༢༠༡༤ ཟླ་ ༥ ཚེས་ ༨ རེས་གཟའ་ཕུར་བུ།

༄༅། །ཕྱི་ལོ་ ༢༠༡༤ ཟླ་ ༥ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནོར་ཝེའི་ Norwayརྒྱལ་ས་ཨོ་སི་ལོར་ Osloཆིབས་སྒྱུར་བསྐྱང་ཆེད་ལ་ཏི་ཝི་ཡའི་རྒྱལ་ས་རི་གའི་གནམ་ཐང་དུ་ཆིབས་སྒྱུར་བསྐྱངས་སྐབས་ནོར་ཝེའི་གསར་འགོད་པ་ཞིག་གིས་ཐེངས་འདིར་ནོར་ཝེའི་སྲིད་གཞུང་གི་གཞུང་འཛིན་མི་སྣས་༸གོང་ས་མཆོག་མཇལ་འཕྲད་ཞུ་རྒྱུ་མིན་པའི་ཐག་གཅོད་གནང་བར་དགོངས་ཚུལ་ཇི་ཡོད་ཀྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན།

འདི་ནི་རྒྱུན་ལྡན་གྱི་གནས་སྟངས་ཤིག་ཡིན་པར་ངོས་ཀྱིས་ངོས་འཛིན་བྱེད་བཞིན་ཡོད། རྒྱལ་ཁབ་ཀྱི་རྩ་དོན་གལ་ཆེན་པོ་རེད། འོན་ཀྱང་ཏཱ་ལའི་བླ་མ་ནི་གཞན་ལ་གནོད་སྐྱེལ་བྱེད་མཁན་ཞིག་མིན་པ་ངོས་ཀྱིས་ཁས་ལེན་ཞུས་ཆོག ངོས་ཀྱིས་ལས་དོན་གལ་ཆེ་ཤོས་དེ་མང་ཚོགས་དང་ཐུག་ནས་ང་ཚོ་འཛམ་གླིང་འདིའི་ནང་འཚོ་གནས་བྱེད་བཞིན་པའི་མི་འབོར་ཐེར་འབུམ་བདུན་ཡོད་པ་རྣམས་ཚང་མ་འགྲོ་བ་མིའི་རིགས་གཅིག་མཚུངས་ཡིན་བསམ་པའི་གཅིག་གྱུར་གྱི་འདུ་ཤེས་ཐོག་ནས་གཞི་རྩའི་འགྲོ་བ་མིའི་རིགས་ཀྱི་བཟང་པོའི་ཡོན་ཏན་དེ་དག་གོང་མཐོར་གཏོང་ཐབས་བྱ་རྒྱུ་དེ་ཡིན་པར་ངོས་འཛིན་བྱེད་བཞིན་ཡོད། དཀའ་ངལ་ཆེན་པོའི་རིགས་འཕྲད་སྐབས་ང་ཚོས་འཛམ་གླིང་སྤྱི་ལ་ཕན་གནོད་ཇི་འདྲ་ཞིག་ཡོང་མིན་ལ་བསམ་བློ་གཙོ་བོ་གཏོང་དགོས་པ་ལས་ང་ཚོ་དང་ཁོ་ཚོའི་རྒྱལ་ཁབ་ཀྱི་ཁེ་ཕན་གཙོ་བཟུང་བྱ་རྒྱུ་མེད། ཆབ་སྲིད་དང་དཔལ་འབྱོར། ཆོས་ལུགས། ཤེས་ཡོན་སོགས་ང་ཚོས་ལས་དོན་ཇི་འདྲ་ཞིག་སྤེལ་ཡང་འགྲོ་བ་མིའི་རིན་ཐང་གཞི་རྩར་བཞག་སྟེ་ཕུགས་རྒྱང་རིང་པོར་སྨན་པའི་བསམ་བློ་གཏོང་དགོས། གལ་ཏེ་ངོས་རང་ཡུལ་འདིར་བསླེབས་སྐབས་ཆབ་སྲིད་ཀྱི་དམིགས་ཡུལ་ཞིག་ཡོད་ན་བློ་ཁ་མ་ཁེངས་པ་དེ་འདྲ་ཡོང་སྲིད་ཀྱང་ངོས་ལ་ཆབ་སྲིད་ཀྱི་རེ་དོགས་གང་ཡང་མེད་པར་བརྟེན་བློ་ཁ་མ་ཁེངས་པ་དེ་འདྲ་བྱེད་དགོས་དོན་གང་ཡང་མེད། ཅེས་བཀའ་ལན་སྩལ།

