འབྲི་གཉན་འདོང་གི་གནས་ཡིག
འབྲི་གཉན་འདོང་གི་གནས་ཡིག
ཡོང་ཁུངས། ངེད་དྲ་བ།
༈ འབྲི་རྒྱལ་གཉན་འདོང་ཆེན་པོ་ཉེ་འཁོར་དང་བཅས་པའི་གནས་ཀྱི་དཀར་ཆག་ཅུང་ཟད་བརྗོད་པ་སྐལ་བཟང་ཀུན་དགའི་མཆོད་སྤྲིན་ཞེས་བྱ་བ་བཞུགས་སོ།།
ན་མོ་གུ་རུ་དྷེ་བ་ཌཱཀྐི་ནི།
རིག་སྟོང་སྤྲོས་བྲལ་འགྱུར་མེད་ཆོས་ཀྱི་སྐུ། །ལྷུན་འགྲུབ་རང་གདངས་མ་འགག་ལོངས་སྤྱོད་རྫོགས། །
གང་འདུལ་ཅི་སྣང་སྟོན་མཁས་སྤྲུལ་པའི་སྐུ། །སྐུ་གསུམ་དབྱེར་མེད་དཔལ་མགོན་བླ་མར་འདུད། །
སྔོན་སྨོན་རྣམ་པར་དག་པའི་ཐུགས་བསྐྱེད་ལས། །གངས་ཅན་བོད་ལ་སྐུ་དྲིན་མཚུངས་མེད་པའི། །
སྐྱེ་ཤི་མི་མངའ་རྫུས་སྐྱེས་སྤྲུལ་པའི་སྐུ། །པདྨ་ཐོད་ཕྲེང་རྩལ་ལ་ཕྱག་འཚལ་ལོ། །
ཟབ་གཏེར་བསྟན་པའི་མཛོད་ལ་མངའ་བརྙེས་ཤིང་། །ལྷར་བཅས་སྐྱེ་དགུ་ཡོངས་ཀྱི་སྐྱབས་གནས་ཆེ། །
པདྨའི་རྒྱལ་ཚབ་མཆོག་ཏུ་མངའ་གསོལ་བའི། །རིག་འཛིན་སྤྲུལ་པའི་གཏེར་སྟོན་རྣམས་ལ་འདུད། །
པདྨའི་བཀའ་གསུང་ཐོད་དུ་བཅིངས་པ་ཡི། །པདྨའི་གཏེར་སྲུང་རྡོ་རྗེ་བློ་གྲོས་སོགས། །
བཀའ་གཏེར་ཆོས་སྲུང་རྒྱ་མཚོའི་ཚོགས་རྣམས་ཀྱིས། །དགྱེས་པར་དགོངས་ལ་གནང་བའི་སྐབས་ཕྱེས་ཤིག །
དེ་ལ་ཨོ་རྒྱན་གྱི་སློབ་དཔོན་ཆེན་པོ་པདྨ་ཐོད་ཕྲེང་རྩལ་གྱིས་རྫུ་འཕྲུལ་གྱིས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་འཕགས་མཆོག་ཐུགས་རྗེ་ཆེན་པོ་སྤྱན་རས་གཟིགས་ཀྱི་གནས་མཆོག གངས་ལྗོངས་དགེ་བསྙེན་ཉེར་གཅིག་དང་མཆེད་གསུམ་གྱི་ཡ་གྱལ། སར་བཞུགས་ཀྱི་སེམས་དཔའ་ཆེན་པོ་གཉན་འདོང་རྡོ་རྗེ་བློ་གྲོས་རྩལ་ལམ་རྡོ་རྗེ་འབར་བ་རྩལ་ཞེས་གྲགས་པའི་སྐུ་མཁར་ཕོ་བྲང་ཆེན་པོ། མདོ་ཁམས་སྡེ་དགེའི་ཆོས་རྒྱལ་ཆེན་པོ་རིམ་པར་བྱོན་པ་རྣམས་ཀྱི་སྐུ་ལྷ་ཐོ་དོར་གཉེན་པོ། དཔལ་སྡེ་དགེ་ལྷུན་འགྲུབ་སྟེང་གི་ཆོས་གྲྭ་ཆེན་པོའི་ལྷ་རི། བོད་ཁམས་སྐྱོང་བའི་གཞི་བདག་སྲུང་མ་ཆེན་པོ་མདོ་ཁམས་རི་དབང་སྤུན་དགུའི་བྱེ་བྲག སོ་གཉིས་གནས་ཀྱི་ནང་ཚན་ཛ་ལེན་དྷ་ར་གཉིས་པ། མདོ་ཁམས་གནས་ཆེན་ཉེར་ལྔའི་ནང་གསེས་ཡོན་ཏན་སྐུའི་གནས་མཆོག་ཡེ་ནའི་ཤེལ་མདུང་ཕྱུག་མོའམ་འབྲི་རྒྱལ་གཉན་རྫོང་ཆེན་པོ་ཞེས་གྲགས་པའི་གནས་ཀྱི་དཀར་ཆག་འདི་ཉིད་འབྲི་བ་ལ་དོན་རྣམ་པ་བཅུ་སྟེ། གནས་ཀྱི་ཆེ་བའི་ཡོན་ཏན་དང་ཡུལ་ཕྱོགས་དབེན་གནས་སོགས་ཀྱི་ཁྱད་པར་སྤྱིར་བསྟན་པ། གྲུབ་པའི་རིག་འཛིན་དུ་མས་ཞབས་ཀྱིས་བཅགས་ནས་བྱིན་གྱིས་བརླབས་ཚུལ། ཡེ་ན་བཀྲ་ཤིས་ལྷ་རྩེའི་ཉེ་འགྲམ་རྣམས་ན་གནས་རྟེན་རང་བྱོན་ཇི་ལྟར་བཞུགས་པ། དབུ་རྩེ་དང་གནས་ཆུང་སོགས་རྩེ་བསྐོར་འགྲོ་ལམ་ན་གནས་རྟེན་རང་བྱོན་ཇི་ལྟར་བཞུགས་པ། བདེ་བ་ཕུག་དང་ར་ཕུག་གུ་ཆུང་རྩེ་རེ་བཅས་ན་གནས་རྟེན་རང་བྱོན་ཇི་ལྟར་བཞུགས་པ། ལྕགས་ར་དང་རྒོད་འབྲང་མཆོད་རྟེན་ནག་འབར་སོགས་ན་གནས་རྟེན་རང་བྱོན་ཇི་ལྟར་བཞུགས་པ། གནས་ཕུག་འོག་མ་ཁྲོམ་དབེན་གནས་ཀྱི་ཕྱི་ནང་ན་རྟེན་རང་བྱོན་བཞུགས་པ། གཉན་འདོང་གནས་ཀྱི་ཉེ་སྐོར་དག་ན་གནས་རྟེན་རང་བྱོན་ཇི་ལྟར་བཞུགས་པ། གནས་ལ་སྤང་བླང་དང་ཕྱག་མཆོད་བསྐོར་བ་བགྱིས་པའི་ཕན་ཡོན་ནོ།།
དང་པོ་ནི། དེ་ཡང་གནས་མཆོག་འདི་ཉིད་འགྲོ་བ་མཆོག་དམན་སྤྱིའི་སྣང་ངོར་དུས་རྟག་ཏུ་ཁམས་དངས་ཤིང་རིག་པ་བཀྲ་བ། ཧ་ཅང་ཚ་བ་དང་གྲང་བའི་གནོད་པ་མེད་ཅིང་ལུང་པ་ཕུ་ཤོ་མདའ་རལ་དུ་མ་སོང་བ། ཤར་ཕྱེས་ལྷོ་སྤུངས། ནུབ་འདན་བྱང་སྐྱོར་བ་སྟེ་སའི་ཀ་བ་ཆེན་པོ་བཞི་དང་། ཡུལ་གྱི་དགེ་བཅུ་མཐའ་དག་མ་ཚང་བ་མེད་པ། འབོལ་ལོ་དང་ཤུག་པ་སོགས་བཟང་ཤིང་སྣ་ཚོགས་པའི་དྲྭ་བས་འབྲེལ་ཞིང་། རྡོ་རྗེའི་བྲག་རི་དང་ནེའུ་གསེང་སྤང་ལྗང་ལྟ་ན་སྡུག་པས་མངོན་པར་མཛེས་པ། ཁ་དོག་དང་རོ་ནུས་ཁྱད་པར་འཕགས་པའི་རྩ་ཆེའི་སྨན་རྫས་ཀྱི་རིགས་དུ་མས་གང་ཞིང་། བཟང་པོའི་དྲི་བསུང་འཐུལ་བའི་མེ་ཏོག་སྣ་ཚོགས་པ་རིན་པོ་ཆེའི་ཕྲ་ཚོམ་བཏབ་པ་ལྟར་བྱས་ནས་སྐྱེས་པ། འཛམ་གླིང་ན་དཀོན་པའི་རྩ་ཆེའི་སྲོག་ཆགས་ཀྱི་རིགས་སུ་གཏོགས་པའི་སྟག་གཟིག་དོམ་དྲེད་དང་། ཝ་འཕར་གཡི་སྤྱང་སོགས་གཅན་གཟན་གཏུམ་པོའི་རིགས་དང་། ཤྭ་གནའ་རྒོ་གསུམ་དང་མི་རྒོད་གླ་བ་སོགས་རི་སྐྱེས་སྲོག་ཆགས་ཀྱི་ཚོགས་མང་པོ་བག་ཡངས་སུ་རྒྱུ་ཞིང་རྩ་ཆུ་ལ་རོལ་པ། འདབ་ཆགས་རྣམས་ཀྱིས་མགྲིན་པའི་གླུ་དབྱངས་སྣ་ཚོགས་དར་དིར་སྒྲོགས་ཤིང་འཕུར་ལྡིང་གི་གར་ལ་རྩེན་པ། མདུན་ནས་འབྲི་ཀླུང་གསེར་ལྡན་རིང་མོ་ཡོན་ཆབ་བཤམས་པ་ལྟར་བྱས་ནས་ལྷུང་ལྷུང་གི་སྒྲ་དང་བཅས་དལ་གྱིས་འབབས་ཤིང་། གཡས་གཡོན་མདུན་རྒྱབ་རྣམས་ནས་མར་རྒྱན་བཏགས་པ་འདྲ་བའི་ཆུ་མིག་འདྲ་བའི་དིལ་འབུར་མང་པོ་དང་། ཞིང་རྣམས་ཐམས་ཅད་ཀྱང་ཤོག་སྐྱ་གཏོར་འདྲའི་ཚུལ་དུ་ཡོད་པ། སྤོང་བ་བསམ་གཏན་ལ་མོས་པ་རྣམས་བསམ་གཏན་སྒོམ་པའི་གནས་བསྔགས་པའི་བྲག་རིའི་བྱ་སྐྱིབས་དང་། དབེན་པའི་ནགས་ཚལ། མཛེས་པའི་སྤང་ལྗང་སོགས་ཀྱིས་ཁྱབ་པས་མདོ་དང་འདུལ་བ་ནས་བཤད་པའི་གནས་ཀྱི་ཡོན་ཏན་དང་ལྡན་ཞིང་། དབེན་ཞིང་ཉམས་དགའ་ལ་གྲོང་ལས་རྒྱང་གྲགས་ཀྱིས་འཕགས་པས་མངོན་པ་ལས་བཤད་པའི་དོན་དང་མཐུན་པ། རང་བྱུང་གི་ནགས་ཚལ་འཐུག་པོ་དང་། ས་ཁད་མཐོ་ལ་རིག་པ་དྭངས་པ་སོགས་ཞི་ལྷག་བསྒོམ་པའི་གནས་དང་། སྔོན་བྱོན་རིག་འཛིན་གོང་མའི་སྒྲུབ་ཕུག་དང་། གཅོང་རོང་རི་སུལ་སོགས་མང་བས་ཉམས་རྟོགས་འཆར་ཞིང་གཏུམ་མོ་སྒོམ་པའི་གནས་ཀྱི་མཚན་ཉིད་ལྡན་པ། སུར་དཀར་སྐྱེ་ཞིང་ས་གཞི་འཇམ་པ། ནགས་ཚལ་དང་མེ་ཏོག་གི་གླིང་ཆེན་རྒྱས་ཤིང་རི་བྲག་ནོར་བུའི་དབྱིབས་ཅན་མང་བ། དབང་ཕྱོགས་ནས་འབྲི་ཀླུང་གསེར་ལྡན་རིང་མོ་དལ་གྱིས་འབབས་ཤིང་ཕུག་པ་ཟླ་གམ་དབང་གི་མདངས་ལྡན་དུ་མས་གང་བ། སྐྲི་ནག་དང་ཚེར་མ་སོགས་དུག་སྨན་དང་དུག་ཤིང་མང་པོ་སྐྱེ་ཞིང་། ཤིན་ཏུ་ཁྲོས་པའི་ཚུལ་ཅན་གྱི་བྲག་རི་དམར་པོ་དང་ནག་པོ་དུ་མས་བརྗིད་པ་སོགས་ལས་བཞི་སོ་སོའི་གནས་ཀྱི་མཚན་ཉིད་ཚང་བ། བྲག་སྐྱིབས་དང་རི་བྲག་གི་ཁོང་གསེང་རྣམས་ན་གྲུབ་པའི་རིག་འཛིན་དུ་མ་ཏིང་ངེ་འཛིན་ལ་བཞུགས་ཤིང་། དུས་དུས་སུ་དཔའ་བོ་དང་མཁའ་འགྲོ་མ་རྣམས་ཚོགས་ཀྱི་འདུ་བ་ལ་རོལ་པའི་རྟགས་ལ་རོགས་གསལ་དགོན་མདོ་འགག་རྒོད་ཧེའི་ཞབས་ཆུ་རྩ་བྲག་ཁུང་ནས་རྔ་སྒྲ་དུང་སྐད་སོགས་རྒྱུན་དུ་ཐོས་རྒྱུ་ཡོད་པ་དང་། བྲག་སྔོན་མ་དང་ཕར་རི་རྔ་བརྡུང་འཇུ་གཉིས་ན་མཚམས་སུ་རྔ་བརྡུང་བའི་སྒྲ་ཐོས་རྒྱུ་ཡོད་པས་མཚོན་ལུང་པ་ཕར་ཚུར་ན་རྔ་དུང་རོལ་མོ་བྱེད་པའི་སྒྲ་མང་པོ་ཐོས་རྒྱུ་ཡོད་པ། གཉན་འདོང་གནས་མདུན་དུ་གནས་ཆུང་མ་དང་། བདེ་བ་ཕུག དཔལ་རི་པད་མཁར། ཁྲོམ་དབེན་གནས་སོགས་དང་། གཡས་ཕྱོགས་ནས་གུ་ཆུང་དང་། ཇི་རི། རྩེ་རི། དཔལ་ཕུང་བཅས་དང་། གཡོན་ཕྱོགས་ནས་གུར་ཕུ་དང་། ར་ཏྲཾ། བཀའ་མཛོད་ནང་། རྒྱབ་ཕྱོགས་ནས་སྒྲོལ་མ་རང་བྱོན་དང་། ཐང་རྒྱལ་སྒྲུབ་གནས། ཕྱི་ནས་རྒོད་འབྲང་དང་། ཨ་ཕྱི། ཇག་ར། བྲག་ར། གདོང་ཟམ། རྫོང་འབར། གནམ་རྫོང་། ཀིརྟི། མཁའ་འགྲོ་སྡེ་ལྔ། ཛཾ་ཆེན། ཐུག་རྗེ་སོགས་གནས་ཆེན་དང་གནས་ཕྲན་དུ་མས་ཡོངས་སུ་གང་བས་གནས་ཀྱི་བཀོད་པ་མཎྜལ་སྤུངས་པ་འདྲ་བ། མཛོ་གཡག་གཉིས་ནས་སྣ་ཁྲིད་སྦྲུལ་དིལ་སྟག་གཡག་གཤིན་རྗེ་གནས་ཆུང་མ་སོགས་བྲག་རི་དཀར་པོའི་ཕྲེང་བ་མུ་ཏིག་བསྟར་ལ་བརྒྱུས་པ་འདྲ་བས་སྐ་རགས་བཅིངས་པ་འདྲ་བ། རྒྱུན་དུ་དཔའ་བོ་མཁའ་འགྲོའི་ཚོགས་རྣམས་འདུ་ཞིང་གྲུབ་པའི་རིག་འཛིན་དུ་མས་ཞབས་ཀྱིས་བཅགས་ནས་བྱིན་གྱིས་བརླབས་པ་སོགས་མདོར་ན་མདོ་དང་སྔགས་གསར་རྙིང་གི་རྒྱུད་གཞུང་རྣམས་ནས་བསྟན་པའི་གནས་ཀྱི་མཚན་ཉིད་མཐའ་དག་མ་ཚང་བར་མེད་ཅིང་། ཡུལ་ཕྱོགས་དབེན་གནས་སོགས་ཀྱི་བཀོད་པ་ཁྱད་པར་འཕགས་པ་ཞིག་སྟེ། དབེན་གནས་མཎྜལ་བཀོད་པ་འདྲ། །སྡེ་དཔོན་མཚོ་ལ་དར་ཆགས་འདྲ། །རྒྱ་ཞིང་ཤོག་སྐྱ་གཏོར་བ་འདྲ། །གཙང་པོ་ཡོན་ཆབ་བཤམས་པ་འདྲ། །བྲག་དཀར་སྐ་རགས་བཅིངས་པ་འདྲ། །གཡས་རི་སྟག་མོ་ངར་བ་འདྲ། །གཡོན་རི་གཟིག་མོ་འགྱིང་བ་འདྲ། །རྒྱབ་རི་རིན་ཆེན་སྤུངས་པ་འདྲ། །མདུན་རི་མདུང་མོ་གཤིབ་པ་འདྲ། །དིལ་འབུར་ལྷ་བཤོས་བཤམས་པ་འདྲ། །ཆུ་མིག་མར་རྒྱན་བཏགས་པ་འདྲ། །ཤུག་པ་བྱ་རྒོད་སྤུངས་པ་འདྲ། །ཞེས་དང་། སྦྲ་ཕུབ་བརྒྱ་དང་བརྒྱད་ཅུ། །འཁོར་རུ་བ་བརྒྱ་དང་བརྒྱད་ཅུ། །འོ་མཚོ་བརྒྱ་དང་བརྒྱད་ཅུ། །ཆུ་མིག་བརྒྱ་དང་བརྒྱད་ཅུ། །སྨྱུག་ཕུང་བརྒྱ་དང་བརྒྱད་ཅུ། །ཤུག་ཕུང་བརྒྱ་དང་བརྒྱད་ཅུ། །སུར་ཕུང་བརྒྱ་དང་བརྒྱད་ཅུ། །སྤེན་ཕུང་བརྒྱ་དང་བརྒྱད་ཅུ། །གསས་མཁར་བརྒྱ་དང་བརྒྱད་ཅུ། །གསེར་གྱི་རི་བདུན་རོལ་མཚོ་བདུན། །དངུལ་གྱི་རི་དགུ་དུང་རི་དགུ། །གཡུ་རི་དགུ་བཅས་བཞུགས་སོ་གསུངས། །ཞེས་གནས་ཡིག་ལས་གསུངས་པ་ལྟར་རོ།།
གནས་འདིར་སྲས་བཅས་རྒྱལ་བ་ཡོངས་ཀྱི་ཐུགས་རྗེ་གཅིག་ཏུ་བསྡུས་པའི་རང་གཟུགས་འཕགས་མཆོག་འཇིག་རྟེན་མགོན་པོ་འཁོར་གྱི་ཚོགས་དང་བཅས་པ་མངོན་སུམ་ལྟར་དུ་བཞུགས་ནས་འགྲོ་རྣམས་རྗེས་སུ་འཛིན་པར་མཛད་པས་དག་པའི་ཞིང་གི་གནས་མཆོག་པོ་ཏ་ལ་དང་ཁྱད་པར་མེད་ཅིང་། སྔོན་བསགས་ལས་སྐལ་ཅན་རྣམས་གནས་འདིར་སླེབས་ཚེ་སྣང་བ་གནས་འགྱུར། ལུ་ཀྱི་བ་སྤུ་ཟིང་། མིག་ནས་མཆི་མ་འཁྲུགས། དད་པ་དང་དག་སྣང་འབྱུང་། ངེས་འབྱུང་དང་སྐྱོ་ཤས་ལྡང་། འབྲལ་མི་ཕོད་པ་ཙམ་གྱི་དགའ་གདུང་དྲག་པོ་སྐྱེ། འཕགས་བོད་གྲུབ་རིག་རྒྱ་མཚོའི་བྱིན་རླབས་དང་རྫུ་འཕྲུལ་གྱི་བཀོད་པ་ཞིས་ལོས་ཡིན་སྙམ་པ་ཡོང་བ་དང་། དག་ཆེན་འཕགས་པ་རྣམས་ཀྱི་གཟིགས་ངོར་གནས་ཀྱི་རྡོ་རྡེའུ་རྩི་ཤིང་ནགས་ཚལ་ཚུན་ཆད་ཀྱང་དཔའ་བོ་དང་མཁའ་འགྲོའི་སྐུ་མངོན་སུམ་དུ་སྣང་ཞིང་། རབ་འབྱམས་རྒྱལ་བ་རྒྱ་མཚོའི་དཀྱིལ་འཁོར་གྱི་ཚོགས་ཆེན་པོ་མངོན་སུམ་དུ་བཞུགས་པའི་རྟགས་ལ་རྩ་གསུམ་རབ་འབྱམས་རྒྱ་མཚོའི་གསང་གསུམ་གྱི་རོལ་པ་ལས་བྱོན་པའི་བཀའ་རྟགས་རང་བྱོན་གྱི་ཚོགས་བསམ་གྱིས་མི་ཁྱབ་པས་གང་ལ། དཔའ་བོ་མཁའ་འགྲོ་སྤྲིན་ལྟར་འདུ་བའི་བསྟི་གནས་ཆེན་པོ་ཛ་ལེནྡྷ་ར་དང་དབྱེད་མེད་དུ་བཞུགས་པ་སྟེ། མཁན་ཆེན་དྷཱ་ནའི་མཚན་གྱིས་གཉན་འདོང་བསང་མཆོད་འདོད་དགུའི་སྤྲིན་ཕུང་ལས། འབྲི་ཀླུང་གསེར་ལྡན་འཁྱིལ་པའི་འགྲམ་ངོགས་ན། །ཛ་ལེན་དྷ་ར་གཉིས་པ་གཉན་འདོང་ཞེས། །དཔའ་བོ་མཁའ་འགྲོའི་ཚོགས་ཁང་ཆེན་པོ་ཡི། །ཞེས་དང་། མཁྱེན་བརྩེ་ཆོས་ཀྱི་བློ་གྲོས་ཀྱིས་བླ་མ་ཆོས་རབ་ཀྱི་གསོལ་འདེབས་ལས། ཛ་ལེནྡྷ་ར་གཉན་འདོང་གནས་མཆོག་ཏུ། །ཚེ་དང་སྒྲུབ་པ་སྙོམ་པའི་དམ་བཅའ་བཞག །ཅེས་གསུངས་པ་ལྟར་རོ། །གནས་ཀྱི་ཕྱོགས་བཞིའི་བཞུགས་ཚུལ་ལ་གནས་མདུན་ཁྲོམ་དབེན་གནས་ཀྱི་ཕྱོགས་ནས་བྲག་དཀར་གཡུ་འབྲུག་གྱེན་དུ་ལངས་པ་འདྲ་ཞིག་ཡོད་པ་རབ་བརྟན་མཁན་པོ་ཐུབ་བསྟན་མཚན་ཅན་གྱིས་གསུངས་ཤིང་། གཡས་ཕྱོགས་གནམ་རྫོང་མགོ་ནས་མཇལ་ན་ཙིཏྟ་ཟུར་བརྒྱད་པ་དངོས་སུ་བཞག་པ་དང་མཚུངས་པ། རྒྱབ་ཕྱོགས་ཡེ་ལ་མགོ་ནས་བལྟས་ན་འདབ་ཆགས་ཀྱི་རྒྱལ་པོ་ནམ་མཁའ་ལྡིང་གིས་གཤོག་གུར་ཕུབ་པ་དང་། གཡོན་ཕྱོགས་སྡེ་དགེ་ལྷུན་འགྲུབ་སྟེང་དང་ལྕང་ར་སོགས་ནས་མཇལ་ན་ལྷའི་རྒྱབ་ཡོལ་ཞིག་གིས་ཚུལ་དུ་བཞུགས་ཡོད་པ་སྟེ། ཨོ་རྒྱན་བདེ་ཆེན་གླིང་པའི་གནས་གཏེར་གྱི་དཀར་ཆག་ལས། ཁྱད་པར་གནས་ཤིག་འབྲི་ཡི་གཡོན་ཟུར་ན༔ གཉེར་ཆེན་རྫོང་ནི་སྟོང་ཞེས་བྱ་བའི་རི༔ ཤར་ནས་བལྟས་ན་གཡུ་འབྲུག་མཁར་འགྲོ་འདྲ༔ ནུབ་ནས་བལྟས་ན་ཁྱུང་གིས་གུར་དབུ་འདྲ༔ ལྷོ་ནས་བལྟས་ན་ཙིཏྟ་ཟུར་བརྒྱད་འདྲ༔ བྱང་ནས་བལྟས་ན་ལྷ་ཡི་རྒྱབ་ཡོལ་འདྲ༔ གནས་ཀྱི་དཀར་ཆག་བཱི་མའི་སྒྲུབ་ཕུག་གི༔ གཡོན་ལོགས་རིན་ཆེན་བྲག་གི་སྒྲོམ་ན་ཡོད༔ མུ་ཏིག་སྤྲུལ་པ་ལྷ་སྲས་ཁྱད་པར་ཅན༔ བཀའ་ཡི་འཕྲིན་ལས་སྐྱོང་བའི་ལས་མཁན་ནི༔ གནས་དེའི་སྲུང་མ་ཚོགས་བདག་ཡིན་པས་ན༔ དེ་ཐོན་བསྒྲུབ་ན་ཉམས་གུད་སེལ་བ་ཡིན༔ ཞེས་གསུངས་པ་ལྟར་རོ།།
གཞན་ཡང་གནས་བདག་དགེ་བསྙེན་ཆེན་པོ་རྡོ་རྗེ་བློ་གྲོས་སམ་རྡོ་རྗེ་མཆོག་རབ་རྩལ་གྱི་བཀའ་ཉན་རུ་འདྲེན་རྗེ་འབར་བ། རྒྱབ་ཏུ་རྒོད་འབྲང་རྡོ་རྗེ་ཐོག་འབེབས་སོགས་ཆེ་བཙན་གྱི་སྲུང་མ་དཔག་ཏུ་མེད་པས་བསྐོར་ནས་བཞུགས་པ་ཡིན་པར་ཤེས་པར་བྱའོ།།
གཉིས་པ་གྲུབ་པའི་རིག་འཛིན་དུ་མས་ཞབས་ཀྱིས་བཅགས་ནས་བྱིན་གྱིས་བརླབས་ཚུལ་ནི།
དེ་ཡང་མདོ་ཁམས་གནས་ཆེན་ཉེར་ལྔའི་མདོ་བྱང་ལས། ཡོན་ཏན་སྐུ་ཡི་གནས་མཆོག་བསྟན་པ་ནི༔ བོད་ཀྱི་མདོ་ཁམས་འབྲི་ཞེས་བྱ་བ་རུ༔ དངུལ་ཞེས་ལུང་པར་ལྡང་ཞེས་བྱ་བའི་རི༔ བྲག་རི་གཡུ་འབྲུག་གནམ་དུ་འགྲོ་བ་འདྲ༔ བི་མ་མི་ཏྲ་ལོ་གཅིག་བཞུགས་པའི་གནས༔ པད་འབྱུང་དག་པའི་འཁོར་བདུན་དང་བཅས་པའི༔ དབང་གི་དཀྱིལ་འཁོར་ཕོ་བྲང་དགུ་ཀློང་ཡོད༔ ཕུག་པའི་མདོ་རུ་ཐུགས་རྗེ་ཆེན་པོ་དང་༔ གཡས་ལོགས་རྟ་མགྲིན་གཡོན་ལོགས་ཕག་མོ་དང་༔ ཕུག་པའི་སྟེང་དུ་ཚེ་དཔག་མེད་མགོན་དང་༔ གཞན་ཡང་ཡིག་འབྲུ་སྣ་ཚོགས་གསལ་བ་སྟེ༔ ཟབ་པའི་གཏེར་ལྔ་སྐུ་ཡི་གཏེར་གསུམ་སྦས༔ སྲུང་མ་ལྷ་ཆེན་བློ་གྲོས་ཉིད་ལ་གཏད༔ རི་ཞོལ་འདི་རུ་ང་སྤྲུལ་བརྩོན་འགྲུས་མིང་༔ གྲུབ་ཐོབ་ཞིག་བྱོན་དེ་ནས་མགོ་བརྩམས་པར༔ རྒྱལ་པོ་བྱིས་པའི་མིང་ཅན་བློ་གྲོས་ཅན༔ རྒྱལ་བའི་བསྟན་པར་བྱ་བ་བྱེད་པ་འབྱུང་༔ དེ་ནས་རྒྱལ་རབས་སིལ་མ་ལྔ་ཙམ་ལ༔ མུ་ཏིག་སྤྲུལ་པ་དཔལ་གྱི་མིང་ཅན་འབྱུང་༔ དེ་་དུས་དཀར་ཆག་འདི་ཡང་ས་སྟེང་འབྱུང་༔ ཞེས་གསུངས་པ་ལྟར། སློབ་དཔོན་རིན་པོ་ཆེ་དག་པའི་འཁོར་བདུན་དང་བཅས་པས་གནས་འདིར་སྒྲུབ་པ་མཛད་ནས་རྩ་གསུམ་ཆོས་སྲུང་རྒྱ་མཚོའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་ས་རྡོ་རི་བྲག་རྩི་ཤིང་ནགས་ཚལ་ཐམས་ཅད་བྱིན་གྱིས་བརླབས། མ་འོངས་པའི་འགྲོ་བ་རྣམས་ཀྱི་དོན་དུ་ཟབ་པའི་གཏེར་ལྔ་དང་སྐུ་ཡི་གཏེར་གསུམ་སོགས་ཆོས་གཏེར་དང་རྫས་གཏེར་དཔག་ཏུ་མེད་པ་ཞིག་སྦས་ཏེ་གཏེར་སྲུང་ལ་བཀའ་གཏད། རྗེ་འབངས་ཉེར་ལྔའི་ཡ་གྱལ་པཎ་ཆེན་བི་མ་མི་ཏྲས་ལོ་གཅིག་སྒྲུབ་པ་མཛད་པས་མཚོན་སྐྱེས་མཆོག་དམ་པ་མང་པོས་སྒྲུབ་གནས་སུ་མཛད་དེ་བསྟན་དང་འགྲོ་ལ་ཕན་བདེ་ཟད་མི་ཤེས་པར་སྤེལ་བའི་གནས་སུ་གྱུར་པས། གཏེར་འབྱིན་ཡོངས་ཀྱི་ཐུ་བོ་རིག་འཛིན་བདུད་འདུལ་རྡོ་རྗེས་ལྷ་གཉན་རྡོ་རྗེ་བློ་གྲོས་ཀྱི་གསོལ་མཆོད་ལས། པདྨས་བྱིན་བརླབས་རིག་འཛིན་འདུ་བའི་གནས། །མདོ་ཁམས་གནས་མཆོག་མེ་འདོང་དཔལ་གྱི་རི། །གསང་བ་རིན་ཆེན་སྣ་ལྔའི་ཕོ་བྲང་ནས། །ཞེས་དང་། རྡོ་རྗེ་དྲག་པོ་འཕྲིན་ལས་འདུས་པ་རྩལ་གྱིས་འབྲི་གཉན་རྡོ་རྗེ་བློ་གྲོས་ཀྱི་བསང་མཆོད་ལས། འབྲི་ཀླུང་རྒྱུད་གྱུར་ཆསོ་ཀྱིས་ཕྱུག་པའི་ཡུལ། །དཔལ་གྱི་རི་བོ་མཐོ་བརྗིད་ལྷུན་ཆགས་པ། །གཞོམ་བྲལ་ལྷུན་པོའི་སྤོ་ལ་ཅོ་འདྲིའི་ནང་། །རྣམ་པར་རྒྱལ་བའི་ཁང་བཟང་ལ་འགྲན་པའི། །རིན་ཆེན་གཞལ་མེད་ལྟ་བས་མི་ངོམས་དབུས། །ཞེས་གསུངས་ཤིང་། མདོ་བྱང་གསལ་བྱེད་ཟིན་ཐུང་འཇམ་མགོན་ཀོང་སྤྲུལ་རིན་པོ་ཆེས་མཛད་པ་ལས། ཡོན་ཏན་གྱི་སྐུའི་གནས་རྡུལ་མདའ་ཕོ་བྲང་སྡེ་དགེ་ལྷུན་འགྲུབ་སྟེང་གི་མདུན་ངོས་འབྲི་གཉན་ལྡངས། བདུད་འདུལ་རྡོ་རྗེས་གནས་སྒོ་ཕྱེས་ཤིང་གཏེར་ཆེན་དེ་ཉིད་དང་། གནམ་ཆོས་མི་འགྱུར་རྡོ་རྗེ། སྡེ་དགེ་གྲུབ་ཐོབ་རྣམས་ཀྱིས་གནས་ཡིག་ཡོད། འདིར་ང་སྤྲུལ་བརྩོན་འགྲུས་མིང་ནི་གྲུབ་ཆེན་ཐང་སྟོང་རྒྱལ་པོའམ་བརྩོན་འགྲུས་བཟང་པོ་ཕེབས། སྡེ་དགེའི་རྒྱལ་ས་ཐོག་མར་འདེབས་པའི་ས་འདུལ་བྱིན་རླབས་སོགས་མཛད། རྒྱལ་པོ་བྱིས་པའི་མིང་ཅན་ནི་ཆོས་རྒྱལ་བསྟན་པ་ཚེ་རིང་། མུ་ཏིག་སྤྲུལ་པ་ནི་ད་ལྟའི་ལྷ་སྲས་དཔལ་ལྡན་འཆི་མེད་རྟག་པའི་རྡོ་རྗེའོ། །ཞེས་གསུངས་སོ།།
རིག་འཛིན་གྲུབ་པའི་དབང་ཕྱུག་ཆེན་པོ་བདུད་འདུལ་རྡོ་རྗེ་རྩལ་གྱིས་གནས་ཞལ་ཕྱེས་ནས་ལོ་ཆེན་རྣམ་པར་སྣང་མཛད་ཀྱི་སྐུ་འགགས་སོགས་གཏེར་ཀ་དུ་མ་བཞེས་པ་དང་། གནས་བདག་གིས་འཕྲིན་ལས་ཅི་བཅོལ་བསྒྲུབ་པའི་དམ་བཅའ་ཕུལ་ནས་གནས་བསང་ཡང་རྒྱས་པར་མཛད་པ་སྟེ། གནས་ཀྱི་བསང་མཆོད་འཕྲིན་ལས་བཞིའི་སྤྲིན་བཏིབས་ལས། ཅེས་བརྗོད་ཟོལ་རྒན་འཁྲུལ་གཏམ་འདི། །སྟག་ལོ་སྟག་ཟླའི་བཅོ་ལྔའི་ཉིན། །ལྷ་རི་མཐོན་པོའི་རྩེ་མོ་ནས། །བླ་མའི་རྣལ་འབྱོར་བསྒོམ་པའི་དུས། །གཏེར་བདག་འཁོར་བཅས་སྔོན་དུ་བྱུང་། །ཁྱོད་ཀྱི་རྗེས་སུ་འབྲང་ཞེས་ཟེར། །འཕྲིན་ལས་བསྒྲུབ་པའི་དམ་བཅའ་ཕུལ། །དེ་དུས་བདག་ཀྱང་སྤྲོ་བ་སྐྱེས། །ཨོ་རྒྱན་རྗེ་ལ་གསོལ་བ་བཏབ། དགའ་རྟགས་མཚོན་པ་འདི་ཉིད་བྲིས། །མི་ལོ་བཅུ་གཅིག་མ་སོང་བར། །རང་ཡུལ་མི་སྤེལ་དམ་བཅའ་བཞག །དེ་བར་བདག་གིས་ཁྱོད་མི་བརྗེད། །བརྫུན་རྒན་ང་ལ་སུ་ཡིད་ཆེས། །ནམ་ཞིག་དུས་སྐལ་དམན་དུས་ལ། །འགྱོད་དགོས་བྱུང་དོགས་ཡོད་ན་སྙམ། །ང་འགྲོ་བྱང་གི་ཕྱོགས་ལ་འགྲོ། །མཁའ་འགྲོ་ཆསོ་སྐྱོང་གཏེར་བདག་རྣམས། །རྣལ་འབྱོར་ང་ཡི་གྲོགས་ལ་ཆོས། །རང་ཡུལ་གཟུགས་ཅན་གཟུགས་མེད་རྣམས། །སྐུ་ཁམས་བཟང་པར་བཞུགས་པར་ཞུ། །ཞེས་གསུངས་སོ། །རིག་འཛིན་སྤྲུལ་པའི་གཏེར་སྟོན་མི་འགྱུར་རྡོ་རྗེས་གཉན་འདོང་གི་གནས་ལག་གཅིག་གི་གནས་ཞལ་ཕྱེས་ནས་བཀའ་རྟགས་རང་བྱོན་གྱི་ཚོགས་བསམ་གྱིས་མི་ཁྱབ་པ་གསར་དུ་བཏོན་ནས་ངོ་སྤྲོད་མཛད་པའི་ཚུལ་གནས་ཆོས་གཉན་འདོང་གནས་ཡིག་ལས་གསལ་ཞིང་། མདོར་བསྡུས་པ་ཙམ་ནི་མཁས་གྲུབ་ཀརྨ་ཆགས་མེད་ཀྱིས་མཛད་པའི་རིག་འཛིན་དེ་ཉིད་ཀྱི་ཐུན་མོང་ཕྱིའི་རྣམ་ཐར་ཆེན་མོ་ལས། དེ་ནས་ཆུ་ཡོས་སྤྲེལ་ཟླ་ཡི། །དམར་པོའི་ཕྱོགས་ཀྱི་ཚེས་གཉིས་ལ། །འབྲི་རྒྱུད་གཉན་འདོང་གནས་ལག་ཕྱེས། །བྱང་ཆུབ་ཆེན་པོའི་མཆོད་རྟེན་དང་། །གསེར་གྱི་མཆོད་རྟེན་ཡི་གེ་ཨ། །ཚེ་དཔག་རྟ་ཕག་ཡབ་ཡུམ་སྐུ། །བདེ་མཆོག་རྡོ་རྗེ་ཕག་མོའི་སྐུ། །ཨོ་རྒྱན་བྲམ་ཟེ་མཆོག་སྲེད་སྐུ། །ལོ་མ་གྱོན་མ་རྡོ་རྗེ་འཆང་། །དུང་ལྕགས་ཟངས་ཀྱི་མཆོད་རྟེན་གསུམ། །ཕྱག་རྡོར་སྐུ་རྣམས་རང་བྱོན་དང་། །རི་བོ་རྩེ་ལྔའི་བཀོད་པ་དང་། །རྡོ་རྗེ་བུམ་པ་ནོར་བུ་སོགས། །ཕྱག་མཚན་མང་པོ་རང་བྱོན་དང་། །ཨོ་རྒྱན་ཕུར་པའི་སྐུ་རྗེས་སོགས། །ཞབས་རྗེས་མང་རབས་གསར་དུ་བཏོན། །ཞེས་གསུངས་པ་ལྟར་རོ། །འབྲོམ་སྟོན་པ་དང་རྒྱལ་རོང་དགེ་སློང་བསམ་གཏན་བཟང་པོ་སོགས་ཀྱི་རྣམ་པར་སྤྲུལ་པ་སྡེ་དགེ་གྲུབ་ཐོབ་ཀུན་དགའ་རྒྱ་མཚོས་གནས་མཆོག་ཀ་རྒྱལ་ཞི་ར་དང་། ར་ས་གངས་ཅན་བྲག་དཀར་རམ་ར་ས་རྒྱལ་བའི་གནས། གཤིན་རྗེའི་སྒྲུབ་གནས་རྨོང་འགག་སྟོད། ནོར་རྒྱུན་མའི་སྒྲུབ་གནས་གནས་འཁེན་དཀར། སེང་གེ་སྒྲའི་གནས་མཆོག་དྷརྨ་མདོ། གནས་རྨོང་འགག་སྟོད། ནོར་རྒྱུན་མའི་སྒྲུབ་གནས་གནས་འཁེན་དཀར། སེང་གེའི་སྒྲ་གནས་མཆོག་དྷརྨ་མདོ། དབྱངས་ཅན་མའི་གནས་མཆོག་རྡོ་ཕུ་བྱ་ཝང་བྲག་དཀར་སོགས་ཀྱི་གནས་ཞལ་ཕྱེས་ནས་གནས་ཡིག་བཀོད་མཛད་པ་ད་ལྟར་བཞུགས་ཤིང་། གྲུབ་ཐོབ་ཆེན་པོ་ཛ་ལནྡྷ་ར་གཉིས་པ་འབྲི་རྒྱལ་གཉན་འདོང་ཆེན་པོར་ཕེབས་ནས་བྱིན་རླབས་གནས་ཞལ་ཕྱེས་ཏེ་གནས་རྣམས་ལ་བཞུགས་པའི་ལྷ་ཚོགས་རྣམས་ཀྱི་དཀར་ཆག་ཀྱང་བཀོད་པར་མཛད། ༼ སྡེ་དགེ་གྲུབ་ཐོབ་ཀུན་དགའ་རྒྱ་མཚོས་གནས་འདིར་གནས་ཞལ་འབྱེད་པ་ནས་བཟུང་སྡེ་དགེ་རྒྱལ་བློན་རྣམས་གལ་ཆེ་དུས་མ་གཏོགས་གནས་འདིར་དབྱར་སྐྱིད་མཛད་པར་ཕེབས་ཤིང་། དེ་སྐབས་མར་ཁུ་གཡང་ཐང་དུ་བཞུགས་མཛད་པར་ཡེ་ནས་སྡེ་པས་བཞུགས་གྲ་བསྒྲིག་དགོས་པའི་ཚུལ་བཤད་རྒྱུ་འདུག མཆན།༽ རིག་འཛིན་ཆེན་པོ་གར་དབང་འགྲོ་འདུལ་གླིང་པའམ་གཏེར་སྟོན་ཉི་མ་གྲགས་པ་གནས་འདིར་བྱོན་ནས་བྱིན་གྱིས་བརླབས་པར་མཛད་ཅིང་། དུས་དེར་རབ་བརྟན་སྐྱེས་པ་ལ་ནས་བྱོན་པས་ནག་ཕྱོགས་གདུག་པ་ཅན་གྱིས་ཐོ་བརྩམས་པ་དམ་འོག་ཏུ་བཅུག་མཛད་པའི་ཚུལ་ཉི་གྲགས་རྣམ་ཐར་གུ་བཀྲའི་ཆོས་འབྱུང་དུ་གསལ་བ་ལས། ཁྱད་པར་སྡེ་དགེ་རང་གི་མངའ་ཞབས་སུའང་། འབྲི་ཆུ་རྒྱུད་ཀྱི་རབ་བརྟན་གྲུ་ཁར་འདྲེ་ངན་ཞིག་གིས་བར་ཆད་བརྩམས་པ་དམ་འོག་ཏུ་བཅུག་མཛད་པའི་ཚུལ་ཉི་གྲགས་རྣམ་ཐར་གུ་བཀྲའི་ཆོས་འབྱུང་དུ་གསལ་བ་ལས། ཁྱད་པར་སྡེ་དགེ་རང་གི་མངའ་ཞབས་སུའང་། འབྲི་ཆུ་རྒྱུད་ཀྱི་རབ་བརྟན་གྲུ་ཁར་འདྲེ་ངན་ཞིག་གིས་བར་ཆད་བརྩམས་པར་ཐུགས་འུར་ནས་དྲག་པོའི་སྟོབས་ཀྱིས་ཞབས་འོག་ཏུ་མནན་པས་ཞབས་རྗེས་ཤིག་བྱུང་ཞིང་། དེ་མཚུངས་སྐྱེས་པ་ལར་དེང་སང་གྲགས་ཆེ་བའི་ལྷ་འདྲེ་ཟླ་བའི་མིང་ཅན་དེས་ཐོ་རྩོམ་པར་བྱུང་བས་དབང་དྲག་འབར་བའི་ཏིང་ངེ་འཛིན་གྱིས་གཟིར་ཞིང་དམ་འོག་ཏུ་བཅུགས་པས་ཆོས་བརྒྱུད་འཛིན་ཚད་ལ་མི་གནོད་པའི་དམ་བཅའ་དང་སྲོག་སྙིང་ཕུལ་ཞིང་། དེ་དུས་ཕྱག་ཞབས་ཀྱི་རྗེས་འགའ་ཞིག་ཀྱང་ཡོད་ཚུལ་དང་། ཞེས་གསུངས་སོ། །ལོ་ཆེན་བཻ་རོའི་རྣམ་སྤྲུལ་མི་འགྱུར་ཚེ་དབང་གསང་སྔགས་གྲགས་པའམ་བོན་གཏེར་ཨོ་རྒྱན་བདེ་ཆེན་གླིང་པས་ས་སྐྱོང་སྡེ་དགེའི་ཆོས་རྒྱལ་ཆེན་པོའི་བཀའ་ཕེབས་ལྟར་གནས་སྒོའི་གཡོན་ལོགས་ཀྱི་བྲག་ངོས་ད་ལྟར་གཏེར་ཁུང་ཡོད་ས་ནས་གུ་རུ་རིན་པོ་ཆེའི་དབུ་ལྗོན་དང་། ཡེ་ཤེས་མཚོ་རྒྱལ་གྱི་མདུན་ཁེབ་དང་ལན་ཚར། ནམ་མཁའི་སྙིང་པོའི་གཟུངས་ཐག་རྡོ་རྗེ་ཆ་གཅིག ལྷ་སྲས་མུ་རུབ་བཙད་པོའི་ཞལ་བུ་ཕྲ་མན་ལས་གྲུབ་པ། ཡོངས་འདུས་ཆོས་ཀྱི་ཤོག་སེར། གཞན་ཡང་དམ་རྫས་འགའ་སོགས་ཉིད་ལ་དབང་བའི་གཏེར་རྫས་མང་པོ་ཁྲོམ་གཏེར་དུ་དྲངས་ཏེ། ས་དབང་རིན་པོ་ཆེ་ལ་རྟེན་སྐལ་དུ་མཛད་པའི་ཚུལ་གཏེར་འབྱུང་རྣམ་ཐར་ཆེན་མོ་ལས་གསལ་ཞིང་། དུས་དེར་དྲི་བཟང་པོའི་ངད་ཀྱིས་དཔལ་རི་པད་མཁར་ཚུན་ཆད་དུ་ཁྱབ་པ་བྱུང་ཚུལ་འདུག
༼ཀློང་ཐང་སེང་ཆེན་བྲག་ནས་དྲངས་པའི་བདེ་གླིང་གཏེར་གྱི་དཀར་ཆག་ལས། དེ་ནས་ཁྱད་པར་དྲུག་གི་རྒྱ་གཏེར་ནི༔ གསུང་གི་དམ་ཆོས་ཡང་བྱང་ལྟར་དུ་བཀོལ༔ རྒྱ་གར་གྲུབ་ཐོབ་དགུ་ཡི་བྱང་སེམས་ཀྱི༔ བདེ་སྟོང་ཡེ་ཤེས་རིལ་བུ་རྡོག་གསུམ་དང་༔ ཨོ་རྒྱན་རྗེ་འབངས་ཉེར་ལྔ་བཅས་པ་དེས༔ བཀའ་བརྒྱད་འདུས་པའི་སྒོ་ནས་བསྒྲུབས་པ་ཡི༔ ཆོས་སྨན་མཐེབ་མཛུབ་ཚོན་ཁྱུད་བདུན་ཕྲག་དང་༔ མཚོ་རྒྱལ་མདུན་ཁེབས་བཻ་རོའི་དྲ་ལྕིབ་ཚལ༔ ནམ་སྙིང་ཚེ་ཡི་གཟུངས་རྡོར་ཆ་གཅིག་བཅས༔ ཞེས་དང་། རིག་འཛིན་གཡུང་དྲུང་བདུད་འདུལ་ཐོགས་མེད་རྩལ་གྱི་རྣམ་ཐར་ཆེན་མོ་ངོ་མཚར་པདྨའི་དགའ་ཚལ་ཐབས་ཤེས་ཉི་ཟླའི་རྒྱན་ཅན་ལས། ༡༤༤ དེ་ནས་ལྕགས་ར་ཕོ་བྲང་དུ་སོང་བའི་ཚེ་འབངས་དེ་ཉིད་བཅས་ནས་མཐུན་སྦྱོར་བགྱིས་ཤིང་། གོང་གི་ལུང་ལྟར་མི་དབང་གི་ཞབས་བརྟན། རང་གི་རྩ་བཤགས་སོགས་ཀྱི་སླད་དུ་རང་གཏེར་རྩ་བ་གསུམ་གྱི་ཚོགས་ཁྲི་རལ་དུ་སྒྲུབ་ཚེ་དེར་ཐན་པ་ཆེན་པོ་ཡོད་སྐབས་སུ་མཆིས་པས་ཆར་འབེབས་སུ་ཡུལ་ལྷ་སྤྱི་བྱེ་བྲག་རྡོ་རྗེ་བློ་གྲོས་སོགས་ལ་ཆབ་ཤོག་སྤྲིངས་པས་ཆར་མྱུར་དུ་འབབས་པ་སོགས་ངོ་མཚར་ཆེ་བར་བྱུང་ངོ་། །དེ་ནས་ཁ་རག་རྡོ་སྐུ་བཅས་ལ་ཁྲུས་གསོལ་རབ་གནས་དང་། ཁོ་བོ་རང་གི་རྟེན་གསུམ་མཐིང་འོད་འབར་བ་ལ་མཆོད་འབུལ་ཁྲུས་གསོལ་རབ་གནས་བཅས་གྲུབ་པར་བགྱིས་སོ། །ཉིན་གཅིག་སྡེ་དགེའི་རྒྱལ་ཁབ་ལྷུན་འགྲུབ་སྟེང་ནས་གཉེར་བཀྲ་ཤིས་ཚེ་བརྟན་དང་། བཀྲ་ཤིས་འཕེལ། ཕྱག་མཛོད་བཀྲ་ཤིས་རྒྱ་མཚོ་བཅས་ཆབ་ཤོག་ལྷ་རྫས་ཀྱིས་བཀླུབས་པ་རྒྱ་མཛེས་ཀྱིས་སྤྲས་པའི་ཞུ་ཚིག རྒྱལ་དབང་པདྨ་ཀཱ་རས་དེང་སྐབས་བསྟན་དང་འགྲོ་བའི་དོན་ལ་བསྔགས་བཞིན། བདག་ཅག་གུས་ལྡན་པ་རྣམས་ནས་ཐལ་མོ་ཚངས་པའི་འཁོར་ལོར་བཀོད་ནས་གསོལ་བ་འདེབས་པ་ལ། རྟེན་འབྲེལ་གསང་གསུམ་ལུང་གིས་མངོན་པར་བསྐྱངས་པའི། གོ་ས་མི་ཡི་དབང་པོ་སྲས་ཡུམ་ཆབས་སྲིད་ལ་ཞབས་བརྟན་རིགས་གྲུབ་པ་དང་། ད་སླད་བསྟན་འགྲོའི་དོན་དུ་ཐུགས་ཞལ་ཙམ་མ་ཡིན་པར་འབད་དང་འབད་མུས་སུ་གཟིགས་ཚེ། གོང་ས་མཆོག་སྙན་ཐེབ་དབབ་ནས་ད་ལམ་ངེད་ཀྱི་ཉེ་གམ་ཞིག་ནས་ཟབ་གཏེར་བཞེས་སུ་མ་གནང་འཐུས་བྲལ་དུ་ཞུ་བསམ་པའི། དེ་དོན་ཞབས་འགྱུར་ཞུ་མུས་སུ་སླར་ཡང་ཛ་ཧུའི་གཞུང་ལྟར་ཆར་པ་ཆུ་གྲོགས་སུ་ཞུ་ལགས། དེང་སྐབས་སྙིགས་མའི་མི་རྣམས་བློ་ཡི་ཐེ་ཚོམ་བྲལ་དཀའ་ཞིང་རྒྱལ་བའི་བསྟན་པ་ལ་ཕྱོགས་རིས་ཅི་སྲིད་ཀྱང་འགྲོ་བ་ཐ་དད་པའི་སྣང་བ་ཚིམ་པའི་མཛད་སྒོ་གོང་ཞུས་ལྟར་གནང་དགོས། འདི་ལ་ཟླ་དུས་ཚེས་དུས་འདི་ལ་འདི་ཞེས་དམིགས་བསལ་འཕྲལ་དུ་ཡོད་པར་མཁྱེན་མཁྱེན་མཁྱེན། ཞུ་ཞུ་ཞུ།
ཞེས་པའི་བཀའ་དེ་ལྟར་རི་གཟར་རྦབ་རྒོད་འདྲ་བ་ཕེབས་བྱུང་བའི། དེ་ནུབ་ཉལ་ཁ་མནོ་བསམ་བཏང་ནས་ན་རེ། ད་ལྟ་ཁ་སོང་སྤྲུལ་སྐུ་རིན་པོ་ཆེ་དང་རྟེན་འབྲེལ་ལེགས་པར་མ་འགྲིགས་ན་འདི་ཕྱོགས་ཀྱི་ཟབ་གཏེར་ཙམ་ཐོབ་ཀྱང་ཕན་བསྐྱེད་མེད་པར་འདྲ་ཡང་། ཁོ་རང་དྲེགས་པ་རྣམས་ཡིད་མ་ཆེས་ཤིང་ཐེ་ཚོམ་ཞི་རེད་འདུག ཐག་ཆོད་པས་དེ་ལ་བདག་གིས་བདེན་པ་ཆེན་པོའི་རྟགས་ཤིག་མ་བཞག་ན། འཆི་མེད་ཡབ་སྲས་ཀྱི་བཀའ་ལུང་སྐྱོང་བར་བདོག་ཀྱང་འཕྲིན་ལས་ཀྱི་རོལ་གར་འགག་པ་འདྲ་འདུག་ཅི་བཟློ་བསམ་པའི་གུ་རུ་རིན་པོ་ཆེ་འཆི་མེད་ཡབ་སྲས་ལ་གསོལ་བ་འདེབས་པའི་ངང་ནས་ཉལ་བའི་རྨི་ལམ་དུ། བདག་གི་མདུན་དུ་རྡོ་རྗེ་བློ་གྲོས་ཡིན་དགོས་པའི་མི་མཆོག་སྡེ་དགེའི་སྐུ་དྲག་གི་ཆས་སྤྲས་པ་ཞིག་གིས་ཡི་གེ་བམ་ཆགས་རྒྱ་མཛེས་ལྡན་པ་ལ། དམ་དྲུག་དམར་པོ་ཡོད་པ་ཞིག་བདག་གི་མདུན་དུ་བཞག་ནས་ཕྱིར་སོང་སྣང་ཤར་ཚེ་ཡི་གེ་སུས་ཡིན་ན་བསམ་ནས་བལྟས་པས། ལྷ་མི་འགྲོ་བའི་གཙུག་རྒྱན་ཟེར་བ་ལྟ་བུའི་ཞེས་དྲུང་དུ་ལན། དམ་དྲུག་ལ་བལྟས་པས་མཆོག་གྱུར་བདེ་ཆེན་གླིང་པས་གནང་བ་ཡིན་ཁུལ་ལྟ་བུར་འདུག བམ་ཆགས་ལ་བལྟས་པས་བདེ་ཆེན་དཔལ་གྱི་རི་བོ་ནས་ཕུལ་ཟེར་བ་འདུག ཚུར་ཀློག་པས་དར་དཀར་བཀྲ་ཤིས་རྫས་བརྒྱད་ཀྱི་རི་མོ་བཀྲ་བས་དྲིལ་བ་ཤོག་གུ་དམར་སེར་ཅན་གྱི་ངོས་སུ་ཡི་གེ་འདུག་པར་བལྟས་ཚེ། དང་པོ་མགོ་རྒྱན་ན། རིང་ནས་ལམ་གསུམ་མཐར་ཕྱིན་རིག་འཛིན་ཆེན་པོའི་ཞབས་དྲུང་དུ། དེ་ནས་མཚམས་བཀོད་རྣམས་ངེས་པར་མ་ཐེབ་པས་རྗེས་སུ་མ་གསལ། ད་ལྟ་རང་རེ་གཉིས་ཀྱིས་མདོ་ཁམས་ལྗོངས་སུ་སངས་རྒྱས་བསྟན་པའི་ས་བོན་གདབ་པ་ལ། ཐེབ་དང་མི་ཐེབ་ཐམས་ཅད་ཀྱི་རྟེན་འབྲེལ་གཙོ་བོ་དམ་པ་ལུང་གིས་ཟིན་པའི་བུ་མཆོག་དམ་པ་བཅོ་ལྔ་ལ་རགས་ཤིང་། ཁྱད་པར་དུ་འདི་དག་སྤྲུལ་སྐུ་གཙོར་དགོས་པ་ཡིན་ནའང་། ད་རེས་ཤིག་འཐེན་མེད་ཀྱི་གདུལ་བྱའི་སྣང་བ་རབ་རིབ་མགུ་བའི་ཆེད་དུ་བཞེས་ན་རྡོ་རྗེ་བློ་གྲོས་ཀྱིས་ཟབ་གཏེར་ཕུལ་བ་དེ་ཐོན་དང་ལེགས། ལར་སྔོན་དུས་ལུང་བཞིན་ལས་མེད་དེ་དེ་ལུགས་ཀྱིས་བྲིས་འདུག་པ་རྨིས། ཕྱི་ཉིན་ཞུ་ལེན་དུ་འབྲི་གཉན་གདོང་གི་རྩེ་མོར་སོང་ན་འགྲོ་བའི་སྣང་བ་མགུ་བའི་རྟེན་འབྲེལ་ཡོད་ཅེས་ཕུལ་ནས་འབྲི་གཉན་གདོང་དུ་སོང་ངོ་། །དེ་ཚེ་ས་དཀར་བླ་མ་བློ་གྲོས་དེས་ངེད་ཀྱི་རོགས་དན་ཆེད་དུ་བགྱིས་ནས་གྲབས་ཡུལ་ཆེན་པོར་བསྒྲིགས་འདུག་པའི་ནུབ་མོར་མི་སྨུག་པོ་དར་སྣ་ཚོགས་ཀྱི་ན་བཟའ་གྱོན་པ། རྟ་དཀར་གཡུ་རྔོག་ལ་བཅིབས་ཏེ་འཁོར་དེ་འདྲ་བ་མང་པོས་བསྐོར་ནས་བྱུང་སྟེ་མོས་གུས་བྱེད་དེ་ཞུ་ལན་སྣ་ཚོགས་བྱུང་བ་གཞན་དུ་གསལ། ཁྱད་པར་གནས་ཀྱི་གྲུབ་མཐའ་སྣང་བ་ཚིམ་པའི་ཟབ་གཏེར་ང་ཡིས་ཕུལ་བ་ལ་བླངས་དང་གྲོགས་ཅི་འོས་བྱེད་ཟེར་བ་གསལ་པོར་ཐོས་པ་ལྟར། ཕྱིར་ཉིན་བདེ་བ་ཕུག་ཏུ་སོང་བའི་རྡོ་བ་མ་རྨོས་ལོ་ཏོག་གམ་ཆུ་སྐྱེས་བུམ་པའི་བཟོ་དབྱིབས་འདྲ་བ་དེ་ཡི་ཁ་ལ་ཆས་བཅད་པ་ཕྱེས་པའི་དེ་རུ་ཤོག་སེར་ལ་བལྟས་པས་གཉན་གདོང་སྐོར་གྱི་གཏེར་ཆེན་ལུགས་འདི་དང་འདི་འདྲ་གྱིས་ཟེར་བ་བོད་ཡིག་ཚིག་དོར་བྲིས་པ་འདུག དེ་བཞིན་འཕྲལ་དུ་ཚོལ་བའི་མཁའ་འགྲོ་རྡོ་རྗེ་ཕག་མོའི་ཞབས་འོག་ནས་ཨུ་རྒྱན་བཻ་རོའི་ཕྱག་ཐེབ་བཞིའི་རྗེས་ནས་ཚངས་ཐིག་ལྟེ་བར་བྱས་པའི་མཐོ་སྐོར་གང་དུ་ཚད་བཟུངས་ནས། ཁོང་མི་བཞི་ལྔ་ཙམ་ལ་ལྕགས་ཀྱི་གཟོང་རིང་གིས་ཉི་མ་གསུམ་ཙམ་བརྐོར་བཅུག་པས། ཚེས་བཅོ་ལྔའི་ཉིན་དུ་སྡེ་དགེ་ལྷ་སྲས་བླ་མས་གཙོས་སྲས་ཡུམ་རྣམས་ཀྱིས་དབུ་བྱས་པའི་ཁྲོམ་ཚོགས་བརྒྱ་ཕྲག་བཅོ་བརྒྱ་ཙམ་ལ་མཇལ་བཅུགས་ཏེ། ངག་ཏུ་སིདྡྷི་དབྱངས་སུ་ལེན་པར་བསྐོས་ནས་ཉི་ཤར་དུ་གཏེར་ཞལ་ཕྱེ་རྒྱུའི་གཏེར་ཕུག་རྡོ་རྗེ་ཁུ་ཚུར་གྱི་མཆུ་ཤོང་ཙམ་དེ་ནང་གཏེར་རྫས་ཟིལ་པ་ཕྲམ་ཕྲམ་དུ་མཇལ་ཞིང་། དྲི་ཞིམ་པོས་ཁྱབ་པར་འཐུལ་བར་འདུག་པས། དེ་ནས་མཚོ་རྒྱལ་གྱི་མདུན་ཁེབས། ནམ་སྙིང་ཕྱག་རྡོར། བཻ་རོའི་གཏེར་དྲིལ་གྱི་དྲྭ་ལྕིབས། ཡོངས་འདུས་ཆོས་ཀྱི་ཤོག་སེར། གཞན་ཡང་དམ་རྫས་འགའ་རེ་འདུག་པ་བཏོན་ནས་དབང་བཞི་བླངས་ཤིང་མཁའ་འགྲོ་ཀརྨ་ཆོས་སྒྲོན་གྱི་ཕྱག་ཏུ་གཏད་དེ། སླར་གཏེར་ཚབ་སྦས་ཤིང་གཏེར་ཁུང་འཚང་བར་བགྱིས་ནས་བཀྲ་ཤིས་སྨོན་ལམ་གྱིས་སྦྱར་བ་བྱས་སོ། །ཞེས་དང་། རྣམ་ཐར་བསྡུས་དོན་སྐལ་ལྡན་དགྱེས་པའི་དགའ་སྟོན་ལས། འབྲི་གཉན་གདོང་དུ་ཟབ་མོའི་གཏེར་སྒོ་ངོ་མཚར་ཅན་ཕྱེས་པའི་སྐབས་སུ། མི་དབང་སྡེ་དགེ་རྒྱལ་པོ་རིན་པོ་ཆེ་སྲས་ཡུམ། ས་དཀར་བླ་མ་ཆེན་པོ་སོགས་རྒྱལ་བློན་འཁོར་དང་བཅས་པས་གཙོས་ཁྲོམ་ཚོགས་སྟོང་ཕྲག་མང་པོར་བརྒལ་བའི་དབང་པོའི་སྤྱོད་ཡུལ་མངོན་དུ། ཁྲི་གདུགས་ཤར་བའི་སྔ་དྲོའི་ཆར་གུ་རུ་རིན་པོ་ཆེའི་དབུ་ལྗོན། ཡེ་ཤེས་མཚོ་རྒྱལ་གྱི་མདུན་ཁེབ་དང་ལན་ཚར། ནམ་མཁའི་སྙིང་པོའི་གཟུངས་ཐག་རྡོ་རྗེ་ཆ་གཅིག ལྷ་སྲས་མུ་རུབ་བཙད་པོའི་ཞལ་བུ་ཕྲ་མན་ལས་གྲུབ་པ་སོགས་གཏེར་དུ་དྲངས་ཏེ། ས་དབང་རིན་པོ་ཆེ་ལ་རྟེན་སྐལ་དུ་བྱས་སོ། །ཞེས་གསུངས་སོ།།༽
ཨོ་རྒྱན་མཆོག་གྱུར་བདེ་ཆེན་ཞིག་པོ་གླིང་པ་འཕྲིན་ལས་འགྲོ་འདུལ་རྩལ་གྱིས་གཙོར་མཛད་མཁྱེན་ཀོང་མཆོག་གསུམ་ལྷན་རྒྱས་པ་འབྲི་གཉན་འདོང་དུ་ཕེབས་ནས་མེ་སྦྲུལ་ཆོ་འཕྲུལ་ཟླ་བའི་ཚེས་དགུ་ཉིན་གནས་ཞལ་ཕྱེ་བ་དང་། དུས་དེར་གཏེར་ཆེན་གྱིས་གསང་ཕུག་ནས་འཇམ་དཔལ་བཤེས་གཉེན་གྱི་སྙིང་ཐིག་སྤྱན་དྲངས་པ་མཛད་པ་སྟེ། མཆོག་གླིང་རྣམ་ཐར་བཀྲ་ཤིས་དབྱངས་ཀྱི་ཡན་ལག་གསལ་བྱེད་ལས།
གཏེར་ཆེན་རྣམ་གཉིས་ལྷན་རྒྱས་པ་སྡེ་དགེ་དགོན་ཆེན་དུ་ཕེབས་བསུ་སོགས་བསྙེན་བཀུར་ཕུན་སུམ་ཚོགས་པ་ཞུས། གཏེར་ཆེན་རྣམ་གསུམ་ལྷན་རྒྱས་པས་སྨན་སྒྲུབ་མཛད། དབང་ཆོས་ཀྱི་རེ་འདོད་ཡོངས་སུ་བསྐངས་ཏེ་ཟླ་བ་དེ་ཉིད་ཀྱིས་ཚེས་དགུ་ལ་ཡོན་ཏན་སྐུའི་གནས་འབྲི་གནན་འདོང་གི་གནས་ཞལ་ཕྱེས། ཚོགས་དང་བསྐང་བ་སོགས་མཛད་ཅིང་གསང་ཕུག་ཆེན་མོ་ནས་འཇམ་དཔལ་བཤེས་གཉེན་སྙིང་ཐིག་གསང་གཏེར་དུ་བཞེས། ཞེས་གསལ་བ་ལྟར་རོ།། གཞན་ཡང་ལྷ་འབྲང་གྲུབ་དབང་གཉིས་པའི་རིགས་སྲས་དཔའ་བོ་སྟག་ཤམ་རྡོ་རྗེ་བདུད་རྩི་རྩལ་གྱིས་གནས་འདིའི་ཉེ་ཁུལ་སིནྡྷ་རའི་ཕུག་པ་ནས་རྨི་ལམ་འོད་གསལ་གྱི་ཀློང་དུ་སྒྲོམ་བུ་ཞིག་བཞེས་པ་ལས་བདེ་ཆེན་རྒྱལ་པོའི་བླ་སྒྲུབ་འོད་གསལ་སྙིང་གི་ཐིག་ལེ་སྤྱན་དྲངས་པ་སོགས་གནས་འདི་ནས་གཏེར་སྟོན་སོ་སོས་ཟབ་གཏེར་མང་དུ་སྤྱན་དྲངས་པར་མཛད་དོ། །ཕྱིས་འདིར་བྱམས་མགོན་ཏཱ་ཡི་སི་ཏུ་པདྨ་དབང་མཆོག་རྒྱལ་པོ་དང་། གཏེར་སྲས་འཆི་མེད་རྣམ་གཉིས་སྡེ་དགེ་ཚང་ནས་གདན་འདྲེན་ཞུས་ཏེ་གནས་ཕུག་ཏུ་གཞི་བདག་རྟེན་བཀོལ་བཅའ་སྒྲུབ་ཚད་ལྡན་དང་། རྡོ་རྗེ་ཁྲོས་པའི་ཏིང་ངེ་འཛིན་གྱི་མཚོན་ཆས་ཡུལ་འདྲེ་གཟིར་བསྐྲད་བྱས་པའི་རྟགས་སུ་ཐོག་སེར་དྲག་པོ་འབེབས་པ་དང་། རྟེན་བཀོལ་དོངས་གཞིའི་སྐབས་འཇའ་སྤྲིན་དང་སྦྲང་ཆར་སིལ་བུར་འབེབས་པ་སོགས་ལྷ་ཡི་དགེ་བསྙེན་ཆེན་པོ་རང་གནས་སུ་བཞུགས་པའི་དགེ་མཚན་ལེགས་ཚོགས་ལམ་འགྲོ་གང་ལེགས་བྱུང་ཚུལ་གསུངས། དབོན་སྟོད་མཁན་ཆེན་མཁྱེན་རབ་ཆོས་ཀྱི་འོད་ཟེར་བྱ་རྒོད་ཚང་གིས་གདན་དྲངས་ནས་གནས་འདིར་ཕེབས་ཤིང་། གནས་སྒོ་ནས་ཚོགས་བསྐང་རྒྱ་ཆེར་དང་ཁྲོམ་མང་ལ་རྩ་གསུམ་དྲིལ་སྒྲུབ་ཀྱི་དབང་བསྐུར་བཅས་མཛད། འདི་ལོའི་སྟོན་ཁར་བདག་གི་རེ་ཞུས་བཞིན་གནུབས་ཆེན་སངས་རྒྱས་ཡེ་ཤེས་དང་སྒ་སྟོན་འཇམ་དབྱངས་རྒྱལ་མཚན་སོགས་ཀྱི་རྣམ་པར་སྤྲུལ་པ་རྩོད་བྲལ་དུས་བབས་ཀྱི་པདྨའི་ཕོ་ཉ་བ་ཆེན་པོ་མཆོག་གི་སྤྲུལ་པའི་སྐུ་རིན་པོ་ཆེ་འཇམ་དབྱངས་ཀུན་དགའ་ཚུལ་ཁྲིམས་རྒྱ་མཚོ་འཇིགས་མེད་བསྟན་པའི་རྒྱལ་མཚན་དཔལ་བཟང་པོ་མཆོག་གི་ཞབས་སོར་བཀོད་དེ། གནས་འདབས་ཀློང་ཐང་ནས་འབྱུང་འདུལ་དྲག་པོའི་སྲེག་བླུག་དང་། གནས་མདུན་མཆོད་རྟེན་ནག་འབར་ནས་གུ་རུ་པདྨ་རྒྱལ་པོ་ལ་བརྟེན་པའི་ཚོགས་བསྐང་དང་། རི་ཁྲུས་དམ་བསྒྲགས་རི་བསྟོད། བྱིན་འབེབས་གནས རང་གཞན་ཐམས་ཅད་ངོ་མཚར་ཆེན་པོས་སྣང་བ་གནས་འགྱུར་ནས་ལྷ་དང་བླ་མ་ལས་བསམ་རྒྱུ་མེད་པ་ཞིག་བྱུང་ངོ་། །སྔར་དུས་གྲོ་ཁེ་རྟོགས་ལྡན་ཨོ་རྒྱན་བསྟན་འཛིན་ནོར་བུས་གཉན་འདོང་གནས་སྒོ་ནས་ཕྱག་འབུམ་ཐེར་བརྒྱ་དང་། དཔལ་རི་པད་མཁར་དུ་སིདྡྷི་དུང་གཅིག་བསགས་མཛད་པ་དང་། ཐུབ་བསྟན་ཆོས་འཕེལ་རབ་རྒྱས་ཀྱིས་གནས་འདིར་ལོ་ངོ་སུམ་ཅུ་རྩ་དྲུག་ཙམ་ལ་སྒྲུབ་པ་མཛད་པས་མཚོན་འདྲེན་མཆོག་དམ་པ་དུ་མས་གནས་འདིར་སྒྲུབ་པའི་རྒྱལ་མཚན་བཙུགས་ནས་གྲུབ་པའི་གོ་འཕང་མངོན་དུ་མཛད་པའི་ཚུལ་གཞན་ལས་ཤེས་པར་བྱའོ།།
གསུམ་པ་ཡེ་ན་བཀྲ་ཤིས་ལྷ་རྩེའི་ཉེ་འགྲམ་རྣམས་ན་གནས་རྟེན་རང་བྱོན་ཇི་ལྟར་བཞུགས་པ་ནི།
དེ་ཡང་ཡེ་ན་བཀྲ་ཤིས་ལྷ་རྩེ་ཐེག་མཆོག་ཆོས་ཀྱི་དགའ་ཚལ་དུ་གྲགས་པའི་ཆོས་གྲྭ་ཆེན་པོའི་ལྷག་རྫོང་མགོ་ན་སྔར་དུས་མཁར་ཤུལ་ཆེན་པོ་ཡོད་པ་སྟག་རོང་ཤོག་གི་དམག་དཔོན་ཆེན་པོ་འབུམ་དཔོན་ཐོག་རྒོད་འབར་བའི་མཁར་ཤུལ་ཡིན་ཞིང་། འབུམ་དཔོན་གྱིས་འདི་ནས་མདའ་འཕངས་ཏེ་རབ་འབོལ་གྲོང་གི་རྡོ་ཞིག་ལ་མདའ་རྟགས་བཞག་པ་ད་ལྟར་མཇལ་རྒྱུ་ཡོད། རྫོང་འགོའི་མཁར་ཤུལ་དུ་སྔར་དུས་གྲུབ་དབང་སངས་རྒྱས་བསྟན་འཛིན་དང་འཁྲུལ་ཞིག་གྲགས་འབྱུང་སོགས་ཀྱི་སྒྲུབ་ཁང་བཞུགས་པ་ཉམས་གསོ་བྱས་ནས་ད་ལྟར་དགོན་གྱི་སྒྲུབ་ཁང་བཞེངས་ཡོད། དགོན་རྒྱབ་སྒོ་ཕུའི་རྒྱབ་ན་གཉན་འདོང་ཆིབས་པ་བཏགས་ས་ཟེར་བའི་རྡོ་སྣ་ལུང་ཅན་ཞིག་ཡོད། མཁར་གདོང་མགོ་ན་རྡོ་ཞིག་ལ་ལྷ་མོའི་སྤྱན་རང་བྱོན་དང་། དེའི་མར་ཙམ་གྱི་རྡོ་ཞིག་ལ་བྱ་རང་བྱོན་ཞིག་ཡོད། དགོན་པའི་རྒྱབ་ཕྱོགས་ནེའུ་རྫོང་གི་གཡོན་གྱི་བྲག་ལ་གྲུབ་ཆེན་ཐང་སྟོང་རྒྱལ་པོས་སྒྲུབ་པ་མཛད་སའི་ཐང་རྒྱལ་སྒྲུབ་ཕུག་ཟེར་བ་དང་། བྲག་རྩ་ན་ཐང་རྒྱལ་སྒྲུབ་ཆུ་ཟེར་བའི་ཆུ་མིག་ཁྱད་པར་ཞིག་ཡོད། ཐང་སྟོང་རྒྱལ་པོ་འདིར་བཞུགས་ནས་སྟོན་ཁར་སྟོན་ཐོག་བསྡུ་སྐབས་ལུང་མདའ་ནས་བམ་སྡོམ་ལ་ཕེབས་པར། དེ་ན་བུ་མོ་གཉིས་ཡོད་པའི་ཆུང་བ་དེས་གྲུབ་ཆེན་ལ་ཐོ་ཞིག་བརྩམ་བསམས་ནས། བུ་མོ་ཆེ་བ་ལ་བམ་སྡོམ་མ་ཕུལ་བཟླས་ནས་ལྕེས་བརྡ་ཞིག་བྱས་པས་གྲུབ་ཆེན་གྱིས་འདི་ན་ལྕེ་བརྡ་ཐོགས་ཞེས་གསུངས་པ་ལྟར་ཐོགས། ལྕེ་བརྡ་ཟམ་འོག་ཆུ་རྩ་ན་རྡོ་ཞིག་ལ་དམ་ཅན་ར་རྗེས་དང་། ཞིང་གི་རིབ་རྩིག་ནང་དུ་རྡོ་ཞིག་ལ་ཐང་རྒྱལ་ཞབས་རྗེས་ཡོད། ལྕེ་བརྡ་ནས་ཕར་སོང་བའི་འབྲི་ཆུའི་ཆུ་འགྲམ་ན་གནས་བདག་གཉན་འདོང་བུ་མོར་གྲགས་པའི་རྡོ་ཕང་ཆེ་བ་ཞིག་ཡོད། གནས་འདི་ན་ལྕགས་ཟམ་གདོང་ཟེར་ཞིང་། སྔོན་གྲུབ་ཆེན་ཐང་སྟོང་རྒྱལ་པོ་གནས་འདིར་ཕེབས་བཞུགས་སྐབས། འདི་ནས་འབྲི་ཆུ་ལ་ལྕགས་ཟམ་བཙུགས་མཛད་པས་ས་མིང་དེ་ལྟར་ཐོགས། དེའི་ལྷག་ལམ་ཆེན་གྱི་འོག་ནས་རྡོ་ཞིག་ལ་དུང་དཀར་རང་བྱོན་ཞིག་བཞུགས་ཤིང་། གྲུབ་དབང་སངས་རྒྱས་བསྟན་འཛིན་གནས་འདིར་ཆར་སློང་ཕེབས་དུས་རྡོ་འདི་ལ་ཞབས་བསྐོར་མང་པོ་མཛད་འདུག་སྐད་འདུག དུང་དཀར་རང་བྱོན་ནས་ཚུར་འོང་བའི་རྡོ་ཕང་ཞིག་ལ་ལྷ་མོའི་སྤྱན་དང་། རིགས་ལྔའི་ཕྱག་མཚན་རང་བྱོན་བཞུགས། དེ་ནས་ཚུར་འོང་སའི་རྡོ་གཏན་ཟུག་ཅིག་ལ་སྦལ་མཁར་བརྩེགས་པ་དང་། ཡང་རྡོ་ཞིག་ལ་སྤར་བརྒྱད་ཀྱི་ཕྱག་རྒྱ་རང་བྱོན་བཞུགས། དེ་ནས་ཚུར་ཅུང་འོང་བའི་ས་ནས་ཡར་བལྟས་ན་བྲག་ངོས་མཐོ་བར་ལྷ་མོ་ཨུ་མའི་གསང་ཕུག་ཡོད། དགོན་རྒྱབ་རྟ་ཆུང་ནང་དུ་རྡོ་རྒྱབ་ཡོལ་འདྲ་བ་ཞིག་ལ་མ་ཎི་རང་བྱོན་བཞུགས། དགོན་ཞབས་བཀྲ་ཤིས་ལྗོངས་མགོ་ན་གཉན་འདོང་ཤ་བཙག་གཙན་ཟེར་བའི་རྡོ་ལེབ་ཆེ་བ་ཞིག་གི་ངོས་ལ་ཤ་བཙག་རྗེས་འདྲ་བ་མང་པོ་ཡོད་པ་ཞིག་ཡོད། དེའི་མར་ཙམ་ན་གསེར་སྒམ་ཟེར་བའ་རྡོ་ཇ་སྒམ་འདྲ་ཞིག་ཡོད་ཅིང་། འདི་ན་གསེར་གྱི་ལྡེའུ་མིག་ཆ་གཅིག་ཡོད་སྐད་འདུག འདི་ནས་ཡར་བལྟ་སའི་བྲག་གི་སྒང་མགོ་ན་འབྲུག་མོའི་མཁར་མགོ་ཟེར་བའི་རྡོ་རྩིག་ཆེན་པོ་ཞིག་ཡོད་པ་གླིང་འབྲུག་མོའི་མཁར་ཤུལ་ཡིན་ཚུལ་འདུག བཀྲ་ཤིས་ལྗོངས་ལྟེམ་ནས་རྩེ་རེ་ནང་དུ་ཡར་སོང་བའི་འུག་ཚང་ལྟེམ་འདབ་ན་མཁར་ཝཾ་ཆུང་བ་ཞིག་ལ་གུ་རུ་རིན་པོ་ཆེའི་ཞབས་རྗེས་ཤིག་བཞུགས། དེ་ནས་སོང་བའི་རྩེ་རིའི་གནས་འདབ་བྲག་ལམ་ཡར་ཀའི་ངོས་ལོགས་དེར་ཕྱག་རྗེས་དང་ཞབས་རྗེས་འགའ་བཞུགས། དེ་ནས་སོང་བའི་རྩེ་རེའི་གནས་འདབ་བྲག་ལམ་ཡར་ཀའི་ངོས་གནས་ཕུག་འོག་མ་དང་། ཕུག་སྒོའི་གཡས་ཕྱོགས་ཀྱི་བྲག་ངོས་ལ་ཡ་ཡིག་རང་བྱོན་ཤིན་ཏུ་ཆེ་བ་ཞིག་ཡོད། དེ་ནས་ཕར་སོང་བའི་བྲག་མགོ་ནས་བལྟས་ན་བཀྲ་ཤིས་ལྗོངས་ཐང་ཡན་ཆད་མཐོང་ཞིང་། བྲག་ལྟེམ་དུ་ཡར་སོང་ན་ཐུབ་བསྟན་ཆོས་འཕེལ་རབ་རྒྱས་ཀྱིས་ཨ་ར་པ་ཙ་དུང་གསུང་སའི་སྒྲུབ་ཁང་དང་། ཕུག་པའི་བྲག་ངོས་ལ་ཕོ་རྒོད་སྙིང་རུས་ཅན་ཡོད་ན་འདི་ན་ཤོག་ཅིས་བྲིས་ཡོད། དེའི་གཡོན་ངོས་ཤིན་ཏུ་མཐོ་སའི་བྲག་འཇུ་ན་བླ་མ་ཆོས་རབ་ཀྱིས་བཞག་ཟེར་བའི་བྱ་རྒྱང་ཞིག་འདུག་གོ།
བཞི་པ་གནས་ཀྱི་གཡས་ཕྱོགས་མཐའ་བསྐོར་འགྲོ་ལམ་ན་གནས་རྟེན་རང་བྱོན་ཇི་ལྟར་བཞུགས་པ་ནི།
