གླིང་བྲོ་བདེ་ཆེན་རོལ་མོའི་ཕན་ཡོན་དང་སྟངས་སྟབས།
༈བྲོ་ཚན་མདོ་ཙམ་བརྗོད་པ།།
༄།།ཀུན་གཟིགས་ཐམས་ཅད་མཁྱེན་པ་མི་ཕམ་ཕྱོགས་ལས་རྣམ་རྒྱལ་མཆོག་གི་ཞལ་ནས་གླིང་བྲོ་བདེ་ཆེན་རོལ་མོ་འདི་གངས་ལྗོངས་མཐའ་དབུས་མེད་པར་འཁྲབ་སྟོན་གྱི་སྲོལ་ཞིག་དར་སོང་ན།བོད་གངས་རིའི་ལྗོངས་ལ་ནད་མུག་འཁྲུག་རྩོད་དབྱིངས་སུ་ཞི། བདེ་སྐྱིད་ཀྱི་ཉི་མ་ཞིག་ཤར་བའི་རྟེན་འབྲེལ་ཡོད་གསུང་། འོན་ཀྱང་བླ་མ་མི་ཕམ་རིན་པོ་ཆེ་ཞལ་བཞུགས་པའི་སྐུ་རིང་ལ་གླིང་བྲོ་བདེ་ཆེན་རོལ་མོ་འདི་ཁྱབ་བརྡལ་དུ་དར་བའི་རྟེན་འབྲེལ་མ་འགྲིག་པ་རེད། དེའི་རྗེས་སུ་རྭ་སྒྲེང་ཁྲི་རིན་པོ་ཆེ་དང་ཉག་བླ་བསོད་རྒྱལ་འཕགས་ཆེན་གོང་མ་ལ་སོགས་པས་གླིང་བྲོ་བདེ་ཆེན་རོལ་མོ་འདི་གངས་ལྗོངས་སྤྱིའི་སྐུ་རིམ་དུ་འཁྲབ་སྟོན་ཞིག་ཨེ་ཡོང་བལྟས་ཀྱང་། གངས་རིའི་ལྗོངས་པ་རྣམས་བསོད་ནམས་དམན་པའི་སྟོབས་ཀྱིས་ཡང་དག་པར་མཐར་མ་འཁྱོལ་བ་རེད། དེའི་རྗེས་སུ་བདུད་འཇོམས་ཡང་སྤྲུལ་ལ་སོགས་པས་ཡང་གླིང་བྲོ་བདེ་ཆེན་རོལ་མོ་འདི་དར་སྤེལ་ཞིག་ཨེ་ཡོང་བལྟ་དུས་བོད་གངས་རིའི་ལྗོངས་ཀྱི་བདེ་སྐྱིད་དུས་སུ་མ་སྨིན་པས་རྟེན་འབྲེལ་མ་འགྲིག་པ་རེད། ད་ལྟའི་གནས་སྐབས་ན་རྟེན་འབྲེལ་དུས་སུ་སྨིན་པའི་དབང་གིས་༧སྐྱབས་རྗེ་དམ་པ་ཡིད་བཞིན་ནོར་བུས་གླིང་བྲོ་བདེ་ཆེན་རོལ་མོ་འདི་དར་སྤེལ་རྒྱ་ཆེར་ཡོང་བར་མ་ཟད་ཐུགས་བཞེས་ནན་ཟབ་ཀྱིས་མདོ་དབུས་ཁམས་གསུམ་གྱི་མི་སྐྱ་ཕོ་མོ་རྣམས་ཀྱིས་ཁྲོད་དུ་བྲོ་གཞིའི་འཁྲབ་སྟོན་འདི་དར་ཁྱབ་བྱུང་ན་གངས་རིའི་ལྗོངས་སྤྱི་དང་བྱེ་བྲག་ཏུ་རང་རེ་གནས་པའི་ས་ཕྱོགས་སུ་བདེ་སྐྱིད་རྒྱ་ཆེན་པོ་ཡོད་གསུང་།
གླིང་བྲོ་བདེ་ཆེན་རོལ་མོའི་འཆམ་ལུགས་དང་སྟངས་སྟབས།
