འཛི་སྒར་ལྷ་མཆོག་རྡོ་རྗེ་སྐུ་ཕྲེང་རིམ་བྱོན་གྱི་མཛད་རྣམ།
༄༅། །རྗེ་བཙུན་འཇམ་དཔལ་དབྱངས་ཀྱི་རྣམ་རོལ་༧དཔལ་འཛི་སྒར་སྐྱབས་མགོན་མཆོག་སྤྲུལ་རིན་པོ་ཆེ་སྐུ་རབས་དགུའི་མཛད་རྣམ་མདོར་བསྡུས་སུ་བཀོད་པ་བཞུགས།།
བོད་ནང་དུ་ཁམས་སྡེ་དགེ་འཇོ་མདའི་ཡུལ་དུ་ཆགས་པའི་གཞིས་ཀྱི་འཛི་སྒར་དགོན་པ།
རྒྱ་གར་དུ་གནས་མཆོག་མཚོ་པདྨའི་ངོགས་སུ་ཆགས་པའི་བྱེས་ཀྱི་འཛི་སྒར་དགོན་པ།
༈ རྗེ་འཛི་སྒར་བསོད་ནམས་རྒྱ་མཚོ་མཆོག་གི་རྣམ་ཐར་ནི།
ཨོཾ་སྭསྟི། དེ་ཡང་གང་ཞིག་གླེང་བར་བྱ་བ་ནི།
ཟག་མེད་ཡོན་ཏན་ཀུན་གྱི་ཕ་རོལ་ཕྱིན། །
འགྲོ་ལ་ཕན་བདེ་སྟེར་བའི་མགོན་པོ་ནི། །
བསོད་ནམས་རྒྱ་མཚོར་འཁྱིལ་བའི་ནོར་བུ་མཆོག །
ཀུན་གྱིས་སྤྱི་བོར་བརྒྱན་དེར་གསོལ་བ་འདེབས། །
ཞེས་གསུངས་པ་ལྟར། གངས་ཅན་ལྗོངས་འདིར་རྒྱལ་བའི་བསྟན་པ་སྤེལ་བ་ལ་གཞན་དྲིང་མི་འཇོག་པའི་དོན་བརྒྱུད་དཔལ་ལྡན་འབྲུག་པའི་རིང་ལུགས་འཆང་བ། མཁས་དང་གྲུབ་པའི་ཁྱུ་མཆོག་རྗེ་འཛི་སྒར་བསོད་ནམས་རྒྱ་མཚོ་མཆོག་ནི། མདོ་སྟོད་ལྷོ་ཚ་བ་སྒང་དུ། ཡུམ་ཁྲོམ་བཟའ་མེ་ཏོག་མ་ཞེས་པའི་སྲས་སུ་༼༡༦༠༨༽རབ་བྱུང་བཅུ་པའི་ས་སྤྲེལ་ལོར་འཁྲུངས། སྐུ་ན་ཤིན་ཏུ་ཕྲ་བའི་དུས་ཉིད་ཀྱི་དགོན་པ་ས་གཞི་སྐྱ་བོ་ལ། ལུང་པ་ཁ་ཤར་བསྟན་ཞིག་ཡོད་པ་ཡང་ཡང་ཐུགས་ལ་ཤར་བ་སོགས་སྔོན་གནས་དུ་མ་རྗེས་སུ་དྲན། ཁྱད་པར་རྗེ་རྒོད་ཚང་པའི་སྐྱེ་བར་ཞལ་གྱིས་བཞེས། དེ་ནས་ཐུགས་ངེས་འབྱུང་དྲག་པོས་བསྐུལ་ཏེ། དགུང་ལོ་བཅུ་གསུམ་པར། གྲུབ་པའི་དབང་ཕྱུག་ཀརྨ་བསྟན་འཕེལ་ཟླུམ་པོ་ཐང་ཞེས་བྱ་བར་ཅོག་སྒར་རྒྱུ་སྐར་ལྟ་བུའི་དབུས་སུ་མཇལ་བས། མི་ཕྱེད་པའི་དད་པ་ཐོབ། གཞུང་ཤོད་བྱང་ར་ཞེས་པར་ཐོག་མར་ཡོངས་རྫོགས་དགེ་བསྙེན་གྱི་སྡོམ་པ་གནང་སྟེ། མཚན་བསོད་ནམས་རྒྱ་མཚོར་བཏགས། ཞོགས་རྒྱུགས་རེ་ལ་ཤོ་ལོ་ཀ་བརྒྱ་དང་བརྒྱད་ཅུ་ཙམ་ཟིན་པས་ཀུན་གྱིས་ཤེས་རབ་ཅན་དུ་རྩི། རིམ་བཞིན་ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་སོགས་དབང་ཆོས་ཐམས་ཅད་བུམ་པ་གང་བྱོར་གནང་བས། ཉམས་རྟོགས་ཁྱད་པར་ཅན་འཁྲུངས། དགུང་ལོ་བཅུ་དགུ་ཙམ་ལ་ཇི་སྙེད་པའི་ཤེས་བྱའི་གནས་ལ་སྦྱང་ཕྱིར། ལྷོ་སྟོད་ལྕང་ར་དཔལ་འབར་དུ་ཀུན་མཁྱེན་གྱི་དངོས་སློབ་རྗེ་ལོ་ཙཱ་བ་ཆེན་པོ་སངས་རྒྱས་དཔལ་བཟང་གི་ཞལ་སྔར་བྱོན་པ་ན། ལོ་ཙཱ་བ་དེ་ཉིད་ཀྱིས། མདང་རྨི་ལམ་ལྟར་ན། དེ་རིང་ང་ལ་ཀུན་མཁྱེན་གྱི་སློབ་མ་ལས་འཕྲོ་ཅན་ཞིག་འཕྲད་དུ་ངེས་པར་འོང་གསུང་པ་ལྟར་སྤྱན་སྔར་སླེབས། རྗེ་དེའི་དྲུང་དུ་དགུང་ལོ་ཉི་ཤུ་པ་མེ་ཡོས་ལོར། དགེ་ཚུལ་དང་བཅས་པའི་བསྙེན་རྫོགས་ཀྱི་སྡོམ་པ་མནོས། ཤ་ཆང་ལྟ་ཅི་རགས་པའི་ཟས་ཆེར་མི་གསོལ་ཡང་ཟོ་མདོག་ལྷག་པར་བཟང་ཞིང༌། སྐུ་བཙུན་པའི་དཔེར་འོས། དེར་སྒྲ་ཀ་ཙན་ནས་བཟུང་ཐུན་མོང་གི་རིག་གནས་ཀུན་དང༌། ཐུན་མོང་མ་ཡིན་པ་སྡེ་སྣོད་གསུམ་དང་རྒྱུད་སྡེ་བཞིའི་དགོངས་འགྲེལ་དུ་མ། ཁྱད་པར་ཇོ་བོ་ནཱ་རོ་པའི་ཁྱད་ཆོས་བསྲེ་འཕོ་གནད་ཀྱི་མཚམས་སྦྱོར་རྒྱས་པ་འབུམ་ནག་ལུགས་དང༌། སྙན་རྒྱུད་ནོར་བུ་སྐོར་གསུམ་སོགས་ཁྲིད་ཆེན་ཕལ་མོ་ཆེ། དབང་སྒྲུབ་སྐོར་བཅས་གསན་ཅིང༌། དོགས་གཅོད་ཀྱི་སྒོ་ནས་གཏན་ལ་ཕབ། རྒྱུད་རྒྱ་འགྲེལ་སོགས་པུ་ཏི་བཅུ་བདུན་གྱི་རྒྱུགས་ཕུལ། ཀུན་མཁྱེན་པདྨ་དཀར་པོའི་བཞེད་གཞུང་ལས་བྱུང་བའི་དཀྱིལ་ཆོག་ཉི་ཤུ་རྩ་གཅིག་སོགས་ཀྱི་ཕྱག་ལེན་དབྱངས་རོལ་རྣམས་མཐོང་བརྒྱུད་མ་ཉམས་པ་ཞལ་ཤེས་དང་བཅས་པ་བསླབས་ཏེ། མདོ་རྒྱུད་རིག་གནས་ཀུན་ལ་མཁས་པའི་ཕུལ་དུ་ཕྱིན་པར་གྱུར་པས། མགུར་ལས། ཕྱི་ལུང་རིགས་ཀྱི་ཉི་འོད་བཀྲ་བ་འདི། །རྗེ་སངས་རྒྱས་དཔལ་བཟང་བཀའ་དྲིན་ཡིན། །ནང་རིག་པའི་རྩལ་ཁ་རྫོགས་པ་འདི། །མགོན་གྲུབ་པའི་དབང་པོའི་བཀའ་དྲིན་ཡིན། །ཞེས་གསུང༌། ལོ་ཆེན་ཞིང་བརྗེས་ནས་སླར་རྗེ་ཀརྨ་བསྟན་འཕེལ་གྱི་དྲུང་དུ་བྱོན། བཀའ་ལས། ཁྱོད་ཀྱིས་ཐ་སྙད་ཚིག་གི་བསླབ་སྦྱང་ལ་ཡེངས་ནས། དགེ་སྦྱོར་བསྐྱུར་འདུག་ན། འོ་སྐོལ་གཉིས་ཁ་མཆུ་ལ་འགྲིག་ཐབས་མེད་པ་ཡོང༌། གཞན་རྟེན་འབྲེལ་འགྲིགས་བྱུང་གསུངས་པར། རྟོགས་འབུལ་མཛད་པས། འོ་གཞོན་ནུ་ཤ་སྙིང་ཁྲག་རྒྱས་ཀྱི་སྒང་ལ་ཅོལ་ཆུང་མ་བྱས་པར་དགེ་སྦྱོར་ལ་འཕེལ་བསྐྱེད་བྱུང་འདུག་གསུང་ནས་ཤིན་ཏུ་མཉེས། སྐབས་ཤིག་རྗེ་ཉིད་ཀྱི་རྒྱུན་བཞེས་ཀྱི་དབུ་ཞྭ་ན་བཟའ་རྣམས་གསོལ་ནས། ཁོ་བོར་དབང་བའི་ཆོས་ཐམས་ཅད་ཀྱི་བདག་པོ་ཁྱོད་ཡིན་ནོ་གསུངས་ནས་གཟེངས་བསྟོད་མཛད། བྱམས་འདུན་དགོན་གསར་གྱི་གྲྭ་པ་བརྒྱ་དང་ཉེར་ལྔའི་སློབ་དཔོན་དུ་བསྐོས། དེར་ལོ་གསུམ་ཙམ་བཞུགས། དེ་ནས་རིང་མིན་ནས་བེ་རི་རྒྱལ་པོ་བདུད་དབང་དུ་གྱུར་ནས་བསྟན་པར་འཚེ་གནོད་ཆེ་གཤིས། རེ་ཞིག་སྟོད་ཕྱོགས་སུ་བྱོན་གསུངས་པ་ལྟར་ལྷོ་སྟོད་ཕྱོགས་སུ་ཕེབས་ནས། དེར་ལོ་མང་ལ་སྒྲུབ་པ་གཙོར་འདོན་མཛད་ཅིང་བཞུགས། རྨི་ལམ་དུ་བླ་མ་གཤེགས་པ་གཟིགས་པས། ཐུགས་ཡུས་ཀྱིས་བརྒྱལ་བ་ཙམ་བྱུང༌། དེ་ནས་ཀུ་ཕུའི་རི་ཁྲོད་དུ་ཟླ་བ་བརྒྱད་ཙམ་བླ་མ་སྒྲུབ་པ་མཛད་པས། ཉིན་མཚན་མེད་པར་བླ་མའི་སྣང་བ་ལས་མ་གཡོས་ཤིང༌། གཉིད་འཐུག་ཕལ་ཆེར་འོད་གསལ་མ་བུ་འདྲེས་པ་བྱུང༌། སླར་མཆེད་གྲོགས་རྣམས་ཀྱིས་གདན་སའི་སྐྱིད་སྡུག་གཟིགས་པ་ལ་འབྱོན་དགོས་ཚུལ་ཞུས་པ་ལྟར་ཕེབས། དེར་ཞབས་ཏོག་རྒྱ་ཆེར་གནང་ཞིང༌། དགུང་ལོ་སོ་དགུ་པ་རབ་བྱུང་བཅུ་གཅིག་པའི་མེ་ཁྱི་༼༡༦༤༦༽ལོར་ཚོགས་བརྒྱའི་དགོན་བཏབ་ནས་དགེ་འདུན་བསྡུས་པས། གཉུག་མར་གནས་པའི་ཚོགས་གྲྭ་བརྒྱ་དང་བརྒྱད་ཅུ་ཙམ་ཡོད་པར་གྲགས། དེའི་རྟེན་འབྲེལ་གྱིས་འཛི་སྒར་སྐུ་རབས་མང་ཆེ་བར་ཆ་སྙོམས་གྲྭ་བརྒྱད་དང་བརྒྱད་ཅུ་ཞེས་གྲགས་པ་འདི་བྱུང༌། རྗེ་གྲུབ་པའི་དབང་ཕྱུག་གི་མཆོག་སྤྲུལ་ཀུན་དགའ་བསྟན་འཕེལ་གྱི་རྩ་འཛིན་གདན་འདྲེན་དང༌། ཁྲི་འདོན་དབང་ཆོས་གནང་བ་སོགས་མཛད། སྤྲུལ་སྐུ་དབུས་སུ་སྤྱན་དྲངས་སྐབས། ཡོངས་འཛིན་ཀུན་དགའ་ལྷུན་གྲུབ་ཀྱི་སྤྱན་སྔར། འཁོར་ལོ་སྡོམ་པ། དུས་ཀྱི་འཁོར་ལོ། རྡོ་རྗེ་གཏུམ་པོ། དཔལ་ནག་པོ་ཆེན་པོའི་དབང་བསྐུར་སོགས་བཀའ་ལུང་དབང་གསུམ་མང་པོ་གསན། ཙནྡྲ་པ་དང་སྙན་ངག་སོགས་ཀྱི་དོགས་གཅོད་དང༌། ཁྱད་པར་ཐུགས་དམ་གྱི་དྲི་འབུལ་གནང་བའི་ཚེ། དགེ་སྦྱོར་ལ་ཉིན་མོར་བསྒོམ་དང་མི་སྒོམ་མེད་ཀྱང༌། མཚན་མོར་ཅུང་ཟད་གསལ་སྣང་མི་འབྱུང་འདུག་པས། འདིས་བར་དོ་ཆོད་དམ་མི་ཆོད་ཞུས་པས། ཉིན་པར་ཡེངས་སྒོམ་མེད་ནའང་མཚན་མོར་མི་འབྱུང་བ་ནི། མངལ་གྱི་དྲི་མ་དང་ལུས་འདི་ཡོད་པས་ལན། རྣལ་འབྱོར་པའི་ལུས་རྒྱ་འདི་གྲོལ་བ་ན་སངས་རྒྱས་པར་ལུང་བསྟན། སླར་ཁམས་སུ་ཕེབས་ནས་མཚམས་སྒྲུབ་དང་འགྲོ་དོན་སྤེལ་མར་མཛད། ཞལ་གཟིགས་ལུང་བསྟན་སོགས་གྲུབ་པའི་མཚན་མ་བསམ་གྱིས་མི་ཁྱབ་པས་རེ་རེ་ནས་སྨོས་ཀྱིས་མི་ལང་ཡང༌། དཔེར་ན་ཨྱེ་རིང་བསྙེན་པའི་དུས། ཆུ་བོ་ཆེན་པོ་ཨྱེ་རིང་སྔགས་སྒྲ་སྒྲོགས་པ་ཞིག་གི་འགྲམ་དུ་རྗེ་གྲུབ་