འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས།
ངོ་སྤྲོད།
ཕྱི་ལོ་༡༩༤༨ ལོའི་ཟླ་༡༢་ཚེས་༡༠ཉིན། མཉམ་འབྲེལ་རྒྱལ་ཚོགས་འཚོགས་ཆེན་གྱིས་གྲོས་མཐུན་གཏན་འབེབས་དང་གསལ་བསྒྲགས་བྱས་པའི་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ཀྱི་་ནང་དོན་ཆ་ཚང་དེ་རྗེས་ཀྱི་ཤོག་ལྷེ་ཁག་ནང་གསལ་ཡོད་། ཚོགས་ཆེན་གྱི་ལོ་རྒྱུས་དང་ལྡན་པའི་བྱ་ཐབས་འདིའི་རྗེས་སུ་ཚོགས་འཐུས་རྒྱལ་ཁབ་ཚང་མར་གསལ་བསྒྲགས་འདིའི་བརྗོད་དོན་རྣམས་ཁྱབ་སྤེལ་དང་། ཡུལ་ལུང་གམ། མངའ་ཁུལ་ཁག་གི་སྲིད་དོན་གནས་བབས་གཞི་རྩར་བཟུང་བའི་དབྱེ་འབྱེད་མེད་པར་གཙོ་བོ་སློབ་གྲ་ཁག་དང་། དེ་མིན་ཤེས་ཡོན་སློབ་གཉེར་ཁང་སོགས་ལ་ཡིག་ཆ་འདི་ཉིད་ཁྱབ་བསྒྲགས་དང་། འགྲེམས་སྟོན་། སྒྲོག་སྦྱང། ནང་དོན་འགྲེལ་བརྗོད་ཐུབ་ཐབས་བཅས་ལ་ནུས་ཤུགས་འདོན་དགོས་པའི་འབོད་སྐུལ་བྱེད་པ་ཡིན།
མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ།
ཀོ་ཕི་ཨེ་ ཨན་ནན།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས།
སྔོན་བརྗོད།
དངོས་དོན་ཐོག་འགྲོ་བ་མིའི་ཁྱིམ་ཚང་གི་ནང་མི་ཡོངས་རྫོགས་ཀྱི་རང་བཞིན་ལྷན་སྐྱེས་སུ་ཡོད་པའི་ཆེ་མཐོང་དང་། འདྲ་མཉམ། སུས་ཀྱང་འཕྲོག་ཏུ་མི་རུང་བའི་ཐོབ་ཐང་རྣམས་ཁས་ལེན་བྱེད་པ་ནི་འཛམ་གླིང་འདིའི་རང་དབང་དང་། དྲང་བདེན། ཞི་བདེ་བཅས་ཀྱི་རྨང་གཞི་ཡིན། དངོས་དོན་ཐོག་འགྲོ་བ་མིའི་ཐོབ་ཐང་ལ་རྩི་མེད་ཁྱད་གསོད་དང་། དམའ་འབེབས་བྱས་པ་དེས་ཀླ་ཀློའི་བྱ་ཐབས་ཤིག་བྱུང་ཡོད་པ་སྟེ། དེ་ནི་མིའི་རིགས་ཀྱི་རྣམ་དཔྱོད་དང་མི་མཐུན་པའི་གནས་ཚུལ་ཞིག་རེད། འགྲོ་བ་མིའི་སྨྲ་བརྗོད་དང་འདོད་མོས་ཀྱི་རང་དབང་དང་། འཇིག་སྐྲག་དང་བྲལ་བའི་དགོས་མཁོ་འཛོམས་པའི་རང་དབང་ལ་ལོངས་སུ་སྤྱོད་ཆོག་པའི་འཛམ་གླིང་ཞིག་འབྱུང་ཐབས་དེ་ནི་སྤྱིར་བཏང་མི་དམངས་ཀྱི་རེ་འདོད་ཆེ་ཤོས་དེ་ཡིན་པ་རྒྱ་ཁྱབ་ཡོངས་གྲགས་བྱེད་པ་ཡིན། དངོས་དོན་ཐོག་སྐྱེ་བོ་དག་འུ་ཐུག་ཐབས་ཟད་ཀྱིས་རྐྱེན་གྱི་བཙན་དབང་དང་། གཉའ་གནོན་ལ་ངོ་རྒོལ་སྒེར་ལངས་བྱེད་པའི་མཐའ་མའི་བྱ་ཐབས་ལག་བསྟར་མི་བྱེད་པ་ཞིག་དགོས་ན། ཁྲིམས་ལུགས་རྩ་འཛིན་གྱི་ཐོག་ནས་འགྲོ་བ་མིའི་ཐོབ་ཐང་སྲུང་ཐབས་བྱེད་དགོས་པ་གལ་གནད་ཆེན་པོ་ཡིན། དངོས་དོན་ཐོག་རྒྱལ་ཁབ་ཁག་ཕན་ཚུན་བར་ལ་མཛའ་མཐུན་གྱི་འབྲེལ་བ་གོང་འཕེལ་གཏོང་དགོས་པ་དེ་གལ་གནད་ཆེན་པོ་ཡིན།
