དགོན་ཆེན་དགོན།
༡༽དགོན་ཆེན་དགོན་ནི།
༈སྡེ་དགེའི་རྒྱལ་ས་ལྷུན་འགྲུབ་སྟེང་དང་།དབུ་བླ་ཁག་གི་ལོ་རྒྱུས་ལ་སྡེ་དགེ་ཆོས་རྒྱལ་ཆེན་པོ་རིམ་བྱོན་གྱི་རྩ་བའི་གདན་ས་དཔལ་ལྡན་ལྷུན་འགྲུབ་སྟེང་གི་ཆོས་གྲྭ་ནི།
སློབ་དཔོན་པདྨ་སཾ་བྷ་ཝ་མངལ་སྐྱེས་ཀྱི་ཚུལ་དུ་བྱོན་པ་གྲུབ་ཆེན་ཐང་སྟོང་རྒྱལ་པོ་དང་།བོ་ཐར་བཀྲ་ཤིས་སེང་གེ་མཆོད་ཡོན་གྱིས་རབ་བྱུང་བདུན་པའི་མེ་སྟག་༼༡༤༤༦༽ལོར་དགོན་ས་བཏབ།གྲུབ་ཆེན་འདི་ངོར་རྡོ་རྗེ་འཆང་གི་སློབ་མར་གྱུར་པས་གནས་དེར་ས་སྐྱའི་སྲུང་མ་ཞིང་སྐྱོངས་ཙ་ཏུར་མུ་ཁའི་ལྗགས་བསྙེན་གནང་བ་དང་།བོ་ཐར་གྱི་སྲས་རྒན་པ་བླ་མ་དཔལ་ལྡན་སེང་གེས་རྒྱལ་བས་ལུང་བསྟན་ངོར་ཆེན་རྡོ་རྗེ་འཆང་གི་གདན་རབས་བརྒྱད་པ་མཁན་ཆེན་རྒྱལ་བ་ལྷ་མཆོག་སེང་གེ་ལས་སྡོམ་པ་གསུམ་དང་འབྲེལ་བའི་ཟབ་ཆོས་ཀྱི་བདུད་རྩི་མང་དུ་བཞེས་ཏེ།ལྷུན་འགྲུབ་སྟེང་གི་བསྟན་བདག་མཛད་པ་སོགས་ཀྱིས་དཔལ་ལྡན་ས་སྐྱ་པའི་ཆོས་རྒྱུད་འཛིན།དེ་ནས་གོང་དུ་སྨྲས་པ་བཞིན་བོ་ཐར་བཀྲ་ཤིས་སེང་གེ་ནས་སྡེ་དགེའི་རྒྱལ་རབས་ཉེར་བཞིའམ།ཁྱད་པར་བཤད་མ་ཐག་པའི་བླ་མ་དཔལ་ལྡན་སེང་གེ།དཔོན་ཆེན་ཨ་སྔའི་སྲས་ཇོ་གདན་ནམ་མཁའ་ལྷུན་བཟང་།ཡ་རྒྱལ་འཕེལ་གྱི་སྲས་རྒན་པ་བླ་མ་དཔལ་ལྡན་རིན་ཆེན།རྗེ་རྗེ་ལྷུན་འགྲུབ་ཀྱི་སྲས་སྐུ་བགྲེས་བླ་མ་གྲགས་པ་ལྷུན་འགྲུབ་དང་།བཞི་ཁྲི་རབས་མ་ཚུགས་པའི་སྔོན་དང་།བླ་ཆེན་བྱམས་པ་ཕུན་ཚོགས་ནས་ལྷ་སྲས་ཚེ་དབང་བདུད་འདུལ་བར་ཁྲི་རབས་བཅུ་བཞི་བཅས་ཀྱིས་བསྟན་པའི་བདག་པོར་མཛད།ངོར་ཨེ་ཝཾ་ཆོས་ལྡན་སོགས་ནས་དབུ་ཡི་མཆོད་གནས་མང་དུ་སྤྱན་དྲངས་པ་སྟེ།བླ་མ་ཀུན་དགའ་རིན་ཆེན་གྱིས་ཤར་ཆེན་ཀུན་བཀྲ་ཤིས་གདན་དྲངས།བླ་ཆེན་བྱམས་པ་ཕུན་ཚོགས་ཀྱིས་སྒྲུབ་ཁང་པ་དཔལ་མཆོག་རྒྱལ་མཚན་སྤྱན་དྲངས།ཁྲི་ཆེན་སངས་རྒྱས་བསྟན་པས་ངོར་ཨེ་ཝཾ་ནས་འཇམ་མགོན་བཀྲ་ཤིས་དཔལ་ལྡན་དང་།རྟ་ནག་མཁན་ཆེན་བཟང་པོ་རྒྱལ་མཚན།ཁྱད་པར་ངོར་མཁན་རབས་ཉེར་བཞི་པ་མཁས་གྲུབ་སངས་རྒྱས་ཕུན་ཚོགས་དང་གསུམ་སྤྱན་དྲངས།ཆོས་རྒྱལ་བསྟན་པ་ཚེ་རིང་གིས་ངོར་ཨེ་ཝཾ་པའི་གདན་རབས་སུམ་ཅུ་བཀྲ་ཤིས་ལྷུན་འགྲུབ་དང་།ལམ་འབྲས་ཞལ་ངོ་ནང་བརྒྱུད་སློབ་བཤད་དུ་གྲགས་པའི་བརྒྱུད་འཛིན་ཡར་ཀླུངས་ཆོས་སྡེ་ནས་གནས་གསར་བ་ངག་དབང་ལེགས་པའི་འབྱུང་གནས་གཉིས་གདན་འདྲེན་ཞུས།ཁྲི་ཆེན་ཕུན་ཚོགས་བསྟན་པས་ངོར་པའི་གདན་རབས་སོ་གསུམ་པ་མཁན་ཆེན་དཔལ་ལྡན་ཆོས་སྐྱོང་སྤྱན་དྲངས།བླ་ཆེན་བློ་གྲོས་རྒྱ་མཚོས་ཤར་ཆེན་མི་འགྱུར་རྒྱལ་མཚན་གདན་དྲངས།རྗེ་བཙུན་དབྱངས་ཅས་སྒྲོལ་མས་ངོར་ཁང་སར་མཁན་ཆེན་ངག་དབང་ཆོས་སྐྱོང་བཟང་པོ་གདན་ཞུས་མཛད།ཁྲི་ཆེན་བླ་མ་སངས་རྒྱས་བསྟན་པས་ངོར་ཐར་པ་རྩེའི་བྱམས་པ་ནམ་མཁའ་འཆི་མེད་དང་བྱམས་པ་ཀུན་དགའ་བསྟན་འཛིན་ཁུ་དབོན།ཡར་ཀླུངས་ཆོས་སྡེ་ནས་ནམ་མཁའ་ལེགས་པ་ལྷུན་འགྲུབ་དང་གསུམ་སྤྱན་དྲངས།དམ་ཚིག་བརྟན་པའི་རྡོ་རྗེས་ངོར་མཁན་རབས་ལྔ་བཅུ་པ་ཐར་རྩེ་རྣལ་འབྱོར་འཇམ་དཔལ་བཟང་པོ་གདན་དྲངས།འཆི་མེད་རྟག་པའི་རྡོ་རྗེས་ངོར་དཔོན་སློབ་ངག་དབང་ལེགས་གྲུབ་དང་།ཐར་རྩེའི་ཞབས་དྲུང་བློ་གཏེར་དབང་པོའི་བར་དུ།སྡེ་དགེའི་རྒྱལ་རབསརིམ་བྱོན་ནས་ངོར་པའི་མཁན་རབས་རྣམས་གདུན་ཞུས་མཛད་པ་དང་།གཞན་ཡང་དཔལ་ལྷུན་འགྲུབ་སྟེང་གི་བསྟན་པར་བཀའ་དྲིན་ཅན་མཁས་གྲུབ་སངས་རྒྱས་དཔལ་བཟང་།འཇམ་དབྱངས་སངས་རྒྱས་ཡེ་ཤེས།མཁས་བཙུན་ཀུན་ཆོས་འཕེལ།བླ་མ་བཀྲ་ཤི་དབང་ཕྱུགསློབ་དཔོན་འཇམ་དཔལ་གྲགས་པ།ཞུ་ཆེན་ཚུལ་ཁྲིམས་རིན་ཆེན།མཁན་རྒན་གསམ་གཏན་བློ་གྲོས།བླ་མ་ངག་དབང་ཆོས་འཕེལ་སོགས་དང་།གཞན་ཡང་།ཤར་བླ་མ་དང་།ནུ་བླ་མ།རྒྱལ་མཚན་བླ་མ།དབྱར་གནས་མཁན་པོ།གྲྭ་སྒང་སྒྲུབ་དཔོན།འཛི་ཕུ་བཤད་གྲྭའི་མཁན་ཆེན་སོགས་རིམ་བྱོན་གྱིས་གདན་ས་མཛད་ཅིང་།དེ་དག་གིས་བཤད་སྒྲུབ་ལས་གསུམ་གྱི་སྒོ་ནས་བསྟན་པ་དང་སེམས་ཅན་གྱི་དོན་ཇི་ལྟར་མཛད་ཚུལ་ངོར་པའི་གདན་རབས།ལམ་འབྲས་བླ་བརྒྱུད་སོགས་སུ་སོ་སོའི་རྣམ་ཐར་རྒྱས་པར་འབྱུང་།གཞན་ཡང་གདུང་རབས་ཕལ་ཆེར་གསར་རྙིང་རིས་མེད་དུ་མཛད་པས་གཙུག་ལག་ཁང་ཆེན་མོ་བསམ་འགྲུབ་མཐོང་གྲོལ་ཆེན་མོའི་ལྡེབས་བྲིས་སོགས་ཕྱེད་ཆ་རྙིང་ལུགས་ལྟར་བཞེངས་པ་དང་།ལྷ་ཁང་འགའ་ཤས་རྙིང་ལུགས་ཀྱི་གསོ་ཀ་ཁང་ཡོད་པ་དང་།རྡོར་བྲག་ཚང་དབུར་བཞུགས་པས་གཤིན་རྗེ་ཚེ་བདག་གི་གཏོར་རྒྱགགཏོར་འཆམ་གཟབ་སྤྲོས་བཅས་རྙིང་ལུགས་ཀྱི་སྲོལ་ཡང་ཅུང་ཟད་གནང་འདུགགཙུག་ལག་ཁང་བསམ་འགྲུབ་མཐོང་གྲོལ་ཆེན་མོས་གཙོས་ལྷ་ཁང་ཆེ་ཆུང་སུམ་ཅུ་རྩ་གསུམ་ཙམ་དང་།གོང་དུ་ལོ་རྒྱུས་སྨྲས་ཟིན་ལྟར་ཐུབ་སྐུ་རྒྱབ་ལུང་མ་དང་།འཛམ་གླིང་ན་གྲགས་པའི་པར་ཁང་ཆོས་མཛོད་ཆེན་མོ་སོགས་རྟེན་གསུམ་མཆོད་ཆ་སོགས་སུམ་རྩེན་ལྷ་ཡི་གྲོང་ཁྱེར་ལ་འགྲན་པ་ཡོད།དེར་འདུས་ཚོགས་ས་དགོན་ཉེར་ལྔ་ལས་བླ་མ་གང་བཟང་རེ་རེ་བསྡུས་པའི་རྩེའི་གྲྭ་ཚང་དང་།ས་དགོན་ཁག་ནས་བསྡུས་པའི་གྲྭ་སྒང་སྒྲུབ་སྡེ།འཛི་ཕུ་བཤད་གྲྭ་ཁང་བཅས་བསྡོམས་པས་དགེ་འདུན་གྱི་ཞལ་གྲངས་སྟོང་རྩ་ཡར་མར་ཙམ་གྱིས་ཐོས་བསམ་སྒོམ་སྒྲུབ་རྟག་ཏུ་བརྩོན་བཞུགས་གནང་ཞིང་སྒྲིག་སྲོལ་ཤིན་ཏུ་དམ་པོར་ཡོད།ངོར་ལུགས་དཀྱིལ་འཁོར་བདུན་གྱི་སྒྲུབ་མཆོད་འདུ་བ་དང་།གཤིན་རྗེ་དྲུག་ཅུ་སོགས་ཀྱི་སྐབས་ཟིལ་རྒྱུད་དགོན་ཁག་དྲུག་མཉམ་དུ་ཚོགས་དགོས།དགོན་འདི་ཆོས་རྒྱལ་ཆེན་པོའི་གདན་སར་སོང་གཤིས་དབང་ཤུགས་དང་བཙན་དྲག་ཀྱང་ཤིན་ཏུ་ཆེ་སྟེ།སྡེ་དགེའི་མདུན་སྐོར་ཡོངས་ནས་ལྷུ་འགྲུབ་སྟེང་དུ་གྲྭ་ཁང་ཡོད་དགོས་པ་དང་སྐུ་ངོ་རེ་རེ་གྲྭ་པ་བྱེད་དགོས།གར་འཆམ་དང་གཏོར་བོག་འཕེན་སྐབས་མདུན་སྐོར་དཔན་ཁག་ཚང་མ་ལུགས་མཐུན་མཛད་སྒོར་ཞུགས་དགོས་པ་དང་།གཏོར་བོག་འཕེན་སྐབས་མདུན་ཁག་རྣམས་སྐུ་ངོ་དངོས་ཀྱིས་འཕེན་དགོས།དུས་མཆོད་ཁག་གི་སྤྱི་བ་ཕལ་ཆེར་ཡང་མདུན་ཁག་གིས་ཁུར་དགོས་པ་སྡེ་དགེའི་ཁྱོན་ཡོངས་ལ་དབང་བསྒྱུར་བྱས་འདུག་གོ།སྡེ་དགེ་ཆོས་རྒྱལ་ཆེན་པོ་རིམ་བྱོན་གྱི་དབུ་མཆོད་གནས་གཙོ་ཆེར་དཔལ་ལྡན་ས་ངོར་ལ་བྱེད་ཀྱང་དེ་དག་སྡེ་དགེའི་མངའ་ཁོངས་སུ་མ་གཏོགས་པས་འདིར་ལོ་རྒྱུས་མ་བྲིས་ལ།སྡེ་དགེའི་ཁོངས་གཏོགས་ཡོངས་གྲགས་དབུ་བླ་ཁག་ལྔའི་ལོ་རྒྱུས་མདོར་ཙམ་བརྗོད་ན།ཡོང་ཁུངས།སྡེ་དགེའི་རྒྱལ་རབས་དངུལ་དཀར་མེ་ལོང་ནས་དྲངས།
བསམ་ཚུལ་འབྲི།
ཀུ་ཤུ་རྟགས་ཅན་དང་སེམས་བཟང་བཟོ་གྲྭའི་བར་གྱི་ཁ་མཆུ།