འདྲེ་ཤིག་དམར་པོའི་སྙན་ངག་ཁག་གསུམ།
འདྲེ་ཤིག་དམར་པོའི་སྙན་ངག་ཁག་གསུམ།
ཚངས་སྲས་མ། འདྲེ་ཤིག་དམར་པོ། (སྡེ་དགེ)
སྲིད་གསུམ་ས་ཡི་མཛེས་རྒྱན་མཐོ་སྒང་ཞིང་།།
ལྷིང་འཇགས་མི་ཡི་གར་དུ་རོལ་མཛད་མ།།
ངག་གི་ལྷ་མོ་སྡེ་དགེ་ཟླ་གཡང་ཞེས།།
ལྷན་སྐྱེས་སྲས་སུ་སྨིན་པ་མཇལ་བས་སྤྲོ།།
དབྱངས་ཅན་མ་ཞེས་ཀུན་གྱིས་བསྟོད་ཀྱང་རུང་།།
ཚངས་སྲས་མ་ཞེས་ཀུན་གྱིས་བོས་ཀྱང་རུང་།།
ཟླ་གཡང་ལས་གཞན་ཚངས་སྲས་དབྱངས་ཅན་ཞིག།
གང་དུའང་མེད་པ་སེམས་ཀྱི་ཡུལ་ན་བཞུར།།
ལྗང་མདོག་ཟླུམ་གཟུགས་ས་ཡི་བརྩེགས་མ་ན།།
ངག་གི་ལྷ་མོས་བྱིན་རླབས་བཞུར་རྒྱུན་གྱིས།།
དགའ་བའི་གར་དང་བརྩེ་བའི་གླུ་དབྱངས་ལ།།
ཕྱོགས་པའི་སེམས་པ་རིང་ནས་རིང་དུ་གྱུར།།
སེམས་ཀྱི་ཡིག་འབྲུ་དབྱར་གྱི་སྤང་ཐང་དུ།།
འབྲི་བའི་ནུས་རྩལ་རྟ་མཆོག་རྒོད་པོ་བཞིན།།
རིམ་གྱིས་བཞུད་པའི་གོམ་ཁ་ཀྱག་ཀྱོག་དེ།།
ཁྱེད་ལ་སྤྲིངས་པའི་སྙིང་གི་གཤིས་ཚིག་ཡིན།།
ཕྱི་ལོ། 2016/04/12
༄༅། །ཕ་ས་སྨུག་པོ།
འདྲེ་ཤིག་དམར་པོ། (སྡེ་དགེ)
ང་བྱིས་དུས་ཀྱི་ལང་ཚོའི་མེ་ཏོག་བཞད་ས།
ང་གཞོན་དུས་ཀྱི་འཚོ་བའི་ཁ་ཕྱོགས་འཁྱིལ་ས།
ང་རྒས་དུས་ཀྱི་སྡོང་ལོ་ས་ལ་ཟག་ས།
བདག་ཉིད་ཀྱི་ཕ་ས་སྨུག་པོ།
གཡང་དཀར་འབྲི་མོའི་ངུར་སྒྲ་དང་།
བྲེ་སེ་འབྲོང་གི་ཧར་སྒྲ།
ཁུ་བྱུག་སྔོན་མོའི་དྲུག་འགྱུར།
མདོ་བ་ལྟ་ཕོའི་འཚེར་སྒྲ།
གངས་དཀར་རི་བོའི་གཟི་བརྗིད།
དྭངས་གཙང་སྔོན་མོའི་རླབས་རྒྱུན།
དཔའ་བོ་དཔའ་མོའི་ཤུལ་གནས།
སྤྲེའུ་སྲིན་གཉིས་ཀྱི་རྒྱུན་འཛིན།
མདོར་ན་ཡོད་ཚད་ཀྱི་ཡོད་ཚད་ཕྱུག་པའི་
བདག་གི་ཕ་ས་སྨུག་པོ་བསིལ་ལྗོངས་གོ་ལའི་གཙུག་རྒྱན།