དེ་རྗེས་༸གོང་ས་མཆོག་ནོར་ཝེའི་གནམ་ཐང་དུ་༸ཞབས་སོར་བདེ་བར་འཁོད་སྐབས། ནོར་ཝེའི་ནོ་བེལ་ཞི་བདེའི་གཟེངས་རྟགས་ཚོགས་ཆུང་གི་ཚོགས་མི་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད། སྐབས་དེར་གསར་འགོད་པ་རྣམས་ཀྱི་དྲི་བར་བཀའ་ལན་སྩལ་རྗེས་༸གོང་ས་མཆོག་གནམ་ཐང་ནས་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས་སྐབས་ཕེབས་ལམ་དུ་མང་ཚོགས་བརྒྱ་ཕྲག་མང་པོས་དཀར་གཙང་མཇལ་དར་དང་བོད་ཀྱི་རྒྱལ་དར་སོགས་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། དེ་རྗེས་བཞུགས་གནས་མགྲོན་ཁང་གི་ཁྱམས་རྭ་ནས་ཞལ་མར་གཟིགས་ཏེ་འོག་ཏུ་མང་ཚོགས་བརྒྱ་ཕྲག་མང་པོས་༸གོང་ས་མཆོག་ལ་དགའ་བསུའི་འཚམས་འདྲི་ཞུས་པར་ཁོང་རྣམས་ལ་༸གོང་ས་མཆོག་གིས་འཚམས་འདྲིའི་བཀའ་སློབ་སྩལ། དེ་ནས་བཞུགས་གནས་མགྲོན་ཁང་དུ་ཕྱིར་ཆིབས་སྒྱུར་བསྐྱངས་ཏེ་ཡུལ་དེའི་སྲིད་བློན་ཟུར་པ་མཆོག་དང་མཇལ་མོལ་མཛད།

དེ་རྗེས་ནོ་བེལ་ཞི་བདེའི་གཟེངས་རྟགས་ཚོགས་ཆུང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཏེ་མི་ལོ་ ༢༥ ཧྲིལ་པོ་འཁོར་བའི་དུས་དྲན་སྲུང་བརྩི་ཞུ་རྒྱུའི་མཛད་སྒོའི་ཐོག་ཇི་ལྟར་སྔོན་ནས་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་ལྟར་ཆིབས་སྒྱུར་བཀའ་དྲིན་བསྐྱངས། སྐབས་དེར་ནོ་བེལ་ཞི་བདེའི་གཟེངས་རྟགས་ཚོགས་ཆུང་གི་ཚོགས་གཙོ་ Chairman of the Nobel Committee སྐུ་ཞབས་ཐོབ་ཇོན་ཇག་ལན་ Thorbjørn Jagland མཆོག་གིས་༸གོང་ས་མཆོག་དགྱེས་སྟོན་གྱི་གསོལ་ཚིགས་ཐོག་གདན་ཞུས་ཀྱིས་དེར་འདུས་ནོ་བེལ་ཞི་བདེའི་གཟེངས་རྟགས་ཚོགས་ཆུང་གི་ཚོགས་མི་རྣམས་ལ་༸གོང་ས་མཆོག་ངོ་སྤྲོད་ཞུས་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཚེ་མེད་ཞི་བའི་ཐབས་ལམ་ཐོག་ནས་བོད་མི་རྣམས་ལ་རང་དབང་ཐོབ་ཆེད་ཐུགས་བརྩོན་མཛད་པ་མ་ཟད། གོ་ལའི་ཁོར་ཡུག་ཐོག་ལ་ཧ་ཅང་ཐུགས་འཚབ་མཛད་པར་བརྟེན་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཡོད། ཏཱ་ལའི་བླ་མ་མཆོག་ནི་ཞི་བདེའི་དེད་དཔོན་ཞིག་ཡིན། ཞེས་སོགས་གསུང་བཤད་གྲུབ་བསྟུན།