འདི་ལ་འཆམ་ལུགས་ཀྱི་སྟངས་སྟབས་མི་འདྲ་བ་མང་པོ་འདུག བདུད་འཇོམས་ཡང་སྤྲུལ་གྱིས་མཛད་པའི་ལུགས་ཤིག་དང་། གྲུབ་དབང་པད་མ་ནོར་བུ་ལ་སོགས་པས་མཛད་པའི་ལུགས་མང་པོ་ཡོད་ཀྱང་། འདིར་གསེར་ཐང་བླ་རུང་ལྔ་རིག་ནང་བསྟན་སློབ་གླིང་གིས་ཆེད་བསྒྲིགས་བྱས་པའི་བྲོ་ཚིག་གི་དབྱངས་རྟ་འདི་ད་སྐབས་དགེ་འདུན་པ་མང་པོས་བྱིན་གྱིས་བརླབས་ཚར་བས་བྱིན་་རླབས་ཀྱི་་ཚན་ཁ་ཡོད་རྒྱུ་རེད། རྗེས་མ་ཐམས་ཅད་ཀྱིས་འཁྲབ་གཞི་འདི་ཡིས་བྱས་ན་ལེགས།
ལུས་ཀྱི་སྟངས་སྟབས་ནི། ཝེར་མ་ལུས་ལ་ཆགས་པའི་གར་སྟབས་ལག་གཡས་ཐབས་ཆེན་དཔའ་བོའིཕྱག་རྒྱ་སོགས་གཞུང་ནས་གསུང་པ་ལྟར་དགོས། དེ་མིན་ངེས་པ་མེད་པས་་ཅི་བདེར་བྱས་ན་ཆོག གྲངས་ཀ་ནི། རབ་ན་དགའ་བ་བཅུ་དྲུག་མཚོན་ཕྱིར་དཔའ་མོ་བཅུ་དྲུག་དང་ཁྱོན་སུམ་ཅུ་སོ་གཉིས་དགོས། འབྲིང་ན་དགའ་བ་བཞི་མཚོན་ཕྱིར་དཔའ་བོ་བཞི་དང༌།སྟོང་པ་བཞི་མཚོན་ཕྱིར་དཔའ་མོ་བཞི་དང་ཁྱོན་བརྒྱད་ཀྱིས་འཆམ་ན་ཆོག ཐ་ནའང་ཚིག་ཙམ་དབྱངས་སྙན་མོས་བབཏོན་་ན་རྟེན་འབྲེལ་གྱི་དབང་གིས་ཕན་ཡོན་ཆེན་པོ་ཡོད་གསུང༌།།
རྒྱན་ཆས་ནི། དཔའ་བོ་རྣམས་ཀྱི་རྒྱན་ཆས་དཀར་པོ་དང་སེར་པོ་སོགས་བྱས་ན་ཡག དཔའ་མོ་རྣམས་ཀྱི་རྒྱན་ཆས་དམར་པོ་དང་སྐག་མདོག་བྱས་ན་ཡག གླིང་བྲོ་བདེ་ཆེན་རོལ་མོ་འདི་ས་ཕྱོགས་གང་དུ་འཁྲབ་ན་ཡུལ་ཁམས་དེར་ནད་མུག་འཁྲུག་རྩོད་་སོཊ་མི་འདོད་ཉེར་འཚེ་ཐམས་ཅད་དང་སྙིགས་མའི་རྒུད་པ་དབྱིངས་སུ་ཞི་བ་དང༌། འདི་སུ་ཞིག་གིས་འཁྲབ་པ་དང་མཐོང་བ་དང་ཐོས་པ་དེར་ཁ་དགེ་བ་་བཀྲ་ཤིས་པ་དང་ཆོས་དང་སྲིད་ཀྱི་བདེ་སྐྱིད་ལེགས་ཚོགས་ཐམས་ཅད་ཆར་བཞིན་བེབས་པར་གསུང་པ་རྡོ་རྗེའི་ཚིག་གོ །
གླིང་བྲོ་བདེ་ཆེན་རོལ་མོའི་བྲོ་ཚན་དབྱེ་ལུགས།
གླིང་བྲོ་བདེ་ཆེན་རོལ་མོ་འདི་ལ་བྲོ་ཚན་བཞི་རུ་གནས་པ་སྟེ།
དང་པོ་བྱིན་འབེབས་ཀྱི་བྲོ་ནི། གླིང་རྗེ་སེང་ཆེན་རྒྱལ་པོའི་གཙོ་བྱས་པའི་དགྲ་བླ་ཝེར་མ་རྣམས་དང་དྭངས་སྨན་མཁའ་འགྲོའི་ཚོགས་ཀྱི་ཐུགས་རྒྱུད་བསྐུལ་ནས་བྲོ་རའི་ནང་དུ་སྤྱན་འདྲེན་པ་དང༌། བཞུགས་གསོལ་མཛད་ཅིང་བྱིན་རླབས་ཞུ་བའོ།།
