ཁམས་སྐད་ཐ་སྙད་ཁ་སྣོན། མཁས་དབང་ཐུབ་བསྟན་ཕུན་ཚོགས།
ཁམས་སྐད་ཐ་སྙད་ཁ་སྣོན།
ཁམས་ཕྲུག་ཁ་ལ་འབྲོག་པའི་ལྕེ་རྩྭ་སྐྱེས། །
ཁམས་པའི་ཨ་མ་མིག་ཆུ་བཞུར་པའི་དུས།
ཁམས་མོའི་ནུ་ཞོས་བསྐྱེད་པའི་མ་སྐད་རྣམས།
རྒྱ་ནག་ཡུལ་ནས་རྒྱལ་ཁམས་པ་དེས་ཕུལ།
ཐུབ་བསྟན་ཕུན་ཚོགས།
༼ཀ༽
ཀིས་མ།
འོ་མ་ལ་སྐྱུར་རྟ་ཅུང་ཟད་བླུག་ཅིང་དལ་བུས་བསྐོལ་ན་རིམ་བཞིན་འོ་མ་རུལ་ཏེ་གོང་བུའམ་འཚིག་འཚིག་ཆགས་པ་དེ་ལ་ཀིས་མ་ཟེར། འཁྱུར་བ་རློན་པའི་མིང་། ཀིས་མ་སྐམ་པོར་ཆགས་ན་འཁྱུར་བ་ཡིན།
རྐྱག་པ།
སྐྱག་པ་དང་དོན་གཅིག མི་ཉག་འཇམ་དབྱངས་གྲགས་པས་བྲིས་པའི་ཡེ་ཤེས་རྡོ་རྗེའི་རྣམ་ཐར་དུ་གསལ།
སྐུགས།
རྒྱན་འགྱེད་པ་སྟེ་རྒྱུ་དངོས་སོགས་རྒྱན་བཙུགས་ནས་རྒྱལ་ཕམ་འགྲན་བསྡུར་བྱེད་པ། དཔེར་ན། དེང་སང་མི་ཚོས་མ་ཅང་རྒྱེབ་དུས་སྐུགས་ཆེན་པོ་བཞག་ཅིང་འདུག ལྟ་བུའོ།
སྐུགས་བཞག
སྒོར་མོ་དང་རྒྱུ་ནོར་སྣ་ཚོགས་རྒྱན་དུ་འཛུགས་ནས་རྩེད་མོ་རྩེ་བའི་ལས་བྱེད་པའི་དོན།
སྐུགས་ར།
དེང་དུས་གློག་རྩེད་འཕྲུལ་ཆས་དང་། ཤོག་བགས་ལ་སོགས་རྩེད་ཆས་སྣ་ཚོགས་ཀྱི་སྒོ་ནས་སྒོར་མོ་རྒྱན་དུ་འཛུགས་སའི་ཚོང་ར་ཆེན་པོའི་རིགས་རྣམས་ལ་ཟེར།
སྐྲ་ཚར།
ཁམས་ཕྱོགས་སུ་སྐྱེས་པ་རྣམས་ཀྱི་མགོའི་སྐྲ་བསླས་མའི་སྣེ་ལ་འདོགས་རྒྱུའི་སྟོང་སྐུད་དམར་པོ་དང་། ནག་པོས་བཟོས་པའི་ཚར་ལུ་ལ་ཟེར།
སྐྲག་མོ།
༡ ཞེད་སྣང་ཚ་བོའི་དོན་སྟེ། ལྷ་ཁྲོ་བོའི་སྐུ་དེ་སྐུ་ཁ་གདངས་མིག་བགྲད་འདུག་པ་སྐྲག་མོ་གཅིག་འགི། རིག་ཡོང་དུས་སྐྲག་འོང་ཡས་ཤིག་འགི་ཞེས་དང་། ཨེ་རྫིའི་ནད་དེ་ན་ཚ་སྐྲག་མོ་རེད་ལྟ་བུ། ༢ ［རྒྱན་ཚིག］ཧ་ཅང་དང་། ཞེ་དྲག་སོགས་དང་དོན་གཅིག་ཏེ། སྒྲ་སྙན་པོ་སྐྲག་མོ་གཅིག་འགི། གཟུགས་མཛེས་པོ་སྐྲག་མོ་གཅིག་འགི མི་མང་པོ་སྐྲག་མོ་གཅིག་འགི རྟ་མགྱོགས་པ་སྐྲག་མོ་གཅིག་འགི་ལྟ་བུའོ།
བསྐྱག་སྟོན།
ཁམས་སྐད་དུ། རིའི་སྐེད་དུ་ཡོད་པའི་ཐང་ཆུང་གི་མིང་། དཔེར་ན། རིའི་བསྐྱག་ན་ངལ་གསོ་བྱེད། འབུ་བརྐོ་འགྲོ་སྐབས་ བསྐྱག་སྟོན་ཐོག་དུ་གུར་ཕུབ་ནས་ཉིན་ཤས་འདུག་ལྟ་བུ།
༼ཁ༽
ཁ་བརྡོས།
ལབ་གླེང་གི་དོན། ངེད་གཉིས་ཁ་བརྡོས་ལབ་བཞིན་ཡོད། མི་ཕར་འདི་གཉིས་ཁ་བརྡོས་ལབ་བཞིན་འདུག ང་ལ་ཁ་བརྡོས་གཅིག་ལོབས་དང་ལྟ་བུ།
ཁ་མ།
ཚབ་དང་དོན་གཅིག དཔེར་ན། དེ་རིང་ཨ་ཕའི་ཁ་མར་ང་ལས་ཀ་འགྲོ་ཆོག ཁྱོའི་སྟོད་ཐུང་དེ་ངས་གྲོགས་པོ་ལ་སྤྲོད་དགོས་བྱུང་སོང་། སོང་ཉིན་ངས་དེའི་ཁ་མ་གཅིག་ཉོ་འོང་། ལྟ་བུ།
ཁ་རིན་བརྩི།
མི་གཞན་ལ་རོགས་པ་བྱེད་ཚར་པའམ་བྱེད་ཞོར་དུ་ལས་དེ་བྱས་པའི་དཀའ་དྲིན་བཤད་པ་དང་། དཀའ་ངལ་སོགས་མང་པོ་འགྲེལ་བཤད་བྱ་བ་ལ་ཁ་རིན་བརྩི་ཟེར་བ་རེད།
ཁ་རུ་གཤིན་པོ།
མི་དང་སེམས་ཅན་སོགས་གཤིས་འཇམ་ཤིང་དལ་བའི་དོན་ཏེ། དཔེར་ན། རྟ་ཁ་རུ་གཤིན་པོ་ཟེར་ན། འཁྲིས་ལ་བཅར་ན་སོ་མི་འདེབས་ཤིང་འཕྲ་ཁ་མི་རྒྱེབ་པའི་རྟ་གཡུང་པ་ལ་ཟེར། བཟའ་ཚང་ཁ་རུ་གཤིན་པོ་ཞེས་པ་ནི། དུས་རྒྱུན་འཁྲུག་པ་མི་བྱེད་མཁན་ལ་ཟེར།
ཁ་རོག་སྒུར་བསྡད་ཡོད།
ལས་ཀ་དམིགས་གསལ་མེད་པས་ལུས་སེམས་གཉིས་ཀ་གཡོ་འགུལ་ཆེར་མེད་པ་དལ་པོར་ཉི་མ་གང་འཁྱོལ་ལྟ་བུ་བསྡད་ཡོད་པའི་དོན་ཡིན། དཔེར་ན། ང་དེང་སང་ལས་ཀ་མང་པོ་མེད་པས་ཁྱིམ་ནང་ལ་ཁ་རོག་སྒུར་བསྡད་ཡོད། མགོ་ཁྲིད་རྣམས་ལས་ཡོལ་ཚར་དུས་ཁ་རོག་ཉི་མ་འདེ་ལེ་སྒུར་བསྡད་འགི། ལྟ་བུའོ།
ཁ་རོག་སྡོད།
སྐུལ་ཚིག ཁྱོད་རང་ཁ་རོག་སྡོད་དང་རྙོག་དྲ་གང་ཡང་ཡོད་མ་རེད། ལྟ་བུ།
ཁ་རོག་བསྡད།
༡ ལུས་ངག་གི་བྱ་ལས་གང་ཡང་མི་བྱེད་ཅིང་ཙོག་གེར་འདུག་པའི་དོན་ཡིན། དཔེར་ན། ཁོ་ཁ་རོག་བསྡད་འགི་ལྟ་བུ། ༢ སྤྱི་བཏང་བྲེལ་བ་མེད་པའི་དོན་སྟེ། དགུན་དུས་ཞིང་པ་རྣམས་ཁ་རོག་བསྡད་འདུག་ལྟ་བུ།
ཁ་ལས་དགེ་མོ།
ཕྲུ་གུ་ཕ་མའི་སློབ་གསོ་ལ་ཉོན་མཁན་ལ་ཟེར། ཕྲུ་གུ་འདི་ཁ་ལས་དགེ་མོ་ཞིག་ཡོད། ངས་ཅི་མངགས་ན་བསྒྲུབ་བགྱི་རེད། ལྟ་བུ།
ཁ་ལས་སྣ་ལས།
ལས་ཀ་ཙག་ཙིག་ཆུང་ངུ་མཐའ་གཅིག་ཏུ་འདི་ཞེས་མེད་པ་ལ་ཁ་ལས་སྣ་ལས་ཟེར། ངས་ནང་ལ་ཁ་ལས་སྣ་ལས་བྱས་པས་དུས་ཚོད་འགྲོ་ཚར་འདུག ལྟ་བུ།
ཁོ་ཧུ།
ཁང་པའི་སྒོ་དང་། སྒམ་སོགས་ཁ་གཟེར་མ་རྒྱེབ་ཆས་ཀྱི་དངོས་པོ། སྒོ་ལྕགས་དང་དོན་གཅིག
ཁྱར།
〔ཡུལ〕ཁང་པའི་སྒོ་དང་། སྣོད་ཀྱི་ཁ་ལེབ་སོགས་བརྒྱབས་པའི་དོན་ཏེ། ད་ལྟ་ཚོང་ཁང་གི་སྒོ་ཁྱར་ཚར་འདུག སང་ཉིན་ཞོགས་པ་སྒོ་ཕྱེ་ལིས་རེད། སྒོ་ཁྱར་དང་སྒོ་རྒྱེབ་གཉིས་ཀ་བེད་སྤྱོད་སྲོལ་འདུག སྐུལ་ཚིག་ལ་ཁྱོར་ཟེར། སྒོ་དེ་ཁྱོར་དང་། སྣོད་དེའི་ཁ་ལེབ་ཁྱོར་དང་ལྟ་བུའོ།
ཁྱི་རྡ་ལེ།
ཁྱིའི་རིགས་གང་ཞིག གཟུགས་ཕྲ་ལ་ཤ་སྐམ་པ། སྐད་ཕྲ་བ། སེམས་སྤོབ་ཆུང་བའི་རིགས་ཤིག །
ཁྱི་འབྲབ་རྒོད།
འབྲོག་པའི་དགྲ་རྐུན་གཅན་གཟན་སོགས་སྲུང་མཁན་ཁྱི་གཟུགས་སྟོབས་དང་སྙིང་ཁམས་ཆེ་བ། བདག་པོར་སྲུང་སྐྱོབ་བྱ་རྒྱུའི་སེམས་ཤུགས་ཆེན་པོ་ཡོད་པ། བོད་ཡུལ་ཁོ་ན་ལས་མེད་པའི་ཁྱི་རིགས་ཤིག
ཁྲམ་པ་དང་ཇུམ་མ།
ཁྲམ་པ་ནི་རྒྱུ་མཚན་དང་གནས་ལུགས་ལ་མི་བརྩི་བ་རང་གི་སྟོབས་ནུས་དང་བསྟུན་ནས་གཞན་ལ་ཐུབ་ཆོད་ཀྱིས་གནོད་པ་གཏོང་མཁན། ཇུམ་མ་ནི་གཡོ་སྒྱུའི་སྒོ་ནས་གཞན་ལ་མགོ་བསྐོར་གྱི་སྒོ་ནས་གནོད་པ་སྐྱེལ་མཁན། ཁྲམ་པའང་ཡིན་ལ་ཇུམ་མའང་ཡིན་པ། ནུས་ན་རང་སྟོབས་ཀྱིས་ཕ་རོལ་བཅོམ་ལ་མ་ནུས་ན་གཡོ་སྒྱུར་གྱིས་གཞན་བསྐོར་ནས་རང་གི་ཕན་བསྒྲུབ་མཁན་གྱི་མི་སྟེ་ཕལ་ཆེར་བླ་གཟུགས་ཅན་ཞིག་ཡིན་དགོས།
འཁི་འུ།
གཡག་དང་འབྲིའི་ལུས་ཀྱི་སྤུ་འཇམ་པོའི་རིགས་ལ་འཁི་འུ་ཟེར།
འཁི་ལུ།
འཁི་འུ་དོན་གཅིག་ཡིན།
འཁིང་།
གྲང་ངའི་སྟོབས་ཀྱིས་བརླན་གཤེར་རིགས་རྣམས་གོང་བུ་སྲ་མོ་ཆགས་པའི་མིང་། དགུན་དུས་ས་འཁིང་། གྲང་སྒམ་དང་ཤ་འཁིང་། གངས་རིའི་ནང་དུ་རྐང་ལག་འཁིང་ནས་ཤི་སོང་བ་རེད་ལྟ་བུའོ།
༼ག༽
གེར་དིག
མི་སེར་སྣ་ཅན་གཞན་ལ་བཏང་བའི་བློ་ཞན་པའི་མི། དཔེར་ན་མི་དེ་གེ་དིག་རེད།
གཞན་ལ་རོགས་པ་བྱེད་ཀྱི་མ་རེད། ལྟ་བུའོ། གེ་དིག་དང་། མ་རབ། གཏེ་ཐུག རྨུ་འཁུམ་རྣམས་དོན་གཅིག་པར་སྣང་།
གོ་གཟས།
ཁམས་པའི་ཡུལ་སྐད། གོས་ཆས་སྤྱིའི་མིང་། དཔེར་ན། གོ་གཟས་ཡར་གྱོན། མགྲོན་པོ་སླེབས་བྱུང་། ལྟ་བུ་སྟོད་གོས་ཕུད་ནས་ལྷོད་པོར་སྡོད་པའི་སྐབས་མགྲོན་པོ་སླེབས་ན་སྒྲིག་དང་ལྡན་པ་བྱ་དགོས་པའི་དོན། ཡང་། ཕྱི་ལོགས་སུ་ལྟ་བསྐོར་འགྲོ་སྐབས་ཆས་གོས་ཡོངས་སུ་གསར་དུ་བརྗེ་དགོས་ན། མགྱོགས་པོར་གོ་གཟས་བརྗེས། ལྟ་བསྐོར་འགྲོ་རན་བྱུང་ལྟ་བུའོ། །
རྒེ།
ཁམས་ཀྱི་ཡུལ་སྐད། ཆེན་པོའི་དོན། མགོ་ཆེན་པོ་ལ་མགོ་རྒེ། སྣ་ཆེན་པོ་ལ་སྣ་རྒེ་ཟེར་བ་ལྟ་བུ།
རྒོབ་རྒོབ།
〔རྒྱན་ཚིག〕རང་གཤིས་བསྒྱུར་ནས་ཆེ་མདོག་གི་རྣམ་པ།
རྒོབ་རྒོབ་ཅན།
〔མིང་ཚིག〕ཕལ་ཆེར་ཀྲོག་ཀྲོག་ཅན་དང་དོན་གཅིག ང་རྒྱལ་གྱི་རྣམ་པས་རང་གཤིས་ལ་གནས་སྐབས་སུ་བཅོས་པའི་རྣམ་པ་ཅན་སྟེ། མི་དེས་རྒོབ་བྱེད་ནས་བཟའ་བཏུང་ཡག་པོ་བྱས་མ་སོང་། མི་དེས་རྒོབ་བརྡུང་ནས་མེད་ནའང་ཡོད་མདོག་བྱེད་ཅིང་འདུག་ལྟ་བུ།
རྒོབ་རྒོབ་མཛེས་མཛེས།
〔རྒྱན་ཚིག〕རྒོབ་རྒོབ་དང་དོན་གཅིག
རྒོབ་བྱེད།
རང་ལ་རྒྱུ་ནོར་མེད་ནའང་ཡོད་པའི་ཟོལ་བྱེད་པ་ལ་རྒོབ་བྱེད་ཟེར།
རྒོབ་བརྡུང་།
〔བྱ་བྱེད་ཐ་མི་དད་པའི་བྱ་ཚིག〕རང་གཤིས་བསྒྱུར་ནས་ཆེ་མདོག་གི་ལས་བྱ་བ།
སྒུར།
ལུས་རྣམ་འགྱུར་མི་མཛེས་པ་དང་། གཡོ་འགུལ་ཆེར་མེད་པའི་དོན་ཡིན། དངོས་རྫས་ཀྱི་དབྱིབས་དགུ་པོ་ལ་གནའ་དུས་ཡིག་རྙིང་ཐམས་ཅད་ལས་དགུ་པོ་ཞེས་བྲིས་པ་མང་ངོ་། སྒུར་ཞེས་པ་རྣམ་པ་མི་མཛེས་པའི་དོན་དུ་བྲིས་འདུག དཔེར་ན། ཕར་ན་མི་ཞིག་སྒུར་རེ་ལང་འདུག རྟ་འདི་སྒུག་རེ་བསྡད་འདུག་རྩྭ་གཏན་ནས་ཟ་ཞིང་མི་འདུག ཕལ་ཆེར་ནད་ཅིག་ཡོད་པ་འདྲ། ལྟ་བུ་དང་། ཡང་། དེང་སང་ལས་ཀ་ཆེན་པོ་མི་འདུག ཁ་རོག་ཁྱིམ་ནང་ལ་སྒུར་བསྡད་ཡོད། ལྟ་བུ་གཡོ་འགུལ་ཆེར་མེད་པའི་དོན་ཡིན།
སྒ་སྒྲིས།
རླངས་འཁོར་གྱི་མིང་། དཔེར་ན། སྡེ་དགེ་ནས་སྒ་སྒྲིས་བསྡད་ནས་ལྷ་ས་བར་དུ་ཕྱིན། དེ་ནས་མེ་འཁོར་བསྡད་དེ་པེ་ཅིང་ཕྱིན། དེ་ནས་གནམ་གྲུ་བསྡད་དེ་ཨ་མི་རི་ཀ་ལ་ཕྱིན་པ་ཡིན་ལྟ་བུ།
སྒ་སྒྲིས་འཁོར་ལོ།
འགྱིག་གིས་བཟོས་པའི་རླངས་འཁོར་རྒྱུག་བྱེད་ཀྱི་འཁོར་ལོ།
གྱམ།
ཆུས་ཡང་ཡང་བཤལ་བའི་དོན། དཔེར་ན་སྣོད་དེ་ཆུས་གྱམ་གྱམ་གྱིས། ཁྲུས་ཆུས་ཁ་གྱམ་ནས་སྨྱུང་གནས་ཀྱི་སྡོམ་པ་ལེན་དགོས།
གྲག
① ལོ་གྲག་ཟེར་གསུམ་གྱི་གྲག་སྟེ་མ་འདོད་པ་དང་། མ་རངས་པའི་ཚིག་ཤུགས་སྟོན་པའི་ཕྲད་ཅིག མི་དེ་མཁས་པ་རེད་ཟེར་གྲག ལས་ཀ་འགྲུབ་མིན་མཐུན་རྐྱེན་ཡོད་མེད་ལ་རག་ལས་པར་གྲག ད་ལོ་བོད་ལ་དབྱར་རྩྭ་དགུན་འབུ་མང་པོ་སྐྱེ་འགི་ཟེར་གྲག་ལྟ་བུ་དང་། མ་རངས་པའི་ཚིག་དོན་སྟོན་པ། བུམ་པ་བདེན་གྲུབ་ཏུ་གྲག བདེ་བ་ཅན་ཞེས་ཡོད་པར་གྲག དམྱལ་བ་ཟེར་བ་ཞིག་ཡོད་པར་གྲག ② ན་ཚ་སོགས་མི་མངོན་པར་ཡོད་པའི་ཚོར་སྣང་ཞིག་སྟེ། ང་ན་གྲག ང་ལྟོགས་གྲག ང་སྐྱིད་གྲག ང་སྐྲག་གྲག་སོགས་ལྟ་བུའོ། ③ ཕན་ཚུན་བསྡུར་བའི་བཟང་བ། བོད་ཡིག་ཀློག་དགོས་ན་ང་ལས་ཁོ་གྲག མགྱོགས་པར་རྒྱུག་དགོས་ན་རྟ་གྲག བརྟན་པོ་དགོས་ན་གཡག་གྲག་ལྟ་བུ།
