བོད་ཀྱི་གྲྭ་པས་བྱིས་པ་ནམ་བརྐུས་ནི་རེད།
བོད་ཀྱི་གྲྭ་པས་བྱིས་པ་ནམ་བརྐུས་ནི་རེད།
ཡ་བྲང་གཡུ་འབྲུག
གཅིག
ཉིན་འདི་དག་གི་རིང་ལ་དྲྭ་ལམ་སོ་སོར་བོད་ཀྱི་གྲྭ་བ་གཉིས་ཀྱིས་བྱིས་པ་གཉིས་བརྐུས་པའི་གསར་འགྱུར་ཞིག་གང་སར་སྤུར། ཁུངས་ལུང་དང་གནས་ཚུལ་ལ་རྩད་ཞིབ་མེད་པར་བོད་པ་མང་པོ་ཞིག་གིས་ཅི་ཞིག་ཤེས་མདོག་གིས། གསར་འགྱུར་དེ་ཉིད་གང་སར་ཁྱབ་བསྒྲགས་བྱས་པ་མ་ཟད། ཐ་ན་བོད་པ་རང་གིས་རྒྱ་ཡིག་ཏུ་བསྒྱུར་ཏེ་འཕྲིན་ཕྲན་གྱི་སྤྱི་སྟེགས་རྣམས་སུ་ཡང་བསྐུར། འདི་ནི་མི་རིགས་གཞན་པའི་མིག་མདུན་དུ་བོད་པ་ཚོས་རང་རྣ་རང་གིས་བཅད་པའོ།།
སྐབས་དེར། ཕྲན་གྱིས་གནས་ཚུལ་དེ་ཉིད་རྫུན་མ་ཡིན་པ་གསལ་པོ་ཤེས་ཀྱང་། དེ་རིང་བར་གསལ་བཤད་ཅི་ཡང་བྱ་ཐབས་མ་བྱུང་། རྒྱུ་མཚན་ནི། དུས་ཀྱི་སྔ་ཕྱི་ཙམ་གྱིས་བདེན་པ་ལྷང་ལ་འབུད་ངེས་པར་ཡིད་ཆེས་པ་དང་། གཞན་ཡང་རེ་ཞིག་གནས་ཚུལ་གྱི་ཐོག་ཐ་བར་གསུམ་ཕྱི་གསལ་ནང་གསལ་བྱུང་མེད་པས་རེ་ཞིག་འགྱངས།
ཏག་ཏག་དུས་དེ་རིང་། གནས་ཚུལ་དེ་ཉིད་ནི་ཞི་བདེ་དང་མཛའ་མཐུན་ངང་། གྲྭ་བཙུན་རྣམ་གཉིས་ལ་མ་ཉེས་ཁ་གཡོག་ཕོག་པའི་གནས་ཚུལ་གསལ་པོ་བྱུང་བས། ད་ནི་འདིའི་སྐོར་གཞི་ནས་དྲ་བར་སྤེལ་བ་ཡིན།
གཉིས།
དེ་ཡང་གྲྭ་བཙུན་ཁོང་རྣམ་པ་གཉིས་ནི། ཀུན་མཁྱེན་ཀརྨ་ཆགས་མེད་ཀྱི་གདན་ས་ཐོག་མ་སྟེ། ལོ་ངོ་སུམ་བརྒྱ་ལྷག་ཙམ་གྱི་ལོ་རྒྱུས་ཡོད་ཅིང་། སྔར་དགའ་ལྡན་ཕོ་བྲང་སྐབས་སུ་སྡེ་དགེའི་ལྷོ་སྡེ་ཕྱི་འབྲོག་ཁག་ལྔའི་ནང་ཚན་མདོ་གཞུང་ན་ཡོད་པའི“གནས་མདོ་དགོན”པའི་གྲྭ་འབངས་ཡིན་ལ། དེང་གི་ས་ཁོངས་ལྟར་ན་བོད་འཇོ་མདའ་རྫོང་གཏེར་སྟོན་ཡུལ་ཚོ་ཡིན་པ་རེད།
