གླིང་གེ་སར་ཟེར་བའི་མི་ཞིག་ཡོད། ཁམས་སྡེ་དགེ་ཟེར་བའི་ས་ཞིག་ཡོད།
བོད་ཀྱི་ལོ་རྒྱུས་སྙན་རྩོམ་རིང་མོ་གླིང་རྗེ་གེ་སར་རྒྱལ་པོའི་སྒྲུང་ནི། ལོ་རྒྱུས་སྔོན་མོའི་ཆུ་ལས་ཀྱང་རིང་བའི་བོད་ཀྱི་དམངས་ཁྲོད་སྙན་ངག་གི་བརྩམས་བྱ་གལ་ཆེན་ཞིག་སྟེ། སྙན་རྩོམ་རིང་མོ་དེ་ལ་ཁག་དབྱེ་བྱས་ན་བབས་སྒྲུང་། བརྩམས་སྒྲུང་། གཏེར་སྒྲུང་། ཁ་སྒྲུང་བཅས་རིགས་ཆེན་པོ་བཞི་ཡོད། དེ་ལས་ཀྱང་ཡ་མཚན་ཤོས་ཤིག་ནི་བབས་སྒྲུང་སྟེ། རིག་གནས་གཞན་དག་ལྟ་ཞོགས། ཐ་ན་ཀ་ཁ་ཙམ་ཡང་མི་ཤེས་པའི་བོད་མདོ་དབུས་མཐོ་སྒང་གི་ཞིང་འབྲོག་མི་སེར་དཀྱུས་མ་དག་ལ་ཆུ་རྒྱུག་རྒྱུག་གི་གླིང་སྒྲུང་ཡ་མཚན་པ་བབས་རྒྱུ་ཡོད་པ་དེ་རེད། བབས་ཞེས་པའི་བྱེད་མེད་ལས་ཚིག་འདིས། གླིང་སྒྲུང་བཤད་པ་པོའི་གང་ཟག་དེས་ཆེད་དུ་སྦྱངས་པ་དང་རྩོལ་བ་ལ་མི་ལྟོས་པར། གླིང་ལྷའི་མཐུ་བྱིན་ནམ་ཡང་ན་སྔོན་གྱི་བག་ཆགས་སད་སྟོབས་ལྟ་བུས་གླིང་སྒྲུང་གང་ཞིག་དང་གླིང་སྒྲུང་གང་ཞིག་ནང་གི་དུམ་ཚན་གང་ཞིག་བཤད་དགོས་ནའང་ཐོགས་པ་མེད་པ་བཤད་ཤེས་པར་མཚོན་གྱིན་ཡོད། དེ་ལ་བལྟས་ན་འཛམ་གླིང་ཐོག་ཆེས་རིང་ཤོས་ཡིན་པའི་ལོ་རྒྱུས་སྙན་རྩོམ་རིང་མོ་གླིང་རྗེ་གེ་སར་རྒྱལ་པོའི་སྒྲུང་ནི་སྒྲུང་གཏམ་ཙམ་ལས་བརྒལ་ཏེ་མི་མ་ལྷ་ཡི་སྐྱེས་བུ་ཞིག་གི་སྐུ་ཚེའི་ལོ་རྒྱུས་ཀྱི་མུ་ཏིག་སིལ་མ་སྟར་རྡང་གཅིག་ལ་བརྒྱུས་པའི་དངོས་ཡོད་ཀྱི་སྒྲུང་གཏམ་ཡ་མཚན་པ་ཞིག་རེད་ཅེས་བཤད་ནའང་མི་ཆོག་པ་ཅི་ཡོད་སྙམ། དེ་ལྟར་གོ་རིམ་ལྡན་ཞིང་མུ་འབྲེལ་རང་བཞིན་གྱི་རླབས་ཆེན་སྒྲུང་གཏམ་རིང་མོ་དེ་དུས་རབས་ནམ་ཞིག་ནས་དར་མགོ་ཚུགས་པ་རེད་ཅེ་ན། འདི་ནི་བཤད་དཀའ་བའི་གནས་ཤིག་སྟེ། དེ་སྔོན་གེ་སར་རིག་གནས་ལ་ཞིབ་འཇུག་གནང་མཁན་གྱི་མཁས་དབང་སུ་གཅིག་གིས་ཀྱང་ཧ་ལམ་གཏན་གཏན་བཤད་མ་ཤེས་པ་ལྟ་བུར་ཆགས་བསྡད་ཡོད། ཉེ་བའི་ཆར་མཁར་རྨེའུ་བསམ་གཏན་གྱིས་བརྩམས་པའི་མདའ་དང་འཕང་ཞེས་པའི་དཔྱད་རྩོམ་བོད་འགྱུར་མའི་ནང་དུ། སྙན་རྩོམ་རིང་མོ་འདི་དར་འགོ་ཚུགས་དུས་ནི་སྤྱི་ལོའི་དུས་རབས་བཅུ་གཅིག་པའི་ནང་དུ་ཡིན་པ་དང་། གེ་སར་སྒྲུང་གི་དངོས་ཡོད་ནང་དོན་རྣམས་ཆ་ཡོངས་སུ་རྫོགས་པའི་དུས་ཚོད་ནི་དུས་རབས་བཅོ་ལྔ་པའི་ནང་དུ་སྟེ། དུས་རབས་ལྔ་ཙམ་གྱི་རིང་ལ་མཐའ་ཡི་དགྲ་བཞི་བཏུལ་ཞིང་རྫོང་ཆེན་བཅོ་བརྒྱད་དང་རྫོང་ཕྲན་མང་པོ་ཕབས་པའི་གེ་སར་སྒྲུང་གི་བརྗོད་བྱ་ཕལ་ཆེ་བ་རྩ་བའི་ཆ་ནས་སྐྱེས་ཤིང་འཚར་ལོངས་བྱུང་ཐུབ་ཡོད་པར་བཤད་ཡོད། ངས་བལྟས་ན་བོད་ཀྱི་རྒྱལ་རབས་དང་ཆབ་སྲིད་ཀྱི་ལོ་རྒྱུས་རིང་མོ་ལ་དུས་རབས་ཀྱི་རིག་གནས་དང་ཁོར་ཡུག་མི་འདྲ་བའི་དབང་གིས་འཕོ་འགྱུར་མང་པོ་ཞིག་བྱུང་ཡོད་པ་ནང་བཞིན། བོད་སྲིད་པ་ཆགས་པའི་རིག་གནས་སྒྲུང་ལྡེའུ་བོན་གསུམ་གྱི་ནང་བསེས། བོད་ཀྱི་ལོ་རྒྱུས་སྒྲུང་གཏམ་རིང་མོ་ལའང་དུས་རབས་དང་རིག་གནས་ཁོར་ཡུག་མི་འདྲ་བའི་དབང་གིས་རྣམ་པའི་ཆ་ནས་འཕོ་འགྱུར་མང་པོ་ཞིག་བྱུང་ཡོད་པ་ལས། ངོ་བོའི་ལོ་རྒྱུས་ཀྱི་ཐོག་ནས་བཤད་ན་ལོ་རྒྱུས་ཀྱི་དུས་ཡུན་དེ་དེ་ལས་ཀྱང་ཆེས་འགོངས་ཡོད་པར་སེམས་བཞིན་ཡོད། དེ་འདྲའི་གེ་སར་སྒྲུང་གཏམ་རིང་མོ་དེ་ཆགས་གྲུབ་བྱེད་སའི་ལྟེ་བ་ལྟ་བུ་ནི་གཙོ་བོ་བོད་ཁམས་ཁུལ་གྱི་ས་ཆ་ཁག་འགའ་སྟེ། མཚོ་སྔོན་ཡུལ་ཤུལ་དང་ཟི་ཁྲོན་སྡེ་དགེའི་ས་ཆ་ཁག་འགའ་ཡིན། སྲོལ་རྒྱུན་ཐོག་ས་ཆ་དེ་དག་ཏུ་ལོ་རྒྱུས་སྒྲུང་གཏམ་རིང་མོ་འདི་ཉིད་ས་འབུས་རྡོ་འབུས་དང་ས་ཁྱབ་རྡོ་ཁྱབ་ལྟ་བུར་བྱུང་ཡོད་པའི་དཔང་རྟགས་ལྟ་བུའི་ལོ་རྒྱུས་དང་དོན་དངོས་ཀྱི་རྒྱབ་ལྗོངས་མང་པོ་ཡོད་དེ། དེའང་གླིང་གེ་སར་རྒྱལ་པོ་དང་པོར་སྐྱེ་ས་དེ་ཁམས་དཀར་མཛེས་ཁུལ་སྡེ་དགེ་ཨ་ཕྱུག་རྩྭ་ཐང་ཡིན་པ་དང་། བར་དུ་སྐྱེས་ནས་འཚར་ས་དེ་མགུ་ལོག་རྨ་སྟོད་རྫོང་དུ་ཡིན་པ། ཐ་མ་འདས་ནས་དུར་འཇུག་བྱེད་ས་དེ་ཡུལ་ཤུལ་ཁུལ་ནང་ཆེན་རྫོང་བྱང་རྟ་རྣ་དགོན་ཡིན་པ། གེ་སར་རྒྱལ་པོའི་གཏན་གྲོགས་གླིང་སེང་ལྕམ་འབྲུག་མོའི་ཕ་ཡུལ་སྒ་སྐྱ་ལོ་ཕྱུག་གི་སྡེ་པ་དེ་ཡུལ་ཤུལ་ཁུལ་འབྲི་སྟོད་རྫོང་ཁོངས་སུ་ཡོད་པ་ཡོངས་སུ་གྲགས་པ། ད་དུང་གླིང་གི་ལོ་རྒྱུས་ཆུ་རྒྱུན་རིང་མོའི་བརྗོད་བྱའི་ཐད་གནས་བབས་གལ་ཆེན་བཟུང་ཡོད་པའི་རྟ་རྒྱུག་རྒྱལ་འཇོག་ཅེས་པ་དེ་བྱེད་སའི་གནས། རྟ་མགོ་གང་ལ་གཏད་སའི་ཡུལ་གུ་ར་རྫ་ཞེས་པ་དེ་ཡུལ་ཤུལ་ཁུལ་ཆུ་དམར་ལེབ་རྫོང་རྨ་སྟོད་ཡུལ་ཚོ་ན་ཡོད་པའི་གུ་ར་རྫ་ཟེར་བ་དེ་ཡིན་པ། མཆན། ཁ་ཤས་ཀྱིས་གུ་ར་རྫ་དང་ཨ་ཡུ་དིལ་སོགས་རྟ་རྒྱུག་སྒྲུང་གཏམ་གྱི་ནང་དུ་འཁོད་པའི་ས་མིང་ཡུལ་མིང་ཆ་ཚང་དེ་སྡེ་དགེ་ཨ་ཕྱུག་རྩྭ་ཐང་ལ་ཡོད་རེད་ཅེས་བཤད་མཁན་ཡང་ཡོད། དེ་ཙམ་མ་ཟད་གེ་སར་སྒྲུང་གཏམ་ནང་དུ་འཁོད་པའི་སྤྱི་ཚོགས་ཀྱི་རྣམ་པ་དང་འཚོ་བའི་སྣང་ཚུལ་ཚང་མ་བོད་ཁམས་ཁུལ་གྱི་སྤྱི་ཚོགས་སྣང་ཚུལ་དངོས་ཡིན་པ་སོགས་ཀྱིས་ཀྱང་ཤེས་ཐུབ། གང་ལྟར་མིང་དང་དོན་མཚུངས་པའི་གླིང་སྒྲུང་ནང་གི་ས་ཆ་མང་ཆེ་བ་ཁམས་ཁུལ་གྱི་ས་ཆ་ཁག་ལ་ཡོད་པས།ས་ཆ་དེ་དག་ལྟེ་བ་བྱས་ཏེ་དེ་ནས་རིམ་གྱིས་བོད་ཁུལ་གྱི་ས་གནས་ཁག་ལ་གླིང་སྒྲུང་རིག་གནས་དར་བས་མ་ཚད། བོད་ཁུལ་ཙམ་ལས་ཡོངས་སུ་བརྒལ་ཏེ་སོག་པོ་སོགས་རྒྱལ་ནང་གི་ཞིང་ཆེན་གཞན་དང་མི་རིགས་གཞན། དེ་བཞིན་ལ་དྭགས། འབྲས་ལྗོངས། ཨུ་རུ་སུ་སོགས་ཐ་ན་ཕྱི་ཡི་རྒྱལ་ཁབ་ཁག་ལའང་རིམ་གྱིས་དར་ཏེ། དེང་སང་ཕྱི་རྒྱལ་བ་ཚོས་ཞིབ་འཇུག་བྱེད་ཡུལ་གྱི་རིག་གནས་གྲུབ་ཆ་ཞིག་ཏུའང་གྱུར་ཡོད་པ་རེད། དེ་ལྟར་དར་བའི་བརྒྱུད་རིམ་ཁྲོད། གེ་སར་ཞེས་པའི་ལོ་རྒྱུས་མི་སྣ་ལའང་འགྱུར་བ་ཐེབས་ཏེ། སོག་པོ་བར་གེ་སར་དང་ཧོར་ཇིང་གེར་རྒྱལ་པོ་གཉིས་གཅིག་ཡིན་པའི་བཤད་ཚུལ་བྱུང་ཞིང་། མན་ཇུ་བར་གེ་སར་ནི་རྒྱལ་རབས་གསུམ་གྱི་ལོ་རྒྱུས་ཀྱི་ནང་ནས་འབྱུང་བའི་རྒྱ་ཡི་དམག་དཔོན་ཀོན་ཡུས་关羽ཞེས་པ་དེ་ཤི་ནས་ལྷ་རུ་གྲུབ་པ་ན།མིང་ལ་关帝ཀོན་ཏེ་འམ།ཡང་ན་关公ཀོན་ཀོང་ཞེས་གྲགས་པ་ཞིག་བྱུང་བ་དེ་དང་མི་སྣ་གཅིག་ཡིན་པའི་ལྟ་ཚུལ་བྱུང་བ་མ་ཟད། ལྟ་ཚུལ་དེ་དག་གིས་བོད་ཁུལ་གྱི་དམངས་ཁྲོད་གེ་སར་རིག་གནས་ལ་རྙོག་དྲགས་དང་མགོ་འཁྲུག་ཀྱང་བཟོས་ཡོད་པ་རེད། གེ་སར་རྒྱལ་པོའི་སྒྲུང་དེ་རྩོམ་ལུས་ཀྱི་ཐོག་ནས་བཅད་ལྷུག་སྤེལ་གསུམ་ག་ལས་གྲུབ་པ་ཞིག་ཡིན་ཞིང་། རིག་གནས་སྡེ་ཚན་གྱི་ངོས་ནས་བཤད་ན་བོད་སྐྱ་བོའི་ཤོག་ཁག་གི་རིག་གནས་སྡེ་ཚན་ཆེན་པོ་ཞིག་རེད། ནང་དོན་གྱི་ཐོག་ནས་གཙོ་བོ་རྒྱལ་གཅེས་དམག་དོན་རང་བཞིན་གྱི་ལོ་རྒྱུས་སྒྲུང་གཏམ་རིང་མོ་ཞིག་རེད་ཅེས་བཤད་ན་ཤིན་ཏུ་མཐུན། དེར་བརྟེན་གནའ་དུས་ཀྱི་བོད་ཀྱི་གྲུབ་མཐའ་ཁག་འགའི་དགོན་སྡེ་དང་ཐ་ན་ཆོས་དད་ཅན་གྱི་དུད་ཚང་སྒེར་པ་འགའི་མཆོད་ཁང་ནང་དུའང་གེ་སར་སྒྲུང་གཏམ་བཤད་རྒྱུར་འཛེམས་པ་དང་། གེ་སར་སྒྲུང་དཔེ་མི་འཇོག་པའི་ལམ་ལུགས་