དཔོན་ཡིག་རིན་ཆེན་རྒྱལ་པོ་ལ་གདམས་པ།
རྗེ་བློ་བཟང་གྲགས་པ།
ༀ་བདེ་ལེགས་སུ་གྱུར་ཅིག
སྲིད་པའི་འབྱོར་བ་རྨི་ལམ་དགའ་སྟོན་དང་།།
འདུ་འཛི་རྙེད་བཀུར་ཆུ་ཤིང་སྙིང་པོ་ལྟར།།
གང་གིས་གཟིགས་ནས་རྒྱལ་བས་བསྔགས་པའི་ལམ།།
གཡེལ་བ་མེད་པས་བསྟན་པ་དེ་དག་རྒྱལ།།
ཡུལ་ལ་སྲེད་པའི་ཆང་གིས་མྱོས་ཤིང་གཏི་མུག་མུན་པ་འཐུག་པོས་བསྒྲིབས།།
བདག་འཛོན་དྲ་བའི་སྦུབས་སུ་ཆུད་ཅིང་མཐའ་མེད་སྐྱེ་འཆིའི་བཙོན་རར་ལྷུང་།།
འཇིགས་རུང་ལས་ཀྱི་གཤིན་རྗེས་མནར་ཞིང་སྡུག་བསྔལ་ཁུར་ལྕིས་ངལ་བ་ཡི།།
འཁོར་བའི་ཆོས་ལ་ཡིད་འབྱུང་གཏམ་འདི་སྙན་དངགས་རྒྱན་གྱིས་སྤེལ་བར་བྱ།།
ཐུགས་རྗེའི་རླབས་ཆེན་རྒྱུན་ཆད་མེད་པར་གཡོ།།
མཁྱེན་པའི་གཏིང་མཐའ་དཔག་མི་ནུས་པའི།།
ཐུབ་དབང་དགེ་ལེགས་ཆུ་ཡི་གཏེར་ཆེན་དེས།།
ཤིན་དུ་རྙེད་དཀར་གསུངས་པའི་དལ་འབྱོར་རྟེན།།
རྙེད་པར་གྱུར་ཚེ་ཚེ་ལ་ལོང་མེད་པ།།
ཡང་ཡང་ཡིད་ལ་ལེ་ལོས་མ་བྱས་པར།།
ཉིན་མཚན་འདས་ན་ན་ཚོད་སོན་པའི་མཐར།།
འཆི་བདག་བྱུང་དུས་དུས་དེར་འགྱོད་ཀྱང་འཕྱིས།།
མཉམ་དུ་འགྲོགས་པའི་གྲོགས་རྣམས་ཤི་བའི་གཏམ།།
ཐོས་སམ་མཐོང་ཡང་ཡིད་ལ་ཁུ་འཕྲིག་མེད།།
གསོད་སར་ཁྲིད་པའི་ཕྱུགས་ཀྱི་ལྷག་མ་རྣམས།།
གཤེད་མ་མཐོང་ཡང་ཡིད་བདེར་གནས་པ་བཞིན།།
སྲིད་པའི་བྱ་ལམ་ཡངས་པར་ལས་ཀྱི་རླུང་གིས་བསྐྱོད་པ་ཡི།།
ལུས་ཅན་རྣམས་ཀྱི་སྲོག་གི་ཉིན་བྱེད་འཆི་བདག་ནུབ་ཀྱི་ས་འཛིན་རྩེར།།
ནུབ་པར་མ་གྱུར་སེམས་ཅན་གང་དེ་འདི་ན་འགས་ཀྱང་མ་མཐོང་ན།།
ཉམ་ཆུང་གནོད་པའི་རྐྱེན་མང་བདག་ལ་མི་འཆིའི་གནས་ཡོད་དམ།།
དེ་ལྟར་ངེས་པར་འཆི་ན་གཏན་དུ་སྡོད་སྙམ་འཁྲུལ་བར་གོ།
གོ་བཞིན་ད་དུང་འཇུག་ན་དེ་ནི་ཕྱུགས་པས་ཕྱུགས།།
ཕྱུགས་ཀྱང་གཡང་ས་མཐོང་ན་དེ་ལ་སྐྲག་པ་སྐྱེ།།
སྐྱེ་མཐའ་འཆི་བ་ཡིན་ན་འདི་ལ་ཅིས་མི་འཇིགས།།
