གཏམ་དཔེ་སྣ་ཚོགས།
གཏམ་དཔེ་ནི་སྤྱི་ཚོགས་ཚང་མའི་འཚོ་བ་དངོས་མ་དེ་མཚོན་བྱེད་ཀྱི་གདམས་ངག་ལྟ་བུའི་ཚིག་ཉུང་ལ་དོན་བསྡུས་པ་ཅན་ཞིག་ཡིན་ལ།ཕལ་མོ་ཆེ་ནི་གནའ་བོའི་ཕ་མེས་ཚོའི་ངག་རྒྱུན་ནས་བརྒྱུད་པ་ཞིག་ཡིན།དེ་བཞིན་བོད་མི་རིགས་ཀྱི་གཏམ་དཔེ་ལ་མཚོན་ནའང་བོད་མི་རང་གི་འཚོ་བ་དང་སེམས་ཁམས།གནད་དོན་དང་གླེང་བྱ་གང་དེ་གཞན་དག་ལ་ཐབས་མཁས་པོའི་ཐོག་ནས་བརྡ་སྤྲོད་པ་བྱེད་པའི་གནད་ཚིག་སྟབས་བདེ་ཅན་ཞིག་ཡིན་ལ།བསླབ་བྱ་དང་ཟུར་ཟ་སོགས་གོ་བར་བྱེད་པའི་ཚིག་ནུས་ལྡན་ཞིག་ཀྱང་ཡིན།དེ་བཞིན་བོད་མི་རིགས་ཀྱི་ཐུན་མིན་པའི་རིག་གཞུང་དང་།སྲོལ་རྒྱུན་གྱི་ཆ་ལག་གལ་ཆེན་ཞིག་ཀྱང་གྱུར་ཡོད།བོད་ཀྱི་གཏམ་དཔེ་ཕལ་མོ་ཆེའང་གདོད་མའི་དུས་རབས་ནས་བརྒྱུད་པའི་གདམས་ངག་གི་ཡང་ཞུམ་ལྟ་བུ་ཡིན་ལ།དུས་ཕྱིས་སུ་མཁས་པ་དང་ཤེས་ཡོན་པས་རྩོམ་བཞག་པ་དེ་འདྲའང་ཡོད།ད་ཐེངས་འདིར་སྡེ་དགེའི་ཡུལ་ཁམས་སུ་སྤྱོད་སྲོལ་ཆེ་བའི་གཏམ་དཔེ་འགའ་ཕྱོགས་བསྡུས་སུ་འགོད་རྒྱུ་ཡིན།
གཏམ་དཔེ།
ཀ་རྡོ་བཞིན་དུ་བརྟན་དགོས།།ཀ་བ་བཞིན་དུ་དྲང་དགོས།།
དཀར་ནག་གི་དབྱེ་བ་འབྱེད་དགོས།།ཐག་ནག་གི་མདུད་པ་འགྲོལ་དགོས།།
དཀར་པོ་བཏབ་སར་དཀར་པོ་ཡོང་།།ནག་པོ་བཏབ་སར་ནག་པོ་ཡོང་།།
བཀའ་ཡོ་བསྲང་ཐིག་ཤིང་བསྲང་འདྲ།།ལས་བདེན་རྫུན་སྨྱུག་མ་གས་འདྲ།།
སྐྱ་རེངས་ནམ་མཁའི་སྒོ་འབྱེད་ལ།།སྤར་མོས་ཁེབས་པ་ལར་ནས་མེད།།
དཀའ་བའི་ལས་ཤིག་མ་ལས་ན།།སླ་བའི་ཟས་ཤིག་རག་མི་ཐུབ།།
དཀར་ཡོལ་བཅག་ན་བཙེམ་ཚུལ་ཡོད།།སྒོང་ང་བཅག་ན་སྦྱོར་ཚུལ་མེད།།
རྐུན་མར་དཔའ་དར་མ་སྟེར།།སྤྱང་ཁུ་ཚེ་དར་མ་སྟེར།།
སྐད་ཆ་ཁ་ནས་ཐོགས་ནི་མེད།།ཡིག་ཁྱེར་བཙོན་ལ་བཟུང་ནི་མེད།།
སྐམ་པོ་རྡབས་ལོག་བྱེད་ན་ཆག་འགྲོ།།རློན་པ་གཅུས་ལོག་བྱས་ན་ཆད་འགྲོ།
