གསོན་འདྲེས་དེད་པའི་བུད་མེད། ས་མཐའི་གཡུ་རལ།
༈ གསོན་འདྲེས་དེད་པའི་བུད་མེད།
_______ས་མཐའི་གཡུ་རལ།
མིག་གིས་འཇིག་རྟེན་མཐོང་བ་ཐོག་མའི་དུས་ནས། །
ཕ་ས་ཕ་ཡུལ་ཟེར་བའི་གནས་གཞི་མེད་པའི། །
སྐྱབས་བཅོལ་བོད་མའི་སྐྱ་ཆད་སྔོ་སྡུག་སྒོ་ན། །
བུ་མོའི་ལུས་ཤིག་བླངས་པས་ཡོད་ཚད་ཚར་སོང་། །
ལོ་ཆུང་གྲོགས་མོ་ཕན་ཚུན་སྐྲ་ལོ་སླ་བཞིན། །
རྒྱབ་ཁུག་ཆུང་ཆུང་ཁུར་ཏེ་སློབ་གྲྭར་འགྲིམ་དུས། །
མཐའ་མའི་ན་ཟུག་འདི་དག་ལྡང་རྒྱུ་མེད་ཀྱང་། །
དགོད་སྒྲའི་དབྱངས་རྟ་དེ་ལ་འདར་སིག་ལོས་རྒྱག །
བརྩེ་གདུང་བྱི་རིལ་མངར་མོ་ཁ་ལ་ནུད་བཞིན། །
བྱིས་པས་ཨ་མར་འབོད་པའི་དགའ་ཚོར་མྱོང་དུས། །
མཐའ་མའི་གྱེས་གདུང་འདི་དག་མྱོང་རྒྱུར་མེད་ཀྱང་། །
དམར་ཆུང་སྙིང་གི་དཀྱིལ་ནས་འདར་སིག་ལོས་རྒྱག །
ཨ་མས་བརྣབ་སེམས་བྱས་པའི་འཚོ་བ་རེ་རེ། །
ཡ་ཐོད་གཉེར་མས་བོས་པའི་སྨོན་འདུན་རེ་རེ། །
ཁྱེད་ཀྱིས་སེམས་སུ་བསྣམས་པའི་ཁུར་པོ་དེ་དག །
ད་དུང་ཕྱི་མའི་ཡུལ་དུ་ཁུར་ནས་ཡོད་དམ། །
ཟ་འདྲེ་ཁོག་ལ་ཞུགས་པའི་གཅན་གཟན་ལག་ནས། །
ཟུག་གཟེར་ད་དུང་ལྡང་པའི་མནར་གཅོད་མྱངས་པ། །
མྱི་ནག་ལུང་པ་དེ་ནི་དམྱལ་བ་འདྲ་ཡང་། །
རང་རིགས་གསོན་འདྲེ་འདི་ཚོའི་ལག་རྗེས་རེད་ཨང་། །
གོས་ཀྱི་སྟོད་དང་སྨད་ནས་བུག་ཅིང་རལ་ཏེ། །
ལུས་ཀྱི་མདུན་དང་རྒྱབ་ནས་དམར་རྗེན་རིག་པའི། །
ཁྲག་དང་ཆུ་སེར་སྔོ་ཐིག་ཞེད་སྣང་བསྟན་འདྲ། །
ཚེ་སྲོག་དམར་པོའི་ཉེན་ཁ་གང་འདྲ་འཕྲད་སོང་། །
སྡེ་དགེའི་དམངས་དང་ཚོགས་པས་ལག་པ་བསྲིངས་ཏེ། །
གདུང་བའི་མིག་ཆུ་རིང་མོ་ཐོལ་གྱིས་གཅོད་དུས། །
དགའ་བའི་འཛུམ་མདངས་དེ་ནི་ལྷ་བས་མཛེས་པ། །
ད་ལྟ་བསམས་ཤིང་བསམ་དུས་དགའ་ཡང་སྐྱོ་བྱུང་། །
མང་པོས་རྒྱབ་ནས་སྐྱོར་བའི་ཁྱེད་དང་རོགས་གཉིས། །
རིམ་གྱིས་ཁེ་ན་ཌ་རུ་བདེ་བར་འཁོད་དུས། །
དགའ་བའི་མིག་ཆུ་དེ་དག་སྔོན་དང་མི་འདྲ། །
འཛུམ་མདངས་འོད་ཞགས་དཀར་པོས་གཡས་སྐོར་རྒྱག་ཡོད། །
དཀའ་སྡུག་འབུམ་གྱི་མཐའ་ནས་རྒྱ་མཚོ་བརྒལ་ཀྱང་། །
བརྟག་དཔྱད་འབྲས་བུ་ཞིག་གིས་སྙིང་ཤ་མཛེར་བྱུང་། །
མི་འདོད་གདུང་བའི་མུན་པ་ཡང་བསྐྱར་འཁྲིགས་སོང་། །
སེམས་ཀྱི་རེ་བའི་རི་མོ་སྟ་རེས་བཙགས་སོང་། །
ཡིད་ཀྱི་སྨོན་པ་སྟོང་གི་སྤྲིན་ཕུང་ནང་ན། །
