གུང་རྒོལ་རྒྱལ་སྲུང་སྐོར་གྱི་སྡེ་དགེའི་གསང་བའི་ཚོགས་འདུ།
ཡོང་ཁུངས། ངེད་དྲ་བ། བསྡུ་སྒྲིག་པ། འཆམ་ར་དྲི་མེད་རྒྱལ་མཚན།
རྒྱ་དམག་ཁམས་ཁུལ་དུ་བཙན་འཛུལ་བྱེད་ཀྱིན་པའི་སྒང་ཙམ་ན།ཕྱི་ལོ་༡༩༥༦ལོར་སྡེ་དགེ་བའི་རྗེ་འབངས་ཡོངས་ཀྱིས་བཙན་རྒོལ་རྒྱལ་སྐྱོབ་ཀྱི་གསང་བའི་ཚོགས་འདུ་ཞིག་སྡེ་དགེ་འཇོ་མདའི་ཕྱོགས་ཀྱི་རི་མདའ་ཞེས་པའི་ས་ཆ་རུ་ཚོགས་པ་རེད།ཚོགས་ཞུགས་མི་སྣ་གཙོ་བོ་སྡེ་དགེ་བཙུན་མོ་འཇམ་དབྱངས་དཔལ་མོ་དང་།རྒྱལ་སྲས་ཨོ་དགའ།མདུན་སྐོར་མཁར་མདོ་འཆི་མེད་མགོན་པོ་དང་།ར་རུ་བསྟན་རྣམ།འོག་མ་རི་རྣམ།རྒྱ་མཁར་མགོན་རྣམ།བྲག་ཡག་མགོན་རྣམ།མཁར་མདོ་དཀར་སྟོབས།ངན་འཕྲད་ཚེ་དབང་རྣམ་རྒྱལ།ཕྱག་རྩ་སྟོབས་ལྡན་གྲགས་པ།ཇོ་ཁང་པད་ཕྲིན།ཡར་མགོ་ཚེ་དགའ།རྣམ་ཆུང་མཐུ་སྟོབས།རྣམ་སྲས་བུ་སོགས་མི་གྲངས་བཞི་བརྒྱ་ལྷག་ཙམ་ཡོད་པ་རེད།དེ་ལྟར་ཛ་དྲག་གི་གསང་བའི་ཚོགས་འདུ་དེ་ཚོགས་དོན་ནི།སྐབས་དེར་ཁམས་ཁུལ་དུ་དགྲ་བོ་རྒྱ་དམར་སིམ་འཛུལ་གྱིས་གྲི་རྩེར་སྦྲང་རྩི་བྱུག་པ་ལྟ་བུའི་སྲིད་བྱུས་འོགབོད་རྒྱལ་ཁབ་ཆེན་མོའི་སྣོད་བཅུད་རིག་གནས་དང་བཅས་པ་འཕྲོག་འདོད་ཀྱི་བྱུས་ངན་དེར་སྡེ་དགེ་བ་ཕོ་ཟད་མོ་ལ་ཐུག་ཀྱང་ངོ་རྒོལ་བྱ་རྒྱུའི་གྲོས་བསྡུ་དང་།དམག་དོན་སྒྲིག་གཞི་ཚགས་ཚུད་བཟོ་བའི་ཆེད་རེད།དེའང་ཚོགས་འདུ་དེའི་ཚོགས་ཞུགས་མི་སྣ་སྡེ་དགེའི་མདུན་སྐོར་རོང་རྒྱབ་ཡིད་དགའ་ཡིས་གཏམ་བཤད་བྱས་པ་ཤྲི་ལ་ལྷུན་འགྲུབ་དབང་རྒྱལ་གྱི་མི་ཚེའི་ལོ་རྒྱུས་ནང་དྲངས་ན།ང་དེ་སྔོན་སུའུ་ལན་གྱི་སློབ་གྲྭར་ཞུགས་ནས་དམར་ཕྱོགས་ཀྱི་ལྟ་བ་ལ་སློབ་སྦྱོང་བྱེད་མྱོང་མཁན་ཞིག་ཡིན་པས།དམར་ཤོག་གི་ལྟ་བ་ནི་ཆེས་གདུག་རྩུབ་དགུ་འཛོམས་ཤིག་རེད།མདོར་བསྡུས་ནས་བཤད་ན་རྒྱ་