གློག་རྫས་ཤུགས་མཛོད།
དེང་དུས་གློག་རྫས་ལ་གློག་ཤུགས་སྣོན་བྱེད་ཀྱི་སྒམ་ཆུང་། རྒྱ་སྐད་དུ། 充电机
རྒྱེབ།
འདས་པ་ལ་བརྒྱབ་དང་། ད་ལྟ་དང་མ་འོངས་གཉིས་ལ་རྒྱེབ། སྐུལ་ཚིག་ལ་རྒྱོབ་ཅེས་འཇམ་མགོན་ཀོང་སྤྲུལ་གྱི་རང་རྣམ་དང་། སི་ཏུའི་རྣམ་ཐར་དང་། རྫ་དཔལ་སྤྲུལ་གྱི་གསུང་རྣམས་སུ་བརྒྱབ། རྒྱེབ་ཅེས་བྲིས་འདུག དཔེར་ན། སྒར་བརྒྱབ། གཏོར་བརྒྱབ། རྒྱེབ་ཆོག་བྱས། ཁྱི་ལ་རྡོ་བརྒྱབ་ཅེས་བྲིས་འདུག འདི་དག་ནི་ཡིག་སྐད་དང་ཁ་སྐད་གཉིས་ཀ་ལ་ཡོངས་གྲགས་རེད། །
དེང་དུས་བརྒྱབ་དང་རྒྱེབ་ཀྱི་ཚབ་ཏུ། བརྒྱག་དང་རྒྱག་ཅེས་བྲིས་པ་ནི་ནོར། འདི་ནི་ཁ་སྐད་དང་ཡིག་སྐད་གཉིས་ཀ་དང་འགལ་བའི་འབྲི་སྲོལ་ཞིག་ཡིན་འདུག །
རྒྱག་པ་ནི་ཤ་རྒྱག་པའི་དོན། རྒྱགས་ནི་བྱེས་བགྲོད་སྐབས་ཀྱི་ལྟོ་ཆས་ཀྱི་མིང་། བརྒྱག་དང་། རྒྱག བརྒྱགས་བཅས་ནི་བྱ་ཚིག་སྟེ་ལྟོ་བ་འགྲངས་པའི་དོན་ཡིན་པ་ལས་རྡོ་སོགས་བཞུས་པའི་དོན་མིན། དེང་དུས་ཁམས་པའི་མཁས་པ་རྣམས་ཀྱི་ཁ་ལ་ཡིག་སྐད་དང་ཁམས་སྐད་གཉིས་ཀ་མིན་པའི་འབྲོག་སྐད་ལད་ཟློས་བྱས་པའི་ལས་ཚིག་ཕུང་གསུམ་པ་མང་ཞིག་ཐོན་དོན་བཞིན་པ་འདི་ལ་གཞོན་ནུ་རྣམས་ཀྱིས་བག་ཡོད་པར་གྱིས་ཤིག །
སྒྲོབ་ལོ།
འོ་མ་དཀྲོག་བྱེད་ཀྱི་ཡོ་བྱད་ཅིག ཤིང་ལེབ་མོ་ཞིང་དུ་སོར་ལྔ་ཙམ་དང་། དཀྱུས་སུ་ཟོམ་ཆེ་ཆུང་དང་བསྟུན་པའི་ལེབ་མོ་གཉིས་རྒྱ་གྲམ་གྱི་བསྣོལ་ཞིང་དཀྱིལ་དུ་བུ་ག་ཞིག་ཕུག དེའི་ནང་དུ་དབྱུགས་པ་རིང་ཙམ་གྱི་ཡུ་བ་སྦྲས་ནས་འོ་ཟོམ་ནང་གི་འོ་མ་དཀྲོག་བྱེད་ཅིག་ཡིན།
དགོས་ཡག་ཡིན།
ཁམས་པའི་ཡུལ་སྐད། གཞན་ལ་མི་འདོད་པར་བྱུང་བ་ལ་ཡིད་ཚིམ་པའི་གཏམ། ཁོས་ང་དང་གྲོགས་པོ་མ་བྱས་པ་མི་གཞན་དང་འབྲེལ་བ་བྱས་སོང་། ད་ལྟ་མི་གཞན་གྱིས་ཁོ་ལ་མགོ་བསྐོར་གཏོང་འདུག་ཟེར། དེ་དགོས་ཡག་ཡིན། ཞེས་པ་དང་། མགོ་ཁྲིད་དེ་མཁས་བཀྱག་ཆེན་པོ་རེད། ད་ལྟ་ཁོའི་གོ་གནས་བབས་འདུག་ཟེར། དགོས་ཡག་ཡིན། ཞེས་པ་ལྟ་བུ་ཡིད་ཚིམ་པའི་སྐད་ཆ་བཤད་པ་ལྟ་བུའོ།
བསྒོ་འཇོངས་བྱེད།
ཇ་དང་ཆུ་སོགས་འཐུང་ཐེངས་གཅིག་གིས་ཕོར་རུ་གང་པོ་དེ་བཏུང་ཚར་བར་བྱེད་པའི་དོན་ཏེ། ཁོས་ཆང་ཕོར་རུ་གང་བསྒོ་འཇོངས་བྱས་སོང་། ཁ་སྐྲག་མོ་གཅིག་སྐོམ་ཡོད་པ་འདྲ་ལྟ་བུ། ཞལ་བསྟབ་དང་དོན་གཅིག
བགྱི།
ལས་ཚིག་གི་ཚིག་གྲོགས། ང་འགྲོ་བགྱི་མིན། ངས་བཟའ་བགྱི་མིན་ལྟ་བུ། འདས་པ་བགྱིས། མ་འོངས་པར་བགྱི། ད་ལྟ་བ་བགྱིད།
བགྱིས་ཚད།
དངོས་པོའི་ཚད་ཉུང་བ་དང་། དུས་ཡུན་ཅུང་ཐུང་བ་བཅས་ཀྱི་མིང་། འབྲུ་རིགས་བགྱིས་ཚད་ཉོ་དགོས། བགྱིས་ཚད་སྒུག་དང་ང་སླེབས་འོང་ལྟ་བུའོ།
མགུར་མོ།
ཕོ་མོ་གཞོན་ནུ་མང་པོ་ཚོགས་པའི་སྐབས་སུ་སོ་སོའི་ཅ་ལག་སྣེ་རེ་བསྡུས་ཏེ། དེ་དག་མི་སོ་སོར་མཚོན་བྱེད་དུ་འཇོག་ཅིང་། དེ་ནས་མི་གཅིག་གིས་ཅ་ལག་གཉིས་སྦར་མོ་གཡས་གཡོན་དུ་འཛིན་ཅིང་། མི་གཞན་ཞིག་གིས་དངོས་པོ་དེ་གཉིས་ཀྱི་ཚབ་བྱེད་ནས་ཕན་ཚུན་གཞས་དང་། ཡང་ན་ལ་ཡི་རེ་ལེན་ཅིང་དེའི་འབྲས་བུ་གང་རེད་བརྟགས་པའི་རྩེད་མོ་ཞིག་རེད། དོན་དུ་དངོས་པོ་གཉིས་ཀྱི་བདག་པོ་སོ་སོས་ཕན་ཚུན་སེམས་ཀྱི་རྣམ་འགྱུར་ཇི་ལྟར་འཛིན་ཡོད་པ་མོ་འདེབས་པའི་ཚུལ་ཞིག་ཡིན་པས་ན་མགུར་མོ་ཟེར།
མགོ་རྟིང་རྒོལ་རྒྱུ།
གཞན་ལ་དམོད་བོར་བའི་ཚིག་སྟེ། མགོ་མཐུར་དུ་ལོག་སྟེ་འགྲིལ་དགོས་ཞེས་པའི་དམོད་ངན་བོར་བའི་ཚིག་ཡིན།
འགྱར།
ཡུལ་ལ་འཛེགས་པའི་དོན། ཕྲུ་གུ་ཕ་མའི་པང་ལ་འགྱར་ཞིང་འདུག སང་ཉིན་རི་འགོར་འགྱར་ནས་ལྟད་མོ་ལྟ་སར་འགྲོ་རྒྱུ་ཡིན། རྒས་པོ་ལ་ལ་འགྱར་དུས་རྒུ་རུ་རུ། རྒན་མོ་མཐུ་ལ་འགྲོ་དུས་རྒུ་རུ་རུ་ལྟ་བུ།
འགྲགས།
མེ་མདའི་སྐད་དྲག་པོའི་དོན་ཏེ། མེ་མདའི་སྐམ་པ་ལ་ཐོ་ཕོག་སྟབས་མེ་མདའ་སྟོང་འགྲགས་ཤོར་སོང་། མེ་མདའ་སྟོང་འགྲགས་ཤོར་ཡང་མི་བསད་མི་འདུག
༼ང༽
ངན་འགྱོང་།
གང་ཟག་སོ་སོའི་སེམས་ཁམས་ཁོང་ཁྲོ་བས་འགྱུར་བའི་རྣམ་པ་ཞིག མི་ངན་འགྱོང་ཆེན་པོ། སྤྲོ་ཐུང་། རླུང་ཚ་པོ་རྣམས་དོན་གཅིག་ཡིན། མི་ངན་འགྱོང་ཆེ་ན་གྲོགས་པོ་དང་མཐུན་པོ་ཡོང་མི་སྲིད། མི་ཁ་ཤས་ངན་འགྱོང་ཆེ་ནའང་སེམས་བཟང་ཡོད་ལིས་རེད།
ངར་ལངས།
བྱ་བྱེད་ཐ་མི་དད་པའི་བྱ་ཚིག མོས་པ་སྤྲོ་བ་རྒྱས་པ་སྟེ། འགྲོ་ངར་ལངས། བཤད་ངར་ལངས་ལ་སོགས་པ་ལྟ་བུ་བྱ་ཚིག་མང་ཆེ་བ་ལ་སྦྱར་ཆོག དབྱིན་སྐད་exciting ཟེར། རྒྱ་སྐད་དུ། 激动 ཟེར།
ངར་སློང་།
སྐད་དང་ཉམས་འགྱུར་སོགས་ཀྱིས་གཞན་ཕ་རོལ་པོའི་སེམས་ལ་ངར་ཤུགས་བསྐྱེད་པའི་དོན། ཕོ་གསར་དེ་ལ་ངས་ངར་སློང་པ་ཡིན། དེ་ནས་ཁོ་ངར་ལངས་སོང་ཞེས་པ་ལྟ་བུ་དང་། རྒྱ་སྐད་དུ། 刺激ཟེར་བ་དང་དོན་གཅིག
ངར་སློང་བ།
སེམས་ཤུགས་སྐྱེ་བར་བྱེད་པའམ་ང་རྒྱལ་སློང་བ། གཅིག་ངར་གཅིག་སློང་།
ངོ་ཚ་བསྲག
མི་མང་གི་མདུན་དུ་སྐྱོན་མཚང་བཏོན་ནས་སྨ་འབེབ་བྱེད་པ།
ངོ་ཕུད།
ནང་སེམས་ཀྱི་དགའ་སྡུག་གི་རྣམ་པ་ཕྱི་རོལ་གཟུགས་ཀྱི་རྣམ་འགྱུར་ཐོན་པའི་ཉམས་ཤིག བཀྲ་ཤིས་ཀྱི་བུ་འབུམ་རམས་སློབ་མའི་རྒྱུགས་འཕྲོད་འདུག བཀྲ་ཤིས་ངོ་ཕུད་མཐོ་ཤར་རེ་རེད་འདུག །མགོ་ཁྲིད་བྱེད་དུས་རང་གི་ཁྲིམས་སྲུང་ན། མི་མང་ནང་དུ་ང་ཕུད་མཐོ་ཤར་རེ་སྐད་ཆ་བཤད་ཆོག་རེད། །རྒྱལ་མཚན་བུས་བརྐུ་བྱས་འདུག་ཟེར། དེ་རིང་རྒྱལ་མཚན་ངོ་ཕུད་དམའ་ནས་བསྡད་འདུག་ལྟ་བུའོ།
ངོགས།
༡ ཁྱད་ཆོས་བརྗོད་པའི་མིང་། ངོས་དང་དོན་གཅིག རིའི་ངོགས། ཁང་པའི་ངོགས་ལྟ་བུ། ་་༢ ཐོངས་དང་དོན་གཅིག མངགས་པའི་སྐུལ་ཚིག ཐག་པ་དེ་མ་འཇུ་ངོགས་ཤོག གྲོང་ནང་དུ་མི་གཅིག་བང་མི་ངོགས།
ངོས་གསེས།
བྱ་ཚིག་གི་རྗེས་སུ་ཞུགས་ནས་ཁྲེལ་དང་ངོ་ཚའི་བྱ་ལས་བྱེད་ནུས་མིན་འགྲེལ་བཤད་ཀྱི་མིང་ཚིག ལས་ཚིག་གི་རྗེས་སུ་དགག་སྒྲ་དང་སྦྱར་ནས་བེད་སྤྱོད་པ་མང་། དཔེར་ན། ངས་ཕ་མ་ལ་རྫུན་བཤད་ངོས་མི་གསེས། ངས་ཁ་སང་བུ་མོ་མཛེས་མ་དེའི་ངོ་ལ་བལྟ་ངོས་མ་གསེས། སང་ཉིན་ང་གོས་རྙིང་པ་འདི་གྱོན་ལེ་འགྲོ་ངོས་མི་གསེས། མྱི་མང་ནང་ཟས་ཟ་ངོས་མ་གསེས། ལྟ་བུ་རིགས་འགྲེ་ནས་སྤྱོད་འོས།
༼ཅ༽
ཅག་མོ།
〔སྡེ་དགེ〕ནང་ལས་སོགས་ལས་ཀ་ཙག་ཙིག་ལ་མཁས་པ་དང་འགུལ་ཡངས་པོ་ཅན་སྟེ། དཔེར་ན། ཕྲུ་གུ་ཅག་མོ་གང་ལ་མངགས་ན་འགྲོ་མཁན་རེད། བུ་མོ་ཅག་མོ་ཁྱིམ་ལས་མཁས་པ་ཡོད་རེད་ལྟ་བུ། ཁ་ལ་ཉོན་མཁན་གྱི་ཕྲུ་གུ་རྣམས་ལ་བསྟོད་བསྔགས་སྐབས་སུ་བེད་སྤྱོད་པའི་ཚིག་ཅིག དགེ་རྒན་ཁ་ལ་ཉོན་མཁན་གྱི་སློབ་ཕྲུག་ཅག་མོ་ཞིག་རེད་ལྟ་བུ།
ཅི་རུ།
གང་ཡང་དང་་དོན་གཅིག དཔེར་ན། དེ་རིང་ཉིན་གུང་ཟ་མ་ཅི་ཟས་ཟིན། ཞེས་དྲིས་པའི་ལན་དུ། ངས་ཅི་རུ་མ་ཟས་ལྟ་བུ། ཡང་། དྲི་བ། དགེ་རྒན་གྱིས་ཅི་ཟེར། དྲིས་ལན། ཅི་རུ་མི་ཟེར། དྲི་བ། ཁྱོས་ཚོང་ཁང་ནས་ཅི་ཉོས་ཡོད། ལན། ཅི་རུ་ཉོས་མེད་ལྟ་བུ། ཅི་ཞེས་འདྲི་བའི་ལན་དགག་སྒྲ་དང་བཅས་པའི་ལན་ལ་ཅི་རུ་ཞེས་ཟེར་དགོས།
གཅེར་རུ་མ།
གོས་མེད་པ་གཅེར་བུའི་དོན། སྤྲང་པོའི་ཕྲུ་གུ་རྣམས་དབྱར་དུས་གཅེར་རུ་མ་འགྲོ་ཞིང་ཡོད་པ་རེད།
བཅྭ་པོ།
ཅ་ལག་གི་དོན། མི་ཉག་འཇམ་དབྱངས་གྲགས་པས་བྲིས་པའི་ཡེ་ཤེས་རྡོ་རྗེའི་རྣམ་ཐར་དུ་གསལ།
༼ཆ༽
ཆ་ཐུང་།
དེང་རབས་ཀྱི་མིང་གསར་ཞིག ཁ་པར་དང་ཨ་ཕད་ཏི་བརྒྱུད་ནས་སྒྲ་ལྡན་གྱི་ངག་གི་ཆ་ཐུང་ངུ་གཏོང་བ་ལ་ཟེར། རྒྱ་སྐད་དུ་微信 ཟེར།
ཆུ་གྲུ་ལུ།
〔སྡེ་དགེ〕དགག་སྒྲ་དང་མཉམ་དུ་སྦྱར་བའི་ཚིག་གྲོགས་ཞིག་སྟེ། ཅི་ཡང་དང་། ཅི་གང་ཡང་རྣམས་དང་དོན་གཅིག ངས་ཅི་ཡང་ཤེས་མ་བྱུང་། སྒམ་དེའི་ནང་ལ་ཅི་ཡང་མི་འདུག་ལྟ་བུ་ལ། དཔེར་ན། ངས་ཆུ་གྲུ་ལུ་ཤེས་མ་བྱུང་། སྒམ་དེའི་ནང་ལ་ཆུ་གྲུ་ལུ་མེད་འགི དེ་རིང་ཉིན་གུང་ངས་ཆུ་གྲུ་ལུ་མ་ཟོས་ལྟ་བུ་རྣམས་སོ། ཆུ་གྲུ་ལུའི་འགྲེལ་བཤད་རྒྱས་པ་དཔལ་སྤྲུལ་བཀའ་འབུམ་ནང་ཡོད།
འཆུ་པུ།
གོས་ཀྱི་མཆན་ཁུང་གཡས་གཡོན་འོག་ནས་མར་བཏང་བའི་འཕེན་ལྕེའི་དབྱིབས་ཅན་གྱི་ཆ་ཤས་གཉིས་གཉིས་བཞི་ཡོད་པ་དེའི་མིང་ཡིན།
འཆུ་ཤུ།
ལག་པས་དབྱུག་པ་སོགས་བཟུང་ནས་ཤུགས་ཀྱི་ལས་ཀ་བྱེད་དྲགས་པ་དང་། རྐང་འོག་སོགས་སུ་ཤ་ལྤགས་འོག་ཏུ་ཆུ་བསགས་ནས་ཕྱིར་ངོས་སུ་འབུར་དུ་ཐོན་པ་ཞིག་གི་མིང་། གཞན་མེ་དང་། ཆུ་ཚ་པོ་སོགས་ཀྱིས་ལྤགས་པའི་ཕྱི་ངོས་བསྲེག པགས་པའི་འོག་ཏུ་ཆུ་བསགས་ནས་འཆུ་ཤུ་བུད་ཅིང་ཡོད་པ་རེད།
འཆུ་ཤུ་བུད།
བྱ་བའི་ཚིག་སྟེ། ལག་པས་སྟ་རེ་དབྱུགས་དྲགས་ནས་འཆུ་ཤུ་ཁ་ཤས་བུད་འདུག་ཅེས་པ་ལྟ་བུའོ།
འཆུར་སྐམ།
འཆུར་བ་སྐམ་པོ།
འཆུར་སྐྱུར།
མར་བཏོན་ཟིན་པའི་དར་རའི་ནང་དུ་ཞོ་སོགས་སྐྱུར་རྟ་ཅུང་ཟད་དང་བཅས་བཀོལ་ཞིང་། འཆུར་ཁུ་ཐམས་ཅད་ཀིས་མར་ཐིམ་བཅུག་ཅིང་། དེ་སྐམ་པོར་བྱས་པར་རོ་སྐྱུར་ཞིང་རྣམ་པ་སོབ་སོབ་ཞིག་ཡོང་བ་དེ་ལ་ཟེར།
འཆུར་ཁུ།
དར་བ་བསྐོལ་ཏེ་འཆུར་བ་བཏོན་ཟིན་པའི་སྔོ་ཁུ།
འཆུར་བ།
རྫ་དཔལ་སྤྲུལ་གྱིས་འཕྱུར་ར་ཞེས་བྲིས་འདུག འོ་མ་སྐྱུར་རྟ་བླུགས་ནས་བཀོལ་བའི་འཆུར་བ་ལ་འོ་འཆུར་ཟེར། རོ་མངར་ཞིང་སྣུམ་ཆེ། ཀོང་སྤྲུལ་ཡོན་ཏན་རྒྱ་མཚོའི་རང་རྣམ། སི་ཁྲོན་པར་མའི་ཤོག་ངོས་༡༨༠པའི་འོག་ཕྲེང་གཉིས་པར། ཐོད་པ་གཡུ་དང་འཆུར་བ་མང་པོས་བཀང་བ་རྙེད་སོགས་རྨིས་ལྟས་ལེགས་པ་བྱུང་། ཞེས་བྲིས་འདུག
འཆུར་བ་སྔོ་ཟིལ་མ།
འོ་མ་སྐྱུར་རྟ་དང་བཅས་པ་ཁོལ་རྗེས་འཆུར་ཁུའི་ཕྱེད་ཙམ་བཞག་སྟེ་ཀིས་མ་ཕྱིར་བཏོན་ནས་སྐམ་བཅུག་ན་འཆུར་བ་མདོག་ལྗང་ལ་སྲ་བ་ཞིག་ཡོང་དེ་ལ་ཟེར།
འཆུར་བ་སྔོ་ཧྲུག་མ།
འཆུར་བ་སྔོ་ཟིལ་་མ་དང་གཅིག་ཡིན།
འཆུར་ར།
འཆུར་བའི་འབྲི་ཚུལ་གཞན་ཞིག
འཆུར་ཧྲོབ།
འཆུར་བ་ཧྲོབ་ཧྲོབ།
༼ཇ༽
ཇུམ་པ།
མགོ་བསྐོར་གཏོང་མཁན་གྱི་མིང་། གཡོ་དང་སྒྱུའི་སྒོ་ནས་གཞན་གྱི་ཡིད་ཆེས་ལ་བསླུ་ཁྲིད་བྱེད་མཁན། དཔེར་ན། སྙིང་རྗེ་མེད་ན་སྙིང་རྗེ་ཡོད་མདོག་བྱ་བ་དང་། དད་པ་མེད་ནའང་དད་པ་ཡོད་མདོག་བྱ་བ་སོགས་སྐབས་དེ་དང་དེའི་དགོས་མཁོ་དང་བསྟུན་ནས་གཞན་གྱི་བློ་སེམས་དང་མཐུན་ཐབས་བྱེད་མཁན་གྱི་མི་ལ་ཇུམ་པ་ཟེར། དེ་ཡང་ཆོས་ལུགས་བེད་སྤྱོད་གཏོང་ནས་མངོན་ཤེས་ཡོད་ཟོལ་དང་། སྙིང་རྗེ་ཡོད་ཟོལ་གྱིས་མི་ལ་མགོ་བསྐོར་གཏོང་མཁན་གྱི་མིང་སྟེ། སྡེ་དགེ་ཡུལ་མིའི་བཤད་སྲོལ་ཏུ། འབྲི་ཆུའི་ཤར་རྒྱུད་དུ་མཁྱེན་ཀོང་རྣམ་གཉིས་སོགས་མཁས་པ་མང་བས་ཇུམ་པ་འགྲོ་སའི་གནས་མེད་ཅེས་ཟེར་སྲོལ་ཡོད་འདུག །ཁྲམ་པ་དང་འདི་མི་འདྲ་བའི་ཁྱད་པ་ནི། ཁྲམ་པ་སྟོབས་ཤུགས་དང་དབང་ཆ་བེད་སྤྱོད་ནས་གཞན་གྱི་ཁེ་ཕན་ལ་གནོད་པ་བྱེད་མཁན། ཇུམ་མ་ནི་ཐབས་ལ་བརྟེན་ནས་གཞན་གྱི་ཁེ་ཕན་ལ་གནོད་པ་བྱེད་མཁན་གྱི་ཁྱད་ཡོད།
ཇུམ་མ།
ཇུམ་པ་དང་དོན་གཅིག་ཡིན།
ཇུམ་ཚད།
བྱ་ཚིག གཡོ་སྒྱུའི་སྒོ་ནས་མགོ་བསྐོར་བའི་དོན། ཇུམ་པས་ཇུམ་ཚད་ནས་མི་སེམས་བསླུ་ཞིང་རྒྱུ་ནོར་ལེན་ལྟ་བུ།
ཇོན་ཙེ།
གཡེན་ཙེ་དང་དོན་གཅིག་ཡིན།
མཇི་པ།
ཁམས་སྐད། བཟང་པོའི་དོན་ཏེ། ཁོ་མི་མཇི་པ་ཞིག་རེད། མི་ཚང་མ་ལ་རོགས་པ་བྱེད་མཁན་ཞིག་རེད། ངས་བཀྲ་ཤིས་ངོ་ཤེས། རིན་ཆེན་ངོ་མཇི་པསམི་ཤེས། ལྟ་བུ་རྣམས་སོ།
འཇིམ་བག
ས་སྐྱོ་འདམ་བག་བཟོས་པའི་མིང་། འདམ་བག་དང་དོན་གཅིག འཇིམ་བག་གཡམ་ནས་བརྩིགས་པའི་ངོས་སུ་བྱུག་དགོས། འཇིམ་སྐུ་བཅའ་དགོས་ན་འཇིམ་བག་ཡག་པོ་གཡམ་དགོས་ལྟ་བུ།
འཇོངས།
ཆུ་སོགས་འཐུང་ཐེངས་གཅིག་གིས་ཚང་མ་འཐུང་བའི་དོན། མཛོད་ནག་མ་ལས། དེ་ནས་བླ་མས་བོང་བའི་གསེབ་ནས་ཆང་ཐོ་ལོམ་ཆེན་པོ་གཅིག་གི་གང་ཕྱུང་བས་དང་ཁོ་རང་གིས་ཐོད་པ་ཆེན་གཅིག་གསོལ། དེ་འཕྲོ་ཁོང་ལ་བླུད་པས་མི་ལ་ཐང་ཆད་པས་འཇངས་པ་ལ་ངོམ་ཚད་གཅིག་བྱུང་སྐད། ཅེས་སོ། འདས་དང་མ་འོངས་ལ་འཇངས། ད་ལྟ་བ་ལ་འཇོང་། སྐུལ་ཚིག་ལ་འཇོངས་ཤེས་འབྲི་དགོས་པར་སེམས།
འཇོངས་རྒན།
མི་ལ་སྨད་ཚིག ཟ་རྒྱུ་མ་གཏོགས་ཧ་མི་གོ་མཁན་ལ་ཟེར་བ།
༼ཉ༽
ཉད།
དངོས་པོ་ཆུང་ངུ་རིམ་བཞིན་རྙིང་པ་དང་ཆེན་པོར་གྱུར་པའི་དོན། དཔེར་ན། གོས་ཉད་ནས་ཆེན་པོར་གྱུར། ཐིག་གུ་ཉད་ནས་རིང་པོར་གྱུར་ལྟ་བུ།
ཉར་ར་བྱེད།
ཉར་ཚགས་བྱ་དང་དོན་གཅིག
སྙི་བྱད།
གློག་ཀླད་ཀྱི་ཆ་ཤས་ལ་སྲ་སྙི་གཉིས་སུ་དབྱེ་བའི་སྙི་བྱད་དེ། གཙོ་བོར་ལས་ཆོག་གི་རིམ་པ་དང་། རྣམ་པ་འདྲ་མིན་སྣ་ཚོགས་པའི་རིགས་རྣམས་ལ་ཟེར།
༼ཏ༽
སྟོང་ཨམ་གཅིག
ཅི་ཡང་དང་། གང་ཡང་རྣམས་དང་དོན་འདྲ། ཡིན་ནའང་འདི་དགག་སྒྲ་དང་ལྷན་ཏུ་སྦྱར་བའི་ཚིག་གྲོགས་ཤིག ངས་སློབ་གྲྭའི་ནང་དུ་སློབ་སྦྱོང་མང་པོ་ཞིག་བྱས་ཀྱང་མཐར་སྟོང་ཨམ་གཅིག་ཤེས་མ་སོང་། ང་སང་ཉིན་ཁྲོམ་ལ་ཐེངས་གཅིག་འགྲོ་ལེ་ཡིན། ཡིན་ནའང་སྟོང་ཨམ་གཅིག་མི་འཐོག མགྱོགས་པ་ཚུར་སླེབས་ཡོང་། ཁོ་ཚོས་ཅི་བྱས་ཡོད་ངས་སྟོང་ཨམ་གཅིག་རིག་མ་བྱུང་་ལྟ་བུ།
བརྟོད་ཁ་སྤོར།
སེམས་ཅན་གང་ཞིག་བརྟོད་ནས་བཞག་པ་དེ། དུས་ཚོད་གང་འཚམས་ཞིག་སྟེ་ཆུ་ཚོད་གསུམ་བཞི་ཙམ་གྱི་རྗེས་སུ་རྩྭ་གསར་པ་དང་། མང་བ་ཐོབ་པའི་ཆེད་དུ་སྔར་གྱི་གནས་དེ་ལ་གཞན་ཞིག་ཏུ་སྤོར་དགོས་ཤིང་ཡོད་པ་དེ་ལ་བརྟོད་ཁ་སྤོར་ཟེར།
༼ཐ༽
ཐག་པ་བྲན།
〔བྱ་བྱེད་ཐ་དད་པའི་བྱ་ཚིག〕གཡག་ལ་སྒ་གཏོད་ཅིང་སྒ་ལ་ཐག་པ་བྲན་ནས་སྒྱེས་བཀལ་དགོས་ལྟ་བུ། འདི་ལ་སྒྱེས་དང་།【ཡོས་】 ཀྱི་སྒྲ་གཉིས་ཀ་ཀློག་སྲོལ་ཡོད། ཁམས་སྐད་ཕལ་ཆེར་བས་གཡག་ལ་ཡོས་བཀལ་ཞེས་ཀློག་ཅིང་ཡོད་འདུག
ཐབ་གུ་ལི་ཉིད།
ཡུལ་སྐད། དེ་མ་ཐག་ཏུ་དང་། འཕྲལ་དུ་ཞེས་པ་དོན་གཅིག་ཡིན། དཔེར་། ངས་སློབ་ཕྲུག་ལ་ཡི་གེ་ཞིག་འབྲི་བཅུག་པ་ཡིན། ཁོས་ཐབ་གུ་ལི་ཉིད་དུ་བྲིས་སོང་། ངས་གྲོགས་པོ་ལ་ཁ་པར་ཞིག་བཏང་ནས་ངའི་ནང་ལ་ཕེབས་རོགས་ཞུས་པ་ཡིན་པས་ཁོང་ཐབ་གུ་ལི་ཉིད་དུ་སླེབས་བྱུང་། ཞེས་པ་ལྟ་བུ།
ཐམ།
〔ཡུལ〕 དུས་ཚོད་མཚོན་བྱེད་དེ། ཅུང་ཟད་ཙམ་གྱི་སྔོན་གྱི་དོན། ཉེ་བའི་དུས་ཀྱི་དོན་ཏེ། རྒྱ་སྐད་དུ། 刚才 དང་དོན་གཅིག ངས་ཟ་མ་ཐམ་ནས་ཟ་ཚར། ཁོ་ཚོ་ནས་གྲོང་པའི་ནང་ཕྱིན་སོང་ལྟ་བུ། བཀྲ་ཤིས་ཐམ་དག་འདི་ན་ཡོད། ད་ག་ན་སོང་ཟིན་ཤེས་མ་སོང་། ཐམ་ང་ཚུར་ཡོང་དུས་བཀྲ་ཤིས་ཕར་ཕྱིན་སོང་། ཐམ་མི་ཐམས་ཅད་འདིར་སླེབས་ཡོད་ཐེས། ད་ཚང་མ་འགྲོ་ཚར་སི། ལྟ་བུ། འདིར་ཐམ་ཞེས་པ་ད་གིན་དང་དོན་གཅིག
ཐལ་རྗེས་བསྡུ་རྒྱུ།
སྡེ་དགེའི་ཡུལ་སྐད་དུ་དམོད་བོར་བ་སྟེ། འཇིག་རྟེན་འདིར་ཁྱོད་རང་གི་རིགས་བརྒྱུད་རྩ་བ་ནས་མེད་པ་ཆགས་པར་མ་ཟད། ཐལ་བའི་ནང་གི་རྗེས་ཙམ་ཡང་མ་ལུས་པར་གྱུར་པའི་སྨོན་ལམ་ངན་པ་འདེབས་པ་ཞིག་རེད།
ཐིག
ཚོད་བགམས་པའི་དོན་རྐྱེན་གནད་ལ་འཁེལ་བ། མོ་ཐིག་པོ་གཅིག་གིས་མི་ཐིག་སྟེ། ང་སྤྱི་དཔོན་བློ་ཡིས་ཐིག་ལེ་ཡིན།
ཐེ།
ཁོངས་སུ་གཏོགས་པའམ་འདུས་པའི་དོན་ཏེ། ང་མ་ཐེ་བར་མི་ལྔ་ཡོད། ཝ་ཡང་གཅན་གཟན་ལ་ཐེ་པ་མ་ཟད། ལི་ལི་ཡང་གཅན་གཟན་གྱི་རིགས་སུ་ཐེ་ལེ་རེད། བོད་དུ་གནས་བསྐོར་འགྲོ་མཁན་མི་ལྔ་ཡོད་པ་རེད། དེའི་ནང་ལ་ང་ཐེ་མེད།
ཐེ་རོ།
ནུས་པ་དང་སྙིང་སྟོབས་ ལ་འཇུག་སྟེ། མི་རྒན་པོ་ལ་ཐེ་རོ་ཆེན་པོ་མེད་སྟབས། ཅ་ལག་མང་པོ་ཁྱེར་ཐུབ་ཀྱི་མ་རེད། ཕོ་གསར་དེ་ལ་ཐེ་རོ་མེད་འགི མི་རྣམས་ཀྱིས་བརྙས་བཅོས་བྱེད་དུས་ལན་སྤྲོད་ཕོད་ཀྱི་མི་འདུག་ལྟ་བུ།
ཐེ་ལེ་བདར།
མི་གང་ཞིག་ལ་རྐྱེན་ཆག་སོགས་མི་འདོད་པ་ཞིག་བྱུང་ཡོད་པ་དེ་དམིགས་སུ་བཀར་ནས་བརྗོད་ཅིང་། ཁྱོད་ལ་དེ་དང་དེ་བྱུང་བར་གྲགས་པ་སོགས་བརྗོད་ཅིང་ཉམས་དགའ་བའི་རྣམ་འགྱུར་སྟོན་པའི་ངག་ལ་ཟེར།
ཐེ་ཤེ
མདུན་གྱི་ཡ་སོ་མེད་པའི་སེམས་ཅན་རྩ་གཟན་རིགས་ཏེ། ཤྭ་གནའ་རྣ་རྒོ་གསུམ་སོགས་རི་དྭགས་དང་། གཡག་ལུག་ར་གསུམ་སོགས་སྒོ་ཕྱུགས་རིགས་རྣམས་ཀྱི་རྐང་པའི་ལྷུ་ཚིགས་འབྲེལ་མཚམས་སུ་ཡོད་པའི་རུས་པ་ཆུང་ངུ་ངོས་གཅིག་འབུར་བ་དང་། ངོས་གཞན་གཅིག་གོར་གོར་ཡོད་པ་ཞིག་གི་མིང་། བོད་ཀྱི་ཕྲུ་གུའི་རྩེད་ཆས་ཞིག་ཡིན། ཐེ་གེ་དང་དོན་གཅིག
ཐེ་སིད་ཤོར།
ཞེད་སྣང་སྐྱེ་བའི་སེམས་ཀྱི་རྣམ་འགྱུར་ཞིག་སྟེ། རྒྱབ་ལོག་ནས་མེ་མདའི་སྐད་གྲགས་པ་དང་ང་ཐེ་སིད་ཆེན་པོ་ཤོར་བྱུང་ལྟ་བུ།
ཐེད་རོ།
༡ འཕར་སྤྱང་སོགས་གཅན་གཟན་གྱིས་བསད་པའི་སེམས་ཅན་གྱི་རོ་གང་ཞིག བྱ་དང་གཅན་གཟན་གྱིས་ཟ་འཕྲོ་ལུས་པའི་དངོས་པོའི་མིང་། དཔེར་ན། བྱ་ཁྱི་ཐེད་རོས་གྲིབ་ནད་ལ་གནོད་པ་ཡོང་། ཐེད་རོའི་རུས་པ་མུར་ལ་ཟླ་བྲལ་བ། ཝ་སྐྱེས་འགའ་ཞིག་རི་དྭགས་རྒྱལ་པོར་འཁུམ། ཞེས་གསུང་པ་ལྟ་བུ། ༢ དངོས་རྫས་རྙིང་པ་རལ་བ་དང་། བུག་པ་ཅན་ཏེ། གོས་ཐེད་རོ། ལྷམ་ཐེད་རོ་ལྟ་བུ།
ཐེས།
〔ཡུལ〕དུས་འདས་པ་སྟོན་པའི་ཚིག་གྲོགས་ཞིག སློབ་མ་རྣམས་སློབ་གྲྭར་འགྲོ་ཚར་ཐེས། ད་ནང་སྔ་དྲོ་ཚོགས་འདུས་འཚོགས་ཐེས། ད་གྲོལ་ཚར་ཐེས། ངའི་རོགས་པ་ཕ་ཡུལ་ལ་བུད་ཐེས། ད་ང་ཁེ་རུ་མ་ཡིན། ལས་ཀ་ཚང་མ་ངས་འགན་ཁུར་དགོས་འདུག ད་སློབ་ཚན་གྲོལ་ཐེས། ང་ཚོ་མཉམ་དུ་ཟ་མ་ཟ་སར་འགྲོ་ལྟ་བུ་རྣམས་སོ།
མཐའ་ཡར་ལ་སོང་།
ངོ་མཚར་བའི་འབོད་ཚིག དེ་མཐའ་ཡར་ལ་སོང་། རྒྱུ་ཡག་མོ་གཅིག་རྙེད་ཐེས། ཡང་ན། མཐའ་ཡར་ལ་སོང་། བུ་མོ་དེ་ལ་སྐད་ཡག་མོ་གཅིག་འགི་ལྟ་བུ།
མཐའ་ཡར་ལ་མ་འགྲོ།
མ་རངས་པའི་སྐབས་སུ་དམོད་བོར་བའི་ཚིག ཁྱོད་མཐའ་ཡར་ལ་མ་འགྲོ། ངའི་དཔེ་ཆ་བརྫད་ཚར་སི། ལྟ་བུ།
མཐུ་དུ།
【 མཐུˋ་དུ】 ཞེས་སྒྲ་ལྕི་བ་ཡི་གེ་དང་པོའི་ཐོག་ཏུ་བཞག་ནས་ཀློག་དགོས། མི་དགེ་བ་བྱས་པའི་རྣམ་སྨིན་གྱི་འབྲས་བུ་ལུས་དང་སེམས་གང་རུང་གི་ཐོག་ཏུ་སྨིན་པ་མཐོང་བ། གཞན་ལ་གནོད་པ་བྱས་ན་རང་ལ་མཐུ་དུ་འོང་གི་རེད། དཔོན་ངན་དེའི་ཁྱིམ་ཚང་ལ་ན་ཚ་དང་གོད་རྐྱེན་མང་པོ་ཞིག་ཡོང་གི་འདུག ཕལ་ཆེར་མི་དམངས་ཀྱི་མཐུ་དུ་ལེ་རེད་ལྟ་བུའོ།
མཐུ་བྱེད།
【 མཐུˋ་བྱེད】 ཡི་གེ་དང་པོ་སྒྲ་གདངས་ལྕི་བར་བཀླག་དགོས། གཞན་ལ་དམོད་བོར་བའི་དོན་སྟེ། གཞན་ལ་ན་ཤི་རྐྱེན་ཆག་སོགས་ཡོང་བའི་སྨོན་ལམ་འདེབས་དང་། དམོད་སྔགས་བོར་བ་སོགས་སོ།