དེ་ཡང་གཉན་འདོང་གནས་བསྐོར་ལ་ཡེ་ན་དགོན་རྒྱབ་དིལ་རོང་ལྷུང་ཆུ་ནས་ཡར་སོང་བའི་རྟ་ཕྱོགས་འཇུའི་ལམ་གྱི་གཡོན་ཟུར་ན་གསང་བདག་ཕྱག་ན་རྡོ་རྗེའི་གནས་མཆོག་རྫོང་འབར་བཞུགས་པ་མཇལ། དེ་ནས་སོང་བའི་ལམ་འགྲམ་རྫ་འུག་ཞིག་གོང་ན་ཕ་ཝང་ཞིག་ལ་ཨ་རྫ་ངག་དབང་རིག་འཛིན་གྱི་ཞབས་རྗེས་ཡོད། དེ་ནས་ཡར་སོང་བའི་ལམ་འགྲམ་གཡས་ངོས་ཀྱི་རྡོ་ཞིག་ལ་གཡག་རྗེས་ཤིག་ཡོད། དེའི་ཆུ་ཕར་ཁ་ན་གཉན་འདོང་བླ་མ་མཁྱེན་བརྩེ་དགེ་ལེགས་ཀྱི་མཚམས་ཁང་ཡོད། དེ་ནས་ཡར་སོང་ན་གྲུབ་ཆེན་ཐང་སྟོང་རྒྱལ་པོས་བཞེངས་པའི་ཕུག་ལེགས་རྒྱ་མཁར་དུ་སླེབས་ཤིང་། རྒྱ་མཁར་གྱི་ཡར་ཁུད་ནས་ཕུག་ལེགས་བྲག་ཉིལ་ཉེ་བར་གྲུབ་ཆེན་གྱིས་རྡོ་ཀ་ངོ་མཚར་བ་བརྒྱབས་པ་ཡོད། འདི་ནས་ཡར་བལྟ་སའི་རང་གི་གཡོན་ཕྱོགས་ནས་འཕགས་མཆོག་ཐུགས་རྗེ་ཆེན་པོའི་གནས་མཆོག་གནམ་རྫོང་བཞུགས་ཤིང་། དེ་ནས་སྐྱེར་གཙང་འདབས་ནས་ཡར་སོང་བའི་རང་གི་གཡོན་ཕྱོགས་ནས་འཕགས་པ་འཇམ་དཔལ་གྱི་གནས་མཆོག་ཀིརྟི་བྲག་དང་། ཀིརྟིའི་མགུལ་ན་ཀིརྟིའི་གབ་མཚོ་ཟེར་བའི་ཆུ་མིག་ཅིག་ཡོད། དེས་ནས་རྫོང་འབར་དང་གནམ་རྫོང་ཀིརྟི་བཅས་གནས་འདི་གསུམ་གྱི་བཞུགས་ཚུལ་ནི་གཙོ་བོ་ཐུགས་རྗེ་ཆེན་པོ་བཅུ་གཅིག་ཞལ་གཡས་སུ་གསང་བདག་ཕྱག་ན་རྡོ་རྗེ་དང་། གཡོན་དུ་རྗེ་བཙུན་འཇམ་དཔལ་དབྱངས་བཅས་གཉན་འདོང་ལ་ཞལ་ཕྱོགས་པའི་རྣམ་པས་བཞུགས་པ་གནས་ཀྱི་ཆགས་ཚུལ་དང་མཐོ་དམའ་མདོག་དབྱིབས་བཅས་ལ་བརྟགས་ན་གསལ་བར་ཡོད། ཀིརྟིའི་འདབས་ནས་གཉན་འདོང་ཕྱོགས་སུ་ཡར་བལྟས་ན་མེད་དང་དཔལ་ལྡན་ལྷ་མོ་སོགས་ཀྱི་རང་བྱོན་བཞུགས་པའི་གནས་མཆོག་བྲག་སྔོན་མ་མཇལ། དེ་ནས་ཡར་སོང་བས་ལམ་ལྷག་ནས་ཆུ་ཆུང་ཞིག་འབབ་པ་དེ་ལ་སྲིན་ཆུ་ཟེར་ཞིང་། ཆུ་འདིས་ཁ་ལག་སོགས་བཀྲུ་བཤལ་བྱས་ན་སྲིན་ནད་ལ་ཕན་པ་ཡིན། དེ་ནས་ཅུང་སོང་བས་གྲོགས་རྡོ་འཕེན་སར་སླེབས་ཤིང་། ཚུར་ཁའི་སྤང་མཆུ་ནས་ཆུ་ཕ་ཁའི་བྲག་ལྟེམ་རྡོ་ཧྲུལ་མང་པོ་འཕངས་པའི་རྗེས་འདུག་པ་ན་རྡོ་བཞི་ལྔ་རེ་འཕང་པས་བྲག་ལྟེམ་དུ་སྡོད་ཐུབ་མིན་ལས་གྲོགས་སྐལ་ཆེ་ཆུང་བརྟག དེ་ནས་ཁྲུང་ཁྲུང་འགག་ནས་ཡར་སོང་བའི་རང་གི་གཡོན་ཕྱོགས་ན་བྲག་རི་ཞིག་ཡོད་པ་དེ་ཐང་བཟུང་དང་། གཡས་ཕྱོགས་ཚུར་རིར་གཉན་འདོང་ཕྱོགས་སུ་ཁ་གཏད་པ་འདྲ་བའི་བྲག་གདོང་རིང་ལ་མཛད་བརྗིད་ཆགས་པ་གཉིས་འདུག་པའི་ནང་མ་དེ་གཡག་དང་ཕྱི་མ་དེ་མཛོ་ཡིན་ཞིང་། མཛོ་གཡག་གཉིས་ཀྱི་བར་ཛམ་ལྟེམ་ལྟག་ན་རྡོ་ཞིག་གི་ཐོག་ལ་གཉན་འདོང་གི་སྤྲུལ་པའི་ཕོ་ཉ་སྟག་གི་རྐང་རྗེས་མང་པོ་ཡོད། གཡང་སྐྱབས་སྐབས་ཀྱི་གཡང་རྫས་ས་སྣ་འཛོམ་ལྟེམ་དང་མར་ཁུ་གཡང་ཐང་གཉིས་ནས་ལེན་སྲོལ་འདུག ལམ་ཁ་གཡག་རྐང་ཡོད་ས་ན་རྡོ་ཞིག་ལ་ཨ་རང་བྱོན་དང་། མཛོ་རྐུབ་ལམ་ཁའི་བྲག་ངོས་ལ་ཨ་ཡིག་རང་བྱོན་ཆེ་བ་ཞིག་བཞུགས། འདི་དག་ན་སྡིག་པ་རྡོ་བཏགས་ཟེར་ནས་གནས་བསྐོར་འགྲི་མི་རྣམས་ཀྱིས་རྡོ་རྡེལ་མང་པོ་བཏགས་ཡོད། ཁྲུང་ཁྲུང་འགག་མདོའི་ཆུ་རྩ་རྡོ་ཞིག་ལ་ཁྲུང་ཁྲུང་རང་བྱོན་བཞུགས་པས་རོང་འགག་འདི་ལ་ཁྲུང་ཁྲུང་འགག་ཅེས་ཐོགས། འདི་ནས་ནུབ་བྱང་མཚམས་སུ་ཡར་བལྟས་ན་ཛཾ་བྷ་ལ་དང་རྗེ་བཙུན་སྒྲོལ་མ་དཀར་མོའི་གནས་མཆོག་ཛཾ་ཆེན་མཇལ། འདི་ནས་ལུང་ལག་གཉིས་ཡོད་པའི་རང་གི་གཡོན་ཕྱོགས་ཀྱི་དགོན་མདོ་འགག་སེང་གེ་གློ་ན་བྲག་ཁུང་ཞིག་གི་ཕུག་ན་རྩིག་པ་ཡོད་པ་འབྲུག་མོའི་རྟ་སྒ་བསྐུང་ཕྱིར་ཐེའུ་རོང་གིས་བརྩིགས་ཞེས་ཟེར། གཡས་ཕྱོགས་མདོ་ལེགས་ལྟེམ་ནས་ཡར་སོང་བའི་མཛོའི་གཡོན་ཕྱོགས་ནས་ཆུ་འཕྱུར་རྗེས་ཤིག་སོག་མ་སྡང་ཆད་སོགས་མང་པོ་ཁྱེར་སྐད་འདུག དེ་ནས་ཡར་སོང་བའི་ས་ན་གཉན་འདོང་སླ་ང་ཟེར་བའི་སྤང་གོབ་སྔ་ང་འདྲ་བ་དང་། དེ་ན་སླང་ཡུ་ལ་རྡོ་གཏོང་མ་ཟེར་བ་ཞིག་ཡོད། དེའི་ལྟག་ན་ས་འོག་ནས་ཐོན་པའི་རྡོ་ཞིག་ལ་མ་ཎི་དང་འབྲུ་གསུམ་རང་བྱོན་འདུག དེ་ནས་ཅུང་སོང་ན་ཕ་ཝང་རྒྱ་བོ་ཟེར་བའི་ཕ་ཝང་ནག་པོ་འཆིག་འདྲ་བ་དེ་གཉན་འདོང་གི་འཆིག་ཡིན་ཟེར། དེ་ནས་རོགས་གསལ་ནང་ཕར་རི་ནས་ཡར་འགྲོ་དུས་རོགས་གསལ་ལ་ཁར་ཚུར་བལྟས་ན་འཕགས་མཆོག་ཐུགས་རྗེ་ཆེན་པོའི་གནས་མཆོག་ཐུགས་རྗེ་མཇལ་ཞིང་། ཐུགས་རྗེའི་གནས་ཀྱི་དབུ་རྩེ་ན་གནས་འཛུལ་བྱེད་ས་དང་། གབ་མཚོ། ཤེལ་རྡོ་བཅས་དང་། ཐུགས་རྗེའི་མགུལ་ཐང་ཆེན་མོའི་གཡས་གདོང་ནས་མ་ཎི་རང་བྱོན་མང་པོ་བཞུགས། དེ་ནས་ཡེ་ལ་བརྒལ་འགྲོ་བའི་ཨ་མྱེ་མཛང་རའི་གཡས་ཕྱོགས་རི་ངོས་ན་སྦྲུལ་ནུད་རྗེས་འདྲ་བ་ཆེན་པོ་ཞིག་ཡོད་པ་ལ་སྦྲུལ་རེ་འབྱམས་ཟེར་ཞིང་། མཆོད་རྟེན་ནག་འབར་ན་ཡོད་པའི་སྦྲུལ་ནག་ཐུར་རྒྱུག་དེ་སོང་བའི་རྗེས་ཡིན་པར་བཤད། སྦྲུལ་རེ་འབྱམས་ཀྱི་མར་ཀའི་ལམ་ནང་ན་གཉན་འདོང་གོས་འབོག་ཟེར་བའི་རྡོ་གོས་འབོག་འདྲ་ཞིག་ཡོད། དེ་ནས་ཡར་སོང་བས་ཡེ་ལ་མགོར་སླེབས་ལ། རྩེ་བསྐོར་བྱེད་ན་རྒྱབ་ཕྱོགས་ཀྱི་འཕྲེད་ལམ་དེ་ནས་སྒྲོལ་མ་རང་བྱོན་གྱི་ཕྱོགས་སུ་ཕར་འགྲོ་ཞིང་། དབུ་རྩེར་འགྲོ་ན་སྒང་མགོར་འཛིགས་ནས་ཡར་སོང་བས་ཆོག མཐའ་སྐོར་བྱས་ནས་ཀོ་གོ་ནང་དུ་བར་བབས་ན་སྡེ་དགེ་ལྷུན་འགྲུབ་སྟེང་གི་ཆོས་གྲྭ་ཆེན་པོར་འབྱོར་པ་ཡིན་ནོ།།
ལྔ་པ་དབུ་རྩེ་དང་གནས་ཆུང་སོགས་རྩེ་བསྐོར་འགྲོ་ལམ་ན་གནས་རྟེན་རང་བྱོན་ཇི་ལྟར་བཞུགས་པ་ནི།
འབྲི་གཉན་འདོང་ཆེན་པོའི་དབུ་རྩེའི་གསས་མཁར་གྱི་གཡས་གཡོན་རྣམས་ན་སློབ་དཔོན་རིན་པོ་ཆེས་ལྷོ་ནུབ་སྲིན་པའི་ཡུལ་དུ་བྱོན་ཁར་བཞག་པའི་ཞབས་རྗེས་དང་། གཉན་འདོང་གི་ཞབས་རྗེས། གནམ་ཆོས་ཀྱི་ཞབས་རྗེས་ཟེར་བ་སོགས་ཞབས་ཕྱག་གི་རྗེས་ངོ་མཚར་ཅན་མང་པོ་ཡོད། དེར་བྲག་ལེབ་ཆེན་པོ་ཞིག་གི་ངོས་ལ་སློབ་དཔོན་རིན་པོ་ཆེས་ལྷོ་ནུབ་སྲིན་པོའི་ཡུལ་དུ་བྱོན་ཁར་བཞག་པའི་ཞབས་རྗེས་དང་། གཉན་འདོང་གི་ཞབས་རྗེས། གནམ་ཆོས་ཀྱི་ཞབས་རྗེས་ཟེར་བ་སོགས་ཞབས་ཕྱག་གི་རྗེས་ངོ་མཚར་ཅན་མང་པོ་ཡོད། དེར་བྲག་ལེབ་ཆེན་པོ་ཞིག་གི་ངོས་ལ་སློབ་དཔོན་རིན་པོ་ཆེས་སྲིན་པོའི་གྲོང་ཁྱེར་འཇོམས་པའི་རྟགས་སུ་བཞག་པའི་སྲིན་པོའི་པགས་པ་ཆ་ཚང་ཞིག་ཡོད། ཡང་རྡོ་ཞིག་ལ་རི་དྭགས་ཀྲིཥྞ་སྭཱ་ར་རྭ་གཉིས་ཀྱིས་རྗེས་བཅས་ཡོད་པ་གནས་འདི་སྤྱན་རས་གཟིགས་ཀྱི་གནས་འཁྲུལ་མེད་ཡིན་པའི་དན་རྟགས་སུ་གསུངས། དབུ་རྩེའི་སྐེ་ཞབས་སུ་ལྷ་འདྲེའི་གྲེ་ཁུང་ཞེས་བྲག་ཞབས་ཤིག་ནས་འཛུལ་ས་ཡོད། དེའི་ལྟག་ན་ནུབ་ཕྱོགས་སུ་བསྟན་པའི་སྤྱན་ནག་པོ་དེ་མགོན་པོའི་སྤྱན་དང་། བྱང་ངོས་སུ་ཕྱོགས་པའི་སྤྱན་དམར་པོ་དེ་འཇིགས་བྱེད་ཀྱི་སྤྱན་ཡིན། དེ་ནས་ཕར་ཙམ་སོང་ན་སྒྲུབ་ཆུ་ནང་ཟེར་བའི་ཁ་བྱང་ཤར་དུ་ཕྱོགས་པའི་ཆུ་མིག་ཅིག་ཡོད་ལ་དེ་ཉིད་གབ་མཚོ་ཡིན་ཞེས་ཟེར། དབུ་རྩེའི་གཡས་གདོང་ནས་མར་ཡར་སོང་ན་གཉན་འདོང་སྒྲུབ་ཆུ་ཟེར་བའི་ཆུ་མིག་ཅིག་ཡོད། དབུ་རྩེའི་གཡོན་ངོས་ཀྱི་སྒང་མགོ་ནས་མར་སོང་བའི་མཐར་ཕྱིན་ཉག་ན་གནས་བསྐོར་བ་རྣམས་ཀྱིས་སྒྲུབ་ཁང་ཁང་ཆུང་མང་པོ་ལས་ཡོད། དབུ་རྩེའི་ཞབས་ནས་ར་ཏྲཾ་གྱི་ཕྱོགས་སུ་གནས་བརྟན་བྲག་རི་མ་ཟེར་བའི་བྲག་རི་དཀར་པོ་མང་པོ་བཞུགས་པ་བསྟན་སྐྱོང་གནས་བརྟན་བཅུ་དྲུག་གི་གནས་ཡིན། གནས་བརྟན་བྲག་རིའི་མཚམས་མར་ཁུ་གཡང་ཐང་ནས་ཡར་བལྟ་སའི་སྤང་གདོང་ནས་བྲག་ཕྲེང་དཀར་པོ་ཞིག་བཞུགས་པ་དེ་ར་ཏྲཾ་མཆེད་གསུམ་ཡིན་ཞིང་། ར་ཏྲཾ་མདུན་ན་ར་ཏྲཾ་ཇ་ཁང་ཟེར་བའི་ཕུག་པ་ཞིག་ན་རྡོ་ཡི་ཀ་བ་དང་འཁྱག་རམ་ཡོད་པ་དབྱར་ཟླ་ལྔ་པའི་ནང་དུ་ཡང་མི་ཞུ་འདུག ཕུག་པའི་མདུན་ངོས་ན་རུས་སྦལ་ཁ་ཐུར་དུ་ཕྱོགས་པའི་དབྱིབས་ཅན་གྱི་རྡོ་ཞིག་ཡོད་པ་ལ་རྡོ་རུས་སྦལ་མ་ཟེར། ར་ཏྲཾ་གྱི་རྒྱབ་སྨད་རྩེ་བསྐོར་འགྲོ་སའི་ལམ་ནང་ན་སྒྲོལ་མ་རང་བྱོན་ཞེས་པའི་རི་དིལ་ཞིག་ཡོད་པ་དེ་རྗེ་བཙུན་སྒྲོལ་མའི་གནས་དང་། དེ་ནས་རྩེ་བསྐོར་བྱས་ནས་ཚུར་འོང་བས་མར་བལྟ་དུས་མེ་ཤོད་ཟམ་པ་མཐོང་བའི་ལམ་ནང་ན་དུང་དཀར་རང་བྱོན་ཞིག་ཡོད། དེ་ནས་ཤར་ལྷོའི་བྲག་སྒོ་བརྒྱུད་དེ་འོང་བས་ཨ་འདོང་ལབ་རྩེ་ལ་སླེབས་ཤིང་། འབུར་སྡོང་དེ་ནས་མར་བལྟས་ན་བྲག་རི་བཀའ་བརྒྱད་ཁ་ཊཱཾ་མཇལ། དེ་ནས་ར་ལྟག་ཏུ་མར་སོང་བའི་ས་ན་མཁན་ཆེན་ཚུལ་ཁྲིམས་འོད་ཟེར་གྱི་སྒྲུབ་ཁང་ཡོད། དེ་ནས་ཚུར་ཡོང་ན་མར་ཁུ་གཡང་ཐང་དུ་སླེབས་ཤིང་། མར་ཁུ་གཡང་ཐང་གི་སྒང་མགོ་ནས་གུར་ཕུ་ནང་དུ་ཕར་བལྟས་ན་དཀྱིལ་དུ་དཔལ་ལྡན་གུར་གྱི་མགོན་པོ་དང་། གཡས་སུ་དཔལ་ལྡན་ལྷ་མོ། གཡོན་དུ་དཔལ་མགོན་ཞལ་ཏེ་གུར་ཞལ་ལྕམ་གསུམ་གྱི་གནས་དང་། དེ་དག་གི་ཉེ་འཁོར་རྣམས་ན་པུ་ཏྲ་ལྷ་ལྔ་དང་སྤྲུལ་པའི་ཕོ་ཉ་རྣམས་ཀྱི་གནས་རྣམས་བཞུགས་པ་མཇལ། བཀའ་མཛོད་ནང་དུ་ཚུར་བལྟས་ན་བྲག་རི་ལྷ་སྐུ་བཤམས་པ་འདྲ་བ་མང་པོ་བཞུགས་པ་ཡི་དམ་སྒྲུབ་པ་ཆེན་པོ་བཀའ་བརྒྱད་ཀྱི་གནས་ཡིན། བར་བསྐོར་བྱས་ན་མར་ཁུ་གཡང་ཐང་ནས་སྤུ་ཞུང་བརྒྱུད་ངལ་གསོ་ལམ་ལྷེམ་དུ་བབ་སྟེ་མཆོད་རྟེན་ནག་འབར་ནས་ཕྱིར་བསྐོར་བ་ཡིན། རྩེ་བསྐོར་བྱས་ན་མར་ཁུ་གཡང་ཐང་ནས་འཕྲེལ་འགྲོ་ཞིང་། མར་ཁུ་གཡང་ཐང་ཟད་མཚམས་ན་ལམ་གོང་འོག་གཉིས་ཡོད་པའི་གཉིས་ཀ་རྩེ་བསྐོར་འགྲོ་སའི་ལམ་ཡིན་ཡང་ལམ་གོང་མ་ནས་སོང་ན་གནས་མང་པོ་ཞིག་ཕྱི་ལ་ལུས་འགྲོ་ལ། ལམ་འོག་མ་ནས་སོང་ན་འགྲོ་ལམ་ཅུང་དཀའ་ཡང་གནས་མང་བ་ཞིག་ནང་དུ་ཚུད་པས་ཕན་ཡོན་ཆེ་བ་ཡིན། ལམ་འོག་མ་ནས་སོང་བའི་གནས་སྒོའི་ཚུར་རི་ན་ལྷོ་ནུབ་དཔལ་རི་པདྨ་འོད་ཀྱི་སྐུ་མཁར་ཆེན་པོ་དཔལ་རི་པད་མཁར་ཡོད་ཅིང་། གནས་འདི་ལ་ལས་ཅན་དག་པ་རྣམས་ཀྱིས་དཔལ་རི་པདྨ་འོད་ཀྱི་ཕོ་བྲང་ཆེན་པོ་རྟེན་དང་བརྟེན་པར་བཅས་པ་དངོས་སུ་མཇལ་རྒྱུ་ཡོད། པད་མཁར་རྩེ་ན་རྟོགས་ལྡན་ཨོ་རྒྱན་བསྟན་འཛིན་ནོར་བུ་དང་། བཤེས་གཉེན་མཁྱེན་བརྩེ་དགེ་ལེགས་གཉིས་ཀྱི་སྒྲུབ་ཁང་བཞུགས་པ་ཉམས་གསོ་བྱས་ཡོད། དཔལ་རི་པད་མཁར་ནས་ཤར་ལྷོའི་ཕྱོགས་སུ་ཕར་བལྟས་པས་བྲག་དིལ་ཞིག་གི་མགོ་ན་ཐུབ་བསྟན་ཆོས་འཕེལ་རབ་རྒྱས་ཀྱི་སྒྲུབ་ཁང་རྩིག་རལ་གྱུར་པ་དང་། དེའི་སྒང་མགོ་ནས་འབོལ་སྡོང་ཆེན་པོ་ཞིག་སྐྱེས་པ་བླ་མ་ཆོས་རབ་ཀྱིས་བཙུགས་པ་ཡིན། སྒྲུབ་ཁང་ཡོད་སའི་བྲག་དིལ་དེ་མཁའ་སྤྱོད་ཀྱི་གནས་དང་། དེའི་ཕར་ངོས་བྲག་དིལ་རྡོ་རྗེ་ཕམ་ཕག་མོའི་གནས་དང་། དེའི་ཕར་ངོས་བཀའ་མཛོད་བྲག་རི་མའི་སྟེང་ཚོགས་བདག་གི་གནས་ཡིན། མཁའ་སྤྱོད་གནས་ཀྱི་ཡར་ངོས་རྩེ་བསྐོར་འགྲོ་སའི་ལམ་ལྟག་ནས་ཚུར་རིམ་པར་རིག་བྱེད་མ་དང་། དམར་ཆུང་སྐོར་གསུམ། རིགས་གསུམ་མགོན་པོ་སོགས་ཀྱི་གནས་རྣམས་མཇལ་ཐུབ། དཔལ་རི་པད་མཁར་ནས་དབུ་རྩེའི་ཕྱོགས་སུ་ཡར་བལྟས་པས་བྲག་དིལ་བུམ་པ་མ་ཟེར་བ་སྒོར་ཕུག་པ་ཡོད་པ་ཞིག་བཞུགས་ཤིང་། དགེ་སློང་ཤེས་རབ་བློ་གྲོས་སོགས་མང་པོས་འདི་ཉིད་མཇལ་སྐབས་བུམ་པ་སེར་པོ་ཞིག་ཏུ་གཟིགས་སྣང་བྱུང་ཚུལ་འདུག ཛཾ་སེར་ནག་གཉིས་ཡིན་ཡང་ཟེར། དཔལ་རི་པད་མཁར་གྱི་མར་ཞབས་ན་གསས་མཁར་ཆུང་ཆུང་ཅན་གྱི་བྲག་རི་མཐོན་པོ་གཏིང་དུ་ཟུག་པ་སྦྲུལ་མགོའི་གདེང་ཀའི་དབྱིབས་ཅན་ཡོད་པ་དེ་གསང་གཉན་བདུད་འདུལ་ཡིན་ཞིང་། དེ་ལ་སྲུང་མ་ཀླུ་བཙན་གནས་པར་གསུངས། གསང་གཉན་གྱི་དཀྱིལ་ནགས་ཚལ་སྟུག་པོའི་གསེབ་ན་གསང་ཕུག་ཡོད་པའི་ནང་ནས་མཆོག་གྱུར་བདེ་ཆེན་གླིང་པས་འཇམ་དཔལ་བཤེས་གཉེན་གྱི་སྙིང་ཐིག་དང་། མཁྱེན་བརྩེའི་གོང་མས་སྨན་སྒྲུབ་སོགས་གཏེར་དུ་བཞེས་ཚུལ་འདུག དཔལ་རི་པད་མཁར་གྱི་སྒྲུབ་ཁང་དེ་གཡངས་བསྐོར་བྱས་ནས་སོང་བས་བྲག་ངོས་ལ་ཕྱག་རྗེས་ཤིག་དང་། ཨོཾ་དང་ཧཱུྃ་བརྩེགས་པའི་རང་བྱོན་ཞིག་མཇལ་རྒྱུ་ཡོད། སྒྲུབ་ཁང་ཞབས་ཀྱི་གཡོན་ལམ་ནས་སོང་ན་མར་ཙམ་ན་ཆུ་མིག་ཡོད་ས་དེར་སླེབས་ཤིང་། གཡས་ལམ་ནས་མར་ཕབ་སྟེ་ཕ་རིའི་བྲག་རྩ་ལ་སོང་ན་གནས་སྒོར་སླེབས། གནས་སྒོའི་གཡོན་ཕྱོགས་ཀྱི་བྲག་འཇུ་དེ་ནས་རྫ་རྡོ་མང་པོ་ཆད་འདུག་པ་ནི། སྔོན་གནས་འདི་གནས་ཞལ་འབྱེད་སྐབས་སྦས་གནས་ཀྱི་ཞལ་ཕྱེས་ནས་སྡེ་དུད་བརྒྱ་དང་བརྒྱད་ཅུ་ལེན་རྒྱུ་ལ། རྫ་རྡོ་མང་པོ་ཆད་བྱུང་ཚེ་མི་རྣམས་སྐྲགས་ནས་རྡོ་འགྲིལ་བྱུང་བཟླས་ནས་འུར་ཆེན་པོ་བརྒྱབས་པས་ལེན་རྒྱུ་མ་བྱུང་། བྲག་འཇུའི་ཕུག་གི་བྲག་རི་དམར་པོ་མཐོ་བ་དེ་ཆོས་སྐུ་སྣང་བ་མཐའ་ཡས་དང་། གཡས་ཕྱོགས་གནས་ཕུག་བཞུགས་སའི་བྲག་རི་ལོངས་སྤྲུལ་གསུམ་གྱི་ཚུལ་དུ་བཞུགས་ལ། ཡང་སྤྲུལ་སྐུའི་གཡོན་ཕྱོགས་ཀྱི་བྲག་རི་དེའི་ངོས་ལ་ཨོ་རྒྱན་རིན་པོ་ཆེའི་སྐུ་ཞིག་བཞུགས་པས་ཨོ་རྒྱན་བྲག་ལེབ་ཟེར། གནས་སྒོ་ནས་གཡས་བསྐོར་བྱས་ཏེ་བྲག་གདོང་སྔོན་པོ་བྱ་འདྲེད་བྱེའུ་འདྲེད་ནས་ཡར་འཛེགས་ལ། དེ་ནས་ཕར་གཤོང་དུ་སོང་བའི་འཕྲང་ལམ་དེ་བར་དོའི་འཕྲང་ལམ་དང་། དེ་ནས་མར་ཅུང་ཟད་སོང་བའི་ཕ་རི་ན་དུར་ཁྲོད་བསིལ་བའི་ཚལ་ལམ་དུར་ཁྲོད་ཀླུ་མོ་མཚོ་ཟེར་བའི་སྤང་གོབ་གཅིག་ཡོད་པ་ན་སྐྲ་སེན་སོགས་འཕེན་སྲོལ་འདུག འདི་ནས་གསང་གཉན་གྱི་གཡོན་ཕྱོགས་སུ་ཕར་བལྟས་ན་ཚེ་སྒྲུབ་ཕུག་པ་མཇལ། དེ་ནས་ཤི་གསོན་བྱེ་མའི་བ་བརྒལ་བའི་སྒང་མགོ་ནས་མར་བལྟས་ན་ཁྲོམ་དབེན་གནས་འདབས་ཀྱི་སྒོ་སྲུང་དང་། མཆོད་རྟེན་ནག་འབར་སོགས་མཇལ་ཐུབ། སྒང་མགོ་དེའི་རྒྱབ་ཕྱོགས་ནས་སྲིན་པོ་ལེབ་ཟེར་ཞིང་། སྒང་མགོའི་གཡས་ཀྱི་མར་ཟུར་ན་བྲག་རྡོ་གྲུ་བཞི་གཅིག་ཐོག་གཅིག་བརྩེགས་བྱས་པ་ཞིག་ཡོད་པ་ལ་སྲིན་པོའི་གྱད་བརྩིགས་ཟེར། འདི་ནི་སློབ་དཔོན་རིན་པོ་ཆེ་ལ་སྲིན་པོ་དག་གིས་གྱད་རྡོ་བརྒྱག་ཕྱིར་བརྩིགས་པས་མིང་དེར་ལྟར་ཐོགས་ལ། གྱད་བརྩེགས་ཀྱི་རྒྱབ་ན་སྲིན་པོའི་མགོ་དང་ལག་པ་གཉིས་ཀྱིས་འཕུར་རྗེས་ཤིན་ཏུ་མཚར་བ་ཡོད། འདི་ནས་ནུབ་བྱང་མཚམས་སུ་གནས་པའི་སྒོ་སྲུང་སྟག་གཡག་གཉིས་མཐོང་། དེ་ནས་སྒང་མགོ་ནས་ཡར་འཛེགས་ནས་འགྲོ་བ་ལ་ཤལ་མ་ལི་ཡི་སྡོང་པོ་ཟེར་ཞིང་། དེ་ནས་བྲག་བཤུར་ཞིག་ནས་ཡར་སོང་བའི་རང་གི་གཡས་ཕྱོགས་ཀྱི་རི་དེ་གནས་ཆུང་དབུ་རྩེ་དང་། གཡོན་ཕྱོགས་ཀྱི་བྲག་རི་དམར་པོ་འཇིགས་སུ་རུང་བ་དེ་གཤིན་རྗེ་ཆོས་ཀྱི་རྒྱལ་པོ་ཡིན། གནས་ཆུང་དབུ་རྩེ་སླེབས་ཉེ་སར་གནས་བསྐོར་བ་རྣམས་ཀྱིས་ཁང་ཆུང་མང་པོ་བཟོས་ཡོད་ཅིང་། དེ་ནས་ཡར་སོང་ན་རྩེ་བསྐོར་ལམ་ནང་སླེབས། གནས་ཆུང་གསས་མཁར་ནས་མར་གཡས་བསྐོར་བྱས་ནས་འོང་བའི་ལམ་ཁ་དུང་དཀར་ལེབ་ཅེས་པ་ན་རྡོ་ལ་དུང་དཀར་རང་བྱོན་ཞིག་ཡོད། དེ་ནས་མར་འོང་བས་རི་འབུར་གཉིས་ཡོད་པ་ལ་དིལ་ཆེན་དིལ་ཆུང་ཟེར་ཞིང་། གནས་ཆུང་རྩེ་ནས་དབུ་རྩེའི་ཕྱོགས་སུ་ཡར་བལྟས་ན་གནན་འདོང་གི་རིགས་ལྔ་མཇལ་ཞིང་། དེ་ནས་རྩེ་བསྐོར་བྱས་ཏེ་འཕྲེད་ལ་སོང་ན་སྟག་གཡག་གཉིས་ཀྱི་སྟེང་དུ་སླེབས། སྟག་གཡག་གཉིས་ཀྱི་བར་དེ་གཉན་འདོང་གི་གོ་མཛོད་ཡིན་པས་སྔར་དུས་སྡེ་དགེ་ཚང་གིས་འདི་ནས་ལོ་བཞིན་གོ་མཚོན་མང་པོ་འཕེན་མཛད། དེ་ནས་ཡོང་ན་སྦྲུལ་དིལ་མགོར་སླེབས་ཤིང་། སྟག་གཡག་དང་སྦྲུལ་དིལ་སོགས་ཀྱི་བྲག་ཕྲེང་གི་མར་ཞབས་ནས་ཐང་ཆེ་བ་ཞིག་ཡོད་པ་ལ་གུ་ཐང་ཟེར་ཞིང་། སྔར་དུས་འདི་ནས་མང་པོ་ཞིག་གིས་གུ་རུ་རིན་པོ་ཆེ་དངོས་སུ་མཇལ་བས་གུ་ཐང་ཐོགས། གུ་ཐང་ཕ་རིའི་ཕྱོགས་སུ་རྒྱང་བལྟས་བྱས་དུས་གུ་ཆུང་གནས་དང་། རྩེ་རེ་རྡོ་རྗེའི་གནས་རྣམས་མཇལ། དེ་ནས་རྩེ་བསྐོར་བྱས་ཏེ་ཡོང་དུས་མར་བལྟས་ན་མཛོ་གཡག་སྣ་ཁྲིད་བཅས་དང་། དེ་ནས་ཡོང་བའི་ལམ་ཞབས་བྲག་དཀར་ནང་ན་བཀའ་འགྱུར་གྱི་གཏེར་ཁ་ཡོད། དེ་ནས་ཚུར་ཡོང་བའི་ལམ་འོག་ནགས་གསེབ་ཀྱི་འབོལ་སྡོང་དེ་གཉན་འདོང་གི་རྟ་བཏགས་ས་དང་། ས་དེ་གཉན་འདོང་གི་རྟ་ར་ཡིན་པར་བཤད། དེ་ནས་རྩེ་བསྐོར་བྱས་ནས་ཡོང་བས་ཡེ་ལ་མགོར་སླེབས་པ་ཡིན་ནོ།།
