གླིང་སེང་ཆེན་གྱི་བྱུང་བ་མདོར་བསྡུས།
རྩོམ་པ་པོ། དམུ་དགེ་བསམ་གཏན།
ན་མོ་གུ་རུ་བྷྱཿ།སྣ་ཚོགས་སྒྱུ་མའི་འཕྲུལ་འཁོར་ལ་བརྟེན་ནས།།སྣ་ཚོགས་སྤྲོས་པའི་སྣང་བ་འབུམ་འཆར་ཞིང་།།སྣ་ཚོགས་དུཿཁའི་དགྲ་བོ་བཅོམ་དང་ལྷན།།སྣ་ཚོགས་བདེ་དགའ་རྒྱས་པའི་དཔལ་དེ་བསྔགས།།འདིར་གླིང་སེང་ཆེན་ནོར་བུ་དགྲ་འདུལ་འཛམ་གླིང་གེ་སར་རྒྱལ་བོ་ཞེས་གྲགས་པ་དེའི་དངོས་དོན་གྱི་ལོ་རྒྱུས་འགའ་ཞིག་བརྗོད་པར་བྱ་སྟེ།གླིང་གེ་སར་འདི་ནི་མདོ་ཁམས་སུ་སྐུ་འཁྲུངས་ཏེ།དཔའ་རྩལ་རབ་ཏུ་རྒྱས་ནས་ཕྱོགས་བཞིའི་དགྲ་འདུལ་མཁན་གྱི་བོད་ཀྱི་མི་དཔའ་བོ་ཞིག་ཡིན་པས་སྙན་པའི་གྲགས་པ་ཡོངས་ལ་ཁྱབ།དེ་ནི་མི་ངོ་མ་ཡིན་མིན་གྱི་དོགས་པ།སྔོན་གྱི་མཁས་མཆོག་སུ་ལའང་སྐྱེས་མ་མྱོང་།འོན་ཀྱང་།བར་སྐབས་ཤིག་ནས་བཟུང་།དངོས་དོན་ལ་ཞིབ་འཇུག་མེད་པའི་གཏམ་སྣ་ཚོགས་ཤིག་སྨྲ་བ་རྣ་བའི་ལམ་དུ་སོན་པ་འགའ་ཞིག་བརྗོད་ན།
ཁ་ཅིག་གིས།འདི་ལྷ་སྒྲུང་ཞིག་ཡིན་པ་ལས།དོན་དངོས་ལ་འདི་ལྟ་བུའི་མི་ཞིག་མེད་དོ་ཟེར།དེ་ནི་མི་འཐད་དེ།གླིང་མི་རེའི་ཁ་ན་སྒྲུང་རེ་ཟེར་བ་ལྟར།གཡུལ་འགྱེད་རེ་རེའི་སྐབས་སུ་དམག་མི་རང་རང་གི་སྣང་ཚུལ་དང་ལྟ་ཚུལ་ཅུང་རེ་མི་འདྲ་བའི་དབང་གིས་སྒྲུང་གླུ་དག་ལ་ཁྱད་པར་ཅུང་རེ་ཡོད་པ་དང་།མཁས་པ་སོ་སོས་ལེགས་བཅོས་བྱས་པ་དང་།ལྷ་སྒྲུང་བསྲེས་པ་འགའ་རེ་ཡོད་པ་མ་གཏོགས།གཞི་རྩའི་ཐོག་སྒྲུང་ནང་དུ་བཤད་པ་བཞིན།མི་དཔའ་བོ་ལག་རྗེས་ཅན་ཞིག་ཡིན་པ་ནི།དེའི་ལག་རྗེས་དང་།རྗེས་ཤུལ་གྱི་དངོས་རྫས།ཕ་ཡུལ།མི་རྒྱུད།མི་སྡེ་དང་བཅས་པ་ད་དུང་མངོན་སུམ་དུ་ཡོད་པ་འོག་ཏུ་འཆད་པར་འགྱུར་རོ།།
ཡང་ཁ་ཅིག་གིས་དེབ་ཐེར་དུ་བཀོད་པ་ལྟར་ན།བོད་ཀྱི་གེ་སར་ཟེར་བ་དེ་ནི་མི་རིགས་གཞན་ཞིག་ཡིན་ཏེ།བོད་ཀྱི་བྱང་ཕྱོགས་ཀྱི་མི་རིགས་ཤིག་ཡིན་པ་དང་།དྲག་རྩལ་ཅན་གྱི་མིང་རེད།མི་རིགས་དེ་ནི་རྒྱུན་པར་བོད་ལ་བཙན་འཛུལ་བྱེད་མཁན་ཞིག་རེད།དེབ་ཐེར་མཁས་པའི་དགའ་སྟོན་ལས།རྒྱ་ནག་རྒྱལ་བོ་ཤིང་ལ་སྦྲུལ་འཁྱིལ་འདྲ།།གེ་སར་རྒྱལ་བོ་ཤིང་ལ་རྟ་བཏགས་པ་འདྲ།།ཞེས་དང་།པད་མ་བཀའ་ཐང་དུ་རྒྱ་གར།རྒྱ་ནག ཨོ་རྒྱན།སྟག་གཟིག གེ་སར་སོགས་ཟ་ཧོར་ལ་སོང་ཞེས་བྲིས།འདི་དག་གི་ནང་དུ་གེ་སར་ནི་བྱང་ཕྱོགས་ཀྱི་རུ་དཔོན་གྱི་སྤྱི་མིང་རེད།སྲོང་བཙན་གྱིས་རྒྱ་བཟའ་ཀོང་ཇོ་སློང་དུས་ཡང་“གེ་སར་དམག་གི་རྒྱལ་བོ་ཡོད”ཅེས་བྲིས་ཏེ།མཐོང་རྒྱ་དང་ཞིབ་འཇུག་མེད་པར་ཁ་ཚོན་གཅོད་པ་ལ་དགའ་ནས།སྲོང་བཙན་དུས་ཀྱི་སོག་པོ་གེ་སར་དམག་གི་རྒྱལ་བོ་དང་།བོད་སིལ་བུར་འཐོར་བའི་དུས་ཀྱི་བོད་མི་གེ་སར་ནོར་བུ་དགྲ་འདུལ་གཉིས་གཅིག་རེད་སྙམ་པའི་རི་བོང་གནམ་རྡིབ་ཀྱི་དོགས་པ་འདྲ་བ་ཞིག་སྐྱེས་འདུགདེ་ནི་ར་མགོ་ལུག་སྦྱར་ཡིན་ཏེ།སྔོན་མཁས་མཆོག་སུ་ལ་དེ་གཉིས་གཅིག་རེད་སྙམ་པའི་འཁྲུལ་བློ་མ་སྐྱེས་ཤིང་།སྐྱེ་དོན་ཡང་མེད་དེ།གེ་སར་དམག་གི་རྒྱལ་བོ་ནི་བྱང་ཕྱོགས་སོག་པོའི་ཡུལ་གྱི་རྒྱལ་བོ་དག་ཤེད་ཅན་ཞིག་ཡིན་པས།གེ་སར་དམག་གི་རྒྱལ་བོ་ཟེར།དེའི་རྒྱལ་རྒྱུད་ནི་སོག་པོའི་ཨོ་རོད་ཚོ་དྲུག་གི་རྒྱལ་རྒྱུད་རྣམས་ཡིན་ཞིང་།རྒྱལ་དབང་ལྔ་བའི་དུས་སུ་བོད་ཡོངས་ལ་དབང་བསྒྱུར་ནས།བོད་སྲིད་རྒྱལ་དབང་ལྔ་བར་འབུལ་མཁན་“བསྟན་འཛིན་ཆོས་རྒྱལ”ཟེར་བའང་དེའི་རྒྱུད་ཡིན་ཏེ།སྡེ་སྲིད་གཙང་བའི་ལོ་རྒྱུས་ལས་“སྟག་གཟིག་ནོར་གྱི་རྒྱལ་བོ་ནི།རྒྱ་གར་ཁ་ཆེའི་མཐའ་ཡི་སོག་པོ་ཕྱིའི་རྒྱ་མཚོ་ཆེན་པོ་ལས་ནོར་བུ་ལོན་པ་འདི་རྣམས་ཡིན་ཞིང་།བྷ་ཏ་ཧོར་གྱི་རྒྱལ་བོ་ནི་སོག་པོ་གཞུང་དྲུག་ཏུ་གྲགས་པ་དེ་ཡིན་པ་དང་།གེ་སར་དམག་གི་རྒྱལ་བོ་ནི།ཨོ་རོད་ཚོ་དྲུག་གི་རྒྱལ་རྒྱུད།བསྟན་འཛིན་ཆོས་རྒྱལ་ནི་འདིའི་རྒྱུད་པ་ཡིན”ཞེས་གསུངས་པ་ལྟར་རོ།།གནའ་དུས་བོད་མི་དག་གིས་བྱང་དང་ནུབ་ཀྱི་མི་རིགས་གཞན་པ་རྣམས་ལ་སོག་པོ་ཞེས་སྤྱི་མིང་དུ་འབོད་པས།སྟག་གཟིག་ལའང་ནུབ་ཕྱོགས་ཀྱི་སོག་པོ་ཞིག་ཅེས་འབོད་དོ།།གེ་སར་ནོར་བུ་དགྲ་འདུལ་ལ་གེ་སར་ཞེས་པའི་མིང་ཐོགས་ཚུལ་དང་བོད་མི་ཡིན་ཚུལ་སོགས་འོག་ཏུ་འཆད་པར་འགྱུར་ལ།དེས་ན་མིང་གི་ཐོག་མ་འདྲ་བའི་མི་ཐམས་ཅད་གཅིག་ཡིན་པར་མ་སེམས་ཤིག
ཡང་ཡི་གེ་མ་མཐོང་ཡང་རྒྱུས་མེད་ཀྱི་མི་རིགས་གཞན་པ་ཁ་ཅིག་གིས།གླིང་གེ་སར་ནི་ཁྲི་སྲོང་ལྡེ་བཙན་རེད་ཟེར་གྱིན་འདུགཅེས་པའི་གཏམ་ཐོས་སོ།དེ་ནི་མི་འཐད་དེ།དེ་ལྟ་བུའི་དོགས་པ་སྔོན་གྱི་མཁས་མཆོག་སུ་ལའང་སྐྱེས་མ་མྱོང་ཞིང་།སྐྱེ་དོན་ཡང་མེད་དེ།ཁྲི་སྲོང་དང་གླིང་སེང་ཆེན་གཉིས་བྱུང་དུས་དང་སྐྱེ་ཡུལ་དང་།ཕྱག་རྗེས་དང་།མིང་དང་།སྲིད་ཀྱི་ཁྱབ་ཁོངས་སོགས་གཏན་ནས་མི་འདྲ་བ་ཡིན་ཏེ།བྱུང་དུས།ཁྲི་སྲོང་ནི་བསྟན་པ་སྔ་དར་བོད་ཁམས་གཅིག་གྱུར་གྱི་སྐབས་ཡིན་པ་སྨྲོས་མ་དགོས།གླིང་གེ་སར་ནི་བོད་སིལ་བུར་འཐོར་ནས།དཔའ་བོ་བཙན་ཤེད་ཅན་དང་།མཁས་པ་སྙན་གྲགས་ཅན་གྱིས་ཚོ་ཤོག་གི་མགོ་བསྡུ་བ་ཙམ་ལས།བོད་སྤྱི་ལ་དབང་བའི་རྒྱལ་པོ་མེད་པའི་དུས་སུ་བྱུང་བ་ཡིན་པ་ནི།དེས་བསྟེན་པའི་བླ་མ་དང་།དེའི་སྡེ་ཤོག་གི་ལམ་ལུགས།ལྷ་ལ་འབོད་བསྐུལ་དང་མཆོད་གསོལ་གྱི་སྒྲུང་གླུ་སོགས་ཀྱིས་ཤེས་ལ།སྔོན་གྱི་ལོ་རྒྱུས་རྣམས་ལས་ཀྱང་དེ་འཁྲུངས་དུས་རབ་བྱུང་དང་པོ་ཡས་མས་སུ་བཙལ་བ་ལས།བསྟན་པ་སྔ་དར་གྱི་དུས་སུ་བྱུང་བ་ཡིན་མིན་གྱི་དོགས་པ་སྔོན་གྱི་མཁས་མཆོག་སུ་ལ་མ་སྐྱེས་ཤིང་།སྐྱེ་དོན་ཡང་མེད་དོ།།
སྐྱེ་ཡུལ།ཁྲི་སྲོང་དབུས་ཀྱི་ཡར་ལུང་བསམ་ཡས་ཕྱོགས་སུ་འཁྲུངས་པ་ནི་རྩོད་མེད་མགྲིན་གཅིག་ཡིན་ལ།གླིང་སེང་ཆེན་ནི་མདོ་ཁམས་སུ་འཁྲུངས་པ་ལ་བོད་ཀྱི་མཁས་ཆེན་དག་ལ་རྩོད་པ་མེད་ཅིང་།མགྲིན་གཅིག་དབྱངས་གཅིག་ཡིན་ནོ།།
ཕྱག་རྗེས།ཁྲི་སྲོང་གི་ཕྱག་རྗེས་གཙོ་བོ་ནི།མཁན་སློབ་གཉིས་སོགས་རྒྱ་བལ་གྱི་མཁས་པ་མང་བོ་སྤྱན་དྲངས།རབ་བྱུང་གི་སྡེ་གསར་དུ་བཙུགས།གཙུག་ལག་ཁང་བཞེངས།སྒྲ་བསྒྱུར་ཁང་བཙུགས་ཏེ།བསྟན་པ་དང་རིག་གནས་ཤིན་ཏུ་དར་བར་མཛད་པར་དེ་ཡིན་ལ།དུས་མཚུངས་སུ་མཐའ་བཞི་དབང་དུ་བསྡུ་བའི་གཡུལ་ལས་ཀྱང་མཛད་དོ།།