༼ད༽
དག་དག
རྐྱང་རྐྱང་། ཁོ་ན། ཤ་སྟག་སོགས་དང་དོན་གཅིག དཔེར་ན། ང་ཚོའི་སློབ་གྲྭའི་ནང་གི་སློབ་མ་རྣམས་བོད་རིགས་དག་དག་རེད། མི་རིགས་གཞན་དག་གཅིག་ཀྱང་ཡོད་ལིས་མ་རེད། འབྲོག་པས་ཤ་དག་དག་ཟ་ལིས་རེད། ཚོང་པས་ཚོང་དག་དག་རྒྱེབ་ལིས་རེད། དཔོན་པོས་མགོ་དག་དག་བསྐོར་ལེ་རེད་ལྟ་བུའོ།
དར་དཀར།
གནའ་བོའི་དུས་སུ་བཀྲ་ཤིས་པ་དང་དགེའི་དོན་མཚོན་བྱེད་ཅིག་སྟེ། བོན་གྱི་ཆོས་ལུགས་ཀྱི་ཆོ་གའི་ནང་དུ་ཁྱིམ་ལྷ་དང་། ནོར་ལྷ་སོགས་ཕྱྭ་གཡང་རྣམས་སྤྱན་འདྲེན་བྱེད་ཀྱི་ཡོ་བྱེད་ཅིག་ཡིན། སྤྱི་ལོ་༡༠༤༢་ལོར་ཇོ་བོ་རྗེ་བོད་དུ་ཕེབས་པའི་སྐབས་སུ་ཇོ་བོ་རྗེ་ལ་དད་པ་དང་ལྷག་བསམ་འགྲོ་བ་མིའི་ཚད་ལས་བརྒལ་བ་མཚོན་བྱེད་དུ་དར་དཀར་གཏོང་བས་མི་་ཡིས་མི་ལ་དར་དཀར་གཏོང་སྲོལ་ཐོག་མར་གྱུར། དེའི་སྔོན་ལ་སྐུ་མགྲོན་ཕེབས་པའི་སྐབས་སུ་རྟེན་འབྲེལ་ཆེད་དུ་རྩམ་པའམ་ཡང་ན་ལུག་བལ་གྱིས་མགྲོན་དེའི་གོང་བ་ལ་དཀར་རྟགས་རེ་འདེབས་སྲོལ་ཡོད་པ་རེད། དུས་དེ་ནས་བཟུང་ལྷ་སྤྱན་འདྲེན་བྱེད་ཀྱི་དར་དཀར་དང་། སྐུ་མགྲོན་གུས་སྲོལ་དཀར་རྟགས་གཉིས་གཅིག་ཏུ་གྱུར་ཏེ་མི་ཆེན་དང་། བླ་སྤྲུལ། དེ་ནས་རིམ་བཞིན་གྲོགས་པོ་སོགས་ལ་དར་དཀར་གཏོང་བའི་སྲོལ་འདི་དར་ཡོད་འདུག
དས།
དུད་ཚང་སོགས་ཚོགས་པ་གང་ཞིག་རིམ་བཞིན་ནུས་པ་ཉམས་ནས་མེད་པར་འགྲོ་བའི་དོན་ཏེ། མེད་པ་འགྲོ་བ། གནའ་སྔ་མོ་མི་ཚང་དེ་ཕྱུག་པོ་ཞིག་རེད། རྗེས་སུ་ཁོ་ཚོའི་བུ་རྒྱུད་རྣམས་ལ་འཇོན་པོ་གཅིག་ཀྱང་མ་བྱུང་པས་དེང་སང་དས་ཚར་པ་རེད།
དས་པ།
དུད་ཚང་ཉམས་ནས་མེད་པ་སྟེ་དས་པའི་མིང་རྐྱང་།
དི།
མེ་རང་བཞིན་གྱིས་མེད་པར་གྱུར་པའི་དོན། བྱ་བྱེད་ཐ་མི་དད་པའི་ལས་ཚིག རི་མེ་ཤོར་ཡང་བཏིལ་མི་དགོས་པ་རང་བཞིན་གྱིས་དི་སོང་། མར་མེ་བཏིལ་ནས་དི་སོང་།
དིས་མིན་ན།
ཅུང་ཟད་མིན་ན་དང་དོན་གཅིག ལོ་རབས་དྲུག་ཅུ་པའི་ནང་ལ་ལྟོ་བ་ལྟོགས་ནས་དིས་མིན་ན་ཤི་སོང་། རིག་གནས་གསར་བརྗེའི་ནང་དུ་སྡུག་བསྔལ་བསྟད་ཆེ་ནས་དིས་མིན་ན་ཤི་སོང་ལྟ་བུ།
དུ།
① ག་ཚོད། མི་དུ་ཡོད་པ། འཛིན་གྲྭ་དེར་སློབ་ཕྲུག་དུ་མཆིས། ② སུམ་ཅུ་པ་ལས་འབྱུང་བའི་ལ་དོན་གྱི་ཕྲད་ཅིག ③ 【དུས་ད་ལྟ་བ་སྟོན་པའི་ཚིག་གྲོགས།】 ཚིག་གྲུབ་གཅིག་གི་མཇུག་ཏུ་བྱ་བྱེད་ཐ་མི་དད་པའི་བྱ་ཚིག་དང་ལྷན་དུ་སྦྱར་ནས་དོན་སྟོན་པའི་ཚིག་ཕྲད་ཅིག ངས་གློག་ཀླད་སྦྱངས་ཟིན་ཡིན་ཏེ་མི་ཤེས་དུ། དེང་སང་པེ་ཅིང་ལ་ཨ་རིའི་བོད་སྐད་རྒྱང་བསྒྲགས་མི་གོ་དུ། ང་སྐྱེས་དུས་ཞོགས་པ་ཆུ་ཚོད་བཅུ་པ་རེད་ཨ་མས་ཟེར་དུ། སང་ཉིན་བཀྲ་ཤིས་ཨ་རི་ལ་འགྲོ་ལེ་ཡིན་ཟེར། ཁྱོད་ལ་ཨི་ཟེར་དུ། སློབ་གྲྭའི་ཟ་མས་ཨེ་རྒྱགས་དུ། 《སྟག་གཟིག་ནོར་རྫོང་》ལས། སེམས་དང་བསམ་པས་དྲན་ལེ་བཞིན། །རྐང་དང་ཕོ་བས་མི་འགྲོ་དུ། ཞེས་སོགས་ལྟ་བུའོ། ④ ལོ་ཐོའི་ནང་གི་དུ་མེ་སོལ་གསུམ་གྱི་དུ་ནི་ཉི་འཛིན་དང་། ཟླ་འཛིན་ཡོད་མེད་བརྟག་ཐབས་ཤིག་སྟེ། དུ་ནི་སྒྲ་གཅན་འདས་པ་མཚོན་བྱེད་ཀྱི་རྟགས་ཤིག་ཡིན།
དུ་བ་འཐེན།
ཐ་མག་ལ་མེ་སྒྲོན་ཏེ་དེའི་དུ་བ་ཁ་ལ་འཐེན་པ། ཐ་མག་འཐེན་དང་དོན་གཅིག དེང་སང་འཛམ་གླིང་འདིར་རྒྱལ་ཁབ་མང་པོ་ཞིག་གིས་དུ་བ་འཐེན་མི་ཆོག་པའི་ཁྲིམས་མང་པོ་ཞིག་བཟོ་ཞིང་འདུག ང་ཚོའི་ལས་ཁུང་ནང་དུ་བ་འཐེན་མཁན་མེད་སྟབས་འདིར་དུ་བ་འཐེན་ཆོག་ལེ་མ་རེད། ལྟ་བུའོ།
དོད་མོ།
བྱ་བ་གང་ཞིག་བྱས་ན་འཛོར་པོ་དང་། འཐད་མོ་ཅན།
རྡང་།
གྲལ་ཕྲེང་སྒྲིགས་ནས་སྡོད་སའི་ཡུལ་ལ་ཟེར། དཔེར་ན། ལྷ་ཁང་ནང་གི་རྡང་གྲལ། གཡག་རྡང་། རྟ་རྡང་སོགས་ལྟ་བུའོ།
རྡང་རྒྱེབ།
བྱ་བྱེད་ཐ་དད་པའི་བྱ་ཚིག འབྲོག་པའི་སེམས་ཅན་མང་པོ་མཉམ་དུ་གྲལ་རིམ་པ་སྒྲིག་ནས་བཏགས་ས་བཀོད་སྒྲིག་བྱ་བ་ལ་རྡང་རྒྱེབ་ཅེས་ཟེར། དབྱར་དུས་འབྲི་རྡང་ནང་དུ་འདག་འབག་མང་ན་ས་གཙང་ས་ཞིག་ལ་རྡང་སྤོར་དགོས། འབྲོག་པ་རྣམས་རུ་བ་སླེབས་མ་ཐག་ཏུ་རྡང་བརྒྱབ་དགོས། ལྟ་བུའོ།
སྡི་ཁྲ་མགོ་དཀྲིས།
འབུ་རས་དམར་པོ་སྣར་རིང་ལ་ཞིང་ཆུང་བ་སྣེ་གཉིས་སུ་ཁྲ་ཡོད་པའི་མགོ་དཀྲིས་ཞིག་སྟེ། གནའ་དུས་ཆོས་རྒྱལ་མེས་དབོན་རྣམས་ཀྱི་སྐབས་བློན་པོ་རྣམས་ཀྱི་ཐོབ་ཐང་མཚོན་བྱེད་ཀྱི་མགོ་དཀྲིས་ཡིན་པ་དེ། ལུགས་དེ་མ་ཉམས་པ་སྡེ་དགེའི་མདུན་སྐོར་རྣམས་ཀྱིས་གཟབ་ཆས་སྤྲས་པའི་སྐབས་སུ་དེང་དུས་ཡང་མགོ་ལ་དཀྲི་སྲོལ་གནས་ཡོད།
དྲག་དྲག གོ་གནས་མཐོན་པོའི་དོན། རྫོང་དཔོན་ནི་དཔོན་པོ་དྲག་དྲག་རེད། ཡོངས་འཛིན་ནི་དགེ་རྒན་དྲག་དྲག་རེད།
གདར་ཤ་བཅད།
ཞིབ་ཏུ་དཔྱད་པའི་དོན། ཐེག་ཆེན་པའི་ལྟ་བ་ལ་གདར་ཤ་བཅད། ལོ་རྒྱུས་ལ་གདར་ཤ་བཅད། བླ་མའི་གསུང་ལ་གདར་ཤ་ཆོད་ནས་དད་པ་འཇུག་པ་ཡིན།
བདལ་བཀལ།
བྱ་ཚིག གཡག་སོགས་ལ་དོ་པོ་བཀལ་ནས་སྐྱེལ་འདྲེན་བྱ་བའི་དོན།
བདལ་པ། དྲེལ་དང་གཡག་སོགས་ལ་དོ་པོ་བཀལ་ནས་སྐྱེལ་འདྲེན་གྱི་ལས་བྱེད་མཁན།
བདེན་འཇུ།
【བདེན་’འཇུ】 འདི་ཀློག་པའི་ཚེ་སྒྲ་གདངས་ལྕི་བ་ཡི་གེ་དགན་པོའི་ཐོག་བཞག་ནས་ཀློག་དགོས། བདེན་བཟུང་བའམ་བདེན་པ་འཛིན་པ། ངས་ཁོ་ཚོ་ལ་རྫུན་བཤད་པ་ཡིན་ཡང་ཁོ་ཚོ་བདེན་འཇུ་སོང་། གསར་འགྱུར་ནང་གི་སྐད་ཆ་དེ་ཚོ་ང་བདེན་འཇུ་མ་བྱུང་ཞེས་པ་ལྟ་བུ།
མདངས་སུམ།
མདང་སང་དང་དོན་གཅིག། ང་མདངས་སུམ་ཉལ་བའི་རྨི་ལམ་ལ།
མདོ་མེད།
① ཕུགས་བསམ་མེད་པ་སྟེ། མི་མདོ་མེད། ཕོ་མདོ་མེད་ཅེས་པ་ལྟ་བུ། ② 【མདོ་’མེད། 】 ཅེས་སྒྲ་གདངས་ལྕི་བ་མདོའི་ཐོག་ཏུ་བཞག་ནས་ཀློག་ན་ལྷ་སའི་སྐད་དུ་ཆོ་མེད་ཅེས་པ་དང་དོན་གཅིག སྙིང་པོ་མེད་པ་དང་། ཁེ་ཕན་མེད་པའི་དོན་ཡིན། དཔེར་ན། ང་ལས་ཀ་བྱས་ནས་ལོ་བདུན་རེད། ད་ལོ་ཕལ་ཆེར་སློབ་དཔོན་གཞོན་པའི་ལས་ཐོབ་རག་ས་རེད། དེས་ན་ད་ལོ་ཞིབ་འཇུག་སློབ་རྒྱུགས་འཕྲོད་འདུག་ཀྱང་། དེ་འདོན་ལ་མདོ་ཅི་ཡང་མི་འདུག ཡང་། ས་ཁང་རྒྱ་ཚོང་པ་དེས་དབྱར་རྩྭ་དགུན་འབུ་རྒྱ་མ་གང་རེས་སྒོར་ཁྲི་ལྔ་རེ་སྦྱིན་ཟེར། འོན་ཀྱང་ང་ལུང་པ་མང་པོ་ཞིག་སོང་ནས་ཚུར་ཉོ་དུས་རྒྱ་མ་གང་རེ་ལ་ཧ་ལམ་ཁྲི་ལྔ་མ་ཟིན་ཙམ་གནས་འདུག དེ་ལྟར་བཙོང་ན་མདོ་ཅི་ཡང་མི་འདུག་ལྟ་བུའོ།
མདོ་ཡོད།
མི་རང་དོན་བསྒྲུབ་མཁས་པའི་དོན། སྙིང་པོ་ཡོད་པའི་དོན།
འདིང་རྒྱེབ།
བསམ་བློ་ཞིབ་ཏུ་གཏོང་བའི་དོན། འདིང་བརྒྱབ་ནས་དྲན་བྱུང་། འདིང་རྒྱོབ། ལྟ་བུ། དེང་སང་ཁམས་ཕྱོགས་སུ་འབྲོག་སྐད་ཡིག་ནོར་དུ་བྲིས་པ“འདང་རྒྱག” ཟེར་ནས་འབྲི་སྲོལ་ཞིག་འདུག་པ་འདི་ནི་གནའ་ཡིག་རྙིང་པ་དང་། དེང་རབས་བོད་ལུགས་ཀྱི་ཡི་གེ་ིལའདིེང་ཆེན། ིལིལ
རྩིས་མཐོང་ཆེན་པོའམ་རིན་ཐང་ཆེན་པོར་བརྩི་བའི་དོན་ཡིན། དཔེར་ན། བོད་རིགས་ཚོས་གཟི་ལ་འདིང་ཆེན་བཞག་ལེ་རེད་ལྟ་བུ།
འདིིང་ཐང་།
རྩིས་མཐོང་དང་དོན་གཅིག ཕ་མས་རང་གི་བུ་བརྒྱུད་ལ་འདིང་ཆེན་པོ་ཡོད་ལེ་རེད་ཀྟ་བུ།
༼ན༽
རྣ་ཚར།
སེམས་ཅན་གྱི་རྣ་ཆོའི་ཐོག་འདོགས་རྒྱུའི་ཚོས་སྣ་ཚོགས་བཙོས་པའི་ཚར་ལུ་དང་། ཁུག་ལུའི་མཐའ་ལ་འདོགས་རྒྱུའི་ཚར་ལུ་ལའང་རྣ་ཚར་ཟེར་སྲོལ་ཡོད།
རྣམ་རྟོག་ཟ།
༡ ཕྲག་དོག་དང་འབྲེལ་ནས་མི་དགའ་བར་གྱུར་པའི་དོན། ༢ ལྟས་ངན་དུ་དོག་ནས་སེམས་ཐེ་ཚོམ་འབྱུང་བ།
རྣམ་གསུམ་ཕོ་ཉ།
གསང་སྔགས་ཉམས་ལེན་སྐབས་སུ་རིག་མ་ལ་བརྟེན་པའི་བརྟུལ་ཞུགས་བརྒྱད་ཉམས་སུ་ལེན་པའི་ཡུལ་ཕོ་ཉ་གསུམ་སྟེ། སྔགས་སྐྱེས་།ཞིང་སྐྱེས། ལྷན་སྐྱེས་ཏེ་ཕོ་ཉ་རིགས་གསུམ་སྟེ་མཁའ་འགྲོ་རིགས་གསུམ་ལ་ཟེར།
༼པ༽
པར་བུ།
ཀརྨའི་མཁན་པོའི་གསུང་འབུམ། ཀརྨའི་གདན་རབས་ཤོག་ལྷེབ་བརྒྱད་པའི་རྒྱབ་ངོས་ཕྲེང་གསུམ་པར། ཨ་ཙ་ར་བདུན་གྱིས་པར་བུ་བཅོལ་བྱུང་ངམ་གསུངས་ཏེ་བྱུང་ལགས་ཞུས་ནས་ཕྱག་དུ་ཕུལ་བའི་ནང་ནས་གནྡྷོ་ལ་ཁྱད་པར་དུ་འཕགས་པའི་ལོ་རྒྱུས་ཀྱི་ཡི་གེ་དང་བཅས་པ་བྱུང་ཏེ། ཡི་གེ་བཅུག་ཡོད་པ་གསལ་བ་ལྟར་རོ།
པར་རུ།
རྩམ་པ་དང་། མར་སོགས་བླུགས་སའི་སྣོད་གང་ཞིག ཁ་ལེབ་དམ་པོར་རྒྱེབ་ཆོག་པའི་སྣོད་རིགས་ཤིག རྩམ་པ་བླུག་སའི་པར་རུ་ལ་རྩམ་པར། མར་བཅུག་སའི་པར་རུ་ལ་མར་པར་ཟེར་ལྟ་བུ། རྒྱུ་ཆས་ཤིང་ལས་བཟོས་པ་མང་། ཕྱིས་ཧ་ཡང་དང་། ཟངས་སོགས་ཀྱིས་བཟོས་པའང་ཡོད། །
སྤྲོ་སྡུག་བྱེད།
ཁོང་ཁྲོ་བའི་རྣམ་འགྱུར་སྟོན་པའི་དོན། རྒྱ་སྐད་དུ། 赌气 ཟེར། བུ་མོ་དེ་སློབ་གྲྭར་ཞུགས་མ་བཅུག་པས་མོས་སྤྲོ་སྡུག་བྱས་ནས་གྲོང་ཁྱེར་ནང་འཁྱམ་སོང་བ་རེད། ཕྲུ་གུ་ལ་ཨ་མས་བསྙད་བཀོས་པས་ཁོས་སྤྲོ་སྡུག་བྱས་ཏེ་ནང་ལ་ཚུར་མ་འོང་པ་རེད། །
སྤྲོ་ལང་།
ཁོང་ཁྲོ་བའི་དོན། དཔེར་ན། ང་ལ་དམའ་འབེབས་བྱེད་དུས་ང་སྤྲོ་ལངས་བྱུང་ལྟ་བུ། །
༼ཕ༽
ཕར་བཅས།
༡ ཆ་ཚང་དང་ཡོངས་རྫོགས་སོགས་དང་དོན་གཅིག ད་རེས་དབྱར་ཁ་ལྗོངས་རྒྱུ་སོང་བས་སྒོར་ཕར་བཅས་ཟད་ཚར་སོང་། རྒྱ་རིགས་ཚོས་ཆུས་གཞི་ཕར་བཅས་བཙོང་དགོས་ཐུག་ནའང་ཕྲུ་གུའི་སློབ་གསོར་འགྲོ་སོང་གཏོང་ལེ་རེད། ༢ ཅ་ལག་ལ་གནོད་སྐྱོན་ཐེབས་པའི་དོན། ད་རེས་དཀར་མཛེས་ལ་སོང་པས་ལམ་སྡུག་ཆེ། མོ་ཊ་ཕར་བཅས་རེད་ཚར་སི། །ཡང་། ཨ་ར་མང་པོ་ཡོད་ན་རྩྭ་ཟ་ཕར་བཅས་བརྫད་འགྲོ་ལིས་རེད། །
ཕེད།
ཁ་ཕྱེ་བ་དང་སློག་པའི་དོན། ཁུག་ལུ་ཁ་ཕེད། ཞིང་གི་ཐ་བ་ཕེད། མི་ལའི་མཛོད་ནག་མ་ལས། བརྩོན་འགྲུས་ལྕག་གི་ཡོངས་བསྐུལ་ནས། །དེ་ཐ་བ་སྲ་ཡང་ཕེད་དེ་མཆི། ཞེས་སོ།
ཕོ་ཁྲེབ།
སྐྱེས་པ་ལོ་བཞི་བཅུ་ནས་ལྔ་བཅུ་ཡས་མས་བར་གྱི་མི་ལ་ཟེར།
ཕོ་ཧྲེང་།
བཟའ་ཟླ་མེད་པའི་སྐྱེས་པ་ཁེར་རྐྱང་།
ཕོག་ཐུགས་ཅན།
འདིར་ཕོག་ཐུགས་ཅན་ཞེས་པ་མིང་རྐྱང་དང་། ཕོག་ཐུག་འགྲོ་ཞེས་པ་ལས་ཚིག་ཡིན། སེམས་ལྡན་གྱི་ཡུལ་གང་ཞིག་ལ་ཚོར་བ་རྣོ་ངར་ལྡན་པ་དང་། རྣམ་རྟོག་འཕྲོ་འགྱུར་རྒོད་པའི་དོན་ཡིན། དཔེར་ན། བོད་ཀྱི་གོམས་སྲོལ་ལ། ཕྱི་དྲོའི་དུས་སུ་གཞོབ་བསུར་བྱས་ན་ལྷ་འདྲེ་ལ་ཕོག་ཐུགས་འགྲོ་བས་འཛེམ་དགོས་པ་དང་། དབྱར་དུས་རི་འགོར་སྐད་འབོད་ཆེན་པོར་བྱས་ན་ཡུལ་ལྷ་གཞི་བདག་ལ་ཕོག་ཐུགས་འགྲོ་བས་ཐོག་འབྲུག་གློག་གསུམ་གྱིས་གནོད་པ་ཡོང་གི་རེད་ཟེར་བ་ལྟ་བུའོ། ། དེང་དུས་ཆབ་སྲིད་དང་འབྲེལ་བའི་སྐད་ཆ་ནི་གཞུང་ལ་ཕོག་ཐུགས་འགྲོ་སླ་བ། ཡང་ན། ཕོག་ཐུགས་ཅན་གྱི་ཚིག ཕོག་ཐུག་ཅན་གྱི་ལས་ཀ་ལྟ་བུ། རྒྱ་སྐད་དུ། 敏感 ཟེར་བ་དང་དོན་གཅིག
འཕྱུར་ར།
ཀོང་སྤྲུལ་རིན་པོ་ཆེའི་རང་རྣམ་དུ། འཆུར་བ་ཞེས་བྲིས་འདུག འཆུར་བ་དང་འཕྱུར་ར་དོན་གཅིག
༼བ༽
བང་།
ཆུས་བརླན་པའི་དོན། དེ་རིང་ཆར་པ་འབབ་པས་ངའི་གོས་ཐམས་ཅད་བང་འདུག ཀོ་རྒོག་དེ་ཆུའི་ནང་དུ་སྦང་པས་ཉིན་གསུམ་གྱི་རྗེས་སུ་བང་འདུག མི་ལའི་རྣམ་ཐར་མཛོད་ནག་མ་ལས། ཐུན་གཅིག་གི་རྨི་ལམ་ན། འཁྲུངས་ཡུལ་དུ་ཕེབ་པས། ཡུམ་འདས། ཁང་པ་ཞིག སྲིང་མོ་འཁྱར་བ་རྨིས་ནས། ཡུམ་དང་མ་འཕྲད་པའི་སྟབས་ཀྱིས་མང་དུ་བཤུམས་པས། རྣལ་སད་ཙ་སྔས་སྤྱན་ཆབ་ཀྱིས་བང་བ་ཙམ་བྱུང་སྟེ། ཞེས་པ་ལྟ་བུ།
བྲད།
དངོས་པོ་གང་ཞིག་ལ་དངོས་རྫས་གཞན་ཞིག་གིས་བདར་བའི་དོན། སྣོད་ཀྱི་དྲེག་པ་རྣམས་བྲད་ནས་གཏང་མ་བཟོ་དགོས། གྱང་ངོས་ཀྱི་རི་མོ་རྣམས་བྲད་ནས་ཡང་བསྐྱར་དུ་གསར་པ་ཞིག་འབྲི་དགོས། མོ་ཊའི་ལྕགས་རྩི་བྲད་ནས་སྐྱོན་ཅུང་ཟད་བྱས་འདུག
བྲིད།
ཞི་བའི་སྒོ་ནས་གྲོས་གླེང་བྱེད་པ། ཨ་ཉོག་ངུ་མ་བཅུག ཡག་པོ་བྲིད་དང་། ཡང་། ཞི་བའི་སྒོ་ནས་བྲིད། དྲག་པོའི་སྒོ་ནས་སྡིག་མོ་གང་བྱས་ཀྱང་ཁས་མི་ལེན་པ་ལྟ་བུ།
བྲུ་ཞིག
ཁམས་པའི་ཡུལ་སྐད་ཞིག ལོ་ན་མ་སྨིན་པའི་ན་གཞོན་གྱི་མིང་སྟེ། ཕྲུ་གུ བྲུ་ཞིག ཨ་ཉོག་རྣམས་དོན་གཅིག་ཡིན།
སྦྱེན་རྒན།
〔ཡུལ〕 རྫུན་བཤད་མཁས་པའི་དོན། རྫུན་རྒན་དང་དོན་གཅིག
སྦྱེན་ལབ།
〔ཡུལ〕 རྫུན་ལབ་པའི་དོན། དཔེར་ན། ཁོས་ནམ་རྒྱུན་སྦྱེན་ལབ་ལིས་རེད། ང་ཁོའི་སྐད་ཆ་ལ་བདེན་མི་འཇུ། ཁོས་ཁ་སང་ང་ཚོ་སློབ་སྦྱོང་བྱེད་སར་སོང་པ་ཡིན་ཟེར་བ་དེ་སྦྱེན་ལབ་ལེ་རེད། ང་ཚོ་ང་ཚོ་གློག་བརྙན་ལྟ་སར་སོང་ཟིནན་ཡིན། སྤྱིར་བཏང་སྦྱེན་ལབ་རྒྱུ་དེ་མི་དགེ་བ་ཞིག་རེད་དེ། ཨ་ཁུ་བསྟན་པས་སྦྱེན་ལབ་ནས་མི་རྣམས་ལ་རོགས་པ་བྱེད་ཐུབ་པ་རེད།
དབྲལ།
༡ ཁམས་སྐད་དུ་གཏོང་ཕོད་པའམ། ཞེན་ཆགས་གཏོང་བའི་དོན་ཏེ། དཔེར་ན། མི་ཡ་རབས་ཚོས་རྒྱུ་ཟས་རྣམས་རང་གི་སྤྱོད་དབྲལ། གཞན་ལའང་སྟེར་དབྲལ། མི་སེར་སྣ་ཅན་ཚོས་རང་གི་ཡང་སྤྱོད་མི་དབྲལ། གཞན་ལའང་སྦྱིན་མི་དབྲལ། ཞེས་པ་ལྟ་བུའོ། ཁ་ལ་ཟ་མ་དབྲལ། རྒྱབ་ལ་གྱོན་མ་དབྲལ་གསོགས་མ་བསྡད་མ་གཏོགས་ཤི་དུས་སྐར་མ་གཅིག་ཀྱང་ཁུར་རྒྱུ་ཡོད་ལེ་མ་རེད། ལྟ་བུ།༢ ཕྲལ་གྱི་མ་འོངས་པ།
དབྲད།
མིའི་ལུས་ཀྱི་ཆ་ཤས་གང་ཞིག་ལ་དངོས་པོ་གཞན་གང་ཞིག་གིས་བྲད་ནས་སྣད་སྐྱོན་བྱེད་པའི་དོན་ལ་གཙོ་བོར་འཇུག་སྟེ། ངོ་ལ་སྦར་བྲད་བརྒྱབས་ཏེ་གདོང་ཚང་མ་དབྲད་འདུག བུད་མེད་དེས་སེན་དབྲད་བྱས་ལུས་ལ་རྨ་བཟོས་འདུག ཤིང་གིས་དབྲད་ནས་རྨ་མང་པོ་བཟོས་འདུག་ལྟ་བུ།
འབབ།
① བབས་ཀྱི་ད་ལྟ་བ། ② བརྔན་པའི་ནོར་གྱི་མིང་། རང་གི་གྲོགས་པོ་སོགས་ལ་སྟེར་རྒྱུའི་བརྔན་རྫས་དང་། གཞན་གྱིས་རང་ལ་ཚུར་སྟེར་བའི་བརྔན་རྫས་ཀྱི་མིང་། ངའི་གྲོགས་པོ་ལྷ་ས་ནས་མར་ཡོང་པ་རེད། ཁོས་ང་ལ་འབབ་འབུ་རས་སྟོད་ཐུང་ཞིག་ཁུར་འགི ངས་ཕྱི་རྒྱལ་ནས་ཆུ་ཚོད་ཡག་པོ་ཞིག་ཉོས་པ་ཡིན། ཨ་མ་ལ་འབབ་སྤྲོད་རྒྱུ་ཡིན་ལྟ་བུ། ③ འཐོབ་པའམ་འོས་པའི་དོན་ཏེ། ཉེས་པ་ཅན་ལ་ཆད་ཁྲིམས་འབབ། དྲིན་ཅན་ལ་དྲིན་ལོག་མི་འབབ་ལྟ་བུ།
འབྱམས།
ཆུ་བོ་མཐུར་དུ་བབས་པའི་དོན་ཏེ། ཆུ་མཐུར་ལ་འབྱམས། མེ་ལ་ལ་འབར་ལྟ་བུ། མི་དེའི་འབད་བརྩོན་རྒྱུན་ཆད་མེད་པ་ཆུ་འབྱམས་པ་འདྲ་པོ་གཅིག་རེད།
དབབ།
① བྱ་བྱེད་ཐ་དད་པའི་འདས་ཚིག་གི་ཁ་གཏད་དུ་ཡོད་པའི་བྱ་བའི་འབྲས་བུ་སྟོན་པའི་བྱ་བྱེད་ཐ་མི་དད་པའི་བྱ་ཚིག་ཅིག རྡོ་གནམ་ལ་འཕང་སྟེ་ས་ལ་དབབ་སོང་། གོས་ཡར་བཀལ་ཀྱང་མར་དབབ་སོང་། དཔོན་པོ་དེ་གོ་གནས་མར་དབབ་སོང་ཟེར་ལྟ་བུ། ②ཅ་ལག་བོར་བའི་དོན་ཏེ། ངའི་ལྡེའུ་མིག་དབབ་སི། ཁོའི་དངུལ་ཁུག་དབབ་ཚར་བཞག་ཟེར་ལྟ་བུའོ།
འབབ་ཀ
འབབ་དང་དོན་གཅིག གཞན་ལ་སྟེར་བྱའི་དངོས་པོའི་མིང་སྟེ། དཔེར་ན། ངའི་སློབ་གྲོགས་ཀྱིས་ང་སྟོད་ཐུང་ཞིག་འབབ་ཀ་སྤྲོད་བྱུང་། ཁོ་ལྷ་ས་ནས་མར་ཡོང་དུས་ང་ལ་གོས་ཆེན་གྱི་གོས་ཤིག་འབབ་ཀ་ཁུར་འདུག ཅེས་པ་ལྟ་བུའོ།
འབྲད།
ཡུལ་གཞན་ཞིག་གི་ངོས་སུ་ཡོད་པའི་དངོས་པོར་བཟུང་ནས་མི་གཏོང་བའི་དོན། ① སོས་རུས་པའི་ངོས་ཀྱི་ཤ་འབྲད་པ། བྱི་བས་ཡུང་འབྲད་པ། ར་ཡིས་ལྕང་སྡོང་འབྲད་པ་ལྟ་བུ་རྣམས་སོ། ཁྱི་ཡིས་སོ་འབྲད་བྱས་པ། རྒྱེབ་རེས་བགོས་ན་སོ་འབྲད་ཅིག་ཐུབ་ནའང་བྱེད་དགོས་རེད་ལྟ་བུ། ② གྱང་གི་ངོས་འབྲད། བྲག་གི་ངོས་འབྲད་ནས་གྱེན་དུ་འགྲོ་བ་ལྟ་བུ།
༼མ༽
མ་ཁ་ཤི།
ཉོ་ཚོང་གི་དངོས་རྫས་དེའི་མ་རྩའི་རིན་གོང་ལས་དམའ་བར་གྱུར་ཏེ་ཁེ་སྐྱེད་མེད་པར་གྱུར་པ་ལ་མ་ཁ་ཤི་ཟེར།
མ་འདྲིས།
རྒྱུན་དུ་ཕན་ཚུན་འབྲེལ་བ་བྱ་མ་མྱོང་པའི་མི་དང་དངོས་པོའི་དོན། མི་མ་འདྲིས་ན་རྒྱུས་མི་ལོན། ཟས་མ་འདྲིས་ན་ཟ་འདོད་མེད།
མར་རྗིས།
ཚད་ངེས་ཅན་ཡོད་པའི་མར་རྡོག་རྡོག་གཅིག་སྟེ། འབྲོག་པའི་ནང་ནས་ངའི་གྲོགས་པོ་སླེབས་བྱུང་། ཁོས་ང་ལ་འབབ་ཀ་མར་རྗིས་གཅིག་དང་། ཤ་གཟུགས་གཅིག་ཁུར་འགི་ལྟ་བུའོ།
མོ་ཁྲེབ།
བུད་མེད་ལོ་ཚོད་སོ་ལྔ་ནས་ལྔ་བཅུ་ཡས་མས་བར་གྱི་རིགས་ལ་ཟེར།
མོལ་སྟེགས།
དབྱིན་སྐད་དུ། Media ཞེས་པ་དེ་ཡིན། དེའི་དོན་ནི། གསར་འགྱུར་གྱི་རིགས་ཡོངས་རྫོགས་ཅི་མགྱོགས་ཀྱིས་སྤྱི་ཚོགས་ཐོག་ཁྱབ་བསྒྲགས་བྱེད་སའི་སྟེགས་བུ་དང་། ཁྱབ་བསྒྲགས་ཀྱི་སྒོ་ཆེན་འབྱེད་པའི་ལྡེའུ་མིག་ལྟ་བུ་ཞིག་ཡིན། མེ་ལྡེའུ་ལ་དབྱེ་ན། ༡ ཚགས་པར་དང་། ༢ རླུང་འཕྲིན། ༣ བརྙན་འཕྲིན། ༤ དབྱིངས་ཐེར་དྲྭ་རྒྱ། ༥ དུས་དེབ། ༦ ལུས་བཟུང་ཁ་པར་བཅས་རིགས་དྲུག་ཡོད་པ་རེད། མེ་སྟེགས་ཀྱི་་བྱེད་ལས་ནི། གནས་ཚུལ་གསར་པ་གང་བྱུང་ཐམས་ཅད་སྐད་ཅིག་གིས་སྤྱི་ཚོགས་ཡོངས་ལ་ཁྱབ་བདལ་སྟོན་པའི་སྟེགས་བུ་ལྟ་བུ་ཞིག་ཡིན།
མྱི་ངན།
ཁམས་སྐད་དུ། མི་སྡུག་ཅག་གི་དོན། རང་གི་ཕ་མ་ལའང་བརྩི་མཐོང་མེད་པའི་མྱི་ངན་གཅིག་རེད།
མྱི་ངན་པ།
ཁམས་སྐད་དུ། མི་ངར་མ་དང་དོན་གཅིག འབྲོག་པའི་མྱི་དེ་མྱི་ངན་པ་རེད། རང་ལུགས་བསྒྱུར་ལེ་མ་རེད།
མྱི་འདྲས་མོ།
ཁམས་སྐད་དུ། མི་རང་གཤིས་བརྟན་པོ། འཇོན་ཐང་ཡོད་པའི་དོན་ཡིན།
༼ཙ༽
རྩིད་པ།
འབྲི་གཡག་སོགས་ཀྱི་ལུས་ཞོལ་གྱི་སྤུ་རིང་ཞིང་རྩུབ་པའི་རིགས། འབྲོང་རྩིད། གཡག་རྩིད།
གཙང་རིས་དཔལ་མགོན་བདུན་ཅུ་རྩ་ལྔ།
རྒྱལ་པོ་ཆེན་པོ་བཞི་དང༌། ཕྱོགས་སྐྱོང་བཅུའམ་བཅོ་ལྔ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད་དང༌། འཇིགས་བྱེད་ཆེན་པོ་དགུ་སྟེ། འདི་བརྒྱད་ཅུ་ལ་བོད་ཀྱི་གྲུབ་མཐའི་ཐོག་མ་ཇོ་བོ་རྗེ་དཔལ་ལྡན་ཨ་ཏི་ཤ་ནས་བརྒྱུད་པའི་བཀའ་གདམས་པ་རྣམས་ཀྱིས་དཀར་པོ་བརྒྱད་ཅུ་ཟེར། ཀུན་རིག་གི་དཀྱིལ་འཁོར་དང་ཤངས་པ་བཀའ་བརྒྱུད་པ་རྣམས་ཀྱིས་ཕྱོགས་སྐྱོང་བཅོ་ལྔ་ལས་ལྔ་ཕྲི་ནས་ལྷག་མ་རྣམས་ལ་གཙང་རིས་དཔལ་མགོན་བདུན་ཅུ་དོན་ལྔ་པོ་ཟེར།
༼ཚ༽
ཚ་འབོག
ཉིན་ལམ་གཅིག་བགྲོད་སྐབས་ལམ་བར་བཟའ་བཏུན་གི་ཆེད་དུ་མེ་འབུད་ཅིང་ཇ་བཀོལ་བའི་དོན། དཔེར་ན། ལྷ་སར་ནས་འདམ་གཞུང་སླེབས་པ་དང་ཚ་འབོག་ཅིག་བཀོལ་ནས་ངལ་གསོ་ཅུང་ཟད་བྱས། དེ་ནས་མུ་མཐུད་དེ་བྱང་ཕྱོགས་སུ་བསྐྱོད་ལྟ་བུ།
ཚར་ལུ།
ཚར་ལུ་ནི་མི་དང་། སེམས་ཅན། དངོས་པོ་སོགས་ཀྱི་རྒྱན་ཆ་འདོགས་རྒྱུའི་རིགས་ཤིག་ལ་ཟེར། དཔེར་ན། རྩིད་པ་དཀར་པོ་ཚོས་ཁ་དོག་སྣ་ཚོགས་བཙོས་ནས་བཟོས་པའི་སེམས་ཅན་གྱི་སྐེ་རྒྱན་དང་། རྣ་ཆོའི་ཐོག་འདོགས་རྒྱུའི་རྣ་ཚར་དང་། འུས་རྡོའི་སྣེ་ཚར་བཏགས་རྒྱུ། ཁུག་ལུའི་མཐའ་ལ་འདོགས་རྒྱུའི་བཅས་ཀྱི་ཚར་ལུ་ལའང་རྣ་ཚར་ཟེར། །མིའི་སྐྲ་ཚར་ནི་སྟོང་སྐུད་དམར་པོ་དང་། ནག་པོས་བཟོས་པའི་ཚར་ལུ་དེ་ཁམས་ཕྱོགས་སུ་སྐྱེས་པ་རྣམས་ཀྱི་མགོ་སྐྲ་བསླས་པའི་སྣེ་ལ་འདོགས་རྒྱུ་ཞིག་ཡིན།
