འདོན་སྤེལ། 2015/07/2 5:36 PM རྩོམ་པ་པོ།

ཁམས་སྡེ་དགེའི་གླུ་མ་ལས་དབང་ལྷ་མོའི་ལོ་རྒྱུས་རགས་བསྡུས།

གླུ་མ་ཆུང་ཆུང་ལས་དབང་ལྷ་མོ་ནི་སྤྱི་ལོ ༢༠༠༣ ལོར་བོད་མདོ་ཁམས་སྒང་དྲུག་གི་ནང་ཚན་འབྲི་རྫ་ཟལ་མོ་སྒང་གི་སའི་ཆར། ཁམས་སྡེ་དགེ་རྫོགས་ཆེན་འབྲོག་རུ་བསོད་ནམས་ལྷ་སྡེ་རུ་ཕ་རྒྱ་ཤིས་བསོད་ནམས་བསྟན་འཛིན་དང་། མ་རྫོགས་ཆེན་སྒྲུང་པ་པདྨ་ཡེ་ཤེས་ཀྱི་བུ་མོ་འབྲིང་བ་པདྨ་ལྷ་མོ་གཉིས་སུ་སྐྱེས་ཞིང་། སྐྱེ་དུས་ཕྲུ་གུ་གཞན་དང་མི་འདྲ་བའི་རྟགས་མཚན་འདྲ་མིན་བྱུང་ཏེ། ཁྱིམ་མཚེས་དག་དང་ཉེ་འབྲེལ་ཚོས་བུ་ཡ་མཚན་ཅན་ཞིག་སྐྱེས་ཡོད་ཚོད་སྙམ་པ་དང་བཤད་གླེང་ཀྱང་སྣ་ཚོགས་བྱས། འོན་ཀྱང་ལས་དབང་ལྷ་མོའི་མ་ཕྱོགས་ཀྱི་ཨ་མྱེས་སམ་པདྨ་ཡེ་ཤེས་ནས་ངའི་ཚ་མོ་འདི་སྐྱེ་དུས་ཀྱི་རྟགས་མཚན་དང་བྱ་བྱེད་སོགས་ལ་བལྟས་ན། ཚེ་སྔོན་གྱི་བསོད་ནམས་བཟང་པོ་བསགས་པའི་དབང་གིས་མོ་རང་གི་མི་ཚེ་འདིར་གཞན་དང་མི་འདྲ་བའི་ལས་དབང་བཟང་པོ་ཅན་ཞིག་འཚར་རྒྱུ་རེད་ཟེར་བ་དང་མིང་ལའང་ལས་དབང་ལྷ་མོ་ཞེས་བཏགས། སྤྱིར་ལས་དབང་ལྷ་མོའི་ཕ་མ་གཉིས་ཀའི་ཕྱོགས་ཀྱི་རུས་རྒྱུད་དག་ལ་སྐད་ངག་སྙན་མོ་ཡོད་པ་མ་ཟད། ལྷག་པར་དུ་མ་རྒྱུད་ཀྱི་མི་དག་ལ་སྐད་ངག་ཧ་ཅང་སྙན་པོ་ཡོད་པས་ཡུལ་མི་ཚོས་རྒྱ་གླིང་རུ་བ་ཞེས་འབོད་སྲོལ་ཡོད་པ་རེད། ཨ་མས་ནམ་རྒྱུན་བོད་ཁམས་ཕྱོགས་ཀྱི་དམངས་གླུ་དང་རྡུང་ལེན་སོགས་རང་གི་ཤེས་ཚད་ལས་དབང་ལྷ་མོ་ལ་སློབ་ཀྱིན་ཡོད་ཅིང་ཆུང་དུས་ནས་གླུ་གཞས་སྒྱུ་རྩལ་ལ་དགའ་སྣང་དང་དུང་བ་ཡོད་མཁན་ཞིག་ཏུ་གྱུར། མ་ཡི་ཕ་རྒྱུད་ཀྱི་ཁྱིམ་གཞི་གང་པོར་གླུ་ལེན་པ་དང་སྒྲུང་བཤད་པ་སོགས་མི་ཤེས་མཁན་མེད་ཅིང་གླུ་བ་གླུ་མ་མང་པོ་བྱུང་དང་འབྱུང་མུས་སུ་ཡོད། ལས་དབང་ལྷ་མོ་རང་ལོ་དྲུག་ལ་སོན་སྐབས་ཨ་ཞང་དང་ཕ་མ་གཉིས་ཀྱིས་ཟི་ལིང་དུ་ཁྲིད་ནས་ཆེས་ཐོག་མའི་ཀ་ཁའི་དབྱངས་རྟ་སློབ་པའི་འཆར་གཞི་བྱས། ཉིན་ཞིག་མི་ཧ་ཅང་མང་པོ་འདུ་འཛོམས་བྱེད་སའི་གཉེན་སྟོན་ཞིག་ལ་སོང་བ་དང་ལས་དབང་ལྷ་མོའི་ཨ་ཞང་ནས་རང་གི་གྲོགས་དང་ངོ་ཤེས་འགོ་ཁྲིད་དག་ལ་ལས་དབང་ལྷ་མོར་གླུ་གཞས་ཞིག་ལེན་དུ་འཇུག་རྒྱུར་བསམ་འཆར་སྟོན། སྐབས་དེར་ལས་དབང་ལྷ་མོ་ནི་རང་ལོ་དྲུག་ལ་སོན་པའི་བྱིས་པ་ཆུང་ཆུང་ཞིག་ཡིན་སྟབས་མི་གཞན་དག་ལ་ཡིད་མི་ཆེས་པའི་སྣང་བརྙན་ཞིག་སྟེར་བ་དང་གར་སྟེགས་སུ་བུད་རྗེས་ཕྲུ་གུའི་ངང་ཚུལ་ལས་སྒྱུ་རྩལ་གྱི་འཁྲབ་སྟོན་ཞིག་བྱེད་མི་ཐུབ་པའི་ལབ་གླེང་བྱས། འོན་ཀྱང་དེ་རྗེས་ལས་དབང་ལྷ་མོ་གར་སྟེགས་སུ་བུད་པའི་སྐབས་ཚང་མས་ཡ་མཚན་དང་སྙིང་རྗེའི་ངང་ནས་དགའ་བསུ་བྱས། འདི་ནི་ལས་དབང་གིས་བསྐོས་པའི་འཇིག་རྟེན་འདིར་ཆེས་ཐོག་མའི་སྒྱུ་རྩལ་གྱི་ལམ་དུ་ཞུགས་པའི་ཉིན་མོ་དེའང་རེད། ལས་དབང་ལྷ་མོས་༼ གནའ་སྔ་མོ་སྔ་མོ ༽ ཞེས་པའི་གླུ་མ་རིགས་འཛིན་སྒྲོལ་མས་བླངས་མྱོང་བའི་གླུ་གཞས་དེ་ལེན་སྐབས། ད་བར་བོད་ཡུལ་དུ་བྱིས་པ་ལོ་དྲུག་ཅན་ལུས་ངག་གི་སྒྱུ་རྩལ་ཕུན་ཚོགས་རང་གྲུབ་ཏུ་ཡོད་པ་ཞིག་བྱུང་བའང་ཐེངས་དང་པོ་རེད་ཅེས་ཀུན་གྱིས་བསྔགས་བརྗོད་བྱས། དེ་རྗེས་མཚོ་སྔོན་བརྙན་འཕྲིན་ཁང་དང་གཞན་ཚོགས་པ་སྒེར་སོགས་ཀྱི་གནད་ཡོད་མི་སྣ་དག་གིས་དོ་སྣང་བྱེད་ཡུལ་དུ་གྱུར། ༢༠༡༠ལོའི་མཚོ་སྔོན་བརྙན་འཕྲིན་ཁང་གིས་གཙོ་བསྒྲུབ་བྱས་པའི་བོད་དམངས་ཁྲོད་ཀྱི་ལོ་གསར་སྤྲོ་ཚོགས་ཆེན་མོ་གཡང་ཁྱིམ་ཚང་གི་ལོ་སར་ཞེས་པའི་ཐོག ༼ཙོང་ཁའི་མེ་ཏོག༽ ཅེས་པའི་གླུ་གཞས་དེ་བླངས་བ་ན་བོད་མདོ་དབུས་ཁམས་གསུམ་ལ་གྲགས་ཆེན་པོ་བྱུང་བ་མ་ཚད། ༢༠༡༡ ལོའི་མཚོ་སྔོན་ཞིང་ཆེན་དམངས་ཁྲོད་དཔྱིད་གསར་དགའ་སྟོན་དགོང་ཚོགས་སྟེང་སྒེར་གྱི་མཆོག་གྱུར་བྱ་དགའ་དང་གཟི་བརྗིད་དཔང་ཡིག་ཐོབ། ༢༠༡༡ ལོར་སྦྲ་ནག་སྤང་རྒྱན་མེ་ཏོག་སྒྱུ་རྩལ་ཚོགས་པས་གཙོ་སྒྲུབ་བྱས་པའི་གསེར་གྱི་བཞོ་ལུང་རྟགས་ཅན་གྱི་གླུ་གཞས་འགྲན་ཚོགས་ཁྲོད། གླུ་དབྱངས་ཀྱི་བྱ་དགའ་ཨང་དང་པོ་ཐོབ། དེ་ནས་རིམ་བཞིན་མཚོ་སྔོན་བོད་སྐད་བརྙན་འཕྲིན་གྱི་མེ་ཏོག་གངས་ལྷ་ལེ་ཚན་སོགས་སུ་གླུ་གཞས་མང་པོས་བོད་ཕྱི་ནང་གཉིས་སུ་བུ་མོ་ཆུང་ཆུང་པགས་རྩག་ཅན་ཞེས་ཀུན་གྱིས་དགའ་བསུ་ཞུ་ཡུལ་ཞིག་དང་དྲྭ་བ་སོགས་སུ་རྒྱུད་འགོད་གྲངས་མེད་བྱེད་གཞི་ཞིག་ཏུ་གྱུར། ད་ལྟའི་ཆར་བོད་མདོ་སྨད་ཀྱི་ཕྱོགས་སུ་ཡོད་པའི་གངས་ལྗོངས་རྩ་ཐང་བུ་མོའི་སློབ་གྲྭའི་ནང་རང་གི་སྐད་ཡིག་གཙོ་བོ་བྱས་ཐོག་ཤེས་རིག་གི་སྦྱང་བ་ལ་བརྩོན་བཞིན་པའོ།།

