བོད་ཀྱི་སངས་རྒྱས་ཆོས་ལུགས་དར་རྒྱས་གཏོང་ཚུལ།
གཞོན་ནུ་ནི་མ་འོངས་བོད་ཀྱི་རེ་བ་རེད།
བོད་ཀྱི་བསམ་པའི་འཚོ་བ་སངས་རྒྱས་ཆོས་ལུགས་དར་རྒྱས་གཏོང་ཚུལ་སྐོར་གྱི་བསམ་འཆར་འགའ་ཞིག
རྩོམ་པ་པོ། འབུམ་རམས་པ་སྡེ་དགེ་ཐུབ་བསྟན་ཕུན་ཚོགས། བོད་འབྱོར།
འབྱོར་པ་ཡོད་ན་སློབ་གསོའི་ཆེད་དུ་ཐོངས། །
དགེ་བ་འདོད་ན་ལས་འབྲས་ཚུལ་བཞིན་སྲུངས། །
རྐྱེན་ཟློག་གང་དགོས་ཁྱིམ་པ་ཡོངས་ཀྱིས་བསྒྲུབ། །
ཆོས་དང་འཇིག་རྟེན་གཉིས་མཆོག་འདི་ཡིན་ནོ། །
སྐད་ཡིག་སློབ་སྦྱོང་གཞོན་ནུའི་དུས་སུ་བརྩོན། །
སྲིད་འབྱོར་རིག་གསུམ་དར་ལ་བབས་ཚེ་ལྡན། །
ལུས་སེམས་བདེ་ཕྱིར་ཆོ་ག་རང་གིས་འདོན། །
བོད་རིགས་ཡར་རྒྱས་ཡོད་པའི་ཚད་གཞི་ཡིན། །
ང་ཚོ་བོད་རིགས་མ་འོངས་པའི་རེ་བ་བཅོལ་ས་དེ་ད་ལྟའི་གཞོན་ནུ་ཤེས་ཡོན་ཅན་རྣམས་རེད། ལྷག་པར་དུ་མིག་སྔར་སློབ་གྲྭ་ཆེན་མོ་རྣམས་སུ་སློབ་སྦྱོང་བྱེད་བཞིན་པའི་སློབ་གྲྭ་ཆེན་མོ་བ་དང་། རབ་འབྱམས་པ། འབུམ་རམས་པ་འདི་དག་རེད།
ཉེ་ཆར་བོད་ཁམས་ཡོངས་ཀྱི་འཕྲིན་ལམ་ནས་བླ་སྤྲུལ་བདེན་རྫུན་གྱི་སྐོར་ལ་ལབ་གླེང་མང་པོ་ཞིག་བྱེད་ཅིང་འདུག ངས་བལྟས་ན་རང་མགོ་འཁོར་བྱེད་ཀྱི་དུས་ཚོད་འཕྲོ་བརླག་རེད། འདི་ནི་རི་བོང་རྭའི་རྩེ་རྣོ་ཞན་གྱི་ཆེད་དུ་རྩོད་པ་བྱ་བ་དང་དོན་གཅིག་པར་མཐོང་། ང་ཚོ་ཆོས་དང་དཀོན་མཆོག་ལ་དད་པ་ཡོད་ན་བླ་སྤྲུལ་རྣམས་བརྒྱུད་ནས་དཀོན་མཆོག་དང་འབྲེལ་བ་བྱེད་དགོས་དོན་མི་འདུག