གསར་འགོད་པ་ཁག་གཅིག་གིས་སྐབས་དེར་ནོ་བེལ་ཞི་བདེའི་གཟེངས་རྟགས་དེས་སྐབས་རེ་ཕན་ཐོགས་ཡོད་ཀྱང་མཚམས་རེ་གནོད་སྐྱེལ་བཞིན་ཡོད་པའི་སྐོར་གླེང་ཕྱོགས་ཡོང་བཞིན་པ་དེར་༸གོང་ས་མཆོག་ལ་དགོངས་ཚུལ་ཇི་ཡོད་ཀྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ཕན་ཐོགས་ཡོད་པ་བརྗོད་མི་དགོས། ངོས་ཀྱི་གྲོགས་པོ་ལྷོ་ཨ་ཕི་རི་ཀའི་ཡི་ཤུའི་ཆོས་དཔོན་སྐུ་ཞབས་ཌེ་སི་མོན་ཊུ་ཊུ་མཆོག་གིས་དེ་སྔ་ཁོང་ལ་ནོ་བེལ་ཞི་བདེའི་གཟེངས་རྟགས་མ་ཐོབ་གོང་མི་སྣ་འགའ་ཤས་མཇལ་འཕྲད་ཞུ་རྒྱུར་ཧ་ཅང་དཀའ་ངལ་འཕྲད་བཞིན་ཡོད་ཀྱང་། ཁོང་ལ་ནོ་བེལ་ཞི་བདེའི་གཟེངས་རྟགས་ཐོབ་རྗེས་མི་སྣ་མཇལ་འཕྲད་ཞུ་རྒྱུ་ལས་སླ་རུ་ཕྱིན་ཡོད་སྐོར་ངོས་ལ་གསུངས་བྱུང་། ངོས་རང་ཨ་རིའི་གྲོང་ཁྱེར་ཁལ་ལི་ཕོར་ནི་ཡར་ཚན་རིག་པ་དང་ལྷན་བགྲོ་གླེང་བྱེད་སྐབས་ངོས་ལ་ནོ་བེལ་ཞི་བདེའི་གཟེངས་རྟགས་ཐོབ་པ་གོ་ཐོས་བྱུང་། སྐབས་དེར་གསར་འགོད་པ་ཚོས་ངོས་ལ་ཚོར་བ་ཇི་བྱུང་འདྲི་སྐབས་ངོས་ཀྱིས་ངོས་རང་དེ་སྔ་ལྟར་ནང་པའི་དགེ་སློང་དཀྱུས་མ་རང་འཇགས་ཡིན་བསམ་པ་མ་གཏོགས་དེ་ཙམ་ཁྱད་པར་མི་འདུག ཅེས་ལན་འདེབས་བྱས་པ་ཡིན།

འོན་ཀྱང་གཟེངས་རྟགས་འདི་གཙོ་བོ་ངོས་ཀྱིས་འཚེ་མེད་ཞི་བའི་ལངས་ཕྱོགས་བཟུང་སྟེ་འཚེ་མེད་ཞི་བ་གོང་མཐོར་གཏོང་ཐབས་འབད་བརྩོན་བྱས་པ་དེར་ངོས་འཛིན་དང་རྒྱབ་སྐྱོར་གནང་བ་ཞིག་ཡིན་སྟབས། གཟེངས་རྟགས་འདིས་ངོས་ལ་ཆེ་མཐོང་ཧ་ཅང་གནང་བ་ཞིག་ལ་ངོས་འཛིན་བྱེད་བཞིན་ཡོད། དེ་རྗེས་འབར་མའི་མང་གཙོ་དོན་གཉེར་བ་ལྕམ་སྐུ་ཨང་སང་སུ་ཀི་ Aung San Suu Kyi མཆོག་དང་རྒྱ་རིགས་མང་གཙོ་དོན་གཉེར་བ་སྐུ་ཞབས་ལིའོ་ཞའོ་པོ་ Liu Xiaobo མཆོག་ལ་ནོ་བེལ་ཞི་བདེའི་གཟེངས་རྟགས་ཕུལ་བ་དེས་དཀའ་ངལ་འཕྲད་བཞིན་པའི་སྐབས་སུ་གཟེངས་རྟགས་དེས་སེམས་ནང་སྙིང་སྟོབས་འཕེལ་རྒྱུར་ཧ་ཅང་ཕན་ཐོགས་བྱུང་ཡོད་པའི་ཚོར་སྣང་བྱུང་། ཞེས་བཀའ་ལན་སྩལ།