ཤུགས་དྲག་རླུང་གིས་མར་མེའི་ཕྲེང་བ་དང་།།
ཉིན་བྱེད་འོད་ཀྱིས་གྲིབ་མའི་དཔུང་ལ་བཞིན།།
སྲོག་དབང་མི་བརྟན་སྲིན་པོའི་ཁར་ཚུད་ན།།
དེ་ལ་རིང་དུ་འཚོ་བའི་སྐབས་ཡོད་དམ།།
དེ་ལྟར་ངེས་པར་འཆི་ན་ཕྱི་མའི་བྱ་བ་ཇི་ལྟར་བཤོལ།།
ཚེ་འདིར་བསྡད་ལོང་མེད་ན་དེ་ལ་ལེ་ལོ་ཇི་ལྟར་རིགས།།
ཤ་རུས་དག་ཀྱང་འགྱེས་ན་གཉེན་བཤེས་ཚོགས་ལ་ཇི་ལྟར་ཆགས།།
གྲོགས་མེད་གཅིག་པུར་འགྲོ་ན་དེ་ཚེ་ཆོས་ལས་སྐྱབས་གཞན་གང་།།
ནམ་ཞིག་མཛའ་བཤེས་ཚོགས་ཀྱིས་མཐའ་ནས་བསྐོར།།
འབྱུང་བ་འཁྲུགས་པའི་མཚོན་གྱིས་ལུས་ལ་བཏབ།།
བཟོད་གླགས་མེད་པའི་ཚོར་བས་སེམས་ལ་ཟིན།།
བཤང་གཅིས་གོས་པའི་སྟན་ལ་འགྲེ་ལྡོག་ཚེ།།
མལ་ནས་མི་གཡོ་ཟུམ་པའི་མིག་དང་ལྡན།།
ཡན་ལག་རིད་ཅིང་སྐྲ་རྣམས་གྱེན་དུ་གཟིངས།།
ཤ་རྣམས་སྟོངས་ཤིང་རུས་གཟེབ་མ་བྲལ་ཙམ།།
མདོག་ནག་པགས་པས་གཡོགས་པའི་དྲང་སྲོང་དེས།།
ཉིན་མོ་ཁ་ཟས་གཅོད་པའི་དཀའ་ཐུབ་བླངས།།
མཚན་མོ་གཉིད་ཀྱི་བདེ་བ་བཀག་ནས་ནི།།
འཁུན་བའི་དྲག་སྔགས་བགྲང་ལ་བརྩོན་བྱས་ཀྱང་།།
འཆི་བདག་བ་སྤུ་གཅིག་ཀྱང་གཡོ་མི་ནུས།།
དེ་ཚེ་དེ་ལ་བརྩེ་བའི་གཉེན་རྣམས་ཀྱང་།།
རྟབ་རྟབ་གྱུར་ཏེ་དྲུང་དུ་ལྷགས་ནས་སུ།།
བརྩེ་བའི་ལྟ་སྟངས་དེ་ཡི་གདོང་དུ་བལྟ།།
བཞིན་གྱི་དཀྱིལ་འཁོར་མཆི་མའི་ཆུ་ཡིས་བཀྲུས།།
ཡིད་ནི་མྱ་ངན་བསམ་གཏན་ལ་གནས་ཤིང་།།
ངག་གི་འོ་དོད་ང་རོ་དབྱངས་སུ་བླངས།།
ལག་པའི་དབྱུག་གུས་བྲང་གི་རྔ་བརྡུངས་ཀྱང་།།
རང་ཉིད་ངལ་བ་ཙམ་ཞིག་འབྲས་བུར་ཟད།།
རྣམ་ཤེས་སྐྱེས་བུ་ཕྱི་མར་སྐྱེས་ཆེན་འདེགས།།
ལུས་ཀྱི་གྲོང་ཁྱེར་འབྲོག་སྟོང་བཞིན་དུ་བྱས།།
རྟེན་མེད་རིག་པ་ལས་ཀྱི་རླུང་གིས་བདས།།
རྒྱུས་མེད་ཕྱོགས་སུ་འཁྲུལ་ཞིང་འཁྱམས་པའི་ཚེ།།
སྔོན་བསགས་ལས་ཀྱི་ནུས་པ་མ་གཏོགས་པ།།
ཡུན་རིན་དགའ་མགུར་སྤྱད་པའི་གཉེན་དང་གྲོགས།།
ངལ་བ་དུ་མས་བསྒྲུབས་པའི་ལོངས་སྤྱོད་ཚོགས།།