གླིང་སེང་ཆེན་གྱི་ཕྱག་རྗེས་གཙོ་བོ་ནི།བོད་ཁ་འཐོར་དུ་སོང་བའི་སྐབས་སུ།ཕྱོགས་ཀྱི་རྒྱལ་བོ་དག་གིས་བོད་ཀྱི་རྒྱལ་སྲིད་ཉམས་ནས།གཅིག་གྱུར་མེད་པ་ཤེས་ཏེ།བོད་ལ་བརྙས་གཙེ་དང་བཙན་གནོད་བྱེད་པ་ཡིན་ལ།གླེང་གེ་སར་གྱིས་གནས་ཚུལ་དེ་མཐོང་ནས།གཞོན་གེ་སར་གྱི་དུས་ནས་བློ་རྣོ་ཞིང་དཔའ་སེམས་མཁའ་ལ་འཕྱུར་ཏེ།གླིང་གི་དཔའ་རྟུལ་（དཔའ་ཐུལ་ཡང་ཟེར）མང་པོ་རང་དང་སེམས་ཀྱི་འཆར་སྒོ་མཐུན་པའི་གྲོགས་སུ་བཀུག་ནས།རྣམ་པར་རྒྱལ་བའི་གཡུལ་ལས་ཤ་སྟག་བྱས་ཏེ།བཙན་གནོད་བྱེད་པའི་ཕྱིའི་རྒྱལ་ཁབ་ཀྱི་རྫོང་ཆེན་བཅོ་བརྒྱད་སོགས་བཅོམ་པ་དང་།བོད་ནང་གི་མི་སེར་གྱི་བདེ་འཇག་གཏོར་བཤིག་བྱེད་པའི་ཇག་དཔོན་སྟོབས་ལྡན་བདུད་རྒྱལ་ཟེར་བ་སོགས་བཅོམ་ནས།བོད་འབངས་བདེ་ལ་བཀོད་པ་ལས་གཞན་རྒྱ་བལ་གྱི་མཁས་པ་གདན་དྲངས་ནས།རབ་བྱུང་གི་སྡེ་གསར་དུ་བཙུགས་པ།སྒྲ་བསྒྱུར་ཁང་བཙུགས་ནས་གཙུག་ལག་མང་པོ་བསྒྱུར་བ་སོགས་ནི།སྒྲུང་ཡིག་དང་རྣམ་ཐར་ལོ་རྒྱུས་གང་ནའང་མེད།སློབ་དཔོན་པད་མ་སྤྱན་དྲངས་ཚུལ་རེ་ཡོད་ཀྱང་།དེ་ནི་དག་སྣང་གི་བརྒྱུད་པ་ཞེས་པ་དེ་ཡིན་ཚུལ་སྒྲུང་རང་གི་གསུང་ཚུལ་ལ་བལྟས་ན་ཤིན་ཏུ་གསལ།དེ་ལྟ་བུའི་ལྷ་སྒྲུང་བསྲེས་པ་ཡོད།
མིང་ཡང་།ཁྲི་སྲོང་གི་མཚན་ལ།ཁྲི་སྲོང་ལྡེ་བཙན་ཞེས་གསོལ་བ་ལས།གེ་སར་དང་།སེང་ཆེན་དང་།ནོར་བུ་དགྲ་འདུལ་ཞེས་མིང་སུས་ཀྱང་མ་བཏགས་ལ།སུས་ཀྱང་དེ་ལྟར་མི་འབོད་ཅིང་།སུས་ཀྱང་ལོ་རྒྱུས་སུ་བྲིས་མེད།དེ་ལྟར་མེད་ཀྱང་ཁྲི་སྲོང་མི་འབོད་ཅིང་།སུས་ཀྱང་ལོ་རྒྱུས་སུ་བྲིས་མེད།དེ་ལྟར་མེད་ཀྱང་ཁྲི་སྲོང་གི་མཛད་པ་རྣམ་ཐར་ལ་སྒྲོ་བཏགས་ནས་ལྷ་སྒྲུང་བྲིས་པ་རེད་ཟེར་ན།དེ་ཡང་མི་འཐད་དེ།ཁྲི་སྲོང་གི་མཛད་པ་ལ་སྦྱར་ན།མཚན་དང་དེའི་མཛད་པའི་གཙོ་བོ་ལ་སྦྱར་ནས་སྒྲོ་འདོགས་དགོས་ཏེ།དཔེར་ན།ཐང་སིན་ནུབ་སྐྱོད་ཀྱི་སྒྲུང་ལྟ་བུ་ལ་མཚོན་ན།ཐང་སིན་གྱི་མཚན་སྙན་དེ་གཞིར་བཟུང་ནས།དེ་ནུབ་ཕྱོགས་སུ་ཆོས་ལེན་དུ་སོང་ཞིང་།ནུབ་ཕྱོགས་ནས་ཆོས་གདན་དྲངས་པའི་མཛད་པའི་གཙོ་བོ་ལ་བཏགས་ནས་ལྷ་སྒྲུང་ཆེན་པོ་བྲིས་པ་ལྟ་བུ་དགོས་ཀྱི།འབྲེལ་མེད་ཀྱི་སྒྲུང་ཞིག་ཁྱེར་འོངས་ནས།བཙན་ཤེད་ཀྱིས་ཁྲི་སྲོང་དང་འབྲེལ་བ་བྱེད་པ་ནི།རྣ་བར་འོང་བའི་གཏམ་མིན་ནོ།།དེ་བཞིན་དུ་གླིང་གེ་སར་ལའང་།ཁྲི་སྲོང་ལྡེ་བཙན་ཞེས་པའི་མཚན་ཡོད་པ་སྒྲུང་དང་ལོ་རྒྱུས་གང་ན་ཡང་མེད་ལ།མིང་འདི་ཁྲི་སྲོང་ལ་སྦྱར་ན་ཨེ་འགྲིག་སྙམ་པ་ཙམ་ཡང་མེད།
སྲིད་ཀྱི་ཁྱབ་ཁོངས་ཀྱང་།ཁྲི་སྲོང་གིས་བོད་སྤྱི་ལ་དབང་བསྒྱུར་ཅིང་།སྲིད་ཀྱི་གཞི་ས་གཙོ་བོ་ནི་དབུས་གཙང་ཡིན་ཏེ།རྒྱལ་སའི་ཤུལ་དང་།ཕྱག་རྗེས་ཀྱི་བསམ་ཡས་སོགས་དེ་གར་གནས།མི་རྒྱུད་ཀྱང་བོད་ཀྱི་རྒྱལ་རྒྱུད་ཚང་མ་རེད།གླིང་སེང་ཆེན་གྱིས་གཙོ་ཆེར་མདོ་ཁམས་སུ་དབང་བསྒྱུར་ཅིང་།སྲིད་ཀྱི་གཞི་ས་ཡང་གཙོ་བོ་དེ་གར་གནས་པ་ཡིན་ཏེ།དེའི་རྒྱལ་རྒྱུད་གླིང་འགུག་ཟི་རྒྱལ་བོ་ད་དུང་ཡོད་ལ།སེང་ཆེན་ཁོང་དང་།དཔའ་ཐུལ་དག་གི་ཕོ་བྲང་གི་ཤུལ་དང་།གོ་མཚོན་དག་ཀྱང་མདོ་ཁམས་སུ་ཡོད་དོ།།དེས་ན་ཁྲི་སྲོང་དང་གླིང་གེ་སར་གཅིག་པར་འདོད་པ་ལོང་བསྙབ་ཡིན་པ་ཤེས་པར་གྱིས།རང་རིགས་གཞོན་ནུ་ཐོས་ཆུང་མགོ་ཡང་འགའ་ཞིག་ཀྱང་དེའི་རྗེས་སུ་གཡམ་རྒྱུག་བྱེད་ཀྱིན་ཡོད།ཅེས་ཐོས་སོ།།
〔སྤྱིར་དེང་དུས།མི་རིགས་གཞན་གྱི་རིག་གནས་ཅུང་ཟད་རེ་སྦྱངས་པའི་རང་རིགས་འགའ་ཞིག་གིས།བོད་ཀྱི་རིག་གནས་དང་བོད་ཀྱི་མཁས་པ་སྔོན་མ་དག་ལ་སྐྱོན་འཚོལ་བྱེད་པའང་མཐོང་།སྔོན་གྱི་ལོ་ཙཱ་བ་རྣམས་ཕྱི་རྒྱལ་དུ་ཕེབས་ནས་ལོ་དུ་མར་སྦྱངས་ཏེ།རང་རིགས་ཀྱི་རིག་གནས་དར་རྒྱས་གཏོང་ཆེད།དེ་དུས་ཕྱི་རྒྱལ་སོ་སོར་དར་བའི་རིག་པའི་གནས་མང་པོ་བོད་ཡིག་ཏུ་བསྒྱུར་ཅིང་སྤེལ་བའི་དཔེ་ཆ་པོ་ཏི་བརྒྱ་ཕྲག་མང་པོ་བྲག་རྩིག་རྩིག་བྱས་ཡོད་པ་འདི་ཚོ་ལ་ལྟོས།དེར་མ་ཟད་བུ་སྟོན་རིན་པོ་ཆེ།རྗེ་ཡབ་སྲས།རྒྱལ་བ་པཎ་ཆེན་སྐུ་ཕྲེང་གི་གསུང་འབུམ་སོགས་དང་།བོ་དོང་བ་ཕྱོགས་ལས་རྣམ་རྒྱལ་གྱི་གསུང་འབུམ་ལ་པོད་བརྒྱ་དང་སུམ་ཅུ་རྩ་གྲངས་ཡོད།ང་ལྟ་བུས་མཁས་པ་རེ་རེའི་གསུང་ཚེ་གཅིག་ལ་ཀློག་མི་ཚར་བའི་ཚད་རེད།ངས་ཤོག་ལྷེ་ཁ་ཤས་རེ་དུས་དེབ་རེའི་ཐོག་ལ་བཀོད་དེ་ང་རྒྱལ་བྱེད་རྒྱུ་མེད་སྙམ།ཁྱེད་ཅག་གིས་ཀྱང་ཡིག་རིགས་གཞན་ཤེས་པ་ནི་རབ་དང་ཕུལ་བྱུང་རེད།ད་ཁྱེད་རྣམ་པས་དེང་དུས་ཀྱི་རིག་གནས།ཚན་རིགལག་རྩལ།ཐ་ན་འཕྲུལ་འཁོར་སྣ་ཚོགས་བཟོ་བཅོས་བྱེད་པའི་དཔེ་ཆ་ཚུན་ཆད་ཀྱི་དཔེ་དེབ་མང་པོ་བོད་ཡིག་ཏུ་བསྒྱུར་ནས་རང་རིགས་ཀྱི་རིག་གནས་དང་དཔལ་འབྱོར་རྒྱས་པ་ལ་ནུས་པ་བཏོན་ན།ད་གཟོད་སྔོན་གྱི་མཁས་པ་རྣམས་ལ་འགྲན་པ་དང་འཕྱས་གདགས་པའི་མ་རྩ་ཡོད་སོང་བ་རེད།དེ་མིན་ད་དུང་མ་རྩ་མེད་པས།འགྲན་འཕྱས་གྱི་སྐུ་ཚེགས་མི་གནང་བར་ཞུ།
ཡང་འགའ་ཞིག་གིས།བོད་ཀྱི་མཁས་པ་སྔོན་མ་ཚོ་ནི་ཆོས་ལ་ཞེན་པའི་སྟབས་ཀྱིས།དེ་དག་གིས་བརྩམས་པའི་ལོ་རྒྱུས་སོགས་ལ་ཡང་དག་པ་གཅིག་ཀྱང་མེད།དེས་ན་བོད་ལ་བོད་རང་གི་ལོ་རྒྱུས་ཡང་དག་རྩོམ་མཁན་གྱི་མཁས་པ་གཅིག་ཀྱང་བྱུང་མེད་སྟབས།བོད་ཀྱི་ལོ་རྒྱུས་ཀྱི་ཁུངས་ནི་ཕྱི་རྒྱལ་དང་།རྒྱ་ཡིག་དང་།ཏུན་ཧོང་གི་ཡིག་ཆ་ཁོ་ན་ལས་བཙལ་དགོས་སོ།།ཞེས་མདོ་མེད་ཀྱི་གཏམ་སྨྲ་བའང་ཡོད།སྔོན་གྱི་ལོ་རྒྱུས་དག་ལ་ཅུང་ཟད་ནོར་བ་དང་།ཡི་གེ་མ་དག་པ་རེ་ལོས་ཡོད།འོན་ཀྱང་དེ་དག་རྩྭ་ལྟ་དོར་ནས་གཞན་ཟེར་ཁོ་ནའི་རྗེས་སུ་འབྲངས་ན།ཕ་ཤུལ་བུས་ཟིན་རྒྱུ་ལྟ་ཞོག ཕ་མེས་ཀྱི་བླ་བཙོང་མཁན་དུ་ཨེ་འགྲོ་སྙམ་པའི་དོགས་པ་ཆེ།
ཏུན་ཧོར་གི་གཏེར་ཡིག་མང་པོ་ཞིག་ལ་བལྟས་མྱོང་།དེ་དག་དཔྱད་གཞིའི་ཡིག་ཆ་མཁོ་གལ་ཆེ་བ་རེ་ལོས་ཡིན།འོན་ཀྱང་།དེའི་ནང་དུ་དག་མོ་རེད་སྙམ་པ་ཡོད།དཔེར་ན།རྒྱལ་བོ་འུ་དུམ་བཙན་གྱི་སྨོན་ལམ་ཟེར་བའི་ཤོག་གྲངས་ཁ་ཤས་མཐོང་།དེ་ནི་དེའི་དུས་ལ་བལྟས་ན་ཅུང་ཟད་དག་མོ་རེད་སྙམ།རྒྱུ་མཚན་ཁྲི་སྲོང་སོགས་ཀྱི་དུས་སྐབས་ཀྱི་རྡོ་རིང་དང་དྲིལ་ཆེན་གྱི་ཐོག་གི་ཡི་གེ་དག་གི་རྩོམ་ལུགས་དང་དག་ཆ་སོགས་འདྲ་མོ་འདུགཡི་གེ་ལ་ལ་ནི།ཁྲི་རལ་གྱི་རྗེས་སུ་བྲིས་པ་ཞིག་ཡིན་པ་ནི།གླང་དར་གྱི་བཤད་པ་ཡོད་པས་ཤེས་མོད།འོན་ཀྱང་ཁྲི་རལ་དུས་ཀྱི་སྐད་གསར་བཅད་དང་མཐུན་རྒྱུ་ཕར་ཞོགདེའི་སྔོན་གྱི་ཁྲི་སྲོང་སོགས་ཀྱི་དུས་སུ་བྲིས་པའི་རྡོ་རིང་དང་དྲིལ་ཆེན་སོགས་ཀྱི་ཐོག་གི་ཡི་གེ་དང་བརྗོད་ཚུལ་དག་ཆ་གང་ཐད་ནས་མི་མཚུངས།ཡིག་གཟུགས་ཀྱང་གཟབ་གཤར་གང་ཡིན་ཆ་མི་འབྱེད་པ་ཡོད།ཐ་ན་ཁ་དང་ག་གཉིས།ཅ་དང་ཆ་གཉིས།པ་དང་ཕ་གཉིས་སོགས་ཁྱད་པར་མེད་པར་ལག་ཏུ་གང་ཐོན་བྲིས་པ་དང་།ཁ་དང་ཆའི་སྔོན་འཇུག་ལ་ག་དང་བ་བཞག་པ་སོགས་ཤིན་ཏུ་མང་།བརྡ་རྙིང་མང་བ་ནི་དེ་དུས་ཀྱི་སྤྱིའི་འབྲི་ལུགས་དང་མཐུན་པ་ཞིག་བྱེད་ཤེས་རྒྱུ་རེད་སྙམ།
འདིའི་སྟབས་ཀྱིས།མི་རིགས་གཞན་པ་འགའ་ཞིག་གིས་སུམ་ཅུ་བ་ནི་ཐོན་མིས་བརྩམས་པ་མ་རེད།དེ་དུས་ཀྱི་ཡིག་ཆ་ཏུག་ཧོང་གི་ཡིག་ཆ་དང་མི་མཐུན་འདུགཅེས་མོན་ཡུལ་རྡོར་གཅོད་ཀྱི་དཔེ་རུ་འགྱུར་ཉེན་ཡོད།ཐ་ན་ཐོན་མི་སམ་བྷོ་ཊ་ཟེར་བ་ཞིག་མེད།དེ་རྒྱའི་ལོ་རྒྱུས་ན་མེད་དོ་ཟེར་བ་དང་།དེ་ནི་ཚོགས་པ་ཞིག་གི་མིང་རེད་མི་གཅིག་མ་རེད་ཟེར་བ་དང་།སྔོན་གྱི་ཡིག་ཆ་དག་རྡོག་རྫིས་གཏོང་བྱེད་སྔར་མ་གྲགས་པའི་གཏམ་རེ་ཡིག་ལོབ་རེའི་ནང་ནས་རྙེད་དོ་ཟེར་བ་དང་།ཕྱི་རྒྱལ་ག་གེ་མོ་ནས་རྙེད་དོ་ཟེར་བ་སོགས་ཕར་དེད་ན།སྦྱང་ཁུ་སྐྱ་ཡོག་སེའི་ལོ་རྒྱུས་ལྟ་བུར་འགྱུར།སྔར་བཤད་དང་གསར་བཤད་གང་ཡིན་ཀྱང་།དགག་བྱ་མེད་ལ་དགོས་པ་ཡོད་ན་ཁས་ལོས་ལེན།དགོས་པ་དང་ཁེ་ཕན་མེད་ན་བསྐྱུར་བར་འོས་སྙམ།མདོར་ན་བོད་ཀྱི་ལོ་རྒྱུས་ལ་རྒྱུས་མེད་ཀྱི་རྒྱུས་གཏམ་སྨྲ་བ་མི་ཉུང་།རང་རིགས་སེང་གེའི་འགྱིང་བག་དང་ལྡན་པ་ཉུང་ཞིང་།ཁྱི་ཚོགས་ནང་དམུར་གྱི་དཔེ་ཡང་སྣང་།
ངས་དབུས་སུ་གཏམ་ཞིག་གི་སྐབས།འདི་དང་ཕྱོགས་མཚུངས་ཤིག་བཤད་ནས་ཏུན་ཧོང་གཏེར་ཡིག་ཁྱེར་ཡོང་ནས་སྔོན་གྱི་མཁས་པ་དག་གི་ཕྱག་རྗེས་རྦད་ཀྱིས་བསུབ་པ་ལ།ང་ཡིད་མཐུན་མིན་ཞེས་བཤད་པ་ཡིན།དེའི་ལན་ལ།གསེར་ལ་བཙའ་ཆགས་ཀྱང་གསེར་ནི་གསེར་ཡིན་ཞེས་ལན་ཡོད་འདུགདེ་ནི་ཡི་གེ་མ་དག་ཀྱང་དོན་ལ་འཁྲུལ་བ་མེད་པའི་གསེར་སླད་མེད་ལྟ་བུ་རེད་ཟེར་བ་ཡིན་ཚོད་འདུགཧེ་ཧེ།ཆོས་ཚུལ་ཟབ་པས་ཐག་གཅོད་མི་སྔ་ཞིང་།།ཟེར་བ་ལྟར་ད་རུང་བརྟག་དཔྱད་རེ་བཏང་ན་བཟང་རྒྱུ་རེད་སྙམ།
འཇམ་དཔལ་རྩ་རྒྱུད་ཀྱི་ལུང་བསྟན་ཁས་མི་ལེན་ན།དེ་ནི་རྨོངས་དད་རེད་ཅེས་བཤད་ན་ལོས་ཆོགབོད་རིགས་བརྒྱ་ཆ་གོ་ལྔ་ཡན་ལ་ཕོག་ཨེ་འགྲོ་སྙམ་ནས།དེའི་དོན་ནི་གཞན་ཞིག་རེད་དོ།།དེའི་དོན་ནི་ཆེས་གཞན་ཞིག་རེད་དོ།།ཞེས་མཛུབ་མོ་འཛུགས་ས་མེད་པའི་བཤད་དྲི་མི་བྲོ་བ་ཞིག་བཤད་པ་ལ་ཁོང་འཛུམ་འཆོར་གྱིན་འདུག
ངས་ནི་བོད་རང་ལ་གཞན་ལ་ངོ་གནོང་མི་དགོས་པའི་རིག་གནས་ཤིག་ཡོད་པ་འདི།སྐུ་དྲིན་ཅན་སྲོང་བཙན་དང་བཀའ་དྲིན་ཅན་ཐོན་མི་སམ་བྷོ་ཊ་གཉིས་ནས་བཟུང་།རང་གི་བླ་མའི་བར་གྱི་མཁས་དབང་རྣམས་ཀྱི་དྲིན་རེད་བསམ་ཡོད།རིག་གནས་འདི་ལྟ་བུ་ཞིག་མེད་ན།མི་རིགས་ཅུང་ཟད་ཆེན་པོ་འགའ་ཞིག་ལྟར་རྒྱ་མིན་གཞན་མིན་དུ་འགྱུར་བ་དང་།ཡང་ན་མི་རིགས་ཁ་ཅིག་ལྟར་རིག་གནས་དཔའ་འབྱོར་གང་ཐད་ནས་རྗེས་ལུས་ཐ་ཆད་དུ་འགྱུར་བ་དང་།ཡང་ན་རིགས་ཀྱི་མིང་ཙམ་ལས་ལྷག་མེད་རྒྱུ་རེད་སྙམ།
ཆོས་ལུགས་ཡོད་པའི་སྟབས་ཀྱིས་ཡར་ཐོན་དུ་མ་སོང་བ་ཡིན་ན།འཇར་པན་ཡང་ཡར་ཐོན་ཡིན་མི་སྲིད།ཆོས་མེད་པས་ཡར་ཐོན་དུ་འགྲོ་རྒྱུ་ཡིན་ན།དབྱིས་རིགས་ཀྱང་ཡར་ཐོན་བླ་ན་མེད་པ་ཞིག་ཡིན་ཆོག དཔྱད་པ་ཞིབ་མོ་རེ་ཐོངས།
དེང་སྐབས་སྲིད་ཇུས་ནི་ལེགས་པ་བླ་ན་མེད་པ་ཞིག་ཡིན་གཤིས།མི་རྣམས་ཀྱི་རང་དབང་དང་འཚོ་བ་ཤིན་ཏུ་བཟང་བ་མཐོང་ནས།དགའ་སྤྲོ་སྐྱེས་ཏེ་མེས་རྒྱལ་གྱི་ཅན་བཞི་འཛུགས་སྐྲུན་ལ་ཚེ་མཇུག་འདིར་ཞབས་འདེགས་གང་ཐུབ་རེ་ཞུ་སྙམ་ཡོད།འདི་དག་ནི་སྤྱི་དོན་ལ་བསམས་ནས་ངོ་དགའ་ཟོལ་འཇོག་མེད་པར་སེམས་ལ་དྲན་ཚོད་སྨྲས་པ་ཡིན།ཀུན་སློང་གཞན་མེད་ལགས།〕
དེ་ཡང་གླིང་གི་མི་རྒྱུད་ནི།བོད་མིའུ་ལྡོང་དྲུག་གི་ནང་ཚན་ལས།སྨུག་པོ་ལྡོང་གི་རིགས་རྒྱུད་རེད།ལྡོང་“ལ་ཁྲ་རྒན་པོ”ལ་བུ་གསུམ་བྱུང་བ་རྣམས་ཀྱིས་རྨ་ཆུའི་སྟོད་སྨད་བར་གསུམ་དུ་གཞི་བཟུང་ནས་བསྡད་པ་ལ་མི་རྒྱུད་མང་དུ་འཕེལ་ཏེ་སྡེ་ཆེན་པོར་ཆགས།དེ་ནས་བཟུང་བུ་སྐྱེས་པ་སྟག་ཤར་དཔའ་བོ་ཤ་སྟག་བྱུང་།ལྡོང་ཆོས་འཕེལ་ནག་པོ་ལ་མ་མི་གཅིག་པའི་བུ་གསུམ་བྱུང་བ་ལས།གླིང་ཆེ་རྒྱུད།འབྲིང་རྒྱུད།ཆུང་རྒྱུད་གསུམ་བྱུང་ནས་མི་རྒྱུད་རབ་ཏུ་འཕེལ་ཏེ།སྡེ་ཤོག་ཆེ་ཞིང་བཙན་ཕྱུག་འཛོམས་པས་སྙན་གྲགས་ཤིན་ཏུ་ཆེ་བ་བྱུང་།སྨུག་པོ་ལྡོང་གི་མི་རྒྱུད་འབྲོག་སྡེ་ཆེན་པོ་འདི་ལ་གླིང་རུ་ཐོགས་པའི་རྒྱུ་མཚན།བཙན་ཕྱུག་འཛོམས་པས་ཡུལ་ཁམས་རྣམས་སུ་སྙན་གྲགས་དང་ལབ་གླེང་ཤིན་ཏུ་ཆེ་བ་བྱུང་སྟབས།མིང་ལ་“གླེང་རུ”ཞེས་ཐོག་ནའང་ཕྱིས་སུ་ཡི་གེ་འགྱུར་ནས་“གླིང་རུ”ཞེས་གྲགས་པ་བྱུང་།གླིང་གི་བུ་རྒྱུད་སྐྱ་ལོ་ཟེར་བས།བྱང་བཟའ་ཟེར་བ་བག་མར་བླངས་པ་ལ་“རྒ་སྐྱ་ལོའི་སེང་ལྕམ་འབྲུག་མོ”ཟེར་བས།ཕྱིས་སེང་ཆེན་གྱི་བཙུན་མོར་གྱུར་པ་དེ་འཁྲུངས།གླིང་གི“སེང་བློན”ཟེར་བས།རྒྱ་བཟའ་ལྷ་སྐྱིད་སྒྲོལ་མ་དང་།འགག་བཟའ་གཉིས་བག་མར་བླངས་པས།རྒྱ་བཟའ་ལ་དཔའ་བོ་རྒྱ་ཚ་ཞལ་དཀར་འཁྲུངས།འགག་བཟའ་ལ་གླིང་རྗེ་གེ་སར་འཁྲུངས།འཁྲུངས་ཡུལ་ནི་ཁམས་ཀྱི་སྐྱིད་སོས་ཡག་གི་ཁ་མདོ་རེད་ཟེར།འཁྲུངས་པའི་ལོ་ཚིགས་ནི་《མདོ་སྨད་ཆོས་འབྱུང་དེབ་ཐེར་རྒྱ་མཚོ》ལས།གེ་སར་རྒྱལ་བོ་འཁྲུངས་ལོ་ནི་ལྕགས་བྱི་དང་ཆུ་སྦྲུལ་ལ་འདོད་མཁན་གཉིས་སྣང་བ་གང་ཡིན་ཀྱང་རབ་བྱུང་དང་པོ་ཚུགས་ཁ་མའི་དྲུག་ཅུ་སྐོར་དེར་གཏོགས་ལ།རླངས་བྱང་ཆུབ་འདྲེ་བཀོལ་དང་སྨྲྀ་ཏི་ཛྙཱ་ན་ཀིརྟི་སྤྱན་དྲངས་ཏེ།ཆོས་ཞུས་པ་དང་།གཙུག་ལག་ཁང་བཞེངས་པས་ཀྱང་ཤེས་ནུས།ཞེས་སྒྲུབ་བྱེད་ནུས་ལྡན་བཀོད་པ་ལྟར་རོ།།ཡང་རབ་བྱུང་དང་པོའི་ས་སྟག་ལ་འཁྲུངས་པར་འདོད་མཁན་བྱུང་བ་དང་དེ་གཉིས་ཀྱི་བར་ཁྱད།སྔ་མའི་ལྕགས་བྱི་དང་དེང་འདིའི་བར་ལ་ལོ་ངོ་སོ་བརྒྱད་དང་།སྔ་མའི་ཆུ་སྦྲུལ་དང་དེའི་བར་ལ་ཞེ་ལྔ་ཙམ་ལས་ཁྱད་པར་ཆེན་པོ་མེད།འདི་དག་ནི་མཁས་པའི་གསུང་ཡིན་ཕྱིར་དཔྱད་གཞིར་འོས།སྲོང་བཙན་གྱི་སྔོན་དང་།དེའི་དུས་ཨེ་ཡིན་བསམ་ཟེར་བ་སོགས་བླུན་པོའི་གཏམ་ལ་ཚད་བཟུང་མེད་པས་དཔྱད་ཀྱིས་ག་ལ་ལང་།གེ་སར་འཁྲུངས་རྗེས་བུ་ཆུང་དེ་རྒྱ་ཚའི་མདུན་དུ་ཁྱེར་བས།རྒྱ་ཚ་རང་གི་ནུ་བོ་ཞིག་འཁྲུངས་པ་ཤིན་ཏུ་དགའ་ནས།ཨ་རེ་དགའ།ད་ངའི་བསམ་པ་འགྲུབ་སོང་བ་ཡིན་སོགས་གསུངས།ཁྱེའུ་རྒྱ་ཚ་ལ་དགའ་བའི་རྣམ་འགྱུར་གྱིས་ཇོར་སེ་བཞུགས་པས།རྒྱ་ཚས་ནུ་བོའི་མིང་ལ་ཇོ་རུ་ཞེས་ཐོགས་ཤིག་གསུངས་པ་བཞིན་རེ་ཞིག་གི་བར་དུ་ཇོ་རུ་ཞེས་གྲགས་སོ།།
དེ་ནས་ཇོ་རུ་ཅུང་ཟད་ལག་ཆགས་པའི་སྐབས་སུ།གླིང་སྡེའི་དཔོན་ཁྲོ་ཐུང་གིས་ཇོ་རུ་བློ་རིག་ཅན་ཞིག་ཡིན་པ་མཐོང་སྟེ།འདི་ཆེར་སྐྱེས་དུས་དཔོན་ས་འཕྲོག་ཉེན་ཡོད་སྙམ་ནས།འགག་མོ་འདྲེ་རེད་ཟེར་ནས།འགག་མོ་མ་བུ་གཉིས་རྨ་སྨད་གཡུ་ལུང་སུམ་མདོར་རྒྱང་འཕུད་བཏང་།དེ་ནས་ཇོ་རུ་ལག་ཆགས་ཡག་གི་སྐབས་ཤིག་ཏུ།གླིང་གི་རྟ་རྒྱུག་བྱེད་པའི་ཆེད་དུ།ཚོགས་ཆེན་ཞིག་འཚོགས་ཏེ་གླུ་ལེན་གར་རྩེད་སོགས་ཀྱི་སྟོན་ཆེན་ཞིག་བྱས།དེའི་སྐབས་ཇོ་རུ་གླིང་ཡུལ་དུ་སླེབས་ཏེ་གློ་བུར་དུ་ཚོགས་ཆེན་དུ་ཞུགས།ཁྲོ་ཐུང་གཙོར་བྱས།གླིང་ཆེ་རྒྱུད།འབྲིང་རྒྱུད་གཉིས་མི་དགའ་ཡང་།ཇོ་རུ་ཆུང་རྒྱུད་ཚང་ཡིན་པས།ཆུང་རྒྱུད་ཚང་དགའ་སྤྲོའི་ནམ་མཁའ་ལངས།འབྲུག་མོས་གཉེན་འདེམས་ཀྱི་མདའ་མོ་ནམ་མཁའ་ལ་འཕངས་པ་ཇོ་རུའི་ཐོག་ཏུ་ལྷུང་།ཇོ་རུ་དང་གཉེན་བསྒྲིག་བྱུང་།ཇོ་རུ་རང་ཡུལ་དུ་ཕེབས།དེ་ནས་རྟ་རྒྱུག་བྱེད་རྒྱུ་གྲོས་འཆམ་བྱུང་སྟེ་དུས་བཏབ་ནས།དུས་ཐོག་ཏུ་གླིང་ཆུང་རྒྱུད་ཚང་དང་མང་མང་གི་ཁ་ཐོག་ཏུ་སོང་སྟེ་ཇོ་རུ་ཡང་གདན་དྲངས།མཁར་སྟག་རྩེའི་མདུན་དུ་སྒར་བཏབ།གླིང་གི་དཔའ་རྟུལ་རྣམས་དང་མི་སྡེ་རྣམས་དེར་འདུས་པ་སའི་རྩི་ཤིང་བཞིན་དུ་གྱུར།གླིང་གི་རྒྱལ་སྲིད།ཕ་ཟོག་ཡོད་དགུ།སྐུ་གསུང་ཐུགས་རྟེན་བཅས་པ་རྟ་རྒྱུག་གི་ལྐུག་ལ་བཞག་ནས།ལྷ་བསང་བཅུ་གསུམ་བཏང་སྟེ་རྟ་རྒྱུག་བྱས།ཇོ་རུས་སྔར་ནས་ཁ་ལོ་བཏུལ་ཟིན་པའི་ལྷ་རྟ་རྐྱང་རྒོད་ལ་བཞོན་ནས་གཅིག་བསྐྱུར་གཉིས་བསྐྱུར་གྱིས་སྔོན་ལ་སླེབས་ཏེ་ཁྲི་ཁར་གཟི་བརྗིད་དང་ལྡན་པར་བཞུགས་སོ།།