༼ཛ༽
ཛིག
གྲི་སོགས་མཚོན་ཆའི་རྣོ་སོ་རྟུལ་པོར་ཆགས་པའི་དོན། གྲི་ཛིག་ནས་ཤ་གཏུབ་མི་ནུས་པ་ལྟ་བུ།
འཛགས།
འཁྲིག་པ་སྤྱོད་པའི་བྱ་ཚིག་དོན། གཙོ་བོ་ཕོའི་བྱ་སྤྱོད་ལ་གོ་བ་ཞིག་སྟེ་དཔེར་ན། བུ་མོ་གཞོན་ནུ་རྣམས་རྒྱུན་དུ་གཟབ་དགོས་མ་གཏོགས་ཁྲམ་པས་འཛགས་སྲིད་ལྟ་བུ།
འཛགས་རེས་བགོ
ཕོ་མོ་འཁྲིག་པ་སྤྱོད་པའི་དོན་སྟེ། ཕོ་མོ་གཉིས་ཀ་ལ་ཆ་སྙོམ་དུ་འཇུག་པ་དཔེར་ན། ཁོང་གཉིས་འཛགས་རེས་བགོ་ཞིང་ཡོད་པ་འདྲ་ལྟ་བུ་དང་། བླ་མས་ནག་མོ་འཛགས་ན་སྡོམ་པ་ཤོར་འགྲོ་ལྟ་བུའོ།
འཛར་མོ།
མིག་ལམ་དུ་འོང་བ། ཕོ་གསར་འཛར་མོ་སྐད་ཆ་བཤད་མཁས་པ། བུ་མོ་འཛར་མོ་གོས་ཆས་གྱོན་མཁས་པ་ལྟ་བུ།
འཛོར་མོ།
མི་སུ་དང་ཡང་འཕྲད་པ། འབྲེལ་བ་མཁས་པའི་མི། མི་སུ་ལའང་འཛོར་པོ་རེད་ལྟ་བུ།
འཛིར།
ཅ་ལག་རིན་གོང་ལ་མ་ལྟོས་པ་སོ་སོའི་དགའ་མོས་དང་བསྟུན་ནས་ཕན་ཚུན་བརྗེ་བའི་མིང་། སྟོད་ཐུང་གཉིས་འཛིར་བཞག རྟ་སྒ་ཆས་དང་བཅས་པ་འཛིར་བཞག ལྷམ་གཉིས་འཛིར་བཞག་ལྟ་བུའོ། །
༼ཝ༽
ཝ་རྡ།
གནའ་དུས་ཕོའི་རྣ་རྒྱན་ཨ་ལོང་གི་ངོས་ལ་ཕྲ་ཆེ་བ་གཅིག་དང་ཆུང་ངུ་གསུམ་ཡོད་པ་ཞིག་གི་མིང་ཡིན། ཕྱིས་བོད་ཀྱི་སྐུ་དྲག་རྣམས་ཀྱིས་ཨ་ལོང་ཡུ་བ་བཟོས་ཤིང་དེ་ལ་གཡུ་དང་། བྱུར་རུ་སུམ་ཕྲེང་ཅན་ཁམས་ཕྱོགས་ཀྱི་བུད་རྣམས་ཀྱི་རྣ་ལུང་དང་ཕྱོགས་འདྲ་བ་ཞིག་ཀྱང་ཡོད་འདུག
ཝ་ཙི།
རྒྱ་སྐད་སྒྲ་གཡར་མིང་། དེང་དུས་རྐང་པར་གྱོན་རྒྱུའི་གོས་རིགས་ཤིག གནའ་བོའི་བོད་སྐད་དུ་ཨུ་མོ་སུག་ཟེར།
༼ཞ༽
ཞིང་འབངས་ཐེམ་ཐོ།
ཀྲུང་གོའི་ལུགས་སྲོལ་ལ་ཞིང་འབངས་དང་གྲོང་འབངས་ཞེས་འབངས་མི་ལ་རིམ་པ་དབྱེ་སྲོལ་གྱི་ཐོ་ཡིག ཞིང་པ་མཚོན་བྱེད་ཀྱི་ཐེམ་ཐོ།
གཞིན།
ཡུལ་སྐད། སྦྱིན་དང་དོན་གཅིག བྲུ་ཞིག་ལ་བུ་རམ་གཞིན། སྤྲང་པོ་ལ་ཟས་གཞིན།
གཞིས་གཟུང་།
ཁམས་པའི་ཡུལ་སྐད། ཁྱིམ་གཞིས་གསར་འཛུགས་དང་དེའི་རྒྱུན་སྐྱོང་བའི་ལས་ཀ
གཞེད།
ཁམས་པའི་ཡུལ་སྐད། བརྗེད་དང་དོན་གཅིག སྤྱིར་བཏང་ད་ལྟ་དང་མ་འོངས་པ་ལ་འཇུག ཁྱོད་ལྷ་སར་སོང་ན་ཇོ་བོ་མཇལ་རྒྱུ་མ་གཞེད།
བཞེ།
ཁམས་པའི་ཡུལ་སྐད། བརྗེ་དང་དོན་གཅིག དུས་རྒྱུན་ཚོང་ཆུང་ཆུང་རྒྱེབ་ཞིང་ཡོད། དཔེར་ན། ནས་དང་མར་བཞེ། འབུ་དང་དུ་བ་བཞེ། འབྲུ་དང་ཆང་བཞེ། ལྟ་བུ།
༼ཟ༽
ཟ་འབྲེ་སློང་།
གཞན་ལ་བཟོད་དཀའ་འདོད་པའི་ཚོར་བ་སྟེར་བའི་དོན། ངར་སློང་དང་དོན་གཅིག དཔེར་ན། ལྟོག་པའི་མིའི་མདུན་དུ་ཟས་བསྟན་པ། འདོད་ལྡན་ཅན་ལ་ལུས་ཀྱི་གསང་བའི་་ཆ་རྣམས་སྟོན་པ་ལྟ་བུ། དབྱིན་སྐད་དུ་ stimulate ཟེར།
ཟིན།
【དུས་འདས་པ་སྟོན་པའི་ཚིག་གྲོགས།】 དུས་འདས་པའི་བྱ་ཚིག་དང་། ཡིན་དང་རེད་གང་རུང་གཉིས་ཀྱི་བར་སྦྱར་བྱའི་ཚིག་ཕྲད་ཅིག ངས་ཟ་མ་ཟས་ཟིནན་ཡིན། ད་ཟ་དགོས་མ་གྲགས། ང་ཁ་སང་གློག་བརྙན་ཁང་ལ་སོང་ཟིནན་ཡིན། ལྟད་མོ་བལྟས་ཟིནན་མིན། ལྟ་བུ་སྐྱེས་བུ་དང་པོ་ལ་འཇུག་པ་ཡིན་དང་ལྷན་ཏུ་འཇུག་པ། ཁོས་ད་ནང་སྔ་དྲོ་ཡིག་རྒྱུགས་སྤྲད་ཟིནན་རེད། ད་ལོ་དབྱར་ཀ་བོད་ལ་སོང་ཟིནན་རེད། ཡིན་ནའང་བོད་སྐད་སྦྱངས་ཟིནན་མ་རེད། རྒྱལ་པོ་སྲོང་སྒམ་པོས་མནའ་མ་ལྔ་ཐམ་པ་བླངས་ཟིནན་རེད་ལྟ་བུ་སྐྱེས་བུ་གསུམ་པ་ལ་རེད་དང་ལྷན་ཏུ་འཇུག་དགོས་པ་ལྟ་བུའོ། འདི་དགག་སྒྲ་དང་ལྷན་ཏུ་སྦྱར་ཚེ་ངེས་པར་དུ་ཟིནན་སྒྲའི་རྗེས་སུ་དགག་སྒྲའི་ཕྲད་དེ་སྦྱར་དགོས། དཔེར་ན། ལས་ཚིག+ཟིནན+དགག་སྒྲ+རེད།
བཟུར་འདུག
ལུས་ཀྱི་སྡོད་སྟངས་ཞིག མྱི་གཅིག་རྟ་ཐོག་ཏུ་བཟུར་འདུག་བྱས་ནས་ཕྱིན་སོང་།
བཟླས།
［སྒྲ་གཉིས་ལྡན་ཅན］འདི་ལ［dai］／［dzai］བཀླགས་ཆོག འདི་བཤད་པའི་དོན་ཏེ། དཔེར་ན། ༡སྔགས་བཟླས། བསྒོམ་བཟླས་བྱེད། ལྟ་བུའོ། ༢ ཁམས་སྐད་དུ། ངས་སུ་གཅིག་ལའང་མ་བཟླས［dzai］ཁྱོས་ཀྱང་སུ་ལ་མ་ཟློ། ཞེས་འབྲི་ཆུ་ནུབ་བརྒྱུད་ཕྱི་འབྲོག་སྡེ་པའི་ཁ་སྐད་དང་། ཤར་བརྒྱུད་པས་ཁྱོས་ཀྱང་སུ་གཅིག་ལ་མ་ཟེར། ཞེས་པ་ལྟ་སྟེ་འདི་ལ་རྫས་དང་རྫོ་ཞེས་པའི་སྒྲ་དང་གཅིག་པར་བཀླགས་དགོས། ངས་སུ་གཅིག་ལའང་བཤད་མེད། ཁྱོད་རང་ཡང་མ་ཟེར། ཞེས་པ་དང་དོན་གཅིག ༣ སྐུལ་ཚིག་སྐབས་སུ། ཁྱོད་ལྷ་སར་སོང་ན་ངའི་ཤ་ཉེ་ལ་ན་བདེ་མོ་འཚམས་པོ་རེད་འགི་ཟློས་ཤོག ཨ་མ་ལ་སློབ་གྲྭའི་གུང་གསེང་སྐབས་ང་ཡར་འོང་ལེ་ཡིན་ཟློས་ཤོག་ལྟུ་བུ་རྣམས་［dzei］ཞེས་པའི་སྒྲ་རུ་བཀླག་དགོས། འདི་ནི་བྱ་བྱེད་ཐ་དད་པའི་ལས་ཚིག་སྟེ། འདས་པ་ལ་བཟླས། ད་ལྟ་བ་ལ་ཟློ། མ་འོངས་པ་ལ་བཟླ། སྐུལ་ཚིག་ལ་ཟློ། ཞེས་སོ།
༼འ༽
འོ་ཤོང་།
མར་བཏོན་ཟིནན་པའི་འོ་མ་སྐྱུར་མོ་མ་ཡིན་པའི་རིགས་དེ་ལ་འོ་ཤོང་ཟེར། འདི་ལ་ཁམས་སྐད་དུ［ཤོང huong］ཅེས་པའི་སྒྲ་གདངས་སུ་ཀློག་དགོས།
འོ་གཡུག་འཕྲུལ་འཁོར།
དེང་དུས་འབྲོག་པའི་འོ་མ་ཧྱུག་བྱེད་ཀྱི་འཕྲུལ་འཁོར་ཞིག འོ་ཧྱུག་འཁོར་ཡང་ཟེར།
༼ཡ༽
ཡིད་སོད།
རང་དང་མི་མཐུན་ཕྱོགས་གང་དེའི་བྱ་བ་ལེགས་ལམ་དུ་མི་འགྲོ་བ་ལ་དགའ་བ་སྐྱེས་ཤིང་ཡིད་ཚིམ་པའི་དོན་ཏེ། དཔེར་ན། ཁོས་ཅ་ལག་དེ་ང་ལ་མ་བཙོང་ནས་ཚོང་པ་གཞན་པ་ཞིག་ལ་བཙོང་སོང་། འོན་ཀྱང་རིན་གོང་ཆེན་པོ་ཁུག་ཡོད་བ་མ་རེད། ང་ཡིད་སོད་བྱུང་། ལྟ་བུ།
ཡོ་ཆེན།
ཁམས་སྐད། མང་པོའི་དོན། ཚོང་པ་ལ་ཚོང་རྫས་ཡོ་ཆེན་གཅིག་འགི སྨན་པ་ལ་སྨན་ཡོ་ཆེན་གཅིག་འགི་ལྟ་བུ།
ཡོ་ལུ་གོང་།
ཁམས་སྐད་དུ། མང་པོའི་དོན། དེ་རིང་མགྲོན་པོ་ཡོ་ལུ་གོང་སླེབས་བྱུང་། གྲོགས་པོས་སྐད་ཆ་ཡོ་ལུ་གོང་བཤད་བྱུང་།
གཡང་འདྲ།
ཅུང་ཟད་ལེགས་པོའི་དོན་སྟེ། ལས་ཀ་གཡང་འདྲ་ཐོན། ཚོང་པ་དེས་ཚོང་གཡང་འདྲ་ཕོག་འགི། མི་དེ་ལ་ཡོན་ཏན་གཡང་འདྲ་འགི། ཞིང་ནང་ལོ་ཏོག་གཡང་འདྲ་སྐྱེ་འགི་ལྟ་བུ། ལྷ་སའི་ཡུལ་སྐད་ཨོབ་ཙམ་འདུག་ཟེར་བ་དང་དོན་གཅིག
གཡུ་བ།
ཁམས་ཕྱོགས་ཀྱི་ཡུལ་སྐད་དུ་ལས་ཀའི་དོན་ཏེ། ང་སང་ཉིན་ཁྱིམ་མཚེས་ཚང་སར་གཡུ་བ་འགྲོ་དགོས་ཟེར། ལས་རོགས་འགྲོ་དགོས་ཟེར་བ་དང་དོན་གཅིག
གཡུ་བ་རྒྱེབ།
〔ཁམས་སྐད〕ལས་ཀ་ལ་འབད་རྩོད་ཆེན་པོ་བྱེད་པའི་དོན་ཏེ། དཔེར་ན། ང་ཚོ་བཟའ་མི་ཚང་མས་གཡུ་བ་བརྒྱབས་ཏེ་ཁང་པ་འདི་བཟོས་པ་ཡིན། ཡང་། ཁོས་ལས་ཀ་ལ་གཡུ་བ་ཆེན་པོ་རྒྱེབ་ཐུབ་སྟབས་གླ་ཆ་མང་པོ་ལོན་ལེ་རེད་ལྟ་བུ།
གཡེན།
ཐབ་ཚང་དང་། ཇ་ཁང་། ཁྱོམ་སོགས་མིན་པའི་མི་ཉལ་ས་དང་མཆོད་བཤམས་བྱ་ཡུལ་སོགས་ཀྱི་ཁང་མིག་རྣམས་ཀྱི་མིང་།
གཡེན་ཆུང་།
ཁང་མིག་ཆུང་ངུའི་མིང་།
གཡེན་ཙེ།
ཁང་མིག་གི་མིང་གཡེན་དང་དོན་གཅིག
༼ར༽
རག
① ཟངས་སེར་རིགས་ཀྱི་སྤྱི་མིང་སྟེ། ཟངས་སེར་གྱི་དུང་ལ་རག་དུང་དང་། ཟངས་སེར་རིགས་ཀྱི་ཟངས་ང་ལ་རག་ཟངས་ཟེར་བ་ལྟ་བུ། ② ཐོབ་པའི་དོན་སྟེ། དགེ་རྒན་གྱིས་ང་ལ་དཔེ་ཆ་ཞིག་རག་བྱུང་། ཨ་མས་ང་ལ་བུ་རམ་ཞིག་རག་བྱུང་། ངས་ན་ཉིན་ཚོང་བྱས་པས་སྒོར་མོ་མང་པོ་ཞིག་རག་བྱུང་། ཁ་སང་ངས་སློབ་སྦྱོང་མ་བྱས་པས་མདོང་དགོང་ཨ་མས་བསྙད་རག་བྱུང་། ང་ལ་བྱ་དགའ་སྒོར་མོ་བརྒྱ་ཐམ་པ་རག་བྱུང་། ད་ལོ་ང་ལ་གོ་སྐབས་ཡག་པོ་ཞིག་རག་བྱུང་། ད་རེས་ང་ཚོང་ལ་ཕྱིན་པས་ཁེ་ཚོང་ཡག་པོ་རག་བྱུང་ལྟ་བུ། ③ མངའ་རིས་སྐད། འཁྲིས་ཀྱི་དོན་ཏེ། དཔེར་ན། ཞེད་ཀྱི་འདུག་ན་ངའི་རག་ལ་ཤོག་ལྟ་བུ།
རང་པུས་མེད།
无法控制 མིའི་རྣམ་འགྱུར་ལ་རང་དབང་མེད་པའི་དོན། མི་ཟ་རང་པུས་མེད། མི་ཟེར་རང་པུས་མེད། མི་བཤད་རང་པུས་མེད། སྤྲོ་མི་ལངས་རང་པུས་མེད་ལྟ་བུ་རྣམས་སོ།
རེ།
⑦ དགག་སྒྲ་དང་མཉམ་དུ་སྦྱར་ན་སྒྲུབ་པའམ་ཁས་ལེན་པའི་དོན་དུ་འཇུག་སྟེ། ངས་བདེན་པར་མི་ཟེར་རེ། ངས་རོགས་ཆེ་ཐུབ་ཆུང་ཐུབ་མི་བཟོ་རེ། ལྟ་བུ་དང་། དེབ་དཀར་དུ་དྲངས་པའི་ཏུང་ཧོང་ཡི་གེ་ལས། ཕྲ་མ་ཞིག་གསན་ན་ཡང་། ཤགས་བྱས་ཏེ་ཡུས་བཀྲོལ་ནས། བཀས་མི་བཅད་རེ། དབྱི་ཚབ་བུ་གཅིག་ལ་གསེར་གྱི་ཡི་གེ་ལས་སྨད་རེ། སྙིང་མ་རིངས་པར་རབས་ཆད་ན། འཁོལ་ཡུལ་བཞེས་རེ། སོགས་མང་ངོ་།
⑧ བྱ་ཚིག་དང་མཉམ་དུ་རེ་ཡིག་རྐྱང་པ་སྦྱར་ན་དམ་བཅའ་དང་བཅས་པའི་དགག་སྒྲ་རུ་འགྱུར་བ་དཔེར་ན། ཁྱོད་རང་གི་གནས་ཚུལ་རྣམས་ང་ལ་ཤོད་དང་། ངས་སུ་གཅིག་ལ་ཟེར་རེ། དཀོན་མཆོག་གསུམ་དཔང་། ཞེས་དང་། ངས་རི་དྭགས་གསད་རེ། ངས་གནས་ཤིང་གཅད་རེ། ངས་མི་སྡུག་པོ་འབྲེལ་བ་བཟོ་་རེ། ང་དམག་ལ་འགྲོ་རེ། ང་གཞན་པ་སུ་གཅིག་ལ་དགའ་རེ། ལས་ཀ་འདི་ཡག་པོར་གྱིས་ཤོག་དང་ངས་གླ་ཆ་སྡུག་བཅུག་རེ། ཉིན་གླ་སྒོར་བརྒྱ་ལས་དམའ་རེ། ལྟ་བུའི་དམ་བཅའ་བའི་ཚིག་རྣམས་སོ། གཞན་ཡང་གོང་དུ་བཤད་པ་ལྟར་ཏོང་ཧུང་ཡིག་རྙིང་ལས་ཀྱང་། དབྱི་ཚབ་བུ་གཅིག་ལ་གསེར་གྱི་ཡི་གེ་ལས་སྨད་རེ། སྙིང་མ་རིངས་པར་རབས་ཆད་ན། འཁོལ་ཡུལ་བཞེས་རེ། སོགས་མང་ངོ་།
རོ་ཐེད།
སེམས་ཅན་བསད་ནས་རོ་བྱ་ཁྱིས་ཟོས་པའི་ལྷག་མའི་མིང་།
རོགས་དན།
ཕན་ཚུན་རོགས་རམས་བྱ་བའི་དོན། ཁྱིམ་འཚེམ་བར་ན་རོགས་དན་བྱ་དགོས། མི་ལའི་མཛོད་ནག་མ་ལས། ལས་དང་བྱ་བ་ཐམས་ཅད་ལ། རོགས་དན་བྱང་ཆུབ་ཀྱི་བཀྲ་ཤིས་ཡོད། ཅེས་པ་ལྟ་བུ།
