ཚ་བ་མདའ་སྨྱུག་གི་ལོག་རྟོགས་སྙིང་སྟོབས།
ལོག་རྟོགས་སྙིང་སྟོབས།
ཚ་བ་མདའ་སྨྱུག
རྟོག་གེ་པའི་མིག་ནང་གི་ཆོས་ལུགས་ཀྱི་འཇིག་རྟེན།
དྲང་པོའི་གཏམ་གྱི་གཉའ་ནས་མི་གནོན་ཞིང༌། །
ལོག་པར་སྨྲ་བ་ཡལ་བར་མི་འདོར་བ། །
མདའ་སྨྱུག་རང་གི་དམ་ཚིག་དང་པོ་སྟེ། །
སྲོག་ལ་བབ་ཀྱང་འབད་པས་སྲུང་བར་ངེས། །
གཅིག །ཆོས་མངོན་པའི་ལུགས་ཀྱི་སྣོད་བཅུད་གཉིས་ཀྱི་རྣམ་གཞག་ལ་དཔྱད་པ།
སངས་རྒྱས་ཆོས་གཞུང་ནས་བཤད་པའི་འཇིག་རྟེན་སྣོད་བཅུད་གཉིས་ཀྱི་རྣམ་གཞག་ལ། མངོན་པ་གོང་འོག་གི་ལུགས། ས་སྡེ་ལྔའི་ལུགས། འཇིག་རྟེན་གདགས་པའི་ལུགས། སངས་རྒྱས་རྨད་བཅད་ཀྱི་ལུགས། མཁའ་འགྲོ་རྒྱ་མཚོའི་ལུགས། དུས་ཀྱི་འཁོར་ལོའི་ལུགས་སོགས་རྣམ་གཞག་ཕྲན་ཚེགས་མི་འདྲ་བ་མང་པོ་ཞིག་ཡོད་པར་གྲགས་ཀྱང༌། སྤྱིའི་ཆ་ནས་བཤད་ན་མངོན་པའི་ལུགས་དེས་མ་ཁྱབ་པ་དང་མ་འཐུས་པ་གང་ཡང་མེད། མངོན་པའི་ལུགས་ཀྱི་འཇིག་རྟེན་ལྟ་ཚུལ་དེ་ནི་མི་ལོ་སྟོང་ཕྲག་མང་པོའི་གོང་ནས་འཛམ་གླིང་ཤར་ནུབ་ཡོངས་ལ་ཁྱབ་པའི་བཤད་སྲོལ་རྙིང་པ་དེ་རང་ཡིན་པས་དེ་ཉིད་དེང་སང་གླེང་དགོས་པ་དང་གླེང་རིན་ཡོད་པ་ཞིག་རྩ་བ་ནས་མིན་མོད། རང་རེ་བོད་ཀྱི་མཁས་པ་ཕལ་མོ་ཆེ་ཞིག་གིས། དེང་གི་གནམ་རིག་པ་དག་དང་མི་འགྲིག་བཞིན་དུ་མཐུན་ཐབས་འཚོལ་བ་སོགས་ལྕེ་ཕར་བསྒྱུར་ཚུར་བསྒྱུར་སྣ་ཚོགས་བྱས་ཏེ། ད་དུང་ཡང་རང་ལ་དག་པ་སྟེར་བའི་རེ་སྟོང་རྒྱག་བཞིན་འདུག་པ་འདི་ནི་ཤིན་ཏུ་མི་འོས་པ་ཞིག་ཡིན་པས། དྲང་པོ་མིན་པའི་སྨྲ་མཁན་ཁོང་རྣམ་ཚོ་རེ་ཐག་ཆོད་པའི་འཁྲུལ་ངོ་རགས་ཙམ་ཞིག་སྤྲོད་པར་བྱའོ། །དེ་ལ་སྣོད་བཅུད་ཀྱི་རྣམ་གཞག་གཉིས་ཡོད་པ་ལས། དང་པོ་རང་ཅག་མིའི་རིགས་རྣམས་ཐུན་མོང་དུ་འཚོ་ཞིང་གནས་པའི་གཞི་རུ་གྱུར་པའི་ད་ལྟའི་འཇིག་རྟེན་འདི་ཉིད་ཐོག་མར་གང་ནས་བྱུང་བའི་ཚུལ་ལ། ཆོས་མངོན་པ་བ་རྣམས་ལྟར་ན། སྤྱིར་འཇིག་རྟེན་གྱི་ཁམས་ལ་ཐོག་མ་དང་ཐ་མའི་མཐའ་མེད་ཅིང་རྒྱ་ཚད་ཀྱང་གཞལ་དུ་མེད། ད་ལྟའི་འཇིག་རྟེན་འདི་ནི་འཇིག་རྟེན་གཞན་ཞིག་ཞིག་ནས་བར་གྱི་བསྐལ་པ་ཉི་ཤུ་ཐམ་པ་ལོན་པའི་རྗེས་སུ་ལས་ཀྱི་དབང་གིས་ཕྱོགས་བཅུའི་ནམ་མཁའི་ཁམས་ནས་རླུང་ཆེན་པོ་དག་ལྡང་སྟེ། དེ་དག་རིམ་གྱིས་ཕྱོགས་གཅིག་ཏུ་འདུས་པའི་མཐར་རྡོ་རྗེའི་ཁམས་ལྟར་སྲ་ཞིང་བརྟན་པར་གྱུར། དེ་ཉིད་མུ་མཐའ་མེད་པའི་ནམ་མཁའི་དབྱིངས་སུ་རྟེན་མེད་པར་ཆགས་ཤིང༌། དབྱིབས་ནི་ཕྱི་རིམ་མཐོ་ལ་ནང་དམའ་བ་སྟེ་བར་སྣང་དུ་དཔྱངས་པའི་ཟོ་སྟོང་ཞིག་དང་འདྲ་པོ་ཡོད། དེ་རྗེས་རླུང་དཀྱིལ་དེའི་སྟེང་གི་ནམ་མཁའ་ལ་སྤྲིན་གྱི་ཕུང་པོ་ཆེན་པོ་འདུས་ཏེ་ཆར་རྒྱུན་ཤིང་རྟའི་འཕང་ལོ་ཙམ་ཡུན་རིང་དུ་བབ་པས། མཐར་ཟོ་བ་ཆུས་ཁེངས་པ་བཞིན་རླུང་དཀྱིལ་གྱི་དབུས་སུ་ཆར་ཆུའི་རྒྱ་མཚོ་ཆེན་པོ་ཞིག་ཆགས། མཚོ་དེའང་རླུང་ཤུགས་ཀྱིས་བསྲུབ་ཅིང་དཀྲུག་པའི་དབང་གིས་འོ་མའི་ཐོག་ཏུ་སྤྲིས་མ་ཆགས་པ་བཞིན་ས་གཞི་ཆེན་པོ་རི་གླིང་དང་བཅས་པ་འདི་བྱུང༌། དེ་ཐམས་ཅད་ཀྱི་བདག་རྐྱེན་ནི་རྒྱལ་བའི་སྨོན་ལམ་དང༌། འགྲོ་བའི་ལས་དབང་གཉིས་ཡིན་ལ། ཉེར་ལེན་གྱི་རྒྱུ་ནི་འཇིག་རྟེན་གཞན་དག་ཞིག་པའི་ཐལ་རྡུལ་ཕྲ་མོ་དག་ནམ་མཁའ་འདིར་རླུང་གིས་ཁྱེར་ནས་འོང་བ་ཡིན། སྣོད་ལ་བར་བསྐལ་གཅིག་དང༌། བཅུད་ལ་བར་བསྐལ་བཅུ་དགུ་སྟེ་འཇིག་རྟེན་རེ་རེའི་འཆགས་པའི་དུས་ཡུན་ནི་བར་བསྐལ་ཉི་ཤུ་རེ་དང༌། བར་བསྐལ་རེའི་ཡུན་ལ་མི་ལོ་དཀྲིགས་ཆུང་བརྒྱད་ལྷག་ཙམ་ཡོད་ཟེར་ལ། དཀྲིགས་ཆུང་ནི་གྲངས་གནས་བཅོ་བརྒྱད་པ་དེ་ཡིན། དེ་ནས་བར་གྱི་བསྐལ་པ་ཉི་ཤུའི་རིང་ལ་འཕེལ་འགྲིབ་སྤེལ་མའི་ངང་ནས་གནས་པའི་མཐར་འཇིག་པའི་འགོ་རྩོམ་ཞིང༌། འཇིག་པའི་ཚུལ་ལ་མེ་ཡིས་འཇིག་པ་དང༌། ཆུ་ཡིས་འཇིག་པ་དང༌། རླུང་གིས་འཇིག་པ་བཅས་རེས་ཀྱིས་འཁོར་བ་ལས། ད་རེས་ནི་མེས་འཇིག་དུས་ཡིན་ཞིང༌། འཇིག་རྟེན་འཇིག་པར་རྩོམ་པའི་ཚེ་ཉི་མའི་དཀྱིལ་འཁོར་འདི་ཉིད་ད་ལྟ་བས་བཞི་འགྱུར་གྱིས་ཚ་རུ་ཕྱིན་པའི་སྟེང་དུ། གང་ཞིག་ནས་ཡོང་མིན་ཆ་མི་འཚལ་བའི་ཉི་མ་གསར་པ་གཞན་དྲུག་བཅས་ཁྱོན་ཉི་མ་བདུན་དུས་གཅིག་ཏུ་ཤར་ནས་ས་གཞི་ཆེན་པོ་འདི་ཉིད་རྩ་སྐྱ་མེ་ནང་དུ་འཕངས་པ་ལྟར་གཞོབ་ཐུལ་དུ་བསྲེག་ཅིང༌། མཐར་ཚིག་པའི་ཐལ་བ་ཙམ་ཡང་ཤུལ་དུ་མི་ལུས་པས་ཅང་མེད་ཀྱི་ནམ་མཁའ་སྟོང་རྐྱང་ཞིག་ཏུ་འགྱུར་བར་འདོད། རྣམ་གཞག་དེ་ཐམས་ཅད་ཀྱང་འཇིག་རྟེན་ལས་འདས་པའི་སངས་རྒྱས་ཀྱི་སྤྱན་ཞེས་བྱ་བ་དེས་དེ་ལྟར་དུ་གཟིགས་པ་ཡིན་ཞེས་པ་ཙམ་ལས། གཞན་དེ་ལྟར་ཡིན་ངེས་པའི་འཐད་པ་བཙལ་ཏེ་སྨྲས་པ་ནི་ཅུང་ཟད་ཀྱང་མེད་དོ། །ཕྱིས་ཀྱི་གནམ་རིག་མཁས་པ་དག་གི་འདོད་པ་ལྟར་ན། སྤྱིར་འཇིག་རྟེན་ལ་མཐའ་ཡོད་མེད་གང་ཡང་མི་སྨྲ་སྟེ། ཐོག་མཐའ་ལ་དུས་ཀྱིས་བསྐལ་ཞིང་ཕ་མཐའ་ལ་ཡུལ་གྱིས་བསྐལ་པས་ཡོད་མེད་གང་ལ་ཡང་བློ་མི་འཇུག་པའི་ཕྱིར། ད་ལྟའི་གནམ་རིག་གི་ཤེས་ཚད་ལྟར་ན་མ་འོངས་པར་ཡང་ཐག་ཆོད་པའི་རེ་བ་མཐོང་གི་མེད། ཡིན་ནའང་གློ་བུར་དུ་བློ་ཡུལ་ལས་འདས་པའི་བློ་སྐྱེད་འདྲ་བྱུང་བ་ཡིན་ན་ནི་བརྗོད་ཚོད་མི་ཐིག་སྟེ། སྔོན་ཆད་འོད་ལས་མྱུར་བའི་དངོས་པོ་ཞིག་ཤེས་བྱ་ལ་མི་སྲིད་པར་འདོད་ཀྱང༌། ད་ལྟ་ཐོད་བརྒལ་གྱི་འགྲུལ་བཞུད་ལ་བརྟེན་ནས་འོད་ལོ་འབུམ་ཕྲག་མང་པོ་དུས་ཚོད་ཐུང་ངུ་རེའི་ནང་དུ་བགྲོད་ཐུབ་སྲིད་པའི་ཚོད་དཔག་བྱེད་ཀྱིན་ཡོད་པ་ལྟ་བུ་རེད། དེས་ན་འབྲི་གུང་གི་མཁས་པ་ར་སེ་དཀོན་མཆོག་རྒྱ་མཚོ་སོགས་ཀྱིས། སངས་རྒྱས་པས་འཇིག་རྟེན་མཐའ་མེད་དུ་བཤད་པ་དེ་དོན་ལ་གནས་པའི་ར་སྤྲོད་དེང་གི་གནམ་རིག་པས་བྱེད་ཀྱིན་ཡོད་ཅེས་གསུངས་འདུག་པ་ནི་མི་བདེན་པའི་གཏམ་དུ་ཤེས་པར་བྱའོ། །འཇིག་རྟེན་སྤྱི་ཡོངས་ལ་འཆགས་པའི་དུས་ཚོད་འདི་ཞེས་འཆད་དུ་མེད་ཀྱང༌། ད་ལྟ་མིག་དང་རྒྱང་ཤེལ་སོགས་ཀྱིས་མཐོང་ཐུབ་པའི་སྐར་ཚོགས་ཀྱི་ཆོལ་ཁ་འདི་ནི་ཆགས་ནས་མི་ལོ་ཐེར་འབུམ་བཅོ་ལྔ་ཙམ་ཞིག་སོང་ཡོད་པར་འདོད། དེ་ཡང་ཐོག་མར་སྟོང་ཆེན་གྱི་ཁམས་འདིར་ཐོགས་རེག་གི་དངོས་པོ་ཅི་ཡང་མེད་པར། གློག་གི་ནུས་ཁྱམས། ཁབ་ལེན་གྱི་ནུས་ཁྱམས། ལྗིད་ཀྱི་ནུས་ཁྱམས། ཚད་རྡུལ་ནུས་ཁྱམས་བཅས་ཤུགས་རིགས་མི་འདྲ་བ་བཞི་ཙམ་གྱི་ངོ་བོར་གནས་པ་ལ། གློ་བུར་དུ་རྒྱུ་མཚན་གང་ཡིན་ཆ་མ་འཚལ་བའི་འབར་གད་ཆེན་པོ་ཞིག་ཤོར་ཏེ་ཤུགས་རིགས་བཞི་པོ་སོ་སོར་གྱེས་ཤིང༌། དེ་དག་ཕན་ཚུན་ཁྱབ་འཕྲོའི་འདུས་སྦྱོར་ལས་ཤིན་ཏུ་ཕྲ་བའི་གཟུགས་ཅན་གྱི་གསོབ་རྡུལ་མང་པོ་གསར་དུ་གྲུབ། སྐབས་དེར་དྲོད་ཚད་ཧ་ཅང་མཐོ་བ་དེ་རིམ་གྱིས་མར་ཆགས་པ་དང་བསྟུན་ནས་ཕྲ་རྡུལ་མི་འདྲ་བ་དག་ཀྱང་ཕན་ཚུན་འདྲེས་སྦྱོར་བྱུང་སྟེ། རྒྱུ་རྡུལ། བར་རྡུལ། ཉིང་རྡུལ་སོགས་རིགས་དང་ནུས་པ་མི་འདྲ་བའི་རིལ་རྡུལ་མང་པོ་ཞིག་གསར་དུ་ཐོན། དེ་ལྟའི་ངང་ལ་མི་ལོ་དུང་ཕྱུར་གཉིས་ཙམ་འདས་རྗེས་ད་གཟོད་གདོད་མའི་སྐར་རྒྱུའི་སྤྲིན་ཕུང་ཆགས་ཤིང༌། མི་རིང་བར་ཆེས་ཐོག་མའི་བརྟན་སྐར་དག་ཀྱང་འཆགས་པའི་འགོ་བརྩམ་པ་ཡིན་ཟེར། འགས་གཏོར་ཆེན་མོའི་གཞུང་ལུགས་འདིའི་ཁུངས་ནི་ཨ་རིའི་གནམ་རིག་མཁས་པ་ཧ་བོས་ཤིན་ཏུ་ལེགས་པའི་རྒྱང་ཤེལ་སྤྱད་ནས་རྟོག་ཞིབ་བྱས་པའི་གྲུབ་འབྲས་དེ་ཡིན། ཁོང་གིས་རྒྱང་ཤེལ་བརྒྱུད་ནས་ལྟ་སྐབས་སྐར་ཚོགས་ཡོད་ཚད་ཕན་ཚུན་བར་ཐག་ཇེ་རིང་དུ་འགྲོ་བཞིན་ཡོད་པ་དང༌། དེ་ཡང་རྒྱང་ཐག་ཇི་ཙམ་རིང་བ་དེ་ཙམ་གྱིས་གྱེས་ཤུགས་ཀྱང་ཆེ་བར་འདུག་ཟེར། ད་ལྟ་ང་ཚོས་མཐོང་ཐུབ་པའི་འོད་ལོ་དུང་ཕྱུར་ཕར་ནང་གི་སྐར་འོད་དེ་དོན་དུ་མི་ལོ་དུང་ཕྱུར་ཡར་སྔོན་གྱི་སྐར་འོད་ཡིན་དགོས་པས། མི་ལོ་དུང་ཕྱུར་གཅིག་གི་ཡར་སྔོན་དུ་སྐར་མ་འདི་དག་ཕན་ཚུན་གྱི་བར་ཐག་ད་ལྟ་ལས་ཉེ་བ་དང༌། དེ་དུས་སྐར་མ་ཕན་ཚུན་གྱི་གྱེས་ཤུགས་ཀྱང་ད་ལྟ་ལས་ཆེ་བ་ཞིག་ཡིན་པར་གོང་གི་རྒྱང་ཤེལ་གྱི་མཐོང་ཚུལ་དེས་ར་སྤྲོད་བྱས་ཡོད་པ་རེད། ད་ལྟ་འོད་ལོ་ཐེར་འབུམ་བཅུ་གཉིས་ཀྱི་སྐར་འོད་མཐོང་ཐུབ་པའི་རྒྱང་ཤེལ་བཟོས་ཡོད་ལ། ད་ལོ་ཉིས་སྟོང་བདུན་ལོར་ཨ་མེ་རི་ཀའི་ཁེ་ལི་ཁོ་ཉི་ཡའི་མངའ་སྡེའི་རང་བྱུང་ཚན་རིག་ཞིབ་འཇུག་ཁང་གིས་འོད་ལོ་ཐེར་འབུམ་བཅུ་གསུམ་མཐོང་ཐུབ་པའི་རྒྱང་ཤེལ་བཟོས་ཡོད་ཅེས་གསལ་བསྒྲགས་སྤེལ་འདུག །གལ་སྲིད་འོད་ལོ་ཐེར་འབུམ་བཅོ་ལྔ་ཕན་གྱི་སྐར་འོད་མཐོང་ཐུབ་པའི་རྒྱང་ཤེལ་ཞིག་བཟོ་ཐུབ་པའི་དབང་དུ་བཏང་ན། འཇིག་རྟེན་ཁམས་འདི་ཐོག་མར་ཇི་ལྟར་ཆགས་པ་དང༌། འགས་གཏོར་ཆེན་མོ་དེ་ཇི་ལྟར་བྱུང་བའི་ཚུལ་བཅས་མངོན་སུམ་དུ་མཐོང་ཐུབ་པའི་རེ་བ་ཡོད་པ་ཡིན་འདུག །ད་དུང་དངོས་ལུགས་རིག་པའི་གཏན་སྲོལ་གྱི་སྟེང་ནས་ཀྱང་འཇིག་རྟེན་འདིའི་ཡབ་མེས་ནི་འགས་གཏོར་ཆེན་མོ་དེ་ཡིན་དགོས་པའི་གནས་ལུགས་འཆད་རྒྱུ་ཡོད་འདུག་མོད་ང་ཚོས་རེ་ཞིག་གོ་དཀའ་བར་སྣང༌། ཉི་མའི་ཁྱིམ་རྒྱུད་འདི་ཆགས་ནས་མི་ལོ་ཐེར་འབུམ་ལྔ་ཙམ་དང༌། ས་ཡི་གོ་ལ་ཆགས་ནས་མི་ལོ་ཐེར་འབུམ་ཕྱེད་ལྔ་ཙམ་སོང་ཡོད། མ་འོངས་པ་ན་མི་ལོ་ཐེར་འབུམ་ལྔ་ཙམ་གྱི་རྗེས་སུ་ཉི་མའི་འབར་རྫས་ཆིང་དང་ཧེལ་ཕལ་ཆེར་ཟད་ནས་དྲོད་ཚད་ཆུང་དུ་ཕྱིན་པ་དང་ཕྱོགས་མཚུངས། སྤུས་ཚད་ཀྱང་ཇེ་ཞན་དུ་གྱུར་པའི་དབང་གིས་དམ་ཚགས་ཤོར་ཏེ་ཉི་མའི་བོངས་ཚད་ད་ལྟ་ལས་ལྡབ་བརྒྱ་ཙམ་ཞིག་ཇེ་ཆེར་འགྱུར། སྐབས་དེར་ས་ཡི་གོ་ལ་སོགས་ཉི་མའི་ཁྱིམ་རྒྱུད་ཀྱི་རྒྱུ་སྐར་ཕལ་མོ་ཆེ་ཡང་ཁབ་ལེན་གྱི་རི་བོར་ལྕགས་ཕྱེ་འབྱར་བ་བཞིན་དུ་ཉི་མའི་ངོས་སུ་ལེན་པར་འགྱུར་ལ། དེ་ནས་སླར་ཡང་མི་ལོ་དུང་ཕྱུར་འགའ་ཞིག་སོང་རྗེས་ཉི་མའི་འབར་རྫས་ཡོངས་རྫོགས་ཟད་དེ་ཁྱིམ་རྒྱུད་ཧྲིལ་པོ་འདི་མུན་པ་མུན་ནག་འབའ་ཞིག་ཏུ་འགྱུར་བ་ཡིན་ནོ་ཞེས་ཟེར་རོ། །ཚན་རིག་པའི་བཤད་སྲོལ་འདི་དག་གི་ཁྲོད་ནས་འགའ་ཞིག་ཚོད་དཔག་ཙམ་ལས་ཁྱབ་མཐའ་ཆོད་པ་རང་མིན་ཡང༌། གཞི་འཛིན་ས་ངེས་ཅན་རེ་ཡོད་པ་མ་གཏོགས་རང་གར་སེམས་ལ་གང་དྲན་ཁ་ནས་ཕུད་བཞག་པ་ཞིག་ཀྱང་མིན། དེས་ན་སྐབས་རེར་ཚན་རིག་པ་ཚོས་ཤེས་པ་ལས་ཀྱང་ཆོས་ལུགས་པ་ཚོས་བཤད་པ་དག་ཞིབ་ཆ་ཆེ་ལ། གསལ་ཁ་དོད་པ་ལྟ་བུ་རེ་ཡང་སྣང་མོད། རྫུན་མའི་གཏམ་ལ་ཁུངས་ལུང་མང༌། ཞེས་པ་ལྟར་ཡིན་པས་ཡ་མཚན་དང་ཡིད་སྨོན་སྐྱེ་དགོས་དོན་མེད་དེ། མཁས་དབང་དགེ་འདུན་ཆོས་འཕེལ་གྱིས། མུ་སྟེགས་པའི་ལུགས་ཀྱི་ཞིང་ཁམས་དེ་ཚོར་ཁང་པ་ཆེ་ཆུང་ཇི་ཙམ་ཡོད་པ་དང༌། ཁང་པ་རེ་རེའི་ནང་དུ་ཀ་བ་དུ་རེ་བསླངས་ཡོད་པ་དང༌། ཀ་བ་རེ་རེ་ལ་རིང་ཐུང་དང་ཕྲ་སྦོམ་ཇི་ཙམ་ཡོད་པ་སོགས་རྣམ་གཞག་ཕྲ་མོ་ཚུན་ཆད་ཤིན་ཏུ་གསལ་ལ་ཚང་བར་བཤད་དེ་བླུན་པོ་ཚོའི་ཡིད་དབང་ཡོངས་སུ་འཕྲོག་འགྲོ་བ་ཞིག་བཟོས་བཞག་ཡོད། ཅེས་གསུངས་པ་ལྟ་བུ་ལས་མ་འདས་སོ། ། འཇིག་རྟེན་འདིའི་དབྱིབས་ཀྱི་ཕྱོགས་ལ་མངོན་པ་བས། ས་གཞི་ལེབ་ཆེན་ཞིག་གི་དབུས་ནས་རི་ཆེན་གྲུ་བཞི་ཞིག་ཡར་ལ་འབུར་ནས་ཡོད་པར་འདོད་པ་སྟེ། མཁས་དབང་དགེ་འདུན་ཆོས་འཕེལ་གྱིས། འཇིག་རྟེན་ལེབ་ལེབ་ཅེས་གསུངས་པ་དེ་ཡིན། སྤྱིར་ས་གཞི་ལེབ་ལེབ་ཡིན་སྙམ་པ་ནི་ང་ཚོ་ས་སྟེང་དུ་སྡོད་པའི་མི་ཀུན་གྱི་བློ་ངོར་མ་བརྟགས་ཉམས་དགའི་སྣང་ཚུལ་དེ་རང་ཡིན་པས་གོ་བ་ལེན་མི་ཐུབ་པ་ཞིག་མིན། འོན་ཀྱང་དེའི་དཀྱིལ་དུ་རི་བོ་མཆོག་རབ་ཅེས་པའི་རི་ཆེན་ཞིག་ཡོད་པར་འདོད་པ་འདི་ནི་མཁས་ཁྱད་ཀྱི་བློས་བཏགས་བྱས་པ་མཚང་དུ་སོང་བ་ཞིག་སྟེ། དོ་དགོང་མུན་རུབ་པ་ནས་བཟུང་སང་ཉིན་ནམ་མ་ལངས་ཀྱི་བར་དུ་ཉི་མའི་འོད་སྣང་རྟ་རྔ་ཙམ་ཡང་རིག་རྒྱུ་མེད་པ་འདི་རི་ཆེན་ཞིག་གིས་བསྒྲིབ་པ་ལོས་ཡིན་སྙམ་པའི་རྨོངས་ཚོད་བྱས་པ་ཙམ་ལས་གཞན་ཁུངས་དང་རྒྱུ་མཚན་ཅི་ཡང་མེད། ལུགས་འདིས་ས་གཞི་ཁོ་ན་མ་ཟད་ཉི་ཟླ་སྐར་མའི་འཇིག་རྟེན་ཡོད་ཚད་ཀྱང་ལེབ་ལེབ་སླ་ང་ལྟ་བུ་རེ་འདོད་ཀྱིན་ཡོད། ཚུལ་འདི་ནི་ནུབ་ཕྱོགས་ས་ལྟེ་སྨྲ་བ་ལས་ཀྱང་རིམ་པ་གཅིག་རྗེས་སུ་ལུས་ཡོད་སྟབས། ལུགས་འདིའི་བག་ཆགས་ཟབ་པའི་རང་རེའི་དགེ་བཤེས་ས་གྲགས་གནམ་གྲགས་རྣམ་པས་དུས་ད་ལྟ་ཡང༌། རི་བོ་མཆོག་རབ་དེ་ང་ཚོས་མཐོང་མི་ཐུབ་པ་མ་གཏོགས་ག་ཤེད་ཅིག་ཏུ་ཡོད་ངེས་རེད་ཅེས་ཨུ་ཚུགས་ཁོ་ན་གནང་བ་དང༌། ས་གཞི་ལེབ་ལེབ་མིན་པར་ཟླུམ་པོ་ཡིན་ན་ཆུ་བོ་གྱེན་དུ་འབབ་པར་ཁས་ལེན་དགོས་ཞེས་དང༌། ས་ལྒང་ནུབ་ནས་ཤར་དུ་འཁོར་འགྲོ་བཞིན་ཡོད་ན་ནུབ་སྐྱོད་གནམ་གྲུ་ནུབ་ཏུ་འཕུར་མི་དགོས་པར་ལྡིང་༡སྐོར་རྒྱག་སྟེ་བསྡད་ན་ཡང་ནུབ་ཕྱོགས་སུ་སླེབ་འགྲོ་བར་ཐལ་བ་དང༌། ཤར་སྐྱོད་གནམ་གྲུ་ཤར་ཕྱོགས་སུ་ཇི་ཙམ་འཕུར་ཡང་ཤར་ཁའི་འབབ་ཚིགས་སུ་བསླེབ་རྒྱུ་མེད་པར་ཁས་ལེན་དགོས། ཞེས་སོགས་རིགས་སྐམ་ལྟར་སྣང་རེས་ཁ་ཕྲལ་འཇལ་ནས་དངོས་ཡོད་ལ་བསྙོན་འདིང་བཞིན་བཞུགས་དགོས་བྱུང་བ་རེད། འཇིག་རྟེན་རིལ་རིལ་ཡིན་པ་དང༌། ས་ལྒང་འཁོར་བཞིན་ཡོད་ཅེས་པ་འདི་རྩོད་ར་གོར་གོར་ཞིག་ཏུ་དཀྱིལ་ཀྲུང་གྲུ་བཞི་ཞིག་བཅས་ཏེ་བཞུགས་མཁན་གྱི་དམ་བཅའ་པ་ཞིག་དང༌། དེའི་དྲུང་དུ་ཐལ་མོ་དྲག་ཏུ་བརྡེབ་བཞིན་ཡར་རྒྱུག་མར་རྒྱུག་གནང་མཁན་གྱི་རྟགས་གསལ་པ་ཞིག་དང་བཅས་མི་གཉིས་ཁ་ཤགས་བཀྱེས་པའི་གྲུབ་དོན་ཙམ་ཞིག་མིན། མཚོ་འགྲུལ་པ་ཚོས་ཕྱོགས་སྟོན་འཁོར་ལོ་ལ་བརྟེན་ནས་དངོས་སུ་བསྐོར་བ་བརྒྱབ། མཁའ་སྐྱོད་པ་ཚོས་བར་སྣང་ཁམས་ནས་མིག་གིས་བལྟས། མཐོང་བའི་དོན་དག་པར་དང་བརྙན་འཕྲིན་བརྒྱུད་ནས་འཛམ་གླིང་གི་མི་ཡོངས་རྫོགས་ལ་ལྟད་མོ་བསྟན། དེས་མི་ཚད་བཅོས་མའི་སྐར་མ་དག་གིས་ས་ལྒང་ཧྲིལ་པོ་བསྐོར་བ་བརྒྱ་ཕྲག་དུ་མ་བརྒྱབ་སྟེ། དཔག་ཚད་རྒྱང་གྲག་ཚུན་ཆད་ཚད་ལེན་ཐིག་འདེབས་བྱས་པ་སོགས་བསླུ་མེད་མངོན་སུམ་གྱི་ཉམས་མྱོང་ཤ་སྟག་ཡིན་པས་དེ་ལ་རིགས་པ་སྐམ་པོས་ཅི་ཞིག་བྱར་ཡོད། གྱེན་དང་ཐུར་གྱི་རྣམ་གཞག་ནི་ས་སྟེང་གི་འབར་འབུར་གཤང་གཤོང་ཚོའི་བར་དུ་ས་སྙིང་གི་འཐེན་ཤུགས་ཕྲན་བུ་མི་འདྲ་བས་བཞག་པ་ཙམ་ལས། ས་ལྒང་གི་རྒྱབ་མདུན་བར་ན་གྱེན་ཐུར་གྱི་དབྱེ་བ་ཕྱེ་རྒྱུ་མེད། ཆུ་བོ་གྱེན་དུ་མི་འབབ་པ་ཡང་ས་སྙིང་གི་འཐེན་ཤུགས་ཀྱིས་ཡིན། ས་སྙིང་དེའང་ང་ཚོས་འདོད་པའི་དབང་ཆེན་གསེར་གྱི་ས་གཞི་ལྟར་ས་འོག་ཏུ་མེད་པར་ས་དཀྱིལ་རང་དུ་ཡོད། ས་ལྒང་ཤར་དུ་འཁོར་བ་ནི་སྤྱི་འགྲོས་དང༌། གནམ་གྲུ་ནུབ་ཏུ་འཕུར་བ་ནི་རང་འགྲོས་ཡིན། གནམ་གྲུ་ས་ལ་མ་ཐུག་པ་ཙམ་གྱིས་ས་ལྒང་གི་འཁོར་ཤུགས་ལས་ཐར་མི་ཐུབ། རྗེ་ཤེས་རབ་རྒྱ་མཚོས། སྒོ་ངའི་དཀྱིལ་ནས་ནམ་མཁའི་ལོ་རྒྱུས་སྨྲ། ཞེས་གསུངས་པ་དེ་ཁྱེད་རྣམ་པའི་རིགས་པ་འདི་འདྲ་ལ་དགོངས་པ་ཡིན། མཁས་དབང་དགེ་ཆོས་ཀྱིས། རང་རེའི་མི་རིགས་འདི་རྩད་གཅོད་པ་ལས་དགག་པ་རྒྱག་རྒྱུར་དགའ། ཞེས་གསུངས་པ་དེ་ཡང་འདི་འདྲའི་རིགས་ལ་དགོངས་ཏེ་གསུངས་པ་རེད། ཨི་ཊ་ལི་ནས་ཡིན་པའི་བོད་རིག་པའི་མཁས་དབང་ཏུའུ་ཆིས། བོད་ཀྱི་མཁས་པ་ཚོས་ས་གཞི་བྱ་སྒོང་ལྟར་ཁས་མི་ལེན་པར་སྡེར་མ་ཁ་སྦུབས་པ་ལྟར་སྐོར་ལོག་ཅིག་འཆད་བཞིན་འདུག་པ་དེ་བདེན་ཤས་ཆེ། ང་ཚོས་ལྟ་བ་འདི་མུ་མཐུད་བསྒྱུར་དགོས་པར་འདུག །མཐར་ཐུག་བོད་བརྒྱུད་ནང་བསྟན་ནས་བཤད་པ་དེ་ཁོ་ན་དོན་ལ་གནས་པའི་དུས་ཤིག་འོང༌། ཞེས་གསུངས་ཡོད་ཅེས་ས་ལྡིང་༢གནམ་ལྡིང་༣བྱེད་ཀྱིན་འདུག་མོད། མཐོང་བ་མངོན་སུམ་གྱི་དོན་ལ་ཏུའུ་ཆིས་མ་འོངས་ལུང་བསྟན་རྒྱག་ག་ལ་དགོས། ད་ལྟའི་མིག་ཡོད་ཚད་འཁྲུལ་སོང་ན་མ་འོངས་པར་མ་འཁྲུལ་བའི་མིག་ཞིག་གང་ནས་རྙེད། རྙེད་ཀྱང་དེ་ལ་སྐྱེ་བོ་སུ་ཞིག་གིས་ཡིད་ཆེས་བྱེད་ཐུབ། དེས་ན་མཁས་དབང་ཏུའུ་ཆིའི་བཀའ་མོལ་དེ་ནི་ང་ཚོ་ལ་རེ་ཞིག་གུ་ཡངས་བཏང་བ་ཙམ་ལས་གཞན་ཅི་ཡང་མིན། ཁོ་ཚོ་ནུབ་ཕྱོགས་པ་དག་གི་ལུགས་ལ་ལག་ལེན་ནི་གནས་སྟངས་གཞན་ཞིག་རེད་མ་གཏོགས། བསམ་བློ་དང་སྨྲ་བརྗོད་ཀྱི་སྐབས་སུ་བདེན་རྫུན་གང་ཡིན་ལ་མ་ལྟོས་པར་ལྟ་བ་དང༌། གྲུབ་མཐའ་གང་འདྲ་ཞིག་ཡིན་རུང་མཉམ་གནས་བྱེད་ཆོག་ཅིང༌། ལྟ་ཚུལ་སྣ་ཚོགས་ཕན་ཚུན་གཙུབ་ཅིང་བརྡར་བ་ལས་ད་གཟོད་བསམ་བློ་གསར་པའི་ཚ་རླབས་འཕྲོ་ཐུབ་པའི་ཕྱིར་ན། ལྟ་གྲུབ་གང་འདྲ་ཞིག་ཡིན་རུང་ཡོད་ཆོག་པ་ཞིག་ཡིན་པར་མ་ཟད་ཡོད་དགོས་པ་ཞིག་ཀྱང་ཡིན་པར་འདོད་པ་ལས། ང་ཚོའི་བསམ་པ་ལྟར་མི་སེམས་ཡོད་ཚད་ལ་སྐྱོན་གྱིས་མ་གོས་པའི་ལྟ་གྲུབ་གཅིག་ཁོ་ནས་ཁྱབ་ཐུབ་དགོས་པ་དང༌། རང་གི་དགོངས་པ་དང་མི་མཐུན་པའི་ལྟ་ལོག་ཡོད་ཚད་ཚར་བཅད་དེ་བསྣུབ་དགོས་པའི་བསམ་བློ་དེ་འདྲ་རྩ་བ་ནས་མེད། དེའི་དབང་གིས་མཁས་དབང་ཏུའུ་ཆིས། སངས་རྒྱས་པའི་ལྟ་གྲུབ་ལ་ཡུལ་དུས་ལ་དཔགས་པའི་རྩི་འཇོག་དང་གུས་བཀུར་གནང་བ་ཡིན་ཚོད་རེད། དེ་མ་གཏོགས་ཏུའུ་ཆི་ཁོང་ལོ་རྒྱུས་ཁས་མི་ལེན་ཞིང་མངོན་སུམ་ལ་བསྙོན་འདིང་བའི་དམུན་པོ་མུ་ཐོ་ལུམ་དེ་འདྲ་ཡིན་རྒྱུ་མ་རེད་སྙམ། དཔེར་ན་ཨ་མེ་རི་ཀའི་དངོས་ཁམས་རབ་འབྱམས་པ་ཧྥེ་མེན་ཟེར་བས། དོན་དངོས་ཐོག་ཏུ་ཚན་རིག་གིས་ལྷ་མེད་པར་སྒྲུབ་མི་ནུས། ཚན་རིག་གིས་ལྷ་མེད་པར་མི་འགྲུབ་པ་འདི་ངེད་ཀྱི་བློ་ལ་ངེས་པར་དུ་འབབ་པ་ཡིན། ཞེས་བཤད་ཡོད་པ་དེ་ལའང་གོ་བ་ཁྱད་པར་བ་ཞིག་ཡོད་པ་ལས། ཉིན་དྲུག་གི་རིང་ལ་འཇིག་རྟེན་ཡོངས་རྫོགས་རྫ་མཁན་གྱི་རྫ་མ་ལྟར་གསར་དུ་བཟོས་ནས། ཉིན་བདུན་པར་ངལ་གསོ་རྒྱག་མཁན་གྱི་ལྷ་དེ་འདྲ་ཚན་རིག་གིས་མེད་པར་མི་འགྲུབ་ཟེར་བ་མིན་པ་ལྟར་རེད། གལ་ཏེ་ཡིན་ན་ས་ཁམས་ཆགས་རིམ་དང༌། སྐྱེ་དངོས་འཕེལ་འགྱུར་སོགས་ཚན་རིག་གི་གྲུབ་དོན་ཆེས་མང་པོ་ཞིག་རབ་འབྱམས་པ་ཧྥེ་མན་གྱི་བློ་ལ་མི་འབབ་པར་ཁས་ལེན་དགོས་སོ། །ཉེ་དུས་ཀྱི་མཁས་པ་ཆེན་པོ་ཚེ་ཏན་ཞབས་དྲུང་དམ་པ་དེས། མདོ་དྲན་པ་ཉེར་བཞག་ལས། འཇིག་རྟེན་འདིའི་དབྱིབས་མངོན་པ་ནས་བཤད་པ་ལྟར་མིན་པར་དེང་སང་གི་བཤད་ལུགས་བཞིན་ས་གཞི་རིལ་ལི་མ་བྱ་སྒོང་ལྟ་བུ་ཞིག་ཀྱང་བཤད་ཡོད་དེ། རྒྱ་མཚོའི་མཐའ་ལ་ཉི་འོད་མི་ཕོག་པར་མུན་པ་མུན་ནག་ཡིན་པར་བཤད་པ་འདི་ལ་བསམ་བློ་གཏོང་རྒྱུ་ཡོད་ཅེས་གསུངས་ཡོད་སྐད་འདུག །རྒྱ་མཚོའི་མཐའ་ལ་ཉི་འོད་མི་ཕོག་པར་བཤད་པས་ས་གཞི་རིལ་ལི་མར་བཤད་པའི་གོ་ཆོད་ན། མངོན་པ་ནས་ཀྱང་ས་གཞི་རིལ་ལི་མར་བཤད་ཡོད་དེ། ཁོར་ཡུག་རི་བོའི་ཕྱི་འགྲམ་དང༌། གླིང་བར་གྱི་རྒྱ་མཚོ་ཉི་འོད་མེད་པའི་མུན་ནག་ཏུ་བཤད་པས་སོ། །མདོ་དྲན་པ་ཉེར་བཞག་པོད་བཞི་པོ་དེ་ཁོ་བོས་སྔོན་ཆད་ཐེངས་འགར་ཀློག་མྱོང་ཡོད་མོད། དེར་ཉི་ཟླ་གཟའ་སྐར་ཡོད་ཚད་ནི་རྒྱལ་ཆེན་རིས་བཞིའི་ལྷ་ཡི་ཁང་བཟང་ཡིན་ཚུལ་དང༌། ཉི་ཟླ་གཟའ་འཛིན་ནི་ལྷ་མིན་དགྲ་གཅན་གྱི་ལག་པས་བསྒྲིབ་པ་ཡིན་ཚུལ་དང༌། ས་འགུལ་ནི་ཀླུ་བདུད་གདུག་པ་ཅན་དག་གིས་མི་ལ་ཞེ་ནག་བྱས་ཏེ་ས་འོག་གི་ཆུ་དཀྲུག་པའི་རྐྱེན་གྱིས་ཡིན་ཚུལ་དང༌། ལོ་ཉེས་དང་སད་སེར་ཤྭ་འོད་སོགས་ནི་མི་ལ་ཀླུ་ཡིས་ཆད་པ་བཅད་པ་ཡིན་ཚུལ་དང༌། བྱང་གི་སྐར་མ་བརྟན་པ་ནི་རླུང་འཚུབ་ཅིག་གིས་བཀག་བཀྱིལ་བྱས་ཏེ་གང་དུ་ཡང་འགྲོར་མི་སྟེར་བ་ཡིན་ཚུལ་དང༌། སྐར་མདའ་ནི་ལྷ་ཡུལ་ནས་ཀླུ་ཡུལ་ལ་བཏང་བའི་ཕོ་ཉ་ལྷ་ཕྲུག་ཚོའི་ལུས་ཀྱི་འོད་ཡིན་ཚུལ་དང༌། སྐར་མ་མཇུག་རིང་ནི་གནོད་སྦྱིན་ནག་པོའི་ཁ་རླངས་ཡིན་ཚུལ་དང༌། འཛམ་བུའི་གླིང་གི་ས་ཆ་ག་གེ་མོར་ཚེ་ཉི་མ་གཅིག་རེ་ལས་མེད་པའི་མི་རིགས་དང༌། རྣ་བ་གོས་སུ་གྱོན་པའི་མི་རིགས། ལུས་པོ་བུད་མེད་དང་གདོང་པ་ཁྱི་ཡིན་པའི་མི་རིགས། བྱ་རྡོ་རྗེའི་མཆུ་ཅན། ཉ་རྟ་ཡི་གདོང་པ་ཅན། སེང་གེ་གཤོག་པ་ཅན། གཅན་གཟན་ནམ་མཁར་འཕུར་ནས་འགྲོ་མཁན་དང༌། ས་ལ་ཐིམ་ནས་འགྲོ་མཁན་དེ་འདྲ་ཡོད་ཚུལ་སོགས་ཡ་མཚན་ཅན་དག་དག་བཤད་འདུག་པ་མ་གཏོགས། ས་གཞི་བྱ་སྒོང་ལྟར་རིལ་ལི་མ་ཡིན་ཞེས་པའི་ཚིག་ཟུར་གཅིག་ཀྱང་ཡོད་པ་མི་དྲན་ནོ། །ཨ་ལགས་ཞབས་དྲུང་ཚང་ཁོང་ང་ཚོའི་སྲོལ་རྒྱུན་རིག་གཞུང་ལ་མཁས་པ་ཆེན་པོ་ཞིག་ནི་དངོས་གནས་ཡིན་མོད། ཕྱོགས་ཞེན་ཆེ་དྲག་པའི་དབང་གིས་སྐབས་རེར་ཁོང་གི་སྤྱན་གཉིས་ཀ་ནག་ཐོམ་མེར་ལོངས་འགྲོ་ཡི་ཡོད། དཔེར་ན་རྗེ་ཙོང་ཁ་པའི་ལེགས་བཤད་གསེར་ཕྲེང་དུ་ཕྱག་འཚལ་བ་ལ་རྣམ་དབྱེ་བཞི་པ་འཇུག་པར་གསུངས་པ་དེ་ཁོ་ནར་ཞེན་ཕྱོགས་མཛད་དེ། སུམ་རྟགས་ཀྱི་མཆོད་བརྗོད་གང་ལ་ཡོན་ཏན་མཆོག་མངའ་བའི། ཞེས་པའི་ལ་དོན་དེ་ཉིད་རྣམ་དབྱེ་བཞི་པ་རུ་ནན་གྱིས་བཀྲལ་ཞིང༌། དེ་ལ་དགོས་ཆེད་ཀྱི་གོ་དོན་འཆད་རྒྱུ་མ་རྙེད་པར་འུ་ཐུག་པའི་ཚེ། རྒྱུ་སྐྱབས་དང་འབྲས་སྐྱབས་ཀྱི་རྣམ་གཞག་འདི་ལ་གོ་བ་ཆེན་པོ་ཞིག་ཡོད་པར་སྣང་ངོ༌། ཞེས་སྒམ་ཚིག་དཔེ་མེད་པ་ཞིག་གསུངས་ཏེ་བཞག་ཡོད་པ་ལྟ་བུ་རེད། སྤྱིར་རྒྱུ་སྐྱབས་དང་འབྲས་སྐྱབས་ཀྱི་རྣམ་གཞག་དེ་ལ་གོ་བ་ཆེན་པོ་ཞིག་ཡོད་ཤས་ཆེ་ཡང༌། སྐབས་དེའི་ཕྱག་གི་ཡུལ་དེ་རྒྱུའི་སྐྱབས་གནས་མིན་པར་འབྲས་བུའི་སྐྱབས་གནས་ཡིན་ཟེར་སྲོལ་ག་ལ་ཡོད་དེ། སུམ་རྟགས་རྩོམ་པ་ལ་བར་ཆད་མེད་ཅིང་བརྩམ་པ་མཐར་ཕྱིན་པ་སོགས་ཀྱི་ཆེད་དུ་སངས་རྒྱས་ལ་སྐྱབས་སུ་སོང་བ་ཡིན་དགོས་པའི་ཕྱིར། སྐབས་དེར་རྩོམ་པོའི་ཐུགས་རྒྱུད་དུ་དེ་འདྲའི་དགོས་དོན་སྒྲུབ་ནུས་ཀྱི་དཀོན་མཆོག་ཅིག་མེད་དགོས་པའི་ཕྱིར་རོ། །ངོ་མ་སྐབས་འདིར་འབྲས་སྐྱབས་ལ་སྐྱབས་བཅོལ་བ་ནི་འུ་ཐུག་ཐག་ཆོད་པ་ཡིན་ཞིང༌། ཁོང་གི་གསུང་རྩོམ་ནང་དུ་འདི་འདྲའི་ཞེན་ལྟ་མཁྲེགས་འཛིན་གནང་བ་ཁ་ཅིག་ཡོད་མོད་སྐབས་དོན་མིན་པས་བཞག །༡ལ་ད་བཏགས་གི་གུ་ང་བཞག །༢ལ་ད་བཏགས་གི་གུ་ང་བཞག །༣ལ་ད་བཏགས་གི་གུ་ང་བཞག ། ཆ་རིས་སྐལ་བཟང་ཐོགས་མེད་ཀྱིས། ཤར་ལུས་འཕགས་པོ་རྒྱ་ནག །ལྷོ་འཛམ་བུའི་གླིང་རྒྱ་གར། ནུབ་བ་ལང་སྤྱོད་ཨོ་སི་ཁྲུ་ལི་ཡ། བྱང་སྒྲ་མི་སྙན་ཨ་རི་བཅས་ཡིན་རྒྱུར་བྱས་ནས་རྒྱ་ནག་གི་གནམ་སྐྱ་བོ་དང༌། ཨ་རིའི་གནམ་སེར་པོ་ཡིན་མིན་སོགས་ཀྱི་དོགས་པ་འགའ་བཀོད་འདུག་པ་ནི་ཅི་བཤད་འདི་བཤད་མེད་པའི་ངག་ཀྱལ་གྱི་སྐད་ཆ་སྟེ། དེ་ལྟར་འདོད་ཕྱིན་ཆད་མངོན་པའི་བཤད་སྟངས་དེ་བསྐྱུར་དགོས་པས་སོ། །གཞན་དུ་ན་རི་བོ་མཆོག་རབ་ཇོ་མོ་གླང་མ་བྱ་རྒྱུ་ཡིན་ནམ། དེ་ལྟར་ན་བོད་ཀྱི་གནམ་སེར་པོ་རེད་འདུག་གམ་ལྟོས་དང་ཨ་རི་ལ་འགྲོ་ཅི་དགོས། ཀྱེ་མ་རང་རེའི་མཁས་པའི་མིང་འཛིན་འདི་ཚོས་འདི་ལྟར་རྩེད་རྡོ་བསྒྲིགས་ནས་ཉི་མ་གཏོང་བཞིན་འདུག །བླ་རུང་མཁན་པོ་ཚུལ་ཁྲིམས་བློ་གྲོས་ལགས་ཀྱིས། ད་ལྟ་ང་ཚོ་ལ་ནི་ས་གཞི་ཟླུམ་པོར་སྣང་བ་བདེན་མོད། མི་ཁ་ཅིག་གི་མིག་ངོར་ད་དུང་ལེབ་ལེབ་དངོས་སུ་སྣང་བཞིན་ཡོད། དེས་ན་མཐའ་གཅིག་ཏུ་ལེབ་ལེབ་དང་ཟླུམ་པོ་གང་རུང་གཅིག་ཏུ་ཐག་མི་ཆོད་ཅེས་གསུངས། ད་དུང་ཡང་མི་ཁ་ཅིག་ལ་འཇིག་རྟེན་འདི་ཟླུམ་པོར་སྣང་བཞིན་ཡོད་པ་ཁྱེད་ཀྱིས་གཟིགས་པ་ཡིན་ནམ་གསན་པ་ཡིན། འཇིག་རྟེན་འདི་ལེབ་ཟླུམ་གང་རུང་མཐའ་གཅིག་ཏུ་ཐག་མ་ཆོད་ན་ཁྱེད་རང་གི་དབུ་ལ་རྭ་ཡོད་མེད་མཐའ་གཅིག་ཏུ་ཐག་ཨེ་ཆོད། ད་ལྟའི་མི་ཚོས་འཇིག་རྟེན་འདིར་རྒྱུས་ལོན་བྱས་པའི་ཚད་དེ་ཁྱེད་རང་ཁྱེད་རང་གི་དབུ་ལ་རྒྱུས་ལོན་བྱས་པའི་ཚད་ལས་མ་མང་ན་མི་ཉུང་བའི་ཚོད་ལགས། མདོ་ལས་ས་ལ་སར་འདུ་ཤེས་པའང་ཡོད། ཆུ་ལ་སར་འདུ་ཤེས་པའང་ཡོད། ནམ་མཁའ་ལ་སར་འདུ་ཤེས་པའང་ཡོད། དེ་བས་ན་ངེས་པ་མེད་པའི་ཕྱིར་གང་ལྟར་ཡང་སྣང་བ་ཡིན་ནོ། །ཞེས་པའི་ལུང་འདི་ཙམ་ལ་བརྟེན་ནས་འཇིག་རྟེན་ལེབ་ཟླུམ་གང་ཡང་ཐག་མ་ཆོད་པ་ཨེ་ཡིན། འོ་ན་ས་ཆུ་མེ་རླུང་ཐམས་ཅད་ཕར་ཡིན་ཚུར་ཡིན་གྱི་ཁྲ་ལེབ་བམ། ཡང་ན་ཐམས་ཅད་ཕར་མིན་ཚུར་མིན་གྱི་ནག་ལེབ་ཡུག་གཅིག་ཏུ་སོང་འདུག་པས་དེ་མིན་འདི་ཡིན་གྱི་རྣམ་གཞག་མི་དགོས་པར་འདུག་གོ །ཚད་མའི་མཐར་ཐུག་མངོན་སུམ་ལ་ཐུག་ཀྱང་ཡིད་རྟོན་མེད་ན་དོན་སྤྱིས་དཔོག་པའི་རྗེས་དཔག་ཡིན་རྒྱུར་དེ་ཚོར་དེ་བས་ཀྱང་ཡིད་རྟོན་ཕེར་དཀའ། ར་སེ་དཀོན་མཆོག་རྒྱ་མཚོ་ལགས་ཀྱིས། སྟོན་པའི་གསུང་རབ་ཕྱི་མ་རྣམས་སུ་བྲམ་ཟེའི་ལུགས་ལྟར་ས་གཞི་ལེབ་མོར་གསུངས་ཀྱང༌། དུས་འཁོར་སོགས་གསུང་རབ་ནང་མ་རྣམས་སུ་ས་གཞི་ཟླུམ་པོར་བཤད་ཡོད། ཅེས་གསུངས་འདུག་པ་ནི་རྫུན་ཚིག་ནམ་མཁར་མི་ཤོང་བ་ཞིག་སྟེ། དུས་འཁོར་ལས། འོག་ནས་རིམ་བཞིན་རླུང་དཀྱིལ་དཔག་ཚད་བཞི་འབུམ། མེ་དཀྱིལ་སུམ་འབུམ། ཆུ་དཀྱིལ་ཉིས་འབུམ། ས་དཀྱིལ་ཆིག་འབུམ། དེའི་སྟེང་ལྷུན་པོ་འཕང་དུ་དཔག་ཚད་ཆིག་འབུམ་དང༌། ཞེང་དུ་རྩ་བར་སྟོང་ཕྲག་བཅུ་དྲུག །རྩེ་མོར་སྟོང་ཕྲག་ལྔ་བཅུ་ཡོད་ཅེས་ཧ་ལམ་བོད་ལུགས་ཀྱི་མཆོད་རྟེན་ཆེ་ཆུང་གཉིས་རྩེ་སྤྲོད་ཀྱིས་བསླངས་པ་ལྟ་བུ་ཞིག་བཤད་འདུག་པས་རྡོ་རྗེ་སྐེད་ཉག་གི་དབྱིབས་དེ་ལ་ཟླུམ་པོའི་དོན་ཅི་ཞིག་ཁྱེད་ཀྱིས་གཟིགས་པ་ཡིན་ནམ། མཐའ་སྐོར་ཟླུམ་པས་ཟླུམ་པོའི་གོ་ཆོད་ན་ནི། མངོན་པའི་ལུགས་ཀྱི་འཇིག་རྟེན་དེའང་ཟླུམ་པོ་ཡིན་ཆོག་སྟེ། དེར་ས་ཆུའི་དཀྱིལ་འཁོར་གཉིས་ཀ་ཟླུམ་པོར་བཤད་པའི་ཕྱིར་ཏེ། ཁོར་ཡུག་གི་རིང་ཚད་ཞེང་ཚད་ཀྱི་སུམ་འགྱུར་དུ་བཤད་པའི་ཕྱིར། ཟླུམ་པོའི་མཐའ་སྐོར་གྱི་རིང་ཚད་དེ་ཞེང་ཚད་ཀྱི་སུམ་འགྱུར་ཡིན་ནོ་ཞེས་པ་འདི་དོན་ལ་ཅུང་ཟད་མི་གནས་ཀྱང་སྔོན་གྱི་མཁས་པ་རྣམས་ལ་ནི་ཡོངས་སུ་གྲགས་པ་ཡིན་ནོ། །དེས་ན་དེང་གི་རང་རེའི་དགེ་བཤེས་རྣམ་པས། གསུང་རབ་ནས་བཤད་པའི་འཇིག་རྟེན་དེ་དང༌། གནམ་རིག་པས་མཐོང་བའི་འཇིག་རྟེན་གཉིས་རྣམ་པ་འགལ་བ་ལྟར་སྣང་ཡང་དོན་དུ་མི་འགལ་བའི་གནད་ཡོད། ཅེས་སོགས་ཟེར་ཏེ་འགལ་སྤོང་སྨྲས་ཚད་ཐམས་ཅད་རྒྱུས་མེད་ཀྱི་སྔོན་དུ་སྟོང་གཏམ་བཤད་པ་འབའ་ཞིག་ལས། ད་སྔ་བོད་དུ་འགྱུར་བའི་སངས་རྒྱས་པའི་གསུང་རབ་ཐེག་པ་ཆེ་ཆུང་སྔགས་དང་བཅས་པ་གང་གི་ནང་དུ་ཡང༌། ང་ཚོ་འཚོ་སྡོད་བྱ་སའི་འཇིག་རྟེན་འདིའི་དབྱིབས་ད་ལྟ་ང་ཚོས་མཐོང་དུ་ཡོད་པ་འདི་ལྟར་རམ། ཡང་ན་འདི་དང་ཕྱོགས་འདྲ་ཙམ་ཞིག་ཏུ་གསུངས་པའི་ཡི་གེ་ན་གཅིག་ཀྱང་མེད་པར་ཤེས་དགོས་སོ། །ཚད་ལ་དཔྱད་ན། མངོན་པ་ལས། ས་དཀྱིལ་ལ་དཔངས་སུ་དཔག་ཚད་སུམ་འབུམ་ཉིས་ཁྲི་དང༌། ཞེང་དུ་དཔག་ཚད་ས་ཡ་གཅིག་དང་ཉིས་འབུམ་སུམ་སྟོང་བཞི་བརྒྱ་ལྔ་བཅུ། ཉི་མ་དང་ཟླ་བར་རྔམས་སུ་དཔག་ཚད་ཕྱེད་བདུན་དང་གཅིག་བཅོ་བརྒྱད་དུ་བགོས་པའི་ཆ་གཅིག །ཞེང་དུ་ཉི་མར་དཔག་ཚད་ང་གཅིག་དང༌། ཟླ་བར་ལྔ་བཅུ། སྐར་མ་ཆེ་ཤོས་ལ་རྒྱང་གྲགས་བཅོ་བརྒྱད་དང༌། ཆུང་ཤོས་ལ་རྒྱང་གྲགས་ཕྱེད། ཉི་ཟླ་གཟའ་སྐར་དང་ས་གཞིའི་བར་ཐག་དཔག་ཚད་བཞི་ཁྲི་ཡིན་ཞེས་འཁོད་ཡོད། དེང་གི་གནམ་རིག་པ་ལྟར་ན། ས་ཡི་གོ་ལའི་ཚངས་ཐིག་ལ་སྤྱི་ལེ་ཆིག་ཁྲི་ཉིས་སྟོང་ལྔ་བརྒྱ་ཙམ་ཡིན་པས་དཔག་ཚད་གཅིག་ལ་གཞུ་འདོམ་བཞི་སྟོང་དང༌། སྤྱི་ལེ་གཅིག་ལ་གཞུ་འདོམ་བདུན་བརྒྱ་ལྔ་བཅུ་རེའི་རྩིས་བྱས་ན། མངོན་པའི་ལུགས་ཀྱི་ས་དཀྱིལ་དེའི་དྲུག་བརྒྱའི་ཆ་གཅིག་ཙམ་དང༌། དཔངས་ཚད་མངོན་པ་ནས་བཤད་པ་དེའི་བརྒྱ་ཆའི་གཅིག་མ་ཟིན་ཙམ་ཡིན། ཉི་མའི་ཚངས་ཕྱེད་ལ་སྤྱི་ལེ་བདུན་འབུམ་སྟེ་སའི་གོ་ལའི་ཚངས་ཕྱེད་ཀྱི་ལྡབ་གཅིག་བརྒྱ་དགུ་དང༌། ཉི་མ་སྤྱི་ཡོངས་ཀྱི་བོངས་ཚད་སའི་གོ་ལའི་ལྡབ་ས་ཡ་གཅིག་དང་འབུམ་གསུམ་ཡིན་པས་མངོན་པའི་ལུགས་ཀྱི་ཉི་མ་དེ་བས་ལྡབ་དུང་ཕྱུར་ཙམ་གྱིས་ཆེ། ཟླ་བའི་ཚངས་ཐིག་ནི་ས་ལྒང་གི་བཞི་ཆའི་གཅིག་ཙམ་ཡིན་པས་མངོན་པའི་ལུགས་ཀྱི་ཟླ་བ་ལས་ལྡབ་བཅུ་གཉིས་ཀྱིས་ཆེ། སྐར་མ་ཆེ་ཤོས་ནི་ཉི་མ་ལས་ཀྱང་ལྡབ་མང་པོས་ཆེ་བ་དང༌། ཆུང་ཤོས་ལ་སྤྱི་ལེ་གཅིག་ཀྱང་མི་ལོངས་པའི་བྲག་རྡོའི་དུམ་བུ་དེ་འདྲའང་ཡོད་ཟེར། འོན་ཀྱང་ས་སྟེང་གི་མིས་ནམ་རྒྱུན་དངོས་སུ་མཐོང་ཐུབ་པའི་སྐར་མ་ཆུང་ཤོས་ནི་ཟླ་བ་ཡིན། ཉི་མ་དང་སའི་གོ་ལའི་བར་ཐག་སྤྱི་ལེ་དུང་ཕྱུར་ཕྱེད་གཉིས་ཙམ་ཡིན་པས་མངོན་པའི་དཔག་ཚད་བཞི་ཁྲི་ལས་ལྡབ་བདུན་བརྒྱས་རིང༌། ཟླ་བ་དང་ས་ལྒང་གི་བར་ཐག་སྤྱི་ལེ་འབུམ་བཞི་ཡིན་པས་མངོན་པའི་དཔག་ཚད་བཞི་ཁྲི་ལས་ལྡབ་གཅིག་ལ་ཉེ་བས་རིང༌། སྐར་མའི་ཁྲོད་ནས་ས་ལྒང་དང་ཉེ་ཤོས་ནི་མིག་དམར་དང་པ་སངས་གཉིས་ཡིན་ཀྱང་ཟླ་བ་དང་ས་ལྒང་གི་བར་ཐག་ལས་ཤིན་ཏུ་རིང༌། ཐག་རིང་ཤོས་ནི་འོད་ལོ་ཐེར་འབུམ་མང་པོའི་སྐད་ཆ་ཡིན་པས་དཔག་ཚད་བཞི་ཁྲི་དང་བསྒྲིག་རྒྱུ་མེད། དེ་ལྟར་རེ་རེ་བཞིན་དུ་བརྩིས་བརྒྱབ་ན། མཁས་པ་དཀོན་མཆོག་རྒྱ་མཚོས། ནང་ཆོས་ནས་ཉི་ཟླ་སྐར་གསུམ་གྱི་བར་ཐག་གསུངས་པ་དེ་དེང་གི་ཚན་རིག་པས་བཤད་པ་དང་འགྲིག་ཡོད། ཅེས་གསུངས་འདུག་པ་དེའང་གཞི་འཛིན་ས་མེད་པའི་བཀའ་མོལ་ཡིན་པ་ཧ་གོ་བར་འགྱུར་རོ། །གྲངས་ལ་དཔྱད་ན། མངོན་པའི་ལུགས་ལ་ཆགས་འཇིག་དུས་མཉམ་པའི་འཇིག་རྟེན་གཅིག་ལ་གླིང་བཞི་རི་རབ་ཉི་ཟླ་དང་བཅས་པ་བྱེ་བ་ཕྲག་བརྒྱ་སྟེ་ཐེར་འབུམ་གཅིག་ཡོད་པར་བཤད་པ་དང༌། སངས་རྒྱས་ཕལ་པོ་ཆེ་ལས། དེ་བས་ཀྱང་ཆེས་རྒྱ་ཆེ་བའི་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་སོགས་མང་པོ་ཞིག་གསུངས་ཀྱང༌། ས་གཞི་ཆེན་པོ་འདི་ཉིད་ཀྱི་སྟེང་གི་ནམ་མཁའ་ལ་ནི། ཉི་མ་གཅིག་དང༌། ཟླ་བ་གཅིག །སྐར་མ་དུང་ཕྱུར་གཉིས་དང་བྱེ་བ་བརྒྱད། ས་ཡ་ལྔ་ཙམ་ཡོད་ཅེས་གསུངས་ལ། གཞུང་ཁ་ཅིག་ཏུ་སྐར་མ་བྱེ་བ་དྲུག་ཡོད་ཅེས་ཀྱང་གསུངས་ཨེ་ཡོད་སྙམ། གནམ་རིག་པས། ང་ཚོའི་ཉེ་འཁོར་འདིར་བརྟན་སྐར་ཉི་མ་དང༌། རྒྱུ་སྐར་ལྷག་པ། པ་སངས། ས་ལྒང༌། མིག་དམར། ཕུར་བུ། སྤེན་པ། གནམ་སྐར། མཚོ་སྐར། གཤིན་སྐར་བཅས་དགུ། གཤིན་སྐར་འདིར་རྒྱུ་སྐར་གྱི་མཚན་ཉིད་ཡག་པོ་མི་ཚང་བར་འདུག་ཀྱང་ཟེར། འཁོར་སྐར་ཟླ་བ་སོགས་བཅུ་གྲངས་འགའ་ཞིག་དང༌། གཞན་འཁོར་ལམ་ངེས་མེད་ཀྱི་སྐར་ཆུང་མཇུག་རིང་མང་ཙམ་དང༌། སྐར་མདའ་སྟེ་ཧ་ཅང་ཆུང་བའི་བྲག་རྡོའི་དུམ་བུ་ནི་རྩི་མི་ཐོན་པ་ཙམ་ཡོད། བརྟན་སྐར་ཞེས་པ་འགུལ་སྐྱོད་གཏན་ནས་མེད་པའི་དོན་མིན་པར། སྐར་ཁྱིམ་ཆེན་པོའི་མཐའ་རུ་འཁོར་བ་ལས། སྐར་འབྲུ་བྱེ་བྲག་པ་གཅིག་གི་མཐའ་སྐོར་དུ་བསྐོར་བ་མི་རྒྱག་པ་ལ་ཟེར། རྒྱུ་སྐར་ནི་བརྟན་སྐར་གཅིག་དབུས་སུ་བཞག་སྟེ་དེའི་མཐའ་སྐོར་ནས་འཁོར་ལམ་ངེས་ཅན་ཞིག་དེད་དེ་བསྐོར་བ་རྒྱག་པ་དང༌། འཁོར་སྐར་ནི་རྒྱུ་སྐར་དེ་ཚོའི་མཐའ་ནས་བསྐོར་བ་རྒྱག་མཁན་ལ་ཟེར། གོང་གི་དེ་ཐམས་ཅད་ཉི་མའི་ཁྱིམ་རྒྱུད་ཀྱི་གྲུབ་ཆ་ཡིན་ལ། དགུ་ཚིགས་ཁྱིམ་རྒྱུད་ནང་དུ་དེ་འདྲའི་སྐར་ཁྱིམ་ཐེར་འབུམ་མང་པོ་ཡོད། མཐའ་ཡས་པའི་ནམ་མཁའི་ཁམས་སུ་དགུ་ཚིགས་ཁྱིམ་རྒྱུད་ལྟ་བུའི་སྐར་ཁྱིམ་ཆེན་པོ་ཐེར་འབུམ་གཅིག་ཙམ་ཞིག་རྒྱང་ཤེལ་བརྒྱུད་ནས་དངོས་སུ་མཐོང་ཐུབ་ཡོད། དེ་དག་སྤྱིའི་མིང་ལ་འཇིག་རྟེན་ཁམས་ཆེན་པོའམ། ཡང་ན་སྐར་ཆོལ་གྱི་མ་ལག་ཧྲིལ་པོ་ཞེས་འབོད་པ་ཡིན་སྐད། རྒྱུ་ལ་དཔྱད་ན། མངོན་པ་ལས། ཉི་མ་མེ་ཤེལ་ཚ་བའི་རང་བཞིན་ཅན། ཟླ་བ་ཆུ་ཤེལ་གྲང་བའི་རང་བཞིན་ཅན། སྐར་མ་རིན་ཆེན་སྣ་ཚོགས་པའི་རང་བཞིན་ཅན། ས་གཞི་རིན་པོ་ཆེ་རབ་འབྲིང་ཐ་མ་ཅི་རིགས་པའི་རང་བཞིན་ཅན། དབུས་རི་རབ་རིན་ཆེན་སྣ་བཞིའི་རང་བཞིན་ཅན་དང༌། རི་རབ་ཀྱི་ལྷོ་ངོས་རིན་ཆེན་དབང་སྔོན་ལས་གྲུབ་པས་དེའི་འོད་མདངས་ཀྱིས་ལྷོ་གླིང་གི་རྒྱ་མཚོ་དང་ནམ་མཁའ་སྔོན་པོར་སྣང་ལ། ཤར་ནུབ་བྱང་གསུམ་གྱི་ཆུ་མདོག་དང་མཁའ་མདོག་ཀྱང་ཕྱོགས་དེ་གའི་རི་ངོས་ཀྱི་རིན་པོ་ཆེ་དེ་དང་དེའི་ཁ་དོག་ཏུ་ཡོད། རི་རབ་ཀྱི་བྱང་ཕྱོགས་གསེར་ལས་གྲུབ་པས་མི་གང་དག་རི་རབ་ཀྱི་བྱང་ངོས་དང་ཉེ་བར་སླེབ་པ་ན། མི་དེའི་ཁ་དོག་ཀྱང་གསེར་གཙོ་མའི་རང་མདངས་ལྟར་ལྟ་བས་ཆོག་མི་ཤེས་པ་ཞིག་ཏུ་འགྱུར་འགྲོ་ཞེས་སོགས་འཁོད་ཡོད། གནམ་རིག་པ་དག་གིས་བཤད་ན། ཉི་མ་སོགས་བརྟན་སྐར་ཕལ་ཆེར་གྱི་གྲུབ་ཆའི་གཙོ་བོ་ཆིང་དང་ཧེལ་ཡིན་པ་དང༌། སྐར་མ་ཕལ་པ་རྣམས་ལ་ཚགས་དམ་ཚད་དང༌། དངོས་པོའི་གྲངས་འབོར། ལྕི་ཡང་སོགས་སྣ་ཚོགས་ཡོད་ཀྱང༌། རྩ་བའི་གྲུབ་ཆ་བྲག་རྡོ་དང་ཐལ་རྡུལ་སོགས་ཡིན་པ་ལས། གསེར་དངུལ་རྐྱང་པས་བཟོས་པའི་སྐར་འབྲུ་གཅིག་ཀྱང་རྙེད་མེད། ཟླ་བའི་འོད་ཟེར་ཡང་ཉི་འོད་ལྡོག་འཕྲོ་བྱས་པ་ཙམ་ལས་རང་ངོས་ནས་འོད་མེད་ཅིང༌། ཟླ་འོད་ཀྱང་བསིལ་བའི་རང་བཞིན་ཅན་མིན་པར་དྲོ་བའི་རང་བཞིན་ཅན་ཡིན། ཉི་འོད་ལ་ཁ་དོག་མི་འདྲ་བ་བདུན་ཙམ་ཡོད་པའི་ནང་ནས་ཁ་དོག་སྔོན་པོ་དེ་རླུང་ཁམས་ཆེན་པོའི་གསེང་ནས་ཐད་ཀར་མཐོང་ཐུབ་པས་རྒྱ་མཚོ་དང་ནམ་མཁའ་སྔོན་པོར་སྣང་བ་མ་ཟད། ཐག་རིང་ཟླ་བའི་སྟེང་ནས་ལྟ་སྐབས་ས་ལྒང་ཉིད་ཀྱང་སྔོན་པོར་སྣང་བཞིན་ཡོད། ཟླ་བ་རང་ལ་མཁའ་དབུགས་ཀྱི་ཕྱི་ཐུམ་མེད་སྟབས་ཟླ་བའི་སྟེང་གི་ནམ་མཁའ་ཡང་སྔོན་པོ་མིན་པར་ཉིན་མཚན་ཀུན་ཏུ་ནག་ངམ་མེ་བ་ཞིག་ཡིན་ཞེས་སོགས་ཟེར་རོ། །
འགྲོས་ལ་དཔྱད་ན། མངོན་པའི་གཞུང་ལས། འཇིག་རྟེན་ཀུན་གྱི་ལྟེ་བ་ནི་ས་གཞི་ཆེན་པོ་འདི་རང་ཡིན་པ་དང༌། ཉི་ཟླ་གཟའ་སྐར་ཡོད་ཚད་ཀྱིས་ས་དཀྱིལ་ནས་ཡར་ལ་འབུར་བའི་རི་བོ་ཆེན་པོ་ཞིག་ལ་གཡས་སྐོར་དང་གཡོན་སྐོར་སྣ་ཚོགས་རྒྱག་བཞིན་ཡོད་པར་བཤད། འདི་ནི་སངས་རྒྱས་པ་ཁོ་ནའི་བཤད་སྟངས་ཤིག་མིན་པར་གནའ་རབས་རྒྱ་གར་གྱི་བྲམ་ཟེ་རྣམ་པས་གཙོས་པའི་ཤར་ཕྱོགས་ཀྱི་འཇིག་རྟེན་ལྟ་ཚུལ་ཡོངས་ཁྱབ་ཅིག་ཡིན་པར་སྣང༌། ནུབ་ཕྱོགས་སུ་ལོ་གྲངས་ཉིས་སྟོང་ལྔ་བརྒྱ་ཙམ་གྱི་ཡར་སྔོན་ནས་རྒེ་རེད་སིའི་མཁས་པ་ཁ་ཅིག་གིས། ཉི་མ་འཇིག་རྟེན་གྱི་ལྟེ་བ་དང༌། ས་གཞིས་ཉི་མར་བསྐོར་བཞིན་ཡོད་པའི་ལྟ་ཚུལ་ཞིག་གཏོན་མྱོང་བར་གྲགས། དེ་རྗེས་དུས་ཡུན་རིང་པོར་ས་ལྟེ་སྨྲ་བའི་ལུགས་དར་ཡང༌། རི་བོ་མཆོག་རབ་མི་འདོད་ཅིང༌། ཉི་ཟླ་སྐར་གསུམ་གྱིས་ས་གཞི་གཡས་བསྐོར་གཡོན་བསྐོར་ཙམ་མིན་པར་སྟེང་འོག་བསྒྱུར་ཏེ་བསྐོར་བཞིན་ཡོད་པར་འདོད་པས་ཕྱིས་ཀྱི་ཚན་རིག་པས་བཤད་པ་དག་ཀྱང་ཅུང་ཟད་བློ་ངོར་འཆར་བདེ་བ་ཞིག་རེད། ང་ཚོ་ལ་མཚོན་ན་ནུབ་ཕྱོགས་ཀྱི་ས་ལྟེ་སྨྲ་བ་དེའང་བློ་ཡུལ་ལས་འདས་པ་ཞིག་སྟེ། ཉི་མ་དབང་ཆེན་གསེར་གྱི་ས་གཞིའི་འོག་ཏུ་མར་ནུབ་ཅིང༌། དབང་ཆེན་གསེར་གྱི་ས་གཞིའི་འོག་ནས་ཡར་འཆར་བར་འདོད་དགོས་པས་སོ། །དེའི་དབང་གིས་དུས་ད་ལྟ་ལ་ཐུག་གི་བར་དུ། ནུབ་ཕྱོགས་ཀྱི་མཚོ་འགྲུལ་པ་ཚོ་མགོ་འཁོར་བ་རེད་ཅེས་དང༌། གནམ་རིག་པ་ཚོ་མིག་འཁྲུལ་པ་རེད་ཅེས་དང༌། དེང་སང་ས་གཞི་འཁོར་བཞིན་ཡོད་པའི་དབང་དུ་བཏང་རུང༌། སྟོན་པ་འཇིག་རྟེན་དུ་བྱོན་སྐབས་ཉི་མ་འཁོར་བཞིན་ཡོད་ངེས་ཞེས་དང༌། སེམས་མ་འཚབས་པར་ཅུང་ཟད་སྒུག་སྡོད་དང༌། མི་རིང་བར་ས་གཞི་ལེབ་ལེབ་ཡིན་པའི་གཏམ་བཟང་གོ་འོང་རྒྱུ་རེད་ཅེས་དང༌། གོ་ས་གཅིག་རང་དུ་རིག་རྒྱུ་ཡོད་པའི་ས་ལྒང་རིལ་མོ་གཅིག་དང༌། རིག་རྒྱུ་མེད་པའི་ས་གཞི་ལེབ་མོ་གཅིག་སྟེ་འཇིག་རྟེན་མི་འདྲ་བ་གཉིས་ཡོད་ཆོག་ཅེས་དང༌། རིལ་རིལ་ཡིན་ན་ལེབ་ལེབ་མིན་པས་མ་ཁྱབ། ཁྱོད་ཀྱི་མིག་ངོར་རིལ་རིལ་དང༌། ངའི་བློ་ངོར་ལེབ་ལེབ་ཡིན་ཞིང་ངེད་གཉིས་ཀ་འཁྲུལ་མེད་ཡིན་ཞེས་དང༌། རིལ་རིལ་དང་ལེབ་ལེབ་གང་ཡང་མིན། ཡོད་ཚད་འཁྲུལ་སྣང་རྐྱང་རྐྱང་རེད། ཅེས་སོགས་ཡེ་ཤུ་དང་ཁ་ཆེའི་ཆོས་པ་ཐལ་མཐའ་པ་ཚོས་ཀྱང་སྨྲ་མ་སྤོབས་པའི་སྐད་ཆ་གཡང་ཟ་བ་སྣ་ཚོགས་བཤད་དེ་ལྐུགས་པ་ཨུ་ཚུགས་གནང་དགོས་ཆགས་པ་རེད། ད་དུང་ང་ཚོའི་ཆོས་ལུགས་འདི་ནི་རིགས་པའི་ཆོས་ལུགས་དང༌། ང་ཚོ་ནི་རིགས་པའི་རྗེས་འབྲང་ཡིན་ཞེས་རང་གིས་སེམས་ཤིང་གཞན་ལ་སྒྲོག་པ་ནི་ཡ་དང་ཆ་ཡི་རྣམ་པར་ཐར་པའོ། །འབྲི་གུང་དཀོན་རྒྱམ་ལགས་དང༌། མཁན་ཆེན་ཚུལ་བློ་ལགས་རྣམ་གཉིས་ཞལ་གཅིག་མཐུན་གྱིས། དཔལ་ལྡན་དུས་ཀྱི་འཁོར་ལོ་ལས། ཉི་མའི་ཁྱིམ་རྒྱུད་ནང་གི་གཟའ་བདུན་ནམ་བརྒྱད་ཀྱི་གནས་ཡུལ། སོ་སོའི་འཁོར་ལམ་བརྒྱུད་ནས་ཉི་མར་སྤྱི་བསྐོར་རྒྱག་པའི་དུས་ཚོད། ཟླ་བ་ཡར་ངོ་མར་ངོའི་འཕེལ་འགྲིབ། ཉི་ཟླ་ལ་སྒྲ་གཅན་འཇུག་ཚུལ་སོགས་གང་གསུངས་དེང་གི་གནམ་རིག་པས་བཤད་པ་དང་ཧེ་བག་མེད་པར་ཐོད་ཐུག་ཡོད། འདི་ཉིད་ཁོ་ནའི་ཆ་ནས་བསམ་ན་ཡང་སངས་རྒྱས་ཁོང་གི་མཁྱེན་རབ་ནི་ཧ་ལས་དགོས་པ་ཞིག་མ་རེད་དམ། ཞེས་སོགས་གསུངས་འདུག་ཀྱང་གསུངས་ཚད་རང་སེམས་གསོ་བའི་གཏམ་སྙན་ཙམ་ལས་གཞན་གང་ཡང་མིན། དཔལ་ལྡན་དུས་འཁོར་སངས་རྒྱས་ཀྱི་གསུང་ཡིན་མི་སྲིད་པའི་ཚུལ་འོག་ཏུ་འཆད། དུས་འཁོར་ལུགས་ཀྱི་སྐར་རྩིས་དེ་ནི་དུས་རབས་བཅུ་པ་གཡས་གཡོན་གྱི་རྒྱ་གར་ཤར་ནུབ་ཏུ་དར་བའི་གནམ་རིག་གི་ཚབ་མཚོན་ལྟ་བུ་ཡིན་ལ། གནའ་བོའི་རྒྱ་གར་ནི་སྐར་རྩིས་རིག་པའི་ཕ་ཡུལ་ལྟ་བུ་ཡིན་པས་དེར་དེང་གི་གནམ་རིག་དང་ཕྱོགས་མཐུན་གྱི་ལེགས་ཆ་ལོས་ཡོད། གཟའ་བདུན་གྱི་གནས་ཡུལ་དང་འཁོར་སྐྱོད་ཀྱི་དུས་ཚོད་ཆ་མཐུན་དུ་བཤད་ཐུབ་པ་ལ་ངོ་མཚར་མི་དགོས་ཏེ། དེ་ཙམ་ནི་ཤར་རྒྱ་ནག་དང༌། ནུབ་རྒེ་རེད་སི། བྱང་ཏ་ཟིག་གི་སྐར་རྩིས་པ་དང༌། ལྷོ་རྒྱ་གར་གྱི་མུ་སྟེགས་བྱེད་བཅས་ཀུན་གྱིས་སྔ་རབས་ཤིག་ནས་ངོས་ཟིན་ཡོད་པའི་ཕྱིར། འཛམ་གླིང་ཤར་ནུབ་ཡོངས་སུ་གཟའ་བདུན་གྱི་རྩི་ཚུལ་ཐུན་མོང་དུ་ཡོད་པ་འདིས་ཡོད་ཚད་ར་སྤྲོད་ཐུབ་པའི་ཕྱིར། ང་ཅག་བོད་པ་ཚོས་ཀྱང་གཟའ་བདུན་དང་སྒྱུ་སྐར་ཉེར་བརྒྱད་ཀྱི་འཁོར་འགྲོས་རགས་ཙམ་ཞིག་ནི་དུས་འཁོར་ལྟ་ཅི། སངས་རྒྱས་ཆོས་ལུགས་བོད་དུ་མ་དར་གོང་ནས་ཤེས་ཡོད་པའི་ཕྱིར་ཏེ། འདི་དག་ལ་བོད་པའི་ཐུན་མིན་གྱི་མིང་བཏགས་ནས་ལེགས་ཉེས་བརྩི་བའི་གཞིར་བྱ་སྲོལ་ཡོད་པའི་ཕྱིར། མངོན་མཚན་ཆེ་བའི་གཟའ་སྐར་འདི་དག་གི་གནས་དང་འགྲོས་སོགས་ཐུན་མིན་གྱི་ཁྱད་ཆོས་ངོས་མ་ཟིན་ན། མཐའ་ཡས་པའི་སྐར་ཚོགས་ཀྱི་ཁྲོད་ནས་འདི་དག་ཁོ་ནར་མིང་འདོགས་དང༌། རྟེན་འབྲེལ་ལ་ཉེའི་གཞི་རུ་འཛིན་པའི་རྒྱུ་མཚན་མེད་པའི་ཕྱིར། མདོར་ན་དུས་འཁོར་ནས་བཤད་པའི་སྐར་རྩིས་ཀྱི་རྣམ་གཞག་ལ། གནའ་རབས་ཀྱི་སྐར་རྩིས་པ་རྒན་པོ་ཚོས་ཤ་མིག་ཕལ་པ་ཞིག་ནམ་མཁར་གཏད་དེ་རྩིས་བརྒྱབ་ཅིང༌། དུས་ཡུན་རིང་མོའི་བར་དུ་ཉམས་མྱོང་བསགས་པའི་གྲུབ་འབྲས་དེ་ཙམ་མ་གཏོགས༌། མི་ཕལ་པས་བསྒྲུབ་མི་ཐུབ་ཅིང་ངོ་མཚར་དགོས་པའི་ཐོད་བརྒལ་གྱི་གྲུབ་འབྲས་ཅུང་ཟད་ཀྱང་མེད། རྒྱུ་བའི་གཟའ་རྣམས་ཀྱི་ངོས་འཛིན་བྱེད་སྟངས་དེ་རང་ལ་གཅིག་ལྟོས་དང༌། གཏན་ནས་རྩི་མི་འོས་པའི་དབུས་ཀྱི་བརྟན་སྐར་ཉི་མ་དང༌། སའི་གོ་ལའི་འཁོར་སྐར་ཟླ་བ་གཉིས་རྒྱུ་སྐར་གྱི་གྲས་སུ་ཚུར་བརྩིས། རྩི་དགོས་ངེས་ཀྱི་སའི་གོ་ལ་ཕར་ཕུད། སུས་ཀྱང་གོ་རིག་མེད་པའི་སྒྲ་གཅན་ཞེས་པ་ཞིག་རྟོག་བཟོ་བྱས་ཏེ་གཟའ་གྲལ་དུ་ཡར་བཙུད། ཡོད་ངེས་པའི་གནམ་མཚོ་གཤིན་གསུམ་པོ་ཅུང་ཟད་བར་ཐག་རིང་བས་རྩ་བ་ནས་མ་མཐོང་བའི་ཁ་སྟབས་འདི་ལ་གཟིགས་དང༌། དུས་འཁོར་མཁན་པོ་ལ་ཤ་ཡི་མིག་ལས་འདས་པའི་སངས་རྒྱས་ཀྱི་སྤྱན་ཡོད་པའི་བཟོ་འདུག་གམ། འདི་ནི་ཁྱིམ་ཞིག་གི་བཟའ་མི་རྣམས་ངོས་འཛིན་དུ་བཅུག་སྐབས། བུ་ཆུང་ཕ་རྒན་དང་ནོར། ཕ་རྒན་བུ་ཆུང་དང་ནོར། ཚ་བོ་ཁུ་བོ་དང་ནོར། བུ་མོ་ཆུང་ཆུང་གསུམ་ཕྱིར་ཕུད། འབྲེལ་མེད་ཀྱི་མི་འཁྱམ་ཞིག་ཡར་བསྡུས་ནས་རྩིས་བརྒྱབ་པ་དང་མཚུངས་པས་ནོར་ཚབས་མ་ཆེ་དགུ་ཆེ་ཡིན། ཡང་ར་སེ་དཀོན་མཆོག་རྒྱ་མཚོས། མདོ་ལས་ཟླ་བ་ཡར་མར་གྱི་འཕེལ་འགྲིབ་ཉི་མའི་དཀྱིལ་འཁོར་གྱི་དབང་གིས་ཡིན་པར་གསུངས་པ་དང༌། དེང་གི་གནམ་རིག་པས་ཟླ་བའི་འཕེལ་འགྲིབ་ས་ལྒང་གི་གྲིབ་མའི་དབང་གིས་ཡིན་པར་བཤད་པ་གཉིས་ཐོད་ཐུག་ཡོད་ཅེས་གསུངས་འདུག །དགེ་རྒན་དོར་ཞི་ཞུ་བའི་རྒན་པོ་ལོ་ལོན་ཞིག་གིས་འདི་འདྲའི་རྒྱུས་མེད་ཀྱི་རྒྱུས་གཏམ་ཞིག་བྱས་འདུག་པ་དེའི་རྗེས་སུ་གཡམ་རྒྱུག་གནང་བ་འདྲ། དེང་གི་གནམ་རིག་པས་ཟླ་འཛིན་ས་ལྒང་གི་གྲིབ་མ་ཡིན་པར་བཤད་ཀྱི། ཡར་ངོ་མར་ངོའི་གྲིབ་མ་ས་གྲིབ་ཡིན་པར་གང་དུ་ཡང་བཤད་མེད། གལ་སྲིད་བཤད་ཡོད་ན་གནམ་སྟོང་གི་ཉིན་མོར་ས་ལྒང་གི་གྲིབ་མ་ཟླ་བའི་ཐོག་ཏུ་ཇི་ལྟར་བབ་པ་ཡིན་ཁོ་བོས་དྲི་བ་ཡིན་པས། གནམ་རིག་མཁས་པ་དང་ཆོས་རིག་མཁས་པ་ཁྱེད་ཅག་དཔུང་བསྒྲིག་སྟེ་ལན་འདེབས་མཛད་དགོས་སོ། །མདོ་ལས། ཉི་མའི་དབང་གིས་ཟླ་བ་བྲི་གང་བྱེད་པར་གསུངས་པ་ཙམ་ཞིག་ནི་བདེན་མོད། བྱེད་ཚུལ་ཚད་ལྡན་ཞིག་གསུང་ཐུབ་མེད་དེ། སྒྲོན་མེ་དང་ཀ་བའི་གྲིབ་མ་དཔེ་རུ་བྱས་པ་དང༌། ཟླ་བའི་ཁ་ཁྱེར་གྱི་གྲིབ་མ་ཡིན་ཞེས་དང༌། ཉི་འོད་ཀྱིས་འུག་པའི་མིག་ལ་མུན་པ་སྐྱེད་པ་ལྟར་རང་གྲིབ་ཡིན་ཞེས་དང༌། ཡང་ཟླ་བ་བླ་འོག་འཛུར་བ་ཡིན་ཞེས་དང༌། སྟེང་ཕྱོགས་ཀྱི་དབང་སྔོན་དེ་མར་བསྟན་ནས་གནམ་མདོག་དང་འདྲེས་པ་ཡིན་སོགས་མི་བདེན་རྟོག་བཏགས་ཁོ་ནས་བཀང་འདུག་པའི་ཕྱིར། ཁག་མེད་དེ། ཟླ་བ་ལེབ་ལེབ་ཞིག་ལ་དེང་གི་དངོས་མཐོང་གི་རྣམ་གཞག་ལྟར་བྱར་མི་བཏུབ་པའི་ཕྱིར། རྟེན་འབྲེལ་འགོ་ནས་ཉེས་ན་འཆོས་དཀའ་བའི་ཕྱིར་རོ། །ཡང་མཁས་དབང་ར་སེ་ལགས་ཀྱིས། ཉི་འཛིན་ཟླ་འཛིན་གྱི་སྐབས་སུ་སྒྲ་གཅན་ཞེས་པའི་སྲོག་ཆགས་ཤིག་གིས་ཉི་ཟླ་ཟོས་པའམ། བཟུང་བར་གྲགས་པ་ནི་མུ་སྟེགས་པའི་ངག་སྒྲོས་ངན་པ་བོད་དུ་འཁྱར་བ་ཙམ་ལས་གསུང་རབ་ཀྱི་ནང་དུ་དེ་འདྲ་གཏན་ནས་མ་བཤད། ཅེས་གསུངས་པ་འདིའང་བཀའ་མོལ་དྲང་པོ་མིན། མདོ་དྲན་ཉེ་ལས། ལྷ་མ་ཡིན་སྒྲ་གཅན་གྱིས་ལྷ་ཡུལ་ལ་བྱ་ར་བྱེད་སྐབས་ཉི་ཟླས་ལྟ་མ་བདེ་བས་ལག་པས་སྒྲིབ་པ་ཡིན་ཞེས་དང༌། ཉི་ཟླ་གཟའ་སྐར་ཡོད་ཚད་ལྷ་ཡི་བུ་དང་བུ་མོའམ། དེ་དག་གི་གཞལ་མེད་ཁང་ཡིན་ཞེས་གསུངས་པ་སྔར་དྲངས་ཟིན་ལྟར་དང༌། དུས་འཁོར་ལས། གཟའ་གཞན་རྣམས་གཡས་བསྐོར་དང༌། སྒྲ་གཅན་གཅིག་པུ་གཡོན་བསྐོར་གྱིས་སྐྱོད་པ་ནི་དེའི་བསོད་ནམས་ཀྱི་སྟོབས་ཀྱིས་ཡིན་པར་བཤད་ཅིང༌། སྲོག་ཆགས་མིན་ན་བསོད་ནམས་ཆེ་ཆུང་གི་སྐད་ཆ་འོང་དོན་མེད་པའི་ཕྱིར། ལྷག་པར་དུ་ཐར་ལོའི་གསར་འགྱུར་བཅུ་གསུམ་གྱི་ནང་ཚན་ཉི་མའི་མདོ་དང༌། ཟླ་བའི་མདོ་ཞེས་པ་དེ་གཉིས་ཀྱི་ནང་དུ་ཅི་ཞིག་གསུངས་འདུག་མཁས་པ་ཁྱེད་ཀྱིས་ཡག་པོ་ཞིག་གཟིགས་པར་ཞུའོ། །ཡང་ཁོང་ཅག་གིས། དུས་འཁོར་ལུགས་ཀྱི་སྐར་རྩིས་དེས་ཉི་ཟླ་གཟའ་འཛིན་དུས་ཚོད་སྐར་མ་ཙམ་ཡང་འཁྲུལ་མེད་དུ་སྟོན་ཐུབ། ཅེས་གསུངས་པ་དེའང་བདེན་པ་ཡེ་ནས་མིན། སྔོན་གྱི་དུས་འཁོར་མཁན་པོ་ཚོས་ཆུ་ཚོད་སྐར་མ་ཕར་བཞག །ཞག་དང་ཉི་མ་ཡང་མོ་མ་ངན་པའི་མོ་བཞིན་ཐིག་ལ་མི་ཐིག་ལ་ཙམ་ཡིན་ཚུལ་ཁ་ཆེ་པཎ་ཆེན་དང༌། རྡོ་རིང་བཀའ་བློན་སོགས་མང་པོའི་ལོ་རྒྱུས་ཡོད་པའི་ཕྱིར། ད་ལྟ་སྨན་རྩིས་ཁང་གིས་དུས་ཚོད་གསལ་ཁ་ཅན་ཞིག་ཤོད་ཐུབ་པ་འདི་ནི་རྒྱ་ནག་ནས་བླངས་པའི་མན་ངག་བཀའ་རྒྱ་མ་ཞིག་གིས་ཁ་སྣོན་བྱེད་ཀྱིན་ཡོད་སྐད་ལ། དེ་ཉིད་དཔེ་འཁྱུད་བྱས་ཏེ་གཞན་ལ་མི་སློབ་པས་ས་རིས་པ་ཕལ་པ་ཚོ་ལ་ཉིན་གྲངས་འགྲོ་ཙམ་ལས་ཆུ་ཚོད་དང་སྐར་མ་བརྩི་རྒྱུ་མི་འདུག །རྒྱ་ནག་གི་མན་ངག་དེ་ནི་མིང་རྒྱལ་རབས་སྐབས་ཀྱི་རྒྱ་ཡི་རྩིས་པ་ཞུས་ཀོང་ཆི་ཟེར་བ་དེས། ཨི་ཊ་ལི་ནས་ཡིན་པའི་ཡེ་ཤུའི་ཆོས་སྤེལ་མཁན་ཞིག་གི་དྲུང་ནས་ནུབ་ཕྱོགས་རྩིས་རིག་གི་གནད་གསང་མང་པོ་བསླབས་པ་དེ་དག་ཡིན་བཟོ་འདུག་པས་དོན་དུ་ནུབ་ཕྱོགས་པའི་བཀའ་དྲིན་ཡིན་པར་ཤེས་དགོས། དེ་མིན་དུས་འཁོར་རང་ལ་ཁུངས་བཅོལ་ནས་དུས་ཚོད་སྐར་མ་ཙམ་ཡང་མ་འཛོལ་བའི་ས་རིས་ཤིག་འབྲི་ཐུབ་ན་ཁྱེད་ཅག་གིས་བྲིས་དང༌། ཁོ་བོས་རིན་ཐང་ཆེ་བའི་རིན་པོ་ཆེ་སྣ་ཚོགས་ཀྱིས་སྟོངས་གདབ་པར་བྱའོ། །སྤྱིར་སངས་རྒྱས་ཆོས་གཞུང་ནས་བཤད་པའི་འཇིག་རྟེན་ཆགས་དབྱིབས་ཀྱི་སྐོར་འདི་ནོར་བས་སངས་རྒྱས་ཆོས་ལུགས་རང་ཉིད་ནོར་བའི་གོ་མི་ཆོད་ཅིང༌། མ་ནོར་བས་སངས་རྒྱས་ཆོས་ལུགས་མ་ནོར་བའི་གོ་ཡང་མི་ཆོད། རང་རེ་ལ་མཚོ་འགྲུལ་དང་མཁའ་འགྲུལ་སོགས་འཇིག་རྟེན་སྐོར་སྐྱོད་དང༌། སྐར་ཁམས་འགྲུལ་བཞུད་སོགས་ཀྱི་ཆ་རྐྱེན་ཀྱང་གནས་སྐབས་འཛོམས་རེ་བྲལ། དེ་བས་ས་འཁོར་བཞིན་ཡོད་དམ་གནམ་འཁོར་བཞིན་ཡོད་འཕྲལ་དུ་ཐག་མ་ཆོད་ན་འགྲོ་ལོ་འདུག་ལོ་མེད་པ་དེ་འདྲ་གང་ཡང་ཆགས་བསྡད་མེད་མོད། གཞན་པ་ལ་མཚོན་ན་སློབ་ཆུང་ནང་གི་ཕྲུ་གུ་ཚོས་ཀྱང་ཧ་གོ་ཞིང་དོན་རྟོགས་ཟིན་པའི་རྒྱུན་ཤེས་ཤིག་ལ། ང་ཚོའི་མཁས་པ་ས་འདྲ་འདྲ་དང༌། གནམ་འདྲ་འདྲ་ཡིན་ཟེར་མཁན་ཚོས་མི་དགོས་ས་ལ་དོགས་པ་རྣམ་རྟོག་དང༌། ལྐུགས་པ་ཨུ་ཚུགས་གནང་སྟེ་བཞུགས་ན་འཛམ་གླིང་མི་དམངས་ཀྱི་སྔུན་ལ་ངོ་ཚ་བར་འདུག་པས་བཀའ་མོལ་འཕྲལ་ལེ་འཕྲུལ་ལེ་དེ་ཚོ་གསུང་མཚམས་བཞག་སྟེ་མི་འགྲོ་ལམ་འགྲོ་གནང་བཞག་ན་ཡག་ཤོས་རེད་བསམ་སྟེ་ཅུང་ཟད་ཅིག་སྨྲས་པ་ལགས། མཁས་ཤིང་མཛངས་པའི་སྐྱེས་བུ་དག་གིས་ནི་འདི་ལྟར་ཞལ་གྱིས་བཞེས་ཟིན་པའང་ཡིན་ཏེ། སེམས་དང་སྲོག་ཅེས་པའི་ཆོས་དང་ཚན་རིག་བར་གྱི་མཁས་པའི་བགྲོ་གླེང་ཚོགས་འདུ་ཐེངས་བཅུ་གསུམ་པ་དེ། ཉིས་སྟོང་ལྔ་ལོར་ཨ་རིའི་རྒྱལ་ས་ཝ་ཤིང་ཀྲོན་དུ་འཚོགས་སྐབས། རྒྱལ་དབང་མཆོག་གིས། འཇིག་རྟེན་ཆགས་དབྱིབས་ཀྱི་སྐོར་ལ་ཆོས་གཞུང་ཁག་ནས་བཤད་པ་དེ་དངོས་གནས་ནོར་བསྡད་ཡོད། དེའི་ཐད་ནས་ཚན་རིག་པས་གྲུབ་འབྲས་ཡག་པོ་བླངས་འདུག །དུས་རབས་བཞི་པའི་ནང་དུ་བྱོན་པའི་སློབ་དཔོན་དབྱིག་གཉེན་ཁོང་གལ་སྲིད་དུས་རབས་ཉེར་གཅིག་པ་འདིའི་ནང་དུ་སླར་ཡང་ལན་གཅིག་འབྱོན་རྒྱུ་ཡོད་པའི་དབང་དུ་བཏང་ན། སྔར་ཡོད་མངོན་པ་མཛོད་ཀྱི་གནས་གསུམ་པ་དེ་རྩིས་མེད་དུ་བཏང་ནས། དེང་དུས་ཀྱི་མཐོང་བ་དང་མཐུན་པའི་འཇིག་རྟེན་བསྟན་པའི་མཛོད་གནས་གསར་པ་ཞིག་ཏན་ཏན་བརྩམ་གནང་རྒྱུ་རེད། ཅེས་ངས་རྟག་པར་ཤོད་ཀྱིན་ཡོད་ཅེས་གསུངས་སོང་བ་ལྟ་བུ་སྟེ། ཁོང་ལ་འཛམ་གླིང་མི་དམངས་ཀྱིས་འདི་ཙམ་གྱི་གུས་བཀུར་ཐོབ་པའི་རྒྱུ་མཚན་གཅིག་ནི། ནམ་ཡང་དངོས་ཡོད་ལ་བསྙོན་མི་འདིང་ཞིང༌། བདེན་དོན་ཡིན་ཕྱིན་ཞལ་གྱིས་བཞེས་ཕོད་པའི་ཐུགས་སྟོབས་འདི་འདྲ་ཞིག་ཡོད་པས་ཨེ་ཡིན་སྙམ།
ནང་བཅུད་སེམས་ཅན་གྱི་རྣམ་གཞག་ལ་དཔྱད་ན། དེང་གི་ཚན་རིག་པའི་མཐོང་བ་དང་ཆེས་མི་མཐུན་ས་གཅིག་ནི། འགྲོ་བ་རིགས་དྲུག་ཅེས་མི་དང་དུད་འགྲོ་གཉིས་ཀྱི་ཐོག་ཏུ་གོ་རྒྱུ་རིག་རྒྱུ་མེད་པའི་སེམས་ཅན་མི་འདྲ་བ་བཞི་བརྩི་རྒྱུ་རྙེད་ཡོད་པ་འདི་རེད། འདི་ཡང་ནང་པ་སངས་རྒྱས་པ་ཁོ་ནས་རྙེད་པ་མིན་པར་གནའ་རབས་ཀྱི་ཆོས་ལུགས་ཡོད་ཚད་ཕལ་ཆེར་ཁ་གཅིག་མཐུན་ལྟ་བུར་གྱུར་འདུག །རྒྱ་གར་དུ་སངས་རྒྱས་ཆོས་ལུགས་མ་དར་གོང་ནས་ལྷ་ཡུལ་དང་དམྱལ་ཡུལ་གཉིས་པོ་ནི་རླུང་ལྟར་གྲགས་ཤིང༌། རིག་བྱེད་ཀྱི་གཏམ་རྒྱུད་ཕལ་མོ་ཆེ་ཡང་ལྷ་དང་དམྱལ་བ་པའི་རྟོགས་བརྗོད་ལྟ་བུར་གྱུར་ཡོད། དཔེར་ན་ཆུ་བོ་གང་གའི་ཆུ་མགོ་ལྷ་ཡུལ་དང༌། ཆུ་རྔ་དམྱལ་ཡུལ་དུ་ཟུག་པར་བཤད་པ་ལྟ་བུ་སྟེ་བགྲང་བས་ག་ལ་ལང༌། མཁས་དབང་ར་སེ་དཀོན་མཆོག་རྒྱ་མཚོས། གནའ་བོའི་རྒྱ་གར་བ་རྣམས་ཀྱི་སེམས་ནང་གི་ལྷ་ཡུལ་དེ་ནི་མངའ་རིས་གངས་དཀར་ཏེ་སེའི་གཡས་གཡོན་ཙམ་ཞིག་ཡིན། ཞེས་གསུངས་པ་ནི་ཕལ་ཆེར་བདེན་པ་ལྟ་བུར་འདུག་ལ། དེ་ལྟར་ན་ཁོ་ཚོའི་སེམས་ནང་གི་དམྱལ་བ་དེའང་བྷང་༡ག་ལའི་མཚོ་ཁུག་དེ་ཙམ་ལས་ཞེད་སྣང་ལངས་དགོས་པའི་ས་ཆ་གཞན་པ་ཞིག་ནི་མིན་པ་འདྲ། ནུབ་ཕྱོགས་ཡེ་ཤུ་པ་ཚོས་ཀྱང༌། ལྷ་ཡུལ་ན་འཇིག་རྟེན་བྱེད་པོའི་ལྷ་ཆེན་དང༌། ཁོང་ལ་གློ་བ་མཉེས་པའི་སྐུ་འཁོར་རྣམས་རང་དབང་བག་ཕེབས་ཀྱིས་འཚོ་བ་རོལ་བཞིན་ཡོད་པ་དང༌། དམྱལ་བའི་ཡུལ་ནི་ལྷ་ཆེན་གྱི་བཀའ་དང་འགལ་བའི་མི་ངན་ཚོར་ཆད་ལས་བྱ་ས་དང༌། དམྱལ་བའི་དཔོན་པོ་དེའང་ལྷ་ཆེན་དང་དམ་ཚིག་མེད་པའི་བདུད་འདྲེ་ཞིག་ཡིན་ཚུལ་བཤད། དེ་བཞིན་ཨ་རབ་ཁ་ཆེའི་ཆོས་པ་ཚོས་ཟེར་ཡག་ལ། ལྷ་ཡུལ་ནི་ཤིན་ཏུ་སྐྱིད་དེ། དེ་ན་འོ་མའི་ཆུ་མགོ་དང༌། བུ་རམ་གྱི་རི་བོ་ཡོད། སྡོད་ཁང་ཧ་ཅང་མཛེས་ཤིང་ཁང་པ་རེ་རེའི་ནང་དུ་ཅི་ཙམ་ཟོས་ཀྱང་ཟད་རྒྱུ་མེད་པའི་ཤིང་ཏོག་དཀར་དམར་གཉིས་རེ་བསྒྲིག་བཞག་ཡོད། གྱོན་པ་ཡོད་ཚད་དར་དང་གོས་ཆེན་སྤུས་ལེགས་ཤ་སྟག་ཡིན། རྒྱན་དུ་ནི་གསེར་གྱི་གདུ་བུ་དང༌། མུ་སྟེགས་ཀྱི་སྐེ་རྒྱན་གང་འདོད་དུ་འདོགས་ཆོག །ལྷ་ཕྲུག་ཚོ་ཆ་དང་ཆ་བྱས་ཏེ་དགའ་ཞིང་སྐྱིད་པའི་སྐྱེད་ཚལ་དུ་རྩེད་འཇོར་རོལ་བཞིན་ཡོད་ལ་ཚ་གྲང་གི་སྡུག་བསྔལ་ནི་མིང་ཙམ་ཡང་མེད། མདོར་ན་དེར་ལན་གཅིག་སླེབ་ཐུབ་ན་སྐྱོ་བ་དང་དཀའ་ངལ་སྤུ་ཙམ་མེད་པའི་འཚོ་བ་རོལ་ཐུབ། དམྱལ་བའི་ཡུལ་དེ་ནི་ཤིན་ཏུ་འཇིགས་སུ་རུང་བ་ཞིག་སྟེ། ས་གང་དུ་སོང་ཡང་རྒྱུན་མི་ཆད་པར་འབར་བཞིན་པའི་དམྱལ་མེ་རིམ་པ་བདུན་གྱིས་བསྐོར་ཡོད་ལ། འབར་རྫས་ནི་མིའི་ལུས་པོ་དང་རྡོ་སོལ་ཞུན་མ་ཡིན། དེར་སྡོད་མཁན་ཀུན་གྱིས་མི་འདོད་བཞིན་དུ་མེའི་གོས་གྱོན་ནས་མེའི་སྟན་སྟེང་དུ་ཉལ་དགོས། ཟས་སུ་འདྲེ་མགོ་ཟ་དགོས་ཤིང༌། བཏུང་བ་ནི་ཁྲོ་ཆུ་དང་རྣག་ཡིན། ཟ་འཐུང་ཚར་མ་ཐག་ཁོག་པར་སྣུམ་ཁོལ་བླུག་པ་ལྟར་དོན་ལྔ་སྣོད་དྲུག་ཡོད་ཚད་ལ་གཟེར་ཟུག་རྒྱག་འོང༌། ནམ་རྒྱུན་མགོ་ཐོག་ཏུ་ཆུ་ཁོལ་ལྡུག །རྐུབ་ལ་ལྕག་ཚན་བཤར། ལྕགས་དམར་གྱི་སྐམ་པས་འཇུས་ནས་གཞོགས་ཕར་བརྗེ་ཚུར་བརྗེ་བྱེད་པ་སོགས་བརྙས་ངན་ཁོ་ན་འདོན་པ་ལས། དལ་དལ་ལྷོད་ལྷོད་དུ་ཅུང་ཟད་ཀྱང་འདུག་དབང་མི་སྟེར། ཞེས་སོགས་ཟེར། བོད་པ་ཚོས་གློ་པད་མ་བཀོད་དུ་རྩམ་པའི་ཕུག་པ་དང༌། འོ་མའི་ཆུ་མགོ་ཡོད། རྒྱ་གུང་ཕྲན་ཏང་གིས་མི་རྒན་པ་ཚོ་གསོན་བཤའ་དང༌། ཕྲུ་གུ་ཚོ་གསོན་བཙོ་བྱེད། ཅེས་སོགས་བཤད་མྱོང་བ་དེ་དག་དང་འདྲ་པོ་འདུག་སྟེ་སྙིང་རྗེ་བའི་གནས་སོ། །ཆེས་གདོད་མའི་ཨེ་ཇེབ་ཆོས་ལུགས་པས་ཀྱང༌། མི་ཚོ་ཤི་མ་ཐག་ཏུ་གཤིན་རྗེ་རྒྱལ་པོའི་དྲུང་དུ་བཅར་ནས་རང་ཉིད་མི་ཡུལ་དུ་འཚོ་སྡོད་བྱས་རིང་གི་བྱ་བའི་སྙན་ཞུ་འབུལ་དགོས། སྐབས་དེར་དབུས་ཀྱི་གཙོ་བདག་གཤིན་རྗེ་རྒྱལ་པོ་སྐུ་དངོས་དང༌། མངའ་སྡེ་བཞི་བཅུ་ཞེ་གཉིས་ཀྱི་དམྱལ་དཔོན་ཀུན་འཛོམས་ནས་ཚེ་འདས་ཀྱི་སྐད་ཆ་བདེན་རྫུན་དང༌། ལས་ཀ་ཡག་བཙོག་རྟོག་ཞིབ་བྱེད། བཤད་སྟངས་དང་ལས་སྟངས་འགྲིག་ཡོད་ན་རྟ་ལ་བསྐྱོན་ནས་ལྷ་ཡུལ་དུ་སྐྱེལ། གལ་སྲིད་མ་འགྲིག་ཚེ་འཕྲལ་དུ་ཁོ་ཚོ་རུབ་བརྒྱབ་ནས་ཤ་ཐིགས་པ་ཁྲག་ཐིགས་པ་བྱས་ཏེ་བཟའ་བར་ངེས། དེས་ན་མི་ཤི་མ་ཐག་སྙིང་ལོགས་སུ་བཏོན་ནས་ཤུལ་དུ་སྙིང་རྫུན་མ་ཞིག་བཅུག་བཞག་ན་ཡག་པོ་ཡོད། དེ་ལྟར་བྱས་ན་རྒྱུག་མ་འཕྲོད་པར་ལུས་པོ་ཟོས་སོང་བའི་དབང་དུ་བཏང་རུང་སྙིང་དངོས་མ་དེ་ད་དུང་ལུས་ཡོད་པས་གནད་འགག་ཆེན་པོ་མེད་ཟེར། དེ་བཞིན་གནའ་བོའི་ཤེས་དཔལ་གྱི་རྒྱལ་ཁམས་ནུབ་རྒེ་རེད་སིའི་མི་དམངས་ཀྱིས་ཀྱང༌། རི་བོ་ཨོ་ལོམ་ཕེག་ཁསིའི་ལྷ་ཚོགས་ཞེས་པའི་ལྷ་དང་དམྱལ་བའི་ཞིང་བཀོད་ཧ་ཅང་རྒྱས་པ་ཞིག་འབྲི་བཞེངས་བྱས་ཡོད་ལ། རྙོག་འཛིང་ཆེ་ལ་འཁྲུག་ཆ་དོད་པའི་ལྷ་སྒྲུང་དེས་སྔོན་ཆད་འཛམ་གླིང་མི་དམངས་ཀྱི་ཡིད་དབང་ཡོངས་སུ་འཕྲོག་མྱོང་བར་མ་ཟད། དུས་ད་ལྟ་ཡང་སྒྱུ་རྩལ་མཁན་པོ་ཚོ་ལྷ་སྒྲུང་དེའི་ཀློང་དུ་ཞུགས་སྐབས་མགོ་བོ་ཡོངས་སུ་འཁོར་ཏེ་ཕྱིར་དོན་རྒྱུ་བརྗེད་འགྲོ་བ་དེ་འདྲའི་ངོ་མཚར་ཡོད་པ་རེད། སངས་རྒྱས་པའི་ལུགས་ཀྱི་ལྷ་དང་ལྷ་མིན། དམྱལ་བ་ཡི་དྭགས་བཅས་ཀྱི་ངོ་བོ་དང་སྐྱིད་སྡུག་ནི་ཕལ་ཆེར་ཆོས་ལུགས་གཞན་པ་ཚོས་བཤད་པ་དང་འདྲ་མཚུངས་ཡིན། འོན་ཀྱང་དེ་དག་རེ་རེ་བཞིན་དུ་དེ་དང་དེར་སྐྱེ་དགོས་པའི་རྒྱུ་དང་རྐྱེན། གང་དུ་སྐྱེ་བའི་གནས། ཚེ། ལུས། ལོངས་སྤྱོད། བྱ་བྱེད། སེམས་ཁམས། འཆི་ཚུལ་སོགས་ཞིབ་ཅིང་ཕྲ་བ་བཤད་ཡོད་པ་དེ་འདྲ་ནི་ཆོས་ལུགས་གཞན་པ་གང་གིས་ཀྱང་མ་ཐོན་པའི་ཚོད་རེད། ས་ཡི་འོག་ཏུ་དམྱལ་བ་དང་ཡི་དྭགས་ཞེས་པའི་ཁྲིམས་ར་ཞིག་དང༌། ནམ་མཁའི་ནང་དུ་ལྷ་དང་ཞིང་ཁམས་ཞེས་པའི་གླིང་ཁ་ཞིག་ཡོད་པར་འདོད་པ་འདི་མཐར་གཏུགས་ན་འཇིག་རྟེན་བྱེད་པོ་འདོད་པའི་ལུགས་ཡིན། དེ་ལྟ་མིན་ཚེ་རང་བྱུང་གི་ཁྲིམས་ར་དང༌། མ་བཅོས་པའི་གླིང་ཁ་ཞིག་ཡོད་དོན་ཅི་ཡོད། ལྷ་ཡུལ་གྱི་གྲོང་དང་གྲོང་ཁྱེར་ཕོ་བྲང་དེ་ཚོ་དང༌། དམྱལ་བའི་ཡུལ་གྱི་ལྕགས་མཁར་སྒོ་མེད་དང་ཟངས་མོ་ཆེ་དེ་དག་ལྷ་དབང་གིས་བཀོད་སྒྲིག་བྱས་པ་མིན་ན་གང་ཞིག་ནས་བྱུང་བ་རེད། བྱེད་པོ་མེད་ཀྱང་ལས་ཀྱི་མཐུ་ལ་བརྟེན་ནས་རང་ཤུགས་སུ་གྲུབ་པར་འདོད་ན་དེ་ནི་གནམ་བསྐོས་ལས་དབང་སྨྲ་བའི་ལུགས་ཡིན། འོ་ན་མི་ཡུལ་གྱི་ཁང་པ་དང་ཁང་པའི་ནང་གི་འཛིན་ཆས་འདི་ཚོ་འབད་མེད་ལྷུན་འགྲུབ་ཏུ་མི་འབྱུང་བའི་རྒྱུ་མཚན་ཅི་ཡིན་ནམ། མི་རྣམས་ལ་ཡང་མི་ཡུལ་གྱི་འཚོ་བ་རོལ་རྒྱུའི་ལས་ཡོད་པ་མིན་ནམ། སེམས་ཅན་དམྱལ་བའི་སྲུང་མ་རྣམས་འགྲོ་བ་རང་རྒྱུད་པ་ཡིན་མིན་དང༌། ལྕགས་སྲེག་ས་གཞི་སུ་ཡིས་བྱས། །མོ་ཚོགས་དེ་དག་ཅི་ལས་བྱུང༌། ཞེས་པའི་དྲི་བ་སྔར་ནས་བཀོད་མྱོང་ཡོད། དེའི་དྲིས་ལན་ནི། དེ་འདྲ་དེ་དག་ཐམས་ཅད་ཀྱང༌། །སྡིག་སེམས་ཡིན་པར་ཐུབ་པས་གསུངས། ཞེས་པ་འདི་ཡིན་ལ་དེར་འགྲེལ་བཤད་བསྐྱོན་སྟངས་མི་འདྲ་བ་གཉིས་བྱུང་ཡོད། དང་པོ་ནི། དེ་དག་བྱེད་པོ་གང་ཟག་གཞན་ཞིག་གིས་ཆེད་དུ་བཀོད་སྒྲིག་བྱས་པ་མིན་པར་ཚེ་སྔོན་མར་ལས་ངན་བསགས་པའི་རྣམ་སྨིན་ཙམ་ཡིན་ཞེས་དང༌། གཉིས་པ་ནི། ཞིང་ཁམས་ཞེས་པའི་ཡུལ་གྲུ་ལྟ་ན་སྡུག་པ་ཞིག་དང༌། དམྱལ་ཡུལ་ཞེས་པའི་གྲོང་ཁྱེར་འཇིགས་སུ་རུང་བ་དེ་འདྲ་ལོགས་སུ་མེད། ལས་དག་ན་སྡོད་ས་འདི་ཉིད་འོག་མིན་སྟུག་པོ་བཀོད་པའི་ཞིང་ཁམས་དང༌། ལས་མ་དག་ན་དམྱལ་བ་རྡོ་རྗེ་གདན་དེ་ཡང་འདི་རང་ཡིན། ཞེས་པ་སྟེ་སྔ་མ་འདི་གཞུང་ལུགས་པ་དང༌། ཕྱི་མ་འདི་གདམས་ངག་པ་ཚོས་བཏབ་པའི་ལན་རེད། ལན་སྔ་མ་དེ་ལ་ལས་ངན་བསགས་པ་ཙམ་གྱིས་ལས་འབྲས་ལྕགས་སྲེག་གི་ས་གཞི་དང༌། ཤལ་མ་ལིའི་བུད་མེད་དེ་ཚོ་འབད་མེད་དུ་འབྱུང་ཆོག་ན། ལས་དཀར་ནག་འདྲེས་མ་བསགས་པའི་མི་ཡུལ་འདིར་ཡང༌། ས་ཁང་ཤིང་ཁང་དང་ལས་གཟུགས་ཀྱི་མི་མོ་གདོང་དམར་མ་ཚོ་རང་ཤུགས་སུ་འབྱུང་མི་ཆོག་པའི་རྒྱུ་མཚན་ཅི་ཡིན་ནམ། ཞེས་མཚུངས་པ་བགྲེ་བའི་ཐལ་འགྱུར་འཕངས་པ་དེ་ལ་ལན་ཐེབས་པའི་རེ་བ་མེད། ཕྱི་མ་དེ་ནི་དངོས་ལན་མ་ཐེབས་པར་ཚིག་ཤིན་ཏུ་འདྲེད་པ་ཞིག་སྨྲས་ནས་གཡོལ་ཐབས་བྱས་པ་ཙམ་དུ་སྣང་སྟེ། འོག་མིན་གྱི་ཁང་བཟང་ལ་བཞེངས་མཁན་དགོས་མིན་དང༌། དམྱལ་བའི་སྲུང་མ་སེམས་ཅན་ཡིན་མིན་ལ་ལན་ཅུང་ཟད་ཀྱང་བཏབ་མི་འདུག་པས་སོ། །འདི་འདྲའི་ཉེས་སྐྱོན་སྔ་མ་འདི་རི་བོ་དགེ་ལྡན་པའི་གྲུབ་མཐའ་འཛིན་པའི་དགེ་བཤེས་མགོ་མཁྲེགས་དེ་ཚོས་ཁུར་དགོས་ཤིང༌། ཕྱི་མ་འདི་ས་དྭགས་རྙིང་གསུམ་གྱི་ཁྲོད་དུ་ཡོད་པའི་གྲུབ་ཆེན་ཧམ་པ་ཅན་ཁོ་ཚོས་ཁུར་དགོས་པ་ཡིན། རང་ར་སེ་དཀོན་མཆོག་རྒྱ་མཚོ་སོགས་ཁ་ཅིག་གིས། ཐེག་ཆེན་པའི་ལུགས་ལ་དམྱལ་བ་སེམས་སྣང་ཙམ་ཡིན། ཞེས་ཟེར་བཞིན་འདུག་སྟེ་དེ་ནི་དོན་དུ་དམྱལ་བ་ཁས་མི་ལེན་ཞེས་ཟེར་འདོད་པ་ཡིན་པས་ཐེག་ཆེན་པ་གཞན་པ་ཚོའི་ཐུགས་ལ་བབ་མིན་ཁོ་བོས་མི་ཤེས་སོ། །ཅིས་ཀྱང་མི་ངན་ལ་ཆད་པ་གཅད་སའི་དམྱལ་བ་དང༌། མི་བཟང་ལ་དཔེ་བཟང་སྤྲད་སའི་ལྷ་ཡུལ་ཞེས་པ་དེ་འདྲ་ཞིག་ཡོད་ན་མི་ཡུལ་རང་དང་འདབས་འབྲེལ་དུ་ཡོད་འོས་པ་ལས། གོ་རིག་དང་མཐོང་ཐོས་ཅུང་ཟད་ཀྱང་མི་ཐུབ་པའི་ཡུལ་ཞིག་ཏུ་ཆགས་དགོས་དོན་ཅི་ཡོད། གཤིན་རྗེ་ཆོས་རྒྱལ་གྱིས་འགོ་ཁྲིད་པའི་ཁྲིམས་ཁང་དྲང་བདེན་ཅན་དེའང་མི་ཡུལ་འདི་རང་དུ་བཙུགས་ནས་མིག་སྔོན་པོས་སྔོན་པོར་ཕར་ལྟ་ཚུར་ལྟ་བྱས་ཏེ་གདོང་བཤེར་བརྒྱབ་ཕོད་ན་ཕོ་རབ་ཀྱི་ལས་ཀ་ཡིན་གྱི། ས་འོག་གི་འཇིག་རྟེན་ཞིག་ཏུ་གབ་ནས་ཤི་སྒུག་བྱེད་པ་ནི་ཐབས་རྡུག་པའི་བྱ་བ་མ་ཡིན་ནམ། སངས་རྒྱས་རྣམ་པར་ཐུགས་རྗེ་དང་ནུས་པ་དེ་འདྲ་ཆེ་ན། ལས་འབྲས་མངོན་སུམ་དུ་བསྟན་ནས་མ་འོངས་སྔོན་འགོག་གནང་དགོས་པ་ལ། དེ་ལྟར་མི་གནང་བར་ནམ་མཁའ་ཇི་སྲིད་བར་དུ་སྤྱན་ཆབ་ཁོ་ན་ཕྱུངས་ཏེ་བཞུགས་པ་ནི་ཐབས་ལ་མི་མཁས་པའི་མཛད་པ་རེད། བརྟག་དཔྱད་དེ་ཙམ་ཡང་མི་བཟོད་ན་རིགས་པས་གྲུབ་པའི་ཆོས་ལུགས་ཞེས་པའང་དེ་ཙམ་དུ་ཟད་དོ། །ལར་རྟེན་སྣོད་ཀྱི་འཇིག་རྟེན་འདིར་འོག་ཏུ་དམྱལ་བའི་ཡུལ་གྲུ་དང༌། བླ་རུ་ལྷ་ཡི་ལུང་པ་དེ་འདྲ་མེད་པར་ཐག་ཆོད་ཚར་ཡོད་པས། བརྟེན་པ་ལྷ་དང་དམྱལ་བ་ཞེས་པ་དེ་ཚོའང་གྱང་མེད་པའི་རི་མོ་ལྟར་ཡར་འགྲོ་བ་ལས་འོས་ཅི་ཞིག་ཡོད། དེ་ལྟར་བསམ་ན་མི་མངོན་པའི་འཇིག་རྟེན་དེ་ཚོ་ནི་དེ་འདྲའི་དཔྱད་མི་བཟོད་པ་ཞིག་དང༌། མེས་པོ་ཚོའི་བསམ་བློ་དེ་དག་ནི་དེ་འདྲའི་དགོད་བྲོ་བ་ཞིག་རེད་བཞག་བསམ་ནས་སྙིང་ཡང་རྗེ་འོང་བར་འདུག །སངས་རྒྱས་ཆོས་ལུགས་རང་ཁོ་ནའི་ངོས་ནས་བཤད་ནའང་ལྷ་དང་དམྱལ་བ་མེད་པ་ཙམ་གྱིས་མགོ་ཐོག་ཏུ་གནམ་རྡིབ་འོང་བ་མ་ཡིན་ཞིང༌། རྐང་འོག་ནས་ས་རྡིབ་འགྲོ་བ་ཡང་མ་ཡིན་ནོ་སྙམ་དུ་ཁོ་བོས་བསམ་བཞིན་ཡོད། མདོར་ན་བསམ་གཞིག་དང་སྐད་ཆའི་ནུས་པ་མ་སྨིན་པའི་སྲོག་ཆགས་དུད་འགྲོ་དང༌། དེ་སྨིན་པའི་མཐོ་རིམ་གྱི་འགྲོ་བ་མིའི་རིགས་གཉིས་ལས་གཞན་པའི་ཚེ་སྲོག་ཅིག་དུས་ད་ལྟའི་བར་དུ་གཏན་ནས་རྙེད་མེད་ལ། མི་དང་དུད་འགྲོ་ཞེས་པའི་སྲོག་ཆགས་འདི་གཉིས་ཀྱང་ཚེ་སྲོག་འཕེལ་འགྱུར་གྱི་གོ་རིམ་ཙམ་ཞིག་ལས། ངོ་བོའི་ཐོག་ནས་འགྲོ་བ་རིགས་མི་འདྲ་བ་གཉིས་ཀྱང་ཡིན་པར་མི་འདོད། སྟོང་ཁམས་ཆེན་མོ་འདིར་སྐར་མའི་ཚོགས་ནི་འདི་ཙམ་ཞིག་མང་ཡང༌། ཆུ་དང་དབུགས། དྲོད་སོགས་འཚོ་སྡོད་ཀྱི་ཆ་རྐྱེན་ཡོངས་སུ་ཚང་བའི་འཇིག་རྟེན་ནི་སའི་གོ་ལ་ཞེས་པའི་སྐར་འབྲུ་ཆུང་ངུ་འདི་གཅིག་པུ་ལས་མཐོང་རྒྱུ་མེད། ཉི་མའི་ཁྱིམ་རྒྱུད་ཀྱི་སྐར་མ་མིག་དམར་འདི་སའི་གོ་ལ་དང་འདྲ་ས་ཅུང་མང་བས་དེར་སྟབས་བདེའི་ཚེ་སྲོག་གམ། ཐ་ནའང་ཆེས་གདོད་མའི་སྐྱེ་དངོས་ཙམ་ཞིག་ཡོད་སྲིད་པའི་རེ་བ་རྒྱག་བཞིན་ཡོད་ནའང༌། དུས་ད་ལྟའི་བར་དུ་རེ་འབྲས་ནི་སྟོང་པ་ཉག་གཅིག་ཡིན། དེར་མིས་བཟོས་གཙང་པོའི་རྗེས་ཤུལ་ཞིག་ཡོད་ཚོད་འདུག་ཅེས་དང༌། བྲག་ལྡེབས་སུ་མིའི་བརྐོས་རིས་ཆེན་པོ་ཞིག་ཡོད་པ་འདྲ་ཞེས་དང༌། བར་སྣང་ཁམས་སུ་འཇིག་རྟེན་གཞན་པའི་མིས་སྡེར་དབྱིབས་ཀྱི་འཕུར་གྲུ་གཏོང་ནས་འགྲོ་བཞིན་འདུག །ཅེས་སོགས་བཤད་རྒྱུ་གླེང་རྒྱུ་ནི་མང་པོ་ཞིག་ཡོད་ཀྱང་ཞིབ་དཔྱོད་བྱེད་སྐབས་རང་བྱུང་ཁམས་ཀྱི་སྣང་ཚུལ་ཙམ་དང༌། མི་བདེན་རྫུན་བསྒྲིག་གི་གཏམ་འཆལ་ཙམ་ལས་ར་སྤྲོད་ཕེར་བ་གཅིག་ཀྱང་བྱུང་མེད། འོན་ཀྱང་ཆེས་རྒྱང་ཐག་རིང་བའི་སྐར་མ་འགའ་རེའི་ཐོག་ནས་རང་རེ་མིའི་རིགས་ཀྱི་སྤུན་ཟླ་འདྲ་རྙེད་པའི་རེ་བ་ཙམ་ནི་ད་དུང་རྒྱག་བཞིན་ཡོད་ལ་མ་འོངས་པ་ན་རེ་འབྲས་མངོན་དུ་འགྱུར་ཡང་སྲིད་པ་ཡིན། དེ་འདྲའི་སྲོག་ཆགས་ཤིག་རྙེད་པའི་དབང་དུ་བཏང་རུང༌། དེ་ནི་ང་ཚོ་དང་ཕ་ཡུལ་མི་འདྲ་བ་ཙམ་ལས། སྐར་མ་གཞན་པའི་འགྲོ་བ་ཡིན་ན་ལྷ་འདྲེ་གདོན་བགེགས་གང་རུང་ཞིག་ཡིན་དགོས་པའི་ཁྱབ་པ་ནི་ནམ་ཡང་མེད། གཟུགས་པོ་ཆུང་ཆེས་པས་ཆེ་ཤེལ་གྱི་འོག་ནས་མ་གཏོགས་མཐོང་མི་ཐུབ་པའི་སྲོག་ཆགས་མང་པོ་ཡོད་པ་དེ་ཚོ་ལ་འབུ་ཕྲ་ཟེར། གཟུགས་པོ་དྭངས་ཆེས་པས་སམ། ཡང་ན་སྒྲིབ་ཤིང་འཁོར་ལོས་བསྒྲིབས་ནས་མདུན་དུ་ཡོད་ཀྱང་མཐོང་མི་ཐུབ་པའི་སྲོག་ཆགས་དེ་འདྲ་ཡོད་པའི་དཔང་རྟགས་ཕྲ་མོ་ཙམ་ཡང་མེད་པར་མ་ཟད། ཚེ་སྲོག་གི་གཞི་རྒྱུ་དང་གྲུབ་ཆ་ལ་བརྟགས་ན་དེ་འདྲ་ནི་མི་སྲིད་པའི་ཚོད་ཙམ་ཡིན། འོན་ཀྱང་གཞི་རྒྱུ་དང་མ་གཟུགས་འདི་དག་དང་རྦད་དེ་མི་འདྲ་བའི་ཚེ་སྲོག་དཔེ་གསར་ཅན་དེ་འདྲ་ཡོད་ན་ཅི་ཤེས་ཏེ། ད་ལྟ་ནི་ཤ་ཟ་རྣམས་ལ་ཤ་ཟ་ཁོ་རང་ཚོས་བཟོས་པའི་ཤ་ཟའི་བུམ་པ་དེ་འདྲ་ཁུར་རྒྱུ་ཡོད་མེད་ང་ཚོས་ཧ་མི་གོ་བ་བཞིན་ཤིན་ཏུ་བསྐལ་པའི་དོན་དག་ཡིན། བུམ་པ་ཡིན་ན་སྣང་རུང་གི་བུམ་པ་ཡིན་དགོས་པ་དང༌། དུ་བ་ཡིན་ན་མེ་ལས་སྐྱེས་པའི་དུ་བ་ཡིན་དགོས་པའི་ཁྱབ་པ་འདི་ཡོད་ན་ནི། སྲོག་ཆགས་ལའང་ཡུལ་དང་དུས་ཀྱིས་བསྐལ་པ་ཙམ་ལས་རང་བཞིན་གྱིས་བསྐལ་པའི་སྲོག་ཆགས་དེ་འདྲ་མེད་ཅེས་སྨྲས་ཀྱང་ཆོག་པར་སེམས། འདོད་ལྷ་རིས་དྲུག །གཟུགས་ཁམས་བཅུ་བདུན། གཟུགས་མེད་མུ་བཞི། ལྷ་མིན་སྡེ་བཞི། ཡི་དྭགས་སོ་དྲུག །དམྱལ་ཁམས་བཅོ་བརྒྱད་བཅས་ཀྱི་གྲངས་འདྲེན་ཡོད་ཚད་ལུང་ཚིག་ཁོ་ནས་བསྒྲུབ་ཡོད་སྟབས། ལུང་རྩིས་མེད་དུ་སོང་བ་ཙམ་གྱིས་ཐག་ཆོད་ཚར་བས་རེ་རེ་བཞིན་དུ་མི་བདེན་པའི་རིགས་པ་ལོགས་ཤིག་ནས་འཚོལ་མི་དགོས། གཞན་དུ་ན་འདོད་ལྷ་རིས་བཅུ། གཟུགས་ཁམས་ཉི་ཤུ། གཟུགས་མེད་མུ་བརྒྱད། ལྷ་མིན་སྡེ་བདུན། ཡི་དྭགས་བཞི་བཅུ། དམྱལ་ཁམས་ཉེར་གཅིག་ཡོད་ཟེར་ན་དེ་ཙམ་མེད་ངེས་པའི་སྒྲུབ་བྱེད་ཅི་ཡོད། ང་ལ་འཛམ་གླིང་རྒྱུ་ཡིས་མི་ཁུགས་པའི་ནོར་བུ་རྡོག་རྡོག་ཅིག་ཡོད་ཟེར་ཡང༌། ཡོད་ངེས་པའི་དཔང་རྟགས་བསྟན་རྒྱུ་མེད་ཚེ་མེད་པར་རྩི་དགོས་པ་ལས། མེད་ངེས་པའི་གཏན་ཚིགས་བཀོད་རྒྱུ་མེད་ཚེ་ཡོད་པར་རྩི་མི་རུང་བ་ལྟར་རེད། རྟོག་གེ་པའི་སྐད་ཆ་བེད་སྤྱད་ན་འདི་ལ་སྣང་རུང་མ་དམིགས་པའི་གཏན་ཚིགས་ཟེར།