རང་རང་གིས་ཐད་ཀར་དཀོན་མཆོག་ལ་གསོལ་བ་བཏབ་ན་ཡག་ཤོས་རེད། དེང་དུས་བླ་སྤྲུལ་འདི་དག་མི་སེར་དང་དཀོན་མཆོག་བར་ལ་འབྲེལ་བ་བྱེད་མཁན། དཔེར་ན། ཁྲིམས་དཔོན་དང་ཉེས་དོག་མི་（犯罪嫌疑人）སྣའི་བར་འབྲེལ་བ་བྱེད་མཁན་གྱི་ཁྲིམས་རྩོད་པ་（律师）ལྟ་བུ་ཞིག་ཆགས་འདུག ཞིབ་ཏུ་བསམ་ན་དེང་དུས་བླ་སྤྲུལ་ཕལ་ཆེར་དེ་སྒོམ་ཉམས་ལེན་ནི་མེད། ཤེས་རིག་ཡོན་ཏན་ནི་ཕལ་ཆེར་སློབ་ཆུང་སློབ་གྲྭ་ནས་ཐོན་པའམ། ཡང་ན་འབྲིང་རིམ་སློབ་གྲྭ་ཙམ་ཐོན་པ་ཤ་སྟག་རེད། དེས་ན་གོས་མི་འདྲ་བ་ཙམ་ལས་དོན་ཏུ་འདོན་ཡོན་ཏན་ང་ཚོ་ཕལ་པའི་མི་རྣམས་དང་ཁྱད་པ་མ་མཐོང་། ཁོ་ཚོས་ང་ཚོ་ལ་འཇིགས་སྐུལ་བྱེད་ཡས་ཀྱི་ལག་ཆ་གལ་ཆེ་ཤོས་དེ། “ཁྱོད་ཚོས་བཀའ་ལ་མ་ཉོན་ན་མི་ལ་ན་ཚ་བྱུང་ན་རིམ་འགྲོ་འདོན་བགྱི་མིན། ཤི་སོང་བ་ལ་ཆོ་ག་འདོན་བགྱི་མིན་” ཞེས་ཞེད་སྣང་སྐུལ་ཡས་གཙོ་བོ་དེ་རེད། དངོས་གནས་བྱས་ན་དེ་ནང་པ་སངས་རྒྱས་པའི་ལྟ་སྤྱོད་དང་འགལ་ཚར་པ་རེད། ནང་པའི་ལྟ་སྤྱོད་དང་འགལ་ཚར་པའི་བླ་སྤྲུལ་ཞིག་གིས་ང་ཚོ་ལ་རིམ་འགྲོ་འདོན་ནའང་ཕན་ཐོག་ཅི་ཡང་ཡོད་མ་རེད། དེ་བས་ང་རང་ཚོ་ཚང་མས་ཆོས་འདོན་ཡས་སྦྱང་དགོས་འདུག མཁས་དབང་ནམ་མཁའི་ནོར་བུ་རིན་པོ་ཆེ་ལ་གོ་ལའི་ཤར་ནུབ་གཉིས་སུ་ཆོས་ཚོགས་ཕལ་ཆེར་བརྒྱ་ལ་ཉེ་སྐོར་ཞིག་ཡོད་རེད། དེའི་ནང་ལ་གཟན་ཤམ་དང་། ཆོས་གོས་གྱོན་མཁན་གཅིག་ཀྱང་མ་མཐོང་། འོན་ཀྱང་སྐྱེ་བོ་ཕོ་མོ་ཚང་མ་ཆོས་ཤེས་མཁན། ཉམས་ལེན་བྱེད་མཁན། དུས་རྒྱུན་ལས་ཀར་འགྲོ། དུས་ཆེན་སྐབས་སུ་ཆོ་ག་ཆོས་སྤྱོད་གང་ཞིག་འདོན་དགོས་ན། འདོན་བཅའ་ཆོག ཆོ་ག་ཕྱག་ལེན་ཆ་ཚང་ཕོ་མོ་ཁྱད་མེད་ཚང་མས་ཤེས་ཀྱི་འདུག སངས་རྒྱས་བསྟན་པ་དར་ཟེར་བ་དེ་དངོས་གནས་དེ་རེད་འདུག །