དེ་ནས་དར་འཕྱར་དུང་འབུད་སོགས་དགའ་སྟོན་རྒྱ་ཆེན་པོ་བྱས་ཤིང་།གླིང་ཆེ་རྒྱུད།འབྲིང་རྒྱུད།ཆུང་རྒྱུད་ཀྱི་དཔའ་རྟུལ་རྣམས་དང་དཔོན་ཐམས་ཅད་འདུས་ནས་བུ་ཇོ་རུ་ལ་མཇལ་དར།རྟ་རྐྱང་རྒོད་ལ་མགྱོགས་དར་ཕུལ།དེ་དུས་ཁྲོ་ཐུང་གིས་རྒྱ་དར་དཀར་བོ་དྲི་མས་མ་གོས་པ་ཞིག་བཞག་ནས།སེམས་ལ་མི་དགའ་ཡང་།ངོ་འཛུམ་མདངས་དགའ་བའི་རྣམ་འགྱུར་གྱིས།ཧེ་ཧེ།ངའི་ཚ་བོ་ལ་དེ་རིང་།གེ༷་འདི་འདྲ་ས༷ར་འདུག་ཟེར།དེ་ནས་ཇོ་རུ་ཁོ་རང་གིས་ང་རང་གི་མིང་རང་གིས་མ་ཐོགས་པར།དེ་རིང་ང་ལ་ཨ་ཁུས་གེ་སར་བཏགས་པ་དེ་རྟེན་འབྲེལ་ལེགས།གེ་སར་སར་སྡང་བའི་དགྲ་ལ་སར།དོན་འགྲུབ་འགྲུབ་ཁྲ་མོ་གླིང་ལ་འགྲུབ།ཅེས་གསུངས་ཤིང་།གེ་སར་ནོར་བུ་དགྲ་འདུལ་ལམ།སྐྱེས་བུ་དོན་འགྲུབ་ཀྱི་མཚན་གསོལ་ནས།ཁྲ་མོ་གླིང་གི་རྗེ་བོར་གྱུར་ཏོ།།
གེ་སར་ཞེས་པའི་མིང་དེ་ལྟར་ཐོགས་པ་རེད།སྤྱིར་སྒྲ་གཅིག་དོན་མང་ལ་འཇུག་པ།གོ་སྒྲ་དོན་དགུ་ལ་འཇུག་པ་ལྟ་བུ་ཡོད།གེ་སར་ཞེས་པའང་དོན་ཁ་ཤས་ལ་འཇུག་པ་ཡོད་མོད།འདིར་གེ་སར་ཞེས་པ་གཞོན་དར་དཔའ་པོ་ལ་འཇུག་སྟེ།ཁྲོ་ཐུང་གིས་ངའི་ཚ་བོ་ལ་གེ་འདི་འདྲ་སར་འདུགཅེས་པའི་དོན་ནི།ངའི་ཚ་བོ་དེ་རིང་འདི་འདྲའི་གཞོན་ནུ་དར་མ་དཔའ་བོ་ཞིག་ཏུ་གྱུར་འདུག་ཅེས་པའི་དོན་ཡིན་ལ།ཁོང་གིས་ཡང་གེ་སར་སར་སྡང་བའི་དགྲ་ལ་སར།དོན་འགྲུབ་འགྲུབ་ཁྲ་མོ་གླིང་ལ་འགྲུབ།ཅེས་པའང་གཞོན་དཔའ་བོ་སྡང་བའི་དགྲ་ཐོག་ལ་དཔའ།གཞོན་ནུ་དཔའ་བོས།རང་གི་སྡེ་ཆེན་ཁྲ་མོ་གླིང་གི་དོན་འགྲུབ་པར་བྱེད་ཅེས་པ་ཡིན།དེས་ན་འདིར་གེ་སར་གྱི་སྒྲ་དོན་ལེགས་སྦྱར་ཚུན་ཆད་ཁྱེར་ཡོང་ནས་རྙོག་ལྡུར་མི་སྨྲ་བར་ཞུ།དེ་དུས་ཀྱི་ས་ཆ་རྫ་གུ་རའམ།ཀུར་རིའི་རྫ་སྐྱ་མཐོན་པོ་དང་།རྡོ་ཕ་བོང་ཟུར་བཞི་བའི་བཞུགས་ཁྲི་ད་ལྟའང་ཡོངས་སུ་གྲགས་པ་རེད།རྒྱུས་ལེན་སྙམ་ན་སོང་ལ་ལྟོས།
བདུད་བཏུལ་ཞེས་པ་དེ་ནི།སུམ་པ་ཡེ་ཤེས་དཔལ་འབྱོར་གྱིས་གསུངས་པ་ལྟར་རེད།དེ་ནི་ལྷ་སའི་བྱང་ངོས་ཀྱི་གནམ་མཚོ་ཕྱུག་མོའི་ཕྱོགས་སུ་ཡོད་པའི་གྲེ་བ་ནང་ཚན་གྱི་སའི་ཆར་གཏོགས་པ།གུ་རུ་དང་མོན་རུའི་ས་མཚམས་སུ་སྐྱེས་པའི་མི་སྟོབས་རྩལ་ཅན་ཞིག་ཡོད་པ་དེས་རྐུན་ཇག་གི་མགོ་གཙོ་བྱས་ནས།མི་རྣམས་ལ་རྐུ་འཕྲོག་གསོད་བཅོམ་གྱིས་གནོད་འཚེ་མང་བོ་བཏང་བས།དེའི་མིང་ལ་བདུད་ཟེར།དེ་ལྷ་ཟའི་བྱང་ངོས་ཀྱི་འདམ་ཞེས་པའི་ས་ཆར་ཕྱིན་ནས།རི་དྭགས་གསོད་པ་དང་རྐུ་འཕྲོག་སོགས་བྱས་ཏེ་ས་དེར་བསྡད།ཤ་བའི་རྭ་དང་རུས་པས་མཁར་བརྩིགས་ནས་བསྡད་པའི་ས་དེ་ལ།ཤ་རྭ་གནམ་རྫོང་ཟེར།གནའ་དུས་རྐྱ་དབུས་པ་དག་གི་ལམ་ཡིག་ཏུའང་ཡོད།དེ་སྐབས་བོད་ཁ་འཐོར་གྱི་དུས་ཡིན་སྟབས།ཁོས་འཁོར་མང་པོ་བསྡུས་ཏེ་སྡེ་ཆེན་ཞིག་ཆགས།ཁོ་སྡེ་ཆེན་དེའི་རྒྱལ་བོ་བྱས་ནས་གཞན་ལ་དམག་འཇུག་བྱས།སྐབས་ཤིག་ཁོ་མདོ་ཁམས་གླིང་ཡུལ་དུ་སླེབས་ཏེ།གེ་སར་བཙུན་མོ་མེ་བཟའ་འབུམ་སྐྱིད་དང་།ནང་མི་གཉིས་ཕྲོགས་པའི་རྐྱེན་གྱིས་གེ་སར་དཔུང་བཏེགས་ཏེ་གཡུལ་བཀྱེས་པས།བདུད་རྒྱལ་བསད།སྡེ་འབངས་མངའ་འོག་ཏུ་བསྡུས་པའི་ཡུན་ལ་ལོ་གཉིས་དང་ཟླ་བ་གསུམ་འགོར་ཟེར།
དེ་རྗེས་གེ་སར་བདུད་ཡུལ་ནས་རང་ཡུལ་དུ་མ་སླེབས་པའི་སྐབས་ཤིག་ཧོར་གླིང་འཁྲུགས་ཏེ་འབྲུག་མོ་འཕྲོག་པ་སོགས་ཀྱིས་རྐྱེན་བྱས་ཏེ།ཧོར་གླིང་གཡུལ་འགྱེད་ཆེན་པོ་བྱུང་སྟེ།མཐར་གེ་སར་གྱིས་ཧོར་ཡུལ་ཆམ་ལ་ཕབ།ཧོར་ལ་དེའི་སྐབས་གུར་དཀར་དང་།གུར་སེང་།གུར་ནག་གསུམ་ཡོད།ཨ་ཆེན་ལུང་བའི་གངས་ཆགས་དཀར་བོའི་སྨད་དུ་རྫ་ཆེན་པོའི་ཉེ་འདབས་སུ།ཧོར་གུར་དཀར་གྱི་ཡ་ཙེའི་མཁར་ཤུལ་ཡོད་ལ།དེར་དེང་སང་ཡང་ཧོར་རྒྱལ་བོའི་སྡེ་ལྷག་གི་མི་རྒྱུད་ཡོད།འ་སྟོད་ཤུག་ཤའི་ཆུ་ནས་རྒྱའི་ཁུའུ་ཀྲུ་མཁན་གྱི་ཚུ་རོལ་གྱི་བར་དུ།ཧོར་གུར་སེར་གྱི་རྒྱུད་པ་ཤ་ར་ཡུ་གུར་ཟེར་བའི་ཆ་ལུགས་མི་འདྲ་བའི་མི་སྡེ་ཡོད།ཐུ་བཀྭན་ཆོས་ཀྱི་ཉི་མས་མཛད་པའི་དགོན་ལུང་དཀར་ཆག་ལས།མཁན་པོ་སུམ་ཅུ་བ་མཁྱེན་རབ་དབང་ཕྱུག་ངག་དབང་དགེ་ལེགས་རྒྱ་མཚོ་ནི།བདེ་དགུ་ཆེ་བ་དཔལ་ལྡན་རྒྱ་མཚོའི་སྐུ་སྐྱེས་གསུམ་པ་ཡིན་ལ།འཁྲུངས་ཡུལ་ཤ་ར་ཡུ་གུར་དུ་གྲགས་པ།དེ་ནི་གེ་སར་གྱི་ལོ་རྒྱུས་སུ་ཧོར་གུར་སེར་ཞེས་འབྱུང་བ་དེ་ཡིན་ཞིང་།ཞེས་གསུངས་པ་དང་།ཡང་དེ་ལས།རྒྱལ་བོ་སྐུ་ལྔ་བོད་དུ་བྱོན་པའི་ལོ་རྒྱུས་སུ།བྷ་ཏ་ཧོར་གྱི་སྒོམ་གྲྭ་བཅོམ་ཟེར་བའི་ཧོར་གྱི་ཡུལ་ཡང་འདི་ཉིད་ཡིན་ཞེས་མང་པོ་ཞིག་གིས་གླེང་བ་བདེན་པ་འདྲ་སྟེ།སོག་སྐད་ལ་ཤ་ར་ཨུར་གེ་ཞེས་པ་གུར་སེར་བོ་ཟེར་བ་ཡིན་པས།ཨུར་གེ་སྒྲ་ལོག་པས།ཡུ་གུར་ཞེས་བོས་སམ་སྙམ་ཞིང་།བྷ་བ་ཏ་རུ་བ་ཟེར་བའི་ཕ་ཚོ་གཅིག་དང་།སྒོམ་གྲྭའི་ཤུལ་ཡིན་ཟེར་བའི་གྱང་རོ་འགའ་ཞིག་ད་དུང་ཡང་སྟོན་རྒྱུ་འདུག་ལ།རྒྱལ་བོའི་རིགས་ཀྱི་དཀོར་བདག་གདུག་པ་ཅན་མང་ཞིང་།དེ་རྣམས་མཆོད་ལུགས་ཀྱང་རྒྱལ་གསོལ་དང་དབྱིབས་འདྲ་བར་སྣང་ངོ་།།ཞེས་གསུངས་སོ།།མཚོ་སྔོན་ཕྱོགས་ཀྱི་ཧོར་སྦྲ་ཁྲ་ཟེར་བའི་སྡེ་ཤོག་དེ་ཡང་གུར་དཀར་གྱི་སྡེ་ལྷག་ཡིན་ལ།དེང་སང་ཅི་ཡིན་མ་ཤེས།བཅིངས་འགྲོལ་སྔོན་དུ་སྡེ་ཚོ་དེ་རྣམས་སུ་མུན་རུབ་ཁར་རྟ་རྐྱང་རྐྱང་བཞོན་མཁན་གྱི་འགྲུལ་བ་སླེབས་ན་ལྟས་ངན་དུ་བརྩི་ཟེར་ཞིང་།རྒྱལ་བོའི་མདུང་ལྷ་ཕབ་པའི་ལུགས་སྲོལ་ཀྱང་ཡོད་ཟེར་རོ།།
འཇང་ཡུལ་ནི།ཡུན་ནན་ཞིང་ཆེན་གྱི་ཁོངས་སུ་ཡོད།སྔར་སྟོབས་འབྱོར་ཆེ་ཡང་།བོད་ཆོས་རྒྱལ་གྱི་དུས་སུ་བོད་རྒྱལ་གྱིས་དབང་དུ་བསྡུས།བོད་སིལ་བུར་འཐོར་བའི་དུས་སུ།བོད་ལ་རྐུན་ཇག་སོགས་བརྙས་གཙེ་སྣ་ཚོགས་བྱས་པའི་དབང་གིས།འཇང་གླིང་གཡུལ་འགྱེད་བྱུང་།དེའི་སྟབས་ཀྱིས་འཇང་གི་སྟོབས་འབྱོར་ཉམས་ཤིང་།མི་སྡེ་འགའ་ཞིག་བོད་དུ་གྱུར་ན་ཡང་མི་སྡེ་དང་དཔོན་རྒྱུད་ད་དུང་ཡང་ཡོད།འཇང་ས་དམ་རྒྱལ་བོས་བཅོས་བསྒྱུར་གོང་དུ་གསེར་དངུལ་དྲེལ་ཁལ་བརྒྱད་ཁྱེར་ནས་ཕྱི་རྒྱལ་དུ་བྲོས་སོང་ཟེར།