དྲུག་པ་བདེ་བ་ཕུག་དང་ར་ཕུག་གུ་ཆུང་རྩེ་རེ་བཅས་ན་གནས་རྟེན་རང་བྱོན་ཇི་ལྟར་བཞུགས་པ་ནི།
དེ་ཡང་གནས་ཕུག་གི་གཡས་ངོས་ཀྱི་སྒོ་ཕྱི་ན་ཤིང་སྡོང་ཞིག་སྐྱེས་ལ། དེའི་ནང་བྲག་རྩ་ན་དཔའ་བླ་བློ་གྲོས་བཟང་པོ་དང་། དཔེ་བླ་ཤེས་རབ་རྒྱལ་མཚན་སོགས་གྲུབ་པའི་རིག་སྔགས་འཆང་བ་མང་པོས་སྒྲུབ་པ་མཛད་སའི་རྩིག་ར་ཞིག་ཡོད། དེའི་སྟེང་གི་བྲག་ངོས་ལ་ཧྲཱི་ཡིག་རང་བྱོན་ཞིག་བཞུགས། ཕུག་པའི་ཀླད་ཀྱི་སྟེང་གི་བྲག་ངོས་ལ་སྒྲོལ་མ་དཀར་སྔོན་གཉིས་རང་བྱོན་དང་། ཤུག་ཕུང་དམ་རལ་འདྲ་བ་གསུམ་ཡོད། སྒོ་ཁའི་གཡོན་ཕྱོགས་ཀྱི་ཕ་ཝང་ཞིག་གི་འོག་ལོགས་སུ་བྱང་ཆུབ་མཆོད་རྟེན་རང་བྱོན་མཇལ་རྒྱུ་ཡོད། གནས་ཕུག་ནང་དུ་ཡར་འགྲོ་དུས་ཐོག་མར་བཀའ་བརྒྱད་ཀ་ཊཱཾ་བྲག་འབུར་ཞིག་ལ་ཡོད། དེ་ནས་ཡར་སོང་བའི་རང་གི་གཡོན་ཕྱོགས་ནས་བར་དོའི་འཕྲང་དང་། གཤིན་རྗེའི་གྲེ་ཁུང་ཞེས་ཕ་ཝང་ཞིག་གི་འོག་ནས་འཛུལ་ས་ཡོད། དེ་ནས་གཡས་བསྐོར་གྱིས་སོང་བས་གྱེན་ལ་ཡར་ཐེམ་པ་མང་པོ་ཡོད་པ་ཤི་གསོན་བྱེ་མའི་ལ་ཡིན། ཤི་གསོན་བྱེ་མའི་ལ་མགོ་དེར་རྩེ་མོ་བྲག་ངོས་ལ་ཟུག་པའི་རྡོ་རིང་གནམ་གྱི་ཀ་བ་དང་། རྡོ་ཐུང་སའི་རྟེན་ཕུར་ཞེས་པའི་རྡོ་འབུར་ཞིག་ཡོད། དེ་གཉིས་ཀྱི་རྩ་ན་དུར་ཁྲོད་ཆེན་པོ་བསིལ་བའི་ཚལ་ཞེས་རྡོ་ལ་རྐང་ལག་གི་རུས་དུམ་སོགས་རང་ཆས་སུ་གྲུབ་པ་དང་། རྡོ་རིང་གནམ་གྱི་ཀ་བའི་འགྲམ་ན་བདུད་རྩིའི་སྤར་བུ་ཟེར་བའི་རྡོ་འབུར་སྟེང་ནས་བུ་ག་ཡོད་པ་དང་། རྡོ་ཐུང་སའི་རྟེན་ཕུར་གྱི་རྩ་ན་ཨ་མོ་ལེབ་ཀྱི་རྡོ་ལེབ་ཟེར་བའི་རྡོ་ཆུང་གྲུ་བཞི་ཞིག་ཡོད། དེ་ནས་གཡས་བསྐོར་གྱིས་སོང་བས་འོག་ཞབས་ཁ་ཞེས་མི་གཟུགས་གང་ཙམ་གྱི་བྲག་ཁུང་ཐུར་དུ་མར་བུག་པ་ཡོད། དེ་ཕྱོགས་ན་གཤིན་རྗེ་ཆོས་རྒྱལ་ལ་ལས་མཁན་རྣམས་ཀྱིས་བསྐོར་བ་དང་། གཤིན་ཐང་སྐྱ་མོ། ལས་ཀྱི་རྒྱ་མ། རྒྱ་རྡོ། ཤོག་དྲིལ་ཡི་གེ། ཤལ་མ་རི་ཡི་སྡོང་པོའམ་རིའི་རྒྱལ་པོ་རི་རབ་ཟེར་བ་བཅས་མཇལ་དུ་ཡོད། དུར་ཁྲོད་བསིལ་བའི་ཚལ་ནས་གནས་ཕུག་གི་དཀྱིལ་དུ་ཚུར་འོང་ན་འཕགས་མཆོག་ཐུགས་རྗེ་ཆེན་པོ་བཅུ་གཅིག་ཞལ་རང་བྱུང་ངོ་མཚར་ཅན་མི་གཟུགས་ལྷག་ཙམ་དང་། དེའི་གཡས་གཡོན་གཉིས་ན་འཇམ་དབྱངས་དང་ཕྱག་རྡོར་གྱི་སྐུ་རང་གྲུབ་བཅས་མཇལ་རྒྱུ་ཡོད། བཅུ་གཅིག་ཞལ་དེ་གཡས་བསྐོར་བྱས་ནས་སོང་བའི་རང་གི་གཡོན་ཕྱོགས་ཀྱི་བྲག་ཁུང་ཞིག་ལ་རི་དྭགས་ཀྲིཥྞ་སྭཱ་རའི་ཡན་ལག་ཆ་ཚང་ཞིག་ཡོད་ལ། བཅུ་གཅིག་ཞལ་གྱི་སྟེང་ཕྱོགས་ཀྱི་བྲག་ངོས་ལ་ཨོ་རྒྱན་པད་ཞྭ་དང་། ཞབས་རྗེས། དགྲ་བགེགས་བསྒྲལ་བའི་ཧམ་ཁུང་ངམ་སྲིན་པོ་ལ་ཟོར་བརྒྱབས་རྗེས་དབྱིབས་ཟུར་གསུམ་ལ་རྩེ་ཕྲ་བ་ཐུར་དུ་བསྟན་པ་མི་ཚད་ཙམ་ཡོད། བཅུ་གཅིག་ཞལ་གྱི་ཉེ་འགྲམ་ཕུག་ནས་རང་བྱུང་གི་ཀུན་རིག་རྩ་ལྷ་སོ་བདུན་མགྲོན་ཐབས་ཀྱི་ལྷ་དང་བཅས་པ་དང་། དཔལ་མགོན་བདུན་ཅུ་རྩ་ལྔ། རྟ་མགྲིན་ལྕགས་རལ་ཅན། མཁའ་འགྲོ་སྡེ་ལྔ། རྒྱལ་ཆེན་སྡེ་བཞི། རྟ་མགྲིན་དྲེགས་པ་ཀུན་སྒྲོལ། རྗེ་བཙུན་རྡོ་རྗེ་རྣལ་འབྱོར་མ་སོགས་དཔག་མེད་མཇལ་རྒྱུ་ཡོད། རི་དྭགས་ཀྲིནཥྞ་སྭཱ་ར་ནས་ཡར་སོང་ན་སྒྲོལ་མ་དཀར་སྔོན་གཉིས་དང་། བདེ་མཆོག་ལྷ་དྲུག་ཅུ་རྩ་གཉིས། ངར་འཛིན་རས་པ་ལ་རས་པ་དུང་ཕྱུར་གྱིས་བསྐོར་བ་སོགས་མཇལ་རྒྱུ་ཡོད། དེ་དག་ཏུ་བྲག་གཡབ་ཆེ་ཆུང་འདྲ་མིན་གྱི་མུན་ཁང་རིམ་པ་དགུ་བརྒྱ་ཡོད་དོ། །ཤལ་མ་ལིའི་སྡོང་པོ་ནས་ཡོང་བའི་བྲག་རྩ་ནས་སོག་ལི་ཁ་ཞེས་བྲག་སྒོ་སོག་ལེའི་ཁ་ལྟ་བུ་ནས་འཛུལ་ས་དང་། དེ་ཕྱོགས་སུ་ཐུགས་རྗེ་ཆེན་པོ་ཕྱག་བཞི་པ་ཞིག་བཞུགས་ལ། བྲག་ངོས་ཁུག་དེར་དུང་བྱ་དཀར་ལུ་གཉིས་ཡོད། དེ་ནས་སོང་བས་མ་གཅིག་ཁྲོས་མ་ནག་མོའི་སྐུ་དང་། ཨོ་རྒྱན་གྱིས་དམ་ལ་བཏགས་པའི་རུས་སྦལ་རྒྱ་བོ་ཁ་ཐུར་དུ་གྱུར་པ། གླང་པོ་ཆེ་ཞིག་གི་སྣ་ལྗགས་ལ་མ་གཅིག་གི་ཕྱག་གིས་འཛིན་པ་བཅས་ཡོད། ཡར་ཕུག་ན་མ་གཅིག་སྒྲུབ་ཁང་ཞེས་པའི་བྲག་ཕུག་དང་། དེ་ནས་ཡར་ཕུག་ལ་སོང་ན་ཀླུ་མི་མགོན་དཀར་པོ་དང་། དེིའི་ལྟག་ཏུ་བདེ་མཆོག་དཀར་པོ་དང་། ཚོགས་བདག་དཀར་པོ་བཅས་བཞུགས། དེ་དག་གི་ངོས་འོག་ཏུ་རྡོ་གོར་གོར་གཞོང་པ་འདྲ་བ་དག་གི་ནང་དུ་རིན་ཆེན་བདུད་རྩིའི་ཚེ་ཆུ་བྲི་གང་དང་བྲལ་བ་ངོ་མཚར་ཅན་བཞུགས། དེའི་མར་ཞབས་ན་རྒྱ་གར་གྱི་གསེར་སྒོ་ཁྲ་མོ་ཞེས་བྲག་ལྡེབས་ན་སྒོ་རང་དོད་དུ་གྲུབ་པ་ནས་འཛུལ་ས་ཡོད། དེ་ནས་རིམ་པར་འོངས་དུས་མཁའ་འགྲོ་མ་སེངྒེའི་གདོང་པ་ཅན་དང་། སྟག་གི་གདོང་པ་ཅན་སོགས་དང་། རིན་ཆེན་ནོར་བུ་ཆ་བདུན། ཆོས་སྐུ་ཀུན་ཏུ་བཟང་པོ། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། ཡི་དམ་འཁོར་ལོ་བདེ་མཆོག མཁའ་སྤྱོད་མ། རྡོ་རྗེ་ཕག་མོ་སོགས་ལ་ཡི་དམ་རྒྱུད་སྡེའི་ལྷ་ཚོགས་དཔག་ཏུ་མེད་པས་བསྐོར་བ་བཞུགས། དེ་ནས་སིན་དྷུ་རའི་ཕུག་ན་སིན་དྷུ་ར་དང་། དེའི་ལྷོ་ནུབ་ཀྱི་ནམ་མཁར་བལྟས་ན་ཨོ་རྒྱན་རྒྱ་གར་འཕུར་ལམ་མམ་སྦས་ཡུལ་དུ་འཕུར་ལམ་ཟེར་བའི་བྲག་ཁུང་གཏིང་རིང་བ་ཞིག་ཡོད། དེ་ནས་གནས་སྒོ་དང་ཉེ་བ་ན་ཁྲོ་བོ་རྟ་མཆོག་རོལ་པའི་སྐུ་རང་བྱོན་དང་། བྲག་སྡེབ་ན་རྒྱ་གར་གྲུབ་ཆེན་བརྒྱད་ཅུ་སོགས་སྐུ་དཔག་ཏུ་མེད་པ་བཞུགས། དེ་དག་གི་སྟེང་ལོགས་ན་ངོར་ལུགས་དཀྱིལ་འཁོར་བདུན་གྱི་དཀྱིལ་འཁོར་རང་བྱོན་ཡོད་པ་སོག་པོས་ཁྱེར་ནས་ད་ལྟར་མི་བཞུགས། དེ་ནས་འོང་བས་གསས་མཁར་དང་ཐུག་ཅིང་། དེའི་གཡོན་རྩ་ན་སྒོ་སྲུང་ལས་མཁན་ཨ་བ་གླང་མགོ་དང་། དེའི་གཡོན་ཟུར་ན་ཚོགས་ཀྱི་བདག་པོའི་སྐུ་རང་བྱོན་བཅས་བཞུགས། གསས་མཁར་སྟེང་ན་བུ་རྡོ་ཟེར་བ་ཞིག་ཡོད་པ་པང་དུ་བླངས་པས་བུ་མེད་པ་མང་པོ་ལ་བུ་སྐྱེས་པའི་ཚུལ་བཤད་རྒྱུ་འདུག གཞན་ཡང་གནས་ཕུག་ནང་དང་སེངྒེ་དཀར་མོིའི་འོ་མ་དང་། མ་ཧེ་དཀར་མོའི་སྐྲི། གནས་དཀྱིལ་ན་གནས་ཆུ་བྱིན་ལྡན་སོགས་ངོ་མཚར་ཆེ་བ་དཔག་ཏུ་མེད་པ་བཞུགས་པ་འདི་འདྲ་ཡུལ་ཕྱོགས་གང་ནའང་བཞུགས་པར་དཀའ་བ་ཡིན་པ་ཞིབ་ཏུ་མཇལ་ན་ཤེས་པ་ཡིན། ཡང་རེ་ཕུག་དང་གུ་ཆུང་རྩེ་རེ་སོགས་སུ་གནས་མཇལ་ལ་འགྲོ་ན་གནས་སྒོ་ནས་བར་དོའི་འཕྲང་ལམ་དང་ཤི་གསོན་བྱེ་མའི་ལ་བརྒལ་ཏེ་སྲིན་པོ་ལེབ་ནས་ཕར་མཐུར་ཕབ་ཀྱིན་སོང་བས་སྐྱིད་མཚེར་ཀོབ་ཏུ་སླེབས། དེ་ནས་ཡར་ཅུང་སོང་བའི་བྲག་རྩ་ན་ར་ཕུག་ནང་ཟེར་བའི་ཕུག་སྒོ་ཤར་དུ་ཕྱོགས་པ་ཞིག་ཡོད་ཅིང་། ཕུག་པའི་ནང་ན་རང་བྱུང་གི་རྡོ་གཞོང་གི་ནང་དུ་བདུད་རྩིའི་ཚེ་ཆུ་དང་། ར་ཡི་རྨིག་རྗེས་མང་པོ། ཐུབ་བསྟན་ཆོས་འཕེལ་རབ་རྒྱས་དང་། གྲུབ་དགེ་ངག་དབང་བྱམས་པ་གཉིས་སྐུ་མཚམས་བཞུགས་དུས་ཀྱི་རྡོ་ཁྲི། ༼ གནས་འདིར་ཆོས་འཕེལ་རབ་རྒྱས་སྐུ་མཚམས་བཞུགས་དུས་སྐུ་ཆིངས་ཀློད་རྒྱུ་མ་བྱུང་བས་ཐེངས་ཤིག་སྐུ་ཆིངས་བཀྲོལ་དུས་རྩག་པ་ཞིག་མནབ་རྒྱུད་ཡོད་པ་བྲག་ཆུས་ཟོས་ནས་རུལ་ཏེ་སྟོད་སྨད་གཉིས་སུ་སོང་ཚུལ་གསུངས། མཆན། ༽ ཕུག་སྒོའི་མར་ཙམ་གྱི་བྲག་ངོས་ལ་ཐུབ་པའི་སྔགས་མུ་ནེ་དང་འབྲུ་གསུམ་མ་ཎི་བཅས་ཀྱི་རང་བྱོན་ཤིན་ཏུ་མཚར་བ་སོགས་བཞུགས། དེ་ནས་གྱེན་ལ་བརྒལ་ཏེ་བྲག་བྱ་མཆུ་མ་ནས་ཡར་སོང་བའི་གདོང་རྒྱབ་ཕར་ཀ་ན་བྲག་རི་དཀར་པོ་ཉའི་དབྱིབས་ཅན་ཞིག་ཡོད་པ་དེ་ཨོ་རྒྱན་རིན་པོ་ཆེའི་སྒྲུབ་གནས་གུ་ཆུང་གནས་ཡིན་ཞིང་། གནས་ཀྱི་སྐེད་དུ་ཞལ་ལྷོ་ནུབ་ཏུ་ཕྱོགས་པའི་ཕུག་པ་གཏིང་ཟབ་པ་ཞིག་འདུག་པ་ན་སློབ་དཔོན་རིན་པོ་ཆེ་ལོ་གཅིག་དང་ཟླ་གཅིག་ལ་བཞུགས་གསུངས་ཤིང་། ཁྱུང་གྲགས་གཏེར་བྱོན་པདྨའི་རྣམ་ཐར་ཡང་གསང་དྲི་མེད་ལས། ཁྲ་སྤང་བྲག་ལ་ཟླ་ཕྱེད་བཞུགས༔ འབྲི་གཉན་རྫོང་ལ་ཞག་བདུན་ལོ་ཕྱེད་དེ༔ ཞེས་གཉན་འདོང་དུ་སློབ་དཔོན་རིན་པོ་ཆེ་ལོ་ཕྱེད་དང་ཞག་བདུན་ལ་བཞུགས་ཚུལ་གསུངས་པའང་གནས་འདི་ཡིན་སྙམ། གུ་ཆུང་ཨོ་རྒྱན་སྒྲུབ་ཕུག་ཏུ་གུ་རུ་རིན་པོ་ཆེའི་བཞུགས་ཁྲི་རྒྱབ་ཡོལ་སྐུ་རྒྱབ་ཀྱི་རྗེས་བཅས་དང་། ཕྱག་རྔ། དུང་དཀར་སོགས་མཆོད་ཆ་མང་པོ་བཞུགས། དེ་ནས་ཕར་ཅུང་ཟད་སོང་བའི་ཝ་རས་ལ་རྒྱབ་ན་རྡོ་ལེབ་ཅིག་ལ་རང་བྱུང་རྡོ་ཡི་མཆོད་རྟེན་བཞུགས། ཝ་རས་ལ་ནས་ཅུང་སོང་ན་དཔལ་ལྡན་ལྷ་མོའི་སྒྲུབ་གནས་ཇོ་རི་ཟེར་བའི་དིལ་འབུར་ཞིག་ཡོད་ཅིང་། ཇོ་རིའི་རྩ་ན་ཞལ་ནུབ་ཏུ་བསྟན་པའི་ཕུག་པ་ཟུར་གསུམ་ཞིག་ཏུ་ཁྲག་མཚོ་སོགས་ཡོད། དེ་ནས་ལུས་བདེ་ཡོད་ན་སྒང་མགོ་ནས་མར་སོང་བས་རྩེ་རེ་རྡོ་རྗེའི་གནས་ཀྱི་མགོ་ལ་སླེབས་ཤིང་། ལུས་བདེ་མེད་པ་རྣམས་ཇོ་རིའི་རྒྱབ་ནས་མཐུར་ཕབ་སྟེ་དེ་ནས་གྱེན་ལ་ཞིག་བརྒལ་ནས་ཡོང་བས་རྩེ་རེའི་གནས་མགོ་ལ་སླེབས་པ་ཡིན། རྩེ་རེའི་གནས་ཀྱི་མདུན་ངོས་གཟར་བ་དེ་ནས་མར་བབ་པའི་བྲག་ངོས་ལ་རྩེ་རེའི་གནས་ཕུག་གོང་མ་བཞུགས་ཤིང་། ཕུག་པའི་ནང་དུ་ཨོ་རྒྱན་གྱིས་ཆབ་ལྷམ་འཕང་མལ་དང་། ཐེའུ་རང་མགར་བའི་མགར་ཚང་། དཔེ་ཆ་དྲེལ་རྒྱབ་གཅིག་ཀློག་པ། གླང་པོ་ཆེས་ས་བཤག་པ། སློབ་དཔོན་རིན་པོ་ཆེ་པདྨ་འབྱུང་གནས་ཀྱིས་གཡུ་ཡི་མཎྜལ་ས་ལ་བཀོད་པ། ཁྲག་མཚོ་ཁོལ་མ་སོགས་ངོ་མཚར་ཆེ་བ་དཔག་མེད་མཇལ་རྒྱུ་ཡོད། དེ་ནས་སླར་གནས་མགོ་ལ་འཛེགས་ཏེ་རྩེ་རེ་གནས་ཀྱི་རྒྱ་ཕྱོགས་ནས་མར་བབ་སྟེ་དགོན་པའི་རྒྱབ་ཕྱོགས་ཀྱི་རྟ་ཆུང་འཇུ་ནས་ཡོང་ན་ཡེ་ན་དགོན་དུ་ཕྱིར་འཁོར་བ་ཡིན་ནོ།།
བདུན་པ་ལྕགས་ར་དང་རྒོད་འབྲང་མཆོད་རྟེན་ནག་འབར་སོགས་ན་གནས་རྟེན་རང་བྱོན་ཇི་ལྟར་བཞུགས་པ་ནི།