གཉིས་པ་མཆོད་ཅིང་བསྟོད་པའི་གླུ་ནི། སེང་ཆེན་ནོར་བུ་དགྲ་འདུལ་སོགས་དགྲ་བླ་ཝེར་མ་དང་དྭངས་སྨན་ཌཀིའི་ཚོགས་ལ། ལུས་མཛེས་པའི་བྲོ་གར། ངག་སྙན་པའི་གླུ་དབྱངས། ཡིད་དུང་བའི་མོས་གུས་སོགས་མཆོད་པར་ཕུལ་ཏེ་མགོན་སྐྱབས་དང་སྡོངས་གྲོགས་མཛད་པར་བསྐུལ་བའོ།།
གསུམ་པ་སྣ་ཚོགས་འཕྲིན་ལས་ཀྱི་བྲོ་ནི། སེང་ཆེན་མི་ཡི་ཉི་མས་ཞི་རྒྱས་དབང་དྲག་གི་ལས་རྣམས་སྒྲུབ་པའི་ཚེ་དཀར་ཕྱོགས་དགྲ་བླ་ཝེར་མའི་འཁོརྭ་ཚོགོས་སྤྲིན་ལྟར་འདུས་ཤིང་ནག་ཕྱོགས་བདུད་སྲིན་གྱི་བསྟན་པ་ནུབ་པ་དང་དཀར་ཕྱོགས་དགའ་བའི་རྒྱལ་མཚན་དགུང་དུ་བ་སྒྲེངས་པ་ལ་དགའ་སྟོན་དུ། སྐྱིད་པའི་བྲོ་གར་ཕུལ་བའི་ངང་ཚུལ་བརྗོད་པ་དང་ཀླུང་རྟ་སྡེ་བཞིའམ་སྟག་སེང་ཁྱུང་འབྲུག་གི་བྲོ་གར་བརྡུངས་པས་མི་འདོད་དགྲ་བདུད་ཆམ་ལ་ཕབས་ཤིང་ཕྱོགས་ལས་རྣམ་པར་རྒྱལ་བའི་རྟེན་འབྲེལ་ལྷུན་གྱིས་འགྲུབ་པར་སྨོན་པའོ།།
བཞི་པ་བཀྲ་ཤིས་དབྱངས་སྙན་ནི། དོན་འགྲུབ་ཝེར་མ་དཀར་པོའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བཀྲ་ཤིས་བརྗོད་དེ་མི་འབྲལ་ཚོམ་བུ་གཅིག་ཏུ་འཚོགས་པར་སྨོན་ལམ་འདེབས་པ་ལགས་སོ། །
གླིང་བྲོ་དངོས་གཞི་ནི།
༅། །གླིང་བྲོ་བདེ་ཆེན་རྡོ་རྗེའི་རོལ་མོ་བཞུགས།
དང་པོ་བྲོ་ཡི་བྱིན་འབེབས་ནི། མོས་གུས་གདུང་བའི་ཡིད་མཆོག་གིས།།རབ་བསྐུལ་ཞི་ཞིང་དགའ་བའི་ཉམས།།སྙན་འགྱུར་ཚངས་པའི་དབྱངས་ལྟ་བུ།།གླུ་ནི་འདི་ལྟར་བླང་བར་བྱ།།
ཕོ་རྣམས་ཀྱིས།
ཨོཾ། ལོའུ་ལ་ཨ་ཧོ་ཡ་སོགས།།
མི་རྗེ་སེང་ཆེན་ལྷ་ཡི་ནོར་བུ། །
དགྲ་ལྷ་ཝེར་མའི་དཔུང་དང་བཅས་ཏེ། །
བག་བྲོ་གཟི་བྱིན་ཐིབས་སེ་བྱོན་ནས། །
གཡས་གྲལ་ལྷ་ཡི་བྲོ་ལ་བཞུགས་ཤོག །
ཕོ་རྒྱུད་དཔའ་བོའི་བྱིན་ཆེན་ཕོབས་ཤོག །
ཨ་ཧོ་ཡ། ཨ་ཧོ་ཡ།
བུ་ཡིས་ཕ་ཆེན་བརྗེད་པ་མི་སྲིད། །