དངོས་དོན་ཐོག་དམ་ཡིག་འདིར་མཉམ་འབྲེལ་རྒྱལ་ཚོགས་ཀྱི་མི་མང་རྣམས་ཀྱིས་གཞི་རྩའི་འགྲོ་བ་མིའི་ཐོབ་ཐང་དང་། མིའི་ཆེ་མཐོང་དང་། ཕོ་མོ་འདྲ་མཉམ་གྱི་ཐོབ་ཐང་བཅས་ལ་ཡིད་ཆེས་དང་འབྲེལ་ཁོང་ཚོས་རང་དབང་རྒྱ་ཆེ་དང་བཅས་སྤྱི་ཚོགས་གོང་འཕེལ་གཏོང་བ་དང་། འཚོ་བའི་གནས་སྟངས་ལེགས་བཅོས་གཏོང་རྒྱུར་སེམས་ཤུགས་ཡོད་སྐོར་རྒྱལ་ཚོགས་ཀྱི་སྒྲིག་ཡིག་ནང་བསྐྱར་བརྗོད་བྱས་ཡོད།
དངོས་དོན་ཐོག་ཚོགས་འཐུས་རྒྱལ་ཁབ་སོ་སོས་མཉམ་འབྲེལ་རྒྱལ་ཚོགས་དང་འགན་འཁུར་མཉམ་ལེན་གྱི་ཐོག་ནས་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ལ་ཡོངས་ཁྱབ་གུས་བཀུར་དང་སྲུང་བརྩི་བྱེད་རྒྱུའི་འགན་ལེན་དམ་བཅའ་བྱས་ཡོད།
དངོས་དོན་ཐོག་འགན་ལེན་དམ་བཅའ ་འདི་ཉིད་ཆ་ཚང་ལག་ལེན་དོན་འབབ་ཡོང་བར་ཐོབ་ཐང་དང་རང་དབང་འདི་དག་གི་ཐུན་མོང་གི་གོ་དོན་ལེགས་རྟོགས་ཡོང་རྒྱུ་གནད་འགག་ཆེ་ཤོས་ཡིན།
ལེ་ཚན་དང་བོ། འགྲོ་བ་མིའི་རིགས་ཐམས་ཅད་སྐྱེས་ཙམ་ཉིད་ནས་རང་དབང་ལྡན་ལ། ཆེ་མཐོང་དང་ཐོབ་ཐང་ཡང་འདྲ་མཉམ་ཡིན། དེ་དག་ནི་རྒྱུ་མཚན་རྟོགས་པའི་བློ་རྩལ་དང་རྣམ་དཔྱོད་ལྡན་པ་ཡིན་པས། ཕན་ཚུན་གཅིག་གིས་གཅིག་ལ་བུ་སྤུན་གྱི་འདུ་ཤེས་བཟུང་བའི་བྱ་བ་སྤེལ་དགོས་པ་ཡིན།
དོན་ཚན་གཉིས་པ། སྐྱེ་བོ་རེ་རེར་མི་རིགས་དང་། ཤ་མདོག། ཕོ་མོ། སྐད་ཡིག་ ཆོས་ལུགས། སྲིད་དོན་ནམ། བསམ་ཚུལ་གཞན་དག་ རྒྱལ་ཁབ་བམ། སྤྱི་ཚོགས་ཀྱི་འབྱུང་ཁུངས། མཁར་དབང་། སྐྱེས་ཁུངས་སམ་གནས་བབས་གཞན་ལྟ་བུ་རྣམ་པ་འདྲ་མིན་གང་ལའང་དབྱེ་འབྱེད་མེད་པར་གསལ་བསྒྲགས་འདིའི་ནང་བཀོད་པའི་ཐོབ་ཐང་དང་། རང་དབང་ཡོངས་རྫོགས་ལ་སྤྱོད་པའི་ཁེ་དབང་ཡོད། དེ་མ་ཟད། སྐྱེ་བོ་གང་ཞིག་གི་ཡུལ་ལུང་ངམ་ས་ཁུལ་དེ། རང་བཙན་ཡིན་པའམ། མངགས་བཅོལ་འོག་ཏུ་གནས་པའམ། རང་སྲིད་རང་སྐྱོང་མ་ཡིན་པའམ། ཡང་ན་རང་དབང་གཙང་མའི་བདག་དབང་ལ་ཚད་དགག་གཞན་དག་ཅི་རིགས་ཡོད་པའི་གནས་བབས་གང་འདྲ་ཞིག་གི་ཁོངས་གཏོགས་ཡིན་ཡང་། དེ་ལ་སྲིད་དོན་དང་ཁྲིམས་ལུགས་ཀྱི་དབང་ཚད། རྒྱལ་སྤྱིའི་གནས་བབས་བཅས་གཞི་རྩར་བཟུང་བའི་དབྱེ་འབྱེད་བྱེད་མི་རུང་བ་ཡིན།