པའི་དབང་ཕྱུག་ཀརྨ་བསྟན་འཕེལ་དེ་ཉིད་སྐུ་གཟི་མདངས་ཤིན་ཏུ་རྒྱས་པ་ཞིག་བཞུགས་འདུག་པར་གསོལ་བ་བཏབ་པའི་མོད་ལ། ཆུ་དང་བླ་མའི་སྐུ་གཉིས་ཀ་ནམ་མཁའ་གང་བའི་འཇམ་དཔལ་ཚེ་བདག་ནག་པོའི་དཀྱིལ་འཁོར་དུ་གྱུར་པ་ལ་ཁྲག་འཐུང་རོལ་པའི་དགའ་སྟོན་གྱི་ཆོག་འགྲོས་ཇི་ལྟ་བའི་སྒོ་ནས་དབང་བསྐུར་རྒྱས་པ་ནོད་པའི་རྨང་ལམ་བྱུང་བ་དེ་ཕྱིན་ནས། དབྱིངས་རིག་མ་བུ་གཅིག་ཏུ་འདྲེས་ཏེ་ཕལ་ཆེར་སྣང་མེད་འོད་གསལ་འབའ་ཞིག་ལ་འབྱམས་པར་གྱུར་པ་ལྟ་བུའོ། །བསྙེན་སྒྲུབ་ཚད་དུ་བསྐྱལ་བའི་དབང་གིས་མཐུ་ནུས་ཤིན་ཏུ་ཆེ་བས། ཆོས་སྐྱོང་བྲན་དུ་འཁོལ་ཞིང༌། རྒྱལ་འགོང་གདུག་པ་ཅན་བཏུལ་བ་གྲངས་ཀྱི་མི་ཆོད། སྔོན་རྗེས་ཅི་རིགས་སུ་རྒྱ་སྟོན་བསོད་ནམས་རིན་ཆེན། མགར་སྤྲུལ་སྐུ་བསྟན་འཛིན། སྒམ་པོ་བ་བཟང་པོ་རྡོ་རྗེ། སྟག་ལུང་བཀྲ་ཤིས་དཔལ་གྲུབ། ནང་སོ་དཀོན་མཆོག་རྒྱལ་པོ། རིག་འཛིན་འཇའ་ཚོན་སྙིང་པོ་སོགས་མཇལ་ཞིང་ཆོས་འབྲེལ་གསན། བླ་མ་ཐམས་ཅད་ལ་དག་པའི་སྣང་བ་ཐོབ། མདོ་ཁམས་ཀྱི་ཡུལ་ཕྱོགས་དུ་མར་ཞབས་ཀྱིས་བཅགས་ཤིང༌། དབང་ལུང་ཁྲིད་གསུམ་གྱི་ཆོས་འཁོར་རྒྱ་ཆེར་བསྐོར་བས། འགྲོ་བ་དཔག་ཏུ་མེད་པ་སྨིན་གྲོལ་ལ་བཀོད། གར་ཕེབས་སུ་རི་རྒྱ་ཀླུང་རྒྱ་སྡོམ་པ། སྒོ་བཤས་སྤོང་བར་བསྐུལ་བ། ཁྱད་པར་ཁམས་འདིར་བླ་མ་དང་དགེ་འདུན་ཆེད་དུད་འགྲོ་མང་པོ་གསོད་ནས་མཆོད་པའི་སྲོལ་ངན་མུ་སྟེགས་བྱེད་ཀྱི་ལུགས་དང་འདྲེས་པ་རྣམས་ནན་གྱིས་བཀག་པ་སོགས་ཀྱིས་ཡུལ་ཁམས་ཆོས་ལ་བསྒྱུར། རྗེ་འདི་མཁས་དང་གྲུབ་པའི་གོ་འཕང་མཐོན་པོར་ཕེབས་པས། བསྟན་བཅོས་ཀྱང་ཤིན་ཏུ་མང་པོ་མཛད་ནའང༌། ད་ལྟར་བཞུགས་པ་ནི་ལྟ་སྒོམ་སྤྱོད་པ་དང་སྦྱར་བའི་རང་རྣམ་ཚིགས་སུ་བཅད་པ་ཐར་པ་དང་ཐམས་ཅད་མཁྱེན་པའི་འཇུག་ངོགས། གུ་ཕུ་མ་ཎི་བྱམས་པ་རྒྱ་མཚོས་ཞུ་བསྐུལ་མཛད་པའི་ཕྱག་ཆེན་རྣལ་འབྱོར་བཞིའི་ངེས་དོན་ཟིལ་དངར་རྒྱས་བྱེད། ཨ་མཁར་སྤྲུལ་སྐུས་ཞུས་པའི་ཕྱག་ཆེན་སྔོན་དངོས་ཀྱི་ཁྲིད་རིམ་དེ་ཁོ་ན་ཉིད་ཀྱི་ཐེམ་སྐས་བཅས་པོད་གཅིག་ཙམ་ཡོད། དགུང་ལོ་དྲུག་ཅུ་རེ་གཉིས་པ་༼༡༦༦༩༽ས་བྱའི་ལོ་གསར་གྱི་ཚེས་ལྔ་ལ་སྐུ་གཤེགས་པའི་ཚུལ་བསྟན་ཏོ། །སྐུ་གདུང་ལ་ལྷ་སྐུ་རིང་བསྲེལ་འཁྲུངས་པ་སོགས་ངོ་མཚར་མང་པོ་བྱུང༌། སློབ་མ་ཡང༌། རྒྱ་མཚོ་རྣམ་ལྔའམ་མཚོ་ལྔ་པ་ཞེས་བྱ་བ་ནི། ལོ་རུ་ཤེས་རབ་རྒྱ་མཚོ། དབོན་ཀུན་དགའ་རྒྱ་མཚོ། དགོན་པའི་ངག་དབང་རྒྱ་མཚོ། མ་ཎི་བ་བྱམས་པ་རྒྱ་མཚོ། སེ་ཚའི་སངས་རྒྱས་རྒྱ་མཚོའོ། །ཡང་རྣམ་ཐར་དུ་ལོ་རུ་ཤེས་རབ་རྒྱ་མཚོ་དང་བླ་མ་ཆོས་ལུ་ཟུང་ལ། ལོ་ཆོས་རྣམ་གཉིས་ཞེས་སློབ་མའི་གཙོ་བོར་གསུངས། གཞན་ཡང་ཁམས་སྤྲུལ་རིན་པོ་ཆེ་ཀུན་དགའ་བསྟན་འཕེལ། བླ་མ་ཀརྨ་རྒྱ་མཚོ། བློ་གྲོས་བཟང་པོའི་སྤྲུལ་སྐུ་མེ་འབར་རྡོ་རྗེ། ཨ་མཁར་སྤྲུལ་སྐུ་མི་ཕམ་ཀརྨ་ཕྲིན་ལས། འཁྲུལ་ཞིག་ཕྲིན་ལས་རྒྱ་མཚོའི་དབོན་ཕྲིན་ལས་རིན་ཆེན། བླ་མ་ཀརྨ་ཤེས་རབ། སྟོང་ནག་དབོན་པོ་སོགས་ཁམས་འབྲུག་ཕལ་ཆེར་འདིའི་སློབ་གྲྭ་ཤས་ཆེ་བར་གསུངས། ཡོན་དགེ་རིག་འཛིན་མི་འགྱུར་རྡོ་རྗེས་ཀྱང་རྗེ་འདི་ལས་ཆོས་གསན་པར་སྣང་ངོ༌།། །།
༈ རྗེ་འཛི་སྒར་སྐུ་ཕྲེང་གཉིས་པ་དགེ་ལེགས་མཆོག་གྲུབ་བསྟན་འཛིན་གྱི་རྣམ་ཐར་ནི།
༄༅། །རྣམ་མང་ཚོགས་ཀྱིས་བསྐྲུན་པའི་བྱང་ཆུབ་དབྱིག །
དགེ་ལེགས་མཆོག་སྦྱིན་མཛད་ལ་མཐུ་གྲུབ་པས། །
བསྟན་འཛིན་ཀུན་ལས་ལྷག་པ་འཕགས་པ་ཅན། །
མ་ལུས་སྐྱབས་སུ་གྱུར་ལ་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་སྐུ་ཕྲེང་གཉིས་པ་དགེ་ལེགས་མཆོག་གྲུབ་བསྟན་འཛིན་གྱི་རྣམ་ཐར་ནི། མདོ་ཁམས་འབྲོག་སྡེ་སྒ་ཡུ་ཤུལ་ཞེས་པར། གདུང་ལྷ་རྗེ་ཞོ་མགར་ཞེས་བླ་མ་དང་ལྷ་རྗེའི་རྒྱུད་བར་མ་ཆད་པར་བྱུང་བའི་ཡབ་ལྷ་རྗེ་ཨ་སྐྱ་དང༌། ཡུམ་ཀླུ་སྐྱིད་གཉིས་ཀྱི་སྲས་སུ་རབ་བྱུང་བཅུ་གཅིག་པའི་ཆུ་བྱི་༼༡༦༧༢༽ལོར་ནང་སོ་དཀོོན་རྒྱལ་སྤྲུལ་སྐུའི་གཅུང་དུ་འཁྲུངས། རྒྱལ་དབང་འབྲུག་པ་མི་ཕམ་དབང་པོའི་ཞལ་སྔ་ནས། ཡབ་ཀྱི་མིང་ལ་ཨ་ཞེས་པ་དང༌། ཡུམ་གྱི་མིང་ཀླུ་ཞེས་བྱ་བ་གཉིས་ཀྱི་སྲས་སུ་འཁྲུངས་ཡོང་ཞེས་ཇི་ལྟར་ལུང་བསྟན་པ་བཞིན་དུ་རྗེ་གོང་མའི་བུ་ཆེན་བླ་མ་ལོ་རུ་ཤེས་རབ་རྒྱ་མཚོ་ནས་ངོས་འཛིན་མཛད། རྒྱལ་དབང་འབྲུག་པ་ནས་ཆེ་འདོན་གཡེལ་གྲགས་སྔ་ན་མི་དགའ་གསུངས་པ་བཞིན་དགུང་ལོ་བདུན་ཐོག་སྒ་ལོ་རུའི་དགོན་དུ་སྤྱན་དྲངས་ཏེ། རེ་ཞིག་དཀྱུས་མའི་ཚུལ་དུ་བཞུགས་ནས་སྐུ་ཡོན་གསན་སྦྱོང་གནང༌། དེ་ནས་བཅུ་གསུམ་བཞེས་ཚེ་བླ་མ་ལོ་རུའི་བཞུགས་གནས་ནམ་མཁའི་སྒང་ཞེས་པ་དེར་ཐོག་མའི་ཆེ་འདོན་མངའ་གསོལ་མཛད། གོང་མའི་སློབ་མ་དབོན་ཀུན་དགའ་རྒྱ་མཚོས་སྤྲུལ་སྐུའི་རྩ་འཛིན་བདག་གཉེར་དེ་ཙམ་མ་མཛད་པར་བརྟེན། བླ་མ་ལོ་ཆོས་ཟུང་རེ་ཐག་ཆོད་དེ། བླ་མ་ཆོས་ལུའི་རང་གནས་འཇོ་ཕག་གྲུའི་ཕུག་གི་གཙུག་ལག་ཁང་དུ་སྤྱན་དྲངས་ཏེ། སེངྒེའི་ཁྲི་ལ་མངའ་གསོལ་ཞིང༌། རང་གི་འདོག་པ་ཐམས་ཅད་ཀུན་ཏུ་བཟང་པོའི་མཆོད་སྤྲིན་དུ་སྤྲུལ་ནས་ཕུལ། དགུང་ལོ་བཅུ་དྲུག་ལ་བླ་མ་ལོ་ཆོས་གཉིས་ཀྱིས་སྒར་ཆས་ཞབས་ཕྱི་འབུལ་རྫས་སོགས་ཀྱི་ཆ་རྐྱེན་སྦྱར་ནས་དབུས་སུ་བྱོན། གོང་ས་རྒྱལ་བ་ལྔ་པ་ཆེན་པོས་མངའ་དབང་བསྒྱུར་བའི་བོད་དབུས་གཞུང་ནས་བླ་ཆེན་གྱི་གོ་གནས་དང་འཇའ་ས་བསྩལ། སྒམ་པོ་ཞབས་དྲུང་བཟང་པོ་རྡོ་རྗེ་ལ་ཡང་ཟབ་དཀོན་མཆོག་སྤྱི་འདུས་ཀྱི་དབང་གསན། བདེ་ཆོས་བླ་མ་ཡབ་སྲས་སོགས་མཇལ་ཞིང་རིམ་པས་བྱར་དུ་ཕེབས། དེར་རྒྱལ་དབང་ཐམས་ཅད་མཁྱེན་ཞབས་མི་ཕམ་དབང་པོའི་ཞལ་མཇལ་ནས། དངོས་འབུལ་རྒྱ་ཆེར་མཛད། གཙུག་ཕུད་ཕུལ་ནས་རབ་ཏུ་བྱུང༌། མཚན་སྔར་ནས་དགེ་ལེགས་མཆོག་གྲུབ་བསྟན་འཛིན་ཞེས་གནང་བར། སླར་ཡང་རྒྱལ་དབང་བསྟན་འཛིན་ཕྲིན་ལས་སུ་གསོལ། རྗེས་གནང་ཉེར་གཉིས་དང༌། དྲག་པོ་ཀཱི་ལ་ཡ་སོགས་ནས་བརྩམས་དབང་ཆོས་རིམ་པར་གསན་ཏེ་ལོ་ཤས་བཞུགས། སླར་ཁམས་སུ་བྱོན། བླ་མ་ཆོས་ལུ་དང་དབོན་ཀུན་དགའ་རྒྱ་མཚོ་གཉིས་ལ་གོང་མ་ནས་བརྒྱུད་པའི་དབང་ཆོས་ཕལ་ཆེར་གསན། འཇོ་ཕུ་དང་བྲག་ལོག་རྣམས་སུ་ཡང་ཤས་རེ་བཞུགས་ཤིང༌། སྐམ་ལུང་དུ་ལོ་མཚམས་དང༌། སྣ་རྡོག་མགོར་ཡང་སྐུ་མཚམས་ཟླ་ཤས་མཛདདེ། སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ། གྲྭ་འཁོར་གསར་རིགས་རྣམས་ཀྱང་རིམ་པས་འདུས། སྒ་སྟོད་དུ་འབུལ་བསྡུད་གནང་བས་ཇ་གསེར་སོགས་གཏོས་ཆེ་བ་བྱུང་བ་རྣམས་བསྣམས་ཏེ། སླར་དབུས་སུ་བྱོན། རྒྱལ་དབང་འབྲུག་པ་ཐམས་ཅད་མཁྱེན་གཟིགས་ཀྱི་སྤྱན་སྔར། བསྙེན་པར་རྫོགས་ཤིང༌། དབང་རྗེས་གནང་གི་རིམ་པ་དུ་མ་དང༌། ཁྱད་པར་དཔལ་ལྡན་ལྷ་མོའི་དབང་བཞི་ཆིག་བརྒྱུད་མ་གནང་ནས་སླར་སྐུ་སྐྱེ་ཕྱི་མ་གསུམ་བཞིས་དུས་ཡར་འབུལ་དགོས་གསུངས། གཞན་ཡང་ཆོས་འབྱུང་བསྟན་པའི་པདྨོ་རྒྱས་པའི་ཉིན་བྱེད་ལ་ལྗགས་བཤད་ཞིབ་བཀྲོལ་གྱིས་མཚོན་ཀུན་མཁྱེན་བཀའ་འབུམ་ཡོངས་རྫོགས་ཀྱི་ལུང་ཁྲིད་དང༌། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་ཉམས་ཁྲིད་དུ་གནང་བས། ཐུགས་རྒྱུད་བདེན་འཛིན་གྱི་འཆིང་བ་ལས་རྣམ་པར་གྲོལ་ཏེ། ཆོས་བརྒྱད་མགོ་བོ་སྙོམས་པའི་རྟོགས་པ་བརྙེས། ཙ་རིའི་ཞབས་སྐོར་ལ་ཕེབས་དུས་སུ་ལྟས་ངོ་མཚར་ཅན་དུ་མ་དང་དག་པའི་གཟིགས་སྣང་དཔག་མེད་ཤར། ཁྱད་པར་གསར་མ་ཡང་མཛོད་དུ་འབྱོན་དུས་རྒྱལ་དབང་མཆོག་གིས་དཔོན་སློབ་གཉིས་བྱང་ཆུབ་མ་ཐོབ་བར་དུ་འབྲལ་བ་མེད་པར་ཞལ་གྱིས་བཞེས། སྐུ་ཞབས་སུ་ལོ་ངོ་གསུམ་ཙམ་བཞུགས་ནས། ཁམས་སུ་འབྱོན་ཁར་གདན་མཐོ་བ་ཞིག་ལ་བཞུགས་སུ་བཅུག་ཅིང༌། ཐམས་ཅད་མཁྱེན་པ་ཉིད་ཞལ་ཡར་ཕྱོགས་ནས་བཞུགས་པ་སོགས་མངའ་གསོལ་ཚད་ལས་བརྒལ་བར་མཛད། རྒྱལ་དབང་མཆོག་ལ་ཞལ་སློབ་མང་ཡང་རྟོགས་པ་དོན་གྱི་བཀའ་བབ་ཅིང་ཐུགས་ཀྱི་ཐིག་ལེ་ལྟ་བུ་ནི་འདི་ཉིད་ཡིན་ཏེ། ཐུགས་ཀར་ཕྱག་མཛུབ་ཀྱིས་ནན་ནན་དང་སྦྲགས་ཁམས་པ་བསོད་ནམས་སྤྲུལ་སྐུ་ནི་ང་རང་གི་ཁོག་པའི་སྙིང་འདི་འདྲ་འདྲ་ཡིན། འདི་ལ་ངེས་དོན་གྱི་ཉམས་ལེན་བཟང་པོ་ཡོད་ཅེས་ཡང་ཡང་བཀའ་བསྩལ་པ་དང༌། དཔལ་ལྡན་ལྷ་མོའི་གསང་སྒྲུབ་ཀྱི་དབང་བཞི་ཆིག་བརྒྱུད་མ་ཡང་རྗེ་འདི་ལ་གནང་བའི་ཕྱིར་རོ། །དེ་ནས་ཁམས་སུ་ཕེབས་ཤིང༌། བླ་མ་ལོ་ཆོས་ཟུང་གཤེགས་པའི་ཞུགས་འབུལ་དང་གཟིམས་མལ་སྐུ་འདྲའི་རབ་གནས་སོགས་དགོངས་རྫོགས་རྣམས་ལེགས་པར་བསྒྲུབས། རྗེ་ཁམས་སྤྲུལ་ཀུན་དགའ་བསྟན་འཛིན་ལས། བཀའ་འགྱུར་གྱི་ལུང༌། དབང་རྡོ་རྗེ་འཕྲེང་བ་གསན་ཅིང༌། ཡབ་སྲས་འདི་གཉིས་མཇལ་འཕྲད་ཆེས་མང་ཞིང༌། ཐུགས་ཡིད་གཉིས་སུ་མེད་པར་གྲགས། གཞན་ཡང་སྟག་ལུང་མ་རིན་པོ་ཆེ། འབྲི་གུང་ཞབས་དྲུང༌། ཀརྨ་པ་ཞྭ་དམར་ནག །རྡོར་བྲག་ཞབས་དྲུང༌། སྒམ་པོ་ཞབས་དྲུང༌། གཏེར་སྟོན་འཛམ་གླིང་རྡོ་རྗེ། སྤྲུལ་སྐུ་རྣམ་གསུམ་སོགས་གངས་ཅན་གྱི་སྐྱེས་ཆེན་དུ་མའང་འབུལ་ཞབས་ཀྱིས་མཉེས་པར་མཛད་ནས། དབང་ཆོས་འབྲེལ་བ་མང་དུ་གསན། དགུང་ལོ་སོ་གཅིག་ལ་ལྡེམ་ཆེན་གྱི་ཡར་ཞོལ་དུ་ཆོས་ཁྲི་བརྩིགས་ནས། སྐྱ་སེར་གྱི་འདུས་པ་མང་པོ་ལ་ཕྱག་ཆེན་གྱི་ཁྲིད་རྒྱས་པ་དང༌། རྒྱབ་ཆོས་སུ་པད་དཀར་ཆོས་འབྱུང་དང་གོང་མའི་བཀའ་འབུམ་གྱི་ལུང༌། མི་འཁྲུགས་པའི་དབང་སོགས་བཀའ་ཆོས་རྒྱ་ཆེར་གནང༌། གཞན་ཡང་སྟོད་སྨད་ཀྱི་ཡུལ་རིས་དུ་མར་ཕེབས་ནས་སྐུ་མཚམས་དང་བསྟན་འགྲོའི་དོན་སྤེལ་མར་མཛད། རབ་བྱུང་བཅུ་གཉིས་པའི་ཆུ་འབྲུག་༼༡༧༡༢༽ལོར་འཛི་ཡུལ་ལྡེམ་པོ་ཆེའི་ཞོལ་དུ་གཙུག་ལག་ཁང་གི་རྨང་བཏིང་ཞིང༌། རྒྱལ་དབང་མི་ཕམ་དབང་པོ་ནས། སྤྱན་དམིགས་གཏད་པའི་འཐོར་ནས་བསྩལ་བ་དང་ཆབས་ཅིག །སྒྲུབ་བརྒྱུད་ཕོ་བྲང་ཞེས་མཚན་གསོལ། གཙུག་ལག་ཁང་ལེགས་པར་གྲུབ་པའི་རབ་གནས་ལ་རྗེ་ཀུན་དགའ་བསྟན་འཛིན་སྤྱན་དྲངས་ཤིང༌། རྗེ་དེ་ཉིད་ནས་རྗེ་མི་ལའི་སྐུ་བརྙན་ཀརྨ་པ་ཞྭ་དམར་མཁའ་སྤྱོད་དབང་པོས་ཀ་རུའི་རྡོ་ལ་ཕྱག་བཟོ་གནང་བ་དང༌། ཀ་པཱ་ལ་དུམ་བུ་གཅིག་པ་གསེར་མདོག་མ་ཁྱད་ཅན་སོགས་གནང་སྐྱེས་བཟང་པོ་དང་བཅས་བརྟན་བཞུགས་བསྩལ། ཕར་ཡང་དངོས་ནོར་གྱི་བརྒྱ་འབུལ་གྱ་ནོམ་པ་མཛད། དེ་ནས་རྗེ་འབྲུག་པའི་གདན་ས་བྱམས་ཆེན་ཆོས་གླིང་ནས་གྲྭ་པ་རྣམས་ཀྱིས་དབྱངས་རོལ། དུང་རྒྱ་གླིང༌། གཏོར་བཟོ་སོགས་རིན་ཆེན་ཕྲེང་བའི་ཆོ་ག་ཕྱག་ལེན་ཐམས་ཅད་དཔྱིས་ཕྱིན་བསླབས་ཏེ། དགོན་པར་སྒྲུབ་མཆོད་དུ་མ་གསར་དུ་ཚུགས། རྗེ་བསོད་ནམས་རྒྱ་མཚོ་ནས་བརྒྱུད་པའི་སྔོན་ཚོགས་བརྒྱའི་སྐབས་ཀྱི་ཕྱག་ལེན་ཡོད་རིགས་ལ་ཁམས་ལུགས་དང༌། ཕྱིས་སུ་བོད་དབུས་ནས་སྦྱངས་པའི་ཕྱག་སྲོལ་འདི་རིགས་ལ་བོད་ལུགས་ཞེས་གྲགས། དེ་ནས་བཟུང་དབུས་ཀྱི་གདན་ས་དང་དགོན་མ་བུའི་འབྲེལ་བ་བྱུང༌། དགོན་མ་བུའི་འབྲེལ་བ་ནི། བླ་སློབ་ཀྱི་འབྲེལ་བ་ལྟར་གང་ཟག་སྒེར་རྐྱང་པས་མ་ཡིན་པར། ཚོགས་པའི་འབྲེལ་བ་ཡིན་པས། བུ་དགོན་གྱི་བྱེད་སྒོ་རྣམས་མ་དགོན་གྱི་སྲོལ་ལྟར་བྱེད་དགོས་པ་ཞིག་ལ་བཤད། དུས་དེ་ཙ་ན་དབུས་ནས་སྒར་བདེ་གཉིས་སྡེ་གཟར་ཕྲན་བུ་བྱུང་བའི་སྐབས་ཡིན་པས། རྗེ་འདི་ཉིད་རྒྱལ་དབང་འབྲུག་པ་དང་འབྲེལ་འདྲིས་ཆེ་བའི་དབང་གིས་དགོན་པ་གསར་དུ་ཕྱག་བཏབ་རྗེས་འབྲུག་པའི་གདན་ས་གཙོ་བོ་གསང་གླིང་གི་ཁོངས་སུ་གཏོགས་པའི་ཐུན་མོང་མ་ཡིན་པའི་དགོན་ལག་ཞིག་ཏུ་གྱུར། སྐུ་དུས་འདིར་རང་དགོན་དུ་བཀའ་འགྱུར་གསར་བཞེངས་དང༌། དཔལ་ལྡན་འབྲུག་པའི་འཁྲུངས་རབས་བདུན་ཐང༌། གནས་བཅུ་གྲ་ཐང་ཉེར་གསུམ། མགོན་མང་སྐོར་གྱི་ཞལ་ཐང༌། བྱར་ཡུལ་སྔགས་གྲྭའི་ནང་རྟེན་སྔོན་སྤྲུལ་སྐུ་མཚོ་སྐྱེས་རྡོ་རྗེས་བཞེངས་པའི་དཀར་བརྒྱུད་གསེར་འཕྲེང་ཁྱད་འཕགས་ཅན་དེ་ལ་མ་ཕྱི་གནང་ནས་ལྷ་རིགས་འགའ་ཞིག་ཁ་བསྐངས་བཅས་པ་སོགས་རྟེན་དང་བརྟེན་པ་གསར་དུ་བཞེངས། རྗེ་འདི་དཀོན་མཆོག་ལ་བཀུར་སྟི་ཤིན་ཏུ་ཆེ་བས། གཞན་གྱིས་འབག་རྩོག་སོགས་ཕྲན་བུ་བྱེད་པ་གཟིགས་ནའང་ཧ་ལས་པ་ལྟར་གནང་ཞིང་ནན་གྱིས་འགོག་ཅིང༌། བླ་མ་སུ་འདྲ་དང་མཇལ་ཡང་གོང་དུ་བཀུར་བ་གནང༌། ཐམས་ཅད་མཁྱེན་པའི་གྲྭ་རིགས་སུ་གཏོགས་ཚད་ལ་ཕྱག་ལེན་མཛད་ཅིང༌། སེར་གོས་གོན་ཙམ་གྱི་བྱ་བྲལ་བ་ཡན་ཆད་ལ་དབུ་དུད་པ་དང་ཞེ་ས་གནང་བ་སོགས་དཔལ་ལྡན་འབྲུག་པའི་ཆེ་བ་རྣམ་གསུམ་ཐུགས་དམ་གྱི་མཐིལ་དུ་མཛད་པར་གྲགས། ལྐོག་གྱུར་མཁྱེན་པ་དང༌། ནད་པ་ཤི་བ་ལྟར་གྱུར་ཚེ་སྐྲ་ནས་འཐེན་པས་སོས་པ་བྱུང་བ་སོགས་གྲུབ་པའི་རྟགས་ཀྱང་མང་པོ་མངའ། དབུས་ཀྱི་གདན་སར་འབུལ་བསྙེན་ཐེངས་མང་དང༌། ལོ་རུ་དགོན་ལ་མདོ་མང་སྐོར་གནང་བ་དང༌། རང་གི་གཅེན་ནང་སོ་དཀོན་མཆོག་ཕྲིན་ལས་བཟང་པོ་ལ་འདུལ་བ་བཅས་ཀྱི་གསུང་རབ་མང་པོའི་གནང་སྐྱེས་བསྩལ་ཅིང༌། དེའི་ཡང་སྲིད་རྩ་འཛིན་དང་གདན་ས་རོང་རེ་ཁེ་རྡོ་རྗེ་རྫོང་དུ་ཁྲི་འདོན་གནང་བ་སོགས་ཀྱི་གཟིགས་བསྐྱངས་མཛད། དེ་ནས་དགུང་ལོ་ཞེ་བརྒྱད་པ་ས་ཕག་༼༡༧༡༩༽ལོའི་ནག་ཟླའི་གནམ་གང་འཕར་བའི་ཚེས་ཕྱི་མའི་དགུང་མོར་ཞི་བའི་དབྱིངས་སུ་གཤེགས་སོ། །སློབ་མ་ནི། དབོན་མཁས་གྲུབ་དགེ་ལེགས་རིན་ཆེན་དང༌། རྟོགས་ལྡན་དཔལ་ལྡན་དབང་ཕྱུག་སོགས་མང་པོ་བྱུང་ངོ༌། །
༈ རྗེ་འཛི་སྒར་སྐུ་ཕྲེང་གསུམ་པ་མི་ཕམ་ཕྲིན་ལས་དཔལ་འབྱོར་གྱི་རྣམ་ཐར་ནི།
༄༅། །མི་ཤིགས་ཏིང་འཛིན་བྱེ་བར་དབང་བའི་མཐུས། །
བདུད་ཀུན་ཕམ་མཛད་ཕྲིན་ལས་དཔལ་འབྱོར་བ། །
ཁམས་གསུམ་སྐྱེ་འགྲོས་བཏུད་པའི་མགོན་པོ་ནི། །
