སྡེ་དགེའི་རྒྱལ་རབས་མུ་ཏིག་ཕྲེང་བ། ༼དགུ་པ་༽
སྡེ་དགེའི་རྒྱལ་རབས་མུ་ཏིག་ཕྲེང་བ། ༼ཚན་པ་དགུ་པ་༽ མཛད་པ་པོ་བར་མ་མཁན་པོ་ངེས་དོན།
༈ ཞུ་ཆེན་ཚུལ་ཁྲིམས་རིན་ཆེན་ནི། མདོ་ཁམས་སྡེ་དགེ་འདན་མའི་ཡུལ། ས་སྐྱ་པ་འཇམ་དབྱངས་རིན་ཆེན་རྒྱལ་མཚན་གྱིས་རབ་བྱུང་བརྒྱད་པའི་ནང་ཕྱག་བཏབ་པའི་ས་དཀར་བསམ་གྲུབ་གླིང་ཞེས་པའི་དགོན་པའི་ཉེ་འདབས་སུ་རབ་བྱུང་བཅུ་གཉིས་པའི་མེ་གླང་ཕྱི་ལོ༡༦༩༧ལོར་སྐུ་འཁྲུངས། དགུང་ལོ་བདུན་པ་ནས་ཡི་གེ་འབྲི་ཀློག་བསླབ་པས་ཚེགས་མེད་དུ་མཁྱེན། དགུང་ལོ་བཅུ་གཅིག་པར་དྲུང་པ་ཀུན་དགའ་རྒྱ་མཚོ་ལས་ཚངས་སྤྱོད་དགེ་བསྙེན་གྱི་སྡོམ་པ་བཞེས་ཏེ། མཚན་ཀུན་དགའ་བསོད་ནམས་གསོལ། སློབ་དཔོན་མཁས་པ་དུ་མ་བསྟེན་ནས་བཟོ་དང་། གསོ་བ། སྒྲ། སྙན་ངག །སྡེབ་སྦྱོར་། རྩིས། མཚན་ཉིད་ཐེག་པ་སོགས་ཕྱི་ནང་གི་རིག་གནས་ཐམས་ཅད་ལ་ཆགས་ཐོགས་བྲལ་བའི་སྤོབས་པ་བརྙེས། ཁྱད་པར་གངས་ལྗོངས་སུ་སྙན་ངག་སྨྲ་བའི་དབང་པོར་ཡོངས་ལ་གྲགས། དགུང་ལོ་ཉེར་དགུ་པར་དབུས་གཙང་དུ་ཕེབས། ངོར་མཁན་ཆེན་ཚུལ་ཁྲིམས་ལྷུན་གྲུབ་ལས་ཚིགས་གསུམ་རིམ་ནོས་ཀྱིས་བསྙེན་པར་རྫོགས་པའི་སྡོམ་པ་བཞེས། མཚན་ཚུལ་ཁྲིམས་རིན་ཆེན་གསོལ། ངོར་དུ་ལོ་གསུམ་བཞུགས་ནས་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་ཚར་གསུམ་གསན་པས་མཚོན་སྔ་ཕྱིར་གོང་སྨོས་ཀྱི་མཁན་ཆེན་དམ་པ་དེ་དང་། མཁན་ཆེན་བྱམས་པ་བསོད་ནམས་བཟང་པོ། མཁན་ཆེན་བཀྲ་ཤིས་ལྷུན་གྲུབ་། རྨོར་ཆེན་ངག་དབང་ཀུན་དགའ་ལྷུན་གྲུབ། འཇམ་དགོན་གནས་གསར་བ་སོགས་དམ་པ་དུ་མ་ལས་ཆོས་ཕུང་རྒྱ་མཚོ་ལྟ་བུ་མཐའ་ཡས་པ་གསན། ཀྱེ་རྡོར། འཇིགས་བྱེད་སོགས་ལྷག་པའི་ལྷ་དུ་མའི་བསྙེན་སྒྲུབ་ཚད་དུ་བསྐྱལ་བས་ཉམས་རྟོགས་ཀྱི་པདྨ་བཞད། ས་སྐྱའི་བཀའ་འབུམ་དང་། བསྟན་འགྱུར་རིན་པོ་ཆེ་སྤར་དུ་བསྐྲུན་པའི་སྐབས་སུ་ཞུ་དག་གི་དབུར་བཞུགས་ནས། འཕགས་བོད་ཀྱི་བརྡ་དང་། ཐ་སྙད། གཞུང་ལུགས་ཀྱི་དགོངས་པ་འཁྲུལ་མེད་ཀྱི་ཞུ་དག་གི་བཀའ་དྲིན་བསྐྱངས་ཤིང་བསྟན་འགྱུར་དཀར་ཆག་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ཞེས་པ་ལྗགས་རྩོམ་མཛད། དེས་མཚོན་ནས་གསུང་རབ་ཀྱི་ཕྱི་མོ་མང་པོ་གསར་བཞེངས་ཀྱི་ཞུས་དག་མཛད་པས་ཞུ་ཆེན་པ་དང་ཞུ་དག་བླ་མ་ཞེས་མཚན་དུ་ཆགས། རྗོད་བྱེད་སྙན་ཅིང་བརྗོད་དོན་ཕུན་སུམ་ཚོགས་པའི་གསུང་རྩོམ་གྱི་རིགས་མང་དུ་མཛད་དེ། མདོར་ན་སྐུ་ཚེ་ཧྲིལ་པོར་ཆོས་སྤྱོད་ཀྱི་བྱ་བ་ཁོ་ནས་འདའ་བ་ཞིག་གོ། མཐར་དགུང་ལོ་བདུན་ཅུ་དོན་བརྒྱད་པ་ཤིང་རྟ་ཕྱི་ལོ་༡༧༧༤ལོར་རྡོ་རྗེ་འཆང་གི་བཞུགས་སྟངས་དང་བཅས་ཏེ་ཟག་མེད་དབྱིངས་སུ་བཞུགས་པའི་ཚུལ་བསྟན་ཏོ།། ༈ མཁན་ཆེན་ངག་དབང་བསམ་གཏན་བློ་གྲོས་ནི། མདོ་ཁམས་འབྲི་རྫ་ཟལ་མོ་སྒང་གི་ཐིག་ལེ་སྡེ་བཞི་དགེ་བཅུའི་འབྱོར་པས་གཏམས་པའི་རྒྱལ་ཁབ་ཆེན་པོ་ལྷུན་གྲུབ་སྟེང་ཞེས་བྱ་བ་འདི་ཉིད་དང་ཉེ་བའི་ཆབ་འབངས། ཟིལ་ལྷ་སྡེ་དཀར་པོའི་ནང་གསེས་དངུལ་ཕུ་ནང་དུ་ཡབ་འབེ་སྤོ་རུ་བྱམས་ཆོས་དང་། ཡུམ་བོ་ཆུང་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ས་འབྲུག་ཕྱི་ལོ་༡༨༦༨ལོར་སྐུ་འཁྲུངས། སྐུ་ཆུང་ངུ་ནས་བྱིས་པའི་སྤྱོད་པ་ལས་འདས་ཤིང་ཡ་རབས་ཀྱི་སྤྱོད་ཚུལ་ལ་གནས་པ། དད་པ་སྙིང་རྗེ་སོགས་དམ་པའི་རིགས་དང་ལྡན་པས་ཆོས་གྲྭ་ཆེན་པོ་ལྷུན་གྲུབ་སྟེང་གི་གྲྭ་སར་ཞུགས་ནས་དགུང་ལོ་བརྒྱད་པའི་དུས་ཀློག་སློབ་པ་ན་དཀའ་ཚེགས་མེད་པ་ཡིག་དཀར་ནག་ཐམས་ཅད་མཁྱེན། དགོན་པའི་ཚོགས་འདོན་སྐོར་རྣམས་ཚར་ཁ་ཤས་རེས་ཐུགས་སུ་ཆུད་པས་ཐམས་ཅད་ཀྱིས་བཙུན་ཆུང་འདི་སྔོན་སྦྱངས་ཅན་ཞིག་ཡིན་འདུག །འདི་འདྲའི་ཤེས་རབ་ཆེ་ལུགས་ལ་དཔག་ན་གཞན་ལས་ཁྱད་པར་དུ་འཕགས་པ་ཞིག་འབྱུང་བར་འདུག་ཅེས་གླེངས། སྔོ་གནའ་བླ་མ་དོན་གྲུབ་རྒྱལ་མཚན་ལས་ཆོ་གའི་ཕྱག་བཞེས། འདོན་རྟ་དབྱངས་འབུད་བརྡུང་དཀྲོལ་གསུམ། དཀྱིལ་འཁོར་བྲི་ཐིག་རྣམས་བསླབ་པས་མཁས་པའི་ཕུལ་དུ་ཕྱིན། དགུང་ལོ་ཉེར་གསུམ་པར་ངོར་ཨེཝཾ་ཆོས་ལྡན་དུ་གྲྭ་སར་ཕེབས། མཁན་ཆེན་ངག་དབང་བློ་གྲོས་སྙིང་པོ་ལས་ཚིགས་གསུམ་བར་མ་ཆད་པའི་བསྙེན་རྫོགས་ཀྱི་སྡོམ་པ་བཞེས། མཚན་ངག་དབང་བསམ་གཏན་བློ་གྲོས་གསོལ། གཞན་ཡང་རྗེ་དེ་ལས་ལམ་འབྲས་སོགས་སྨིན་གྲོལ་རྒྱ་ཆེར་གསན། སྔ་ཕྱིར་གསན་བསམ་མཛད་ཚུལ་ཡང་། གཞོན་ནུའི་དུས་འཇམ་དབྱངས་མཁྱེན་བརྩེའི་དབང་པོ་མཇལ་བར་ཕེབས་པས་རྗེ་དེས་ཐུགས་དགྱེས་པ་ཆེན་པོ་དང་བཅས་བསྟན་པ་ལ་ཕན་ཐོག་པའི་ལུང་བསྟན་དང་། ཚེ་དབང་། གང་བློ་མའི་རིག་གཏད་དང་ལུང་བསྩལ་ཞིང་བྱིན་རླབས་བཀའ་བསྒོ་དང་སྨོན་ལམ་རྒྱས་པར་མཛད་པས་རྟེན་འབྲེལ་ཤིན་ཏུ་དགེ་བར་གྱུར། ལྔ་རིག་སྨྲ་བའི་མཁས་དབང་ནུབ་བླ་མ་འཇམ་དབྱངས་མཁྱེན་རབ་མཐའ་ཡས་ལས་སུམ་རྟགས་དག་གསུམ་གྱི་བཤད་པ། ནག་རྩིས། དཀར་རྩིས། དགུ་མཐའ། སྒྲ་ཀཱལཔའི་མཚམས་སྦྱོར་མིང་ལེ་བཅས་པའི་རི་མོ། སྡོམ་གསུམ་འཇམ་དབྱངས་བླ་མའི་དགོངས་རྒྱན། ཚུལ་གསུམ་དང་ལྗོན་ཤིང་མཛེས་རྒྱན། དབུ་མ་འཇུག་པ་དང་རྒྱན། སྤྱོད་འཇུག་དང་རྒྱུད་བླ། བཤེས་སྤྲིང་སོགས་ཀྱི་བཤད་པ་ཞིབ་མོ་གསན་ཅིང་སློབ་གཉེར་གྱི་གཞི་ཐེངས་པར་མཛད། མི་ཕམ་འཇམ་པའི་དབྱངས་ལས་མདོ་སྡུད་པ་འགྲེལ་པ་ལུགས་གཉིས་ཀྱི་བཤད་ལུང་དང་། འབྱེད་རྣམ་གཉིས་ཀྱི་བཤད་པ། སྔོ་གནའ་དོན་རྒྱལ་ལས་དཀར་ནག་རྩིས་ཀྱི་ལག་ལེན། གོ་ལའི་རྣམ་བཞག་གསོ་དཔྱད་ཀྱི་སྐོར་ཕལ་ཆེར་དང་། འཚོ་བྱེད་ཞྭ་ཆེན་བླ་སྨན་པ་དང་། བློ་གྲོས་ཕུན་ཚོགས་གཉིས་ལས་རྩ་མདོ་ཆུ་མདོ་དང་། ལྡུམ་བུ་ངོ་སྤྲད། སྨན་གྱི་བསྡུ་སྦྱོར་སོགས་གསན་ནས་ལག་ལེན་ཡང་མཛད། མཁན་ཆེན་གཞན་ཕན་སྣང་བ་ལས་སྤྱོད་འཇུག་རིགས་ཚོགས་ལྔ། དབུ་མ་འཇུག་པའི་བཤད་པ་གསན། རྟོགས་ལྡན་ལྷག་བསམ་ལས་སུམ་རྟགས་བཤད་པ། སྡེབ་སྦྱོར་རིན་འབྱུང་། སྒྲ་ཀཱལཔའི་རི་མོ། མཁས་དབང་དབྱངས་ཅན་སྙེམས་པའི་ལང་ཚོ་ལས་དབྱངས་ཅན་སྒྲ་མདོ། སྙན་ངག་ལེའུ་བར་པ། སྤྱོད་འཇུག་ཤེར་ལེ་བཅས་ཀྱི་བཤད་པ་གསན། མཁས་དབང་ཨ་དཔལ་ལས་ཚུལ་ཁྲིམས་རྣམ་དག་མདོ་འགྲེལ། སྤྱོད་ཊཱིཀ། གང་བློ་མའི་འགྲེལ་པ་སོགས་གསན། བླ་མ་ཆོས་དབྱིངས་འོད་གསལ་ལས་ཚིག་བདུན་བླ་མའི་རྣལ་འབྱོར། ཚོགས་མཆོད། རྣམ་བཤད་པདྨདཀར་པོ། དབུ་མ་རྒྱན་གྱི་འགྲེལ་ཆེན། བསྟོད་ཚོགས་སྐོར་སོགས་གསན། ཕན་ཁང་མཁན་རིན་པོ་ཆེ་དཔལ་ལྡན་བློ་གྲོས་རྒྱལ་མཚན་ལས་འཇིགས་བྱེད་ལྷ་བཅུ་གསུམ་པའི་དབང་ལུང་ཁྲིད། དྲི་མེད་རྣམ་གཉིས་ཀྱི་དབང་ལུང་། སྒྲུབ་ཐབས་ཀུན་བཏུས་ཕལ་ཆེར་གསན། ཕན་བདེ་མཁན་ངག་དབང་ཀུན་དགའ་བསྟན་པའི་རྒྱལ་མཚན་ལས་འཇིགས་བྱེད་ལྷ་དགུ་མའི་དབང་ལུང་ཁྲིད་སོགས་གསན། འཇམ་མགོན་བློ་གྲོས་མཐའ་ཡས་ལས་སྨིན་གླིང་བདེ་གཤེགས་ཀུན་འདུས་ཀྱི་དབང་ལུང་། འབྲུག་ལུགས་གྲུབ་བརྒྱའི་བྱིན་རླབས། བླ་མ་ནོར་ལྷའི་དབང་ལུང་། ལྷ་མོ་དཔལ་གྱི་སྒོམ་ལུང་། འཇམ་དབྱངས་དང་། སྒྲོལ་དཀར་རྗེས་གནང་། གང་བློ་མའི་ལྗགས་ལུང་སོགས་གསན། ཁྱད་པར་རྒྱུད་སྡེ་རྒྱ་མཚོའི་གསང་བའི་མཛོད་འཛིན་འཇམ་དབྱངས་བློ་གཏེར་དབང་པོ་ལས་སྒྲུབ་ཐབས་རིན་པོ་ཆེ་ཀུན་ལས་བཏུས་པ་ཡོངས་རྫོགས་དང་། རྒྱུད་སྡེ་ཀུན་བཏུས་ལས་བྱ་སྤྱོད་སྐོར་ཕར་ཆེར་དང་། བདེ་མཆོག་སྐོར་ཡོངས་རྫོགས། དུས་འཁོར། ཀྱེ་རྡོར་སྐོར་སོགས་གསན་པ་དང་། རྗེ་དེ་ལས་མ་གསན་པ་རྣམས་རྗེ་དེའི་ཐུགས་སྲས་བེ་ཚང་ཆོས་རྗེ་མཁས་གྲུབ་རྒྱ་མཚོ་ལས་གསན་ཏེ་མདོར་ན་ཡབ་སྲས་དེ་གཉིས་ལས་རྒྱུད་སྡེ་ཀུན་བཏུས་ཀྱི་སྨིན་གྲོལ་ཡོངས་རྫོགས་གསན། གཞན་ཡང་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་སློབ་བཤད་ཀྱི་སྨིན་གྲོལ་ཡོངས་རྫོགས་དང་། ཀྱེ་རྡོར་རྒྱུད་གསུམ་གྱི་བཤད་པ། མགོན་པོ་བཀའ་བབས་བཞིའི་དབང་རྗེས་གནང་ཕྱི་གནང་གསང་བའི་ཁྲིད་དང་བཅས་པ། ནཱ་རོ་མཁའ་སྤྱོད་མའི་བྱིན་རླབས་ཁྲིད་བཅས། བློ་སྦྱོང་ལེགས་བཤད་ཀུན་བཏུས་དང་སྙན་བརྒྱུད་ཆེན་མོ་སོགས་བློ་སྦྱོང་སྐོར་མང་པོ། རྒྱལ་བའི་བཀའ་འགྱུར་རིན་པོ་ཆེ་དང་། ས་སྐྱ་འི་བཀའ་འབུམ། རྗེ་ཉིད་ཀྱི་གསུང་རབ་རྣམས་ཀྱི་ལུང་སོགས་ཟབ་ཆོས་རྒྱ་མཚོ་ལྟ་བུར་གསན་པས་རྩ་བའི་རིགས་བདག་ཏུ་བཟུང་། འཇམ་དབྱངས་ཆོས་ཀྱི་བློ་གྲོས་ལས་མཁའ་འགྲོ་གསང་འདུས་དབང་ལུང་ཁྲིད། གྲུབ་ཐོབ་ཐུགས་རིག་རྩ་དབང་། ཐུགས་སྒྲུབ་རྣམ་གཉིས་སོགས་དང་། ཐུབ་བསྟན་ལེགས་བཤད་བཟང་པོ་ལས་སྒྲུབ་ཐབས་རིན་འབྱུང་ཁ་སྐོང་དང་བཅས་པ་གསན། ཁང་གསར་ཞབས་དྲུང་བཀྲ་ཤིས་རྒྱ་མཚོ་ལས་ཆགས་མེད་རྣམ་བཞིའི་དབང་བྱིན་རླབས། དམར་པོ་སྐོར་གསུམ་གྱི་པོད། བཀའ་གདམས་གླེགས་བམ་གྱི་ལུང་སོགས་གསན། མཁན་ཆེན་བཀྲ་ཤིས་འོད་ཟེར་ལས་ཀར་ལུགས་བདེ་མཆོག་དབང་རྗེས་གནང་། ཕྱག་ལེན་ཁྲིད་སོགས་དང་། ཤར་ཆེན་འཇམ་དབྱངས་ཆོས་ཀྱི་ཉི་མ་ལས། ཚེ་དཔག་ལྷ་དགུའི་དབང་གསན། རྫོགས་སྤྲུལ་ལྔ་པ་ལས་དཀོན་སྤྱིའི་ཚེ་དབང་དང་། ཉི་གྲགས་ཐུགས་ཆེན། བདུད་རྩི་སྨན་གྱི་སྒྲུབ་དབང་། དགེ་མང་སྐུ་ཞབས་ལས་གཞན་ཕན་མཐའ་ཡས་ཀྱི་ཞལ་གདམས་གསུང་མགུར་སོགས་ཀྱི་ལུང་དང་། སེམས་ཁྲིད་རྣམས་གསན། ཀཿཐོག་སི་ཏུ་ལས་མཁྱེན་བརྩེ་དབང་པོའི་དགོངས་གཏེར་རྩ་གསུམ་འོད་གསལ་སྙིང་ཐིག །འཁོན་ལུགས་ཕུར་པ་ཇོ་ནང་ནས་བརྒྱུད་པའི་སྨིན་གྲོལ། བཀའ་མའི་སྒྱུ་འཕྲུལ་ཞི་ཁྲོ། ཐུགས་སྒྲུབ་བར་ཆད་ཀུན་སེལ་སོགས་གསན། ཞེ་ཆེན་རྒྱལ་ཚབ་འགྱུར་མེད་པདྨརྣམ་རྒྱལ་ལས་ཕུར་པ་ཡང་གསང་སྤུ་གྲིའི་དབང་ལུང་། ཐང་རྒྱལ་པའི་གཅོད་དབང་ཁྲིད་པོད་ལུང་། ཀར་གླིང་ཞི་ཁྲོའི་དབང་བར་དོ་དྲུག་ཁྲིད། ཡང་དག་ཕུར་པ། གྲུབ་ཐོབ་ཐུཊ་ཏིག་ཡང་ཕུར་སྒྲགས་མ་རྣམས་ཀྱ་ིདབང་སོགས་གསན། སྒ་ངག་དབང་ལེགས་པ་ལས་ས་འཇམ་སྦགས་སྒྲུབ་ཀྱ་ིབྱིན་རླབས། འཇམ་དབྱངས་བསྟན་འཕེལ་ལས་མཁའ་སྤྱོད་བྱིན་རླབས། ཡེ་ན་བླ་མ་སངས་རྒྱས་བསྟན་འཛིན་ལས་སྒྲུབ་ཐབས་ཀུན་བཏུས་པོད་དགུའི་ལུང་། དཀོན་ལྷུན་དང་ཞུ་ཆེན་བཀའ་འབུམ་གྱི་ལུང་སོགས་གསན། བླ་མ་དཀོན་མཆོག་རྒྱལ་མཚན་ལས་ངོར་ཆེན་བཀའ་འབུམ། རྒྱུད་སྡེ་ཀུན་བཏུས་ཀྱི་ལུང་ཡོངས་རྫོགས། ཤར་བླ་མ་ངག་དབང་བློ་གྲོས་ལས་གུར་མགོན་གཞུང་པོད་ཡོངས་རྫོགས། ཞལ་པོད་གཉིས། ལས་གཤིན་དང་བེཀྩེའི་པོད་བཅས་ཀྱི་ལུང་གསན། དཔལ་ལྡན་འཇམ་དབྱངས་ལས་ཞལ་གྱི་རྗེས་གནང་ཡོངས་རྫོགས་དང་ཁྲིད་པོད་ལུང་བཅས་དང་། ངོར་ལུགས་རྭ་པོད་ཀྱི་ལུང་། བླ་མ་ངག་དབང་བསྟན་པ་ལས་བདེ་མཆོག་མཁའ་འགྲོ་རྒྱ་མཚོའི་དབང་། མཁའ་སྤྱོད་བེའུ་བུམ་གྱི་ལུང་། འབྲུ་འཇམ་དབྱངས་གྲགས་པ་ལས་ཇོ་ལུགས་དུས་འཁོར་གྱི་ཁྲིད་ལུང་། མི་ཕམ་འགྲེལ་ཆེན་གྱི་བཤད་ལུང་། ལམ་རིམ་ཡེ་ཤེས་སྙིང་པོའི་ལུང་སོགས་གསན། མཁས་བཙུན་བླ་མ་འཇམ་དབྱངས་རྒྱལ་མཚན་ལས་དབུ་མ་བཞི་བརྒྱ་པ། རྒྱུད་སྡེ་སྤྱི་རྣམ། མངོན་རྟོགས་ལྗོན་ཤིང་སོགས་གསན་ཏེ་མདོར་ན་རིས་སུ་མ་ཆད་པའི་ཡོངས་འཛིན་དུ་མ་བསྟེན་ནས་མང་དུ་ཐོས་པའི་མཐར་སོན་པར་མཛད། དེ་དག་ཀྱང་ཐོས་པ་ཙམ་མ་ཡིན་པར་བསམ་བྱུང་རིག་པས་སྒྲོ་འདོགས་ལེགས་པར་བཅད་དེ་ཕྱི་ནང་རིག་གནས་དང་བཅས་པ་སྤྱི་དང་བྱེ་བྲག་རང་ལུགས་རྗེ་བཙུན་གོང་མའི་གསུང་རབ་འཁྲུལ་པའི་དྲི་མ་ཐམས་ཅད་དང་བྲལ་བ་ལ་དབྲོག་ཏུ་མེད་པའི་ངེས་ཤེས་བརྙེས། ཐོས་བསམ་གྱིས་གཏན་ལ་ཕབས་པའི་དོན་བསྒོམ་པས་ཉམས་སུ་བླངས་ཏེ་བསྒོམས་བྱུང་གི་ཡེ་ཤེས་མངོན་དུ་གྱུར། བསྙེན་སྒྲུབ་མཛད་པའང་འབྱུང་འདུལ། ཀྱེ་རྡོར་བསྙེན་ཆེན། ཀུན་རིག །རིགས་གསུམ་སྤྱི། རྣམ་སྣང་མངོན་བྱང་། རྡོར་དབྱིངས། གསང་བདེ། རྣལ་འབྱོར་མ། དུས་འཁོར་། ཕུར་པ། མི་འཁྲུགས། ཚེ་དཔག་ལྷ་དགུ། སྒྲོལ་མ་དཀར་དམར། རྣམ་རྒྱལ་འཇོམས། རྟ་མགྲིན། འཇམ་དཀར། དབྱངས་ཅན་མ། རིགས་བྱེད་མ། ཐང་རྒྱལ་ཚེ་སྒྲུབ། གྲུབ་རྒྱལ་ཚེ་སྒྲུབ། མགོན་པོ་ཆེ་ཆུང་། དཀོན་མཆོག་སྤྱི་འདུས་བསྙེན་སྒྲུབ་ལས་གསུམ་ཚད་ལྡན། འཆི་མེད་འཕགས་མའི་སྙིང་ཐིག་གི་བསྙེན་སྒྲུབ་གནང་བས་མཚོན་གསར་རྙིང་གི་ལྷག་པའི་ལྷ་མང་པོའི་བསྙེན་པ་དང་། ཁྱད་པར་དུ་དཔལ་རྡོ་རྗེ་འཇིགས་བྱེད་ངོར་ཚར་གྱི་བཀའ་སྲོལ་སོ་སོའི་བསྙེན་ཆེན་རྒྱས་པ་གནང་སྟེ་རྒྱུན་དུ་ཐུགས་དམ་གྱི་སྙིང་པོར་མཛད། ལྷག་པའི་ལྷ་འདི་དང་མགོན་པོ་གཉིས་ལས་མཐུ་སྟོབས་ནུས་པའི་དབང་ཕྱུག་ཏུ་གྱུར། དངོས་གྲུབ་ཀྱི་མཚན་མ་བརྙེས་པའང་། ངོར་དུ་རྒྱུ་དབང་གསན་སྐབས་ཡེ་ཤེས་ཀྱི་ཉམས་མྱོང་སྐྱེས་ཤིང་། དེས་མཚོན་ལམ་འབྲས་ཀྱི་དབང་བྱིན་རླབས་ཐམས་ཅད་ལ་བྱིན་རླབས་ཀྱི་བབ་རེ་བྱུང་གསུངས་པ་དང་། ངོར་ཆེན་གྱི་འདྲ་སྐུ་མདུན་གསོལ་བཏབ་མཛད་པས་ཚེ་རབས་ཐམས་ཅད་དུ་ཐུགས་རྗེས་འཛིན་པའི་མཚན་མ་རྙེད་པ་དང་། དབང་ཁང་སྦུག་གི་མགོན་པོ་རླུང་ཞོན་མ་ཡེ་ཤེས་པ་དངོས་སུ་མཐོང་བ་དང་། ངོར་གྱི་གླིང་གསེབ་ཏུ་མི་རྒན་སྨ་ར་སེར་འཁྱུག་གེ་བ་ཞིག་མཐོང་བས་ཞལ་བཞི་པ་ཡིན་འདྲ་གསུངས། ས་སྐྱར་རྗེ་བཙུན་མ་རྟ་མགྲིན་དབང་མོ་མཇལ་བས་ཞལ་རས་དམར་ལ་སྤྱན་གསུམ་ཧྲིག་གེར་གཡོ་བ་མཇལ་བ་དང་། དགོན་ཆེན་ཉིད་དུ་ཀྱེ་རྡོར་གཞི་བསྙེན་སྐབས་ཐུན་བཅད་བཞིན་པའི་ཚེ་གཟིམས་སྒོ་ཕྱེ་བྱུང་བ་མི་ནག་པོ་མིའུ་ཐུང་ཨང་རག་གྱོན་པ་ཞིག་བྱུང་ནས་ཁྱོད་ཀྱི་མཐུན་རྐྱེན་ངས་སྒྲུབ། བར་ཆད་ཀྱང་ངས་སེལ་ཞེས་སྨྲས་ནས་ཡལ་བ་དང་། མགོན་པོའི་གསང་སྒྲུབ་བསྙེན་སྐབས་གུར་མགོན་སྐུ་ཁྲུ་གང་ཙམ་པ་མཇལ། གསོལ་བ་བཏབ་པས་སྐུ་དེ་མེ་འབར་བ་དང་བཅས་པའི་ཧཱུྂ་མཐིང་ནག་ཏུ་གྱུར་ནས་རང་ལ་ཐིམ་པས་བསྐྱེད་རིམ་ཤིན་ཏུ་བརྟན་ཅིང་ཐུན་གྲོལ་སྐབས་བསྡུ་མི་ནུས་པ་ལྟ་བུར་གྱུར་པ་དང་། རྗེ་བཙུན་གྲགས་པའི་སྐུ་བསྟོད་ཆོས་རྣམས་མ་འབུམ་ཐེར་ལྔ་བསགས་སྐབས་དངོས་ཉམས་རྨི་ལམ་དུ་ཞལ་མཐོང་གསུང་གི་དབུགས་དབྱུང་ཐོབ་པ་དང་། བློ་གཏེར་རྡོ་རྗེ་འཆང་དགོན་ཆེན་དབྱར་གནས་ལྷ་ཁང་དུ་བཞུགས་སྐབས་སྐུ་བཅར་ཞུས་པས་བླ་མ་གསང་བདག་ཕྱག་ན་རྡོ་རྗེ་དངོས་སུ་མཇལ་བ་དང་། ཚར་འཇིགས་བསྙེན་སྐབས་འཇིགས་བྱེད་ཀྱི་ཞལ་གཟིགས་པ་དང་། རྒྱ་མིའི་འཁྲུཊ་འཛིངས་སྐབས་དྲུག་ཅུ་ཉིན་བཅུ་བཞིར་གནང་བས་ཟོར་གཏོར་ལས་མེ་འབར་བ་མངོན་སུམ་དུ་བྱུང་བ་དང་། ཡང་སྐབས་དེར་མི་བསྲུན་པ་འགའ་ཞིག་གིས་བསྟན་དགོན་ལ་འཚེ་བ་ཐང་རྒྱལ་ལྷ་ཁང་དུ་བསྐང་གསོ་དང་དྲག་བསྐུལ་མཛད་པས་ལྷ་ཁང་གི་ལྡེབ་བྲིས་མགོན་པོའི་ཞལ་དང་ཐོད་པ་ལས་ཁྲག་གི་ཞམ་ཆུ་འབེབས་ཏེ་ཕ་རོལ་པོ་ལྔ་ལམ་དུ་གྱུར་པ་དང་། ལྕགས་རའི་མགོན་ཁང་དུ་བཤགས་པ་ཕྲིན་བཅོལ་མཛད་དེ་ཕྱག་གིས་ནས་བཤར་རྒྱབ་པས་མགོན་སྐུ་ལས་མེ་སྟག་འཕྲོ་བ་ཀུན་གྱིས་མཐོང་བ་དང་། སྡེ་དགེའི་སྲས་ཀྱིས་མགོན་ཁང་གསར་བཞེངས་སྐབས། ལྷ་མོའི་ལྕགས་སྙིང་སྒྲུབ་སྐབས་དེ་སྟེང་བྱ་ནག་བབ་པར་ཀུན་གྱིས་མཐོང་། བྱ་ནག་རབ་གསལ་ནས་ཕྱིར་འཕུར་ལྕགས་སྙིང་ལ་དྲོད་ཆེན་པོ་འབར་བ་དེ་འཕྲལ་ནང་རྟེན་དུ་བཞུགས། སྡེ་སྲས་ཨ་ཇ་གཉན་ལྡང་ལྷ་གསོལ་བྱོན་སྐབས་རྗེ་འདི་གདན་འདྲེན་ཞུས་པར་ལམ་བར་དུ་ཆིབས་འབྲོག་བྱུང་བས་སྐུ་ས་ལ་མ་ལྷུང་བར་རྫུ་འཕྲུལ་གྱིས་བསྐྱོད་དེ་ཕ་བོང་ཞིག་གི་སྟེང་དུ་བྱ་བབ་པ་ལྟར་བཞུགས་པ་དང་། གཉེན་ལྡང་དབུ་རྩེ་ལ་ལྕགས་ཀྱི་རྡོ་རྗེ་རྩེ་དགུ་པ་ཞིག་བཞེས་པ་ཕྱིས་དཔལ་མཆོག་མཆོད་རྟེན་དུ་བཞུགས་པ་དང་། གཙུག་ལག་ཁང་བསམ་གྲུབ་མཐོང་གྲོལ་ཆེན་མོའི་ངོར་ཆེན་འདྲ་སྐུ་ནམ་མཇལ་དུས་ཕལ་ཆེར་སྤྱན་གསུམ་ཁྲོ་འཛུམ་ཅན་སོགས་མཐོང་ཚུལ་མི་འདྲ་བ་བྱུང་བ་དང་། འཇིགས་བྱེད་ལྷ་ཁང་དུ་འཇམ་དཔལ་ཁྲོ་བོའི་ལས་སྦྱོར་སྐབས་གཏོར་མ་དང་ལིངྒ་ལས་ཁྲག་གི་ཞམ་ཆུའི་རྒྱུན་ཆེན་པོ་བབ་པ་དང་། ལས་གཏད་ཀྱི་གཏོར་མ་ཕྱག་གིས་བསྐུར་མ་དགོས་པར་དགྲ་ཡུལ་དུ་ཐེགས་པ་དང་། དྲྭ་སྒང་སྒྲུབ་སྡེར་གཏོར་སྒྲུབས་སྐབས་མགོན་པོའི་གཏོར་མ་ལས་རླངས་པ་འཕྱུར་ཞིང་གཏོར་མ་སྣོད་དང་བཅས་པར་ལྕགས་བསྲེག་ལྟ་བུའི་དྲོད་འབར་ཞིང་རེག་ཏུ་མི་བཟོད་པ་ཉིན་མང་པོ་གནས་པ་བྱུང་བ་དང་། ཞལ་གྱི་བསྐང་བ་རྒྱས་རེས་ཉིན་དེ་རིང་རྒས་པོ་ཕེབས་ཡོད་པ་འདུག་གསུངས་པ་དང་། གྲུབ་ཆེན་ཐང་སྟོང་རྒྱལ་པོའི་ཞལ་ལན་གཉིས་ཙམ་བསྟན་ནས་བྱིན་གྱིས་བརླབས་པ་དང་། ལྷུན་གྲུབ་ཡང་རྩེར་བཞུགས་སྐབས་རྗེ་བཙུན་ས་སྐྱ་པ་དཀར་པོ་རྣམ་གསུམ་མཇལ་བ་དང་། དངུལ་སྲིབ་ཕྱོགས་ཀྱི་སྤངས་ལྗོངས་ལ་སྐྱོ་བསངས་སྐབས་མནལ་ལམ་དུ་རྗེ་བླ་མ་བློ་གཏེར་རྡོ་རྗེ་འཆང་སྐུ་ཚད་རི་དིལ་ཙམ་པ་དང་། གཡས་སུ་ཡོངས་འཛིན་དཔལ་ལྡན་ཆོས་ཀྱི་རྒྱལ་མཚན། གཡོན་དུ་དཔོན་སློབ་ངག་དབང་ལེགས་གྲུབ་དང་བཅས་པ་མཇལ་གསུང་ངག་རྒྱུད་གསུམ་གྱི་ཁྲིད་གནང་། སེམས་ལ་སྔར་མ་གོ་བའི་ངེས་ཤེས་སྐྱེས་པ་དང་མནལ་སད། ནག་ཕྱོགས་འཚུབ་འགྱུར་ལྡང་སྐབས་རྗེ་བཙུན་རིགས་བྱེད་མའི་ཏིང་འཛིན་གྱིས་རྒྱ་མིའི་དཔོན་ཆེན་ཁ་ཤས་ཀྱི་ཡིད་དབང་མེད་དུ་འཕྲོག་ནས་གུས་ཤིང་འདུད་པ་བྱས། རྒྱ་ཡི་དམག་མི་གཅིག་གིས་ཁྱོད་ཀྱི་ལུས་ལ་མེ་འབར་འདུག་ཅེས་རྒྱ་སྐད་ཀྱིས་ཟེར་ནས་གུས་པས་བཏུད་པ་བྱུང་། མདའ་དཔོན་བཀྲས་མཐོང་བའི་ཞབས་རིམ་དབང་གི་སྦྱིན་སྲེག་སྐབས་མེ་རང་འབར་དུ་གྱུར་པ་དང་། དངུལ་ཕུ་ནང་དུ་སྨན་ལུམ་མཛད་སྐབས་ཆབས་བསིལ་ཕེབས་པར་ཤར་ཕྱོགས་ནས་བྱ་གོ་བོ་ཞིག་འཕུར་བྱུང་བ། དབུ་ཀླད་ཙམ་དུ་སླེབས་པ་དང་སྡིགས་མཛུབ་མཛད། ཕཊ་དྲག་པོ་གསུང་བ་དང་ཐང་ལ་ལྷུང་། ཕྱི་ཉིན་ནང་མོ་གོ་བོ་ཤི་ཚར་འདུག་ཞུས་པས། དམ་སྲི་གདུག་པ་ཅན་རྣམས་བྱ་ཁྱི་ལ་རྫུས་པ་རེད། ཁ་སང་ངས་ལས་ཤིན་ཏུ་སྡུག་པོ་རེད་སོང་གཞན་སུ་ལ་མ་སྨྲ་བཀའ་ཆད་འོང་གསུངས། སྐུ་སེ་གྱེ་རང་གཞུང་ནས་བྱོན་སྐབས་ཆུ་བྲག་འཐབ་པའི་སྒྲ་ཐམས་ཅད་ཧ་ཱུྂདང་ཧྲཱིཿདྷ༄༅ིའི་སྒྲ་གྲགས་པར་ཐོས་པས་གཤིན་རྗེ་གཤེད་ཀྱི་གནས་ཁྱད་པར་ཅན་ཞིག་ཡིན་འདུག་གསུངས། དགོན་ཆེན་དུ་འདུ་བའི་དབུ་བཞུགས་སྐབས་ལན་གཅིག་སྣང་བ་ཐམས་ཅད་དབྱིངས་སུ་ཐིམ་པའི་སྟོང་ཆེན་གྱི་ཉམས་ཤར་བ་དང་། ཉམས་ཀྱི་སྣང་བར་གྲུབ་ཆེན་བིརཱུ་པ་མཇལ་ཏེ་དགྱེས་རྡོར་རྩ་རྒྱུད་ལམ་འབྲས་རྡོ་རྗེའི་ཚིག་རྐང་། དེའི་མན་ངག་དམར་ཁྲིད་སོགས་བོད་དུ་གྲགས་མ་གྲགས་ཀྱི་ཟབ་ཆོས་མང་དུ་གསན་པ་དང་། ཡང་གསལ་སྣང་ལ་ནམ་མཁའ་ལ་བྱ་ལྟར་འཕུར་ནས་བྱོན་པས་བྱང་ཤམྦྷར་ཕེབས་དཔལ་དུས་ཀྱི་འཁོར་ལོའི་དཀྱིལ་འཁོར་རྟེན་དང་བརྟེན་པར་བཅས་མཇལ་ཏེ་དབང་དང་བྱིན་རླབས་བཞེས་པ་དང་། ནུབ་གཅིག་ཐོ་རངས་ཁར་བླ་མ་ངོར་ཆེན་མཇལ་གསོལ་བ་བཏབ་པས་ངོར་ཆེན་ཉིད་དགྱེས་རྡོར་ཡབ་ཡུམ་དུ་གྱུར། དབང་གི་ལྷ་རྣམས་ནམ་མཁར་འདུས་ཏེ་དབང་བཞི་གཅིག་ཆར་དུ་བསྐུར་བས་ཏིང་ངེ་འཛིན་གྱི་ངང་དུ་འབྱམས་ཀླས་པ་དང་། ཡང་བྱང་ཕྱོགས་ལྕང་ལོ་ཅན་དུ་ཕེབས་དཔལ་ཕྱག་ན་རྡོ་རྗེ་ཤིན་ཏུ་ཁྲོས་པའི་གཟུགས་ཅན་མཇལ་མཐར་ཐུགས་ཡིད་དབྱེར་མེད་དུ་འདྲེས་པའི་ཉམས་བྱུང་བ་དང་། ཡང་ཉམས་སྣང་ལ་མཁའ་འགྲོ་སྡེ་བཞི་དང་བཅས་ཨོ་རྒྱན་གྱི་ཡུལ་དུ་བྱོན། ཨོ་རྒྱན་ཆེན་པོ་འཁོར་དང་བཅས་པ་མཇལ་ནས་བྱིན་རླབས་ལུང་བསྟན་མང་དུ་ཐོབ་པ་སོགས་ཐ་མལ་པའི་བློ་ཡུལ་ལས་འདས་པའི་རྣམ་ཐར་བསམ་གྱིས་མི་ཁྱབ་པ་ཞིག་མངའ། གཞན་ལ་ཆོས་འཆད་པའི་རྣམ་གྲངས་ཀྱང་། རྒྱལ་བཀའ་རིན་པོ་ཆེའི་བཀླག་ལུང་ཚར་གསུམ་དང་། རྫོང་སར་འཇམ་དབྱངས་ཆོས་ཀྱི་བློ་གྲོས་སོགས་འདུས་ཚོཊ་ལ་སྒྲུབ་ཐབས་ཀུན་བཏུས་ཤིན་ཏུ་རྒྱས་པ་དང་། མཁའ་སྤྱོད་བྱིན་རླབས། དམར་པོ་སྐོར་གསུམ་གྱི་རྗེས་གནང་ཐུན་མིན། མཁའ་སྤྱོད་བེའུ་བུམ་ལུང་། དམར་པོ་སྐོར་གསུམ་པོད། ཀྱེ་རྡོར་ལམ་དབང་སོགས་གསུངས། ལྷུན་གྲུབ་སྟེང་དུ་སྒྲུབ་ཐབས་ཀུན་བཏུས་སོགས་སྔ་ཕྱིར་ཆོས་མཐའ་ཡས་པ་གསུངས། ཡེ་ན་དགོན་དང་གསེར་ལྗོངས་དགོན་དུ་ཕེབས་ནས་ངོར་དཀྱིལ་བདུན། མཁའ་སྤྱོད་སོགས་དབང་ཆེས་མང་དུ་བསྩལ། ཐར་རྩེ་མཁན་པོ་སོགས་ལ་མགོན་པོ་བཀའ་བབས་བཞིའི་དབང་རྗེས༼གནང་༽། བྲག་རྫོང་ཕྱི་ཁྲིད། ཞལ་གྱི་རྗེས་གནང་དང་། གསང་ཁྲིད། ཞལ་པོད་བཅས་དང་། དྲྭ་མ་སྒང་དུ་འཇམ་རྒྱལ་རིན་པོ་ཆེ། སྡེ་གཞུང་མཆོག་སྤྲུལ་སོགས་ལ་ས་སྐྱ་བཀའ་འབུམ་ལུང་། ཚར་འཇིགས་དབང་ཁྲིད་རྭ་པོད་བཅས་གནང་། བྲག་ར་རིན་པོ་ཆེ་སོགས་ལ་ས་སྐྱ་བཀའ་འབུམ་ལུང་གསུངས། ཡེ་ན་དགེ་སློང་ཤེས་རབ་ཕུན་ཚོགས་སོགས་ལ་ཚར་འཇིགས་དབང་ཁྲིད་རྒྱས་པ། རྗེ་ཉིད་ཀྱི་གསུང་རྩོམ་ཕལ་ཆེར་གྱི་ལུང་གནང་། རབ་བརྟན་མཁན་པོ་སོགས་ལ་ཀྱེ་རྡོར་རྒྱུད་བཤད་རྒྱས་པ་བསྩལ། རྗེ་སི་ཏུ་པས་ཀཿཐོག་ཏུ་གདན་དྲངས་ཏེ་སྒྲུབ་བཏུས་སྔར་མཁྱེན་བརྩེའི་མདུན་ནས་མ་གསན་པའི་ཁ་སྐོང་སྐོར་དང་། ཀྱེ་རྡོར་རྒྱུད་བཤད་གསན། ཞེ་ཆེན་རྒྱལ་ཚབ་འགྱུར་མེད་པདྨརྣམ་རྒྱལ་ལ་ཀླུ་དབང་རྒྱལ་པོའི་རྗེས་གནང་ལུང་། ཉེ་སྲས་བརྒྱད་ཀྱི་སྒོམ་ལུང་། ས་འཇམ་སྦགས་སྒྲུབ། ཐོགས་མེད་བཀའ་འབུམ་གྱི་ལུང་རྣམས་བསྩལ། དཔལ་སྤུངས་སུ་སྐུ་ཞབས་སི་ཏུ་རིན་པོ་ཆེས་སྔ་རྗེས་གཉིས་སུ་གདན་དྲངས་པའི་ཚེ། ཚེ་དབང་དང་ཞབས་བརྟན་གསུང་སྒྲུབ་དང་། ལན་རྗེས་མའི་སྐབས་རྟེན་དང་བརྟེན་པ་གསར་བཞེངས་ལ་རབ་གནས་ཤིན་ཏུ་རྒྱས་པ་མཛད། དྲྭ་སྒང་མཚམས་གྲྭ་སྒྲུབ་ཐེངས་གཉིས་ཀྱི་རིང་དབང་ལུང་མན་ངག་ཕྱག་བཞེས་རྣམས་གནང་ཞིང་སྒྲུབ་མཆོད་སོགས་ཀྱི་ཚོགས་དབུར་ཕེབས་པས་སྒྲིག་ལམ་ཚགས་སུ་ཚུད་པ་དང་། ལྕགས་ར་འཇིགས་བྱེད་སྒྲུབ་གྲྭ་ལའང་དེ་བཞིན་གནང་བས་སྒྲུབ་གྲྭ་འདི་གཉིས་ལ་བཀའ་དྲིན་ཤིན་ཏུ་ཆེ། དེ་ལྟར་སྨིན་གྲོལ་གྱི་ཆོས་འཁོར་བར་མེད་དུ་བསྐོར་བས་གསུང་ལས་སྐྱེས་པའི་སློབ་མའང་། བྲག་ར་བླ་མ་བཀྲ་ཤིས་རྒྱ་མཚོ། ཐར་རྩེ་མཁན་པོ་རྣམ་གཉིས། ཁང་སར་མཁན་པོ་དོན་དཔལ། སྒ་ངག་དབང་ལེགས་པ་ལ་མགོན་པོད་སོགས་གནང་། འཇམ་དབྱངས་ཆོས་ཀྱི་བློ་གྲོས། སྡེ་གཞུང་མཆོག་སྤྲུལ། ཨ་མདོ་དྷ༄༅ིཿ་ཕུ་སྤྲུལ་སྐུ་རྣམ་གཉིས། སི་ཏུ་གོང་འོག་གཉིས། འཇམ་རྒྱལ་རིན་པོ་ཆེ། ཞེ་ཆེན་རྒྱལ་ཚབ། ཀཿཐོག་རྨོག་ཚ། རྒྱ་གར་ནུབ་༼བྱང༽ཕྱོགས་པ་བསྟན་འཛིན་རྒྱ་མཚོ། ཨ་མདོ་དགེ་བཤེས་ཆེན་པོ་འཇམ་དཔལ་རོལ་པའི་བློ་གྲོས། ཟུར་མང་མཁས་གྲུབ་པདྨརྣམ་རྒྱལ། ས་ཕུར་གྱང་གསུམ་གྱི་ཆོས་རྗེ། རྒྱལ་མཚན་བླ་མ། ཤར་ནུབ་དབྱར་མཁན་གྱི་ཆོས་རྗེ་སྔ་ཕྱིར་བྱོན་པ་རྣམས་དང་། བླ་མ་རིན་པོ་ཆེ་ངག་དབང་ཆོས་འཕེལ་བཟང་པོ་སོགས་གསར་རྙིང་གི་སྤྲུལ་སྐུ། མཁན་པོ། ཆོས་རྗེ་སློབ་དཔོན་སོགས་གྲངས་མེད་པ་དང་། སྡེ་དགེ་ས་སྐྱོང་ཡབ་སྲས། གཞུང་གི་སྐུ་དྲག་ཁྱུང་རམ། །བཀྲས་མཐོང་། ཐང་དཔོན་སོགས་སྔ་རྗེས་ཕེབས་པ་རྣམས་ལའང་དབང་ཆོས་བྱད་གྲོལ་སོགས་ཀྱིས་ཐུགས་བཞེད་སྐོང་བས་མཚོན་འཁོར་ཚད་མེད་པའི་རེ་བ་རྫོགས་པར་མཛད་དོ། ཚིག་དོན་ཤིན་ཏུ་ལེགས་པའི་གསུང་རྩོམ་གྱི་སྐོར་དཀོན་མཆོག་རྗེས་དྲན་གྱི་མདོ་འགྲེལ་པད་དཀར་ཕྲེང་མཛེས། འཇམ་དཔལ་སོགས་ཀྱི་རྟོགས་བརྗོད་སྒོ་བཞི་པ། སྤྱོད་འཇུག་ཤེར་འགྲེལ་ཚིག་བཅད་ཅན། གཏོར་མའི་དོན་འགྲེལ། འཇམ་དབྱངས་བློ་གཏེར་དབང་པོའི་རྣམ་ཐར་སོགས་ཆོས་ཚན་མང་དུ་བཞུགས། བྱ་བ་ལས་ཀྱི་འཁོར་ལོའང་སྡེ་དགེ་ཆོས་རྒྱལ་བོད་ཕྱོགས་བྱོན་ཤུལ་དངུལ་གདུང་བླ་མ་ཟླ་བ་བཅོ་བརྒྱད་མཛད་ནས་ཞབས་བརྟན་སྒྲུབ་པ་དང་། དགོན་ཆེན་དུ་དབྱར་གནས་མཁན་པོ་ལོ་བཅོ་བརྒྱད་ཀྱི་བར་དུ་མཛད་ནས་འདུལ་བའི་ཕྱག་བཞེས་ཞིབ་ཐེར་དང་། དབྱར་གནས་དགེ་འདུན་གྱི་སྒྲིག་ལམ་ཤིན་ཏུ་དམ་པ་དང་། གསུང་ཆོག་རིགས་ཀྱང་སྦྱིན་བདག་གི་ཚོགས་རྫོགས་ངེས་མཛད་ཅིང་དབྱར་གནས་ཀྱི་དེབ་ཡིག་གསར་བཀོད་དང་གཏན་བཞག་སོགས་རྒྱ་ཆེར་མཛད། རྒྱ་ཟིང་གི་འཚུབས་ཆེ་སྐབས་ཀྱང་ཆོས་སྡེ་འདི་ཉིད་ཀྱི་སྲོག་ཤིང་མཁན་ཆེན་འདི་ཉིད་ཀྱིས་བཟུང་སྟེ་དགེ་འདུན་རྣམས་ལ་མོ་བཅའ་ཆང་ཁྲིམས་སྡོམ་པས་རྒྱུད་ཆུད་མ་ཟོས་པ་དང་། དགོན་པའི་བཅའ་སྒྲིག་མ་ཉམས་ཤིང་ཚེས་དུས་སྒྲུབ་མཆོད་མ་ཆག་པ་དང་། བླ་མ་ལྷ་སྲུང་གི་ཐུགས་དམ་རྒྱུད་བསྐུལ་ལ་བརྩོན་པས་འཚུབ་འགྱུར་ཞི་ཞིང་སྡེ་དགེའི་ཆབ་སྲིད་རང་འཇགས་དང་། བསྟན་དགོན་ཡང་སྔར་ལས་ཇེ་རྒྱས་སུ་བྱུང་བ་དང་། དགོན་འདིར་ལོངས་སྤྱོད་འཕེལ་བ་བླ་མ་རིན་འབྱུང་གི་བྱིན་རླབས་ཡིན་པའི་རྨི་ལམ་བྱུང་གསུང་ནས་དབྱར་གནས་སྐབས་བླ་མ་རིན་འབྱུང་མཆོད་ཆོག་འཛུགས་པར་མཛད། རྒྱ་ཟིང་སྐབས་འདུ་བ་ཆེན་པོའི་དབུར་བཞུགས་ལོ་བསྟར་མཛད་པ་དང་། ཕྱིས་སུའང་ལན་གཉིས་ཙམ་མཛད། ས་དཀར་དགོན་དང་ལྕགས་ར་དགོན་སོགས་ལའང་དབྱར་གནས་ཀྱི་མཁན་པོ་མཛད་ཅིང་ཕྱག་བཞེས་ཞིབ་བཅའ་འཁྲིད་པ་དང་། དྲྭ་སྒང་ཡར་མན། འཇིགས་བྱེད་སྒྲུབ་གྲྭ་སོགས་ལའང་བསྟན་པའི་གཞི་རྩ་ཐེངས་པའི་མཐུན་རྐྱེན་རྒྱ་ཆེར་གནང་བ་དང་། སྡེ་སྲས་བ་བའི་མགོན་ཁང་གསར་བཞེངས་ལ་ཕྱི་ནང་གསང་བའི་རྟེན་རྣམས་ཕྱག་བཞེས་དང་། ཐོག་མཐའ་བར་གྱི་འགན་བཞེས་རབ་གནས་དཀར་ཆག་བཅས་མཛད་པ་དང་། རྡོ་ཁོ་མའི་རྣམ་རྒྱལ་མཆོད་རྟེན་ལའང་ཞབས་འདེབས་རྒྱ་ཆེར་གནང་ཞིང་རྟེན་རྩ་ཆེན་སྣ་མང་འཇོག་པར་མཛད། དཔལ་མཆོག་རིགས་ལྔ་མཆོད་རྟེན་ཉམས་གསོ་སོགས་དགོན་འདིའི་ལྷ་ཁང་རྣམས་ལ་ཉམས་གསོ་རྗེ་ཉིད་དང་གཞན་ལ་བསྐུལ་བས་མཛད་པ་དང་། སྐུ་གསུང་ཐུགས་རྟེན་བཞེངས་པ་དང་། དེ་དག་ལ་མཆོད་འབུལ། དགེ་འདུན་ལ་ཕྱག་འགྱེད་བསྙེན་བཀུར་ཚད་མེད་པ་མཛད་དེ་མདོར་ན་འབུལ་ནོད་བྱུང་བ་ཐམས་ཅད་ཆུད་ཟོས་སུ་མི་འགྲོ་བར་བསྟན་འགྲོའི་དོན་འབའ་ཞིག་གི་ཆེད་དུ་གཏོང་བར་མཛད། དེ་ལྟར་དགུང་ལོ་དྲུག་ཅུ་རེ་བཞིའི་ལྕགས་ལུག་ཕྱི་ལོ་༡༩༣༡ལོ་བར་བསྟན་འགྲོའི་དོན་མཛད་དེ་མཐར་འདའ་ཁ་མའི་རྣལ་འབྱོར་ཟབ་མོས་གཟུགས་སྐུའི་བཀོད་པ་བསྡུ་བའི་ཚུལ་བསྟན་ཏོ།། ༈ གཞན་ཡང་ཆོས་གྲྭ་ཆེན་པོ་འདི་ཉིད་ལ་བཀའ་དྲིན་ཆེ་བ་ཤར་ཆེན་ཀུན་དགའ་བཀྲ་ཤིས་དང་། དཔལ་ས་སྐྱ་པ་ངག་དབང་ཀུན་དགའ་བསོད་ནམས། ངག་དབང་ཀུན་དགའ་བཀྲ་ཤིས། ངག་དབང་ཀུན་དགའ་བློ་གྲོས། འཇམ་མགོན་དབང་སྡུད་སྙིང་པོ། མཁས་བཙུན་བཀྲ་ཤིས་དཔལ་ལྡན། རྟ་ནག་མཁན་ཆེན་བཟང་པོ་རྒྱལ་མཚན། འཇམ་དབྱངས་དོན་གྲུབ་རྒྱལ་མཚན། ཡར་ཀླུང་མཆོག་སྤྲུལ་ནམ་མཁའ་ལེགས་པ་ལྷུན་གྲུབ། ངོར་དཔོན་སློབ་ངག་དབང་ལེགས་གྲུབ། མཁྱེན་བརྩེ་སྐུ་གོང་འོག་སོགས་ས་ངོར་ཚར་པའི་སྐྱེས་ཆེན་བགྲང་ལས་འདས་པ་དང་། དགོན་འདི་ཉིད་ཀྱི་ཆོས་རྗེ་རྒྱལ་མཚན་བླ་མ། ཤར་བླ་མ། ནུབ་བླ་མ། དབྱར་གནས་མཁན་པོ། བཤད་གྲྭའི་མཁན་ཆེན་སོགས་མཁས་གྲུབ་ཀྱི་སྐྱེས་བུ་བསམ་གྱིས་མི་ཁྱབ་པ་ཞིག་བྱོན་ཏེ་མདོ་སྔཊ་རིག་གནས་དང་བཅས་པའི་བཤད་སྲོལ། བསྒོམ་སྒྲུབ་ཀྱི་ཉམས་ལེན། ཆོ་གའི་ཕྱག་ལེན་ཐམས་ཅད་ཀྱང་དཔལ་ལྡན་ས་ངོར་ཚར་གསུམ་གྱི་བཞེད་སྲོལ་དྲི་མ་མེད་པ་བསྐྱངས་ཤིང་བསྟན་པ་སྡེ་དང་བཅས་པ་ཤིན་ཏུ་དར་ཞིང་རྒྱས་པས། ཆོས་གྲྭ་ཆེན་པོ་ལྷུན་གྲུབ་སྟེང་ཞེས་བྱ་བའི་སྙན་གྲགས་ས་ཆེན་པོའི་དཀྱིལ་འཁོར་ཀུན་ཏུ་ཁྱབ་པར་གྱུར་ཏོ། །རྗེ་མཁྱེན་བརྩེས་མཛད་པའི་གངས་ཅན་བོད་ཡུལ་དུ་བྱོན་པའི་གསང་སྔགས་གསར་རྙིང་གི་གདན་རབས་མདོར་བསྡུས་ངོ་མཚར་པདྨའི་དགའ་ཚལ་ལས་དཔལ་ལྡན་ས་སྐྱ་པའི་གདན་རབས་ཀྱི་སྐབས་སུ། དེ་ལྟ་བུའི་བསྟན་འཛིན་གྱི་སྐྱེས་བུ་དམ་པ་ཚད་ལྡན་རྣམས་ཀྱི་དོན་གྱི་རྣམ་ཐར་ཀྱང་མདོར་བསྡུ་ན། རྗེ་བཙུན་ས་སྐྱ་པཎྜིཏ་ཆེན་པོས། ཐོག་མར་ཤེས་བྱ་ཀུན་ལ་མཁས་པར་བྱ། །བར་དུ་མཁས་པའི་ཚོགས་སུ་ལེགས་པར་བཤད། །ཐ་མ་འདྲིས་པའི་དོན་ལ་བརྩོན་པས་བསྒོམ། །དུས་གསུམ་རྒྱལ་བ་ཀུན་གྱི་བཞེད་གཞུང་ཡིན། །ཞེས་གསུངས་པ་ལྟར། གཞི་ཚུལ་ཁྲིམས་རྣམ་པར་དག་པས་བཟུང་སྟེ། པཎྜིཏ་དང་ལོ་ཙཱ་བ་ཆེན་པོ་རྣམས་ཀྱིས་བསྒྱུར་ཞིང་གཏན་ལ་ཕབ། མཁས་གྲུབ་རྣམས་ཀྱིས་བཤད་ཅིང་ཉམས་སུ་བླངས་པས་བློ་གྲོས་དང་ལྡན་པ་ཐམས་ཅད་ལ་ཚད་མར་གྲགས་ཤིང་གྲུབ་པའི་མདོ་སྔགས་ཀྱི་གཞུང་ལུགས་རྒྱ་མཚོ་ལྟ་བུ་ལ་མང་དུ་ཐོས་པའི་མཐར་སོན་པར་བྱས། དེ་དག་གི་ཚིག་གི་སྡེབ་སྦྱོར། དོན་གྱི་དགོངས་འགྲེལ། ཆོ་གའི་ཕྱག་ལེན་ཕྲ་མོ་ཚུན་ཆད་ལའང་དངོས་དང་བཏགས་པ། དགོངས་གཞི་དང་དགོས་པ། རང་གཞན་གྱི་གྲུབ་མཐའི་ཁྱད་པར་སོགས་བསམ་བྱུང་གི་རིག་པས་སྒྲོ་འདོགས་ཞིབ་མོར་བཅད། གཞན་ལ་འཆད་པ་དང་། བསྟན་བཅོས་རྩོམ་པ་སོགས་གང་གི་ཚེའང་ལུང་དང་རིགས་པས་གྲུབ་ཅིང་། བླ་མ་བརྒྱུད་པའི་མན་ངག་ལས་ཇི་ལྟར་འབྱུང་བ་འཁྲུལ་མེད་དུ་སྐྱོང་བ་ལས་གཞན་གཞུང་གི་ཟེར་སྒྲོས་དང་། རང་བཟོའི་དྲི་མ་ཕྲ་མོ་ཙམ་གྱི་བསྲེ་བསླད་ཀྱང་མི་མཛད། ཟབ་མོའི་ལམ་སྤྱི་དང་། ཁྱད་པར་ཁྱབ་བདག་རྡོ་རྗེ་འཆང་ཆེན་པོ་དང་། གྲུབ་ཆེན་བི༦པ་ནས་རྒྱ་བོད་ཀྱི་མཁས་གྲུབ་ཟམ་མ་ཆད་པར་བརྒྱུད་ཅིང་། མི་བར་དུ་ཁྱི་མ་ཞུགས། མཁའ་འགྲོའི་ཞལ་རླངས་མ་ཡལ་བའི་གསུང་ངག་རིན་པོ་ཆེ་སྙན་བརྒྱུད་ཚད་མ་བཞི་ལྡན་ཐུགས་ཉམས་སུ་བཞེས་ཏེ། དང་པོ་རྒྱུ་དུས་ཀྱི་དབང་གིས་སྨིན་པར་བྱས། བར་དུ་ལམ་དུས་ཀྱི་དབང་གི་ཆུ་བོ་མ་ནུབ་པ་ཐུན་བཞིར་བླངས་པས་གསོས་ཏེ་རིམ་པ་གཉིས་ཀྱི་ལམ་བཞི་ལ་གོམས་པས། མཐར་འབྲས་བུའི་དུས་ཀྱི་དབང་གིས་ཚེ་འདི་ལའམ་བར་དོ་སོགས་སུ་ངེས་པར་ཕྱག་རྒྱ་ཆེན་པོ་མཆོག་གི་དངོས་གྲུབ་ལ་གཤེགས་པའི་ལམ་གཞན་ལས་ཆེས་ཁྱད་པར་དུ་འཕགས་པ་དང་། གཞན་ཡང་མཆོག་སྒྲུབ་པས་ཐུན་མོང་ཞར་ལ་འབྱུང་བ་དང་། ཐུན་མོང་སྒྲུབ་པས་མཆོག་ཞར་ལ་འབྱུང་བའི་ཟབ་རྒྱས་ཀྱི་གདམས་པ་ལག་ཏུ་ལོན་ངེས་པ་དུ་མས་རང་གཞན་ཐམས་ཅད་ལ་གནས་སྐབས་དང་མཐར་ཐུག་གི་དངོས་གྲུབ་རྣམ་གཉིས་ལ་བདེ་བླག་ཏུ་སྦྱོར་བར་མཛད་པ་ཡིན་ལ། གཞན་ཡང་རང་གི་གྲུབ་མཐའ་མ་འཁྲུལ་བར་སྐྱོང་བ་ལས་གཞན་ལུགས་ཀྱི་རྗེས་སུ་མི་འབྲང་ཡང་། དེ་དག་ལུང་རིགས་ཀྱི་དཔྱད་པ་རེ་ཙམ་མ་གཏོགས་རྒྱུ་མཚན་མེད་པའི་སྡང་ཞེན་གྱིས་སྨོད་པ་སོགས་གྲུབ་མཐའི་ཆགས་སྡང་མི་མཛད། ནང་དུ་ཉམས་རྟོགས་དང་། མངོན་པར་ཤེས་པ་སོགས་རྒྱ་ཆེ་བ་མངའ་ཡང་སྦས་པའི་ངང་ཚུལ་ལྟ་བུར་མཛད་དེ། དཔལ་གསང་བ་འདུས་པ་ལས། ཕྱི་རུ་ཉན་ཐོས་སྤྱོད་པ་སྐྱོང་། །ནང་དུ་འདུས་པའི་དོན་ལ་དགའ། །ཞེས་གསུངས་པ་ལྟར། ཕྱག་ལེན་དུ་བཏབ་པས། མདོ་སྔགས་རིག་གནས་དང་བཅས་པའི་གཞུང་ལུགས་རབ་འབྱམས་རྒྱ་བོད་ཀྱི་ཤིང་རྟ་ཆེན་པོ་རྣམས་ཀྱི་བཞེད་སྲོལ་ཇི་ལྟ་བ་བཞིན་དུ་སྨྲ་བའི་པཎྜིཏ་དང་། རྒྱུད་སྡེ་ནས་གསུང་པའི་ལམ་འཁྲུལ་མེད་བསྒོམས་པས་ཕྱག་རྒྱ་ཆེན་པོའི་ཡེ་ཤེས་དང་ས་ལམ་གྱི་ཡོན་ཏན་མཚན་ཉིད་རྒྱུད་ལ་སྐྱེས་པའི་གྲུབ་ཐོབ་རྣལ་འབྱོར་གྱི་དབང་ཕྱུག་བསམ་གྱིས་མི་ཁྱབ་པ་ཞིག་བྱོན་པ་ཡིན་ནོ་གསུངས། དེ་ལྟར་བསྟན་འཛིན་སྐྱེས་བུ་རིམ་པར་བྱོན་པས་སྐྱོང་ཞིང་དར་རྒྱས་སུ་མཛད་ཚུལ་བསྟན་འཛིན་གཙོ་བོ་འགའ་ཞིག་གི་རྣམ་ཐར་དང་བཅས་ཏེ་མདོར་བསྡུས་སུ་བཤད་པ་ཡིན་གྱི། བསྟན་འཛིན་སྐྱེས་བུ་ཇི་སྙེད་བྱོན་པས་བསྟན་པ་འཛིན་སྐྱོང་སྤེལ་གསུམ་མཛད་ཚུལ་རྒྱས་པ་ནི་ས་ངོར་གྱི་གདུང་རབས་དང་། གདན་རབས། ལམ་འབྲས་བླ་མ་བརྒྱུད་པའི་རྣམ་ཐར། སོ་སོའི་རྣམ་ཐར། ཆོས་འབྱུང་རྣམས་ལས་འབྱུང་བས་དེ་དག་བལྟ་བར་བྱའོ།། ༈ གསུམ་པ་བསྟན་པའི་ངོ་བོ་བཤད་སྒྲུབ་ལས་ཀྱི་ཆོས་སྤྱོད་དར་ཞིང་རྒྱས་ཚུལ་ལ། བསྟན་གཞི་བྱ་བ་ལས་ཀྱི་སྐོར། བསྟན་པའི་རྩ་བ་བཤད་གྲྭའི་སྐོར། བསྟན་པའི་སྙིང་པོ་སྒྲུབ་གྲྭའི་སྐོར་དང་གསུམ་ལས། དང་པོ་ལ། ལྷ་ཁང་རྟེན་གསུམ་ཇི་ལྟར་བྱུང་ཚུལ། ལོ་ཟླ་ཚེས་དུས་སྒྲུབ་མཆོད་ཇི་སྙེད་བྱུང་ཚུལ། བླ་མ་ལས་འཛིན་རིམ་པ་ཇི་ལྟར་ཡིན་ཚུལ། རྒྱུན་གྱི་དགོན་པའི་སྒྲིག་སྲོལ་ཇི་ལྟར་ཡིན་ཚུལ་དང་བཞི་ལས། དང་པོ་ལ། ལྷ་ཁང་སོགས་ཀྱི་སྐོར་དང་། རྟེན་གསུམ་གྱི་སྐོར་གཉིས་ལས། དང་པོ་ནི། དེ་ལ་མདོ་ཁམས་འབྲི་རྫ་ཟལ་མོ་སྒང་གི་སའི་ཐིག་ལེ། སྟོབས་ཀྱི་འཁོར་ལོས་སྒྱུར་བ་སྡེ་དགེ་ཆོས་རྒྱལ་ཆེན་པོའི་རྩ་བའི་གདན་ས། ལུགས་གཉིས་ཆབ་སྲིད་འགྲན་ཟླ་དང་བྲལ་བ། དཔལ་སྡེ་དགེ་དགོན་ཆེན་ལྷུན་གྲུབ་སྟེང་ཞེས་བྱ་བ་འདི་ཉིད་དཔལ་གྲུབ་པའི་དབང་པོ་ཐང་སྟོང་རྒྱལ་པོ་དང་། བོར་ཐར་བཀྲ་ཤིས་སེངྒེ་མཆོག་མཆོད་ཡོན་ཟུང་འབྲེལ་གྱིས་རབ་བྱུང་བདུན་པའི་མེ་སྟག་ཕྱི་ལོ་༡༤༤༦ལོར་ཐང་རྒྱལ་ལྷ་ཁང་རྟེན་དང་བརྟེན་པར་བཅས་བཞེངས་ཏེ་ལྷ་ཁང་གི་སྔ་ཤོས་འདི་ཡིན་ལ། གནས་འདིར་ཀླུ་ཡི་དབང་པོ་ཞིག་བརྟེན་བཅས་པའི་མཚོ་ཞིག་ཡོད་པ་ལ་གྲུབ་ཆེན་གྱིས་བླ་གོས་ཀྱིས་མཚོ་བསུབས་ཀླུ་ལ་མཐུན་རྐྱེན་བསྒྲུབ་པར་བཀའ་བསྒོས་ཏེ་རྟེན་ལྷ་ཁང་དང་། གྲུབ་ཆེན་ཉིད་ཀྱི་ཕྱག་བཟོ་ཐང་རྒྱལ་ང་འདྲ་མར་གྲགས་པ་སོགས་བརྟེན་པར་བཅས་བཞེངས་ཏེ། དཔལ་མགོན་གདོང་བཞི་པའི་ལྗགས་བསྙེན་ཞིག་ཀྱང་མཛད་དེ་བྱིན་རླབས་ཀྱི་གཟི་འོད་རབ་ཏུ་འབར་བ་ད་ལྟར་ཡང་གནས་པ་འདིའོ། དེ་ནས་བླ་ཆེན་བྱམས་པ་ཕུན་ཚོགས་ཀྱིས་རབ་བྱུང་བཅུ་པའི་མེ་འབྲུག་ཕྱི་ལོ་༡༦༡༦ལོར་ས་སྐྱའི་ལྷ་ཁང་གཡེར་མོ་ཆེ་ལ་དཔེར་མཛད་ནས་སྤྲུལ་པའི་ལྷ་ཁང་ཆེན་པོ་བསམ་གྲུབ་མཐོང་གྲོལ་ཆེན་མོ་བཞེངས་ཤིང་། དེའི་ཉམས་གསོ་རྒྱས་སྤྲོས་ཁྲི་ཆེན་བླ་མ་སངས་རྒྱས་བསྟན་པ་དང་། བསོད་ནམས་ཕུན་ཚོགས་ཀྱིས་མཛད་པ་དང་། ཆོས་རྒྱལ་བསྟན་པ་ཚེ་རིང་མཆོག་གིས་གསེར་འཕྲུ་རྒྱ་ཕིབས་གསེར་བྱ་སྤེན་རྒྱན་གསེར་གྱི་རྒྱལ་མཚན་བསྐྲུན་པ་སོགས་ལྷ་ཁང་ཆེན་པོ་གང་དེ་ནི། འཆི་མེད་ཡུལ་གྱི་འཕྲུལ་བཟོ་བིཤྭཀརྨའི་ལག་རྩེ་ལས་འཁྲུངས་པ་ལྟ་བུའི་འགྲམ་ལོགས་དང་། ཀ་བ་དང་ཀ་ཞུ་། གདུང་དང་ཐོག་ཕུབ་ཀྱི་རིམ་པ། འདའ་ཡབ་པུ་ཤུ། སྒོ་དང་སྒོ་ལོགས་སོགས་མཚན་ཉིད་ཐམས་ཅད་རྫོགས་པ། དགེ་འདུན་སྟོང་ཕྲག་དུ་མའང་བདེ་བར་ཤོང་བའི་རྒྱ་ཁྱོན་ལྡན་པ། འབུར་དུ་བརྐོས་པ་དང་། རིས་སུ་བྲིས་པ་ལ་ཚོན་སྣ་བརྒྱ་ཕྲག་གིས་བཀྲ་བར་བྱས་པ་རྟེན་གསུམ་རབ་འབྱམས་གྱིས་ཕྱུར་བུ་གཏམས་པ་ལ་མཆོད་སྤྲིན་རྒྱ་མཚོའི་སྤྲིན་ཕུང་འཕྲོ་བ། ནང་གི་ཁོར་ཡུག་ཀུན་ཏུ་བྲེ་བའི་འཕན། བླ་བྲེ། གདུགས། རྒྱལ་མཚན། ཆོས་ཀྱི་བཞུགས་ཁྲི། སྟེང་གི་རྩེ་མོ་ན་ཉི་མ་འཆར་ཀའི་གཟི་བརྗིད་ཀྱི་ཕུང་པོ་ལས་འཕོས་པ་ལྟ་བུའི་གསེར་འཕྲུ་རྒྱ་ཕིབས། གསེར་བྱ་ཆོས་འཁོར། གསེར་གྱི་རྒྱལ་མཚན། སྤེན་རྒྱན། མེ་ལོང་། དྲིལ་བུ་སིལ་སིལ་རྣམས་ཀྱིས་ཀུན་ནས་མཛེས་པར་བྱས་པ། ས་ཆེན་པོ་ལ་གནས་པའི་སྐྱེས་ཆེན་དམ་པ་བགྲང་བ་ལས་འདས་པ་ཞིག་གིས་དཀྱིལ་འཁོར་སྒྲུབ་ཅིང་མཆོད་པ་ལ་སོགས་པས་བྱིན་གྱིས་བརླབས་ཤིང་། ཟབ་རྒྱས་དམ་པའི་ཆོས་ཀྱི་འཁོར་ལོ་བར་མེད་དུ་བསྐོར་བས་འོག་མིན་ཞིང་གི་གཞལ་ཡས་ཁང་དང་མཚུངས་པ། གཙུག་ལག་ཁང་བསམ་གྲུབ་མཐོང་གྲོལ་ཆེན་མོ་ཞེས་པའི་མཚན་དོན་དང་ལྡན་པར་ངེས་སོ། །ཆོས་རྒྱལ་བསྟན་པ་ཚེ་རིང་དང་། ཀུན་དགའ་འཕྲིན་ལས་རྒྱ་མཚོས་གངས་ལྗོངས་རིག་པའི་འབྱུང་གནས་པར་ཁང་ཆོས་མཛོད་བཀྲ་ཤིས་སྒོ་མང་གི་གཙུག་ལག་ཁང་བཞེངས་ཏེ། དེ་ཡང་ཆོས་རྒྱལ་བསྟན་པ་ཚེ་རིང་མཆོག་གིས་རབ་བྱུང་བཅུ་གཉིས་པའི་ས་བྱ་ཕྱི་ལོ་༡༧༢༩ལོའི་ཧོར་ཟླ་གཉིས་པའི་ཚེས་ཉེར་བརྒྱད་ནས་བརྩམས་ཏེ་བཀའ་འགྱུར་བཞུགས་ཁང་རྟེན་དང་བརྟེན་པར་བཅས་བཞེངས། དེ་ནས་ཀུན་དགའ་འཕྲིན་ལས་རྒྱ་མཚོས་བསྟན་འགྱུར་རིན་པོ་ཆེ་པར་བསྐྲུན་ལེགས་པར་གྲུབ་ནས་མཁན་ཆེན་དཔལ་ལྡན་ཆོས་སྐྱོང་གི་ཐུགས་དགོངས་ལྟར་སྔར་གྱི་བཀའ་འགྱུར་བཞུགས་ཁང་གི་ཉེར་འགྲམ་དེ་ཉིད་དུ་རབ་བྱུང་བཅུ་གཉིས་པའི་ཤིང་བྱི་ཕྱི་ལོ་༡༧༤༤ལོའི་ཟླ་བ་གཉིས་པའི་ཚེས་༢༧་ཉིན་དབུ་བརྩམས་ཏེ། གཙུག་ལག་ཁང་རྟེན་དང་བརྟེན་པར་བཅས་བཟོ་བཀོད་ཤིན་ཏུ་ལེགས་པར་བཞེངས་ཏེ། ཆོས་ཁྲི་ཤིང་གི་དྲྭ་བ་མིག་མང་རིས་སུ་བྲིས་པ་དག་ཏུ་འཇིག་རྟེན་གསུམ་ན་མཆོད་འོས་གསུང་རབ་ཀྱི་ཕྱི་མོ་ཇི་སྙེད་ཡོད་པ་རྣམས་མཆོད་པའི་རྣམ་གྲངས་བསམ་གྱིས་མི་ཁྱབ་པ་དང་བཅས་བཞུགས་སུ་གསོལ་བར་མཛད། དེ་ནས་རིམ་པར་བྱུང་བའི་གསུང་རབ་ཀྱི་ཕྱི་མོ་ཐམས་ཅད་ཀྱང་གཙུག་ལག་ཁང་འདི་ཉིད་དུ་བཞུགས། རྒྱལ་བའི་བཀའ་འགྱུར་རོ་འཚལ། རྒྱ་གར་དང་བོད་ཀྱི་མཁས་གྲུབ་དམ་པ་རྣམས་ཀྱིས་མཛད་པའི་བཅུ་ཕྲག་རིག་པས་བསྡུས་པའི་ཆོས་སྦྱིན་ཟད་མི་ཤེས་པའི་འཁོར་ལོ་སྤྲོ་བས། ཆོས་གྲྭ་ཆེན་པོ་དཔལ་སྡེ་དགེ་དགོན་ཆེན་ལྷུན་གྲུབ་སྟེང་ཞེས་བྱ་བ་འདི་ཉིད་ནི་གངས་ལྗོངས་རིག་པའི་མཛོད་ཆེན་པོར་གྱུར་ཏོ། །དེ་ལྟར་ན་དགོན་འདི་ཉིད་དུ་ཐང་རྒྱལ་ལྷ་ཁང་། གཙུག་ལག་ཁང་ཆེན་བསམ་གྲུབ་མཐོང་གྲོལ་ཆེན་མོ། སྤར་ཁང་ཆོས་མཛོད་ཆེན་པོ་བཀྲ་ཤིས་སྒོ་མང་གི་གཙུག་ལག་ཁང་གསུམ་པོ་དེ་གཙོ་བོར་སྨོས་པའི་ལྷ་ཁང་སུམ་ཅུ་རྩ་ལྔ་ཙམ་ཡོད་དེ། ཐང་རྒྱལ་ལྷ་ཁང་། བསམ་གྲུབ་མཐོང་གྲོལ་ཆེན་མོ། སྤར་ཁང་ཆོས་མཛོད་དང་། མགོན་ཁང་གཉིས་། སྲིབ་དགོན་ལྷ་ཁང་། བདུད་འདུལ་ལྷ་ཁང་། རིགས་ལྔ་ལྷ་ཁང་ལྔ། ས་དཀར་ལྷ་ཁང་། དངུལ་གདུང་ལྷ་ཁང་། ཉིན་དགོན་སྒྲོལ་མ་ལྷ་ཁང་། ཉིན་དགོན་མགོན་ཁང་། བར་ཤར་ལྷ་ཁང་། བཀྲ་རབ་ལྷ་ཁང་། ཐར་རྩེའི་སྒྲུབ་ཁང་། གཡུ་འབྲུག་ལྷ་ཁང་། ཤར་མགོན་ཁང་། ནུབ་མགོན་ཁང་། སྤྱན་རས་གཟིགས་ལྷ་ཁང་། ཇོ་ཁང་། རྣམ་སྲས་ལྷ་ཁང་། རྒྱལ་ཁང་། འབག་ཁང་། གསོ་ཀ་རྙིང་མ་ལྷ་ཁང་། གཙུག་ལག་ཁང་ཆེན་སྟེང་དུ་སྲི་ཟློག་ལྷ་ཁང་དང་། རྡོ་རྗེ་འཆང་གི་ལྷ་ཁང་གཉིས། དབྱར་གནས་ལྷ་ཁང་། བ་བའི་མགོན་ཁང་། མཛེས་ཕུ་ལྷ་ཁང་། མཛེས་ཕུ་བསྙུང་གནས་ལྷ་ཁང་། མཛེས་ཕུ་མགོན་ཁང་། མཛེས་ཕུ་ལམ་འབྲས་ལྷ་ཁང་དང་བཅས་པ་རྣམས་སོ། །ཉིན་བསྟར་མ་ཆགས་པར་བསྐང་གསོ་རྟག་འདོན་ཡོད་པའི་ལྷ་ཁག་བཅོ་བརྒྱད་ཡོད་དེ། དེའང་། གཙུག་ལག་ཁང་ཆེན། ཐང་རྒྱལ་ལྷ་ཁང་། ཤར་མགོན་ཁང་། ནུབ་མགོན་ཁང་། མཛེས་ཕུ་མགོན་ཁང་། དབྱར་གནས་ལྷ་ཁང་། གཡུ་འབྲུག་ལྷ་ཁང་། བ་བའི་མགོན་ཁང་། བར་ཤར་ཁང་། ཐར་རྩེ་སྒྲུབ་ཁང་། དངུལ་གདུང་ལྷ་ཁང་། ས་དཀར་ལྷ་ཁང་། སྤར་ཁང་མགོན་ཁང་། རྒྱལ་ཁང་། ཉིན་དགོན་མགོན་ཁང་། བཀྲ་རབ་ལྷ་ཁང་། གསོ་ཀ་ཁང་། འབག་ཁང་དང་བཅས་པ་རྣམས་སོ། །ལྷ་ཁང་དེ་རྣམས་ཐམས་ཅད་ཀྱང་ཕྱི་ནང་གི་བཀོད་པ་ཡོངས་སུ་རྫོགས་ལ་ཕུན་སུམ་ཚོགས་པ་དང་ལྡན་པ་ཤ་སྟག་གོ། སྤར་ཁང་དང་ཉེ་བའི་ལྟག་ཏུ་སྡེ་དགེ་ཆོས་རྒྱལ་ཆེན་པོ་ཁྲི་འཛིན་རིམ་བྱོན་གྱི་བསྟི་གནས་བླ་བྲང་ཆེན་པོ་ཕྱི་ནང་བཟོའི་བཀོད་པ་སུམ་རྩེན་ལྷ་ཡི་རྣམ་རྒྱལ་ཁང་བཟང་ལ་འགྲན་པ། ས་ཆེན་པོ་ལ་གནས་པའི་བྱང་ཆུབ་སེམས་དཔའ་དག་རྒྱལ་པོའི་ཚུལ་གྱི་བྱོན་པའི་གནས་དགའ་ལྡན་ལྷ་ཡི་གཞལ་མེད་ཁང་དང་མཚུངས་པ། བརྒྱ་བྱིན་ཉེར་དབང་གིས་བསྐོར་བ་ལྟར་ཆོས་རྒྱལ་ཆེན་པོ་ནང་བློན་ཆེན་པོའི་ཚོགས་དང་བཅས་པས་ཆོས་སྲིད་ལུགས་བརྒྱའི་འདུན་མ་གླེང་བ་ལྷའི་ཆོས་བཟང་འདུན་ས་དང་མཚུངས་པ། ལོངས་སྤྱོད་མཁོ་རྒུ་མི་ཟད་པའི་མཛོད་ཆེན་པོ་རྣམ་མང་ཐོས་སྲས་ཀྱི་ཕོ་བྲང་ལ་འགྲན་པ་ལྟ་བུ། རྟེན་གསུམ་རབ་འབྱམས་རྒྱ་མཚོའི་སྤྱན་སྔར་མཆོད་པའི་སྤྲིན་ཕུང་མཐའ་ཡས་པ་ཉིན་མཚན་ཁོར་མོ་ཡུག་ཏུ་འཕྲོ་བའི་བླ་བྲང་ཁྱད་པར་ཅན་དང་། བླ་གྲྭ་སོ་སོའི་གྲྭ་ཁང་བཞི་བརྒྱ་ལས་བརྒལ་བ་ཡོད་ཅེས་ཐོས་ལ། ཟིལ་ཆུའི་ཟམ་ཆེན་ཁ་ཡན་ནས་མཛེས་ཕུའི་མན་གླིང་བསྐོར་ལམ་ཉེ་ཙམ་ནའང་ལྷ་ཁང་དང་སྡེ་དགེའི་བླ་བྲང་། གྲྭ་ཁང་དང་དུང་འཁོར་མཆོད་རྟེན་རིགས་མ་གཏོགས་ཁྱིམ་པའི་ཡུལ་ཁང་སོགས་གཅིག་པུའང་མེད་ཅིང་། དེ་དག་ཀྱང་བཟོ་ལེགས་པ། བཀོད་པ་མཛེས་པ་ཉམས་དང་གཟི་བརྗིད་སོགས་དགའ་ལྡན་ལྷ་ཡི་གྲོང་ཁྱེར་མི་ཡུལ་དུ་འཕོས་པ་ལྟ་བུ་ཞིག་ཡོད་དོ།། ༈ གཉིས་པ་རྟེན་གསུམ་གྱི་སྐོར་ལ། དེ་ལ་ཆོས་སྡེ་ཆེན་པོ་འདི་ཉིད་དུ་ཕྱོགས་བཅུའི་རྒྱལ་བའི་ཟབ་གསལ་གཉིས་སུ་མེད་པའི་སྐུ་གསུང་ཐུགས་ཀྱི་རང་བཞིན་གཟུགས་སུ་སྣང་བ། འགྲོ་བ་ཚད་མེད་པའི་བསོད་ནམས་ཀྱི་རྟེན། དད་པ་ཅན་རྣམས་ཀྱི་རྒྱུད་ལ་ཐར་པའི་ས་བོན་གྱི་ཞིང་ས། མཐོང་ཐོས་དྲན་པ་ཀུན་ཏུ་དོན་ཡོད་པའི་བྱིན་རླབས་ཀྱི་གཟི་བྱིན་རབ་ཏུ་འབར་བའི་སྐུ་གསུང་ཐུགས་ཀྱི་རྟེན་བསམ་གྱིས་མི་ཁྱབ་པ་ཞིག་མཆིས་ཏེ། ཐོག་མར་སྐུ་རྟེན་ལ་ཐང་རྒྱལ་ལྷ་ཁང་དུ་གྲུབ་ཆེན་ཉིད་ཀྱི་ཕྱག་བཟོ་ལས་གྲུབ་པའི་ཐང་རྒྱལ་ང་འདྲ་མར་གྲགས་པས་གཙོར་བྱས་པའི་གྲུབ་དབང་མཆོག་གིས་ཡེ་ཤེས་པ་དངོས་སུ་བསྟིམ་པའི་སྐུ་གཟུགས་ཀྱི་རིགས་མང་པོ། སྐུ་རྟེན་གྱི་གཙོ་བོ་གཙུག་ལག་ཁང་བསམ་གྲུབ་མཐོང་གྲོལ་ཆེན་མོའི་གཙང་ཁང་དབུས་མར། ཐུབ་ཆེན་འཛམ་གླིང་རྒྱན་གཅིག་གམ་ཐུབ་སྐུ་རྒྱབ་ལུང་མའམ་ཐུབ་སྐུ་རབ་གནས་མ་ཞེས་གྲགས་པ། ལྷ་སའི་ཇོ་བོ་ཤྭཀྱམུནེ་དང་སྐུ་རྒྱུ་རིན་ཆེན་གཅིག་ལས་གྲུབ་པ། དང་པོར་ཧོར་གྱི་རྒྱལ་ཁབ་ཏུ་བཞུགས་པ་དེ་ནས་རིམ་གྱིས་འབྲི་གུང་གཙུག་ལག་ཁང་དང་། དེ་ནས་གླིང་ཨ་ཡུ་ཤག་རྒྱལ་ཞེས་པས་འཛིང་རྣམ་རྒྱལ་དགོན་དུ་གདན་དྲངས་པ་དེ་ཉིད་ཁྲི་ཆེན་བླ་མ་བསོད་ནམས་ཕུན་ཚོགས་ཀྱིས་ལྷུན་གྲུབ་སྟེང་འདིར་གདན་དྲངས་ནས་འཁོར་གནས་བརྟན་ཆེན་པོ་བཅུ་དྲུག་གིས་བསྐོར་ཏེ་བཞུགས། ཐུབ་སྐུ་འདི་ཕྱིས་སུ་སྡེ་དགེའི་བློན་ཆེན་བྱ་རྒོད་སྟོབས་ལྡན་གྱིས་གསེར་ལས་སྒྲུབ་པའི་ཅོད་པན་གསོལ་ཏེ་ལོངས་སྐུའི་ཆ་ལུགས་སུ་བྱས་ཞེས་བཤད། གཙང་ཁང་གཡས་པར་ལི་ཐང་ནས་གདན་དྲངས་པའི་ཐུབ་པའི་ལི་སྐུ་གུ་རུ་མཚན་བརྒྱད་ཀྱིས་བསྐོར་བ། གཙང་ཁང་གཡོན་པར་བྱམས་པ་ཐོག་ཚད་གསུམ་པ་ཉེ་སྲས་ཀྱིས་བསྐོར་བ། གསེར་ཟངས་ལས་གྲུབ་པའི་ངོར་ཆེན་རྡོ་རྗེ་འཆང་གི་སྐུ་བྱིན་རླབས་ཤིན་ཏུ་ཆེ་བ། ཚེ་དཔག་མེད་སྐུ། དངུལ་དཀར་གྱི་སྤྱན་རས་གཟིགས་བཅུ་གཅིག་ཞལ་རྣམས་ཐོག་ཚད་གཉིས་པ་རིང་བསྲེལ་རྣམ་བཞིས་ཕྱུར་བུར་གཏམས་ཤིང་ཡེ་ཤེས་པ་དངོས་སུ་བཞུགས་པའི་བྱིན་རླབས་ཅན། ཆོས་རྒྱལ་འཕགས་པའི་ཐུགས་དམ་གྱི་རྟེན་མགོན་སྐུ་བྱིན་རླབས་ཅན་མཛེས་ཕུ་མགོན་ཁང་དུ་བཞུགས་པ། རྡོར་ལྷུན་གྱི་སྲས་གྲགས་པ་ལྷུན་གྲུབ་ཀྱིས་གུར་གྱི་མགོན་པོ་ཐུགས་དམ་སྙིང་པོ་མཛོད་པས་མགོན་པོ་ལུས་དང་གྲིབ་མ་བཞིན་དུ་འགྲོགས་པ་དེའི་བསྒྲུབ་པའི་རྟེན། མགོན་སྐུ་རབ་གནས་སྐབས་ཡེ་ཤེས་པ་དངོས་སུ་ཐིམ་པའི་བྱིན་རླབས་ཅན་ནུབ་མགོན་ཁང་དུ་བཞུགས་པ། ཆོས་རྒྱལ་བསྟན་པ་ཚེ་རིང་གི་དུས་སུ་བཞེངས་པའི་ལམ་འབྲས་བླ་མ་བརྒྱུད་པ། ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷ་རྣམས་ཀྱི་སྐུ་བརྙན་གསེར་ཟངས་ལས་གྲུབ་པ་ཕྱེད་བཞི་བརྒྱ་ཙམ། ཙནྡ་དཀར་དམར་ལས་གྲུབ་པའི་བསྐལ་བཟང་སངས་རྒྱས་སྟོང་གི་སྐུ་བརྙན་ཆ་གཉིས། བ་སོ་ལས་གྲུབ་པའི་སྒྲོལ་མ་ཉེར་གཅིག་གི་སྐུ། ཙནྡ་གྱི་ལྡེའུ་གུ་ལས་གྲུབ་པའི་སངས་རྒྱས་བྱང་སེམས་ཀྱི་སྐུ་མང་པོ། ཤར་མགོན་ཁང་དུ་མགོན་པོ་ལྕམ་དྲལ་སོགས་ཀྱི་སྐུ་ཤིན་ཏུ་བྱིན་རླབས་ཅན་མང་པོ། བླ་ཆེན་བློ་གྲོས་རྒྱ་མཚོའི་སྐུ་དུས་སུ་བཞེངས་པའི་གསེར་ཟངས་ལས་གྲུབ་པའི་རྡོ་རྗེ་འཆང་དབང་གི་སྐུ་ལ་གྲུབ་ཆེན་བརྒྱད་ཅུས་བསྐོར་བ། ཐུབ་པ་གནས་བརྟན་གཙོ་འཁོར། གཞན་ཡང་སངས་རྒྱས་བྱང་སེམས་ཆོས་སྲུང་སོགས་ཀྱི་སྐུ་བརྙན་སྟོང་རྩར་ལོངས་པ་དང་། རྗེ་བཙུན་དབྱངས་ཅན་སྒྲོལ་མའི་དུས་སུ་བཞེངས་པའི་གསེར་ཟངས་ལས་གྲུབ་པའི་ཀུན་རིག་རྩ་ལྷ་སོ་བདུན་སོགས་སྐུ་བརྙན་མང་པོ། གཞན་ཡང་བླ་མ་ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷའི་སྐུ་གཟུགས་གསེར་དངུལ་ཟངས་སོགས་རིན་ཆེན་སྣ་ཚོགས་དང་། ལི་དང་བ་སོ་དང་ཙནྡ་དང་བྱེ་མ་ཨ་ཀྲོང་དང་སྨན་འདམ་དང་འཁར་དང་ས་འཇིམ་སོགས་ལས་གྲུབ་པ་བཟོ་ཚད་ཤིན་ཏུ་ལེགས་པ་གཟུངས་དང་རབ་གནས་སོགས་མཚན་ཉིད་ཡོངས་སུ་རྫོགས་པ་བགྲང་བ་ལས་འདས་པ། འཁོན་ལུགས་ཕུར་པ། ཨོ་རྒྱན་སངས་རྒྱས་གཉིས་པ། གུར་མགོན་རྣམས་ཀྱིས་གཙོ་བོར་བྱས་པའི་ཐང་ནག་ཐོག་ཚད་གསུམ་པ་ཅན་གསུམ། གོས་ཆེན་བསླན་དྲུབ་ཀྱི་བདེ་གཤེགས་སོ་ལྔ་རིན་ཐང་ཆེ་བའི་གོས་ཤམ་སྤུས་ལེགས་དང་བཅས་པ་ཐོག་ཚད་ཅན་གྱི་ཞལ་ཐང་རྣམས་ཀྱིས་མཚོན་ཞལ་ཐང་དང་། ལྷ་ཁང་སོ་སོ་འི་བླ་མ་ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷ་སོགས་ཀྱི་ལྡེབ་བྲིས། རྒྱུད་སྡེ་ཀུན་བཏུས་ཀྱི་དཀྱིལ་འཁོར། ལྷ་སྐུའི་ཞལ་ཐང་གི་མ་ཕྱི་སྤར་དུ་བརྐོས་པ་ཕྱེད་དང་ཉིས་བརྒྱ་ཙམ་སོགས་མདོར་ན་སྐུ་རྟེན་གྱི་རིགས་བྱིན་རླབས་ཀྱི་གཟི་འོད་རབ་ཏུ་འབར་བ་ཁྲི་ཁྲག་གཅིག་ལས་ལྷག་ཡོད་དོ།། ༈ གསུང་རྟེན་ལ་གསེར་བྲིས་ཀྱི་བཀའ་འགྱུར་ཚར་གཉིས། དངུལ་བྲིས་ཀྱི་བསྟན་འགྱུར་ཚར་གཅིག །ཤེར་ཕྱིན་གྱི་མདོ་རྒྱས་འབྲིང་བསྡུས་པ་གསེར་བྲིས་སུ་བྱས་པས་མཚོན་གསེར་དངུལ་གྱིས་བྲིས་པའི་གླེགས་བམ་མང་པོ་དང་། བཀའ་བསྟན་འགྱུར། ས་སྐྱ་བཀའ་འབུམ་སོགས་རིག་གཞུང་གི་སྐོར་དང་། ཆོ་ག་ཆོས་སྤྱོད་སྐོར་གྱི་གླེགས་བམ་སྐྱ་པོད་བགྲང་ལས་འདས་པ། དེ་དག་ཀྱང་གླེགས་ཤིང་། གླེགས་ཐག་ན་བཟའ་གདོང་དར་སོགས་ཁྱད་འཕགས་ཅན། གསུང་རྟེན་སྤར་གྱི་ཕྱི་མོ་བཞུགས་པའང་། ཤེར་ཕྱིན་བརྒྱད་སྟོང་སུམ་འབིད། མཚན་བརྗོད་སུམ་འབིད། རྒྱལ་བའི་བཀའ་འགྱུར་རོ་འཚལ་གླེགས་བམ་བརྒྱ་དང་གསུམ། བསྟན་བཅོས་འགྱུར་རོ་འཚལ་གླེགས་བམ་ཉིས་བརྒྱ་དང་བཅུ་གསུམ། རྙིང་མ་རྒྱུད་འབུམ་པོད་ཉེར་དྲུག །མ་ཎིའི་བཀའ་འབུམ་པོད་གཉིས། བཀའ་གདམས་གླེགས་བམ་པོད་གཉིས། ས་སྐྱའི་བཀའ་འབུམ་པོད་བཅོ་ལྔ། ཀློང་ཆེན་མཛོད་བདུན། ངལ་གསོ་སྐོར་གསུམ། རང་གྲོལ་སྐོར་གསུམ། སྙིང་ཐིག་ཡ་བཞི་བཅས་ལ་པོད་བཅུ་གཅིག །དྭགས་པོ་བཀའ་འབུམ་པོད་གཉིས། རྗེ་བཀའ་འབུམ་པོད་བཅུ་དགུ། ངོར་ཆེན་བཀའ་འབུམ་པོད་བཞི། ཨ་མྱེས་བཀའ་འབུམ་པོད་དྲུག །ཀུན་མཁྱེན་བཀའ་འབུམ་པོད་བཅུ་གསུམ། གཡག་སྟོན་གསུང་པོད་བརྒྱད། དཀོན་མཆོག་ལྷུན་གྲུབ་བཀའ་འབུམ་པོད་བཞི། སངས་རྒྱས་ཕུན་ཚོགས་གསུང་འབུམ་པོད་བཞི། ཐོགས་མེད་བཀའ་འབུམ་པོད་གཉིས། ཞུ་ཆེན་བཀའ་འབུམ་པོད་བཅུ། གློ་བོ་མཁན་ཆེན་གསུང་པོད་གསུམ། འཇིགས་མེད་གླིང་པའི་བཀའ་འབུམ་པོད་དགུ། མི་ཕམ་བཀའ་འབུམ་པོད་བཅུ་དགུ། སྡེ་སྲིད་པའི་བཻཌཱུདཀར་སྔོན་གཡའ་སེལ་མན་ངག་ལྷན་ཐབས་བཅས་ལ་པོད་དྲུག །དཔལ་ལྡན་ཆོས་སྐྱོང་རྟོགས་བརྗོད་པོད་གཉིས། གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ཚོགས་སློབ་རྣམ་འགྲེལ་དང་བཅས་པ་ལ་པོད་ཉེར་དྲུག །རྒྱུད་སྡེ་རིན་པོ་ཆེ་ཀུན་ལས་བཏུས་པ་པོད་སོ་གཉིས། སྒྲུབ་ཐབས་ཀུན་བཏུས་ཁ་སྐོང་བཅས་པོད་བཅུ་བཞི། མདོ་ངེས་དོན་པོད་དྲུག །ཐུགས་ཆེན་ཀུན་འདུས་པོད་བཞི། ཚེ་སྒྲུབ་ཀུན་འདུས་པོད་བཞི། གཞན་ཡང་མདོ་སྔགས་ཀྱི་གཞུང་འགྲེལ་སྐོར་དང་། རིག་གནས་སྐོར། ཆོ་ག་ཆོས་སྤྱོད་མདོ་གཟུངས་སོགས་ཉེར་མཁོ་སྣ་ཚོགས་པ་གླེགས་བམ་དུ་མར་ལངས་པ་ཐམས་ཅད་ཡོངས་བསྡོམས་ལྡེབ་ཁྲི་ཉེར་གསུམ་ལྷག་གི་སྤར་ཤིང་ཡོད་ཅིང་། གསུང་རྟེན་བླ་ན་མེད་པ་དེ་དག་ཐམས་ཅད་ཀྱང་ཡིག་གཟུགས་དང་། ཟབ་དང་། བརྡ་དག་སོགས་ཕུན་སུམ་ཚོགས་ཤིང་གཅིག་ལས་མང་པོ་འགྱེད་པ་ཟད་མི་ཤེས་པའི་གཏེར་ཆེན་པོར་གྱུར་པས། གངས་ལྗོངས་རིག་གཞུང་ཀུན་གྱི་མཛོད་ཆེན་པོ་ནི་དཔལ་སྡེ་དགེ་དགོན་ཆེན་ལྷུན་གྲུབ་སྟེང་ཞེས་བྱ་བའི་ཆོས་སྡེ་འདི་ཉིད་ཡིན་པར་བློ་ལྡན་གཟུར་གནས་རྣམས་ཀྱིས་མཐོང་ངོ་།། ༈ ཐུགས་ཀྱི་རྟེན་ལ། ཆོས་རྒྱལ་བསྟན་པ་ཚེ་རིང་གིས་གསེར་སྲང་སུམ་བརྒྱས་བསྒྲུབ་པའི་ཙནྡ་དཀར་དམར་སྤེལ་བ་ལས་གྲུབ་པའི་བདེ་གཤེགས་མཆོད་རྟེན་ཆེན་པོ་བརྒྱད་ཐོག་ཚད་ཅན་བཟོ་བཀོད་ཤིན་ཏུ་ལེགས་པ་དང་། སྡེ་དགེ་བླ་མ་ཀུན་དགའ་རྒྱ་མཚོ། བླ་ཆེན་བྱམས་པ་ཕུན་ཚོགས། ཀུན་དགའ་ཕུན་ཚོགས། ཀུན་དགའ་ཕྲིན་ལས་སོགས་དང་། ངོར་མཁན་ཆེན་བཀྲ་ཤིས་ལྷུན་གྲུབ་སོགས་ཀྱི་སྐུ་གདུང་། མཁན་ཆེན་དཔལ་ལྡན་ཆོས་སྐྱོང་གི་གསེར་གདུང་ཆེན་མོ། འཇམ་དབྱངས་མཁྱེན་བརྩེའི་དབང་པོའི་གསེར་གདུང་གཉིས་ཐོག་ཚད་གཉིས་པ་ཅན་གཙུག་ལག་ཁང་བསམ་གྲུབ་མཐོང་གྲོལ་ཆེན་མོར་བཞུགས་པ་དང་། སྡེ་དགེ་ཆོས་རྒྱལ་དང་། ངོར་མཁན་རབས་མང་པོའི་སྐུ་གདུང་མཆོད་རྟེན། རྡོ་ཁོ་མའི་རྣམ་རྒྱལ་མཆོད་རྟེན་ཆེན་པོ་ཐོག་ཚད་བདུན་པ་ཅན་རྣམས་ཀྱིས་མཚོན་ཐུགས་ཀྱི་རྟེན་བགྲང་བ་ལས་འདས་པ་ཞིག་མཆིས། གཞན་ཡང་གར་གྱི་ཆས་གོས་དང་ཞལ་འབག་གི་རིགས་སྣ་ཚོགས་པ། རིན་ཐང་གཞལ་དུ་མེད་པའི་དར་གོས་ཆེན་བཟང་ལེགས་དུ་མ་ལས་གྲུབ་པའི་ཀ་འཕེན་དང་ཁྲི་རྒྱན། གདུགས་དང་རྒྱལ་མཚན། བླ་བྲེ། འཕན། བ་དན། ལྡ་ལྡི་སོགས་སྣ་ཚོགས་པ། དཀོན་ཞིང་རིན་ཚད་མེད་པའི་རོལ་མོ་མཁའ་ལྡིང་ཞེས་གྲགས་པ་དང་། རྒྱ་གླིང་ནག་བཀྲ་མ་ཞེས་གྲཊ་པ། མཁར་རྔ་ཉི་མ་འབྲུག་གྲགས་ཞེས་དང་། རྐང་གླིང་རྫོང་དགའ་མ་ཞེས་གྲགས་པ། དུང་དཀར་པོ་གཡས་སུ་འཁྱིལ་བ། དཀར་མོ་རྒྱང་གྲགས་རྣམས་ཀྱིས་གཙོས་རྔ་དང་རྔ་ཆེན། རྔ་ཁ་གཅིག་པ། རོལ་མོ་སྦུབས་ཆེན། སིལ་སྙན། གླིང་བུ་སྣ་ཚོགས་པ། དུང་ཆེན། དུང་དཀར། ཅང་ཏེའུ། ཏིང་ཏིང་ཤག་སོགས་རོལ་མོའི་བྱེ་བྲག་མཐའ་ཡས་པ། བུམ་པ་སོགས་དཀྱིལ་འཁོར་གྱི་བྱ་བ་སོགས་ལ་དགོས་པའི་ཡོ་བྱད། གཞན་ཡང་ཉེར་མཁོ་སྣ་ཚོགས་པའི་རིགས་བསམ་གྱིས་མི་ཁྱབ་པ་གདེངས་ཅན་དབང་པོའི་གནས་སུ་རིན་ཆེན་དབྱིག་གིས་གཏམས་པ་དང་མཚུངས་སོ།། ༈ གཉིས་པ་ལོ་ཟླ་ཚེས་དུས་སྒྲུབ་མཆོད་ཇི་སྙེད་བྱུང་ཚུལ་ལ། དུས་མཆོད་ཀྱི་རིགས་ཇི་སྙེད་བྱུང་བ་དང་། དེ་དག་གི་དབུར་བཞུགས་སློབ་དཔོན་གང་ཡིན་པ། དེ་དག་ལས་བློ་ལ་འཛིན་དགོས་པ་གང་དག་ཡིན་པ་གསུམ་ལས། དང་པོ་ནི། ཆོས་གྲྭ་ཆེན་པོ་འདི་ཉིད་དུ་ས་ཆེན་པོ་ལ་གནས་པའི་སེམས་དཔའི་སྒྱུ་འཕྲུལ་ཆོས་རྒྱལ་རིམ་བྱོན་དང་། ས་ངོར་ཚར་པ་སོགས་རྫོགས་པའི་སངས་རྒྱས་དང་ཞལ་མི་གཉིས་པའི་སྐྱེས་ཆེན་རིམ་བྱོན་མཆོད་ཡོན་དུ་འབྲེལ་ཏེ་ལོ་ཟླ་ཚེས་དུས་ཀྱི་དུས་མཆོད་རིགས་སྔ་ཕྱིར་ཅི་རིགས་པར་བཙུགས་པ་ལྟར་རྒྱུན་གནས་སུ་བྱུང་བ་ནི། ལོ་བསྟར་ཟླ་བ་བཅུ་གཉིས་པར་ངོར་ཆེན་ཀུན་དགའ་བཟང་པོ་གཟུགས་སྐུ་དབྱིངས་སུ་བསྡུ་བའི་ཚུལ་བསྟན་པའི་ཟླ་དུས་ཀྱི་མཆོད་འབུལ་དང་བསྟུན། ཚེས་ཉི་ཤུ་ལྔ་ནས་བརྩམས་ཏེ་ཟླ་བ་དང་པོའི་ཚེས་བཅུ་དྲུག་གི་བར་དུ་དགོན་འདི་ཉིད་དུ་གཉུག་མར་གནས་པའི་དགེ་སློང་གི་དགེ་འདུན་ཇི་སྙེད་ཅིག་བཞུགས་པ་དང་། གཞན་ཡང་ལྕགས་ར་དགོན། འཁོར་མདོ་དགོན། མཎྜལ་དགོན། སྒ་ལེན་སྟེང་དགོན། ཡེ་ན་དགོན། རབ་བརྟན་དགོན་པ་སྟེ་དགོན་མ་ལག་བདུན་གྱི་བླ་མ་དང་། དགེ་སློང་ཞིབ་རྒྱས་སུ་འདུ་བའི་དགེ་འདུན་གྱི་འདུ་བ་ཆེན་མོར་གྲགས་པ་གཙུག་ལག་ཁང་ཆེན་པོ་བསམ་གྲུབ་མཐོང་གྲོལ་ཆེན་མོའི་ནང་དུ་འཚོགས་ཤིང་། ཐོག་མར་བཅོམ་ལྡན་འདས་རྡོ་རྗེ་འཇིགས་བྱེད་འཁོར་དང་བཅས་པའི་གཏོར་མའི་ཆོ་ག་དྲུག་ཅུ་པ་དང་གཏོར་རྒྱབ་བཅས་པའི་ཉིན་ལྔ། དེའང་། ཚེས་ཉེར་བརྒྱད་ལ་སྐྱ་འཆམ། ཚེས་ཉེར་དགུའི་ཉིན་ལྷ་ཆེན་དང་བཅས་པའི་གཏོར་འཆམ། མདུན་ཧོར་གཟབ་རྒྱས་ཀྱིས་གཏོར་བོག་འཕེན་པ་སོགས་རྒྱས་སྤྲོས་ཀྱིས་གཏོར་རྒྱག །གཞན་ཡང་ཀཿཐོག་དགོན། དཔལ་ཡུལ་དགོན། རྨུགས་སངས་དགོན། རྡོ་བྲག་དགོན། བྲོ་གདུང་དགོན་གྱི་བླ་མ་དཔོན་སློབ་རྣམས་དང་། མཁར་མདོར་རག་མཁར་སྔགས་པ་འཁོར་བཅས་དགོན་འདིར་ལྷགས་ཏེ་རང་རང་གི་ལུགས་ཀྱི་གཏོར་བཟློག་གི་རིགས་དྲུག་ཅུའི་ཆེན་པོའི་གཏོར་ཆེན་ཉིན་གཏོར་རྒྱག་མཛད། ཧོར་ཟླ་དང་པོའི་ཚེས་གཅིག་ཉིན་རྣམ་རྒྱལ་སྟོང་མཆོད་དང་། རྣམ་འཇོམས་ཆོ་ག་གཉིས་འཚོགས་ཤིང་། དེ་ཉིན་འདུ་བའི་ཚོགས་གྲབ་ཡིན། ཚེས་གཉིས་ནས་བརྩམས་ཏེ་ཚེས་བཅུ་དྲུག་གི་བར་དུ་མན་ངག་ལུགས་ཀྱི་ཀྱེ་རྡོ་རྗེ་ལྷ་དགུའི་དཀྱིལ་འཁོར་དང་། གུར་རིགས་བསྡུས་མཁའ་འགྲོ་ལྔའི་ཕོ་བྲང་ལྷ་བཞི་བཅུ་རྩ་དགུའི་དཀྱིལ་འཁོར། སམྤུཊ་རྡོར་དབྱིངས་ལྷ་སུམ་ཅུ་རྩ་བདུན་གྱི་དཀྱིལ་འཁོར། བདེ་མཆོག་ལཱུ་ཧི་པའི་ལུགས་ལྷ་དྲུག་ཅུ་རྩ་གཉིས། བདེ་མཆོག་ནག་པོ་ལུགས་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར། གསང་འདུས་མི་སྐྱོད་རྡོ་རྗེ་ལྷ་སུམ་ཅུ་རྩ་གཉིས་ཀྱི་དཀྱིལ་འཁོར། གསང་འདུས་འཇམ་པའི་རྡོ་རྗེ་ལྷ་བཅུ་དགུ་པའི་དཀྱིལ་འཁོར་ཏེ་ངོར་ལུགས་དཀྱིལ་འཁོར་བདུན་དུ་གྲགས་པ་འཚོགས་ཏེ། དེ་ཐམས་ཅད་ཀྱང་སྟ་གོན་ཚོམ་བུ་ལ་བརྟེན་པ། དངོས་གཞི་རྡུལ་ཚོན་ལ་བརྟེན་ཏེ་སྒྲུབ་ཅིང་མཆོད་པ། འཇུག་ཅིང་དབང་བླང་བ། རྗེས་གཤེགས་གསོལ་གྱི་ཆོ་ག་ལེགས་པར་མཛད། ཡང་དུས་ཚེས་དེ་དང་མཉམ་དུ་ཆོས་སྒྲོག་མཁན་བརྒྱ་ལྷག་གིས་རྒྱལ་བའི་བཀའ་འགྱུར་ཚར་གྲངས་ཕལ་འགྲོར་ཀློག་པ། སླར་ཡང་ཆོས་སྒྲོག་མཁན་ཉུང་ཤས་ཀྱིས་ཤེར་ཕྱིན་འབུམ་པ་ཚར་བརྒྱ་མན་ཆད་གང་འགྲུབ། བཀའ་འགྱུར་ཚར་གཅིག་ཀློག །ཟླ་བ་དེའི་ཚེས་༡༨ནས་གནམ་སྟོང་གི་བར་དུ་རྡོ་རྗེ་ཕུར་པ་ས་ལུགས་ཀྱི་དཀྱིལ་འཁོར་ཆེན་པོ་རྡུལ་ཚོན་ལ་བརྟེན་པའི་སྒྲུབ་མཆོད་འཚོགས་ཤིང་། ཚེས་བཅོ་བརྒྱད་དང་བཅུ་དགུ་གཉིས་ལ་འཆམ་པ་ཞེ་གཅིག་གིས་ཕུར་ཆུང་རྩ་འཆམ། ཚེས་ཉེར་བརྒྱད་དང་ཉེར་དགུ་གཉིས་ལ་ཕུར་ཆེན་བསྒྲལ་འཆམ་མཛད། ཕུར་པའི་སྐབས་དེར་རྒྱལ་མཚན་བླ་མ་དབུར་བཞུགས་ནས། དགེ་འདུན་མང་སྙེད་ཀྱིས་མཁྱེན་བརྩེའི་དབང་པོའི་གདུང་མཆོད་ཀྱེ་རྡོར་སྒྲུབ་མཆོད་ཉིན་བཅུ་ཤས་འཚོགས། ཧོར་ཟླ་གཉིས་པའི་ཚེས་གཅིག་ནས་དཔལ་ཀྱེ་རྡོ་རྗེའི་དཀྱིལ་འཁོར་ལ་བརྟེན་པའི་རབ་གནས་དཔལ་འབྱོར་རྒྱ་མཚོ་ཚེས་བཅོ་ལྔའི་བར་འཚོགས། ཚེས་བཅུ་དྲུག་ནས་མགོན་པོ་ཁྲོ་བཅུའི་གཏོར་བཟློག་འཚོགས་ཤིང་། ཚེས་ཉེར་གཅིག་ཉིན་གཏོར་རྒྱག་མཛད། ཚེས་ཉེར་གསུམ་ནས་གནམ་སྟོང་བར་མགོན་པོ་ཚར་ལུགས་ལྟར་གྱི་གཏོར་བཟློག་ཆོས་ཉིད་མར་གྲགས་པར་འཚོགས་ཤིང་། ཚེས་ཉེར་བརྒྱད་དང་ཉེར་དགུའི་ཉིན་རུ་འདྲེན་སྡེ་བཞི་དང་སྒོ་མ་བཞི་སོགས་ཀྱི་འཆམ། ཚེས་ཉེར་དགུའི་ཉིན་གཏོར་རྒྱག་མཛད། ཧོར་ཟླ་གསུམ་པའི་ཚེས་གཅིག་ནས་ཚེས་ལྔའི་བར་དུས་འཁོར་གར་སྦྱངས། ཚེས་བརྒྱད་ནས་ཉེར་དྲུག་གི་བར་དུ་དཔལ་དུས་ཀྱི་འཁོར་ལོ་རྭ་འབྲོ་ཆུ་བོ་གཉིས་འདྲེས་བུ་ལུགས་ལྟར་གྱི་སྐུ་གསུང་ཐུགས་ཡོངས་སུ་རྫོགས་པའི་སྒྲུབ་མཆོད་འཚོགས་ཏེ། ཚེས་བཅུར་ས་གར་འཆམ་པ། ཚེས་བཅོ་ལྔ་ལ་དངོས་གཞི་དང་པོ་དང་རྒྱས་པའི་སྦྱིན་སྲེག་མཆོད་གར་དང་བཅས་པ། ཚེས་ཉེར་ལྔར་དཀྱིལ་འཁོར་གཤེགས་ཤིང་། ཚེས་ཉེར་དྲུག་ལ་རྡུལ་ཚོན་ཆུ་གཤེགས་མཛད། ཚེས་ཉེར་བདུན་ནས་ཧོར་ཟླ་བཞི་པའི་ཚེས་དགུའི་བར་དབྱར་མཆོད་ཅེས་དཔལ་ཀྱེ་རྡོ་རྗེ་མན་ངག་ལུགས་ཀྱི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་འཚོགས། ཚེས་བཅུ་ནས་ཉི་ཤུ་གསུམ་བར་ངན་སོང་ཐམས་ཅད་ཡོངས་སུ་སྦྱོང་བའི་ཀུན་རིག་རྩ་བའི་ལྷ་སོ་བདུན་མགྲོན་ཐབས་ཀྱི་ལྷ་དང་བཅས་པའི་དཀྱིལ་འཁོར་རྡུལ་ཚོན་ལ་བརྟེན་པ་སྒྲུབ་ཅིང་མཆོད་པ་དང་བདག་ཉིད་འཇུག་ཅིང་དབང་བླང་བ་དང་། ཕྱོགས་སོ་སོ་ནས་འདུས་པའི་སེར་སྐྱ་མང་ཚོགས་ལ་འཇུག་ཅིང་དབང་བསྐུར་བ་མཇུག་ཏུ་ཞི་རྒྱས་དབང་དྲག་གི་ལས་བཞིའི་སྦྱིན་སྲེག་དང་བཅས་པ་འཚོགས། ཚེས་ཉེར་ལྔ་ངོར་ཆེན་རྡོ་རྗེ་འཆང་གི་སྐུ་མཆོད་ལ་དངོས་གཞི་ཁེལ་བར་ཚེས་ཉེར་བཞི་ནས་སུམ་ཅུའི་བར་མཁའ་བདག་གཉིས་ཞེས་དཔལ་བདེ་མཆོག་མཁའ་འགྲོ་རྒྱ་མཚོའི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་དང་། རྗེ་བཙུན་རྡོ་རྗེ་བདག་མེད་མ་ལྷ་མོ་བཅོ་ལྔ་འི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་འཚོགས། འདི་སྐབས་སུ་ལོ་སྔོན་མའི་དབྱར་གནས་ཚོགས་པས་སྙུང་གནས་ཀྱི་ཆོ་ག་མཛད། ཧོར་ཟླ་ལྔ་པའི་ཚེས་གཅིག་ནས་དྲུག་གི་བར་དུ་དམར་ནག་འཇིགས་གསུམ་ཞེས་གཤིན་རྗེ་གཤེད་དམར། དགྲ་ནག་པོ། འཇིགས་བྱེད་རོ་ལངས་བརྒྱད་སྐོར་རྣམས་ཀྱི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་འཚོགས། ཟླ་བ་དེའི་ཡར་ཚེས་གཟའ་སྐར་སྦྱོར་ལེགས་ཉིན་ཞིག་ལ་བཀྲ་ཤིས་གསོ་སྦྱོང་མཛོད་ཅིང་། ཚེས་བཅོ་ལྔ་ལ་མཐུན་པའི་གསོ་སྦྱོང་། ཚེས་བཅུ་དྲུག་ཉིན་ནས་དགེ་སློང་བརྒྱད་ཅུ་དང་དགེ་ཚུལ་ཉི་ཤུ་བཅས་བརྒྱ་ཕྲག་ཐམ་པ་དབྱར་ཁས་ལེན་བྱེད་ཅིང་། ཧོར་ཟླ་དྲུག་པའི་ཚེས་སུམ་ཅུའི་ཉིན་དབྱར་དགག་དབྱེ་དང་། ཚེས་གཅིག་ནས་ཆུ་ནག་མར་ལྗོངས་རྒྱུར་འཕན་གདུཊ་ཡོ་བྱད་སོགས་དང་ཆོས་གོས་སྣམ་སྦྱར་བཅས་སེར་ཕྲེང་མཛེས་པོ་བཤར། ཚེས་གཅིག་ཉིན་སྔ་དྲོར་ལྷ་བསང་རྒྱལ་བརྔན་ཆ་ལག་དང་བཅས་པ། ཕྱི་དྲོར་ཆོས་རྒྱལ་ནོར་བཟང་གི་ཟློས་གར་འཆམ། ཚེས་གཉིས་ཉིན་སྔ་དྲོར་བསང་དང་ཉེ་བརྒྱུད་ཚེ་རྟ་ཟུང་འབྲེལ་གྱི་ཚེ་དབང་མང་ཚོགས་ལ་བསྐུར། ཕྱི་དྲོར་སྟོན་པའི་སྐྱེས་རབས་རི་དྭགས་ཀྱི་རྒྱལ་པོ་ཤ་ར་བྷི་ཟློས་གར་འཆམ། དབྱར་གནས་ཀྱི་རིང་ལ་སྔ་དྲོར་རྒྱུན་ཆགས་གསུམ་པ། ཉིན་གུང་གཟུངས་སྔགས་བསྔོ་སྨོན་གྱི་སྐོར། དོ་ནུབ་བཟང་སྤྱོད་སྨོན་ལམ་རྣམ་ལྔ་བཅས་ཆད་མེད་དང་། ཆོས་འཆད་རྩོད། ཆོ་ག་ཆོས་སྤྱོད་ཀྱི་རིགས་མང་པོ་ཡོད། དེ་སྐབས་དབྱར་གནས་ཚོགས་པ་ལས་གཞན་རྣམས་ཀྱིས་མ་ཎི་བུམ་སྒྲུབ་དང་། སིདྡྷ་ལོ་རེ་མོས་སུ་དུང་རེ་འགྲོ་ངེས་མཛད། གཞན་ཡང་སྔོན་དུས་སུ་ཟླ་བ་གསུམ་པའི་ཚེས་ཉེར་ལྔ་ནས་ཉེར་དགུའི་བར་འཇིགས་བྱེད་གཏོར་མ་དྲུག་ཅུ་རྩ་བཞི་པའི་གཏོར་རྒྱག །ཟླ་བ་བཞི་པའི་ཚེས་ཉེར་གསུམ་ནས་ཉེར་དགུའི་བར་རྡོ་རྗེ་ཕུར་པ་ས་ལུགས་ཀྱི་གཏོར་བཟློག། ཟླ་བ་བདུན་པའི་ཚེས་གསུམ་ནས་ཉེར་དགུའི་བར་མགོན་པོའི་གཏོར་མ་དྲུག་ཅུ་རྩ་བཞི་པའི་གཏོར་བཟློག །ཟླ་བ་བརྒྱད་པར་མགོན་པོའི་གཏོར་བཟློག་བཅས་བྱུང་འདུག །ཟླ་བ་དགུ་པའི་ཚེས་བཅུ་བཞིར་དཔལ་ས་སྐྱ་པ་ཆེན་པོ་ཀུན་དགའ་སྙིང་པོ་དགོངས་པ་རྫོགས་པའི་དུས་ཀྱི་མཆོད་པ་ས་སྐོར་ཆེན་པོ་ཞེས་གྲགས་པ་ས་ངོར་གྱི་དགོན་སྡེ་མཐའ་དག་ལ་ཡོད་པ་དང་མཐུན་པར་གཙུག་ལག་ཁང་བསམ་གྲུབ་མཐོང་གྲོལ་ཆེན་པོའི་ནང་དུ་དུས་ཐང་གི་སྐུ་བརྙན་མཐོང་བ་དོན་ལྡན་བཀྲམ་པའི་མདུན་ན་མཆོད་ཡོན། མེ་ཏོག །སྤོས། མར་མེའི་ཕྲེང་བ། བྱུག་པ། ལྷ་བཤོས་སོགས་མཆོད་པའི་ཉེར་སྤྱོད་བརྒྱ་སྟོང་གྲངས་མེད་པ་བཤམ་སྟེ། བླ་མ་དང་དགེ་སློང་གི་དགེ་འདུན་གྱི་ཚོགས་ཇི་སྙེད་བཞུགས་པ་འདུས་ཏེ་མཆོད་པ་དང་། བསྟོད་པའི་གདངས་དབྱངས་ཡིད་དུ་འོང་བ་བསྒྱུར་ཏེ་མཆོད་ཅིང་རྗེད་པར་བྱེད་པ་དང་། དེ་ནས་འབུད་དཀྲོལ་གྱི་བྱེ་བྲག་དཔག་ཏུ་མེད་པ་དང་། གདུགས། རྒྱལ་མཚན། འཕན། བ་དན་སོགས་ཡོ་བྱད་ཀྱི་ཕྲེང་བ་མཛེས་ཤིང་ལྟ་ན་སྡུག་པ་ནམ་མཁའ་ལ་འཕྱང་བ། དཔྱངས་པ། རླུང་གིས་བསྐྱོད་པ་དག་བཟུང་ནས་སེར་ཕྲེང་གི་བཀོད་པ་ངོ་མཚར་བར་ཕེབས་ཤིང་། ཕྱི་རོལ་རྡོ་བཅལ་སྟེང་དུ་དཔལ་དུས་ཀྱི་འཁོར་ལོའི་མཆོད་གར་འཆམ་པ་དང་བཅས་པས་རི་མོར་བྱེད་པ་དང་། དེ་ནས་ལམ་འབྲས་བླ་མ་མཆོད་པ་བླ་མ་རིན་འབྱུང་གི་མཆོད་ཆོག་དང་སྦྲགས་ནས་གསུངས། ཚེས་བཅོ་ལྔ་ཉིན་བསྐང་གསོ་རྒྱས་པར་གསུངས། ཚེས་ཉེར་ལྔ་ནས་ཉེར་དགུ་བར་མགོན་པོའི་དམར་ཆེན་གཏོར་བཟློགས་འཚོགས་ཤིང་། ཚེས་ཉེར་བརྒྱད་དང་ཚེས་ཉེར་དགུ་གཉིས་ལ་གཏོར་འཆམས། ཚེས་ཉེར་དགུའི་ཉིན་གཏོར་རྒྱག །གཏོར་བོག་འཕེན་པ་རྒྱས་སྤྲས་ཡོད། ཧོར་ཟླ་བཅུ་པའི་ནང་ལ་རྣམ་རྒྱལ་སྟོང་མཆོད་དང་། རྣམ་འཇོམས་བུམ་སྒྲུབ་ཀྱི་ཆོ་ག །དགུན་ཉི་ལྡོག་གི་དུས་ཚོད་རི་མོའི་ངེས་པ་དང་བསྟུན་ཏེ་གཙུག་ལག་ཁང་ཆེན་དུ་འཇིགས་བྱེད་དྲུག་ཅུ་པའི་གཏོར་བཟློག་ཕྱོགས་སྐྱོང་བཅུ་སོགས་གཏོར་འཆམ་དང་བཅས་པ་ཉིན་ལྔ། སྲིབ་དགོན་དུ་སེང་གདོང་མའི་གཏོར་བཟློག །བར་གླིང་དུ་སྒྲོལ་མ་གཡུལ་མདོས། ཉིན་དགོན་སྟོད་དུ་འཇིཊ་བྱེད་དྲུག་ཅུ་པའི་གཏོར་བཟློག་རྣམས་ཉིན་ལྔ་རེ། སྤར་ཁང་དུ་འཇིགས་བྱེད་དྲུག་ཅུའི་གཏོར་བཟློག་ཉིན་གསུམ་ལ་འཚོགས། ཧོར་ཟླ་བཅུ་གཉིས་པའི་ཡར་ཚེས་ལ་གཙང་ཁང་དུ་གཡང་སྐྱབས་ནོར་བུ་མཆོག་རྒྱལ་སོགས་གཡང་སྐྱབས་ཀྱི་རིགས་མང་པོ་ཉིན་གསུམ་རེ་དང་། གླིང་ཁག་སོ་སོ་ལའང་གཡང་སྐྱབས་ཉིན་གསུམ་རེ་འཚོགས། ཚེས་བཅོ་བརྒྱད་ནས་ཉིན་གསུམ་གྱི་བར་དུ་ལྷ་མོ་ལོ་གྱོན་མའི་བུམ་སྒྲུབ་དང་རིམས་འགོག་འཚོགས་ཤིང་། ཚེས་ཉི་ཤུའི་ཉིན་དགྲ་བཅོམ་ཆོས་འཁོར་ཞེས་དགེ་འདུན་ཇི་སྙེད་པས་སེར་ཕྲེང་གི་བཀོད་པ་མཛེས་ཉམས་བཅས་རྒྱལ་བའི་བཀའ་འགྱུར་རིན་པོ་ཆེ་གདན་དྲངས་ཏེ་གླིང་བསྐོར་གྱི་ཕྱོགས་བཞིར་ལོ་གྱོན་ཚོགས་པས་ལོ་གྱོན་དང་། གཞན་གྱིས་ཤེས་རབ་སྙིང་པོ་བཟློག་པ་དང་བཅས་པའི་མཐར་བཀའ་འགྱུར་པུསྟཀ་བཅས་ཐལ་རྡེག་བྱེད། གཞན་ཡང་ཟླ་བ་དེར་འཇམ་དཔལ་ཚེ་བདག་གི་གཏོར་བཟློག་རྡོ་བྲག་དགོན་པའི་བླ་མ་དཔོན་སློབ་བཅས་པས་འཚོགས་ཤིང་དེའི་འཆམ་དགོན་འདི་ཉིད་ཀྱི་གྲྭ་པས་བྱེད་འདུག །གཞན་ཡང་ཟླ་དུས་ཀྱི་མཆོད་པ་ལ། ཟླ་བ་ཐམས་ཅད་ཀྱི་ཚེས་གསུམ་ལ་ཤེར་ཕྱིན་འབུམ་པ་ཚར་རེ། ཚེས་བརྒྱད་ཀྱི་ནང་པར་སྒྲོལ་མ་ལྷ་ཁང་དུ་རྣམ་རྒྱལ་སྟོང་མཆོད། ཨ་ཐིག་བང་རྒོད་དུ་ལམ་ཟབ་བླ་མཆོད། ཤར་ནུབ་མགོན་ཁང་དུ་བསྐང་གསོ་རྒྱས་པ། ཚེས་བཅུར་ལྷ་ཁང་གསར་པར་དཀོན་མཆོག་སྤྱི་འདུས། བཅུ་གཉིས་ལ་ཀུན་དགའ་ཆོས་འཕེལ་གྱི་གདུང་ཁང་དུ་ཀུན་རིག་བསྙེན་རྒྱས་མདུན་བསྐྱེད་ཆོ་ག་དང་བཅས་པ། བཅུ་བཞིར་ལམ་འབྲས་ལྷ་ཁང་དུ་བླ་མ་རིན་འབྱུང་མཆོད་ཆོག །ངོར་པའི་ཆོས་སྤྱོད་ཀྱི་རིམ་པ་མཚན་བརྗོད་སྨོན་ལམ་དང་བཅས་པ། མགོན་ཁང་གཉིས་སུ་བསྐང་བ་རྒྱས་པ། སྡེ་དགེ་གྲུབ་ཐོབ་པའི་དུས་མཆོད་ལམ་ཟབ་བླ་མཆོད། ཉི་ཤུར་མཁན་ཆེན་བཀྲ་ཤིས་ལྷུན་གྲུབ་ཀྱི་གདུང་ཁང་དུ་ལམ་འབྲས་བླ་མཆོད། ཉེར་གསུམ་ལ་ལམ་འབྲས་ལྷ་ཁང་དུ་ཞང་བློན་རྡོ་རྗེ་བདུད་འདུལ་གྱི་བསྐང་གསོ་ཚོགས་དང་བཅས་པ། མགོན་ཁང་གཉིས་སུ་བསྐང་བ་རྒྱས་པ། གནམ་སྟོང་ཉིན་སློབ་དཔོན་ཆེན་པོའི་གསོལ་འདེབས་ལེའུ་བདུན་མ་རྣམས་ཟླ་རེ་བཞིན་དང་། ཉིན་རྟག་པར་སྒྲོལ་མ་ལྷ་ཁང་དུ་སྒྲོལ་མ་མཎྜལ་བཞི་ཆོག །སྲིབ་དགོན་ལྷ་ཁང་དུ་ཀུན་རིག་གི་ཆོ་ག །ལྷ་ཁག་བཅོ་བརྒྱད་དུ་བསྐང་གསོ་བཅས་ཉིན་བསྟར་མ་ཆག་པར་གསུང་རྒྱུ་ཡོད། སྡེ་དགེ་ཆོས་རྒྱལ་ཆེན་པོའི་སྐུའི་སྲུང་བ་པ་སྐུ་ཞབས་གྲྭ་ཚང་རྣམས་ཀྱིས་གདོན་པར་བྱ་བའི་དུས་མཆོད་ཀྱི་རིམ་པ་ལ་ལོ་དུས་ཀྱི་མཆོད་པར། ངོར་ལུགས་མགོན་པོ་ཆེ་ཆུང་གི་བསྐང་བ་བརྒྱ་ཚར། དཔལ་ལྡན་དམག་ཟོར་རྒྱལ་མོའི་བསྐང་བ་བརྒྱ་ཚར། འཇའ་ཚོན་སྙིང་བོའི་ལུགས་ཀྱི་དཀོན་མཆོག་སྤྱི་འདུས་ཚོགས་འཁོར་བརྒྱ་ཚར། གུ་རུ་དྲག་པོ་མེ་རླུང་འཁྱིལ་བའི་བསྐང་བ་བརྒྱ་ཚར། ཀློང་གསལ་ལུགས་ཀྱི་ཡེ་ཤེས་རབ་འབར་གྱི་བསྟན་སྲུང་ཡོངས་རྫོགས་ཀྱི་བསྐང་བ་བརྒྱ་ཚར། འཁོར་ལོ་བདེ་མཆོག་ལས་བཀའ་སྲུང་སྐྱེས་བུ་ཆེན་པོའི་བསྐང་བ་བརྒྱ་ཚར། མགོན་པོ་ཚོགས་བདག་གི་བསྐང་བ་རྣམས་གསུངས། ཟླ་དུས་ཀྱི་མཆོད་པར་ཟླ་བ་ཐམས་ཅད་ཀྱི་ཚེས་གཅིག་ལ་རྣམ་རྒྱལ་སྟོང་མཆོད། གཉིས་ལ་རྣམ་འཇོམས་བུམ་ཆོག །གསུམ་ལ་ཆོས་རྒྱལ་བསྟན་པ་ཚེ་རིང་གི་དུས་མཆོད་སྐྲ་རོ་མཁའ་སྤྱོད་མའི་ཆོ་ག་སིནྡྷུརའི་དཀྱིལ་འཁོར་ལ་བརྟེན་པ། བཞི་ལ་ཚེ་དཔག་ལྷ་དགུའི་དཀྱིལ་ཆོག །ལྔ་ལ་པདྨརིག་འཛིན་དུས་མཆོད་དཀོན་མཆོག་སྤྱི་འདུས། དྲུག་ལ་ངོར་ལུགས་ཀྱི་ཆོས་སྤྱོད་རྒྱས་པ། བདུན་ལ་གསོལ་འདེབས་ལེའུ་བདུན་མ་དང་ཀློང་གསལ་ལུགས་ཀྱི་ཚེ་སྒྲུབ་ཡང་གསང་བླ་མེད། བརྒྱད་ལ་སློབ་དཔོན་ངག་དབང་གྲགས་པའི་ལུགས་ཀྱི་སྒྲོལ་དཀར་ཡིད་བཞིན་འཁོར་ལོའི་ཆོ་ག་དང་། བླ་མ་དགོངས་འདུས་ཚོགས་བསྐང་། ངོར་ལུགས་བསྐང་བ། དགུ་ལ་གཏེར་སྟོན་ཉི་གྲགས་ལུགས་ཀྱི་བདུད་འདུལ་མ། བཅུ་ལ་གསོལ་འདེབས་བསམ་པ་ལྷུན་གྲུབ་དང་དཀོན་མཆོག་སྤྱི་འདུས། བཅུ་གཅིག་ལ་རྗེ་མོའི་དགོངས་རྫོགས་སུ་ཀུན་རིག་དཀྱིལ་ཆོག །བཅུ་གཉིས་ལ་བླ་མ་ཀུན་དགའ་ཆོས་འཕེལ་གྱི་དུས་མཆོད་དུ་ཀུན་རིག་བསྙེན་པ་རྒྱས་པའི་ཆོ་ག །བཅུ་གསུམ་ལ་བཞད་པ་རྡོ་རྗེའི་ལུགས་ཀྱི་བཀྲ་ཤིས་ཚེ་རིང་མའི་གསོ་བསྐང། བཅུ་བཞི་ལ་ཉི་གྲགས་ལུཊ་ཀྱི་ཚེ་སྒྲུབ་བདུད་བཞིའི་གཡུལ་རྒྱལ་དང་། ངོར་ལུགས་བསྐང་བ། བཅོ་ལྔ་ལ་ལྷ་བསང་རྒྱལ་བརྔན་དང་དཀོན་མཆོག་སྤྱི་འདུས་དང་ཡང་འདུས། བཅུ་དྲུག་ལ་སྒྲོལ་དཀར་ཆོ་ག །བཅུ་བདུན་ལ་ཐུབ་དབང་གནས་བརྟན་ཕྱག་མཆོད། བཅོ་བརྒྱད་ལ་མཁན་ཆེན་སངས་རྒྱས་ཕུན་ཚོགས་ཀྱི་དུས་མཆོད་དུ་ལམ་འབྲས་ཕྱག་མཆོད། བཅུ་དགུ་ལ་ཉི་གྲགས་ལུགས་ཀྱི་རྟ་མགྲིན་དྲེགས་པ་ཟིལ་གནོན་དང་ལྷ་ཆེན་ཚོགས་བསྐང་། ཉི་ཤུ་ལ་བསྟན་བཅོས་སྡོམ་གསུམ་རབ་དབྱེ། ཉེར་གཅིག་ལ་འཇམ་མགོན་བཀྲ་ཤིས་དཔལ་ལྡན་གྱི་དུས་མཆོད་དུ་ལམ་འབྲས་བླ་མཆོད། ཉེར་གཉིས་ལ་ཀློང་གསལ་ལུགས་ཀྱི་ཡེ་ཤེས་རབ་འབར་ཚོགས་བསྐང་། ཉེར་གསུམ་ལ་ངོར་ལུགས་བསྐང་བ་དང་། དམག་ཟོར་མའི་བསྐང་བ། རཏྣལུགས་ཀྱི་གུར་དྲག་མེ་རླུང་འཁྱིལ་བའི་བསྐང་བ། ཉེར་བཞི་ལ་དཔལ་ས་སྐྱ་པ་བསོད་ནམས་དབང་ཕྱུག་པའི་དུས་མཆོད་དུ་བླ་མ་མཆོད་ཆོག །ཉེར་ལྔ་ལ་ཁྲི་ཆེན་སངས་རྒྱས་བསྟན་པ་དང་། ཕུན་ཚོགས་བསྟན་པ་གཉིས་ཀྱི་དུས་མཆོད་དུ་མི་འཁྲུགས་པའི་ཆོ་ག་དང་ནཱ་རོ་མཁའ་སྤྱོད་མའི་ཆོ་ག །ཉེར་དྲུག་ལ་ཆོས་སྤྱོད་རྒྱས་པ། ཉེར་བདུན་ལ་ཞི་བ་ལྷའི་སྤྱོད་འཇུག །ཇོ་བོའི་བྱང་སེམས་ནོར་བུའི་ཕྲེང་བ། ཀླུ་སྒྲུབ་ཀྱི་བཤེས་སྤྲིང་། ཉི་གྲགས་ལུགས་ཀྱི་བདེ་མཆོག་ཚོགས་བསྐང་། ཉེར་བརྒྱད་ལ་མཁན་ཆེན་དཔལ་མཆོག་རྒྱལ་མཚན་པའི་དུས་མཆོད་དུ་ལམ་འབྲས་ཕྱག་མཆོད། ཉེར་དགུ་ལ་ངོར་ལུགས་བསྐང་བ་དང་དམག་ཟོར་མའི་བསྐང་བ། ཡེ་ཤེས་རབ་འབར་ཚོགས་བསྐང་། གནམ་སྟོང་ལ་སྒྲོལ་མ་མཎྜལ་བཞི་ཆོག་དང་། གནམ་ཆོས་ཚོགས་བསྐང་རྣམས་ཟླ་བ་བྱུང་ངོ་ཅོག་ལ་གསུང་རྒྱུ་ཡོད། ཉིན་རེ་བཞིན་རྒྱུན་ཁྱེར་དུ་ཡེ་ཤེས་རབ་འབར་ལས་སེངྒེའི་གདོང་མ་ཅན། མ་མོ་དང་མགོན་པོ་ཚོགས་བདག །རྣམ་སྲས་རྟ་བདག་བརྒྱད་བཅས་མང་པོ་དང་། དཀོན་མཆོག་སྤྱི་འདུས་སོགས་མང་པོ་ཉིན་ལྟར་བྱུང་འདུག །དེ་ལྟར་གོང་དུ་བཤད་པའི་ལོ་ཟླ་ཚེས་དུས་ཀྱི་མཆོད་པའི་རིགས་དེ་དག་རྣམས་དང་གཞན་ཡང་ཆོ་ག་ཆོས་སྤྱོད་ཀྱི་རིགས་སྣ་ཚོགས་པ་གནས་སྐབས་སྣ་ཚོགས་པ་རྣམས་སུ་རྒྱལ་བའི་ལུང་རྟོགས་ཀྱི་བདག་ཉིད་ཀྱི་བསྟན་པ་རིན་པོ་ཆེ་ཡུན་དུ་གནས་པ་དང་། བསྟན་འཛིན་གྱི་སྐྱེས་བུ་རྣམས་ཀྱི་ཞབས་པད་བརྟན་ཅིང་མཛད་ཕྲིན་རབ་ཏུ་རྒྱས་པ། ཡུལ་ཕྱོགས་འདིས་མཚོན་ཏེ་ཡངས་པའི་རྒྱལ་ཁམས་ཐམས་ཅད་དུ་བདེ་ཞིང་འབྱོར་པ། ལོ་ལེགས་པ། སྐྱེ་འགྲོ་ཀུན་གྱི་རྒྱུད་ཀྱི་སྡིག་སྒྲིབ་སྦྱངས་ཤིང་དགེ་ཚོགས་རབ་ཏུ་འཕེལ་བའི་རིམ་གྲོར་ལོ་ཟླ་ཁོར་མོ་ཡུག་ཏུ་བྱུང་ངོ་།། ༈ གཉིས་པ་དུས་མཆོད་དེ་དག་གི་དབུར་བཞུགས་སློབ་དཔོན་གང་ཡིན་པ་ནི། དེ་ལྟར་དུས་མཆོད་དེ་དག་གི་དབུར་བཞུགས་ཀྱི་སློབ་དཔོན་ངོར་གྱི་མཁན་ཞབས་རིམ་བྱོན་དང་། གདན་ས་ཆེན་པོ་དཔལ་ས་སྐྱའི་བླ་བསྐོས། དགོན་ཉིད་ཀྱི་རྒྱལ་མཚན་བླ་མ། ཤར་ནུབ་དབྱར་མཁན། དབུ་མཛད། ཟུར་བླ་རྣམས་ཀྱིས་བྱེད་ཅིང་། ཚོགས་ཆེན་ཕལ་ཆེ་བའི་དབུར་སྡེ་དགེའི་ཆོས་རྒྱལ་ཆེན་པོ་ཉིད་ཕེབས་པ་དང་། སྐབས་རེར་དགོན་དཔོན་བླ་མ་ཕེབས་ནས་ཚོགས་པའི་བཅའ་སྒྲིག་ཆོ་ག་དག་ཐེར་སོགས་གྲྭ་ས་ཆེན་པོའི་སྒྲིག་སྲོལ་མ་འཁྲུལ་བར་མཛད། དེ་ལ་དྲུག་ཅུ་ཆེན་པོའི་དབུར་བཞུགས་སློབ་དཔོན་ངོར་གྱི་མཁན་ཆེན་རིམ་བྱོན་དང་། ངོར་ཞབས་དྲུང་རིམ་བྱོན་གྱིས་མཛད་ཅིང་། ཕྱིས་སུ་རྒྱལ་མཚན་བླ་མ་དང་། དབུ་མཛད་ཆེ་བ་གཉིས་ཀྱིས་མཛད་དེ་དགོངས་གསོལ་ལྷན་དུ་གསུང་བ་དང་། ཟོར་གཏོར་གཉིས་ལྷན་དུ་རྒྱག་མཛད། ངོར་དཀྱིལ་བདུན་ལས་དབུས་ཀྱེ་རྡོ་རྗེའི་དཀྱིལ་འཁོར་གྱི་སྔ་ཆོག་གི་སློབ་དཔོན་ངོར་གྱི་མཁན་ཞབས་རིམ་བྱོན་གྱིས་མཛད་ཅིང་། ཕྱི་ཆོག་གི་སློབ་དཔོན་རྒྱལ་མཚན་བླ་མ་དང་། ས་སྐྱ་གྱང་ར་བླ་མ་གཉིས་ཡིན། ཟུར་ཆོག་དྲུག་གི་སློབ་དཔོན་ཟུར་བླ་དྲུག་གིས་བྱེད། རྡོ་རྗེ་ཕུར་པའི་སྒྲུབ་མཆོད་ཀྱི་དབུར་བཞུགས་སློབ་དཔོན་ནི་གདན་ས་ཆེན་པོ་ནས་མངགས་པའི་ས་སྐྱ་བླ་མ་དང་། ཕུར་པ་བླ་མ་གཉིས་ཡིན་ལ། ལོ་བསྟར་གཉིས་ཀ་ཚོགས་ལ་ཕེབས་ཤིང་རྡོར་སློབ་ལོ་རེས་མོས་སུ་བྱེད། རབ་གནས་ཀྱི་དབུར་བཞུགས་སློབ་དཔོན་རྒྱལ་མཚན་བླ་མས་མཛད། མགོན་པོ་ཁྲོ་བཅུའི་དབུར་བཞུགས་སློབ་དཔོན་ས་ཕུར་གཉིས་ཡིན་ལ། མགོན་པོའི་གཏོར་བཟློག་ཆོས་ཉིད་མའི་དབུར་བཞུགས་སློབ་དཔོན་ཤར་བླ་མ་ཡིན། དུས་འཁོར་སྒྲུབ་མཆོད་ཀྱི་སློབ་དཔོན་ཤར་བླ་མས་མཛད། དབྱར་མཆོད་ཀྱེ་རྡོར་སྒྲུབ་མཆོད་ཀྱི་སློབ་དཔོན་དབུ་མཛད་བཞི་འདོན་རེས་སུ་ཡིན་གྱིས་ཉིན་རེ་བཞིན་བྱེད། ཀུན་རིག་སྒྲུབ་མཆོད་ཀྱི་དབུར་བཞུགས་སློབ་དཔོན་ཤར་ནུབ་གཉིས་ལོ་རེ་བཞིན་རེས་མོས་སུ་བྱེད། དེའང་ཤར་བླ་མས་ཀུན་རིག་སློབ་དཔོན་བྱེད་ལོར་ནུབ་བླ་མས་ཟིལ་བརྒྱུད་དུ་སེར་བ་སྲུང་བཟློག་དགོས་པ་དང་། ནུབ་བླ་མས་ཀུན་རིག་གི་སློབ་དཔོན་བྱེད་ལོར་ཤར་བླ་མས་སེར་བ་སྲུང་བཟློག་བྱེད་དགོས། མཁའ་འགྲོ་རྒྱ་མཚོའི་སྒྲུབ་མཆོད་ཀྱི་དབུར་བཞུགས་སློབ་དཔོན་རྒྱལ་མཚན་བླ་མས་མཛད་ཅིང་། བདག་མེད་མའི་སྒྲུབ་མཆོད་ཀྱི་སློབ་དཔོན་དབུ་མཛད་གཅིག་གིས་བྱེད། སྙུང་གནས་ཀྱི་དབུར་བཞུགས་དབྱར་གནས་མཁན་པོས་མཛད། དམར་ནག་འཇིགས་གསུམ་གྱི་སློབ་དཔོན་ཟུར་བླ་རེས་བྱེད་ཅིང་། དབྱར་གནས་ཀྱི་དབུར་བཞུགས་དབྱར་གནས་མཁན་པོས་མཛད། མ་ཎི་དང་སིདྡྷའི་དུང་སྒྲུབ་ཀྱི་དབུར་བཞུགས་རྒྱལ་མཚན་བླ་མ་དང་། ཤར་ནུབ་བླ་མ་གང་རུང་གིས་མཛད། ས་སྐོར་ཆེན་པོའི་དབུར་བཞུགས་ངོར་གྱི་མཁན་ཞབས་རྣམས་དང་། དེ་མེད་ན་རྒྱལ་མཚན་བླ་མས་མཛད། ས་རྟ་རབ་མཛོ་ཞེས་ས་བསྐོར་གྱི་དབུ་བཞུགས་སུ་ཡིན་ལ་རྟ་དང་། རབ་གནས་ཀྱི་དབུར་བཞུགས་སུ་ཡིན་ལ་མཛོ་རེའི་འབུལ་བ་ཡོད་འདུག །དམར་ཆེན་གཏོར་བཟློག་གི་དབུར་བཞུགས་ཀྱི་སློབ་དཔོན་ནུབ་བླ་མ་ཡིན་ལ། ཉི་ལྡོག་སྐབས་ཀྱི་གཏོར་བཟློག་ལ་དགོན་གཞུང་དྲུག་ཅུའི་སློབ་དཔོན་དབུ་མཛད་ཆེ་བ་དང་། གླིང་ཁག་སོ་སོའི་ཉི་ལྡོག་དབུར་བཞུགས་གླིང་སོ་སོའི་བླ་མ་རྣམས་ཡིན་ཅིང་། སྤར་ཁང་དུ་བླ་མ་སུ་ཡིན་གྱིས་མཛད། གཡང་སྐྱབས་ཀྱི་དབུར་བཞུགས་དགོན་གཞུང་དུ་དབུ་མཛད་ཟུར་བླ་གང་རུང་དང་། གླིང་སོ་སོའི་གཡང་སྐྱབས་ཀྱི་སློབ་དཔོན་གླིང་སོ་སོའི་བླ་མ་རྣམས་ཡིན། ལོ་གྱོན་བུམ་སྒྲུབ་ཀྱི་སློབ་དཔོན་བླ་ཆེན་གང་རུང་གིས་མཛད། འདི་དག་ནི་ཕྱིས་ཀྱི་སྲོལ་རྒྱུན་གཙོ་བོར་བྱས་ནས་སྨྲས་པ་ཡིན་ལ། གཞན་ཡང་དུས་མཆོད་རྣམས་ཀྱི་དབུར་བཞུགས་ཀྱི་སློབ་དཔོན་གཞུང་ལུགས་རབ་འབྱམས་དང་ཆོ་གའི་ཆིངས་དང་ཕྱག་ལེན་སོགས་སྦྱངས་པ་མཐར་ཕྱིན་པའི་རིས་བྲལ་མཁས་གྲུབ་དུ་མས་མཛད་ཡོད་པ་ནི་སྨོས་མ་དགོས་པས་མཐའ་གཅིག་ཏུ་ག་ལ་ངེས། ༈ གསུམ་པ་དེ་དག་ལས་བློ་ལ་འཛིན་དགོས་པ་གང་དག་ཡིན་པ་ནི། དེའང་སྔོན་ཕུར་པ་དང་དུས་འཁོར་སོགས་དུས་མཆོད་ཆེ་རིགས་ཕལ་ཆེ་བ་བླ་གྲྭ་ཡོངས་ཀྱིས་བློ་ལ་ལེན་པ་ལས་དཔེ་ཀློག་གཏན་ནས་མི་ཆོག་ལ། ཕྱིས་ཀྱི་བར་དུ་རྒྱུན་འཇགས་པ་ནི། དཀོན་མཆོག་རྗེས་དྲན་མདོ། ཕུང་པོ་གསུམ་པའི་མདོ། གནས་བརྟན་ཕྱག་མཆོད། ཆོ་འཕྲུལ་སྨོན་ལམ། ཆོས་སྤྱོད་ཕྱི་ནང་གཉིས། བཟང་སྤྱོད་སྨོན་ལམ་རྣམ་ལྔ། ཀུན་རིག་ཆོ་ག །འཇིགས་བྱེད་དྲུག་ཅུ་པ། ཀྱེ་རྡོར་མངོན་དཀྱིལ། དམར་ཆེན་གཏོར་བཟློག །ངོར་ལུགས་བསྐང་གཏོར་བཅས་དང་། གཞན་ཡང་སྒྲོལ་མ་མཎྜལ་བཞི་ཆོག་སོགས་མང་ཙམ་བློ་ལ་འཛིན་དགོས་པ་འདུག །ཧོར་ཟླ་བཅུ་པ་ནས་བརྩམས་ཏེ་ཟླ་བ་གཉིས་ཡར་མར་དགེ་ཚུལ་མན་ཆད་ཀྱི་གྲྭ་ཆུང་རྣམས་ཡིག་ཀློག་དང་ཆོས་སྤྱོད་ཆོ་གའི་རིགས་བློ་འཛིན་གྱི་སྦྱོང་གྲྭ་འཛུགས་ཤིང་། ལོ་རེ་བཞིན་འདུ་བའི་སྐབས། དབྱར་མཆོད་སྐབས། དགུན་གྱི་སྦྱོང་གྲྭ་སྐབས་དང་བཅས་གསུམ་ལ་སྐབས་རེར་སྡེ་དགེའི་ཆོས་རྒྱལ་ཆེན་པོ་ཉིད་ཕེབས་པ་དང་། ཕལ་ཆེར་དགོན་དཔོན་བླ་མ། དབུ་མཛད་གཅིག །དྲུང་ཡིག་གཅིག་སོགས་ཀྱིས་ངག་རྒྱུག་ལེན་པར་བྱེད། གཞན་ཡང་འབུད་བརྡུང་དཀྲོལ་གསུམ་གྱི་རིགས། གར་འཆམ། ཐིག་རྡུལ་ཚོན། འདོན་གདངས་དབྱངས་སོགས་ཐམས་ཅད་ཀྱང་སྡེ་དགེའི་བླ་ཆེན་རིམ་བྱོན་ཉིད་དང་། བླ་མ་སློབ་དཔོན་མཁས་པ་རྣམས་ཀྱིས་ལག་ཁྲིད་ལེགས་པར་མཛད་དེ་གྲྭ་ས་ཆེན་མོའི་སྲོལ་རྒྱུན་མིག་དཔེར་འོས་པ་ཡོད། ༈ གསུམ་པ་བླ་མ་ལས་འཛིན་རིམ་པ་ཇི་ལྟར་ཡིན་པ་ལ། བླ་གྲྭའི་རིམ་པ་དང་། ལས་འཛིན་གྱི་རིམ་པ་གཉིས་ལས། དང་པོ་ནི། དེ་ལ་ཆོས་གྲྭ་ཆེན་པོ་འདི་ཉིད་དུ་བླ་མ་ཡིན་པ་དང་། གྲྭ་པ་དཀྱུས་མ་ཡིན་པའི་རིམ་པ་གཉིས་ཡོད་ཅིང་། བླ་མ་ཡིན་པ་ལ་རིམ་པ་དང་པོ་བླ་ཆེན་བཞི། རིམ་པ་གཉིས་པ་དབུ་མཛད་བཞི། རིམ་པ་གསུམ་པ་ཟུར་བླ་དྲུག་རྣམས་ཡིན། བླ་ཆེན་བཞི་ལས་ཁྲི་རིམ་དང་པོ་ནི། ངོར་མཁན་ཞབས་ཀྱི་གདན་ཚབ་འདུ་བ་ཆེན་པོའི་དབུར་བཞུགས་ཡིན་པས་རྒྱལ་མཚན་བླ་མ་ཡིན། ཁྲི་རིམ་གཉིས་པ་ཤར་བླ་མ། གསུམ་པ་ནུབ་བླ་མ། བཞི་པ་དབྱར་གནས་མཁན་པོ་ཡིན་འདུག །ཤར་ནུབ་ཀྱི་བླ་མའི་མིང་ཐོགས་ནི་སྡེ་དགེའི་ཕོ་བྲང་ཤར་གྱི་མགོན་ཁང་དང་། ནུབ་ཀྱི་མགོན་ཁང་གཉིས་སུ་དུས་གཏོར་དང་གཏོར་བཟློག་གི་རྡོར་འཛིན་བླ་མ་ཡིན་པ་ལས་བྱུང་ཞིང་སྡེ་དགེའི་སྐུའི་སྲུང་བ་པ་གཙོ་གྲས་ཡིན། དེ་ལྟར་བླ་ཆེན་བཞི་ལས་རྒྱལ་མཚན་བླ་མ་ནི་སྔོན་ཤར་ནུབ་མཁན་པོ་གང་རུང་མཛད་མྱོང་མཁན་མདོ་སྔགས་གཞུང་ལུགས་རབ་འབྱམས་དང་ཆོ་ག་ཕྱག་ལེན་སོགས་སྦྱངས་པ་མཐར་ཕྱིན་པ། ལྷག་པའི་ལྷ་མང་པོའི་བསྙེན་སྒྲུབ་དང་ལྡན་ཞིང་ཚོགས་པ་ཆེན་པོའི་རྡོ་རྗེ་སློབ་དཔོན་གྱི་མཚན་ཉིད་ལེགས་པར་ཚང་བ་ཞིག་དགོས། ཤར་ནུབ་ཀྱི་བླ་མ་ནི་སྔོན་དབུ་མཛད་ཡིན་པ་དབུ་ཟུར་ལ་གནས་པའམ། དབུ་མཛད་ལས་ཐོགས་པ་ཡིན་ནའང་རུང་སྟེ་མཁས་ཤིང་ལྷག་པའི་ལྷ་སྤྱི་དང་ཁྱད་པར་མགོན་པོ་ཆེ་ཆུང་གི་བསྙེན་སྒྲུབ་ལས་སྦྱོར་ཕུལ་དུ་ཕྱིན་པ་ལ་དབང་འབྱོར་བའི་སློབ་དཔོན་ཆེན་པོའི་འོས་སུ་གྱུར་པ་ཞིག་དགོས། དབྱར་གནས་མཁན་པོ་ནི་གཞུང་ལུགས་སྤྱི་དང་ཁྱད་པར་འདུལ་བ་གཞི་གསུམ་གྱི་ལག་ལེན་ལ་མཁས་པ། ཚུལ་ཁྲིམས་ལ་ལྟུང་བའི་རྙོག་པའི་དྲི་མས་མ་གོས་པ། ལྷག་ལྷ་དུ་མའི་གཞི་བསྙེན་མཐར་ཕྱིན་པ་སོགས་ཀྱི་མཚན་ཉིད་དང་ལྡན་པ་ཞིག་དགོས། དེ་ལྟར་ན་རྒྱལ་མཚན་བླ་མ། ཤར་བླ་མ། ནུབ་བླ་མ། དབྱར་གནས་མཁན་པོ་དང་བཅས་ཏེ་བླ་ཆེན་བཞིའོ། རིམ་པ་གཉིས་པ་དབུ་མཛད་བཞི་ནི། ཟུར་བླའི་རིམ་པ་ནས་བརྒྱུད་པ་དུས་མཆོད་ཆེན་པོ་རྣམས་ཀྱི་དབྱངས་གདངས་འདོན་ཆའི་རིགས་ལ་ཐོགས་པ་མེད་ཅིང་ངག་བདེ་བ། ཕྱག་ལེན་ལ་མཁས་ཤིང་སློབ་དཔོན་ལ་འོས་པའི་མཚན་ཉིད་ཚང་བ་རེ་དགོས་ལ། དབུ་མཛད་རྣམས་ཀྱིས་དུས་མཆོད་ཆེན་པོའི་ཚོགས་འདོན་དབུ་འདྲེན་པ། འདོན་བརྗིད་ཆགས་པ། མཐར་འཚོ་བ་སོགས་གཙོ་བོར་བྱེད་དགོས་ཤིང་སྐབས་རེར་སློབ་དཔོན་བྱེད་དགོས་པའང་ཡོད། དབུ་མཛད་རྣམས་ཆེ་ཆུང་གི་རིམ་པ་ནི་དབུ་མཛད་ཀྱི་གོ་ས་ཐོབ་སྔ་ཕྱིའི་རིམ་པ་ལྟར་ཡིན་འདུག །དབུ་མཛད་དགོངས་ཁྲོལ་བྱུང་ནས་དབུ་ཟུར་ཞེས་བླ་མའི་གོ་ས་དབུ་མཛད་དང་འདྲ། རིམ་པ་གསུམ་པ་ཟུར་བླ་དྲུག་ནི། ལས་ཚན་ཡིན་པ་གཙོར་བྱས་པའི་གྲྭ་མང་དཀྱིལ་ནས་ཀུན་སྤྱོད་བཟང་བ། ཆོ་ག་ཆོས་སྤྱོད་ལ་མཁས་པ། ཚོགས་ཀྱི་སློབ་དཔོན་འོས་པ། དབུ་མཛད་ཀྱི་ལས་ལ་བསྙེག་ཏུ་རུང་བ་རེ་བསྐོས་པ་ཡིན་ལ། ཟུར་བླ་དེ་དག་གིས་འདུ་བ་ཆེན་པོའི་སྐབས་སུ་ངོར་དཀྱིལ་བདུན་ལས་གུར་སཾ་གཉིས་བདེ་མཆོག་ལཱུ་ནག་གཉིས། གསང་འདུས་མི་བསྐྱོད་པ་དང་འཇམ་རྡོར་གཉིས་བཅས་ཟུར་ཆོག་དྲུག་གི་སློབ་དཔོན་བྱེད་དགོས་ཤིང་། ཟུར་བླ་ཞེས་པའི་མིང་ཡང་དེ་ལས་ཐོགས། གཞན་ཡང་དམར་ནག་འཇིགས་གསུམ་སོགས་ཀྱི་སློབ་དཔོན་བྱེད་དགོས་ལ། ཀུན་རིག་སྒྲུབ་མཆོད་དང་། དབྱར་གནས་སྐབས་ཚོགས་འདོན་དབུ་འདྲེན་པ་ཡང་བྱེད་དགོས་པ་འདུག །བླ་མ་དེ་དག་བསྐོས་བཞག་གི་ཚུལ་ནི། གཙོ་བོ་སྡེ་དགེ་ཆོས་རྒྱལ་ཆེན་པོས་དགོངས་པ་བཏོན་པ་རྣམས་འོས་ཐོའི་ཡི་གེ་བཀོད་ནས། བླ་ཆེན་བཞི། དབུ་མཛད་བཞི། ཟུར་བླ་དྲུག །བླ་ཆོས་བཞི། མི་ཆེན་བརྒྱད། ལས་ཚན་བརྒྱད་རྣམས་ཀྱི་འོས་ཐོ་དྲུག་ཏུ་བྱས་པ་དེ་ཉིད་ཆོས་རྒྱལ་ཆེན་པོ་སྐུ་དངོས་ཀྱི་སྤྱན་སྔར་ཕུལ་ནས། བབས་འོས་ཀྱི་བཀའ་ཤོག་སྡེ་དགེ་ཆོས་རྒྱལ་ཆེན་པོས་གནང་སྟེ་བླ་ཆེན་ཡིན་ན་བཀའ་ཤོག་དར་བཅས་ཆོས་ཁྲིམས་གཅིག་གིས་ཕུལ། དབུ་མཛད་ལ་སྒོ་བཀག་ལ་བཀའ་ཤོག་བསྐུར་ནས་སྤྲོད། ཟུར་བླ་ལ་བླ་ཆོས་ཁང་དུ་ཚུར་འོང་བ་ལ་བཀའ་ཤོག་སྤྲོད་སྲོལ་བྱུང་། ༈ གཉིས་པ་གྲྭ་པ་དཀྱུས་མ་ཡིན་པའི་རིམ་པ་ལ་ལས་ཚན། ལས་གཡོགས། གྲྭ་མང་གི་རིམ་པ་གསུམ་ཡོད། ལས་ཚན་ནི་བརྒྱད་ཡོད་དེ། རོལ་དཔོན་གཉིས་། དུང་དཔོན་གཉིས། རྒྱག་དཔོན་གཉིས། མཆོད་དཔོན་གཉིས་རྣམས་ཡིན། འདི་རྣམས་ཀྱིས་དུས་མཆོད་ཆེན་པོ་རྣམས་ཀྱི་རོལ་མོ་འབུད་བརྡུང་དཀྲོལ་གསུམ་གྱི་རིགས་དང་། ལས་རྡོར་གྱི་བྱ་བ་སྟེ་སོ་སོར་འོས་པའི་ལས་སྔར་སྲོལ་ལྟར་རྒྱུན་བརྟན་པོ་བྱེད། ལས་གཡོཊ་ནི་ལས་ཚན་བརྒྱད་ཡོད་པ་ལྟར་རོལ་གཡོགས་གཉིས། རྒྱག་གཡོགས་གཉིས། དུང་གཡོགས་བཞི་བཅས་བརྒྱད་ཡོད། ལས་གཡོགས་དེ་དག་གིས་ལས་ཚན་གྱི་བྱ་བ་རྗེས་འཚོ་བྱེད་པ་ཡིན། གྲྭ་མང་གི་རིམ་པ་ནི་བླ་མ་ལས་ཚན་གྱི་རིགས་མིན་པ་ཇི་སྙེད་མཆིས་པ་རྣམས་ཡིན། ཐམས་ཅད་ཀྱང་རབ་བྱུང་གི་རྟེན་ཅན་ཆོས་ལ་དད་འདུན་ཡོད་པ་ཤ་སྟག་དགོས་པ་ཡིན། བླ་གྲྭའི་གྲངས་ཕལ་ཆེའི་སྐབས་སུ་བདུན་བརྒྱ་ལྷག་ཡོད་ཆིང་། མང་སྐབས་སུ་སྟོང་ཕྲག་ཕྱེད་གཉིས་ཡས་མར་བྱུང་འདུག །གྲྭ་རྩ་ཡོད་པའི་སྡེའང་དགོན་སྡེ་གཞན་རྣམས་ལ་སོ་སོར་ཡོད་ཀྱང་། དགོན་ཆེན་འདི་སྡེ་དགེ་རྒྱལ་པོའི་རྩ་བའི་གདན་སར་སོང་གཤིས་མདུན་སྐོར་སུམ་ཅུ་ཚང་མའི་སྐུ་ངོ་དངོས་རེ་དགོན་འདི་ཉིད་དུ་གྲྭ་པ་ཡོད་དགོས་པ་དང་། མངའ་རིས་སུ་གཏོགས་པ་སུས་དགོན་འདི་ཉིད་དུ་གྲྭ་པ་བྱེད་པ་ལ་སྡེ་དགོན་གང་གིས་ཀྱང་གྲྭ་རྩའི་སྒོ་ནས་བཀག་འགོག་བྱེད་མི་ཆོག་པས་སྡེ་དགེའི་མངའ་འོག་ཏུ་དགོན་འདི་ཉིད་ཀྱི་གྲྭ་རྩས་མ་ཁྱབ་པ་མེད་དོ།། མུ་འགོད།
' རྩོམ་འོག་མ།
སྡེ་དགེའི་རྒྱལ་རབས་རིན་ཆེན་ཕྲེང་མཛེས། ༼བཅུ་པ་༽