དོན་ཚན་གསུམ་པ། སྐྱེ་བོ་རེ་རེར་ཚེ་སྲོག་དང་། རང་དབང་ལ་སྤྱོད་པ། རང་ཉིད་སྲུང་སྐྱོབ་བཅས་ཀྱི་ཐོབ་ཐང་ཡོད།
དོན་ཚན་བཞི་བ། སྐྱེ་བོ་སུ་ཞིག་ཀྱང་ཚེ་གཡོག་གམ་བྲན་གཡོག་ཏུ་བཀོལ་སྤྱོད་བྱས་མི་ཆོག་པ་སྟེ། ཚེ་གཡོག་གི་ལམ་ལུགས་དང་། ཚེ་གཡོག་ཉོ་ཚོང་གི་རྣམ་པ་མཐའ་དག་བཀག་འདོམས་བྱེད་དགོས་པ་ཡིན།
དོན་ཚན་ལྔ་བ། སྐྱེ་བོ་སུ་ཞིག་ལའང་མནར་གཅོད་གཏོང་བའམ་ཡང་ན་སྡུག་རྩུབ་ཆེ་བའི་མི་སྤྱོད་ལས་འདས་པའི་མཐོང་ཆུང་དམའ་འབེབ་བྱེད་བའམ། ཁྲིམས་ཉེས་འགེབ་བའི་རིགས་མི་ཆོག
དོན་ཚན་དྲུག་པ། སྐྱེ་བོ་རེ་རེར་ཁྲིམས་ཀྱི་མདུན་སར་འགྲོ་བ་མི་ཞིག་ཡིན་པར་ངོས་འཛིན་དགོས་པའི་ཐོབ་ཐང་ཡོད།
དོན་ཚན་བདུན་པ། སྐྱེ་བོ་སུ་ཡིན་རུང་ཁྲིམས་གྱི་མདུན་དུ་འདྲ་མཉམ་ཡིན། ཁྲིམས་ཐོག་ནས་དབྱེ་འབྱེད་གང་ཡང་མེད་པར་སྲུང་སྐྱོབ་འདྲ་མཉམ་དགོས་པའི་ཁེ་དབང་ཡོད། ཚང་མར་གསལ་བསྒྲགས་འདི་དང་འགལ་བའི་དབྱེ་འབྱེད་ཅི་རིགས་དང་། དེ་ལྟར་དབྱེ་འབྱེད་བྱེད་པའི་ངན་སྐུལ་རིགས་ཀྱི་བྱ་སྤྱོད་བཅས་པར་སྲུང་སྐྱོབ་འདྲ་མཉམ་དགོས་པའི་ཁེ་དབང་ཡོད།
དོན་ཚན་བརྒྱད་པ། སྐྱེ་བོ་རེ་རེར་རྩ་ཁྲིམས་ཐོག་ནས་སྤྲད་པའི་རང་ཉིད་ཀྱུ་གཞི་རྩའི་ཐོབ་ཐང་རྡོག་རོལ་གཏོང་བའི་བྱ་སྤྱོད་བྱུང་རིགས་ལ་རྒྱལ་ཁབ་ཁྲིམས་ཁང་ཚད་ལྡན་ཞིག་ནས་ཕན་ནུས་ལྡན་པའི་རོགས་སྐྱོར་དང་། གུན་གསབ་བྱ་དགོས་པའི་ཐོབ་ཐང་ཡོད།
དོན་ཚན་དགུ་བ། སྐྱེ་བོ་སུ་ཡང་གང་བྱུང་གིས་འཛིན་བཟུང་དང་། བཀག་ཉར་བྱེད་བའམ་རྒྱང་ཕུད་གཏོང་བ་བཅས་ཀྱི་རིགས་མི་ཆོག
དོན་ཚན་བཅུ་བ། སྐྱེ་བོ་རེ་རེར་རང་གི་ཐོབ་ཐང་འོས་འགན་སྐོར་དང་། རང་ལ་ཁྲིམས་འགལ་ཉེས་འཛུགས་བྱུང་རིགས་ཐག་གཅོད་ཆེད་ཕྱོགས་ལྷུང་བྲལ་བའི་རང་དབང་ཅན་གྱི་ཁྲིམས་ཁང་ཞིག་ནས་དྲང་བདེན་དང་། མང་ཚོགས་ཀྱིས་ཉན་ཆོག་པའི་ཞུ་གཏུགས་ཐག་གཅོད་ཀྱི་ཆ་ཚང་བའི་ཁེ་དབང་འདྲ་མཉམ་ཡོད།
