འདོན་སྤེལ། 2015/06/3 8:57 AM རྩོམ་པ་པོ།

རྔ་བ་རྫོང་ཁོངས་ནས་ཡིན་པའི་བུད་མེད་འཕགས་མ་ལགས་དང་ཁོང་མོའི་ཚ་བོ་འཇིགས་མེད་ལགས་གཉིས་ཆུ་ཤུལ་བཙོན་ཁང་ནས་བཙོན་གྲོལ་བཏང་སྟེ་ཕ་ཡུལ་དུ་འབྱོར་ཡོད་འདུག

Untitled7 འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ཟླ་ ༥ ཚེས་ ༢༩ ཉིན་རྔ་བ་རྫོང་ཁོངས་ནས་ཡིན་པའི་འཕགས་མ་ལགས་དང་། ཁོང་མོའི་ཚ་བོ་འཇིགས་མེད་ལགས་གཉིས་ལྷ་སའི་ཆུ་ཤུལ་བཙོན་ཁང་ནས་ཀློད་གྲོལ་བཏང་སྟེ། ཚེས་ ༣༡ ཉིན་གཉེན་ཉེ་དང་ས་གནས་བོད་མིའི་ཕེབས་བསུའི་ཁྲོད་ཁྲིན་ཏུའུ་གནམ་ཐང་དུ་འབྱོར་ཡོད་པ་དང་། ཁྲིན་ཏུའུ་རུ་གཟུགས་པོར་བརྟག་དཔྱད་བྱས་རྗེས། ཁ་སང་ཕྱི་ཚེས་ ༡ ཉིན་གྱི་བོད་ནང་གི་དགོང་མོའི་ཆུ་ཚོད་ ༡༡།༤༠ ཐོག ཕ་ཡུལ་གྱི་གཉེན་ཉེ་དང་བོད་རིགས་སེར་སྐྱ་མི་མང་མང་པོ་གཞུང་ལམ་གཡས་གཡོན་དུ་གྲལ་སྒྲིག་སྟེ། བསང་གསོལ་དང་རླུང་རྟ་མཆོད་དེ་ལྷ་རྒྱལ་ལོ། བོད་རྒྱལ་ལོ། ཞེས་པའི་ཁ་གཡང་གི་ཕེབས་བསུའི་ཁྲོད་ཕ་ཡུལ་དུ་འབྱོར་ཡོད་འདུག

ཕྱི་ལོ་ ༢༠༡༢ ལོའི་ཕྱི་ཟླ་ ༥ ཚེས་ ༢༧ ཉིན་གྱི་བོད་ནང་གི་ཉིན་རྒྱབ་ཆུ་ཚོད་ ༢།༡༦ ཙམ་གྱི་སྟེང་། ལྷ་སའི་ཇོ་ཁང་མདུན་ཐང་དུ་བོད་རིགས་གཞོན་སྐྱེས་རྡོ་རྗེ་ཚེ་བརྟན་ལགས་དང་དར་རྒྱས་ལགས་གཉིས་ཀྱིས་རང་ལུས་མེར་བསྲེགས་གནང་རྗེས། ལྷ་སར་ཡོད་པའི་བོད་རིགས་མང་པོ་རྒྱ་གཞུང་གིས་གང་བྱུང་འཛིན་བཟུང་བྱས་པ་མ་ཟད། ལྷག་པར་དུ་ཁམས་དང་ཨ་མདོའི་ཕྱོགས་ནས་ཡིན་པའི་བོད་རིགས་ཚོར་དམིགས་བསལ་གྱིས་ཞིབ་བཤེར་དམ་དྲག་བྱས་ཡོད་པ་ལྟར། སྐབས་དེར་འཕགས་མ་ལགས་དང་ཁོང་མོའི་ཁྱོ་ག་སྐར་ཁོ་ལགས། ཁོང་མོའི་ཚ་བོ་འཇིགས་མེད་ལགས་བཅས་རྒྱ་གཞུང་གིས་འཛིན་བཟུང་བྱས་ཏེ། སྐར་ཁོ་ལ་ཚེ་བཙོན་དང་། ཁོང་གཉིས་ལ་ལོ་ ༣ རེའི་བཙོན་འཇུག་ཁྲིམས་ཐག་བཅད་དེ་ཆུ་ཤུལ་བཙོན་ཁང་དུ་བཅུག་ཡོད་འདུག

ཁོང་གཉིས་རྔ་བ་རྫོང་ལོ་རྟ་ཡུལ་ཚོ་ཤོ་དགུ་སྡེ་བ་ནས་ཡིན་ཞིང་། འཕགས་མ་ལགས་རང་ལོ་ ༣༧ ཡས་མས་ཡིན་པ་དང་། ཁོང་མོར་བུ་མོ་གཉིས་དང་བུ་གཅིག་བཅས་བྱིས་པ་གསུམ་ཡོད་འདུག

གསར་འགོད་པ། པདྨ་མཚོ།

བསམ་ཚུལ་འབྲི།

' རྩོམ་འོག་མ།

རྒྱ་གར་གྱི་ཡུལ་མི་ ༢༢༠༠ ལྷག་གྲོངས་འདུག

བོད་མི་གཉིས་བཙོན་གྲོལ་བཏང་།

བསམ་ཚུལ་འབྲི།

འབྲེལ་ཡོད་ཀྱི་རྩོམ་གཞན།