སྟག་གཟིག་ནི་ཕྱི་རྒྱལ་སྐད་ཡིག་གཤིས།འབྲི་ལུགས་སྣ་ཚོགས་ཡོད་དེ།སྟག་གཟིག ཏ་ཟིག ཏ་ཞིག་ཅེས་བྲིས་པ་ཡོད།ཕྱིས་སུ་བོད་ཀྱིས་གར་ལོག་ཟེར་བ་ཡང་དེ་ཡིན་ཞེས་ལོ་རྒྱུས་འགའ་ཞིག་ན་སྣང་།ཏཱ་ར་ནཱ་ཐའི་སློབ་དཔོན་པད་མའི་རྣམ་ཐར་དུ།ཏུ་རུ་ཀྵ་དང་སྟག་གཟིག་གཉིས་གཅིག་པ་ཡིན་གསུངས།དེང་དུས་ཐུར་ཆི་ཟེར་བ་དེ་ཡིན་ཚོད་རེད།བོད་ཀྱི་སྟག་གཟིག་ཟེར་བ་ནི་ཡས་ལང་དང་།ཐུར་ཆི།ཆོས་ལུགས་ཧོས་ཧོས་དང་འདྲ་བ་དེ་དག་ཡིན་ཞིང་།གནའ་དུས་རྒྱལ་ཁབ་ཕྱུག་པོ་སྟོབས་དང་ལྡན་པ་ཡིན་གཤིས། སྟག་གཟིག་ནོར་གྱི་རྒྱལ་བོ་ཟེར།གེ་སར་སྒྲུང་དུའང་སྟག་གཟིག་ནོར་རྫོང་བཅོམ།ཞེས་པའི་ནོར་རྫོང་ནི་གྲོང་ཁྱེར་དང་ཕོ་བྲང་ཕྱུག་པོའི་བརྡ་ཆད་རེད།བོད་ཆོས་རྒྱལ་གྱི་དུས་སུ་བོད་ལ་བཙན་འཛུལ་དུ་མ་བྱས་ཀྱང་།མཐར་གཡུལ་ཕམ་ཏེ་བོད་རྒྱལ་ལ་དཔྱ་ཁྲལ་འབུལ་དགོས་བྱུང་།བོད་ཁ་འཐོར་གྱི་དུས་སུ།བོད་ཀྱི་སྲིད་ཉམས་ཤིང་མགོ་འཐོར་དུ་སོང་བ་ཤེས་ནས།བོད་ལ་རྐུན་ཇག་སོགས་གནོད་པ་བྱས་ན་ཡང་།དེའི་སྐབས་དབུས་གཙང་དུ་སྡེ་དཔོན་སྟོབས་ལྡན་དམག་ཤུགས་ཅན་མེད་གཤིས།དབུས་གཙང་གི་ཆེ་གཙོ་འགས་མདོ་ཁམས་ཀྱི་དཔའ་བོ་སྟོབས་ལྡན་དམག་ཤེད་ཅན་གླིང་གེ་སར་རྒྱལ་བོ་སྐུལ་སློང་བྱས་པ་སོགས་ཀྱི་རྐྱེན་གྱིས།སྟག་གླིང་གཡུལ་འགྱེད་བྱུང་སྟེ།སྟག་གཟིག་ནོར་རྫོང་བཅོམ་སྟེ་རྒྱལ་ཁ་བླངས།དེ་དུས་བོད་ལ་གནོད་པ་བྱེད་པའི་རྒྱ་ནག་གི་གྲོང་དང་གྲོང་རྡལ་འགའ་ཞིག་བཅོམ་པའི་མཁར་ཤུལ་རྔ་བ།ཟངས་དཀར།མཛོད་དགེ་དང་།ཀན་ལྷོ་ཕྱོགས་སུའང་ཡོད།
དེ་དག་ལ་སོགས་པ་གཡུལ་ཆེན་བཅོ་བརྒྱད་སོགས་བགྱིས་པ་དང་།རྨ་སྟོད་སྨད་བར་གསུམ་སོགས་མདོ་ཁམས་ཡོངས་ལ་དབང་བསྒྱུར་ཅིང་།བོད་ཡུལ་ཕལ་མོ་ཆེ་ལ་ལུང་འབེབས་པ་བྱུང་ངོ་།།
གླིང་གེ་སར་འདས་རྗེས་རིམ་གྱིས་མངའ་ཐང་ཉམས་པར་གྱུར་ནའང་གདུང་རྒྱུད་དང་མི་སྡེའི་ལྷག་དུ་མ་ཡོད།སྡེ་དགེ་ཕྱོགས་ཀྱི་སྡེ་དཔོན་གླིང་ཚང་རྒྱལ་བོ་ནི་གླིང་སེང་ཆེན་གྱི་རྒྱལ་རྒྱུད་རེད།གླིང་འགུ་ཟིའི་རྒྱལ་བོ་ཟེར་ལ།སྲས་དགྲ་བླ་རྩེ་རྒྱལ་ནས་བརྩིས་པའི་གདུང་རབས་ཞེ་དགུ་སོང་།ཞེས་སྔོན་གྱི་གླིང་ཚང་རྒྱལ་བོའི་རྒྱལ་རབས་ལོ་རྒྱུས་སུ་ཡོད་འདུག གླིང་ཚང་རྒྱལ་བོ་ནི་དེང་སང་རྒྱ་གར་ན་བསྡད་ཡོད།གླིང་ཚང་རྒྱལ་བོའི་རྒྱལ་ས་དེ་ན་སྔོན་གྱི་གླིང་གེ་སར་གྱི་སྦྲ་ཤུལ་ཡོད་པ་དང་།གེ་སར་སོགས་ཀྱི་གོ་མཚོན་དང་།བ་སོའི་ཕྱག་ཐམ་སོགས་ཡོད།སྡེ་དགེའི་ལྕང་ར་ན་ཁྲོ་ཆུའི་དངུལ་རྫོང་གི་ཤུལ་ཡོད་འདུག་ལ།མཚོ་སྐྱ་རེངས་དང་སྔོ་རེངས་གཉིས་ཀྱི་བར་དུ་འབྲུག་མོའི་གསེས་མཁར་དང་།འབྲུག་མོའི་ཆུ་འཁུར་སའི་རྡོ།སྐྱ་ལོའི་གཡག་རྔའི་ལབ་རྩེ།ཕོ་བྲང་སྟག་རྩེའི་མཁར་ཤུལ་ཡོད།འདན་ཁོག་གི་ས་སྐྱིད་སོས་གཡག་གི་མདོ་ན།གེ་སར་གྱི་ལྷ་ཁང་ཡོད་ཀྱང་།གོད་ཆག་སྐབས་གཏོར་བརླག་བྱས་ཡོད་པ་གཞིར་བཞག་ཡིན་ཀྱང་གྱང་རོ་རེ་ལྷག་ཡོད་ལས་ཆེ།དེ་ན་གེ་སར་གྱི་རེད་ཟེར་བའི་ཁྲབ་རྨོག་གོ་མཚོན་སྒ་སྲབ་སོགས་སྔར་ཡོད།ད་སྐབས་ཅི་ཡིན་མ་ཤེས།མགོ་ལོག་གི་གླིང་བླ་མ་ཆོས་རྡོར་ཡང་གླིང་གི་རྒྱུད་པ་ཡིན་གཤིས།གླིང་བླ་མ་ཞེས་འབོད།དེ་གའི་གླིང་སྐོར་ཞེས་པའི་རུ་སྡེ་དེ་ཡང་གླིང་གི་སྡེ་ལྷག་ཡིག་འདུགསྡེ་དགེའི་ཕྱོགས་ཀྱི་རྫ་ཁོག་གི་ཆབ་བཙའ་དགོན་པའི་གཡོན་ཟུར་དུ་ཨ་མྱེ་ཁྲ་རྒན་གྱི་སྦྲ་ཤུལ་ཡོད།རྫ་དཀར་ནག་གི་ཕྱོགས་སུ་གླིང་གིས་མདའ་རྩལ་སྦྱང་སའི་ཕ་བོང་གྲུ་བཞི་མ་ཕ་རི་ཚུ་རི་གཉིས་ཀ་ན་ཡོད།ཁྲ་གླིང་དགོན་པའི་ཐག་ཉེ་ས།རྒྱུ་དར་གྱི་ས་ནག་ལུང་མདོ་ན།གེ་སར་གྱི་མཁར་ཤུལ་ཡོད།རྨ་སྨད་གཡུ་ལུང་སུམ་མདོ་ཟེར་བའི་ས་དེ་རེད་ཟེར།རྨ་ཆུ་དང་ཁོ་ཆུ་འདྲེས་མཚམས་ཁོ་མདོ་ཟེར་བའི་ས་ཆ་ན།ཁྲོ་ཐུང་གི་ཕོ་རོག་སྙིང་རྫོང་གི་མཁར་ཤུལ་ཡོད་ལ།གོ་འཇོ་ན་སེང་སྟག་ཨ་དོམ་གྱི་མཁར་ཤུལ་ཡོད།མགོ་ལོག་པད་མ་རྫོང་ན་གེ་སར།འབྲུག་མོ།འདན་མ་རྣམས་ཀྱིས་ཁྲུས་བྱེད་སའི་ཆུ་ཚན་ཡོད།ང་རང་ཡང་དེ་གར་སོང་ནས་བདུན་གཅིག་ལ་བསྡད་དེ་ཁྲུས་བྱས་མྱོང་།མགོ་ལོག་ཕྱོགས་སྐྱོང་གི་ས་ཆ་ན་གླིང་ཁྱ་ཡི་རི་བཤོལ་ཟེར་བའི་རིའི་ངོ་ནས།གླིང་གི་དུས་ཀྱི་ལྕགས་ཀྱི་མདེའུ་མཐོ་གང་རེ་ཡོད་པ་རྙེད་རྒྱུ་ཡོད་ཟེར།མགོ་ལོག་མི་ར་ཟེར་བའི་ས་ན།གེ་སར་གྱི་ལྷ་རྟ་རྐྱང་ལིའི་རྔོག་མ་འབྲེག་ས་བྲག་ཟོར་ཡོད་པ་དེར།དེང་སང་ཡང་རྟའི་རྔ་རྔོག་མཆོད་སྲོལ་འདུགམགོ་ལོག་དཀར་བོའི་ཁོག་ན་གེ་སར་གྱི་བཞུགས་ཁྲི་རྡོ་ཁྲི་རྒྱབ་ཡོལ་ཅན་ཞིག་གདའ།ས་དེ་ན་འཇང་གི་སོ་དེའུ་ཟེར་བའི་འཇང་གླིང་འཁྲུགས་སྐབས་སུ་འཇང་དམག་ཨེ་ཡོང་སོ་བྱེད་སའི་སོ་ཁང་རི་རྩེ་ན་ཡོད་པ།རྡོ་ཕ་བོང་ཆེན་པོ་གསུམ་གྱི་སྟེང་དུ།རྡོ་གྲུ་བཞི་རྒྱ་ཁྱོན་ཁང་མིག་ཆེ་བའི་ཚད་ཙམ་གྱིས་བཀབ་ཡོད་པ།དེའི་མཐར་རྡོ་གྲུ་བཞི་མ་རྣམས་ཀྱིས་བསྐོར་ཡོད་པ་ཞིག་ཡོད།རྔ་བའི་ཡུལ་གྱི་རྔ་སྟོད་རྩི་མདའ་མན་ན་གེ་སར་གྱི་རྟ་འདོགས་ས་རེད་ཟེར་བའི་བྲག་རྡོ།རྔ་བའི་རྨེ་སྐོར་གྱི་ས་ཆ།སྟོད་ན་ཤྭ་ཡུ་འཁོར་ས།བར་ན་ཕྱུགས་རིགས་སྐྱོང་ས།སྨད་ན་འབྲུ་རིགས་འཁྲུངས་ས།ཟེར་བའི་ས་དེ་ཨ་མྱེ་ཁྲ་རྒན་གྱིས་བཟུང་བའི་ལོ་རྒྱུས་ཡོད།སྐ་ཆུའི་སྟོད་དུ་གླིང་མཁར་སྟག་རྩེའི་མཁར་ཤུལ་ཡོད་པ་དང་།དེ་མན་གྱི་ཨ་མོའི་ཁོག་ཏུ་འབྲུག་མོའི་རྟ་ར་ཡིན་ཟེར་བའི་བྲག་ར་ཟླུམ་པོ་ཞིག་ཡོད།དེང་སང་ཧོང་ཡོན་རྫོང་ཟེར་བའི་ས་ཁོངས་བརྒལ་མཚམས།ཟུང་ཆུ་རྫོང་གི་ཁོངས་ཀྱི་ས་སྣེ་ཟིན་མཚམས་སུ་སྟོན་མོ་ལུང་ཟེར་བའི་ས་ཆ་ཞིག་ཡོད།ས་དེར་ཧོར་གླིང་གཡུལ་འགྱེད་སྐབས་གླིང་གིས་རྒྱལ་ཁ་ཆེན་པོ་ཞིག་ལོན་ནས།ས་དེར་དགའ་སྟོན་ཆེན་པོ་ཞིག་བྱས་པས།སྟོན་མོ་ལུང་ཞེས་མིང་ཐོགས་པ་རེད།དེ་དང་ས་ཐག་ཉེ་སར་མདའ་སྦྱངས་རྒོད་ཡུལ་ཟེར་ས་དེར།གླིང་གི་དཔའ་བོ་རྣམས་ཀྱིས་མདའ་རྩལ་སྦྱངས་ཏེ།བྱ་རྒོད་ལ་མདའ་འཕངས་པས་ས་དེའི་མིང་ལ་དེ་ལྟར་གྲགས།
དམུ་དགེ་དགོན་པའི་རྒྱབ་རིའི་ཁ་ན་འོབས་ཆེན་པོ་ཞིག་ཡོད་པའི་མིང་ལ་ཧོར་སྐུང་ས་ཟེར། སྔར་ཧོར་གླིང་འཁྲུགས་སྐབས་ཧོར་དམག་སྐུང་ས་རེད།དམུ་དགེ་དགོན་པའི་དཀྱིལ་དུ་འོབས་ཆེན་པོ་མི་རྟ་བརྒྱ་ཕྲག་ཆུད་ས་ཞིག་བརྐོས་པ།ཧོར་གྱིས་ས་སྲོག་བཅད་པ་རེད་ཟེར་ཡང་།འཐབ་རའམ་མི་རྟ་བརྒྱ་ཕྲག་དུ་མ་སྐུང་ས་བཟོས་པ་རེད།དེང་སང་དེའི་དཀྱིལ་དུ་ས་རྡུལ་གྱིས་བསུབ་ཡོད་ཀྱང་།སྣེ་གཡས་གཡོན་གཉིས་ད་རུང་ཁ་མ་གང་བར་ལུས་ཡོད།དམུ་དགེའི་མཆོད་རྟེན་སྣར་འབྲུག་མོའི་སྦྲ་ཤུལ་ཡོད།དེ་དང་མི་རིང་བ་ན་ར་ཕུག་ཟེར་བའི་ས་ཆར་མོ་དེའུ་ཟེར་བའི་དེའུ་ཆུང་ཞིག་ཡོད་པ་དེ་གླིང་སེང་ཆེན་གྱིས་མོ་འདེབས་ས་ཡིན་ཟེར།དམུ་དགེ་དང་མཁར་ལུང་གི་བར་དུ་ས་རྡོ་གྲུ་བཞི་མ་ལེབ་མོ་མཐར་འོབས་ཀྱིས་བསྐོར་ནས་ཡོད་པ་ཞིག་ཡོད་པ་དེ།གླིང་དཔོན་རྣམས་ཀྱིས་ཤོ་རྩེད་བྱེད་ས་ཡིན་ཟེར།དེ་ནས་ཤར་ཕྱོགས་སུ་སོང་མཚམས་གཉང་རྐྱལ་ཁ་ཟེར་བའི་ལ་ཁ་དེར།གླིང་དམག་འགྲོ་སྐབས་ཨ་མྱེ་ཁྲོ་ཐུང་གི་ཁོག་པ་མ་བདེ་ནས།ཁྲོ་ཐུང་བཤལ་གཉང་བྱས་སྟབས།གཉང་རྐྱལ་ཁ་ཞེས་མིང་ཐོགས་པ་རེད་ཟེར།དེ་ནས་ཕར་སོང་ན་ཟུང་ཆུ་ཟེར་བའི་ཆུའི་ཕར་ཁ་དང་།ཚུར་ཁར་གླིང་གིས་དམག་སྒར་བརྒྱབ་པའི་ཤུལ་དང་།ཟུང་ཆུའི་ཀྲེན་ཅང་ཀོན་མན་ཆད་དུ་དཔའ་ཆེས་གདོང་ཟེར་ས་དེ་གླིང་གིས་དམག་རྩེད་བྱེད་ས་ཡིན་ལ།སེང་ཆེན་གྱི་མདའ་ཟུག་ཤུལ་ཡིན་ཟེར་བའི་བྲག་ངོ་ཞིག་ཏུ་མདའ་ཤུལ་ཡོད།ཟུང་ཆུའི་སྟོད་ཨ་གླིང་ཟེར་བའི་སྡེ་བ་དེ་གླིང་དམག་བསྡད་པའི་སྡེ་ཤུལ་ཡིན་ཟེར་བ་དང་།རྒྱ་རྩེ་ཟེར་བའི་སྡེ་བ་དེ་རྒྱ་ཚ་ཞལ་དཀར་གྱི་སྡེ་འཐོར་ཞིག་ཡིན་ཟེར་བ་དང་།དེའི་བར་དུ་གླིང་གི་དམག་རུ་བར་མ་བསྡད་པའི་ས་དེར་བར་རུ་ཟེར་མོད།དེང་སང་བརྡ་ཅུང་ཟད་འགྱུར་ནས་བར་རུང་ཟེར།དེ་ཡན་ཆད་ཅིག་ན།རྟ་ར་རྟེའུ་ར་ཟེར་བའི་བྲག་ར་ཞིག་ཡོད་པ་དེ།གླིང་དམག་དེར་བསྡད་དུས་འབྲུག་མོའི་རྟ་ར་བྱས་པ་རེད་ཟེར།ས་དེ་ནས་བྱང་ཕྱོགས་སུ་བརྒལ་བ་མཛོད་དགེ་ཟེར་བའི་ས།སྐ་ཆུ་རྨ་ཆུ་རྨེ་ཆུ་འདྲེས་པའི་ཆུ་རྒྱུད་དུ།ཧོར་གླིང་གཡུལ་འགྱེད་ཆེན་པོ་ཞིག་བྱས་ནས།ཧོར་དམག་ཁྲི་ཕྲག་བརྒལ་བ་བསད་དེ།གླིང་གིས་རྒྱལ་ཁ་ཆེན་པོ་ཐོབ་པའི་ལོ་རྒྱུས་ཡོད་ལ།སྒྲུང་ཡིག་ཏུའང་ཡོད།མཛོད་དགེའི་ས་དེར།སྔོན་མངའ་བདག་ཁྲི་རལ་བ་ཅན་གྱི་དུས་སུ།བློན་པོ་དགའ་ཡེ་ཤེས་དར་རྒྱས་ཟེར་བས་གཞི་བཟུང་ནས།འབྲོག་སྡེ་ཆགས་པ་ཡིན་མོད།ཧོར་གླིང་འཁྲུགས་ནས་གླིང་གིས་དབང་བསྒྱུར་པས།མཛོད་དགེ་གླིང་དཀར་སྟོད་ཀྱི་ས་ཆ།ཞེས་པའི་མིང་དེ་ཆགས།གླིང་གི་སྡེ་ལྷག་ཞིག་ཡོད་པའི་སྡེ་བ་དེ་ལ་“གླིང་བ”ཞེས་མིང་མ་འགྱུར་བར་ཡོད།མཛོད་དགེ་བཞག་སྡོམ་ཞེས་པའི་སར་གླིང་གི་དཔོན་འདུག་སའི་ས་སྟོན་རྒྱུ་ཡོད།མཛོད་དགེ་སྡེ་གི་ཆོས་རྗེ་ན་གླིང་གི་འབྲུག་དགའ་བདེ་ཟེར་བའི་སྡེ་སྐོར་འབྲུག་སྡེ་ཟེར་བ་ཡོད།ཁོ་ཚོ་ལ་མ་བགོས་སྤྱི་ནོར་དུ་ཁྲོ་ཆུའི་གསེར་རྡོ།འབྲུག་མོའི་རྔ་སོགས་ཡོད་ཟེར།དེ་ནས་བྱང་ཕྱོགས་སུ་སོང་བའི་བླ་བྲང་དགོན་པའི་གཡས་ཕྱོགས་ཀྱི་སྤང་གཞུང་ཆེན་པོ་དེར་གླིང་གི་དཔའ་ཐུལ་དམག་དཔུང་དང་བཅས་པས་ལྷ་བསང་ཆེན་པོ་ཞིག་བཏང་བའི་སྟབས་ཀྱིས།སྤང་གཞུང་དེ་ལ་བསང་གཞུང་ཟེར་ཞེས་བླ་བྲང་གདན་རབས་སོགས་ལོ་རྒྱུས་འགའ་ན་ཡོད།དེ་ནས་འབབ་པའི་ཆུ་བླ་བྲང་གདན་རབས་སོགས་ལོ་རྒྱུས་འགའ་ན་ཡོད།དེ་ནས་འབབ་པའི་ཆུ་བླ་བྲང་གདན་རབས་སོགས་ལོ་རྒྱུས་འགའ་ན་ཡོད།དེ་ནས་འབབ་པའི་ཆུ་བླ་བྲང་བཀྲ་ཤིས་འཁྱིལ་གྱི་མདུན་བརྒྱུད་དེ།ཧོར་ཚང་ཁོག་ཏུ་འབབ་པ་དེ་ལ་བསང་ཆུ་ཟེར།འོན་ཀྱང་།གོ་མེན་ཏང་གི་རྒྱ་མི་ཁ་ཤས་ཀྱིས་ཆུ་བོ་དེའི་མིང་ལ་“ཞ་ཧུ”ཞེས་བཏགས་ནས་བཙན་ཤེད་ཀྱིས་རྫོང་དེའི་མིང་ལའང་ཞ་ཧུ་རྫོང་ཞེས་འབོད་དགོས་བྱུང་།དེང་སང་དེར་མཐུད་དེ་ས་ཁྲ་དང་།བོད་ཡིག་ཚགས་དཔར་ཐོག་ལ་དེ་བཞིན་དགོས་པའི་བཀའ་ཤེད་བཞིན་བྱེད་ཀྱིན་འདུག
བླ་བྲང་བཀྲ་ཤིས་འཁྱིལ་གྱི་གདན་རབས་བཅུ་བ།དགེ་བའི་བཤེས་གཉེན་ཆེན་པོ་གླིང་དཔོན་སློབ་དོན་འགྲུབ་རྒྱ་མཚོ་ནི་གླིང་གི་དཔོན་རྒྱུད་ཡིན་གཤིས།གླིང་གེ་སར་གྱི་གྲི་རིང་སོགས་ཡོ་བྱད་འགའ་ཡོད་པ།སྔར་ཨ་ལགས་གླིང་ཚང་གི་ནང་ཆེན་གྱི་ཚོམས་ཆེན་ལྷ་ཁང་དུ་བཞུགས་ཡོད།དམངས་གཙོའི་བཅོས་བསྒྱུར་དང་།རིག་གནས་གསར་བརྗེ་ཟེར་བའི་གོད་ཆག་སྐབས།ནང་ཆེན་གྱི་གནའ་རྫས་ལ་གཏོར་བཤིགས་ཆེན་པོ་བྱུང་ཡང་།གླིང་སེང་ཆེན་གྱི་གྲི་རིང་དེ་ནི་བླ་བྲང་བཀྲ་ཤིས་འཁྱིལ་གྱི་ཚོགས་ཆེན་འདུ་ཁང་ཐོག་གི་འགྲེམས་སྟོན་ཁང་གི་ནང་དུ་བཞག་འདུགང་རང་གི་ལག་ཏུ་བླངས་ནས་ཞིབ་ལྟ་བྱས།དུས་དེ་སྐབས་ཀྱི་དམག་ཆས་ངོ་མ་རེད་སྙམ།
དེ་ནས་བྱང་ཕྱོགས་སུ་སོང་བ་ན།ཨ་རིག་ཆུ་ཚན་དང་ཕྱོགས་མཚུངས་འདབ་ཆགས་པའི་སར།སྔོན་ཧོར་དམག་གིས་བཟུང་བའི་ཨབ་ཆུ་དུག་ཐང་དེར་ཧོར་དམག་ཕམ་ནས་གླིང་གིས་བཟུང་།གེ་སར་གྱི་བཞུགས་ཡུལ་ལྷ་ལུང་གཡུ་མདོ།མཛོ་འདོགས་ས་ཡིན་ཟེར་བའི་རི་དེའུ་ཞིག་གི་ཉེ་འགྲམ་དུ་སྤང་སྔོན་པོ་ལ་བྲག་དཀར་བོ་སྲོག་ཆགས་ཀྱི་རྣམ་པ་འབུར་དུ་དོད་པའི་ས་འཛིན་ཡོད་ཅེས་པ་སོགས།འདི་དག་མདོ་སྨད་ཆོས་འབྱུང་དུ་གསལ་བོར་ཡོད།དེ་ཕྱོགས་ཀྱི་ར་རྒྱ་དགོན་གྱི་ས་ཆ་ནི།ཁ་རྒྱུན་ལ།རྨ་ཕ་རི་དྲོ་ལ་ཚུ་རི་དྲོ།།རྨ་དྲོ་དྲོ་ལུ་གུའི་མཁལ་ཁུག་ན།།རླུང་བསིལ་མས་རྩྭ་ཁྲལ་འཇལ་ས།།ཆབ་ཆུ་བོས་ཤིང་ཁྲལ་འཇལ་ས།།གླག་རོག་མོས་ཤ་ཁྲལ་འཇལ་ས།།ཞེས་པ་གླིང་སྒྲུང་དུ་ཡོད་པའི་གླིང་གིས་སྔོན་བཟུང་བའི་ས་ཡིན་ཟེར།།
རྨ་སྨད་དན་ཏིག་མན་ཆོད་ཀྱི་ཟ་ལར་ཁོག་གི་རྨ་ཆུའི་ཉིན་གྱི་ལམ་ཁར་གླིང་གེ་སར་གྱི་མདའ་གཞུ་འཇོག་ས་རེད་ཟེར་བའི་རྡོ་གྲུ་བཞི་མ་ཞིག་དང་།ཆིབས་རྟ་བཞོན་དུས་ཀྱི་ཞབས་སྟེགས་རེད་ཟེར་བའི་རྡོ་གྲུ་བཞི་མ་ཞིག་ཀྱང་འདུགགླིང་གི་རྗེས་ཤུལ་འདི་དགཕལ་ཆེར་རང་གིས་དངོས་སུ་མཐོང་བ་དང་།འགའ་ཞིག་ནི་ཡིད་རྟོན་རུང་བའི་མིའི་ངག་ལས་ཐོས་པ་ཡིན།དེའི་མི་ཚད་མདོ་ཁམས་ཀྱི་ས་ཆ་གཞན་དང་།རྨ་སྟོད་སྨད་བར་གསུམ་དུ་གླིང་གེ་སར་གྱི་དངོས་རྫས་དང་།རྗེས་ཤུལ་མང་པོ་ཡོད་ཟེར་བ་བདེན་མོད།བདག་གིས་ས་ཆ་འགའ་ཞིག་ལ་གོམས་པ་མ་བོར་ཞིང་།ངག་རྒྱུན་འགའ་ཐོས་ན་ཡང་ཁུངས་ལྡན་ཡིན་མིན་ཐེ་ཚོམ་ཅན་རྣམས་ནི་མ་བྲིས།རྨ་སྟོད་སྨད་བར་གསུམ་དབང་དུ་བསྡུས་ཞེས་པ་ནི།རྨ་ཆུའི་ཆུ་མགོ་ནས་བཟུང་སྟེ།ཟ་ལར་ཁོག་ཡར་མར་ནི་དབང་བསྒྱུར་ཡུལ་རྨ་ཆུའི་རྒྱུད་ཡིན་འདུགདེ་ལ་ཕྱིས་སུ་གླིང་གིས་ས་ཆར་ཆ་བགོས་ནས་སྲུང་དམག་འཇོག་ཡུལ་ནི།མཛོད་དགེ་སྟོད་ཡན་ཆད་རྨ་སྟོད་དུ་བརྩི་བ་ཡིན་ཏེ།གླིང་དཀར་སྟོད་ཟེར་བ་ནི་གླིང་གིས་བཟུང་བའི་ས་ཡིན་པས།གླིང་དཀར་དང་རྨ་སྟོད་དུ་བརྩིས་པས།སྟོད་ཟེར་བ་ཡིན་འདུག ར་རྒྱ་དགོན་ཡང་མར་ལ་རྨ་སྐེད་དུ་བརྩི།ཟ་ལར་ཡར་མར་ལ་རྨ་སྨད་དུ་བརྩི།སྤྱིར་རྨ་ཆུ་ནི་ཤར་ཕྱོགས་སུ་བཞུར་ཏེ་རྒྱ་མཚོར་འདྲེས་པས།རྒྱ་ཡུལ་དུ་བཞུར་བའི་རྨ་ཆུ།བོད་རང་གི་སྐད་དུ་རྨ་ཆུའི་མཇུག་ཟེར་ཡང་འདིར་བཤད་པ་ནི་གླིང་གིས་དབང་བསྒྱུར་པའི་སའི་ཆ་བགོས་པ་རེད།འགའ་ཞིག་གིས་རྒྱ་ཡུལ་དུ་བཞུར་བའི་རྨ་ཆུ་ལ་བོད་ཀྱིས་ཀྱང་“ཧྭང་ཧུ”ཟེར།ཞེས་བཤད་པ་ནི་ལོ་རྒྱུས་ཡིག་ཆ་གང་གི་ཐོག་ཏུ་མེད་ལ།བོད་མི་སུའི་ཁ་སྐད་ལའང་མེད་དོ།།