གཞན་ཡང་གསར་འགོད་པ་ཞིག་གིས་ཐེངས་འདིར་ནོར་ཝེའི་གཞུང་འབྲེལ་མི་སྣ་ཚོ་དང་གྲོས་ཚོགས་ཀྱི་ཚོགས་གཙོ་བཅས་ཀྱིས་༸གོང་ས་མཆོག་ལ་མཇལ་འཕྲད་ཞུ་རྒྱུ་མིན་པའི་ཐག་གཅོད་གནང་བ་དེར་བློ་ཕམ་བྱུང་མིན་གྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། བློ་ཕམ་རྩ་བ་ནས་མེད་ལ་བློ་ཕམ་ཡོང་དགོས་དོན་ཡང་མེད། ངོས་ཀྱིས་དམིགས་ཡུལ་གཙོ་བོ་འགྲོ་བ་མིའི་རིན་ཐང་གོང་མཐོར་གཏོང་ཐབས་བྱ་རྒྱུ་ཡིན། ང་ཚོ་སྐྱེས་པ་ནས་རང་ཉིད་ཀྱིས་བྱམས་བརྩེའི་འཚོ་བ་མྱོང་བ་ཙམ་དུ་མ་ཟད། གཞན་གྱི་བདེ་སྡུག་ལ་ཚོར་བ་ཡོང་བཞིན་ཡོད། དེར་བརྟེན་ང་ཚོར་བྱམས་བརྩེའི་བློའི་ས་བོན་ལྟ་བུ་ཡོད་པ་འདི་སྐྱེད་སྲིང་བྱེད་དགོས། ལུས་པོའི་འཕྲོད་བསྟེན་ཡག་པོ་ཞིག་ཡོང་བ་ལའང་སེམས་ལ་ཞི་བདེ་དགོས་རྒྱུ་ཧ་ཅང་གལ་ཆེ་ཡིན་པ་དེང་སྐབས་ཚན་རིག་པ་ཚོས་ཤེས་རྟོགས་བྱུང་ཡོད། སྤྱིར་བཏང་མི་ཚོས་བྱམས་པ་དང་བརྩེ་བ་བརྗོད་སྐབས་ཆོས་ཀྱི་སྐད་ཆ་རེད། ཅེས་པའི་བསམ་ཚུལ་འཛིན་བཞིན་ཡོད་ཀྱང་། འོན་ཀྱང་དོན་དངོས་ཐོག་བྱམས་པ་དང་བརྩེ་བའི་རིན་ཐང་ནི་འགྲོ་བ་མིའི་སྤྱི་ཚོགས་ཀྱི་འཚོ་བའི་གོམས་གཤིས་ནང་ཧ་ཅང་དགོས་མཁོ་ཆེན་པོ་ཞིག་ཡིན། ངོས་རང་ནང་པའི་དགེ་སློང་ཞིག་ཡིན་པའི་ཆ་ནས་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་ལས་དོན་ལ་དོ་དབྱིངས་ཡོད། ཅེས་སོགས་ཀྱི་བཀའ་ལན་སྩལ།

