མཁན་ཆེན་གཞན་དགའ་རིན་པོ་ཆེ།
༈ རྫོགས་ཆེན་མཁན་རིན་པོ་ཆེ་གཞན་ཕན་ཆོས་ཀྱི་སྣང་བའམ་མཁན་ཆེན་གཞན་དགའ་རིན་པོ་ཆེ་ནི། རྫོགས་ཆེན་རང་གི་ལྷ་སྡེ་འབྲོག་རུ་མ་ཞེས་པའི་ནང་དུ། རྒྱ་རྐོང་ཚང་ཞེས་རིགས་རུས་ཕུན་སུམ་ཚོགས་པར། རབ་བྱུང་བཅོ་ལྔ་པའི་ལྕགས་ལུག་སྤྱི་ལོ་ ༡༨༧༡ ལོར་སྐུ་བལྟམས། སྐུ་ཆུང་ངུའི་དུས་སུ་སྦས་ཚུལ་འཇིག་རྟེན་ཕལ་པའི་ཚུལ་གྱིས་དགུང་ལོ་སུམ་བཅུ་བར་བཞུགས་ཤིང་། ཉིན་ཞག་གཅིག་གི་ལྟོ་ཆས་དང་ཐ་ན་ཞལ་ཕོར་ཙམ་ཡང་མ་བསྣམས་པར་རི་དྭགས་རྙི་ནས་ཤོར་བ་ལྟར། རྫ་སྟོད་དུ་དཔལ་སྤྲུལ་རིན་པོ་ཆེའི་མདུན་དུ་བཅར། དེ་ནས་བརྒྱུད་ཕྱག་བྲིས་བཅས་དབོན་བསྟན་འཛིན་ནོར་བུའི་མདུན་དུ་བརྫངས། དབོན་རིན་པོ་ཆེ་ནས་རང་གི་ཞང་པོ་རྒྱལ་སྲས་པའི་སྐུ་སྐྱེ་ཡིན་པ་སྔོན་གནས་རྗེས་དགོངས་ཀྱིས་ཐུགས་དགྱེས་བརྩེ་དང་བཅས་རྗེས་སུ་བཟུང་། འབྲི་ཀློག་ནས་བཟུང་བསླབ་སྦྱང་མཛད་དེ་ཟླ་ཤས་སོང་མཚམས་དབྱངས་ཅན་དཀར་མོའི་རྗེས་གནང་བྱིན་ཏེ་དབྱངས་ཅན་མ་བསྒྲུབས་པ་ལས་བདུན་ཕྲག་གཉིས་ཙམ་ནས་གྲུབ་པའི་རྟགས་ཐོན། ཆོས་གྲོགས་རྙིང་པ་མཁན་ཡོན་ཏན་རྒྱ་མཚོ་སོགས་མཁས་ཆེན་རྣམས་ནས་ཀྱང་བསྒྲུན་དུ་མེད་པའི་གཟུངས་སྤོབས་བློ་གྲོས་ཀྱི་གཏེར་གྲོལ་ཏེ་མཁས་པའི་ཡང་རྩེར་སོན། རབ་ཏུ་བྱུང་ནས་མཚན་གཞན་ཕན་ཆོས་ཀྱི་སྣང་བ་ཞེས་གོང་མའི་མཚན་གསོལ་དང་སྦྲགས་དོན་གྱི་རྒྱལ་ཚབ་ཏུ་མངའ་གསོལ་ནས་བསྟན་པའི་གཉེར་ཁ་གཏད་པས། རང་གཞན་གྲུབ་མཐའི་འདོད་ཞེན་གྱི་ཕྱོགས་སུ་ལྷུང་བར་མཁས་པ་ཀུན་གྱིས་གྲུབ་མཐའི་གཏད་སོ་རྒྱ་གར་མཁས་པའི་ལེགས་བཤད་ཀྱི་བཅུད་ཕྱུང་སྟེ། གཞུང་ཆེན་བཅུ་གསུམ་ཆ་ལག་དང་བཅས་མཆན་གྱིས་བཀྲལ་ནས་བསྟན་འགྲོའི་བཙས་སུ་གསར་བསྐྲུན་མཛད་དེ་རྫོགས་ཆེན་དཔལ་སེངྒེའི་རིའི་ཆོས་གྲྭ་བཙོ་བོར་སྨོས་པའི་དགོན་སྡེ་དང་ས་གནས་སོ་སོར་བཤད་གྲྭའི་རྒྱུན་མང་པོ་བཙུགས་ཏེ་རྒྱལ་བསྟན་རིན་པོ་ཆེ་བླ་ནས་བླར་བཏེགས་པའི་ཞལ་སློབ་རགས་རིམ་ཙམ་སྨོས་ན། མདོ་སྨད་མི་ཉག་པ་གསེར་ཁ་པ་ཆོས་ཀྱི་གྲགས་པ། ར་ཧོབ་ཆོས་ཀྱི་གྲགས་པ་སྟེ་ཆོས་གྲགས་རྣམ་གཉིས། འབོ་གངས་དཀར་སྤྲུལ་སྐུ། ཝ་ཤུལ་རྨེ་བའི་མཁན་ཆེན་ཚེ་དབང་རིག་འཛིན། བསོད་ནམས་མགོན་པོ། ནོར་