འཛི་སྒར་དགོན་གྱི་ཆོས་བརྡ།
༼ཆོས་བརྡ།༽
༈ དེ་ཡང་རྒྱལ་བའི་བསྟན་པ་རིན་པོ་ཆེ་སྤྱི་དང་། བྱེ་བྲག་བཀའ་བརྒྱུད་ཀྱི་བསྟན་པ་མི་ཉམས་གོང་འཕེལ་དང་ཉམས་པ་སོར་ཆུད་ཆེད། འཕགས་ཡུལ་འཛི་སྒར་དགོན་ནས་རྡོ་རྗེ་གླིང་དུ་མདོ་སྔགས་རིག་གནས་བཅས་པའི་བཤད་གྲྭ་གསར་འཛུགས་དང་འབྲེལ། ལོ་ལྟར་དགུན་ཀའི་ཆོས་མཚམས་དང་སྟབས་བསྟུན་ནས། འཛི་སྒར་མཁན་རིན་པོ་ཆེ་ཕྲིན་ལས་རྡོ་རྗེས་འདི་གར་མཚོ་པདྨ་དཔལ་འཛི་སྒར་དགོན་བྱེས་ཀྱི་གདན་ས་རུ་རྒྱུད་སྡེའི་སྐོར་སོགས་ཁྲིད་ལུང་ཟླ་བ་གཅིག་རིང་གནང་གཏན་ཁེལ་སོང་བས། འདི་ལོར་བོད་ཟླ་ ༡༡ ཚེས་ ༡༩ དང་། སྤྱི་ཟླ་ ༡ ཚེས་ ༩ ནས། བོད་ཟླ་ ༡༢ ཚེས་ ༡༩ དང་། སྤྱི་ཟླ་ ༢ ཚེས་ ༨ བར་རྩ་རྒྱུད་བརྟག་གཉིས་འཇམ་མགོན་ཀོང་སྤྲུལ་ཚིག་འགྲེལ་གཞོམ་མེད་རྡོ་རྗེའི་གསང་འབྱེད་ལ། ཀོང་སྤྲུལ་སྤྱི་དོན་རྡོ་རྗེ་དྲྭ་བའི་རྒྱན་དང་། ཀུན་མཁྱེན་པདྨ་དཀར་པོའི་བརྟག་གཉིས་སྤྱི་དོན་གྲུབ་པའི་ཡིད་འཕྲོག་ཟུང་སྦྲགས་ནས་འཆད་ཁྲིད་དང་། ཞོར་དུ་མཉམ་མེད་དྭགས་པོའི་བཀའ་འབུམ། བདེ་གཤེགས་ཕག་མོ་གྲུ་པའི་བཀའ་འབུམ། འདུལ་བ་མཚོ་ཊྭིཀ་ཉི་མའི་འོད་ཟེར་བཅས་ཀྱི་ལུང་།
ལོ་རྗེས་མའི་དགུན་དུས་རྣམས་ལ་རིམ་བཞིན་ཟབ་མོ་ནང་དོན། བསྲེ་འཕོའི་འགྲེལ་བ། དུས་འཁོར་འགྲེལ་ཆེན་སོགས་དང་། ཞོར་དུ་གླིང་རས་བཀའ་འབུམ། རྒྱ་རས་བཀའ་འབུམ། རྒོད་ཚང་པའི་བཀའ་འབུམ། ཡང་དགོན་པའི་བཀའ་འབུམ། ཀུན་མཁྱེན་པད་དཀར་དང་མཁས་དབང་སངས་རྒྱས་རྡོ་རྗེའི་གསུང་འབུམ་སོགས་ཀྱི་ལུང་བཅས། མདོར་ན་ཆོས་རྗེ་མཁན་ཆེན་དོན་བརྒྱུད་ཉི་མ་དང་། མཁས་གྲུབ་སངས་རྒྱས་ཕྲིན་ལས། སྐྱབས་རྗེ་སེང་བྲག་རིན་པོ་ཆེ་སོགས་ལས་ཐོབ་པའི་ཁྲིད་ལུང་གི་རྒྱུན་རྣམས་དགུན་དུས་ཟླ་རེར་སྤེལ་འཆར།