སྤྱིར་བཏང་ཁོང་རྣམ་གཉིས་ནི་ཕྱི་ཚུལ་གྱི་དང་བ་འདྲེན་ཞིང་ནང་ཚུལ་གྱི་འདུལ་ཁྲིམས་གཙང་བའི་གྲྭ་བཙུན་གཉིས་ཡིན་ཁར། སྔར་གྱི་ཡུལ་སྲོལ་དུ་གྲྭ་རྐྱང་རྣམས་འཚོ་བའི་མཐུན་རྐྱེན་དམིགས་ནས། དབྱར་དུས་དཀར་ལྡོམ་དང་དགུན་དུས་འབྲུ་ལྡོམ(དཀར་བསོད་དང་ནས་བསོད)ཞེས་འགྲོ་སྲོལ་ཡོད་པ་གཞིར་བཞག ཁོང་རྣམ་གཉིས་ཀྱང་ད་ཐེངས་དཀར་ལྡོམ་དུ་བོད་ཀྱི་བྱང་སྡེ་རྫ་སྟོད་ཕྱོགས་སུ་ཕེབས་པ་དང་བསྟུན། དེའི་ཕྱོགས་ཀྱི་བྱིས་པ་གཉིས་ཆུ་བོའི་ཕ་རོལ་ཏུ་བགྲོད་པར་དཀའ་ངལ་འཕྲད་པར་གཟིགས་ཏེ་འཕྲུལ་རྟའི་འཕོངས་སུ་བཞག དུས་དེ་དང་བསྟུན་ཏེ་ཡུལ་དེའི་གཞོན་པ་མང་པོ་ཞིག་གིས་བསམ་ལོང་འདྲི་ལོང་མེད་པར་སྐད་འབོད་བྱེད་བཞིན། གྲྭ་བཙུན་རྣམ་གཉིས་ལ་ཉེས་རྡུང་དང་བརྙས་སྨོད་ཚབས་ཆེན་བྱས་ཏེ་པར་དུ་བཏབ། བརྙན་དུ་བླངས། འཕྲིན་ཕྲན་དུ་བསྐུར་ཏེ་གྲྭ་བཙུན་རྣམ་གཉིས་རྫ་སྟོད་རྫོང་གི་ཉེན་རྟོག་པར་རྩིས་སྤྲད།
བདུད་འདུལ་སྤྲུལ་སྐུས་མདོ་གཞུང་གན་པའི་གྲགས་པར་མཇལ་དར་འབུལ།
དུས་དེ་དང་ཅུང་མ་འགོར་བར་བོད་ཕྱི་ནང་གཉིས་ཀྱིས་དེ་ཉིད་བརྒྱུད་བསྐུར་དང་དགག་རྒྱག་ཚ་པོ་བྱས་ཏེ། བོད་མི་རིགས་དང་བོད་པའི་གྲྭ་བཙུན་སྤྱིའི་ངོ་གདོང་ལ་དམའ་ཕབ་པའི་ཁར། མི་སྒེར་གྱི་རྩིས་ཐང་རྡོག་རོལ་བཏང་། འདི་ནི་བོད་མི་རིགས་ཀྱི་ལ་རྒྱ་ཆུར་གཡུགས་པ་དང་རླུང་ལ་བསྐུར་པ་སྟེ། ཅི་འདྲའི་མི་འོས་པ་ཞིག་རེད་ཨང་།
གསུམ།
ལར་དེང་གི་དུས་འདིར། གྲྭ་བཙུན་རྣམ་གཉིས་དཀར་ལྡོམ་ལ་འགྲོ་བ་ནི་ནོར་འཁྲུལ་གྱི་མཛད་པ་ཞིག་ཡིན་པ་ང་ཚོས་མི་འདོད་བཞིན་དུ་ངོས་འཛིན་རིགས་མོད། གཞན་ཕན་དང་བྱམས་བརྩེ་ནི་ནང་པ་སངས་རྒྱས་པའི་བསླབ་བྱར་གཏོགས་ན། གྲྭ་བཙུན་གཉིས་པོས་ཆུ་བོ་བརྒལ་བར་དཀའ་ངལ་འཕྲད་པའི་བྱིས་པ་གཉིས་འཕྲུལ་རྟའི་འཕོངས་སུ་བཞག་པ་ནི་ནོར་འཁྲུལ་ཡིན་ཞེས་སུ་ཡིས་སྨྲ་སྤོབས།
གང་ལྟར། ཟླ་འདིའི་སྤྱི་ཚེས༢༧ཉིན་གྱི་ཕྱི་དྲོ་ཙམ་ལ། གྲྭ་པ་གཉིས་ཀྱིས་བྱིས་པ་བརྐུས་པའི་གནས་ཚུལ་དེ་ཉིད་རླུང་ལས་མྱུར་བའི་དྲྭ་སྟེང་དུ་དྲིལ་བསྒྲགས་བྱས་པར་བརྟེན། བོད་ཡུལ་སྟོད་སྨད་བར་གསུམ་དུ་འཚོ་བའི་གྲྭ་བཙུན་གཉིས་ཀྱི་ཤ་རུས་གཅིག་པའི་ཕུ་ནུ་མང་པོའི་སེམས་པ་སྡུག་ཅིང་དངངས། གློ་བ་དྲག་ཏུ་ཁྲོས་ཏེ། ཤི་གསོན་གཉིས་ཀྱི་ལས་དེར་ཤ་ཁྲག་གི་འགྲོ་གྲོན་འཆོར་ཡང་སྣང་མེད་བྱ་ཐབས་བྲལ་བའི་གྲབས་གཤོམ་པའི་ཚེ། ལྷ་བླ་མའི་བྱིན་རླབས་ཀྱིས་ཕ་ཨ་ཁུ་དག་གིས་ཡང་ཡང་གྲོས་བསྡུར་པ་ལས། སྤྱིར་བོད་གངས་ཅན་གྱི་གནས་སྟངས་དང་སྒོས་རྒྱུ་རྐྱེན་འདི་ཡི་འབྱུང་རྩ་སོགས་ལ་བསམ་གཞིག་གནད་སྨིན་མཛད་དེ། མཐར་ཞི་བ་དང་མཛའ་མཐུན་གྱིས་སྦྲེལ་ལམ་འཛུགས་པར་དམ་བཅས་པས།
སྤྱི་ཚེས༢༨ཉིན་འགོ་བཙུགས་ཏེ། གྲྭ་བཙུན་གཉིས་ཀྱི་ཤ་རུས་གཅིག་པའི་ཕུ་ནུ་མང་པོ་ལྷ་ས་དང་། ནག་ཆུ། སྡེ་དགེ། མགོ་ལོག ཆུ་མ་ལེབ་སོགས་ནས་རྫ་སྟོད་དུ་རྡོག་ཐོན་བྱས་ཤིང་། ད་དུང་འཇོ་མདའ་རྫོང་དང་གཏེར་སྟོན་ཡུལ་ཚོ། གནས་མདོ་དགོན་པའི་འགན་ཁུར་མི་སྣ་རྣམས་ཀྱང་དུས་ཐོག་ཏུ་འབྱོར་ནས། དོན་འདིའི་ཐག་གཅོད་བྱ་བར་མ་གྲོས་གཅིག་ཏུ་འཛོམས།
བཞི།
སྤྱི་ཚེས༢༩དང༣༠གཉིས་སུ། རྫ་སྟོད་རྫོང་དང་འཇོ་མདའ་རྫོང་གི་འགོ་ཁྲིད་དང་ཕྱོགས་གཉིས་ཀྱི་མཐུས་མི་དག་གིས་འདུམ་འགྲིག་བྱས་ཏེ། ཕན་ཚུན་ཞི་བདེའི་ངང་རྫ་སྟོད་ཕྱོགས་ཀྱི་བྱིས་པའི་ནང་མི་གཙོས་པའི་གནད་ཡོད་མི་སྣ་ཚོས་ནོར་འཁྲུལ་ངོས་འཛིན་དང་། གྲྭ་བཙུན་རྣམ་གཉིས་ལ་ཉེས་མེད་ཉེས་འགེབས་ཡིན་པའི་དཀར་འདོན་བདེན་དཔང་གནང་བ་སྟེ། བོད་རང་གི་སྲོལ་རྒྱུན་བཞིན། “རྟ་ཕོ་མགྱོགས་པའི་མགྱོགས་དར་དང་། མི་ཕོ་དཀར་བའི་དཀར་རྟེན”དུ། དྲྭ་ལམ་དུ་གསར་འགྱུར་ཆེས་ཐོག་མ་གཏོང་མཁན་གྱི་སྤྲུལ་སྐུ་བདུད་འདུལ་ལགས་ཀྱིས་ནོར་འཁྲུལ་ངོས་ལེན་དང་བཅས། མི་དམངས་ཤོག་སྒོར་འབུམ་གཉིས་དང་ཁྲི་ལྔ་འབུལ་རྒྱུ་དང་། མདོ་གཞུང་གཙོས་པའི་ཡུལ་ལུང་གང་ས་ནས་ཕེབས་པའི་ཕུ་ནུ་ལྷན་རྒྱས་ཀྱི་འགྲོ་སོང་མཐའ་དག་རྫ་སྟོད་རྫོང་སྲིད་གཞུང་གིས་ཕུད་རྒྱུ། མ་ཟད་སྔ་ནད་ཕྱི་འཁོན་གང་ཡང་མེད་པར་བཟོས་ཏེ། དོ་བདག་སོ་སོ་ནས་དྲི་མེད་ཁ་བཏགས་ཀྱི་མཛའ་མཐུན་བདེ་ལེགས་དབུལ་བཞིན་གྲྭ་བཙུན་རྣམ་གཉིས་ཕྱིར་རང་ཡུལ་ལ་བདེ་ཐང་ངང་གདན་འདྲེན་ཞུས།
གཞན་ཡང་། ཟླ་འདིའི་ཚེས༣༡ཉིན་བྱིས་པ་གཉིས་ཀྱི་ནང་མིས་ཕུ་ནུ་ལྷན་རྒྱས་ལ་གསོལ་སྟོན་གྱ་ནོམ་པ་ཞིག་བཤམས་ཤིང་། མ་འོངས་པའི་དུས་སུ་འདི་དང་འདི་ལྟ་བུའི་རི་བོང་ཅལ་འདྲོགས་ཀྱི་རྗེས་སུ་མི་འགྲོ་བར། བོད་གངས་ཅན་གྱི་ཕུ་ནུའི་འདུན་མ་མཉམ་དུ་བསྡེབས་ཏེ། ཁ་བ་རི་བའི་དབུ་འཕང་དགུང་ལས་མཐོ་བའི་སྐྱབས་འཇུག་ཡང་ཡང་ཞུས་ཡོད་པ་རེད། དེས་ན། རྗེས་མའི་ཆར་ཡང་བོད་ཀྱི་ཡུལ་གྲུ་སོ་སོར་དོན་དག་ག་རེ་འབྱུང་ཡང་། དོན་དངོས་གནས་ཚུལ་མ་རྟོགས་པར། མི་རིགས་དང་མི་སྒེར་ལ་གནོད་ཚབས་ཆེ་བའི་དྲིལ་སྒྲོག་འདི་རིགས་ལ་འཇུག་མི་འོས་པའི་གསོལ་འདེབས་དང་རེ་སྐུལ་བཅས།
༢༠༡༥.༨.༣༡ཉིན་ཡ་བྲང་གཡུ་འབྲུག་གིས་ཕུལ་བའོ། །
བསམ་ཚུལ་འབྲི།
སྡེ་དགེ་རྒྱལ་ཡོངས་ལྷན་ཚོགས་ཀྱི་ངོ་སྤྲོད་སྙིང་བསྡུས།