འགྲོ་བ་མིའི་རིགས་ཀྱི་ལོ་རྒྱུས་འཆད་སྐབས་ནི་མངོན་པའི་གཞུང་ནས་བཤད་པ་དང༌། ཚན་རིག་མཁན་པོའི་འདོད་པ་གཉིས་རོ་རྒྱབ་ཁུར་ཤ་སྟག་ཏུ་སོང་ཡོད། དེ་ཡང་མངོན་པ་བས་མི་ནི་ལྷ་ནས་མར་ལྷུང་བར་འདོད་ལ། ཚན་རིག་པས་དུད་འགྲོ་ནས་ཡར་འཕེལ་བར་འདོད། མངོན་པ་བས་འཇིག་རྟེན་དང་པོར་ཆགས་སྐབས་དུད་འགྲོ་རྣམས་ཀྱང་ད་ལྟའི་མི་དང་འདྲ་བར་སྨྲ་ཤེས་ཤིང་དོན་གོ་བའི་སྤྱང་གྲུང་ཅན་ཞིག་ཏུ་འདོད་ལ། ཚན་རིག་པས་སྐབས་དེར་མི་རྣམས་ཀྱང་ད་ལྟའི་དུད་འགྲོ་བཞིན་དུ་གླེན་ཞིང་ལྐུག་པ་ཡིན་པར་འདོད། མངོན་པ་བས་ཐོག་མའི་མི་དེ་ཚོ་ལུས་ལས་འོད་འཕྲོ་ཞིང་བྱ་བཞིན་དུ་འཕུར་ནས་འགྲོ་བར་འདོད་ལ། ཚན་རིག་པས་ཐོག་མའི་མི་དེ་ཚོ་ལུས་ལ་སྤུ་སྐྱེས་ཤིང་ཟོག་བཞིན་དུ་གོག་ནས་འགྲོ་བར་འདོད། མངོན་པ་བས་ཐོག་མའི་མི་དེ་ཚོ་དགའ་བའི་ཟས་ཀྱིས་འཚོ་བར་འདོད་ལ། ཚན་རིག་པས་ཐོག་མའི་མི་དེ་ཚོ་ཤ་རྗེན་ཆུ་གྲང་གིས་འཚོ་བར་འདོད། མངོན་པ་བས་ད་ལྟའི་མི་ལས་གདོད་མའི་མི་རྣམས་གཟུགས་བཟང་ཞིང་ཚེ་རིང་བར་འདོད་ལ། ཚན་རིག་པས་ད་ལྟའི་མི་ལས་གདོད་མའི་མི་རྣམས་གཟུགས་ངན་ཞིང་ཚེ་ཐུང་བར་འདོད། མངོན་པ་བས་ད་ལྟའི་མི་ལས་གདོད་མའི་མི་རྣམས་རྣམ་རིག་བཀྲ་ཞིང་ཀུན་སྤྱོད་གཙང་བར་འདོད་ལ། ཚན་རིག་པས་ད་ལྟའི་མི་ལས་གདོད་མའི་མི་རྣམས་རྣམ་རིག་བརྟུལ་ཞིང་ཀུན་སྤྱོད་བཙོག་པར་འདོད། མངོན་པ་བས་ད་ལྟ་ལས་སྔོན་ཆད་འབྱོར་པ་ཆེ་ཞིང་གྲོང་ཁྱེར་དང་གྲོང་ཁྱེར་གཞན་པའི་བར་དུ་བྱ་གག་འཕུར་བས་སླེབ་པ་ཙམ་རྒྱས་མྱོང་བར་འདོད་ལ། ཚན་རིག་པས་སྔོན་གྱི་དུས་སུ་ཤིན་ཏུ་འབུལ་ཞིང་མི་ལོ་ཁྲི་ཡི་ཡར་སྔོན་ན་འཛམ་གླིང་འདིར་གྲོང་ཁྱེར་གྱི་མིང་ཙམ་ཡང་མེད་པར་འདོད། མངོན་པ་བས་གནའ་ནས་ད་བར་འཚོ་བའི་ཆ་རྐྱེན་ཇེ་སྡུག་ཇེ་ཞན་དང་མི་གྲངས་ཀྱང་ཇེ་ཉུང་དུ་འགྱུར་འགྲོ་བཞིན་ཡོད་པར་འདོད་ལ། ཚན་རིག་པས་འཚོ་བའི་ཆ་རྐྱེན་ཇེ་བཟང་དང་མི་གྲངས་ཀྱང་ཇེ་མང་ཡིན་པར་འདོད། ཕྱི་སྣོད་ཀྱི་འཇིག་རྟེན་ལེབ་ལེབ་དང་ཟླུམ་པོ་གང་ཡིན་ཡང་ཆོག །ནང་བཅུད་ཀྱི་སེམས་ཅན་ལ་རིགས་གཉིས་སམ་དྲུག་ཡོད་ཀྱང་འདྲ། ང་ཚོ་ལ་མཚོན་ན་ཕན་གནོད་ཐོབ་ཤོར་ཅི་ཡང་བརྩི་རྒྱུ་མེད། ཅིས་ཀྱང་ཤེས་དགོས་པ་ནི་འགྲོ་མིའི་རིགས་ཀྱི་ལོ་རྒྱུས་ཀྱི་འཕེལ་རིམ་འདི་ཡིན། དེང་སང་བོད་ཀྱི་བསམ་བློ་པར་གྲགས་པ་ཚོས། ང་ཚོས་བདག་མེད་བསྒྲུབ་པས་བདག་འཛིན་བརླགས་སོང༌། སྙིང་རྗེ་བསྒོམ་པས་བཙན་གནོན་བྱས་སོང༌། གཞན་དོན་བྱས་པས་རང་དོན་ཤོར་སོང༌། མ་ནམ་མཁའ་གླེང་ནས་མི་རིགས་བརྗེད་སོང༌། ཞེས་སོགས་ཟེར་ཏེ་སངས་རྒྱས་ཆོས་ལུགས་ལ་ངོ་རྒོལ་རྒྱག་བཞིན་འདུག་མོད། ཁོ་བོས་ནི་ང་ཚོ་རྒུད་པའི་རྩ་བ་དང༌། སངས་རྒྱས་ཆོས་ལུགས་ཀྱིས་བཞག་པའི་བག་ཆགས་སྡུག་ཤོས་ཤིག་ནི། སྐྱོ་སྣང་རིང་ལུགས་ཀྱི་དྲིལ་བསྒྲགས་འདི་རེད་སྙམ་གྱིན་ཡོད། མཐོ་སྲིད་པའི་རྩེ་མོ་ནས་བཟུང་སྟེ་དམའ་ན་རག་དམྱལ་བའི་བར་གྱི་འཇིག་རྟེན་འཁོར་བ་འདི་ཡོངས་རྫོགས་སྡུག་བསྔལ་གྱི་རྒྱ་མཚོ་དང༌། མེ་མ་མུར་གྱི་འོབས། སྲིན་མོ་བུ་གཟན་མའི་གླིང༌། དུག་སྦྲུལ་གདུག་པའི་ཚང༌། སྤུ་གྲི་རྣོན་པོའི་སོ། ཆུ་སྲིན་ཁྲོས་པའི་ཁ་ཡིན་པས་ཉིན་མོའི་ཟས་དང་མཚན་མོའི་གཉིད་ཀྱང་མི་དྲན་པར་དགེ་བཤེས་གླང་རི་ཐང་པ་ལྟར་ཚེ་གང་པོར་ངོ་ནག་སྡུག་གེར་དང༌། སེམས་སྟོང་ལྷང་ངེར་འདུག་དགོས་པ་དང༌། འཁོར་བའི་ཕུན་ཚོགས་མཐའ་དག་ལ་ཡིད་སྨོན་ཅུང་ཟད་ཙམ་ཡང་མི་སྐྱེ་བར་མགོའམ་གོས་ལ་མེ་ཤོར་བ་ལྟ་བུའི་བྲེལ་འཚབ་ཀྱི་སྒོ་ནས་ཐར་པའི་ཕྱོགས་སུ་རྒྱུག་དགོས་པ་དང༌། ཚོང་དང་སོ་ནམ་སོགས་དོན་ཆུང་ཚེ་འདིའི་ལས་ལ་མགོ་འཁོར་བ་ནི་ཕྱུགས་ལས་ཀྱང་ལོད་པའི་ཕྱུགས་རང་ཡིན་པ་དང༌། འཕྲལ་གྱི་ལྟོ་གོས་ཙམ་ནི་དུད་འགྲོས་ཀྱང་རྙེད་བཞིན་ཡོད་པས་འཇིག་རྟེན་འཚོ་ཐབས་ཀྱི་ཕྱོགས་ལ་ཕོ་རྒོད་པས་ནི་རྒོད་པའི་གོ་ཅུང་ཟད་ཀྱང་མི་ཆོད་པ་དང༌། ད་རེས་ཀྱི་མི་ལུས་འདི་ནི་བསྐལ་པ་བརྒྱ་ཡི་ནང་ནས་གོ་སྐབས་ལན་གཅིག་ཁོ་ན་ཡིན་པས་འཇིག་རྟེན་འཁོར་བའི་འདུན་མ་ཡོད་ཚད་ཆེ་བཞག་ཆུང་བསྐྱུར་བྱས་ཏེ་ཟས་སྲོག་འཚོ་དང༌། གོས་ལྷགས་སྐྱོབ་ཙམ་ཞིག་བསྟེན་ནས་དཀའ་ཐུབ་དང་སྒོམ་བཟླས་ཁོ་ནར་བརྩོན་དགོས་པ་དང༌། འཆི་རྐྱེན་མང་ཞིང་འཚོ་རྐྱེན་ཉུང་བའི་མི་ཚེ་འདི་ནི་དྲག་རླུང་ཁྲོད་ཀྱི་མར་མེ་ལྟར་ད་ཡོད་ད་མེད་ཡིན་པས་སང་ཉིན་ཕན་ཆད་གསོན་པོར་སྡོད་པའི་རྩིས་གཏན་ནས་བརྒྱབ་མི་རུང་བ་དང༌། དེང་སང་ནི་ལྟ་བའི་སྙིགས་མ་དང༌། ཚེ་ཡི་སྙིགས་མ་དང༌། སེམས་ཅན་གྱི་སྙིགས་མ་སོགས་སྙིགས་མ་ལྔ་མཚོ་རྡོལ་རྡོལ་དང་རི་ལུག་ལུག་བྱེད་པའི་དུས་ཡིན་པས། དུས་ངན་འདི་འདྲ་ཞིག་ལ་རང་རེ་མི་ཡུལ་འདིར་སླེབ་པ་ནི་སྟབས་མ་ལེགས་པ་ཞིག་དང༌། ལམ་འགྲོ་མ་རྒྱུགས་པ་ཞིག །ལན་ཆགས་ཤིག །ནོར་འཁྲུལ་ཞིག །ཆགས་སྒོ་ཞིག །ཕམ་ཁ་ཞིག །གྱོང་གུད་ཞིག་ལས་རིན་ཐང་དང་དོན་སྙིང་སྤུ་ཙམ་ཡང་མེད་པ་དང༌། ད་ནས་མི་རིང་བར་ནད་ཀྱི་བར་གྱི་བསྐལ་པ་དང༌། མུ་གེའི་བར་གྱི་བསྐལ་པ་དང༌། མཚོན་གྱི་བར་གྱི་བསྐལ་པ་བཅས་དུས་ངན་བསྐལ་པའི་ཁུགས་སོ་དེ་ཚེས་རྒྱུ་ཡིན་པས་མིའི་རིགས་ཀྱི་མ་འོངས་པའི་ལས་དབང་ནི་ཡ་ང་ཞིང་ཡི་མུག་དགོས་པ་ཞིག་ཡིན་པ་དང༌། དུས་ངན་ཚེ་ལོ་བཅུ་པ་དེ་ལས་རེ་ཞིག་གཡོལ་འདོད་ན་ཐབས་ཤེས་གཅིག་རང་ཡོད་པ་ནི། མདུན་སྐྱོད་ཀྱི་གོམ་མཚམས་རྦད་དེ་བཞག་ནས་ནུས་ཤུགས་ཡོད་རྒུས་ལྟག་ལོག་བརྒྱབ་རྒྱུ་སྟེ། གནའ་རབས་ཀྱི་མེས་པོ་ཚོས་བཞག་པའི་ལམ་དང་ལུགས་སྲོལ་རྣམས་སྲུང་སྐྱོབ་བྱས་ཏེ་དེའི་ནང་དུ་འཛུལ་རྒྱུ་དང༌། གནའ་རབས་ཀྱི་མཛངས་མི་ཚོས་གསུངས་པའི་ལེགས་བཤད་དག་བརྗེད་དུ་མི་འཇུག་པར་ངག་ནས་བསྐྱོར་རྒྱུ་དང༌། གནའ་རབས་ཀྱི་མཁས་པ་ཚོས་གནང་བའི་གདམས་ངག་རྣམས་བཅོས་བསླད་མེད་པར་སྙིང་ལ་འཇོག་རྒྱུ་དང༌། གནའ་རབས་ཀྱི་སྟོན་པ་ཚོས་གཏན་ལ་ཕབ་པའི་གྲུབ་མཐའ་དག་ལ་ཐེ་ཚོམ་མི་ཟ་བར་ཡིད་ལ་བསྒོམ་རྒྱུ་དང༌། གནའ་རབས་ཀྱི་སྐྱེས་ཆེན་ཚོའི་མཛད་སྤྱོད་ལ་སྐྱོན་རྟོག་མི་བྱེད་པར་དག་སྣང་སྦྱང་རྒྱུ་དང༌། མདོར་ན་ཡོད་ཚད་ལ་གནའ་རབས་ཚད་ཤིང་བཞག །གནའ་རབས་ལ་མིག་དཔེ་ལྟ། གནའ་རབས་ལ་ལད་ཟློས་བྱེད། གནའ་རབས་ཚང་གཙུག་ཏུ་བཀུར། གནའ་རབས་ཉིད་ངག་ནས་བཟླ། གནའ་རབས་རང་ཡིད་ལ་བསྒོམ། གནའ་རབས་ཁོ་ནར་སྐྱབས་སུ་འགྲོ་དགོས་པ་དང༌། འདས་ཟིན་པའི་གནའ་རབས་ཀྱི་དུས་དེ་ནི་རྫོགས་ལྡན་ཕུན་ཚོགས་ཀྱི་དུས་ཡིན་པས་རེ་བ་དང་ཡིད་ཆེས། སྤྲོ་སྣང་དང་མོས་པ་ཡོད་ཚད་འདས་ཟིན་པའི་གནའ་རབས་ཀྱི་དུས་དེར་སྒོམ་དགོས་པ་དང༌། ཤི་ཟིན་པའི་གནའ་རབས་ཀྱི་མི་བོ་ཆེ་རྣམས་ནི་པཎ་ཊི་ཏ་དང༌། གྲུབ་པའི་དབང་ཕྱུག །ཚད་མའི་སྐྱེས་བུ་དང༌། ཐམས་ཅད་མཁྱེན་པ་ཤ་སྟག་ཡིན་པ་དང༌། ང་ཚོ་ནི་ཁོང་རྣམ་པའི་ཞལ་མཇལ་གསུང་ཐོས་ཀྱི་གོ་སྐབས་ཙམ་ཡང་མ་རག་པའི་ལས་ངན་བསོད་ཟད་སྐལ་ཆད་ཐོད་སྐམ་རྐྱང་རྐྱང་ཡིན་པ་དང༌། ད་ནས་བཟུང་ང་ཚོས་ཤི་ཟིན་པའི་སྐྱེས་ཆེན་ཁོང་རྣམ་ཚོར་མྱ་ངན་གྱི་སྒོ་ནས་འོ་དོད་འབོད། སྐྱོ་སྣང་ཆེན་པོས་སྨྲེ་སྔགས་འདོན། ཞལ་གཟིགས་གནང་བའི་འདུན་པ་བཅངས། ལུང་བསྟན་བརྒྱབ་པའི་རྟེན་འབྲེལ་བསྒྲིག །བྱིན་རླབས་སྩོལ་བའི་སྙན་ཞུ་འབུལ། རྗེས་སུ་འཛིན་པའི་གསོལ་བ་འདེབས། འདུ་འབྲལ་མེད་པའི་སྨོན་ལམ་བརྒྱབ། ཐུགས་ཡིད་འདྲེས་པའི་ཐབས་ལམ་འཚོལ་དགོས་པ་དང༌། ཁོང་རྣམ་པས་མ་གཟིགས་པ་ཞིག་ང་ཚོས་མི་མཐོང༌། ཁོང་རྣམ་པས་མ་གསན་པ་ཞིག་ང་ཚོས་མི་གོ །ཁོང་རྣམ་པས་མ་གསུངས་པ་ཞིག་ང་ཚོས་མི་འཁྱོལ། ཁོང་རྣམ་པ་མ་ཕེབས་པའི་ས་དེར་ང་ཚོ་མི་སླེབ། ཁོང་རྣམ་པས་མ་གནང་བའི་ལས་དེ་ང་ཚོས་མི་འགྲུབ། ཁོང་རྣམ་པས་མ་དགོངས་པ་ཞིག་ང་ཚོས་མི་ཤེས་པ་དང༌། ང་ཚོ་སྡུག་ཚོད་སྣ་རྩེ་ནས་བཟུང་སྟེ་འགྲོ་ཤེས་འདུག་མཁས་བྱ་དགོས་པ་ལས། མི་མཁས་མཁས་མདོག་དང༌། མི་འཇོན་འཇོན་མདོག་གི་གསར་བཤད་དང་གསར་གཏོད་སོགས་བྱ་མི་རུང་བ་དང༌། རྙིང་པ་དོར་ནས་གསར་པ་འཚོལ་དགོས་ཟེར་མཁན་གྱི་མི་དེ་ཚོ་ལྟ་ལོག་དང༌། གཏམ་དེ་གྲས་ལྟས་ངན་ཡིན་པས་དེ་དག་ལ་དགྲ་ལྟར་ལྟ་ཞིང་དུག་ལྟར་འཛེམས་དགོས་པ་དང༌། དེ་ལྟར་ཐབས་ཤེས་ཡོད་དགུ་རྩལ་སྤྲུག་གིས་བརྒྱབ་བཤིག་བརྒྱབ་སྟེ་བསྡད་ན་ད་གཟོད་རྒྱ་མཐོངས་ནང་གི་ཉི་ཐིག་ཙམ་གྱི་གནས་སྐབས་འཕེལ་བདེ་ཞིག་ཡོང་རེ་ཡོད་པ་དང༌། དེ་མིན་གོམ་གང་མདུན་ལ་སོང་ན་ཐུག་རྒྱུ་མུན་ནག་དང་གཡང་ས་འབའ་ཞིག་ཡིན་པ་སོགས་རང་གིས་ཡིད་ལ་བསྒོམ་ཞིང་གཞན་ལ་བསླབ་བྱ་བརྒྱབ་བཞིན་ཡོད་པ་རེད། འདི་ལྟར་འཇིག་རྟེན་དང༌། མི་ཚེ། འབྱུང་འགྱུར་བཅས་ལ་ཡིད་ཆེས་རྩ་བ་ནས་བརླག་པའི་རིག་གཞུང་གང་དེའི་བྲན་འབངས་སུ་གྱུར་པའི་མི་རིགས་ཤིག་ལ་སོ་སོའི་མི་ཚེ་དང༌། མིའི་རིགས་ཀྱི་མ་འོངས་པའི་ཆེད་དུ་ནུས་ཤུགས་འདོན་པའི་སྤྲོ་སྣང་ཡོད་སྲིད་དམ། སྤྱིར་ཤར་ཕྱོགས་ལྐོག་རྒྱུར་རིང་ལུགས་པས་བསམ་གཞིག་གི་མདའ་ཁ་འཁྲུལ་སྣང་དང་མི་མངོན་པའི་དབྱིངས་སུ་གཏད་དེ་མིག་མདུན་གྱི་དོན་དག་ལ་ཁ་ཡ་ཡག་པོ་ཞིག་བྱ་མྱོང་མེད་ལ། སྒོས་གངས་ཅན་བོད་པའི་མི་རིགས་འདིས་མིག་གིས་རྒྱབ་ཏུ་བལྟས་ཤིང་རེ་བ་གཤིན་པོ་ལ་བཅོལ་ནས་བསྡད་པས། ད་གཟོད་དེང་སང་ཁ་ནུབ་གླིང༌། སྣ་ནུབ་གླིང་ཟེར་ནས་འགྲམ་ཆུ་ལྷུག་ལྷུག་ཏུ་བཞུར་དགོས་པའི་གནས་བབ་འདི་འདྲ་ཞིག་ཏུ་ལྷུང་བ་ཡིན་པར་འདོད་དོ། །
གཉིས། དབུ་མའི་ལུགས་ཀྱི་བདེན་པ་གཉིས་ཀྱི་རྣམ་གཞག་ལ་དཔྱད་པ།
རྒྱ་གར་འཕགས་པའི་ཡུལ་དུ་སངས་རྒྱས་པའི་གྲུབ་མཐའ་མི་འདྲ་བ་བཞི་བྱུང་ཞིང༌། དེ་འཛིན་གྱི་མཁས་པ་དེ་ཚོས་རང་རང་གི་ལུགས་དེ་ཁོ་ན་དབུ་མའི་གྲུབ་མཐའ་དང༌། གཞན་དག་རྟག་ཆད་ཅན་དུ་འདོད། བོད་ཡུལ་གྱི་མཁས་གྲུབ་རྣམ་པས་དེ་བཞི་ཡི་ཁྲོད་ནས་ངོ་བོ་ཉིད་མེད་པར་སྨྲ་བའི་ལུགས་དེ་ཁོ་ན་དབུ་མའི་གྲུབ་མཐའ་ཡིན་རྒྱུར་བྱས་ཏེ། ལུགས་དེ་དང་མི་མཐུན་པའི་གྲུབ་མཐའ་གཞན་གསུམ་གྱི་རྣམ་གཞག་ཡོད་ཚད་ཕྱིན་ཅི་ལོག་འབའ་ཞིག་ཡིན་ཚུལ་དང༌། གྲུབ་མཐའ་འདི་ལ་ནི་དུས་དང་རྣམ་པ་ཀུན་ཏུ་འཁྲུལ་པའི་དྲི་མ་ཕྲ་མོ་ཙམ་ཡང་མི་སྲིད་པ་དང༌། གྲུབ་མཐའ་འདིའི་དགོངས་པ་དྲི་མ་མེད་པ་དེ་ལོན་མཁན་ནི་རང་དང་རང་གི་ཆོས་བརྒྱུད་འདི་གཅིག་པུ་ཡིན་པ་སོགས་སྨྲ་སྲོལ་ཡོད་པ་རེད། དེ་བས་ཁོ་བོས་ཆེད་དུ་བོད་དར་དབུ་མའི་ལྟ་གྲུབ་ཀྱི་གནད་གསང་འགའ་ཞིག་ལ་དཔྱད་པའི་སྤྲོ་བ་བརྟས་ཤིང༌། ལུགས་དེའི་གཞུང་གང་ཡིན་བདེན་པ་གཉིས་ཀྱི་སྒོ་ནས་ཁོག་ཕུབ་ཡོད་པའི་རྒྱུ་མཚན་གྱིས། འདིར་ཡང་ཀུན་རྫོབ་དང་དོན་དམ་གྱི་རྣམ་གཞག་གཉིས་སུ་ཕྱེས་ན་ལེགས་པར་འདོད། དང་པོ་ཀུན་རྫོབ་སྣང་བའི་རྣམ་གཞག་ལ་ཕྲ་རགས་གཉིས་ལས། རགས་པ་སྣོད་བཅུད་ཀྱི་རྣམ་གཞག་ནི་མངོན་པའི་ལུགས་ལས་ལོགས་སུ་མེད་པས་དེར་དཔྱད་པ་གོང་དུ་སོང་ཟིན། ཕྲ་བ་དོན་ཤེས་སྐད་ཅིག་མའི་རྣམ་གཞག་ལ་དཔྱད་པ་ལའང་གཉིས། ངོ་བོའི་ཆ་ནས་དངོས་གཙོ་དང་སེམས་གཙོ་གང་ཡིན་གླེང་བ། ཁྱད་པར་གྱི་ཆ་ནས་དངོས་ཁམས་ཚན་རིག་དང་མཐུན་མིན་གླེང་བའོ། །དང་པོ་ནི། སྤྱིར་དངོས་གཙོ་དང་སེམས་གཙོ་ཞེས་པའི་ཐ་སྙད་འདི་གཉིས་ནུབ་དར་མཚན་ཉིད་རིག་པའི་འཇིག་རྟེན་ལྟ་ཚུལ་མི་འདྲ་བ་གཉིས་ཀྱི་མིང་ཡིན་པར་གྲགས། དེ་ཡང་ལོ་གྲངས་ཉིས་སྟོང་ལྔ་བརྒྱ་ཙམ་གྱི་ཡར་སྔོན་དུ། ས་དབུས་རྒྱ་མཚོའི་བྱང་འགྲམ་ཡོ་རོབ་ལྷོ་མའི་ཡུལ་གྲུ་རྒེ་རེད་སི་རུ་ཁྲེ་ལེ་སི་ཞེས་པའི་མི་ཞིག་གིས་དངོས་གཙོ་སྨྲ་བའི་སྲོལ་གཏོད། དེ་ནས་ལོ་བརྒྱ་ཕྲག་ཙམ་གྱི་རྗེས་སུ་གནའ་རབས་རྒེ་རེད་སིའི་མི་བོ་ཆེ་གསུམ་གྱི་ཡ་གྱལ་ཕོ་ལ་ཐོ་ཞེས་པས་སེམས་གཙོ་སྨྲ་བའི་སྲོལ་གཏོད། འཛམ་གླིང་ཤར་ཕྱོགས་སུ་གནའ་བོའི་ཤེས་རིག་གི་ཕ་ས་རྒྱ་གར་འཕགས་པའི་ཡུལ་ལ་མཚོན་ན། སྐབས་དེར་སངས་རྒྱས་ཆོས་ལུགས་ནི་སྟོན་པ་ཤཱཀྱ་ཐུབ་པས་སྲོལ་གཏོད་མ་ཐག་པ་ཙམ་ཡིན་པས་མ་ལག་ཚང་བའི་རིག་པའི་གཞུང་ལུགས་ཆགས་ཐུབ་མེད། བྲམ་ཟེའི་ཆོས་ལུགས་དར་ཞིང་རྒྱས་པའི་སྒང་ཡིན་ཡང༌། འཇིག་རྟེན་ལྟ་ཚུལ་ཐད་དུ་དྲང་སྲོང་དག་གིས་མངོན་ཤེས་དང་རྫུ་འཕྲུལ་གྱི་ལམ་ནས་ལྷ་སྒྲུང་གི་རྣམ་པས་འགྲེལ་བཤད་ཡ་མཚན་པ་དག་བརྒྱབ་པ་ཙམ་ལས། དོན་དངོས་ལ་བརྟག་དཔྱད་དང་བསམ་གཞིག་གི་སྲོལ་ད་དུང་ཚུགས་མེད་པ་འདྲ། དེས་ན་རྒེ་རེད་སི་ནི་ནུབ་ལུགས་ཙམ་མ་ཟད་འཛམ་གླིང་གི་མཚན་ཉིད་རིག་པ་སྤྱིའི་འབྱུང་ཁུངས་སུ་བཤད་ཆོག་པར་སྙམ། དངོས་གཙོ་ལ་དབྱེ་ན། གནའ་རབས་བབ་ཆགས་དངོས་གཙོ་སྨྲ་བ། ཉེ་རབས་འགྱུར་མེད་དངོས་གཙོ་སྨྲ་བ། དེང་རབས་རྩོད་སྒྲུབ་དངོས་གཙོ་སྨྲ་བ་གསུམ། སེམས་གཙོ་ལ་ཕྱི་ཡུལ་སེམས་གཙོ་སྨྲ་བ་དང༌། རང་སྣང་སེམས་གཙོ་སྨྲ་བ། འཇིག་རྟེན་གསར་གཏོད་སྨྲ་བ་གསུམ་ཡོད། ད་དུང་དངོས་གཙོ་དང་སེམས་གཙོ་གང་ལ་ཡང་མི་གཏོགས་པའི་རྒྱུ་གཉིས་སྨྲ་བ་ཞེས་པའི་གྲུབ་མཐའ་ཞིག་ཀྱང་སྔར་ནས་དར་ཡོད་པར་འདུག་མོད་དེའི་སྲོལ་འབྱེད་པ་འདི་ཡིན་ཞེས་བཤད་པ་མ་མཐོང༌། ཕྱིས་ཀྱི་མར་ཁེ་སིའི་རིང་ལུགས་པ་ཚོས། མཚན་ཉིད་པ་ལ་དངོས་གཙོ་དང་སེམས་གཙོ་གཉིས་ལས་ཕུང་གསུམ་མི་སྲིད་ཅིང༌། རྒྱུ་གཉིས་སྨྲ་བ་ཡང་སེམས་གཙོ་པའི་ཁུངས་སུ་གཏོགས་པ་ཡིན་ཟེར་ཡང༌། རྒྱུ་མཚན་བཤད་རྒྱུ་མི་འདུག་པས་ཡིད་ཆེས་བྱ་དཀའ་བ་ཞིག་རེད། ཡང་མར་ཁེ་སིའི་རིང་ལུགས་པ་ཚོས། ཡེ་ཤུའི་ཆོས་ལུགས་སོགས་འཇིག་རྟེན་གསར་གཏོད་སྨྲ་བ་འདི་དངོས་གཙོ་མིན་པའི་ཆ་ནས་སེམས་གཙོ་པར་བཞག་པ་ཙམ་ལས། དོན་དུ་ལྷ་སྒྲུང་གི་རྣམ་པ་ཤས་ཆེ་བས་སེམས་གཙོ་ལས་ཀྱང་ལྟ་བ་དམན་པ་ཡིན་ཟེར། སེམས་གཙོ་ལས་ཀྱང་དམན་པ་ཡིན་ན་སེམས་གཙོ་པར་འཇོག་དགོས་དོན་མེད་མོད། བརྟགས་ཤིང་དཔྱད་ན་སེམས་གཙོ་སྨྲ་བའི་ཁྱད་ཆོས་ཚང་འདུག་སྟེ། དཀོན་མཆོག་ནི་འཇིག་རྟེན་བཀོད་པ་པོ་དང༌། ཁོང་གི་མངོན་འདོད་ནི་དངོས་པོ་ཀུན་གྱི་འབྱུང་ཁུངས་སུ་སྨྲ་བའི་ཕྱིར་རོ། །དངོས་གཙོ་དང༌། སེམས་གཙོ། རྒྱུ་གཉིས་སྨྲ་བ་གསུམ་གྱི་གོ་དོན་ནི། སེམས་སམ་འདུ་ཤེས་འདི་མ་གཞི་ནས་ཡོད་པ་ཞིག་མིན་པར་ཐོག་མར་དངོས་པོའི་འཇིག་རྟེན་ཏེ་རང་བྱུང་ཁམས་ཆེན་པོའི་ཉེར་ལེན་ལ་བརྟེན་ནས་ད་གཟོད་གསར་དུ་གྲུབ་པ་དང༌། བར་དུ་རང་རྐྱ་ཐུབ་ངེས་མིན་པར་དངོས་པོའི་འཇིག་རྟེན་ལ་བརྟེན་ནས་གནས་དགོས་པ་དང༌། མཐར་རྒྱུན་ཆགས་སུ་བསྲིང་མི་ཐུབ་པར་རྟེན་དངོས་པོའི་ནུས་ཚད་རྫོགས་ཚེ་ཡལ་འགྲོ་བ་བཅས་ཁྱད་ཆོས་དེ་གསུམ་ཚང་བ་ནི་དངོས་གཙོ་སྨྲ་བ་དང༌། དེ་གསུམ་ལྡོག་སྟེ་སྨྲ་བ་ནི་སེམས་གཙོ་སྨྲ་བ། དངོས་སེམས་གཉིས་ལ་ངོ་བོའི་སྟེང་ནས་ཐོག་མཐའ་བར་གསུམ་དུ་འབྲེལ་མེད་སྲད་བུ་དཀར་ནག་ལྟར་ཡོད་པར་འདོད་པ་ནི་རྒྱུ་གཉིས་སྨྲ་བའི་ལུགས་ཡིན། དེ་ལྟར་བྱས་ན་གྲུབ་མཐའ་དེ་གསུམ་པོ་གཞི་རྩའི་ཐོག་ནས་འཇིག་རྟེན་ལྟ་ཚུལ་མི་འདྲ་བ་གསུམ་ཡིན་པ་དང༌། འཇིག་རྟེན་ལྟ་ཚུལ་གྱི་རིགས་པའི་གཞུང་ལུགས་ལ་དེ་གསུམ་དུ་མ་འདུས་པ་ཞིག་ཡོད་མི་སྲིད་པ་དང༌། དེ་གསུམ་ཕན་ཚུན་དགག་སྒྲུབ་བྱས་ཚེ་གཞུང་ལུགས་ཀྱི་ཐོག་ནས་རྒྱལ་ཕམ་ཐག་ཆོད་ཀྱི་ནུས་པ་ཆེན་པོ་ལྡན་པ་དང༌། མི་ཚེའི་ལྟ་ཚུལ་དང༌། འཚོ་གནས་ཀྱི་དམིགས་འདུན་སོགས་ལག་ལེན་དངོས་ཀྱི་ཁྲོད་དུ་མཛུབ་སྟོན་གྱི་དོན་སྙིང་ཡག་པོ་ཡོད་པ་བཅས་གནད་དོན་གནད་འགག་ཅན་མང་པོ་ཞིག་རྟོགས་ཐུབ། སྐབས་བབ་ཀྱི་བརྗོད་བྱ་སངས་རྒྱས་ཆོས་ལུགས་ཁྲོད་ཀྱི་མཚན་ཉིད་རིག་པའི་མ་ལག་དང༌། འཇིག་རྟེན་ལྟ་ཚུལ་འདི་ཡང་གྲུབ་མཐའ་དེ་གསུམ་གང་རུང་ལས་མ་འདས་པས་གང་ཡིན་དཔྱད་ན། དེང་དུས་ཀྱི་རང་རེའི་མཁས་པའི་ཁྲོད་ནས་མཁན་ཆེན་དམ་པ་འཇིགས་མེད་ཕུན་ཚོགས་འབྱུང་གནས་མཆོག་དང༌། འབྲི་གུང་གི་མཁས་པ་དཀོན་མཆོག་རྒྱ་མཚོ་སོགས་ཀྱིས་ནི། ནང་བསྟན་ཤེས་རིག་འདི་ཡང་དག་པའི་དངོས་གཙོ་རྩོད་སྒྲུབ་སྨྲ་བ་ཡིན་ཏེ། འདི་ནས་གང་གསུངས་དངོས་ཡོད་ཀྱི་གནས་ཚུལ་ལ་ཐོད་ཐུག་འདུག་པའི་ཕྱིར་ཞེས་གསུངས་འདུག་སྟེ། དངོས་གཙོ་རྩོད་སྒྲུབ་སྨྲ་བའི་དོན་གཞི་ནས་མ་དགོངས་པར་ཟད་ལ། གང་གསུངས་དངོས་ཡོད་དང་ཐོད་ཐུག་མིན་ནི་དཔྱད་ཅིང་རིམ་བཞིན་དཔྱད་པར་འགྱུར་རོ། །དགེ་རྒན་ཆེན་མོ་དོར་ཞི་གདོང་དྲུག་སྙེམ་བློས། སངས་རྒྱས་པའི་གྲུབ་མཐའ་བཞིའི་ནང་ནས་སེམས་ཙམ་པ་དེ་སེམས་གཙོ་སྨྲ་བ་དང༌། གཞན་གསུམ་པོ་དངོས་གཙོ་སྨྲ་བ་ཡིན་ཞེས་བཤད་ཡོད། ཀླུ་ཚང་ཤེས་རབ་བསྟན་དར་སོགས་སྨྲ་བ་ལ་རབ་ཏུ་དགའ་ཡང་སྨྲ་རྒྱུས་ཤིན་ཏུ་ཕོངས་པའི་བྱིས་པ་ལས་ངན་སྐོར་ཞིག་ཀྱང་དོར་ཞི་ཚང་གི་རྐུབ་ཏུ་འུར་འདྲོག་བྱེད་ཀྱིན་འདུག །གྲུབ་མཐའ་གཞན་གསུམ་དངོས་གཙོ་སྨྲ་བ་ཡིན་ཟེར་བ་འདི་ལ་བློ་རྩེ་གཏད་ས་སྒོ་ལྔའི་དབང་ཤེས་ཕྱི་རོལ་ཡུལ་གྱི་དམིགས་རྐྱེན་ལ་བརྟེན་ནས་སྐྱེ་བ་འདི་གཅིག་པུ་ལས་གཞན་ཅི་ཡང་མི་འདུག་སྟེ། ཁྱེད་དཔོན་སློབ་ལྷན་རྒྱས་ཁོ་ན་མ་གཏོགས་དངོས་གཙོ་སྨྲ་བའི་དོན་དེ་ཙམ་ལ་འདོད་པའི་མཚན་ཉིད་རིག་པའི་སློབ་དཔོན་ཞིག་འཛམ་གླིང་ཤར་ནུབ་གང་དུའང་མཇལ་རྒྱུ་མེད། དངོས་གཙོ་དང་སེམས་གཙོ་ཞེས་པའི་སེམས་དེ་འདུ་ཤེས་སམ་གཙོ་བོའི་ཡིད་རྣམ་ལ་ངོས་འཛིན་དགོས་པ་ལས་དབང་ཤེས་ཙམ་མིན་ལ། ཨང་དང་པོ་དང་གཉིས་པའི་གོ་དོན་ཡང་གང་ཞིག་གང་གི་ཉེར་ལེན་བྱེད་མིན་གྱི་ངོ་བོའི་ཐོག་ནས་འཇོག་དགོས་པ་ལས། དམིགས་རྐྱེན་དང་གཟུང་དོན་ལྟ་བུ་ཉི་ཚེ་བའི་རྒྱུ་འབྲས་ཙམ་གྱི་ཐོག་ཏུ་ག་ལ་ཡོད། དུས་ད་ལྟའི་བར་དུ་སྐྱེ་བ་སྔ་ཕྱི་ཁས་ལེན་པའི་དངོས་གཙོ་སྨྲ་བའི་གྲུབ་མཐའ་ཞིག་གང་དུའང་ཡོད་པར་མ་ཐོས་མོད། ཁྱེད་རྣམ་པས་རང་རྐྱ་ཐུབ་པའི་སེམས་ཉིད་ཐོག་མཐའ་མེད་པར་ཁས་འཆེས་པའི་དངོས་གཙོ་སྨྲ་བའི་གྲུབ་མཐའ་མང་པོ་དེ་འདྲ་ཞིག་རྙེད་པ་ངོ་མཚར་ཆེའོ། །ལྷོ་ནུབ་མི་རིགས་སློབ་གླིང་གི་སློབ་དཔོན་ཆེན་མོ་འབུམ་སྐྱབས་ལགས་ཀྱིས་ཀྱང༌། རྩོད་སྒྲུབ་མཚན་ཉིད་རིག་པའི་དཔེ་དེབ་ཅིག་ཏུ། སངས་རྒྱས་པའི་གྲུབ་མཐའ་བཞིའི་ནང་ནས་མདོ་སྡེ་པ་དེ་ལྷད་མེད་པའི་དངོས་གཙོ་སྨྲ་བ་རེད། ཅེས་བྲིས་འདུག་མོད་རང་གི་སློབ་དཔོན་གྱི་ངན་ཤན་ཐེབས་པ་ཙམ་དུ་ཟད། སེམས་ཙམ་པ་སེམས་གཙོ་སྨྲ་བ་ཡིན་ཟེར་བ་འདིའང་ཁྱེད་ཅག་ལ་གཏན་ནས་མི་རུང་སྟེ། སྤྱིར་སེམས་ཙམ་པའི་གྲུབ་མཐའ་དེ་ལ་རྣམ་བདེན་རྫུན་གཉིས་དང༌། རྣམ་བདེན་པ་ལ་གཟུང་འཛིན་གྲངས་མཉམ་པ་དང༌། སྒོ་ང་ཕྱེད་ཚལ་པ། སྣ་ཚོགས་གཉིས་མེད་པ་གསུམ། རྣམ་རྫུན་པ་ལ་དྲི་བཅས་དྲི་མེད་གཉིས་བཅས་ཀྱི་དབྱེ་བ་ཡོད་མོད་རེ་ཞིག་བཞག་སྟེ། སེམས་ཙམ་ཞེས་པའི་ཙམ་སྒྲ་དེའི་རྩ་བའི་གོ་དོན་རང་ལ་བསམ་ན་ཡང་བོད་འདིར་འགྲེལ་བཤད་རྒྱག་སྟངས་རྦད་དེ་མི་འདྲ་བ་གསུམ་ཡོད། གཙང་ཆོས་འཁོར་སྒང་པ་ཤེར་རིན་པས། སྔོ་སེར་སོགས་ཕྱི་ཡུལ་གྱི་སྣང་བ་ཐམས་ཅད་ནང་གི་སེམས་ཉིད་དངོས་ཡིན་པར་འདོད་ལ། དྭགས་རྙིང་གི་མཁས་པ་ཕལ་མོ་ཆེས་འདོད་ཚུལ་དེ་ཉིད་འཐད་པར་རྩི། རྟ་ནག་གི་མཁས་པ་གོ་རམས་པས། སེམས་ཉིད་གཅིག་པུ་མ་གཏོགས་སྔོ་སེར་སོགས་དོན་སྣང་མ་ལུས་པ་དཔྱད་ན་གཏན་མེད་དུ་འདོད་ལ། ས་ལུགས་འཛིན་པ་ཕལ་མོ་ཆེ་དེའི་རྗེས་སུ་འབྲང་བར་བྱེད། རྗེ་ཡབ་སྲས་ཀྱིས་གཙོས་པའི་དགེ་ཕྱོགས་ཀུན་ཞལ་གཅིག་གྲག་གིས། གཟུགས་སེམས་གཉིས་པོ་ངོ་བོ་གཅིག་ལ་རང་ལྡོག་ཐ་དད་པའི་དོན་དུ་སྨྲ། དེ་ལྟར་གསུམ་ལས་ཁྱེད་ཅག་དགེ་ལྡན་པའི་གྲུབ་མཐའ་སྐྱོང་དགོས་པས། གཟུགས་སེམས་གཉིས་ཀྱི་བར་ན་གཙོ་ཕལ་དང་ཨང་རིམ་ཅི་ཞིག་བརྩི་རྒྱུ་འདུག་བསམ་བློ་ཐོངས་ཤིག །སེམས་ཙམ་ཞེས་པའི་ཚིག་ཙམ་ལ་རེ་ནས་སྡོད་དགོས་པ་ཁྱེད་ཅག་མཁས་པའི་གྲལ་དུ་འཚང་ཀ་རྒྱག་པ་འདི་ནི་མ་ལེགས་པ་ཞིག་གོ
ཁམས་བླ་རུང་ཆོས་གྲྭའི་མཁན་པོ་མཁས་དབང་ཚུལ་ཁྲིམས་བློ་གྲོས་ལགས་ཀྱི་ཞལ་ནས། སངས་རྒྱས་པའི་གྲུབ་མཐའ་བཞི་པོ་གང་ཡང་ནུབ་དར་མཚན་ཉིད་རིག་པའི་ལུགས་གསུམ་པོ་གང་གི་ཁོངས་སུ་ཡང་མི་གཏོགས་གསུངས། རྒྱུ་མཚན་རེ་རེ་བཞིན་དུ་བགྲང་སྐབས། དངོས་གཙོ་སྨྲ་བའི་ཁོངས་སུ་གཏོགས་མིན་གྱི་དོགས་པ་ཙམ་ཡང་སྐྱེ་བའི་གཞི་མེད། ཅེས་གསུངས་འདུག་པ་ནི་ཤིན་ཏུ་བདེན་ལ། སྤྱིར་སེམས་ཙམ་པ་སེམས་གཙོ་སྨྲ་བ་མིན་པའི་སྒྲུབ་བྱེད་དུ། སེམས་ཙམ་པ་ལ་གཞི་ལམ་འབྲས་གསུམ་གྱི་རྣམ་གཞག་ཡོད་ཅིང༌། ནུབ་ཀྱི་སེམས་གཙོ་པ་ལ་དེ་མེད་པའི་ཕྱིར། ཞེས་བཀོད་གནང་འདུག་པ་འདི་ནི་མ་ངེས་པ་ཞིག་སྟེ། སེམས་གཙོའི་འཇོག་མཚམས་གཞི་ལམ་འབྲས་བུའི་རྣམ་གཞག་ཁས་ལེན་མིན་གྱི་ཕྱོགས་སུ་མེད་པར་གོང་དུ་བཤད་ཟིན་ཏོ། །བྱེ་བྲག་ཏུ་སེམས་ཙམ་རྣམ་བདེན་པ་ཉམས་མྱོང་སེམས་གཙོ་སྨྲ་བ་མིན་པའི་གྲུབ་བྱེད་དུ། ཉམས་མྱོང་སེམས་གཙོ་སྨྲ་བ་རྦེར་ཁེ་ལིས། རིགས་པའི་མཐའ་འཇིག་རྟེན་བྱེད་པོའི་ལྷ་ལ་བཅོལ་འདུག་ཅིང༌། སེམས་ཙམ་རྣམ་བདེན་པས་དེ་འདྲའི་ལྷ་ཁས་མི་ལེན་པའི་ཕྱིར། ཞེས་གསུངས་འདུག་པའང་དོན་མེད་པ་ཞིག་སྟེ། དེ་གཉིས་བར་ལ་བསྒྲུབ་བྱ་སྣང་བ་སེམས་སུ་འདོད་མིན་གྱི་ཁྱད་པར་གསུང་རྒྱུ་མེད་ན་སྒྲུབ་བྱེད་ཀྱི་རིགས་པ་མི་འདྲ་བ་ཡོད་ཚུལ་ཙམ་བཤད་པས་ཅི་ཞིག་ཕན། སྣང་བ་ཐམས་ཅད་སེམས་ཡིན་ན་སེམས་ཅན་མེད་པའི་ས་ཕྱོགས་སུ་སྣང་བ་གཏན་མེད་དུ་འགྱུར་རོ། །ཞེས་གཞན་པས་གནོད་བྱེད་འཕངས་པ་ན། ཚད་རྡུལ་ནུས་རིག་པ་དང༌། ཉམས་མྱོང་སེམས་གཙོ་པ་དག་གིས་ལན་མ་ཐེབས་མོད། སེམས་ཙམ་པས་རིགས་པ་རྣམ་དག་གི་སྒོ་ནས་ལན་བཏབ་ཡོད། ཅེས་གསུངས་པ་དེའང་བདེན་དཀའ་སྟེ། སེམས་ཙམ་པ་ལ་སྣང་བ་སེམས་སུ་སྒྲུབ་བྱེད་ཀྱི་རིགས་པ་རྣམ་དག་ཡོད་ན་གྲུབ་མཐའ་དེ་དབུ་མ་པས་ཇི་ལྟར་ཚར་བཅད་པ་ཡིན་ཐུགས་བསམ་བཞེས་ཤིག །ད་དུང་དབུ་མ་པའི་ལུགས་ལའང་སྣང་བ་སེམས་ཡིན་ཆོག་པའི་གནས་སྐབས་ཡོད། ཅེས་སོགས་ཁུངས་མི་འཁྱོལ་བའི་སྐད་ཆ་མང་པོ་ཞིག་ཁྱེད་ཀྱིས་གསུངས་འདུག་མོད་ཁོ་བོས་རེ་རེ་བཞིན་བཀག་པས་མི་ལོངས་པར་འདུག །གྲུབ་མཐའ་བཞི་ཀ་རྒྱུ་གཉིས་སྨྲ་བ་མིན་པའི་སྒྲུབ་བྱེད་དུ། རྒྱུ་གཉིས་སྨྲ་བའི་སློབ་དཔོན་རེ་ནེ་རྡོ་གར་ཐུས། མི་ལུས་འཕྲུལ་ཆས་དང༌། དུད་འགྲོ་ལ་རྣམ་ཤེས་མེད་པར་འདོད་ཅིང༌། སངས་རྒྱས་པ་སུས་ཀྱང་དེ་ལྟར་འདོད་མི་སྲིད་པའི་ཕྱིར། ཞེས་གསུངས་པ་འདིའང་རྒྱུ་གཉིས་སྨྲ་བའི་འཇོག་མཚམས་ངོས་མ་ཟིན་པའི་སྐྱོན་ཡིན་ལ། རྒྱུ་གཉིས་སྨྲ་བ་ཡིན་ན་རེ་ནེ་རྡོ་གར་ཐུ་ཞེས་པ་དེས་གང་བཤད་ཁས་ལེན་དགོས་པའི་ཤེས་བྱེད་ཀྱང་ཁྱེད་ལ་མེད། གྲུབ་མཐའ་དེ་དང་དེ་དངོས་གཙོ་དང་སེམས་གཙོ་སོགས་གང་ཡིན་དཔྱད་པའི་ཚེ། རྩ་དོན་འཇིག་རྟེན་གྱི་འབྱུང་ཁུངས་སེམས་དང་དངོས་པོ་གང་ཞིག་འདོད་མིན་གྱི་ཆ་ནས་དཔྱད་དགོས་པ་ལས། ནུབ་ཕྱོགས་ཀྱི་དངོས་གཙོ་པ་དང༌། སེམས་གཙོ་སྨྲ་བའི་མཁས་པ་བྱེ་བྲག་པ་འགའ་རེའི་འདོད་ཚུལ་ཆུང་ཚགས་རེ་དང་འགྲིག་མིན་གྱི་སྒོ་ནས་དཔྱད་པ་བརྗོད་པ་ལ་དགོས་ནུས་ཅི་ཡང་མེད། དེ་ལྟར་བྱས་ན་བོད་སྔ་མ་རྣམས་ཀྱིས་འདོད་པའི་སེམས་ཙམ་པ་དེ་སྤྱིར་སེམས་གཙོ་པ་དང༌། བྱེ་བྲག་ཏུ་ཉམས་མྱོང་སེམས་གཙོ་སྨྲ་བའི་ལུགས་སུ་སྣང་སྟེ། རྣམ་པར་ཤེས་པ་ཙམ་ཞིག་རིགས་གཞན་ལ་ལྟོས་མེད་དུ་གྲུབ་པ་དང༌། དོན་དུ་སྣང་བ་ཐམས་ཅད་གང་ཟག་སོ་སོའི་སེམས་ཀྱིས་བསགས་པའི་བག་ཆགས་ཀྱི་དབང་གིས་སྣང་བ་མ་གཏོགས། སེམས་ལས་ལོགས་སུ་ཚུགས་ཐུབ་ཏུ་མེད་ཅིང༌། སེམས་ཀྱི་བག་ཆགས་ཟད་པ་ན་མ་དགག་རང་ཡལ་དུ་འགྲོ་བར་འདོད་ལ། སེམས་གཙོ་སྨྲ་བར་འཇོག་པ་ལ་དེ་བས་ལྷག་པའི་ཆ་རྐྱེན་ཅི་ཡང་བརྩི་རྒྱུ་མེད། གྲུབ་མཐའ་གཞན་གསུམ་དང་དགེ་ལྡན་པའི་འདོད་ལུགས་ཀྱི་སེམས་ཙམ་པ་དང་བཅས་པ་ནི། བཤད་ཚོད་ཙམ་གྱི་དབང་དུ་བྱས་ན་རྒྱུ་གཉིས་སྨྲ་བའི་ལུགས་ཡིན་ཏེ། བེམ་པོ་ཤེས་པའི་ཉེར་འབྲས་དང༌། ཤེས་པ་བེམ་པོའི་ཉེར་འབྲས་གང་ཡང་མི་འདོད་པར་བེམ་ཤེས་གཉིས་ཀ་ཐོག་མེད་ནས་ད་ལྟའི་བར་དུ་གཤིབ་ནས་འོང་བར་བཤད་པས་སོ། །སོང་ཚོད་ལ་ནི་སྤྱིར་སེམས་གཙོ་སྨྲ་བ་དང༌། ཁྱད་པར་དུ་འཇིག་རྟེན་གསར་གཏོད་སྨྲ་བའི་ཕྱོགས་སུ་སོང་ཡོད་དེ། བེམ་ཤེས་གཉིས་ཀྱི་བར་ལ་ཁ་འབྲལ་ཐབས་མེད་པའི་འབྲེལ་པ་ཞིག་མཐོང་རྒྱུ་ཡོད་ཀྱང༌། རྒྱུ་གཉིས་སྨྲ་བས་ནི་དེའི་སྐོར་ལ་འགྲེལ་བཤད་ཅུང་ཟད་ཀྱང་བྱེད་མ་ཐུབ་པས། ད་གཟོད་ལས་འབྲས་ཀྱི་རྣམ་གཞག་ཁ་གསབ་བརྒྱབ་སྟེ་དེ་གཉིས་ཀྱི་འབྲེལ་བ་ལ་གསལ་བཤད་བྱས་ཡོད། ལས་འབྲས་ཀྱི་རྩ་བ་སེམས་ལ་ཐུག་པའི་དབང་གིས་སེམས་གཙོ་པར་སོང་ཞིང༌། ལས་འབྲས་ཀྱི་འཐད་པ་རྟོག་བཏགས་དང༌། ལྷ་སྒྲུང་ཙམ་ལས་རིགས་པའི་ལམ་ནས་བརྗོད་མ་ཐུབ་པའི་དབང་གིས་འཇིག་རྟེན་གསར་གཏོད་སྨྲ་བར་སོང་བ་རེད། འཇིག་རྟེན་བཀོད་པ་པོ་ཚིག་ཟིན་ལ་ཁས་མ་བླངས་ཀྱང༌། ལས་འབྲས་ཀྱི་ཤུགས་ནས་འཇིག་རྟེན་བཀོད་པ་པོའི་ལམ་དང་ལུགས་སྲོལ་མང་པོ་རང་ཤུགས་སུ་ཐོན་འོང་བ་ཡིན་ཏེ། སྔར་བཤད་ཟིན་པ་ལྟར་སྡིག་པ་གསོག་མཁན་ཚོ་ཤི་ཚར་རྗེས་སུ་ཞིག་གིས་ས་འོག་ཏུ་ཁྲིད་ནས་ཉེས་ཆད་གཅོད་འོང་བ་དང༌། དགེ་བ་སྒྲུབ་མཁན་ཚོ་ནམ་མཁའི་དབྱིངས་སུ་འབད་མེད་ལྷུན་གྲུབ་ཀྱི་འཚོ་བ་རོལ་ཆོག་པ་སོགས་མིང་ལས་འབྲས་སུ་བཏགས་ཀྱང་དོན་བྱེད་པོའི་བཀོད་སྒྲིག་ལས་འགྲོ་ས་མེད་པ་དེ་འདྲ་མང་པོ་ཡོད་པ་རེད། དཔེར་ན་སྣོད་ཀྱི་འཇིག་རྟེན་འཇིག་པའི་སྐབས་སུ། འཇིག་རྒྱུ་རང་སྟེང་ནས་ཚང་མི་དགོས་པར་འཇིག་པའི་དུས་ལ་སླེབ་དུས་འཇིག་བྱེད་ཀྱི་ཉི་མ་དྲུག་རང་གར་གཞན་ཞིག་ནས་ཐོན་འོང་བ་ལྟ་བུ་རེད། གཞན་པས་དཀོན་མཆོག་མཉེས་ན་ལྷ་ཡུལ་དང༌། མ་མཉེས་ན་དམྱལ་ཁམས་སུ་ལྷུང་འགྲོ་བར་བཤད་མོད། དཀོན་མཆོག་ཁོང་དགེ་བ་བྱས་ན་མཉེས་ཤིང་སྡིག་པ་བསགས་ན་མི་མཉེས་པར་བཤད་པས་གནད་གཅིག་ཏུ་བབས་ཡོད། ཕྱུགས་ཀྱི་མཆོད་སྦྱིན་སོགས་དཀོན་མཆོག་མཉེས་བྱེད་དུ་བཤད་པ་ནི། དགེ་སྡིག་ངོས་འཛིན་ཚུལ་མ་འདྲ་བ་ཙམ་ལས་དགེ་སྡིག་ཁས་ལེན་མིན་གྱི་ཁྱད་པར་མིན། མདོར་ན་གོང་གི་སངས་རྒྱས་པའི་གྲུབ་མཐའ་དེ་གསུམ་པོས་འཇིག་རྟེན་འདི་ཅི་ཞིག་ཡིན་ཞེས་པ་དང༌། འཇིག་རྟེན་འདི་གང་ནས་བྱུང་ཞེས་པའི་དྲི་བ་གཉིས་ལ་རྒྱུ་གཉིས་སྨྲ་བའི་ལུགས་ལྟར་ལན་བཏབ་པ་དང། འཇིག་རྟེན་འདི་ཇི་ལྟར་ཡིན་ཞེས་པ་དང༌། འཇིག་རྟེན་འདི་ཅིའི་ཕྱིར་བྱུང་ཞེས་པའི་དྲི་བ་གཉིས་ལ་འཇིག་རྟེན་གསར་གཏོད་སྨྲ་བའི་ལུགས་ལྟར་ལན་བཏབ་པ་ཡིན་པར་ཤེས་དགོས། དྲང་པོར་བཤད་ན་དྲི་བ་ཕྱི་མ་འདི་གཉིས་ལ་ལན་ཚུལ་བཞིན་ཐེབས་མཁན་ཞིག་ཆོས་ལུགས་པ་དང༌། མཚན་ཉིད་རིག་པ་པ། ཕྱིས་ཀྱི་ཚན་རིག་པ་གང་གི་ཁྲོད་དུའང་བྱུང་མི་འདུག །དཀོན་མཆོག་སྨྲ་བའི་ཆོས་པ་ཚོས་འཇིག་རྟེན་དཀོན་མཆོག་གིས་བསྐྲུན་པར་བཤད་པ་ཙམ་ལས། དཀོན་མཆོག་རང་ཉིད་ཇི་ལྟར་བྱུང་བ་དང༌། བསྐྲུན་པའི་དམིགས་ཡུལ་གང་ཞིག་ཡིན་པ་བཅས་བཤད་རྒྱུ་མེད། ལས་འབྲས་སྨྲ་བའི་ཆོས་པ་ཚོས། ལས་འབྲས་ལ་བརྟེན་ནས་བེམ་ཤེས་གཉིས་ཀྱི་འབྲེལ་བ་ཙམ་ཞིག་བཤད་པ་ལས། བེམ་ཤེས་གཉིས་ཀྱི་ངོ་བོའམ་རྫས་རྒྱུན་དེ་ཇི་ལྟར་བྱུང་བ་དང༌། ཅིའི་ཕྱིར་བྱུང་བའི་ཐད་དུ་ལན་ཅི་ཡང་བཏབ་མེད། ངོ་བོ་ལ་འགྲེལ་བཤད་བྱ་རྒྱུ་མེད་ན་ཁྱད་པར་ལ་ཅིག་བཤད་ཁུལ་བྱས་ཀྱང་ཅི་ཞིག་ཕན། ཧེ་རྒུལ་ལྟ་བུའི་སེམས་གཙོ་པ་ཚོས། འདུ་ཤེས་ནི་མ་གཞི་ནས་ཡོད་པ་ཞིག་ཡིན་པ་ལ། དངོས་པོ་ནི་དེའི་གྲིབ་མ་ཙམ་ཞིག་ཏུ་ངེས་ཞེས་དང༌། མར་ཁེ་སི་ལྟ་བུ་དངོས་གཙོ་པ་ཚོས། མ་གཞི་ནས་ཡོད་པའི་དངོས་པོ་ལས་འདུ་ཤེས་བྱུང་བ་ཡིན། ཞེས་པ་ཙམ་ཞིག་ལས་སེམས་སམ་དངོས་པོ་དེ་མ་གཞི་ནས་ཡོད་དོན་ཅི་ཞིག་ཡིན་པ་དང༌། ཡོད་ཚུལ་ཇི་ལྟར་ཡིན་པའི་སྐོར་བཤད་མི་འདུག །ཚན་རིག་པས་ཀྱང༌། འཇིག་རྟེན་འདིའི་འབྱུང་ཁུངས་འགས་གཏོར་ཆེན་མོ་ཡིན་རབས་བཤད་པ་ཙམ་མ་གཏོགས། ནུས་པའི་རྦ་ཀློང་ཇི་ལྟར་བྱུང་བ་དང༌། འགས་གཏོར་ཆེན་མོ་ཅིའི་ཕྱིར་བྱུང་བའི་ཚུལ་ཤོད་ཀྱིན་མེད། ཡིན་ནའང་དྲི་བ་དང་པོ་གཉིས་ལ་ལན་འདེབས་པའི་སྐབས་སུ། དཀོན་མཆོག་སྨྲ་བ་ཚོས་དཀོན་མཆོག་གི་ཁུངས་ལྷ་སྒྲུང་དང། ལས་འབྲས་སྨྲ་བ་ཚོས་ལས་འབྲས་ཀྱི་ཁུངས་རྟོགས་བཏགས་དང༌། རྒྱུ་གཉིས་སྨྲ་བ་ཚོས་རྒྱུ་གཉིས་ཀྱི་ཁུངས་འོལ་ཚོད་ཙམ་ལས་མ་འདས་པས་དེ་གསུམ་ལ་དད་པ་དང་ཧམ་པ་ལས་བརྒལ་མི་རུང་ཞིང༌། སེམས་གཙོའི་མཚན་ཉིད་སྨྲ་བ་ཚོས་དངོས་པོའི་བྱུང་རིམ་ཉམས་མྱོང་གི་ལམ་ནས་དང༌། དངོས་གཙོའི་མཚན་ཉིད་སྨྲ་བ་ཚོས་འདུ་ཤེས་ཀྱི་འཕེལ་རིམ་ལོ་རྒྱུས་ཀྱི་ལམ་ནས་དང༌། ཚན་རིག་པ་ཚོས་འགས་གཏོར་ཆེན་མོ་གཏན་སྲོལ་གྱི་ལམ་ནས་བསྒྲུབ་ཡོད་སྟབས། དེ་གསུམ་པོར་རིགས་པས་དཔྱད་པ་བྱ་ཆོག་པས་དེའི་ཆ་ནས་བར་ཁྱད་ཆེན་པོ་ཞིག་ཤོར་ཡོད་པར་སྣང་ངོ༌། །