དེ་རྗེས་གསར་འགོད་པ་ཞིག་གིས་ཕྱི་ལོ་ ༢༠༠༩ ནས་བོད་ནང་ད་བར་བོད་མི་ ༡༣༠ ལྷག་གི་རང་ལུས་མེར་སྲེག་བཏང་བའི་གནད་དོན་ཐོག་གི་དྲི་བར་བཀའ་ལན་སྩལ་དོན། གནས་སྟངས་འདི་ནི་ཧ་ཅང་བློ་ཕམ་རང་བཞིན་རེད། ཚབས་ཆེའི་ལས་འགུལ་དེ་དག་ནད་ཀྱི་མཚོན་རྟགས་ལྟ་བུ་རེད། གནས་ཚུལ་དེ་དག་གི་རྒྱབ་ལྗོངས་ལ་བོད་མི་ཚོའི་སེམས་གཏིང་ལ་འདོད་བློ་མ་ཁེངས་པའི་རྣམ་པ་ཡོད་པ་མཚོན་བཞིན་ཡོད། དེར་བརྟེན་གནས་ཚུལ་དེ་དག་ཡོང་དགོས་པའི་རྒྱུ་རྐྱེན་གཙོ་བོ་གང་ཡིན་རྒྱབ་ལྗོངས་ཀྱི་གནས་སྟངས་རྟོག་ཞིབ་བྱ་རྒྱུ་རྒྱ་ནག་གཞུང་ལ་འགན་ཡོད། འོན་ཀྱང་རྒྱ་ནག་གཞུང་གིས་དངོས་ཡོད་གནས་ཚུལ་ལ་རྟོག་ཞིབ་མ་བྱས་པར་ངོས་ལ་ཁག་དཀྲི་བྱེད་བཞིན་ཡོད། རྒྱ་ནག་གཞུང་གིས་གསར་འགོད་པ་ཚོ་བོད་དུ་བཏང་ནས་དངོས་ཡོད་གནས་སྟངས་ཇི་ཡིན་ཐོག་ངེས་པར་དུ་ཞིབ་འཇུག་བྱེད་འཇུག་དགོས། རང་ལུས་མེར་སྲེག་གཏོང་མཁན་བོད་མི་དེ་དག་ཆང་སོགས་ཀྱི་བཟི་བ་དང་ནང་མིའི་དཀའ་ངལ་འཕྲད་ནས་རང་སྲེག་བྱས་པ་དེ་འདྲ་མིན། ཁོང་ཚོས་དེ་ལྟར་བྱས་པ་དེར་རྒྱུ་རྐྱེན་གཞན་ཞིག་ཡོད། ཅེས་སོགས་ཀྱི་བཀའ་ལན་མཛད།

དེ་རྗེས་ཤུགས་ལྡན་ཚོགས་པས་གཞུང་ལམ་ཐོག་༸གོང་ས་མཆོག་ལ་ངོ་རྒོལ་བྱས་པའི་སྐོར་གྱི་དྲི་བ་ཕུལ་བར་བཀའ་ལན་སྩལ་དོན། ངོས་ཀྱིས་དུས་རྟག་ཏུ་སོ་སོའི་ཕ་མེས་ཀྱི་ཆོས་ལུགས་རྒྱུན་འཁྱོངས་བྱ་རྒྱུ་ཧ་ཅང་གལ་ཆེ་ཡིན་སྐོར་བརྗོད་བཞིན་ཡོད། འོན་ཀྱང་གལ་ཏེ་མི་འགའ་ཤས་ལ་ནང་ཆོས་དེས་ཕན་ཐོགས་ཆེ་བ་ཡོད་ན་དེ་ལྟར་བྱེད་མིན་སོ་སོའི་རང་དབང་རེད། བཅོམ་ལྡན་འདས་ཀྱིས་རྗེས་འཇུག་ཚོར་བཅོམ་ལྡན་འདས་ལ་དད་པ་ཙམ་ལ་ཆ་མ་བཞག་པར་བཀའ་ལ་དཔྱད་པ་བྱེད་དགོས་གསུངས་ཡོད། ངོ་རྒོལ་བྱེད་མཁན་ཚོར་མཚོན་ན་སྤྱིར་རྡོ་རྗེ་ཤུགས་ལྡན་སྐོར་དེ་ལོ་རྒྱུས་རིང་པོ་རེད། ལོ་ངོ་བཞི་བརྒྱའི་གོང་༸རྒྱལ་བ་ལྔ་པའི་སྐབས་ནས་གླེང་གཞི་ཅན་གྱི་དྲེགས་པ་ཞིག་ཆགས་ཡོད། ༸རྒྱལ་བ་ལྔ་པས་སྨོན་ལམ་ལོག་པའི་དམ་སྲི་འབྱུང་པོ་། བསྟན་པ་དང་འགྲོ་བ་ལ་འཚེ་བ་བྱེད་མཁན་ཞིག་ལ་ངོས་འཛིན་གནང་ཡོད། ༸རྒྱལ་བ་ལྔ་པའི་རྗེས་སུ་བླ་ཆེན་མང་པོས་ཤུགས་ལྡན་ལ་དམ་བསྒྲགས་གནང་ཡོད་པ་མ་ཟད། ༸རྒྱལ་བ་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཤུགས་ལྡན་དར་སོ་དེ་ཙམ་མེད་ཀྱང་དེར་དམ་བསྒྲགས་གནང་ཡོད། ངོས་ཀྱིས་ནོར་བ་རེད། ངོས་ཀྱིས་མ་ཤེས་པར་ཕྱི་ལོ་ ༡༩༥༡ ནས་ ༡༩༧༠ འགོ་སྟོད་བར་ཤུགས་ལྡན་བསྟན་པ་རེད།