' རྩོམ་འོག་མ། གཞས་མ་གྲགས་ཅན་འཇམ་དབྱངས་སྒྲོལ་མས་ཀྲུང་སྒོར་ཁྲི་ ༡༠ ཕུལ་བ།

འབྲེལ་ཡོད་ཀྱི་རྩོམ་གཞན།

• སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་རྒྱུན་སྐབས་ ༣ པའི་ལོ་འཁོར་༣ གྱི་ལས་བསྡོམས་སྙིང་བསྡུས།
• ཨ་ཧྥི་ཏབ་ཀརྨ་སིང་པུ་རེ་ཝལ་ (Aftab Karma Singh Pureval) ལགས་ཨ་རིའི་གྲོང་ཁྱེར་སིན་སི་ན་ཊི་( Cincinnati) ཡི་སྤྱི་ཁྱབ་གྲོང་ཁྱེར་དཔོན་པོའི་གོ་གནས་ཀྱི་རྒྱལ་ཁ་ཐོབ་པ།
• བོད་ཕྲུག་༢༧་ལ་སྲིད་སྐྱོང་གི་སློབ་ཡོན་གཟེངས་རྟགས་ཐོབ་པའི་ནང་རང་རེ་སྡེ་དགེ་བའི་སློབ་མ་གཅིག་ཡོད་པ་རེད།
• དབུས་རྒྱུན་སྐབས་གསུམ་པའི་ཚོགས་ཐེངས་གཉིས་པ་དེ་བསྐོང་ཚོགས་གནང་
• ལོ་གསར་པའི་འཚམ་འདྲི་བཀྲ་ཤིས་བདེ་ལེགས།