ངའི་བསམ་འཆར་ལ། ཆོས་ཟེར་བ་དེ་བསམ་པའི་འཚོ་བ་ཞིག་ཡིན་སྟབས། སྤྱི་ཚོགས་གང་འདྲ་ཞིག་ཡར་རྒྱས་ཕྱིན་ཡང་དགོས་མཁོ་མེད་པར་འགྱུར་མི་སྲིད། དེས་ནས་ཆོས་ལུགས་ནི་ང་ཚོའི་འཚོ་བའི་ཆ་ཤས་ཇ་དང་རྩམ་པ་ལྟ་བུ་ཞིག་ཏུ་ངོས་འཛིན་ནས། ཁྱིམ་པ་ཕོ་མོ་ཚང་ནས་ནམ་དགོས་རང་གིས་འདོན་ཤེས་པ་དང་། སྒོམ་ཤེས་པ་བྱས་ན་ལེགས། །
དེ་ནི་དཔེར་ན། རང་ཉིད་ལྟོ་བ་ལྟོག་པའི་སྐབས་སུ་ཇ་རྩམ་དང་། ཤ་མར་རང་གིས་ཟོས་ན་ལྟོ་བ་ལ་ཕན་པ་སྨོས་མ་དགོས་པ་རེད། ང་ལ་ཕན་པའི་ཆེད་དུ་གཞན་ལ་ཆོས་འདོན་རོགས་ཞེས་རེ་བ་ཞུ་བ་ནི། རང་ཉིད་ལྟོ་བ་ལྟོག་པའི་སྐབས་སུ་ངའི་བཀྲེས་སྐོམ་སེལ་བའི་ཆེད་དུ་མི་གཞན་ལ་ལྟོ་ཆས་ཟ་རོགས་ཞེས་རེ་བ་ཞུ་བ་དང་དོན་གཅིག་པར་མཐོང་། དེས་ན་བོད་མི་གཞོན་ནུ་ཕོ་མོ་ཚང་མས་རྒྱུན་མཁོའི་ཆོ་ག་ཆོས་སྤྱོད་ཚང་མ་འདོན་ཤེས་པར་བྱ་ནས། དགོས་མཁོ་ཡོང་དུས་རང་རང་གིས་རྩ་འཛུགས་བྱ་སྟེ་གཏོ་དགེ་རིམ་གྲོ་འདོན་ན་ཚེ་འདི་ཕྱི་གཉིས་ཀ་ལ་ཕན་པ་ཆེ་ཤོས་དེ་རེད་སྙམ། །
མདོར་བསྡུས་ན་ང་ཚོས་སྦྱང་དགོས་པའི་གཏོ་མདོས་དང་། ཆོ་གའི་སྐོར་ལ་མང་པོ་དགོས་ཀྱི་མི་འངུག རྐྱེན་ཟློག་སྐོར་རྒྱུན་མཁོའི་ཆོ་གར། དཔེར་ན། ཤེར་སྙིང་བདུད་ཟློག བརྒྱ་བཞི། སྒྲོལ་མ་གཡུལ་མདོས། འཆི་བླུ། གཡང་གླུད། བསེ་རག་བཀར་ཡས་སོགས་འགའ་ཞིག །
ཤི་ཆོས་ལ་ཐོག་མར་འབྱུང་རྩིས་དང་། གཤིན་ཆོག དུར་གཅོད། རོ་ལམ་གསེར་སྐྱེམས། སྒམ་ཆིངས་སོགས་འགའ་ཞིག་དང་། དེ་ནས་བདུན་བདུན་བཞི་བཅུ་ཞེ་དགུའི་ཆེད་དུ་ཆོ་ག་བདུན་ཙམ་སྦྱང་ཐུབ་ན་འགྲིག དཔེར་ན། འོད་དཔག འཁོར་བ་དོང་སྤྲུགས། མི་འཁྲུག་པ། ཀུན་རིག