ངས་ནི་མི་བརྗེད་གསོལ་བ་འདེབས་སོ། །
ཡིད་ལ་སེང་ཆེན་རྒྱལ་པོ་དྲན་ནས། །
རྐང་བའི་བྲོ་དང་ལག་པའི་གར་སྟབས། །
ངག་གི་གདུང་དབྱངས་ལྷང་ལྷང་སྒྲོགས་ན། །
མཁྱེན་པའི་ཉི་མ་གསལ་བའི་ལྷ་སྲས། །
བརྩེ་བའི་ཟླ་བ་རྒྱས་པའི་མི་རྗེ། །
བྱིན་རླབས་གློག་ལྟར་མྱུར་བའི་སེང་ཆེན། །
སྐུ་རྗེ་དོན་གྲུབ་ཝེར་མ་དཀར་པོ། །
འཛུམ་པའི་ཞལ་རས་སྟོན་ལ་བྱོན་ཤོག །
སྙན་པའི་གསུང་དབྱངས་སྒྲོགས་ལ་བྱོན་ཤོག །
དགྱེས་པའི་ཐུགས་ཀྱིས་དགོངས་ལ་བྱོན་ཤོག །
བྱིན་རླབས་བརྡ་རྟགས་སྟོན་ལ་བྱོན་ཤོག། །
འཕྲིན་ལས་བྱིན་ཆེན་ཕོབ་ལ་བྱོན་ཤོག །
ཨ་ཧོ་ཡ། ཨ་ཧོ་ཡ།
ལུས་ངག་ཡིད་གསུམ་མཆོད་པ་འབུལ་ན། །
མ་གཡེང་ཐུགས་རྗེས་དགོངས་ཤིག་ནོར་བུ། །
ཕ་ཡིས་བུ་དེ་བརྗེད་པ་མི་སྲིད། །
མ་བརྗེད་ཡོད་ན་ད་ལྟ་ཕེབས་ཤོག །
ཕེབས་ནས་བཀྲ་ཤིས་བྱིན་རླབས་མཛོད་ཅིག །ཨ་ཧོ་ཡ། ཨ་ཧོ་ཡ། ལེ་ཚན་དང་པོའོ།།
དེ་ནས་བུད་མེད་རྣམས་ཀྱིས་ནི། གླུ་ནི་འདི་བཞིན་བླང་བར་བྱ།།
ཨོཾ། སྟོང་ཉིད་ལྷ་མོ་ཆོས་ཀྱི་མཚོ་མོ། །
མ་ཚོགས་མཁའ་འགྲོའི་འཁོར་དང་བཅས་ཏེ། །
བག་དྲོ་གཟི་བྱིན་ཐིབས་སེ་བྱོན་ཤོག །
གཡོན་གྲལ་ལྷ་ཡི་བྲོ་ལ་བཞུགས་ཤོག །
མོ་རྒྱུད་མཛེས་པའི་བྱིན་ཆེན་ཕོབ་ཤོག །
བུ་མོས་ཨ་མ་བརྗེད་པ་མི་སྲིད། །
ངས་ནི་མི་བརྗེད་གསོལ་བ་འདེབས་སོ། །
ཡིད་ལ་དྭངས་སྨན་ཌཱ་ཀཱི་དྲན་ནས། །
རྐང་བའི་བྲོ་དང་ལག་པའི་གར་སྟབས། །
ངག་གི་གདུང་དབྱངས་ལྷང་ལྷང་སྒྲོགས་ན། །
མཁྱེན་པའི་ཉི་མ་གསལ་བའི་མཁའ་འགྲོ། །
བརྩེ་བའི་ཟླ་བ་རྒྱས་པའི་ཡུམ་ཆེན། །
བྱིན་རླབས་གློག་ལྟར་མྱུར་བའི་དྭངས་སྨན། །
དགྱེས་ཡུམ་བཀྲ་ཤིས་གསང་བའི་ལྷ་མོ། །
འཛུམ་པའི་ཞལ་རས་སྟོན་ལ་བྱོན་ཤོག །
སྙན་པའི་གསུང་དབྱངས་སྒྲོགས་ལ་བྱོན་ཤོག །
དགྱེས་པའི་ཐུགས་ཀྱིས་དགོངས་ལ་བྱོན་ཤོག །
བྱིན་རླབས་བརྡ་རྟགས་སྟོན་ལ་བྱོན་ཤོག །
འཕྲིན་ལས་བྱིན་ཆེན་ཕོབ་ལ་བྱོན་ཤོག །