ཡོངས་ཀྱི་བླ་ན་འཕགས་ལ་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་སྐུ་ཕྲེང་གསུམ་པ་མི་ཕམ་ཕྲིན་ལས་དཔལ་འབྱོར་གྱི་རྣམ་ཐར་ནི། ལྷ་ཐོག་དཔོན་པདྨ་དབང་གི་སྲས་སུ་རབ་བྱུང་བཅུ་གཉིས་པའི་ལྕགས་བྱི་༼༡༧༢༠༽ལོར་འཁྲུངས། དགུང་ལོ་བཞིར་ཕེབས་སྐབས། རྒྱལ་དབང་བདུན་པ་དཀར་བརྒྱུད་ཕྲིན་ལས་ཤིང་རྟས་གོང་མའི་ཡང་སྲིད་དུ་ངོས་འཛིན་གསལ་པོར་མཛད། དགུང་ལོ་བདུན་པ་ལ་གདན་སར་སྤྱན་དྲངས་ཤིང་མངའ་གསོལ། རིམ་གྱིས་དབུས་སུ་ཕེབས་ནས་རྒྱལ་དབང་འབྲུག་པ་བདུན་པའི་ཞབས་དྲུང་དུ་དབང་ཆོས་ཀྱི་རིམ་པ་མང་པོ་གསན། ཙ་རི་ཅིག་ཅར་དུ་སྐུ་མཚམས་ལ་བཞུགས་དུས། གཏོར་སྒམ་གྱི་ཐོག་ཏུ་དཔལ་ལྡན་ལྷ་མོ་སྐུ་རྒྱན་རྣམས་ཀྱི་ཁྲོབ་སྒྲ་དང་བཅས་མངོན་སུམ་དུ་བཞུགས་པའི་གཟིགས་སྣང་བྱུང༌། མཚན་ལམ་དུའང་དག་པའི་ཞིང་གཟིགས་པ་བྱུང་ཚུལ་གསུངས་པ་རྣམས་ནི་བརྗོད་ཀྱིས་མི་ལང༌། གཞན་གྱིས་མཐོང་བ་ཡང་སེར་བ་བྱུང་བའི་ཚེ། སྐུ་སྲུང་གི་ཕུར་པ་གདེང་བར་མཛད་པ་ལས་ཧྲེམ་སྒྲ་དང་བཅས་ཏེ་མེ་འབར་བར་མཐོང་བ་སོགས་ངོ་མཚར་ཅན་ཞིག་ནའང༌། གདུལ་བྱ་བསོད་ནམས་དམན་པའི་སྣང་ངོར། སྐུ་གཅོང་དམ་པོས་ཟིན་པ་རིམ་ཐུ་ནས། སྒ་ཉག་ཏུ་ཕེབས་རྩིས་ཀྱིས་ཆིབས་ཁ་བསྒྱུར་བའི་ལམ་དུ་དགུང་ལོ་ཉེར་གཅིག་པ་ལྕགས་སྤྲེལ་༼༡༧༤༠༽ལོའི་བོད་ཟླ་བཞི་པའི་ཉི་ཤུ་ལ་སྐུ་གཤེགས་སོ། །གདུང་བཞུ་བའི་ཚེ་འཇའ་སྤྲིན་དར་ཁྲ་བརྐྱངས་པ་ལྟར་རི་རྩེ་ཕན་ཚུན་སྦྲེལ་ཉེ་ཤར་བ་སོགས་ངོ་མཚར་བ་བྱུང་ངོ༌། །
༈ རྗེ་འཛི་སྒར་བཞི་པ་རིག་འཛིན་རྡོ་རྗེ་དྲག་པོ་ཀརྨ་ཕྲིན་ལས་རྣམ་རྒྱལ་གྱི་རྣམ་ཐར་ནི།
༄༅། །གྲུབ་པ་ཡོངས་ཀྱི་གཙུག་ཏོར་རྒྱན་འོས་པའི། །
ཆེ་མཆོག་རིག་འཛིན་པདྨའི་ཐུགས་རྗེའི་གཟུགས། །
སྲིད་ཞིའི་སྤྱི་དཔལ་ནུས་ལྡན་དྲག་པོ་རྩལ། །
འཁོར་ལོའི་མགོན་པོ་བླ་མར་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་བཞི་པ་རིག་འཛིན་རྡོ་རྗེ་དྲག་པོ་ཀརྨ་ཕྲིན་ལས་རྣམ་རྒྱལ་གྱི་རྣམ་ཐར་ནི། སྒ་བེ་རི་དཔོན་ཇོ་བོ་འབུམ་བྱ་བའི་སྲས་སུ༼༡༧༤༠༽རབ་བྱུང་བཅུ་གཉིས་པའི་ལྕགས་སྤྲེལ་ལོར་དགེ་མཚན་དུ་མ་དང་བཅས་ཏེ་སྐུ་འཁྲུངས། སྨྲ་མཁྱེན་ཙམ་ནས་ང་འབྲུག་པ་བསོད་ནམས་རྒྱ་མཚོ་ཡིན་སོགས་སྔོན་གནས་རྗེས་དྲན་དང༌། མངོན་ཤེས་དུ་མ་གསུང༌། རྒྱལ་དབང་འབྲུག་པ་ཕྲིན་ལས་ཤིང་རྟ་དང༌། ཀཿཐོག་རིག་འཛིན་ཆེན་པོ་དགོངས་མཐུན་གྱིས་གོང་མའི་སྐུ་སྐྱེ་འཁྲུལ་མེད་དུ་ལུང་བསྟན། མཚན་མི་ཕམ་ཕྲིན་ལས་རྒྱ་མཚོར་གསོལ། དགུང་ལོ་བརྒྱད་པ་ལ་གདན་སའི་ཁྲིར་མངའ་གསོལ་ཞུས། དགུང་ལོ་བཅུ་གསུམ་ལ་དབུས་སུ་ཕེབས་ནས་འབྲུག་པ་ཐམས་ཅད་མཁྱེན་པའི་ཞལ་སྔ་ནས་སྨིན་གྲོལ་གྱི་རིམ་པ་གསན་བཞེས་དང༌། ཁྲོ་ཕུ་མཁན་ཆེན་ཤེས་རབ་རྒྱ་མཚོའི་མདུན་ནས་ཐུན་མོང་དང་ཐུན་མོང་མ་ཡིན་པའི་རིག་གནས་ལ་སྦྱངས་པ་མཛད། དགུང་ལོ་བཅོ་ལྔ་ལ་དཔལ་ཙ་རི་ཏྲར་ཕེབས་པས། ཕེབས་ལམ་ཀུན་ཏུ་འཇའ་འོད་ཀྱིས་མདུན་བསུས་ཤིང་ཡ་མཚན་པའི་ལྟས་ཁོ་ན་བྱུང༌། དེར་སྐུ་མཚམས་མཛད་པའི་མནལ་ལམ་དུ་ཅིག་ཆར་དམར་པོ་ཡིན་ཟེར་བའི་ཁྱེའུ་ཤིན་ཏུ་མཛེས་པ་ཞིག་གིས། རང་བྱུང་འཕགས་པའི་སྐུ་དེ་ཕུལ་ནས། ཁྱེད་རང་སྔོན་བོད་རྒྱལ་པོའི་དུས་རྟེན་འདི་འབྲལ་སྤང་ཡིན། ཨོ་རྒྱན་པདྨའི་ཕ་ནོར་བུ་ལ་འཕྲོད་པ་ཡིན། ལོ་གསུམ་ལ་གསང་རྒྱ་གྱིས། དེ་ནས་ཀུན་ལ་ངོམ། ལུས་དང་གྲིབ་མ་བཞིན་མི་འབྲལ་བར་མཛོད་ཟེར། མནལ་སད་པ་དང་སྔོན་གནས་ཐུགས་ལ་ལྷང་གིས་ཤར་བར་བྱུང༌། དེ་འཕྲལ་འཕགས་པ་སེང་གེ་སྒྲའི་སྐུ་རྟེན་དེ་རྐྱེན་གང་ཡང་མེད་པར་གཉེར་མགོན་པོ་བྱ་བས་ཕུལ། ཟབ་མོའི་གཏེར་ཁ་བཞེས་པའི་ཐོག་མར་འཕགས་མཆོག་སེང་གེ་སྒྲའི་ཆར་ཆོག་ཐུགས་ལ་ཤར་ཅིང༌། ལོ་དེར་ཡུལ་ཕྱོགས་ཀུན་ཆར་པ་ལ་མཐུ་རྡུགས་པའི་དུས་ཡིན་ཀྱང༌། ཆར་ཆོག་དེ་རྗེ་ཉིད་ཀྱིས་ཅུང་ཟད་རེ་གནང་བས་ཆར་གྱི་རྒྱུན་བཟང་པོ་བབས་པ་བྱུང༌། དེར་ལོ་ཤས་བཞུགས་ནས། སླར་ཁམས་སུ་ཕེབས། དགུང་ལོ་ཉེར་གསུམ་ལ་བླ་མ་དམ་པ་ཧྱ་གྲྀ་ཝ་ནཱ་ཐ་ལ་དབང་ཞུས་ན་སྙམ་སྐབས་སུ། གཟིམས་ལམ་ན་ཨོ་རྒྱན་ཆེན་པོ་དངོས་ལ་དངུལ་གྱི་མཎྜལ་ལ་འབྲས་དཀར་གྱི་ཚོམ་བུ་བཀོད་ནས། ཕུར་པའི་དབང་ཞུས་པ་སོགས་ཤིན་ཏུ་ལྟས་བཟང་པོ་བྱུང་བས་བསྐུལ་ཏེ། དཔལ་སྤུངས་སུ་བྱོན། གཏེར་ཆེན་རོལ་བའི་རྡོ་རྗེའི་རྣམ་འཕྲུལ་རྗེ་རིག་འཛིན་རྟ་མགྲིན་མགོན་པོའི་ཞལ་ཐོག་མར་མཇལ། རཏྣ་གླིང་པའི་གཏེར་བྱོན་ཕུར་པ་ཡང་གསང་བླ་མེད་ཀྱི་དབང་ལུང་གསན། རྗེ་དེ་ཉིད་ལའང་ལུང་བསྟན་བྱུང་བ་དང་རྗེས་སུ་མཐུན་པར། གུ་རུ་དྲག་པོ་དང༌། དཔལ་རྡོ་རྗེ་གཞོན་ནུ་གཉིས་ལྷ་སྐལ་དུ་ཕོག །གསང་བའི་མཚན་རྡོ་རྗེ་དྲག་པོ་ཕྲིན་ལས་འདུས་པ་ལས་རབ་བདེ་བ་རྩལ་ཞེས་གསོལ། རིམ་བཞིན་རོལ་པའི་རྡོ་རྗེའི་གཏེར་བྱོན་ཡོངས་སུ་རྫོགས་པ་བཅས་སྨིན་གྲོལ་དཔག་ཏུ་མེད་པ་ཞུས། སི་ཏུ་པཎ་ཆེན་ཆོས་ཀྱི་འབྱུང་གནས་སྤྱན་སྔར་དགེ་ཚུལ་དང་དགེ་སློང་དུ་བསྒྲུབས། མཚན་ཀརྨ་བཀའ་བརྒྱུད་ཕྲིན་ལས་རྣམ་རྒྱལ་རྒྱས་པའི་སྡེ་ཞེས་གསོལ། མདོ་རྒྱུད་རིག་གནས་དང་བཅས་པའི་བཀའ་དྲིན་བསྐྱངས། གཞན་ཡང་ཡོངས་འཛིན་འཇམ་དཔལ་དཔའ་བོ། ཁམས་སྤྲུལ་བསྟན་འཛིན་ཆོས་ཀྱི་ཉི་མ། གྲུ་གུ་ཆོས་རྒྱལ་རྒྱ་མཚོ། དཔའ་བོ་གཙུག་ལག་དགའ་བ་སོགས་ལ་ཚུལ་བཞིན་བསྙེན་པས། མཁས་བཙུན་གྲུབ་པའི་ཕུལ་དུ་ཕྱིན་པར་གྱུར། ཁྱད་པར་སློབ་དཔོན་སངས་རྒྱས་གཉིས་པ་མ་ཧཱ་གུ་རུ་པདྨ་ཀཱ་རས་རྗེས་སུ་བཟུང་ནས་མཁྱེན་བརྩེ་ནུས་གསུམ་ལ་དབང་ཐོབ་ཅིང༌། གཏེར་ཆེན་བརྒྱ་རྩའི་ཡ་གྱལ་དུ་གྲགས། རྒྱལ་དབང་བདུན་པའི་ཡང་སྤྲུལ་ཀོང་ཡུལ་འབྲུག་ཆོས་ལྡིང་དང་ཉེ་བར་འཁྲུངས་ཚུལ་དཔལ་ལྡན་ལྷ་མོས་ལུང་བསྟན་གནང་བ་བཞིན་ཕྱིས་མངོན་དུ་གྱུར། དེ་བཞིན་རྒྱལ་དབང་འབྲུག་པ་རིན་པོ་ཆེས་བཀའ་ནན་ལྟར་ཡོངས་འཛིན་མཆོག་སྤྲུལ་འཁྲུལ་བ་དང་བྲལ་བའི་ལུང་བསྟན་གནང༌། གཞན་ཡང་རྗེ་ཉིད་ཀྱིས་ངོས་འཛིན་གནང་བའི་སྤྲུལ་པའི་སྐུ་ཡང་དཔལ་ཡུལ་ཁྲིར་བཞུགས་ཀརྨ་བཀྲ་ཤིས་ཀྱི་སྤྲུལ་སྐུ། རི་བོ་ཆེའི་འཕགས་མཆོག་རིན་པོ་ཆེ་ངག་དབང་བཀྲ་ཤིས་གྲགས་པ་རྒྱལ་མཚན་གྱི་སྤྲུལ་སྐུ། རྗེ་ཆོས་ལུ་སྤྲུལ་སྐུ། ལོ་རི་སྤྲུལ་སྐུ། དྷི་ཁྱིམ་སྤྲུལ་སྐུ། རྡོ་རྗེ་རྫོང་པའི་སྤྲུལ་སྐུ། མཁར་དམར་སྤྲུལ་སྐུ། ཁྲོ་རུ་སྒྲུབ་བརྒྱུད་སྤྲུལ་སྐུ། དྲུང་རམ་སྤྲུལ་སྐུ། རྒྱུན་ནེ་སྤྲུལ་སྐུ། གནས་མདོ་ཆོས་གྲུབ་སྤྲུལ་སྐུ། མཛེས་དགོན་སྤྲུལ་སྐུ། རི་མགོ་བྱང་ཆུབ་སྤྲུལ་སྐུ། སིབ་དགོན་སྤྲུལ་སྐུ་སོགས་ཤིན་ཏུ་མང་ངོ༌། །རྒྱལ་དབང་བརྒྱད་པ་ཀུན་གཟིགས་ཆོས་ཀྱི་སྣང་བས་ཀྱང་སྨིན་གྲོལ་དུ་མ་གསན་ཏེ། དབུའི་རིགས་བདག་ཏུ་བཞེས། རྒྱལ་དབང་ཀརྨ་པ་བདུད་འདུལ་རྡོ་རྗེ་དང༌། རྗེ་ཞྭ་དམར་བཅུ་པ་ཆོས་གྲུབ་རྒྱ་མཚོར་དབང་ལུང་སྤེལ་མར་གསན་བཞེས་མཛད། དཔལ་སྤུངས། དཔལ་ཡུལ། རི་བོ་ཆེ། ཟུར་མང༌། སྐྱབས་ཆེ། ཁྲོ་རུ། རྫ་པད་སྙིང༌། གླིང་བསྟན་འཕེལ་སོགས་ཁམས་ཕྱོགས་ཀྱི་དགོན་སྡེ་ཆེ་ཆུང་ཕལ་ཆེ་བས་གདན་དྲངས་ཏེ། དེ་དག་གི་བླ་སྤྲུལ་ཡོངས་ལ་སྨིན་གྲོལ་བདུད་རྩིའི་ཆོས་ཆར་ཡང་ཡང་ཕབ་སྟེ། མཚན་སྙན་དང་མཛད་ཕྲིན་གྱིས་བོད་ཡུལ་ཁྱབ། གདན་སར་གཙུག་ལག་ཁང་དང༌། གསེར་ཟངས་ལས་གྲུབ་པའི་སངས་རྒྱས་སྟོང་སྐུ། དཔལ་ཆེན་རྡོ་རྗེ་གཞོན་ནུའི་བློས་བསླངས་སོགས་རྟེན་གསུམ་ཁྱད་འཕགས་དུ་མ་བཞེངས། སྙན་འཇེབས་ལྡན་པའི་བཀའ་རྩོམ་དང༌། བྱིན་ཆེན་འབེབས་པའི་དགོངས་གཏེར་སྐོར་པོད་ཆེན་དུ་མ་བཞུགས། མཐར་གདུལ་བྱ་རྟག་འཛིན་ཅན་གྱི་ངོར། དགུང་ལོ་ང་བརྒྱད་པ་མེ་སྦྲུལ་༼༡༧༩༧༽ལོའི་བོད་ཟླ་བདུན་པའི་དམར་ཕྱོགས་དཔའ་བོ་མཁའ་འགྲོ་རང་བཞིན་གྱི་འདུ་བའི་དུས་ཆེན་ཉེར་ལྔའི་ཐོ་རེངས་ཙམ་དུ། གངས་ཅན་ལྗོངས་ཀྱི་གདུལ་བྱ་སྤྱི་མཐུན་གྱི་སྣང་ངོར། སྤྲུལ་པའི་དཀྱིལ་འཁོར་ཆོས་དབྱིངས་ཆེན་པོའི་ཀློང་དུ་བསྡུ་བའི་ཚུལ་བསྟན་ཏོ། །སློབ་མ་ཡང་རྒྱལ་དབང་བརྒྱད་པ་ཀུན་གཟིགས་ཆོས་ཀྱི་སྣང་བ། མཐུ་ཆེན་ལྔ་པ་འཇམ་དཔལ་རྡོ་རྗེ། བཀའ་བརྒྱད་སྤྲུལ་སྐུ་ཕྲིན་ལས་ཡར་འཕེལ། འབྲུག་པ་སྐྱིད་སྦུག་སྤྲུལ་སྐུ་ཀརྨ་ཚུལ་ཁྲིམས་དར་རྒྱས། འབྲུག་པ་ཆོས་ལུ་སྤྲུལ་སྐུ། ལོ་རུ་སྤྲུལ་སྐུ། གྲུ་གུ་ཆོས་རྒྱལ་སྤྲུལ་སྐུ། གསང་བདག་རྣམ་རོལ་ཉིད་ཀྱི་རྒྱལ་ཚབ་ཆོས་སྐྱོང་སྐུ་རྟེན་སྤྲུལ་སྐུ་ཚེ་དབང་བསྟན་འཛིན་དཔལ་བཟང་སོགས་རང་ལུགས་དང༌། གཞན་ཡང་སློབ་མའི་གཙོ་བོར་གྱུར་པ་ཀྭོན་ཏིང་ཏཱ་ཡི་སི་ཏུ་དཔལ་འགྱུར་མེད་བསྟན་འཛིན་ཕྱོགས་ལས་རྣམ་གྲོལ་པདྨ་ཉིན་བྱེད་དབང་པོའི་སྡེ་མཆོག་དང༌། རྗེ་དབོན་མཆོག་གི་སྤྲུལ་སྐུ་ཀརྨ་རིན་ཆེན། དཔའ་བོ་རིན་པོ་ཆེ་གཙུག་ལག་ཆོས་ཀྱི་རྒྱལ་པོ། རྗེ་དྲུང་ཀརྨ་འཆི་མེད་དང་ཚེ་དབང་བདེ་ཆེན། ཟུར་མང་གར་དྲུང་གཉིས། ཀརྨ་ཆགས་མེད་ཀྱི་སྤྲུལ་སྐུ་ཀརྨ་ངེས་དོན་བསྟན་འཛིན་རྒྱལ་པོ། གནས་མདོ་བླ་མ་གྲུབ་དབང་ཀརྨ་ཡན་ལག་དང་རྒྱ་མཚོ། ཀརྨ་བདེ་ཆེན་སྙིང་པོ། སྐྱོ་བྲག་བསྟན་སྙིང་སྤྲུལ་སྐུ་ཀརྨ་བསྟན་འཛིན་རྣམ་རྒྱལ། འབྲོང་པ་ལྷུན་གྲུབ་རབ་བརྟན། འདོད་དཔལ་མཁན་ཆེན་སྐལ་བཟང་ཕྲིན་ལས་ཡར་འཕེལ། ཟུར་མང་ཆོས་རྗེ་ཀརྨ་གྲུབ་མཆོག་དགེ་ལེགས་རབ་རྒྱས་སོགས་དེ་དུས་ཀྱི་ཀར་འབྲུག་རྙིང་གསུམ་གྱི་བསྟན་འཛིན་ཕལ་མོ་ཆེ་རྗེ་འདི་ཉིད་དང་ཆོས་ཀྱིས་འབྲེལ་བའི་སློབ་རིགས་སུ་གྱུར་པའི་ཚུལ་ཞིབ་པ་ནི་རྗེ་འདིའི་རྣམ་ཐར་དད་གསུམ་འདབ་སྟོང་བཞད་པའི་ཉིན་བྱེད་དུ་གསལ་ལོ། །
༈ རྗེ་འཛི་སྒར་སྐུ་ཕྲེང་ལྔ་པ་མི་ཕམ་ཆོས་ཀྱི་ཉི་མའི་རྣམ་ཐར་ནི།
༄༅། །གང་འདུལ་བརྩེ་བའི་རོལ་པ་སྟོན་པ་ལ། །
སྣ་ཚོགས་ཕྲིན་ལས་རྒྱ་མཚོའི་མཛོད་བཟུང་སྟེ། །
བསྟན་འགྲོ་ཡོངས་ལ་ཕན་བདེའི་དཔལ་སྦྱིན་མཁན། །
མི་ཕམ་ཆོས་ཀྱི་ཉི་མར་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་སྐུ་ཕྲེང་ལྔ་པ་མི་ཕམ་ཆོས་ཀྱི་ཉི་མའི་རྣམ་ཐར་ནི། ཁམས་ཀརྨ་དགེ་རུ་རྗེ་གཏུགས་ཚང་དུ། རབ་བྱུང་བཅུ་གསུམ་པའི་ས་རྟ་༼༡༧༩༨༽ལོར་སྐུ་འཁྲུངས། རྒྱལ་དབང་འབྲུག་པ་ཀུན་གཟིགས་ཆོས་ཀྱི་སྣང་བ་མཆོག་ནས་འཁྲུལ་མེད་རྡོ་རྗེའི་ཚིག་གིས་ངོས་འཛིན་གསལ་བར་མཛད། སྐུ་འཁྲུངས་པ་ནས་བཟུང་རྒྱལ་སྲས་བྱང་ཆུབ་སེམས་དཔའི་རྣམ་པར་ཐར་པའི་ངང་ཚུལ་དང་ལྡན་ཞིང༌། ཡི་གེའི་ཕྱི་མོ་ནས་བཟུང་རིག་པའི་གནས་ཀུན་ལ་སྦྱངས། འབྲུག་ལུགས་ཀྱི་ཆོ་གའི་ཕྱག་ལེན་འདོན་དབྱངས་རོལ་མོ་ཕྱག་རྒྱ་གར་ཐིག་སོགས་ཐུགས་ལ་ངེས་པར་མཛད། སི་ཏུ་པདྨ་ཉིན་བྱེད་དབང་པོ་དང༌། ཀུན་གཟིགས་ཆོས་ཀྱི་སྣང་བ་སོགས་མཁས་གྲུབ་ཀྱི་བཤེས་གཉེན་དུ་མ་གཏུགས་ཏེ་དབང་ཁྲིད་མན་ངག་དང་བཅས་པ་གསན། ཉམས་བཞེས་མཛད་པས་དངོས་ཅན་དངོས་མེད་ཐམས་ཅད་དབང་དུ་འདུས་པའི་ནུས་པ་མངའ། དབུས་ཀྱི་གདན་ས་གསང་སྔགས་ཆོས་གླིང་དུ་ཐེངས་མང་ཕེབས་ཤིང༌། འབུལ་བསྙེན་གྱིས་མཉེས་པར་མཛད། གདན་ས་འཛི་སྒར་དང་ས་ཡུལ་སྟོད་སྨད་མང་པོར་ཞབས་ཀྱིས་བཅགས་ཤིང༌། གདུལ་བྱའི་རེ་བ་ཡིད་བཞིན་དུ་བསྐངས་ཤིང་སྐལ་ལྡན་མང་པོ་སྨིན་གྲོལ་ལ་བཀོད། གདན་སར་རྟེན་གསུམ་གསར་བཞེངས། སྒྲུབ་མཆོད་གསར་འཛུགས། དགེ་འདུན་གྱི་དར་སྤེལ་སོགས་བསྟན་པ་འཛིན་སྐྱོང་དང་འགྲོ་བའི་དོན་རྒྱ་ཆེར་གནང་བའི་མཐར། དགུང་ལོ་ལྔ་བཅུ་ང་གསུམ་པ་ལྕགས་ཁྱི་༼༡༨༥༠༽ལོར་ངོ་མཚར་བའི་ལྟས་དང་བཅས་གཟུགས་སྐུའི་བཀོད་པ་དབྱིངས་སུ་བསྡུས་སོ། །རྗེ་འདི་ཉིད་སྤྲུལ་སྐུ་སྙིང་ཐིག་གི་གཏེར་ལུང་ལས། མདོ་ཁམས་རྗེ་རིགས་བྱ་བ་རུ༔ ཕྲིན་ལས་མིང་ཅན་རྟ་ལོ་པ༔ ལས་ཅན་དེ་ལ་པདྨ་རྒྱལ་པོའི་སྒྲུབ་ཐབས་བྱིན༔ འབྲེལ་ཚད་དོན་ལྡན་རྔ་ཡབ་གླིང་དུ་ཁྲིད༔ ཅེས་པའི་ལུང་གིས་གསལ་བར་བསྟན་ཏོ། །
༈ རྗེ་འཛི་སྒར་དྲུག་པ་བསྟན་པའི་ཉི་མའི་རྣམ་ཐར་ནི།
༄༅། །བསྐལ་པ་བཟང་པོའི་ཞིང་མཆོག་ཆེར་ཡངས་པར། །
ངག་གི་དབང་ཕྱུག་བསྟན་པའི་ཉི་མ་ཆེ། །
ཀུན་ཏུ་བཟང་པོའི་ཕྲིན་ལས་རྒྱ་མཚོའི་གཏེར། །
དོན་ཀུན་གྲུབ་པའི་དཔལ་ལ་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་དྲུག་པ་བསྟན་པའི་ཉི་མའི་རྣམ་ཐར་ནི། སྡེ་དགེའི་དབོན་རྒྱུད་ཆོས་བློན་རྒྱ་འགུ་ཚང་སར། རབ་བྱུང་བཅུ་བཞི་པའི་ཆུ་བྱི་༼༡༨༥༢༽ ལོར་འཁྲུངས། རྒྱལ་དབང་ཀར་འབྲུག་ཡབ་སྲས་ནས་གོང་མའི་ཡང་སྤྲུལ་དུ་ངོས་འཛིན་གནང༌། རིམ་གྱིས་གདན་སར་སྤྱན་དྲངས་ནས་རྗེ་གོང་མའི་བཞུགས་ཁྲི་ལ་མངའ་གསོལ། རྒྱལ་དབང་འབྲུག་པ་རིན་པོ་ཆེ་དགུ་པ་འཇིགས་མེད་མི་འགྱུར་དབང་རྒྱལ་གྱི་ཞབས་དྲུང་དུ་ཕེབས་ནས། རང་ལུགས་འབྲུག་པའི་དབང་ཆོས་སྤྱི་དང༌། ཁྱད་པར་ཕྱག་ཆེན་དང་ཆོས་དྲུག་སོགས་ཀྱི་མན་ངག་རྣམས་སྨར་ཁྲིད་དུ་གསན་ནས་ཐུགས་ཉམས་སུ་བསྟར། གཞན་ཡང་རྒྱལ་དབང་ཀརྨ་པ་ཐེག་མཆོག་རྡོ་རྗེ་དང༌། བྱམས་མགོན་སི་ཏུ་རིན་པོ་ཆེ་སོགས་བླ་མ་མང་པོ་བསྟེན་ནས། ཐུན་མོང་རིག་གནས་ནས་ཐུན་མིན་གསང་ཆེན་རྡོ་རྗེ་ཐེག་པ་ལ་ཐུག་གི་བར་གསན་བསམ་མཛད་པས་མཁས་གྲུབ་ཆེན་པོར་གྱུར། མཆོག་གྱུར་བདེ་ཆེན་གླིང་པས། ནམ་སྙིང་སྤྲུལ་པ་ངག་དབང་མཚན་ཅན་འབྱུང་༔ ཞེས་ཆོས་བདག་ཏུ་ལུང་བསྟན། གུ་རུའི་དུས་ཆེན་ལ་ཚེས་བཅུ་ཆེན་མོ་གསར་འཛུགས་གནངབ་སོགས་མཛད་པ་རྒྱ་ཆེ། སྒྲུབ་བརྒྱུད་ཀྱི་བསྟན་པ་ལ་ཕྱག་རྗེས་ཤིན་ཏུ་ཆེ་བས། རྒྱལ་དབང་ཀར་འབྲུག་རྣམ་གཉིས་ནས་ཆོས་ཀྱི་རྒྱལ་ཚབ་ཆེན་པོར་གཟེངས་བསྟོད། གདུལ་བྱར་གྱུར་པ་རྣམས་ལ་དམ་པའི་ཆོས་ཀྱི་འཁོར་ལོ་བར་མེད་དུ་བསྐོར་ཅིང༌། བསྟན་འགྲོའི་དོན་མཛད་བཞིན་པར། གདུལ་བྱ་བསོད་ནམས་དམན་པའི་ངོར་དགུང་ལོ་སོ་དགུ་པ་ལྕགས་སྟག་༼༡༨༩༠༽ལོར་རབ་ཞིའི་དབྱིངས་སུ་སྙོམས་པར་ཞུགས་སོ། །
༈ རྗེ་འཛི་སྒར་བདུན་པ་ངག་དབང་བསྟན་འཛིན་དཔལ་བཟང་གི་རྣམ་ཐར་ནི།
༄༅། །རྒྱལ་སྲས་ངག་གི་དབང་ཕྱུག་དགེ་སྦྱོང་ཚུལ། །
ཕྱོགས་མེད་བསྟན་པ་འཛིན་ལ་ཕན་བདེའི་དཔལ། །
རྣམ་ཐར་ཕྲིན་ལས་བཟང་པོའི་འོད་སྣང་ཅན། །