དོན་ཚན་བཅུ་གཅིག་པ། ༡ ཁྲིམས་འགལ་ཉེས་འཛུགས་བྱས་པའི་སྐྱེ་བོ་མཐའ་དག་ལ་རང་གི་བདེན་པ་དག་སྐྱེལ་ཆེད། དགོས་ངེས་ཀྱི་འགན་ལེན་མཐའ་དག་ཡོད་པའི་ཡོངས་གྲགས་ཁྲིམས་ཞིབ་ཀྱི་ཐོག་ནས། ཁྲིམས་ཐོག་ནས་ནག་ཉེས་ཡོད་པ་ར་འཕྲོད་མ་བྱུང་བར་དོ་བདག་ལ་ཉེས་མེད་དུ་ཆ་འཛིན་དགོས་པའི་ཐོབ་ཐངགཡོད། ༢ ་ སྐྱེ་བོ་སུ་ཡིན་རུང་བྱ་སྤྱོད་སྤེལ་བའམ་ནོར་འཛོལ་གང་ཞིག་བྱེད་པའི་སྐབས་དེར་རྒྱལ་ཁབ་བམ་ཡང་ན་རྒྱལ་སྤྱིའི་ཁྲིམས་ལུགས་ཀྱི་ནང་དོན་ལྟར་ནག་ཉེས་སུ་མི་འགྲོ་བའི་བྱས་ཉེས་གཞི་རྩར་བཟུང་སྟེ་སྐྱེ་བོ་སུ་ཡང་ནག་ཆེན་དུ་ངོས་འཛིན་བྱེད་མི་ཆོག་པ་མ་ཟད། བྱས་ཉེས་གང་ཞིག་ལ་སྐབས་དེ་རང་དུ་ལག་བསྟར་ཉེས་འགེལ་འོས་པ་ལས་ལྕི་བའི་ཉེས་ཆད་ཀྱང་འགེལ་མི་ཆོག
དོན་ཚན་བཅུ་གཉིས་བ། སྐྱེ་བོ་སུ་ཡིན་རུང་རང་གི་སྒེར་དོན་ནམ། ཁྱིམ་ཚང་། སྡོད་ཁང་། བརྡ་ལན་ཡིག་འགྲུལ་བཅས་པར་གང་བྱུང་གི་ཐེ་བྱུས་བྱས་མི་ཆོག་པ་མ་ཟད། རང་གི་ཆེ་མཐོང་དང་། མིང་གྲགས་ལའང་སུས་ཀྱང་བཙན་ཤེད་ཀྱིས་གནོད་སྐྱོན་གཏོང་མི་ཆོག དེ་འདྲའི་ཐེ་བྱུས་སམ་གནོད་སྐྱོན་བྱུང་རིགས་འགོག་ཐབས་བྱེད་པར་སྐྱེ་བོ་རེ་རེར་ཁྲིམས་ཐོག་ནས་སྲུང་སྐྱོབ་ཀྱི་ཐོབ་ཐང་ཡོད།
དོན་ཚན་བཅུ་གསུམ་པ། ༡ སྐྱེ་བོ་རེ་རེར་སོ་སོའི་རྒྱལ་ཁོངས་ནང་རང་དབང་ཐོག་ནས་འགྲོ་འོང་དང་། གནས་སྡོད་བྱེད་པའི་ཐོབ་ཐང་ཡོད། ༢ ་ སྐྱེ་བོ་རེ་རེར་རང་ཡུལ་ཐེ་བས་ཡུལ་ལུང་གང་འདྲ་ཞིག་ནས་ཀྱང་ཕྱིར་ཐོན་བྱེད་པ་དང་། རང་ཡུལ་དུ་ཕྱིར་ལོག་བྱེད་པའི་ཐོབ་ཐང་ཡོད།
དོན་ཚན་བཅུ་བཞི་བ། ༡ སྐྱེ་བོ་རེ་རེར་རང་ཉིད་སྡུག་སྦྱོང་གནོད་འཚེ་ལས་གཡོལ་ཆེ་རྒྱལ་ཁབ་གཞན་དུ་སྐྱབས་བཅོལ་ཞུ་བའི་ཐོབ་ཐང་ཡོད། ༢ ་ འོན་ཀྱང་ཐོབ་ཐང་དེ་ཉིད་ཆབ་སྲིད་ཀྱི་གནད་དོན་མ་ཡིན་པའི་དངོས་འབྲེལ་ནག་ཉེས་སམ། མཉམ་འབྲེལ་རྒྱལ་ཚོགས་ཀྱི་རྩ་དོན་དང་དམིགས་ཡུལ་ལས་འགལ་བའི་བྱ་སྤྱོད་ལས་བྱུང་བའི་གྱོད་དོན་རིགས་ལ་ཐོབ་ཐང་འདི་ལ་བརྟེན་ནས་སྐྱོབ་ཐབས་ཆེད་ཞུ་འབོད་བྱས་མི་ཆོག་
དོན་ཚན་བཅོ་ལྔ་བ། ༡ ་ སྐྱེ་བོ་རེ་རེར་རྒྱལ་ཁབ་ཀྱི་ཆབ་འབངས་ཤིག་བྱེད་པའི་ཐོབ་ཐང་ཡོད། ༢ ་སྐྱེ་བོ་གང་ཞིག་གི་རྒྱལ་ཁབ་ཀྱི་ཆབ་འབངས་གནས་བབས་གང་བྱུང་བཙན་འཕྲོག་བྱེད་མི་ཆོག་པ་མ་ཟད། དེའི་ཆབ་འབངས་ཀྱི་གནས་བབས་བརྗེ་བསྒྱུར་བྱེད་པའི་ཐོབ་ཐང་ལ་ཁས་ལེན་མི་བྱེད་པའི་རིགས་ཀྱང་མི་ཆོག