ལུས་ངག་ཡིད་གསུམ་མཆོད་པ་འབུལ་ན། །
མ་གཡེལ་ཐུགས་རྗེས་དགོངས་ཤིག་སྒྲོལ་མ། །
མ་ཡིས་བུ་མོ་བརྗེད་པ་མི་སྲིད། །
མ་བརྗེད་ཡོད་ན་ད་ལྟ་ཕེབས་ཤོག །
ཕེབས་ནས་བཀྲ་ཤིས་བྱིན་རླབས་མཛོད་ཅིག །ཨ་ཧོ་ཡ། ཨ་ཧོ་ཡ། ཞེས་སོ།།
དེ་ནས་མཆོད་ཅིང་བསྟོད་པའི་གླུ། ཕོ་མོ་ཁྱད་མེད་ཅི་བདེར་བླངས། བཀྲ་ཤིས་དར་གྱི་འཕྱང་འཕྲུལ་ཐོགས། སྒེག་ཅིང་འཛུམ་པའི་ཚུལ་གྱིས་ནི། ཡིད་འཕྲོག་ངག་གིས་བླང་བར་བྱ།།
ཨཱ༔ སྐུ་རྗེ་སེང་ཆེན་ཡིད་བཞིན་ནོར་བུ །།
རྩ་གསུལ་དགྲ་བླའི་སྤྲིན་ཕུང་འཁྲིགས་པ།།
བདེ་ཆེན་དྭངས་སྨན་ཌ་ཀིའི་ཚོགས་དང་།།
དགྱེས་བཞད་ཆགས་པའི་ཉམས་འགྱུར་གཡོ་ཞིང་།།
ཨ་ལ་ལ་ཧོ། ཨ་ལ་ལ་ཧོ།
བྱིན་རླབས་གཟི་བྱིན་འབར་བར་བཞུགས་ལ།།
འདིར་ཚོགས་དད་ལྡན་བདག་ཅག་རྣམས་ཀྱིས།།
གནས་ལུས་ལོངས་སྤྱོད་མཆོད་པར་འབུལ་ན།།
བརྩེ་བའི་ཐུགས་ཀྱིས་བཞེས་པར་མཛོད་ཅིག ། ཨ་ལ་ལ་སོགས།།
མཛེས་མཛེས་ལུས་ཀྱི་བྲོ་གར་སྟངས་སྟབས།།
སྙན་སྙན་ངག་གི་གླུ་དབྱངས་འགྱུར་ཁུག །
དུངས་དུངས་སེམས་ཀྱི་དད་གུས་གདུང་ཤུགས།།
ཡང་ཡང་སེང་ཆེན་རྗེ་ལ་མཆོད་དོ།། ཨ་ལ་ལ་སོགས།
སྔོན་ཚེ་སེར་པོ་ཧོར་གྱི་ས་ནས།།
སྟོང་ཉིད་མགར་བཟའ་ཆོས་ཀྱི་སྒྲོན་མེས།།
དགྲ་བླའི་སྐུ་ཆས་ཁྱེད་ལ་གསོལ་བས།།
བསྟནདགྲ་ཐུལ་བའི་རྟེན་འབྲེལ་འགྲིག་སོང་།།
ཨ་ལ་སོགས།
སྔོན་ཚེ་དྭངས་སྨན་མཁའ་འགྲོའི་ཚོགས་དང་།།
ལྷ་ཀླུ་མི་ཡི་དྲེགས་ལྡན་རྣམས་ཀྱིས།།
སྣན་ཚོགས་རྫས་མཆོག་ཁྱེད་ལ་ཕུལ་བས།།
འཕྲིན་ལས་ཀུན་འགྲུབ་རྟེན་འབྲེལ་འགྲིག་སོང་།། ཨ་ལ་ལ་ཧོ། ཨ་ལ་ལ་ཧོ།
དེ་བཞིན་ད་ལྟ་མོས་ལྡན་ངེད་ཀྱིས།།
དགྲ་བླའི་སྐུ་ཆས་རྟེན་འབྲེལ་རྫས་མཆོག །
སྣ་ཚོགས་སྤྲིན་ལྟར་གཏིབས་པའི་མཆོད་པས།།
དགྲ་བླ་ཝེར་མའི་དབུ་འཕང་བསྟོད་ན།། ཨ་ལ་ལ་ཧོ། ཨ་ལ་ལ་ཧོ། །།
འཛུམ་འཛུམ་སྤྱན་གྱིས་གཟིགས་ལ་བཞེས་ཤིག །
དགྱེས་དགྱེས་ཐུགས་ཀྱིས་དགོངས་ལ་བཞེས་ཤིག །
