འགོ་རྒྱལ་དཔལ་འཛང་རྒོད་ཚང་གི་གནས་ཡིག
༇། །འགོ་རྒྱལ་དཔལ་འཛང་རྒོད་ཚང་དབང་ཕུག་ནམ་མཁའ་རྫོང་གི་གནས་བསྟོད་བཞུགས་སོ།།
༇། །སངས་རྒྱས་ཀུན་དང་ཡེ་ཤེས་རོ་མཉམ་ཀྱང་། །སངས་རྒྱས་ཀུན་གྱི་ཕྲིན་ལས་བསྒྲུབ་པའི་ཚུལ། །སངས་རྒྱས་པད་འབྱུང་བདག་གི་རིགས་བདག་ཏུ། །སངས་རྒྱས་མ་ཐོབ་བར་དུ་འབྲལ་མེད་བཞུགས། །གནས་མཆོག་འགོར་རྒྱལ་དཔལ་འཛང་རི་བོ་ནི། །ཟླ་ཞུན་ཁུ་བས་ཡང་ཡང་བྱུགས་པ་དང་། །མཚུངས་པའི་བྲག་དཀར་སྲ་བརྟན་མཐོ་ཞིང་མཛེས། །སྤང་ལྗོངས་མ་རྒད་ཕྱིས་པའི་མདངས་འཕྲོག་པ། །རྩ་བ་རབ་ཏུ་བརྟན་པའི་སྡོང་བུ་ལ། །ཡལ་ག་ལོ་མ་མེ་ཏོག་སྣ་ཚོགས་དང་། །འབྲས་བུ་དག་གིས་ཡོངས་སུ་དུད་པའི་ཤིང་། །ལྷ་ཡི་སྐྱེད་མོའི་ཚལ་ལྟར་ཡིད་དུ་འོང་། །ལུས་དང་སྒྲོ་གཤོག་སྣ་ཚོགས་ཚོན་རིས་ཀྱིས། །མཛེས་པར་བྲིས་པའི་བྱ་དང་བྱིའུ་རྣམས། །སྐད་སྙན་དྲི་ཟའི་རྒྱུད་མང་ལྟ་བུ་སྙན། །སྤྲེའུ་རྣམས་ཀྱང་ལུས་རྩལ་འགྲན་པར་བྱེད། ཨེ་ན་ཡ་དང་ཤྭ་བ་རྒྱ་རྣ་སོགས། །རི་སྐྱེས་དུ་མ་བག་ཡངས་བདེ་བར་རྒྱུ། །གཟིག་དང་གུང་སོགས་གཅན་གཟན་གཏུམ་པོ་ཡང་། །རྟག་ཏུ་རྒྱུ་ཞིང་སྒྲ་སྐད་སྒྲོགས་པར་བྱེད། གཡས་གཡོན་མདུན་ངོས་བྲ
ག་གཡང་ངོས་གཟར་བ། །ངང་མའི་ཚང་ནས་ཐང་དཀར་རྒོད་པོ་རྣམས། །འདབ་གཤོག་བརྐྱངས་ནས་བར་སྣང་མཐོིན་པོ་ལ། །ལྡིང་ཞིང་ཤ་ཁྲག་གཟན་ལ་གཞོལ་ཞིང་རོལ། །དཀར་མོ་ཤམ་ཡག་ལྷ་སྨན་མུ་ནུ་སོགས། །དཀར་ཕྱོགས་ལ་དགའི་ཕོ་བྲང་གཡའ་བྲག་གི། །ཕྲེང་བས་བསྐོར་ཞིང་འབྲུ་དང་ཕྱུགས་ལ་སོགས། །སྐྱོང་བའི་འབྲོག་དང་གྲོང་གིས་རབ་བརྒྱན་པ། །དགེ་བཅུ་ཚང་བ་ངོ་མཚང་རྨད་དུ་བྱུང་། །ཁྱད་པར་དཔལ་གྱི་དབང་ཕྱུག་འགྱུར་མེད་བརྟན། །ནམ་མཁའ་རྫོང་འདི་དབེན་ཅིང་ཉམས་རེ་དགའ། །དཔའ་བོ་མཁའ་འགྲོའི་ཚོགས་རྣམས་ངང་གི་འདུ། །དམ་ཅན་སྲུང་མས་ཕྲིན་ལས་སྒྲུབ་པའི་གནས། །རྣམ་གཡེང་འདུ་འཛི་སྤང་བའི་སྒྲུབ་གནས་ཡིན། །ཆེ་ཐབས་ཆོས་བརྒྱད་འཁྲུལ་བའི་བྱ་བ་བཏང་། །གཅིག་པུར་རི་ཁྲོད་འགྲིམ་ནས་བསྒོམ་ནུས་ན། །ཚེ་གཅིག་སངས་རྒྱས་བདེ་བར་ཐོབ་པ་ཡིན། །གཞན་ངོར་ཐུན་མོང་མཐོང་ཚུལ་དེ་ལྟར་དང་། དག་པའི་སྣང་ངོར་འཕགས་པ་སྤྱན་རས་གཟིགས། །རྗེ་བརྩུན་སྒྲོལ་མ་བྱང་སེམས་དཔག་མེད་དང་། །རྟ་མགྲིན་ལག་ན་རྡོ་རྗེ་ལ་སོགས་པ། །ཁྲོ་བོ་ཁྲོ་མོ་བགྲང་ཡས་བཞུགས་པ་ཡི། །ཕོ་བྲང་རི་བོ་པོ་ཊ་ལ་གཉིས་པ། །པདྨ་བཛྲ་ཡེ་ཤེས་མཚོ་རྒྱལ་མས། །ཞབས་ཀྱིས་བཅགས་ཤིང་བྱིན་གྱིས་ཡང་ཡང་བརླབས། །ཟབ་གཏེར་དུ་མ་སྦས་པའི་གནས་མཆོག་སྟེ། །ཕྱག་སྐོར་སྨོན་ལམ་གང་བཏབ་ཕན་ཡོན་ཆེ། །གནས་འདིར་ལྷག་པའི་ལྷ་རྣམས་སྒྲུབ་པ་དང་། །བསྐྱེད་རྫོགས་ཟབ་མོ་རྣམ་དཀར་དགེ་བ་བསྐྲུན། །མཆོག་ཐུན་དངོས་གྲུབ་ཚེ་འདིར་ཐོབ་པ་དང་། །མཁའ་སྤྱོད་རིག་འཛིན་གྲལ་དུ་འཁོད་པར་ངེས།།ཞེས་འགོ་རྒྱལ་དཔལ་འཛང་རྒོད་ཚང་དབང་ཕུག་ནམ་མཁའ་རྫོང་གི་གནས་བསྟོད་འདི་ཡང་༧རྡོ་རྗེ་དྲག་པོས་དབེན་གནས་དེ་ཉིད་དུ་བརྗོད་པའོ།། །།
བསམ་ཚུལ་འབྲི།
ལྡེམ་ཆེན་གྱི་གནས་ཡིག