གླུའི་རིགས།
ཁ་དགའ་དགའ་བྱས་ཚད་རོགས་དགའ་མིན།།
དེ་ཡིན་ན་བློ་སེམས་སུ་ལ་གཏད།།
མགོ་རིལ་རིལ་བྱས་ཚད་བླ་མ་མིན།།
དེ་ཡིན་ན་དད་པ་སུ་ལ་བྱ།།
ང་ཚོའི་རོགས་དགའ་སེང་དང་འདྲ།།
སེང་དཀར་མོ་ལོ་རེ་ཐེངས་རེར་འགྱིངས།།
ཁྱེད་ཚོའི་རོགས་དགའ་ཁྱི་དང་འདྲ།།
ཁྱི་སྡར་ལི་ནུབ་རྒྱུག་ནངས་རྒྱུག་རེད།།
ཆུ་འགོ་ཉ་རྙོག་ཀླུ་རེད་ཟེར།།
ཇ་ཆུ་མི་བྱེད་ཀླུ་དང་འབྲེལ།།
རྡོ་རིལ་ཐ་ཐོར་བཙན་རེད་ཟེར།།
ཐབ་རྡོ་མི་བྱ་བཙན་དང་འབྲེལ།།
རྟ་བརྒྱའི་ཐོ་རུ་རག་ཕྲུག་མ།།
ཁ་ཕར་བསྐོར་རྟ་རྔ་དར་ལས་འཇམ།།
ཁ་ཚུར་བསྐོར་མགོ་འཕང་རྐྱོང་ལས་མཐོ།།
ངའི་འོག་རྟ་མེད་དེ་གཡང་གིས་སྲུང་།
རྟ་བརྫོ་ལེ་མང་པོ་མེད་གོ་ཏེ།།
གཅིག་ཡོད་བ་ནམ་མཁའི་བྱ་དང་འདྲ།།
བྱ་འདྲ་ལེའི་གཤོག་པ་མེད་གོ་དེ།།
འགྲོས་གོམ་ལག་ནམ་མཁའི་བྱ་དང་འདྲ།།
རྟ་གཅིག་ཡོད་དུས་རྟ་གཅིག་ཉོ།།
རྟ་མེད་རྐང་ཐང་འགྲོ་བལྟས་རེད།།
རོགས་གཅིག་ཡོད་དུས་རོགས་གཅིག་འདྲིས།།
རོགས་མེད་ཁེ་འགྲོ་བྱ་བལྟས་རེད།།
རྟ་རྐྱང་རྐྱང་རྐྱང་ནང་འདྲོགས་པའི་ཐར།།
ཚེ་གཅིག་ལ་རྐྱང་རྗེས་དུས་པ་ན།།
རྟ་ཁྱོད་ལ་རྐྱང་ཕྲུག་ཁ་དཀར་བཏགས།།
རྟ་བརྒྱའི་ཐོ་རུ་རག་ཕྲུག་མ།།
ལ་ཁར་མ་གང་ན་ལྷག་བསྡད་གདའ།།
ང་ཇག་པ་རྟ་ཐབས་མི་ཆག་སྟེ།།
རྟ་ཁྱོད་རང་ལུས་ས་སྡུག་བསྡད་གདའ།།
རྟ་མདོ་བ་གཡང་གིས་སྲུང་རྒྱུ་ཡིས།།
ཐག་རིང་དུ་མི་ཁུར་མི་བརྫོ་དུ།།
རོགས་དགའ་མོ་བླ་མས་བསྐྱབ་རྒྱུ་ཡིས།།
རྒྱུ་མི་འགི་མི་འདྲིས་མི་བརྫོ་དུ།།
གནའ་སྐེ་མོས་མཐོ་མཐོ་མི་དགོས་དང་།
རྫ་བྲག་དཀར་ཅི་ཡོད་ང་ཚོས་ཤེས།།
སྨད་བུ་མོས་རྒྱང་རྒྱང་མི་དགོས་དང་།
གཞིས་འཁོར་རྭ་ཅི་ཡོད་ང་ཚོས་ཤེས།།
ན་ནིང་ཡོད་པའི་རོགས་དགའ་དེ།།
ད་ལོ་མེད་པར་གང་ན་ཐལ།།
ཤི་བ་རེད་དམ་མེད་པ་རེད།།
ཤི་བ་རེད་ན་བརྫོ་ལེ་མིན།།
མེད་པ་རེད་ན་ཉུག་རོགས་བྱེད།།
ཕ་ཆེན་བུ་མོ་ཕེར་ཆེན་མ།།
སྤུལ་ཤེལ་གཡག་མགོ་ཆེན་པོ་མ།།
ཡག་བུད་མེད་མེད་ན་འཚར་པོ་གདའ།།
བོག་ཁྲ་རིང་ཤིང་ཐོག་ལྕགས་བཞག་རེད།།
ཁ་གྲག་རྒྱུ་ཡོད་ལེ་ཡ་མཚན་རེད།།
རོགས་མ་འདྲིས་སྡེ་བས་སྡེ་བ་ལ།།
ཞེ་མཐུན་རྒྱུ་ཡོད་ལེ་ཡ་མཚན་རེད།
བོག་ཁྲ་རིང་ལྕགས་ཡག་གཅུས་ཕྲ་མ།།
གཅུས་རེ་རེའི་མཚམས་ན་རྐྱེན་རེ་བདའ།།
རྐྱེན་འགི་རབས་སྡེ་ལ་མ་ཤོད་རོགས།།