ཏིལ་གྱི་ཆ་ཤས་ཙམ་ཡང་རྗེས་མི་འབྲང་།།
ཚུལ་འདི་བསམས་ན་གློག་བཞིན་མི་བརྟན་པའི།།
ཡུད་ཙམ་ཞིག་གི་ཚེ་འདིའི་བདེ་བའི་ཕྱིར།།
བསྐལ་པར་བརྣག་དཀའི་སྡུག་བསྔལ་མྱོང་བའི་རྒྱུ།།
སྒྲུབ་པར་བྱེད་ལ་སེམས་ཡོད་སུ་ཞིག་འཇུག།
དབང་ཕྱུག་རྨི་ལམ་རྒྱལ་སྲིད་བཞིན་དུ་གཡོ།།
ལང་ཚོ་དབང་པོའི་གཞུ་ལྟར་མྱུར་དུ་ཡལ།།
གྲགས་པ་སྒྲ་བརྙན་བཞིན་དུ་མིང་ཙམ་པ།།
ལོངས་སྤྱོད་སྦྲང་མའི་རྩི་བཞིན་གཞན་གྱིས་སྤྱོད།།
དེ་ལྟ་ན་ཡང་མ་རིག་ལིང་ཏོག་གིས།།
བློ་མིག་རིང་ནས་བསྒྲིབས་པའི་བྱས་པ་རྣམས།།
མི་གཙང་ཁྲོད་ན་དགའ་བའི་སྦྲང་བུ་བཞིན།།
ཚེ་འདིའི་སླུ་བྲིད་དག་གི་དབང་དུ་གྱུར།།
ཀྱེ་མ་མཐོན་པོའི་མཐའ་ནི་དམའ་བར་ལྷུང་།།
ལང་ཚོའི་དཔལ་ནི་རྒ་བའི་ཉེས་པས་འཇོམས།།
འབྱོར་བའི་མཐའ་ནི་རྒུད་པར་འགྱུར་ལ་སོགས།།
གང་གང་འགྲོ་བའི་སྐྱབས་ཀྱིས་གསུངས་པ་རྣམས།།
དེ་དེ་བཞིན་དུ་འདི་ན་སྣང་གྱུར་ཀྱང་།།
སླར་ཡང་སྲེད་པའི་ཆུ་བོས་ཁྱེར་བ་ཡི།།
ལུག་ལྟར་ལྐུག་པའི་བློ་ཅན་རྣམས་ཀྱིས་ནི།།
འདི་ཡི་རང་བཞིན་མི་མཐོང་ཇི་ལྟར་བྱ།།
ཉམ་ཆུང་འཇིག་སླ་ཆུ་ཡི་ཆུ་བུར་བཞིན།།
མི་གཙང་སྣོད་གྱུར་ངན་སྐྱུགས་བུམ་པ་བཞིན།།
སྡུག་བསྔལ་ཀུན་སྟེར་སྟོབས་ལྡན་དགྲ་བོ་བཞིན།།
རྙེད་པར་དཀའ་ཞིང་ཤིན་ཏུ་འཇིག་སླའི་ལུས།།
འཇམ་པའི་གོས་དང་ཞིམ་པའི་ཁ་ཟས་ཀྱིས།།
འབད་པ་དུ་མས་ལན་མང་བསྐྱངས་གྱུར་ཀྱང་།།
ཁྱི་དང་བྱ་རྒོད་ཅི་སྤྱང་ཁ་ཟས་ལ།།
རྩོལ་བ་དུ་མས་གང་དར་བྱས་པར་ཟད།།
སྐྱེ་དགུའི་ཕན་བདེའི་རྩ་བ་བསྟན་པ་ཡང་།།
ནུབ་པའི་མཐའ་ལ་ཤིན་ཏུ་ཉེ་བར་སླེབ།།
སྲིད་མཚོ་སྒྲོལ་བའི་དལལ་འབྱོར་གྲུ་ཆེན་ཡང་།།
ནམ་གྱི་ཚེ་ན་འཇུག་པ་མི་ཤེས་པས།།
དེ་ཕྱིར་དལ་འབྱོར་ཐོབ་ཅིང་བསྟན་དང་འཇལ།།
བཤེས་གཉེན་དམ་པ་བསྟེན་དུ་ཡོད་བཞིན་དུ།།
དེ་ལས་འོངས་པའི་གདམས་ངག་བདུད་རྩིའི་རྒྱུན།།
