བདེ་ཆེན་འབུར་མོའི་གནས་ཡིག
༈ བདེ་ཆེན་འབུར་མོའི་གནས་ཡིག་བཞུགས་སོ།
མཆོག་གྱུར་གླིང་པ།
ཨོ༔ ཐཟོསྟདྦརྦདྱའན༔ ཆོས་སྐུ་ཀུན་བཟང་ལོངས་སྐུ་རིགས་ལྔ་དང་༔ སྤྲུལ་སྐུ་ཨོ་རྒྱན་འགྲོ་བའི་དཔལ་དུ་ཤར༔ སྣང་ཚུལ་དུ་མས་ཆོས་སྒོ་མཐའ་ཡས་སྟོན༔ སྐུ་གསུམ་དེ་དང་རྒྱལ་སྲས་ཚོགས་ལ་འདུད༔ དེ་ཡང་ཨོ་རྒྱན་པདྨ་བདག་ཉིད་ཀྱི༔ མ་འོངས་པ་རྣམས་སྤྲོ་བར་བསྐྱེད་པའི་ཕྱིར༔ གནས་ཡུལ་པདྨ་བཀོད་ཀྱི་མདོ་བྱང་ནི༔ ཞིང་ཁམས་ཀུན་ཏུ་སྣང་བའི་ཆོས་ཐམས་ཅད༔ འཇིག་རྟེན་ཀུན་ལ་དེ་ཉིད་སྣང་བ་ནི༔ དམ་པའི་བྱིན་རླབས་གྲུབ་པ་ཐོབ་པར་བྱེད༔ ཞེས་པའི་དོན་གྱི་མདོ་བྱང་བསྟན་པ་ནི༔ དེ་ཡང་ཁྱད་པར་གནས་མཆོག་འདི་ཉིད་ནི༔ བྱིན་རླབས་ཐུགས་རྗེ་སྤྲིན་ཕུང་ཐིབས་སེ་བཞུགས༔ བྱེ་བྲག་ཨོ་རྒྱན་པདྨ་བདག་ཉིད་ཀྱི༔ དུས་གསུམ་རྟེན་འབྲེལ་འཛོམས་པའི་ས་གནད་དུ༔ སྒྲུབ་པ་བྱས་ཤིང་དཔའ་བོ་མཁའ་འགྲོ་དང༔ བླ་མ་རིག་འཛིན་རྒྱལ་བ་སྲས་དང་བཅས༔ ཡི་དམ་ཞི་ཁྲོ་ལྷ་ཚོགས་སྤྱན་དྲངས་ཏེ༔ དངོས་སུ་བསྟིམས་ཤིང་ཡུན་དུ་བཞུགས་གྱུར་པས༔ རྟེན་དང་བརྟེན་པར་བཅས་པ་བྱིན་གྱིས་བརླབས༔ འབྲེལ་ཚད་དོན་དང་ལྡན་པའི་སྨོན་ལམ་བཏབ༔ འབུར་ཞེས་བྱ་བའི་བྲག་རི་སྣང་བ་མཐའ་ཡས་འདྲ༔ རི་ཡི་དབུས་སུ་རང་བྱུང་མཆོད་རྟེན་བཞུགས༔ པད་འབྱུར་ལོ་གསུམ་སྒྲུབ་གནས་དབང་ཕུག་དང་༔ གྲུབ་རྟགས་མཚན་མ་སྐུ་གསུང་ཐུགས་རྟེན་བཞུགས༔ མཚོ་རྒྱལ་སྒྲུབ་ཕུག་གསང་བའི་ཟླ་གམ་ན༔ གསང་བ་ཡོངས་རྫོགས་སྡེ་ཚན་བཅོ་བརྒྱད་བཞུགས༔ ཌཱཀྐིའི་གསང་ཕུག་སྟེང་ངོས་ཕྱོགས་ཆ་ལ༔ ཉེ་སྲས་བརྒྱད་སོགས་རང་བྱུང་ངོ་མཚར་བཞུགས༔ དེ་སྟེང་ཆའི་གཡས་ཀྱི་ཕྱོགས་མཚམས་སུ༔ པདྨ་བདག་གི་གྲུབ་རྟགས་ཞབས་རྗེས་ཡོད༔ གཡས་ཕྱོགས་ནམ་སྙིང་སྒྲུབ་ཕུག་དེ་འོག་ཆ༔ སྐ་བ་དཔལ་བརྩེགས་གྲུབ་པའི་གསང་ཕུག་ན༔ བཀོད་པ་བསམ་མི་ཁྱབ་པའི་མཚན་རྟགས་དང་༔ རིགས་གསུམ་མགོན་པོ་རང་བྱོན་ཕྱག་མཚན་སོགས༔ གཞན་ཡང་ཡིག་འབྲུ་སྣ་ཚོགས་གསལ་བ་སྟེ༔ ཟབ་པའི་གཏེར་ལྔ་སྐུ་ཡི་གཏེར་གསུམ་སྦས༔ དབུས་ཕྱོགས་གསང་ཕུག་དེ་ཡི་ནང་རོལ་ན༔ གསང་བ་སྡེ་གསུམ་རྒྱ་མཚོའི་གླེགས་བམ་དང་༔ མཁན་སློབ་རྣམས་ཀྱི་སྐུ་ཆས་སྣ་རེ་ཡོད༔ རྩ་བར་དགོངས་པའི་མན་ངག་དང་༔ རིན་ཆེན་སྒྲོམ་བུ་གསེར་གྱི་སྒྲོལ་མའི་སྐུ༔ རྗེ་འབངས་རྣམས་ཀྱི་ཤོག་སེར་གླེགས་བམ་དང་༔ ལོ་པཎ་གཏེར་བརྒྱ་གྲུབ་ཆེན་ཕལ་མོ་ཡི༔ གཏེར་རྫས་ཐུགས་བཅུད་མན་ངག་གསེར་ཆོས་རྣམས༔ གཞན་ཡང་རིན་ཆེན་ནོར་བུ་སྣ་ཚོགས་སྦས༔ བི་མའི་སྒྲུབ་ཕུག་མེ་ཏོག་ཁ་བྱེ་འདྲ༔ བྲག་གི་ལོགས་སུ་ཞི་ཁྲོ་རང་བྱོན་དང་༔ བྱིན་གྱིས་བརླབས་པའི་གནས་མཆོག་གུད་དུ་སྦས༔ ཡེ་ཤེས་སྐུ་ཡི་ཞབས་ཀྱི་མཚན་མ་གསལ༔ རྫུ་འཕྲུལ་ཞབས་ཀྱིས་བཅགས་པའི་གནས་ཡིན་པའི༔ གངས་རྒྱལ་ཙཱ་རི་ཟབ་ལུང་གྲགས་ཆེ་ཡང་༔ བདེ་ཆེན་འབུར་མོ་བྱ་བ་འདི་ཉིད་ལ༔ ཆར་མི་ཉེ་ཞིང་ཀུན་ལས་འདི་མཆཽག་པས༔ བོད་ཡུལ་ས་འོག་ཀུན་གྱི་གཏེར་གཅིག་མ༔ མཁས་གྲུབ་ཀུན་གྱི་ཐུགས་བཅུད་ཡོངས་རྫོགས་སྦས༔ འདོན་པའི་སྐྱེས་བུ་སྦ་བཙུན་བློ་གྲོས་སོགས༔ སྐྱེས་ཆེན་དུ་མ་གུ་རུའི་ལུང་བསྟན་བཞུགས༔ དུས་གསུམ་བདེ་གཤེགས་སྔགས་བརྗོད་གནས་འདི་ནི༔ འོད་གསལ་ཐུགས་ཀྱི་གནས་མཆོག་ཡིན་པའི་ཕྱིར༔ རྩི་ཤིང་ནགས་ཚལ་ས་རྡོ་རི་བྲག་རྣམས༔ འཇའ་ཟེར་ཐིག་ལེ་རང་བྱོན་ཚུལ་དུ་གནས༔ ཁྱད་པར་ཅན་གྱི་གནས་མཆོག་འདི་ཉིད་ལ༔ ཕྱག་བསྐོར་བྱས་ཚད་ངན་སོང་སྐྱེ་སྒོ་གཅོད༔ བཀུར་སྟི་བྱས་ན་མཐོ་རིས་གནས་སུ་སྐྱེ༔ ཚོགས་འཁོར་གཅིག་གིས་བསོད་ནམས་ཚོགས་ཆེན་བསགས༔ ཚོགས་འཁོར་གཉིས་ཀྱིས་ལུས་ཀྱི་རྣམ་སྨིན་བྱང་༔ ཚོགས་འཁོར་གསུམ་གྱིས་ཨོ་རྒྱན་པདྨ་བདག༔ དངོས་ནས་རྨི་ལམ་བརྡའ་ཡི་ཚུལ་དུ་མཇལ༔ ཆོགས་འཁོར་བརྒྱད་ཀྱིས་མཁའ་སྤྱོད་གནས་སུ་སྐྱེ༔ མཆོག་ཐོབ་འདོད་ན་རྩེ་སྒྲུབ་པས་འགྲུབ༔ འབྲེལ་ཚད་དོན་ལྡན་གནས་མཆོག་ཨེ་མ་ཧོ༔
