གཏེར་སྟོན་བདུད་འདུལ་རྡོ་རྗེའི་རྣམ་ཐར།
སྡེ་དགེའི་ལོ་རྒྱུས་སྤྱི་དོན་ཟླ་ཤེལ་གསར་པའི་མེ་ལོང་ལས་དྲངས།རྩོམ་པ་པོ།སྡེ་དགེ་ཐུབ་བསྟན་ཕུན་ཚོགས།
གཏེར་སྟོན་བདུད་འདུལ་རྡོ་རྗེ་ནི།གཏེར་སྟོན་བརྒྱ་རྩའི་ནང་ཚན་དུ་གྱུར་པའི་གངས་ལྗོངས་ཡོངས་ལ་སྙན་གྲགས་ཅན་གྱི་གཏེར་ཆེན་ཞིག་ཡིན། «གཏེར་སྟོན་བརྒྱ་རྩའི་རྣམ་ཐར་གསོལ་འདེབས་»ལས།ཁྱེའུ་ཆུང་ལོ་ཙཱ་མདོ་ཁམས་སྡེ་དགེར་སྤྲུལ། ། ཚ་བ་སྒྲོ་བྲག་སྤྲུལ་སྐུ་སྙིང་ཐིག་སོགས། ། གནས་གཏེར་བརྒྱ་རྩའི་མངའ་བདག་ས་བཅུའི་དབང༌། ། བདུད་འདུལ་ནུས་ལྡན་རྡོ་རྗེར་གསོལ་བ་འདེབས། །ཞེས་གསུངས་པ་ལྟར།རང་བྱུང་བཅུ་པའི་ཤིང་ཡོས་སྤྱི་ལོ་1615ལོར་ཡབ་གླིང་གི་རིགས་འཚོ་བྱེད་མཁས་པ་ཚེ་སྐྱབས་དང༌། ཡུམ་པོ་ལུ་མ་ཞེས་པའི་སྲས་སུ་མདོ་ཁམས་སྡེ་དགེ་ཆོས་རྒྱལ་ཆེན་པོའི་ཕོ་བྲང་དང་ཉེ་བའི་དངུལ་ཕུ་ནང་དུ་སྐུ་འཁྲུངས། ཡབ་ལས་ཡི་གེ་འབྲི་ཀློག་དང་གསོ་རིག་སོགས་བསླབས། དགུང་ལོ་དྲུག་པ་ནས་དག་པའི་སྣང་བ་མང་པོ་ཤར། ཆུང་དུས་ནས་དགོན་ཆེན་དགོན་པའི་གྲྭ་སར་ཞུགས། རིག་འཛིན་རྒོད་ལྡེམ་གྱི་རྣམ་འཕྲུལ་དུ་གྲགས་པ་སྡེ་དགེའི་རྒྱལ་སྲས་བླ་མ་ཀུན་དགའ་རྒྱ་མཚོ་ལ་གཙུག་ཕུད་ཕུལ། མཚན་ཀུན་དགའ་བསོད་ནམས་ཆོས་འཕགས་གསོལ། ས་སྐྱ་པའི་སྒྲིག་འདོན་ཆོ་ག་སོགས་མཁས་པར་སྦྱོང༌། དེ་ནས་སྨུག་སངས་སྒྲུབ་གནས་སུ་བྱོན་ཅིང་དཀོན་མཆོག་རྒྱལ་མཚན་ལས་རྫོགས་ཆེན་སོགས་རྙིང་མའི་ཟབ་ཆོས་མང་པོ་ཞུས། དེ་ནས་དབུས་སུ་ཕེབས་པར་ཉང་པོ་གྲུབ་ཆེན་བཀྲ་ཤིས་ཚེ་བརྟན་དང་ལས་གདམས་ངག་མང་པོ་ཞུས།བྲག་དཀར་ལྷ་ཆུ་ལ་ཁ་ཟས་སྤངས་ཏེ་བཅུད་ལེན་མཛད་ཅིང་རྩ་རླུང་ཐིག་ལེའི་རྣལ་འབྱོར་མཐའ་ཕྱིན་པར་མཛད།གཙང་ས་ངོར་ཐམས་ཅད་བྱོན་ནས་ལམ་འབྲས་སོགས་ས་སྐྱའི་ཆོས་སྐོར་རྣམས་གསན། ཕྱིར་ཕ་ཡུལ་དུ་ཕེབས་པའི་ལམ་བར་རིག་འཛིན་འཇའ་ཚོན་སྙིང་པོ་དང་མཇལ་ནས་དབང་ཁྲིད་རྫོགས་པར་ཞུས།ཁོང་གིས་གཏེར་གྱི་སྐལ་པ་ཅན་ཡིན་པར་ལུང་བསྟན།དགུང་ལོ་ཉེར་དགུ་པར་རིགས་ལྡན་མ་པདྨ་སྐྱིད