བོག་ལན་གཅིག་འཕངས་པའི་མགོ་རྣ་ཡིན།།
མཚོ་སྟོད་གསེར་བྱ་སེར་པོ་དང་།
མཚོ་སྨད་དངུལ་བྱ་དཀར་པོ་གཉིས།།
མཚོ་སྟོད་སྨད་བྱེས་བསམ་མ་སྡུག་དང་།།
མཚོ་དར་ཁ་བྱེ་དུས་ཐུག་རྒྱུ་ཡོད།།
རྫ་ཁྲ་ཡག་རིག་བྱུང་གནའ་གཡག་དྲན།།
ཤ་འདྲེ་མོ་མེད་ན་ཅི་ལ་དྲན།།
སྡེ་ཁྲོ་བོ་རིག་བྱུང་རོགས་དགའ་དྲན།།
ཞེ་འཐད་པོ་མེད་ན་ཅི་ལ་དྲན།།
རྫ་མགོ་རི་མགོ་ཁ་ཁ་རེད།།
རི་སྨུག་པས་གཏུམ་ན་ཕྱོཊ་གཅིག་རེད།།
སྡེ་འགོ་ལུང་འགོ་ཁ་ཁ་རེད།།
སྡེ་དཔོན་གྱིས་བཟུང་ན་ཕྱོཊ་གཅིག་རེད།།
རྫ་རིའི་རྫ་ཤོག་སྡེ་མོ་བཞུགས།།
རྫ་ཆུ་སིལ་མ་འགྲོ་མི་ཡིན།།
སྤང་རིའི་སྤང་ཤོག་བདེ་མོ་བཞུགས།།
སྤང་རྒྱན་མེ་ཏོག་འགྲོ་མི་ཡིན།།
རོགས་དགའ་མོ་ལྷ་སའི་མཐིལ་ལ་ཐོན།།
འཕྲུག་ཐེ་གཅིག་རྒྱ་འགོ་ཁུར་འོང་ཟེར།།
འཕྲུག་ཐེ་གཅིག་རྒྱ་འགོ་ལུས་དགའ་སྟེ།།
ང་ཡར་འགྲོའི་རོགས་ལ་ཤ་རེ་ཚ།།
རོགས་དགའ་མོ་ཡོད་སའི་ས་ཕྱོགས་ལ།།
སྐྱིད་ཉི་མ་ཁེ་ཤར་ཡོང་བར་ཤོག །
སྐྱིད་ཉི་མ་ཁེ་ཤར་མེད་ན་ཡང་།
རླུང་སིལ་བུ་དར་ལས་འཇམ་པར་ཤོག །
རོགས་དགའ་མོ་ཡོད་སའི་ས་ཕྱོགས་ལ།།
སྤྲིན་དཀར་པོ་ཉིན་རྒྱུག་མཚན་རྒྱུག་རེད།
སྤྲིིན་དཀར་པོ་ཁ་གྲག་ཡོད་ན་གོ།
ངས་ཉིན་རེ་ཆ་རེ་བསྐུར་ས་རེད།
རི་མགོ་མཐོན་པོའི་ཉི་མ་དེ།
དྲོ་རོགས་མ་རེད་གྲང་རོགས་རེད།
ས་ཐག་རིང་པོའི་རོགས་དགའ་དེ།།
དགའ་རོགས་མ་རེད་སྡུག་རོགས་རེད།།
རི་ཕར་རིའི་རི་དང་ཚུར་རིའི་རི།།
རི་རིག་རྒྱུ་ཡོད་དེ་ཐུག་རྒྱུ་མེད།།
ལ་ཕར་རྒྱབ་ཆུ་དང་ཚུར་རྒྱབ་ཆུ།།
ཆུ་རིག་རྒྱུ་མེད་དེ་ཐུག་རྒྱུ་ཡོད།།
རོགས་བརྫོ་ལེ་མང་པོ་མེད་ན་ཡང་།
གཅིག་ཡོད་པ་ནམ་མཁའི་ལྷ་དང་འདྲ།།
ལྷ་འདྲ་ལེ་དད་པ་མེད་ན་ཡང་།
ཁོག་ཤེས་རྒྱ་ནམ་མཁའི་ལྷ་དང་འདྲ།།
ཤར་རྒྱ་གར་རྩ་མཆོག་ཟེར་མ་ལ།།
ལུག་གཡང་དཀར་ཤོག་དང་རྩ་ཟ་འགྲོ།།
རྩ་ཞིམ་པོ་མཉམ་བཟའ་མ་དུང་ཡང་།།
ཤར་རྒྱ་གར་ཡུལ་ལ་མཉམ་དུ་འགྲོ །།
ས་སྐྱིད་མ་རེད་སེམས་སྐྱིད་རེད།།
སེམས་སྐྱིད་ན་ས་ཆ་གང་ལ་སྐྱིད།།
ས་འདི་ཚོ་བསམས་ནས་མ་ཡོང་དེ།།
ཡོང་དགོས་ལེ་རྡོག་པའི་བུ་ལོན་རེད།།
རྐང་རྡོག་པའི་བུ་ལོན་མ་སོད་བར།།
ལམ་སྐྱ་མོ་དར་ལས་འཇམ་པར་ཤོག།
ས་འདི་ཚོ་སྐྱིད་དུ་དགའ་དུ་དེ།།
ཕོ་རང་ཡུལ་རང་ས་མི་དོ་འདུག།
བསམ་ཚུལ་འབྲི།
མགུར་མོ།