ཨོ༔ གནས་ཆེན་ཉེར་ལྔའི་གཙོ་བོ་ཙཱ་རི་ཏྲའི༔ འདུས་མདོ་སྙིང་པོ་བདེ་ཆེན་པད་བཀོད་འདི༔ དད་ཅིང་མོས་པས་བསྐོས་བ་བྱེད་པ་རྣམས༔ ཕྱི་མ་བདེ་ཆེན་ཞིང་ཁམས་སུ༔ འོད་དཔག་མེད་ཀྱི་སྤྱན་སྔར་སྐྱེ༔ གནས་འདིར་ཚུལ་མིན་སྤྱོད་པ་རྣམས༔ ཚེ་འདིར་བར་ཆད་རྐྱེན་མང་ཞིང་༔ དུས་མིན་འཆི་དང་དམྱལ་བར་སྐྱེ༔ དམ་མེད་ཚུལ་མིན་སྤྱོད་པ་རྣམས༔ གནས་འདིར་སྡོད་པའི་གནས་མ་ཡིན༔ སྐལ་ལྡན་ཚུལ་བཞིན་སྤྱོད་པ་རྣམས༔ སྐལ་བ་མཚམས་པའི་དངོས་གྲུབ་ཐོབ༔ ཅེས་པས་བསྐོར་ཙད་ཕན་ཡོན་ནི༔ ཡིད་གཅིག་དད་པ་ལྡན་པ་ཡི༔ བསྐོར་བ་གཅིག་གིས་དུང་ཕྱུར་གསུམ༔ བཟླས་བརྗོད་བྱེད་ཅིང་ཏིང་འཛིན་སྒོམས༔ དུང་བདུན་འགྱུར་དང་ནི་བརྒྱའི་འགྱུར༔ རང་རང་བློ་དང་མཚམས་པར་འགྱུར༔ དེ་ཡང་ཡར་མར་ཚེས་བརྒྱད་དང་༔ ཉ་སྟོང་དུས་ཆེན་དེ་རྣམས་སུ༔ བྱེ་བ་ས་ཡ་དུང་ཕྱུར་འགྱུར༔ གཞན་དུ་ལོ་གཅིག་སྒྲུབ་པ་བས༔ འདི་རུ་ཞག་གཅིག་སྒྲུབ་པས་མཆོག༔ མཆོག་གླིང་གཏེར་མའོ༔
ཨོ༔ གནས་མཆོག་འདི་ཉིད་མཐོང་བ་དང་༔ དད་ཅིང་བསྐོར་བ་སུས་བྱས་ན༔ རྐྱེན་ངན་བཟློག་ཅིང་བར་ཆད་ཞི༔ ཚེ་བསོད་དཔལ་འབྱོར་ལོངས་སྤྱོད་ཕྱུག༔ ལུས་སྒྲིབ་བྱང་ཞིང་བདེ་འགྲོ་ཐོབ༔ མི་ལུས་དོན་དང་ལྡན་པར་འགྱུར༔ གནས་འདིའི་སྒོ་སྲུང་བྱ་ར་བ༔ གིས་ར་གཟི་ཁྱིམ་རྨ་ཐོམ་སོགས༔ འདི་དག་རྣམས་ཀྱིས་རི་དྭགས་ཞོན༔ རི་དྭགས་གསོད་སོགས་ཚུལ་མིན་ལས༔ གང་བྱས་དེ་དག་རྐྱེན་ངན་མང་༔ ཕྱུགས་ལུག་དབུལ་ཞིང་ངན་ཞི་མང་༔ དེ་བས་རྟག་ཏུ་འཛེམ་བག་བྱ༔ དྷ་ཐིམ༔ རྒྱ་རྒྱ་རྒྱ༔ ཞེས་པ་འདི་ནི་གནས་མཆོག་འབུར་མོ་བྲག་དཀར་གྱི་འགྲམ་དུ་ཡོད་པའི་རྡོ་བརྐོས་གནས་བྱང་ལས་འཕྲི་སྣོན་མེད་པ་ཡིག་ཐོག་ཏུ་ཕབས་པའོ། བཀྲ་ཤིས། དགེའོ།
བསམ་ཚུལ་འབྲི།
འབྲི་གཉན་འདོང་གི་གནས་ཡིག