དོན་ཚན་བཅུ་ དྲུག་པ། ༡་ སྐྱེ་བོ་ཕོ་མོ་ན་ཚོད་ལོན་པ་རྣམས་ལ་མི་རིགས་སམ། རྒྱལ་ཁོངས། ཆོས་ལུགས་བཅས་ཀྱི་འགོག་རྐྱེན་གང་ཡང་མེད་པར་གཉེན་བསྒྲིགས་བྱེད་པ་དང་། ཁྱིམ་གསར་འཛུགས་པའི་ཐོབ་ཐང་ཡོད། ཁོང་ཚོར་གཉེན་སྒྲིག་བྱེད་བ་དང་། བཟའ་ཚང་བྱེད་རིང་། ཁ་བྲལ་དུ་འགྲོ་བའི་སྐབས་བཅས་པར་ཐོབ་ཐང་འདྲ་མཉམ་དུ་སྤྱོད་པའི་ཁེ་དབང་ཡོད། ༢ ་ བཟའ་མི་གཉིས་ཀའི་འདོད་མོས་གཙང་མ་དང་། རང་དབང་ཁོ་ནའི་སྒོནས་ཁྱིམ་ཐབ་བྱ་བར་ཞུགས་དགོས་པ་ཡིན། ༣ ་ ཁྱིམ་ཚང་ནི་སྤྱི་ཚོགས་ཀྱི་རང་བཞིན་དང་། གཞི་རྩའི་སྒྲུབ་བྱའི་ཚན་པ་ཡིན་ཞིང་། འདི་ལ་སྤྱི་ཚོགས་དང་། རྒྱལ་ཁབ་ཀྱིས་སྲུང་སྐྱོབ་དགོས་པའི་ཁེ་དབང་ཡོད།
དོན་ཚན་བཅུ་བདུན་པ། ༡ སྐྱེ་བོ་རེ་རེར་རང་གི་རྒྱུ་ནོར་རང་ཉིད་ཁེར་རྐྱང་གིས་བདག་འཛིན་བྱེད་པའམ། ཡང་ན་གཞན་དང་མཉམ་རུབ་ཐོག་བདག་འཛིན་བྱེད་པའི་ཐོབ་ཐང་ཡོད། ༢ ་ སྐྱེ་བོ་རང་ཉིད་ཀྱི་རྒྱུ་ནོར་སུས་ཀྱང་གང་བྱུང་གིས་བཙན་འཕྲོག་བྱེད་མི་ཆོག
དོན་ཚན་བཅོ་བརྒྱད་པ། སྐྱེ་བོ་རེ་རེར་བསམ་བློ་དང་། རྟོག་དཔྱོད། ཆོས་དད་བཅས་ཀྱི་རང་དབང་ལ་སྤྱོད་པའི་ཐོབ་ཐང་ཡོད། ཐོབ་ཐང་འདིའི་ཁོངས་སུ་རང་ཉིད་ཀྱི་ཆོས་ལུགས་སམ་ཡིད་ཆེས་བརྗེ་སྒྱུར་གྱི་རང་དབང་དང་། རང་ཉིད་ཁེར་རྐྱང་ངམ། གཞན་དང་མཉམ་སྡེབས་ཀྱིས་ཡོངས་གྲགས་སམ་ཡོངས་གྲགས་མ་ཡིན་པའི་སྒོ་ནས་རང་ཉིད་ཀྱི་ཆོས་དང་། ཡིད་ཆེས་མངོན་པར་བྱེད་པའི་སློབ་ཁྲིད་དང་། ཉམས་ལེན། གསོལ་མཆོད་བསླབ་སྡོམ་སྲུང་རྒྱུ་བཅས་ཀྱི་རང་དབང་གི་ཐོབ་ཐང་ཡང་འདུས་ཡོད།
དོན་ཚན་བཅུ་དགུ་བ། སྐྱེ་བོ་རེ་རེར་རང་དབང་ཐོག་ནས་བསམ་ཚུལ་འཆང་བ་དང་འདོད་པའི་ཐོབ་ཐང་ཡོད་ཅིང་། ཐོབ་ཐང་འདིའི་ཁོངས་སུ་ཐེ་བྱུས་བྲལ་བའི་བསམ་ཚུལ་འཆང་བ་དང་། བར་མཚམས་ལ་ལྟོས་མི་དགོས་པར་བརྒྱུད་ལམ་ཅི་རིགས་བརྒྱུད་དེ་རང་དབང་ཐོག་ནས་བསམ་ཚུལ་དང་། གནས་ཚུལ་འཚོལ་བསྡུས་བྱེད་པ་དང་། ལེན་པ། མཁོ་སྤྲོད་བྱེད་པ་བཅས་ཀྱི་རང་དབང་ཡང་ཚུད་ཡོད།
དོན་ཚན་ཉི་ཤུ་བ། ༡ སྐྱེ་བོ་རེ་རེར་ཞི་འཇམ་གྱི་སྒོ་ནས་འདུ་འཛོམས་བྱེད་པ་དང་། ཚོགས་པ་འཛུགས་པའི་རང་དབང་ལ་སྤྱོད་པའི་ཐོབ་ཐང་ཡོད། ༢་ སྐྱེ་བོ་སུ་ཡིན་ཡང་ཚོགས་པ་ཞིག་གི་ཁོངས་སུ་བཙན་ཤེད་ཀྱིས་འཇུག་ཐབས་བྱེད་མི་ཆོག