རྒྱལ་རོང་ཁོག་གམ་རྒྱལ་མོ་ཚ་བ་རོང་དུ།ཨ་མྱེ་ཁུར་ཏུང（འདི་ནི་སྒྲ་ཙམ་བྲིས་པ་ཡིན།ཡིག་ཐོབ་ལ་ངེས་པ་མི་འདུག）ཟེར་བ་དེའི་ལོ་རྒྱུས་ཡོད་ཀྱང་།ས་ཆ་སོ་སོར་བཤད་ཚུལ་མི་འདྲ་བ་འདུགལ་ལས་གླིང་གི་སྤྲུལ་བ་ཡིན་ཟེར།ལ་ལས་ཐབ་ལྷ་ཡིན་ཟེར་ནས་ལྷ་སྒྲུང་རིང་བོ་རེ་བཤད་ཀྱིན་འདུག་དེང་སང་ལིས་ཤན་ཟེར་བའི་ས་ཆའི་རྒྱལ་རོང་གི་མིའི་གཏམ་རྒྱུད་ཅིག་ལ།ཨ་མྱེ“ཁུར་ཏུང”ནི་ཁྲོ་ཐུང་རེད།སྔར་ཁོས་ཧོར་དང་གཡུལ་བཀྱེས་པས།ཁོ་ཕམ་ཏེ་ཧོར་དམག་རྒྱལ་རོང་ཁོག་ཏུ་ཁྱབ།ཕྱིས་སུ་གླིང་དམག་གིས་ཧོར་རྒྱལ་རོང་ཡུལ་ནས་ཕུད་པའི་གཡུལ་ལས་ཀྱི་རྒྱལ་ཁ་ཐོབ་པའི་དུས་ཚིགས་དགའ་སྟོན་ནི།ཧོར་ཟླ་བཅུ་གཅིག་པའི་ཚེས་བཅུ་གསུམ་ཉིན་རྒྱལ་རོང་ཡོངས་ལ་བྱད་ཀྱིན་ཡོད།དེ་དུས་སྟོན་རྩ་ཆེན་ཞིག་ཏུ་བརྩི་ལ།རྒྱལ་རོང་གི་ས་ཆའི་མི་སེར་ལ་ལས་དེ་ཅིའི་དུས་སྟོན་ཡིན་མི་ཤེས་ཟེར།ལ་ལས་ཨ་མྱེ“ཁུར་ཏུང”གི་རྗེས་དྲན་ཡིན་ཟེར།ལིས་ཤན་བཀྲ་ཤིས་གླིང་གི་དཔོན་རྒྱུད།དེང་སང་རྔ་བ་ཁུལ་སྲིད་གྲོས་ཀྲུའུ་ཞི་གཞོན་པ།ལོ་དོན་བཞི་ལོན་པའི་ཤེས་ཡོན་ཅན་མིང་ལ་བཀྲ་ཤིས་རྣམ་རྒྱལ་ཟེར་བ་དེས་བཤད་དོན།དེ་ནི་ཧོར་གླིང་འཁྲུགས་སྐབས་རྒྱལ་རོང་ནས་ཧོར་ཕམ།བོད་རྒྱལ་བའི་དགའ་སྟོན་རེད་ཟེར།ཡང་ཁོས་ཟེར་བ།ཁོའི་སྐྱེ་ཡུལ་ཀན་ཕོ་སྡེ་ཤོག་གི་གོམས་སྲོལ་ལ།དུས་སྟོན་དེའི་ཉོན（ཧོར་ཟླ་༡༡ཚེས་༡༣ཉིན）དཔོན་འབངས་མཉམ་དུ་ཚོགས་ནས།དགའ་སྟོན་གཟབ་རྒྱས་བྱེད།གླུ་ལེན།བྲོ་རྡུང་།ཕྱེ་རིལ་སྣུམ་དུ་བཙོས་ནས་དགྲ་བོ་ཧོར་གྱི་མིག་ཡིན་ཟེར་ནས་ཟ།བདག་ཐུག་རིང་བོ་བཙོས་ནས་དགྲ་ཧོར་གྱི་རྒྱུ་མ་ཡིན་ཟེར་ནས་ཟ།ནང་རྩམ་པ་དང་སྣུམ་བསྲེས་ནས་ཕྱི་གྲོ་ཕྱེས་བཏུམ་སྟེ་འཁུར་བ་སྙིང་དང་འདྲ་བ་བཟོས་ནས་ཧོར་གྱི་སྙིང་ཡིན་ཟེར་ནས་ཟ་བའི་སྲོལ་བཅིངས་འགྲོལ་སྔོན་དུས་ཡོད་པ་དང་།དེ་གའི་མི་རྒན་ཚོའི་གཏམ་རྒྱུད་ལ།ཧོར་དམག་རྒྱལ་རོང་ཡུལ་ནས་ཕམ་ཏེ།ཟུང་ཆུ་ཕྱོགས་སུ་བྲོས།དེ་ནས་མཛོད་དགེ་ཕྱོགས་སུ་བྲོས་པ་བཤད་རྒྱུ་ཡོད་ཟེར་བའང་།ཧོར་གླིང་འཁྲུགས་ཕྱོགས་ཀྱི་སྤྱི་བབ་ལ་བལྟས་ན་བདེན་ཤས་ཆེ་སྙམ།
མདོར་ན།གླིང་སེང་ཆེན་གེ་སར་ནོར་བུ་དགྲ་འདུལ་ནི།མི་དངོས་ཡིན་པ།འཁྲུངས་ཡུལ་མདོ་ཁམས་ཡིན་པ་སོགས་ལ་སྔོན་གྱི་མཁས་མཆོག་རྣམས་ལ་འདོད་པ་མི་མཐུན་པ་བྱུང་མ་མྱོང་།ད་ལྟ་མི་རེ་རེས་རང་སྣང་གང་ཤར་རེ་བཤད་ཀྱིན་འདུག་སྙམ་ནས།རང་གི་མཐོང་ཚུལ་ཐོས་ཚུལ།བསམ་ཚུལ་ཅུང་ཟད་རེ་རྣམ་གཡེང་གི་ཁ་སྣོན་དུ་མཁོ་མེད་པཎ་རྒན་མགོ་སེ་དེས་བྲིས་པ་ལགས་སོ།།།།
༄༅། །གླིང་གེ་སར་དང་དེའི་འཁྲུངས་ཡུལ། སེར་བོ་ཧོར་དང་ནག་པོ་བདུད་སོགས་ཀྱི་སྐོར།
རྩོམ་པ་པོ། སུམ་པ་ཡེ་ཤེས་དཔའ་འབྱོར།
ད་ལྟར་རྒྱ་བོད་ཧོར་ཡུལ་ཀུན་ཏུ་གེ་སེར་རྒྱལ་པོའི་སྒྲུང་ཞེས་སྙན་ངག་གི་རབ་རྟོག་སོགས་ཀྱི་ལམ་ནས་དྲངས་སམ། གང་ལྟར་ཡང་མི་ཕལ་བ་ཞིག་ཡིན་ལ་ཁད་ལ་དེ་མིན་འདྲ་སྤྲུལ་བ་སྣ་ཚོགས་བྱས་འགྲན་མང་དུ་བཤད་པ་ལ་ཡིད་རྟོན་དཀའ་ལ། དེ་ལྟ་ན་ཡང་གེ་སར་དེ་ནི་སྤྲུལ་བ་དང་ཐ་མལ་བ་གང་ཡིན་གྱི་ཚོད་ཚུ་རོལ་མཐོང་བ་སུས་ཀྱང་ཟིན་དཀའ་བས། 【རྗེ་དགེ་རྒྱམ་པ་དེའི་སྤྲུལ་འདྲ་རྣང་ན་ཡོད་དཾ། པདྨའི་ལུང་ན་ནི་རླང་བྱང་ཆུབ་དེའི་བླ་མ་ཟེར་མི་སྔའཾ】འདིར་ཕལ་བ་ཐུན་མོང་ལ་གྲགས་ཙམ་ངོ་ཏེ་ཞུ་ན། གེ་སར་དེ་སྐྱེས་ཡུལ་ནི། བར་ཁམས་སྟོང་མས་ནས་ཡར་ལ་རྨ་ཆུ་རྫ་ཆུ་འབྲི་ཆུ་གསུམ་ཡོད་པའི་ནང་ནས། བར་བ་རྫ་ཆུ་ལ་སྐྱིའི་གཞུང་དང་ཚུ་ལུང་བའི་ཆུ་གཉིས་དང་གསུམ་འདུས་ཀྱི་མདོ་ཡིན་ཞིང་། དེ་ནི་སྡེ་དགེའི་ཕོ་བྲང་གི་གཡོན་དངོས་ཀྱི་སྡེ་དགེའི་སའི་ཆར་གཏོགས་ལ། དེ་སྐྱེས་ས་དངོས་ནི་ཕུ་ན་མཚོ་ཆུང་མེ་ལོང་འདྲ་བ་དང་མདོ་ན་ཆུ་གཉིས་འདུས་པ་དང་བྲག་རི་ཆུང་ངུར་ཟུར་བཞི་བ་ཡོད་པའི་བར་དུ་སྤང་ཐང་གདན་བཏང་མཚུངས་ཡོད་དེ། དེ་ན་ལྗོན་པ་ཆིག་སྐྱེས་དང་དེའི་ཕ་མའི་རེ་སྦྲ་ཕུབས་ཤུལ་གྱི་བྲག་ལེབ་ཡོད་ཅིང་གནས་དེ་ལ་སྐྱིད་ཉི་མ་ཀུན་འཁྱིལ་ཟེར་སྐད། གནས་དེའི་སྟོད་དུ་ཁང་ཆེན་ལུང་བའི་ཆུ་དང་ཡག་ཉེའི་ཆུང་དང་རྫ་ཆུ་གསུམ་འདུས་མདོར་སྟག་རིའི་མདུན་ན་རི་ཆུང་སྙིང་འདྲ་བ་དང་། དེའི་གཤམགྱི་རྫ་རི་ཆེན་པོའི་ཕུ་ན་གོམ་པར་ཚ་ཞེས་པའི་གཞི་གཉན་པོ་ཡོད་པའི་རྫ་པོའི་མདུན་དུ་གེ་སར་གྱི་ཕུ་ནུ་སུམ་ཅུའི་རྡོ་སྤུངས་སུམ་ཅུ་ཡོད་ཟེར་རོ། གེ་སར་གྱི་རུས་ནི། བར་ཁམས་ཀྱི་སྡེ་དགེའི་ཡུལ་ན་ཡོད་པའི་གླིང་བ་དང་འདན་སྡེ་ཆེན་གྱི་ནང་གི་གླིང་བའི་སྡེ་གཅིག་ཡིན། དེང་སང་གླིང་བ་སྡེ་དགེའི་མངའ་འོག་མིན་ལ་འདན་ཡིན་ནོ། ། དེ་ལ་གེ་སར་ནི། ཕ་སེང་བློན་དང་མ་འགོག་རུས་ཀྱི་བུར་སྐྱེས་ལ། དེ་ཡང་ལ་ལས་སྔར་གླིང་བ་དང་འདན་གྱི་སྡེ་ནི་ཆོམ་པོས་ཡང་ཡང་བཅོམ་ཚེ་ཡུལ་མི་རྣམས་ཀྱིས་རང་ཡུལ་གྱི་རི་གཉན་ཞིག་གི་གཞི་བདག་ལ་བསང་མཆོད་རྒྱུན་དུ་ཕུལ་ཏེ་འཕྲིན་ལས་བཅོལ་བས་གཞི་བདག་དེའམ་དེའི་སྤྲུལ་བ་ཞིག་གེ་སར་དུ་སྐྱེས་ཏེ། དེ་འདྲ་སྲིད་པ་ནི་དཔེར་ན་ད་ལྟར་ཡང་མདོང་ནག་གི་ཡུལ་གྱི་རི་གཉན་ཞིག་ལ་རྒྱུན་དུ་སྡོད་པའི་འབྲོག་པ་ཞིག་གི་བུད་མེད་ལ་གནས་དེའི་གཞི་བདག་གི་བུ་སྐྱེས་པའི་ཚ་བོ་འཇམ་དབྱངས་རབ་འབྱམས་པ་ཞེས་པ་སྐྱ་སེར་བདག་གིས་མཐོང་བ་ལྟར་རོ། ། དེ་ནས་གེ་སར་སྐྱེས་ནས་མི་རིང་བར་ཁོ་རང་གི་ཨ་ཁུ་ཐུང་གིས་རྨ་ཆུའི་མགོའི་མཚོ་སྐྱ་རངས་སྔོ་རངས【དུག་མཚོ】དང་ཉེ་བའི་ལྷ་ལུང་གཡུ་མདོར་བསྐྲད་པ་དེར་གཞི་བཟུང་ནས་བསྡད་དེ་དཔའ་རྩལ་ཅན་དུ་གྱུར། ཡུལ་དེར་གེ་སར་གྱི་མཛོ【མཛོ་ཁྲ་སྟེང་ཞེས་པ】འདོག་ས་ཟེར་པའི་རི་ཆུང་དེ་དང་མི་རིང་བར་ཧོར་དམག་གིས་སྒར་གདབས་ཟེར་བའི་ཐང་ཆེན【ཨབ་ཕྱི་དུག་ཐང་ཞེས་པའི】པོ་ཞིག་འདུག་ཅེས་རྒྱལ་དབང་ལྔ་བའི་རྣམ་ཐར་ཀ ༨༡བར་ཡང་གསུངས་སོ། ། གེ་སར་དེ་ནི་མི་སྟོབས་རྩལ་ཆེ་ལ་བློ་རྒོད་པ་ཞིག་ཡིན་འདུག ཆུང་མ་མེ་བཟའ་འབུམ་སྐྱིད་དང་གླིང་སྐྱ་ལོའི་བུ་མོ་འབྲུག་མོ་སྐྱིད་ཟེར་བ་ཆེན་ཆུན་གཉིས་བླངས། གེ་སར་གྱི་གློ་རྟ་ལ་རྐྱང་རྒོད་གཡེར་བ་ཟེར། གེ་སར་དེས་ཕྱིས་སུ་བཏུལ་བའི་བདུད་དུ་གྲགས་པ་ནི་ལྷ་སའི་བྱང་ངོས་ཀྱི་གནམ་མཚོ་ཕྱུག་མོའི་ཕྱོགས་སུ་ཡོད་པའི་གྲེ་བ་ནག་ཚང་གི་སའི་ཆར་གཏོགས་གུ་རུ་དང་མོན་ར་ཞེས་པའི་ས་མཚམས་སུ་སྐྱེས་པའི་མི་དཔའ་བོ་སྟོབས་རྩལ་ཆེ་བ་ཞིག་ཡིན་ལ། དེ་སྐྱེས་ཡུལ་གྱི་ནག་ཚང་པ་ལ་བདུད་ཀྱི་རུ་སྡེ་ཟེར། མི་དེ་ལྷ་སའི་ལྷོ་ངོས་ཀྱི་ཀོང་པོའི་ཕྱོགས་སུ་ཕྱིན་པ་ན། ཡུལ་དེ་ན་ཆུ་མགོ་ཞིག་ཡོད་པའི་ཆུ་ལ་དུག་ཆུའམ་འཐོམ་ཆུ་ཞེས་པ་སུས་འཐུང་ཡང་སྨྱོས་མ་སྨྱོ་སུ་འགྱུར་བ་ཞིག་ཡོད་པའི་ཆུ་དེ་དང་ཉེ་བའི་མི་ཕྱུགས་ཐམས་ཅད་ར་རོ་ཡོད་སྐད། མི་དེས་ཆུ་དེ་འཐུང་བ་དང་ཡུལ་དེར་བདུད་ཀྱི་བླ་རི་ཧ་ཤང་རྩེ་དགུ་ཟེར་བ་ཡོད་པའི་དབུས་སུ་མཚོ་ཆུང་གསུམ་ཡོད་པའི་ཆུ་རྒྱུན་ནམ་ཞིག་འདུས་པ་ན་བདུད་སྐྱེས་ཞེས་གྲགས་ལྟར་དུ་མི་དེས་དུག་ཆུ་འཐུང་ཞིང་མཚོ་གསུམ【རྨ་མཚོ་དམེ་མཚོ་སོགས་སོ】གྱི་ཆུ་རྒྱུན་དེ་དུས་འདུས་ནས་མི་དེ་མི་ཡུལ་གྱི་བདུད་དུ་གྱུར་རམ་སྙམ། དེ་ནས་དེ་【ལྷ་ས་བྱང་ཤར】འདམ་དུ་ཕྱིན་པས་ཤ་བའི་རྭ་དང་རུས་པས་མཁར་