བྱམས་བྱམས་ཕ་མ་ལྟ་བུའི་ཚུལ་གྱིས། །
ཡང་ཡང་མགོན་སྐྱབས་སྡོངས་གྲོགས་མཛོད་ཅིག ། ཨ་ལ་ལ་ཧོ། ། ཨ་ལ་ལ་ཧོ། ། བྲོ་ལེ་ཚན་གཉིས་པའོ།།
དེ་ནས་སྣ་ཚོགས་འཕྲིན་ལས་བྲོ།། དཔའ་བརྗིད་རྔམ་པའི་ཚུལ་གྱིས་བརྡུང་།། དགྲ་བླའི་ཆས་སམ་གང་མཛེས་སུ།། འཇིགས་ལ་ཟིལ་ཆེ་སྙན་པའི་དབྱངས།། རིག་པའི་བརྟུལ་ཞུགས་བཅས་ཏེ་བླངས།།
ཧཱུྃཿ སྔོན་ཚེ་འཛམ་གླིང་ནོར་བུ་དགྲ་འདུལ།།
དགྲ་བླའིསྐུ་ཆས་སྐུ་ལ་མནབས་ནས།།
བདུད་དང་སྲིན་པོ་འདུལ་དུ་གཤེགས་ཤིང་།།
ནག་ཕྱོགས་ཧོར་བདུད་གདན་ལ་བཞུགས་ཚེ།།
དགྲ་བླ་ཝེར་མའི་དམག་དཔུང་འདུས་སོང་།།
འཇམ་དཔལ་རྣོན་པོ་ཤེས་རབ་རལ་གྲིས།།
ལྔ་ཕུང་སྒྱུ་མའི་དྲ་བ་བཤིག་ནས།།
ཤ་ཁྲག་དགྲ་བླའི་མཆོད་སྟོན་འགྱེད་སོང་།།
དགྲ་བླ་དཔའ་བའི་གད་རྒྱང་བསྒྲགས་སོང་།།
དགྲ་བླ་དཔའ་བའི་གད་རྒྱང་བསྒྲགས་སོང་།།
ས་སྟེང་བདུད་སྲིན་བསྟན་པ་བསྣུབས་སོང་།། ས་སྟེང་སོགས་ཉིས་བསྐྱར།
དཀར་ཕྱོགས་དགའ་བའི་རྒྱལ་མཚན་བསྒྲེངས་སོང་།། དཀར་ཕྱོགས་དགའ་་
ལྷ་ཀླུས་སྐྱིད་པའི་བྲོ་གར་བརྡུང་སོང་། ལྷ་ཀླུས་སྐྱིད་
ཡང་ཅི་འཛམ་གླིང་ལྷ་ཡི་ནོར་བུ།།
དགྲ་བླའི་སྐུ་ཆས་སྐུ་ལ་མནབས་ནས།།
རྫུ་འཕྲུལ་རྟ་རྒྱུགས་མཛད་པ་བསྟན་ཅིང་།།
རིན་ཆེན་གསེར་གྱི་ཁྲིལ་བཞུགས་ཚེ།།
དགྲ་བླ་ཝེར་མའི་དམག་དཔུང་འདུས་སོང་།།འདི་ཉིས་བསྐྱར་སོགས་གོང་གི་རིགས་འོག་མ་ཀུན་ལ་འགྲེ་ཤེས་པར་བྱ།།
རྟ་མཆོག་རོལ་པ་དབང་གི་ང་རོ།།
བཞད་པ་བརྒྱད་ཀྱི་དབྱངས་སུ་འཚེར་བས།།
སྣང་སྲིད་འདོད་རྒུ་དབང་དུ་བསྡུས་ནས།།
དགྲ་བླ་དགྱེས་པའི་མཆོད་སྟོན་མཛད་སོང་།།
ས་སྟེང་བདུད་སྲིན་བསྟན་པ་བསྣུབས་སོང་།།
དཀར་ཕྱོགས་དགའ་བའི་རྒྱལ་མཚན་བསྒྲེངས་སོང་།།
ལྷ་ཀླུས་སྐྱིད་པའི་བྲོ་གར་བརྡུང་སོང་།།
ཡང་ཅི་འཛམ་གླིང་ལྷ་ཡི་ནོར་བུ།།
དགྲ་བླའི་སྐུ་ཆས་སྐུ་ལ་མནབས་ནས།།
