འདོན་སྤེལ། 2019/11/27 11:20 AM རྩོམ་པ་པོ།

དབུས་རྒྱུན་སྐབས་ ༣ པ་བསྐོ་བཞག་གིས་ཚོགས་ཆེན་ལེགས་གྲུབ་བྱུང་།

འདི་ཟླའི་ཕྱི་ཚེས་ ༢༣ ནས་ ༢༥ བར་ཉིན་གསུམ་རིང་སྡེ་དགེ་རྒྱལ་ཡོངས་ལྷན་ཚོགས་ཀྱི་ཚོགས་ཆེན་ཐེངས་ ༢ པ་དང་འགན་འཛིན་ལྷན་ཚོགས་ཐེངས་ ༥ པ་གཉིས་མཉམ་གཅིག་ཏུ་རྒྱལ་ས་ལྡི་ལི་རུ་བསྐོང་ཚོགས་ཞུས་ཏེ་དེ་རིང་ཚོགས་འདུ་རྒྱལ་ཁའི་ངང་གྲོལ་ཡོད་པ་རེད། དེའང་ཚོགས་ཐོག་དེར་རྒྱལ་ཕྱི་ནང་གི་ས་གནས་ཁག་བརྒྱད་ཙམ་ནས་ས་གནས་རྒྱུན་ལས་དང་འབྲེལ་མཐུད་པ་བཅས་ཚོགས་ཞུགས་མི་སྣ་ ༣༥ ཙམ་བྱུང་ཡོད་པ་རེད། ཚོགས་ཐོག་དེ་ནས་༸གོང་ས་མཆོག་གི་སྐུ་ཕྱྭའི་སྐོར་དང་། སྡེ་དགེའི་ཉིན་མོ་གཏན་ལ་ཕབ་པ་སོགས་གྲོས་ཆོད་ཁག་ ༦ སྤྱི་མོས་སུ་གཏན་འབེབས་ཞུས་ཡོད་པ་རེད།

མ་ཟད་འདི་ལོར་དབུས་རྒྱུན་སྐབས་ ༢ པའི་ལས་འཁྱུར་ཟིན་བཞིན་ཡོད་སྟབས། སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་འོས་བསྡུ་ཚོགས་ཆུང་སྐབས་ ༢ པས་སྔོན་འགྲོ་དང་དངོས་གཞིའི་འོས་བསྡུའི་ལམ་ནས་དབུས་རྒྱུན་སྐབས་ ༣ པ་བསྐོ་བཞག་བྱས་ཡོད་པ་དང་། (ཚོགས་གཙོ། ཚོགས་གཞོན། དྲུང་ཆེ། རྩིས་པ། དངུལ་གཉེར། དཔལ་འགན། )བཅས་ཐག་གཅོད་བྱུང་ཡོད་པ་རེད།

དེ་བཞིན་སྡེ་དགེ་རྒྱལ་ཡོངས་ལྷན་ཚོགས་ཀྱི་རྩིས་ཞིབ་ཚོགས་ཆུང་སྐབས་ ༢ པ་བསྐོ་བཞག་བྱས་ཡོད་པ་རེད།(སྐུ་ངོ་དབྱངས་ཅན་སྒྲོལ་དཀར། ཚེ་དབང་བསོད་ནམས།) ཚོགས་ཐེངས་འདིའི་དཔལ་འབྱོར་གྱི་མཐུན་འགྱུར་སྦྱར་གནང་མཁན། དབུས་རྒྱུན་བླ་ཁྲི་ལྷག་པ་རྒྱལ་མཚན་ལགས། སྡེ་དགེ་ས་ཁང་ཚོགས་ཆུང་གི་ཚོགས་མི་དཀོན་མཆོག་བསྟན་འཛིན་ལགས། བལ་ཡུལ་གནས་བཞུགས་ཀརྨ་སྒྲོལ་དཀར་ལགས་བཅས་བྱུང་ཡོད་པ་རེད།

གཞན་ཡང་སྡེ་དགེ་རྒྱལ་ཡོངས་ལྷན་ཚོགས་ཀྱི་སློབ་ཡོན་སྦྱོར་སྤྲོད་ལ་མཐུན་འགྱུར་རྒྱ་ཆེན་སྦྱར་གནང་མཁན་ཨ་རིར་གནས་བཞུགས་སྟག་ལྔ་རྒྱལ་མཚན་ཆོས་གྲགས་ལགས་ལ་བཀའ་དྲིན་ཆེ་ཞུའི་གཟེངས་རྟགས་ཤིག་ཀྱང་འབུལ་ལམ་ཞུས་ཡོད་པ་རེད། ཚོགས་འདུ་རྒྱལ་ཁའི་ངང་གྲོལ་བ་དང་ཉིན་རྒྱབ་ནས་ཐུགས་སྤྲོ་གཏོང་འགོ་བཙུགས་ཏེ་ལས་དོན་ཐམས་ཅད་ལེགས་གྲུབ་བྱུང་ཡོད་པ་རེད།

སྐབས་གསུམ་པའི་དབུས་རྒྱུན་རྣམ་པ།

ཚོགས་གཙོ། བྱ་རྒོད་སྲས་འཆི་མེད་རྡོ་རྗེ།

ཚོགས་གཞོན་འཇུ་ཆེན་དཀོན་མཆོག་ཆོས་སྒྲོན།

དྲུང་ཆེ་མཁན་པོ་ཚེ་རིང་།

རྩིས་པ་འཇིགས་མེད་རྣམ་རྒྱལ།

དངུལ་གཉེར་ཆོས་གྲགས།

མཐུན་འབྲེལ་འགན་འཛིན་ཤྲི་ལ་དབང་གྲགས་རྡོ་རྗེ།

དཔལ་འབྱོར་འགན་འཛིན་དཀར་རྡོ་བཅས་འདེབས་ཐོན་བྱུང་ཡོད་པ་རེད།