ཆུ་སྒང་དུས་དྲན་ཐེངས་ ༥༧ པའི་གསུང་འཕྲིན།
ཆུ་སྒང་དུས་དྲན་ཐེངས་ ༥༧ པའི་གསུང་འཕྲིན།
ཡོང་ཁུངས། མདོ་ཁམས་ཆུ་བཞི་སྒང་དྲུག་དྲ་བ།
༄༅།།མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་༥༧འཁོར་བའི་ཡོངས་ཁྱབ་གསུང་འཕྲིན།
༄༅།།དེ་ཡང་བོད་རྒྱལ་ལོ་༢༡༤༢ཕྱི་ལོ་༢༠༡༥ཟླ་༦ཚེས་༡༦གི་ཉིན་མོ་འདི་ནི།དགྲ་བོ་རྒྱ་དམར་གྱི་མེ་སྒྱོགས་དང་།མདའ་གྲི་གདུང་གསུམ་གྱི་སོ་ཁ་ནས་རང་སྲོག་བློས་བཏང་གིས་བོད་བསྟན་སྲིད་མི་རིགས་དང་བཅས་པའི་ཆེད་དུ་རང་ཡུལ་བོད་དུ་བཙུགས་པའི་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་འདི་དབུ་བརྙེས་ནས་མི་ལོ་ཧྲིལ་པོ་༥༧འཁོར་བའི་དུས་ཚོད་ཁྱད་པ་ཅན་གྱི་ཉིན་མོ་ཞིག་ཡིན་ལ།དེ་རིང་གི་མཛད་སྒོའི་ཐོག་མར་ཕྱི་ལོ་༡༩༤༩ནས་ད་བར་གྱི་བོད་བསྟན་སྲིད་མི་རིགས་རིག་གཞུང་དང་བཅས་པའི་ཆེད་དུ་སྐུ་གཤེགས་རྒྱལ་གཅེས་དཔའ་བོ་དཔའ་མོ་རྣམ་པས་དབུས་ཉེ་བའི་ལོ་རབས་ནང་གཞིས་བྱེས་གཉིས་སུ་སྐུ་ལུས་མེར་སྲེག་གནང་མཁན་རྣམ་པ་ལ་གུས་འདུད་ཚད་མེད་ཀྱིས་མྱ་ངན་ཞུ་བ་དང་འབྲེལ། ཤུལ་ལུས་ལྟོས་བཅས་ཡོངས་ལ་གདུང་སེམས་མཉམ་བསྐྱེད་ཞུ་བཞིན་ཡོད།དེ་བཞིན་དེ་རིང་གི་དུས་དྲན་མཛད་སྒོ་འདིར་ཆེད་ཕེབས་གནང་བའི་བཀུར་འོས་འབྲེལ་ཡོད་མི་སྣ་རྣམ་པ་ཡོངས་ལ་གུས་བཀུར་ཆེན་པོའི་ངང་འཚམས་འདྲི་བཀྲ་ཤིས་བདེ་ལེགས་ཞེས་ཞུ་རྒྱུ་ཡིན།
སྤྱིར་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་འདི་ནི།རང་དབང་གི་ཡུལ་དུ་རྒྱ་ལྕོག་དང་རྐུབ་སྟེགས་བསྒྲིགས།ཇ་ཆང་དང་གསོལ་སྟོན་གཤམས་ནས་སོས་དལ་བག་ཕེབས་ངང་བཙུགས་པའི་ཚོགས་པ་ཞིག་དང་།མི་རྒྱུ་སྲོག་གསུམ་གྱི་བློས་གཏོང་མི་དགོས་པ་དུས་བདེ་ཞོད་འཇགས་སྐབས་སུ་བཙུགས་