ཀྱེ་མ་ད་ལྟ་ཉིད་དུ་མི་འཐུང་ན།།
ནམ་ཞིག་གློ་བུར་ཉིད་དུ་དབང་མེད་པར།།
གཉེན་གཤེས་དབུས་ན་རྩེ་དགའ་སྐྱོང་བཞིན་དུ།།
ནད་ཀྱི་ཕོ་ཉས་བཟུང་ནས་འཆི་བདག་གི།
དྲུང་དུ་ཁྲིད་ན་དེ་ཚེ་ཇི་ལྟར་བྱ།།
དེ་ཕྱིར་ཡིད་སྨོན་ཙམ་ལ་མ་བཞག་པར།།
པང་དུ་དུག་སྦྲུལ་བྱུང་བའི་མི་བཞིན་དུ།།
ལེ་ལོ་དོར་ནས་བརྩོན་འགྲུས་ཤུགས་བསྐྱེད་དེ།།
དེང་ནས་ཐར་པའི་བདེ་བ་བཙལ་པར་རིགས།
ས་དང་བར་སྣང་ནམ་མཁའི་མི་མཚོན་པའི།།
སྟོབས་ཆེན་མེ་ལྕེས་འཁོར་བའི་ནགས་ཁྲོད་ཀྱི།།
སྲོག་ཆགས་རྣམས་ཀྱིས་གནས་དེར་བག་ཕབ་ནས།།
སོས་དལ་བདེ་བར་འདུག་པ་ཇི་ལྟར་འོས།།
ཤེས་ལྡན་ཁྱོད་ལ་མང་དུ་སྨོས་ཅི་དགོས།།
མདོར་ན་འཁོར་བའི་བདེ་འབྱོར་ཀུན་གྱིས་བསླུ།།
གཅིག་ཏུ་ཡིད་བརྟན་རུང་བ་དམ་པའི་ཆོས།།
དེ་ཕྱིར་དལ་འབྱོར་ཐོབ་པ་དོན་ཡོད་མཛོད།།
ཚུལ་འདི་འདི་དང་ཕྱི་མར་བདེ་བའི་གཞི།།
དམ་ཆོས་ཆོས་ནས་གསུངས་བཞིན་བསྒྲུབ་འདོད་པ།།
རིན་རྒྱལ་རྒྱལ་བའི་བསྟན་ལ་གུས་པའི་ཚིག་གིས་ཡིད་སྐྱོའི་གཏམ།།
དད་པའ་རླུང་གིས་བསྐུལ་ཚེ་ཕྱོགས་མེད་དུ།།
ངལ་སོ་མེད་པར་འཁྱམས་པའི་རྒྱལ་ཁམས་པ།།
བློ་བཟང་གྲགས་པའི་མགྲིན་པའི་དཀྱིལ་འཁོར་ནས།།
འཐོན་པར་གྱུར་བའི་འོད་སྟོང་ཚིག་གི་ཕྲེང་།།
ཆུ་སྐྱེས་འདབ་མ་ཤོག་བུའི་ངོས་དག་ལ།།
མིག་གི་དགའ་སྟོན་ཆེད་དུ་འཁྲིགས་པ་འདིས།།
ཁྱོད་ཡིད་ཐར་བའི་ལམ་དུ་འཁུལ་གྱུར་ཅིག།
ཅེས་པ་འདི་ནི་དད་པ་དང་གཏོང་བའི་ཡོན་ཏན་དང་ལྡན་པ་དཔོན་ཡིག་རིན་ཆེན་རྒྱལ་པོས།། རྒྱང་རིང་པོ་ནས་བསྐུལ་བའི་དོན་དུ་མང་དུ་ཐོས་པའི་རྒྱལ་ཁམས་པ་བློ་བཟང་གྲགས་པའི་དཔལ་གྱིས། འཕགས་པ་འཇིག་རྟེན་དབང་ཕྱུག་གིས་རྒྱལ་པོའི་གཟུགས་བཟུང་ནས་བྱིན་གྱིས་བརླབས་པའི་གནས་ཆེན་པོ་པོ་ཏ་ལ་ཞེས་གྲགས་པར་སྦྱར་བའོ།།
བསམ་ཚུལ་འབྲི།
ཞལ་གདམས་དཔེ་རྒྱན་གསལ་བ་བཞུགས།