འོན་ཀྱང་ཕྱིས་སུ་ངོས་ཀྱིས་དེར་མ་འགྲིག་པ་ཞིག་ཡོད་པ་ཤེས་ནས་བརྟག་དཔྱད་བྱེད་སྐབས་༸གོང་ས་ལྔ་པ་ཆེན་པོ་མཆོག་དང་༸གོང་ས་སྐུ་ཕྲེང་བཅུ་གསུམ་པ་ཆེན་པོས་དམ་བསྒྲགས་གནང་བ་གཞི་ནས་ཤེས་བྱུང་། དེ་རྗེས་ངོས་ཀྱིས་དོལ་རྒྱལ་བསྟེན་རྒྱུ་མཚམས་འཇོག་བྱས་པ་ཡིན། དེ་ནས་རིམ་བཞིན་མང་ཚོགས་ཀྱིས་གནས་ཚུལ་ཤེས་སྟབས་དེའི་སྐོར་མང་ཚོགས་ལ་འགྲེལ་བཤད་རྒྱག་རྒྱུ་ངོས་ཀྱི་ལས་འགན་རེད། དོལ་རྒྱལ་རྗེས་འབྲང་པ་ཚོས་ཚོགས་པ་བཙུགས་ནས་ངོས་ཀྱིས་དོལ་རྒྱལ་བཀག་སྡོམ་བྱེད་ཀྱི་ཡོད་པ་རྗོད་བཞིན་ཡོད། དངོས་ཡོད་གནས་སྟངས་དེ་འདྲ་མ་རེད། རྒྱ་གར་ལྷོ་ཕྱོགས་ལ་དགོན་པ་ཆེ་ཐག་ཆོད་ཡོད་པའི་ནང་དོལ་རྒྱལ་མུ་མཐུད་བསྟེན་བཞིན་ཡོད་པ་ཟུར་བལྟས་ལེབ་མཐོང་རེད། བླ་མ་དང་སློབ་མའི་དབར་དམ་ཚིག་གཙང་མ་དགོས་སྟབས་དོལ་རྒྱལ་བསྟེན་འདོད་ཡོད་ན་ངོས་ཀྱི་སར་ནས་ཆོས་མ་ཞུ་རོགས་ཞེས་བརྗོད་ཀྱི་ཡོད། དེ་འདྲ་བརྗོད་པ་དེར་ཁོང་ཚོས་དམ་བསྒྲགས་བྱས་པ་རེད། ཅེས་རྗོད་བཞིན་ཡོད། དོལ་རྒྱལ་རྗེས་འབྲང་པ་ཚོས་ངོས་ལ་སྐྱག་རྫུན་མ་ཤོད། ཅེས་སྐད་འབོད་རྒྱག་བཞིན་ཡོད། སྐྱག་རྫུན་སུས་ཤོད་ཀྱི་འདུག ངོས་ཀྱིས་ཆོས་ལུགས་རིས་མེད་བྱེད་དགོས་པའི་ལམ་སྟོན་བྱེད་བཞིན་ཡོད། དོལ་རྒྱལ་བསྟེན་པས་ཆོས་ལུགས་འགལ་ཟླ་འགྲོ་བཞིན་ཡོད། ངོས་ལ་ངོ་རྒོལ་བྱེད་མཁན་དོལ་རྒྱལ་རྗེས་འབྲང་པ་ཚོས་དངོས་ཡོད་གནས་ཚུལ་མ་ཤེས་པར་དེ་ལྟར་བྱེད་བཞིན་ཡོད་པར་བརྟེན་ཡ་ང་སྙིང་རྗེ་བསམ་པ་དྲན་གྱི་འདུག ཅེས་བཀའ་ལན་སྩལ། སང་ཉིན་༸གོང་ས་མཆོག་གིས་ཨོ་སི་ལོ་གཙུག་ལག་སློབ་གྲྭའི་ནང་བློ་སྦྱོང་ཚིགས་བརྒྱད་མའི་ཆོས་འབྲེལ་དང་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག ཡོང་ཁུངས། བོད་གཞུང་དྲ་བ།