དེ་ལྟར་བརྟག་གཉིས་སོགས་རྒྱུད་སྡེའི་ཁྲིད་རྣམས་ཞུ་བའི་སྔོན་འགྲོའི་ཆ་རྐྱེན་ནི། རབ་ན་དགྱེས་རྡོར་གྱི་དབང་ཐོབ་པ་དང་། ཡང་ན་སྔགས་བླ་མེད་ཀྱི་དབང་གང་རུང་ཐོབ་ནས། སྒྲུབ་པ་བ་ཡིན་ན་སྔོན་འགྲོ་འབུམ་བཞི་གྲུབ་པ་དང་། དཔེ་ཆ་བ་ཡིན་ན་དབུ་མ་གཟིགས་ཟིན་པ་ཞིག་དགོས། ཕྱག་དཔེ་ཀོང་སྤྲུལ་འགྲེལ་བ་སོ་སོ་ནས་རྙེད་དགོས་ལ། ཀུན་མཁྱེན་སྤྱི་དོན་འདི་ནས་ཚར་རེ་འབུལ་བའི་གྲ་སྒྲིག་ཡོད། ཟླ་བ་གཅིག་རིང་བཞུགས་ཁང་དང་ཞལ་ལག་ནི་རང་དགོན་ནས་འབུལ་བའི་ཐབས་ཤེས་མཐུན་འགྱུར་གང་འགྲུབ་ཅི་ལྕོགས་ཞུ་འཆར་ལགས་ན། དེ་ལུགས་ཐུགས་བཞག་གིས་ངེས་ཕེབས་མཆིས་ཚེ་སྔོན་ཙམ་ནས་འབྲེལ་བ་གནང་རོགས།
འབྲེལ་བ་ཞུ་ཡུལ། དགོན་པའི་ཕྱག་མཛོད་ཞལ་པར། 09816497788
ཡང་ན་མཁན་པོ་བསོད་ནམས་བཀྲ་ཤིས་ཞལ་པར། 08447794887
འཕགས་ཡུལ་ཧི་མ་ལའི་ཆར། ཟ་ཧོར་མཚོ་པདྨ་ཅན་འཛི་སྒར་བཀྲིས་བཤད་སྒྲུབ་ཐུབ་བསྟན་ཆོས་འཁོར་དགེ་འཕེལ་གླིང་ནས། བོད་རབ་གནས་ཤིང་རྟ་ལོའི་བོད་ཟླ་ ༡༠ ཚེས་ ༡༠ སྤྱི་ཟླ་ ༡༢ ཚེས་ ༡ ལ་ཕུལ།།
བསམ་ཚུལ་འབྲི།
སློབ་དཔོན་ཆེན་པོའི་ཀཿཐོག་རྡོ་རྗེ་གདན་གྱི་གནས་བཤད།
འབྲེལ་ཡོད་ཀྱི་རྩོམ་གཞན།
-
སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་རྒྱུན་སྐབས་ ༣ པའི་ལོ་འཁོར་༣ གྱི་ལས་བསྡོམས་སྙིང་བསྡུས།
-
ཨ་ཧྥི་ཏབ་ཀརྨ་སིང་པུ་རེ་ཝལ་ (Aftab Karma Singh Pureval) ལགས་ཨ་རིའི་གྲོང་ཁྱེར་སིན་སི་ན་ཊི་( Cincinnati) ཡི་སྤྱི་ཁྱབ་གྲོང་ཁྱེར་དཔོན་པོའི་གོ་གནས་ཀྱི་རྒྱལ་ཁ་ཐོབ་པ།
-
བོད་ཕྲུག་༢༧་ལ་སྲིད་སྐྱོང་གི་སློབ་ཡོན་གཟེངས་རྟགས་ཐོབ་པའི་ནང་རང་རེ་སྡེ་དགེ་བའི་སློབ་མ་གཅིག་ཡོད་པ་རེད།
-
དབུས་རྒྱུན་སྐབས་གསུམ་པའི་ཚོགས་ཐེངས་གཉིས་པ་དེ་བསྐོང་ཚོགས་གནང་
-
ལོ་གསར་པའི་འཚམ་འདྲི་བཀྲ་ཤིས་བདེ་ལེགས།