གཉིས་པ་ཁྱད་པར་གྱི་ཆ་ནས་ཚན་རིག་གི་གྲུབ་དོན་དང་མཐུན་མིན་གླེང་བ་ལ། རྒྱལ་བའི་དབང་པོའི་བཀའ་སློབ་ཅིག་ཏུ། ཕྱི་དངོས་པོའི་སྡོད་ལུགས་ཀྱི་སྐོར་ལ་སངས་རྒྱས་ཆོས་གཞུང་ལས་ཚན་རིག་པས་བཤད་པ་དག་དོན་ལ་གནས་པ་ཡོད། མ་གཞི་ཆོས་གཞུང་ནས་ཀྱང་རྡུལ་ཕྲན་གྱི་རྣམ་གཞག་སོགས་གསུངས་ཡོད་ཀྱང་ཚན་རིག་པས་བཤད་པ་ནང་བཞིན་ཁུངས་འཁྱོལ་པོ་དེ་འདྲ་མེད། སེམས་དང་སེམས་བྱུང་གི་ངོས་འཛིན་བྱེད་སྟངས་སྤྱི་དང། ལྷག་པར་དུ་ཚོར་བ་བདེ་སྡུག་གི་འཕོ་འགྱུར་དང༌། ཆགས་སྡང་གི་བསམ་བློར་གདོང་ལེན་བྱེད་ཐབས་སོགས་སེམས་ཁམས་འཕྲོད་བསྟེན་གྱི་སྐོར་ལ་ད་གཟོད་ཚན་རིག་པ་ཚོས་སངས་རྒྱས་པའི་གཞུང་གི་ནང་ནས་ལེགས་ཆ་མང་པོ་ཞིག་ལེན་རྒྱུ་ཡོད་པ་རེད། ཅེས་ཕེབས་འདུག་ལ་འདི་ནི་སྐུ་ཉིད་སངས་རྒྱས་ཆོས་ལུགས་པ་ཞིག་ཡིན་པའི་ཆ་ནས་ཆོས་ལུགས་དེའི་དགོངས་པའི་གནད་མ་ཤོར་ཞིང༌། དངོས་ཡོད་ཀྱི་གནས་ཚུལ་ལ་བསྙོན་མི་འདིང་བའི་ཐབས་མཁས་ལ་ཐུགས་རྗེ་ཆེ་བའི་གསུང་ཞིག་ཏུ་སྣང་སྟེ། ཨ་མདོ་དགེ་འདུན་ཆོས་འཕེལ་ལགས་ཀྱིས། དོན་དམ་པར་སངས་རྒྱས་ཆོས་ལུགས་ལ་ཤ་ཚ་ཞིང་སྙིང་ཉེ་བ་ཞིག་ཡིན་ཚེ་གཙོ་ཕལ་མཐོང་བའི་དགོངས་པ་གུ་ཡངས་མོ་ཞིག་བཞེས་ན་ལེགས་པ་ཡིན་གྱི། ལུང་ཚིག་ཕྲ་མོ་ཡན་ཆད་མ་ཉམས་པར་འཛིན་ཁུལ་གྱི་ལྐུགས་པ་ཨུ་ཚུགས་བྱས་པས་མི་ཕན་ཞེས་གསུངས་པ་ལྟར་རེད། འོན་ཀྱང་རང་རེའི་མཁས་པ་གཞན་ཕལ་མོ་ཆེ་ཞིག་ནི་དེ་ལས་ལྡོག་སྟེ་སྡིག་པ་མིག་བཙུམས་ཀྱིས་མཐའ་གཅིག་ཏུ་ཆོས་གཞུང་གི་རྣམ་གཞག་ཡོད་ཚད་ལ་འགེབས་སྲུང་བྱེད་རྐྱང་དང༌། དེའི་ཆེད་དུ་རྫུན་དང་གཡོ་འཕྲུལ་གྱི་བྱ་བྱེད་སྣ་ཚོགས་ཁབ་འགྲོ་འབིགས་འགྲོ་སྤྱད་ནས་དེ་ཉིད་བསྟན་པ་ལ་བྱ་བ་རླབས་པོ་ཆེ་བྱས་པ་ཡིན་པར་རློམ་བཞིན་འདུག །དཔེར་ན་གསེར་རྟ་མཁན་པོ་ཚུལ་ཁྲིམས་བློ་གྲོས་ལགས་ཀྱི་ཞལ་ནས། དངོས་ཁམས་ཚན་རིག་ལ་སྔ་རབས་རྡུལ་ཕྲན་སྨྲ་བ་དང༌། ཉེ་རབས་ལྟོས་བཅས་སྨྲ་བ། དེང་རབས་ཚད་རྡུལ་སྨྲ་བ་བཅས་ཅུང་གླེང་རིན་ཡོད་པའི་ལུགས་གསུམ་ཡོད་པ་ལས། དང་པོ་ནི་བྱེ་སྨྲའི་གྲུབ་མཐའི་ཆ་ཤས་ཙམ་དང༌། གཉིས་པ་ནི་མདོ་སྡེ་པའི་གྲུབ་མཐའི་ཆ་ཤས་ཙམ། གསུམ་པ་ནི་སེམས་ཙམ་པའི་གྲུབ་མཐའི་ཆ་ཤས་ཙམ་ཡིན། ཁོ་བོས་མི་ལོ་ཉི་ཤུའི་རིང་ལ་ཞིབ་འཇུག་དང་འདྲི་རྩད་བྱས་པ་ལས་ཤེས་རྟོགས་བྱུང་བ་ནི། ཚན་རིག་པ་ཁོ་ཚོས་གསར་གཏོད་དང་གསར་རྙེད་དུ་རློམ་པ་དེ་དག་ང་ཚོའི་ངོར་དཀྱུས་མའི་ཤེས་བྱ་ཙམ་ཞིག་ལས་ཧ་ལས་འོང་བ་དང༌། ཡ་མཚན་དགོས་པ་ཅུང་ཟད་ཀྱང་མེད་པ་འདི་རེད། ཅེས་སོགས་རང་རྟུག་གསེར་མགོ་དང༌། རང་རྣ་ལྷ་ཁང་གི་སྐད་ཆ་ཉན་མི་འདོད་པ་མང་པོ་ཞིག་གསུངས་འདུག་པ་ལྟ་བུ་རེད། འདིར་ཁོང་གི་སྐད་ཆ་དེ་ཚོའི་ངན་མཚང་རྣམས་རེ་རེ་བཞིན་དུ་བྲུས་ན། བྱེ་སྨྲའི་ལུགས་ཀྱི་རྡུལ་ཕྲན་གྱི་རྣམ་གཞག་དང༌། དངོས་ཁམས་པའི་ལུགས་ཀྱི་རྡུལ་ཕྲན་གྱི་རྣམ་གཞག་གཉིས་ལ། རྡུལ་ཕྲན་ཞེས་པའི་མིང་ཙམ་ཞིག་ཐུན་མོང་དུ་ཡོད་པས་ཐུགས་ཚིམ་བཞིན་ཡོད་ན་མ་གཏོགས་དོན་གྱི་བར་ཐག་ནི་གནམ་དང་ས་ལས་ཀྱང་རིང་བ་ཞིག་ཡིན། བྱེ་སྨྲ་སོགས་སངས་རྒྱས་པ་ཚོས་རྡུལ་ཕྲན་གྱི་གོ་དོན་ཆེ་ཆུང་ཁོ་ནའི་ཆ་ནས་བཤད་པ་ལས་རིགས་དང་ནུས་པའི་ཕྱོགས་སུ་བསམ་བློ་འཁོར་ཐུབ་མེད། དེའི་དབང་གིས་ཆ་བཅས་དང་ཆ་མེད། ཐུག་བཅས་དང་ཐུག་མེད། ཡོད་པ་དང་མེད་པ་སོགས་འདྲ་མིན་བཅོ་བརྒྱད་སྨྲ་དགོས་བྱུང་ཡོད་ལ། སྨྲས་པ་དེ་དག་གི་ཁྲོད་དུ་ཁུངས་འཁྱོལ་བ་ནི་གཅིག་ཀྱང་མཐོང་རྒྱུ་མེད། རིགས་ཀྱི་ཆ་ནས་འབྱུང་བ་བཞི་དང༌། འབྱུང་འགྱུར་བཞི་སྟེ་རྡུལ་རྫས་བརྒྱད་དམ་དགུ་ལས་མེད་པར་འདོད་ཅིང༌། འདི་ནི་དངོས་པོའི་རྩོམ་གཞི་ས་ཆུ་མེ་རླངས་བཞི་རུ་འདོད་པའི་ནུབ་ལུགས་ཀྱི་ལྟ་བ་རྙིང་པ་དེ་རང་ཡིན། ཁྱེད་ཀྱིས་བྱེ་སྨྲའི་ལུགས་ཀྱི་དངོས་པོའི་རྩོམ་གཞི་འབྱུང་བ་བཞི་པོ་དེ་འབྱུང་བཞི་མཚན་ཉིད་པ་ལ་གོ་མི་དགོས་པས་གནའ་རབས་ཀྱི་ནུབ་ཕྱོགས་པས་བཤད་པ་དེ་དང་མི་འདྲ། ཞེས་གསུངས་འདུག་ཀྱང་འབྱུང་བཞི་མཚན་ཉིད་པ་ལ་གོ་དགོས་པར་མངོན་པ་མཛོད་ལས་བཤད་ཡོད་དེ། མེ་ལ་རླུང་རྡུལ་ཡོད་པའི་རྒྱུ་མཚན་དུ་མེ་ལྕེ་གཡོ་བ་དང༌། ཆུ་ལ་མེ་རྡུལ་ཡོད་པའི་རྒྱུ་མཚན་དུ་དངོས་རྫས་རུལ་བ་དང༌། རླུང་ལ་ས་རྡུལ་ཡོད་པའི་རྒྱུ་མཚན་དུ་ཐལ་བ་སྤུར་འགྲོ་བ་སོགས་བཀོད་ཡོད་པས་སོ། །རྡུལ་ཕྲན་དེའི་ཆེ་ཆུང་གི་ཚད་ཕྲ་རྡུལ་ཐེར་འབུམ་གཉིས་ལ་ཉེ་བ་ཞིག་ཕྲེང་བར་བསྟར་ན་ད་གཟོད་སོར་མོ་གང་ཞེས་བཤད་པ་དེའང་ཚོད་དཔག་ཙམ་ལས་ཤེས་ནས་སྨྲས་པ་མིན། དངོས་ལུགས་ཀྱི་མཐོང་བ་དང་ཡང་མི་འགྲིག་སྟེ། རྫས་འགྱུར་སྤྱིར་བཏང་བའི་གཞི་རྒྱུའི་ཚད་ཡིན་ན་ཕྲ་ཆེས་པ་དང༌། བར་རྡུལ་དང་གློག་རྡུལ་སོགས་ཀྱི་ཚད་ཡིན་ན་རགས་ཆེས་པའི་ཕྱིར་རོ། །བར་སྟོང་དང་འཐེན་ཤུགས་ཀྱི་རྣམ་གཞག་དེ་དག་ཀྱང་དམ་བཅའ་ལྟར་སྣང་ཞིག་བསྒྲུབ་པའི་ཆེད་དུ་གང་བྱུང་གང་དྲན་དུ་སྨྲས་པ་ཁོ་ན་ཡིན། མཐར་རྩ་བའི་དམ་བཅའ་སྦོ་ལུག་པའི་ཚེ་རྣམ་གཞག་དེ་ཚོའང་སྦོ་ལུག་པ་རེད། སངས་རྒྱས་ཉིད་ཀྱི་ཞལ་ནས། འདུས་བྱས་ཐམས་ཅད་མི་རྟག་པའོ། །ཞེས་པ་ཙམ་ལས་རྒྱུན་དང་སྐད་ཅིག་མའི་ཁྱད་པར་གསལ་པོར་མ་གསུངས། དེ་ཉིད་བྱེ་སྨྲ་ཁ་ཅིག་གིས། རགས་པ་རྒྱུན་གྱི་མི་རྟག་པའི་དོན་དུ་འདོད། མདོ་སྡེ་པ་སོགས་ཀྱིས་ཕྲ་བའི་མི་རྟག་པར་འགྲེལ་ཡང་མི་རྟག་པའི་གོ་དོན་ཡག་པོ་ཞིག་ངོས་ཟིན་མེད། དཔེར་ན་བྲག་རྡོ་རླུང་གིས་ཟད་པ་དང༌། སྲོག་ཆགས་རྒས་ནས་འཆི་བ། སྐྱེ་དངོས་འཚར་ནས་ལོངས་པ་སོགས་ནི་མཁས་བླུན་སུས་ཀྱང་ཤེས་པས་རིགས་པས་བསྒྲུབ་མི་དགོས། ཤིན་ཏུ་ཕྲ་བའི་རྡུལ་ཕྲན་སྐད་ཅིག་དང་པོ་དང༌། གཉིས་པའི་བར་ལ་ངོ་བོའི་ཐོག་ནས་འགྱུར་བ་ཅི་ཞིག་ཕྱིན་ཡོད་མདོ་སྡེ་པ་ལ་བཤད་རྒྱུ་མེད། སྒྲུབ་བྱེད་དུ། དང་པོར་མི་འཇིག་ཕྱིས་མི་འགྱུར། ཞེས་བཀོད་པ་དེ་ནི་བྱིས་པ་བཙས་འཕྲལ་མ་ཤི་ན་ཕྱིས་ཀྱང་མི་འཆི། ཞེས་པ་ལྟར་རིགས་པ་གོ་ཆོད་པ་ཞིག་མིན། དུས་ཀྱི་ཐུང་མཐའ་སེ་གོལ་གྱི་དྲུག་བཅུའི་ཆ་གཅིག་ཡིན་ཞེས་པ་ནི་གོ་བདེ་བའི་ཆེད་ཙམ་ལས། དོན་དུ་དུས་ཚོད་ཐུང་མཐའ་ཞིག་ལ་གོ་དགོས། ཞེས་པའི་ཉིད་ཀྱི་བཀའ་མོལ་དེའང་བློ་ལ་མི་འབབ་སྟེ། དུས་ཀྱི་ཐུང་མཐའ་གང་ཡིན་དཔྱད་པའི་ཚེ་དངོས་ཡོད་གསལ་པོར་གསུངས་དགོས་པ་ལས་གོ་བདེར་བྱས་པས་མི་ཆོག་ཅིང༌། ཐུང་མཐའི་ཚད་དེ་ཐུང་མཐའ་ཞིག་ཡིན་ཞེས་པ་ལ་ནི་གོ་རྒྱུ་ཅི་ཡང་མི་འདུག་གོ །དངོས་ཁམས་ཚན་རིག་པས་དངོས་གཟུགས་ཡོད་ཚད་བར་སྣང་སྟོང་པར་འཕུར་སྐྱོད་བྱེད་བཞིན་ཡོད་པར་བཤད་པ་ལས། ཐོ་བས་བཅོམ་ན་འཐོར་འགྲོ་བའི་རྒྱུ་མཚན་གྱིས་རྡུལ་ཕྲན་དུ་འདོད་པ་མ་རེད། ངོ་བོ་གསེར་དངུལ་ཟངས་ལྕགས་སོགས་གཞི་རྡུལ་མི་འདྲ་བ་བརྒྱ་དང་བཅུ་ལྷག་རྙེད་ཡོད་ལ། ས་ཆུ་མེ་རླུང་བཅས་ནི་རྫས་འགྱུར་གྱི་སྣང་ཚུལ་ཙམ་ལས་གཞི་རྡུལ་གྱི་གྲས་སུ་མེད། དཔེར་ན་དབྱང་རྡུལ་གཅིག་དང་ཆིང་རྡུལ་གཉིས་བཅས་མ་རྡུལ་གསུམ་འདུས་ཚེ་ད་གཟོད་ཆུ་ཡིན་པ་དང༌། དབྱང་རྡུལ་གཉིས་འདུས་ཚེ་ད་གཟོད་རླུང་ཡིན་པ་ལྟ་བུ་རེད། ཆེ་ཆུང་གི་ཚད་ནི་མ་རྡུལ་དུང་ཕྱུར་གཅིག་བཤིབས་ན་ལི་སྨིས་གཅིག་གམ་སོར་གང་ཙམ་ཡོད་ཟེར། མི་རྟག་པའི་དོན་ཡང་རྡུལ་ཕྲན་ཐམས་ཅད་ཤིན་ཏུ་མྱུར་བའི་སྒོ་ནས་འཕུར་སྐྱོད་བྱེད་བཞིན་ཡོད་པ་འདི་རང་ཡིན། ཚེ་སྲོག་དང་སྐྱེ་དངོས་རིགས་ཀྱི་འཕེལ་འགྱུར་དང༌། རྫས་འགྱུར་གྱི་འགུལ་སྐྱོད་སོགས་ལ་ནི་ཡོངས་ཁྱབ་ཀྱི་མི་རྟག་པའི་དོན་དེ་མི་ཚང༌། མདོར་ན་རྡུལ་ཕྲན་འཁོར་སྐྱོད་ཀྱི་རྣམ་གཞག་འདི་ཁས་མ་བླངས་ན་བར་སྟོང་དང༌། འཐེན་ཤུགས། འཕོ་འགྱུར་བཅས་ལ་འགྲེལ་བཤད་རྒྱག་ཐབས་མེད་ཅིང༌། བྱེ་སྨྲའི་གྲུབ་མཐའི་ནང་དུ་འཁོར་སྐྱོད་ཀྱི་རྣམ་གཞག་ཟུར་ཙམ་ཡང་མེད་པས་བར་སྟོང་སོགས་ཀྱང་མིང་ཙམ་དུ་གྱུར་པ་རེད། ལྷག་པར་དུ་མཁས་དབང་ཁྱེད་ཀྱིས་ངེས་པར་དུ་མཁྱེན་དགོས་པ་ཞིག་ནི། གྲུབ་མཐའ་གོང་མ་ཚོའི་ལུགས་ལ་བྱེ་མདོ་གཉིས་ཀྱི་རྡུལ་ཕྲན་གྱི་རྣམ་གཞག་དེ་ཐམས་ཅད་ཁུངས་མེད་རྟོག་བཟོ་འབའ་ཞིག་ཏུ་ཁས་ལེན་དགོས་པ་འདི་ཡིན། དེའི་ཚུལ་གསལ་པོར་ཞུས་ན། བྱེ་མདོ་གཉིས་ཀྱིས་ཕྱི་དོན་དཔྱད་བཟོད་དུ་ཡོད་པར་འདོད་ཀྱང་སྣམ་བུ་བཤིག་ན་སྣལ་མ་དང༌། བུམ་པ་བཅག་ན་གྱོ་མོ་དང༌། ནས་འབྲུ་འཐག་ན་རྩམ་པ་རུ་འགྱུར་འགྲོ་བས་སྣམ་བུ་དང༌། བུམ་པ། ནས་འབྲུ་བཅས་བདེན་པར་གྲུབ་ཅེས་སྨྲས་ན་མི་འགྲིག་པར་བསམ་སྟེ་མཐར་རྡུལ་ཕྲན་ཕྱོགས་ཀྱི་ཆ་མེད་ལ་ཐུག་པ་རེད། ཕྱོགས་ཀྱི་ཆ་མེད་ཡིན་ན་རགས་པ་ཇི་ལྟར་རྩོམ་ཞེས་དྲིས་པའི་ལན་དུ། ཕན་ཚུན་ཐུག་རེག་མེད་པའི་བར་སྟོང་དང་བཅས་པ་ཡིན་ཟེར། འོ་ན་བྱེ་མ་ལྟར་འཐོར་མི་འགྲོའམ་ཞེས་དྲིས་པར། ལས་ཀྱི་མཐུ་དང་རྫས་ཀྱི་ནུས་པས་དམ་པོར་སྦྲེལ་ཡོད་ཟེར། གཟུགས་མཐའ་ཆ་མེད་དུ་ཁས་མ་བླངས་ན་འདི་འདྲའི་དྲི་བ་དྲིས་ལན་གང་ཡང་འོང་དོན་མེད་པ་རེད། ཕན་ཚུན་ཐུག་རེག་མེད་པའི་དབང་དུ་བཏང་རུང་དབུས་རྡུལ་གཅིག་ལ་ཕྱོགས་རྡུལ་དྲུག་གིས་བསྐོར་བའི་ཚེ། དབུས་རྡུལ་དེར་ཕྱོགས་རྡུལ་རེ་རེའི་ཕྱོགས་སུ་གཏད་པའི་ངོས་མི་འདྲ་བ་དྲུག་ཡོད་ན་དབུས་རྡུལ་ཆ་མེད་ཉམས་ཤིང༌། མེད་ན་དབུས་རྡུལ་ལ་གཏད་པའི་ཕྱོགས་རྡུལ་དྲུག་གི་ངོས་ཐམས་ཅད་ཀྱང་ཕྱོགས་གཅིག་ཁོ་ནར་གཏད་པའི་སྐྱོན་དུ་མི་འགྱུར་རམ་ཞེས་དྲིས་པ་ན། དྲིས་ལན་ཚིག་གཅིག་མ་ཐེབས་པས་རྡུལ་ཕྲན་ཆ་མེད་ཀྱི་དམ་བཅའ་དེ་རྩད་ནས་ཤོར་སོང་བ་རེད། བསྒྲུབ་བྱ་ཆ་མེད་ཀྱི་གྲུབ་མཐའ་དེ་ཤོར་ཚར་དུས་སྒྲུབ་བྱེད་བར་སྟོང་དང་འཐེན་ཤུགས་ཀྱི་སྐོར་དེའང་རང་ཤུགས་ཀྱིས་རྩིས་མེད་དུ་སོང་ཡོད། རྒྱུ་མཚན་དེ་ལ་བརྟེན་ནས་སེམས་ཙམ་པ་ཚོས། གཟུགས་ཅན་གྱི་ཆོས་ཀུན་མ་བརྟགས་ཉམས་དགའི་སྣང་བ་ཙམ་ལས་དཔྱད་ན་སྙིང་པོ་མེད་པས་ཁས་མི་ལེན་ཟེར། དབུ་མ་པས་ཐ་སྙད་དུ་ཕྱི་དོན་ཁས་ལེན་ཀྱང་རྣམ་གཞག་ཡོད་ཚད་རིགས་པ་མི་ཤེས་པའི་འཇིག་རྟེན་རྒན་པོའི་ཁ་ལ་ཉན་རྒྱུ་ཡིན་ཟེར། དགེ་ལྡན་པའི་མཁས་པ་ཚོས་དབུ་མའི་གྲུབ་མཐའ་དེར་འགྲེལ་བཤད་གཞན་པ་ཞིག་བསྐྱོན་བཞིན་ཡོད་ཀྱང་དེ་ལ་སྙིང་པོ་མེད་པའི་ཚུལ་འོག་ཏུ་འཆད། མདོར་ན་གཟུགས་མཐའ་རྡུལ་ཕྲན་ཆ་མེད་དང༌། བསྐོར་བ་བར་དང་བཅས་པ། དཔེ་ལ་གཡག་རྔ་ནེའུ་གསེང་སོགས་བྱེ་མདོས་བཤད་ཚད་གཏམ་ཚད་སེམས་ཙམ་པ་ལྟར་ན་ཁྱད་གཞི་མེད་པའི་ཁྱད་ཆོས་འབའ་ཞིག་དང༌། དབུ་མ་པ་ལྟར་ན་ཐ་སྙད་འཇོམས་པའི་ཐོ་བ་རུ་ངོས་འཛིན་བཞིན་ཡོད། འོ་ན་དངོས་ལུགས་པ་རྙིང་པ་ཚོས་རྙེད་པའི་ཀུན་ཁྱབ་འཐེན་ཤུགས་དང༌། རྫས་འགྱུར་གྱི་མ་རྡུལ། དངོས་པོའི་འགུལ་སྐྱོད་འདི་དག་ཀྱང་ཁྱད་གཞི་མེད་པའི་ཁྱད་ཆོས་སམ། ཡང་ན་ཐ་སྙད་འཇོམས་པའི་ཐོ་བ་རུ་ཞལ་གྱིས་བཞེས་རྒྱུ་ཡིན་ནམ། དེ་མིན་ན་ཁྱེད་སྐབས་འདིར་དབུ་སེམས་ཀྱི་ལྟ་གྲུབ་རྒྱབ་ཏུ་གཡུག་ནས་བྱེ་མདོའི་རྗེས་སུ་ཕེབས་རྒྱུ་ཡིན། དབུ་མ་པས་ཀྱང་ཐ་སྙད་དུ་རྡུལ་ཕྲན་དང༌། བར་སྟོང༌། འཐེན་ཤུགས་གསུམ་ཁས་ལེན་སྙམ་དུ་དགོངས་ན། ཁས་ལེན་པའི་ཁུངས་གང་དུ་ཡོད། ལེན་དགོས་པའི་གལ་འགག་ཅི་ཞིག་ལ་ཐུག །སྒྲུབ་བྱེད་ཀྱི་གཏན་ཚིགས་ཅི་འདྲ་ཡོད། སེམས་ཙམ་པའི་རིགས་པ་ལ་སྐྱོན་སྤོང་གང་འདྲ་བྱེད། ཀུན་རྫོབ་ལ་རིགས་པའི་འཐད་པ་མི་བཅུག་པའི་རང་གི་གྲུབ་མཐའ་ལ་འགལ་སྤོང་ཇི་ལྟར་བྱེད། ཕྱི་དོན་བདེན་གྲུབ་འགོག་བྱེད་ཀྱི་རིགས་པ་གསར་པ་ཅི་ཞིག་འགོད་རྒྱུ་བཅས་རེ་རེ་ནས་གསུངས་ཤིག་དང་ལྟད་མོ་ཡོད། སྔོན་གྱི་དབུ་མ་པ་ཚོས་དེ་དག་ཁས་མི་ལེན་ཀྱང༌། དེང་སང་ང་ཚོས་དངོས་ལུགས་པའི་ལེགས་ཆ་བླངས་ནས་ཁས་ལེན་ཆོག་སྙམ་དུ་དགོངས་ན། དེ་ནི་སངས་རྒྱས་པའི་གྲུབ་མཐའ་ལ་དངོས་ཁམས་ཚན་རིག་གིས་ཁ་གསབ་བརྒྱབ་པ་ཙམ་ལས། སངས་རྒྱས་པའི་གྲུབ་མཐའི་ནང་དུ་དངོས་ཁམས་ཚན་རིག་ཡོད་པའི་དོན་དུ་མི་འགྲོ། ལར་ཁྱེད་ཀྱིས་དབུ་མའི་ལུགས་སུ་བཞེད་པའི་རྡུལ་ཕྲན་དེ་ཆ་བཅས་ཡིན་ནམ་ཆ་མེད་ཡིན། ཆ་བཅས་ཡིན་ན་ཆུང་མཐའ་རུ་ཇི་ལྟར་འཐད། ཆ་མེད་ཡིན་ན་རགས་པ་ཇི་ལྟར་རྩོམ། དཔྱད་པ་མི་འཇུག་ན་འདི་ལ་ཅི་ལ་འཚང་སོགས་མང་པོ་ཞིག་འདྲི་བར་འདོད་དོ། །
ལྟོས་བཅས་ཚན་རིག་མདོ་སྡེ་པའི་གྲུབ་མཐར་འདུས་ཞེས་པ་ལ་ནི་དེ་བས་ཀྱང་སྙིང་པོ་མེད་དེ། མདོ་སྡེ་པའི་གྲུབ་མཐའི་ནང་དུ་ཡོད་པའི་ཨེའན་སན་ཌན་གྱི་ལྟོས་བཅས་ཚན་རིག་དེ། གཡས་གཡོན་རིང་ཐུང་སོགས་ཀྱི་ཐ་སྙད་ཕན་ཚུན་ལྟོས་ནས་འཇོག་དགོས་པར་བཤད་པ་འདི་ཨེ་ཡིན། འདི་མིན་ན་གང་དུའང་མི་འདུག་པས་ཁྱེད་རང་མིག་འཁྲུལ་པར་ཟད་དོ། །འདི་ཡིན་ན་གཡས་པ་གཡས་པར་འཇོག་པ་ལ་གཡོན་པ་ཞིག་ཡོད་དགོས་པ་དང༌། རིང་པོ་རིང་པོར་འཇོག་པ་ལ་ཐུང་ངུ་ཞིག་ཡོད་དགོས་པའི་གནས་ལུགས་འདི་ཤེས་མཁན་མི་བཅུ་གཉིས་སམ། ཡང་ན་མི་གཉིས་དང་ཕྱེད་ཀ་ལས་མེད་པའི་འཛམ་གླིང་འདི་མི་ཟད་ཁུར་བ་ཡིན་རྒྱུ་རེད། ངོ་བོ་ལྟོས་ནས་གྲུབ་པ་དང༌། ཐ་སྙད་ལྟོས་ནས་འཇོག་པའི་ཁྱད་པར་ཙམ་ཡང་མི་ཕྱེད་པའི་ལྟོས་བཅས་སྨྲ་བ་ཁྱོད་ནི་སྨྲ་བ་ལ་དགའ་བ་ཞིག་གོ །ཁྱེད་ཀྱིས་ཨེའན་སན་ཌན་གྱི་ལྟོས་བཅས་ཚན་རིག་འདི་ད་དུང་བདེན་རྫུན་ཐག་ཆོད་མེད། གལ་སྲིད་བདེན་པ་ཡིན་ན་ནི་མདོ་སྡེ་པའི་གྲུབ་མཐའི་ནང་དུ་འདུས་ཞེས་གསུངས་འདུག །འོ་ན་རྫུན་པ་ཡིན་ན་མདོ་སྡེ་པའི་གྲུབ་མཐར་བསྡུ་མི་འདོད་པ་ཨེ་རེད། དངོས་གནས་བྱས་ན་ལྟོས་བཅས་ཚན་རིག་འདི་བདེན་རྫུན་ཅི་ཡིན་ཁྱེད་ཀྱིས་ཐག་གཅོད་གནང་འོས་པར་འདུག་སྟེ། ཁྱེད་ལྟོས་བཅས་ཚན་རིག་མདོ་སྡེ་པའི་གྲུབ་མཐའི་ཆ་ཤས་ཙམ་དུ་བཞེད་པའི་ཕྱིར། ཡང་ན་ཁྱེད་དབུ་མའི་སློབ་དཔོན་རི་འདྲ་བ་ཞིག་གིས་མདོ་སྡེ་པའི་གྲུབ་མཐའ་དེ་བདེན་རྫུན་ཐག་མ་ཆོད་པར་ཕྱིས་བྱུང་ཚན་རིག་པའི་ཁ་ལ་རེ་དགོས་པ་ཨེ་ཡིན། ཡང་དོར་ཞི་སོགས་ཀྱིས། རྟེན་འབྲེལ་གྱི་ལྟ་བ་དང༌། ལྟོས་བཅས་སྨྲ་བའི་ལྟ་བ་གཉིས་དོན་གཅིག་རེད་ཟེར། ངོ་བོ་སྟོང་ཉིད་དང་དོན་གཅིག་རེད་ཟེར་རམ། རང་བཞིན་རྟེན་འབྱུང་དང་དོན་གཅིག་རེད་ཟེར། དང་པོ་ལྟར་ན་ལྟོས་བཅས་སྨྲ་བས་བདག་མེད་རྟོགས་ཟིན་པས་མི་རིང་བར་བདག་འཛིན་ཀྱང་སྤང་ནས་སངས་རྒྱས་པར་འགྱུར་རོ། །གཉིས་པ་ལྟར་ན་རྟེན་འབྲེལ་གྱི་དོན་རྒྱུ་ལ་བརྟེན་ནས་འབྲས་བུ་འབྱུང་བ་དང། བུ་བསྐྱེད་པའི་ཆ་ནས་ཕ་རུ་འཇོག་པ་འདི་གཉིས་ཁོ་ན་ཡིན་པས། འདི་གཉིས་གང་ཞིག་ལ་ལྟོས་བཅས་སྨྲ་བའི་གོ་དོན་ཡོད་པ་ཡིན་ནམ། སོ་ནམ་མ་བྱས་ན་སྟོན་ཐོག་མེད་པ་དང༌། བུ་མེད་པའི་མི་ལ་ཕ་རྒན་མི་ཟེར་བའི་གནས་ལུགས་འདི་འཛམ་གླིང་གི་མི་ཀུན་གྱི་སེམས་ལ་ངེས་པའི་རྒྱུན་ཤེས་ཤིག་ཡིན་པ་ལས་ཚན་རིག་པ་ཨེའན་སན་ཌན་གྱིས་གསར་དུ་རྙེད་པའི་གསང་བ་ཞིག་མིན་ལགས། གང་ཟག་ཅིག་གི་སྟོབས་ཤུགས་ལ་བརྟེན་ནས་དངོས་པོ་ཆུང་བའི་ནང་དུ་ཆེ་བ་བསྡུ་ཐུབ་པ་དང༌། དུས་ཚོད་ཐུང་ངུའི་ནང་ལ་རིང་པོ་འགྲོ་ཐུབ་པའི་རིགས་ལམ་ཞིག་ལྟོས་བཅས་ཚན་རིག་པས་རྙེད་མེད་ལ། དངོས་གཟུགས་ཤིག་གི་འགུལ་སྐྱོད་དང་འཐེན་ཤུགས་ལ་བརྟེན་ནས་དངོས་གཟུགས་གཞན་གྱི་ཚེ་ཚད་དང་བོངས་ཚད་འགྱུར་འགྲོ་བའི་རིགས་ལམ་ཞིག་སངས་རྒྱས་ཆོས་གཞུང་དུ་བཤད་མེད། སངས་རྒྱས་ཆོས་གཞུང་དུ། དངོས་པོ་ཆུང་བ་རྣམས་ཆེ་བར་བསྒྱུར། དུས་ཚོད་ཐུང་ངུ་རྣམས་རིང་པོར་བསྒྱུར། ཁ་ཟས་མི་ཞིམ་པ་རྣམས་ཞིམ་པར་བསྒྱུར། ལོང་བ་མིག་ལྡན་དང༌། ཞ་བོ་རྐང་བཟང་དུ་བསྒྱུར་བ་སོགས་མེད་པ་དང་མ་ཡིན་པ་མང་པོ་ཞིག་ཡོད་པ་དང་ཡིན་པར་བསྒྱུར་ཐུབ་པའི་ཚུལ་ཞིག་བཤད་ཡོད་ལ། དེ་ལྟར་བསྒྱུར་ཐུབ་པའི་རྒྱུ་མཚན་ནི་སངས་རྒྱས་མཐུ་རྩལ་ཆེ་བས་ཡིན་ཟེར། དེ་ལྟར་ན་དམྱལ་བ་ཞིང་ཁམས་དང༌། འཁོར་བ་མྱང་འདས་སུ་བསྒྱུར་མི་ཐུབ་པའི་རྒྱུ་མཚན་ཅི་ཡིན་བསམ་དགོས་ཤིང༌། ཡང་རྡུལ་ཕྲན་དང་ལྷུན་པོ་མི་འགལ་བ་དང༌། སྐད་ཅིག་དང་བསྐལ་པ་མི་འགལ་བའི་ཚུལ་ཞིག་བཤད་ཡོད་ལ། དེ་དག་མི་འགལ་བའི་རྒྱུ་མཚན་ནི། ཆོས་རྣམས་ཅིར་ཡང་མ་གྲུབ་པའི་གནད་ཀྱིས་གང་ཡང་འཆར་ཆོག་པ་དང༌། བདེན་པར་མ་གྲུབ་པའི་དབང་གིས་སྣ་ཚོགས་སུ་སྣང་དུ་རུང་བ་འདི་ཡིན་ཟེར། དེ་ལྟར་ན་འཇིག་རྟེན་བཀོད་པ་པོའི་དཀོན་མཆོག་དང༌། དགེ་སྡིག་གི་འབྲས་བུ་འཆོལ་ནས་སྨིན་པ་སོགས་སྣང་མི་ཆོག་པའི་རྒྱུ་མཚན་གང་ཡིན་དཔྱད་དགོས། ད་དུང་མཁན་ཆེན་མཆོག་གིས། སྒྲ་ཡངས་འཇུག་གི་ལྟོས་བཅས་སྨྲ་བའི་བསྟན་དོན་རྡུལ་ཕྲན་ནུས་ཤུགས་ཀྱི་སྐོར་དེའང་སངས་རྒྱས་ཆོས་གཞུང་དུ་བཤད་ཟིན། ཞེས་གསུངས་འདུག་མོད་ཤ་ཡི་མིག་གི་སྤྱོད་ཡུལ་དུ་ནི་མི་འདུག་གོ །ཚད་རྡུལ་ནུས་རིག་སེམས་ཙམ་པའི་གྲུབ་མཐའི་ཆ་ཤས་ཡིན་པའང་མི་འཐད། གལ་ཏེ་འཐད་ན་ཚད་རྡུལ་ནུས་རིག་ནོར་འཁྲུལ་གྱི་ལྟ་ཚུལ་དུ་ཁས་ལེན་དགོས་ཏེ། སེམས་ཙམ་པའི་འདོད་པ་དེ་ལོག་རྟོགས་ཡིན་པར་དབུ་མ་ཐལ་འགྱུར་བས་བཤད་པའི་ཕྱིར། ཐ་སྙད་དང་དོན་དམ་གང་གི་དབང་དུ་བྱས་ཀྱང་གཟུགས་སེམས་གཉིས་ལ་ཡོད་མེད་ཀྱི་དབྱེ་བ་འབྱེད་མི་རུང་བར་གསུངས་པའི་ཕྱིར། ཁྱེད་ནམ་ཡང་ཕར་འགྱུར་ཚུར་འགྱུར་དང༌། རྐང་པ་གཉིས་འཛུགས་ཁོ་ན་གནང་བཞིན་འདུག་མོད་དེས་རིགས་ལམ་གྱི་ཆུ་མི་ཐུབ། སེམས་ཙམ་པས་གཟུགས་སྣང་གི་རྩ་བ་སེམས་ཀྱི་ཐོག་ཏུ་བསྒོས་པའི་བག་ཆགས་ཡིན་པར་འདོད་པ་ལས། ནམ་མཁའི་དབྱིངས་སུ་ཁྱབ་པའི་ནུས་ཁྱམས་ཡིན་པར་མི་འདོད། ཁྱེད་ཀྱིས་རྡུལ་ཕྲན་གཞི་མེད་དུ་གཏན་ལ་འབེབས་སྐབས་སྣམ་བུ་བཤིག་ན་སྣལ་མ་དང༌། སྣལ་མ་བཤིག་ན་སྤུ་ཉག་དང༌། སྤུ་ཉག་བཤིག་ན་ཐལ་རྡུལ་དང༌། ཐལ་རྡུལ་དེ་དག་ཀྱང་ཚུལ་དེ་ལྟ་བུའི་སྒོ་ནས་བཤིག་ན་མཐར་གཞི་མེད་དུ་འགྱུར། དེ་ཡི་ཚེ་ན་ཐམས་ཅད་གར་སོང་ཆ་མེད་ནམ་མཁའ་ལ་སྤྲིན་དྭངས་པ་ལྟར་འགྱུར། ཞེས་དང༌། བེམ་པོའི་སྡོད་ལུགས་ལ་གནས་སྐབས་གསུམ་ཡོད་པ་ལས། གསུམ་པའི་སྐབས་སུ་རྡུལ་གྱི་རང་བཞིན་ཅུང་ཟད་ཀྱང་མེད་པར་རྡུལ་ཕྲན་འབྱུང་རུང་ཙམ་དང༌། འབྱུང་རུང་དེའང་རྩད་བཅད་ན་སེམས་ཀྱི་བག་ཆགས་ལ་ཐུག་པས་བག་ཆགས་ཟད་ན་གཏན་མེད་དུ་འགྱུར། ཞེས་སྟབས་བདེ་མདོག་ཁ་པོ་ཞིག་གསུངས་འདུག་ཀྱང༌། ཐུགས་རྩེ་གཏད་ས་ཡག་པོ་ཞིག་ཡོད་མེད་བློ་དོགས་ཆེ་སྟེ། གཞི་མེད་དུ་མ་གྱུར་ཙམ་གྱི་རྡུལ་ཐ་མ་དེ་གཟུགས་ཀྱི་ཆུང་མཐའ་ཡིན་ན་དེ་ལ་སྣམ་བུ་བཤིག་པའི་ཚུལ་དེ་ལྟ་བུའི་སྒོ་ནས་ཇི་ལྟར་བཤིག་རྒྱུ་ཡོད། ཆུང་མཐའ་མིན་ན་དེ་ཉིད་སྣམ་བུ་བཤིག་པའི་ཚུལ་དེ་ལྟར་བཤིག་ཀྱང་གཞི་མེད་དུ་ཅི་ལ་འགྲོ། དེ་བས་ཆུང་བའི་གཟུགས་ཤིག་ཡོད་དགོས་པས་མ་མཐའ་ཡང་དུམ་བུ་གཉིས་སུ་བཤིག་བཟོད་ལོས་དགོས། འདིས་ཁྱེད་ཙམ་དུ་མ་ཟད་གཅིག་དུ་བྲལ་གྱི་དབུ་མའི་རིགས་པ་དེའི་དབུ་ལ་ཡང་ཐོག་ཕབ་པ་ཡིན། ཆེ་ཆུང་ཁོ་ནའི་ཆ་ནས་ཆ་ཤས་ཡོད་མེད་བརྟག་དཔྱད་གཏོང་བ་དེ་འཁྲུལ་ཡོད་ཟེར་བའི་རྒྱུ་མཚན་ཡང་འདི་ཡིན། རྡུལ་ཕྲན་གྱི་རྩ་བ་འབྱུང་རུང་དང༌། འབྱུང་རུང་གི་རྩ་བ་བག་ཆགས་དང༌། བག་ཆགས་ཀྱི་རྩ་བ་སེམས་ཉིད་ལ་ཐུག་པ་བདེན་ན། སེམས་གཙོ་སྨྲ་བའི་གྲུབ་མཐའ་དེ་མ་འདོད་ན་ཡང་པང་དུ་ལེན་དགོས་རྒྱུ་རེད་སྙམ། དེ་ལྟར་རིགས་པས་བརྟགས་ཤིང་དཔྱད་ན་རང་བྱུང་ཚན་རིག་གི་ཞིབ་འཇུག་བྱ་ཡུལ་རྩིས་དངོས་རྫས་གསུམ་གང་ལ་ཡང་སངས་རྒྱས་ཆོས་གཞུང་ཁྲོད་དུ་མི་རྣམས་ཧ་ལས་འོང་བ་དང༌། ཧོན་འཐོར་དགོས་པ་དང༌། ཡ་མཚན་འོས་པ་དང༌། ཡིད་འཕྲོག་འགྲོ་བའི་ལེགས་བཤད་ཅི་ཡང་མཐོང་རྒྱུ་མི་འདུག་མོད། མེད་བཞིན་ཡོད་མདོག་སྟོན་པ་ལ་དགོས་པ་གཞན་ཞིག་ཡོད་པ་ཡིན་ན་ནི། ད་རེས་ཁོ་བོས་རྫུན་རྐུབ་གཏོལ་ཉེས་ཤོར་སོང་བས་དགོངས་དག་ཞུའོ། །ཆོས་གཞུང་གི་སེམས་དང་སེམས་བྱུང་གི་རྣམ་གཞག་དག་ལ་ནི། ལྷ་སྒྲུང་དང་རྟོག་བཟོ་ཆེར་མ་འདྲེས་ཤིང་ཚོད་དཔག་དང་རིགས་སྐམ་ཙམ་ཡང་མིན་པར་དུས་རབས་རིམ་བྱོན་གྱི་རྣལ་འབྱོར་པ་ཚོས། ཁ་ནང་དུ་ཕྱོགས་ནས་ཚོད་ལྟ་གནང་བའི་ཉམས་མྱོང་དངོས་མ་ཤས་ཆེ་བས། ཕྱིས་ཀྱི་སེམས་ཁམས་རིག་པའི་གཞུང་ལུགས་དག་ལ་ཡང་ངོ་གནོངས་མི་དགོས་པ་ཞིག་ཡོད། འོན་ཀྱང་དེ་ལ་མངོན་གསལ་དོད་པའི་ཞན་ཆ་གཅིག་རང་མཐོང་རྒྱུ་ཡོད་པ་ནི། རྣམ་གཞག་མང་པོ་ཞིག་ངོ་བོའི་ཆ་ནས་མིན་པར་དགེ་སྡིག་གི་ཆ་ནས་བྱས་འདུག་པ་འདི་རེད། འཛིན་སྟངས་དང་རིགས་རྒྱུན་གཅིག་ཉིད་ལ། ཤེས་རབ་དང་འཆལ་བའི་ཤེས་རབ། བརྩོན་འགྲུས་དང་ལེ་ལོ། དད་པ་དང་ལོག་ལྟ། བྱམས་བརྩེ་དང་ཞེན་ཆགས། ངེས་འབྱུང་དང་ཞེ་སྡང་སོགས་ཀྱི་དབྱེ་བ་ཕྱེས་ཡོད་པ་ལྟ་བུ་རེད། རྣམ་གཞག་དེ་དག་དགེ་སྒྲུབ་སྡིག་སྤང་གི་ཉམས་ལེན་གནང་མཁན་ཚོ་ལ་རིན་ཐང་ཆེ་བ་ཙམ་མ་གཏོགས། སེམས་ཁམས་ཆོས་ཉིད་ལ་ཞིབ་འཇུག་བྱེད་མཁན་རྣམས་ལ་ནི་དེ་ཙམ་ཕན་མི་ཐོགས། གང་ལྟར་ཚན་རིག་པ་ནི་སེམས་ཁམས་ཞིབ་འཇུག་ལ་གོམ་པ་སྤོ་མ་ཐག་པ་ལྟ་བུ་དང༌། སངས་རྒྱས་ཆོས་རིག་ནི་སེམས་ཁམས་ཞིབ་འཇུག་གི་གཞུང་ལུགས་དང༌། ཆོས་ལུགས་ཉམས་བཞེས་ནི་སེམས་ཉིད་འདུལ་སྦྱོང་གི་རྣལ་འབྱོར་ཤ་སྟག་ཡིན་པས་དེའི་ཆ་ནས་སངས་རྒྱས་ཆོས་གཞུང་ལ་ལེགས་བཤད་དང༌། སློབ་སྦྱོང་བྱེད་དགོས་ས་གང་འཚམ་རེ་ཡོད་པར་སྨྲ་ན་དེ་ནི་འགྲོ་བ་སེམས་ཅན་ཚོའི་རྣ་ལ་འགྲོ་བའི་གཏམ་ཡིན་ནོ། །དེ་ཡན་ཆད་ཀྱིས་སངས་རྒྱས་ཆོས་གཞུང་ནས་བཤད་པའི་གཞི་ཀུན་རྫོབ་སྣང་བའི་རྣམ་གཞག་ལ་དཔྱད་ཟིན་ཅིང༌། དཔྱད་པའི་ཚུལ་ཡང་རྒྱལ་བའི་དབང་པོའི་བཀའ་གསུང་ལས། སངས་རྒྱས་ཆོས་ལུགས་ལ་དབྱེ་ན། སངས་རྒྱས་ཆོས་ཀྱི་ཚན་རིག་དང༌། སངས་རྒྱས་ཆོས་ཀྱི་ལྟ་གྲུབ། སངས་རྒྱས་ཆོས་ཀྱི་ཉམས་ལེན་བཅས་སྡེ་ཚན་གསུམ་དུ་དབྱེར་ཡོད། ཅེས་ཕེབས་པ་ལྟར་ན་གོང་བཤད་དེ་དག་ནི་སྡེ་ཚན་དང་པོ་སྟེ། ཆོས་རིག་དང་ཚན་རིག་གཉིས་ཀའི་ཐུན་མོང་གི་ཞིབ་འཇུག་བྱ་ཡུལ་དུ་འཇོག་དགོས་པར་འདུག་པས་ནུབ་དར་མཚན་ཉིད་རིག་པ་དང༌། ཕྱིས་དར་ཚན་རིག་གི་རིག་ཚན་སོ་སོའི་ཞིབ་འཇུག་གི་བསྡོམས་ཚིག་སྣ་ཚོགས་དང་འགྲིག་མིན་གྱི་ཆ་ནས་གཙོ་བོར་དཔྱད་ཡོད། དེ་ཡང་དེང་སང་བོད་ནང་དུ་ཆོས་རིག་དང་ཚན་རིག་གཉིས་ཀ་ལ་སྤྱན་མ་ལོངས་ཙམ་གྱི་མཁས་པ་ནི། ཁམས་བླ་རུང་མཁན་ཆེན་ཚུལ་ཁྲིམས་བློ་གྲོས་མཆོག་དང༌། ཨ་མདོ་རྨེ་བ་སྤྲུལ་སྐུ་བསྟན་འཛིན་རྒྱ་མཚོ། དབུས་འབྲི་གུང་མཁས་དབང་དཀོན་མཆོག་རྒྱ་མཚོ་གསུམ་ལས་གཞན་སུ་ཡང་མཇལ་རྒྱུ་མི་འདུག་ཅིང༌། མཆོག་སྤྲུལ་བསྟན་རྒྱམ་ལགས་ཀྱི་གསུང་རྩོམ་ཉེ་ཆར་ལག་སོན་མ་བྱུང་བས། མཁས་དབང་གཞན་རྣམ་གཉིས་ཀྱི་བཀའ་རྩོམ་ཁ་ཅིག་དཔྱད་གཞིར་བཟུང་སྟེ་ནོར་འཁྲུལ་གྱི་རིགས་ལ་ཡོ་བསྲང་གི་ཚུལ་དུ་ཅུང་ཟད་ཙམ་ཞིག་ཞུས་པ་ཡིན། འདིའི་མན་ཆད་ཆོས་ལུགས་ཀྱི་ཐུན་མོང་མིན་པའི་རྣམ་གཞག་གཙོ་ཆེ་བས་ཚན་རིག་སོགས་དང་དཔྱད་བསྡུར་བྱ་རྒྱུ་ཆེར་མེད་སྟབས། ང་ཚོའི་སྔོན་ཆད་ཀྱི་རྟགས་ལ་བརྟེན་པའི་རྩོད་རིགས་ཀྱི་འགྲོ་ཕྱོགས་དེ་རང་གི་ཐོག་ནས་དཔྱད་པ་བྱ་རྒྱུ་ལས་མ་འདས་སོ་ཞེས་གསལ་བཤད་དང་འབྲེལ། སྐབས་སུ་བབ་པ་དོན་དམ་སྟོང་ཉིད་ཀྱི་རྣམ་གཞག་ལ་དཔྱད་པར་བྱ་སྟེ། དེ་ཡང་རྒྱལ་བའི་གསུང་རབ་ཡོངས་ཀྱི་མཐར་ཐུག་གི་འབབ་སོ་དང༌། ནང་པའི་གྲུབ་མཐའ་བཞི་ཆར་གྱི་བླ་སྲོག་གམ་གཞུང་ཤིང་ལྟ་བུ་ནི་དོན་དམ་སྟོང་ཉིད་ཀྱི་རྣམ་གཞག་འདི་ཡིན་ལ། གལ་སྲིད་སྟོང་ཉིད་ཀྱི་ལྟ་བའི་སྐོར་འདིར་རིག་པའི་གཞུང་ལུགས་ཀྱི་ཐོག་ནས་ཁུངས་སྐྱེལ་ཡག་པོ་ཞིག་བྱེད་ཐུབ་པ་ཡིན་ཚེ། སྔར་བཤད་ཀུན་རྫོབ་ཀྱི་རྣམ་གཞག་ཁ་ཅིག་ལ་ནོར་འཁྲུལ་འགའ་རེ་ཡོད་ན་ཡང་གནད་འགག་དེ་ཙམ་མེད་མོད། དད་པ་དང་དག་སྣང་གི་ལྷད་མ་ཞུགས་པའི་གཟུ་བོའི་བློས་བརྟགས་ཤིང་དཔྱད་ན། རྣམ་གཞག་འདི་དག་ལ་ཡང་བློ་རྩེ་གཏད་ས་ཡག་པོ་ཞིག་ཡོད་པའི་བཟོ་མི་འདུག །གང་ཟག་གི་བདག་མེད་ཀྱི་མིང་ཙམ་ཞིག་སངས་རྒྱས་པ་སྤྱི་ལ་མ་བགོས་ཐུན་མོང་དུ་ཡོད་ཀྱང་དོན་མཛུབ་མོ་འཛུགས་ས་འདིའོ་ཞེས་པའི་རྩོད་མེད་ཡོངས་གྲགས་ཤིག་རྒྱ་བོད་གང་དུའང་བྱུང་མྱོང་མེད། རྒྱ་གར་ལ་མཚོན་ན། བདག་ཕུང་དེ་ཉིད་དང་གཞན་ཉིད་བརྗོད་དུ་མེད་པར་འདོད་མཁན། ཕུང་པོ་བདག་ཏུ་འདོད་མཁན། དེ་ལ་ཡང་ཕུང་པོ་ལྔ་ཆར་བདག་ཏུ་འདོད་མཁན། སེམས་གཅིག་པུ་བདག་ཏུ་འདོད་མཁན། དེ་ལ་ཡང་ཡིད་ཤེས་བདག་ཏུ་འདོད་མཁན། ཀུན་གཞི་བདག་ཏུ་འདོད་མཁན། གཞན་ཡང་བདག་རྟག་པར་འདོད་མཁན་སོགས་གྲུབ་མཐའ་ཁྱུ་ཞིག་བྱུང་ཡོད་ལ། དེ་ཀུན་ཀྱང་འདི་ཉིད་ཁོ་ན་བདེན་གྱི་གཞན་ནི་གཏི་མུག་གོ་ཟེར་མཁན་ཤ་སྟག་ཡིན། བོད་གངས་ཅན་པའི་མཁས་གྲུབ་རིམ་བྱོན་ཚང་མ་ཁ་དབུ་མ་སྣ་དབུ་མ་གསུང་བཞིན་བཞུགས་ཡོད་ནའང༌། དབུ་མའི་ལུགས་ཀྱི་གང་ཟག་གི་བདག་མེད་ངོས་འཛིན་བྱ་ཚུལ་ནི་ཡོད་ཚད་ཁ་ཁ་སོ་སོ་རེད། དེ་ཡང་འདོད་ཚུལ་ཆུང་ཚགས་ཁག་བཞག་ནས་གནད་འགག་ཆེ་ས་ནས་གླེང་ན། བོད་སྔ་རབས་པ་དང་ཕྱི་རབས་པའི་འདོད་པ་གཉིས་ལས། ཐང་སག་པའི་རྗེས་འབྲང་བོད་སྔ་མ་རྣམས་ཀྱིས་ནི། ངར་འཛིན་གྱི་ཡུལ་དུ་གྱུར་པའི་ངའམ་བདག་དེ་མ་བརྟགས་འཁྲུལ་ངོའི་སྣང་བ་འབའ་ཞིག་ལས། རིགས་པས་བརྟགས་ན་འདི་ཞེས་ངོས་བཟུང་མེད་པ་དེ་གང་ཟག་གི་བདག་མེད་ཀྱི་དོན་ཡིན། ངའོ་བདག་གོ་སྙམ་དུ་འཛིན་པ་དེ་གང་ཟག་གི་བདག་འཛིན་གྱི་དོན་ཡིན། ང་དང་བདག་ཅེས་བྱ་བ་དེ་འཁྲུལ་སྣང་ཙམ་ལས་དོན་ལ་མེད་དོ་སྙམ་དུ་ཡིད་ལ་བྱེད་པ་དེ་གང་ཟག་གི་བདག་མེད་བསྒོམ་པའི་དོན་ཡིན། ང་བདག་གི་འཛིན་པ་རྩད་ནས་རྒྱུན་ཆད་པ་དེ་གང་ཟག་གི་བདག་མེད་རྟོགས་ནས་གང་ཟག་གི་བདག་འཛིན་སྤངས་པའི་དོན་ཡིན་ཟེར། ཨ་མདོ་དགེ་འདུན་ཆོས་འཕེལ་ལགས་ཀྱིས། དབུ་མའི་ལུགས་ལ་ཁས་ལེན་མེད་ཅེས་སྨྲས་ནས་བསྡད་ན་འགྲིག །ཅེས་གསུངས་འདུག་པ་ལྟར་བོད་སྔ་མ་འདི་དག་གིས་གལ་དང་འགག་ལ་ཐུག་དུས་རིགས་པ་དེ་ཙམ་ཁས་མི་ལེན་པར་ཨུ་ཚུགས་ལྟ་བུ་ཞིག་གནང་ནས་བཞུགས་སྲོལ་ཡོད་པ་ཡིན་འདུག །རྗེ་བཙུན་ཙོང་ཁ་པས་ཀྱང་གཞན་གྱི་ལྟ་གྲུབ་གང་ལ་ཡང་སྐྱོན་འདོགས་ཁོ་ན་བྱེད་ཅིང༌། གཞན་པས་ཚུར་ལ་གནོད་བྱེད་སྟོན་དུས་སྐྱོན་སྤོང་གཅིག་ཀྱང་མི་བྱེད་པར་ཁོ་བོ་ཅག་ལ་གྲུབ་མཐའ་མེད་ཅེས་གཡོལ་ཐབས་བྱེད་པ་འདི་ནི་ཧ་ཅང་ཐབས་རྡུག་གི་ལས་ཀ་རེད། ཅེས་བཀའ་བཀྱོན་ཡང་ནས་ཡང་དུ་གནང་ཡོད། གལ་སྲིད་རིགས་པའི་འགྲོ་སྟངས་ཁས་ལེན་མཁན་ཞིག་ཡིན་ཚེ། གང་ཟག་བདག་མེད་ངོས་འཛིན་དེ་འདྲ་ཞིག་བྱ་སྲོལ་ག་ལ་ཡོད། བདག་དང་གང་ཟག་ཡོད་མེད་བརྟག་དཔྱད་གཏོང་དུས་རྙེད་རྒྱུ་མེད་ཚེ་ཡང་ན་གཏན་ནས་མེད་པའི་རྟགས་དང༌། ཡང་ན་འཚོལ་མ་ཤེས་པའི་རྟགས་རེད། དེ་ལྟ་མིན་ན་གཞི་གང་དུ་ཡོད་པ་དང༌། ཚུལ་ཇི་ལྟར་ཡོད་པ་བཙལ་ན་ཅི་ལ་མི་རྙེད། ངའོ་བདག་གོ་སྙམ་པའི་བསམ་བློ་དེ་འཁྲུལ་པ་དང་བདག་འཛིན་ཡིན་ན། ང་མེད་བདག་མེད་སྙམ་པའི་བསམ་བློ་དེ་ཚད་མ་དང་བདག་མེད་སྒོམ་པའི་བློ་ཡིན་དགོས། དེ་ལྟར་ན་ང་དང་བདག་མེད་དགོས་ཤིང༌། དེ་ལ་འདོད་ཟེར་ན་ང་མེད་ཟེར་མཁན་ཁྱོད་རང་སུ་ཡིན་སྨྲ་དགོས་སོ། །དཔལ་ལྡན་ས་སྐྱའི་མཁས་པ་ཆེན་པོ་གཡག་པས་ཀྱང་ངའོ་སྙམ་པའི་བློ་དེ་ངར་འཛིན་ཡིན་པའི་ཞལ་བཞེས་ལ་བརྟེན་ནས་རྗེ་འཇིགས་བྲལ་ཞབས་ལ་རྩོད་པ་ཤོར་བར་གྲགས་ཏེ་ཁོང་ལ་ཐུགས་ཁག་མེད་དོ། །ངའོ་སྙམ་པའི་བློ་དེ་ངར་འཛིན་དང༌། སེམས་ཅན་ནོ་སྙམ་པའི་བློ་དེ་བདག་འཛིན་ཡིན་ན། ངར་འཛིན་ཟད་པའི་འཕགས་པ་ཚོས་མི་ངོ་རང་ངོ་མི་ཕྱེད་པར་ཐལ་བ་སོགས་ཐོག་ལྟར་ཚ་བའི་ཉེས་སྐྱོན་མང་པོ་ཞིག་གཞན་གྱིས་བགྲང་ཡོད་ལ། དེ་དག་ལ་སྔ་རབས་པའི་མཁས་པ་སུས་ཀྱང་སྐྱོན་སྤོང་ཤེས་མེད། མ་ཤེས་པ་དེའང་ཁོང་རྣམ་ཚོ་ཤེས་རྒྱ་ཆུང་བའི་དབང་གིས་ཕོ་མ་བྱས་པ་མིན་པར་གནད་ལ་ཁེལ་བའི་དབང་གིས་བྱ་ཐབས་ཟད་པ་ཡིན་ནོ། །དབུ་མ་ཕྱི་རབས་པ་སྟེ་རི་བོ་དགེ་ལྡན་པའི་བསྟན་འཛིན་རྣམ་པས། བོད་སྔ་རབས་པའི་རྣམ་གཞག་ཡོད་ཚད་ཕྱིར་མི་ལྡོག་པར་ཚར་བཅད་རྗེས་རང་ལུགས་འདི་ལྟར་བཞག་ཡོད་དེ། སྤྱིར་ངའོ་སྙམ་པའི་བློ་ཙམ་ནི་སངས་རྒྱས་འཕགས་པ་ལ་ཡང་ཡོད་པས་དེ་ནི་ངར་འཛིན་དང་སྤང་བྱ་མིན། འོན་ཀྱང་ངའོ་སྙམ་པའི་བསམ་བློ་ཤུགས་དྲག་པོ་དེ་འདྲ་སྐྱེས་པ་ཡིན་ན་ད་གཟོད་ངར་འཛིན་དང་སྤང་བྱར་འགྱུར་འགྲོ་བ་ཡིན། དཔེར་ན་རྐུན་པོ་ཞིག་ལ་ཁྱོད་རྐུན་མ་རེད། ཅེས་བརྗོད་ན་ང་རྐུན་མ་ཡིན་སྙམ་པའི་བསམ་བློ་ཞིག་སྐྱེ་ངེས་ཤིང༌། དེའི་སྐབས་ཀྱི་ངའོ་སྙམ་པའི་བློ་དེ་ཚད་མ་དང་ཡུལ་དེ་ཚད་གྲུབ་ཡིན། རྐུན་མ་མིན་པའི་མི་ཞིག་ལ་ཁྱོད་རྐུན་མ་རེད། ཅེས་བརྗོད་ན་ང་རྐུན་མ་མིན་སྙམ་པའི་བསམ་བློ་ཞིག་སྐྱེ་ངེས་ཤིང༌། དེའི་སྐབས་ཀྱི་ངའོ་སྙམ་པའི་བློ་དེ་འཁྲུལ་པ་དང་ཡུལ་དེ་གཏན་མེད་ཡིན། འོ་ན་དེ་འདྲའི་ངའོ་སྙམ་པའི་བློ་སྔ་ཕྱི་གཉིས་པོར་འཛིན་སྟངས་མི་འདྲ་བ་ཅི་ཞིག་ཡོད་ཅེ་ན། ངའོ་སྙམ་པའི་བློ་སྔ་མ་དེ་དང་མི་འདྲ་བར་ཕྱི་མ་དེ་དམ་ཧྲིག་ཧྲིག་ཅིག་དང༌། དེའི་ཡུལ་གྱི་ང་དེའང་འཁྲང་ཐེང་ཐེང་ཞིག་ཡོད། དེ་འདྲའི་ཁྱད་པར་དེ་མི་ཕལ་པ་ཚོས་ངོས་ཟིན་དཀའ་ཡང་ཁ་ནང་ལ་བསྐོར་ན་ཉམས་མྱོང་གི་ཐོག་ནས་གོ་རྒྱུ་ཞིག་ཡོད། མདོར་ན་ངར་འཛིན་ལྷན་སྐྱེས་ཀྱི་དམིགས་ཡུལ་གྱི་ང་ཙམ་ནི་འཆིང་འགྲོལ་གྱི་གཞི་ཡིན་པས་མཐའ་གཅིག་ཏུ་འཇོག་དགོས་ཤིང༌། འཛིན་སྟངས་ཀྱི་ཡུལ་དེ་ནི་ང་བདེན་གྲུབ་ཡིན་པས་མཐའ་གཅིག་ཏུ་དགག་དགོས་ཞེས་དང། དེ་འདྲའི་རྣམ་གཞག་ཞིབ་ཆ་ཅན་དེ་ཀླུ་སྒྲུབ་ཡབ་སྲས་སོགས་ཀྱི་གཞུང་ཆེན་ཁག་ཏུ་གསལ་པོར་མེད་ཀྱང༌། བླ་མ་དབུ་མ་པས་ཁྲིད་འོང་བའི་མདོ་ཁམས་ཀྱི་འཇམ་དབྱངས་དེ་ལ་བརྟེན་ནས་རྗེ་བཙུན་ཙོང་ཁ་པས་གསར་དུ་རྙེད་པ་ཡིན་ཞེས་སོགས་ཀྱང་སྨྲས་སྐད་འདུག་གོ །སྒྲ་མི་རྟག་གོ་སྙམ་པ་ལྟ་བུ་ཁྱད་གཞི་དང་ཁྱད་ཆོས་སྦྱར་ཏེ་འཛིན་པའི་བློ་ལ་དམིགས་ཡུལ་དང་འཛིན་སྟངས་ཀྱི་ཡུལ་གཉིས་སུ་དབྱེར་རུང་གི །ངའོ་སྙམ་པའི་བློ་ཞིག་ལ་ཡུལ་མི་འདྲ་བ་གཉིས་བཙན་ཤེད་བྱས་ཀྱང་ཕྱེར་མི་བཏུབ། ལྟ་གྲུབ་ཀྱི་ཁུངས་ཤིང་རྟ་ཆེན་པོའི་གཞུང་ལུགས་ལ་མ་ཐུག་པར་ཡི་དམ་འཁྱམ་པོའི་མན་ངག་ལ་གཏུགས་པ་འདིས་རྟགས་དང་རྟེན་འབྲེལ་ཡོད་ཚད་འཁྱུག་ནས་སོང་བ་རེད། སྒྲུབ་བྱེད་དངོས་སྟོབས་ཀྱི་རིགས་པ་མ་རྙེད་པར་སེམས་འཛིན་གྱི་ཉམས་མྱོང་ལ་ཞལ་འཕེན་གནང་དགོས་བྱུང་བ་ཡང་སྡུག་རྟགས་མ་གཏོགས་ཡག་རྟགས་ཤིག་ག་ལ་ཡིན། འདི་དག་ཁོ་བོ་མི་སྒེར་གྱི་བསམ་འཆར་ཙམ་ཡིན། གཞན་བདག་དང་བདག་འཛིན་འཚོལ་སྟངས་དང་རྙེད་སྟངས་ཁྱད་མཚར་ཅན་དེ་ཚོ་ལ། ཡར་ལངས་མེད་པའི་དགག་པ་ཞིག་དབུ་མ་ཀླུ་སྒྲུབ་དགོངས་རྒྱན་དུ་བྲིས་འདུག་པ་དེས་ཆོག་པར་འདུག་པས་དེ་ཉིད་འདིར་བཀོད་ན། གལ་ཏེ་ནམ་རྒྱུན་གྱི་ངའོ་སྙམ་པའི་བློ་འདི་ཚད་མ་ཡིན་ན། ཁྱོད་རྐུན་མ་ཡིན་ནོ་ཞེས་བརྗོད་ཚེ་ངའོ་སྙམ་པའི་བློ་སྐྱེས་པ་དེའང་ཚད་མ་ཤུགས་ཆེ་རུ་སོང་བ་ཙམ་ཡིན་གྱི་བདེན་འཛིན་དུ་འགྲོ་དོན་ག་ལ་ཡོད། གལ་ཏེ་དེ་བདེན་འཛིན་ཡིན་ན། མི་ཞིག་གིས་སངས་རྒྱས་ནི་སྐྱབས་གནས་མ་ཡིན་ཞེས་བརྗོད་ཚེ། སྐྱབས་གནས་ག་ལ་མིན་སྙམ་པའི་བློ་སྐྱེས་པ་དེའང་བདེན་འཛིན་ཅིའི་ཕྱིར་མིན། དེ་བཞིན་འདི་བུམ་པ་མིན་ཞེས་བརྗོད་ཚེ། བུམ་པ་མིན་ན་གཞན་ཅི་ཞིག་ཡིན། བུམ་པ་ཡིན་པར་ཐག་ཆོད་སྙམ་པའི་བློ་དེ་ཡང་བུམ་པའི་བདེན་འཛིན་ཡིན་གྱི་ཚད་མ་ག་ལ་ཡིན། དེས་ན་ཁོང་ཅག་གི་ལུགས་ལྟར་ན་བློ་ཤུགས་ཆུང་བ་རྣམས་ཚད་མ་དང༌། བློ་དེ་ག་རང་ཤུགས་ཆེ་རུ་སོང་ཚེ་རླུང་ལོག་པ་བཞིན་བདེན་འཛིན་དུ་འགྲོ་བར་འདུག་པས་ཡ་མཚན། ཞེས་སོ། །འདི་ཡར་ལངས་མེད་པའི་དགག་པ་ཡིན་མིན་ཀླུ་སྒྲུབ་དགོངས་རྒྱན་གྱི་དགག་ཡིག་མི་འཇིགས་སེང་གེའི་ང་རོ་ནས་བཟུང་སྟེ། དེང་སང་གི་ལོག་སྨྲའི་ཚང་ཚིང་སྲེག་པའི་ལུང་རིགས་རྡོ་རྗེའི་མེ་ཆར་གྱི་བར་དུ་ཞིབ་ཏུ་ཀློག་དང་ཧ་གོ་བར་འགྱུར་རོ། །མདོར་ན་བདག་དང་གང་ཟག་སོགས་ཡོད་པ་མྱོང་བ་མངོན་སུམ་ཡིན་པས། སངས་རྒྱས་པ་ཚོས་བདག་དང་གང་ཟག་ཡོད་མེད་དམ། ཡང་ན་བདེན་གྲུབ་ཏུ་ཡོད་མེད་དཔྱོད་ཁུལ་བྱེད་པ་ནི་དོན་མེད་པའི་བྱ་སྤྱོད་ཡིན་ལ། ཡོད་ཚུལ་ཇི་ལྟར་ཡིན་པའི་སྐོར་ལ་གནའ་ནས་བཟུང་སྟེ་མཚན་ཉིད་རིག་པ་པ་ཚོས་དཔྱད་པ་བྱས་ཡོད་ཅིང༌། རིག་པའི་གཞུང་ལུགས་ཀྱི་ངོས་ནས་བཤད་ན་དེ་ཉིད་གལ་འགངས་ཆེ་བའི་བྱ་གཞག་ཅིག་ཡིན་ཤས་ཆེ་ཡང༌། ཡོད་ཚུལ་འདི་འདྲ་ཡིན་ཞེས་ད་བར་སུས་ཀྱང་གསལ་པོར་མ་ཤོད་པར་སྣང་ངོ༌། །གནའ་བོའི་རྒྱ་གར་གྱི་བྲམ་ཟེའི་ཆོས་ལུགས་སོགས་མུ་སྟེགས་པའི་གྲུབ་མཐའ་ཚང་མས་གང་ཟག་གི་བདག་ཏུ་སྨྲ་བ་ན། སྟོན་པ་ཤཱཀྱ་ཐུབ་པས་དེ་དག་གི་ཁ་གཏད་དུ་ལངས་ཏེ་གང་ཟག་གི་བདག་མེད་སྨྲ་བའི་ཆོས་ལུགས་གསར་པ་འདི་སྲོལ་གཏོད་པ་ཡིན་པས། ལྟ་བའི་ཐད་ནས་གང་ཟག་གི་བདག་མེད་འདི་སངས་རྒྱས་ཆོས་ལུགས་ཀྱི་སྙིང་ལྟ་བུ་ཡིན། སྐབས་དེ་དག་ཏུ་ཆོས་ཀྱི་བདག་མེད་ཀྱི་སྐོར་ལ་སྐད་ཆ་ཅི་ཡང་མེད་མོད། ཕྱིས་སུ་མཁས་པ་མང་པོས་གང་ཟག་བདེན་མེད་དུ་སྒྲུབ་བྱེད་ཀྱི་རིགས་པ་དེ་དག་དངོས་པོ་གཞན་དག་ལ་ཡང་ཁ་སྤོ་རྒྱུ་ཡོད་པར་ཧ་གོ་ནས། རྣམ་རིག་པ་དང་ངོ་བོ་ཉིད་མེད་པར་སྨྲ་བ་ཞེས་པའི་གྲུབ་མཐའ་གསར་པ་གཉིས་བཙུགས་ཏེ་ཆོས་ཀྱི་བདག་མེད་ཀྱི་རྣམ་གཞག་རྒྱས་པར་གཏན་ལ་ཕབ་པ་རེད། དབུ་སེམས་གཉིས་ཀྱི་གཞུང་ལུགས་ཕལ་མོ་ཆེ་བོད་དུ་འགྱུར་ཞིང༌། བསྟན་པ་སྔ་དར་གྱི་སྐབས་ནས་བཟུང་སྟེ་ད་ལྟའི་བར་གྱི་མི་ལོ་ཆིག་སྟོང་ལྷག་གི་རིང་ལ་འཆད་ཉན་སྒོམ་སྒྲུབ་ཀྱི་འཕྲིན་ལས་ཀྱང་རྒྱུན་ཆད་མྱོང་མེད། འོན་ཀྱང་གཞུང་ཆེན་དེ་དག་ལ་འགྲེལ་བཤད་བསྐྱོན་སྐབས་བཤད་སྟངས་རྩ་བ་ནས་མི་འདྲ་བ་གཉིས་བྱུང་ཡོད། བོད་ཀྱི་དབུ་མ་པ་སྔ་མ་ཚོས་ཟེར་ན། སྣང་ཞིང་སྲིད་པའི་ཤེས་བྱ་ཡོངས་རྫོགས་བདག་འཛིན་མ་རིག་པའི་དབང་གིས་བྱུང་བའི་འཁྲུལ་སྣང་ཤ་སྟག་ཡིན་པ་དང༌། བརྟགས་ཤིང་དཔྱད་ན་ཆུ་ཤིང་ལ་སྙིང་པོ་འཚོལ་བ་ལྟར་དཔྱད་བཟོད་དུ་གྲུབ་པ་རྡུལ་ཕྲན་ཙམ་ཡང་མེད། དེ་ཡང་རགས་པའི་དངོས་པོ་རྣམས་བཅོམ་ཞིང་བསལ་ན་ཐལ་བ་རྡུལ་དུ་འགྱུར་འགྲོ་ལ། རྡུལ་ཕྲན་ཞེས་པའི་དངོས་པོ་ཆུང་མཐའ་ཞིག་ཀྱང་ཡོད་མི་སྲིད་དེ། བྱེ་མདོས་འདོད་པའི་ཕྲ་རྡུལ་དེ་ལ་ཤར་བསྟན་གྱི་ཆ་དང༌། ནུབ་བསྟན་གྱི་ཆ་གཉིས་སུ་ཕྱེ་རྒྱུ་ཡོད་ན་ནི་ཆུང་མཐའ་མ་ཡིན་དགོས་ལ། མེད་ན་ནི་རང་རང་གི་གོ་ས་ནོན་མི་ཤེས་པས་རྡུལ་ཕྲན་གྱི་ཁྱད་ཆོས་བརླགས་ཚར་བ་རེད། དེས་ན་ས་རྡོ་རི་བྲག་སོགས་མ་བརྟགས་མ་དཔྱད་ན་ཡོད་ཡོད་བདེན་བདེན་ལྟ་བུ་འདི་དག་ཀྱང་རིགས་པས་དཔྱད་ན་འཇའ་ལ་རེག་པ་བཞིན་ཡལ་འགྲོ་བས་མི་བདེན་འཁྲུལ་སྣང་དུ་ཤེས་དགོས། ནང་གི་སེམས་ལ་དཔྱད་ན་ཡང་དེ་དང་འདྲ་སྟེ། དགའ་སྡུག་ཆགས་སྡང་སོགས་རྒྱུན་ལྡན་གྱི་ཤེས་པ་འདི་དག་ལ་ཞིབ་ཏུ་དཔྱད་ན་དུས་ཤིན་ཏུ་ཐུང་ངུ་རེའི་ནང་དུ་སྐྱེ་འགག་བྱེད་པ་མ་གཏོགས་སྐད་ཅིག་ཙམ་ལ་ཡང་མི་སྡོད་པས། དུས་སྔ་ཕྱི་སོ་སོ་ན་ཡོད་པའི་ཤེས་པ་གཉིས་པོ་གཅིག་ཏུ་སྣང་བ་འདི་མགལ་མེའི་འཁོར་ལོ་ལྟར་འཁྲུལ་པ་ཡིན་པར་ར་འཕྲོད་ཐུབ། ཤེས་པ་གཅིག་ལ་སྔ་ཕྱི་ཆ་ཤས་སོ་སོར་ཕྱེ་རྒྱུ་མེད་པ་ཞིག་ཡོད་མི་སྲིད་དེ། གལ་སྲིད་ཡོད་ན་དེ་འདྲའི་ཤེས་པ་སྐད་ཅིག་མ་གསུམ་རྒྱུན་ཆགས་སུ་འབྱུང་བའི་ཚེ། ཤེས་པ་སྐད་ཅིག་དང་པོ་དང༌། གཉིས་པ་གཉིས་དུས་གཞན་གྱིས་བར་དུ་ཆོད་ན་རྒྱུན་ཆགས་ཀྱི་དོན་མེད། བར་དུ་མ་ཆོད་ན་འཕྲད་དགོས། འཕྲད་ན་དུས་མཉམ་ཡིན་དགོས་པས་སྐད་ཅིག་གཉིས་མཐུད་ཀྱང་གཅིག་གི་ཡུན་ལས་མི་ལོངས་པར་འགྱུར་རོ། །ད་དུང་སྐད་ཅིག་གཉིས་པ་དེར་སྐད་ཅིག་དང་པོ་ལ་འཕྲད་པའི་ཆ་གཅིག་དང༌། གསུམ་པ་ལ་འཕྲད་པའི་ཆ་གཅིག་སྟེ་སྔ་ཕྱིའི་ཆ་ཤས་གཉིས་སུ་ཕྱེ་རྒྱུ་ཡོད་ན་སྔ་ཕྱིའི་ཆ་མེད་ཉམས་ཤིང༌། ཕྱེ་རྒྱུ་མེད་ན་དང་པོ་ལ་འཕྲད་པའི་ཆ་དེ་ཕྱི་མ་ལ་འཕྲད་པའི་ཆ་ཡང་ཡིན་དགོས་པས་སྐད་ཅིག་དང་པོ་དང་གསུམ་པ་གཉིས་ཀྱང་འཕྲད་པར་འགྱུར། ཞེས་སོགས་རྣོ་ལ་སྐྱེན་པའི་རིགས་པ་མང་པོ་བརྗོད་ཡོད། དེ་ལྟར་བརྟགས་དཔྱད་བྱས་ན་དཔྱད་བཟོད་ཀྱི་ཆོས་སྣ་གཅིག་མེད་པས་སྣང་བ་ཡོད་ཚད་གཞི་མེད་ཀྱི་འཁྲུལ་སྣང་རྐྱང་རྐྱང་དུ་ཁས་ལེན་པ་ཡིན་ཟེར། དེང་སང་ཀུན་གྱི་ཁ་ན་རྒྱུ་བའི་ཐ་སྙད་ཚད་མས་མ་གྲུབ་ཟེར་བ་དེའི་དོན་འདི་རེད། འོ་ན་སངས་རྒྱས་དང་སངས་རྒྱས་ཀྱི་ཆོས་ཉིད་དེ་དོན་དམ་བདེན་པ་ཡང་མེད་དམ་ཞེས་དྲིས་པ་ན། མེད་ཅེས་སྨྲ་མ་ནུས་ཤིང་ཡོད་ཅེས་ཀྱང་ཟེར་མ་ཤེས་པས་དེ་དག་ཡོད་པའང་མ་ཡིན་མེད་པའང་མ་ཡིན་ཟེར། ཡོད་མེད་གཉིས་ཕུང་གསུམ་ཁེགས་པའི་དངོས་འགལ་མིན་ནམ་ཞེས་དྲིས་པ་ན། ང་ཚོའི་བློ་ངོར་དངོས་འགལ་ཡིན་ཀྱང་དོན་ལ་དེ་ལྟར་ཡིན་པར་མ་ངེས་ཟེར། ཡོད་མེད་གང་ཡང་མིན་པའི་གནས་ལུགས་དེ་ཤེས་རྒྱུ་ཡོད་དམ་མེད་ཅེས་དྲིས་པ་ན། དེ་ནི་བསམ་གྱིས་མི་ཁྱབ་པའི་གནས་ཡིན་པས་ཤེས་རྒྱུ་ཡོད་པའང་ཁས་མི་ལེན། ཤེས་རྒྱུ་མེད་པའང་ཁས་མི་ལེན་ཟེར། དེང་སང་ཡོངས་གྲགས་ཀྱི་ཁས་ལེན་མེད་པའི་གྲུབ་མཐའ་ཟེར་བ་དེ་འདི་རེད། ཐ་སྙད་ཚད་མས་མ་གྲུབ་པའི་དམ་བཅའ་དང༌། ཁས་ལེན་མེད་པའི་གྲུབ་མཐའ་འདི་གཉིས་ལ་ཞིབ་ཏུ་བསམ་ན་དངོས་གནས་དགོད་ཤོར་འོང་བར་འདུག །ཐ་སྙད་ཚད་མས་མ་གྲུབ་ན་ཐ་སྙད་པའི་ཆོས་ཀྱི་བྱེ་བྲག་ཁོའི་བློ་དེའང་ཚད་མས་མ་གྲུབ་དགོས་པས་དེས་ཐ་སྙད་ཚད་མས་མ་གྲུབ་པ་ཇི་ལྟར་ཤེས་པ་ཡིན་ནམ། སྣང་བ་ཡོད་ཚད་གཏད་སོ་མེད་པའི་འཁྲུལ་སྣང་ཡིན་ན། ཡོད་ཚད་འཁྲུལ་སྣང་དུ་ཐག་གཅོད་བྱེད་པའི་བློ་དེ་ཡང་འཁྲུལ་བློ་ཡིན་དགོས་པས་དེས་ཐག་གང་བཅད་ལའང་གཏད་སོ་ཅི་ཞིག་ཡོད། ཁོས་ཡོད་ཚད་འཁྲུལ་སྣང་དུ་ཐག་བཅད་པའི་ཞོར་ལ་ཁོས་བཤད་ཚད་ཐམས་ཅད་ཀྱང་འཁྲུལ་བཤད་གཟའ་བཤད་རྐྱང་རྐྱང་ཡིན་པར་ཐག་བཅད་པ་ཡིན་པས་རང་གིས་རང་ལ་དེ་སྡུག་མེད་པའི་མཚང་འབྲུ་ཁྱད་གསོད་བྱས་པ་ཡིན་ནོ། །སངས་རྒྱས་དཀོན་མཆོག་དང་དཀོན་མཆོག་དེའི་ཆོས་ཉིད་གཉིས་གོ་རིག་ཐོས་གསུམ་གང་ཡང་མི་འདུག་ན་མེད་ཅེས་ལབ་བཞག་ན་ལོས་ཆོག །ཡོད་པའང་མ་ཡིན་མེད་པའང་མ་ཡིན་ཟེར་ཅི་དགོས། སངས་རྒྱས་མེད་ན་གདུལ་བྱ་སུས་འདུལ། ཆོས་འཁོར་སུས་བསྐོར་སྙམ་ནས་ཞེད་སྣང་ལངས་པ་ཡིན་ན། གདུལ་བྱ་འདུལ་བ་དང༌།ཆོས་འཁོར་བསྐོར་བ་དེ་ཚོ་འཁྲུལ་སྣང་རེད་ཅེས་ཁྱོད་ཀྱིས་བཤད་ཟིན་པ་མིན་ནམ། འཁྲུལ་སྣང་ལ་ནི་བྱེད་པོ་མི་དགོས་ཏེ། དཔེར་ན་མིག་བཙིར་བའི་སྐབས་ཀྱི་ཟླ་གཉིས་བཞིན་ནོ། །ཁས་ལེན་མེད་ན་ཁ་རོག་འདུག་མི་བཞག་པར་རྩོད་པའི་གྲྭ་རུ་ཅི་ལ་སླེབ་ཡོང་བ་ཡིན་སུས་ཤེས། རིགས་པ་ལ་གཡོལ་བའི་ཆེད་དུ་མ་དཔྱད། ཅུང་ཟད་དཔྱད་པ། ཤིན་ཏུ་དཔྱད་པའི་རྣམ་གཞག་གསུམ་མམ། ཐ་སྙད་གཞིར་བཞག་དང༌། དོན་དམ་གཞིར་བཞག་གི་གནས་སྐབས་གཉིས་སུ་དབྱེ་བ་སོགས་པར་པུར་མང་པོ་ཞིག་བྱས་ཡོད་མོད། ཡོད་ཚད་རང་མགོ་རང་གཡོག་གི་ལས་ཀ་ཡིན། གནས་སྐབས་ཞེས་པ་དུས་ཚོད་སྟོན་པའི་ཚིག་ཡིན་གྱི་ཕྲ་རགས་སྟོན་པའི་ཚིག་མིན་པ་འདི་ཉིད་ཁོ་ནས་དེ་ཚོའི་དེ་ཉིད་ལྷང་ལ་ཕུད་ཚར། དངོས་པོ་གཅིག་ཉིད་ཐོག་མར་ཡོད་པར་རྟོགས་པའི་ཚད་མ་སྐྱེ། བར་དུ་མེད་པར་རྟོགས་པའི་ཚད་མ་སྐྱེ། མཐར་ཡོད་མེད་གང་ཡང་མིན་པར་རྟོགས་པའི་ཚད་མ་སྐྱེ་ཆོག་ན་འཇིག་རྟེན་འདིར་མི་ཆོག་པ་དང་མི་རུང་བ་ཅི་ཡང་མི་སྲིད། ཁྱོད་རང་ཐོག་མར་མི་ཡིན་པར་རྟོགས་པའི་ཚད་མ་དང༌། བར་དུ་ཁྱི་ཡིན་པར་རྟོགས་པའི་ཚད་མ་དང༌། ཐ་མར་འདྲེ་ཡིན་པར་རྟོགས་པའི་ཚད་མ་ཁོ་བོའི་རྒྱུད་ལ་སྐྱེ་བྱུང་ཞེས་སྨྲ་བར་འདོད་དོ། །རང་རྒྱུད་གྲུབ་མཐས་བསླད་ཆེས་པས་རང་སྐྱོན་མཐོང་མི་ཐུབ་པ་མ་གཏོགས་སྔ་རབས་པའི་གྲུབ་མཐའ་འདི་ལས་ནོར་ཚབས་ཆེ་བ་ཞིག་ཕལ་ཆེར་མི་སྲིད་པའི་ཚོད་ཡིན། དཔལ་ལྡན་འབྲས་སྤུངས་ཀྱི་ཆོས་རྗེ་ལེགས་ཆོས་པས། ཡིད་ལ་སྒོམ་ཚེ་ཅི་ཡང་མི་འཆར་ཞིང༌། །ངག་གི་ལམ་ནས་གང་ཡང་མི་སྨྲ་བར། །ལུས་ཀྱི་རྣམ་འགྱུར་ཁོ་ནས་འཛིན་དགོས་པའི། །གྲུབ་མཐའ་འདི་ནི་ཁྱོད་ཀྱི་བགོ་སྐལ་ཡིན། །ཞེས་སྔ་རབས་པའི་ཡོད་མིན་མེད་མིན་གྱི་ལྟ་བ་དང༌། ཁས་ལེན་མེད་པའི་རྩོད་པ་ལ་ཤགས་འདེབས་གནང་བ་འདི་ཅི་འདྲའི་གནད་ལ་ཁེལ་བ་ཞིག་རེད་ཨང༌།
རྗེ་བཙུན་ཙོང་ཁ་པ་ཡབ་སྲས་ཀྱིས། བོད་སྔ་རབས་པའི་གྲུབ་མཐའ་དེས་ཆུ་མི་ཐུབ་པར་གཟིགས་ནས་རང་ལུགས་གསར་པ་ཞིག་བཟོས་ཡོད་པ་ནི་འདི་ལྟར། ཆོས་ཀྱི་བདག་མེད་ཅེས་གསུངས་པ་དེ་བུམ་པ་ཀ་བ་སོགས་གཏན་ནས་མེད་གསུངས་པ་མ་རེད། དེ་ཚོ་བདེན་གྲུབ་ཀྱིས་མེད་གསུངས་པ་རེད། ཡོད་པ་དང་བདེན་གྲུབ་ཀྱིས་ཡོད་པ་གཉིས་དང༌། མེད་པ་དང་བདེན་གྲུབ་ཀྱིས་མེད་པ་བཅས་ལ་ཁྱད་པར་ཧ་ཅང་ཆེན་པོ་ཡོད། འོན་ཀྱང་ཁྱད་པར་འདི་ངོས་ཟིན་མཁན་རྗེ་ཙོང་ཁ་པ་ཁོང་ཙམ་མ་གཏོགས་གཞན་བོད་པ་ཉུང་ཉུང་ཡིན། རགས་པའི་རྩོམ་གཞིར་གྱུར་པའི་རྡུལ་ཕྲན་དེ་བྱེ་མདོ་གཉིས་ཀྱིས་བཤད་པ་ལྟར་ཕྱོགས་ཀྱི་ཆ་མེད་མིན་པར་ཆ་བཅས་ཡིན། ཤེས་པ་སྐད་ཅིག་དང་པོ་དང་གཉིས་པའི་བར་དུ་དུས་གཞན་གྱིས་བར་དུ་མ་ཆོད་ཀྱང་དེ་གཉིས་འཕྲད་མི་དགོས། གཞི་གང་ལ་སྦྱར་ཡང་ཡོད་པ་མ་ཡིན་ན་མེད་དགོས་ཤིང༌། མེད་པ་མ་ཡིན་ན་ཡོད་དགོས། དགག་པ་གཉིས་ཀྱིས་རྣལ་མ་གོ་བ་འདི་རིགས་པ་སྨྲ་བ་སྤྱིའི་ལུགས་ཡིན། ཡོད་པའང་མ་ཡིན། མེད་པའང་མ་ཡིན། གཉིས་ཀའང་མ་ཡིན། གཉིས་ཀ་མ་ཡིན་པའང་མ་ཡིན། ཞེས་སྨྲ་བ་ནི་ཁ་ན་རོགས་དང༌། དེ་ལྟར་བསྒོམ་པ་ནི་སྙིང་ལངས་རོགས་ལས་དོན་སྙིང་དང་གྲུབ་འབྲས་སྤུ་ཙམ་མེད། གཞན་ལུགས་རིགས་པས་ཚར་བཅད་རྗེས་རང་ལུགས་རིགས་པས་བསྒྲུབ་ཤེས་དགོས་ཀྱི། ང་ལ་ཁས་ལེན་མེད་ཅེས་བརྗོད་དེ་ལག་སྟོང་མཆན་ལ་བཅུག་ནས་སྲ་ཐོ་སེར་འཆི་རྒྱུར་སྒུག་བསྡད་ན་མི་འགྲིག །ཅེས་སོགས་སྐད་ཆ་གསར་པ་མང་པོ་ངར་ངར་རྫིག་རྫིག་དང་བཅས་བཤད་འདུག་ལ། དེ་དག་གི་ཁྲོད་ནས་སྔ་རབས་པ་ལ་འཕངས་པ་ཕལ་མོ་ཆེ་གནད་དུ་བསྣུན་ཡོད་ཀྱང༌། རང་ལུགས་ཀྱི་རྩ་བའི་གྲུབ་མཐའ་དེ་ཚོ་ནི་ཡིད་དུ་འོང་བ་ཞིག་གཏན་ནས་མ་རེད། ཡོད་པ་དང་བདེན་གྲུབ་གཉིས་ལ་ཁྱད་པར་ཆེན་པོ་ཞིག་འཇོག་ཁུལ་བྱས་པ་འདི་ནོར་བ་ཐམས་ཅད་ཀྱི་རྩ་བ་ཡིན། ཡོད་ཀྱང་མི་བདེན་པའི་དངོས་པོ་ཞིག་བཙལ་ཀྱང་རྙེད་རྒྱུ་མེད། ཡོད་འཛིན་ལས་ལྷག་པའི་བདེན་འཛིན་ཞིག་འཇིག་རྟེན་སུ་ལ་ཡང་མེད། སུ་ལ་ཡང་ཆ་རྒྱུས་མེད་པའི་བདེན་ཚད་དེ་རང་བཟོ་ཡིན། དེ་འདྲའི་བདེན་གྲུབ་དེ་མེད་པར་རྟོགས་ཀྱང་དགོས་ནུས་སྤུ་ཙམ་མེད་དེ། དེས་ཉོན་མོངས་སྐྱེ་བའི་སྒོ་ཅུང་ཙམ་ཡང་མི་ཁེགས་པའི་ཕྱིར། མཁས་དབང་དགེ་འདུན་ཆོས་འཕེལ་གྱིས། གྲོགས་པོར་མཚན་མར་ཞེན་པའི་བདེན་འཛིན་དང༌། །གྲོགས་ཀྱིས་ཕན་པར་རྟོགས་པའི་ཚད་མ་གཉིས། །སྲེད་པ་བསྐྱེད་ལ་ཁྱད་པར་ཅི་ཡང་མེད། །དགྲ་བོ་བདེན་པར་ཞེན་པའི་དངོས་འཛིན་དང༌། །དགྲ་ཡིས་གནོད་པར་ངེས་པའི་ཚད་མ་གཉིས། །ཞེ་སྡང་བསྐྱེད་ལ་ཁྱད་པར་ཅི་ཡང་མེད། ཅེས་གསུངས་པ་འདིས་ཁྱེད་ཅག་གི་གྲུབ་མཐའ་དེའི་སྙིང་དམར་དམར་པོ་དེ་ཁྲོམ་བསྒྲགས་བྱས་ནས་བསྟན་མི་འདུག་གམ། ད་དུང་ཧ་མ་གོ་ན་ཞེ་སྡང་ཅན་གྱི་མི་ཞིག་ལ། ཁྱོད་རང་དགྲ་བོའི་ཐོག་ཏུ་ཞེ་སྡང་ལངས་པ་ཡིན་ནམ། ཡང་ན་བདེན་གྲུབ་ཀྱི་ཐོག་ཏུ་ཞེ་སྡང་ལངས་པ་ཡིན། ཞེས་བཀའ་འདྲི་ཞིག་གནོངས་དང་བློ་སྐྱེད་ཡོད་པའི་ལན་ཞིག་འབུལ་རྒྱུ་རེད། གཟུགས་ཀྱི་ཆུང་མཐའ་དང༌། ཕྱོགས་ཀྱི་ཆ་བཅས་གཉིས་ཡིན་ཞིག་འདོད་པ་ནི་རིགས་པ་མི་ཤེས་པའི་ངན་རྟགས་ཡིན། ཁོ་བོ་ལ་ཡིད་མ་ཆེས་ན། སློབ་དཔོན་དབྱིག་གཉེན་གྱིས། དྲུག་གིས་གཅིག་ཆར་སྦྱར་བ་ན། ཞེས་པའི་ཚིགས་བཅད་གཅིག་གསུངས་འདུག་པ་དེར་ཐུགས་བསམ་བཞེས་དང་གོ་རྒྱུ་ཆེན་པོ་ཡོད། གལ་སྲིད་རྡུལ་ཕྲན་ཐུག་མེད་དུ་ཞལ་གྱིས་བཞེས་རྩིས་ཡིན་ན་ནི། དབུ་མ་ཚང་གི་ཕ་ནོར་དྲག་ཤོས་ཏེ་གཅིག་དུ་བྲལ་གྱི་རིགས་པ་འདི་ཆུ་ལ་གཡུག་དགོས། རྒྱུ་མཚན་ནི་རྡུལ་ཕྲན་ཇི་ལྟར་བཤིག་ཀྱང་དུ་མ་མི་འདོར་བས་དུ་མ་མི་བདེན་པའི་རྒྱུ་མཚན་བཤད་རྒྱུ་མེད་སོང་བས་རེད། ཤེས་པ་སྐད་ཅིག་དང་པོ་དང་གཉིས་པ་གཉིས་མ་འཕྲད་ན་བར་མ་ཆད་ཟེར་བ་འོང་མི་སྲིད་ཅིང༌། དུས་ཀྱང་ཐུག་མེད་དུ་འདོད་ན་གཅིག་དུ་བྲལ་གྱི་རིགས་པས་གོ་མི་ཆོད་པ་སྔ་མ་དང་མཚུངས་སོ། །མདོར་ན་རི་བོ་དགེ་ལྡན་པའི་མཁས་པ་དག་གིས་གསུངས་ན། བོད་སྔ་མ་ཚོའི་འདོད་པའི་ཐ་སྙད་ཚད་གྲུབ་མིན་པ་དང༌། ཁས་ལེན་མེད་པའི་ལྟ་བ་ལྟ་བུའི་ལོག་རྟོགས་རྫབ་ཆེན་དེ་འདྲ་ནི་མུ་སྟེགས་རྒྱང་འཕེན་པའི་རྒྱུད་ལའང་སྐྱེ་མ་མྱོང་ཞིང༌། གལ་སྲིད་ཁོ་ཚོས་ལྟ་བ་དེ་ཉིད་ལག་ལེན་དུ་བཏབ་པའི་དབང་དུ་བཏང་ན་ནི། ཚེ་སྔ་ཕྱི་དང་ལས་རྒྱུ་འབྲས་སོགས་ཀྱི་རྣམ་གཞག་ལྟ་ཅི་སྟེ། སོ་ནམས་ཞིང་ལས་སོགས་ཚེ་འདིའི་འཚོ་ཚིས་ཙམ་ཡང་འགྲུབ་ཐབས་མེད་པས་རིགས་ལོག་དེ་གྲས་ནི་ལྟོགས་གྲིར་འཆི་བའི་མན་ངག་དེའི་ཡན་མེད་པ་ཞིག་རེད་འདུག་ཅེས་དགག་པ་བརྒྱབ་ཡོད། དེ་བཞིན་བོད་སྔ་རབས་པའི་མཁས་པ་རྣམ་པས་ཀྱང༌། དགེ་ལྡན་པ་ཚོས་ཚད་མའི་ལུགས་ལ་ཡན་ལག་ལས་ལོགས་སུ་ཡན་ལག་ཅན་གྱི་རྫས་ཁས་བླངས་པ་འདིས་གང་ཟག་གི་བདག་མེད་གཏན་ལ་འབེབས་བྱེད་ཀྱི་རིགས་པ་ཡོད་ཚད་ཆུ་ལ་བསྐྱུར་བ་རེད། དབུ་མའི་ལུགས་ལ་སྣང་བ་ཟུར་དུ་བཞག་ནས་བདེན་གྲུབ་ལོགས་སུ་འཚོལ་ཁུལ་བྱས་པ་དེས་ཆོས་ཀྱི་བདག་མེད་གཏན་ལ་འབེབས་བྱེད་ཀྱི་རིགས་པ་ཡོད་ཚད་རླུང་ལ་བསྐུར་བ་རེད། ལུགས་འདིས་དགག་བྱ་འཚོལ་སྟངས་དང་གཉེན་པོ་བསྟེན་སྟངས་དེ་ཚོ་ནི་དགྲ་བོ་བསྐྱུར་ཏེ་གྲིབ་མ་ལ་འཐབ་འཛིང་བྱེད་པ་ཡིན་པས་བསྐལ་པ་བརྒྱ་ཡི་བར་དུ་འབད་བརྩོན་བྱས་ཀྱང་གྲུབ་འབྲས་ཅུང་ཟད་ཙམ་ཡང་ཡོད་མི་སྲིད། ཅེས་སོགས་སྐྱོན་འདོགས་རྐྱང་བྱེད་དེ། ལྟ་བའི་སྐོར་ལ་ཐུག་དུས་བོད་སྔ་ཕྱི་གཉིས་པོ་ཁྱི་དང་ར་འགྲོགས་པ་ནང་བཞིན་ཆགས་བསྡད་ཡོད། དེང་སང་ཁ་ཅིག་གིས། སྔོན་བྱོན་མཁས་གྲུབ་རྣམ་པའི་བར་ལ་ཚིག་གི་འཛིན་མཚམས་མི་འདྲ་བ་ཕྲན་བུ་ཡོད་པ་མ་གཏོགས་ཕུགས་ཀྱི་དགོངས་པ་གཅིག་ཡིན། ཚིག་གི་འཛིན་མཚམས་མི་འདྲ་བ་དེ་ནི་གྲུབ་མཐའ་ཕན་ཚུན་བྱི་དོར་དང༌། རྒྱལ་བའི་བསྟན་པ་ལ་དག་ཐེར་གནང་བའི་དགོས་ཆེད་རྨད་དུ་བྱུང་བ་ཡོད། ཅེས་སོགས་ཇོ་བཟང་གི་གསུང་བཟང་འབའ་ཞིག་ཕབ་ཀྱིན་འདུག །འདི་དག་ཆོས་ཀྱི་གནས་ལུགས་ཅི་ཡང་མི་ཤེས་པའི་མི་ནག་ཚོའི་ཆགས་སྡང་གི་སྒོ་འགོག་པའི་ཆེད་དུ་གསུངས་པའི་དགོངས་པ་ཅན་གྱི་གསུང་འདྲ་ཡིན་ན་ནི་དེར་ཟད། དེ་ལྟ་མིན་ན་གསུང་དེ་དག་ལ་སྙིང་པོ་མེད་དེ། གྲུབ་མཐའ་གཅིག་གིས་གཅིག་ལ་ཉེས་མེད་ཉེས་འདོགས་དང༌། ནག་མེད་ནག་འཛུགས་བྱས་པས་ཕན་ཚུན་བྱི་དོར་བྱས་པར་མི་འགྲོ་ཞིང༌། རྒྱལ་བསྟན་དཀར་འཇམ་ཡུག་གཅིག་ཏུ་གནས་པ་ལ་དུམ་བུ་གཉིས་སུ་བགོས་ཏེ་འཐབ་རྩོད་བྱས་པས་བསྟན་པ་དག་ཐེར་དུ་ཇི་ལྟར་འགྱུར། མཛེས་མཚོན་གྱི་བཀའ་མོལ་གསུང་མཁན་ཁོང་རྣམ་ཚོའི་ནང་ཁུལ་དུ་ཡང་དོན་དུ་ནང་འགྲིག་ཅི་ཡང་བྱུང་མེད། སྔ་རབས་པའི་ཁྲོད་དུ་སྡོད་པའི་མཐུན་ཐབས་སྨྲ་བ་ཚོས་ནི། རྗེ་བདག་ཉིད་ཆེན་པོ་ཉིད་ཀྱི་ཐུགས་ལ་ནི་ཡོད་མིན་མེད་མིན་གྱི་ལྟ་བ་ཁོ་ན་བཞུགས་པ་ཡིན་ཡང༌། ལྟ་བ་དེའི་སྐལ་པ་མེད་པའི་གདུལ་བྱ་དམན་པ་དག་གི་ངོར་གནས་ལུགས་མེད་དགག་ཏུ་གསུངས་པ་ཡིན་ཟེར། སྐད་ཆ་འདི་ངོས་ལེན་ཞུ་མཁན་གྱི་དགེ་ལྡན་པའི་མི་གཅིག་ཀྱང་བྱུང་མྱོང་མེད། དགེ་ལྡན་པའི་ཁྲོད་ཀྱི་མཐུན་ཐབས་སྨྲ་བ་ཚོས། སྔ་རབས་པའི་སྐྱེས་ཆེན་རྣམ་པས་སྤྲོས་བྲལ་དང་བློ་འདས་སོགས་གསུངས་པ་དེ་ཚོ་ཞིབ་ཆ་མ་ཐོན་པའི་གྲུབ་ཐོབ་ཀྱི་སྐད་ཆ་ཙམ་རེད། དགོངས་པའི་གཏད་སོ་རང་རེའི་སྟོང་རྐྱང་མེད་དགག་འདི་རང་ཡིན་ཟེར། སྔ་རབས་པ་ཞིག་ལ་མཚོན་ན་དེ་ནི་ནམ་ཡང་ཁས་ལེན་ཐབས་བྲལ་བའི་སྐད་ཆ་རེད། དེས་ན་ཁོ་བོས་བོད་སྔ་ཕྱིའི་དགོངས་པ་འགལ་མེད་དུ་འགྲེལ་མཁན་གྱི་མི་སྣ་དེ་ཚོ་ནི་ཁ་ཡག་རིང་ལུགས་པ་དང༌། འགན་ཁུར་མེད་པའི་བྱ་སྤྱོད་སྤེལ་མཁན་རེད་བཞག་ཅེས་ཁ་རྡུང་གཏོང་སྙིང་འདོད། འོ་ན་ལུགས་དེ་གཉིས་ལས་གང་ཞིག་མ་འགྲིག་པ་ཡིན་ཟེར་ན་གཉིས་ཀ་མ་འགྲིག་པ་ཡིན། དེ་ཡང་བོད་ཀྱི་མཁས་པ་རིམ་བྱོན་གྱི་ཁྲོད་དུ་ཀླུ་སྒྲུབ་ཡབ་སྲས་ཀྱི་དགོངས་པ་འཚོལ་མཁན་ཁོ་ན་མ་གཏོགས། ཀླུ་སྒྲུབ་ཡབ་སྲས་ཀྱི་དགོངས་པ་དེ་འགྲིག་མིན་གྱི་ཕྱོགས་སུ་བསམ་བློ་གཏོང་ཕོད་མཁན་མི་གཅིག་ཀྱང་མེད་པས་ལན་སོང་བ་རེད། ཁོང་རྣམ་པ་ལ་ཡང་ཐུགས་ཁག་ཁྱོན་ནས་མེད་དེ། ཀླུ་སྒྲུབ་ཡབ་སྲས་ཀྱི་མཁྱེན་དཔྱོད་ལ་ཧ་མི་ལས་མཁན་ཞིག་དང༌། དབུ་མའི་རིགས་པ་ལ་ངོ་མི་མཚར་མཁན་གྱི་མཁས་པ་ཞིག་འཇིག་རྟེན་འདིར་བྱུང་མ་མྱོང་ལ། ཁོང་ཡབ་སྲས་ཀྱི་དགོངས་པ་བཞེས་སྟངས་དེར་རྩ་བ་རང་ནས་མ་འགྲིག་པའི་ནོར་འཁྲུལ་ཞིག་ཤོར་ཡོད་སྙམ་པའི་བསམ་བློ་སུ་ལ་ཡང་འཁོར་མྱོང་མེད། འོན་ཀྱང་མིའི་རིགས་ཀྱི་ཤེས་རབ་རིམ་གྱིས་གོང་དུ་འཕེལ་ནས་དུས་རབས་ཉི་ཤུ་པར་སླེབ་པ་ན། ད་གཟོད་སྔོན་གྱི་མི་རྣམས་ཀྱི་བློ་ཡུལ་ལས་འདས་པའི་བློ་སྐྱེད་ཁ་ཅིག་རག་ཡོད་པ་རེད། སྔོན་ཆད་དུས་ཚོད་ནི་ཕྲེང་ཐགས་ལྟ་བུ་དང༌། སྐྱེ་འཇིག་ཅན་གྱི་དངོས་པོ་སྣ་ཚོགས་ནི་དུས་ཚོད་དེར་བརྒྱུས་པའི་ཕྲེང་རྡོག་ལྟ་བུའི་ངོས་འཛིན་ཡོངས་ཁྱབ་ཀྱིས་བྱེད་ཀྱིན་ཡོད། གནའ་བོའི་རྒྱ་གར་གྱི་སློབ་དཔོན་རྣམ་པས་ཀྱང་ལྟ་ཚུལ་དེ་ཉིད་གཞིར་བཞག་གི་ཐོག་ནས་དུས་ཀྱི་ཐུང་མཐའ་མའི་ཤེས་པ་གཅིག་ལ་སྔ་ཕྱིའི་ཆ་ཤས་ཡོད་མེད་ཀྱི་བརྟག་དཔྱད་གནང་བ་རེད། ཆ་ཤས་ཡོད་ན་ཐུང་མཐའི་དོན་མེད་ཅིང་ཆ་མེད་ཡིན་ན་རྒྱུན་རྩོམ་མི་ཐུབ་པར་གཟིགས་ནས་ཤེས་པ་སྐྱེ་མེད་དུ་གཏན་ལ་ཕབ་པ་རེད། གལ་སྲིད་ལྟོས་བཅས་ཚན་རིག་འདི་བྱུང་མེད་ན་དབུ་མའི་རིགས་པ་འདི་ལ་ལན་འདེབས་སུས་ཀྱང་ནུས་རེ་བྲལ། དགེ་ལྡན་པའི་མཁས་པ་ཚོས་ཤེས་པ་མེད་ཟེར་བཞག་ན་སྐུར་འདེབས་སུ་འགྲོ་བར་དགོངས་ཏེ། ཤེས་པ་སྐད་ཅིག་མ་གཉིས་མཐུད་ནས་རྒྱུན་རྩོམ་སྐབས་བར་སྟོང་མེད་ཅིང་ཐུག་འཕྲད་ཀྱང་མེད་པ་འདི་ཀླུ་སྒྲུབ་ཡབ་སྲས་ཀྱི་དགོངས་པ་ཡིན་གསུངས་ཀྱང༌། བར་སྟོང་དང་ཐུག་རེག་གཉིས་ཀ་མེད་པ་ཞིག་ཡོང་ཐབས་རྩ་བ་ནས་མེད། ལྟོས་བཅས་སྨྲ་བས་དངོས་པོ་སོ་སོའི་འགུལ་སྐྱོད་ལས་ལོགས་སུ་དུས་ཚོད་རང་རྐྱ་བར་མེད། ཅེས་བཤད་པ་འདིས་གཞི་ནས་ཤེས་པ་གཅིག་ལ་སྔ་ཕྱིའི་ཆ་ཤས་ཡོད་མེད་བརྟག་པ་ནི་དོན་མེད་སྐོར་ལོག་གི་བསམ་བློ་ཡིན་པར་ར་འཕྲོད་པ་རེད། དེ་བཞིན་ཡབ་སྲས་ཀྱིས་བེམ་པོ་ལ་དཔྱོད་པའི་སྐབས་སུ། རགས་པ་བཤིག་ན་རྡུལ་དུ་འཇིག་འགྲོ་ལ། རྩོམ་གཞིའི་ཕྲ་རྡུལ་དེའང་ཕྱོགས་ཀྱི་ཆ་དང་བཅས་པ་ཡིན་ན་ཆུང་མཐའི་དོན་མེད་ཅིང་ཆ་མེད་ཡིན་ན་རགས་པ་རྩོམ་མི་ནུས་པར་དགོངས་ཏེ་རྡུལ་ཕྲན་སྐྱེ་མེད་དུ་གཏན་ལ་ཕབ་པ་རེད། གལ་སྲིད་ཚད་རྡུལ་ནུས་རིག་འདི་བྱུང་མེད་ན་དབུ་མའི་རིགས་པ་འདི་ལ་ལན་འདེབས་ནུས་རེ་བྲལ། དགེ་ལྡན་པས་བེམ་པོ་གཞི་མེད་དུ་ཁས་བླངས་ན་སྐུར་འདེབས་སུ་འགྲོ་བར་དགོངས་ཏེ། རྩོམ་གཞིའི་རྡུལ་དེ་ཆ་བཅས་སུ་ཡོད་པ་ཀླུ་ཡི་དགོངས་པ་ཡིན་རྒྱུར་བྱས་ཀྱང༌། སྟེང་འོག་གི་ངོས་སོ་སོར་དགར་རྒྱུ་ཡོད་པའི་ཆུང་མཐའ་ཞིག་ག་ལ་སྲིད། ཚད་རྡུལ་སྨྲ་བས་གཟུགས་མེད་ནུས་ཁྱམས་ཀྱི་ཀློང་ནས་གཟུགས་ཅན་གྱི་གསོབ་རྡུལ་ཐོན་པར་བཤད་པ་འདིས་ད་གཟོད་བོངས་ཚད་ཁོ་ནའི་ཆ་ནས་དཔྱད་པ་གཏོང་བ་དེ་ནོར་འཁྲུལ་གྱི་བསམ་བློ་ཡིན་པར་ར་འཕྲོད་པ་རེད། ཁོ་བོས་ལྟོས་བཅས་ཚན་རིག་དང༌། ཚད་རྡུལ་ནུས་རིག་གི་སྒྲ་ཙམ་ཐོས་མ་ཐག་གསར་ཞེན་གཡམ་རྒྱུག་བྱས་ཏེ། དབུ་མའི་རིགས་པ་ལ་ཁྱད་གསོད་བྱས་པ་ཞིག་གཏན་ནས་མིན། ང་ཚོས་གཞུང་ཆེན་ཁག་ཏུ་རྣམ་གཞག་གང་ལ་ཡང་དགག་སྒྲུབ་སྤང་གསུམ་གྱི་སྤྲོས་པ་གྲ་རྒྱས་པོ་ཞེ་དྲག་མཛད་ཡོད་ཀྱང༌། གང་མཚམ་ཞིག་ལ་སླེབ་དུས་དད་པ་དག་སྣང་འདྲ་སྦྱངས་ཏེ་སྡོད་རྒྱུ་མ་གཏོགས་མཐའ་འགྲོ་བ་ཞིག་རྩ་བ་ནས་བྱུང་མི་འདུག་ལ། ལས་མ་དག་པའི་ཁོ་བོ་ལ་ནི་དག་སྣང་མ་སྐྱེས་པའི་གོང་ནས་སུན་སྣང་ཞིག་སྐྱེས་པར་གྱུར་ཅིང༌། ཇི་ལྟར་བྱས་ཀྱང་མི་བདེ་བར་ལུས་པའི་སྐབས་སུ་རིགས་གསར་གྱི་རྣམ་གཞག་འདི་དག་སྲོག་ཆད་ཀ་མའི་མི་ལ་སྨན་བཞིན་དུ་གནད་ལ་འཕྲོད་པར་བྱུང་བས་ད་གཟོད་ཡིད་ཆེས་པའི་གནས་སུ་བཟུང་བ་ལགས་སོ། །
གསུམ། ཚད་མའི་ལུགས་ཀྱི་མཐོ་རིས་དང་ཐར་པའི་རྣམ་གཞག་ལ་དཔྱད་པ།
མཁས་གྲུབ་དགེ་ལེགས་དཔལ་བཟང་སོགས་མཁས་པ་ཁ་ཅིག་གིས། མདོ་ལུང་ཟ་ཟུར་རེ་དྲངས་ནས་ཚད་མ་རིག་པའི་ཁུངས་སངས་རྒྱས་ཀྱི་གསུང་ལ་གཏུག་ཅི་ཐུབ་མཛད་ཡོད་ཀྱང༌། གསུང་རབ་གང་དུ་ཡང་ཚད་མ་དང་ཚད་མིན་གྱི་རྣམ་གཞག་དང༌། རྟགས་ཡང་དག་དང་ལྟར་སྣང་གི་རྣམ་དབྱེ་གསལ་པོར་མ་གསུངས་ཤིང༌། མཚན་གཞི་ཙམ་ནི་འཇིག་རྟེན་འཚོ་བའི་ཁྲོད་དུའང་ཡོད་པས་ཁུངས་སུ་མི་འགྲོ། དེས་ན་རིག་གཞུང་འདི་ཐོག་མར་མུ་སྟེགས་རིག་པ་ཅན་པའི་ཁྲོད་དུ་རང་རྐྱ་ཐུབ་ཅིང༌། ཕྱིས་སུ་སངས་རྒྱས་པའི་མཁས་པ་ཚོས་རང་ལུགས་ཟུར་དུ་ཕྱེས་པར་གྲགས་པ་ཉིད་དོན་ལ་གནས་སོ་སྙམ། ངོ་བོ་ཤེས་པ་ཡུལ་ལ་ཇི་ལྟར་འཇུག་པའི་ཚུལ་གཏན་ལ་འབེབས་པ་ཡིན་པས། རིག་གཞུང་རང་ངོས་ནས་བཤད་ན་ཆོས་དང་འཇིག་རྟེན། ཕྱི་པ་དང་ནང་པ་སོགས་ཀྱི་དབྱེ་བ་འབྱེད་རྒྱུ་མེད། འོན་ཀྱང་སློབ་དཔོན་ཕྱོགས་གླང་གི་མདོ་ཡི་མཆོད་བརྗོད་ལ་རྣམ་འགྲེལ་མཁན་པོས་ཚན་པ་ལོགས་སུ་བཟོས་ཏེ་རྒྱས་བཤད་གནང་བ་དེ་ནས་བཟུང༌། སངས་རྒྱས་པའི་ལུགས་ཀྱི་ཚད་མ་རིག་པའི་ཁ་ཕྱོགས་ཀྱང་འཁོར་འདས་གཉིས་ཀྱི་ཕྱོགས་སུ་བསྒྱུར་ཏེ་དོན་དངོས་ཀྱི་བརྗོད་བྱ་བློ་རྟགས་གཉིས་ནི་དེའི་ལག་ཆ་ཙམ་དུ་གྱུར་པ་རེད། སྐབས་འདིའི་དཔྱད་བྱ་ཡང་ཚད་མ་རིག་པ་དངོས་དེ་མིན་པར་ཚད་མ་གྲུབ་པའི་ལེའུ་དེའི་ནང་དོན་ཏེ་ཆོས་ལུགས་དང་ཐད་ཀར་འབྲེལ་བའི་གནད་དོན་ཁ་ཅིག་ཡིན། དེ་ལ་ཐོག་མར་དཔྱད་འོས་པ་ནི་སྐྱེ་སྲིད་ཀྱི་སྐོར་འདི་ཡིན་ཏེ། སྐྱེ་བ་སྔ་ཕྱི་ཡོད་པ་ཙམ་གྱིས་ཆོས་ལུགས་པ་ལ་རྒྱལ་ཁ་ཐོབ་པ་མ་ཡིན་ཀྱང༌། གལ་སྲིད་མེད་པའི་དབང་དུ་བཏང་ན་ནི་འཇིག་རྟེན་སྟེང་གི་ཆོས་ལུགས་ཕལ་མོ་ཆེ་གཞི་རྩའི་ཆ་ནས་ཚར་སོང་བ་རེད། གནའ་བོའི་རྒྱ་གར་དུ་སྐྱེ་བ་སྔ་ཕྱི་ཁས་མི་ལེན་པའི་གྲུབ་མཐའ་ཞིག་བྱུང་མྱོང་ཡོད་པ་དེའི་མིང་འདོགས་ལ་རྒྱང་འཕེན་པ་ཟེར། གྲུབ་མཐའ་དེ་ཐོག་མར་དྲང་སྲོང་ཕུར་བུས་དམག་འཁྲུག་གི་ཆེད་དུ་ལྷ་ཡུལ་དུ་སྲོལ་གཏོད་ཅིང༌། དེ་རྗེས་དྲང་སྲོང་འཇིག་མིག་གིས་འདོད་སྲེད་ཀྱི་ཆེད་དུ་མི་ཡུལ་དུ་དར་སྤེལ་བཏང་བ་རེད་ཅེས་ཤོད་སྲོལ་འདུག །ལྷ་རྣམས་ཀྱིས་རང་ཉིད་གང་ནས་ཤི་འཕོས་ཏེ་འདིར་སྐྱེས་པ་དང༌། འདི་ནས་ཤི་འཕོས་ཏེ་གང་དུ་སྐྱེ་བར་འགྱུར་བ་དང༌། དེ་དག་གི་རྒྱུ་དང་རྐྱེན་ཅི་ཞིག་ཡིན་པ་བཅས་གསལ་གསལ་ཐིང་ཐིང་མཐོང་བར་བཤད་ཡོད་པས་དེར་དྲང་སྲོང་ཕུར་བུའི་ཆད་ལྟའི་གྲུབ་མཐས་ཁ་ལོ་ཇི་ལྟར་བསྒྱུར་ཐུབ་བམ། དྲང་སྲོང་འཇིག་མིག་དང་ཁོའི་བུ་མོའི་བར་གྱི་འབྲེལ་བ་དེ་ཡ་རབས་བཟང་སྤྱོད་ཀྱི་ཐད་ནས་སྟངས་འཛིན་བྱས་ཡོད་པ་ལས། སྐྱེ་སྲིད་དང་རྣམ་སྨིན་ཁས་ལེན་མིན་ལ་རག་ལས་མེད། འདི་ཙམ་ལ་ཡང་རྟོག་དཔྱོད་མེད་པར་རང་སྣང་གང་ཤར་གྱིས་ཐོག་མ་ཉིད་ནས་དམའ་འབེབས་དང་ཁྱད་དུ་གསོད་རྐྱང་བྱེད་པ་ནི་རང་ཉིད་དྲང་པོ་མིན་ཞེས་གསལ་སྟོན་བྱས་པ་ཁོ་ནའོ། །ཚད་མ་རྣམ་འགྲེལ་ལས། རྒྱུ་འབྲས་དང་རྗེས་དཔག་ཁས་མི་ལེན་ཞིང༌། ལུས་ཆ་མེད་དང་དབུགས་རྟག་པར་འདོད་པ་སོགས་མེད་སྨྲའི་ལྟ་གྲུབ་ཆག་རོ་འགའ་ཞིག་ཆེད་དུ་བསལ་ཏེ། དེར་དགག་སྒྲུབ་རྒྱས་ཤིང་རྒྱས་པ་ཞིག་གནང་འདུག་པ་སྐབས་དེའི་ཕྱོགས་སྔ་དེ་ཚོར་ཕྲན་བུ་རེ་སོང་ཡོད་ཤས་ཆེ། སྤྱིར་ནི་རིགས་པ་ཕལ་མོ་ཆེ་རྩིང་ཧྲུལ་གནད་མ་ཟིན་པ་འབའ་ཞིག་ལས་བསྒྲུབ་བྱ་ལ་ངེས་ཤེས་འདྲེན་པ་དག་ལྟ་ཅི་སྟེ། ད་རེས་ཏོག་ཙམ་འདྲ་ཆགས་པོ་ཞིག་གསུངས་སོང་སྙམ་པའི་དོན་འགྱུར་གྱི་ཐེ་ཚོམ་སྐྱེད་ནུས་ཤིག་ཀྱང་ཕལ་ཆེར་མེད་པའི་ཚོད་རེད། དཔེར་ན། ལུས་ལས་སེམས་སྐྱེ་ན་ལུས་ཡོངས་རྫོགས་ལས་སྐྱེའམ། ཆ་ཤས་རེ་རེ་ལས་སྐྱེ། ཡོངས་རྫོགས་ལས་སྐྱེ་ན་མཛུབ་མོ་ཆད་པའི་མི་ལ་སེམས་མི་སྐྱེ་བར་ཐལ། ཆ་ཤས་རེ་རེ་ལས་སྐྱེ་ན་རྡུལ་གྱི་གྲངས་བཞིན་དུ་སེམས་ཀྱང་མང་དུ་སྐྱེ་བར་ཐལ། ཞེས་པ་ལྟ་བུ་བསམ་གཞིག་གནད་ལ་ཡེ་ནས་མ་འབྱོར་བ་དང༌། ལུས་སེམས་གཉིས་ལ་རྒྱུ་འབྲས་ཀྱི་འབྲེལ་པ་གྲུབ་ན་ལུས་ཅི་ཙམ་རྒྱགས་པ་ན་སེམས་ཀྱང་དེ་ཙམ་དུ་གསལ་ཞིང་རྒྱས་པར་ཐལ། ཞེས་པ་ལྟ་བུ་རིགས་ལམ་སྟབས་བདེ་ཐག་ཆོད་པ་དང༌། ལུས་སེམས་ཀྱི་ཉེར་ལེན་ནམ། ཡང་ན་ལུས་སེམས་བདག་ཉིད་གཅིག་ཡིན་ན་ཤི་བའི་རོ་ལ་ཡང་སེམས་གནས་དགོས་པར་ཐལ། ཞེས་པ་ལྟ་བུ་དོན་མེད་ཁ་ཁྲལ་འཇལ་བ་ཙམ་དང༌། ལུས་སེམས་གཉིས་པོ་ཡོན་ཏན་དང་ཡོན་ཏན་ཅན་ཡིན་ན་སེམས་ཀྱི་ཡོན་ཏན་ལུས་ཐོག་ནས་མཐོང་ཐུབ་པར་ཐལ། ཞེས་པ་ལྟ་བུ་ཁྱབ་འབྲེལ་ངེས་པ་མེད་པ་དང༌། རྒྱུ་ཚོགས་གྲངས་ཚང་གི་ཚུལ་དུ་འབྲེལ་ན་དུག་གིས་ཤི་བའི་རོ་ལ་དུག་སེལ་བྱས་ཚེ་གསལ་རིག་སླར་ཡང་སྐྱེ་འོང་བར་ཐལ། ཞེས་པ་ལྟ་བུ་མཐའ་དཔྱད་ཡག་པོ་མ་བྱས་པ་སྟེ་རིགས་ལམ་མང་ཤོས་འདི་དང་འདི་འདྲ་ཤ་སྟག་རེད་བཞག །མེ་ཇི་ཙམ་གྱིས་ཤུགས་ཆེར་འབར་ན་དུ་བ་དེ་ཙམ་གྱིས་དྲག་ཏུ་འཕྱུར་མི་དགོས་པ་བཞིན་རྒྱུ་དང་འབྲས་བུའི་འབྲེལ་བ་གྲུབ་ཕྱིན་ཆད་མཐའ་གཅིག་ཏུ་འཕེལ་འགྲིབ་རྗེས་སུ་འགྲོ་ལྡོག་ཡོད་མི་དགོས། ལུས་སེམས་བདག་ཉིད་གཅིག་ཡིན་པའི་དབང་དུ་བཏང་རུང་འདུ་འབྲལ་མེད་པས་མ་ཁྱབ་པ་ནི་ལྕགས་གོང་དང་དེའི་དམར་འབར་བ་ནང་བཞིན་རེད། ཆང་མ་འཐུང་གི་བར་དུ་མྱོས་པའི་ནུས་པ་ཧ་མི་གོ་བ་བཞིན་ཡོན་ཏན་དང་ཡོན་ཏན་ཅན་གྱི་འབྲེལ་བའང་རྣམ་པ་ཐམས་ཅད་དུ་གཅིག་གྱུར་དུ་བསྡད་མེད། གསོན་ལུས་སེམས་ཀྱི་རྒྱུ་ཚོགས་གྲངས་ཚང་ཡིན་སྲིད་ཀྱང་དབུགས་དང༌། དྲོད། སྲོག་བཅས་ཡོད་ཚད་སོང་ཟིན་པའི་རོ་ཐོག་ཏུ་བསམ་བློ་རང་འཇགས་སུ་ལོག་འོང་བའི་ངེས་པ་ག་ལ་ཡོད། སྐྱེ་དངོས་རིག་པ་དང༌། ཚེ་སྲོག་གི་སྐྱེ་འཕེལ་ལ་ཆ་རྒྱུས་ཕྲན་བུ་ཡོད་པའི་དེང་གི་ཚན་རིག་པ་ཞིག་ཡིན་ན་གོང་གི་རིགས་པ་དེའི་གྲས་ལ་བསམ་བློ་གཏོང་རིན་ཅུང་ཙམ་ཡང་མེད་ཅིང༌། གཞན་སུ་ཞིག་གིས་དེ་དང་དེ་འདྲའི་བགྲོ་གླེང་འདྲ་བྱས་ན་ཁོ་ཚོའི་སེམས་གཏིང་ནས་དགོད་རྒྱུ་ཡོང་ངེས་རེད། འབྲོག་པ་ཞིག་གིས་ཐག་པའི་སྣེ་གཅིག་ཤེལ་ཏོག་ལ་བཏགས། སྣེ་གཞན་ཞིག་དེ་ཆུ་ལ་བཏུགས་ནས་གློག་འབར་མིན་ཚོད་ལྟ་བྱས་སྐད་འདུག་པ་དེ་དང་ཤིན་ཏུ་འདྲ་བས་དགོད་རྒྱུ་ཅི་ལ་མི་འོང༌། དབྱིན་ཇིའི་སྐྱེ་དངོས་རིག་པ་བ་རྡར་ཝུན་གྱི་སྐྱེ་དངོས་འཕེལ་འགྱུར་གྱི་ལྟ་བ་འདིས། འཇིག་རྟེན་གསར་གཏོད་སྨྲ་བ་དང༌། འགྱུར་མེད་དངོས་གཙོ་སྨྲ་བའི་གྲུབ་མཐའ་ཤུལ་མེད་དུ་བཏང་བ་ཙམ་དུ་མ་ཟད། མཐར་གཏུགས་ནས་བཤད་ན་ང་ཚོའི་ཡང་སྲིད་རིང་ལུགས་འདི་ལ་ཡང་རྩ་འཛིན་བྱ་ས་ཡག་པོ་ཞིག་མེད་པའི་བརྡ་ལན་གསལ་པོར་སྤྲད་ཡོད། དེ་ཡང་འཕེལ་འགྱུར་སྨྲ་བ་འདི་ལ་སྐྱེ་དངོས་རྣམས་ཀྱི་ངོ་བོ་སྟབས་བདེ་ཅན་ནས་རྙོག་འཛིང་ཅན་དུ་འཕེལ་བ་དང༌། རིགས་རྒྱུད་ཆིག་རྐྱང་ཅན་ནས་སྣ་མང་ཅན་དུ་འགྱུར་བའི་རྩ་དོན་གཉིས་ཡོད་ཅིང་འཕེལ་དང་འགྱུར་ཞེས་པའི་མིང་ཚིག་དེ་གཉིས་ཀྱི་གོ་དོན་ཡང་དེ་ཡིན། དང་པོ་འདིས་སྐྱེ་མེད་དངོས་རྫས་ཀྱི་གྲུབ་ཆ་ཕུན་སུམ་ཇེ་ཚོགས་སུ་ཕྱིན་ཚེ་སྐྱེ་ལྡན་དངོས་པོར་འགྱུར་བ་དང༌། སྐྱེ་ལྡན་དངོས་པོའི་གྲུབ་ཆ་ཕུན་སུམ་ཚོགས་སུ་ཕྱིན་ཚེ་དམའ་རིམ་གྱི་ཚེ་སྲོག་འབྱུང་བ་དང༌། དམའ་རིམ་སྲོག་ཆགས་ཀྱིས་ཕྱི་ཡུལ་དང་འབྲེལ་གཏུགས་མཐུན་སྦྱོར་བྱས་ཚེ་ད་གཟོད་མཐོ་རིམ་གྱི་སྲོག་ལྡན་འགྲོ་བ་མིའི་རིགས་འདི་འབྱུང་བར་བཤད་ཅིང༌། དེ་དག་གི་འཕེལ་རིམ་ཡང་བྱིས་པ་ནས་རྒན་པོའི་བར་གྱི་མི་ཚེ་བཞིན་རྒྱུན་ཆགས་སུ་བརྩི་རྒྱུ་ཡོད། གནའ་བོའི་སྤྲ་མི་ནི་མི་དང་དུད་འགྲོའི་དབྱེ་འབྱེད་དཀའ་བའི་མཚམས་ཚིགས་དང༌། ལུས་ཀྱི་ནད་འབུ་ནི་སྲོག་ལྡན་དང་སྲོག་མེད་ཀྱི་དབྱེ་འབྱེད་དཀའ་བའི་མཚམས་ཚིགས་དང༌། འཕྱོ་གཡེང་གི་དངོས་པོ་ནི་སྐྱེ་ལྡན་དང་སྐྱེ་མེད་ཀྱི་དབྱེ་འབྱེད་དཀའ་བའི་མཚམས་ཚིགས་ཡིན། ཚད་མ་རྣམ་འགྲེལ་ལས། སྲོག་ཆགས་ཙམ་དང༌། སྲོག་ཆགས་དང༌། ཆེས་སྲོག་ཆགས་བཅས་ཀྱི་དབྱེ་བ་འབྱེད་རྒྱུ་ཡོད་པར་ཐལ། ཞེས་གཞན་ལ་མི་འདོད་པའི་ཚད་དུ་བྱས་ནས་འཕངས་ཡོད་ཀྱང་འཕེལ་འགྱུར་སྨྲ་བའི་ལུགས་འདིར་དེ་འདྲའི་དབྱེ་བ་ཕྱེས་ན་ཤིན་ཏུ་འོས་ཤིང་འཚམ་པར་སྣང༌། རྩོད་སྒྲུབ་དངོས་གཙོ་སྨྲ་བ་ཚོས། འདུ་ཤེས་ནི་དངོས་པོའི་འཇིག་རྟེན་ཡུན་རིང་འཕེལ་བའི་འབྲས་བུ་ཡིན་ཞེས་པ་དང༌། འདུ་ཤེས་ནི་སྤྱི་ཚོགས་ངལ་རྩོལ་གྱི་གྲུབ་འབྲས་ཡིན་ཞེས་པ་དང༌། འདུ་ཤེས་ནི་ཀླད་ཆེན་གྱི་ནུས་མཐུ་ཡིན་ཞེས་པ་དང༌། འདུ་ཤེས་ནི་ཕྱི་རོལ་ཡུལ་གྱི་ཚུར་སྣང་ཡིན་ཞེས་པ་འདི་དག་ཡོད་ཚད་ཀྱི་ཁུངས་དང་གོ་བ་ཡང་འཕེལ་འགྱུར་སྨྲ་བའི་ལྟ་བ་འདི་རང་ཡིན། བྱིས་པ་དང༌། གཞོན་ནུ། རྒན་པོ་གསུམ་ལ་རྣམ་དཔྱོད་ཆེ་ཆུང་ཡོད་ཀྱང་རྣམ་ཤེས་ཡོད་མེད་ཀྱི་དབྱེ་བ་འབྱེད་མི་བཏུབ་པ་བཞིན། སྲོག་ཆགས་དང༌། རྩི་ཤིང༌། ས་རྡོ་བཅས་ལ་རྐྱེན་ལྡན་རྐྱེན་མེད་ཀྱི་ཚུར་སྣང་གི་ཁྱད་པར་ཙམ་ལས་བསམ་གཞིག་རང་རྐྱ་བ་ཡོད་མེད་གཅིག་མཚུངས་ཡིན། རྩ་དོན་གཉིས་པ་རིགས་རྒྱུད་ཆིག་རྐྱང་ཅན་ནས་སྣ་མང་ཅན་དུ་འགྱུར་བའི་དོན། དང་པོ་ཉིད་ནས་དཀོན་མཆོག་གམ་ལས་དབང་གིས་མི་དང་དུད་འགྲོ་སོགས་རིགས་མི་འདྲ་བ་སོ་སོར་གཏན་ཁེལ་བྱས་བཞག་པ་ཞིག་མིན་པར་དུས་ཡུན་རིང་པོར་ཕྱི་རོལ་ཡུལ་གྱི་ཆ་རྐྱེན་མི་འདྲ་བ་དང༌། ནང་ཕན་ཚུན་བར་གྱི་འདྲེས་སྦྱོར་སྣ་ཚོགས་བཅས་ལ་བརྟེན་ནས་རིམ་གྱིས་རིགས་རྒྱུད་གཞན་འགྱུར་བྱུང་བར་འདོད་པ་སྟེ། འདིས་ཀྱང་རྣམ་ཤེས་དང་ལས་དབང་ལ་བསྙོན་འབྱིན་བྱས་ཡོད་མོད་ཞིབ་ཏུ་སྨྲ་བར་མི་བྱའོ། །སྐྱེ་བ་སྔ་ཕྱི་ཡོད་པའི་སྒྲུབ་བྱེད་ལ། དཔལ་ལྡན་ཆོས་གྲགས་ཀྱིས། སྐྱེས་མ་ཐག་པའི་བྱིས་པའི་རིགས་པ་དེ་རིགས་འདྲའི་རིག་པ་སྔ་མ་སྔོན་སོང་ཡིན་ཏེ། རིག་པ་ཡིན་པའི་ཕྱིར། ཞེས་རིགས་འདྲ་སྔོན་སོང་གིས་བསྒྲུབས། མཁན་ཆེན་ཞི་འཚོས། ཚེ་འདིའི་དབང་དུ་བྱས་པའི་རྣམ་ཤེས་སྐད་ཅིག་དང་པོ་དེ་རྣམ་ཤེས་སྔ་མའི་ཉེར་འབྲས་ཡིན་ཏེ། རྣམ་ཤེས་ཡིན་པའི་ཕྱིར། ཞེས་ཉེར་ལེན་སྔོན་སོང་གིས་བསྒྲུབས། སློབ་དཔོན་དཔའ་བོས། སྐྱེས་མ་ཐག་པའི་སྟག་གི་ཕྲུ་གུ་དེ་གོམས་པ་སྔོན་སོང་གི་རྣམ་ཤེས་རྒྱུད་ལྡན་ཡིན་ཏེ། ཁྱོད་ལ་བསླབ་མི་དགོས་པར་ནུ་ཞོ་འཐུང་ཤེས་པའི་ཤེས་པ་ལྷན་སྐྱེས་སུ་ཡོད་པའི་ཕྱིར། ཞེས་གོམས་པ་སྔོན་སོང་གིས་བསྒྲུབས། ལེགས་ལྡན་འབྱེད་ཀྱིས། ད་ལྟའི་སྐྱེ་སྲིད་འདི་སྔོན་མའི་ཡང་སྲིད་ཡིན་ཏེ། སྔོན་གྱི་སྲིད་པ་དྲན་པའི་གང་ཟག་ཡོད་པའི་ཕྱིར། ཞེས་མྱོང་བ་སྔོན་སོང་གིས་བསྒྲུབས་པ་བཞི་ཡོད་པ་ལས། རིགས་པ་དང་པོ་གསུམ་ནི་ཁྱབ་འབྲེལ་ངེས་པ་མེད་པས་ནུས་པ་ཅི་ཡང་མི་འདུག །བཞི་པ་ཚེ་རབས་རྗེས་དྲན་གྱི་རིགས་པ་འདི་ནི་རྟོག་པ་འོག་འགྱུ་ཙམ་མིན་པར་མིག་མཐོང་ལག་ཟིན་གྱི་གནས་ཚུལ་གཞི་ལ་བཞག་ནས་བཀོད་པ་ཡིན་འདུག་པས་དཔྱད་དགོས་ཤིང༌། དུས་ད་ལྟའི་བར་དུ་དངོས་གཙོ་སྨྲ་བ་དང༌། འཕེལ་འགྱུར་སྨྲ་བ་སུས་ཀྱང་འགྲེལ་བཤད་བློ་ཡིད་ཚིམས་པ་ཞིག་བརྒྱབ་ཐུབ་མེད་མོད། ཚན་རིག་གི་ཤེས་ཚད་གོང་འཕེལ་དུ་ཕྱིན་ཚེ་ནམ་ཞིག་བློ་ཡུལ་ལས་འདས་པའི་གསང་བ་ཞིག་རྙེད་སྲིད་པ་ཡིན། མི་ཁ་ཅིག་གིས། རྨི་ལམ་གྱི་ནང་ནས་རྗེས་ཕྱོགས་ཀྱི་དོན་དག་སྔོན་དཔག་བྱེད་ཐུབ་ཀྱང་རྨི་ལམ་གྱི་ཤེས་པ་དེ་མ་འོངས་པ་ནས་ཡར་ལ་བསླེབས་པ་ཞིག་ཡིན་མི་སྲིད་པ་བཞིན། ཚེ་རབས་དྲན་པའི་བསམ་བློ་དེའང་གཅིག་བྱས་ན་འདི་འདྲའི་དོན་དག་ཅིག་ཡིན་ཤས་ཆེ། སྐྱེ་བ་སྔ་མའི་ལུས་ཀྱི་ཤ་མཚན་ཕྱི་མའི་ལུས་སྟེང་དུ་འཕོས་པ་ཡོད་པ་ལྟར་ན། སྐྱེ་བ་སྔ་ཕྱི་གཉིས་ཀྱི་བར་དུ་བརྡ་འཕྲིན་དང་གློག་རླབས་ལྟ་བུ་གཞི་རྒྱུ་ཕྲ་མོའི་འབྲེལ་བ་ཞིག་ཡོད་པ་ཡིན་ཡང་སྲིད། སྤྱིར་བཏང་བྱས་ན་བསམ་གཞིག་གི་ལྟེ་གནས་ཀླད་ཆེན་ནི་མེད་དུ་མི་རུང་བ་ཞིག་ཡིན་ན་ཡང༌། དམིགས་བསལ་ཅན་གྱི་མི་རེ་གཉིས་ལ་ཀླད་ཆེན་མེད་ཀྱང་ཆོག་པ་ལྟར་སྐྱེ་བ་སྔ་ཕྱི་འདིའང་དམིགས་བསལ་གྱི་མི་སྣའི་དམིགས་བསལ་གྱི་ཁྱད་ཆོས་འདྲ་ཨེ་ཡིན། དེ་ལྟ་མིན་ན་འདུ་ཤེས་ཀྱི་འཕེལ་རིམ་ཚད་ངེས་ཅན་ཞིག་ལ་ཐོན་དུས། ད་གཟོད་རྣམ་ཤེས་བེམ་པོ་ལས་ལོགས་སུ་མུ་མཐུད་དུ་འཚོ་གནས་ཐུབ་པ་ཡིན་རྒྱུ་རེད། ཚན་རིག་པའི་ཁྲོད་ནས་རྣམ་ཤེས་ཡོད་ཤས་ཆེ་ཟེར་མཁན་དེ་ཚོས་ཀྱང་དོན་འདི་འདྲ་ཞིག་ལ་ཐེ་ཚོམ་སྐྱེས་པ་ཙམ་མ་གཏོགས། ང་ཚོ་ལྟར་རྣམ་ཤེས་ཀྱི་ཐོག་མ་གཏན་མེད་དུ་ཁས་ལེན་རྩིས་རང་དག་མ་རེད་སྙམ། མདོར་ན་དེང་སང་སྐྱེ་བ་སྔ་ཕྱི་དྲན་པ་དང༌། སྲིད་པ་ཕྱིར་ལྡོག་གི་ཆོ་ག །རྣམ་ཤེས་འཁྱམས་པའི་ཉམས་མྱོང༌། ལུས་སེམས་བརྗེ་སྤོར་གྱི་མཐོང་སྣང་སོགས་ངོ་མཚར་ཆེ་བའི་བྱུང་བ་འདི་དག་ཡོད་ཚད་མི་བདེན་རྫུན་བསྒྲིགས་ཤ་སྟག་རེད་ཅེས་ལག་མགོ་གནམ་གཡུག་བྱས་ན་མི་འགྲིག་ལ། ད་ལྟའི་རིགས་གསར་གྱིས་འགྲེལ་བཤད་མི་ཕོག་པ་ཙམ་གྱིས་ལམ་སེང་སྐྱེ་བ་སྔ་ཕྱི་མིན་ན་ཅི་ཡིན་ཞེས་རང་སྣང་མཐོ་དྲག་རྒྱུའང་མེད། ཇི་སྲིད་མཐོང་ཐག་མ་ཆོད་པ་དེ་སྲིད་དུ་བློ་གཟུ་བོར་གནས་པས་ཞིབ་འཇུག་བྱས་ཏེ་བསྡད་ན། ནམ་ཞིག་བདེན་རྫུན་ཕུ་ཐག་ཆོད་དུས་འཚེར་སྣང་མེད་པར་ཁས་ལེན་བྱ་ཆོག་པ་ཡིན་ནོ། །
མཐོ་རིས་དང་ངན་སོང་གི་སྡེ་ལོགས་སུ་ཡོད་མེད་གླེང་ཟིན་ཅིང༌། དེ་དག་གི་རྒྱུ་ལས་འབྲས་ཀྱི་རྣམ་གཞག་ལ། སྲོག་གཅོད་པ་ནས་བཟུང་སྟེ་ལོག་པར་ལྟ་བའི་བར་གྱི་མི་དགེ་བའི་ལས་ལམ་བཅུ་པོ་དེ་ཆེན་པོས་དམྱལ་བ་དང༌། འབྲིང་གིས་ཡི་དྭགས། ཆུང་ངུས་དུད་འགྲོའི་སྐྱེ་གནས་སུ་ལྟུང་བ་དང༌། དེ་ལས་ལྡོག་སྟེ་གཞན་གྱི་སྲོག་བསྐྱབས་པ་སོགས་དགེ་བ་བཅུ་ལ་བརྟེན་ནས་བདེ་འགྲོ་ལྷ་མིའི་ལུས་སུ་སྐྱེ་ངེས་ཞེས་མངོན་པའི་གཞུང་ནས་བཤད་ཡོད། དེ་འདྲའི་འཐོབ་བྱ་དང་ཐོབ་བྱེད་ཀྱི་འབྲེལ་བ་དེ་དངོས་སྟོབས་ཀྱི་རིགས་པས་མི་འགྲུབ་པའི་ཕྱིར་ན་ཡིད་ཆེས་པའི་ལུང་ལ་བརྟེན་དགོས་ཤིང༌། ལུང་གང་ཞིག་ཡིད་ཆེས་པའི་གནས་སུ་འཛིན་འོས་མིན་ནི་དཔྱད་གསུམ་གྱིས་དག་དང་མ་དག་ལ་འཇོག་དགོས་ཞེས་ཚད་གཞུང་དུ་བཤད་འདུག །དཔྱད་གསུམ་གྱིས་དག་པའི་ཚུལ་ལ་མཁས་པ་སོ་སོའི་འདོད་ཚུལ་ཤིན་ཏུ་མང་ཞིང༌། མཁས་གྲུབ་དགེ་ལེགས་དཔལ་བཟང་སོགས་མཁས་པ་ཁ་ཅིག་གིས། དཔེ་ཆ་རེ་རེའི་ནང་དུ་འགྲེལ་བཤད་མི་འདྲ་བ་རེ་རེ་བསྐྱོན་བཞིན་འདུག་པ་ལ་བལྟས་ན་ཁོང་རྣམ་ཚོ་ལ་ཡང་ཏིག་ཏིག་ཅིག་མེད་པ་འདྲ། མངོན་གྱུར་བསྟན་པ་མངོན་སུམ་དང་མི་འགལ། ལྐོག་གྱུར་བསྟན་པ་རྗེས་དཔག་དང་མི་འགལ། ཤིན་ལྐོག་བསྟན་པ་རང་ཚིག་སྔ་ཕྱི་དང་བརྗོད་བྱ་དངོས་ཤུགས་མི་འགལ། ཞེས་སོགས་བཤད་ཡམས་ཅི་འདྲ་བྱས་ཀྱང་དོན་དུ་ནི་ནམ་རྒྱུན་རྫུན་བཤད་པ་མཐོང་ཐོས་མེད་ཅིང༌། ད་རེས་ཀྱི་སྐད་ཆ་གོང་འོག་ལྷུ་ཐུག་པ་ཞིག་བྱུང་སོང་ན་ཆ་འཇོག་བྱ་དགོས་ཞེས་པ་དེ་ཙམ་ཞིག་ཡིན་པར་སྣང་སྟེ། དེ་ལྟར་ན་འཇིག་རྟེན་གྱི་རྒན་པོ་ཡ་རབས་ཤིག་གི་སྐད་ཆ་ལས་ལྷག་པའི་ཁྱད་ཆོས་ཅི་ཡང་མི་འདུག་པས་ལུང་ཚད་མ་ཟེར་ཡང་དེ་ག་ཙམ་རེད། རྟོགས་དཀའ་བ་ངེས་ལེགས་ལ་མི་བསླུ་བར་རིགས་པས་གྲུབ་ན་སླ་བ་མངོན་མཐོ་ལ་མི་བསླུ་བར་ཡིད་ཆེས་བྱེད་ཆོག་ཟེར་ཡང༌། དཀའ་སླའི་ངེས་པ་དེ་ག་རང་ཡང་བསྒྲུབ་བྱ་ལས་སྒྲུབ་བྱེད་མིན་པས་ཕན་ག་ལ་ཐོགས། ཁ་ཅིག་གིས། ལས་འབྲས་ཞེས་པ་དེ་ངལ་རྩོལ་ཅན་གྱི་མི་ལ་གྲུབ་འབྲས་ཐོབ་པ་དང༌། ནག་ཉེས་བསགས་པའི་མི་ལ་ཁྲིམས་ཆད་ཕོག་པའི་ངེས་པ་འདི་ཙམ་ལ་ཟེར་བ་ཡིན་གྱི། གཞན་རྭ་ཟིང་ངེ་བའི་རྒྱུ་འབྲས་ཤིག་ང་ཚོས་ཀྱང་འདོད་ཀྱིན་མེད། འདི་ཁས་མི་ལེན་ན་ཁྱོད་རང་མགོ་རྒྱལ་བ་ཡིན་ཞེས་སྒམ་མདོག་དང་བཅས་སྨྲས་འདུག །དེ་ལྟར་ན་མར་ཁེ་སི་དང་མའོ་ཙེ་ཏུང་ལྟ་བུ་ཡང་ལས་འབྲས་སྨྲ་བ་ཡིན་པར་འགྱུར་བས་ད་ནི་སུ་ལ་ཡང་རྩོད་པ་བརྒྱབ་དགོས་མི་འདུག་གོ །དེས་ན་ལས་འབྲས་ཡོད་དང་མེད་ཅེས་རྩོད་པ་དེ་རྒྱལ་ཁབ་ཀྱི་རྩ་ཁྲིམས་ལྟར་ལྕི་ཡང་མི་ཡིས་གཏན་ལ་ཕབ་པ་མིན་པ་ཞིག་དང༌། ས་སྨྱུག་གི་འབྲེལ་བ་ལྟར་ངོ་བོ་ཐད་ཀར་མཐོང་བར་མི་ནུས་པའི་མི་མངོན་པའི་སྟོབས་ཤུགས་ཤིག་གཞི་གྲུབ་མིན་དཔྱོད་པ་ཡིན་གྱི། འཇིག་རྟེན་ཐོག་ཏུ་རྒྱུ་འབྲས་ཀྱི་རྣམ་གཞག་མེད་ཅེས་འདི་ན་རྩོད་མཁན་སུ་ཡང་མི་འདུག་པས་དོན་མེད་ཁ་རླངས་ཕུད་ནས་ཅི་ཞིག་བྱེད། མཐོང་རྒྱུ་རིག་རྒྱུ་མེད་པའི་འབྲེལ་བ་རྙོག་འཛིང་ཅན་དེ་འདྲ་ཞིག་ང་ཚོའི་མགོ་ཐོག་ཏུ་ཡོད་པའི་ཤེས་བྱེད་ནི་ཅུང་ཙམ་ཡང་འགོད་ནུས་མེད། མེད་པའི་དབང་གིས་ལས་འབྲས་སྨྲ་བ་ཚོས་ཀྱང་ལུང་ལ་སྐྱབས་བཅོལ་ཞུ་དགོས་ཐུག་པ་རེད། ལུང་ལ་སྐྱབས་བཅོལ་ཞུ་མིན་ནི་རྨོངས་དད་བྱེད་མིན་ལ་ཐུག་ཡོད། ལས་འབྲས་མེད་ཟེར་མཁན་ཚོས་མ་མཐོང་བའི་ཕྱིར་མེད་ཟེར་བ་ཡིན་པའི་དབང་དུ་བཏང་ན། ཡོད་ཟེར་མཁན་ཚོས་ཡོད་པར་གསུངས་པའི་ཕྱིར་ཡོད་ཅེས་ཟེར་བ་ཡིན། མ་མཐོང་བའི་ཕྱིར་མེད་ཟེར་ན་གཅིག་ཏུ་ཁྲེལ་བའི་རྒྱུ་རུ་མ་ངེས་ཏེ། རི་བོང་གི་མགོ་ལ་ཐུག་རྒྱུ་རིག་རྒྱུ་ཅན་ཞིག་མ་མཐོང་བའི་རྒྱུ་མཚན་གྱིས་དེར་རྭ་མེད་ཟེར་བ་མ་གཏོགས་དེ་ལྷག་གི་གནས་ལུགས་ཤིག་སུ་ལ་ཡང་འཆད་རྒྱུ་མེད་པའི་ཕྱིར། ཡོད་གསུངས་པ་ཙམ་གྱིས་ཡོད་པར་ཁས་ལེན་དགོས་པ་འདི་ཅུང་ཟད་ངོ་མཚར་ཆེ་སྟེ། གསུང་མཁན་དེ་ཉག་སྐེད་བུ་ལོང་མ་ལྟར་བཙན་དྲག་ཆེ་བ་ལ་ཚོད་ཅིག་མི་འདུག་པས་སོ། །ཅུང་ཟད་ཞིབ་ཏུ་འཆད་ན་ལས་ཀྱི་འབྲས་བུ་ལ་རྣམ་སྨིན་དང༌། རྒྱུ་མཐུན། བདག་པོའི་འབྲས་བུ་བཅས་གསུམ་གསུངས་ཡོད། རྣམ་སྨིན་གྱི་འབྲས་བུ་ཞེས་པ་དེ་ཚེ་སྔ་མར་དགེ་བ་བསྒྲུབས་ན་ཚེ་ཕྱི་མར་ལྷ་ཡུལ་དུ་སྐྱེ་འགྲོ་བ་དང༌། ཚེ་སྔ་མར་སྡིག་པ་བསགས་ན་ཚེ་ཕྱི་མར་དམྱལ་བར་ལྷུང་འགྲོ་བའི་ངང་ཚུལ་འདི་ལ་ཟེར། རྒྱུ་མཐུན་ལ་གཉིས་ལས། མྱོང་བ་རྒྱུ་མཐུན་ནི། ཚེ་སྔ་མར་སྦྱིན་པ་བཏང་ན་ཕྱི་མར་ཕྱུག་པོར་ཆགས་ངེས་པ་དང༌། ཚེ་སྔ་མར་རྐུ་མ་བརྐུས་ན་ཕྱི་མར་དབུལ་པོར་འགྱུར་འགྲོ་བའི་ཚུལ་ལུགས་འདི་ལ་ཟེར། ནམ་རྒྱུན་ལས་དག་དང་མ་དག་ཟེར་བ་དང༌། འདི་དང་དེའི་རྣམ་སྨིན་ཞེས་མང་མང་གིས་གླེང་བ་ཕལ་མོ་ཆེ་རྣམ་སྨིན་དང་མྱོང་བ་རྒྱུ་མཐུན་གྱི་འབྲས་བུའི་ཆ་ནས་ཡིན་པར་སྣང༌། འདི་གཉིས་ལ་ལུང་ཁོ་ན་ལས་རིགས་པའི་སྒྲུབ་བྱེད་ཅི་ཡང་འགོད་རྒྱུ་མེད། བྱེད་པ་རྒྱུ་མཐུན་ནི་ཚེ་སྔ་མར་སྲོག་གཅོད་བྱེད་མཁན་དེ་ཚེ་བརྗེས་ན་ཡང་སྲོག་གཅོད་ལ་དགའ་མཁན་ཞིག་ཏུ་འགྱུར་སྲིད་ཟེར། ས་སྐྱ་པཎ་ཆེན་གྱིས། །རིགས་པ་ནངས་པར་འཆི་ཡང་བསླབས། །ཚེ་འདིར་མཁས་པར་མ་གྱུར་ཀྱང༌། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་དང་མཚུངས། །ཞེས་གསུངས་པ་ལྟར་གལ་སྲིད་ཚེ་སྔ་ཕྱི་ཞེས་པ་ཞིག་ཡོད་པའི་དབང་དུ་བཏང་ན་འདི་ལ་གནས་ལུགས་ཅུང་ཟད་ཡོད་འོས་པ་ཙམ་ཡིན། འོན་ཀྱང་དེང་གི་བྱིས་པ་འདི་དག་གི་གནས་བབ་ཡོད་ཚད་ཁོར་ཡུག་དང་སློབ་གསོ་ལ་རག་ལས་འདུག་པ་མཐོང་དུས་འདི་ལ་ཡང་ཐེ་ཚོམ་སྐྱེ་འོང་བར་འདུག །སྐྱེ་བ་སྔ་མའི་གནས་ཡུལ་ཙམ་ཡང་དྲན་རྒྱུ་མེད་པར་ནག་ཐོམ་མེར་ཆགས་ཚར་འདུག་པས། སྔོན་མའི་དགའ་ཁ་ཁྱེར་ཕྱོགས་ད་དུང་མ་ཉམས་པར་བསྡད་ཡོད་ཟེར་ན་ཁག་པོ་ལོས་ཡིན། བདག་པོའི་འབྲས་བུ་ཞེས་པ་ནི་མི་ཡིས་བསོད་ནམས་བསགས་ན་ཡུལ་ལ་གཡང་འཁོར་ཞིང༌། མི་ཡིས་ཚོགས་ངན་བསགས་ན་ཡུལ་གྱི་བཅུད་འཛད་འགྲོ། ཞེས་པ་སྟེ་སྣོད་བཅུད་དབྱེར་མེད་ཀྱི་ལྟ་ཚུལ་རྙིང་པ་ཞིག་ཡིན་པར་སྣང༌། འཁོར་བ་ཐོག་མེད་དུ་འདོད་པ་དང༌། དགེ་སྡིག་སྤང་བླང་སྨྲ་བ་འདི་ལ་ནང་འགལ་ཞིག་ཀྱང་འདུག་སྟེ། ཐོག་མེད་ནས་བསགས་པའི་ལས་ལ་འཛད་པའི་མཐའ་མི་དམིགས་ན་ད་གསར་དུ་དགེ་བ་མ་བྱས་ཀྱང་ཉུང་དུ་འགྲོ་རྒྱུ་དང༌། སྡིག་པ་བསགས་ཀྱང་མང་དུ་འགྲོ་རྒྱུ་མེད་པའི་ཕྱིར་དགེ་སྡིག་འདོར་ལེན་བྱེད་པ་ལ་དགོས་ནུས་ལྷག་པོ་ཅི་ཞིག་ཡོད། ལས་འབྲས་སྤྱི་ཡི་རྣམ་གཞག་ལ་བགྲོ་གླེང་དེ་ཙམ་གྱིས་ཆོག་པར་བྱ་ཡང༌། ལོག་ལྟ་ཟེར་བའི་མ་འདྲ་འདྲ་ཞིག་འདུག་པ་འདི་ལ་ནི་དམིགས་བསལ་གྱིས་ཅུང་ཟད་ཅིག་མ་ཞུས་ན་མི་བཟོད་པ་ཞིག་རེད། རང་རེའི་ཁྲིད་གཞུང་རྣམས་སུ། མི་དགེ་བཅུ་ལས་ལོག་ལྟ་ལྕི། ཞེས་གསུངས་ཡོད་ལ་དེའི་དོན་ཚེ་སྔ་ཕྱི་དང་ལས་རྒྱུ་འབྲས་ཟེར་བ་འདི་ཚོ་ཟེར་ཚོད་ཙམ་ལས་བདེན་རྒྱུ་རང་དག་མ་རེད་སྙམ་པའི་བསམ་བློ་སྐད་ཅིག་མ་ཅིག་སྐྱེས་ན། དེ་མ་ཐག་ཏུ་ཚེ་ཚེ་རབས་རབས་སུ་བསགས་ཚད་བསྒྲུབས་ཚད་ཐམས་ཅད་འོ་ཟོ་ཁ་སྦུབས་པ་ལྟར་ནག་གོར་རེར་འགྱུར་འགྲོ་བ་ཡིན་ཟེར། དེ་ལྟར་ན་མི་དགེ་བཅུ་དག་ཕར་བཞག་སྟེ་མཚམས་མེད་ལྔ་ལས་ཀྱང་རབ་ཅིག་ལྕི་ཚོད་རེད། ལས་བྱས་པ་ཆུད་མི་ཟ། མ་བྱས་པ་དང་མི་འཕྲད། དཀར་ནག་འཆོལ་ནས་མི་སྨིན་སོགས་དྲང་བདེན་ཚུལ་མཐུན་གྱི་སྐད་ཆ་དེ་ཚོ་ཡོད་ཚད་ལོག་ལྟ་འདིས་གྱུར་མིད་བཏང་ཚར་བཞག །ཤུགས་མ་ཐུབ་ཀྱི་བསམ་བློ་གཏོང་སྟངས་ཏོག་ཙམ་འགྲིག་མིན་བྱུང་ཚེ་ལམ་སེང་ཁ་རྗེ་དབང་ཐང་ཡོད་ཚད་གཞུང་བཞེས་བཟོ་འགྲོ་མཁན་ཞིག་གིས་ད་དུང་གནས་ལུགས་དང་རྒྱུ་འབྲས་གླེང་འོང་ན་ཚིག་པ་མི་ཟའམ། ལས་འབྲས་མེད་སྙམ་པ་ཙམ་གྱིས་དགེ་རྩ་ཆད་འགྲོ་ན་ལས་འབྲས་ཡོད་སྙམ་པ་ཙམ་གྱིས་སྡིག་རྩ་ཆད་མི་འགྲོ་བ་ཅི་ཡིན་ནམ། སྡིག་པ་ཁོ་ན་ལ་འདི་ཙམ་གྱི་ཁ་ངོ་སྟེར་གནང་བའི་སྟོན་པ་སངས་རྒྱས་ཁོང་གལ་སྲིད་ཞལ་བཞུགས་ཡོད་པའི་དབང་དུ་བཏང་ན། ད་རེས་དྲང་ཚུགས་ཟིན་མ་བྱུང་ཞེས་ངོ་རྒོལ་རྔམ་སྟོན་བྱ་དགོས་ངེས་རེད་འདུག་གོ །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གཞན་དུ་མིན། ཞེས་པའི་ལུང་འདི་ཁ་ཤ་ལ་བཏགས་ནས་འགྲོ་འདུག་མཁན་དེ་ཚོས་ཐུགས་བསམ་དྲང་མོ་རེ་བཞེས་དང༌། གཟི་བརྗིད་ཁོག་སྟོང་ཞིག་མ་གཏོགས་དོན་དངོས་སུ་ཁོང་གིས་ང་ཚོར་བསམ་བློའི་རང་དབང་སྤྲད་འདུག་གམ། ཁོར་ཡུག་གི་གནས་བབ་ཉ་རྫའི་ནང་གི་ཉ་ལས་ཀྱང་སྐྱོ་བཞིན་དུ་ད་དུང་ང་ཚོར་ཞེད་པོ་ཞིག་ཡོད་ཅེས་དགའ་ཀྲོག་ཀྲོག་ཏུ་འདུག་དགོས་སམ། བརྟག་དཔྱད་དང་ཉམས་ཞིབ་ཡོངས་རྫོགས་ཡག་ས་བཟང་ས་ཁོ་ན་ནས་བྱེད་དགོས་པ་ལས། སྐྱོན་དང་དྲི་མའི་སྐོར་དྲན་ཙམ་ཡང་མི་ཆོག་པའི་ལུགས་ཤིག་ལ་བསམ་བློའི་རང་དབང་ཟེར་རུང་ངམ། ང་ཚོ་ལ་ཚེ་སྔ་ཕྱི་དང་ལས་རྒྱུ་འབྲས་མེད་ན་དགའ་རྒྱུ་དང༌། ཡོད་ན་སྡུག་རྒྱུ་ཅུང་ཙམ་ཡང་མེད་མོད། ཉེས་པ་ཁབ་ཙམ་མ་བསགས་ཀྱང་ཆད་པ་རི་ཙམ་རེ་གཅོད་འོང་ན་ང་ཚོས་མགོ་བོ་སྒུར་མི་ཐུབ། དེ་བས་བདག་ལེགས་སུ་འདོད་པའི་མི་ཚོས་ཉི་མ་དེ་རིང་ནས་འོས་ལངས་བྱས་ཏེ། དགེ་རྩ་ཁྱུ་གསོད་བྱེད་མཁན་གྱི་ལོག་ལྟ་འདི་ལས་གྲལ་ནས་ཕྱིར་འབུད་གཏང་རྗེས། འདྲ་མཉམ་གཉིས་ཕན་གྱི་ཁྲིམས་ལུགས་གསར་པ་ཞིག་གཏན་ལ་མི་འབེབས་ཀ་མེད་རེད་འདུག་གོ །སྟོན་པ་ཚད་སྒྲུབ་ཀྱི་སྐབས་སུ། །མི་ཤེས་སྟོན་པར་བྱེད་པ་ལ། །འཁྲུལ་པར་དོགས་པ་ཅན་རྣམས་ཀྱིས། །དེས་བཤད་ནན་ཏན་བྱ་བའི་ཕྱིར། །ཤེས་ལྡན་འགའ་ཞིག་འཚོལ་བར་བྱེད། །ཅེས་སྟོན་པ་ཚད་མར་སྒྲུབ་པའི་དགོས་པ་ནི་བསྟན་པ་མ་ནོར་བ་ཞིག་དང་མཇལ་བའི་ཆེད་ཡིན་གསུངས། འོན་ཀྱང་དངོས་གཞིའི་སྐབས་སུ་དེ་ལས་ལྡོག་སྟེ། བསྟན་པ་བདེན་བཞིའི་གནས་ལུགས་མ་འཁྲུལ་བ་སྔོན་དུ་བསྒྲུབས་ཟིན་རྗེས་གཞི་ནས་སྟོན་པ་ཚད་མའི་སྐྱེས་བུ་རུ་ཐག་གཅོད་གནང་འདུག །དགེ་ཆོས་ལགས་ཀྱིས། །རིགས་པའི་དཔྱད་པ་ཤིང་རྟའི་སྲོལ་ལ་བརྟེན། །ཤིང་རྟ་ཆེན་པོ་རིགས་པའི་སྟོབས་ཀྱིས་བསྒྲུབས། །རང་ཐག་ཆོད་ན་སུ་ཡི་རྗེས་སུ་འབྲང༌། །རང་ཐག་མ་ཆོད་སུ་ལ་ཡིད་རྟོན་བྱེད། །ཡང་དག་རིགས་པ་ངེས་དོན་ལུང་ལས་རྙེད། །དྲང་ངེས་ཁྱད་པར་དྲི་མེད་རིགས་པས་འབྱེད། །རིགས་པས་ཤེས་ན་ངེས་དོན་ཅི་ལ་འཚོལ། །རིགས་པས་མ་ཤེས་ངེས་དོན་ག་ལ་རྙེད། །ཅེས་ཕན་ཚུན་གཅིག་གི་དཔང་པོ་གཅིག་གིས་ཡོང་ཐབས་མེད་པར་གསུངས་པ་འདི་ཤིན་ཏུ་བདེན་ཏེ། བསྟན་པ་རྣམ་དག་ཏུ་ཐག་མ་ཆོད་པ་དེ་སྲིད་དུ་སྟོན་པ་ཚད་མ་ཞིག་རྙེད་མི་སྲིད་ཅིང༌། བསྟན་པ་རྣམ་དག་ཏུ་ཐག་ཆོད་ཚར་དུས་སྟོན་པ་ཚད་མ་འཚོལ་མི་དགོས་པའི་ཕྱིར་རོ། །སྐྱོན་ཆ་གཏན་ནས་མེད་པའི་དགེ་རྒན་ཞིག་དང༌། ནོར་འཁྲུལ་ཡེ་ནས་མེད་པའི་རིག་གཞུང་ཞིག་རྙེད་ན་དག་མི་འདོད་མཁན་སུ་ཞིག་ཡོད་ཀྱང༌། སྐྱོན་ཡོན་འདྲེས་མར་གནས་པ་འདི་དངོས་པོ་ཀུན་གྱི་གཤིས་ལུགས་ཡིན་འདུག་པས་ཐབས་དང་བཀོད་པ་ཐོན་དཀའ་རྒྱུ་རེད་སྙམ། བདེན་བཞིའི་རྣམ་གཞག་གི་ཐད་དུ། བདག་མེད་རྟོགས་པའི་ཤེས་རབ་ཟེར་བ་འདི་ལ་བློ་རྩེ་གཏད་ས་ཅི་ཡང་མེད་པའི་ཚུལ་དབུ་མའི་སྐབས་སུ་བཤད་ཟིན། འཁོར་བ་བདེན་མེད་དུ་རྟོགས་ན་འཁོར་བ་དོན་གཉེར་གྱི་བློ་སྤོང་འགྲོ་ཟེར་བ་འདིའང་ཡོངས་སུ་འཁྲུལ་པ་ཡིན་ཏེ། དེ་ལྟར་ན་མྱང་འདས་བདེན་མེད་དུ་རྟོགས་ཚེ་མྱང་འདས་དོན་གཉེར་གྱི་བློའང་ཅིའི་ཕྱིར་སྤོང་མི་འགྲོ་སྟེ་རྒྱུ་མཚན་མཚུངས་པ་ལ་ཟློག་ཏུ་མེད་པའི་ཕྱིར་རོ། །ད་དུང་སེམས་ཀྱི་རང་བཞིན་ནི་འོད་གསལ་བ་ཞིག་ཡིན་ཚུལ་དང༌། དྲི་མ་རྣམས་ནི་གློ་བུར་བ་ཞིག་ཡིན་ཚུལ་སོགས་འཐད་པ་མེད་པའི་རྣམ་གཞག་མང་དུ་འདུག་མོད༌། སྙིང་གི་དཀྱིལ་དུ་སྔར་ནས་བསྣུན་ཟིན་པ་ཡིན་པས་ད་ཡན་ལག་རེ་རེ་བཞིན་དུ་གསོད་པའི་ངལ་བ་བསྟེན་མ་འདོད་དོ། །
བཞི། འདུལ་སྔགས་ལུགས་ཀྱི་སྡོམ་དང་དམ་ཚིག་གི་རྣམ་གཞག་ལ་དཔྱད་པ།
སངས་རྒྱས་ཆོས་ལུགས་ནི་གནའ་རབས་རྒྱ་གར་གྱི་སྤྱི་ཚོགས་ཁྲོད་ནས་མགོ་འབུས་ཤིང༌། བྲམ་ཟེའི་ཆོས་ལུགས་ཀྱི་འོག་ནས་ལག་ཆགས་པ་ཞིག་ཡིན་སྟབས། ཆོས་འདུལ་བའི་ལུགས་ཀྱི་བཅའ་ཁྲིམས་ཀྱི་ནང་དུ་ཡང་སྐབས་དེའི་རྒྱ་གར་བའི་ཡུལ་ཆོས་དང༌། བྲམ་ཟེའི་ཆོས་ཀྱི་ཆོ་ག་མང་པོ་འདྲེས་ཡོད་པ་སྨོས་ཅི་དགོས་ཏེ། ཆེ་ས་ནས་བཤད་ན་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་ངང་ཚུལ་འདི་ཡང་ཕྱི་རོལ་མུ་སྟེགས་པའི་ལུགས་སྲོལ་ཡིན་པ་ལྟ་བུ་རེད། སྟོན་པ་སངས་རྒྱས་རང་ཉིད་ཀྱང་ཐོག་མར་མུ་སྟེགས་པའི་རབ་བྱུང་ཚོར་མིག་དཔེར་བལྟས་ཏེ་ཆ་ལུགས་བསྒྱུར་བ་ཞིག་ཡིན་ལ། ཕྱིས་སུ་ལྟ་བའི་ཐད་ནས་ཏོག་ཙམ་མ་མཐུན་པས་ཟུར་དུ་དོན་དགོས་བྱུང་ཡང་རྟགས་དང་ཆ་ལུགས་གསར་བརྗེ་གནང་མེད་པར་མ་ཟད། ཉིད་ཀྱི་རྗེས་འབྲང་ཚོར་ཡང་མུ་མཐུད་ཆ་ལུགས་དེ་ཉིད་རྒྱུན་འཛིན་བྱེད་དུ་བཅུག་པ་རེད། ཐོག་མའི་ཆར་རབ་ཏུ་བྱུང་བའི་ཚད་དེ་སྐྲ་བྲེགས་ཤིང་གོས་བརྗེས་ཏེ་ཁྱིམ་ཚང་དང་ཁ་བྲལ་ནས་སྡོད་པ་དེ་ཙམ་ཞིག་མ་གཏོགས། དེང་སང་ནང་བཞིན་སྡོམ་པ་ལེན་པའི་ཆོ་ག་དང༌། གཏོང་བའི་ས་མཚམས་སོགས་རྙོག་འཛིང་ཆེན་པོ་འདི་འདྲ་མེད། རིམ་བཞིན་དགེ་སློང་བཟང་སྦྱིན་གྱིས་དགེ་སྦྱོང་གི་ཆ་ལུགས་མ་དོར་བཞིན་དུ་མི་ཚངས་པར་སྤྱད་པ་དང༌། རྫ་མཁན་ནོར་ཅན་གྱིས་རྐུ་མ་བརྐུས་པ། ཉ་པའི་ཁྱེའུ་ལྔ་བརྒྱས་མ་ཡིན་ཡིན་མདོག་གི་རྫུན་གཏམ་པ། དགེ་སློང་མི་སྡུག་པ་སྒོམ་མཁན་ཁ་ཤས་ཀྱིས་རང་སྲོག་རང་གིས་བཅད་པ་སོགས་གནད་དོན་ཛ་དྲག་ཅན་མང་པོ་འཕྲོ་རིམ་འཕྲོར་ཐོན་པ་ན། ད་གཟོད་ཕྱོགས་གཅིག་ནས་སྔོན་འགྲོའི་ཆ་རྐྱེན་དང་ཆོ་གའི་བརྒྱུད་རིམ་མང་པོ་ཞིག་བཟོས་ཏེ་མི་ཅི་མིན་འདི་མིན་དེ་འདྲ་རབ་བྱུང་པའི་གྲལ་དུ་འཚང་རྒྱུ་སྔོན་འགོག་བྱས་པ་དང༌། ཕྱོགས་གཞན་ཞིག་ནས་བཅའ་ཁྲིམས་གསར་པས་རབ་བྱུང་པ་ཚོའི་ཀུན་སྤྱོད་ཀྱི་ཚད་གཞི་གཏན་ལ་ཕབ་པ་རེད། ལས་དོན་དེ་སྐུ་ཚེ་གང་པོར་རྒྱུན་འཁྱོངས་དང༌། འཐུས་སྒོ་ཚང་དུ་བཏང་བའི་མཐར་དགེ་སློང་ཕ་ལ་འདུལ་ཁྲིམས་ཉིས་བརྒྱ་ང་གསུམ་དང༌། དགེ་སློང་མ་ལ་སུམ་བརྒྱ་རེ་བཞི། ཐུན་མོང་གི་ལས་བརྒྱ་རྩ་གཅིག་དང༌། གཞི་བཅུ་བདུན་སོགས་མ་ལག་ཚང་བའི་ལམ་སྲོལ་འདི་ཉིད་ཆགས་ཐུབ་པ་བྱུང༌། གལ་སྲིད་སྟོན་པ་ཁོང་སྐུ་ཚེ་དེ་བས་རིང་བ་ཞིག་བཞུགས་ཡོད་ན། ད་ལྟའི་འདུལ་ཁྲིམས་འདི་དག་ལས་ཁ་ཅིག་རྩིས་མེད་དང༌། ལ་ལ་ཁ་གསབ་སོགས་མུ་མཐུད་བཅོས་བསྒྱུར་གནང་ཡོད་ངེས་རེད། འདིར་ཁོ་བོས་བརྗོད་འདོད་པའི་སྐད་ཆ་ནི། འདུལ་བའི་བཅའ་ཁྲིམས་དེ་སྟོན་པ་ཤཱཀྱ་ཐུབ་པས་དབྱིངས་ཆོད་ཀྱིས་མར་བཀའ་ཕབ་བཞག་པ་ཞིག་མིན་པར། རྒྱལ་ཁབ་ཀྱི་ཁྲིམས་ལུགས་ལྟར་ཐོག་མར་དུས་དང་ཁོར་ཡུག་ངེས་ཅན་ཞིག་གི་ཤུགས་རྐྱེན་འོག་གཏན་འབེབས་གནང་བཞག་པ་ཞིག་ཡིན་པས། ད་དུང་ཡང་དུས་དང་ཁོར་ཡུག་ལ་བསྟུན་ནས་བསྣོན་འཕྲི་སྤོར་བཅོག་བྱེད་ཆོག་པ་ཞིག་མ་གཏོགས། དགེ་མཚན་དང་དོན་སྙིང་ཡོད་མེད་ལ་ལྟོས་པ་མེད་པར་མཐའ་གཅིག་ཏུ་མཛེ་ཕོ་མདུང་བཟུང་བྱེད་མི་དགོས་ཞེས་པ་འདི་ཡིན། དེ་བཞིན་དགེ་ཚུལ་སློང་གི་སྡོམ་པ་ལེན་པའི་ཆོ་ག་དེ་ཡང་བསྟན་པའི་སྒོ་རུ་འཇུག་པའི་དམ་བཅའི་མཛད་སྒོ་ཙམ་ཞིག་ཡིན་གྱི། འབོགས་ཆོག་ལ་བརྟེན་ནས་སྡོམ་པ་ཞེས་པའི་དངོས་པོ་རྡོག་རྡོག་ཅིག་རྒྱུད་ལ་སྐྱེ་འོང་རྒྱུ་དང་འཐོབ་འོང་རྒྱུ་ཅི་ཡང་མེད་ལ། དེ་དང་འགལ་བའི་གནས་ཚུལ་ལྷག་ན་དམ་བཅའ་ཤོར་བ་ཡིན་པས་སྨད་པར་འོས་པའི་གནས་ཙམ་ནི་ལོས་ཡིན་མ་གཏོགས། དངོས་སུ་རྫ་བུམ་བཞིན་དུ་ཆག་འགྲོ་རྒྱུ་དང༌། ཤིང་ལོ་བཞིན་དུ་གྲུག་འགྲོ་རྒྱུ་དེ་འདྲ་གང་ཡང་ཡོད་པ་མ་རེད། སྡོམ་པ་ཤོར་སོང་ན་དམྱལ་བར་ལྷུང་འགྲོ་ཟེར་བ་འདི་ནི་དེ་བས་ཀྱང་དཔྱད་མི་བཟོད་པའི་རྫུན་གཏམ་ཡིན་ཏེ། སྡོམ་པ་གཏན་ནས་བསྲུང་མ་མྱོང་བའི་ཁྱིམ་པ་ཚོ་དམྱལ་བར་ལྷུང་མ་སོང་ན། གྲྭ་ལོག་ཚོས་ཁྱིམ་པ་ལས་སྡུག་པའི་ལས་ཀ་ཅི་ཡང་མ་བྱས་པས་དམྱལ་བར་ཅི་ལ་ལྷུང་འགྲོ། སྡོམ་པ་བསྲུང་ཨེ་ཐུབ་བལྟས་པ་དེར་དགེ་བ་མེད་ཀྱང་སྡིག་པ་ཡོད་མི་དཔེ། འདུལ་བའི་ཆོས་ནི་སངས་རྒྱས་ཉག་གཅིག་ལས། །བྱམས་དང་འཇམ་དབྱངས་སོགས་ལའང་དབང་བ་མིན། ཞེས་སོགས་ཟེར་བ་ནི་གླེན་རྟགས་མཁྲེགས་འཛིན་གྱི་སྐད་ཆ་ལས་མ་འདས། སངས་རྒྱས་འཇིག་རྟེན་བཀོད་པ་པོ་ཡིན་ན་མ་གཏོགས་ཁོང་གཅིག་པུ་ལ་དམིགས་བསལ་གྱི་དབང་ཆ་དེ་འདྲ་ཡོད་དོན་ཅི་ཡང་མེད། རྒྱ་གར་གྱི་འདུལ་ཁྲིམས་དེ་རྒྱ་གར་གྱི་ཡུལ་ཆོས་ལ་བསྟུན་ནས་བཟོས་འདུག་པ་མངོན་སུམ་ཡིན་ན། བོད་ཀྱི་འདུལ་ཁྲིམས་དེ་བོད་ཀྱི་ཡུལ་ཆོས་དང་བསྟུན་ནས་བཟོ་མི་ཆོག་པའི་རྒྱུ་མཚན་ཅི་ཡོད། མ་བྱིན་ལེན་གྱི་ཕམ་པ་དེ་གྲོང་ཁྱེར་རྒྱལ་པོའི་ཁབ་ཀྱི་ཁྲིམས་ལུགས་ལྟར་གཏན་འབེབས་གནང་བ་འདི་ཙམ་ལ་བསམ་ན་ཡང་གོ་རྒྱུ་ཞིག་མི་འདུག་གམ། བཀའ་བརྒྱུད་འབྲི་གུང་ཚང་གི་དམ་ཆོས་དགོངས་པ་གཅིག་པའི་ནང་དུ་ཉམས་ལེན་ཡེ་བཀག་ཡེ་གནང་ཞེས་པ་དང༌། བཅས་པ་སྤྱི་ལ་བཅས་པ་ཞེས་པའི་རྡོ་རྗེའི་གསུང་དུམ་བུ་གཉིས་འཁོད་ཡོད། དེའི་ནང་དོན་ནི་འདི་ལྟར། སྡིག་པ་ཐམས་ཅད་ཡེ་ནས་སྡིག་པ་དང༌། དགེ་བ་ཐམས་ཅད་ཡེ་ནས་དགེ་བ་ཡིན་པ་མ་གཏོགས་དགེ་སྡིག་གི་ངོ་བོ་སངས་རྒྱས་ཀྱིས་གསར་དུ་གཏན་འབེབས་གནང་དགོས་པ་དང་གནང་ཆོག་པ་ཞིག་མིན། དགེ་ཚུལ་སློང་གི་སྡོམ་པ་ཞེས་པ་དེའང་མི་ཁ་ཤས་ཀྱིས་བསྲུང་དགོས་པ་དང༌། ཁ་ཤས་ཀྱིས་མ་བསྲུངས་ཀྱང་ཆོག་པ་ཞིག་མིན་པར་མི་སུ་ཡིན་ནའང་བརྩི་བསྲུང་ཞུ་རྒྱུའི་འགན་དབང་ཆ་ཚང་ཡོད། དཔེར་ན་དགེ་སློང་གིས་གཟན་ཤམ་མ་གྱོན་ན་སྡིག་པ་འཁྲི་འོང་བ་ལྟར་ཁྱིམ་པ་ཕོ་མོ་ཚོས་ཀྱང་གཟན་ཤམ་མ་གྱོན་ན་སྡིག་པ་འདྲ་འདྲ་ཁུར་དགོས་པ་མ་གཏོགས་ཁོ་ཚོ་ལ་དམིགས་བསལ་ཅི་ཡང་མེད། ཆང་འཐུང་བ་དང༌། རྩྭ་གཅོད་པ་སོགས་འདུལ་ཁྲིམས་ཡོད་ཚད་དེའི་ནང་བཞིན་རེད། དེ་ལྟ་མིན་པར་སྔོན་ཆད་ཆང་འཐུང་ན་སྡིག་པ་མེད་པ་ཞིག་ལ། སྟོན་པས་ཆང་འཐུང་མི་ཆོག །ཅེས་བཀའ་ཕབ་མ་ཐག་གཞི་ནས་སྡིག་པ་ཅན་དུ་གྱུར་སོང་བ་ཡིན་ན། སྟོན་པ་སངས་རྒྱས་དགེ་སྡིག་གི་བྱེད་པོར་ཐལ་བ་ཟློག་ཏུ་མེད་ལ། སྟོན་པའི་ཉན་ཐོས་ཚོས་ཆང་དང་བུད་མེད་ལ་སྤྱད་ན་སྡིག་པ་ཡོད་པ་མ་གཏོགས་མི་གཞན་པས་སྤྱད་ན་སྡིག་པ་མེད་པ་ཞིག་ཡིན་ན། སྟོན་པས་རང་གི་སློབ་མ་ཚོར་བསམ་བཞིན་དུ་ཞེ་གནག་བྱས་པར་འགྱུར་ཞིང༌། དེ་ལྟར་ན་སུ་ཞིག་ཉེ་སར་བཅར་ཚེ་དེ་ཉིད་ཕུང་ལ་སྦྱོར་བའི་སྦྲུལ་གདུག་ལྟ་བུའི་སྟོན་པ་ཁོང་ཐུགས་རྗེ་ཅན་ཞིག་ཏུ་ཇི་ལྟར་ན་འགྲུབ། དེ་བས་བཀག་པ་ཐམས་ཅད་ཡེ་བཀག་དང༌། གནང་བ་ཐམས་ཅད་ཡེ་གནང༌། བཅས་པ་ཐམས་ཅད་སྤྱི་སྙོམས་སུ་བཅས་པ་ཡིན་པར་ཁས་ལེན་དགོས་ཞེས་གསུངས། དེ་ལ་ས་སྐྱ་པཎ་ཆེན་གྱིས་སྡོམ་གསུམ་རབ་དབྱེའི་ནང་དུ་དགག་པ་འདི་ལྟར་བཏང་ཡོད། ཉམས་ལེན་ཡེ་བཀག་ཡེ་གནང་ཡིན་ན་ཐེག་དམན་པར་གང་བཀག་ཐེག་ཆེན་པར་བཀག་པ་དང༌། ཐེག་ཆེན་པར་གང་གནང་ཐེག་དམན་པར་ཡང་གནང་འོས་པ་ལ་དེ་ལྟར་མིན་པའི་རྒྱུ་མཚན་ཅི་རེད། བཅས་པ་འགྲོ་བ་སྤྱི་ལ་བཅས་པ་ཡིན་ན། མི་ཡོད་ཚད་གཟན་ཤམ་གྱོན་ནས་སོང་ཞིག་ཅེས་གསུངས་རིགས་པ་ལ། དེ་ལྟར་མ་གསུངས་པར་ཚུལ་ཁྲིམས་འཆལ་བའི་མི་ཚོས་གཟན་ཤམ་གྱོན་བསྡད་ན་གནོད་པ་མ་གཏོགས་ཕན་པ་མེད་ཅེས་གསུངས་དོན་ཅི་ཡིན་ནམ། སངས་རྒྱས་ལོངས་སྤྱོད་རྫོགས་སྐུ་དང༌། བྱང་སེམས་ཉེ་བའི་སྲས་ཆེན་བརྒྱད་སོགས་སྐྱ་ཆས་སྤྲས་ནས་བཞུགས་ཡོད་པས་ཁོ་ཚོས་ཀྱང་གཟན་ཤམ་མ་གྱོན་པའི་སྡིག་པ་དེ་ཁུར་དགོས་པ་ཨེ་རེད། ཉན་ཐོས་ཚོས་ཆང་དང་བུད་མེད་ལ་ལོངས་སྤྱད་ན་སྡིག་པ་ཆེན་པོ་ཡོད་ཀྱང་སྤངས་ཐུབ་ན་དགེ་བ་ཡང་ཆེན་པོ་ཡོད། དེས་ན་སྟོན་པས་རང་གི་སློབ་མ་ཚོར་ཆང་དང་བུད་མེད་བསྟེན་མི་ཆོག་པར་བཟོས་པ་དེས་སློབ་མ་ཚོར་ཕན་པ་མ་གཏོགས་གནོད་པ་མེད། དཔེར་ན་ཞིང་ཁ་ཡོད་ན་སད་དང་སེར་བའི་གནོད་འཚེ་འབྱུང་སྲིད་ཀྱང་སྟོན་ཐོག་གི་རེ་བ་ཡོད་པས་ཞིང་ཁ་གཏན་ནས་མེད་པ་ལས་དྲག་གི་རེད། དེ་བས་མི་དབུལ་པོ་ལ་ས་ཞིང་སྦྱིན་པར་བཏང་ན་དེ་ཉིད་ཕན་བཏགས་པ་ལས་གནོད་བསྐྱལ་བར་བརྩི་མི་རུང༌། ཞེས་སོགས་ལ་བཤད་ལུང་བཤད་མང་པོ་ཞིག་གནང་འདུག །འོན་ཀྱང་དགེ་སྡིག་གི་བྱེད་པོ་སངས་རྒྱས་ཡིན་པར་ཐལ་བའི་རྩ་བའི་རིགས་པ་དེ་ལ་སྐྱོན་སྤོང་ཅུང་ཙམ་ཡང་མ་ཐུབ་པ་ནི་ས་ཞིང་སྦྱིན་པའི་དཔེ་དེ་རང་ལས་ཀྱང་ཤེས་ཐུབ། ཕྱིས་ཀྱི་ས་སྐྱའི་མཁས་པ་ངག་དབང་ཆོས་གྲགས་ཟེར་བ་དེས་ཀྱང༌། འདིའི་ཐད་དུ་འབྲི་གུང་པ་ལ་རིགས་པ་ཏོག་ཙམ་ཡོད། ཅེས་ལན་མ་ཐེབས་པའི་ངོས་ལེན་ཞུ་དགོས་བྱུང་འདུག་པ་ལྟར་རེད། འབྲི་གུང་པའི་ཡེ་བཀག་ཡེ་གནང་དང༌། བཅས་རང་གནད་གཅིག་གི་གྲུབ་མཐའ་དེས་ཀྱང་པཎ་ཆེན་བླ་མའི་རིགས་པ་དེ་ཚོར་ཚུལ་མཐུན་གྱི་ལན་ཐེབས་པའི་རེ་བ་མེད། གལ་སྲིད་སྡོམ་པ་ཞེས་པ་དེ་རང་བྱུང་གི་དགེ་བ་ཞིག་ཡིན་ན་ནི། འབྲི་གུང་ཆོས་རྗེའི་དགོངས་པ་ལྟར་དེའི་གནང་བཀག་གི་དབང་ཆ་སངས་རྒྱས་ལ་ཡོད་དོན་མེད་ཅིང༌། ས་སྐྱ་པའི་བཞེད་པ་ལྟར་སངས་རྒྱས་ཀྱིས་གསར་དུ་བཟོས་བཞག་པ་ཞིག་ཡིན་ན་ནི། འཇིག་རྟེན་པའི་ཁྲིམས་ལྟར་ངོ་བོ་དགེ་སྡིག་གང་ཡང་ཡིན་མི་སྲིད་དོ། །ཐུགས་རིག་རྣོ་ཐག་ཆོད་པས་སྡོམ་པའི་རྣམ་གཞག་ལ་ནང་འགལ་ནི་གསལ་པོར་མཐོང༌། ཐུགས་དད་ཆེ་ཐག་ཆོད་པས་རྣམ་གཞག་འདི་མི་བདེན་ནམ་སྙམ་པའི་ཐུགས་བསམ་ནི་བཞེས་མ་ཕོད། དེའི་དབང་གིས་ས་འབྲིའི་ཆོས་རྗེ་རྣམ་པ་གཉིས་ཀ་ཐུགས་འོ་བརྒྱལ་པོ་བྱུང་འདུག་སྟེ། ཆོས་ལུགས་ཀྱི་རྣམ་གཞག་ཕལ་མོ་ཆེ་ཞིག་དང༌། ཆོས་པ་ཚོའི་རིགས་ལམ་མང་པོ་ཞིག་ལ་ཞིབ་ཏུ་དཔྱད་ན་འདི་འདྲ་ཤ་སྟག་ཏུ་སྣང་ངོ༌། རབ་བྱུང་པའི་ཆས་གོས་གཟན་ཤམ་འདི་ཡང་སངས་རྒྱས་པའི་ཐུན་མིན་གྱི་ཁྱད་ཆོས་ཅི་ཡང་མིན། སྤྱིར་སྟོད་སྨད་སོ་སོར་རས་ཡུག་ལྷེབ་གྱོན་བྱེད་པ་འདི་རྒྱ་གར་བའི་ཡུལ་སྲོལ་དང༌། བྱེ་བྲག་ཏུ་ངུར་སྨྲིག་གི་ཁ་དོག་ནི་མུ་སྟེགས་པའི་རབ་བྱུང་གི་མཚོན་བྱེད་ཙམ་ཡིན། ཕྱིས་སུ་རྒྱལ་པོ་གཟུགས་ཅན་སྙིང་པོའི་དགོངས་འཆར་ལྟར་ཕྱི་རོལ་པ་དང་མི་འདྲ་བའི་ལེའུ་ཞིག་བཅོས་པ་འདི་ཙམ་ཞིག་སངས་རྒྱས་པའི་གསར་གཏོད་རེད། དེས་ན་དུས་གསུམ་གྱི་སངས་རྒྱས་སྤྲུལ་པའི་སྐུ་ཐམས་ཅད་གནའ་དུས་ཀྱི་རྒྱ་གར་བ་ལྟར་ན་བཟའ་སྟོད་གཡོགས་སྨད་གཡོགས་ཅན་རྐྱང་རྐྱང་ཡིན་པ་དང༌། ཐག་རིང་བདེ་བ་ཅན་ན་བཞུགས་པའི་མགོན་པོ་འོད་དཔག་མེད་པ་ཁོང་ཡང་སྐུ་ལ་ཆོས་གོས་རྣམ་གསུམ་གསོལ་ཞིང་སེར་ལྟེམ་མེར་བཞུགས་ཡོད་པ་དང༌། བསྟན་པ་ནུབ་པའི་ཚེ་ན་སྐྲ་ལ་གྲི་མི་འཇུག་ཅིང་གོས་ཀྱིས་ཚོན་མི་ལེན་པར་བཤད་ཅིང་མོས་པ་བཅས་ནི་བཤད་པ་ཙམ་དང་མོས་པ་ཙམ་དུ་ཟད། གཟན་ཤམ་འདི་ཡུལ་གྱི་དབང་དུ་བྱས་ན་ཚ་བའི་ཁུལ་གྱི་ཆ་ལུགས་དང༌། དུས་ཀྱི་དབང་དུ་བྱས་ན་མི་ལོ་སྟོང་ཚོ་ཁ་ཤས་ཡར་སྔོན་གྱི་ཆ་ལུགས་དང༌། རང་བཞིན་གྱི་དབང་དུ་བྱས་ན་རྒྱ་གར་མི་རིགས་ཀྱི་ཆ་ལུགས་ཡིན་པས་དེང་སང་གི་ང་ཚོ་ལ་འཚམ་པོ་ཞིག་ནི་མ་རེད། མདོར་ན་ཆོས་འདུལ་བའི་བཅའ་ཁྲིམས་ཀྱི་ནང་དུ་སྲོག་མི་གཅོད་པ་དང༌། མ་བྱིན་པར་མི་ལེན་པ་སོགས་བསྔགས་པར་འོས་པ་མང་པོ་ཡོད་པ་སྨོས་མེད་ཐོག །མེ་ལ་མི་རེག་པ་དང༌། ཤིང་ལ་མི་འཛེགས་པ་ལྟ་བུ་སྐབས་དེའི་བྲམ་ཟེ་དང་ཁྱིམ་བདག་དག་གི་ངོ་མ་ཆོག་པར་བཅས་པ་ཙམ་ལས་དོན་དངོས་སུ་དགོས་པ་དང་རྒྱུ་མཚན་དེ་ཙམ་མེད་པའང་མང་པོ་ཡོད། ལྷག་པར་དུ་ཚངས་སྤྱོད་ཀྱི་སྡོམ་ཁྲིམས་འདི་མིའི་རང་གཤིས་དང་རྩ་བ་ཉིད་ནས་མི་མཐུན་ཞིང༌། རང་དབང་གིས་རྙེད་པའི་འདོད་བདེ་ཙམ་ལ་ནི་ངོ་བོའི་ཆ་ནས་ཉེས་པ་ཅི་ཡང་བརྩི་རྒྱུ་མེད་པས། དངོས་གནས་བྱས་ན་འདིའི་ཚབ་ཏུ་ཤ་མི་ཟ་བ་ལྟ་བུ་ཞིག་བྱས་བཞག་ན་བསྲུང་སླ་ཞིང་ཕན་ཐོགས་མིག་མཐོང་ལག་ཟིན་ཡིན་པས་དགེ་མཚན་ཆེ་བར་སྣང་མོད་མ་བྱུང་བར་འདུག་གོ །ཚངས་སྤྱོད་ཀྱི་དགོས་པ་མཐར་ཐུག་ནི་ཆོས་བསྒྲུབ་པ་ལ་སྟབས་བདེ་དང༌། སེམས་ཤུགས་བསྐྲུན་རྒྱུ་དེ་ཁོ་ན་ཡིན་པས་རང་དོན་དུ་འདོད་ཆུང་ཆོག་ཤེས་དང༌། སྤྱི་པའི་རྩ་དོན་ལ་ཐུག་དུས་ཁྱིམ་པ་རྣམས་དང་མི་འདྲ་བའི་གཏོང་ཕོད་ཅན་ཞིག་དང། གདོང་མཆོང་བྱེད་ནུས་མཁན་ཞིག་ཡིན་ན་ཚངས་པར་སྤྱད་པ་ལ་དོན་པོ་བྱུང་བ་ཡིན། དེ་མིན་མོ་སྡོམ་བསྲུང་བའི་ཡུས་ཆེ་ཙམ་ལས་བཟང་སྤྱོད་ཀྱི་ཁྱད་པར་གཞན་གང་ཡང་བསྟན་རྒྱུ་མེད་པའི་གྲྭ་བཙུན་སྐུ་ཞབས་རྣམ་པ་ནི། རྒྱ་ནག་གོང་མ་ཆེན་མོའི་ཕོ་བྲང་ནང་མའི་བཙུན་མོ་སྲུང་མཁན་གྱི་ཉུག་རུམ་པ་ཟེར་བའི་སྐྱེས་པ་ལས་ངན་དེ་ཚོ་དང་འདྲ་བས་སྙིང་པོ་ཅི་ཞིག་ཡོད། འོན་ཀྱང་དེ་དག་ནི་གཞན་པས་བཙན་པོ་དབང་ཡོད་བྱས་ཏེ་འབྲས་བུ་ཕྱུངས་པ་ཡིན་པས་སྙིང་རྗེ་བར་འོས་ལ། འདི་ནི་དོན་མེད་རང་སྡུག་རང་གིས་ཉོས་པ་ཡིན་པས་ཡི་མུག་པའི་གནས་སོ། །