པའི་ཚོགས་པ་ཞིག་མིན་པ་བོད་ཀྱི་བྱུང་རབས་ལོ་རྒྱུས་ནང་གི་ཆེས་གཉན་འཕྲང་ཆེ་བའི་དུས་ཚོད་དེ།དུས་རབས་ཉི་ཤུ་པའི་ལོ་རབས་ལྔ་བཅུའི་ནང་བོད་ཁ་བ་ཅན་གྱི་ཆོས་སྲིད་གཉིས་ཀྱི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱྭ་དང་སྐུ་དབང་།དེ་བཞིན་བོད་བསྟན་སྲིད་མི་རིགས་རིག་གཞུང་དང་བཅས་པ་རླུང་ཁྲོད་ཀྱི་མར་མེ་དང་།གཡང་གཟར་གྱི་སེམས་ཅན་ལྟར་ཆེས་ཛ་དྲག་གི་གནས་སུ་ལྷུང་བའི་སྐབས་ཛ་སག་ཨ་འབྲུག་མགོན་པོ་བཀྲིས་མཆོག་གིས་སྣེ་ཁྲིད་པའི་རྒྱལ་གཅེས་ཁམས་པའི་དཔའ་རྒོད་ཚོས་གཙོས་མདོ་དབུས་ཁམས་གསུམ་གྱི་དཔའ་བོ་ཁྱུ་གཅིག་གིས།རང་རྒྱུ་ནོམ་ཆེན་དེ་སྤྱི་ལ་སྤུངས།རང་སྲོག་རྩིས་ཆེན་དེ་བློས་བཏང་བྱས་ནས་བོད་རྒྱལ་ཁབ་དང་མི་རིགས་ཀྱི་རང་དབང་རང་བཙན་ཆེད་ཉིན་གྱི་རྒྱབ་ལ་མཚན་མཐུད་དེ་རྒྱབ་སྣོན་གྱི་དཔུང་མེད་ཀྱང་དགྲ་བོ་ལ་མགོ་མ་སྒུར་བ་ཤི་འཛིང་རོ་འཛིང་བྱས།དམག་སྦྱོང་གི་རྩལ་མེད་ནའང་རྡོ་དང་ཁུ་ཚུར་ཡན་ཆོད་བཞུས་ཏེ་རྒྱུ་མ་ཐང་ལ་དྲུད་ཀྱང་རུམ་ཁུག་ཏུ་བརྫངས་ནས་ཁ་ཕོ་ཡང་བསྡམ་དང་།སྐེ་རགས་ཡང་བཅིངས་བྱས་ཏེ་དམག་འཐབ་བྱས་པའི་ཁྲག་མཚོ་ཁོལ་མའི་ནང་གི་དཔའ་བོའི་རྟོགས་བརྗོད་རིང་མོ་ཡོད་པའི་དྲག་པོ་དམག་གི་སྒྲིག་འཛུགས་ཤིག་རེད།
སྒྲིག་འཛུགས་འདིར་བརྒྱུད་༸གོང་ས་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དབུས་བོད་ཀྱི་ཆོས་བརྒྱུད་རིས་མེད་ཀྱི་བསྟན་འཛིན་སྐྱེས་བུ་ཁག་དང་།དེ་བཞིན་ཆོལ་གསུམ་ཁྱོན་ཡོངས་ཀྱི་བོད་མི་མང་པོ་ཞིག་རང་དབང་གི་ཡུལ་དུ་བྲོས་བྱོལ་ཡོང་པར་སྲི་ཞུ་རྒྱ་ཆེན་བསྒྲུབས་ཐུབ་ཡོད།