ལྗང་མདོག་གོ་ལའི་གནམ་གཤིས་འཁོར་ས།
སྟོད་སྨད་ཀྱི་ལྷ་ཀླུའི་གླུ་དབྱངས་མཆོད་ས།
ཕྱི་ནང་གི་ཕོ་མོའི་གསོལ་འདེབས་ཞུ་ས།
སུན་རྩེན་ས་ལའི་སྨན་ལྗོངས། །
དྲན་སེམས་ཀྱི་བྱེ་མའི་ཀློང་ནས།
རྒྱང་རིང་རྒྱང་རིང་ཞིག་ནས།
ཁྱེད།
དྲན་གདུང་གིས་བཟི་ཡོད།
ཕྱི་ལོ / 04 / 04 / 2016
༈ ན་གཞོན་གྱི་ཚོར་རླབས།
འདྲེ་ཤིག་དམར་པོ། (སྡེ་དགེ)
ཕ་ཡུལ་གདུང་བའི་ས་མཐའ་ནས།།
དྲན་པའི་དར་སྐུད་རིང་མོ་དེ།།
བསིལ་ལྗོངས་ཡུལ་ལ་འཐེན་བཞིན་དུ།།
མིག་ཆུའི་མཆོད་ཆང་གཙང་མ་བཤམས།།
དྲན་པའི་ན་ཟུག་ཀློང་རོལ་ནས།།
སྒང་གི་མི་ཡི་གོམས་གཤིས་དག།
སེམས་ཀྱི་འོ་ཆུ་དང་འདྲེས་ཏེ།།
དྲན་པའི་གདུང་བ་འདི་ནས་བཞུར།།
སྙན་པའི་ཚིག་སྦྱོར་སྟོང་ཙམ་གྱིས།།
དྲན་དྲན་ཚོར་རླབས་དྲག་པོ་ཞིག།
སུམ་རྩེན་ལྷ་ཡུལ་ཞིང་ཁམས་སུ།།
སྤྲིངས་པའི་ཐོག་མ་འདི་ཙམ་ཉིད།།
རྫ་རི་སྨུག་པོའི་གསེབ་ལམ་ནས།།
ཁྱུང་ཆེན་སེམས་གཏད་འཕུར་བ་སྟེ།།
ས་ལཱའི་སྨན་ལྗོངས་དྲན་དྲན་གྱི།།
གཤིས་ཀྱི་ཐོག་མ་འདི་ནས་སྩོལ།།
དྭངས་གཙང་ཆུ་བོའི་བཞུར་རྒྱུན་ལས།།
དྲན་ཤིང་སེམས་ཀྱི་ཁུག་མདུད་དེ།།
ནམ་ཡང་མི་ལྷོད་དོམ་འཛིན་གྱིས།།
ཕ་ཡུལ་ཕྱོགས་ལ་འདི་ལྟར་སྨྱོས།།
ཡངས་པའི་རྩ་ཐང་བསིལ་རླུང་ལྡང་།།
རི་ལུང་སྨུག་པས་བཏུམས་པ་གྱུར།།
གྲང་བའི་སེམས་པའི་ཤུགས་གླུ་ཞིག།
རྒྱང་རིང་ཡུལ་ནས་འཚར་དུ་མངར།།
གཞོན་པ་ཞིག་གི་ཚོར་བའི་རླབས།།
ས་ལཱའི་ལྗོངས་སུ་ལྡང་བས་ན།།
ཚོར་འདུ་འདྲེས་པའི་ཡིག་ཕྲེང་དག།
རིམ་བཞིན་འདི་ནས་བཞུར་བ་གྱུར།།
བསམ་ཚུལ་འབྲི།
གནའ་བོའི་བོད་ཀྱི་རིག་གནས་འཕེལ་རྒྱས་ཀྱི་ལོ་རྒྱུས་གནད་བསྡུས།