གསང་སྔགས་རྡོ་རྗེ་ཐེག་པ་ལ་ཐེག་པ་གཞན་དང་ཐུན་མོང་མ་ཡིན་པའི་ཁྱད་ཆོས་མང་པོ་ཡོད་པ་སྨོས་མ་དགོས་མོད། ཆེས་མངོན་གསལ་དོད་ཤོས་ཤིག་ནི་དགེ་སྡིག་དང་རྒྱུ་འབྲས་ཀྱི་འགྲོ་ལུགས་གང་ཡང་བརྒྱུད་མི་དགོས་པར་གནད་དོན་ཡོད་ཚད་བླ་མའི་བྱིན་རླབས་ལ་བརྟེན་ནས་ཐག་གཅོད་བྱེད་ཆོག་པ་འདི་རེད། དེ་ཡང་ང་ཚོས་ཤེས་གསལ་ལྟར་གསང་སྔགས་ལུགས་ལ་བླ་མ་རྣམ་པར་དམིགས་བསལ་གྱི་གོ་ཐོབ་ཆེན་པོ་ཞིག་ཡོད་དེ། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། ཞེས་བླ་མ་རྣམ་པ་དཀོན་མཆོག་གསོན་པོ་ཡིན་པ་མ་ཟད། ཀུན་གྱི་བྱེད་པོ་བླ་མ་ཡིན། ཞེས་བླ་མ་རྣམ་པ་ནི་མིང་དོན་མཚུངས་པའི་བྱེད་པོ་ཞིག་ཀྱང་རེད། མདོ་ལུགས་ལ། ངས་ནི་ཁྱོད་ལ་ཐར་པའི་ཐབས་བསྟན་གྱི། །ཐར་པ་རང་ལ་རག་ལས་ཤེས་པར་གྱིས། ཞེས་དང༌། །ཐུབ་རྣམས་སྡིག་པ་ཆུ་ཡིས་མི་འཁྲུད་ཅིང༌། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཡང༌། །ཆོས་ཉིད་ཞི་བ་བསྟན་པས་གྲོལ་བར་འགྱུར། །ཞེས་སོགས་ཡིད་དུ་འོང་བའི་རྣམ་གཞག་འགའ་ཞིག་ཡོད་མོད། གསང་སྔགས་ཀྱིས་དེ་དག་ཡོད་ཚད་རྩིས་མེད་དུ་བཏང་བཞག་ཡོད། གསང་སྔགས་ལུགས་ལ་བླ་མ་ནི་ཐར་ལམ་སྟོན་པ་པོ་མིན་པར་ཐར་པ་སྟེར་བ་པོ་དང༌། སློབ་མ་ནི་ཐར་ལམ་སྒྲུབ་པ་པོ་མིན་པར་ཐར་པ་སློང་བ་པོ་རེད། དེའི་རྒྱུ་མཚན་གསང་སྔགས་ལུགས་ལ་བླ་མའི་གནང་བ་མ་ཐོབ་ན་སློབ་མ་ལ་ཉམས་ལེན་གྱི་ཐོབ་ཐང་མེད་ཅིང༌། བླ་མའི་གནང་བ་ཐོབ་ན་སློབ་མ་ལ་ཉམས་རྟོགས་ཀྱི་ཆར་པ་འབད་མེད་ལྷུན་འགྲུབ་ཏུ་འབབ་ཡོང་བ་ཡིན། གསང་སྔགས་ལུགས་ལ་སྡིག་པ་ཆུ་ཡིས་འཁྲུ་རུང་ཞིང་སྡུག་བསྔལ་ཕྱག་གིས་སེལ་ཆོག །ཆོས་ཉིད་ཞི་བ་སྟོན་མི་དགོས་པར་རྟོགས་པ་གཞན་ལ་སྤོ་ཐུབ། གསང་སྔགས་ལུགས་ཀྱི་དབང་བསྐུར་དེ་སྡིག་པ་ཆུ་ཡིས་འཁྲུད་རུང་ཞིང་སྡུག་བསྔལ་ཕྱག་གིས་སེལ་ཆོག་པའི་དཔེ་ཡིན་ལ། གསང་སྔགས་ལུགས་ཀྱི་བྱིན་རླབས་ནི་ཆོས་ཉིད་ཞི་བ་སྟོན་མི་དགོས་པར་རྟོགས་པ་གཞན་ལ་སྤོ་ཐུབ་པའི་ལུང་ཡིན། གསང་སྔགས་ལུགས་ཀྱི་བླ་མ་ལ་མཚན་ཉིད་གང་ཡང་ཚང་མི་དགོས་ཏེ། སློབ་མས་འཇོན་ན་ཁྱི་སོ་ལའང་རིང་བསྲེལ་འཁྲུངས་འོང་བ་ཡིན། གསང་སྔགས་ལུགས་ཀྱི་སློབ་མ་ལ་ཡོན་ཏན་གང་ཡང་འཛོམས་མི་དགོས་ཏེ། གླེན་དད་དཔེ་མེད་ཅིག་ཡོད་ན་དེ་ག་རང་གིས་འགྲིག་པ་ཡིན། གསང་སྔགས་ལུགས་ཀྱི་བླ་མ་ཚོས་འགན་ཁུར་གང་ཡང་ལེན་མི་དགོས་ཏེ། རང་སྣང་གང་ཤར་དང༌། ཅི་དྲན་གང་འདོད་གནང་ནས་བཞུགས་ཆོག །གསང་སྔགས་ལུགས་ཀྱི་སློབ་མ་ཚོར་རང་དབང་སྤུ་ཙམ་ཡང་མེད་དེ། བླ་མས་རྒྱོབས་གསུང་ན་བརྒྱབ་རྐྱང་དང༌། ལྕོབས་གསུང་ན་ལྕེབ་རྐྱང་བྱེད་དགོས། གསང་སྔགས་ལུགས་ཀྱི་དམ་ཚིག་དེའང་བླ་མས་མར་གནང་ནས་སློབ་མས་ཡར་བསྲུང་དགོས་པ་ཞིག་ཡིན། བླ་མའི་ཐུགས་ལ་མ་བབས་ན་དམ་ཚིག་གཞུང་བཞེས་གནང་ཆོག་ལ། སློབ་མའི་བློ་ལ་མ་བབས་རུང་དམ་ཚིག་ཡར་སློག་ཞུ་ས་མེད། སློབ་མའི་བྱེད་སྟངས་མ་འགྲིག་ན་སློབ་མ་དམ་ཉམས་ཡིན་ལ། བླ་མའི་གནང་སྟངས་མ་འགྲིག་རུང་བླ་མ་དམ་ཉམས་མིན། རྒྱ་གར་འཕགས་པའི་ཡུལ་གྱི་ཏེ་ལོ་ནཱ་༡རོའི་རྣམ་ཐར་དང༌། བོད་གངས་ཅན་ལྗོངས་ཀྱི་མར་པ་མི་ལའི་རྣམ་ཐར་ལས་གོང་གི་རྣམ་གཞག་དེ་ཚོ་ཡོད་ཚད་ར་སྤྲོད་བྱས་བཞག་ཡོད། དེ་ཡང་ཏེ་ལོས་ནཱ་རོ་པར་དཀའ་ཆེན་བཅུ་གཉིས་དང༌། དཀའ་ཕྲན་བཅུ་གཉིས་ཏེ་དཀའ་བ་མི་འདྲ་བ་ཉེར་བཞི་སྐུ་ལུས་གཅིག་གི་ཐོག་ཏུ་སྤྱད་དུ་བཅུག་པར་གྲགས་པ་དེ་ཚོ་དོན་དངོས་སུ་རྐུ་མ་བརྐུ་བ་དང༌། ཇག་པ་བརྒྱབ་པ་སོགས་མ་རབས་ཐ་ཤལ་གྱི་བྱ་བ་འབའ་ཞིག་བསྒྲུབ་ཏུ་བཅུག་པ་རེད། ཡིན་ནའང་བཀའ་འབེབས་མཁན་བླ་མར་སོང་སྟབས་བཀའ་གསུང་ཅི་བསྒྲུབ་མ་ཞུས་ས་མ་ཐུག་པ་རེད་ལ། བླ་མའི་ཅི་གསུང་ཆོས་ཡིན་སྟབས་སྡིག་པ་བྱས་ཀྱང་དགེ་བར་འགྱུར་སོང་བ་རེད། མཐར་ཏེ་ལོས་ནཱ་རོ་པའི་སྙིང་ཁར་རྡོག་རྒྱག་མུན་རུབ་པ་ལྟ་བུ་ཞིག་བཞུས་པས་ནཱ་རོ་པ་དྲན་མེད་དུ་བརྒྱལ། བརྒྱལ་བ་ལས་སངས་པ་དང་དཔོན་སློབ་དགོངས་པ་དབྱེར་མེད་དུ་གྱུར་ཚར་འདུག་སྐད། དེ་མ་གཏོགས་ཁོང་རྣམ་གཉིས་ཆོས་འཆད་ཉན་གྱི་སྒོ་ནས་བླ་སློབ་ཆགས་པ་ཞིག་མིན་ཏེ། ཏེ་ལོས་ཚིག་གཅིག་མ་གསུངས་ལ། །ནཱ་རོས་ཚིག་གཅིག་མ་ཉན་ཏེ། །བྱིན་རླབས་རྟོགས་པ་འཕོས་པས་གྲོལ། ཞེས་གསུངས་ཡོད། དེ་བཞིན་མར་པས་མི་ལར་མཁར་ཟླ་གམ་ཟླུམ་པོ་གྲུ་བཞི་བརྩིག་ཏུ་བཅུག་པ་སོགས་ཡི་ཆད་ཆེན་པོ་བརྒྱད་དང་སྣང་ཆུང་གྲངས་མེད་པའི་སྒོ་ནས་ཚར་བཅད་པ་དེའང་བལྟས་ཚོད་ལ་མར་པས་རྒྱུ་འབྲས་མེད་པའི་བྱ་ངན་ཤ་སྟག་སྤེལ་བ་དང༌། མི་ལས་དོན་དག་མེད་ས་ནས་དཀའ་སྡུག་གྲངས་མེད་ཅིག་མྱངས་སོང་བ་ལྟ་བུར་སྣང་མོད་གསང་སྔགས་ལུགས་ལ་དེ་ལྟར་མིན་པར་བྱ་གཞག་རླབས་པོ་ཆེ་ཞིག་གི་གཞི་ཐིངས་སོང་བ་རེད། ད་དུང་གྲུབ་ཆེན་ག་གེ་མོས་གླུ་ཞིག་བླངས་པས་གྲོང་ཁྱེར་འབུམ་ཕྲག་བཅུ་གཉིས་ཀྱི་སྐྱེ་བོ་ཐམས་ཅད་གྲུབ་པ་ཐོབ་ཅེས་དང༌། རྟོགས་ལྡན་ཆེ་གེ་མོས་གར་ཞིག་འཁྲབ་པས་བྱ་དང་རི་དྭགས་ཡོད་ཚད་འཇའ་ལུས་སུ་དེངས་ཞེས་དང༌། ཁ་ཆང་སྣོད་ལ་གཏུག་མ་ཐག་མཆོག་གི་དངོས་གྲུབ་བརྙེས་ཞེས་དང༌། ཉལ་པོ་བྱེད་བཞིན་མཁའ་སྤྱོད་དུ་འཕུར་སོང༌། ཞེས་སོགས་ངོ་མཚར་རབ་ཏུ་ཆེ་བའི་རྣམ་ཐར་མང་པོ་མཇལ་རྒྱུ་ཡོད། ཉིན་བསྒོམ་ན་ཉིན་འཚང་རྒྱ། མཚན་བསྒོམ་ན་མཚན་འཚང་རྒྱ། སྐལ་ལྡན་ལས་འཕྲོ་ཅན་ལ་བསྒོམ་མི་དགོས་པར་ཐོས་པ་ཙམ་གྱིས་གྲོལ་འགྲོ་བའི་གདམས་ངག་ཟེར་བ་འདི་འདྲ་ལོས་ཡིན་སྙམ། སྐྱབས་འགྲོའི་བསམ་བློ་ཇི་ཙམ་ཤུགས་ཆེ་ན་བྲན་གཡོག་གི་འདུ་ཤེས་དེ་ཙམ་གྱིས་ཤུགས་ཆེ་བ་ཡིན། ཞེས་པ་འདི་མདོ་ལུགས་ཀྱི་སྐྱབས་འགྲོ་ལ་སྦྱར་ན་ཅུང་ཟད་མི་འཕྲོད་པ་ལྟ་བུ་ཞིག་རེད་བསམ་བཞིན་ཡོད། འོན་ཀྱང་གསང་སྔགས་ལུགས་ཀྱི་བླ་མ་ལ་སྐྱབས་སུ་འགྲོ་བ་ནི་དངོས་གནས་བླ་མའི་བྲན་གཡོག་རྒྱུག་པ་རང་རེད་བཞག །ཀུན་གྱིས་ཤེས་གསལ་ལྟར་མི་ལ་རས་པ་ནི་གསང་སྔགས་ལུགས་ཀྱི་སློབ་མ་དེ་ཡན་མེད་པ་ཞིག་རེད་ལ། ཁོང་བླ་མ་མར་པ་ལ་སྐྱབས་སུ་སོང་རྗེས་མར་པའི་གཡོག་ལ་རྒྱུག་དགོས་པ་དག་ཨ་ཅང་ཅང་སྟེ། མར་པའི་འདུག་རོགས་བདག་མེད་མའི་ཡང་བ་འཇོ་བའི་འཇོ་སྟེགས་དང༌། ཡོས་བརྔོ་བའི་བརྔོ་སྟེགས་ཡན་ཆད་ཞབས་ཕྱི་ཞུ་དགོས་ཐུག་པ་རེད། སྡིག་རྒྱལ་གླང་དར་མས་རབ་བྱུང་ཁ་ལ་མི་ཉན་མཁན་ཚོ་རྟ་ཞོན་པའི་ཞོན་སྟེགས་བྱེད་མྱོང་སྐད་འདུག་པ་བདེན་མིན་ཅི་ཤེས། དེ་མ་གཏོགས་བདག་མེད་མ་ལྟ་བུ་མི་ཨོང་བཀྱག་བརྒྱབ་ནས་བ་འཇོ་ཞིང་ཡོས་བརྔོ་མཁན་གྱི་ནག་མོ་ཧམ་པ་ཅན་དེ་འདྲ་གཞན་འཇིག་རྟེན་འདིར་ཨེ་ཡོད་ན་སྙམ། ནམ་རྒྱུན་འཚོ་བའི་ཁྲོད་དུ་ང་ཚོས་བླ་མར་ཕྱག་དབང་ཞུ་བ་ཞེས་མགོ་ཐོག་ཏུ་བླ་མའི་ལག་པ་འཇོག་ཏུ་བཅུག་པ། ཞབས་བཀྱག་ཞུ་བ་ཞེས་རང་ཉིད་གན་རྐྱལ་དུ་འགྱེལ་བའི་ཐོག་ཏུ་བླ་མར་རྡོག་བརྫི་བྱེད་དུ་བཅུག་པ། ཆགས་མེད་རིན་པོ་ཆེས། །གོས་དུམ་སྐྲ་སེན་ཆབ་བསིལ་ཡང༌། །དད་ཅན་མང་པོས་ཁྱེར་དང་བཏུང༌། །ཇ་སྙིགས་ཕོས་པ་ཐམས་ཅད་ཀྱང༌། །མིག་ལ་བྱུག་དང་སྐེ་ལ་བྱུག །ཅེས་གསུངས་པ་ལྟར་བླ་མའི་ཁ་འཁྲུད་ལག་འཁྲུད་རང་གི་མགོ་དང་ལུས་ལ་བྱུག་པ། རང་གི་ཁ་མིག་སྣ་གསུམ་གྱི་ནང་དུ་བླ་མར་མཆིལ་མ་འདེབ་ཏུ་བཅུག་པ། བླ་མའི་སྐྲ་སེན་བསྲེག་པའི་དུ་བར་སྣོམ་པ། ཐ་ན་བླ་མའི་གཅིན་སྐྱག་ཡན་ཆད་བྱིན་རླབས་ཀྱི་རྫས་སུ་བརྩིས་ཏེ་ཟ་ཞིང་འཐུང་བ་སོགས་ཀྱང་གསང་སྔགས་ལུགས་ཀྱི་བླ་མ་བསྟེན་ཚུལ་དྲི་མ་མེད་པ་རེད། ད་དུང་དེང་སང་ལག་ལེན་བྱེད་མཁན་མེད་པ་ཙམ་མ་གཏོགས་བླ་མ་ཡབ་ཡུམ་སྙོམས་པར་འཇུག་པའི་སྦྱོར་མཚམས་སུ་སློབ་མར་ལྕེ་ལྡག་བྱེད་དུ་བཅུག་ཅིང༌། ལྕེ་ཐོག་ཏུ་ཡོང་བའི་ཁྲག་རྣག་གི་ཐིགས་པ་དེ་ཉིད་འཛམ་གླིང་ན་དཀོན་པའི་དངོས་གྲུབ་ཀྱི་རྒྱ་མཚོ་ཞིག་ཡིན་རབས་ཀྱི་བཤད་པ་བརྒྱབ་པ་སོགས་མི་ཆོས་ལས་འདས་པའི་ཆོ་ག་ཕྱག་ལེན་མང་པོ་ཡོད་པ་རེད། མདོར་ན་གསང་སྔགས་ལུགས་ལ་བླ་མའི་ཞབས་ཕྱི་ཡག་པོ་ཞུས་ཏེ་བསྡད་ན་གཞན་གང་ཡང་བྱེད་མི་དགོས་པར་རང་གར་སངས་རྒྱས་འགྲོ་བ་རེད་ལ། བླ་མ་དགྱེས་པོ་མ་བྱུང་ཕྱིན་གཞན་ཚོགས་བསགས་སྒྲིབ་སྦྱོང་ཅི་ཙམ་བྱས་ཀྱང་ཕན་ཐོགས་མེད་པར་རྡོ་རྗེ་དམྱལ་བའི་མཐིལ་དུ་འབྱར་འགྲོ་བ་རེད། གསང་སྔགས་ལུགས་ཀྱི་དམ་ཚིག་ཐམས་ཅད་ཀྱང་བསྡུ་ན་བླ་མའི་སྐུ་གསུང་ཐུགས་གསུམ་ལ་ཞབས་ཏོག་ཕངས་པ་མེད་པར་བསྒྲུབ་པ་འདིའི་ནང་དུ་འདུས་པ་ཡིན། དེ་བས་གསང་སྔགས་ལུགས་ཀྱི་བླ་མ་ནི་ཡེ་ཤུའི་ལུགས་ཀྱི་ལྷ་ཆེན་ལས་ཀྱང་སྐུ་གསོད་དང་དབང་ཐང་ལྡབ་འགྱུར་གྱིས་ཆེ་ཞིང༌། ཡེ་ཤུའི་ལུགས་ཀྱི་ལྷ་ཆེན་དེ་འཇིག་རྟེན་འཛུགས་སྐྲུན་གནང་མཁན་གྱི་དཀོན་མཆོག་ཅིག་ཡིན་ན། གསང་སྔགས་ལུགས་ཀྱི་བླ་མ་དེ་འཇིག་རྟེན་ལོངས་སུ་སྤྱོད་མཁན་གྱི་དཀོན་མཆོག་དེ་རེད་ཅེས་བཤད་ཆོག །ད་དུང་ཕྱག་ལས་གནང་སྟངས་ཁ་ཤས་ཀྱི་ཐད་ནས་བསམ་ན་འཇིག་རྟེན་གཏོར་བཤིག་གཏོང་མཁན་གྱི་དཀོན་མཆོག་ཅིག་རེད་ཅེས་ཞུས་ནའང་མི་འགྲིག་པ་མེད་པའི་ཚོད་རེད། སྐད་གྲགས་ཆོད་པའི་རྒྱ་གར་གྲུབ་ཆེན་བརྒྱད་ཅུ་ཟེར་བའི་མི་དེ་རྣམས་ཀྱི་འགྲོ་ལུགས་འདུག་སྟངས་ལ་གཅིག་ལྟོས་དང༌། ཁོ་ཚོའི་ཁྲོད་དུ་མི་གསོད་མཁན། དམག་རྒྱག་མཁན། རྐུ་མ་རྐུ་མཁན། སྐྱག་རྫུན་ཤོད་མཁན། ཆང་རག་འཐུང་མཁན། ཤོ་རྒྱན་འགྱེད་མཁན། གཞང་འཚོང་མཁན། ཕྱུགས་བཤའ་མཁན། ཉ་བཟུང་མཁན་སོགས་བྱ་བ་སྡུག་རིགས་ངན་ཚད་བྱེད་མཁན་རྐྱང་མ་གཏོགས་ཡ་རབས་ཚུལ་མཐུན་གྱི་འཚོ་བ་རོལ་བའི་མི་མང་པོ་བགྲང་རྒྱུ་མེད། བོད་དུའང་ཇོ་བོ་བཀའ་གདམས་པས་བཙུན་ཚུགས་ཕྲན་བུ་ཟིན་པ་མ་གཏོགས་གཞན་སྔགས་རྒན་རྣམ་པས་ཡོས་བརྔོ་བརྔོ་དང༌། ཁྲག་དཀྲུག་དཀྲུག་གནང་གྲབས་བྱས་ཡོད། རྭ་ཆེན་རྡོ་རྗེ་གྲགས་ཀྱིས་ངན་སྔགས་བསགས་ཏེ་ས་ཐོབ་ཀྱི་སེམས་དཔའ་བཅུ་གསུམ་བསྒྲལ། འབྲུག་སྨྱོན་ཀུན་དགའ་ལེགས་པས་དགའ་རོགས་ལྔ་སྟོང་བརྒྱ་མེད་ཉི་ཤུ་རྩ་ལྔ་བསྒྲིགས། དེ་ལྟ་ནའང་ཁོ་ཚོར་སྡིག་རྒན་དང་འཆལ་པོའི་མིང་ཤས་འོང་རྒྱུ་ལྟ་ཅི་སྟེ། ད་དུང་གཟི་བརྗིད་དང་ངོ་མཚར་ཆེ་བའི་ཚད་དུ་བརྩིས་ནས་ཀུན་ལ་གསང་མཐོར་སྒྲོག །པཎ་ཊི་ཏ་ཤམ་ཐབས་སྔོན་པོ་ཅན་གྱིས། ཆང་དང་བུད་མེད་འཁྲིག་པ་རིན་ཆེན་གསུམ། །རིན་ཆེན་གཞན་ནི་རྡོ་ཤིང་རིན་ཆེན་ཉིད། ཅེས་དང༌། ཕོ་བྲང་ཞི་བ་འོད་ཀྱིས། སྦྱོར་བ་དར་བས།༡ སྒྲོལ་བ་དར་བས་ར་ལུག་ཉལ་ཐག་བཅད། ཅེས་གསུངས་པ་ལྟར་ཡུལ་ཁམས་ཀྱི་ཕོ་ཐམས་ཅད་བསྒྲལ་ཏེ་མོ་ཐམས་ཅད་དང་སྦྱོར་བའི་རྡོ་རྗེ་སློབ་དཔོན་ཡང་བྱོན་མྱོང་ཞིང༌། དེ་ལ་ཡང་ཡག་ས་དང་བཟང་ས་ནས་འགྲེལ་བཤད་བོང་བུའི་ཨ་འབྱོག་འདྲ་བ་རེ་བསྐྱོན་རྒྱུ་ཡོད་ན་གཞན་ལྟ་ཅི་སྨོས། མདོར་ན་ནང་པ་སངས་རྒྱས་པའི་ཐེག་པའི་རྩེ་མོ་གསང་སྔགས་རྡོ་རྗེ་ཐེག་པ་ལ་བརྟེན་ནས་གྲུབ་པའི་ས་མཐོར་གཤེགས་པའི་རྣལ་འབྱོར་པ་སྨྱོ་སྤྱོད་ཅན་དེ་ཚོ་དང༌། དེང་སང་འཛམ་གླིང་ཐོག་ཏུ་མི་གསོད་མེ་རྒྱག་གི་ལས་འགུལ་སྤེལ་མཁན་གྱི་འཇིགས་སྐུལ་དྲག་སྤྱོད་རིང་ལུགས་པ་གཉིས་པོ་ཀུན་སློང་དང་ཀུན་སྤྱོད་གང་ལ་ཡང་ངོ་བོའི་ཐོག་ནས་དབྱེ་བ་འབྱེད་དཀའ་བ་ཞིག་རེད་འདུག །འོན་ཀྱང་འགྲེལ་བཤད་བསྐྱོན་སྟངས་མི་འདྲ་བ་ཕྲན་བུ་ཡོད་པ་ནི། ནང་པའི་གྲུབ་ཆེན་རྣམ་པས་ཁོང་རྣམ་ཚོའི་ཞལ་གྱི་ནང་དང་ཕྱག་གི་འོག་ནས་ཤི་བའི་སེམས་ཅན་ཐམས་ཅད་ཁོང་རྣམ་ཚོ་ཉིད་ཀྱིས་འདྲེན་འགྲོ་བཞིན་ཡོད་གསུངས་པ་དང༌། འཇིགས་སྐུལ་དྲག་སྤྱོད་པས་ཁོ་པ་ཚོས་བསད་རིམ་བཞིན་ཁ་ཆེའི་ལྷ་མོ་ཨལ་ལས་འདྲེན་འགྲོ་བཞིན་ཡོད་ཅེས་ཟེར་བ་འདི་རེད། དོན་འདི་དག་ཁོ་བོས་གསང་སྔགས་ཀྱི་རྒྱུད་སྡེ་རིན་པོ་ཆེ་རྣམས་དཔང་དུ་བཞག །རྩོད་མེད་ཡོངས་གྲགས་ཀྱི་གྲུབ་ཐོབ་མང་པོའི་རྣམ་ཐར་དཔེ་རུ་བཟུང་ནས་སྨྲས་པ་ཡིན་གྱི། རང་ཉིད་སྔགས་ལ་མི་མོས་པའི་དབང་གིས་གཞི་མེད་ཀྱི་སྐུར་འདེབས་དང༌། གསང་སྔགས་འཆལ་བར་སྤྱོད་པའི་མི་ངན་ཁ་ཤས་ཀྱི་བྱ་སྤྱོད་བག་ཙམ་ལ་བརྟེན་ནས་ཡོངས་རྫོགས་ནག་འབྱམས་སུ་བརྩིས་པ་གཏན་ནས་མིན་ཏེ། མི་བདེན་སྙམ་པའི་མི་ཡོད་ཚེ་ཁོ་བོ་དང་ལྷན་དུ་བགྲོ་གླེང་གི་ལམ་ནས་བདེན་རྫུན་བརྡར་ཤ་གཅོད་པའི་ལས་སུ་ཞུགས་མཛོད་དང་ད་གཟོད་ཧ་གོ་བར་འགྱུར་རོ། །༡ལུང་འདི་རྗེ་སོག་བཟློག་པས་མཛད་པའི་བརྒལ་ལན་ངེས་དོན་འབྲུག་སྒྲའི་ནང་དུ་ཡོད་སྙམ་ཡང་ཡིད་ལ་མ་འོངས་པས་སེམས་བཟང་ཅན་གྱི་ཀློག་པ་པོ་ཞིག་གིས་རོགས་རམ་གནང་བའི་རེ་བ་ཞུ།
ལྔ། ཕར་ཕྱིན་ལུགས་ཀྱི་སྐུ་དང་ཞིང་ཁམས་ཀྱི་རྣམ་གཞག་ལ་དཔྱད་པ།
ཕར་ཕྱིན་གཞུང་གི་གཞི་ལམ་འབྲས་གསུམ་གྱི་རྣམ་གཞག་རྒྱས་སྤྲོས་ཅན་དེ་དག་ཐེག་ཆེན་གྱི་མདོ་སྡེ་རྣམས་ལ་བརྟེན་ནས་མཛད་པ་ཡིན་ཡང༌། ཐེག་ཆེན་གྱི་སྡེ་སྣོད་ཚད་མར་འོས་མིན་ནི་ཤིན་ཏུ་ཐེ་ཚོམ་གྱི་གནས་སུ་ལྷུང་ཡོད་དེ། དེ་ཡང་སངས་རྒྱས་པའི་གྲུབ་མཐའ་གོང་འོག་ཀུན་ལ་རྩོད་པ་མེད་པའི་རྒྱལ་བའི་བཀའ་ནི་ཉན་ཐོས་ལུགས་ཀྱི་སྡེ་སྣོད་གསུམ་པོ་སྟེ་དེང་སང་ཡོངས་གྲགས་སུ་ཐེག་དམན་གྱི་མདོ་སྡེར་འབོད་པ་འདི་དག་ཙམ་ཡིན། འདི་དག་གི་ཁྲོད་དུ་སྐྱེས་པའི་རབས་དང་སྔོན་གྱི་བྱུང་བ་སོགས་ལ་སྒྲུང་གཏམ་གྱི་སླད་གཏན་ནས་མེད་པ་མིན་ཡང༌། གཞི་རྩའི་ཆ་ནས་སྟོན་པ་ཉིད་ཀྱི་སྐུ་ཚེ་ལོ་རྒྱུས་དང་མཛད་པ་ཕྲིན་ལས་སོགས་དངོས་ཡོད་དང་ཐག་ཉེ་པོ་ཞིག་འཁོད་ཡོད། སྟོན་པ་ཉིད་ཞལ་བཞུགས་པའི་དུས་ཀྱི་སློབ་མའི་གཙོ་བོ་མཆོག་ཟུང་དང༌། ཉན་ཐོས་འོད་སྲུང་ཆེན་པོ་སོགས་དང༌། མྱ་ངན་ལས་འདས་ནས་བསྟན་པའི་གཏད་རབས་བདུན་ལ་སོགས་པས་བསྟན་པ་སྐྱོང་བའི་སྐབས་སུ་ཡང་ཐེག་ཆེན་གྱི་གྲགས་འགུལ་ཅི་ཡང་མེད། དེ་ལྟའི་ངང་ནས་མི་ལོ་བརྒྱ་ཕྲག་མང་པོ་ཞིག་སོང་བའི་རྗེས་སུ་གཞི་ནས་སྔོན་གྱི་སེམས་ཙམ་པའི་སློབ་དཔོན་ལྔ་བརྒྱ་སོགས་ཀྱིས་གསུང་རབ་རྣམས་འདོན་པ་ཅུང་ཟད་མི་འདྲ་བ་ཁ་ཅིག་གིས་འདོན་ཞིང༌། འདས་རྗེས་ཀྱི་ལོ་ཆིག་སྟོང་ལ་ཉེ་བའི་སྐབས་སུ་ད་གཟོད་ཀླུ་ཐོགས་གཉིས་སོགས་བརྒྱུད་ནས་ཤིན་ཏུ་མི་འདྲ་བའི་ཆོས་སྐད་རླབས་པོ་ཆེ་དག་ས་ཁྱབ་རྡོ་ཁྱབ་ཏུ་གྱུར་པ་རེད། དེ་དག་གི་ཁུངས་དང་རྒྱུད་པ་གང་ཡིན་དྲིས་པ་ན། ཀླུ་སྒྲུབ་ཀྱིས་ཁོ་རང་ས་འོག་ཏུ་འཛུལ་ནས་ཡར་ལ་དྲངས་པ་ཡིན་ཚུལ་དང༌། ཐོགས་མེད་ཀྱིས་ཁོ་རང་ནམ་མཁའ་ལ་འཛེགས་ནས་མར་ལ་ཕབ་པ་ཡིན་ཚུལ་སོགས་གསུངས་པ་མ་གཏོགས་འཇིག་རྟེན་མི་ཡུལ་འདིར་མཛུབ་མོ་འཛུགས་ས་གཅིག་ཀྱང་རག་མེད་པ་རེད། ཁོང་རྣམ་གཉིས་ལ་བསྟན་པའི་ཤིང་རྟ་ཆེན་མོར་བགྲང་བའི་རྒྱུ་མཚན་ཡང་དྲང་མོར་ཞུས་ན་ཁུངས་ལུང་མེད་པའི་གྲུབ་མཐའ་མི་འདྲ་བ་གཉིས་གསར་དུ་སྤེལ་མཁན་ཡིན་པ་འདི་ལ་ཐུག་ཡོད། གཅུང་དབྱིག་གཉེན་སྐུ་ན་གཞོན་དུས་ཐེག་པ་ཆེ་ཆུང་གི་བར་ན་རྩོད་པ་ཛ་དྲག་ཆེ་བའི་སྒང་ཡིན་པ་འདིས་སྐབས་དེར་ཐེག་ཆེན་ས་ཐོག་ཏུ་བུད་ནས་དུས་ཡུན་མི་རིང་བར་ཤེས་ཐུབ། དེས་ན་སློབ་དཔོན་ཀླུ་སྒྲུབ་ཁོང་འདས་རྗེས་ཀྱི་བཞི་བརྒྱ་ལོན་དུས་སྐུ་འཁྲུངས་ཤིང་དགུང་གྲངས་དྲུག་བརྒྱའི་བར་དུ་བཞུགས་པ་སོགས་ནི་གཏམ་རྒྱུད་ཙམ་དང༌། དགུ་བརྒྱ་ཙམ་དུ་འཁྲུངས་ཤིང་སྟོང་ཕྲག་ཡས་མས་སུ་གྲོངས་པ་ནི་དངོས་དོན་དུ་བཟུང་ན་འགྲིག །མཁས་དབང་དགེ་ཆོས་ལགས་ཀྱིས། ལེགས་ལྡན་དང་ཆོས་གྲགས་སོགས་གསང་སྔགས་ལ་ཆ་རྒྱུས་མེད་པར་གསུངས་པ་ལྟར་དུས་རབས་བདུན་པའི་གཡས་གཡོན་ཙམ་ལ་ཡང་ཡོངས་གྲགས་སུ་གསང་སྔགས་ནང་བསྒྱུར་གནང་བའི་མགོ་ཕལ་ཆེར་ཚུགས་མེད་པ་འདྲ། ཕྱིས་སུ་ནི་སློབ་དཔོན་ཀླུ་སྒྲུབ་ཀྱི་མཚན་འཁོད་པའི་གསང་འདུས་རིམ་ལྔ་དང༌། ཟླ་བའི་མཚན་འཁོད་པའི་སྒྲོན་མ་གསལ་བ་སོགས་མང་དུ་དར་ཡང་སློབ་དཔོན་དེ་དག་གི་གསུང་ག་ལ་ཡིན་ཏེ།
དེ་ཚོ་ནི་ཀླུ་སྒྲུབ་ཡབ་སྲས་འདས་ནས་མི་ལོ་བརྒྱ་སྐོར་མང་པོ་སོང་རྗེས་གཞི་ནས་དོན་པ་ཡིན་འདུག་པའི་ཕྱིར། སྲོང་བཙན་གྱི་བཀའ་ཆེམས་དང༌། པད་མའི་བཀའ་ཐང་ཟེར་བ་དག་དང་འདྲ་བར་སློབ་དཔོན་གོང་མའི་མཚན་གཡར་བ་ཙམ་དུ་ཟད་དོ། །རྨོརྱའི་༡རྒྱལ་པོ་མྱ་ངན་མེད་ཀྱིས་འཛམ་བུའི་གླིང་དུ་ཆོས་ཀྱི་ཕོ་ཉ་བཀྱེ་སྐབས་རྒྱལ་བསྟན་དར་བའི་ཤར་ལྷོ་ཨེ་ཤེ་ཡའི་ཡུལ་གྲུ་ཁག་ཏུ་སྡེ་པ་མ་གཏོགས་ཐེག་ཆེན་མེད་པའི་རྒྱུ་མཚན་དང༌། རྒྱ་ནག་གི་སློབ་དཔོན་ཐང་སྡེ་སྣོད་གསུམ་པ་སོགས་ཀྱིས་མདོ་སྐོར་མ་གཏོགས་གསང་སྔགས་ཁུར་མ་འོངས་པའི་རྒྱུ་མཚན་དང༌། བོད་དར་རྫོགས་ཆེན་གྱི་ཆོས་སྐོར་དུས་ཕྱིས་སུ་ཡང་རྒྱ་གར་ན་མཇལ་རྒྱུ་མེད་པའི་རྒྱུ་མཚན་བཅས་ལ་ཐུགས་བསམ་དྲང་མོར་བཞེས་ན་གོ་བ་ནམ་ལངས་པ་ལྟ་བུ་རེ་འཆར་རྒྱུ་ཡོད་མོད་ཕྱོགས་ལྷུང་གི་རེ་ལྡེ་ནག་པོས་མགོ་གཏུམས་མཇུག་གཏུམས་བྱས་པའི་མི་དག་ལ་ཅི་ཆ། རྒྱ་གར་དུ་ཀླུ་སྒྲུབ་ཞབས་ཀྱིས་ཤེར་ཕྱིན་འབུམ་པ་ཀླུ་ཡུལ་ནས་བླངས་པ་ནས་བཟུང་སྟེ་མདོ་གསར་རྩོམ་གྱི་མཚམས་བཞག་ཅིང༌། ཙི་ལུ་པའམ་དུས་ཞབས་པས་དུས་ཀྱི་འཁོར་ལོ་མི་ཡུལ་དུ་བླངས་རྗེས་རྒྱུད་གསར་རྩོམ་གྱི་ཚ་རླབས་ཞི་འཇགས་སུ་ཕྱིན་པར་གྲགས། འོན་ཀྱང་ང་ཚོ་བོད་ཡུལ་ལ་མཚོན་ན་ནི་དེ་ནས་བརྩིས་པའི་མི་ལོ་སྟོང་ཕྲག་གཅིག་གི་རྗེས་ཏེ་དུས་ད་ལྟ་ཡང་ས་ཆོས་རྡོ་ཆོས་སྣ་ཚོགས་རྡོལ་མཚམས་བཞག་ཐུབ་ཀྱིན་མེད་པ་འདིས་ང་ཚོའི་མི་རིགས་འདི་ད་དུང་ཡང་བར་སྣང་ཁམས་ནས་མར་འབབ་ཡག་བྱས་མེད་པའི་ར་སྤྲོད་བྱུང་ཡོད། ཐེག་ཆེན་པའི་རང་སྐད་ལྟར་ན་སྟོན་པས་གདུལ་བྱ་རིགས་ཅན་གསུམ་ལ་ཆོས་འཁོར་རིམ་པ་གསུམ་དངོས་སུ་བསྐོར་མྱོང་བ་ཡིན་ཡང༌། ཁོང་དགོངས་པ་རྫོགས་མ་ཐག་གློ་བུར་དུ་མི་ཡུལ་འདིར་ཐེག་ཆེན་གྱི་གདུལ་བྱ་གཅིག་ཀྱང་གོ་རྒྱུ་རིག་རྒྱུ་མེད་པ་ཆགས་པས། སྲས་ཀྱི་ཐུ་བོ་བྱམས་འཇམ་དབྱངས་སོགས་བྱ་ཐབས་ཟད་དེ་ཐེག་ཆེན་གྱི་སྡེ་སྣོད་རྣམས་བསྣམས་ནས་ལྷ་ཀླུ་ལྷ་མིན་དྲི་ཟའི་ཡུལ་བཅས་སུ་ཕེབས་ཏེ། དུས་ཡུན་རིང་པོའི་བར་འཁྱམ་པོ་ལྡོམ་པོའི་འཚོ་བ་རོལ་བཞིན་བཞུགས་དགོས་བྱུང་བ་ཡིན་འདུག །བྱམས་འཇམ་དབྱངས་ཞུ་བ་འདི་དག་ཁ་ཅིག་གིས་རྒྱ་གར་ལུང་པའི་ནང་དུ་ས་སྐྱེས་རྡོ་སྐྱེས་ཀྱི་མི་ཡིན་ཟེར་བ་དང༌། ཁ་ཅིག་གིས་འཇིག་རྟེན་གཞན་ནས་འཁྱར་འོང་བའི་ལྷ་རེད་ཟེར་བཞིན་འདུག་སྟེ། དོན་དུ་དངོས་ཡོད་དངོས་མེད་གང་ཡིན་བརྗོད་ཚོད་མི་ཐིག་པ་ཞིག་ཏུ་སྣང༌། ཕྱོགས་གཅིག་ནས་སྟོན་པ་ཁོང་སྐྱེ་འཆི་འཕོ་འགྱུར་ལ་རང་དབང་ཐོབ་ཅིང༌། གདུལ་བྱ་འདུལ་བའི་དུས་ལས་སྐད་ཅིག་ཀྱང་མི་ཡོལ་བར་ནམ་དགོས་ན་ནམ་ཡིན་པར་བཤད་པ་དང༌། ཕྱོགས་གཞན་ཞིག་ནས་དུས་ཚོད་མ་རན་གོང་ནས་ཆོས་འཁོར་སྟོང་བསྐོར་མཛད་ཅིང༌། སྲས་ཀྱི་ཐུ་བོ་ཚོ་སྒུག་ལོངས་མེད་པར་སྐུ་ཚེའི་འཕེན་པ་རྫོགས་འགྲོ་བ་འདི་དག་ལ་འགྲེལ་བཤད་ཇི་ལྟར་བརྒྱབ། དགུང་གྲངས་དྲུག་བརྒྱ་བཞུགས་པའི་སྐུ་ཚེ་ཞིག་ཡོད་ན་ཀླུ་སྒྲུབ་ལས་སྟོན་པ་ཉིད་ལ་མཁོ་ཆེ་བར་མི་འདུག་གམ། གདུལ་བྱ་དབང་པོ་ཡང་རབ་དེ་ཚོ་བསྟན་པ་ཡར་དར་གྱི་སྐབས་སུ་གཅིག་ཀྱང་འོང་རྒྱུ་མེད་པར་ལྔ་བརྒྱ་ཐ་མ་ཚེས་ལ་ཉེ་དུས་གཞི་ནས་ཁྱུ་དང་ཁྱུ་བྱས་ཏེ་གང་ནས་གཤར་ཡོང་བ་ཡིན་སུས་ཤེས། ཐེག་ཆེན་གསུང་སྐབས་སྦྱིན་བདག་རྒྱལ་པོ་མ་སྐྱེས་དགྲ་དང༌། ཞུ་མཁན་གནས་བརྟན་ཀུན་དགའ་བོ། ཉན་མཁན་དགེ་སློང་བརྒྱ་ཕྲག་ཕྱེད་དང་བཅུ་གསུམ། ད་དུང་དགེ་བསྙེན་ཕ་མས་གཙོས་པའི་བྲམ་ཟེ་དང་ཁྱིམ་བདག་དེ་འདྲའི་མང་པོ་ཞིག་ཡོད་འདུག་པ། སྟོན་པ་མྱ་ངན་ལས་འདས་མ་ཐག་སུ་ཞིག་གིས་དེ་ཚོ་ཡོད་ཚད་ལ་བརྗེད་ཟས་བརྗེད་ཆུ་འདྲ་དྲངས་པ་ཡིན་ན་མ་གཏོགས། ཁོ་ཚོས་ཐེག་ཆེན་གསུང་སའི་སྣོད་ལྡན་གྱི་སློབ་མ་མ་རྙེད་པའི་དབང་དུ་བཏང་རུང་མི་ཚེ་ལོ་རྒྱུས་གསུང་སའི་མི་རེ་གཉིས་ཤིག་ཅི་ལ་མི་རྙེད། དེས་ན་ཉན་ཐོས་སྡེ་པ་དག་གིས། ཐེག་ཆེན་སངས་རྒྱས་ཀྱིས་གསུངས་པའི་བཀའ་མ་རེད། ཀླུ་སྒྲུབ་སོགས་ཀྱིས་རང་བཟོ་བྱས་པའི་བསྟན་བཅོས་རེད་ཅེས་སྨྲ་བ་ལ་ནི་ཐུགས་ཁག་ཁྱོན་ནས་མི་འདུག་སྟེ། དཔེར་ན་དེང་སང་མི་ཁ་ཅིག་གིས། ལྷ་ཡུལ་དང་ཀླུ་ཡུལ་ནས་བླངས་པའི་རྗེ་ཙོང་ཁ་པའི་གསུང་རྩོམ་ཡིན་ཟེར་ནས་བརྗོད་བྱ་ཆལ་ཆོལ་ཅན་གྱི་དཔེ་དེབ་ཟད་རྒྱུ་རྫོགས་རྒྱུ་མེད་པ་ཞིག་ཕུད་འོང་བའི་དབང་དུ་བཏང་ན། རྗེ་ཡི་ཆོས་བརྒྱུད་འཛིན་པའི་བསམ་ཤེས་ཅན་གྱི་མཁས་པ་སུས་ཀྱང་ཁས་ལེན་གནང་ཐབས་བྲལ་བ་དང་གཅིག་མཚུངས་ཡིན་པའི་ཕྱིར། རྡོ་རྗེ་ཐེག་པའི་ཆོས་སྐོར་རྣམས་ལ་ནི་དེ་བས་ཀྱང་དགུ་འགྱུར་གྱིས་ཁུངས་ལུང་མེད་པ་ཤ་སྟག་སྟེ། གསང་སྔགས་ཀྱི་སྟོན་པ་རྡོ་རྗེ་འཆང་ཞེས་པ་དེ་སངས་རྒྱས་ཤཱཀྱ་ཐུབ་པ་སྐྱ་སར་བབས་པའི་མིང་ཡིན་ཟེར་བ་ལྟ་བུ་གསུང་མཁན་ཁུངས་ལུང་མེད་པ་དང༌། ས་གནས་རི་རབ་ཀྱི་རྩེའམ་རྡོ་རྗེ་བཙུན་མོའི་བྷ་གའི་ནང་དུ་ཡིན་ཞེས་པ་ལྟ་བུ་གསུང་ས་ཁུངས་ལུང་མེད་པ་དང༌། རྒྱུད་འཆད་པ་པོ་ང་དང་ཞུ་བ་པོའང་ང་ཡིན་ཞེས་པ་ལྟ་བུ་གསུང་ཡུལ་ཁུངས་ལུང་མེད་པ་དང༌། འཁོར་བ་ཐོག་མེད་ནས་བསྟན་པའི་ཆོས་ཡིན་ཞེས་པ་ལྟ་བུ་གསུང་དུས་ཁུངས་ལུང་མེད་པ་དང༌། ཉོན་མོངས་མ་སྤངས་ལམ་དུ་ཁྱེར་ཞིང་མ་བསྒོམས་ཐོས་པས་ཆོག་ཅེས་པ་ལྟ་བུ་གསུང་རྒྱུ་ཁུངས་ལུང་མེད་པ་དང༌། ནུབ་ཕྱོགས་ཨོ་རྒྱན་གྱི་ཡུལ་དེར་མཚོ་ཞིག་ཡོད་པ་སྐམ་པའི་ཤུལ་ནས་རང་བྱུང་གི་རྒྱུད་སྡེའི་དཔེ་མཛོད་ཁང་ཞིག་ཐོན། དེའི་ནང་གི་དཔེ་ཆ་རྣམས་གྲུབ་ཆེན་ས་ར་ཧས་རྒྱ་གར་དུ་སྐྱེལ་འདྲེན་བྱས་པ་རེད་ཅེས་པ་ལྟ་བུ་རྒྱུད་པའི་ལོ་རྒྱུས་ཁུངས་ལུང་མེད་པ་བཅས་ཕ་སུ་ཡིན་བཤད་རྒྱུ་མེད་པའི་ནལ་གྱི་བུ་ཞིག་དང་འདྲ་ཡང༌། བསམ་བློ་གུ་ཡངས་བཏང་དྲགས་པས་གང་ལ་ཡང་འགལ་འབྲེལ་གྱི་རྣམ་གཞག་བརྩི་མི་དགོས་པར། སློབ་དཔོན་སོ་སོའི་བསམ་ཚོད་དྲན་ཚོད་རེ་དང༌། ཅི་དགའ་གང་སྐྱིད་རེ་གདམས་ནས་བཤད་ཆོག་གི་ཡོད་པ་རེད། དེ་བས་རྒྱུད་སྡེ་རེ་རེ་ལ་ལུགས་སྲོལ་མི་འདྲ་བ་ཉི་ཤུ་སུམ་ཅུ་རེ་ཙམ་ཐོན་ཡོང་གི་ཡོད་ལ། དེ་དག་གཅིག་ལས་གཅིག་རླབས་ཆེ་ཞིང་ཡ་མཚན་པ་དག་དག་ཡིན། མདོར་ན་སྔགས་ཀྱི་ཆོས་འབྱུང་ནི་གནའ་བོའི་རིག་བྱེད་གཏམ་རྒྱུད་ལས་ཀྱང་དགོད་བྲོ་བའི་ལྷ་སྒྲུང་འབའ་ཞིག་སྟེ། རྗེ་རེད་མདའ་བས། གང་ནས་བླངས་པའི་ཁུངས་ཀྱང་མི་སྣང་ན། །འཕྱོན་མའི་བུ་བཞིན་འདི་ལ་སུས་ཡིད་རྟོན། ཞེས་གསུངས་པ་དེ་ཉིད་འཕངས་པ་ནི་དུས་ཀྱི་འཁོར་ལོ་སྒེར་གྱི་ཐོག་ཏུ་འཕངས་པ་ཡིན་ཀྱང་ཕོག་པ་ནི་རྒྱུད་སྡེ་སྤྱི་ཡི་སྣ་ལ་ཕོག་འདུག་གོ །སངས་རྒྱས་ཀྱི་བསྟན་པ་མར་ནས་མར་ལ་ཇེ་འགྲིབ་དང༌། གདུལ་བྱའི་བློ་རིག་ཇེ་བརྟུལ་ཇེ་དིག་ཏུ་བུད་འགྲོ་བཞིན་ཡོད་སྐད་ཀྱི་བཤད་ཡམ་དེ་དང་བསྟུན་ན། ཆོས་ཀྱི་ཟབ་ཁྱད་ཀྱང་ཇེ་སྡུག་ཇེ་ཞན་དུ་འགྱུར་འགྲོ་འོས་པ་ལ། དེ་ལྟར་མིན་པར་ཐེག་དམན་གྱི་རྗེས་སུ་ཐེག་ཆེན་དང༌། མཚན་ཉིད་ཀྱི་རྗེས་སུ་སྔགས། རྒྱུད་སྡེ་འོག་མའི་རྗེས་སུ་གོང་མ་བཅས་རིམ་གྱིས་དར་ཞིང༌། དེ་དག་སྔ་མ་སྔ་མ་རྣམས་ལས་ཕྱི་མ་ཕྱི་མ་རྣམས་ཇེ་མཐོ་ཇེ་རྫིག་ཏུ་བུད་སོང་བ་འདི་གཉིས་གབ་མི་ཐུག་པའི་ནང་འགལ་བླ་ན་མེད་པ་ཞིག་མ་ཡིན་ནམ། གནས་ལུགས་རྐྱང་པའི་ངོས་ནས་བཤད་ན་ནི་དེ་ལྟར་ལགས་མོད། ཐེག་ཆེན་གྱི་སློབ་དཔོན་རྣམ་པས་ཐེག་ཆེན་གྱི་མདོ་དང་རྒྱུད་སྡེ་དག་གསར་དུ་དར་སྤེལ་བཏང་བ་ལ་དགོས་པ་དང་རྒྱུ་མཚན་མེད་ཅེས་ནི་ནམ་ཡང་སྨྲ་བ་མིན་ཏེ། རྒྱ་གར་གྱི་མུ་སྟེགས་བྱེད་དག་གིས་སྟོབས་འབྱོར་རྒྱས་པའི་ཞིང་ཁམས་དང༌། མི་སེམས་སྒུལ་བའི་ཐར་པའི་གླིང་ཁ་མང་པོ་གཅིག་རྗེས་གཉིས་མཐུད་དུ་འཛུགས་སྐྲུན་བྱས་པ་ན། ནང་པ་སངས་རྒྱས་པའི་མཁས་པ་ཚོས་བུད་ཤིང་ཟད་པའི་མེ་བཞིན་དེངས་འགྲོ་ཚུལ་གྱི་སྐད་ཆ་རྙིང་པ་དེ་རང་བཤད་དེ་བསྡད་ན་མདུན་ལམ་སོར་གང་ཡང་མེད་པར་ཤེས་ཏེ། རྔ་དང་བསྟུན་ནས་འཆམ་རྒྱག་པའི་དཔེ་ལྟར་འཇིག་རྒྱུ་མེད་པའི་དག་ཞིང་དང༌། ཤི་རྒྱུ་མེད་པའི་ལོངས་སྐུ། གསལ་སྒྲིབ་མེད་པའི་རྣམ་མཁྱེན་སོགས་ཡ་མཚན་ཆེ་བའི་ཐེག་པ་འདི་འདྲ་ཞིག་གསར་གཏོད་ཐུབ་པ་དེས་རང་ཉིད་འཆི་ལམ་ནས་ཐེངས་གཅིག་བསྐྱབས་པ་ཡིན་ཞིང༌། གྲུབ་མཐའ་སྔ་ཕྱིའི་བར་ན་ཐོད་མི་ཐུག་པའི་ཧེ་བག་རྒྱུག་སྐབས་དྲང་ངེས་ཀྱི་ཁྱད་པར་ཕྱེས་ཏེ་འགལ་བ་བཟླུམ་པ་འདི་ཡང་འཐབ་ཇུས་ལྷུ་ཐིངས་པོ་ཞིག་མ་རེད་ཅེས་སུས་བརྗོད་ཤེས། ཡང་མུ་སྟེགས་དབང་ཕྱུག་པ་སོགས་ཁ་ཅིག་ལ། ལྟ་གྲུབ་ཀྱི་ཐད་ནས་སངས་རྒྱས་པ་སོགས་གྲུབ་མཐའ་གཞན་དག་དང་འགྲན་རྩོད་བྱེད་པའི་སྤོབས་པ་མེད་ཀྱང༌། རྩ་རླུང་ཐེག་ལེའི་རྣལ་འབྱོར་སོགས་ལུས་ལ་གནད་དུ་བསྣུན་པའི་མན་ངག་དང༌། མན་ངག་དེ་དག་ལས་བལྟས་བལྟས་རིག་རིག་གི་གྲུབ་འབྲས་མང་པོ་བསྟན་རྒྱུ་ཡོད་པས་དད་ལྡན་མི་དམངས་ཀྱི་བློ་ཡིད་འགུགས་པའི་ནུས་ཤུགས་ལ་སུས་ཀྱང་འགྲན་ཟླ་དང་བྲལ་བའི་ཚད་དུ་སླེབ་པ་ན། སངས་རྒྱས་ཆོས་ལུགས་པས་ཀྱང་བློ་སྟོབས་ཆེན་པོས་མུ་སྟེགས་ལུགས་ཀྱི་ངོ་མཚར་ཆེ་བའི་རླུང་སྦྱོར་གྱི་མན་ངག་མང་པོ་ནང་འདྲེན་གནང་ཐོག །མན་ངག་དེ་དག་ལ་བསྟེན་ནས་ཚེ་ལུས་གཅིག་ལ་འཚང་རྒྱ་ཐུབ་པའི་འགྲེལ་བཤད་གསར་དུ་བསྐྱོན་པ་སོགས་གཞན་གྱི་ལེགས་ཆ་འདུས་ལ་རང་གི་ཁྱད་ཆོས་ཀྱང་ཡོད་པའི་གསང་སྔགས་ཀྱི་བསྟན་པ་འདི་སྤེལ་བ་དེས་ཛ་དྲག་ཆེ་བའི་འགྲན་རྩོད་ཁྲོད་ནས་སླར་ཡང་རྒྱལ་ཁ་ཐེངས་གཅིག་བླངས་པ་རེད། འོན་ཀྱང་སྐབས་དེ་ནས་བཟུང་སྟེ་ལྟ་སྒོམ་སྤྱོད་གསུམ་གང་གི་ཐད་ནས་ཀྱང་སངས་རྒྱས་པ་གཅིག་པུ་ཡ་མེད་ལྟ་བུར་ཆགས་པའི་དབང་གིས་མུ་མཐུད་ལེགས་བཅོས་དང་ཡར་རྒྱས་མ་བཏང་བར་མ་ཟད། རང་ལྟ་མཆོག་འཛིན་ལ་བརྟེན་པའི་རྙིང་ཞེན་མཁྲེགས་འཛིན་གྱི་སྨྱུ་གུ་ཞིག་ཀྱང་འབུས་འགོ་ཚུགས་པ་དང༌། ཕྱོགས་གཞན་ཞིག་ནས་འཐད་སྒྲུབ་ཀྱི་རིགས་པ་མི་དགོས་པར་མཚོན་ཆ་ལ་བརྟེན་ནས་བསྟན་པ་སྤེལ་མཁན་གྱི་ཀླ་ཀློའི་དམག་དཔུང་ཡུལ་དབུས་སུ་སླེབ་པ་བཅས་རྐྱེན་ངན་འགལ་འཛིང་གི་ཁྲོད་ནས་རྒྱ་གར་འཕགས་པའི་ཡུལ་དུ་སངས་རྒྱས་ཀྱི་བསྟན་པ་ཉིན་བཞིན་མ་བསྡད་པར་རྒུད་པ་ནས་རྒུད་པའི་ཕྱོགས་སུ་ཆས་སོང་བར་སྣང་ངོ༌། །༡རྨོ་ལ་རྗེས་འཇུག་ར་ལ་ཡ་བཏགས་པ་ཞིག ། རྗོད་བྱེད་ཐེག་ཆེན་གྱི་སྡེ་སྣོད་རང་ལྡོག་ལ་དཔྱད་ན་ཁུངས་ལྡན་མིན་པའི་ཚུལ་དེ་ལྟར་ཡིན་ལ། བརྗོད་བྱ་ཐེག་ཆེན་གྱི་རྣམ་གཞག་ཐུན་མོང་མིན་པ་རྣམས་ལ་ཡང༌། བལྟས་ན་མཚར་མཚར་ཙམ་ལས་དཔྱད་ན་སྙིང་པོ་དེ་ཙམ་མེད་པའི་ཚོར་སྣང་ཞིག་བྱུང་སྟེ། ཐེག་པ་ཆེན་པོའི་ཆོས་ཀྱི་རྩ་བ་བྱང་ཆུབ་ཀྱི་སེམས་ལ་མཚོན་ན། ཕྱོགས་དང་རིས་སུ་མ་ཆད་པར་མཁའ་མཉམ་འགྲོ་བ་ཡོངས་ཀྱི་བདེ་སྡུག་ལ་སེམས་ཁུར་གནང་བ་ནི་དངོས་གནས་རླབས་པོ་ཆེ་ཡི་ཐུགས་བསྐྱེད་ཅིག་ཡིན་པ་སྨོས་མ་དགོས་མོད། འགྲོ་བའི་བདེ་སྡུག་རང་རང་གི་ལས་ལ་རག་ལས་པའི་རིག་པའི་གཞུང་ལུགས་དེ་ཉིད་དབང་བཙན་དུ་བྱས་ནས་བཤད་ན། རླབས་ཆེན་གྱི་ཐུགས་བསྐྱེད་དེའང་སྟོང་བསམ་ཙམ་ལས་ལག་ལེན་གྱི་རིན་ཐང་ཆེར་མེད་ཅིང༌། བདག་གཞན་བརྗེ་བ་དང་བདག་བས་གཞན་གཅེས་བསྒོམ་པའི་ཐབས་ལམ་དེ་དག་ལའང་སྤགས་རང་གིས་ཟོས་རྗེས་ཐང་ཁུག་མིའི་མགོར་གཡོགས་པ་ལྟ་བུའི་གཡོ་སྒྱུའི་ཆ་ཞིག་འདྲེས་ཡོད་བཟོ་འདུག་སྟེ། རྒྱལ་ཁ་གཞན་ལ་སྤྲོད་ཁུལ་བྱས་ན་ཁེ་སྤོགས་རང་གིས་ལེན་ཐུབ་པའི་གནད་གསང་ཞིག་རིག་ནས་དེ་ལྟར་བསྒོམ་པ་ཡིན་འདུག་པས་སོ། །རྒྱུ་འབྲས་མན་ངག་བདུན་གྱི་རྩ་བ་མར་ཤེས་དྲིན་དྲན་གྱི་གདམས་ངག་འདི་ལ་ནི་གནས་ལུགས་ཅུང་ཙམ་ཡང་མི་འདུག །ཚེ་རབས་གཞན་དུ་ཕ་མ་མ་བྱས་པའི་སེམས་ཅན་སུ་ཡང་མེད་པའི་རྒྱུ་མཚན་གྱིས་ཡོད་ཚད་ད་ལྟའི་ཕ་མ་ནང་བཞིན་བརྩི་དགོས་ན། ཚེ་རབས་གཞན་དུ་དགྲ་བོ་མ་བྱས་པའི་སེམས་ཅན་སུ་ཡང་མེད་པའི་རྒྱུ་མཚན་གྱིས་ཡོད་ཚད་ད་ལྟའི་དགྲ་བོ་ནང་བཞིན་བརྩི་མི་དགོས་པའི་རྒྱུ་མཚན་ཅི་ཡོད། གཞན་དག་རང་གི་ཕ་མར་གྱུར་པའི་སྐབས་སུ་ཟས་ཀྱི་ཕུད་བྱིན། གོས་ཀྱི་རྩེས་གཡོགས་ནས་བྱམས་སྐྱོང་གནང་བ་ནང་བཞིན་རང་ཉིད་གཞན་པའི་ཕ་མར་གྱུར་སྐབས་སུ་ཡང་དེ་ལྟར་བྱས་ཡོད་ངེས་པས་ད་ནི་གཅིག་གིས་གཅིག་ལ་བྱས་ཡུས་འདོན་རྒྱུ་དང༌། སྤྲོད་ལེན་བྱ་རྒྱུ་གང་ཡང་ལྷག་མི་འདུག །དེ་ལྟར་བསམ་ན་མར་ཤེས་དྲིན་དྲན་གྱི་མན་ངག་དེ་སེམས་ཅན་གཞན་ལ་ཕན་འདོགས་རིགས་པའི་ཤེས་བྱེད་དུ་མི་འགྲོ་བའི་ཐོག་ཏུ་ད་ལྟའི་ཕ་མའི་བཀའ་དྲིན་ཀྱང་བྱས་པ་རྗེས་མེད་དུ་གཏོང་བའི་ངན་ཇུས་ཤིག་རེད། ཅེས་བཤད་འོང་ན་དེ་ལ་ལན་འདེབས་ཇི་ལྟར་དགོས་པ་ཁོ་བོས་མི་ཤེས་པར་འདུག་པས་ཤེས་མཁན་ཁྱེད་ཅག་ལ་འདྲི་བར་འདོད་དོ། །བདེན་བཞིའི་འཇུག་ལྡོག་དངོས་སྟོབས་ཀྱི་རིགས་པས་འགྲུབ་པ་བདེན་ན། གསུམ་ལ་སྐྱབས་སུ་མ་སོང་བའི་མུ་སྟེགས་པ་ལ་ཐར་ལམ་མེད་པའི་རྒྱུ་མཚན་མི་འདུག་སྟེ། ཁོ་ཚོས་ཀྱང་རིགས་པའི་ལམ་ནས་སྲིད་རྩེའི་དངོས་གཉེན་རྒྱུད་ལ་བསྐྱེད་ཆོག་པའི་ཕྱིར། དངོས་པོ་སྟོབས་ཞུགས་ལ་སྟོན་པ་དང་བསྟན་པའི་ཆ་རྐྱེན་རྩིར་མི་བཏུབ་པའི་ཕྱིར། དེས་ན་ཆོས་འདི་པ་ལས་ཕྱི་རོལ་ཏུ་གྱུར་པའི་མི་ལ་ཐར་པའི་སྐལ་པ་མེད་ཅེས་ཟེར་བ་ནི་སྒེར་གཅོད་ཀྱི་རང་གཤིས་ཕྱི་རུ་མངོན་པ་ཙམ་དུ་ཟད། འཁྲུལ་པའི་རྩ་བ་བདག་འཛིན་ཡིན་པ་བདེན་ན། དེའི་གཉེན་པོ་བདག་མེད་རྟོགས་པའི་ཤེས་རབ་གཅིག་པུས་ཆོག་གི །ལོགས་སུ་ཚོགས་བསགས་སྒྲིབ་སྦྱོང་ཞེས་པ་དེ་ཚོ་དགོས་དོན་ཅི་ཡོད། ལས་དང་ལུས་ཟད་སོགས་མི་དགོས་མི་ནུས་མི་ཤེས་པར་བཤད་པ་མིན་ནམ། བསྐལ་ཆེན་གྲངས་མེད་གསུམ་གྱི་བར་དུ་སྦྱིན་དང་བདེ་གཤེགས་མཆོད་པ་དེ་གཞན་དོན་གཟུགས་སྐུའི་རྒྱུ་ཡིན་ཟེར་ཡང༌། དེ་ལྟར་ན་གཟུགས་སྐུའི་ཡོན་ཏན་ཐུག་བཅས་སུ་ཁས་ལེན་འོས་ཏེ། རྒྱུ་ཐུག་བཅས་ཤིག་ལས་འབྲས་བུ་ཐུག་མེད་ཅིག་འོང་དོན་མེད་པའི་ཕྱིར། སངས་རྒྱས་ཐོབ་རྗེས་སུ་མཆོད་སྦྱིན་གྲངས་མེད་པ་ཞིག་གནང་བ་དེའི་ལག་རྗེས་སུ་གཟུགས་སྐུ་གཉིས་པ་ཞིག་ཀྱང་ཡོད་པར་འགྱུར་ཏེ། སློབ་པའི་དགེ་རྩ་ཆུང་ངུ་དེར་ཡང་གཟུགས་སྐུ་གཅིག་ཡོད་ན། མི་སློབ་པའི་དགེ་རྩ་རླབས་པོ་ཆེ་དེ་བར་མ་དོ་རུ་ཆུད་འཛའ་བ་འོས་མ་ཡིན་པའི་ཕྱིར། དེས་ན་སྐབས་རེར་སེམས་རྟོགས་ན་ཡེ་ཤེས་ཡིན་པར་བཤད་པ་དང༌། སྐབས་རེར་ཚོགས་མ་རྫོགས་ན་སངས་རྒྱས་མི་ཐོབ་པར་བཤད་པ་དེ་དག་ཀྱང་ནང་འགལ་ཅན་གྱི་རྣམ་གཞག་ཏུ་ངེས་སོ། །བསམ་པ་དགེ་དང་མི་དགེའི་བྱེ་བྲག་ལས་དགེ་སྡིག་གཟུགས་བརྙན་ཆེ་ཆུང་གི་རྗེས་སུ་མི་འགྲོ་བའི་ལངས་ཕྱོགས་འདིས་དོན་དངོས་སུ་ཀུན་སྤྱོད་ལ་བག་ཆགས་ངན་པ་ཞིག་བཞག་ཡོད་དེ། ནང་གི་ཀུན་སློང་གང་ཡིན་ནི་སུ་ལ་ཡང་གསལ་ཆ་མེད་པས་ཀུན་སློང་བཟང་པོ་ཡོད་ཁུལ་གྱིས་སྤྱོད་ངན་འཁྲབ་ཚད་ལ་གཞན་པས་སྟངས་འཛིན་བྱ་ཐབས་བྲལ་བས་སོ། །ལྷག་པར་དུ་གསང་སྔགས་ལུགས་ལ་རྟོགས་པའི་གདེང་དང་ལྡན་ན་ལུང་པ་དམར་པོར་བསྒྱུར་ཡང་རང་ལག་ཡིན་པའི་ཁྲིམས་ལུགས་འདིས་ཆོས་འདུལ་བའི་ལུགས་ཀྱི་དམངས་གཙོ་དང་འདྲ་མཉམ། དྲང་བདེན་བཅས་ཀྱི་ས་བོན་ཡོད་ཚད་རྩད་ནས་ཕྱུངས་ཤིང་རྨང་ནས་བསྒྱེལ། ཁྲིམས་ལུགས་འདིས་བླ་མ་དང་གོང་མ་རྣམ་པའི་མཛད་སྤྱོད་ལ་ཚད་འཛིན་ཅུང་ཙམ་ཡང་མེད་པར་དམིགས་བསལ་སྟེར་རྐྱང་བྱས་པས། ཁོང་རྣམ་ཚོའི་ཕྱི་ནང་གསང་གསུམ་གྱི་རྣམ་པར་ཐར་པ་ལ་རུལ་དྲི་དང་སྐྱུར་དྲི་འཐུལ་བའི་རྩ་བ་ཀླུ་ཡུལ་ནས་ཚུགས་ཤིང་རྩེ་མོ་ལྷ་ཡུལ་དུ་རྒྱས་པ་རེད། མཆོག་གི་སྤྲུལ་སྐུའི་རྣམ་ཐར་གྱི་སྐོར་ལ། འདས་པའི་དུས་སུ་སངས་རྒྱས་འོད་སྲུང་ཞུ་བ་དེ་འདྲ་གཏན་ནས་བྱོན་མ་མྱོང་ཞིང༌། མ་འོངས་པའི་དུས་སུའང་སངས་རྒྱས་བྱམས་པ་ཞུ་བ་དེ་འདྲ་འབྱོན་རྒྱུ་ཡོད་པའི་ཤེས་བྱེད་ཕྲ་མོ་ཙམ་ཡང་མེད། ད་ལྟའི་སངས་རྒྱས་ཤཱཀྱ་ཐུབ་པ་ཁོང་ལ་ཡབ་ཡུམ་སྲས་སྲོས་མེད། ཤ་ཁྲག་རུས་པ་མེད། བུ་ག་དང་ཁོང་སྟོང་མེད། འཁྱག་རྒྱུ་ལྟོགས་རྒྱུ་མེད། ན་རྒྱུ་ཚ་རྒྱུ་མེད། འཆི་རྒྱུ་རྒས་རྒྱུ་མེད། དེ་དག་ཡོད་ཚད་ཚུལ་བསྟན་དང་ཆོ་འཕྲུལ་ཙམ་ཡིན་ཞེས་པ་འདིས་དོན་དུ་སྟོན་པ་སངས་རྒྱས་མི་གྲལ་ནས་ཕུད་དེ་ལྷ་སྒྲུང་ཁྲོད་ཀྱི་མི་སྣ་རུ་བསྒྱུར་བ་ཡིན། མི་ཞིག་ཡིན་ཕྱིན་ཆད་ཡབ་ཡུམ་དང་སྐུ་ལུས་འདས་གྲོངས་བཅས་མེད་ཐབས་མེད་པའི་ཕྱིར། རྒྱལ་པོ་ཟས་གཙང་ནི་རྒྱ་བལ་མཚམས་ཀྱི་རྒྱལ་ཕྲན་ཆུང་ཆུང་ཞིག་ཡིན་པས། ཁོང་གི་མངའ་ཞབས་ཡོངས་སུ་བུད་མེད་ན་ཆུང་མ་བརྒྱད་ཁྲི་བཞི་སྟོང་ཡོད་མེད་ཀྱང་ཐེ་ཚོམ་ཙམ་ཡིན་ན། རྒྱལ་སྲས་དོན་གྲུབ་ལ་བཙུན་མོ་བརྒྱད་ཁྲི་བཞི་སྟོང་འཇོག་རྒྱུའི་ཆ་རྐྱེན་ག་ལ་འཛོམས། སྟོན་པའི་ཐུགས་རྒྱུད་དུ་ཤེས་བྱ་ཐམས་ཅད་མཁྱེན་པའི་རྣམ་མཁྱེན་མེད་ཀྱང་སྐྱོན་དུ་མི་ཆེ་སྟེ། །རིང་པོར་མཐོང་བའམ་མིན་ཡང་རུང༌། །འདོད་པའི་དེ་ཉིད་མཐོང་བ་ཡིན། །འདི་ཡིས་སྲིན་བུའི་གྲངས་མཁྱེན་པ། །ངེད་ལ་འགར་ཡང་ཉེར་མཁོ་མེད། ཅེས་བདེན་བཞིའི་བླང་དོར་ཐབས་དང་བཅས་པ་སྟེ་དགོས་པའི་དོན་ཀུན་མཁྱེན་པའི་རྣམ་མཁྱེན་ཡོད་ན་ཐར་འདོད་ཀྱི་བསམ་དོན་འགྲུབ་པར་མ་བཤད་དམ། དཀྱིལ་ཡངས་ཀྱི་བསམ་བློ་འདི་ཙམ་ཞིག་ཡོད་ན་ཡང་སྣོད་བཅུད་ཀྱི་ཆགས་དབྱིབས་དང༌། ཕྲ་རྡུལ་གྱི་གྲུབ་ཚུལ་སོགས་ཀྱི་ཐད་ནས་ཆོས་ཚན་གཉིས་མི་འགྲིག་བཞིན་དུ་མགོ་སྦྲེལ་བྱེད་པའི་ཐུགས་ཁུར་འོ་བརྒྱལ་དེ་འདྲ་མྱོང་དགོས་དོན་རྩ་བ་ནས་མེད། ཉན་ཐོས་སྡེ་པས་རྣམ་མཁྱེན་གྱི་གོ་དོན་ཆེད་དུ་གཟིགས་ན་གང་ཡང་མཁྱེན་ཐུབ་པ་ཞིག་ཏུ་འདོད་ཅིང༌། དེ་ཡང་ཉིན་ལན་གསུམ་མཚན་ལན་གསུམ་སྟེ་ཉིན་མཚན་དུས་དྲུག་ཏུ་འཇིག་རྟེན་ཁམས་འདིར་གཟིགས་ནས་སེམས་ཅན་སུ་ནི་དར། སུ་ནི་རྒུད་སོགས་ཞིབ་འཇུག་གནང་སྟེ་ལས་དོན་སྒྲུབ་པ་ཞིག་ཡིན་པར་བཤད་པ་འདི་ཉིད་དོན་ལ་གནས་མིན་གང་ལྟར་ཡང་རྣམ་གཞག་ཅུང་ཟད་བབ་ཆགས་པ་ཞིག་རེད། ལྷག་པར་དུ་སྡེ་པའི་ལུགས་ལ་སྟོན་པ་མྱ་ངན་ལས་འདས་རྗེས་ཆོས་འདུལ་བ་ཉིད་ཀྱིས་སྟོན་པའི་རྒྱལ་ཚབ་དང་བསྟན་པ་དམ་ཆོས་གཉིས་ཀའི་གོ་ཆོད་དགོས་པ་མ་གཏོགས། སྟོན་པ་སངས་རྒྱས་རང་ངོས་ནས་ཡེ་ཤེས་དང་ཕྲིན་ལས་ཐམས་ཅད་རྒྱུན་ཆད་འགྲོ་བར་འདོད་པའི་གྲུབ་མཐའ་འདི་ལྟོས་བཅས་ཀྱིས་བཤད་ན་ཅུང་བརྟན་བརླིང་ཅན་ཞིག་ཡིན། དེ་མིན་ཐེག་ཆེན་པའི་ལུགས་ལྟར་སངས་རྒྱས་སྔ་མ་གཅིག་ཁོ་ནའི་མཛད་ཕྲིན་ཡང་ནམ་མཁའ་ལྟར་ཀུན་ལ་ཁྱབ་ཅིང་བསྐལ་པ་ཇི་སྲིད་བར་དུ་ཚར་རྒྱུ་མེད་པ་ཞིག་ཡིན་ཚེ། སངས་རྒྱས་ཕྱི་མ་ཚོ་འབྱོན་པ་ལ་དགོས་ནུས་སྤུ་ཙམ་མི་འདུག་སྟེ། སངས་རྒྱས་སྔ་མ་དེས་བསྒྲུབ་མི་ཐུབ་པ་དང༌། མི་ཚར་བའི་ལས་ཀ་སྣ་གཅིག་ལག་ཏུ་འོང་རྒྱུ་མེད་པའི་ཕྱིར། སངས་རྒྱས་ཕྱི་མ་ཚོ་ནམ་ཡང་ལག་པས་ལག་པ་བཅངས་ཏེ་ཁ་རོག་གེར་འདུག་དགོས་པར་འགྱུར་རོ། །མཁས་དབང་དགེ་འདུན་ཆོས་འཕེལ་གྱི་ཞལ་ནས། འོག་མིན་སྟུག་པོ་བཀོད་པའི་ཞིང་ཁམས་དེ་རྒྱ་གར་ཚ་བའི་ལུང་པ་ནང་བཞིན་དུས་བཞི་དབྱེར་མེད་སྔོ་ཐེང་ངེ་བར་ཡོད་པ་ནི་ཞིང་ཁམས་དེ་འཛུགས་སྐྲུན་འཆར་འགོད་གནང་མཁན་རྒྱ་གར་བའི་མི་ཡིན་པའི་རྐྱེན་གྱིས་རེད་ལ། ངེས་པ་ལྔ་ལྡན་གྱི་ལོངས་སྐུ་དེ་རྒྱ་གར་བའི་ཡུལ་མིའི་ཆ་ལུགས་ནང་བཞིན་དར་གྱི་སྟོད་གཡོགས་སྨད་གཡོགས་དང༌། རིན་པོ་ཆེའི་རྐང་གདུབ་ལག་གདུབ་གྱོན་ནས་བཞུགས་ཡོད་པ་ནི་ལོངས་སྐུ་དེ་རྒྱ་གར་གྱི་མི་ཡི་སྐུ་སྐྱེ་ཡིན་པས་རེད། དེས་རིགས་འགྲེས་ནས་རྒྱ་ནག་པའི་མི་ཞིག་ལོངས་སྐུ་ཐོབ་པའི་དབང་དུ་བཏང་ན་ཁོས་ཨག་ཚོམ་རིང་པོ་ཞིག་བཞག་སྟེ་གསེར་འབྲུག་རིས་ཀྱི་བེར་ཆེན་ཞིག་གྱོན་ནས་སྡོད་པར་ངེས་ལ། བོད་མི་ཞིག་ཤི་ནས་འོག་མིན་དུ་སྐྱེས་པའི་དབང་དུ་བཏང་ན་ཁོས་དཔག་བསམ་ཤིང་གི་ལོ་མར་འདོད་འཇོའི་བ་མར་སྦྱར་བའི་དཀྲུག་ཇ་ཞིམ་པོ་ཞིག་འཐུང་བཞིན་བསྡད་ཡོད་རྒྱུ་རེད། ཅེས་གསུངས་པ་འདིས་ཐེག་ཆེན་པའི་ལུགས་ཀྱི་སྐུ་དང་ཞིང་ཁམས་ཡོད་ཚད་ཀྱི་དབུ་ལ་ཐོག་བརྒྱབ་པ་ཡིན་མོད། ཁོང་གི་རྗེས་འཇུག་ཏུ་རློམ་པའི་བསྟན་འཛིན་རྣམ་པས་དེ་དོན་ཟུར་ཙམ་ཡང་མ་དགོངས་པར་ད་དུང་སྲོག་བཅད་ས་ལ་བླ་འཁོར་ནས་ལུས་ཡོད་པ་འདྲ། སྟོན་པ་ཤཱཀྱ་ཐུབ་པ་ཁོང་བཟང་པོའི་བསྐལ་པ་འདི་ལ་སླར་ཡང་བྱང་ཆུབ་སྙིང་པོར་གཤེགས་པའི་ཚུལ་ཙམ་བསྟན་པ་ཡིན་གྱི། དོན་དུ་འཁོར་བ་ཐོག་མ་མེད་པ་ནས་བླ་ན་མེད་པའི་གོ་འཕང་མངོན་དུ་བྱས་ཟིན། ཞེས་པའི་སྐད་ཆ་ཞིག་ཐེག་ཆེན་པའི་ཁྲོད་དུ་ཁྱབ་འདུག་པ་འདི་ནི་ཤིན་ཏུ་མ་ལེགས་པ་ཞིག་སྟེ། དེ་ལྟར་ན་གསར་དུ་ལམ་ལ་བསླབ་ནས་ཕྱིས་སུ་སངས་རྒྱས་ཐོབ་པའི་མཚན་གཞི་འཇོག་རྒྱུ་མི་རྙེད་པར་འདུག་པའི་ཕྱིར། ངོ་མཚར་དང་ཡ་མཚན་གྱི་གཏམ་ལ་ཧ་ཅང་རྔམ་དྲགས་ན་དོན་དངོས་ཀྱི་རིན་ཐང་ཐམས་ཅད་འདི་ལྟར་ཆུད་ཟོས་སུ་འགྱུར་འགྲོ། སྐད་ཆ་འདིའི་ཤུགས་རྐྱེན་ངན་པ་ང་ཚོའི་རྒྱུད་ལ་འགོས་ཚབས་ཤིན་ཏུ་ཆེ་སྟེ། བླ་མ་སུ་ཞིག་གི་རྣམ་ཐར་འགོ་བཙུགས་མ་ཐག་ཏུ། ཁོ་བོ་ཅག་གི་འདྲེན་པ་ཐུགས་རྗེ་ཅན་འདི་ཉིད་ངེས་པའི་དོན་དུ་བསྐལ་ཆེན་གྲངས་མེད་དུ་མའི་སྔ་རོལ་ནས་སངས་རྒྱས་སུ་ཟིན་ཡང༌། དྲང་དོན་གདུལ་བྱའི་སྣང་ངོར་སླར་ཡང་ཐེག་པ་རིམ་འཛེག་གི་མཛད་པ་འདི་དང་འདི་ལྟ་བུ་བསྟན། ཞེས་པའི་ཆེ་བརྗོད་འདི་འདྲ་ཞིག་ཅིས་ཀྱང་བྱེད་དགོས་ཤིང༌། དེ་ལྟར་མིན་པར་ཚེ་འདི་རང་ལ་བསླབ་ནས་མཁས་དང་གྲུབ་པའི་གོ་འཕང་ཐོབ་པར་བྱས་ན་དེ་ནི་ཤིན་ཏུ་རླབས་ཆུང་ཞིང་ཕལ་ཆེར་སྨད་པའི་གནས་ལྟ་བུར་བརྩི། འདི་འདྲའི་གོམས་སྲོལ་ལ་བརྟེན་ནས་ཅུང་ཟད་སྐད་གྲགས་ཡོད་པའི་མི་སྣ་ཡོད་ཚད་ལྷ་འདྲེ་གདོན་བགེགས་གང་རུང་ཞིག་གི་ཆོ་འཕྲུལ་དུ་བརྩིས་ཏེ། མེས་དབོན་རྣམ་གསུམ་རིགས་གསུམ་མགོན་པོ་དང༌། འུ་དུམ་བཙན་པོ་བདུད་འདྲེའི་གླང་གོག །རྒྱ་ནག་གོང་མ་འཇམ་པའི་དབྱངས། དབྱིན་ཇིའི་རྒྱལ་མོ་རྗེ་བཙུན་སྒྲོལ་མ། ཨ་རིའི་སྲིད་འཛིན་འཇམ་དབྱངས་བཞད་པ་བཅས་ཡིན་རྒྱུར་ཐག་བཅད། འུ་ཅག་ནི་ཤ་དང་ཁྲག་ལས་གྲུབ་པའི་སྐྱེ་བོ་ཐ་མལ་པ་ཡིན་པས་ཁོ་ཚོ་ལྟར་ག་ལ་ཡོང་ཞེས་རང་གིས་རང་ལ་མགོ་ལྕག་ཚ་བེར་བ་རེ་བཞུས་ཏེ་སུས་ཀྱང་མ་བསྐུལ་བར་བྲན་འབངས་ཀྱི་བརྟུལ་ཞུགས་དང་དུ་བླངས། གཞན་པས་ང་ལ་དེ་ཙམ་གྱིས་གུས་འདུད་མ་བྱས་ཀྱང་ཆོག་ཅེས་མར་ལ་གནང་བ་བྱིན་ཡང༌། ཕྲན་ཆུང་ངས་ཁྱེད་ལ་གུས་འདུད་རབ་གཅིག་མ་ཞུས་ན་ག་ལ་འགྲིག་ཅེས་ཡར་ལ་ཞུ་བ་ཕུལ་ནས་སྤུས་མོ་ཐང་ལ་བཙུགས་ཤིང་མགོ་བོ་བྲང་ཁར་ཕབ་སྟེ་སྡོད་པར་སྤྲོ་བའི་རང་ཅག་གི་ད་ལྟའི་མི་གཤིས་སྡུག་པོ་འདི་ཉིད་བསྐྱེད་ཅིང་བསྲིང་བ་ཡིན་ནོ། །དེ་ལྟར་བརྗོད་གཞི་པོ་སྟི་ལྔ་ལས་བརྩམས་ཏེ་བརྗོད་བྱ་སངས་རྒྱས་ཆོས་ལུགས་ལ་རྟོག་གེའི་ལམ་ནས་བརྒལ་བརྟགས་ཅུང་ཟད་བྱས་པ་འདི་ནི་མཚོན་པ་ཙམ་སྟེ། ཞིབ་ཏུ་ན་ཆོས་ལུགས་འདི་ཡི་ཕྱི་ནང་བར་གསུམ་ན་ཐེར་འདོན་བྱ་རྒྱུ་གྲངས་མེད་པ་ཞིག་མཆིས་མོད། ཧ་ཅང་མང་ན་ཉོབ་པའི་རྒྱུ་ལས་དགེ་མཚན་ཆེ་བ་མ་མཐོང་བའི་ཐོག་ཏུ། དུས་ཚོད་རིན་པོ་ཆེས་གཙོས་པའི་ཆ་རྐྱེན་ཡོད་དགུས་ཀྱང་ཁོ་བོར་སྒོ་ཀུན་ནས་གཏུག་ཅིང་གཙེས་པར་གྱུར་པས་ད་ནི་དེ་ཙམ་གྱིས་ཆོག་ཤེས་པའི་བགྱི་བ་ལྷུར་བླངས་པ་ལགས་སོ། །
བླ་མས་བསྩལ་བའི་ཆོས་མིང་འབོད་ཕོད་མེད། །
ཕ་མས་གནང་བའི་གཅེས་མིང་འབོད་རྒྱུ་མེད། །
རང་གིས་བཏགས་པའི་སྨྱུག་མིང་མདའ་སྨྱུག་ཏུ། །
འབོད་པས་ས་བྱི་གསར་ཚེས་དགུ་ལ་སྦྱར། །
ལོག་ལྟའི་བསྒྲགས་ཡིག
___ རང་རྩོམ་ལོག་རྟོགས་སྙིང་སྟོབས་དང་འབྲེལ་བའི་གཏམ།
ལོག་རྟོགས་སྙིང་སྟོབས་ཞེས་པ་ནི་ཀུ་རེའི་ཚུལ་དུ་བཏགས་པའི་དྲ་མིང་ཞིག་ལས་རྩོམ་ཡིག་འདིའི་ཁ་བྱང་དངོས་མིན། འོན་ཀྱང་མིང་ཚིག་འདི་ལ་ཡིན་གཅིག་འགྲེལ་བ་ཞིག་བརྒྱབ་དགོས་པའི་དབང་དུ་བཏང་ན། སྔོན་བྱོན་སྐྱེས་ཆེན་དམ་པ་གནམ་ས་ལྟ་བུ་དག་གི་རྡོ་རྗེའི་གསུང་ལ་མཐའ་གཅིག་ཏུ་ངོ་ལོག་ཅིང༌། རྒྱབ་བསྟན་པ་འདི་གཞན་པས་བལྟས་ན་ལོག་སྤོབས་ཡ་ང་བ་ཞིག་དང༌། མི་ལོ་སྟོང་ཚོ་བརྒལ་བའི་རིང་ལ་འཇིག་རྟེན་སུས་ཀྱང་ཐུག་རེག་མ་ནུས་པའི་རྣག་ཐུམ་ཞིག་གཙག་གཤག་བཏང་བ་འདི་རང་ངོས་ནས་བལྟས་ན་སྙིང་སྟོབས་ཤིག་ཡིན་ཞེས་བཤད་ཆོག་པས་ཀུ་རེའི་ཁྲོད་དུ་བདེན་ལུགས་ཀྱང་ཏོག་ཙམ་འདྲེས་ཡོད། དེ་མིན་རང་རྒྱུད་ཀྱི་དགག་སྒྲུབ་བསམ་བློ་འདི་ལོག་རྟོགས་ཡིན་པའི་ངོས་ལེན་ཞུས་པ་མིན་ལ། ལོག་རྟོགས་ཀྱི་བློ་རིག་དེ་སྙིང་སྟོབས་སུ་ཁས་བླངས་པའང་མིན་པས། རྗེས་ཕྱོགས་དགག་ལན་འབྲི་མཁན་འདྲ་ཡོད་ཚེ། ཤིན་ཏུ་ཞིབ་མོ་རྣམ་འཐག་ཡིན་ཁུལ་གྱིས། ཐོག་མར་ལོག་རྟོགས་སྙིང་སྟོབས་ཞེས་པའི་ཁ་བྱང་འདི་མི་འཐད་དེ། ལོག་རྟོགས་ཡིན་ན་སྙིང་སྟོབས་ཡིན་པ་འགལ་བའི་ཕྱིར། ཞེས་སོགས་དོན་མེད་ཀྱི་རྩོད་རྙོག་དེ་རིགས་སློང་དོན་མེད་ཅེས་ཞུ་བ་ཡིན། མ་གཞི་དེང་སང་ངའི་སེམས་ཁམས་ཀྱི་གནས་བབ་ནི་རྩོམ་བརྒྱབ་རྒྱུའི་སྤྲོས་པ་དང་བྲལ་བའི་ཚོད་དུ་ལྷུང་ཡོད་མོད། ལོག་རྩོམ་འདི་ཟླ་བ་བདུན་བརྒྱད་ཀྱི་ཡར་སྔོན་ཞིག་ནས་འབྲི་འགོ་བཙུགས་ཚར་བས་ད་མཇུག་ཅིག་མ་བསྐྱངས་ན་ངོ་ཚ་བར་སེམས་ཏེ་ཨ་ན་ཨུ་ཚུགས་ཁོ་ན་བསྐྱོན་པའི་འབྲས་བུར་ད་ཆར་ཐབས་ཆག་ཅིག་གྲུབ་པའི་ཁུལ་ཡིན་ཡང༌། ཤུགས་ཀྱིས་བབ་པ་མིན་པར་བཙན་གྱིས་བཙིར་བའི་དབང་གིས་ཚིག་དོན་གཉིས་ཆ་ནས་རང་གིས་བསམ་ཚོད་ཙམ་ཞིག་འཁྱོངས་མི་འདུག་ཅིང༌། ཚན་པ་དང་པོ་ཙམ་མ་གཏོགས་གཞན་དག་ལ་ཞུ་དག་ཡག་པོ་ཞིག་ཀྱང་བྱ་ལོངས་མ་བྱུང་བར་འབྲི་ཚར་རིམ་བཞིན་དྲ་ཐོག་ཏུ་སྤེལ་སྟབས་ལྷག་ཏུ་མ་འདང་ས་ཡོད་སྲིད། དེའི་ཆ་ནས་ཧ་རེ་ཧུ་རེ་ཅན་གྱི་མི་ངས་ཁྱེད་ཀློག་མཁན་རྣམ་པར་ཐོག་མར་དགོངས་དག་ཞུ་བ་ཡིན། འོན་ཀྱང་རང་བཙུགས་ཀྱི་ཟམ་པར་རང་ཉིད་ཐར་དགོས་པའི་དཔེ་ལྟར་བརྗོད་བྱ་དང་རྗོད་བྱེད་གང་ལ་ཡང་སྐྱོན་དང་དྲི་མ་ཅི་ཞིག་ཡོད་ཀྱང་འགན་ཁུར་ཆ་ཚང་ལེན་ངེས་ཡིན་པ་མ་གཏོགས་ཁག་འདོགས་བྱ་ས་བཙལ་ཏེ་གཡོལ་རྩིས་མིན་པས་གོ་བ་སྒྲ་ལོག་མི་ལེན་པའི་རེ་བ་ཡོད། ངའི་གཉུག་སེམས་ཀྱི་ངོས་ནས་བཤད་ན་ཆོས་ལུགས་ལ་དགག་པ་བརྒྱབ་སྟེ་རྩ་མེད་དུ་གཏོང་དགོས་སྙམ་གྱི་མེད་ལ། ང་རང་ཉིད་ཆོས་ལུགས་ལ་མཐའ་གཅིག་ཏུ་ཞེན་པ་ལོག་པ་ཞིག་ཀྱང་མིན། ཆོས་ལུགས་ནི་མིའི་རིགས་ཀྱི་བསམ་པའི་ཟས་ཡིན་པས་མེད་པར་གཏོང་དགོས་དོན་མེད་པར་མ་ཟད་གཏོང་ཐུབ་པ་ཞིག་ཀྱང་མ་རེད། ཆོས་ལུགས་ནི་དུས་ཇི་སྲིད་ཀྱི་བར་དུ་མི་ཡུལ་དུ་དར་བར་ངེས་ཤིང་དེ་སྲིད་ཀྱི་བར་དུ་མི་རྣམས་ལ་ཞབས་ཏོག་བསྒྲུབ་པར་ནུས། མི་རྣམས་ཀྱི་ནུས་པ་ལ་ཚད་ཡོད་ཅིང་རེ་བ་ལ་ཚད་མེད། ཚད་མེད་པའི་རེ་སྟོང་ཁ་ཤས་ཆོས་ལུགས་མ་གཏོགས་གཞན་གང་གིས་ཀྱང་སྐོང་མི་ཐུབ། ཆོས་ལུགས་ཀྱི་རྣམ་གཞག་ལ་བརྟགས་ཤིང་དཔྱད་ན་དཔྱད་བཟོད་པ་ཞིག་རེད་མི་འདུག་མོད། དཔྱད་མི་བཟོད་པ་ཙམ་གྱིས་འདོར་དགོས་པའི་ངེས་པ་མེད། དགོས་མཁོ་ཡོད་ན་གནས་ལུགས་མེད་ཀྱང་ཆོག་སྟེ། སྒྱུ་རྩལ་གྱི་འཇིག་རྟེན་དེ་འཇིག་རྟེན་རྫུན་མ་ཞིག་ཡིན་པ་ཤེས་བཞིན་དུ་མི་ཚོ་དེར་འཆམ་འཆམ་འགྲོ་བཞིན་འདུག་པ་ལྟ་བུ་རེད། ང་རང་བསམ་རྒྱུ་དྲན་རྒྱུ་མང་བའི་དབང་གིས་ཁྱེད་རྣམ་པ་ལྟ་བུའི་རྨོངས་དད་བྱེད་པའི་ལས་དང་སྐལ་པ་ལྡན་མ་སོང་ཡང༌། ངས་དགོས་པའི་དབང་གིས་བཅོས་མའི་དད་པ་ཞིག་བྱེད་ཀྱིན་ཡོད་ལ། དུས་ད་ལྟའི་བར་དུ་ཕྱག་འཚལ་བ་དང་སྐྱབས་འགྲོ་འདོན་པ་སོགས་ཆོས་ལུགས་ཀྱི་བྱེད་སྒོ་ཉི་མ་གཅིག་ལའང་མཚམས་བཞག་མྱོང་མེད། བྱེད་སྒོ་འདི་དག་གིས་ང་འུ་ཐུག་ཅིང་ཐབས་ཟད་པའི་སྐབས་སུ་སེམས་གསོ་དང་རོགས་རམ་ཐོབ་པ་མ་གཏོགས་བགེགས་དང་བར་ཆད་གང་ཡང་སྟེར་གྱི་མི་འདུག །ལྷག་བསམ་རྣམ་དག་གི་སྒོ་ནས་ཆོས་ལ་དད་པ་གནང་མཁན་ཚོར་ངས་མཐའ་གཅིག་ཏུ་ཡི་རང་དང་བརྩི་བཀུར་ཞུ་བ་ལས་འཕྱ་སྨོད་དང་ཁྲེལ་དགོད་བྱེད་ཀྱིན་མེད་ལ། ཁོང་རྣམ་པའི་ལྷད་མེད་དྭངས་གཙང་གི་ཐུགས་སེམས་དེར་ངས་ཕོག་ཐུག་རྩ་བ་ནས་གཏོང་འདོད་མེད། དེ་བས་ཆོས་ལུགས་དཀྱིལ་ཡངས་ཀྱི་བསམ་བློ་མངའ་བའི་ཆོས་ལྡན་རྒྱ་ཆེའི་སེར་སྐྱ་མང་ཚོགས་ཡོངས་ལ་ངས་བྲིས་པའི་ལོག་རྩོམ་འདིས་ཐུགས་སུན་བཟོས་ཚད་ཐམས་ཅད་ལ་ནོངས་འགྱོད་ཆེན་པོས་སྙིང་ཐག་པ་ནས་དགོངས་སེལ་ཞུ་བ་ཡིན། ངས་ད་རེས་མི་འདོད་བཞིན་དུ་སངས་རྒྱས་ཆོས་ལུགས་ཀྱི་ཕྱི་ནང་ཡོད་ཚད་འདི་ལྟར་རྩ་སློག་ཏུ་གཏོང་དགོས་དོན་ནི། ཆོས་ལུགས་དེ་ཆོས་ལུགས་ཀྱི་ཚད་དུ་མི་འཇོག་པར་དངོས་ཡོད་ཀྱི་འཇིག་རྟེན་ཡོད་ཚད་ཆོས་ལུགས་ཀྱི་ཁ་འོག་ལག་འོག་ཏུ་འདུ་དགོས་པར་འདོད་པའི་རང་རེའི་རྒྱུད་ཀྱི་ཐལ་མཐའི་བསམ་བློ་འདི་ཡོ་བསྲང་བྱ་རྒྱུ་ཁ་ཚ་དགོས་གཏུག་ཡིན་པ་དང༌། རང་ཉིད་ཆོས་དད་ཆེ་མདོག་གིས་མི་གཞན་པའི་ཆོས་དད་ཀྱི་དབང་ཆ་བཙན་འཕྲོག་བྱེད་མཁན་གྱི་ཆོས་ལུགས་སྒེར་གཅོད་ཀྱི་མི་སྣ་དེ་ཚོའི་མགོ་ལ་སྟ་རེ་ཞིག་མ་བཞུས་ན་ཐབས་མེད་རེད་འདུག་པས་ཡིན། གོང་དུ་བཤད་ཚར་བ་བཞིན་ཆོས་ལུགས་ནི་འཚོ་བའི་ཁྲོད་དུ་མེད་ཐབས་མེད་པ་ཞིག་ཡིན་མོད། དངོས་ཡོད་ཀྱི་གནད་དོན་ཆོས་ལུགས་ཀྱིས་ཐག་གཅོད་བྱ་ཐབས་མེད། ཆོས་ལུགས་ནི་མིའི་ནུས་ཤུགས་མི་སླེབ་པའི་ཕྱོགས་སུ་བེད་སྤྱོད་གཏོང་རྒྱུ་ཞིག་མ་གཏོགས་མིའི་ནུས་ཤུགས་ཀྱི་ཚབས་བྱེད་དངོས་པོ་ཞིག་གཏན་ནས་མིན། ད་ལྟའི་བར་དུ་ང་ཚོས་ཁ་ཆོ་ལེས་ཚིག་ན་དཀོན་མཆོག་དང༌། འཕོང་ཤིག་གིས་ཟོས་ནའང་དཀོན་མཆོག་ཁོ་ནར་གསོལ་བ་འདེབས་པ་ལས། རང་གི་ཀླད་པ་དཀྲུག་དཀྲུག་དང༌། ལག་པ་འགུལ་སྐྱོད་གཏོང་མྱོང་མེད། རྣ་ལམ་ལ་མ་སོང་ན་འདས་པའི་མི་ལོ་སྟོང་ཕྲག་གི་རིང་འུ་ཚང་ལ་མཁས་པ་གནམ་གྱིས་ས་བཀབ་པ་ལྟ་བུ་བྱོན་ནས་གསུང་རྩོམ་བྲག་རི་བརྩིག་བརྩིག་བྱས་ཡོད་ཀྱང༌། མི་ཆོས་རིང་ལུགས་ཀྱི་མཁས་པ་གཅིག་ཁོ་ན་དང༌། འཚོ་ཐབས་སྟོན་པའི་གླེགས་བམ་ཁེར་རུ་མ་ཞིག་བགྲང་རྒྱུ་མེད་པ་འདི་ཅི་ཞིག་གིས་མ་ཉན་པ་རེད་བསམ་བློ་ཐོངས་ཤིག །ང་ཚོའང་མི་ལུས་བླངས་ཚར་བས་མི་ཚེ་སྐྱེལ་སྟངས་ཀྱི་རིག་གཞུང་ཞིག་ཅི་ལ་མི་མཁོ། ཡིན་ནའང་ང་ཚོ་ཆོས་ལུགས་ཀྱིས་བཟི་དྲགས་པས་ཡར་མར་གང་ལ་ཡང་བསམ་བློ་མ་བཏང་བར་ད་ལྟའི་བར་དུ་ནག་ཐོམ་མེར་ལུས་སོང་བ་རེད། ངས་འདི་ལྟར་བཤད་པ་ཕ་མེས་ཡང་མེས་རྣམ་པར་ལེ་བདའ་དང༌། ཁོང་རྣམ་ཚོའི་རུས་པ་ལ་ཁྲིམས་ཆད་གཏོང་དགོས་ཟེར་བ་མིན། ང་ཚོས་ལོ་རྒྱུས་ཀྱི་བསླབ་བྱ་བླངས་ནས་ལམ་ནོར་ལྡོག་ཤེས་དགོས་ཞེས་སྐུལ་མ་བྱེད་པ་ཡིན། ཆོས་གཞུང་ཁྲོད་ཀྱི་ཚད་མའི་སྐྱེས་བུ་དང༌། མཆོག་གི་སྤྲུལ་སྐུ་སོགས་ཡ་མཚན་ཅན་གྱི་རྣམ་གཞག་འདི་དག་མི་རྣམས་ཀྱི་མོས་པ་དང་རེ་བ་ཙམ་གྱི་ཚད་དུ་བཞག་ནས་དད་པ་དང་ཡིད་ཆེས་བྱས་པ་ཡིན་ན་དགག་པ་བརྒྱབ་དགོས་དོན་ཅི་ཡང་མེད་མོད། ང་ཚོས་དེ་དག་དངོས་ཡོད་ཀྱི་འཇིག་རྟེན་དུ་བེད་སྤྱོད་ཡོད་པའི་དངོས་པོ་ཞིག་ཏུ་རློམ་ནས་གཅིག་གཅིག་གཉིས་གཉིས་ལག་བསྟར་བྱེད་ཀྱིན་འདུག །དེའི་དབང་གིས་སངས་རྒྱས་ཆོས་གཞུང་དུ་ཚན་རིག་གི་ཚབས་བྱེད་ཐུབ་པའི་དངོས་པོ་སྣ་གཅིག་མེད་བཞིན་དུ་ཚན་རིག་པས་གང་ཤེས་ཆོས་ལུགས་པས་ཤེས་ཡོད་ཅེས་སྟོང་ལབ་བརྒྱབ་པ་དང༌། བྱིས་པ་སྣབས་ལུག་ཅིག་ལ་སངས་རྒྱས་གསོན་པོ་ཞེས་པའི་མིང་སྐམ་ཞིག་བཏགས་ནས་ཚེ་འདི་ཕྱི་གཉིས་ཀྱི་བློ་གཏད་ཧྲིལ་པོ་བཅོལ་བ་སོགས་མ་འོས་པ་དང་མ་འཚམས་པའི་ལས་ལམ་འདི་དག་དར་བ་རེད། ཆོས་ལུགས་ཀྱིས་བསམ་བློའི་རང་དབང་འཕྲོག་མེད་རབས་བཅོ་བརྒྱད་བརྗོད་བཞིན་འདུག་མོད་འཕྲོག་ཡོད་པ་ངས་མྱོང་བ་མངོན་སུམ་གྱིས་གྲུབ་པ་ཡིན། ང་ལ་སྐྱེས་ཐོབ་ཀྱི་ཤེས་རབ་དཀྱུས་མའི་ནང་གི་ཆེས་དཀྱུས་མ་ཞིག་ལས་མེད་ཅིང༌། མི་ཚེ་འདིར་སློབ་སྦྱོང་བྱས་ཚད་བསྡོམས་བཞག་ན་མི་ལོ་དྲུག་ཟིན་མིན་ཙམ་ཡིན། དེའི་རིང་ལ་ཡང་སྔོན་གྱི་མཁས་པའི་རྣམ་ཐར་ནང་བཞིན་ཉིན་མཚན་ངོ་མི་ཤེས་པའི་འབད་བརྩོན་དེ་འདྲའི་ཆ་ཡི་ཆ་ཤས་ཙམ་ཡང་འཇོན་མ་སོང༌། འོན་ཀྱང་རང་དབང་གི་བློ་ཁ་སངས་རྒྱས་ཆོས་གཞུང་ལ་བསྐོར་བ་ཙམ་གྱིས་མ་འདང་ས་དང་མ་འགྲིག་ས་བརྩི་མི་ཐོན་པ་ཙམ་མཐོང་འོང་གི་འདུག །འོ་ན་སྔོན་གྱི་མཁས་པ་མི་ཚེ་ཐོས་པ་ལ་ཟད་པའི་སྦྱངས་པ་ཅན། བཀའ་འགྱུར་ཐུགས་ཐོག་ནས་ཐོན་པའི་བློ་རིག་ཅན། རྗེ་བཙུན་འཇམ་དབྱངས་ཀྱང་ཡིད་སྨོན་ཤོར་དགོས་པའི་མཁྱེན་རབ་ཅན་དེ་ཚོས། ཆོས་ལུགས་འདིའི་ཞན་ཆ་སྤུ་ཙམ་མཐོང་མ་ཐུབ་པ་དེ་བསམ་བློའི་རང་དབང་མེད་པའི་སྐྱོན་མིན་ན་དབུ་ས་འོག་ཏུ་བཅུག་ཅིང་སྤྱན་བཙུམས་ནས་བཞུགས་པའི་སྐྱོན་ཡིན་ནམ། བོད་ཀྱི་མཁས་གྲུབ་ཆེན་པོ་ཀརྨ་པ། ས་སྐྱ་པ། ཙོང་ཁ་པ་སོགས་ཡོད་དོ་ཅོག་རོ་སྔོན་ལ་ཕུད་ནས་སྐར་མ་རྗེས་ལ་ལྟ་མཁན་རྐྱང་རྐྱང་མ་གཏོགས། བསྲེགས་བཅད་བརྡར་བའི་གསེར་བཞིན་དུ་ལེགས་པར་བརྟགས་ཤིང་དཔྱད་རྗེས་ད་གཟོད་དང་དུ་བླངས་པའི་རྣམ་ཐར་སུ་ཞིག་ལ་མཇལ་རྒྱུ་ཡོད། དགེ་ལྡན་པའི་གྲལ་གདན་སྟེང་དུ་སྡོད་ཚད་ཀྱིས་རྗེ་ཙོང་ཁ་པ་ལ་རྫུན་ཚིག་མི་སྲིད་པར་འདོད་ཅིང༌། སྔ་རབས་པའི་ལུས་བླངས་ཚད་ཀྱིས་རྗེ་ཙོང་ཁ་པ་ནི་རྫུན་གྱི་རྐྱལ་པ་ཞིག་ཏུ་རྩི་སྲོལ་ཡོད། དེ་ཡང་ངེད་ཚང་ལ་ཕྱོགས་རྒྱུག་མཁན་མ་གཏོགས་རང་ཚུགས་ཟིན་པའི་མི་མེད་སོང་བས་ལན་པ་རེད། སངས་རྒྱས་ཆོས་ལུགས་ལ་སྒེར་གཅོད་ཀྱི་རང་གཤིས་མེད་པ་བདེན་ན། སོ་སོའི་བསམ་ཚུལ་ཤོད་མཁན་གྱི་མི་རེ་གཉིས་རིག་མ་ཐག །ཆོས་པ་ཚོའི་ངོ་གདོང་དེ་ཇ་མཛོ་བཅོ་བརྒྱད་ཆུ་ལ་ཤོར་སོང་བ་ལྟར་ཅི་ལ་ལོག་འགྲོ་བ་རེད། མི་འཁྱག་ཁ་ནས་སྨྲས་ཀྱང་འཁྱག་འདར་ལུས་ལ་རྒྱུག །ཅེས་པ་ལྟར་ང་ཚོའི་བསམ་བློ་གུ་ཡངས་ལོས་དེ་ང་ཚོ་རང་གི་ངོ་གདོང་འདིས་གསལ་བཤད་བྱེད་ཀྱིན་མི་འདུག་གམ། ཉེ་ཆར་ཞོགས་དུང་སོགས་ཀྱིས་ཀྱང་སངས་རྒྱས་ཆོས་ལུགས་ལ་བརྟེན་ནས་འཇིག་རྟེན་འཚོ་བའི་གནད་དོན་ཐག་གཅོད་མི་ཐུབ་པར་བཤད་པ་ཙམ་ལས། ཆོས་ལུགས་རང་ངོས་ཀྱི་རིན་ཐང་ངོ་མ་སྟེ་གཞི་ལམ་འབྲས་གསུམ་གྱི་རྣམ་གཞག་གང་ལ་ཡང་སྡུག་ནད་མི་ཁྱག་པའི་དགག་པ་ཚབས་ཆེན་ཞིག་བརྒྱབ་མི་འདུག་མོད། གནམ་འོག་འདིར་ང་མིན་ན་སུ་ཡིན་སྙམ་པའི་རང་མཐོང་ཅན་གྱི་རང་རེའི་མཁས་པ་དེ་ཚོས། སངས་རྒྱས་ཆོས་ལུགས་མེད་ན་འཛམ་གླིང་འདི་ཚར་འགྲོ་ཚུལ་དང༌། སངས་རྒྱས་ཆོས་ལུགས་ཀྱི་ནང་དུ་མ་འདུས་པའི་ཤེས་བྱ་སྣ་གཅིག་མེད་ཚུལ་དང༌། ལྟ་ཚུལ་གསར་པ་དེ་རིགས་ལ་ར་མ་ཞིག་གི་རིན་བབ་ཀྱང་མེད་ཚུལ་སོགས་འར་འཇུན་དང་རྫིག་གཏམ་ཁོ་ནས་ཞོགས་དུང་སོགས་ས་འོག་གི་འཇིག་རྟེན་དུ་བརྫངས་འགྲོ་ལ་ཁད་བྱེད་ཀྱིན་འདུག །ཆོས་པ་དེ་ཚོས་རླབས་རྒྱག་རྒྱུ་མང་དྲགས་པའི་དབང་གིས། ཞོགས་དུང་སོགས་ཀྱིས་ཀྱང་རིགས་པའི་གཞུང་ལུགས་ཀྱི་ཐོག་ནས་བཤད་ན་སངས་རྒྱས་ཆོས་ལུགས་འདིར་ལྗིད་གོག་རབ་གཅིག་ཡོད་རྒྱུ་རེད་སྙམ་ནས་ཞེད་སྣང་ལངས་བཞིན་ཡོད་པ་འདྲ། དོན་དངོས་སུ་རིགས་པའི་ལམ་ནས་བརྟག་ན་ཡང་སངས་རྒྱས་ཆོས་ལུགས་འདི་ཆོས་པ་ཚོས་བཤད་པ་ནང་བཞིན་སྐྱོན་ཀུན་ཟད་དང་ཡོན་ཏན་ཀུན་ལྡན་ཞིག་རྩ་བ་ནས་མ་རེད་ལ། རང་རེའི་མཁས་པ་རྣམ་པ་ནི་རིགས་ལམ་སྐམ་པོ་ཁོ་ནར་འདྲེས་ཤིང་འགྲོགས་ནས་འཚར་ལོངས་བྱུང་བ་ཞིག་ཡིན་སྟབས། རིགས་ལམ་གྱི་ཐོག་ནས་ཡ་ལན་ནན་པོ་ཞིག་མ་འཕྲོད་ན་ཁོ་ཚོའི་རྒྱུད་ཀྱི་བླུན་སྤོབས་དེ་ནམ་ཡང་གཞོམ་མི་ཐུབ། དེ་བས་ད་རེས་ཁོ་བོས་སྲོལ་རྒྱུན་གྱི་རིགས་པའི་འགྲོ་སྟངས་དེ་རང་གཞིར་བཞག་གི་ཐོག་ནས་ཆོས་ལུགས་འདིའི་ནང་སྙིང་ཆ་ཚང་ཕྱི་རུ་བྲུས་པ་ཡིན་ལ། ད་དུང་དུས་ཇི་སྲིད་དུ་རང་རེའི་ཆོས་ལུགས་འདིས་སྒེར་གཅོད་ཀྱི་རང་གཤིས་ངན་པ་འདི་མ་བསྐྱུར་བ་དང༌། རང་རེའི་ཆོས་པ་ཚོས་རང་ལྟ་མཆོག་འཛིན་གྱི་བསམ་བློ་རེངས་པོ་འདི་མ་དོར་བ་དང༌། ཆོས་ལུགས་ཀྱི་དད་མོས་དེ་མི་སྒེར་གྱི་གནད་དོན་ཞིག་ཏུ་མ་ཆགས་པའི་དུས་དེ་སྲིད་དུ། ང་ཚོས་ང་ཚོའི་ཆོས་ལུགས་འདི་དགྲ་བོའི་དྭངས་མར་བརྩིས་ཏེ་ཡ་ང་སྙིང་རྗེ་མེད་པའི་སྒོ་ནས་དགག་རྒྱག་དང་འཐབ་རྩོད་བྱ་དགོས། དེ་ལ་བརྟེན་ནས་ཕྱོགས་ཞེན་ཅན་གྱི་ཆོས་པ་ཚོ་མ་དགའ་ནས་གས་སོང་ནའང་འདྲ། མ་སྐྱིད་ནས་ཤི་སོང་ནའང་འདྲ། ང་ཚོས་སེམས་གསོ་དང་གུ་ཡངས་གཏོང་ཚོད་མེད། ཕྱོགས་ཞེན་ཅན་གྱི་ཆོས་པ་ཚོས། ང་ཚོ་ལ་ལྟ་ལོག །དམ་ཉམས། བསྟན་བཤིག་སོགས་ཀྱི་མིང་ངན་འདོགས་ཤིང་དམྱལ་བ་ཟངས་དམར་མའི་མཐིལ་དུ་འབྱར་འགྲོ་ཚུལ་སོགས་ཀྱི་འཇིགས་སྣང་སྐུལ་བཞིན་ཡོད་མོད། ང་ཚོས་མིང་ངན་འདི་དག་དགའ་བཞིན་དང་དུ་ལེན་འདོད་ཅིང༌། དམྱལ་བ་ཟངས་དམར་མའི་མཐིལ་དུ་སྤྲོ་བཞིན་འགྲོ་བར་ཕོད། སྐད་ཆ་འདི་དག་གིས་ནུས་པ་མ་ཐོན་པ་ཤེས་རྗེས། ཁོ་ཚོས་དེང་སང་དམར་སྲུང་མི་སྣ་དང༌། སྲིད་གཞུང་གི་རྒྱུག་ཁྱི། དངུལ་ལོའི་བྲན་གཡོག །ཨ་མའི་ནུ་མ་འཆའ་མཁན་སོགས་དཔྱིད་ཉི་རིང་མོ་ལ་དྲན་མི་དགོས་སྟོན་གནམ་ཁྲ་མོ་ལ་རྨིས་ཀྱང་མ་མྱོང་བའི་ནག་ཉེས་དང་གླེང་ཕྱོགས་སྙིང་ལ་གྲི་ཡོག་པ་ལྟ་བུ་རེ་བཟོ་འོང་གི་འདུག །ནག་ཉེས་དང་གླེང་ཕྱོགས་ཇི་ཙམ་མང་བ་དེ་ཙམ་གྱིས་ང་ཚོའི་འགྲོ་སྟངས་འདི་འགྲིག་བསྡད་ཡོད་པའི་དཔང་རྟགས་བསྟན་པ་ཡིན། རྒྱུ་མཚན་ནི་ང་ཚོས་མི་མ་བསད། རྟ་མ་བཅག །བླ་མ་བཙོངས་ན་ཡང་དྲན་ཚུལ་ཁ་ནས་ཐལ་བ་ཙམ་གྱིས་ང་ཚོས་ནག་ཉེས་འདི་ཙམ་ཞིག་ཁུར་དགོས་བྱུང་བ་རེད། འདིས་ང་ཚོའི་སྤྱི་ཚོགས་ཀྱི་གནས་བབ་ནི་མ་རུང་པ་ཞིག་དང༌། ང་ཚོས་མ་རུང་བའི་གནས་བབ་འདི་ལ་རྒོལ་འཛིང་བྱེད་པ་ནི་དོན་སྙིང་རི་བས་ཀྱང་ཆེ་ངེས་པའི་དངོས་ར་འཕྲོད་པ་ཡིན། ཆོས་ལུགས་ཀྱི་ལྟ་བ་ཏོག་ཙམ་མཐུན་མིན་བྱུང་འཕྲལ་ཁོ་ཚོས་མི་རིགས་ཀྱི་བརྩེ་སེམས་སྐྱག་པ་བསྐྱུར་བསྐྱུར་བྱས་ནས་ང་ཚོ་ཕྱིར་འབུད་གཏོང་ཐབས་བྱེད་ཀྱིན་འདུག །འདིས་ཀྱང་དོན་དུ་སུ་ཞིག་གིས་མི་རིགས་དང་རྒྱལ་ཁབ་འཚོང་རྩིས་ཡོད་པ་ཤེས་ཐུབ། མདོར་བསྡུས་ནས་བཤད་ན་ད་སྔོན་ཁོ་ཚོས་བཙན་ཚོད་ཟིན་མ་སོང་བས་ད་རེས་བཙན་ཚོད་མེད་ས་ལ་བརྡབ་པ་རེད། རྒྱུ་མཚན་རྒྱུ་མཚན་ཟེར་མཁན་དེ་ཚོ་ད་ནི་རྒྱུ་མཚན་ལ་གཡོལ་ནས་མ་འདུག་ཅིག །དགག་རྩོམ་འདི་ལ་ལན་མ་བྱུང་ན་ལན་མ་ཐེབས་པ་ལས་མ་བཏབ་པའི་གྲས་སུ་བརྩི་རྒྱུ་མིན། ཚིག་སྤུ་གཏོག་ལ་དགའ་བའི་དགེ་ལྡན་པ་ཚོས་ཚིག་སྐྱོན་ཐོངས། དོན་དམར་འཇུ་ལ་མཁས་པའི་རྙིང་མ་པ་ཚོས་དོན་སྐྱོན་ཚོལ། ཡུལ་ལ་དགྲ་བྱུང་ན་རྔ་འབྱར་ཁྱི་ཡིན་ནའང་ཟུག་དགོས་པས་འཆུགས་མི་ཉན། ལྷག་པར་དུ་བསྟན་པའི་ནང་སྙིང་དོན་དམ་སྟོང་ཉིད་ཀྱི་སྐོར་ནས་གླེང་དང༌། ཁྱེད་ཚོས་ཕྱོགས་འདི་ནས་ཤོར་ན་ཤོར་བ་ཡིན་ལ། ང་རང་ཕྱོགས་འདི་ནས་སྐ་རགས་མི་བོར་བ་ཕོ་བ་ལ་ཡིད་ཆེས་ཡོད། ལོག་རྟོགས་སྙིང་སྟོབས་བརྒྱ་ཆའི་ལྔ་བཅུ་ཡན་ཆོད་ཚར་གཅོད་ཐུབ་མཁན་ཞིག་བྱུང་ཚེ། ངས་མི་ལོ་སུམ་ཅུ་ཁ་ལྷག་གི་རིང་ལ་རྩམ་པ་ཚོད་མེད་ཅིག་ཟོས་པ་དེ་ཡོངས་རྫོགས་འཕྲོ་བརླག་ཏུ་སོང་བའི་གསལ་བསྒྲགས་སྤེལ་ངེས་ཡིན། སྤྱིར་བསྟན་པ་དཔང་དུ་བཙུགས་ནས་རྩོད་པ་བརྒྱབ་པ་དང༌། རྩོད་པ་ཤོར་ཚེ་བསྟན་བཅོས་ཁྱི་ཡི་རྔ་མར་བཏགས་ཤིང༌། རྩོམ་མཁན་གྱི་ལག་པ་གཅོད་པ་སོགས་ནི་ཤིན་ཏུ་གུ་དོག་པའི་ལས་སྟངས་ཡིན་པས། རིག་གནས་དཀྱིལ་ཡངས་ཀྱི་ཁོར་ཡུག་ན་སྐད་ཆ་བཙོག་པ་འདི་རིགས་ནམ་ཡང་འཆད་མི་འོས་ཀྱང༌། ང་ཚོའི་རྣ་རྩར་སྐད་ཆ་བཙོག་ཙམ་མ་བཤད་ན་གོ་བརྡ་མི་འཕྲོད་པར་འདུག་གོ །འདི་དག་གཙོ་བོ་མཁན་པོ་ཚུལ་ཁྲིམས་བློ་གྲོས་མཆོག་ལ་ཞུས་པ་ཡིན། མཁས་དབང་ཁོང་གི་སྐུ་གསུང་ཐུགས་གསུམ་གྱི་ཡོན་ཏན་ལ་ང་རང་དགའ་ཞིང་གུས་པ་ལ་ནི་ཚོད་གཅིག་མེད་མོད། ངན་མཚང་ཡོད་རྒུ་ཤི་སྦས་རོ་སྦས་གནང་བའི་ཁོང་གི་རིགས་ཞེན་ཆོས་ཞེན་དེ་ལ་ང་དེ་ཙམ་མི་དགའ་ཞིང༌། ངས་བོས་པའི་གཏམ་ལ་ཨ་ལན་ཞིག་ཡོང་བའི་རེ་བའང་ཁོང་གཅིག་པུ་ལ་ཆེ་བས་ཡིན། དེ་འོག་ཨ་མདོའི་ཁ་སྐད་དུ་ཨ་ལགས་དོར་ཞི་ཞུ་བའི་སྐྱ་བོ་ཆོས་སྨྲ་ཞིག་འདུག་པ་དེ་ལའང་སྤྲིངས་པ་ཡིན། ཁོང་ནི་བོད་སྔ་ཕྱི་གཉིས་ཀྱི་བར་ན་ཡང་ཆགས་སྡང་མེ་ལྟར་འབར་བའི་ཕྱོགས་རིས་ཅན་ཞིག་ཡིན་པས། གདོན་འདྲེ་མི་ཡུལ་དུ་སླེབ་པ་ལྟ་བུའི་ཁོ་བོ་གཟིགས་པ་ཡིན་ན་འཕག་འཚག་སྟོབས་ཅན་ཞིག་བརྒྱབ་རྒྱུ་ལོས་ཡོད་སྙམ་དུ་འདོད་པ་ཡིན། དེ་མིན་ལྡོང་ཡོན་ཏན་དང་ཀླུ་ཚང་རྒྱ་གྲོལ་སོགས་ལ་ཡང་གོ་ཙམ་བྱེད་དགོས་ཡོད། ཡིན་ནའང་ཁོ་ཚོའི་གྲས་ཀྱིས་ཁོ་བོར་ཡ་ལན་ཚ་མོ་ཞིག་འཕྲོད་ཨེ་ཡོང་སྙམ་པའི་རེ་དོགས་གང་ཡང་བྱེད་ཀྱིན་མེད། ད་དུང་མིང་མ་སྨོས་ཀྱང་སུ་ཞིག་གི་མཚང་དུ་ཕོག་པའི་མི་དེ་དག་རང་རྩོམ་ལོག་རྟོགས་སྙིང་སྟོབས་འདིའི་ཆེད་དུ་བྱ་བའི་གདུལ་བྱ་དང༌། དགྲ་བོ་གཉིས་ཀ་ཡིན་པས་དེ་ཀུན་ལ་ཚག་སྒྲ་དང་ཚིག་སྒྲ་ཅི་ཙམ་གྲག་རྒྱུ་འདུག་ཁོ་བོས་ཉན་རྣ་དང་ངང་སྒུག་བྱས་ནས་བསྡད་ཡོད་དོ། །
ས་བྱི་དང་པོའི་གནམ་གང་ཉིན་མོར་བྲིས།
ཁོ་བོའི་ཟིན་བྲིས་ནང་གི་དཔྱད་རྩོམ་ཚོའི་བདག་དབང་ཆ་ཚང་སྐུ་ཞབས་བྱང་སྐར་ལགས་སུ་ཕུལ་བ་ཡིན་པས་ཕྱིན་ཆད་གཞན་པས་རང་གར་བཀོལ་སྤྱོད་མི་གནང་བར་ཞུ།
གྲོགས་མདའ་སྨྱུག་གི་རེ་བ་བཞིན་དུ་བདག་མི་ཁོམ་པའི་རྒྱལ་སྲས་ནས་སྐུ་ཞབས་བྱང་སྐར་ལགས་ལ་དགོངས་འཁྲོལ་གཙང་མར་ཞུ་བ་ཡིན་པས། ཉིད་ཀྱིས་ནམ་མཐོང་ལ་ཨ་ཁུར་གུ་ཡངས་ཤིག་ཡོད་པར་ཞུ། རྩོམ་རིང་འདི་བདག་གིས་ཧ་ཅང་གཟབ་ནན་གྱིས་ཡིག་གཟུགས་བརྗེ་བསྒྱུར་དང་དག་བསྒྲིགས་ཞིབ་ཏུ་བརྒྱབ་སྟེ་སེང་རྡོར་དྲ་བར་ལེགས་སྐྱེས་སུ་ཕུལ་བ་ཡིན་པས། གཞན་དག་གིས་གང་བྱུང་དུ་བརྒྱུད་འགོད་བྱས་ཏེ་བསྒྲིགས་ནོར་དང་ཡིག་འཆལ་མི་འབྱུང་བར་ཐ་ཚིག་ནན་དུ་སྤེལ་བ་ཡིན།
སེང་རྡོར་དྲྭ་བ་ནས་དྲངས། སེང་རྡོར། པར།13195768852 QQ:741041516
བསམ་ཚུལ་འབྲི།
སྡེ་རོང་ཚེ་རིང་དོན་འགྲུབ་རྩོམ།