་ལས་རྒྱར་བསྟེན་ནས་གཡུ་མཚོ་རིན་ཆེན་བྲག་ནས་གཏེར་གྱི་ཁ་བྱང་དང༌། སྤུ་བོ་འདོད་ཆུ་བདེ་ཆེན་གསང་བ་ཕུག་ནས་དམ་ཆོས་དགོངས་པ་ཡོངས་འདུས་ཀྱི་སྐོར་རྣམས་སྤྱན་དྲངས། ཚ་བ་སྒྲོ་མ་བྲག་ནས་དམ་ཆོས་སྤྲུལ་སྐུ་སྙིང་ཐིག་བཀའ་སྲུང་ཞིང་སྐྱོང་དང་བཅས་པ། སྤུ་རི་དྭགས་རྫོང་ཕུག་ནས་ཟབ་དོན་གསང་བ་སྙིང་ཐིག དཔལ་བདེ་མཆོགབཀའ་སྲུང་ཕྱག་བཞི་པའི་སྐོར་བཅས་དང༌།སྤུ་རི་ཤེལ་གྱི་ཡང་སྒྲོམ་ནས་སྙིང་ཐིག་ཚེ་ཡང་ཕུར་གསུམ་དྲིལ་སྒྲུབ་སྒོམ་སྒྲུབ་དང་བཅས་པ།སྲུང་མ་ཨེ་ཀ་ཛ་ཏཱི་དང༌། རང་བྱུང་རྒྱལ་མོའི་སྐོར། སྤུ་བོ་འདོད་ཆུའི་བྱང་ངོས་ནས་སྦས་ཡུལ་པདྨོ་བཀོད་པའི་གནས་ཡིགམདོ་ཁམས་སྡེ་དགེའི་ཁྲོ་ཟིལ་ཁྲོམ་དཀར་ཡག་ནས་ཡི་དམ་དམར་ནག་འཇིགས་གསུམ་གྱི་སྐོར་རྣམས་སྤྱན་དྲངས་པ་རྣམས་གཏན་ལ་ཕབས།གཞན་ཡང་བྱ་བུ་ལྕགས་ཕུར་ཅན་དང༌།བསམ་ཡས་དབུ་རྩེ་སྟེང་ཁང༌།ར་ས་འཕྲུལ་སྣང་གི་གློ་འབུར།སྤུ་བོའི་བདུད་རི་གནམ་ལྕགས་འབར་བ་སོགས་ཡུལ་མང་པོ་ཞིག་ནས་གཏེར་དྲངས་པ་རྣམས་གཏན་ལ་འབེབས་པར་མ་མཛད་ཅེས་གཏེར་བརྒྱའི་རྣམ་ཐར་ལས་གསུངས། དགུང་ལོ་ཞེ་གཉིས་པ་ཤིང་ལུག་1655ལོར་སྡེ་དགེ་བླ་ཆེན་བྱམས་པ་ཕུན་ཚོགས་ཁུ་དབོན་གྱིས་གདན་དྲངས། རྗེ་ཉིད་སྔར་བཞུགས་ཀྱི་གྲྭ་ཁང་མལ་དུ་བདུད་འདུལ་ལྷ་ཁང་དུ་གྲགས་པ་བཞེངས་ནས་བསྟན་སྲིད་ལ་ཕན་པའི་ལུང་དོན་བསྒྲུབ། དགུང་ལོ་ང་བརྒྱད་པ་རབ་བྱུང་བཅུ་གཅིག་པའི་ཆུ་བྱི་སྤྱི་ལོ་1672ལོར་སྐུ་གཤེགས།
བསམ་ཚུལ་འབྲི།
གསལ་སྟོང་ཤོ་སྒམ་པའི་རྣམ་ཐར།
འབྲེལ་ཡོད་ཀྱི་རྩོམ་གཞན།
-
༧སྐྱབས་རྗེ་ཁམས་སྤྲུལ་རིན་པོ་ཆེ་དགོངས་པ་གཞན་དོན་དུ་གཤེགས་པར་མྱ་ངན་དང་གདུང་སེམས་མཉམ་བསྐྱེད་ཞུ་བཞིན་ཡོད།
-
༈ འཕགས་ཡུལ་རྫོང་སར་བཤད་གྲྭའི་མཁན་ཆེན་ཀུན་དགའ་དབང་ཕྱུག་མཆོག་གི་མཛད་རྣམ།
-
འཛི་སྒར་བླ་མ་དབང་རྡོར་རིན་པོ་ཆེའི་རྣམ་ཐར།
-
མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
-
མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།