ཐུགས་གསོའི་ཞུ་འཕྲིན།
༄༅། །དཀྱིལ་འཁོར་རིགས་བརྒྱའི་ཁྱབ་བདག བརྩེ་ཆེན་བསྟན་པའི་སྲོག་འཛིན། འདུལ་འཛིན་བྱེ་བའི་གཙུག་རྒྱན། ངོར་ཆེན་རྒྱལ་བའི་རྒྱལ་ཚབ། ༸སྐྱབས་མགོན་འཁོར་ལོའི་མགོན་པོ། མཚན་བརྗོད་པར་དཀའ་བ་ངོར་ཀླུ་ལྡིང་མཁན་ཆེན་རྡོ་རྗེ་འཆང་འཇམ་དབྱངས་བསྟན་པའི་ཉི་མ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་མཆོག་ཉིད་རབ་བྱུང་ ༡༦ པའི་ཆུ་སྟག་ལོའི་ཧོར་ཟླ་བཅུ་གཅིག་པའི་ཚེས་དྲུག་རེས་གཟའ་ལྷག་པ། ཕྱི་ལོ་ ༢༠༢༢ ཟླ་ ༡༢ ཚེས་ ༢༨ ཉིན་གྱི་ཐོ་རེངས་བསྟན་འགྲོའི་དོན་ཆེན་རེ་ཞིག་གྲུབ་ནས་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་བྱུང་བར་སྡེ་དགེ་རྒྱལ་ཡོངས་ལྷན་ཚོགས་ཀྱི་འགོ་མང་ཡོངས་རྫོགས་སྐྱོ་གདུང་དྲག་པོས་མནར་བའི་ཐོག་རིན་པོ་ཆེ་ཉིད་ཀྱིས་བསྟན་དང་འགྲོ་བའི་དོན་དུ་མཛད་བཟང་བསྐྱངས་གནང་བ་རྣམས་དྲན་གསོ་དང་། འདི་ཕྱིའི་ཕན་བདེའི་གདམས་ངག་དང་ལམ་སྟོན་གནང་བ་ཁག་ལ་གསལ་འདེབས་དང་བཅས། མགོན་པོ་གང་ཉིད་ཀྱི་རྗེས་འཇུག་ངོར་ཀླུ་ལྡིང་མཁན་རིན་པོ་ཆེ་མཆོག་གིས་དབུས་བླ་བྲང་སྐུ་འཁོར་སློབ་བུ་ལྟོས་བཅས་ཡོངས་ལ་གདུང་སེམས་མཉམ་བསྐྱེད་ཞུ་རྒྱུ། རིན་པོ་ཆེ་མཆོག་གི་ཐུགས་དགོངས་ཡོངས་སུ་རྫོགས་ཤིང་བདག་ཅག་དད་ལྡན་ཤུལ་ལུས་རྣམས་ཀྱང་ཚེ་རབས་ནས་ཚེ་རབས་བར་རྗེས་སུ་བཟུང་དུ་གསོལ་བའི་གདུང་ཤུགས་དྲག་པོའི་གསོལ་བ་རྩེ་གཅིག་ཏུ་འདེབས་རྒྱུ་བཅས།
གུས་འབངས་སྡེ་དགེ་རྒྱལ་ཡོངས་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་ཕྱི་ལོ་ ༢༠༢༢ ཟླ་ ༡༢ ཚེས་ ༣༡ ཉིན་གུས་ཕུལ།
བསམ་ཚུལ་འབྲི།
སྡེ་དགེ་རྒྱལ་ཡོངས་ལྷན་ཚོགས་ཀྱི་ ༢༠༢༢ ལོའི་སློབ་ཡོན་གསལ་བསྒྲགས།