སྣ་ཚོགས་མཛད་པའི་རོལ་རྩེད་ངོམ་པས།།
མཐའ་བཞིའི་ཆེ་རྒུ་ཆབ་འོག་འཛུད་ཚེ།།
དགྲ་བླ་ཝེར་མའི་དམག་དཔུང་འདུས་སོང་།།དགྲ་བླ་སོགས།
མཐུ་སྟོབས་མཚུངས་པ་མེད་པའི་ལྷ་མཆོག །
ཐོགས་མེད་རྡོ་རྗེའི་ནུས་རྩལ་ལྡན་པས།།
གང་འདོད་འཕྲིན་ལས་རང་དབང་བསྒྱུར་ནས།།
དགྲ་བླ་དགྱེས་པའི་མཆོད་སྟོན་མཛད་སོང་།།
ས་སྟེང་བདུད་སྲིན་བསྟན་པ་བསྣུབས་སོང་།། ས་སྟེང་ཉིས་བསྐྱར་སྔ་མ་ལྟར་རོ།།
དཀར་ཕྱོགས་དགའ་བའི་རྒྱལ་མཚན་བསྒྲེངས་སོང་།།
ལྷ་ཀླུས་སྐྱིད་པའི་བྲོ་གར་བརྡུང་སོང་།།
ཡང་ཅིག་སྐྱེས་མཆོག་གེ་སར་རྒྱལ་པོ།།
བསམ་གྲུབ་བདེ་ཆེན་ནོར་བུའི་ཕོ་བྲང་།།
བཀྲ་ཤིས་གསེར་གྱི་ཁྲི་ལ་བཞུགས་ཏེ།།
དད་དམ་དག་པ་འདུས་པའི་འཁོར་ལ་།།
རང་སྣང་ཆོས་སྐུའི་དགོངས་པ་གཏད་ཚེ།།
མཐོང་བ་ཀུན་སྨོན་གླིང་དཀར་ཡུལ་གྱི།།
དཔའ་ཐུལ་དྭངས་སྨན་འདུས་པའི་ཚོགས་ཀྱིས།།
རང་རིག་ཀུན་བཟང་དགོངས་པ་མཐོང་ནས།།
འཆི་མེད་འོད་ལུས་དྭངས་མ་འགྲུབ་སོང་།།
དེ་ཚེ་རྩ་གསུམ་སྲུང་མའི་ཚོགས་རྣམས།།
ཡེ་ཤེས་དགྲེ་བླ་ཝེར་མའི་རྣམ་པས།།
ངོ་མཚར་ཤིས་པའི་གད་རྒྱངས་བསྒྲགས་སོང་།།ངོ་མཚར་ཤིས་སོགས་ཉིས་ཟེར།།
ས་སྟེང་བདུད་སྲིན་བསྟན་པ་བསྣུབས་སོང་།།
དཀར་ཕྱོགས་དགའ་བའི་རྒྱལ་མཚན་བསྒྲེངས་སོང་།།
ལྷ་ཀླུས་སྐྱིད་པའི་བྲོ་གར་བརྡུང་སོང་།། འདི་ནས་དབྱངས་དལ་བུས་ལུས་ཀྱི་སྟབས་རྣམས་བྱ་སྟེ།
ལག་གཡས་ཐབས་ཆེན་དཔའ་བོའི་ཕྱག་རྒྱ།། གཡས་གྱེན་དུ་གདངས།
རྔམ་རྔམ་ནམ་མཁའི་ཁམས་ལ་གདེངས་སོང་།།
ལག་གཡོན་ཤེས་རབ་དཔའ་མོའི་ཕྱག་རྒྱ།།
མཛེས་མཛེས་ས་གཞིའི་ངོས་ལ་གཏད་སོང་།། ལག་གཡོན་མཛེས་པར་བསྒྱུར་ཞིང་ཐུར་དུ་ཕབ།
རྐང་པ་གཡས་གཡོན་སྟོང་ཉིད་སྙིང་རྗེ།།
ལྡེམ་ལྡེམ་གཡོ་བའི་བྲོ་ར་འགྲིག་སོང་།། རྡོག་བྲོ་རས་འཐབ་དང་མཉམ་སྡེབ།
རོ་སྟོད་དགྱེ་དགུ་གཡུ་འབྲུག་འཁྱུག་འགྲོས།། སྟོད་འཁྱུག་ལྡེམ།
