འགུག་གླུ་རྣ་བའི་བདུད་རྩི།
འགུག་གླུ་རྣ་བའི་བདུད་རྩི།
༡ བཅོ་ལྔ་ཟླ་བ་འདྲ་བའི།།
གསལ་ཆ་ང་ལ་མེད་དེ།
ཚེས་གསུམ་ཟླ་བ་འདྲ་བའི།།
རང་ལུས་རང་གིས་གསལ་ཆོག །
༢ ལྕང་གླིང་ཕྱོགས་ཀྱི་འཇོལ་མོས།།
གསུང་སྙན་མི་རྒྱག་དགུ་རྒྱག །
གོ་བ་ཅན་གྱིས་མ་གཏོགས།།
ཅི་གསུངས་བཤད་ཐབས་དཀའ་བ།།
༣ ལྕང་མ་བྱིའུ་ཆུང་ངེད་གཉིས།།
ཆུང་ནས་མཉམ་སྐྱེས་ཡིན་གྲགས།།
ལྕང་མ་ཁོག་རུལ་ཨེ་ཡིན།།
ད་ལོ་མ་གཏོགས་མ་ཤེས།།
༤ཆང་གཅིག་འཐུང་བའི་མི་ལ།།
ཡོན་ཏན་མི་འདུག་མ་གསུངས།།
གཞས་དང་གླུ་ངག་ཚིག་གསུམ།།
ཡོན་ཏན་མིན་ན་གང་ཡིན།།
༥ཆུ་མོ་རྒྱུགས་སོང་མ་བསམ།།
ཟམ་པ་ལུས་ཐལ་མ་བསམ།།
ཆུ་མོ་གཡས་འཁོར་གཡོན་འཁོར།།
ཟམ་ཆུང་ཁྱོད་རྩར་འཁོར་ཡོང་།།
༦ཆུ་ཡིས་མར་འགྲོ་ཟེར་གྲགས།།
ཉ་ཡིས་ཡར་འགྲོ་ཟེར་གྲགས།།
ཆུ་མོ་ཉ་ཆུང་གཉིས་ཀ།།
བསམ་པ་མཐུན་རོགས་ཨེ་ཆོག །
༧ཆུ་མོས་མར་འགྲོ་ཟེར་ན།།
ཉ་ཆུང་ཡར་འགྲོ་མི་ཟེར།།
ཆུ་མོ་གར་འགྲོ་ས་ལ།།
ཉ་ཆུང་དེ་ལ་སླེབས་ཡོང་།།
༨ཆུ་འགོ་ཉ་ཡིས་བསྙོགས་བྱུང་།།
ཆུ་རྔ་སྲམ་གྱིས་བསྙོགས་བྱུང་།།
དྭངས་ན་དྭངས་ཐག་ཆོད་རོགས།།
བསྙོགས་ན་བསྙོགས་ཐག་ཆོད་རོགས།།
༩ཆུ་གཅིག་ཆེ་ན་ཆེ་ཆོག །
ཟམ་ཆུང་འཁུར་ན་འཁུར་ཆོག །
རྟ་ཕོ་རག་ཕྲུག་ངེད་གཉིས།།
ཆུ་འགོ་བསྐོར་ནས་འགྲོ་ཆོག །
༡༠ཆུ་མོ་མ་བསྙོགས་གོང་ནས།།
ཆུ་མོ་བསྙོགས་མིང་ཕོག་སོང་།།
གལ་སྲིད་བསྙོགས་དགོས་བྱུང་ན།།
དྭངས་རྒྱུ་མེད་པ་བསྙོགས་ཆོག །
༡༡ཆུ་མོ་མར་འགྲོ་སྐབས་ལ།།
ཟམ་པས་བྱམས་སྐྱོང་མཛད་རོགས།།
ཆུ་མོ་ཡར་འཁོར་བྱུང་ན།།
སྐུ་དྲིན་རིམ་གྱིས་གསབ་ཆོག །
༡༢ཆུང་འདྲིས་ང་གཉིས་ཐུག་ས།།
ཨོ་རོག་རྫོང་གི་ཡར་ནང་།།
བྱིའུ་ཆུང་འཇོལ་མོ་མ་གཏོགས།།
སུ་གཅིག་གང་གིས་མི་གོ །
༡༣ཆུང་འདྲིས་རྒྱ་གར་འགྲོ་ན།།
རྨ་བྱའི་སྒྲོ་གཅིག་ཁུར་ཤོག །
ང་རང་རྣམ་རྒྱལ་བུམ་པ།།
ཁ་རྒྱན་མེད་པར་བཞག་ཡོད།།
༡༤ཆུང་འདྲིས་འགྲོ་དགོས་ཟེར་དུས།།
མ་འགྲོ་ཟེར་རྒྱུ་མི་འདུག །
ཆུ་དང་ཟམ་པའི་ཐོག་ལ།།
སྐྱབས་འགྲོ་སྒྲོལ་མ་འདོན་རོགས།།
༡༥ཆུང་འདྲིས་ཡོད་ན་ལོས་སགའ།།
སྙིང་གཏམ་བཤད་ས་ཡོད་གྲགས།།
ཆུང་འདྲིས་མེད་ན་ཅི་སྡུག །
ཕྲག་དོག་མེད་ན་སྐྱིད་ཡིན།།
བསམ་ཚུལ་འབྲི།
མགུར་མོ་ཁག་ཅིག