དོན་ཚན་ཉེར་གཅིག་པ། ༡ སྐྱེ་བོ་རེ་རེར་ཐད་ཀར་རམ་ཡང་ན་རང་དབང་སྒོ་ནས་འདེམས་བསྐོས་འཐུས་མི་བརྒྱུད་དེརང་ཡུལ་གྱི་གཞུང་གིལས་དོན་ནང་ཆ་ཤས་ལེན་པའི་ཐོབ་ཐང་ཡོད། ༢ ་ སྐྱེ་བོ་རེ་རེར་རང་གི་ཡུལ་ལུང་ནང་སྤྱི་བའི་ཞབས་ཞུར་འདྲ་མཉམ་གྱིས་ཞུགས་རྒྱུའི་ཐོབ་ཐང་ཡོད། ༣ ་ མི་མང་གི་འདུན་པ་དེ་གཞུང་གི་དབང་ཆའི་གཞི་རྩར་འཛིན་དགོས་པ་སྟེ། དུས་མཚམས་རྒྱས་བཅད་དང་དངོས་འབྲེལ་གྱི་འོས་བསྡུའི་ལམ་ནས་འདུན་པ་དེ་ཉིད་མངོན་གྱུར་དགོས་པ་དང་། དེ་ཡང་ཡོངས་ཁྱབ་དང་འདྲ་མཉམ་གྱི་འོས་བསྡུ་བྱེད་པ་དང་། གསང་བའི་འོས་ཤོག་འཕེན་པའམ། ཡང་ན་དེ་དང་མཚུངས་བའི་རང་དབང་གི་སྒོ་ནས་འོས་ཤོག་འཕེན་པའི་འགྲོ་ལུགས་ལ་བརྟེན་ནས་འོས་བསྡུ་བྱེད་དགོས།
དོན་ཚན་ཉེར་གཉིས་པ། སྐྱེ་བོ་རེ་རེར་རང་ཉིད་སྤྱི་ཚོགས་ཀྱི་ཚོགས་མི་ཞིག་ཡིན་པའི་ཆ་ནས་སྤྱི་ཚོགས་བདེ་སྲུང་གི་ཐོབ་ཐང་ཡོད། རང་ཉིད་ཀྱི་ཆེ་མཐོང་དང་། རང་དབང་གི་གཤིས་སྤྱོད་ཡར་རྒྱས་ཆེད་མེད་དུ་མི་རུང་བའི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་ཐོབ་ཐང་ཁག་རྒྱལ་ཁབ་རང་རང་གི་བཀོད་སྒྲིག་དང་མཐུན་རྐྱེན་ལ་གཞི་བཅོལ་ཏེ་རྒྱལ་ཁབ་ཀྱི་འབད་རྩོལ་དང་། རྒྱལ་སྤྱིའི་མཐུན་རྒྱུར་ལ་བརྟེན་ནས་སྤྱི་ཚོགས་བདེ་སྲུང་གི་ཐོབ་ཐང་དེ་ཉིད་ལག་ལེན་དོན་འབབས་དགོས་པའི་ཁེ་དབང་ཡོད།
དོན་ཚན་ཉེར་གསུམ་པ། ༡ སྐྱེ་བོ་རེ་རེར་ལས་ཀ་བྱེད་པ་དང་། རང་དབང་གི་སྒོ་ནས་ལས་རིགས་འདེམས་པ། དྲང་ལྡན་དང་འོས་ཤིང་འཚམས་པའི་ལས་ཀའི་ཆ་རྐྱེན་དགོས་པ་དང་། ལས་ཤོར་ལ་ལས་སྐྱོབ་དགོས་པ་བཅས་ཀྱི་ཐོབ་ཐང་ཡོད། ༢ ་ སྐྱེ་བོ་རེ་རེར་དབྱེ་འབྱེད་གང་ཡང་མེད་པར་ལས་རིགས་འདྲ་མཚུངས་ལ་གླ་ཕོགས་འདྲ་མཉམ་གྱི་ཐོབ་ཐང་ཡོད། ༣ ལས་ཀར་ཞུགས་པའི་སྐྱེ་བོ་རེ་རེར་འགྲོ་བ་མིའི་ཆེ་མཐོང་གི་རིན་ཐང་འཚམས་པའི་འཚོ་གནས་ཆེད་རང་ཉིད་དང་རང་གི་ཁྱིམ་ཚང་གི་ཆེད་དུ་དྲང་བདེན་དང་། འོས་བབས་ཀྱི་གླ་ཕོགས་འགན་ལེན་དགོས་པའི་ཐོབ་ཐང་ཡོད། དགོས་གལ་མཆིས་ཚེ་སྤྱི་ཚོགས་འགན་སྲུང་གི་ཐབས་ལམ་གཞན་དག་ཐོག་ནས་འཚོ་སྣོན་སྤྲོད་དགོས། ༤ ་ སྐྱེ་བོ་རེ་རེར་རང་གི་ཁེ་ཕན་སྲུང་སྐྱོབ་ཆེད་ལས་མིའི་ཚོགས་པ་འཛུགས་པའམ་འཛུལ་ཞུགས་བྱེད་པའི་ཐོབ་ཐང་ཡོད།