སྐྱེ་ཡག་བུ་མོའི་ཚེ་རོགས་དེ།།བསམ་མི་མང་ཡང་བློ་མི་དཀོན།།
སྐྱིད་འོད་འཁོར་བའི་སོ་ནམ་དེ།།སྒྲུབ་མི་མང་ཡང་ཐོབ་མི་དཀོན།།
སྐམ་པོ་ཤིང་དང་དམར་པོ་མེ།།སྔོན་མོ་ཆུ་དང་རྣམ་གསུམ་པོས།།
སྐྱེས་པ་ཕོ་ལ་ལྟིག་གཅིག་དགོས། སྟོད་རུམ་ནང་ལ་རྡོ་ཞིག་དགོས།
སྐྱིད་ན་ནམ་མཁའི་བྱ་ཡང་འཁོར།།སྡུག་ན་རང་གི་བུ་ཡང་འབྲོ།།
ཁ་རྗེས་ལག་པས་མི་གཙེབས།།གནམ་མཐའ་སྤྲིན་གྱིས་མི་ཁེབས།།
ཁས་ལེན་རང་གིས་བྱས་པ་དེ།།སངས་རྒྱས་ཡིན་ཀྱང་འབྲོ་ཐབས་མེད།།
ཁོག་པ་གཤགས་རུང་དུང་དཀར།།ཁྲག་རྩ་བཅད་རུང་འོ་མ།།
འཁོར་མེད་ཉི་མ་སྤྲིན་བྲལ།།སྡང་མེད་དགྲ་བོ་སྤུན་འདྲ།།
ཁྱི་ཉལ་མའི་མགོར་རྡོ་བརྒྱབ།།མི་ཉམ་ཆུང་མགོར་གྱོད་བཞག།
ཁྱོད་རྒྱ་རྫོང་ནག་གི་ཤིང་དྲང་ན།།ང་ཤིང་བཟོ་རྒན་པོའི་ཐིག་ལོས་དྲང་།།
གྲུང་ཆེ་ན་སྤོས་ཤེལ་ཐལ་བ་འགམས། །གསལ་ཆེ་ན་ཆུ་ནང་ཉ་མོ་རིག།
མགོ་གསེར་གྱིས་བརྡུང་དང་རྡོ་ཡིས་བརྡུང་།།བྱིན་རླབས་མེད་པར་འདྲ་འདྲ་ཡིན།།
གྲོས་ལ་མི་ལ་དྲིས།།ཐག་རང་གིས་ཆོད། །
རྒྱུགས་ར་བྲག་ལ་བརྟེན་ན། །རྟ་ལས་ར་མགྱོགས།།
འགྲོ་རྒྱུ་མང་ན་བྱུ་དང་འཕྲད།།
གཅིག་གནོད་གཅིག་ལ་སྐྱལ་བ་དེ།།དག་གཤེད་སྲིད་པའི་བསྐོས་ཐང་རེད།།
ཆུ་ལ་དབྱུག་པ་བཞུས་ན། །ཉ་ལ་ཡང་ལྗིད་མི་འདུག །
ཉིན་བསམ་རྒྱ་ཡི་དཀྱིལ་འཁོར།།མཚན་བསམ་བྲང་ཐོག་ལག་བཞག །
གཏམ་ཁ་ཡིས་ཤོར་ན་བཟུང་རྒྱུ་མེད།།རྟ་ལག་པས་ཤོར་ན་རྐང་པས་བཟུང་།།
སྟག་པགས་སྲིན་བུས་བཙབས་ཀྱང་། །དགུ་མཚན་བཅུའི་གྲལ་འགོ།
བདེན་པ་གཡུ་ཡི་རལ་པ། །གནམ་ལྕགས་ཐོག་གིས་གཏོར། །མི་བདེན་དུག་གི་སྡོང་པོ། །བཟང་དྲུག་སྨན་གྱིས་བཅོས།
སྡེ་བན་དེས་དཀྲུགས། །གྱོད་ནག་མོས་བཟོས། །
འདོ་བ་རྟ་ལ་རྒྱུག་རྒྱུ་ཡོད་ན། །ཨ་ཆེན་ཐང་ལ་རྫོགས་རྒྱུ་མེད།
ཕ་བསད་ནས་མི་ཆོག་རི་འགོར་དམག་གིས་གང་། །འབྲོང་བསད་ནས་མི་ཆོག་རྔ་མས་དར་ཅོག་བཙུགས།།