བུ་བསྟན་འཛིན། སྡེ་དགེ་དབོན་སྟོད་མཁྱེན་རབ་ཆོས་ཀྱི་འོད་ཟེར། ཟླ་གཞུང་མཆོག་སྤྲུལ། ཁང་དམར་བ་རིན་ཆེན་རྡོ་རྗེ། འཇིགས་མེད་རྡོ་རྗེ། མདོ་སྲིད་ཐུབ་བསྟན། དཔལ་སྤུངས་སི་ཏུ་རིམ་པོ་ཆེ། ཟུར་མང་པདྨ་རྣམ་རྒྱལ། དཀར་མཛེས་བུ་རམ་སྣ་བ་བློ་བཟང་བསྟན་འཛིན། ཨ་ལགས་རྒུ་རོང་མཆོག་སྤྲུལ། བ་ཐུར་མཁན་པོ་ཐུབ་སྟན་ཆོས་འཕེལ། གྲ་ཡབ་བློ་གྲོས་བཟང་པོ། ལྷོ་འབྲུག་མཁན་ཆེན་ཞུས་དག་པ་བསྟན་པ་རིན་ཆེན། རིན་ཆེན་རྡོ་རྗེ། དགེ་བཤེས་ཚུལ་ཁྲིམས་དཔལ་བཟང་། རྣམ་རྒྱལ་དཔལ་བཟང་སོགས་དང་། རང་དགོན་གྱི་མཁན་ཆེན་ལྷ་རྒྱལ་ལམ་པདྨ་ཐེག་མཆོག་བློ་ལྡན་བཀའ་དྲིན་ཅན་དང་། མཁན་ཆེན་ཐུབ་བསྟན་སྙན་གྲགས། འཇིགས་མེད་བློ་གྲོས། དཀོན་མཆོག་བཟང་པོ། འཆི་མེད་ཡེ་ཤེས། ཡོན་ཏན་མགོན་པོ། པདྨ་ཆོས་དཔལ། སྐྱ་མོ་ཆོས་ཁོ། ཡབ་ཆེན་ངག་དབང་ནོར་བུ། མཁན་པདྨ་ཚེ་དབང་སོགས་དངོས་སློབ་དང་། ཡང་སློབ་དང་ཉིང་སློབ་མཁས་བཙུན་བཟང་པོ་དཔལ་གྱི་མངོན་པར་མཐོ་བ་དུ་མས་གངས་ཅན་གྱི་ལྗོངས་སུ་ཁྱབ་པས་གཞུང་ཆེན་གྱི་འཆད་སྤེལ་མདོ་སྔགས་སྒོམ་སྒྲུབ་ལ་རྨ་མེད་པས། རྒྱལ་བསྟན་སྤྱི་དང་ལྷག་པར་གསང་བ་སྙིང་ཐིག་གི་བསྟན་པ་རིན་པོ་ཆེ་སྨད་རྒྱ་ནག་གི་ཕྱོགས་ནས་སྟོད་རྒྱ་གར་གྱི་བར་དུ་དཀར་འབྱམས་ཀྱིས་ཁྱབ་པར་མཛད། གཞན་ཡང་གསུང་གི་སྐོར་ལ་གཏམ་ཚོགས་དང་བསྟོད་ཚོགས། ཞལ་གདམས་སོགས་ཀྱང་བཞུགས། དགུང་གྲངས་ལྔ་བཅུ་ང་བདུན་བཞེས་པ། རབ་བྱུང་བཅུ་དྲུག་པའི་མེ་ཡོས། སྤྱི་ལོ་ ༡༩༢༦ ལོར་གནས་ཆེན་རྒྱ་བོ་ཕུག་ཏུ་རེ་ཞིག་དགོངས་པ་ཆོས་དབྱིངས་སུ་བསྡུ་བར་མཛད་དོ། ། །།
བསམ་ཚུལ་འབྲི།
བོད་ནང་མེ་སྐྱོན་ཤོར་བར་༸གོང་ས་མཆོག་གི་སེམས་གསོའི་གསུང་འཕྲིན།
འབྲེལ་ཡོད་ཀྱི་རྩོམ་གཞན།
-
༧སྐྱབས་རྗེ་ཁམས་སྤྲུལ་རིན་པོ་ཆེ་དགོངས་པ་གཞན་དོན་དུ་གཤེགས་པར་མྱ་ངན་དང་གདུང་སེམས་མཉམ་བསྐྱེད་ཞུ་བཞིན་ཡོད།
-
༈ འཕགས་ཡུལ་རྫོང་སར་བཤད་གྲྭའི་མཁན་ཆེན་ཀུན་དགའ་དབང་ཕྱུག་མཆོག་གི་མཛད་རྣམ།
-
འཛི་སྒར་བླ་མ་དབང་རྡོར་རིན་པོ་ཆེའི་རྣམ་ཐར།
-
མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
-
མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།