མདོ་སྨད་ལུགས་བརྒྱའི་འབྱུང་གནས་སྡེ་དགེ་ལྷུན་འགྲུབ་སྟེང་གི་མདུན་ངོས་ན་ཐང་རྒྱལ་སྒྲུབ་ཕུག་དང་། པད་མདའ་ན་མཁའ་སྤྱོད་སྒྲུབ་གནས་པད་ཤེལ་དཀར་བྲག་སོགས་གཡས་གཡོན་ཉེ་འགྲམ་དག་ན་གནས་རྟེན་རྩ་ཆེན་མང་དུ་བཞུགས་པའི་ཚུལ་གཞན་དུ་གསལ་ལ། དཔལ་ལྡན་ལྷུན་འགྲུབ་སྟེང་ནས་མར་སོང་བས་ར་ཆེན་མདའི་གཉན་འདོང་ཆུ་མལ་ནང་ན་རྡོ་ལེབ་གཅིག་ལ་ཀླུ་དཀར་པོས་གཉན་འདོང་ལ་ཆང་ཕུད་ཕུལ་བའི་ཚུལ་ཡོད་ལམ་ཆེན་གསར་བཟོ་སྐབས་གཏོར་ཚར་འདུག ལམ་ལྟག་བྲག་ཁུང་དེར་ཆུ་མལ་སྒྲོལ་མ་རང་བྱོན་ཡོད། དེ་ནས་ཡོང་བའི་ལྕགས་ར་སྙན་མདའི་ལམ་ལྟག་ཤིང་འུབ་ན་སྔར་དུས་གླིང་དང་སྡེ་དགེ་ས་མཚམས་འབྱེད་པའི་རྩོད་པའི་སྡེ་པ་ཁྲ་མགོ་ཟེར་བའི་ཕ་ཝང་སྐེད་ཁྲ་དེ་ཡོད། དེ་ནས་ལྕང་ར་ནང་ནས་ཡོང་བས་དགྲ་ངུ་བྲག་མདུན་ན་ལྕགས་ར་བསམ་འགྲུབ་རྩེའི་དགོན་པ་བཞུགས་པ་མཇལ། དགོན་ལྟག་སྒང་མགོ་དེ་འཇམ་དཔལ་གཤིན་རྗེའི་གཤེད་ཀྱི་གནས་ཁྱད་པར་ཅན་ཡིན་པས་ཕྱིས་འཇིགས་བྱེད་ལྷ་ཁང་དང་སྒྲུབ་ཁང་གསར་དུ་བཞེངས་ཤིང་། ལས་དག་པ་ཡིན་ན་གནས་འདིར་དུར་ཁྲོད་ཆེན་པོ་བརྒྱད་ཀྱི་དབུས་ན་འཇམ་དཔལ་གཤིན་རྗེའི་གཤེད་ཀྱི་དཀྱིལ་འཁོར་མངོན་སུམ་བཞུགས་པ་མཇལ་རྒྱུ་ཡོད་གསུངས། འཇིགས་བྱེད་ལྷ་ཁང་གི་མཐའ་སྐོར་ན་འཛམ་གླིང་གེ་སར་རྒྱལ་པོའི་ཕུ་བོ་དཔའ་ཡ་མེད་རྒྱ་ཚ་ཞལ་དཀར་གྱི་ཕོ་བྲང་ཆེན་པོ་ཞལ་ལུའི་དངུལ་ཆུ་ཁྲོ་རྫོང་གི་མཁར་ཤུལ་དང་། ཕྱོགས་བཞི་ལ་རྫོང་ཆུང་བཞིའི་ཤུལ་བཅས་ཡོད། དགྲ་ངུ་བྲག་གདོང་ལམ་ནང་ན་རྡོ་ལ་རྒྱ་ཚའི་ཆིབས་རྗེས་དང་། ལྕགས་ར་དགོན་ནས་ཕར་བལྟ་སའི་ཐད་ཀྱི་རྒོད་འབྲང་རི་མགུལ་ན་རྒྱ་ཚའི་མདའ་རྟགས་ཡོད། དགོན་པའི་ཕར་རི་ཆུ་རྩ་ན་བྲག་དིལ་དང་གབ་མཚོ་བཞུགས་པ་ཨ་ཕྱི་ཆོས་ཀྱི་སྒྲོལ་མའི་གནས་དང་། དགོན་འདབས་ཐང་ཆེན་མ་ནས་མར་ཡོང་བའི་ལྷ་ཡོང་ཐང་འདབས་ན་ཇག་ར་ཟེར་བའི་བྲག་དིལ་ཞིག་ཡོད་པ་བཙན་རྒོད་ཇག་མེའི་གནས་ཡིན། དེ་ནས་ཡོང་ན་སྡེ་དགེའི་མདོ་ཆེན་བཞིའི་ཡ་གྱལ་ཤར་རྩེ་ཟིལ་མདོ་ཞེས་གྲགས་པར་སླེབས་ཤིང་། རི་ཁུག་གད་ཆེན་གདོང་ན་གེ་སར་རྟ་ཆུ་བླུད་ས་ཟེར་བའི་ཆུ་མིག་ཆེན་པོ་གསུམ་ཡོད། དེ་ནས་མར་ཡོང་བའི་ཕར་ཀ་གོ་རོང་མདའི་བྲག་ལ་རྒྱ་ཚའི་ཞལ་ངོ་དང་། རྩ་བརྒྱད་ཐང་ནས་ཡོང་བའི་ལམ་ཁའི་བྲག་ལ་གེ་སར་གསང་རྡོར་བརྒྱབས་པའི་རྗེས་དང་། སྐུ་དཔུང་གི་རྗེས་བཅས་ཤིན་ཏུ་གསལ་བར་ཡོད། དེའི་ཕར་རི་རྒོད་འབྲང་རྩ་ར་རི་ཁྲོད་ན་ཆུ་འཕུར་བླ་མ་ཉི་མ་རྒྱལ་མཚན་གྱི་སྒྲུབ་གནས་སོགས་གནས་འདིའི་སྟོད་སྨད་རྣམས་ལ་སྒྲུབ་གནས་རི་ཁྲོད་མང་པོ་བཞུགས། སྔར་དུ་མི་རྣམས་འདི་ནས་འགྲོ་དུས་མ་ཎི་པད་དབྱངས་རེ་བྱས་པས་རི་ཁྲོད་ན་ཆུ་འཕུར་བླ་མས་མ་ཎི་པད་དབྱངས་བྱེད་ཡོང་ཞིང་། ད་ལྟ་ཡང་སྡེ་དགེའི་ཕྱོགས་ན་ཆུ་འཕུར་མ་ཎི་པད་དབྱངས་ཟེར་བ་ཞིག་བྱེད་རྒྱུ་ཡོད། རྒོད་འབྲང་རི་བྲག་རྣམས་ལ་སཱཙྪའི་འབུམ་ཁང་ཟེར་ཞིང་ད་ལྟ་ཡང་ས་འོག་ནས་སཱཙྪ་མང་པོ་རྙེད་རྒྱུ་ཡོད་འདུག དེ་ནས་མར་སོང་ན་གེ་སར་ཆང་རྡོ་བཀོག་ས་སླེབས་ཤིང་། ལམ་ལྟག་བྲག་ལ་གེ་སར་གྱིས་གསོང་ཆང་རྒྱབ་མལ་དང་། དེའི་ཕར་རི་རྒོད་འབྲང་རི་འདབས་རྩ་བརྒྱད་མདའ་ན་བྲག་ཕྲེང་མཆོད་རྟེན་འདྲ་བ་མང་པོ་ཡོད་བརྒྱ་རྩ་བརྒྱད་མཆོད་རྟེན་ར་བ་ཡིན། རྒོད་འབྲང་གནས་ཀྱི་དབུ་རྩེ་ན་སྒྲུབ་ཕུག་དང་ཕྱག་ཞབས་ཀྱི་རྗེས་མང་པོ་དང་། དགེ་འུག་ནོར་བུའི་གླིང་ན་གྲུབ་དབང་སྔོ་སྟོན་རིན་པོ་ཆེ་དང་། འཇམ་དབྱངས་ཆོས་ཀྱི་དབང་པོ་སྐུ་ཕྲེང་གོང་འོག་གི་འཁྲུངས་གནས་སོགས་མཇལ་རྒྱུ་ཡོད། གནས་འདིར་ཚེའི་རིག་འཛིན་བརྙེས་པ་མང་པོ་སྒོམ་ལ་བཞུགས་པར་བཤད་ཅིང་། མཁན་པོ་བསམ་གཏན་བློ་གྲོས་དཔལ་སྤུངས་སུ་ཕེབས་དུས་ཤིག་ལ་ཕར་ལམ་ཟིལ་མདོར་ཞག་ཚུགས་མཛད་དེ། ཆབ་བསིལ་ལ་ཡུན་རིང་ཞིག་བཞུགས་ནས་ཕྱིར་བྱོན་དུས་སྟན་ཆད་ཅིག་བསྣམས་འདུག་པར་རྒྱུ་མཚན་ཞུས་པས། རྒོད་འབྲང་གནས་ན་ར་རྫི་དགེ་འཕེལ་ཚེའི་རིག་འཛིན་བརྙེས་ནས་བཞུགས་པ་མཇལ་སོང་ཞིང་། དད་རྟེན་ཞིག་དགོས་ཞུས་པས་འདི་གནང་བྱུང་གསུངས་ནས་དཔལ་སྤུངས་ཕེབས་དུས་ཕྱེད་སི་ཏུ་ལ་ཕུལ་བ་དང་། དུས་དེར་སི་ཏུ་པདྨ་དབང་མཆོག་གིས་ཞལ་མཚར་མཛད་ནས་ངས་དབུ་ཆེ་ལ་ནས་བྱ་སྒྲོ་ཆག་ཅིག་བྱུང་བསམས་པར་གསུངས་པར། བསམ་བློས་དེ་འཕྲལ་ངས་དབུ་ཆེ་ལ་ནས་མར་ལྟ་དུས་དཔལ་སྤུངས་བླ་བྲང་གི་ཉི་ར་ན་ཟངས་སྐྱོགས་ཤིག་བཀལ་འདུག་བསམ་ཞེས་ཞུས་སྐད་འདུག འབྲི་ཟིལ་མདོའི་གཡོན་ཕྱོགས་ཕུག་སྒོ་སྒང་དེ་རྗེ་བཙུན་སྒྲོལ་མའི་གནས་ཡིན་ཞིང་། འབྲི་ཆུའི་ཆུ་རྩ་ན་སྒྲོལ་མ་ཕུག་ཟེར་བའི་ཕུག་པ་སྣ་ལུང་ཅན་ཞིག་ཏུ་སྒྲོལ་མ་ཉེར་གཅིག་རང་བྱོན་བཞུགས་ཀྱང་དགུན་ཁ་འཁྱག་དར་ཆགས་དུས་མ་གཏོགས་མི་ཐར། དེའི་མར་རྒྱབ་ཕུག་སྒོ་ཕུག་པ་ན་སྦྲུལ་ཞིག་གི་ཁ་སྣ་ལ་ཕུར་པ་བཙུགས་རྗེས་ཡོད་པ་ཀཿཐོག་གཅོད་སྨྱོན་གྱིས་དམ་ལ་བཞག་པ་ཡིན་ཟེར། ཕར་ཀ་སྐམ་ཐོག་ན་སྡེ་དགེའི་མཐའ་རྟེན་དང་གཉན་འདོང་གནས་ཀྱི་སྒོ་སྲུང་ཨ་མྱེ་རྫོང་ཆེན་ཟེར་བའི་བྲག་དེལ་ངོ་མཚར་བ་ཞིག་ཡོད་ཅིང་། དེའི་མར་རྒྱབ་ཆུ་ཁ་ན་རྡོ་ཕང་ཞིག་ལ་ཞབས་རྗེས་ཤིག་ཡོད། དེ་ནས་འབྲི་ཟིལ་མདོའི་གཡས་ཕྱོགས་གླང་ཆེན་སྣ་ལྗགས་ནས་ཡར་བསྐོར་ཏེ་འོང་བའི་གད་ཆེན་གདོང་གི་ཆུ་ཕ་རིའི་རྒྱབ་ཕྱོགས་ན་ཡོན་ཏན་འཕྲིན་ལས་ཀྱི་གནས་མཆོག་སེང་ཆེན་གནམ་བྲག་ཏུ་གྲགས་པ་བཞུགས་ཀྱང་འདི་ནས་དངོས་སུ་མི་མཇལ། དེ་ནས་ཡར་འོང་བའི་ཕར་རི་ཞེ་ན་མདའི་གཡོན་ཟུར་ཆུ་རྩ་ན་དགོན་ཐོག་བྲག་གམ་འབང་དིལ་བྲག་ཟེར་བའི་བྲག་རི་དམར་པོ་གནམ་ལ་ཟུག་པ་ཞིག་ཡོད་པ་གནོད་སྦྱིན་བཻཀྩེའི་གནས་ཡིན་པར་གསུངས་ཤིང་། བྲག་སྐེད་ན་ལྷ་མོའི་གསང་ཕུག་དང་། ཆུ་རྩར་སྤང་ལྟེམ་ཟུར་གསུམ་ཆེ་བ་ཞིག་འདུག་པ་ན་སྔོན་དུས་གདོང་ཐོག་དགོན་ཟེར་བའི་དགོན་པ་ཞིག་ཡོད་ཤུལ་འདུག དེ་ནས་ཡར་ཡོང་བའི་ཕར་རི་འབྲི་ཆུའི་རྩ་ན་དགེ་མིག་ཀུན་འབྲོང་མཚོ་ཟེར་བའི་མཚོ་ཁྱད་པར་ཞིག་དང་། དེ་ནས་ཡར་སོང་ན་རྗེ་བཙུན་སྒྲོལ་མའི་གནས་མཆོག་རྡོ་རྗེའི་བྲག་རའམ་ལྕེ་ཡི་བྲག་ལ་མདའ་ཟུག་ཏུ་གྲགས་པ་ཡོད་ཅིང་། བྲག་རའི་གནས་འདས་ཆུ་རྩའི་བྲག་ཁུག་ན་སྒྲོལ་མ་རང་བྱོན་ཞིགས་བཞུགས་པ་ལུ་གེའི་གདོང་སྣ་ནས་ཕར་བལྟས་ན་མཇལ་ལ། འདི་དང་གཡང་ཤོད་སྒྲོལ་མ་རང་བྱོན་གཉིས་ཀྱི་བར་ན་སྒྲོལ་མ་ཉེར་གཅིག་གི་རང་བྱོན་བཞུགས་ཚུལ་ཐོས། དེ་ནས་ཡར་ཡོང་བའི་ལམ་ཁ་ནས་ཕར་རིར་རབ་བརྟན་དགོན་པ་དང་། རྒྱབ་རི་ངོར་མཛངས་རྡོ་རྗེ་མཆོག་རབ་མཇལ། དེ་ནས་ཡོང་བས་གནས་ཡིག་ལས་ཆུ་མིག་བརྒྱ་དང་བརྒྱད་ཅུ་གསུངས་པའི་ཆུ་མིག་བརྒྱད་ཅུ་ལ་སླེབས་ཤིང་། དེ་ནས་ཕར་བལྟ་སའི་གཟིག་ཆུ་སྒོའི་མར་ཟུར་ལམ་ཁ་ན་གཉན་འདོང་གི་འབྲུ་བང་རྡིག་རྡིག་ཐང་ཟེར་བ་ཡོད། ཆུ་མིག་བརྒྱད་ཅུ་ནས་ཅུང་ཟད་ཡོང་བའི་འབྲི་ཆུའི་ནང་ན་སློབ་དཔོན་རིན་པོ་ཆེས་སྲིན་པོ་བསྒྲལ་བའི་བམ་རོ་མིང་ལ་སྲིན་པོ་མགོ་དགུ་ཟེར་བའི་རྡོ་ཕང་ཞིག་ཡོད་ཅིང་། ཕར་རིའི་འབྲི་ཆུའི་ངོགས་མཚོ་ཐང་ཁུག་ན་སློབ་དཔོན་རིན་པོ་ཆེས་སྲིན་པོ་གཅིག་མནན་མཛད་ཡོད། དེ་ནས་འོང་བའི་ཀློང་ཐང་འབྲི་ཆུའི་འགྲམ་ན་གཉན་འདོང་ར་ལུག་ཟེར་བའི་རྡོ་མཆོག་རྡོ་ཡི་སྙིང་པོ་དང་། རྡོ་རྒྱུས་བྱ་བལ་མ་སོགས་ཀྱི་རྡོ་ངོ་མཚར་ཆེ་བ་མང་པོ་བཞུགས་ཤིང་། དེ་ནས་འབྲི་ཆུའི་ནང་ན་གཉན་འདོང་ཆུ་འཕགས་ཟེར་བའི་རྡོ་ཕང་གསུམ་བསྒྲིགས་ནས་ཡོད། ཕར་རི་གཟིག་སྒང་རྒྱབ་ན་སྲིན་པོའི་གྲོང་ཁྱེར་གཅིག་ཡོད་པ་གུ་རུས་ཕྱག་མཁར་བཙུགས་ནས་རྫ་འོག་ཏུ་མནན་ཚུལ་འདུག དེ་ནས་གཉན་འདོང་གི་གནས་མདུན་གྱང་ཕུག་སྒང་དུ་སླེབས་དུས་གཉན་འདོང་གི་དབུ་རྩེ་དང་ཡེ་ན་དགོན་པ་མཇལ་ཞིང་། ལམ་ཞབས་ནས་གནས་ཡིག་ལས་གསུངས་པའི་ཕ་ཝང་མི་དགུ་རྟ་དགུ་ཞེས་པ་ཡོད། དེ་ནས་ལམ་ཆེན་བསྐྱུར་ནས་ལྟག་ཕྱོགས་ཀྱི་རྡོ་མཆོད་ཡོད་ས་ནས་རྐང་ལམ་དེད་དེ་ཁ་ལུང་པར་གཏད་ནས་སོང་བས་སྤང་མཆུ་ཞིག་ལ་སླེབས་ཉེ་བའི་རང་གི་གཡོན་ཕྱོགས་ན་གནམ་ཆོས་གནས་ཡིག་ལས་གསལ་བའི་ཕ་ཝང་གབ་གནས་ཟེར་བ་དེ་ཡོད་ཅིང་། ཕ་ཝང་གི་ཐོག་ཏུ་གུ་རུས་ཕྱག་མཁར་བཙུགས་ཤུལ་དང་། གཏེར་སྲུང་བྱ་རོག་ཡབ་ཡུམ་མཆུ་ཁྲག་གིས་བྱུག་ནས་བྱ་ར་མཛད་དེ་བཞུགས་ཚུལ་གསུངས་པ་ཡོད། དེ་ནས་ཡོང་བའི་སྤང་ཐང་དཀྱིལ་ན་སྲིན་པོའི་སྙིང་ཟེར་བའི་རྡོ་ནག་ཟུར་གསུམ་སྙིང་གི་དབྱིབས་ཅན་ཞིག་ཡོད་ཅིང་། འདི་ནས་གཏེར་ཆེན་བདུད་འདུལ་རྡོ་རྗེས་ཚོགས་བསྐང་དང་ཕྱག་བསྐོར་མང་པོ་མཛད་སྐད་འདུག དེ་ནས་ཡར་བལྟ་དུས་མདུན་ཕྱོགས་ཀྱི་ཕར་རི་ན་མངོན་སུམ་དུ་མཐོང་བའི་མཆོད་རྟེན་དེ་ནི་མ་རུང་འདྲེ་སྲིན་རྣམས་ཀྱི་གཉའ་གནོན། ནད་གདོན་གདུག་པ་ཅན་གྱི་གཉེན་པོ། སློབ་དཔོན་རིན་པོ་ཆེ་སྐུ་དངོས་ཀྱིས་བོད་ཁམས་སྤྱིའི་ས་གནད་ཀྱི་མེ་བཙའ་ལ་བཞེངས་པའི་ཁམས་ཀྱི་མཆོད་རྟེན་ནག་འབར་ཞེས་པ་ཡིན་ཞིང་། འདི་ཉིད་བར་སྐབས་སུ་སོག་དམག་དང་རྔོན་པ་དག་གིས་གཏོར་བཤིགས་གཏོང་བ་གེ་མོ་གཏེར་སྟོན་དང་འབྲི་གཏེར་འོད་གསལ་རྡོ་རྗེ་གཉིས་ཀྱིས་སྔ་རྗེས་སུ་ཉམས་གསོ་མཛད། དེ་རྗེས་དམངས་གཙོ་བཅོས་བསྒྱུར་སྐབས་བུམ་སྟོད་ཡན་བཤིགས་སོང་བ་སྦས་པའི་རྣལ་འབྱོར་ཆེན་པོ་ངག་དབང་སྙན་གྲགས་ཀྱིས་ཉམས་གསོ་མཛད་དེ། སྔར་གྱི་མཆོད་རྟེན་རིལ་པོ་བཞུགས་པའི་ཕྱི་ནས་རྩིག་པས་གཡོགས་ཏེ་བདུད་འདུལ་མཆོད་རྟེན་ཐོག་ཚད་གཉིས་ལྷག་ཅན་འདི་བཞེངས་པ་ཡིན་ཞིང་། དུས་དེར་རབ་ཏུ་གནས་པར་མཛད་པའི་ཚེ་ཡེ་ཤེས་པ་བཞུགས་པའི་རྟགས་ངོ་མཚར་བ་བྱུང་བ་གཞན་དུ་གསལ་ལ། མཆོད་རྟེན་འདི་ལ་ཕྱིས་སུ་དཔེ་ཝར་མཆོག་སྤྲུལ་རིན་པོ་ཆེ་འཇམ་དབྱངས་བསོད་ནམས་ལེགས་པའི་དབང་པོ་སོགས་དམ་པ་མང་པོས་རབ་ཏུ་གནས་པའི་མེ་ཏོག་འཐོར་བར་མཛད། མཆོད་རྟེན་གྱི་འོག་ཚེར་གསེབ་ན་དུག་གསུམ་མཚོན་པའི་རྡོ་གསུམ་ཡོད། མཆོད་རྟེན་འདི་ལ་བད་ཀན་སོགས་གཅོང་ནད་ཅན་རྣམས་ཀྱིས་ཕྱག་བསྐོར་བགྱིས་པས་སོང་དྲག་ཏུ་སོང་བ་ཤིན་ཏུ་མང་བ་བྱུང་བས་རྒྱུན་པར་བསྐོར་བར་བྱེད་མི་མང་ལ། བསྐོར་ཚད་ཆིག་ཁྲི་ཆིག་སྟོང་ཆིག་བརྒྱ་བཅུ་གཅིག་ཡིན། མཆོད་རྟེན་གྱི་གཡས་ཕྱོགས་བྲག་བཤུར་ན་སྦྲུལ་ནག་ཐུར་རྒྱུགས་དང་། གཡོན་ཕྱོགས་སུ་ཕར་རི་ནས་སྲིན་པོའི་གློ་མཆིན་དང་། སྲིན་པོའི་རྣ་བ། སྲིན་པོའི་བྲང་བཅས་བྲག་ལ་རང་གྲུབ་ཏུ་ཡོད། འདི་དག་ནི་གནས་ཡིག་ལས་གཡས་སུ་སྦྲུལ་ནག་ཐུར་དུ་རྒྱུགས་འདྲ། གཡོན་ན་དགྲ་བགེགས་བསྒྲལ་ནས་རུ་ཏྲའི་གློ་སྙིང་ཁོག་ནས་ཕྱུང་སྟེ་ཕྱི་རུ་བཏོན་འདྲ་ཡོད་གསུངས་པ་དེ་ཡིན། མཆོད་རྟེན་གྱི་གཡོན་ཕྱོགས་ཆུ་ཁ་ན་ཀླུ་མི་མགོན་དཀར་པོ་གནས་པའི་རྡོ་ལུག་ཙམ་དང་། དེའི་ཡར་ཙམ་ན་སློབ་དཔོན་རིན་པོ་ཆེའི་ཞབས་རྗེས་ཤིག་ཡོད། མཆོད་རྟེན་ནག་འབར་ནས་གཡས་བསྐོར་བྱས་ཏེ་འཕྲེད་ལམ་དུ་ཡོང་བས་འཕྲང་མགོ་ཟེར་བའི་རི་གདོང་དེར་སླེབས་ཤིང་། དེའི་གཡས་ཕྱོགས་ཀྱི་ཐལ་སྐྱ་སྒང་ཟེར་བའི་དིལ་འབུར་དེ་སཱཙྪའི་འབུམ་ཁང་ཆེན་པོ་ཡིན་པས་སྟེང་ནས་ཁྲུ་གང་ཙམ་རེ་བྲུས་པས་སཱཙྪས་གང་བ་མཇལ་རྒྱུ་ཡོད། དེ་ནས་ཕར་འཕྲེད་ལ་སོང་བའི་སྒང་མགོ་ནས་ཕ་རིའི་གད་ངོས་ཤིག་ལ་བལྟས་ན་དུང་ཕྱེ་ལས་གྲུབ་པའི་མཆོད་རྟེན་བརྒྱ་དང་བརྒྱད་ཅུ་མཇལ། དེ་ནས་བྲག་ཆད་རྫ་ལམ་དུ་མར་ཡོང་བའི་ལམ་ཁ་ན་འབྲུག་མོའི་ཆབ་ཁུངས་ཟེར་བ་ཁང་བརྩེགས་མང་པོ་ཡོད་པ་དང་། དེ་ནས་འོང་བའི་ལམ་གཡས་གཡོན་ན་རྡོ་སྣ་ལུང་ཅན་གཉིས་ཡོད། དེ་ནས་ལམ་ཆེན་ནང་སླེབས་པའི་ལམ་ལྟག་ཕ་ཝང་ཞིག་ལ་ཁྱུང་ནག་རང་བྱོན་ཞིག་མཇལ་རྒྱུ་ཡོད་དོ།།
བརྒྱད་པ་གནས་ཕུག་འོག་མ་ཁྲོམ་དབེན་གནས་ཀྱི་ཕྱི་ནང་ན་རྟེན་རང་བྱོན་ཇི་ལྟར་བཞུགས་པ་ནི།
དེ་ཡང་ཁྲོམ་དབེན་གནས་མཇལ་དུ་འགྲོ་ན་མཆོད་རྟེན་ནག་འབར་གྱི་གཡོན་ཕྱོགས་ལུང་འཇུ་ནས་ཡར་འགྲོ་དགོས་ཤིང་། ལམ་ཁ་ངལ་གསོ་ལམ་ལྟེམ་ཐད་ཀྱི་རང་གི་གཡས་ཕྱོགས་ཀྱི་ཆུ་འགྲམ་ན་རྡོ་ཞིག་གི་འོག་ན་གུ་རུའི་ཕྱག་རྗེས་ཤིག་ཡོད། གཡོན་ཕྱོགས་ན་སྲིན་ཆུ་ཟེར་བའི་ཆུ་མིག་ཅིག་ཡོད་པ་ལ་ཁྲུས་བྱས་པས་སྲིན་ནད་ལ་ཕན་པར་གསུངས། དེ་ནས་ཡར་སོང་ན་ལུང་པ་སུམ་མདོ་ཞིག་ལ་སླེབས་ཤིང་། ཕ་རི་སྤང་ཐེམ་ཡོད་ས་དེར་སོང་ནས་ཚུར་བལྟ་དུས་ཤིང་ནགས་ཀྱི་གསེབ་ན་བྲག་དིལ་ཞིག་ཡོད་པ་ཕྱག་ན་རྡོ་རྗེའི་གནས་ཡིན། རང་གི་གཡོན་ཕྱོགས་ཀྱི་ལུང་འཇུ་ཆུ་ཆེན་འབབ་ས་དེ་ལ་མགོ་ཆེ་འཇུ་ཟེར་ཞིང་། སྔོན་དུས་འདི་ནས་སྡེ་མང་པོ་ཆགས་ཡོད་པར། མགོ་ཆེ་རིན་ཆེན་འབུམ་ཟེར་བས་རྩྭ་ཞྭ་མང་པོ་བསླས་ཏེ་བཙོང་རྒྱུ་ཁྱེར་ཡོང་སྐད་འདུག སུམ་མདོའི་སྣ་དེར་ཆུ་མིག་གཅིག་ཡོད་པ་ལ་སྦས་ཡུལ་གྱི་ཆུ་ཟེར་ཞིང་། འདིའི་ཆུ་ནང་ནས་མཚམས་སུ་ར་ལུག་གི་རིལ་མ་དང་། སོག་མ་སོགས་ཁྱེར་ཡོང་སྐད་བཤད་རྒྱུག་འདུག མགོ་ཆེ་འཇུའི་གཡོན་ངོས་ཀྱི་རི་དེ་གནས་ཡིག་ལས་གསལ་བའི་རྔ་མོང་ཐུར་དུ་རྒྱུགས་འདྲ་དང་། ཚུར་རིའི་རི་དེ་སྲེ་མོང་གླ་བར་འཇབ་འདྲ་ཡིན། དེ་ནས་རང་གི་གཡས་ཕྱོགས་ཀྱི་ལུང་པ་ནས་ལ་ཐུང་ཞིག་བརྒལ་ཏེ་སོང་ན་ཕུག་རྒྱལ་ཕུག་པ་ཞེས་པའི་བྲག་ཕུག་ཆེན་པོ་ཞིག་ལ་སླེབས་ཤིང་། ཕུག་པ་འདི་ཉིད་གྱོད་སྤྲུལ་ཀུན་དགའ་སངས་རྒྱས་སོགས་དམ་པ་མང་པོའི་སྒྲུབ་གནས་བྱིན་ཆེན་ཡིན་ལ། ཕུག་པའི་ནང་ན་གུ་རུ་པདྨ་རྒྱལ་པོའི་སྐུ་ཤིན་ཏུ་གསལ་བ་ཐོག་བརྩེགས་ལྷག་ཙམ་ཞིག་མཇལ་རྒྱུ་ཡོད། དེ་ནས་ཡར་སོང་ན་སྒོ་སྲུང་སྟག་དང་རུས་སྦལ་ཁ་སྤྲོད་དང་། དེ་ནས་སོང་བའི་རང་གི་གཡས་ཕྱོགས་ཀྱི་བྲག་རི་དེ་སེངྒེ་དང་། གཡོན་ཕྱོགས་ཀྱི་བྲག་རི་དེ་སྟག་ཡིན་ཞིང་། སེངྒེའི་བྲག་སྣ་ལ་སེངྒེ་ཕུག་ཟེར་བའི་ཕུག་པ་ཞིག་ཡོད། དེ་ནས་ཡར་བལྟས་ན་ཁྲོམ་དབེན་གནས་ཀྱི་ཕྱིའི་བཀོད་པ་ལ། སྤྱིར་རི་སྟོད་ཐམས་ཅད་གྱེད་པ་འདྲ། །མཚན་ཉིད་གཅན་གཟན་དགུང་མཆོང་འདྲ། །དབེན་ཕུག་ཟབ་ཏུ་ཡོད་པ་དེ། །ཨོ་རྒྱན་གནས་དང་མཉམ་པའི་རྟགས། །ལྷོ་བུན་དཀར་པོ་འཁྲིགས་པ་དེ། །བྱང་ཆུབ་ལམ་དུ་ཞུགས་པའི་རྟགས། །ཞེས་དང་། གཡས་སུ་ནགས་གཅིག་ཡོད་པ་དེ། །ཁྲོ་བོས་རལ་པ་གསིག་པ་འདྲ། །གཡོན་དུ་ནགས་གཅིག་ཡོད་པ་དེ། །ཁྲོ་མོས་རལ་པ་གསིག་པ་འདྲ། །དབེན་སྒོ་ནུབ་ཏུ་བསྟན་པ་དེ། །ཨོ་རྒྱན་གནས་དང་འབྲེལ་བའི་རྟགས། །ཞེས་གསུངས་པ་ལྟར་རི་སྟོད་ཐམས་ཅད་གཅན་གཟན་དགུང་དུ་མཆོང་བ་བཞིན་རིམ་གྱིས་གྱེད་ཅིང་དབེན་ཕུག་ཟབ་ལ་སྒོ་ལྷོ་ནུབ་བསྟན་པ་དང་། གཡས་གཡོན་ནས་ཁྲོ་བོ་དང་ཁྲོ་མསོ་རལ་པ་གསིག་པ་འདྲ་བའི་ནགས་དང་། རྒྱུན་དུ་ལྷོ་བུན་དཀར་པོ་འཁྲིགས་པ་སོགས་གནས་ཡིག་ལས་གསུངས་པ་ལྟར་གྱི་མཚན་ཉིད་ཐམས་ཅད་ཚང་བ་མཇལ་རྒྱུ་ཡོད་ལ། རི་རྩ་ནས་ཞལ་མར་ཕྱོགས་པའི་བྲག་རི་ཤིན་ཏུ་མཐོ་བ་གསུམ་བཞུགས་པ་རིགས་གསུམ་གྱི་གནས་དང་། གནས་མི་འགྱུར་བའི་རྟགས་ལ་གནས་ཀྱི་གཡས་ཕྱོགས་ཀྱི་བྲག་ལོགས་ལ་ཧྲཱི་ཡིག་ཅིག་དང་། གཡོན་ཕྱོགས་ཀྱི་བྲག་ལ་ཤུག་ཕུང་མི་གཟུགས་ཙམ་ཞིག་ཡོད། བྲག་རྩ་དབེན་ཕུག་གི་ལོགས་གཡས་སུ་ཐུབ་པ་གཙོ་འཁོར་གསུམ་དང་། གཡོན་ཕྱོགས་སུ་ཆོས་སྐྱོང་བྱ་རོག་གདོང་ཅན་བཅས་མཇལ་རྒྱུ་ཡོད། གནས་ཕུག་གི་སྒོ་ནས་མར་བབ་ན་སྒོ་སྲུང་ཤེལ་གྱི་མཆོད་རྟེན་རང་བྱོན་ཡོད་གསུངས་པ་དེ་མཇལ་ཞིང་། འདི་ལ་འཕགས་མཆོག་ཐུགས་རྗེ་ཆེན་པོ་བཅུ་གཅིག་ཞལ་དངོས་སུ་གསལ་ཞིང་། ལོགས་ཤིག་ལ་རང་བྱུང་གི་དབུ་ངོ་མཚར་ཅན་ཞིག་བཞུགས་པ་འདི་འདྲ་གང་ནའང་དཀོན་པ་ཡིན། དེ་ནས་གཡས་བསྐོར་བྱས་ནས་སོང་བའི་ལོགས་ལ་མགོན་པོ་འོད་དཔག་མེད་དང་། སྤྱན་རས་གཟིགས་བཅུ་གཅིག་ཞལ། འཇམ་དབྱངས། ཕྱག་རྡོར། ཀླུ་མི་མགོན་དཀར་པོ། སྤྱན་རས་གཟིགས་ཕྱག་བཞི་པ། སྒྲོལ་མ་དཀར་སྔོན་གཉིས་སོགས་དང་། མཆོག་ཟུང་གཉིས་ཀྱི་ཆོས་གོས་དང་། དུང་དཀར། པད་ཚལ། གདུགས། རྒྱལ་མཚན་བཅས་ཡོད་ཀྱང་གཏོར་བརླགས་ཆེན་པོ་བཏང་ཚར་འདུག