ཕ་དྲིན་ཆེན་ལག་པ་རྡོ་ཡིས་བརྡུང་། །འབྲོང་རྟ་གསོད་རྭ་ཅོ་མར་གྱིས་རྒྱན། །
ཕོ་བརྒྱའི་གྲལ་མགོར་མ་སླེབས་ཀྱང་། །ཕོ་བཅུའི་གྲལ་མཐར་མ་ལུས་ཙམ་ཡོད།།
ཕུ་འཆུག་རྒྱ་གར་ཡུལ་ནས་འཆུག །མདའ་འཆུག་བོད་ཀྱི་ཡུལ་ནས་འཆུག །
ཕོ་ལོ་བཅོ་ལྔས་ཕ་ལ་བློ་མ་དྲིས། །མོ་ལོ་བཅོ་ལྔས་མ་ལ་ཟས་མ་སློང། །
བུ་མར་རྡོ་གཉིས་ལ་ཚུགས་མི་དགོས།།
བུ་ཕ་ཡིས་མི་བསྟོད་དགྲ་ཡིས་བསྟོད།།བུ་མོ་མ་ཡིས་མི་བསྟོད་གནས་ཀྱིས་བསྟོད།།
བློ་ཨེ་རེད་མཛར་བ་ཟ་ཟ། གྲོས་ཨེ་རེད་སྐུད་ཐག་བཀུག་བཀུག
བློ་རྩེ་གཉིས་ཀྱིས་འདོད་དོན་འགྲུབ་ལེ་མིན།།ཁབ་རྩེ་གཉིས་ཀྱིས་འཚེམ་བུ་ཡོང་ས་མེད།།
མི་ཆག་གསེར་གྱི་ཕར་བང་དེ།།ཁྱིམ་དུ་མེད་ན་རྒྱུ་མིན།།
མི་སུམ་ཅུར་བསམ་བློ་སུམ་ཅུ་དང། །མཛོ་སུམ་ཅུར་རྭ་ཅོ་དྲུག་ཅུ།
མི་གཤིས་ངན་པ་བསྒྱུར་རྒྱུ་མེད།།གོར་མོ་རྡོ་ལ་སྦང་རྒྱུ་མེད།།
མི་ཉམ་ཆུང་སྟེང་ལ་མཉམ་སྡང་།།གད་དམའ་བོའི་སྟེང་ལ་ཆུ་འབབ།།
མི་ངན་གཡོ་ཆེ་ན་སྐྱག་པ་ཁྱིམ་ལ་གཏོང་།།ཁྱི་ངན་འདྲིས་ཆེ་ན་བདག་པོའི་འགྲམ་རྩ་ལྡག།
མི་ངན་ཁ་ནས་གཏམ་ངན།།བ་གླང་རྐུབ་ནས་རྙང་པ།།
མི་ངན་སེམས་རྩ་དཀར་རྒྱུ་མེད།།ཡུལ་ངན་གནམ་ངོ་དྭངས་རྒྱུ་མེད།།
མི་ལ་རྟོག་དཔྱོད་མེད་ན་ཁྱི་རྒན་ཡིན།།རྟ་ལ་གོམ་འགྲོས་མེད་ན་བོང་བུ་ཡིན།།
མི་ཆེན་བསམ་རྒྱུ་རང་ཆུས།།མི་ངན་བསམ་རྒྱུ་རང་ཕོར།།
མི་མང་ཁ་དེ་ཐན།།མི་མང་ལག་དེ་གསེར།།
མི་རེ་རེའི་སེམས་ན་ཕུགས་བསམ་རེ་ཡོད་དགོས།།ཞིང་ཆུ་མ་རེ་ན་རྐ་རེ་ཡོད་དགོས།།
སྨྱོ་རིགས་མེད་ན་མིག་རྩ་དམར་དགོས།འཇའ་རིགས་མེད་ན་མགོ་བོ་ཆེ་དགོས།
སྨན་བཟང་དྲུག་མི་ཁ་ཆེ་བ་ལས།།རྡོ་རྡུ་པོས་ནད་སྲོག་པར་དགའ།།
མཚོ་སྔོན་མཐོ་པོའི་རི་ལ།།ཅི་ཡོད་བསུས་རྒྱུ་ལར་ནས་མེད།།