སྲོལ་ཞིག་དར་ཡོད་ནའང་། འདི་ནི་སངས་རྒྱས་ཆོས་ལུགས་ཀྱིས་ཤ་བརླན་ལྤགས་བརླན་བྱས་པའི་བོད་ཀྱི་སྤྱི་ཚོགས་མི་སྣ་ཁ་ཤས་ཀྱི་ལྟ་སྟངས་ཡན་གར་བ་ཙམ་ལས། དོན་དངོས་ཐོག་གེ་སར་རིག་གནས་ནི་བོད་རང་གི་གལ་ཆེན་རང་བཞིན་གྱི་གདོད་མའི་རིག་གནས་དང་། ཕ་མེས་རང་བཞིན་གྱི་ཤུལ་བཞག་རིག་གནས་གཙོ་ཤོས་ཤིག་ཀྱང་ཡིན་པ་བཤད་མ་དགོས་པས། དེ་ལ་བཙོག་ལྟ་ཞིང་ཞེ་ལོག་དགོས་པའི་གནད་དོན་ཅི་ཡང་མེད་པ་ཟད།འདི་ལ་ང་ཚོས་ལྷག་ཏུ་མཐོང་ཆེན་དང་གལ་ཆེན་དུ་བརྩིས་ཏེ། ཉམས་པ་སོར་ཆུད་མི་ཉམས་གོང་འཕེལ་གྱི་ཐབས་ལ་བརྩོན་པར་འོས་སོ་སྙམ་མོ།། ང་ཚོས་ཤེས་གསལ་ལྟར། བོད་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་སྙན་རྩོམ་རིང་མོ། གེ་སར་སྒྲུང་གཏམ་ལ་གཞི་རྩའི་ཆ་ནས་བོད་རང་གི་གདོད་མའི་ཆོས་ལུགས་གཡུང་དྲུང་བོན་གྱི་ལྟ་གྲུབ་ཀྱི་ཤན་ཤུགས་ངེས་ཅན་ཞིག་ཐེབས་ཡོད་པའི་རྟགས་མང་པོ་ཞིག་གླིང་སྒྲུང་གི་བརྗོད་བྱའི་དཀྱིལ་དང་ཟུར་དག་ནས་མངོན་ཡོང་ནའང་། དུས་རབས་བཅུ་དགུ་པའི་དུས་མཇུག་ཏུ། ཁམས་ཀྱི་མཁས་པ་འཇུ་མི་ཕམ་དགེ་ལེགས་རྣམ་རྒྱལ་པས།གེ་སར་ནི་སངས་རྒྱས་ཆོས་ལུགས་ཀྱི་བླ་མ་ཡི་དམ་དཔའ་བོ་མཁའ་འགྲོ། ཆོས་སྐྱོང་སྲུང་མ་ནོར་ལྷ་གཏེར་བདག མདོར་ན་དཀོན་མཆོག་ཀུན་འདུས་ཀྱི་ངོ་བོར་འབྲི་བཞེངས་བྱས་པས་མ་ཚད། གེ་སར་དེ་ཉིད་བོད་ཀྱི་ལོ་རྒྱུས་ཐོག་གི་གལ་ཆེའི་མི་སྣ་སློབ་དཔོན་པདྨ་འབྱུང་གནས་ཀྱི་ཐུགས་སྲས་དང་། ཆོས་རྒྱལ་ཁྲི་སྲོང་ལྡེའུ་བཙན་གྱི་སྒྱུ་འཕྲུལ་ཡིན་པར་བཤད་དེ། གེ་སར་ལ་བརྟེན་པའི་ལས་བཞིའི་ཆོ་ག་མང་པོ་ཞིག་ཀྱང་བརྩམས་གནང་ཞིང་། གེ་སར་དེ་ཉིད་ལ་གཞི་ནས་སངས་རྒྱས་