དོན་ཚན་ཉེར་བཞི་བ། སྐྱེ་བོ་རེ་རེར་འོས་འཚམས་ཀྱི་ཚད་གཞི་ལྡན་པའི་ལས་ཀའི་དུས་ཚོད་དང་། དུས་བསྟུན་ཕོགས་ཡོད་དགུང་གསེང་ཁག་ཐེ་བའི་ངལ་གསོ་དང་། སོས་དལ་གྱི་ཐོབ་ཐང་ཡོད།
དོན་ཚན་ཉེར་ལྔ་བ། ༡ ་ སྐྱེ་བོ་རེ་རེར་རང་ཉིད་དང་རང་གི་ཁྱིམ་ཚང་གི་འཕྲོད་བསྟེན་དང་། བདེ་ཐབས་ཀྱི་ཆེད་དུ་ཟས་གོས་གནས་མལ་། སྨན་བཅོས། དགོས་ངེས་ཀྱི་སྤྱི་ཚོགས་ཞབས་ཞུ་བཅས་ཚུད་པའི་འཚོ་བའི་གནས་ཚད་འགྲིགས་ངེས་ཤིག་དགོས་པའི་ཐོབ་ཐང་ཡོད་ཅིང་ལས་མེད་དང་། ནད་མནར། དབང་བོ་ཡན་ལག་སྐྱོན་ཅན། བཟའ་ཟླ྄་འདས་གྲོངས། རྒས་གཅོང་བཅས་ཀྱི་སྐབས་སམ་དེ་མིན་རང་ནུས་ལས་རྒལ་བའི་འཚོ་ཐབས་དཀའ་ངལ་འཕྲད་སྐབས་འཚོ་ཐབས་འགན་སྲུང་དགོས་པའི་ཐོབ་ཐང་ཡོད། ༢ སྐྱེས་མ་དང་། བྱིས་པའི་གནས་སྐབས་སུ་དམིགས་བསལ་གྱི་ལྟ་རྟོག་དང་རོགས་སྐྱོར་ཐོབ་དགོས་པའི་ཁེ་དབང་ཡོད་ཅིང་། ཕ་མ་བཟའ་ཚང་ཡིན་པའམ། མ་ཡིན་པ་གང་ཡང་རུང་བ་ལས་སྐྱེས་པའི་བྱིས་པ་ཚང་མར་སྤྱི་ཚོགས་འགན་སྲུང་གཅིག་མཚུངས་ཐོབ་དགོས།
དོན་ཚན་ཉེར་དྲུག་པ། ༡ སྐྱེ་བོ་རེ་རེ་ཤེས་ཡོན་སློབ་སྦྱོང་གི་ཐོབ་ཐང་ཡོད། མ་མཐར་ཡང་སྔོན་འགྲོ་དང་ གཞི་རིམ་ཤེས་ཡོན་སློབ་སྦྱོང་རིན་མེ་དུ་ཐོབ་དགོས་ལ། སྔོན་འགྲོའི་ཤེས་ཡོན་སློབ་སྦྱོང་ནི་ངེས་པར་དུ་དགོས་པ་ཡིན། སྤྱིར་འཕྲུལ་ལས་དང་། ཆེད་ལས་སློབ་སྦྱོང་གི་གོ་སྐབས་ཡོད་པ་བཟོ་རྒྱུ་དང་། མཐོ་རིམ་སློབ་སྦྱོང་གི་གོ་སྐབས་སྦྱང་འབྲས་གཞིར་བཟུང་ཚང་མར་འདྲ་མཉམ་ཐོབ་དགོས་པ་ཡིན། ༢་ ཤེས་ཡོན་སློབ་སྦྱོང་གི་ཁ་ཕྱོགས་ནི། འགྲོ་བ་མིའི་རང་གཤིས་ཡར་རྒྱས་ཆ་ཚང་བ་དང་། འགྲོ་བ་མིའི་ཐོབ་ཐང་དང་། གཞི་རྩའི་རང་དབང་ལ་བརྩི་བཀུར་གྱི་ནུས་ཤུགས་ཆེ་སྐྱེད་བྱེད་པར་དམིགས་དགོས་པ་ཡིན། དེས་རྒྱལ་ཁབ་ཁགདང་། མི་རིགས། ཆོས་ལུགས་སྡེ་ཁག་བཅས་ཚང་མའི་བར་ལ་ཕན་ཚུན་གོ་དོན་ལེགས་རྟོགས་དང་། བཟོད་འཁུར། མཛའ་གྲོགས་མཐུན་འབྲེལགོང་འཕེལ་དུ་གཏོང་བ་མ་ཟད། མཉམ་འབྲེལ་རྒྱལ་ཚོགས་ཀྱི་ཞི་བདེ་ཡུན་གནས་ཀྱི་ལས་དོན་ལ་རམ་འདེགས་བྱེད་ངེས་ཡིན། ༣ ་ བུ་ཕྲུག་རྣམས་ལ་ཤེས་ཡོན་སློབ་སྦྱོང་ཇི་འདྲ་ཞིག་སྤྲོད་དགོས་མིན་གདམ་ག་བྱེད་པའི་ཐོབ་ཐང་གཙོ་བོ་ཕ་མ་ཚོར་ཡོད།
