མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།
༄༅། །མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།
སྤྱི་ལོ་ ༡༩༣༦ ལོར་ཁམས་སྡེ་དགེ་འཇོ་མདའི་ཁོངས་རི་ཕུ་ཞེས་པར་ཡབ་རྡོ་རྗེ་དོན་གྲུབ་དང་། ཡུམ་ཚེ་མཚོ་གཉིས་ཀྱི་སྲས་སུ་སྐུ་འཁྲུང་། དགུང་གྲངས་བརྒྱད་དགུ་ཙམ་ནས་ཕྱུགས་འཚོ་བའི་ཞོར་དུ་ཞང་པོ་བླ་མ་ཆོས་བཟང་ཞུ་བ་ལས་འབྲི་ཀློག་སོགས་ལེགས་པར་སྦྱངས། བཅུ་བཞི་སྐོར་ནས་ལྷ་ལྡན་ཕྱོགས་སུ་ཕེབས་ཏེ་རིས་མེད་སྐྱེས་ཆེན་དུ་མ་མཉེས་པ་གསུམ་གྱིས་བསྟེན་ཅིང་ཉིན་མཚན་ལྟོས་མེད་ཀྱི་སྒོ་ནས་སློབ་གཉེར་མང་དུ་གནང་། ༡༩༥༣ ལོར་ཞེ་ཆེན་ཀོང་སྤྲུལ་རིན་པོ་ཆེའི་མདུན་ནས་ཚིགས་སྔ་མ་དགེ་ཚུལ་གྱི་སྡོམ་པ་བཞེས། ༡༩༥༩ ལོར་བཙན་བྱོལ་དུ་ཕེབས། ༧ སྐྱབས་རྗེ་མཁྱེན་བརྩེ་རིན་པོ་ཆེའི་སྐུ་མདུན་ནས་རྩ་རྒྱུད་གསང་བ་སྙིང་པོ་དང་། གདམས་ངག་མཛོད། བཀའ་བརྒྱུད་སྔགས་མཛོད། གཏེར་མཛོད། ཡོན་ཏན་མཛོད། སྡོམ་གསུམ་དཔག་སྙེ། ཀུན་བཟང་བླ་མའི་ཞལ་ལུང་སོགས་མདོ་སྔགས་ཀྱི་ཆོས་མང་དུ་གསན། གཞན་ཡང་སྔ་ཕྱི་ཅི་རིགས་སུ་༧ སྐྱབས་རྗེ་བདུད་འཇོམས་རིན་པོ་ཆེ་དང་། ༧སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེ་རྣམ་གཉིས་ཀྱི་མདུན་ནས་རིན་ཆེན་གཏེར་མཛོད་ཆེན་མོའི་དབང་ལུང་སོགས་དབང་བཀའ་དུ་མ་དང་། ༧ སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེའི་སྐུ་མདུན་ནས་བྱང་གཏེར་ཡོངས་རྫོགས་ཀྱི་དབང་ལུང་གསན།
༡༩༦༨ ལོར་ ༧ སྐྱབས་རྗེ་གྲུབ་དབང་རིན་པོ་ཆེས་བཀས་བསྐུལ་བ་ལྟར་དགོན་འདིར་ཞབས་སོར་འཁོད། དེ་སྐབས་བཤད་གྲྭ་ཟུར་བཙུགས་མེད་ཀྱང་ལོ་ཆུང་བློ་གསལ་གྲྭ་བཙུན་རྣམས་ལ་རིག་གནས་སོགས་སློབ་ཁྲིད་གནང་སྟེ་ལོ་ཤས་བཞུགས། ༡༩༧༨ ལོར་མཐོ་སློབ་འདི་ཉིད་དབུ་བརྙེས་པ་ནས་བཟུང་ད་ལྟ་བར་རྙེད་བདེ་གྲགས་བསྟོད་སོགས་རྒྱབ་ཏུ་བོར་ཏེ། རྒྱལ་བསྟན་སྤྱི་དང་ཁྱད་པར་ཆེ་བ་དྲུག་ལྡན་
གྱི་སྔ་འགྱུར་བའི་བསྟན་པ་ཁོ་ན་ཐུགས་ལ་བཞག་སྟེ་སྐུ་ངལ་འཛེམས་མེད་ཐོག་མཐོ་སློབ་ཆེན་པོ་འདིའི་མཚོན་པའི་དད་ལྡན་སློབ་གཉེར་བ་རྣམས་ལ་། ཐུན་མོང་སུམ་རྟགས་དག་གསུམ་དང་སྙན་ངག ཐུན་མིན་གཞུང་ཆེན་བཅུ་གསུམ་གཙོས་ཡོན་ཏན་མཛོད། རྩ་རྒྱུད་གསང་བ་སྙིང་པོའི་སྤྱི་དོན་འོད་གསལ་སྙིང་པོ། ངལ་གསོ་སྐོར་གསུམ། མདོ་ཚོགས་ཆེན་འདུས་པ། ཐེག་ཆེན་ཚུལ་འཇུག བརྒལ་ལན་རྣམ་གསུམ་སོགས་སྔ་འགྱུར་རིང་ལུགས་དྲི་མ་མེད་པའི་མདོ་སྔགས་རྒྱ་མཚོའི་བཀའ་ཁྲིད་གནང་བ་དང་། ཨོ་རྒྱན་མ་ཧཱ་གུ་རུའི་རྣམ་ཐར། བདེན་གཉིས་རྣམ་གཞག བློ་རིགས། རྟགས་རིགས། མཚན་ཉིད་རིགས་པ་བློ་ཡི་ཉིན་བྱེད་སོགས་བསྟན་བཅོས་དུ་མ་ལྗགས་རྩོམ་གནང་། མདོར་ན་སྔོན་ནས་ད་ལྟའི་བར་བཤད་གྲྭ་འདིར་ཐུགས་བརྩེའི་སྒོ་ནས་འཛིན་སྐྱོང་གནང་བ་སོགས་བཀའ་དྲིན་གཞལ་བར་དཀའ་བའོ། ། ། །
རྣམ་གྲོལ་གླིང་ནས་སྔ་འགྱུར་རིག་མཛོད་རྩོམ་སྒྲིག་ལྷན་ཁང་གི་བགྲང་བྱ་ཉེར་ལྔ་འཁོར་བའི་དྲན་དེབ་ལས་ཟུར་བཀོལ་བྱས།
བསམ་ཚུལ་འབྲི།
མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
འབྲེལ་ཡོད་ཀྱི་རྩོམ་གཞན།
-
༧སྐྱབས་རྗེ་ཁམས་སྤྲུལ་རིན་པོ་ཆེ་དགོངས་པ་གཞན་དོན་དུ་གཤེགས་པར་མྱ་ངན་དང་གདུང་སེམས་མཉམ་བསྐྱེད་ཞུ་བཞིན་ཡོད།
-
༈ འཕགས་ཡུལ་རྫོང་སར་བཤད་གྲྭའི་མཁན་ཆེན་ཀུན་དགའ་དབང་ཕྱུག་མཆོག་གི་མཛད་རྣམ།
-
འཛི་སྒར་བླ་མ་དབང་རྡོར་རིན་པོ་ཆེའི་རྣམ་ཐར།
-
མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
-
མཁས་དབང་ནམ་མཁའི་ནོར་བུ་ལ་ཨི་ཊ་ལིའི་མི་སེར་གྱི་གཟེངས་རྟགས་མཐོ་ཤོས་དེ་ཕུལ།