ཆོས་ལུགས་ཁྲོད་ཀྱི་མི་སྣ་གལ་ཆེན་ཞིག་གི་གོ་བབས་ཀྱང་སྤྲད་དེ། གེ་སར་གྱི་དགྲ་བོའང་སངས་རྒྱས་བསྟན་པའི་སྤྱི་དགྲ་ཡིན་པ་ལས་དབུ་ནག་བོད་ཀྱི་སྒེར་དགྲ་མིན་པའི་སྐོར་བཤད། དེ་འོག་དེ་མཚུངས་མཆན། འདན་མ་ས་ར་ཧ་ཡི་སྤྲུལ་པ་ཡིན་པ་སོགས། གླིང་གི་དཔའ་བརྟུལ་འགའ་ཤས་ཀྱང་རྒྱ་གར་གྲུབ་ཆེན་གང་རུང་གི་རྣམ་སྤྲུལ་དུ་ངོས་བཟུང་སྟེ། མདོར་ན་གླིང་སྒྲུང་གི་ནང་དོན་ལ་གཞི་རྩའི་ཆ་ནས་འཕོ་འགྱུར་ཆེན་པོ་ཞིག་གཏུག་བཞག་པ་རེད། མཁས་དབང་ཁོང་གི་དགོངས་པ་ལྟར་ན་གླིང་སྒྲུང་སྙན་རྩོམ་རིང་མོའི་ལོ་རྒྱུས་ཀྱི་མགོ་ཁུངས་དེ་སྤྱི་ལོའི་དུས་རབས་བརྒྱད་པའམ་དགུ་པ་ཙམ་ཞིག་ལས་སྔ་བར་གཏུག་ཐབས་མེད་པ་ཡིན། དེ་ལྟར་སྔ་འགྱུར་རྙིང་མ་བའི་མཁས་དབང་ཆེན་པོ་འཇུ་མི་ཕམ་པས་གེ་སར་དེ་ཉིད་ཁམས་གསུམ་ཆོས་ཀྱི་རྒྱལ་པོར་མངའ་གསོལ་བ་ནས་བཟུང་། རིམ་བཞིན་ས་དཀར་གཉིས་ཀྱི་ཆོས་བརྒྱུད་འཛིན་པའི་བོད་ཁམས་ཁུལ་གྱི་དགོན་སྡེ་མང་པོ་ཞིག་གི་ནང་དུའང་རིག་གནས་ལྟ་ཚུལ་དེ་ཉིད་དར་ཡོད་པས་མ་ཚད། དགེ་ལུགས་པའི་དགོན་སྡེ་ཁག་འགའི་ནང་དུའང་དར་ཡོད་ངེས་རེད། གོ་སྐབས་དེ་དང་བསྟུན་ཏེ་བོད་ཁུལ་གྱི་གེ་སར་རིག་གནས་ལ་བྲོ་བ་གསར་པ་དང་གསོན་ཤུགས་གསར་པ་ཞིག་ཀྱང་འཕྲད་པས།དུས་དེ་ནས་བཟུང་བོད་བརྒྱུད་ནང་བསྟན་གྱི་ཆོས་ལུགས་གཞུང་རྟ་རུ་བྱས་པའི་གེ་སར་རིག་གནས་ཀྱི་མཚོ་རླབས་གསར་པ་ཞིག་འཕྱུར་མགོ་ཚུགས་པ་རེད། དེ་ནས་རིམ་བཞིན་བོད་ཀྱི་བླ་ཆེན་དང་མཁས་དབང་མི་ཉུང་བ་ཞིག་གིས་ཀྱང་གེ་སར་གླིང་སྒྲུང་གི་ལོ་རྒྱུས་སྙན་རྩོམ་རིང་མོ་ལ་ལེགས་སྐྱེས་གསར་པ་རེ་ཕུལ་ཡོད་དེ། དཔེར་མཚོན་ཙམ་ཞུས་ན། མདོ་ཁམས་ལྷ་ཐོག