བརླག་སོང་།
ཁྲོ་བའི་དམོད་ཚིག་དང་སྐུལ་ཚིག བརླག་སོང་། བརླག་པར་གྱུར་ཅིག རྒྱ་སྐད་དུ། 滚 དང་དོན་གཅིག ཁྱོད་རང་ཕར་བརླག་སོང་། ངས་ལས་ཀ་བྱ་དགོས། རྒྱ་སྐད་དུ། 你滚出去，我要工作。
༼ལ༽
ལ་ཀིས།
ཡི་གེ་དང་པོའི་ཐོག་ཏུ་སྒྲ་གདངས་ལྕི་བ་འཇོག་ཅིང་ཀློག་ན་བྱ་ཚིག་ཏུ་འགྱུར་ཞིང་། རི་ལ་འཛེགས་ནས་རིའི་རྩེ་བརྒལ་ཐུབ་པའི་དོན་ཡིན། དཔེར་ན། སང་ཉིན་ང་ཚོ་ལྷ་སར་འགྲོ་བའི་ལམ་བར་ལ་ཆེན་པོ་ཞིག་ཀིས་རྒྱུ་ཡོད་པ་རེད། ཅེས་བྱ་བྱེད་ཐ་དད་པ་དང་། ཁིས་ཞེས་པ་དེའི་ཁ་གཏད་དུ་ཡོད་པའི་ཐ་མི་དད་པའི་བྱ་ཚིག་ཡིན། ངས་འབད་བརྩོན་བྱས་ཏེ་ལ་ཀིས་སར་སོང་ཡང་ལ་མཐོ་དྲགས་ཏེ་ཁིས་མ་སོང་། ཞེས་པ་ལྟ་བུའོ།
ལ་དུག
〔མིང་ཚིག 〕ས་མཐོའི་ཡུལ་དང་དང་། རི་མགོ་མཐོན་པོ་རྣམས་སུ་སླེབས་སྐབས་མགོ་བ་དང་། ཞེན་པ་ལོག་སྟེ་སྐྱུག་མེར་བྱེད་པ་སོགས་ཀྱི་ནད་རྟགས་འབྱུང་བའི་ཡུལ་ནད་ཀྱི་རིགས་ཤིག རྒྱ་སྐད་དུ། 高山反应ཟེར།
ལ་དུག་ན།
〔བྱ་ཚིག 〕ས་མཐོའི་རྐྱེན་གྱིས་ལུས་ཁམས་ཀྱི་དབུགས་དང་འབྱུང་བའི་རྫས་རིགས་ལ་ཤུགས་རྐྱེན་ཐེབས་ཏེ་མགོ་ན་བ་དང་། དབུགས་ཧེ་བ། ལུས་ལྕི་བ་སོགས་ནད་རྟགས་དངོས་སུ་བྱུང་བ།
ལ་ཡི།
མིང་ཚིག གྲོང་གསེབ་ཏུ་ཕོ་མོ་གཞོན་ནུ་རྣམས་འཛའ་བརྩེ་ཡོད་མེད་མཚོན་པའི་གླུ་གཞས་ཀྱི་རིགས་ཞིག་ཡིན་པ་གང་ཞིག ཚིག་བརྒྱད་ཅན་དང་། སྒྲ་གདངས་དལ་ལ་སྙན་པ་ཞིག་ལེན་སྲོལ་ཡོད། ལ་ཡི་དང་གླུ་གཉིས་ཀྱི་ཁྱད་པར། ལ་ཡི་ནི་ནང་དོན་ཕོ་བར་གྱི་འཛའ་བརྩེ་ཡོད་མེད་ཀྱི་རྣམ་འགྱུར་སྟོན་བྱེད་ཀྱི་དོན་ཡིན་པ་གང་ཞིག སྒྲ་དལ་ལ་འཇམ་པ་ཞིག་ཡིན། གླུ་ནི་ནང་དོན་གང་ཡང་རུང་བ། སྒྲ་གདངས་མཐོ་ལ་དྲག་པའི་ལེན་སྲོལ་ཅན་ཞིག་ཡིན།
ལ་ཡི་ལེན།
ལས་ཚིག གླུ་ལེན་དང་དོན་གཅིག
ལིས།
【དུས་འདས་པ་དང་མ་འོངས་པ་སྟོན་པའི་ཚིག་གྲོགས།】 འདི་ནི་སྐྱེས་བུ་གསུམ་པའི་བྱ་བ་ཁོ་ན་ལ་འཇུག་པ་ཞིག་རེད། སྔོན་མ་ང་ཚོ་སློབ་གྲྭ་ལ་ཡོད་དུས་ཁོས་དབྱིན་ཇི་སྦྱོང་ལིས་རེད། ལྟ་བུ་འདས་པའི་ད་ལྟ་བ་དང་། ཁོས་ཇ་འཐུང་ལིས་རེད། ཁོ་དེ་རིང་སློབ་གྲྭའི་ནང་འགྲོ་ལིས་རེད། ཕྱི་དྲོ་ཟ་མ་འདིར་ཟ་སར་ཡོང་ལིས་རེད། ཁོ་སང་ཉིན་ཁྲོམ་ལ་འགྲོ་ལིས་རེད། སྐད་ཆ་དེ་ཁྱོས་དྲིས་དང་ཁོས་བཤད་ལིས་རེད། སྟ་རེ་འདི་རྣོན་པོ་ཡོད། ཤིང་གཅད་ལིས་རེད། གློག་བརྙན་འདི་ཡག་ཡོད། མི་ཚོས་བལྟ་ལིས་རེད་ལྟ་བུ། བྱ་བ་དེ་བྱེད་ངེས་པའི་མ་འོངས་པ་ལ་འཇུག་པ་དང་། སྟོད་ཐུང་འདི་དྲོད་པོ་ཡོད་ལིས་རེད། ས་ཆ་འདིར་དགུན་དུས་གྲང་མོ་ཡོད་ལིས་རེད་ལྟ་བུ། སྤྱིར་བཏང་གི་ད་ལྟ་བ་འཇུག་པ་ལྟ་བུའོ། འདི་ནི་དུས་འདས་པའི་བྱ་ཚིག་དང་ལྷན་ཏུ་མི་འཇུག
ལེ།
① 【བྱ་ཚིག་ལ་བརྟེན་ནས་དུས་སྟོན་པའི་ཚིག་གྲོགས།】 ལས་ཚིག་གང་རུང་ལ་བརྟེན་ནས་དུས་འདས་མ་འོངས་ད་ལྟ་བ་རྣམས་སྟོན་པའི་ཚིག་གྲོགས་ཀྱི་ཕྲད་ཅིག ངས་དུས་རྒྱུན་ཇ་ཡང་འཐུང་ལེ་ཡིན། ཆུ་ཡང་འཐུང་ལེ་ཡིན། ལྟ་བུ་སྤྱིར་བཏང་ད་ལྟ་བའི་དུས་དང་། ང་སྔ་ཉིན་ཁྲོམ་ལ་འགྲོ་ལེ་ཡིན་ལྟ་བུ་སྤྱིར་བཏང་མ་འོངས་པ་དང་། ངས་སྨན་སྦྱང་ལེ་ཡིན། ངས་སང་ཉིན་དུ་བ་གཅད་ལེ་ཡིན་ལྟ་བུ་གདམས་ཀ་འདེམ་པའི་མ་འོངས་པ་དང་། ངས་ཇ་འཐུང་ཚར་ལེ་ཡིན། ཤིང་སྡོང་དེ་བཅད་ཚར་ལེ་ཡིན་ལྟ་བུ་འདས་པའི་བྱ་ཚིག་གི་ཚིགས་གྲོགས་དང་ལྷན་དུ་སྦྱར་ན་དུས་འདས་པ་སྟོན་པ་དང་། ངས་དུས་རྒྱུན་བརྙན་འཕྲིན་བལྟ་ལེ་མིན དཔེ་ཆ་བལྟ་རྒྱུ་ལ་དགའ་ལེ་ཡིན། ང་ཨ་རག་ལ་དགའ་ལེ་མིན། ཇ་ལ་དགའ་ལེ་ཡིན། ཞེས་པ་ལྟ་བུ་སྤྱིར་བཏང་དུས་ད་ལྟ་བ་སྟོན་པ་དང་། གེ་སར་སྒྲུང་ལས། གཞུ་ཡར་མཆོག་འུར་འུར་ཟེར་ལེ་དེ། དབྱར་རྔ་འབྱིན་པའི་སྒྲ་སྐད་འདྲ། མར་མཁྱོག་ལྡིང་ལྡིང་ཟེར་ལེ་དེ། ཁྲིམས་ཀྱི་རྔ་མོ་བརྡུངས་པ་འདྲ། མདེའུ་རྩེ་ཚྭ་ཚྭ་འཕྲོ་ལེ་དེ། ལྕགས་དམར་ཟིན་ར་འཚུབ་པ་འདྲ། ཞེས་སོགས་ལེ་ཡིག་བེད་སྤྱོད་ཧ་ཅང་མང་། འདི་དག་སྐྱེས་བུ་དང་པོ་ལ་སྦྱར་ཚེ་ཡིན་དང་ལྷན་ཏུ་སྦྱར་དགོས། ཁོ་སང་ཉིན་ལྷ་སར་འགྲོ་ལེ་རེད་ལྟ་བུ་དོན་ངེས་པའི་མ་འོངས་པ་དང་། ཁོས་ཁྱོད་ལ་རོགས་པ་བྱེད་ལེ་རེད། སྟོད་ཐུང་འདི་ལ་སྒོར་མོ་ལྔ་བརྒྱ་འགྲོ་ལེ་རེད། སྐུ་མགྲོན་དེ་ཚོས་ཨ་རག་འཐུང་ལེ་རེད་ལྟ་བུ་དོན་མ་ངེས་པའི་རྗེས་དཔག་གི་མ་འོངས་པ་སྟོན་པ་ལྟ་བུ། འདི་དག་སྐྱེས་བུ་གསུམ་པ་ལ་སྦྱར་སྐབས་རེད་དང་ལྷན་ཏུ་སྦྱར་དགོས། ② མིང་སྔོན་ཆ་ཤས་ཤིག ལེ་ཚན། ལེ་ལག
ལོ་ཁྲེབ།
གནོན་ནུའི་ན་ཚོད་བརྒལ་ཞིང་རྒན་པོའི་ན་ཚོད་ལའང་མ་སླེབས་པའི་མིའི་རིགས་ལ་ཟེར། རྒྱ་སྐད་དུ། 中年人 དེང་དུས་ལྟར་ན་ལོ་བཞི་བཅུ་ནས་ལྔ་བཅུའི་བར་གྱི་མི་ལ་ཟེར།
ལོ་སར།
མིང་ཚིག་དང་བྱ་ཚིག་གཉིས་ཀ་ཡིན། ལོ་གསར་པའི་ཆེད་དུ་དུས་སྟོན་བྱེད་ཅེས་པ་དང་དོན་གཅིག འདི་“ལོ་སར་”ཞེས་ཐད་ཀར་བཀླགས་ན་མིང་རྐྱང་ཡིན། “དུས་སྟོན།” དང་གཅིག “ ལོ་’སར།” ཞེས་སྒྲ་གདངས་ལྕི་བ་ཡི་གེ་དང་པོའི་ཐོག་བཞག་ནས་ཀློག་ན་བྱ་ཚིག་ཏུ་འགྱུར་ཏེ་“དུས་སྟོན་བྱ།” ཞེས་པ་དང་དོན་གཅིག་ཡིན།
༼ཤ༽
ཤ་ས།
མང་པོ་ཡོད་པའི་དོན་ཡིན། དཔེར་ན། དཔེར་ན། མི་རིགས་སློབ་གྲྭའི་ནང་དུ་བོད་རིགས་ཤ་ས་འགི བོད་རིགས་སློབ་མའི་ནང་དུ་དབྱིན་ཡིག་ཤེས་མཁན་ཤ་ས་འགི་ལྟ་བུའོ།
ཤ་ས་མེད་པ།
ཧ་ཅང་མོད་པོ་ཡོད་པའི་དོན་ཏེ། དཔེར་ན།ཟས་ཁང་འདིའི་ནང་ལ་ཟ་མ་ཟ་མཁན་ཤ་ས་མེད་པ་འདུག ལྷ་ས་ལ་ཡུལ་བསྐོར་བྱེད་མཁན་ཤ་ས་མེད་པ་འདུག་ལྟ་བུའོ།
ཤིང་བཅག
ཤིང་བཅག་དང་ས་བཅགས་གཉིས་ལས་ཚིག་གི་དོན་མི་འདྲ་བ་ཤེས་དགོས། འདས་པ་བཅག ད་ལྟ་བ་དང་མ་འོངས་པར་གཅག
ཤོ་བཅད།
གནའ་དུས་དྲེལ་དང་། གཡག་སོགས་ལ་ཚོང་རྫས་དོ་པོ་རྣམས་བཀལ་ནས་ས་ཐག་རིང་པོར་ཚོང་དུ་འགྲོ་སྐབས། དྲེལ་ལམ་གཡག་བཅུ་སྐོར་རེ་ཚོ་རེ་བཅད་ནས་དེད་འགྲོ་བ་ལ་ཤོ་བཅད་ཟེར།
གཤའ།
གོས་སོགས་སྦྱར་མ་ཚེམ་བུའི་སྐབས་ཕྱི་ནང་མི་འགྱུར་བའི་ཆེད་དུ་ཨབ་ཐག་རིང་པོར་རྒྱེབ་ནས་རགས་པ་ཚེམ་པའི་དོན།
གཤའ་རྒྱེབ་པ།
ཚེམ་བུ་བས་གོས་ཀྱི་ནང་ཤ་སོགས་ལ་སྟེང་གནོན་གྱི་ཚུགས་སམ་གཤར་ཐོར་རེ་བ་རྒྱེབ་པ། ལྭ་བ་སོགས་ཚེམ་སྐབས་ཐོག་མར་སྐུད་ཚིགས་རིང་བོ་བྱས་ནས་རགས་ཙམ་བཙེམས་ནས་མི་འཆོལ་བར་བྱེད་ཐབས་ཀྱི་མིང་།
གཤར།
གཞུས་པའི་དོན་ཏེ། ལྕག་ཚན་དང་དབྱུག་པ་སོགས་གཤར་བ། དཔེར་ན་ལྕག་ཚན་གཤར། འགྲམ་ལྕག་གཤར་ལ་སོགས།
གཤུགས།
དངོས་རྫས་གང་ཞིག གྲོགས་པོ་སོགས་ཀྱིས་རེ་བ་ལྟར་རིན་གོང་མ་སྤར་བ་རང་གོང་ལྟར་གཞན་ལ་སྤྲོད་པའི་དོན། སྟོད་ཐུང་འདི་གྲོགས་པོས་ང་ལ་གཤུགས་རོགས་བྱས་བྱུང་། མོ་ཊ་དེ་ངས་ཁོ་ལ་གཤུགས་རོགས་བྱས་པ་ཡིན།
གཤུགས་རེས།
དངོས་རྫས་གང་ཞིག གྲོགས་པོ་ལ་རོགས་རམ་བྱ་བའི་ཆེད་དུ་ཅ་ལག་རང་གོང་ལྟར་ཕན་ཚུན་་བཙོང་རེས་བྱེད་པ།
གཤོབ་རྒན།
རྟག་པར་རྫུན་བཤད་མཁན་མི་ལ་ངན་མིང་འབོད་སྟངས་ཤིག
གཤོབ་ལབ།
ཁམས་ཀྱི་ཡུལ་སྐད། རྫུན་ལབ་དང་དོན་གཅིག དཔེར་ན། ཨ་ཁུ་བསྟན་པས་གཤོབ་རྐྱང་རྐྱང་ལབ་ནས་དཔོན་པོ་རྣམས་མགོ་བསྐོར་གཏོང་ཞིང་ཡོད་པ་རེད། དཔོན་པོས་གཤོབ་ལབ་ནས་མི་སེར་མགོ་བསྐོར་གཏོང་གི་རེད་ལྟ་བུ།
བཤར།
① སྔོན་རྗེས་རུ་སྒྲིག་ནས་ཆད་ལུས་མེད་པར་དམིགས་ཡུལ་ཕྱོགས་སུ་འགྲོ་བའི་དོན། དྲེལ་པ་བཤར། རྟ་པ་བཤར། དམག་མི་བཤར། རི་དྭགས་རྣམས་རི་འགོ་ནས་བཤར་ཞེས་པ་ལྟ་བུ་རྣམས་སོ། ② འགྲོ་དང་དོན་གཅིག་སྟེ། ཡུལ་སྐད་འགའ་ཞིག་ཏུ་འགྲོ་དང་བེད་སྤྱོད་གཅིག་སྟེ། ད་ང་བཤར་འགྲོ་ལེ་ཡིན། སང་ཉིན་ང་ཕ་ཡུལ་ལ་བཤར་འགྲོ་ལེ་ཡིན་ལྟ་བུ།
༼ས༽
ས་བཅགས།
འདས་པ་བཅགས། མ་འོངས་པར་གཅག ད་ལྟ་བ་འཆག ཤིང་བཅག་དང་བྱ་ཚིག་ངོ་བོ་ཐ་དད་ཡིན་པར་ཤེས་དགོས། ཤིང་བཅག་ལ་ད་ལྟ་དང་མ་འོངས་པར་གཅག
སི།
【དུས་འདས་མ་ཐག་པ་སྟོན་པའི་ཚིག་གྲོགས།】 དུས་འདས་མ་ཐག་པའི་དོན་གྱི་རྒྱུ་མཚན་སྟོན་པའི་ཚིག་ཕྲད་ཅིག ཚིག་གྲུབ་གཅིག་རྫོགས་པའི་མཇུག་ཏུ་སྦྱར་བྱའི་ཕྲད། དེ་རིང་ཁོས་སློབ་སྦྱོང་ཡག་པོར་བྱས་སི། ཤོག་ལྷེབ་མང་པོ་ཅིག་བློ་ལ་བཟུང་འགི། ཁོས་དེ་རིང་ཉིན་གུང་ཟ་མ་མ་ཟས་སི། ཕོ་རུའི་ནང་ཟ་མ་ཐམས་ཅད་བཞག་བཞག་འགི། ཁོ་ད་ལོ་ཨ་རི་ལ་མ་སོང་སི། དེང་སང་སློབ་གྲྭའི་ནང་ཁ་རོག་སྡོད་འགི། ཨ་མི་རི་ཀའི་སློབ་ཆུང་དང་། སློབ་འབྲིང་ནང་སློབ་ཡོན་སྤྲད་དགོས་མ་དར་སི། 《སྟག་གཟིནག་ནོར་རྫོང་》 ལས། ལས་དབང་ཅན་གྱི་སྒོ་རྩ་ལ། །སྤྲང་པོས་སློང་དབང་ཨི་ཡོད་ལགས། །སྟོད་རྒྱ་གར་ཡན་དང་རྒྱ་ནག་མན། །ཕྱོགས་མེད་སྤྲུལ་རྒྱ་མ་དར་སི། ཞེས་སོགས་ལྟ་བུའོ། འདི་ལ་དགག་སྒྲ་སྦྱར་བའི་ཚེ་དགག་སྒྲའི་ཕྲད་དེ་ངེས་པར་དུ་སི་སྒྲའི་སྔོན་དུ་ལས་ཚིག་དང་། དེའི་སྔོན་དུ་དགག་སྒྲ་་སྦྱར་དགོས། དཔེར་ན། དགག་སྒྲ+ལས་ཚིག+སི།
སིས།