རྡོར་སེམས། ཞི་ཁྲོ། སྨན་བླ་བཅས་ཆོ་ག་བདུན་པོ་དེ་དག་ཁྱིམ་པ་ཕོ་མོ་སུས་ཀྱང་འདོན་ཤེས་པ་ཞིག་སྦྱང་ན་ཀུན་རིག་ཆོ་ག་ཕུད། གཞན་རྣམས་ཕལ་ཆེར་ཟླ་བ་གཅིག་གིས་ཤེས་ཐུབ་བགྱི་རེད། དེས་ན་བླ་སྤྲུལ་ཚོ་ལ་དཀོན་མཆོག་དང་འབྲེལ་བ་བྱེད་རོགས་ཞེས་ཞུ་བ་འཐེན་དགོས་དོན་མི་འདུག །
ང་ཚོ་ཚང་མས་ཡོན་ཏན་དེ་འདྲ་པོ་ཞིག་ཤེས་ཚར་དུས། ཁོ་རང་ཚོ་གོས་ཆེན་གྱི་ཞྭ་དང་གོས་རྫིག་པོ་རེ་གྱོན་ནས་ཁྲི་ཆེན་པོ་ཞིག་གི་ཐོག་ཏུ་འགྱིང་ནས་བསྡད་ནའང་ང་ཚོས་ཡིད་སྨོན་དང་། དད་པ་བྱ་དགོས་དོན་མི་འདུག ང་ཚོ་སོ་སོས་དཀོན་མཆོག་དང་ཐད་ཀར་འབྲེལ་བ་བྱེད་ཐུབ་པའི་ནུས་པ་ཡོད་ཚར་པ་རེད། །
དེང་སང་གི་དགོན་པ་ཟེར་བ་དེ་སྐུགས་ཤོག་གི་ཚོང་ར་（股票市场）དང་འདྲ་བ་ཞིག་སྟེ། ལས་ཐབས་སུས་མཁས་ན་དེ་སྐུགས་ཤོག་གི་ཁེ་ཕན་ལོངས་སུ་སྤྱོད་ཅིང་། ལས་ཐབས་མཁས་པ་མེད་ན་ནམ་ཡང་སྐུགས་ཤོག་གི་གྱོང་རག་མཁན་ཡིན་པ། དཔེར་ན། བླ་སྤྲུལ་མཁན་གསུམ་ནི་སྐུགས་ཤོག་གི་ཁེ་ཟ་མཁན་དང་། གྲྭ་པ་ཕལ་ཆེར་དང་མི་སེར་རྣམས་ནི་སྐུགས་ཤོག་གི་གྱང་རག་མཁན་ལྟ་བུ་ཞིག་ཆགས་འདུག །
རང་རིགས་དད་ལྡན་ཕོ་མོ་ལ། །
དམ་ཆོས་ཡང་དག་སྐུལ་བ་འདིར། །
ཆོས་མགོ་བསྐོར་བའི་བླ་སྤྲུལ་ཚོས། །
སྡིགས་གཏམ་ཆར་བཞིན་དབབ་པར་ངེས།
ཞེས་པ་ནང་པའི་ཆོས་དང་རིག་གཞུང་ལ་དད་པ་བསྟན་པོར་ཐོབ་ཅིང་ཆོས་ལོག་ཆོས་རྫུན་རྣམས་ལ་མཐར་གཅིག་ཏུ་རྒོལ་ནུས་ཀྱི་སྤོབ་པ་ཅན་ཤར་དཔལ་སྤུངས་པའི་གྲོང་འདབས་སུ་སྐྱེས་པའི་རྒྱལ་ཁམས་པ་ཐུབ་བསྟན་ཕུན་ཚོགས་དེས། ལྷོ་ནུབ་མི་རིགས་སློབ་གྲྭ་ཆེན་མོའི་རང་ཤག་ཏུ་བྲིས་སོ། །
བསམ་ཚུལ་འབྲི།
བོད་ཀྱི་གཞོན་ནུ་རྣམས་ལ་སྤྲིངས་པ།