དོན་ཚན་ཉེར་བདུན་པ། ༡ སྐྱེ་བོ་རེ་རེར་རང་མོས་ལྟར་སྡེ་ཚོགས་ཀྱི་རིག་གཞུང་འཚོ་བའི་ནང་རང་དབང་གིས་མཉམ་བཞུགས་བྱེད་པ་དང་། སྒྱུ་རྩལ་ལོངས་སུ་སྤྱོད་པ། ཚན་རིག་ཡར་ཐོན་། དེའི་ཁེ་ཕན་མཉམ་སྤྱོད་བྱེད་པ་བཅས་ཀྱི་ཐོབ་ཐང་ཡོད། ༢ ་ སྐྱེ་བོ་རེ་རེར་རང་ཉིད་རྩོམ་པ་པོ་ཡིན་པའི་ཚན་རིག་དང་། རྩོམ་རིག མཛེས་རྩལ་བརྩམས་བྱ་བཅས་ཅི་རིགས་ཀྱི་ཐོན་སྐྱེད་ལས་བྱུང་བའི་བསམ་དཔལ་དང་། དངོས་པོའི་ཁེ་ཕན་དེ་དག་ལ་ལོངས་སྤྱོད་དང་སྲུང་སྐྱོབ་ཀྱི་ཐོབ་ཐང་ཡོད།
དོན་ཚན་ཉེར་བརྒྱད་པ། སྐྱེ་བོ་རེ་རེར་སྤྱི་ཚོགས་དང་། རྒྱལ་སྤྱིའི་སྒྲིག་སྲོལ་ཞིག་དགོས་པའི་ཁེ་དབང་ཡོད་ལ། སྒྲིག་སྲོལ་དེའི་འོག་གསལ་བསྒྲགས་འདིའི་ནང་བཀོད་པའི་ཐོབ་ཐང་ཁག་དང་། རང་དབང་རྣམས་མངོན་གྱུར་དགོས་པ་ཡིན།
དོན་ཚན་ཉེར་དགུ་བ། ༡ ་ སྤྱི་ཚོགས་ཁོ་ནའི་ནང་གང་ཟག་ཞིག་གི་གཤིས་སྤྱོད་རང་དབང་གི་སྒོ་ནས་ཆ་ཚང་བའི་ཡར་རྒྱས་འགྲོ་ཐུབ་པར་བརྟེན་སྐྱེ་བོ་རེ་རེར་སྤྱི་ཚོགས་ཀྱི་ལས་འགན་ཡོད། ༢ ་ སྐྱེ་བོ་རེ་རེས་རང་གི་ཐོབ་ཐང་དང་རང་དབང་ལ་ལོངས་སུ་སྤྱོད་སྐབས་མང་གཙོའི་སྤྱི་ཚོགས་ཤིག་ནང་དགོས་ངེས་ཀྱི་ཡ་རབ་སྤྱོད་བཟང་། མང་ཚོགས་ཀྱི་སྒྲིག་སྲོལ། སྤྱིར་བཏང་གི་བདེ་དོན་བཅས་ཀྱི་དགོས་མཁོ་གྲུབ་པ་དང་། སྐྱེ་བོ་གཞན་གྱི་ཐོབ་ཐང་དང་རང་དབང་ལ་འོས་ཤིང་འཚམས་པའི་ངོས་འཛིན་དང་། བརྩི་བཀུར་འབྱུང་ཐབས་འབའ་ཞིག་བཅས་ཁྲིམས་ཐོག་ནས་ཇི་ལྟར་གཏམ་ལ་ཕབ་པའི་རྒྱས་བཅད་ཁོ་ནར་བསྟུན་དགོས་པ་ཡིན། ༣ ་ ཐོབ་ཐང་དང་། རང་དབང་འདི་དག་སྐབས་གང་དུ་འང་མཉམ་འབྲེལ་རྒྱལ་ཚོགས་ཀྱི་དམིགས་ཡུལ་རྩ་འཛིན་རྣམས་དང་ཕྱོགས་འགལ་གྱིས་ལོངས་སུ་སྤྱོད་པའི་རིགས་མི་ཆོག
དོན་ཚན་སུམ་ཅུ་བ། གསལ་བསྒྲགས་འདིའི་ནང་གི་གནས་དོན་གང་ལ་ཡང་རྒྱལ་ཁབ་བམ། མི་སྡེ། གང་ཟག་སུས་ཀྱང་འདིར་གསལ་བའི་ཐོབ་ཐང་དང་རང་དབང་ཁག་གང་ཡང་རུང་བ་གཏོར་བཤིག་གཏོང་བར་དམིགས་པའི་བྱ་གཞག་གང་ཡང་སྤེལ་བའམ་སྤེལ་བར་འཇུག་པའི་ཐོབ་ཐང་གང་ཡང་ཡོད་ཚུལ་གྱི་གོ་དོན་ཕྱིན་ཅི་ལོག་ཏུ་བཀྲལ་མི་ཆོག ༼རྫོགས་སོ།།༽
བསམ་ཚུལ་འབྲི།
རྒྱ་ནག་གི་མི་རིགས་ས་ཁོངས་རང་སྐྱོང་སྐོར་གྱི་བཅའ་ཁྲིམས།