དཔག་བསམ་ལྗོན་ཤིང་དང་། ཙན་དན་གྱི་ཀ་བ་དགུ་འགྲིགས་སོགས་ངོ་མཚར་ཆེ་བ་མཇལ་རྒྱུ་ཡོད། ཤེལ་གྱི་གདུང་མ་དང་མཁར་རྔ་རང་གྲགས་སོགས་ཡོད་པ་སོག་དམག་གིས་ཁྱེར་ནས་ད་ལྟར་མི་བཞུགས། སྒོ་སྲུང་ཤེལ་གྱི་མཆོད་རྟེན་ཁྱེར་གྲབས་ཀྱིས་རྩ་བ་ནས་བཅད་ཀྱང་མ་ལྕོག་ནས་བཞག་དགོས་བྱུང་བའི་ཚུལ་གསལ་བར་ཡོད། གནས་ཕུག་གི་དཀྱིལ་ན་ཐུབ་བསྟན་ཆོས་འཕེལ་རབ་རྒྱས་ཀྱི་སྐུ་མཚམས་བཞུགས་གནས་རྡོ་ཁྲི་དང་རྒྱབ་ཡོལ་བཅས་ཡོད། དབེན་གནས་ཕུག་ཏུ་ཁྲག་མཚོ་འཇིགས་སུ་རུང་བ་དང་། དེའི་ཕུག་ཏུ་སྤང་ཐམས་ཅད་གཡའ་མ་ཤར་ཤུར་དང་། སྦ་ཕུང་དང་། སྨྱུང་ཕུང་ཡོད་པ། ལོ་ཏོག་དང་གཡུ་ལྗང་ལེགས་པ། ཁ་ཁོར་ཉི་མ་ཤར་བ། ཁ་ཁོར་སྦྲང་ཆར་འབབ་པ། ཁྲལ་ལྡོམ་བྱེད་པ་བཅས་ཡོད་ཚུལ་གསུངས་ཤིང་། སྔར་དུ་རྔོན་པ་ཞིག་གིས་འདི་ནས་ཤྭ་བ་ཞིག་བཤོལ་བ་ཁྲོམ་དབེན་གནས་ཀྱི་ཕུག་ནས་འཛུལ་སོང་བའི་རྗེས་བཅད་པས་ཁོ་རང་སྦས་ཡུལ་དུ་སླེབས་ཏེ་ལོ་མང་པོར་སོང་ཞིང་། དུས་དེར་ཁོ་རང་གང་དུ་སོང་སར་ན་ཚ་ཤི་ཆད་སོགས་མི་ལེགས་པ་འབའ་ཞིག་བྱུང་བས་སྦས་ཡུལ་གྱི་མི་རྣམས་ཀྱིས་རིམ་གྲོ་བསྒྲུབ་མི་བླ་མ་གསར་ཞྭ་རྟ་སྡོམ་ཅན་དང་། སྔགས་པ་བེར་ཞྭ་ནག་ཅན་སོགས་བོས་ནས་རིམ་གྲོ་མང་པོ་བསྒྲུབས་ཀྱང་ཅི་ཡང་ཕན་པ་མ་བྱུང་ལ། མཐར་ཞྭ་ངན་ལྷམ་སྡུག་ཅན་གྱི་རྟོགས་ལྡན་ཞིག་གདན་འདྲེན་ཞུས་བྱུང་བས་ཁོ་ལ་རྒྱུ་ནོར་མང་པོ་བྱིན་ཏེ་མ་འདུག་གསུངས་ཤིང་། ནང་ཞིག་གཉིད་སད་པ་འདྲ་ཞིག་བྱུང་དུས་ཕུག་སྒོའི་རྒྱབ་ལོགས་དེར་སླེབས་ནས་འདུག ཉེར་འགྲམ་ན་བལྟས་པས་སྤར་འདེབས་མང་པོ་བླུགས་འདུག་པས་ཐེ་ཚོམ་ཆེན་པོར་སྐྱེས། ཁྱིམ་དུ་ཡོང་བས་སྔོན་རི་དྭགས་རྔོན་དུ་འགྲོ་དུས་ཁྱེའུ་བསྙལ་རྒྱུ་ཅན་ཞིག་ཡོད་པ་དེ་རྒས་ཚར་འདུག་ཅིང་ཁོ་རང་སྔར་དུས་ལྟར་ལས་རྒས་མེད་མི་རྣམས་ངོ་མཚར་ཆེན་པོ་བྱུང་ཚུལ་དང་། ཡང་འདི་ནས་རྫིའུར་འགྲོ་བ་ཞིག་ལ་བུ་མོ་ཞིག་གིས་ཉིན་བསྟར་ཟ་མ་བྱིན་ནས་ཚུལ་འདི་གཞན་ལ་མ་གླེང་ཟེར་ཞིང་། དབྱར་དུས་དགུན་ཟས་དང་དགུན་དུས་དབྱར་ཟས་འབའ་ཞིག་བྱིན་པས་ངོ་མཚར་ཆེན་པོ་གྱུར། མཐར་ཚུལ་དེ་ཁྱིམ་མི་དག་ལ་བཤད་དགོས་བྱུང་བས་དེ་ནས་ཟ་མ་སྦྱིན་མི་འོང་རྒྱུ་མེད་པར་གྱུར་པ་སོགས་གནས་འདིར་སྦས་སྡེ་ཆེན་པོ་ཡོད་ཚུལ་གྱི་ལོ་རྒྱུས་མང་ལ། མཁྱེན་བརྩེ་དགེ་ལེགས་ཀྱིས་སྦས་ཡུལ་མཐོང་བའི་ཁུང་བུ་ནས་གཟིགས་དུས་མར་མེ་ཞིག་བཅའ་བ་གཟིགས་པ་སོགས་མཐོང་སྣང་འདྲ་མི་སྣ་ཚོགས་བྱུང་བའི་ལོ་རྒྱུས་ཀྱང་མང་ངོ་། །ཁྲོམ་དབེན་གནས་ཀྱི་གཡས་ཕྱོགས་བྲག་རྩ་ནས་སོང་ན་ཐུབ་པའི་སྔགས་མུ་ནེ་བྲིས་ཡོད་པའི་རྡོ་ཞིག་གི་སྟེང་ན་ཁྲོ་བོ་ཞིག་གི་ཞལ་རང་བྱོན་དང་། དེའི་ལྟག་བྲག་ངོས་མཐོ་ས་ཞིག་ལ་འབྲུ་གསུམ་དང་མ་ཎི་རང་བྱོན་ཤིན་ཏུ་ཆེ་བ་དང་། དེའི་ལྟག་བྲག་རྩ་ན་འབྲུ་གསུམ་རང་བྱོན་བཅས་བཞུགས། དེ་ནས་ཡར་སོང་ན་བླ་མ་བཀྲ་ཤིས་ཀྱི་མཚམས་ཕུག་ཏུ་སླེབས་ཤིང་། གསང་ཕུག་ན་སྒྲུབ་ཆུ་དང་། ཕུག་སྒོ་ན་བླ་མ་ཞིག་གི་སྐུ་སྤུར་མེ་ལ་བཞུས་པའི་རུས་པ་རྡོ་གྱུར་པ་དང་། ཕུག་པའི་གཡས་ངོས་མཐོ་ས་ན་མ་ཎི་རང་བྱོན་དང་། བྲག་ཕག་གི་ངོས་ལ་རྡོ་རྗེ་དང་དཔལ་བེ་སོགས་ཀྱི་རི་མོ་མང་པོ་བཅས་བཞུགས་ཡོད་དོ།།
དགུ་པ་གཉན་འདོང་གནས་ཀྱི་ཉེ་སྐོར་དག་ན་གནས་རྟེན་རང་བྱོན་ཇི་ལྟར་བཞུགས་པ་ནི།
སློབ་དཔོན་རིན་པོ་ཆེ་པདྨ་འབྱུང་གནས་ཕར་རི་སྒོ་མདའ་ནང་ནས་ཡར་ཕེབས་ཏེ་སྒོ་ལའི་བྲག་བང་ལྟེམ་བཞུགས་ནས་ཕྱིར་གཟིགས་དུས། མཁར་དམར་མདོ་ནས་མཆོད་སྒམ་བཀལ་སའི་དྲེལ་ཞིག་ཡོད་པ་སྲིན་པོས་བསད་འདུག་པ་གཟིགས་ཏེ། སྲིན་པའི་རྐང་གཡས་བཅད་ནས་ད་ལྟར་མཁར་དམར་མདོའི་ཆུ་ཕ་ཁ་སྲིན་པོ་རྐང་བཅད་ཟེར་བའི་བྲག་ངོས་ལ་བཅིངས་པ་དངོས་སུ་མཐོང་རྒྱུ་ཡོད། མཁར་དམར་མདོའི་ཆུ་ཁའི་ཞིང་ནང་ན་དྲེལ་རོ་དང་། གསེར་སྒམ་དང་དངུལ་སྒམ་ཟེར་བའི་རྡོ་ཇ་སྒམ་འདྲ་བ་གཉིས་ཡོད། ཕྱིས་གནས་འདིར་འཁྲུལ་ཞིག་བླ་མ་གྲགས་པ་འབྱུང་གནས་ཀྱིས་མཆོད་རྟེན་བྱིན་ཆེན་གསུམ་བཞེངས་པ་ད་ལྟར་བཞུགས། དེ་ནས་ཡར་སོང་བའི་ཁྲ་སྨད་ན་རྫོང་མགོ་བྲག་ཟེར་བའི་རི་བོ་ཟུར་གསུམ་དཔལ་བཤོས་འདྲ་བ་ཞིག་དང་། དེའི་སྟེང་རྫོང་མགོ་ན་རྐུན་མོ་བླ་མ་ཡོན་ཏན་ཚུལ་ཁྲིམས་ཀྱིས་ཕུར་དུང་བསག་སའི་སྒྲུབ་གནས་རྐུན་མོའི་རི་ཁྲོད་ཡོད། དེ་ནས་ཡར་བལྟ་ས་ན་ཡོད་པའི་གཡས་ཀྱི་དིལ་ལུ་རྔ་བརྡུང་གུར་གྱི་མགོན་པོའི་གནས་དང་། དབུས་ཀྱི་རྫི་ར་སྒང་དཔལ་ལྡན་ལྷ་མོའི་གནས། གཡོན་གྱི་མཁར་སྐེ་ཡར་དིལ་དཔལ་མགོན་ཞལ་གྱི་གནས་ཡིན། ཆུ་ཁ་ལམ་ཆེན་ནས་ཡར་སོང་བའི་བང་ཐིལ་ལམ་གྱི་གཡོན་ཟུར་ན་རྡོ་ཞིག་ལ་ནེའུ་ལེ་ནོར་བུ་སྐྱུགས་པའི་ཚུལ་ཡོད། སྒོ་ཕུ་ན་རི་ཕུ་གོ་ཕུ་སྒོ་ཕུ་གསུམ་གྱི་དགོན་པ་ཡིན་པས་ཕུ་གསུམ་དགོན་པའམ་སྒོ་གོ་ཆེ་དགོན་ཞེས་གྲགས་པ་ཡོད་པའི་ཤུལ་ན་དུད་ཁ་འགའ་ཆགས་ནས་ཡོད། ཕྱིས་དགོན་པ་རྩ་སྟོང་དུ་འགྲོ་སྐབས་སྒོ་ཕུ་དགོན་ཞིག་དགོན་ཞེས་བཏགས་འདུག ད་ལྟ་ཡང་ལྷ་ཁང་ཁག་དང་། ཇ་ཁང་། དབྱར་ལྗོངས་བྱེད་ས་བཅས་ཀྱི་ས་མལ་རྒྱུས་བཤད་བྱེད་རྒྱུ་འདུག ཉག་བླ་བྱང་ཆུབ་རྡོ་རྗེས་གཟིག་སྒང་མཁན་པོ་སྒོ་ཕུ་གོ་ཆེ་དགོན་པའི་སྤྲུལ་སྐུ་ཡིན། སྐུ་མཚམས་ལོ་གྲངས་མང་བར་བཞུགས་ནས་དགོན་པ་ཉམས་གསོ་བྱས་ན་འཕྲིན་ལས་རྒྱས་པ་ཡོང་གསུངས། རབ་འབོལ་གྲོང་མདུན་ཞིང་དཀྱིལ་ན་རབ་འབོལ་གཡུ་རྫོང་དགོན་པ་ཆགས་མལ་དང་། གྲོང་རྒྱབ་ན་གཉན་འདོང་སྟ་རེ་རྡར་ས་ཟེར་བའི་རྡོ་ལེབ་ཅིག་ཡོད། གདོང་ཟམ་བྲག་མགོ་ན་ཞབས་རྗེས་ཤིག་འདུག་པ་སུའི་ཡིན་མ་ཤེས། རྩེ་སྐྱིད་གྷ་ཐུ་ཕུག་ན་མཐུ་སྟོབས་ནུས་པའི་མངའ་བདག་བྱམས་པ་ཆོས་འཕེལ་གྱི་སྒྲུབ་ཕུག་དང་། མོ་ང་རྡོ་རྗེ་དྲེལ་དཀར་གྱི་སྒྲུབ་ཁང་སྟེང་ཐོག་བརྒྱབས་ནས་བྲག་ལ་ཁུང་བུ་བྱུང་བ་བཅས་མཇལ་རྒྱུ་ཡོད། ཞང་འགུ་རྒྱབ་ཞབས་རྗེས་ཉག་མོད་པོ་ཆུ་མགོ་ན་རྡོ་ལེབ་ཆེན་པོ་ཞིག་ལ་སུའི་ཡིན་མ་ངེས་པའི་ཞབས་རྗེས་ངོ་མཚར་ཆེ་བ་དྲུག་དང་། ཡང་རྡོ་ཞིག་ལ་ཞབས་རྗེས་གཉིས་བཅས་བཞུགས། སྒོ་འགུག་རྟ་ར་སྒང་ཉན་ཐོས་བྲག་ཟེར་བ་ན་ཉན་ཐོས་འགོག་པ་ལ་མཉམ་པར་བཞག་པ་ཞིག་བཞུགས་ཚུལ་དང་། དེའི་བྲག་རྩ་ན་རྡོ་ལ་ཞབས་རྗེས་ཤིག་ཡོད། སྒོ་འགུག་ལ་ཁ་མཚོ་ཆེན་མ་ན་རྒྱལ་དབང་ཀརྨ་པའི་ཞབས་རྗེས་གཉིས་བཞུགས། རྫ་པོ་སྒང་ན་རྫ་བླ་བརྩོན་འགྲུས་ཡེ་ཤེས་དང་། མཁྱེན་བརྩེ་དཔལ་འབྱོར། ངག་དབང་རིག་འཛིན་རྣམས་ཀྱི་སྒྲུབ་གནས་རྫ་བོ་སྒང་གི་རི་ཁྲོད་ཡོད། གནས་འདིར་རྒྱུན་དུ་བྱ་རྒོད་མང་པོ་འདུ་བ་སོགས་སྒྲུབ་གནས་བྱིན་ཆེན་ཞིག་ཡིན། ལེགས་མ་གོ་རི་སྒང་ན་བེ་རི་རྒྱལ་པོའི་མཁར་རྫོང་བཀྲ་ཤིས་ལྷ་རྩེའི་མཁར་ཤུལ་ཤིན་ཏུ་ཆེ་བ་དང་། དེའི་གྱང་རྨང་དཀར་ཆག་གི་རྡོ་ཆེ་བ་ཞིག་ལ་ངོ་མཚར་ཆེ་བའི་རང་བྱོན་མ་ཎི་ཚར་བདུན་དང་། བཛྲ་ས་ཏྭ་ཚར་གཅིག འབྲུ་གསུམ་ཚར་གཉིས་བཅས་བཞུགས། ལེགས་མ་མདོ་ཐོག་ཚང་གི་ཁང་ཞབས་གཏེར་རྟགས་གཡུང་དྲུང་ཡོད་པའི་ཕ་ཝང་དེ་ལ་འཕགས་པ་བསྐལ་པ་བཟང་པོའི་གཏེར་ཁ་བཞུགས། ཁྲེ་ལྗོངས་ཡི་གེ་སྣའི་བྲག་སྣ་གཏེར་སྒོ་ཡོད་ས་དེར་འཕགས་པ་བརྒྱད་སྟོང་པའི་གཏེར་ཁ་བཞུགས་པས་མིང་དེ་ལྟར་བཏགས། ལེགས་མ་དང་ཡ་ཆེ་གཉིས་ཀྱི་འབྲི་ཆུའི་འགྲམ་མཁའ་འགྲོ་སྡེ་ལྔར་གྲགས་པ་ན་མཁའ་འགྲོ་སྡེ་ལྔའི་གནས་དང་། མཁན་པོ་བསམ་གཏན་བློ་གྲོས་བྱ་རྒོད་ཚང་གིས་གདན་དྲངས་ནས་ལེགས་མ་ལྕང་ར་ནང་བཞུགས་དུས། མཁའ་འགྲོ་སྡེ་ལྔའི་སྤྲུལ་པ་རྒོད་ཐང་སྤུག་བཞི་དང་ཐང་དཀར་གཅིག་བྱུང་ནས་གཟིམས་གུར་ལ་བསྐོར་བ་གསུམ་བྱས་ཤིང་། དད་ཅན་གྱི་ངོར་མཁའ་འགྲོ་སྡེ་ལྔའི་གནས་ལ་བསངས་མཆོད་ཀྱ་གསུངས་མཛད། ཚུར་རི་ལིང་ཆེ་གྲོང་གི་མཆོད་རྟེན་རྩ་ན་རྡོ་དཀར་གྱི་ཨ་རང་བྱོན་ཡོད། ལིང་ཆེ་གྲོང་གི་ཆུ་ཕར་ཁའི་ཞིང་འགྲམ་ན་ཛཾ་ཆེན་ཐབ་རྡོ་ཟེར་བའི་རྡོ་གསུམ་དང་། དེ་ནས་ཕར་སོང་བའི་མུ་ཚིགས་ཤིག་ལ་ཛམ་ཆེན་མགར་སྒམ་དང་། ཏི་ཚ། མགར་བ་སྡོད་ས་ཟེར་བ་བཅས་ཡོད། ལིན་ཆེ་ནས་མར་ཡོང་བའི་ལམ་ཁ་ཆུ་འཕྱར་ས་ཟེར་བ་ན་བྲག་ངོས་ནས་འབབ་པའི་ཆུ་ཕྱར་ལེགས་པ་ཞིག་ཡོད་པ་ན་སྟོན་ཁ་དྲང་སྲོང་སྐར་མ་རྀ་ཥི་འཆར་སྐབས་ཡུལ་འདིའི་མི་རྣམས་དེ་ན་ཁྲུས་བྱེད་པར་འགྲོ་སྲོལ་ཡོད། ཀོ་སྟོད་སྒྲོལ་མ་རང་བྱོན་དེ་རྗེ་བཙུན་འཕགས་མ་སྒྲོལ་མའི་གནས་ཡིན་ཞིང་། གནས་ཀྱི་ལམ་ལྟག་བྲག་ཞབས་ཤིག་ལ་ཨ་ཨྃ་འཁོར་ལོ་བཅས་ཀྱི་རང་བྱོན་དང་། ལམ་ཞབས་རྡོ་ཞིག་ལ་ཨ་ཡིག་རང་བྱོན་མང་པར་བཞུགས། དེ་ནས་ཡར་འོང་བའི་ཀོ་སྟོད་གཏེར་ལུང་ནང་ན་རྫོང་མགོ་སྤྲུལ་སྐུ་པདྨ་བློ་གྲོས་ཀྱིས་ལྷ་འདྲེའི་འདུ་ཚོགས་བཅའ་སྐབས་ཕ་ཝང་གྲིས་བཤགས་ནས་དུམ་བུར་བྱས་པ་ཡོད། དེ་ནས་ཕར་སོང་ན་ཐུགས་རྗེ་ཆེན་པོ་བཅུ་གཅིག་ཞལ་གྱི་གནས་མཆོག་གནམ་རྫོང་མགོར་སླེབས་ཤིང་། དེ་ན་འཁྲུལ་ཞིག་བླ་མ་གྲགས་པ་འབྱུང་གནས་ཀྱི་སྒྲུབ་གནས་གནམ་རྫོང་མགོའི་རི་ཁྲོད་ཡོད། གནམ་རྫོང་དམར་ཤར་རྒྱབ་ན་གཉན་འདོང་ཇ་སྒམ་ཟེར་བའི་བྲག་རྡོ་བརྩིགས་པ་དང་། གནམ་མགོ་ཆུ་ལུང་པདྨ་སྟོང་ལྡན་ན་རྡོ་ཞིག་ལ་རྫོང་མགོ་སྤྲུལ་སྐུས་གཏེར་བཞེས་ཤུལ་དང་། དེ་ནས་ཡར་སོང་བའི་ཆུ་ལུང་འཇུ་ན་རྫོང་མགོ་སྤྲུལ་སྐུས་གཏེར་དུ་བཞེས་པའི་གཏེར་ཆུ་ངོ་མཚར་ཅན་ཞིག་ཡོད་དོ།།
བཅུ་པ་གནས་ལ་སྤང་བླང་དང་ཕྱག་མཆོད་བསྐོར་བ་བྱས་པའི་ཕན་ཡོན་ནི།
དེ་ཡང་སྤྲུལ་སྐུ་སངས་རྒྱས་གླིང་པའི་དགོངས་འདུས་ལས། ལ་ལར་སངས་རྒྱས་རྣམས་ཀྱི་སྤྲུལ་པ་ནི༔ ས་རྡོ་རི་བྲག་ལས་འཕྲང་ལ་སོགས་སུ༔ སྐུ་གསུང་ཐུགས་ཀྱི་སྤྲུལ་པ་རང་བྱུང་འབྱོན༔ དེ་མཐོང་ཐོས་དང་གང་འབྲེལ་ནང་སོང་མེད༔ ཕྱོགས་ནི་མ་ངེས་ཕྱོགས་མཚམས་དབུས་ལ་སོགས༔ ཉེ་རིང་མེད་ཕྱིར་ཀུན་ཏུ་འབྱོན་པར་འགྱུར༔ དེ་བཞིན་དུས་ལ་མ་ངེས་ནམ་ཡང་འབྱོན༔ དེ་སོགས་རྣམ་པ་དུ་མར་སྤྲུལ་ནས་ཀྱང་༔ འགྲོ་བའི་དོན་མཛད་བསྟན་པ་རྒྱས་པར་མཛད༔ ཞེས་དང་། ཡིག་དྲུག་ལ་སོགས་རང་བྱོན་བསམ་མི་ཁྱབ༔ དེ་སོགས་རྣམ་པ་དུ་མར་སྤྲུལ་ནས་ཀྱང་༔ འགྲོ་བའི་དོན་མཛད་བསྟན་པ་རྒྱས་པར་འགྱུར༔ ཞེས་གསུངས་པ་ལྟར། རྒྱལ་བ་རྣམས་ཀྱི་ཐུགས་བསྐྱེད་སྨོན་ལམ་དང་གདུལ་བྱའི་ལས་དང་སྐལ་བ་འཛོམས་པའི་རྟེན་འབྲེལ་བཟང་པོའི་མཐུ་ལས་ས་རྡོ་རི་བྲག་ཐམས་ཅད་རབ་འབྱམས་རྩ་གསུམ་རྒྱལ་བའི་དཀྱིལ་འཁོར་ཆེན་པོ་མངོན་དུ་གྱུར་པའི་རྟགས་ལ་སོ་སྐྱེ་ཕལ་པའི་བློ་ལ་ཡང་སྐུ་ཕྱག་མཚན་དང་གསུང་ཡིག་འབྲུ་ཐུགས་མཆོད་རྟེན་སོགས་ཀྱི་རྣམ་པར་གསལ་བའི་རང་བྱོན་དུ་མ་བྱོན་ཞིང་། གྲུབ་པའི་རིག་འཛིན་ཆེན་པོ་རྣམས་ཀྱིས་བྱིན་གྱིས་བརླབས་པའི་མཚན་མར་གཏེར་རྒྱ་དང་སྐུ་རྗེས་སོགས་ངེས་པའི་བཀའ་རྟགས་རྣམས་ཀྱིས་དཔང་པོར་བྱེད་པ་དང་། དད་མོས་གདུང་བའི་ཤུགས་ཀྱིས་གནས་འདི་ལ་ཕྱག་དང་བསྐོར་བ་དང་། མཆོད་ཅིང་བསྟོད་པ་སོགས་བྱས་ན་རྒྱ་གར་རྡོ་རྗེ་གདན་དང་། བྱ་རྒོད་སྤུངས་རི། རྒྱ་ནག་རི་བོ་རྩེ་ལྔ། བལ་ཡུལ་འཕགས་པ་ཤིང་ཀུན། རྩ་རི་རྩ་ཀོང་། བྱང་ཤམ་བྷ་ལ། གངས་རི་ཏི་སེ། སྦས་ཡུལ་པདྨ་བཀོད། ལྷ་ལྡན་ཇོ་བོ་སོགས་རྒྱ་བོད་ཀྱི་གནས་རྟེན་དེ་རྣམས་ལ་བྱས་པ་དང་ཁྱད་པར་ཅུང་ཟད་ཀྱང་མེད་ཅིང་། བདེ་གླིང་གནས་ཀྱི་དཀར་ཆག་ལས། དྲུག་པ། ༼འབྲི་གཉེར་རྫོང་།༽ བྱ་རྒོད་སྤུངས་དང་བདུན་པ་༼ཀློང་ཐང་༽ནི༔ ཟངས་མདོག་རི་བོ་མཆོག་དང་བསྔགས་ཚུལ་གཅིག༔ ཅེས་རྒྱ་གར་བྱ་རྒོད་སྤུངས་རི་དང་མཉམ་པར་གསུངས། གནས་འདི་མཇལ་ཕྱག་གསུམ་བྱས་ན་ནད་མུག་མཚོན་འཁྲུགས་དང་། མོ་འདྲེ་རྒྱལ་འགོང་། ས་བདག་ཀླུ་གཉན་སོགས་གཟུགས་ཅན་གཟུགས་མེད་ཀྱི་གནོད་པ་ཞི་བ་དང་། རྒྱལ་ཁམས་བདེ་ཞིང་ལོ་ཕྱུག་ལེགས་པ། ཚེ་དང་བསོད་ནམས་འཕེལ་བ། དཔལ་འབྱོར་ལོངས་སྤྱོད་རྒྱས་པ། བསམ་དོན་ཡིད་བཞིན་དུ་འགྲུབ་པ། ཕྱི་མ་ངན་སོང་གི་སྐྱེ་སྒོ་ཁེག་པ། མཆོག་དང་ཐུན་མོང་གི་དངོས་གྲུབ་འགྲུབ་པ་སོགས་གནས་ཀྱི་ཆེ་བའི་ཡོན་ཏན་བསམ་གྱིས་མི་ཁྱབ་པའི་ཚུལ་གནས་ཡིག་རྙིང་པ་དག་ལས་རྒྱ་ཆེར་གསུངས་ཤིང་། འདུལ་བ་ལུང་དུ། དགེ་སློང་དག བྱང་ཕྱོགས་གངས་རིའི་ཁྲོད་དུ་ས་རྡོ་བེམ་པོས་ཀྱང་སེམས་ཅན་གྱི་དོན་བྱེད་པ་ཡོད་དོ། །ཞེས་དང་། ལུང་བསྟན་ཆེན་པོ་བཀའ་རྒྱ་མ་ལས། དེ་བཞིན་གནས་དང་གནས་ཕྲན་ལ་སོགས་དང་༔ ཡུལ་དང་ཡུལ་འདྲ་སྦས་པའི་ཡུལ་རྣམས་སུ༔ སྒྲུབ་པར་བྱས་པའི་ཡོན་ཏན་བསམ་མི་ཁྱབ༔ ཕལ་པའི་གནས་སུ་ལོ་གཅིག་བསྒྲུབས་པ་བས༔ དེ་དག་རྣམས་སུ་ཟླ་གཅིག་འགྲུབ་ཐག་ཉེ༔ དེ་དོན་ཤེས་པར་མཛོད་གཅིག་རྗེས་འཇུག་རྣམས༔ ཞེས་དང་། གནས་ཆེན་ཉེར་ལྔའི་མདོ་བྱང་ལས། ད་ནི་གནས་ཀྱི་ཕན་ཡོན་བརྗོད་པ་ནི༔ ཕྱག་བསྐོར་བྱས་ཚད་ངན་སོང་སྐྱེ་སྒོ་གཅོད༔ བཀུར་བསྟི་བྱས་ན་མཐོ་རིས་གནས་སུ་སྐྱེ༔ ཚོགས་འཁོར་ལན་གཅིག་བསོད་ནམས་ཚོགས་ཆེན་རྫོགས༔ ཚོགས་འཁོར་ལན་གཉིས་ལས་ཀྱི་རྣམ་སྨིན་བྱང་༔ ཚོགས་འཁོར་ལན་གསུམ་ཨོ་རྒྱན་པདྨ་བདག༔ དངོས་ཉམས་རྨི་ལམ་བརྡ་ཡི་ཚུལ་དུ་མཇལ༔ ཚོགས་འཁོར་བརྒྱ་རྩས་མཁའ་སྤྱོད་གནས་སུ་སྐྱེ༔ མཆོག་ཐོབ་འདོད་ན་རྩེ་གཅིག་སྒྲུབ་པས་འགྲུབ༔ འབྲེལ་ཚད་དོན་ལྡན་གནས་མཆོག་ཨེ་མ་ཧོ༔ ཞེས་སོགས་བཀའ་གཏེར་རྣམས་ལས་མགྲིན་དབྱངས་གཅིག་གིས་ཡོན་ཏན་ཚད་མེད་པའི་གནས་སུ་བསྔགས་པར་མཛད། རབ་བརྟན་སྡེ་པ་གནའ་ནས་ད་ལྟ་བར་དུ་ཟས་གོས་ལོངས་སྤྱོད་སོགས་ཀྱིས་ཕོངས་པ་མ་བྱུང་བའང་གནས་འདིའི་གནས་སྒོ་དེ་ཕྱོགས་སུ་བསྟན་པས་ཡིན་པ་བྱམས་མགོན་སི་ཏུ་རིན་པོ་ཆེས་གསུངས་ཤིང་། ཡེ་ན་ཕར་ཚུར་སྤྲུལ་སྐུ་དང་སྦས་པའི་རྣལ་འབྱོར་བ་ཆེནན་པོ་མང་པོ་བྱོན་པའང་གནས་འདིའི་བྱིན་རླབས་ཀྱི་མཐུས་ཡིན་ཚུལ་གསུངས། གནས་སྐོར་དུ་འགྲོ་དུ་ངལ་དུབ་ལ་མི་འཛེམ་ཞིང་རྫུན་ཚིག་འཆལ་གཏམ་བསམ་ངན་སོགས་སྤངས་ནས་ཁ་ཏོན་བསྟོད་དབྱངས་དང་དད་མོས་དག་སྣང་དང་ལྡན་པས་གནས་བསྐོར་བྱ་ཞིང་། ཐོག་མར་གནས་བསྐོར་འགྲོ་ཁར་ཕ་མ་སེམས་ཅན་ཐམས་ཅད་ཀྱི་དོན་དུ་ངས་བསྐོར་བ་ཞིག་བྱས་ནས་སངས་རྒྱས་འཐོབ་པར་བྱ་སྙམ་པའི་སེམས་བསྐྱེད་དང་། བསྐོར་བ་བྱེད་དུས་རང་གི་གཡས་ཕྱོགས་ན་འཕགས་པ་སྤྱན་རས་གཟིགས་ལ་རྩ་གསུམ་རྒྱལ་བ་རབ་འབྱམས་ཀྱིས་བསྐོར་བ་སྤྲིན་གྱི་ཕུང་པོ་ཆེན་པོ་འཁྲིགས་པ་ལྟར་མངོན་སུམ་དུ་བཞུགས་ཡོད་སྙམ་པའི་མོས་པས་རང་གི་ལུས་ཞིང་རྡུལ་གྱི་གྲངས་དང་མཉམ་པར་སྤྲུལ་ཏེ་བསྐོར་བར་བྱེད་པའི་མོས་པ་དང་། གནས་བསྐོར་ཟིན་དུས་ད་ལན་བསྐོར་བ་བགྱིས་པའི་དགེ་བ་འདིས་མཚོན་ཏེ་དུས་གསུམ་བསགས་ཡོད་ཀྱི་དགེ་བའི་རྩ་བ་ཐམས་ཅད་མ་རྒན་སེམས་ཅན་ཐམས་ཅད་སངས་རྒྱས་འཐོབ་པའི་ཕྱིར་དུ་བསྔོའོ་སྙམ་པས་བསྡོ་བ་བྱས་པ་ཡིན་ན་དམ་པ་གསུམ་གྱིས་རྩིས་ཟིན་པར་འགྱུར་བས་ཤིན་ཏུ་གལ་ཆེ་ལ། གཞན་ཡང་ལ་མཐུར་འཕྲང་རོང་སོགས་ཀྱིས་དཀའ་ངལ་བྱུང་ཚེ་སྒྲིབ་པ་བྱང་བའི་དགའ་བ་བསྒོམ། རི་དྭགས་གཅན་གཟན་སོགས་ཅི་མཐོང་ཡང་དཔའ་བོ་མཁའ་འགྲོའི་སྤྲུལ་པ་ཡིན་པའི་ངེས་ཤེས་བསྐྱེད། ལམ་འཕྲང་ཐོག་སེར་གཅན་གཟན་སོགས་ཀྱིས་འཇིགས་པ་བྱུང་ན་བར་དོའི་འཇིགས་སྐྲག་ཡིན་པར་བསམ་ལ་གསོལ་བ་འདེབས། གནས་རྟེན་རང་བྱོན་གང་མཇལ་བ་རྣམས་ལ་ལྷ་དང་ཡེ་ཤེས་ཀྱི་སྤྲུལ་པར་ཐག་བཅད་དེ་དག་སྣང་བྱེད་པ་སོགས་སྙིང་གི་གྭའུར་བཅངས་ནས། གནས་བསྐོར་ལན་གཅིག་ལས་འགྲོ་རྒྱུ་མ་བྱུང་ཡང་སྦྱོར་དངོས་རྗེས་གསུམ་དང་ལྡན་པས་གནས་རྟེན་རང་བྱོན་རྣམས་མཇལ་གང་ཐུབ་བྱེད་རྒྱུ་ཤིན་ཏུ་གནད་ཆེ་བ་ལས། གནས་རྟེན་རང་བྱོན་སོགས་མཇལ་རྒྱུ་དང་དད་པ་དག་སྣང་བྱིན་རླབས་ཕན་ཡོན་སོགས་ལ་རྩིས་ཆེན་མ་བྱས་པར་ས་བལྟས་རི་བལྟས་ཙམ་ལ་བསམ་བློ་གཏོང་ནས་རི་རྒོད་མགོ་ལ་གོམ་མགྱོགས་འབའ་ཞིག་བགྱིས་ཏེ་གནས་བསྐོར་ལན་གྲངས་མང་དུ་ཕྱིན་ཡང་། གནས་རྟེན་རང་བྱོན་ཅི་མཇལ་བྱིན་རླབས་ཕན་ཡོན་ཅི་ཡོད་ཟེར་དུས། མི་སྨྲ་བའི་བརྟུལ་ཞུགས་བཟུང་ནས་སྡོད་འདུག་དགོས་པ་དེ་འདྲ་གྱུར་ན། བསམ་ཡས་ཞིབ་ཏུ་མཇལ་ན་བྱ་ཕོ་དཀར་ཆུང་ཨེ་མཇལ། ལྷ་ས་ཞིབ་ཏུ་མཇལ་ན་ཇོ་བོ་ར་རྒྱ་མོ་ཨེ་མཇལ། ཅེས་དྲི་དུས་མ་མཇལ་ཟེར་བའི་དཔེ་ལྟར་སོང་བ་ཡིན་པས་ཤིན་ཏུ་མཚང་ཆེ་ལ། དཔལ་སྤྲུལ་འཇིགས་མེད་ཆོས་ཀྱི་དབང་པོས། རྒྱལ་ཁམས་འགྲིམས་པ་འདྲ་ཞིག་ཡོད། །ལྟད་མོ་བལྟ་བའི་མཚར་འདོད་གཅིག །དད་པ་མ་སྐྱེས་གནས་མཇལ་གཉིས། །ཕན་ཡོན་མི་ཤེས་བསྐོར་བ་གསུམ། །ཟ་འདོད་རྙེད་ཚོལ་ཁྲོམ་པ་བཞི། །བསམ་བློ་མ་བཏང་སྐོར་རྒྱུག་ལྔ། །གནས་བསྐོར་འདྲ་སྟེ་གནས་བསྐོར་མིན། །ཞེས་གསུངས་པ་སྙིང་དཀྱིལ་དུ་བཅངས་ནས་བག་ཡོད་པར་བྱའོ།།
གནས་འདིའི་གནས་འདུས་ནི་རྟ་ལོའི་ལོ་དང་ལོ་རེའི་རྟ་ཟླ་བ་མ་ཡིན་ཚུལ་འདུག་པས་དེ་སྐབས་མཇལ་བསྐོར་དང་ཕྱག་མཆོད་སོགས་ཚུལ་བཞིན་བྱས་ན་ཕན་ཡོན་དཔག་ཏུ་མེད་པ་ཡོད་ཚུལ་གསུངས་པས་དུས་དེར་གནས་འབྲེལ་བྱེད་རྒྱུ་ཤིན་ཏུ་གལ་ཆེ་ལ། གནས་དུས་སྐབས་རྩེ་བསྐོར་ལ་མ་ཎི་དུང་གསུམ་དང་། བར་བསྐོར་ལ་དུང་བདུན། མཐའ་སྐོར་ལ་དུང་བཅུ་གསུམ། གནས་ཆུང་བསྐོར་བ་རེ་ལ་སིདྡྷི་དུང་རེའི་ཕན་ཡོན་ཡོད་ཅེས་གནས་ཡིག་དག་ལས་གསུངས་ཤིང་། གཏེར་སྟོན་བདུད་འདུལ་རྡོ་རྗེས་དུས་རྒྱུན་ཞོར་བསྐོར་རེ་ལ་མ་ཎི་དུང་རེའི་ཕན་ཡོན་མི་འདུག་ན་ཁོང་གིས་ཕྱི་མའི་ཡུལ་ནས་མཇལ་་་་་་་་ཆོག་གསུངས་པའི་ངག་རྒྱུན་ཡང་འདུག གཞན་ཡང་ལམ་འགྲུལ་གནས་སྐོར་རྣམས་ལ་བསམ་པ་རྣམ་པར་དག་པས་གནས་གསང་་་་བ་དང་། ཇ་ཆུ་ཙམ་རེ་སྟེར་བ་བྱས་ན་ཕན་ཡོན་དཔག་ཏུ་མེད་པར་ཡོད་ཚུལ་རྡོ་རྗེའི་ལུང་ལས་གསལ་བས་རོགས་པ་ཅི་ཐོན་བྱེད། གནས་ཀྱི་ཉེ་ལོགས་རྣམས་ལ་ཕྱག་བརྡར་དང་། གནས་ལམ་གསོ་བ་སོགས་བྱས་པས་ཚེའི་བར་ཆད་དང་ནད་གདོན་སྡིག་སྒྲིག་དག མཎྜལ་དང་ན་བཟའ་ཕུལ་ཏེ་སྨོ་ནལམ་བཟང་པོས་མཚམས་སྦྱར་ན་འདི་ཕྱི་རྒྱུ་འབྲས་དང་མཐུན་པའི་ལེགས་ལམ་མཐའ་འཁྱོལ་བར་འགྱུར། གདུགས་དང་རྒྱལ་མཚན་བ་དན་སོགས་ཕུལ་ན་ཀུན་གྱི་གཙུག་ན་མངོན་པར་མཐོ་ཞིང་སྙན་པའི་གྲགས་པ་ཕྱོགས་ཀུན་འཕེལ་བ་སོགས་གནས་ཀྱི་ཆེ་བའི་ཡོན་ཏན་བསམ་གྱིས་མི་ཁྱབ། གཞན་ཡང་གནས་འདི་ཉེ་རིང་གང་ནས་མཇལ་ཡང་མཐོང་གྲོལ། ཆེའི་ཡོན་ཏན་ཐོས་པས་ཐོས་གྲོལ། དད་ཅིང་ཡིད་ལ་བྱས་པས་དྲན་གྲོལ། ཕྱག་མཆོད་བསྐོར་བ་བགྱིས་པས་རེག་གྲོལ། ས་ཆུ་རྩི་བཅུད་མྱོང་བས་མྱོང་གྲོལ། འབྲེལ་བ་གང་ཐོགས་འཆིང་པས་འབྲེལ་གྲོལ་ཏེ་གྲོལ་བ་དྲུག་དང་ལྡན་ཞིང་། ལས་དང་སྨོན་ལམ་ལོག་པའི་གང་ཟག་རྣམས་ཀྱིས་གནས་ཀྱི་གཏེར་ཁ་སྔོག་འདོན་དང་། རྟེན་དང་རང་བྱོན་རྣམས་ལ་གཏོར་བརླག་གཏོང་བ། ཕུ་ཡི་རི་དྭགས་གསོད་ཅིང་མདའ་ཡི་ཉ་མོ་གཤོལ་བ། གནས་ལ་ས་དགྲ་གཏོད་ཅིང་གནས་ཤིང་གི་མགོ་སྐེ་བྲེགས་པ། ཁོར་ཡུག་འབག་བཙོག་བྱེད་པའི་རྫས་ངན་གྱིས་བསླད་པ་སོགས་བྱས་ན་ཡུལ་གྱི་བཅུད་ཤོར། གནས་སྲུང་རྣམས་ཀྱང་འཁྲུགས་ནས་རྒྱལ་ཁམས་མི་བདེ་ཞིང་། ལོ་ཉེས་སད་སེར། ས་གཡོ་ཆུ་ཐན། མེ་དགྲ་རླུང་འཚུབས། ནད་མུག་མཚོན་འཁྲུགས་སོགས་རྒྱུན་མི་འཆད་པར་འབྱུང་བའི་ཚུལ་གུ་རུ་རིན་པོ་ཆེས་གཏེར་ལུང་ཁག་ལས་རྒྱ་ཆེར་གསུངས་ཤིང་། ཆུ་མ་བདེ་ན་ཉ་ཡང་མི་བདེ་བ་བཞིན་དུ་གནས་རི་ཆེན་པོ་དག་ལ་གཏོར་བརླག་དང་འབག་བཙོག་བྱས་ན་གནས་ལ་ཁང་ཁྱིམ་ལྟར་བྱས་ནས་སྡོད་པའི་གནས་བདག་གཏེར་སྲུང་རྣམས་ལ་གྲིབ་ཕོག་ནས་མི་བདེ་བར་འགྱུར་བ་དང་། དེའི་རྐྱེན་ལས་སྣོད་བཅུད་སྐྱེ་འགྲོ་སྤྱི་ལ་མི་ཤིས་པར་འབྱུང་བའང་རྟེན་འབྲེལ་གྱི་ཆོས་ཉིད་ཡིན། ཁྱད་པར་སྡེ་དགེ་ཆོས་རྒྱལ་ཆེན་པོ་རིམ་བྱོན་གྱི་སྐུ་ལྷ་ཟོ་དོར་འདི་ལས་ཆེ་བ་མེད་སྟབས་འདི་ཉམས་རྒུད་དུ་སོང་ན་སྡེ་དགེའི་རྒྱལ་ཁམས་ཡོངས་ལ་ཉམས་ཉེས་ཆེན་པོ་འབྱུང་བ་དང་། ལྷ་ཡི་དགེ་བསྙེན་ཆེན་པོ་རང་གནས་བཞུགས་ཤིང་དབུ་འཕང་མཐོ་བ་བྱུང་ན་སྡེ་དགེའི་བསྟན་སྲིད་སྤྱི་སྒེར་ཡོངས་ལ་ལུགས་གཉིས་ཀྱི་དཔལ་ཡོན་ཕུན་སུམ་ཚོགས་པ་འབྱུང་བའི་ལོ་རྒྱུས་ཀྱང་མང་དུ་ཡོད་པ་ཡིན་ནོ།།
སླར་སྨྲས་པ། རྩ་གསུམ་ཀུན་འདུས་ཨོ་རྒྱན་རྡོ་རྗེ་འཆང་། །ངུར་སྨྲིག་གར་བསྒྱུར་རྗེ་བཙུན་བླ་མའི་ཞབས། །འབྲལ་མེད་སྙིང་གི་པདྨོར་རྟག་བཞུགས་ནས། །གསོལ་འདེབས་བུ་ལ་དགོངས་པས་བྱིན་གྱིས་རློབས། །མདོ་སྨད་ཡངས་པའི་དཀྱིལ་འཁོར་ཆེན་པོ་ན། །སྟོབས་ཀྱིས་འཁོར་ལོས་བསྒྱུར་བའི་ཆོས་རྒྱལ་ཆེའི། །བླ་རི་ཆེན་པོ་འགྲན་གྱི་ཟླ་མེད་པ། །རྡོ་རྗེའི་གནས་ཆེན་འབྲི་རྒྱལ་གཉན་འདོང་ཞེས། །པདྨའི་རྒྱལ་ཚབ་བདུད་འདུལ་གླིང་པ་དང་། །ཀུན་དགའ་རྒྱ་མཚོ་མི་འགྱུར་རྡོ་རྗེ་རྩལ། །སོགས་ཀྱིས་གནས་ཞལ་ཕྱེས་ནས་གནས་ཡིག་དང་། །རང་བྱོན་ངོ་སྤྲོད་ཕྱི་ནང་གནས་ལམ་བསྟན། །རྩ་གསུམ་དཔའ་བོ་མཁའ་འགྲོ་སྤྲིན་ལྟར་འདུ། །རྒྱ་བོད་གྲུབ་རིག་རྒྱ་མཚོས་བྱིན་གྱིས་བརླབས། །ཀུན་ཀྱང་འབྲེལ་ཚད་དོན་ལྡན་འཕྲིན་ལས་ཅན། །འདི་འདྲ་རྒྱ་བོད་གང་ནའང་དཀོན་པ་ཡིན། །གནས་འདིར་སྐྱེས་པའི་སྐྱེ་འགྲོ་ཐམས་ཅད་ཀྱང་། །འཕགས་མཆོག་སྤྱན་རས་གཟིགས་ཀྱི་གདུལ་བྱ་སྟེ། །ཡིད་ཆེས་དད་པས་མཆོད་ཅིང་བསྟོད་པ་དང་། །ཕྱག་བསྐོར་རེ་ཙམ་བྱེད་པ་སྐལ་བ་བཟང་། །རང་བྱུང་མཛེས་པའི་བཀོད་པ་ཕུལ་བྱུང་ཞིང་། །རང་བྱུང་གྲུབ་པའི་གནས་རྟེན་དཔག་མེད་པ། །རང་ས་རང་བདག་བྱེད་པའི་ངང་ཚུལ་གྱིས། །རང་གི་མི་ལ་རང་ངོ་སྤྲོད་པ་དང་། །གནས་རྟེན་རྩ་ཆེ་གཏོར་བརླག་མི་འགྲོ་ཞིང་། །གནས་མཇལ་མཁན་ལ་གནས་བཤད་བྱེད་ཚུལ་གྱིས། །གནས་སྐབས་ཀུན་ལ་གནས་འདིས་ཕན་པའི་ཕྱིར། །གནས་ཀྱི་དཀར་ཆག་འདི་བཞིན་ཡི་གེར་བཀོད། །འདི་ནི་རང་གིས་གནས་འབྲེལ་བྱས་པ་དང་། །གནས་ཡིག་ཡིག་རྙིང་དག་ལས་འབྱུང་བ་རྣམས། །ཚད་མར་བྱས་ཏེ་གཏམ་དུ་བྱས་པ་ལས། །ཁུངས་མེད་རང་བཟོའི་རྡུལ་གྱིས་གོས་པ་མེད། །རྡོ་རྗེའི་གནས་ཀྱི་སྲུང་མ་འདི་ཉིད་ཀྱིས། །ཁོ་བོའི་ཁྱིམ་ལ་སྡོང་གྲོགས་ཡོད་པ་ཡི། །གཏམ་ཞིག་ཐོས་ཤིང་ཆུང་ནས་གནས་འདི་ལ། །ཡིད་ཆེས་དད་པའི་པདྨོ་ཁོང་ནས་དགོད། །དགེ་བ་གང་དེས་གནས་མཆོག་འདི་ཉིད་ལ། །བཟང་ངན་ལས་ཀྱིས་འབྲེལ་བའི་འགྲོ་བ་རྣམས། །ཚེ་རིང་ནད་མེད་བདེ་ལྡན་དམ་ཆོས་འཕེལ། །ཕྱི་མ་བདེ་ཆེན་ཞིང་དུ་སྐྱེ་བར་ཤོག །
ཅེས་བདག་ཅག་རྣམས་ཀྱི་ཕ་ལྷ་མ་ལྷར་གྱུར་པའི་འབྲི་གཉན་འདོང་ཆེན་པོ་ལ་གནས་ཀྱི་དཀར་ཆག་ཞིབ་རྒྱས་སུ་བཀོད་པ་ཞིག་བྱུང་ན་སྙམ་པའི་འདུན་པ་སྔར་ནས་ཡོད་པའི་ཁར་ཡེ་ན་བཀྲ་ཤིས་ལྷ་རྩེའི་དགེ་འདུན་རྣམས་ནས་འབྲི་གཉན་འདོང་ཆེན་པོ་ཉེ་འཁོར་དང་བཅས་པའི་གནས་ཀྱི་དཀར་ཆག་ཅིག་ཅི་ནས་འབྲི་དགོས་པའི་གསུང་བསྐུལ་དྲག་པོ་ལན་གྲངས་དུ་མར་གནང་བ་དང་། འདི་བཞིན་བྲིས་ན་རང་གཞན་སྤྱི་སྒེར་ཡོངས་ལ་འཕྲལ་ཡུན་ཀུན་ཏུ་ཕན་ཐོགས་ཆེན་པོ་ཞིག་ཀྱང་ཡོད་ཚུལ་མཐོང་བས་རྐྱེན་བྱས་ཏེ། འདི་ལོའི་དབྱར་ཀའི་སློབ་གྲྭའི་གུང་གསེང་དང་བསྟུན་ནས་དབྱར་ཟླ་འབྲིང་པོའི་ཚེས་བཅུ་གཉིས་ལ་ཡེ་ནར་སོང་སྟེ་གནས་མཇལ་བགྱིད་རྒྱུའི་མགོ་བརྩམས་པས་དེ་འཕྲལ་ནས་བདུད་རྩིའི་ཆར་པ་ལྟ་བུ་བབ་སྟེ་ལུང་པ་ཕར་ཚུར་འཇའ་འོད་ཀྱིས་གང་བ་བྱུང་བས་ཐོག་མའི་ལྟས་བཟང་ཞིང་། དེ་ནས་ཡེ་ན་དགོན་གྱི་མཐུན་འགྱུར་རོགས་དན་ལ་བརྟེན་ནས་རྒྱུས་ཡོད་ལམ་སྟོན་གྱི་ཚུལ་དུ་སྡོམ་བརྩོན་ཡོན་ཏན་ཆོས་འཕེལ་སོགས་རོགས་རྣམས་དང་བཅས་གཉན་འདོང་གནས་ཀྱི་སྟོད་སྨད་ཐམས་ཅད་དང་། ཕར་རིའི་གནས་རྟེན་རྣམས་ཀྱང་རྩད་གཅོད་དུ་སོང་ནས་ཉིན་བཅུ་གཉིས་ཙམ་ལ་གནས་མཇལ་བྱས་ཤིང་། མཚམས་རྣམས་སུ་གནས་བསང་དང་། གནས་ཆེན་བྱིན་འབེབས། རི་ཁྲུས། དམ་བསྒྲགས། རི་བསྟོད་བཅས་བགྱིས་པས་དེ་འཕྲལ་ནས་འཇའ་སྤྲིན་ངོ་མཚར་བ་འཁྲིགས་པ་དང་། འདི་སྐབས་ཆར་ཤིན་ཏུ་རྒོད་པའི་དུས་ཡིན་ཡང་གནས་མཇལ་འགྲོ་ལམ་དུ་གནམ་གཤིས་བཟང་དུ་འགྲོ་བ་བཅས་གནས་བདག་དགྱེས་པའི་རྟགས་མཚན་ལེགས་ཤིང་། གནས་རྟེན་རྣམས་ལ་མཎྜལ་དང་མར་རྟགས་བཀྲ་ཤིས་གསོལ་སྨོན་བཅས་གང་ཤེས་བགྱིས་ཏེ་ཨོ་རྒྱན་ཆེན་པོའི་བཀའ་འབངས་སུ་གཏོགས་པ་རིག་འཛིན་ཆོས་དབྱིངས་ཡེ་ཤེས་རྒྱལ་པོའམ། རབ་བརྟན་པ་དགེ་ལེགས་ཕུན་ཚོགས་སུ་འབོད་པས་འབྲི་རྒྱུད་ཡེ་ན་དགོན་ནས་དབུ་བཙུགས་ཏེ། ཆུ་འབྲུག་སྟོན་ཟླ་ར་བའི་ཚེས་བཅུ་ལ་དཔལ་སྡེ་དགེ་ལྷུན་འགྲུབ་སྟེང་གི་ཆོས་གྲྭ་ཆེན་པོ་ནས་ལེགས་པར་གྲུབ་པ་བགྱིས་པ་བསྟན་དང་འགྲོ་ལ་སྨན་པའི་རྒྱུར་གྱུར་ཅིག །སརྦ་མངྒཱ་ལམ།། །།༼༢༠༡༡༽
བསམ་ཚུལ་འབྲི།
སྡེ་དགེར་ཕེབས་པའི་གླིང་གེ་སར་སོགས་ཀྱི་སྐོར།