་རྒྱལ་པོའི་དབུ་ཡི་མཆོད་གནས།འབྲུག་ཁམས་སྤྲུལ་དོན་བརྒྱུད་ཉི་མས།བརྗོད་བྱ་དང་རྗོད་བྱེད་གཉིས་ཀའི་ཆ་ནས་ཆེས་སྙན་ཞིང་འཇེབས་པའི་འཇར་གླིང་གཡུལ་འགྱེད་སོགས་གླིང་སྒྲུང་ཁག་འགའ་བརྩམས་གནང་བ་སོགས། མདོར་ན་དེ་དང་དེ་ལ་སོགས་པའི་སྔ་ཕྱི་བར་མའི་རྒྱུ་རྐྱེན་མང་པོ་ཞིག་གིས་གླིང་སྒྲུང་དེ་ཉིད་རང་གི་གཞི་རྩའི་གནས་བབས་དང་བྱེད་ནུས་ལས་ཡོངས་སུ་འཕོས་ཏེ། རིམ་གྱིས་སྐྱ་མིན་སེར་མིན་གྱི་རིག་གནས་སྡེ་ཚན་ཞིག་ཏུ་ལོག་སོང་བ་རེད། གང་ལྟར་གེ་སར་སྙན་སྒྲུང་རིང་མོའི་ནང་གི་བརྗོད་བྱའི་མི་སྣ་ལ་བསམ་ན།ངས་གོང་དུ་ཞུས་པ་ནང་བཞིན། གེ་སར་སྒྲུང་གཏམ་ནི་མི་མ་ལྷ་ཡི་རྒྱལ་ཁབ་བམ་ཡང་ན་ཡུལ་ཚོ་ཆེན་པོ་ཞིག་གི་ལོ་རྒྱུས་ཀྱི་འཕྲེང་བ་རིང་མོ་སྟར་ལ་བརྒྱུས་པའི་གཏམ་བརྗོད་གསེར་གྱི་རྐུད་པ་ཡ་མཚན་པ་ཞིག་ཡིན་པས། ལོ་རྒྱུས་ནང་གི་མི་སྣ་དེ་དག་ཀྱང་གཅིག་ནས་རྒྱལ་གཅེས་རིང་ལུགས་ཀྱི་བསམ་བློའི་དཔའ་ངར་ལྡན་པ། གཉིས་ནས་མི་ལས་འདས་པའི་ནུས་མཐུ་དམིགས་བསལ་ཅན་ཤ་སྟག་ཏུ་བཀོད་འབྲི་བྱས་ཡོད་ནའང་། གླིང་སྒྲུང་གི་ཉིང་དགོས་གཙོ་བོ་དང་ང་ཚོས་དོ་སྣང་བྱེད་དགོས་ས་གཙོ་བོ་དག་ནི་མི་ལས་འདས་པའི་ནུས་ཤུགས་དེ་རྣམས་མ་ཡིན་པར། གཙོ་བོ་མི་ཆོས་རིང་ལུགས་ཀྱི་བསམ་བློའི་སྙིང་སྟོབས་དང་དཔའ་ངར་འབའ་ཞིག་ཡིན་པས། ང་ཚོས་མུ་མཐུད་དེ་གེ་སར་སྙན་སྒྲུང་ལ་ཞིབ་འཇུག་བྱེད་རྒྱུ་འདི། བོད་མི་རིགས་ཀྱི་གཞི་རྩའི་རིག་གནས་ལ་ཞབས་འདེགས་དང་ཞིབ་འཇུག་བྱེད་པར་ཆགས་བསྡད་ཡོད།
རྩོམ་པ་པོ། ལྷ་ཐོག་མེ་སྟག
བསམ་ཚུལ་འབྲི།
སྡེ་དགེ་རྒྱལ་ཡོངས་ལྷན་ཚོཊ་ཀྱི་ཚོཊ་གཙོ་ལཊ་ཡུ་རོབ་ཏུ་ཕྱོཊ་ཕེབས་གནང་བ།