ས་གསུམ་འགྲོ་བའི་མགོན་དེར་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་བདུན་པ་ངག་དབང་བསྟན་འཛིན་དཔལ་བཟང་གི་རྣམ་ཐར་ནི། གཙང་རྟ་ནག་ཚང་དུ། རྗེ་ཀརྨ་པའི་དབོན་རིགས་སུ་རང་བྱུང་བཅོ་ལྔ་པའི་ཆུ་འབྲུག་༼༡༨༩༢༽ལོར་སྐུ་འཁྲུངས། རྒྱལ་དབང་ཀརྨ་པ་བཅོ་ལྔ་མཁའ་ཁྱབ་རྡོ་རྗེས། གོང་མའི་རྣམ་འཕྲུལ་དུ་ངོས་འཛིན་གནང་ཞིང༌། མཚན་ཀརྨ་ངག་དབང་ངེས་དོན་བསྟན་འཛིན་བཤད་སྒྲུབ་ཆོས་ཀྱི་ཉི་མ་དགེ་ལེགས་དཔལ་བཟང་པོ་ཞེས་གསོལ། ཕྱིས་ཡོངས་གྲགས་སུ་ངག་དབང་བསྟན་འཛིན་དཔལ་བཟང་ཞུ། རྗེ་དེས་ཐུན་མོང་དང་ཐུན་མོང་མ་ཡིན་པའི་དབང་དང་གདམས་ངག་ཀྱང་རིམ་པར་ཕོག །མི་རིང་བར་གདན་ས་ཆེན་པོར་སེང་ཁྲི་ལ་མངའ་གསོལ། རྒྱལ་དབང་ཀརྨ་པ་མཁའ་ཁྱབ་རྡོ་རྗེ་དང༌། ཀརྨ་མཁན་རྒན་རིན་ཆེན་དར་རྒྱས་སོགས་ཚད་ཐུབ་ཀྱི་སྐྱེས་བུ་དུ་མ་བསྟེན་ནས་མདོ་རྒྱུད་རིག་གནས་ཅི་ཡང་གསན་བསམ་མཛད། ཁྱད་པར་རྒྱལ་དབང་འབྲུག་པ་སྐུ་ཕྲེང་བཅུ་པ་མི་ཕམ་ཆོས་ཀྱི་དབང་པོའི་མདུན་ནས། དཀྱིལ་ཆོག་རྡོར་ཕྲེང༌། བདེ་མཆོག་དྲུག་ཅུ་མ། བླ་མ་རིགས་དྲུག་གི་དབང་དང༌། སྒྲུབ་ཐབས་བརྒྱ་རྩའི་རྗེས་གནང༌། རྗེས་གནང་ཉེར་གཉིས་མ། གྲུབ་ཐོབ་བརྒྱ་རྩའི་བྱིན་རླབས། དཔལ་མགོན་ཕྱག་བཞི་པ་སོགས་ཆོས་སྲུང་ཡོངས་རྫོགས་ཀྱི་རྗེས་གནང༌། ལོ་རྒོད་གཉིས་ཀྱི་བཀའ་འབུམ། རྒྱལ་དབང་རྗེའི་བཀའ་འབུམ། ཀུན་མཁྱེན་བཀའ་འབུམ། ཀུན་གཟིགས་བཀའ་འབུམ་སོགས་སྨིན་གྲོལ་གྱི་རིམ་པ་མང་པོ་གསན་པར་མཛད་ཅིང༌། ཐུགས་ཡིད་གཅིག་ཏུ་འདྲེས་ཤིང༌། རྗེ་དེས་ཁམས་སྡེ་དགེ་རྒྱ་གུ་ཚང་གི་གཞིས་རྣམས་འཛི་སྒར་དགོན་པའི་མཆོད་གཞིས་སུ་སྦྱོར་འབུལ་གནང་རྒྱུར་གོང་ས་བཅུ་གསུམ་པ་མཆོག་ལ་སྙན་ཞུ་ཕུལ་བར་བརྟེན་ཞལ་བཞེས་ཐོབ་ཅིང་གསོལ་རས་བྱུང༌། རྒྱལ་དབང་དྲུག་པ་མི་ཕམ་དབང་པོའི་དུས་ནས་བཟུང་སྐུ་ཕྲེང་རིམ་བྱོན་རྣམས་བླ་སློབ་རེས་མོས་ཀྱིས་དམ་ཚིག་གསེར་གྱི་ཕྲེང་བ་ལ་ཕྱོགས་ལྷུང་གི་དྲི་མས་མ་གོས་པའི་རང་མདངས་དུས་འདིར་མངོན་དུ་གྱུར་ཏེ། རྒྱལ་དབང་ཉིད་སྐུ་འཚོ་གཞེས་སྐབས་རིགས་ཀྱི་མྱུ་གུ་གདུང་སྲས་རིན་པོ་ཆེ་ཡུལ་གྱི་མངལ་དུ་བཞུགས་སྐབས་ནས་རྗེ་འདི་ལ་གནང་ཞིང༌། ཞི་བར་གཤེགས་དུས་ལྷ་སྐུ་རིང་བསྲེལ་གྱིས་གཏམས་པའི་ཐུགས་ཀྱི་གོང་བུ་ཡང་རྗེ་འདི་ཉིད་ཀྱི་པང་དུ་བབ་པར་གྲགས།
ལྷོ་འབྲུག་རྒྱལ་རབས་གཉིས་པ་དཔལ་ལྡན་འཇིགས་མེད་དབང་ཕྱུག་མཆོག་གི་དབུའི་མཆོད་གནས་སུ་སྤྱན་དྲངས་པ་བཞིན། ཀྲོང་ས་ཆོས་འཁོར་རབ་རྩེར་ཞབས་པད་བཀོད་དེ། ཁུལ་དེར་རྗེ་འབངས་རྣམས་ལ་དཀྱིལ་ཆོག་རྡོར་ཕྲེང་སོགས་སྨིན་གྲོལ་བདུད་རྩིའི་ཆོས་ཆར་ཕབ། ཤར་ཕྱོགས་བཀྲ་ཤིས་ཡངས་རྩེ་སོགས་སྒྲུབ་གནས་རྣམས་སུ་ཡང་ཕེབས་ཏེ་ཟབ་རྒྱས་ཆོས་ཀྱི་བཀའ་དྲིན་བསྐྱངས། ཕྱོགས་ཀྱི་དད་ལྡན་རྣམས་ནས་ཕུལ་བའི་དངོས་པོ་རྣམས་རྫས་བྱུང་བསོད་ནམས་ཀྱི་ཞིང་དུ་སྤེལ་བའི་སླད། མདོ་ཁམས་ཕྱོགས་འདིར་དཀོན་པའི་གཙུག་ལག་ཁང་དང་རྟེན་གཙོ་ཐུབ་ཆེན་དཔེ་ཟླ་དང་བྲལ་བ་གསར་དུ་བཞེངས། དཔལ་ལྡེམ་ཆེན་གཡུ་རུའི་སྒྲུབ་སྡེ་དང༌། མདོ་སྔགས་རིག་པའི་འབྱུང་གནས་སུ་གྱུར་པའི་བཤད་གྲྭ་གསར་འཛུགས་ཀྱི་བདག་རྐྱེན་བླ་ན་མེད་པ་མཛད། དབུས་ཀྱི་གདན་ས་གསང་གླིང་དུ་འབུལ་ཆེན་ཐེངས་མང་དང༌། ལོ་རུ་སྐུ་ཕྲེང་བདུན་པ་ངོས་འཛིན་དབུ་འདྲེན་གནང་བས་མཚོན་དགོན་མ་ལག་ཐམས་ཅད་ཀྱང་ཚུལ་བཞིན་གཟིགས་རྟོག་གནང༌། གོང་ས་ལྷ་མིའི་རྣམ་འདྲེན་རྒྱལ་མཆོག་བཅུ་གསུམ་པ་དང་ཐུགས་ནང་གཤིན་པར་གྱུར་ཏེ། དབྱིངས་ས་ནས་གོ་སའི་ཤེལ་ཐམ་དང༌། དམིགས་བསལ་ལམ་ཡིག་སོགས་ཁམས་ཀྱི་ཀར་འབྲུག་བླ་ཆེན་གཞན་ལ་མེད་པར་གནང་བ་ཡོངས་སུ་གྲགས། དེ་བཞིན་རྒྱལ་དབང་ཀརྨ་པ་མཆོག་ནས་ཀྱང་རྗེ་དབོན་ཆེན་མོའི་བཞུགས་གདན་བསྟབས་ཤིང༌། ཆེན་པོར་འོས་པའི་ཡོ་བྱད་འཛིན་ཆོག་པའི་གཟེངས་བསྟོད་ཀྱི་བཀའ་ཤོག་བསྩལ་ཚུལ་ཟུར་གསལ་ལྟར་ཡིན། མདོར་ན་ཆོས་འདུལ་བའི་བཅའ་ཁྲིམས། གཞི་གསུམ་གྱི་ཕྱག་ལེན། སྤྱི་སྒེར་གྱི་ནང་ཁྲིམས། བཤད་སྒྲུབ་ལས་གསུམ་གྱི་བྱ་བ་སོགས་ཆོས་སྲིད་གཉིས་ལྡན་གྱི་སྒོ་ནས་བསྟན་པ་སྤྱི་དང་བྱེ་བྲག་གི་མཛད་རྗེས་འགྲན་ཟླ་མ་མཆིས་པར་སྐྱོང་བཞིན་པར། དགུང་གྲངས་ཞེ་དྲུག་པ་མེ་གླང་༼༡༩༣༧༽ལོར་ཞི་བར་གཤེགས་སོ། །སློབ་མའི་གཙོ་བོ་ནི། སྐྱབས་རྗེ་འཛི་སྒར་ཐུགས་སྲས་རིན་པོ་ཆེ་སྟེ། འདི་རྒྱལ་དབང་འབྲུག་པའི་གདུང་སྲས་ཡིན་ཡང་འཛི་སྒར་བདུན་པས་ལུགས་གཉིས་ཀྱིས་བསྐྱངས་པའི་སྲས་སུ་གྱུར་པས་འཛི་སྒར་ཐུགས་སྲས་ཞེས་པའི་མཚན་ཆགས། གཞན་ཡང་ཆོས་སྐྱོང་དཔལ་དགའ་སྤྲུལ་སྐུ། རྒྱལ་སྲས་པདྨ་དབང་དྲག་སོགས་བླ་སྤྲུལ་དམ་པ་མང་དུ་བྱུང་ངོ༌། །
༈ རྗེ་འཛི་སྒར་བརྒྱད་པ་རིག་འཛིན་ཌོམྦྷི་ལྷ་མཆོག་རྡོ་རྗེའི་རྣམ་ཐར་ནི།
༄༅། །ཨོ་རྒྱན་མ་ཧཱ་གུ་རུའི་ཕོ་ཉ་བ། །
ཁམས་གསུམ་འགྲོ་བའི་དཔལ་མགོན་རིག་པ་འཛིན། །
རྫོགས་ཆེན་ཨ་ཏིའི་གྲུབ་བརྙེས་དྲིན་ཆེན་རྗེ། །
ལྷ་མཆོག་རྡོ་རྗེའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། རྗེ་འཛི་སྒར་བརྒྱད་པ་རིག་འཛིན་ཌོམྦྷི་ལྷ་མཆོག་རྡོ་རྗེའི་རྣམ་ཐར་ནི། ཁམས་ལྷ་ཐོག་རྒྱལ་པོའི་བློན་པོར་གཏོགས་པའི་ཐ་ག་ཚང་ཞེས་པར། ཡབ་དགེ་ལེགས་དང༌། ཡུམ་ནོར་བུ་སྒྲོལ་མ་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ས་སྟག་༼༡༩༣༨༽ལོར་ཟངས་མདོག་དཔལ་རི་ནས་ཞིང་འདིར་བསམ་བཞིན་སྲིད་པ་བཟུང་བའི་ཚུལ་བསྟན། བལྟམས་མ་ཐག་ནས་ལྷ་ཐོག་ཡེ་བརྫུ་དང་མགོན་ལྷ་སོགས་ཆོས་སྐྱོང་རྣམས་རང་བཞིན་གྱིས་འཁོར། དགུང་ལོ་བཞི་ཙམ་ནས་དག་པའི་ཞལ་གཟིགས་མཐའ་ཀླས་པ་བྱུང༌། རྒྱལ་དབང་ཀརྨ་པ་རིག་པའི་རྡོ་རྗེ་དང༌། དྲུང་རམ་རྒྱལ་སྤྲུལ་རྡོ་རྗེ་འཆང་ཟུང་ནས་རྡོ་རྗེ་དྲག་པོའི་ཡང་སྤྲུལ་འཁྲུལ་མེད་དུ་ལུང་བསྟན་ཏེ། གདན་ས་འཛི་སྒར་དུ་ཁྲི་གསོལ་ཞུས། ཡོངས་འཛིན་སློབ་དཔོན་དུ་ཆོས་འཛིན་སྤྲུལ་སྐུ་བསྐོས་ནས་དགུང་ལོ་དྲུག་བདུན་བར་སློབ་གཉེར་ལ་སྦྱང་བརྩོན་གནང༌། དམ་པ་སངས་རྒྱས་ཀྱི་ཞལ་གཟིགས་ནས་རང་ལ་ཐིམ་པའི་སྣང་བ་དང༌། ལྷ་མོ་དུད་སོལ་མས་ཅི་གསུང་སྒྲུབ་པར་ཁས་བླངས་པ་སོགས་དག་སྣང་མང་དུ་ཤར། དགུང་ལོ་བདུན་པར་དྲུང་དགོན་རྒྱལ་སྤྲུལ་རིན་པོ་ཆེའི་མདུན་ནས་རིན་ཆེན་གཏེར་མཛོད་ཀྱི་དབང་ལུང་གསན། དབང་དོན་ཡིད་དང་འདྲེས་པ་བྱུང༌། སྔར་སློབ་གཉེར་མི་ཤེས་ནས་ཐུགས་ངལ་ཅུང་ཟད་ཡོད་པ་དེ་སངས་ནས་ཐུགས་རིག་རྩལ་ཁ་ཇེ་བཀྲ་ལ་སོང༌། ཆོས་ཐམས་ཅད་མ་བསླབས་དགོངས་པ་རང་རྡོལ་དུ་གྱུར་ཏེ། ཀུན་གཞི་ཟག་པ་མེད་པའི་ཀློང་ནས་དགོངས་གཏེར་དཔག་མེད་གཏན་ལ་ཕབ་པར་མཛད། ཁྱད་པར་ཟབ་ཆོས་ཞི་ཁྲོའི་སྒྲུབ་དཀྱིལ་གཏན་ལ་ཕབ་སྐབས་སྤྱི་དཔལ་ཆེ་མཆོག་ཧེ་རུ་ཀ་ཡབ་ཡུམ་སོགས་ཁྲག་འཐུང་ཁྲོ་བོའི་ལྷ་ཚོགས་རྣམས་ཆུ་ནང་གི་ཟླ་བ་དང༌། ནམ་མཁའི་འཇའ་ཚོན་ལྟར་མངོན་སུམ་དུ་མཇལ་ཞིང༌། མཐར་འོད་ཀྱི་གོང་བུར་གྱུར་ཏེ་སྒྲུབ་གཏོར་བསམ་འཕེལ་དབང་རྒྱལ་ཇི་ལྟ་བ་བཞིན་འགྱུར་བ་སོགས་ངོ་མཚར་གྱི་རོལ་པ་བརྗོད་ལས་འདས། དགུང་ལོ་བཅུ་གཉིས་ལ་རྒྱལ་སྤྲུལ་རིན་པོ་ཆེའི་མདུན་ནས་རྒྱ་ཆེན་བཀའ་མཛོད་ཀྱི་དབང་ལུང་གསན། བླ་མ་དེ་ཉིད་རྗེ་བཙུན་མི་ལར་དངོས་སུ་གཟིགས། གཞན་ཡང་སི་ཏུ་པདྨ་དབང་མཆོག །ཉག་བླ་བྱང་ཆུབ་རྡོ་རྗེ་སོགས་བླ་མ་མང་པོ་བསྟེན། ལྡེམ་ཆེན་གཡུ་རུའི་སྒྲུབ་སྡེ་བསམ་གཏན་གླིང་དང༌། པདྨ་འོད་ཕུང་འཁྱིལ་བ་སོགས་སུ་བཅད་རྒྱར་ཡུན་རིང་བཞུགས་པས། རྩ་གསུམ་ལྷ་ཚོགས་གྲུབ་པའི་རྟགས་མཚན་ཤིན་ཏུ་མང་པོ་དང༌། མཚན་ལམ་དུ་ཀླ་ཀློས་བོད་འདིར་འཚེ་བ་འབྱུང་ཚུལ་དུས་རྟགས་ངན་པའང་བྱུང༌། དགུང་ལོ་བཅོ་ལྔ་ལ་འཇའ་སྤྲིན་གྱི་དབུས་ནས་རྒྱལ་དབང་མ་ཧཱ་གུ་རུ་དངོས་སུ་བྱོན་ཏེ། གསང་བའི་མཚན་རིག་འཛིན་ཌོམྦྷི་ལྷ་མཆོག་རྡོ་རྗེ་བདེ་ཆེན་འདུས་པ་རྩལ་ཞེས་གསོལ། མཚན་གཞན་སྣང་སྲིད་ཡེ་ཤེས་ཁྱབ་བརྡལ་ཆེན་པོ་ཞེས་ཀྱང་གྲགས། དེ་ཡང་བཀའ་ཐང་ལས། ཤཱཀྱའི་ཞིང་ཁམས་གཡུ་རུ་གང་ཞེས་ན། །གསང་སྔགས་ཐེག་ཆེན་སྒྲུབ་པའི་རྣལ་འབྱོར་པ། །སྔགས་ཀྱི་བདག་པོ་ཡེ་ཤེས་ཞེས་བྱ་འབྱུང༌། །ཞེས་གནས་དང་མཚན་གསལ་བར་ལུང་བསྟན་པ་ལྟར་རོ། །དགུང་ལོ་བཅོ་བརྒྱད་ལ་གཙང་གཤིས་རྡོ་རྗེ་གྲོ་ལོད་ཀྱི་གནས་སྲུང་བཙན་རྒོད་རྡོ་རྗེ་ཁྲ་འབར་གྱིས་ཞུ་བསྐུལ་ལྟར་གནས་དེར་ཕེབས། དག་པའི་ངོ་མཚར་གྱི་གཟིགས་མོ་འབྱམས་ཀླས། ཚེ་སྒྲུབ་བདུད་རྩིའི་བུམ་བཟང་དགོངས་པའི་ཀློང་ནས་ཕྱུང༌། གནས་དེའི་ནུབ་ངོས་བྲག་རིམ་པ་གཅིག་བཤུས་པའི་འོག་ནས། འཕགས་ཡུལ་རིག་འཛིན་རྣམ་དགུའི་ཆོས་སྨན་གྲོ་ལོད་ཀྱི་བྱང་སེམས་དཀར་པོས་སྦྲུས་ཏེ་ཤ་ཟ་མཁའ་འགྲོའི་བྱང་སེམས་དམར་པོས་རྩི་བྱས་པ་གཏེར་དུ་བཏོན་པས། སྨན་དྲི་བཟང་པོས་ཕྱོགས་ཀུན་ཁྱབ་པ་བྱུང༌། དེ་རྣམས་ཕལ་ཆེར་སྨན་སྒྲུབ་གཞན་ནང་དུ་བཏབ་ནས། ཟབ་ཆོས་ཞི་ཁྲོའི་སྒོ་ནས་དམ་རྫས་ར་སཱ་ཡ་ནའི་སྒྲུབ་པ་ཉིན་མང་པོར་མཛད། དངོས་གྲུབ་ལེན་ཆོག་སྐབས་སྨན་སུམ་ལོག་ཙམ་དུ་འཕེལ། ཚོགས་མཆོད་འབུམ་ཐེར་བརྒྱད་ཙམ་ཕུལ་བས་དཔའ་བོ་དགྱེས་པའི་ཉམས་སྣང་འབའ་ཞིག་བྱུང༌། ཕྱིས་སུའང་གནས་དེར་ཐེངས་གཅིག་བྱོན། དེ་ནས་འགོར་རྒྱལ་དཔལ་འཛོང་དབང་ཕུག་ནམ་མཁའ་རྫོང་དུ་བཞུགས་ནས་ལྟ་སྒོམ་མཐར་ཕྱིན་ཅིང་རྟོགས་པའི་གདེང་བརྙེས། གནས་འདི་ཉིད་གུ་རུའི་གནས་ཆེན་བརྒྱ་རྩའི་གཙོ་བོ། སྒྲུབ་གནས་ཉེར་ལྔའི་མཆོག་གྱུར་ཡིན་ཚུལ་གྱི་གནས་ཡིག་རྒྱས་པ་མཛད། གནས་འདིར་སྔ་ཕྱིར་ལན་མང་བཞུགས་ཤིང་མཆོག་ཐུན་མོང་གི་དངོས་གྲུབ་བརྙེས་པའི་གནས་ཡིན། དགུང་ལོ་ཉི་ཤུ་ལ། སློབ་དཔོན་ཆེན་པོའི་ཞལ་ནས། ཐེ་ཚོམ་དང་བློ་ཆུང་བསྐྱུར་ལ་གསང་སྔགས་རྡོ་རྗེ་ཐེག་པའི་ལྟ་སྤྱོད་ཀུན་ལ་སྟོན་དགོས་པའི་དུས་ལ་བབ་པ་ཡིན་ཞེས་ལུང་བསྟན་བསྩལ་ཏེ། རིམ་གྱིས་སྔགས་ཀྱི་སྤྱོད་པ་མངོན་དུ་གྱུར། ཉེར་གཅིག་ལ་སྔར་ནས་གདན་ཆགས་པའི་གོ་འཇོ་སྟག་གཡག་རི་ཁྲོད་རྟག་བརྟན་འོད་གསལ་ཆོས་གླིང་དུ། གཙུག་ལག་ཁང་ཀ་བ་གཉིས་ཅན་གསར་དུ་བཞེངས་ནས། ནང་རྟེན་འཇིམ་སྐུ་ལ་ཞལ་གཟིགས་དང་མཐུན་པར་ཀུན་བཟང་ཡབ་ཡུམ། ཤཱཀྱ་ཐུབ་པ། དགའ་རབ་རྡོ་རྗེ། ཨིནྡྲ་བྷཱུ་ཏི། བཻ་རོ་ཙ་ན། ཀློང་ཆེན་རབ་འབྱམས། གོང་ས་ལྔ་པ། མར་མི་དྭགས་གསུམ། ས་སྐྱ་པཎྜི་ཏ། རྗེ་ཙོང་ཁ་པ་སོགས་རིས་མེད་ཀྱི་བླ་མ་མང་པོ་བཞེངས་ཤིང༌། རང་རང་གི་སྐུ་ཆས་དབུ་སྐྲ་སོགས་རྟེན་འགངས་ཆེན་རིགས་དང་གཟུངས་གཞུག་བཅས་ལེགས་པར་གྲུབ་པར་མཛད། དེར་ལོ་ཀྟྲི་པཱ་ལའི་སྒྲུབ་ཟློག་ཅིག་ཀྱང་མཛད་པས། རྟེན་འབྱུང་འབྲིང་ཙམ་ལས་མ་བྱུང་ཡང༌། ཟླ་ཤས་ལ་མུ་སྟེགས་ཀྱིས་འཚེ་བ་བཟློག་པའི་སྣང་བ་ཤར། གཙུག་ལག་ཁང་གཙོ་བོར་རྒྱལ་པོ་སྐུ་ལྔ་ལ་གཉེར་དུ་གཏད་ཅིང་ཕྲིན་ལས་བཅོལ། འདྲ་འབག་སྐུ་ཚབ་ཅིག་བཞེངས། མགོན་པོའི་སྐུ་ཚབ་ཅིག་ཀྱང་བཞེངས་པར་རབ་གནས་སྐབས་ཡེ་ཤེས་པ་དངོས་སུ་ཐིམ་སྣང་བྱུང༌། མདོར་ན་རྗེ་འདི་ཉིད་སྐྱེས་རབས་དུ་མར་སློབ་དཔོན་ཆེན་པོ་པདྨ་ཀཱ་རས་རྗེས་སུ་བཟུང་བས། འབད་རྩོལ་ཆེར་མ་དགོས་པར་ཞལ་ནམ་འདོད་དུ་མཇལ་ཞིང་བྱིན་གྱིས་བརླབས་པ་དང༌། གཞན་ཡང་དཔལ་ཆེན་རྟ་འགྲིན། རྗེ་བཙུན་སྒྲོལ་མ་སོགས་ལྷག་པའི་ལྷ་དུ་མ་དང༌། རིག་འཛིན་དགའ་རབ་རྡོ་རྗེ། མར་མི་དྭགས་གསུམ། ཀརྨ་པ་དུས་གསུམ་མཁྱེན་པ། ཀུན་མཁྱེན་པདྨ་དཀར་པོ། རིག་འཛིན་འཇའ་ཚོན་སྙིང་པོ། ཡོན་དགེ་མི་འགྱུར་རྡོ་རྗེ་སོགས་གྲུབ་མཐའ་རིས་མེད་ཀྱི་རྗེ་བཙུན་གོང་མ་དུ་མའི་ཞལ་གཟིགས་ཤིང༌། བརྡ་ཆོས་ཀྱིས་རྗེས་སུ་བཟུང༌། དཔལ་ཡེ་ཤེས་ཀྱི་མགོན་པོ་ཕྱག་བཞི་པ། དཔལ་ལྡན་ལྷ་མོ་དུད་སོལ་མ། རྡོ་རྗེ་གཡུ་སྒྲོན་མ། དམ་ཅན་ར་ཞོན། ཇག་པ་མེ་ལེན། རག་མའི་ཀླུ་བཙན་སོགས་ཆོས་སྐྱོང་ཐམས་ཅད་ཀྱིས་ཕྲིན་ལས་གཉན་པོ་སྒྲུབ་པར་ཁས་བླངས། ནག་ཕྱོགས་གདུག་འདྲེ་འབྲོང་པ་བན་ཐུང་མ་དང་རྒྱལ་པོ་ཤུགས་ལྡན་སོགས་དམ་སྲི་འབྱུང་པོའི་ཚོགས་རྣམས་ལྷ་སྔགས་ནུས་པ་ཆེན་པོས་ཟིལ་འོག་ཏུ་མནན་ནས་བཀའ་འབངས་སུ་བགྱིས། མཁྱེན་རབ་ཀྱི་རྩལ་རང་གྲོལ་དུ་རྫོགས་པས་མཁས་པར་གྲགས་པ་རྣམས་ཀྱང་ཆོས་ཀྱི་མོལ་མཆིད་དང་གསུང་ཆོས་སྐོར་ལ་ཐུགས་དད་དེ་བསྟོད་བསྔགས་ཀྱི་མེ་ཏོག་འཐོར། སྡེ་དགེ་རྒྱལ་པོ་དང་མདུན་བློན་རྣམས་ཀྱིས་དབང་ཆོས་ཞུས་ཤིང༌། དུས་འགྱུར་གྱི་དབང་དུ་སོང་བ་མ་གཏོགས་སྡེ་དགེའི་དབུ་བླ་ཁག་ལྔའི་ཁར་འཛི་སྒར་དང་རྫོང་སར་གཉིས་བསྣན་པའི་དབུ་བླ་ཁག་བདུན་གྱི་གཏན་འབེབས་ཀྱང་མཛད་པར་གྲགས། གཞན་ཡང་སྐབས་དེ་དུས་སུ་གྲགས་པའི་ཆེ་དགུ་ཀུན་གྱིས་མངོན་པར་བཏུད་ཅིང་སྐྱབས་གནས་གཅིག་པུར་གྱུར། ཁམས་གོ་འཇོ་སོགས་སྡེ་ཡུལ་སྟོད་སྨད་དུ་མར་ཞབས་ཀྱིས་བཅགས་ཏེ། དབང་ཆོས་ཟབ་མོས་སོ་སོའི་རེ་འདོད་ཡིད་བཞིན་དུ་བསྐངས་ཤིང༌། ཁྱད་པར་སྨན་པས་བོར་བའི་ནད་པ་འཆི་ལ་ཐུག་པ་མང་པོར། ཁྱུང་ནག་གི་སྡེ་བརྒྱད་ནད་འདུལ་དང་འབྲེལ་ཁྱུང་ལྔ་ཞི་དྲག་སོགས་སྨན་དཔྱད་ཀྱིས་བདེ་ལྡན་དུ་སོས་པར་མཛད་པ་སོགས་འགྲོ་ཕན་རྒྱ་ཆེ། དེ་ནས་མ་འོངས་དུས་ཀྱི་འཚུབ་སློང་འབྱུང་ཚུལ་དང་ལྷ་ལྡན་དང་རྡོར་གདན་སོགས་ལ་འབྱོན་ན་ལེགས་པར་ཆོས་སྐྱོང་རྣམས་ཀྱིས་ལན་དུ་མར་བསྐུལ་ཀྱང༌། གུ་རུ་པདྨའི་དྲུང་དུ་སྲོག་ལ་བདོས་ཏེ་བསྟན་པ་སྤྱི་དང་བྱེ་བྲག་བོད་འབངས་རྣམས་བློས་མི་གཏོང་བའི་དམ་བཅའ་ཡང་ཡང་ཕུལ་བ་ཡིན་གསུངས་ནས། ལྷ་མི་སུས་ཞུས་ཀྱང་ཞལ་བཞེས་མ་གནང་བར། མཐར་དགུང་ལོ་ཉི་ཤུ་རྩ་གཉིས་པ་ས་ཕག་༼༡༩༥༩༽ལོའི་དབྱར་ཀར་དྲག་པོའི་མཚོན་ལ་བརྟེན་པའི་ཚུལ་གྱིས་ཕ་ཨོ་རྒྱན་གྱི་དྲུང་དུ་གཤེགས་སོ། །རྗེ་འདིའི་དགོངས་གཏེར་སྐོར་ནི། ཟབ་ཆོས་བླ་མེད་ཞི་ཁྲོའི་སྒྲུབ་དཀྱིལ་མཐོང་ཐོས་དྲན་པ་ཀུན་གྲོལ་གྱི་ལས་ཚོགས་རྒྱས་པ། ཡི་དམ་རྟ་མགྲིན་དམར་པོའི་ལས་ཚོགས། ཁྱུང་ནག་གི་སྒྲུབ་ཐབས། ཡང་གསང་མཐུ་ལྡན་དམོད་པ་དྲག་སྔགས་ཀྱི་སྐོར། དཔལ་སྟོབས་ལྡན་གཏུམ་པོ་ཆོས་སྐྱོང་དགོངས་པ་འདུས་པའི་ལས་ཚོགས། དྲང་སྲོང་ལོཀྟྲི་པཱ་ལ། ནོར་ལྷ་ཀུན་འདུས་བསོད་ནམས་ཆུ་གཏེར། དམ་ཆོས་སྨྱོ་གཅོད་མ་ཅིག་ཐུགས་ཀྱི་ཐིག་ལེ། རྫོགས་ཆེན་སྒོམ་དོན་མན་ངག་སྙིང་གི་དུམ་བུ། གསང་བའི་རྟོགས་བརྗོད་ཅིར་སྣང་ལྷ་རུ་ཤར་བའི་རོལ་རྩེད་སོགས་ཆེས་ཟབ་པའི་གསུང་འབུམ་པོད་ཏི་མང་པོར་བཞུགས་སོ། །སློབ་མའི་གཙོ་བོ་ནི། སྨར་ཁམས་གཙང་གཤིས་ནས་བླ་མ་བསྟན་འཛིན་བཟང་པོ་དང་རྒྱལ་སྲས་སྤྲུལ་སྐུ། བསམ་འགྲུབ་གཞུང་ནས་ཀར་བཀྲ་བླ་མ། བྲག་ཡབ་ནས་མཁན་ཆེན་བློ་གྲོས། སྟག་གཟིག་རྫོང་རྩ་ནས་རེ་ཁེ་མཁན་པོ། རྫ་རྒྱུད་ནས་སཱཙྪ་སྒྲུབ་རྒན། པད་སྙིང་མཆོག་སྤྲུལ་སྐུ་ཕྲེང་བདུན་པ་ཐུབ་བསྟན་ཕྲིན་ལས་རྒྱ་མཚོ། གནས་མདོ་ནས་རྟ་པ་ཆོས་རྒྱལ། གནས་ཀེ་བླ་མ་ཡེ་ཤེས་རང་གྲོལ། ཨ་མདོ་བླ་མ་སོགས་དང། འཛི་སྒར་རང་དུའང་ལྕི་སྤྲུལ་སྐུ་ཕྲེང་བཞི་པ་ཀརྨ་བཤད་སྒྲུབ་ཆོས་ཀྱི་སེང་གེ། ཐུགས་སྲས་ངག་དབང་འགྱུར་མེད། ཆོས་སྐྱོང་དཔལ་དགའ་སྐུ་ཕྲེང་དྲུག་པ་མི་ཕམ་སྒྲུབ་བརྒྱུད་བསྟན་འཛིན་དཔལ་བཟང་པོ། རྒྱལ་སྲས་པདྨ་དབང་དྲག་སྐུ་ཕྲེང་གསུམ་པ་ཕྲིན་ལས་ཀུན་ཁྱབ་འགྱུར་མེད། རོལ་མོ་སྤྲུལ་སྐུ་རྡོར་རྩ་ཀརྨ་གུ་རུ། འགོར་ཕུ་སྒྲུབ་སྡེ་སྤྲུལ་སྐུ། སྒ་བདེ་རྟོགས་ལྡན་བསྟན་པ་རབ་རྒྱས། དྲག་སྔགས་པ་ཚེ་དབང་བདུད་འདུལ། སྒྲུབ་དཔོན་ཨ་བསྟན་རྒྱ་མཚོ་སོགས་འཛི་སྒར་བླ་མ་མཁན་སྤྲུལ་ཕལ་ཆེ་བ་དང༌། ཟུར་མང་ནས་གར་དྲུང་རྣམ་གཉིས། སྐུ་མཆེད་འཇོ་ཕུ་ཆོས་ལུ་རྒྱ་མཚོ་དང་ཝཾ་དགོན་བླ་རྒན་ངག་ཆོས་སྤྲུལ་སྐུ་སོགས་ཀྱང་ཐུགས་ཡིད་འདྲེས་པའི་བླ་སློབ་ཡིན་ཞིང༌། གཞན་ཡང་ཆོས་བདག་ཏུ་གྱུར་པའི་སྐྱེས་ཆེན་ཤིན་ཏུ་མང་ངོ༌། །