【བྱེད་བཞིན་པའི་ད་ལྟ་བ་སྟོན་པའི་ཚིག་གྲོགས།】 ལས་ཚིག་ད་ལྟ་བའི་ཕྲད་དང་ལྷན་ཅིག་སྦྱར་པའི་བྱེད་བཞིན་པའི་ད་ལྟ་བ་སྟོན་པའི་ཚིག་ཕྲད་ཅིག འགི་དང་ལྷན་ཏུ་སྤྱོད་དགོས་པའི་ཚིག་ཕྲད་ཅིག་ཡིན། དཔེར་ན། ད་ལྟ་སློབ་གྲྭ་འཚོགས་སིས་འགི། ང་ན་ཉིན་ལྷ་སར་འགྲོ་དུས་བར་བསྐོར་ལམ་དུ་བཀྲ་ཤིས་ཀྱིས་དབྱར་རྩྭ་དགུན་འབུ་བཙོང་སིས་འགི། དེང་དུས་སློབ་མ་རྣམས་བོད་ཡིག་མཁས་པ་རེད་འོང་སིས་འགི། ཁོ་ཚོས་ཟ་མ་ཟ་སིས་འགི། ཁྲོམ་རའི་ནང་གི་ཟ་མ་མང་ཆེ་བའི་ནང་རྫས་སྦྱོར་གྱི་དུག་ཡོད་ལིས་རེད་ཟེར་སིས་འགི། ངལ་རྩོལ་པས་ཤིང་གཅོད་སིས་འགི། ཡི་གེ་ཀློག་སིས་འགི། དཔེ་ཆ་ལྟ་སིས་འགི། ད་པེ་ཅིང་ལ་དྲོད་བབས་ཡོང་སིས་འགི་ལྟ་བུ་ད་ལྟ་བའི་དོན་སྟོན་པ་དང་། དགག་སྒྲ་དང་ལྷན་ཏུ་སྦྱར་ན། འབྲོག་པ་རྣམས་ད་རུང་རུ་བ་སྐྱ་སིས་མེད་འགི སློབ་མ་ཚོས་ཨ་རག་འཐུང་སིས་མེད་འགི། མགོ་ཁྲིད་རྣམས་ཨེ་ཙིའི་ནད་ལ་སྐྲག་སིས་མེད་འགི་ལྟ་བུ། དགག་སྒྲའི་ཕྲད་བཞི་ལས་འདི་དང་ལྷན་ཅིག་ཏུ་འཇུག་རུང་བ་ནི་མེད་སྒྲ་ཁོ་ན་ཡིན།
སེམས་རྩེ་ཤོར།
དོན་རྐྱེན་གང་ཞིག རྟགས་དང་རྟེན་འབྲེལ་ངན་པར་རྟོགས་པའི་དོག་གཞིའི་བསམ་བློ་འབྱུང་བ། ཁ་སང་ང་དགོན་ནང་འགྲོ་སྐབས་ཟོམ་སྟོང་གཅིག་ཐུག་བྱུང་། ང་སེམས་རྩེ་སྐྲག་མོས་ཤོར་ཐེས། ལྟ་བུ།
སོ་འབྲད།
སོ་ཡིས་བཟུང་ནས་ཤུགས་ཀྱིས་འཐེན་པ། ཤ་ཟ་དུས་གྲི་མེད་ན་སོ་འབྲད་བྱེད་ཆོག་ལིས་རེད། འདོད་ཆགས་ཅན་གྱིས་སོ་འབྲད་དང་། སེན་དབྲད་གཉིས་ཀ་བྱེད་སྲིད་པ་རེད།
སོས་སོད།
སོས་དལ་གྱི་དོན་ཏེ། ས་གནས་འདིར་ཁ་ཁུད་སིམ་པོ་ཡིན་སྟབས། སོས་སོད་ཅིག་འདུག ཁྱིམ་མཚེས་མེད་དུས་འུར་སྒྲ་རྒྱེབ་མི་མེད། སོས་སོད་ཅིག་འགི།
སླ།
〔སྒྲ་གཉིས་ལྡན་ཅན〕ཀློག་སྟངས་གཞན་ཞིག 〔tsa〕 ཞེས་ཀླག་དགོས། དེས་ན་ལས་ཀ་དེ་སླ 〔tsa〕 མོ་རེད། ཇ་སླ་འུ་རེད་ལྟ་བུ་འདི་ལ་སྒྲ་གཉིས་ཀ་འདོན་ཆོག ① ས་རློན་པ་བརྐོ་སླ། ཤིང་སྐམ་པོ་འབར་སླ། ཤེས་སླ་མོ། གོ་སླ་བའི་ཚིག་ཅེས་པ། འདི་རིགས་ལ་སྒྲ་གདངས་གཉིས་ཀ་གང་བདེ་རུ་བཀླག་ཆོག ② གཡག་སློ། ལྤགས་སླག སློ་ང་ལྟ་བུ་རྣམས་ནི་ངེས་པར་དུ་〔tsa〕བཀླག་དགོས་པ་ལས་གདམས་ང་མེད་དོ། དཔེར་ན། ལྤགས་སླག་གྱོན་ནས་གཡག་སློ་འཕོ། སློ་ང་བཙུགས་ནས་ཨ་འགད་བརྔོས། ལྟ་བུ་ལ་གདམས་ཀའི་ངང་བཀླག་མི་རུང་ངོ་།
༼ཧ༽
ཧག་ལས།
ཁམས་ཀྱི་ཡུལ་དུ། ཆེན་པོའི་དོན། མི་གཟུགས་ཆེན་པོ་ལ་མྱི་ཧག་ལས་མ། ཁ་ཆེན་པོ་ཅན་ལ་ཁ་ཧག་ལས་མ་ཟེར་བ་ལྟ་བུ།
ཧོ་ཇོ་རོ།
ཁམས་སྐད་དུ། ཡིད་མ་རངས་པའམ་སྡུག་བསྔལ་བའི་དུས་སུ་འབོད་པའི་སྨྲེ་ངག་གི་སྒྲ་ཞིག ཧོ་ཇོ་རོ། ངའི་དངུལ་ཁུག་བོར་ཚར་སི། ལྟ་བུ།
ལྷོང་།
① མ་ཉེས་ཁ་ཡོག་གི་ཉེས་སྐྱོན་འགེལ་བ། རྐུན་ལྷོང་ཕོག་པ། རྫུན་ལྷོང་ཕོག་པ། ཁོས་རྐུན་མ་བྱས་མེད་ཀྱང་རྐུན་ལྷོང་ཕོག་པ་རེད། ② རྟགས་སམ་མཚན་མ། འཚུབ་ལྷོང་། བར་ཆད་ཀྱི་ལྷོང་ཚར་ཆོད་གསུམ། གེགས་སམ་བར་ཆད། ཕྱིའི་ལྷོང་། ནང་གི་ལྷོང་། གསང་བའི་ལྷོང་། གློ་བུར་ལྷོང་ཤོར་གྱི་ཉེན་དོགས།
ལྷོང་ཕོག
ནག་ཉེས་མ་བྱས་ནའང་བྱས་པའི་ཉེས་ཁག་ཐེག་པ། མི་མ་བསད་ནའང་གསད་ལྷོང་ཕོག་ནས་བཙོན་ཁང་དུ་བཅུག་པ་རེད། རྐུ་མ་བྱས་ཀྱང་རྐུན་ལྷོང་ཕོག་ནས་ཁ་མཆུ་ཐུག་པ་རེད། ལྟ་བུ།
ཧྱབ།
སྡེ་དགེའི་ཡུལ་སྐད་དུ་བྲིས་པའི་ཡིག་ཚང་འགའ་ཞིག་ཏུ་མཐོང་རྒྱུ་ཡོད་པ། གཡབ་དང་དོན་གཅིག་ཡིན། ཕྲུ་གུ་རྣམས་ཐང་ལ་ཧྱབ་ཞིང་འདུག འབུ་རྣམས་འདམ་དུ་ཧྱབ་ལང་བྱེད་པ། བླ་མས་ཆོས་གསུང་དུས་ཧྱབ་ལང་བྱེད་མ་འདུག ཙུག་གེར་སྡོད་དང་། ལྟ་བུའོ།
ཧྱུ།
ཤིང་ཐོག་སྨིན་ནས་མར་ཧྱུ་ཡོང་ཞིང་འདུག གཡག་རྒས་ནས་རྭ་ཅོ་མར་ཧྱུ་བཞག་པ་ཞིག་འདུག ཕག་གི་རྣ་བ་མར་ཧྱུ་ནས་ཡོད་པ་རེད།
ཧྱུག
གཡུག་པ་དང་དོན་གཅིག འོ་མ་ཧྱུག་ནས་མར་བཏོན་དགོས། ཆུ་ཧྱུག་ན་མར་མི་བཅའ། དར་ཆ་ཧྱུག་ནས་མགོ་འདོགས་པའི་བརྡ་བཏང་།
ཧྱེ་ཧྱེ།
མགོ་བོ་དགྱེ་བའི་དོན་ཏེ། དམྱལ་གླིང་རྫོགས་པ་ཆེན་པོ་ལས། ཧྱེ་ཧྱེ་བ་ལ་ཕྱག་གསུམ་འཚལ། སྐྱེ་བ་སྔ་མའི་སྒྲིབ་པ་དག རྒུར་རྒུར་བ་ལ་ཕྱག་གསུམ་འཚལ། སྐྱེ་བ་ཕྱི་མའི་སྒྲིབ་པ་དག ཅེས་གསུངས་པ་ལྟར་རོ།
ཧྲིལ་བསྒྲིམས།འབད་བརྩོན་ཆེན་པོ་བྱ་བའི་དོན་སྟེ། སློབ་སྦྱོར་ལ་ཧྲིལ་བསྒྲིམས་དང་མཁས་པར་ཆགས་ཐུབ་རྒྱུ་རེད། གླ་པ་རྣམ་སཀྱིས་ལས་ཀ་ཧྲིལ་བསྒྲིམས་ནས་ལས་ཀ་བྱེད་ཅིང་འདུག གླ་ཕོག་ཅུང་ཟད་སྤར་དགོས་ས་རེད།
༼ཨ༽
ཨ་རྒེ།
ཁམས་ཀྱི་ཡུལ་སྐད་དུ། སྤྲེའུ་མིང་། ཨ་རྒེ་སྤྲེའུ་ཞེས་འབོད་པ་ལྟ་བུ།
ཨ་ཞར་མ། སྡུག་པོ་དང་སྐྱོན་ཅན་གྱི་དོན། མྱི་དེ་མྱི་ཨ་ཞར་མ་གཅིག་ཡོད་ལིས་རེད། ཡིད་མ་ཆེས་ལྟ་བུ་དང་། ཅ་ལག་ཨ་ཞར་མ་གཅིག་འགི ཆུ་གྲུ་ལུ་མི་ལོ་དུ། ལྟ་བུ་ཡག་པོ་མེད་པའི་དོན་ཡིན།
ཨུ་མོ་སུག
རྒྱ་ལྷམ་ནང་དུ་གྱོན་རྒྱུའི་རྐང་ཤུབ་རིགས རྒྱ་སྐད་དུ་ཝ་ཙི་ཟེར།
ཨ་འབྲིག
〔སྡེ་དགེ〕ཐང་ཤིང་གི་སྡོང་པོ་དུམ་བུ་མང་པོར་བཏུབས་པའི་ཆ་ཤས་རྣམས་ཀྱི་མིང་ཡིན།
ཨ་ལ་ཧ་སུད།
སྡེ་དགེའི་འབྲོག་སྐད། ཡུལ་སྐད། མདོ་མེད་ཀྱི་ལས་ཀ དཔེར་ན། ཁོ་མྱི་ཨ་ལ་ཧ་སུད་རེད། དངུལ་ཚང་མ་སྤྱད་ཚར་ལེ་རེད། གཏམ་པདྨའི་ཚལ་གྱི་ཟློས་གར་ལས། ཐོ་ཅོའི་གཏོང་ཕོད་ཨ་ལ་ཧ་སུད་ཡིན། དེ་ལ་འབྲས་བུ་མེད་པ་མ་དགོངས་སམ།
ཨ་སླ་སྐྱོ་འདག
སྡེ་དགེའི་རོང་སྐད། མདོ་མེད་ཀྱི་ལས་ཀ དཔེར་ན། ཁོ་མྱི་ཨ་སླ་སྐྱོ་འདག་རེད། དངུལ་ཚང་མ་སྤྱད་ཚར་ལེ་རེད།
ཨང་།
① 【སྐུལ་ཚིག་དང་འབྲེལ་བའི་ཕྲད།】 ལེགས་པར་ཉོན་ཨང་། སེམས་ལ་ཞོག་ཨང་། ངས་ཟེར་རྒྱུ་དེ་མ་བརྗེད་ཨང་། ② མི་འདོད་པའི་རྣམ་པ་སྟོན་པའི་ཕྲད། ཁོ་སྨན་པ་ཨང་ཅིག་ཡིན་ཟེར་ནས་སྨན་ཅིག་སྤྲད་བྱུང་དེ་ཆུ་གྲུ་ལུ་ཕན་མ་ཐལ། ཚོང་ཨང་ཅིག་རྒྱེབ་ལེ་ཡིན་ཟེར། མ་དངུལ་ཚན་མ་དེ་མེད་ལིས་བྱས་སོང་། འགོ་ཁྲིད་ཨང་ཅིག་ཡིན་ཟེར་མི་སེར་ཚང་མ་མགོ་བསྐོར་གཏོང་སིས་འགི། སློབ་སྦྱོང་ཨང་ཅིག་བྱེད་ལེ་ཡིན་ཟེར་ཁ་རོག་ཉལ་བསྡད་འགི་ལྟ་བུ།
ཨ་ཐོ་མིན་ན།
དོན་གང་ཞིག་འབད་བརྩོན་བྱས་པས་ཅུང་ཙམ་མིན་ན་འགྲུབ་ཐུབ་མ་སོང་ཟེར་བ་དང་དོན་གཅིག དཔེར་ན། ང་ད་ལོ་ཆམ་པ་ཚ་བ་བརྒྱབས་ཏེ་ཨ་ཐོ་མིན་ན་ཤི་སོང་། ཞེས་པ་དོན་དུ་ནའང་ཤི་མེད་པའི་དོན་ཡིན། ཡང་། ངས་གློག་ཀླད་བེད་སྤྱོད་བྱེད་སྟངས་ཡུན་རིང་པོ་ཞིག་བསླབས་པ་ཡིན། ཨ་ཐོ་མིན་ན་ཤེས་མ་སོང་། ཞེས་པ་དོན་དུ་བསླབས་པས་ཤེས་ཐུབ་ཡོད་པའི་དོན་ཡིན། ཡང་། ངས་མོ་ཊ་གཏོང་རྒྱུ་སྦྱོང་བ་ཡིན། ཨ་ཐོ་མིན་ན་ཤེས་སོང་། ཞེས་དོན་དུ་ཤེས་མེད་པའི་དོན་ཡིན།
ཨ་སྡིའི་མགོ་དཀྲིས།
སྡི་ཁྲ་མགོ་བཀྲིས་དང་དོན་གཅིག
ཨ་སྡུག་ཚང་།
དུད་ཚང་ཞིག་གི་མིང་ཡིན། གནའ་དུས་སྡེ་དགེ་རྒྱལ་པོའི་མངའ་ཁོངས་སུ་དཔོན་རིགས་མདུན་སྐོར་གྱི་གོ་གནས་ཡོད་པའི་ཁྱིམ་དུད་སུམ་ཅུ་ཡོད་པའི་གྲས་ཤིག ཕྱིས་རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པའི་ཡབ་ཚང་ཡིན།
ཨ་བསྲག
བག་ལེབ་དང་དོན་གཅིག ཨ་མདོའི་སྐད་དུ། གོ་རེ་ཟེར།
ཨ་བསྲག་བ་རྡི་ལ།
〔སྡེ་དགེའི་ཡུལ་སྐད〕 ཨ་བསྲག་ནང་དུ་ཤ་གཏུམ་ཞིང་མེ་ལ་བསྲེག་པའི་ཁ་ཟས་ཞིག་གི་མིང་ཡིན། ལྷ་སའི་སྐད་དུ་ཤ་བག་ལེབ་ཟེར།
ཨ་བསྲག་པུ་དིག
ཨ་བསྲག་བ་རྡི་ལ་དང་དོན་གཅིག
ཨུ་སྡུག
〔སྡེ་དགེ〕 འབད་བརྩོན་བྱ་བའི་དོན་སྟེ། ངས་ལས་ཀ་ཨུ་སྡུག་བྱས་ལས་པ་ཡིན། ངས་སློབ་སྦྱོང་ཨུ་སྡུག་བྱས་ཟིན་ཡིན། རྨུ་སྡུག་དང་དོན་གཅིག
ཨུ་རུ་རྨུ་སྡུག
〔སྡེ་དགེ〕འབད་བརྩོན་བྱས་པའི་དོན་སྟེ། རྨུ་སྡུག་དང་དོན་གཅིག ངས་ཨུ་རུ་རྨུ་སྡུག་བྱེད་ནས་སློབ་སྦྱོང་སིས་ཡོད། ཁྱོད་ཚོས་ང་ལ་སེམས་འཕྲལ་མ་རྩ་བྱེད་མི་དགོས།
ཨུ་ལུ་གང་།
① ལག་པ་གཉིས་ཀྱིས་གང་འཁྱུད་ཀྱི་ཚད་བསྟན་པའི་མིང་སྟེ། དཔེར་ན། རྟ་ལ་རྩྭ་ཨུ་ལུ་གང་བྱིན་ཡོད། ངས་ཤིང་ཨུ་ལུ་གང་ཁུར་ཡོད་ལྟ་བུ། ② ཕྲུ་གུས་ཨ་མ་ལ་སྐེ་ཨུ་ལུ་གང་བྱས་ནས་དགའ་དགའ་བྱས་སོང་།
ཨུ་ལུ་གང་བྱེད།
〔སྡེ་དགེ〕 ལག་པ་གཉིས་ཀྱིས་འཁྱུད་ནས་འཐམ་པ།
ཨུ་ལུ་ནང་།
〔སྡེ་དགེ〕 ལག་པ་གཉིས་ཀྱི་ནང་དུ་འཁྱུད་ཡོད་པའི་གནས་བསྟན་པའི་མིང་སྟེ། ཨ་མས་ཕྲུ་གུ་ཨུ་ལུ་ནང་དུ་ཁུར་འགི། སློབ་ཕྲུག་དེས་རྒྱབ་ཏུ་དཔེ་ཁུག་ཆེན་པོ་ཞིག་ཁུར། ཨུ་ལུ་ནང་ལའང་དཔེ་ཆ་ཁ་ཤས་ཞིག་ཁུར་ནས་འགྲོ་ཞིང་འགི་ལྟ་བུ།
ཨུ་ལུག
〔སྡེ་དགེ〕འབྲོག་པའི་ས་ཁུལ་གྱི་སྤང་རིའི་ངོས་སུ་སྐྱེས་པ་ཤ་མོང་དཀར་པོ་ཞིག་གི་མིང་ཡིན། དབྱར་ཉི་ལྡོག་སྐབས་སུ་ཤ་མོང་འདི་སྐྱེ་འགོ་ཚུགས་ཤིང་། དེ་ནས་བདུན་ཕྲག་གཉིས་ཙམ་རིང་ལ་ཤ་མོང་འདི་བཏུ་ཆོག
ཨུ་སུག
〔སྡེ་དགེ〕ད་ལྟ་དང་། མྱུར་བ་ཉིད་ཀྱི་དོན་ཏེ། ཅུང་ཟད་སྒུག་དང་ང་ཨུ་སུག་སླེབས་ཡོང་། ཉེ་བའི་དུ་མཚོན་བྱེད་དེ། དེང་སང་དོན་གཅིག དཔེར་ན། སློབ་ཕྲུག་ཚོས་ཨུ་སུག་སློབ་སྦྱོང་ཡག་པོར་བྱེད་ཅིང་འདུག ལྟ་བུའོ།
ཨུ་སུག་དག
〔སྡེ་དགེ〕ད་ལྟ་དང་། མྱུར་བ་ཉིད་ཀྱི་དོན་ཏེ། གོང་དང་འདྲ། བཀྲ་ཤིས་ཨུ་སུག་དག་ཨི་ན་སླེབ་བྱུང་། ད་ག་ན་སོང་ཟིན་ཤེས་མ་ཐལ། ངས་ཨུ་སུག་དག་ཟ་མ་ཟས་ཟིན། ད་ཟ་ཐུབ་ས་ཡོད་མ་གྲགས།
བསམ་ཚུལ་འབྲི།
ཁྱེད་ཀྱི་གསང་བ་ཤོར་སྲིད་པས་འདི་ལ་དོ་སྣང་གྱིས།