ཟ་རྒྱུ་ཁབ་ཙམ་མེད་པར།།ཟེར་རྒྱུ་རི་ཙམ།།
རང་ཤ་བཅད་ཁྱི་སྔོན་འཕེན།།
ལོ་གཅིག་སྟོན་ཐོག་ཉེས་ཀྱང་ཉེས་པ་མིན།།གཏན་གྱི་འདུན་མ་ཉེས་ན་ཉེས་པ་ཡིན།།
ཤ་ཚ་བའི་གཏམ་ལ་སྙན་པོ་མེད།།ནད་མཁྲིས་པའི་སྨན་ལ་མངར་མོ་མེད།།
ཤར་རི་མཐོ་ན་ནུབ་རིའི་རྒྱན། ནུབ་རི་མཐོ་ན་ཤར་རིའི་རྒྱན། །རི་གཉིས་ཀ་མཐོ་ན་ལུང་པའི་རྒྱན།
སུམ་ཅུའི་གྲལ་མགོར་མ་སླེབས་ཀྱང་། བཅོ་ལྔའི་རང་ཁྲལ་འཇལ་ཐུབ།
ཨ་རོགས་མདའ་འདྲ་བྱས་ན་མདའ་འདྲ།།ཨ་རོགས་གཞུ་འདྲ་བྱས་ན་གཞུ་འདྲ།།
ཆོས་ཀྱིས་སངས་མ་རྒྱས།དྲིལ་བུས་སྙིང་རླུང་སློང་།
ངོ་ཤེས་པ་ལས་ཡག་པ་མེད།རྒྱུས་ཡོད་པ་ལས་སྡུག་པ་མེད།
ངན་པ་དཔོན་ལ་གྱུར་ན།རང་གི་སྡེ་ལ་སྡང་།
རྒྱ་གར་ཨ་ཙ་ར་ཡི་རོ་གོས་དེ།བོད་བསྟན་པ་དར་བའི་དར་ལྕོག་བྱེད།
མགོ་རིལ་རིལ་ཡོད་ཚད་དགེ་འདུན།གོས་སེར་སེར་གྱོན་ཚད་བླ་མ།
གྲོགས་པོས་བསླུ་དུས་དགོད་བཞིན་བསླུ།ཁྲམ་པས་བསླུ་དུས་ངུ་བཞིན་བསླུ།
མཁས་པ་མི་གཙོ།རྒྱུས་ཡོད་གཙོ།
ཁྱིམ་མཚེས་ཞེ་སྡང་མེད་ན།གྲོང་པ་ཡར་རྒྱས་མེད།
བཀའ་དྲིན་བསམ་ཤེས་མེད་པར།དྲིན་ལན་ལོག་འཇལ།
སྤྱང་ཀི་རྒས་ནས་མཐོལ་ལོ་བཤགས།
སྤྱང་ཀི་མ་ལྟོགས་ཙམ་དང་ལུ་གུ་མ་ཤི་ཙམ།
སྣམ་བུ་དཀར་པོའི་ཚོས་མདོག་གང་ལ་སྒྱུར་སྒྱུར།
བུ་མ་སྨྱོ་ཙམ་དང་མུ་མོ་མ་ལྐུགས་ཙམ་དགོས།
ཚིག་གསུམ་དར་གྱི་མདུད་པ།མི་འགྱུར་རྡོ་ཐོག་ཡི་གེ།
འབུ་རྭ་ཅོ་ཅན་ལ་འབྲོང་མི་ཟེར།སྦྲང་མ་ཐིག་རིས་ཅན་ལ་སྟག་མི་ཟེར།
ཁ་སྟོང་ནང་གི་ཚིག་སྟོང་།ལག་སྟོང་ནང་གི་ཕྱག་རྒྱ།
ཧོར་ཆེན་རྒྱལ་པོའི་མངའ་འོག ཧོར་ཞྭ་མི་གྱོན་ཀ་མེད།
ལས་ངན་པའི་སྡིག་པ་མ་བསགས་ན།སྐྲག་མི་དགོས་གཤིན་རྗེ་ཆོས་རྒྱལ་ཡིན།
ཡོད་ལ་མེད་པའི་རྟ་ཕོ་ལས།བློ་ཐག་ཆོད་པའི་རྐང་ཐང་མགྱོགས།
བསམ་ཚུལ་འབྲི།
གླིང་བྲོ་བདེ་ཆེན་རོལ་མོའི་ཕན་ཡོན་དང་སྟངས་སྟབས།