དམར་གྱིས་བོད་རྒྱལ་ཁབ་འདི་མངའ་འོག་ཏུ་བཅུག་སྟེ།ནང་ཆོས་དུག་ཏུ་བཟུང་ནས་སངས་རྒྱས་ཀྱི་བསྟན་པ་བཤིག་འདོད་མཁན་དང་།སེམས་ཅན་ཀྱི་བདེ་སྐྱིད་འཕྲོག་འདོད་མཁན་གྱི་ཀླ་ཀློའི་དཔུང་ཚོགས་ཤིག་རེད།ཁྱེད་རང་ཚོས་རྒྱ་དམར་གུང་ཁྲན་གྱིས་སྐད་ཅ་སྙན་པོ་བཤད་པ་ལ་མགོ་མ་འཁོར།རྒྱ་མི་གུང་ཁྲན་གྱི་སྲིད་བྱུས་ལ་དང་པོ་ཨ་ཆེན་གྱི་ཐང་འདྲ་བ།བར་དུ་བར་དོའི་འཕྲང་འདྲ་བ།ཐ་མ་གཡག་རྭའི་སྦུག་འདྲ་བ་ཡོད་པས།ང་ཚོ་འགོ་དཔོན་མི་སེར་ཚང་མ་མཐུན་སྒྲིལ་རྡོག་རྩ་གཅིག་བསྒྲིལ་བྱས་ནས་གུང་རྒོལ་འཐབ་རྩོད་མཐའ་འཁྱོལ་བ་ཞིག་མ་བྱས་ན།མཐའ་མ་བོད་རྒྱལ་ཁབ་འདི་རྒྱ་དམར་གྱིས་མངའ་འོག་ཏུ་བསྡུ་བའི་ཉེན་ཁ་ཡོད་པ་རེད་ཅེས་སོགས་གསུང་ཚུལ་བཀོད་འདུགདེ་བཞིན་དེར་འདུས་པའི་སྡེ་དགེ་བ་མི་རེ་ངོ་རེ་ནས་གུང་རྒོལ་རྒྱལ་སྲུང་སྐོར་གྱི་གཏམ་བཤད་རིམ་པ་བྱས་ཤིང་།མཐའ་མ་ཕོ་ཟད་མོ་ལ་ཐུག་ཀྱང་གུང་ཁྲན་ཏང་གི་བཙན་གནོན་སྲིད་བྱུས་ལ་མཐའ་གཅིག་ཏུ་ངོ་རྒོལ་བྱ་རྒྱུའི་མནའ་གན་ཆོད་ཡིག་བཞག་པ་རེད།དེ་བཞིན་འཐུས་མི་སོ་སོས་རང་རང་གི་མངའ་འོག་སྡེ་རིས་རྣམས་ལ་གྲོས་ཆོད་དེའི་དགོངས་དོན་གསལ་བཤད་དང་།གོ་རྟོགས་སྤེལ་རྒྱུའི་ལས་འགན་ཏག་ཏག་ཁུར་རྒྱུའི་ཁས་ལེན་ཞུས་པ་རེད།ས་གནས་ས་ཐོག་ཏུ་འབྱོར་རྗེས་ཀྱང་ཚོགས་ཞུགས་མི་སྣ་ཚོས་ཆོད་གན་གྱི་ནང་དོན་རྣམས་གསང་ཐབས་ཀྱིས་ཚུལ་བཞིན་སྒྲུབ་པ་སྟེ།དེའང་དཔེར་ན་ཤྲི་ལ་ཆོས་མཛད་ཀྱིས་མི་དམངས་ལ།ད་ལྟ་རྒྱ་མིས་ཡག་པོ་བྱེད་ཁུལ་བྱེད་བཞིན་པ་འདི་བོད་རྒྱལ་ཁབ་བཙན་འོག་ཏུ་བཅུག་པའི་ཆ་གཞི་ཡི་རིམ་པས་དམངས་གཙོ་བཅོས་བསྒྱུར་ཞེས་པའི་ལས་འགུལ་བྱས་ནས་མཉམ་ལས་ཁང་ཟེར་བ་བཙུགས་ཏེ་ཡོད་པོ་མེད་པོ་དང་།མེད་པོ་ཡུ་མེད་བྱེད་ཀྱི་རེད།ཆོས་སངས་རྒྱས་ཀྱི་བསྟན་པ་བཤིག་སྟེ་སེམས་ཅན་གྱི་བདེ་སྐྱིད་འཕྲོག་པ།དགོན་སྡེ་དང་ལྷ་སྐུ་རྟེན་གསུམ་ཡུ་མེད་བཟོ་རྒྱུ།བླ་སྤྲུལ་དང་མི་ཆེན་རྣམས་གསོད་རྡུང་བཙོན་འཇུག་བྱེད་པ་དང་།མི་དམངས་ལའང་གླ་ལས་དང་སློང་མོ་རྒྱག་པའི་གོ་སྐབས་ཙམ་ཡང་མེད་པ་རང་དབང་རྦད་དེ་བཙན་འཕྲོག་བྱེད་ངེས་རེད།དེར་བརྟེན་ང་ཚོ་ཚང་མས་བོད་རྒྱལ་ཁབ་དང་སངས་རྒྱས་ཀྱི་བསྟན་པ་སྲུང་བའི་དོན་དུ་རྒྱ་གུང་ཁྲན་ལ་ཞི་དྲག་གང་རུང་གིས་ངོ་རྒོལ་བྱེད་དགོས་ཞེས་པའི་གོ་བཀོན་སློབ་གསོ་གནང་བ་ལྟ་བུ་རེད།
དེ་རྗེས་༡༩༥༧ལོར་ཡང་བསྐྱར་སྡེ་དགེ་སྐུ་ཚེ་སྤོ་ལུ་རུ་རྒྱལ་སྲས་ཨོ་དགའ་དབུ་བཞུགས་ཐོག་གསང་བའི་གུང་རྒོལ་རྒྱལ་སྲུང་སྐོར་གྱི་ཚོགས་འདུ་ཚོགས་པ་དང་།རྒྱལ་སྲས་དམག་སྤྱིར་བསྐོས།རུ་དཔོན་འོག་མ་རི་རྣམ་དང་།རྒྱལ་མཁར་མགོན་རྣམ།ངན་ཕྲད་ཚེ་དབང་རྣམ་རྒྱལ་སོགས་བསྐོས་ཏེ་ཞི་དྲག་གཉིས་ཀྱི་ཐབས་བྱུས་རིམ་པ་བགྲོས།
སྐབས་འདིའི་གཡས་གཡོན་ནས་གུང་ཁྲན་ཏང་གིས་མང་ཚོགས་དང་དེ་ལས་ཀྱང་གནད་ཡོད་ཀྱི་མི་རྣམས་ལ་སྒོར་མོའི་ལྐོག་རྔན་དང་།མི་ཐོབ་ཀྱི་མགོ་སྐོར་རིམ་པ་གཏོང་གིན་ཡོད་མོད།༡༩༥༨ ལོ་ནས་འཇོ་མདའ་རུ་གུང་ཁྲན་གྱིས་བསྐོས་པའི་སྡེ་དགེའི་ལས་བྱེད་རྣམས་ཧྲིལ་གྱིས་ཕྱིར་འཐེན་བྱས་ཏེ་གུང་རྒོལ་རྒྱལ་སྲུང་གི་ལས་དོན་ཐོག་ཕྱི་གསལ་ནང་གསལ་ཐོག་དངོས་སུ་ཞུགས་བྱས།དཔེར་ན།
༈རྒྱལ་སྲས་དབུ་དགའ་དང་།འོག་མ་རི་རྣམ།རྒྱལ་མཁར་མགོན་རྣམ་སོགས་ཀྱིས་སྣེ་ཁྲིད་པའི་སྡེ་དགེའི་དམག་དཔུང་གིས་བྲག་གཡབ་གསེང་གཞུང་ནས་གུང་དམག་དང་དགྲ་འཐབ་དྲག་པོ་བྱས་ཏེ་ཤོ་རྟ་ལྷོ་གསུམ་དུ་ཡོད་པའི་ཆུ་སྒང་གི་དམག་སྒར་དུ་ཕེབས་པ་དང་།
༈ར་རུ་བསྟན་རྣམ་དང་།བྲག་ཡག་མགོན་རྣམ་གཉིས་ཀྱི་སྣེ་ཁྲིད་པའི་དཔའ་རྒོད་ཁྱུ་ཞིག་གིས་དབོན་སྟོད་ཤར་ནུབ་གཉིས་ནས་དགྲ་བོ་ལ་རྒོལ་རྡུང་ཚ་ནན་གཏོང་བ།
༈དབོན་ཐོག་སྟོབས་དགའ་དང་།མཁར་མདོ་གཟིམ་དཔོན་སོགས་ཀྱིས་དགྲ་ལ་རྒོལ་ནས་བཙོན་དུ་ཚུད་ཀྱང་།དམག་དཔོན་ཞིག་བསད་པ་སོགས་ཀྱི་འཐབ་འཛིང་དྲག་པོ་བྱས་པ།
༈བཤེས་གཉེན་ཚེ་རིང་དངོས་གྲུབ་སོགས་བྱང་གནམ་མཚོ་ཁ་རུ་ཨ་འབྲུག་དམག་སྤྱི་ཆེན་མོའི་ལྷན་གོ་མཚོན་ལེན་ཆེད་སོང་ནས།གཡུལ་སར་རྨས་སྐྱོན་ཐེབས་ཏེ་དགྲ་ལག་ཏུ་ཤོར་རྗེས་ཀྱང་རྨ་བཅོས་མ་བྱས་པ་དང་།ཁ་ལག་མ་ཟོས་ནས་རྒོལ་གནང་སྟེ་མཐར་བཙོན་འོག་སྐུ་གྲོངས་པ།
༈འབའ་ཆུང་དཔོན་གྱིས་སྣེ་ཁྲིད་པའི་དམག་དཔུང་ཁྱུ་ཞིག་ལྕགས་ཚ་གྲི་གུ་ཐང་གི་ཆུ་སྒང་དམག་སྒར་ལྟེ་བར་སོང་ནས་བྱང་སྐྱོད་མདའ་མཚོན་ལེན་མཁན་གྱི་ཨ་འབྲུག་སྦྱིན་བདག་སོགས་ཚུར་ཡོང་བའི་ལམ་ཁ་སྲུང་ཆེད་ཀོང་པོ་དང་།གཡག་ར་འཕྲང་སོགས་སུ་དམག་འཐབ་དྲག་པོ་བྱས་པ།
༈བྱ་རྒོད་རྣམ་རྒྱལ་རྡོ་རྗེ་དང་ཀཿཐོག་ཕུར་པ་ཕྲིན་ལས་ཀྱིས་དབུས་སྡེ་དགེ་བའི་མི་རྒོད་ཁག་ཅིག་གིས་ཨ་འབྲུག་ཚང་གི་མཆོད་ཁང་ནང་དུ་དགྲ་ལ་རྒོལ་རྒྱུའི་གྲོས་མོལ་དང་མནའ་གན་བཞག་པས་མ་ཚད།ཆུ་སྒང་དབུས་སྒྲིག་འཛུགས་ཀྱི་སྤྱི་ཁྱབ་གཙོ་འཛིན་པ་དང་།དམག་སྤྱི།འགོ་དཔོན་སོགས་གནང་སྟེ་༸གོང་ས་མཆོག་རང་དབང་ཡུལ་དུ་གདན་འདྲེན་ཞུས་པ་སོགས་ཀྱི་བླ་མེད་བྱས་རྗེས་བཞག་པ།
༈སྲས་དོན་ཡོད་དང་།ར་རུ་ཡེ་ཤེས་སོགས་ཨ་རིར་གསང་བའི་དམག་སྦྱོང་སོང་ནས།གནམ་ཐོོག་ནས་མར་བོད་ནང་དུ་གཡུག་སྟེ།བསྟན་སྲིད་མི་རིགས་ཆེད་རླབས་ཆེན་གྱིས་བྱས་རྗེས་རིམ་པར་བཞག་པས་མཚོན་སྡེ་དགེའི་དཔའ་རྒོད་མང་པོས་བོད་མི་རིགས་དང་རྒྱལ་ཁབ་ཀྱི་ཆེད་དུ་ཚེ་སྲོག་མང་པོ་ཞིག་ཕུལ་བ་དང་།བྱས་རྗེས་མང་པོ་ཞིག་བཞག་ཡོད་པ་རེད།
བསམ་ཚུལ་འབྲི།
བདེ་ཆེན་འབུར་མོའི་གནས་ཡིག