༈ འཛི་སྒར་སྐུ་ཕྲེང་དགུ་པ་འཇིགས་མེད་མི་ཕམ་བསྟན་པའི་ཉི་གཞོན་ཕྲིན་ལས་ཀུན་ཁྱབ་དཔལ་བཟང་པོ་མཆོག་ནི།
༄༅། །རྒྱལ་བ་ཀུན་གྱི་མཁྱེན་བརྩེ་ནུས་པའི་འཕྲུལ། །
སྙིགས་དུས་འགྲོ་བ་གདུལ་ཕྱིར་གཅིག་བསྡུས་གཟུགས། །
སྤངས་རྟོགས་འཇིགས་མེད་བདུད་ཀྱིས་མི་ཕམ་པ། །
བསྟན་པའི་ཉི་གཞོན་ཞབས་ལ་གསོལ་བ་འདེབས། །
ཞེས་གསུངས་པ་ལྟར། མདོ་ཁམས་ལྷ་ཆབ་སྡེ་གསུམ་གྱི་དབུས་སུ། དོན་བརྒྱུད་དཔལ་ལྡན་འབྲུག་པའི་བཤད་སྒྲུབ་གཉིས་ལྡན་གྱི་བསྟན་པ་རིན་པོ་ཆེ་གཞན་དྲིང་མི་འཇོག་པར་རང་རྐང་ཚུགས་པའི་ཆོས་སྡེ་ཆེན་པོ་འཛི་སྒར་ཞེས་གནའ་སྔར་ནས་ས་སྡེ་ཡུལ་རིས་སྒེར་བཙན་བདག་ཐོབ་ཏུ་ཡོད་པའི་སྡེ་འབངས་སྟོད་སྨད་བར་གསུམ་གྱི་སྐྱབས་མགོན་ཆོས་ཀྱི་རྒྱལ་པོ། རྒྱ་བོད་གཉིས་སུ་གནས་པའི་འཛི་སྒར་དགོན་པའི་ཆོས་སྡེ་ལྷ་འབངས་མ་ལག་དང་བཅས་པ་ཐམས་ཅད་ཀྱི་གཙུག་གི་རྒྱན་དང་མགོན་སྐྱབས་དཔུང་གཉེན་གཅིག་པུར་གྱུར་པ། སྐྱབས་མགོན་འཛི་སྒར་མཆོག་སྤྲུལ་ཡིད་བཞིན་ནོར་བུ་སྐུ་ཕྲེང་དགུ་པ། དོན་གྱི་སླད་དུ་མཚན་ནས་སྨོས་ན། འཇིགས་མེད་མི་ཕམ་བསྟན་པའི་ཉི་གཞོན་ཕྲིན་ལས་ཀུན་ཁྱབ་དཔལ་བཟང་པོ་མཆོག་ནི། རྗེ་འཛི་སྒར་མཆོག་སྤྲུལ་བདུན་པ་མཆོག་ལྷོ་མོན་གདུལ་བྱའི་མགོན་དུ་ཕེབས་སྐབས། ད་ལྟའི་ཡབ་ཚང་དུ་བཞུགས་ནས་གནས་ཁང་བྱིན་གྱིས་བརླབས་ཤིང༌། མ་འོངས་པར་ང་ཉིད་སླར་ཡང་འདིར་འོང་ངོ་ཞེས་གསུང་ཚིག་རྡོ་རྗེའི་བཀའ་གསང་བསྩལ་བ་དུས་སུ་སྨིན་ཏེ། རབ་བྱུང་བཅུ་དྲུག་པའི་ལྕགས་གླང་༼༡༩༦༡༽ལོར་ལྷོ་ཡུལ་ནགས་མའི་ལྗོངས་སུ། ཡབ་བློ་གྲོས་དང༌། ཡུམ་མཚོ་མོ་གཉིས་ཀྱི་སྲས་སུ་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས། དཔལ་རྒྱལ་བའི་དབང་པོ་༧ཀརྨ་པ་བཅུ་དྲུག་པ་རང་བྱུང་རིག་པའི་རྡོ་རྗེའི་ཞལ་སྔ་ནས། ཐབས་མཆོག་བློ་གྲོས་དང༌། ཤེས་རབ་མཚོ་མོ། ཁྱེའུ་གླང་ལོ་པ་ཞེས་ཡབ་ཡུམ་དགུང་སྙིང་བཅས་གསལ་བར་ལུང་བསྟན་ཏེ། གོང་མའི་ཡང་སྲིད་འཁྲུལ་བྲལ་དུ་ངོས་འཛིན་གནང༌། མཚན་ཀརྨ་བསྟན་པ་འགྱུར་མེད་གོ་ཆ་ཕྲིན་ལས་ཀུན་ཁྱབ་དཔལ་བཟང་པོར་གསོལ། གོོང་མའི་ཕྱག་མཛོད་རྒྱ་མཚོ་མི་ཕམ་དང་འབྲུག་སྒར་གཉེར་ངག་དབང་རྣམ་རྒྱལ་ཟུང་ནས་རྩ་འཛིན་བདག་གཉེར་བཟང་པོ་ཞུས་ནས། སྐུ་ཆུང་ངུ་ནས་འབྲུུག་ཐིམ་ཕུག་གི་རྒྱལ་སར། བླ་སྤྲུལ་མཁན་སློབ་འདུས་པ་རྒྱ་མཚོའི་དབུས་སུ་སེང་གེའི་ཁྲི་ལ་མངའ་གསོལ། རིམ་གྱིས་དཔལ་རྒྱལ་དབང་ཀརྨ་པ་མཆོག་རིགས་བདག་ཏུ་བསྟེན་ཏེ། སྨིན་གྲོལ་གྱི་རིམ་པ་མང་དུ་མནོས། གཞན་ཡང་སྐྱབས་རྗེ་དིལ་མགོ་མཁྱེན་བརྩེ། རྗེ་མཁན་པོ་བསྟན་འཛིན་དོན་གྲུབ། རྗེ་མདོ་ཁམས་པ་སྐལ་བཟང་དོན་བརྒྱུད་ཉི་མ། སྐྱབས་རྗེ་ཨ་ལྡེའུ་རིན་པོ་ཆེ་སོགས་བཤེས་གཉེན་དུ་མ་ཚུལ་བཞིན་བསྟེན་ནས་གསར་རྙིང་རིས་མེད་ཀྱི་མདོ་སྔགས་ཟབ་དགུའི་གདམས་པས་ཐུགས་རྒྱུད་ཡོངས་སུ་གཏམས། སངས་རྒྱས་ཀྱི་བསྟན་པ་རིན་པོ་ཆེའི་མཛེས་རྒྱན་དང་སྒྲུབ་བརྒྱུད་གདམས་པ་རྒྱ་མཚོའི་བང་མཛོད་དུ་གྱུར། དགུང་གྲངས་སོ་གཅིག་ལྕགས་ལུག་༼༡༩༩༡༽ལོའི་གྲོ་བཞིན་ཟླ་བའི་དཀར་ཕྱོགས་རྫོགས་པ་དང་པོའི་ཉིན། རྗེ་གོང་མ་རིན་བྱོན་གྱི་གདན་ས་ཆོས་སྡེ་ཆེན་པོ་འཛི་སྒར་བཀྲ་ཤིས་ཐུབ་བསྟན་ཆོས་འཁོར་གླིང་དུ། མི་འཇིགས་སེང་གེས་བཏེགས་པའི་ཁྲི་འཕང་མཐོན་པོར་ཞབས་ཟུང་འཁོར་ལོའི་རེ་ཁ་ཐོག་མར་བཀོད་ཅིང༌། གསེར་ཁྲིར་མངའ་གསོལ་གྱི་མཛད་སྒོ་ཤིན་ཏུ་རྒྱས། ཆོས་དང་ཟང་ཟིང་གིས་གདུལ་བྱའི་རེ་བ་ཡིད་བཞིན་དུ་ཚིམས་པར་མཛད་ཅིང༌། ལྷག་པར་བཤད་སྒྲུབ་ཀྱི་སྡེ་གཉིས་པོ་ལ་གཙིགས་མཐོང་ཆེན་པོ་གནང་ནས་བསྟོད་བསྔགས་དང་འབྲེལ་གནང་སྦྱིན་འགྲན་དུ་མི་བཟོད་པ་མཛད་པས། བཤད་སྒྲུབ་ཀྱི་སྡེ་གཉིས་ཆར་སྔར་དང་མི་འདྲ་བར་མི་ཉམས་གོང་འཕེལ་གྱི་བཀའ་དྲིན་ཆེན་པོ་བྱུང༌། དེ་ནས་བཟུང་བོད་ཀྱི་གདན་སར་ཐེངས་མང་པོར་ཕེབས་ནས། སྨིན་གྲོལ་ཆོས་ཀྱི་བདུད་རྩིས་གདུལ་བྱའི་རེ་བ་ཡོངས་སུ་བསྐངས། སྔར་གྱི་འདུ་ཁང་ཆེན་མོ་དུས་ངན་ནང་ཞིག་རལ་དུ་གྱུར་པར་ཐུགས་ཀྱིས་མ་བཟོད་ནས། དགུང་གྲངས་སོ་དྲུག་མེ་བྱི་༼༡༩༩༦༽ལོར་དབུ་བཙུགས་ཏེ། རྒྱུ་གྲོན་ཕངས་པ་མེད་པར་ནར་གཏོང་མཛད་དེ། གཙུག་ལག་ཁང་རྟེན་དང་བརྟེན་པ་བཅས་པ་སྔོན་ལས་ལྷག་པ་ཅན་གསར་བཞེངས་གནང༌། དེ་བཞིན་བསྟན་རྩ་དགེ་འདུན་གྱི་སྡེ་རྣམས་ལ་འཚོ་བའི་མཐུན་རྐྱེན་ནར་མར་སྦྱར་ཏེ། བོད་གངས་ཅན་ཡུལ་དུ་བསྟན་པ་སྤྱི་དང་བྱེ་བྲག་ཧ་ཅང་ཉག་ཕྲ་བའི་སྐབས་སུ། བསྟན་པའི་མེ་རོ་གསོས་ཏེ། རྒྱལ་བསྟན་ཉམས་པ་སོར་ཆུད་དང་མི་ཉམས་གོང་འཕེལ་གྱི་ཕྱག་རྗེས་བླ་ན་མེད་པར་འཇོག་བཞིན་ཡོད། མ་ཟད་འཕགས་ཡུལ་རྒྱ་གར་བྱང་ཕྱོགས་གུ་རུའི་གནས་མཆོག་མཚོ་པདྨ་ཅན་དུ། བསྟན་གཞི་གཙུག་ལག་ཁང་རྟེན་བརྟེན་པ་དང་བཅས་པ་གསར་བསྐྲུན་དང་བསྟན་རྩ་འདུས་སྡེ་དར་སྤེལ། རྒྱ་གར་ཤར་ཕྱོགས་རྡོ་རྗེ་གླིང་དུ། འབྲུག་རྒྱལ་ཡུམ་ཕུན་ཚོགས་ཆོས་སྒྲོན་ལགས་ནས་མཆོད་གཞིས་ཕུལ་བའི་བསྟི་གནས་སུ། དོན་བརྒྱུད་དཔལ་ལྡན་འབྲུག་པའི་འཆད་ཉན་སྒོམ་སྒྲུབ་ཀྱི་སྲོལ་བཟང་པོ་འཛུགས་བཞིན་པ་བཅས་བསྟན་འགྲོའི་དཔལ་དུ་ཞབས་པད་རྡོ་རྗེའི་ཁམས་སུ་བརྟན་ཅིང༌། མཛད་ཕྲིན་ཡར་ངོའི་ཟླ་ལ་འགྲན་བཞིན་བཞུགས་པ་ལགས་སོ། །དེ་ཡང་སྐྱབས་མགོན་ཞེས་པའི་མཚན་ནི་ད་ལྟར་གསར་དུ་བྲིས་པ་མ་ཡིན་པར། ལོ་ཉིས་བརྒྱའི་སྔོན་ནས་བརྩམས་པའི་རིག་འཛིན་རྡོ་རྗེ་དྲག་པོའི་རྣམ་ཐར་དུ་འཁོད་པ་གཞིར་བཞག་པ་ཙམ་ཡིན་ནོ།། །།སརྦ་མངྒ་ལཾ།། །།
ཕྱོགས་སྒྲིག་པ། འཛི་སྒར་མཁན་པོ་ཕྲིན་ལས་རྡོ་རྗེ།
(མཆན། འཛི་སྒར་དགོན་ནི་སྡེ་དགེ་འཇོ་མདའ་རུ་ཡོད།)
བསམ་ཚུལ་འབྲི།
སྡེ་དགེ་དྲ་བ་དབུ་འབྱེད་མཛད་སྒོ་གནང་པ།
འབྲེལ་ཡོད་ཀྱི་རྩོམ་གཞན།
-
༧སྐྱབས་རྗེ་ཁམས་སྤྲུལ་རིན་པོ་ཆེ་དགོངས་པ་གཞན་དོན་དུ་གཤེགས་པར་མྱ་ངན་དང་གདུང་སེམས་མཉམ་བསྐྱེད་ཞུ་བཞིན་ཡོད།
-
༈ འཕགས་ཡུལ་རྫོང་སར་བཤད་གྲྭའི་མཁན་ཆེན་ཀུན་དགའ་དབང་ཕྱུག་མཆོག་གི་མཛད་རྣམ།
-
འཛི་སྒར་བླ་མ་དབང་རྡོར་རིན་པོ་ཆེའི་རྣམ་ཐར།
-
མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
-
མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།