བརྩེགས་པའི་བདུད་མཁར་ཤ་རྭ་གནམ་རྫོང་ཞེས་པར་བསྡད་དེ་ཇག་བྱེད། བར་སྐབས་ཤིག་ཇག་བྱེད་ཞོར་ལ་གླིང་བའི་ཡུལ་དུ་འོང་ནས་གེ་སར་རི་དྭགས་བཤོར་བའམ་ཇག་བྱེད་པར་ཡུལ་གཞན་དུ་ཕྱིན་སྐབས་ཤིག་དང་ཐུག་ནས་གེ་སར་གྱི་བུད་མེད་མེ་བཟའ་འབུམ་སྐྱིད་དང་ནང་མི་ཕྱིར་སྔོན་ཅན་གཉིས་སོགས་འཕྲོག་ནས་སོང་། གེ་སར་རང་ཡུལ་དུ་ཐོན་ཏེ་གཏམ་དེ་ཐོས་ནས་ཇག་བྱེད་བཞིན་དུ་བདུད་ཀྱི་ཡུལ་གྱི་གཤེད【བཤེག】ཆུ་ཁམས་པ་བརྒལ་ཏེ་ཕྱིན་ནས། བདུད་དེ་ཇག་ལ་སོང་ཤུལ་དུ་སླེབས་ཚེ་མེ་བཟའ་འབུམ་སྐྱིད་དང་ཐུག་ནས་མེ་བཟས་གེ་སར་ས་དོང་ཞིག་ཏུ་སྦས་ཏེ་བདུད་འགུམ་ཐབས་སྨྲས། བདུད་རང་ཡུལ་དུ་སླེབས་ནས་མཚན་མོ་གཉིད་ལོག་པའི་ཕྱི་ཉིན་ཉི་མ་རྩེ་ཤར་དུ་བལྟས་པས་བདུད་ཀྱི་སྣ་ཁུང་ནས་སྦྲུལ་དཀར་ནག་གི་རྣམ་པ་གཉིས་བྱུང་ནས་གདོང་ངོས་སུ་འཐབ་སྟེ། སྦྲུལ་ནག་བདུད་ཀྱི་བླའམ་ལྷན་སྐྱེས་འདྲེ་དེ་འབྲལ་བར་ཁྱིལ་ཚེ་གར་སར་གྱིས་མདའ་འཕངས་ཏེ་【རྨ་མཚོ་དམེ་མཚོ་སོགས་སམ】སྦྲུལ་འདྲ་བ་དང་བདུད་དུས་གཅིག་ལ་བསད་ནས། གེ་སར་ལོ་དགུའི་བར་དུ་མེ་བཟའ་དང་ལྷན་དུ་བདུད་ཡུལ་དུ་བསྡད་ཟེར། བར་【དུས】དེར་ཧོར་རྒྱལ་གུར་དཀར་གུར་ནག་གུར་སེར་གསུམ་གྱི་ཇག་དམག་གླིང་བའི་ཡུལ་དུ་ཕྱིན་ནས་གེ་སར་གྱི་མེས་པོ་བརྒྱད་ཅུ་ཞལ་དཀར་དང་གླིང་གི་ཕུ་ནུ་སུམ་ཅུ་སོགས་བཀུམ་སྟེ། ཨ་ཁུ་ཁྲ་རྒན་དང་འབྲུག་མོ་སོགས་ཁྱེར་ནས་འོངས་ཏེ་འབྲུག་མོ་སྐྱིད་གུར་དཀར་རྒྱལ་པོའི་བཙུན་མོར་བླངས་སོ། དེ་ལ་ཧོར་ཡུལ་ནི་གླིང་བ་དང་ཧ་ཅང་ཐག་མི་རིང་སྟེ། དེ་ཡང་འབྲུ་ཆུའི་རབ་བདུན་གྱི་གཡོན་ངོས་ཀྱི་ཆུ་དམར་སྟོད་ཀྱི་ཨ་ཆེན་ལུང་བའི་ཕུའི་གངས་ཆགས་དཀར་པོ་ཞེས་པའི་གངས་རིའི་སྨད་དུ་རྫ་རི་ཆེན་པོ་ཞིག་ཡོད་པའི་འདབས་སུ་ཧོར་གུར་དཀར་རྒྱལ་པོའི་ཡ་རྩེ་མཁར་དམར་ཡོད་ཅིང་། ད་ལྟ་ཡང་མཁར་ཤུལ་གྱི་རྩིག་པ་ཞིག་ལ་སྔར་གེ་སར་གྱིས་ལྕགས་ཐག་གཟར་ནས་བབས་པའི་ལྕགས་ཐག་དུམ་བུ་【བཙའ】དམར་པོའང་སྣང་ཟེར། རྫ་རི་དེའི་རི་སུལ་འགའ་ཞིག་ན་སྔར་ཧོར་དམག་བསད་པའི་གྲི་འདྲེ་ཡིན་ཟེར་བའི་མི་མིན་གྱི་ཆོ་འཕྲུལ་ལྟ་བུ་ཡོད་པས་ད་ལྟ་ཡང་མཚན་མོ་མི་ཕལ་བ་སུ་ཡང་འགྲོ་མི་ནུས་ཟེར་བའི་གཏམ་མཐོང་ཐོས་ཀྱི་མི་ལས་ཐོས། བདུད་ཡུལ་ནས་གེ་སར་རང་ཡུལ་དུ་ལོག་ཚེ་ཧོར་དམག་གིས་གླིང་བཅོམ་པའི་གཏམ་མཐོང་ཐོས་ལ་བརྟེན་ནས་གེ་སར་གྱིས་གླིང་བའི་དམག་དཔུང་ཆེན་པོ་ཁྲིད་དེ་ཡ་ཙེ་མཁར་དམར་དུ་ཕྱིན་ནས་གེ་སར་གྱིས་ལྕགས་ཐག་གཟར་ཏེ་མཁར་ནང་དུ་བབས་ནས་སྒོ་ཕྱེས་ཏེ་དམག་འཚང་ནས་ཧོར་རྒྱལ་དང་དམག་མང་པོ་བསད་སྐབས་སུ་ཧོར་དམག་ལས་དཔའ་རྩལ་ཅན་ཡ་བ་སྐྱ་བདུན་འཁོར་བཅས་སོགས་ཤོར་ཟེར། གེ་སར་གྱིས་ཨ་ཁུ་ཁྲ་རྒན་དང་འབྲུག་མོ་ཁྲིད་ནས་རང་ཡུལ་དུ་ལོག ། ཕྱིས་གེ་སར་འདན་གྱི་ཡུལ་དུ་ཕྱིན་སྐབས་ཤིག་ཏུ། འདན་གྱི་ཁྱིས་དེད་པས་རྟ་བཀྲོགས་ནས་འཕངས་སྟེ་དུས་ལས་འདས་སྐད། དེ་ནས་བཟུང་སྟེ་འདན་མས་གེ་སར་གྱི་སྟོང་མཇལ་དགོས་བྱུང་ལ། དེ་ལ་ལོ་རེ་བཞིན་གླིང་བ་ལ་ཁྲལ་ལྟ་བུ་རེ་སྟེར་བ་དང་། ཡང་འདན་གྱི་སའི་ཆ་ན་ཡོད་པའི【ཐང་ཆུང་བུ】ལྷ་ཁང་ཞེས་པར་རྡོ་སྤུངས་ཆེན་པོ་ཞིག་ཡོད་པ་ལ་ད་ལྟའི་བར་དུ་ལྡན་མས་རྡོ་རེ་ལ་མ་ཎི་རེ་བྲིས་པ་སྟོང་ལོ་རེ་བཞིན་བསྣན་ན་ཡུལ་དེར་བཀྲ་ཤིས་ཟེར། དེའི་རྒྱུ་མཚན་གྱིས་ཡུལ་དེ་རུ་གེ་སར་གྱི་སྟོང་མཇལ་བ་ལ་ཚར་རྒྱུ་མེད། ལྡན་མའི་རྒྱུ་ཆས་ལ་འཛད་རྒྱུ་མེད་ཟེར་བའི་དཔེ་འཐེན་ནོ། ། དེ་དུས་ཀྱི་གླིང་འདན་དང་བདུད་ཡུལ་གྱི་མི་དང་ཧོར་མི་རྣམས་ལ་ཐུན་མོང་གི་སྤྱི་རྒྱལ་ཆེན་པོ་དང་སྤྱི་ཁྲིམས་དམ་པོ་མེད་པས་རང་རང་གང་དྲན་བྱེད་པ་དང་། དེ་དུས་ཀྱི་མི་དེ་རྣམས་རང་བཞིན་དྲངས་ཞིང་དཔལ་རྩལ་ཆེ་པའི་ང་རྒྱལ་གྱིས་ཕན་ཚུན་ཇག་བྱེད་རེས་ཀྱིས་འཁྲུག་པ་བསླང་རེས་བྱས་པ་ཡིན་པ་འདྲ། སྔར་སྨོས་ཨ་ཆེན་གངས་ཆགས་དཀར་པོ་དང་རྫ་རིའི་གཤམ་གྱི་ཡ་རྩེ་མཁར་དམར་གྱི་ཤུལ་དང་ཉེ་བར་གུར་དཀར་རྒྱལ་པོའི་སྡེ་ལྷག་དང་ཡ་བ་སྐྱ་བདུན་སོགས་ཀྱི་མི་རྒྱུད་ཡོད་ལ། དེ་དག་གི་རེ་སྦྲའི་ནང་གི་ཕུགས་སུ་ཀ་བ་ཕྲ་མོ་ཞིག་གི་རྩེར་ཤིང་འཕྲེད་ཆུང་བ་ཅན་བཙུགས་པ་ནིས་སྔར་གེ་སར་གྱིས་ཧོར་བཅོམས་ཏེ་རྒྱལ་ནས་རེ་སྦྲ་ལ་གཡག་སྒ་བསྟད་པའི་དོད་ཟེར། ཡང་མཚོ་སྔོན་གྱི་བྱང་ངོས་ཞག་ལམ་བདུན་བརྒྱད་ཀྱི་ས་ན། བཱ་སྟོང་དང་ཤུག་ཤའི་ཆུ་ནས་བཟུང་སྟེ་རྒྱའི་སུ་གྲུ་མཁར་གྱི་ཚུན་བར་ལ་ཧོར་གུར་སེར་གྱི་རུ་སྡེའི་རྒྱུད་པའམ་ཤ་ར་ཡུ་གུར་ཟེར་བའི་སྡེ་ཚོ་བརྒྱད་སྐད་ཧྭོ་ཐོན་དང་འདྲ་སེ་ཆ་ལུགས་རྒྱ་བོད་ཧོར་སོགས་གང་ལའང་ཅུ་ཟད་མི་འདྲ་བ་སྣང་། དེ་ལ་འབན་ངྷ་ཧོར་ཟེར། སྡེ་དེའི་རེ་སྦྲའི་རྐེད་ན་རེ་ནག་བྱང་གཅིག་འཕྲེད་དུ་འཇོག་སྲོལ་ཡོད་པ་ནི་སྔར་གེ་སར་གྱིས་ཧོར་བཅོམས་སྐབས་སྦྲ་རལ་གྲིས་བཅད་པའི་རྟགས་ཟེར། ཨ་ཆེན་གྱི་གཞུང་དང་མཚོ་སྔོན་སྟོད་ཀྱི་ཧོར་གཉིས་ཀ་ན་སྔར་གླིང་བ་དང་འཐབ་ནས་བསད་པའི་གྲེ་འདྲེ་པེ་དཀར་པོ་སེར་རྒྱལ་པོ་སོགས་ཀྱི་འཁོར་དང་དེའི་རྒྱུད་པ་ལྷ་འདྲེས་སུ་སྐྱེས་པ་ད་ལྟར་ཡང་མངོན་སུམ་ལྟར་རྒྱུ་ཞིང་། ཡུལ་དེ་དག་ཏུ་གེ་སར་གྱི་སྒྲུང་བཤད་པ་དང་རྟ་རྐྱང་ཞུར་ཞོན་ནས་སོང་ན་ལྷ་འདྲེས་འཚེ་བར་འདུག་གོ ། ད་ལྟར་ཁམས་ཆབ་མདོ་སོགས་ན་གླིང་བའི་ཕུ་ནུ་སུམ་ཅུ་སོགས་ལས་འགའ་ཞིག་གཞི་བདག་ལྟ་བུར་སྐྱེས་པ་ལུས་ཁོག་ལ་ཞུགས་ནས་ལུང་སྟོན་བྱེད་ཟེར། དེ་བཞིན་དུ་ཡུ་གུར་གྱི་ཡུལ་སོགས་ནའང་གུར་རྒྱལ་དང་དཔའ་བོ་སོགས་ཀྱིས་ལ་ལ་ལྷ་འདྲེར་སྐྱེས་པ་ལྷ་བ་ལ་བབ་པ་འདུག་གོ ། གེ་སར་སྐྱེས་པ་ཧ་ཅང་མི་སྔ་སྙམ་སྟེ། ཆབ་མདོའི་ལྷོ་གཡུ་ཕུགས་ཀྱི་ལྷ་ཁང་ན་གེ་སར་གྱི་ཡུལ་ཤེར་ཕྱིན་པོ་ཏི་གཉིས་རེ་ཁལ་རེ་ལོངས་པ་ཆེན་པོ་ཞིག་ཡོད་པ་དང་། གེ་སར་དང་ཨ་མེས་དང་ཕུ་ནུ་སུམ་ཅུའི་རལ་གྲི་ད་ལྟའི་རལ་གྲི་ལས་ཅུང་ཟད་ཆེ་ཙམ་ཡོད་པ་མཐོང་བའི་མི་ལས་ཁོ་བོས་ཐོས། གཞན་དབུས་གཙང་གི་ལྷ་ཁང་འགའ་ཞིག་ནའང་གེ་སར་གྱི་ཞྭ་དང་མདའ་སོགས་སྣང་ཟེར། གང་ཞུས་དེ་དག་སྡེ་དགེའི་རྒན་པོ་དག་གི་ངག་ལས་ཐོས་པས་ལ་ལ་མ་ངེས་ཀྱང་ཕལ་ཆེར་མཐུན་པར་འདུག་ལགས་ཞེས་ཞུས་པའོ། །（《ནང་དོན་ཐ་སྙད་རིག་གནས་ཀྱི་གཞུང་གི་དོགས་གནས་འགའ་ཞིག་དྲིས་པའི་ལན་ཕྱོགས་གཅིག་ཏུ་བྲིས་པ་རབ་དཀར་པ་སངས》སྣ་རིང་མའི་ཤོག་གྲངས་༡༣-༡༦ནས་བཤུས། །）
ད་དུང་གེ་སར་སྐོར་ནས་མཁྱེན་འདོད་ན་ཁ་བྱང་འདིའི་སྟེང་ཕེབས།
http://219.239.12.26/za/2009-07-03-11-32-05/gser/3817-2009-12-04-10-06-30?view=article&id=3817:2009-12-04-10-06-30&catid=129:gser
བསམ་ཚུལ་འབྲི།
སྡེ་དགེ་རྒྱལ་པོའི་ཕྱག་ཐམ་སྡིག་ཐམ་སྐོར།