ཁྱེད་ཀྱི་རྨས་པའི་ལུས་དང་ཟུངས་ཁྲག་གསོས་ནས། །
སེམས་ཀྱི་ཕོག་ཐུག་ཐབས་ཅད་སེལ་བར་བསྒོམས་ཀྱང་། །
རེ་བའི་ཞིང་ཁམས་དེ་ནི་མགོ་མཇུག་བསྒྱུར་སོང་། །
ས་སྟེང་མི་ཡི་འགྲོ་བ་སྨྱོས་པས་མ་ཚད། །
གཤིན་རྗེའི་ལས་མཁན་དག་ཀྱང་རག་གིས་བཟི་སྟེ། །
ཁྱོད་དང་ཁྱོད་ཀྱི་ཤན་པ་ཁྲིད་རྒྱུ་ནོར་སོང་། །
ཨ་ཁུ་ཁྲིམས་དཔོན་ཐུག་ན་བརྩད་རྒྱུ་མ་བརྗེད། །
ཁྱེད་ཀྱི་བྱིས་པ་ཆུང་ཆུང་ཅུང་ཙམ་འཚར་འདུག །
རྨོ་རྨོའི་ཡ་ཐོད་གཉེར་མའི་གྲངས་ཀ་བརྩིས་བྱུང་། །
ཨ་མས་ཁྱེད་ཀྱི་མིང་ནས་མུར་མུར་འབོད་བཞིན། །
མིག་ཆུའི་ཐིག་པ་རེ་རེས་མ་ཎི་བསྡོས་བྱུང་། །
ཁྱེད་ཀྱི་རྣམ་ཤེས་ཕྲ་མོ་གང་ན་འཁོར་ཡོད། །
བྱ་དང་བྱེའུའི་ལུས་འདྲ་ལེན་རྒྱུ་ཨེ་བྱུང་། །
ཤིང་སྡོང་འོག་དང་ཁ་ཀྱོག་ཁུག་ཀྱོག་ལྟོས་དང་། །
ཁྱེད་ཀྱི་ཟླ་བོས་ཁྱེད་ལ་མཁྲེང་ནས་སྡོད་འདུག །
མཐའ་མའི་ཟླ་བ་དྲུག་གི་ཉིན་ཞག་བརྩི་དུས། །
སྙིང་གི་འཕར་སྒྲ་དེ་ཉིད་འདི་ནས་ཐོས་བྱུང་། །
གདོང་གི་སྐྱོ་ཉམས་དེ་ཡང་འདི་ནས་རིག་བྱུང་། །
རིག་ཀྱང་ནུས་མེད་ང་རང་ཤི་བ་འདྲ་སོང་། །
སྐར་ཅིག་སྐད་ཅིག་རེ་ལ་དབུགས་རྔ་རྒོད་ཅིང་། །
སྐར་ཆ་སྐར་ཆ་རེ་ལ་རྣམ་ཤེས་འགག་དུས། །
སྲིད་པའི་འཇིག་རྟེན་འདི་ལ་ཞེན་པ་ལོག་ནས། །
ཁྱེད་ལ་དགོངས་དག་སྟོང་གིས་མིག་ཟུང་བཙུམ་ཡོད། །
ཕྱི་ལོ་ ༢༠༡༣་༧་༡༦ ཉིན་བོད་པའི་བུ་མོ་གཉིས་ཕྱི་རྒྱལ་ལམ་ཁྲིད་པས་མི་ནག་ལུང་པར་གཡུག་པ་དང་། ༢༠༡༤་༡་༣ ཉིན་སྡེ་དགེ་ཚོགས་པས་རོགས་རམ་བྱེད་འགོ་བཙུགས་པ། ༢༠༡༥་༡་༢༧ ཉིན་ཕྱི་རྒྱལ་ཁེ་ན་ཌ་རུ་གཏོང་ཐུབ་པ་བྱུང་པ་དང་། དེ་ནས་བུ་མོ་རྒན་པ་ལ་ནད་ངན་ཞིག་ཕོག་ཡོད་པ་ཤེས་ཏེ་ཉེ་སྔོན་ཚེ་ལས་འདས་སོང་པའི་ཡིད་སྐྱོའི་གནས་ཚུལ་ཐོན་པར་མྱ་ངན་གྱི་གདུང་སེམས་དྲག་པོས་འཆམ་ར་དྲི་མེད་རྒྱལ་མཚན་གྱིས་ ༢༠༡༦་༩་༡༣ ཉིན་སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་ལས་ཁུངས་སུ་བྲིས།
འབྲེལ་ཡོད་གནས་ཚུལ་རྒྱས་པ་དྲ་ཐག་འདི་ལ་ཕེབས་ནས་གཟིགས་རོགས།
One Response
བསམ་ཚུལ་འབྲི།
སྡེ་དགེ་རྒྱལ་ཡོངས་ལྷན་ཚོགས་ཀྱི་ཚོགས་ཆེན་ཚོགས་བརྡ།
ངོ་མ་ཡིད་སྐྱོ་བོ་རེད་མྱ་ངན་ཞུ།
ལམ་སྣེ་སྟོན་མཁན་དེ་ཕ་རོ་ཟོ་ཟོ་དེ་མི་ཁ་ནག་ཟིག་འོད་ཟིག།