བོད་ཀྱི་རྒྱལ་ས་ལྷ་སའི་ནོར་བུ་གླིང་ཁ་རུ་གསེར་ཁྲི་ཁམས་གསུམ་ཟིལ་གནོན་གསར་བཞེངས་ཀྱིས་འདི་ཕྱི་ཚེ་རབས་གཏན་གྱི་སྐྱབས་གནས་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་བརྟན་བཞུགས་རྒྱས་འབུལ་ཞུས་པ་ནས་ད་བར་རླབས་ཆེན་བསོད་ནམས་གསོག་པའི་རྟེན་དུ་བརྟན་བཞུགས་ཚར་དྲུག་ཙམ་འདེགས་འབུལ་དང་བཀའ་ཆོས་གོ་སྒྲིག་ཞུ་རྒྱུའི་བསྐལ་བ་བཟང་པོ་བྱུང་ཡོད་པ་ལྟར། མདོ་སྟོད་ནང་ཁུལ་གྱི་ལུང་ཚན་དགུའམ་བཅུ་ཙམ་གྱིས་ད་བར་བརྟན་བཞུགས་འདེགས་འབུལ་གྱིས་རླབས་ཆེན་ཚོགས་གཉིས་ཀྱི་བསོད་ནམས་གསོག་རྒྱུ་བྱུང་ཡོད་པའང་ཧ་ཅང་བསྐལ་པ་བཟང་པོར་གྱུར་ཡོད།
ཕྱི་ལོ་༡༩༥༨ལོར་ལྕགས་ཚ་གྲུ་གུ་ཐང་ལ་བསྟན་སྲུང་དང་བླངས་དམག་སྒར་དབུ་བརྙེས་ནས་བྱང་ཁུལ་དུ་དགྲ་ཐེངས་༡༨དང་།ལྷོ་ཁུལ་དུ་དགྲ་ཐེངས་ཆེ་བ་༣༤ཆུང་བ་༧༥ལྷག་བརྒྱབ་ནས་དགྲ་བོ་ལ་རྒོལ་འཛིང་དྲག་པོའི་ཐོགཨ་རི་གསང་བའི་ལས་ཁུངས་སུ་འབྲེལ་བ་རིམ་མཐུད་ཀྱིས་ལི་ཐང་ཨ་ཐར་ནོར་བུ་དང་།བྱ་རྒོད་སྲས་དོན་ཡོད་སོགས་ལ་གསང་བའི་དམག་སྦྱོང་ཐོབ་ནས་བོད་ཀྱི་ས་ཐོག་ཏུ་གནམ་མཆོང་བརྒྱབ་སྟེ་དགྲ་བོ་ལ་ཕར་རྒོལ་དྲག་པོ་བྱས་པའི་ལོ་རྒྱུས་དག་དེང་སང་དགྲ་བོ་རྒྱ་དམར་གྱི་ཡིག་ཚང་ནང་ནས་ཐོན་ཡོང་བཞིན་ཡོད་ལ།ཨ་རི་CIAགསང་ལས་ཁང་སོགས་སྐབས་དེའི་གནས་ཚུལ་དངོས་ཧ་གོ་མཁན་ཚོས་དེང་སང་ལོ་རྒྱུས་དེབ་དེར་འདོན་བཞིན་པ་དག་ལས་ཀྱང་མཁྱེན་རྟོགས་ཐུབ་ངེས་ཡིན།
ཉེ་ཆར་༢༠༡༥་༣་༡ཉིན་བཞུགས་སྒར་རྡ་ས་ནས་ཨ་རིའི་འབུམ་རམ་པ་ཁེ་རཱོལ་གྱིས་ཆུ་སྒང་དམག་གི་སྐོར་གྱི་ལོ་རྒྱུས་དྲན་གསོ་ཞེས་པའི་བརྗོད་གཞིའི་ཐོག་གཏམ་བཤད་གནང་བ་དང་། ཁོང་གིས་ལོ་ཉི་ཤུའི་རིང་ཆུ་སྒང་སྐོར་ལ་ཞིབ་འཇུག་བྱས་ཏེ། ལོ་རྒྱུས་ལ་དྲན་གསོའི་སྐོར་གྱི་དཔེ་དེབ་ཅིག་ཀྱང་བཏོན་ཡོད་པ་རེད། ཁོང་གིས་དམག་འཐབ་ལོ་རྒྱུས་ནི་བོད་ཀྱི་ལོ་རྒྱུས་ནང་ཧ་ཅང་གལ་ཆེན་པོ་ཡིན་པས་གཞུང་འབྲེལ་ལོ་རྒྱུས་ནང་འཁོད་འོས་པ་དང་། སློབ་གྲྭ་ཁག་གི་སློབ་ཚན་ནང་དུ་ངེས་པར་དུ་འཁོད་དགོས་པ་ཞིག་ཡིན་ནའང་། ད་ལྟ་དེ་ལ་དམིགས་བསལ་གྱིས་མཐོང་ཆེན་བྱེད་ཀྱི་མེད་པ་དེ་ལོ་རྒྱུས་ཐོག་ནས་འགྲིག་གི་མེད་སྐོར། དེ་བཞིན་སྐབས་དེའི་དམག་འཐབ་བྱེད་མཁན་རྣམས་ལ་གཞུང་གིས་དམིགས་བསལ་ལྟ་རྟོགས་གང་ཡང་མེད་སྐོར་སོགས་ཀྱི་འགྲེལ་བརྗོད་གནང་ཡོད་པ་རེད།
དེ་བཞིན་བཙན་བྱོལ་རང་དབང་ཡུལ་དུ་འབྱོར་རྗེས་རང་མགོ་གང་ཐོན་བྱས་ཏེ་མ་བསྡད་པ་ལན་དགུར་ཆད་ཀྱང་ལན་དགུར་མཐུད་པའི་དཔེ་ལྟར་བལ་ཡུལ་གློ་རུ་དྲག་པོའི་གསང་བའི་དམག་སྒར་གསར་འཛུགས་བྱས་ཏེ་བོད་ནང་དུ་བསྟུད་མར་གནམ་ས་གཉིས་ནས་ཚུར་རྒོལ་བྱེད་བཞིན་པའི་དགྲ་བོ་དམར་པོ་ལ་འཇབ་རྒོལ་ལན་མང་བརྒྱབ་པ་སོགས་བརྒྱུད་སྔ་ཕྱིར་རྒྱལ་ཁ་ཆེན་པོ་ཐོབ་ཡོད་ནའང་རྒྱབ་ཀྱི་དཔུང་སྣོན་ཆད། ནང་གི་དམག་མི་རྫོགས། མང་སྣེ་ཉུང་གིས་མ་བརྟན།མདའ་མཚོན་གོ་ལག་གིས་མ་འདང་པ་མཐར་ཁམས་པའི་དཔའ་རྒོད་ཚོས་གཙོས་རྒྱལ་གཅེས་དཔའ་བོ་ཁྲི་ཁྲག་མང་པོའི་སྐུ་སྲོག་དགྲ་ལག་ཏུ་ཤོར་བའི་ཡིད་སྐྱོའི་གནས་ཚུལ་ཐོན་པར་དག་དེ་རིང་གི་མཛད་སྒོའི་སྡིངས་ཆ་འདིར་བརྒྱུད་སེམས་ཚོར་ཆེན་པོའི་ཐོག་དྲན་གསོ་ཞུ་བ་དང་སྦྲགས་མྱ་ངན་གུས་འདུད་ཞུ་བཞིན་ཡོད།
དེ་བཞིན་དཔའ་བོ་ཁོང་ཅག་གིས་ཁྲག་དམར་ལྷོག་ལྷོག་བཞུར་ཡང་མི་རབས་རྗེས་མ་ཚོར་རེ་བ་ཆེན་པོའི་ཐོག་ཞལ་ཆེམས་དྲོན་མོ་བཞག་པ་དག་ང་ཚོས་ད་ལྟའང་མ་བརྗེད་སེམས་ལ་འཆང་བཞིན་ཡོད་ལ།ཁོང་ཅག་གིས་ཤི་མིག་གསོན་ལ་ཅེར་བ་དག་ལ་ཁྲེལ་མེད་མི་བྱ་བ་ནམ་ཡང་ཞུམ་པ་མེད་པའི་ཐོག་འཐབ་རྩོད་རྒྱུན་འཁྱོངས་དང་།ཕ་རྗེས་བུ་འཇུག་གིས་བར་དོའི་རྣམ་ཤེས་དག་ལ་བློ་བདེ་རུ་འཇུག་རྒྱུའི་དམ་བཅའ་བརྟན་པོ་ཡོད།སྔོན་ནས་དམིགས་ཡུལ་རྒྱུན་འཁྱོངས་ཆེད་ལྡེ་ར་ཌུན(Dehradun) དུ་དམག་སྒར་ཨང་༢༢པ་དྲག་པོའི་དམག་གི་དཔུང་སྡེ་གསར་འཛུགས་བྱས་ཏེ་ད་ལྟའང་མུ་མཐུད་གནས་ཡོད་ལ།ད་བར་ཤུལ་ལུས་དཔའ་བོ་རྒན་གྲས་ཚོར་ཆེ་མཐོང་དང་གུས་བརྩིའི་ཆེད་དོན་འགྲུབ་གླིང་དུ་རྒན་གསོ་ཁང་བརྒྱབ་ཡོད་པས་མ་ཚད།ལོ་ལྟར་རྒན་རབས་བརྒྱ་ཐམ་པ་ལ་འཚོ་སྣོན་གྱི་རོགས་སྐྱོར་དང་།༸གོང་ས་༸རྒྱལ་དབང་ཐམས་ཅད་མཁྱེན་པ་མཆོག་གིས་ཀྱང་དུས་ནས་དུས་སུ་བཀའ་སློབ་ཕེབས་དོན་ལྟར་མ་འོངས་བོད་ཀྱི་རྩ་དོན་རྒྱུན་སྐྱོང་ཆེད་གཞོན་སྐྱེས་ལོ་ཆུང་ཚོར་ཤེས་ཡོན་ཚད་ལྡན་འབྱོར་ཐབས་སུ་ལོ་ལྟར་སློབ་ཕྲུག་གྲངས་༦༧ལ་སློབ་ཡོན་རོགས་རམ་བྱེད་བཞིན་པ་ཡིན།
རྒྱུན་དུ་སྒྲིག་འཛུགས་འདི་ནི་བོད་བསྟན་སྲིད་མི་རིགས་སྤྱིའི་རྩ་དོན་ཐད་ཧ་ཅང་གལ་གནད་ཆེན་པོ་ཞིག་ཆགས་ཡོད་པ་ཧ་གོ་བའི་སྟེང་། ཐོག་མའི་དམིགས་ཡུལ་བཞིན་མ་འོངས་ཕུགས་འཕེར་རང་བཞིན་ཅན་ཞིག་ཡོང་ཐབས་ལ་རྒྱུན་དུ་འབད་བརྩོན་བྱེད་མུས་ཐོག་༸རྒྱལ་བ་དོན་གྱི་བདག་པོའི་དབུ་ཁྲིད་འོག་རང་གཞུང་བོད་མིའི་སྒྲིག་འཛུགས་ལ་དབུ་འོག་དཔུང་འདེགས་ཀྱིས་བོད་ཀྱི་བདེན་མཐའ་མྱུར་བར་གསལ་སླད་སྔར་ལྷག་འབད་རྩོལ་ཤུགས་དྲག་བྱ་རྒྱུའི་ཆོད་སེམས་བརྟན་པོ་ཡོད་ལ།འཛམ་གླིང་གང་སར་གནས་པའི་མདོ་ཁམས་ཆུ་བཞི་སྒང་དྲུག་གི་ཁྱབ་ཡོངས་གཏོགས་པའི་ས་གནས་རྒྱུན་ལས་ཡོངས་དང་རྒྱ་ཆེའི་མང་ཚོགས་ཀྱིས་དེ་བཞིན་བོད་དོན་འཐབ་རྩོད་དང་འབྲེལ་བའི་ལས་འགུལ་ཆེ་ཆུང་ཚང་མར་ཚ་ཚ་འུར་འུར་གྱིས་མཉམ་ཞུགས་དང་རྒྱབ་སྐྱོར་ནུས་པ་སྔར་ལྷག་འདོན་དགོས་རྒྱུའི་འབོད་བསྐུལ་ཞུ་བཞིན་ཡོད།
གནས་ཡུལ་རྒྱ་གར་གཞུང་གིས་ད་བར་ཧ་ཅང་བཀའ་དྲིན་ཆེན་པོ་བསྐྱངས་དང་སྐྱོང་བཞིན་པས་མཚོན་འཛམ་གླིང་ཁྱོན་ཡོངས་ཀྱི་བོད་མི་སྐྱབས་བཅོལ་ལེན་མཁན་རྣམ་པ་དང་དེ་མིན་དོན་དམ་པའི་བོད་དོན་རྒྱབ་སྐྱོར་བ་ཚང་མ་ལ་ནམ་ཡང་བཀའ་དྲིན་ཆེ་ཞུ་བཞིན་ཡོད།སྤྱིར་རྒྱ་བོད་བར་གྱི་འཐབ་རྩོད་ནི་རྒྱལ་ཁབ་གཅིག་དང་མི་རིགས་ཤིག་གི་འཐབ་རྩོད་ཡིན་དུས།མ་འོངས་པ་བོད་ཀྱི་བདེན་དོན་མ་གསལ་བར་དེ་སྲིད་དུ་སྔར་ལྷག་རྒྱབ་སྐྱོར་དང་རོགས་དན་ཁ་ཡོད་ལག་ཡོད་གནང་རོགས་གྱིས་ཞེས་སྡིངས་ཆ་འདིར་བརྒྱུད་འབོད་སྐུལ་ཞུ་བཞིན་ཡོད།
མཐའ་དོན་འདས་པའི་རྒྱལ་གཅེས་དཔའ་བོ་རྣམ་པའི་རེ་སྨོན་དང་།ད་ལྟའི་མགོ་ནག་བོད་མི་ཡོངས་ཀྱི་མངོན་འདོད།དེ་བཞིན་མ་འོངས་བོད་ཀྱི་མི་རབས་གསར་བའི་མདུན་ལམ་སྟེ་མདོར་ན་བོད་ཀྱི་བདེན་མཐའ་གསེར་གྱི་ཉི་མའི་དཀྱིལ་འཁོར་མྱུར་དུ་འཆར་བ་དང་།༸གོང་ས་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དབུས་རིས་མེད་བསྟན་འཛིན་གྱི་སྐྱེས་ཆེན་དམ་པ་རྣམས་སྐུ་ཚེ་ཡུན་དུ་བརྟན་ཅིང་།ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་བཀྲ་ཤིས་སྨོན་འདུན་གྲངས་མེད་ཞུ་བ་དང་།ཛ་སག་ཨ་འབྲུག་མགོན་པོ་བཀྲ་ཤིས་མཆོག་དང་།མི་རྗེ་བཀའ་བློན་ཁྲི་ཟུར་སྐུ་ངོ་འཇུ་ཆེན་ཐུབ་བསྟན་རྣམ་རྒྱལ་གཉིས་ཀྱིས་གཙོས་མེས་པོ་གོང་མ་རྣམས་ཀྱི་ཐུགས་འདུན་མཐའ་དག་གང་མགྱོགས་འགྲུབ་པས་མཚོན།གཞིས་བྱེས་བོད་མི་མཉམ་འཛོམས་ཀྱི་བཀྲ་ཤིས་རྫོགས་ལྡན་གསར་པའི་དགའ་སྟོན་མྱུར་དུ་འཆར་བའི་སྨོན་པ་ཤུགས་དྲག་དང་བཅས།བོད་རྒྱལ་ལོ།བོད་རྒྱལ་ལོ།བོད་རྒྱལ་ལོ།
མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་ནས་ཕྱི་ལོ་༢༠༡༥ཟླ་༦ཚེས་༡༦ཉིན་རྒྱ་གར་གྱི་རྒྱལ་ས་ལྡི་ལི་ནས།
བསམ་ཚུལ་འབྲི།
ཚེ་དབང་ཕུན་ཚོགས་ཀྱི་ལོ་རྒྱུས་སྙིང་བསྡུས།