རྐང་པ་དམར་ཡག་སྟག་གི་མཆོངས་སྟངས།། རྐང་འདེགས་མཆོངས་ཆེན།
ལག་པ་ཁྱུང་ཆེན་གཤོག་པའི་ལྡིང་སྟབས། བརྐྱངས་འདེགས།
མགོ་བོ་སེང་གེ་རྔམ་པའི་ལྟ་སྟངས།། ཕྱོགས་སུ་བརྗིད་པར་བལྟ།
ཝེར་མ་ལུས་ལ་ཆགས་པའི་སྒྱུ་རྩལ།།
ཁམས་གསུམ་ཟིལ་གནོན་བྲོ་ཡི་སྟབས་ཀྱིས།།
མི་འདོད་དགྲ་བདུད་ཆམ་ལ་ཕབ་སོང་།། འཁྲབ་ཆུང་།
མི་འདོད་དགྲ་བདུད་ཆམ་ལ་ཕབ་སོང་།། འཁྲབ་ཆེན།
དེ་ནས་དལ་བུས་བྲོ་གྲལ་གཡས་སུ་བསྐོར་ལ།
གཡས་སྐོར་ཕོ་རྒྱུད་དཔའ་བོའི་དཔའ་དར།།
གཡོན་དུ་བསྐོར་ལ། གཡོན་བསྐོར་མོ་རྒྱུད་དཔའ་མོའི་དཔའ་སྐྱེམས།།
བྲོ་ཡི་རོལ་རྩེད་དེ་རིང་ངོམ་ན།།
དགྲ་བླ་དགྱེས་པའི་དབུ་འཕང་བསྟོད་ཅིང་།།
ཝེར་མ་དགའ་བའི་ངོ་སོ་མཐོ་བའི།།
དགའ་སྟོན་བྲོ་གར་རྟེན་འབྲེལ་འདི་ཡིས།།
རྒྱལ་ཁམས་ཡོངས་ལ་བཀྲ་ཤིས་རྒྱས་ཤིང་།།
འདིར་ཚོགས་ཡོངས་ལ་དགེ་ལེགས་འཕེལ་ཤོག །
ཕྱོགས་ལས་རྣམ་པར་རྒྱལ་བའི་རྟེན་འབྲེལ།།
དེ་རིང་ལྷུན་གྱིས་འགྲིག་པར་ཤོག་ཅིག ཨ་ཏེ་ཧོ། ཨ་ཏེ་ཧོ། ཞེས་འཁྲབ་ལ་རྒྱ་རོལ་བསྒྲགས། དེ་ནས་དཔའ་སྐྱེམས་དྲངས་བར་བྱའོ། བྲོ་ལེ་ཚན་གསུམ་པའོ།།
དེ་ནས་བཀྲ་ཤིས་རྫས་སྣ་ཚོགས། ཐོགས་ལ་དལ་བར་བག་ཕེབས་ཤིང་། ཡིད་འོང་ཚིམ་པའི་ཚུལ་གྱིས་སུ། བཀྲ་ཤིས་དབྱངས་སྙན་བླང་བར་བྱ།།
ཧོཿ རྩ་གསུམ་ཀུན་འདུས་སེང་ཆེན་རྒྱལ་པོ། །
མཆོག་གསུམ་བཀྲ་ཤིས་སྙན་པའི་ནོར་བུ། །
སྐུ་རྗེ་དོན་གྲུབ་ཝེར་མ་དཀར་པོ། །
བཀྲ་ཤིས་དགེ་ལེགས་ཕུན་སུམ་ཚོགས་མཛོད། །
ཨེ་མ་ཧོ། ཨེ་མ་ཧོ།
སྐུ་ཡི་བཀྲ་ཤིས་ཡིད་འོང་བྱིན་ཆགས། །
ནད་མེད་བདེ་སྐྱིད་འཕེལ་བའི་རང་བཞིན། །
མི་ནུབ་རྒྱལ་མཚན་ལྟ་བུའི་བཀྲ་ཤིས། །
འདིར་འཚོགས་ཡོངས་ལ་འཛོམས་པར་ཤོག་ཅིག །
ཨེ་མ་ཧོ། ཨེ་མ་ཧོ།
གསུང་གི་བཀྲ་ཤིས་དགའ་སྐྱིད་གླུ་དབྱངས། །
སྙན་གྲགས་ས་སྟེང་ཁྱབ་པར་སྒྲོགས་པ། །
འགག་མེད་དུང་སྒྲ་ལྟ་བུའི་བཀྲ་ཤིས། །
འདིར་ཚོགས་ཡོངས་ལ་འཛོམས་པར་ཤོག་ཅིག །
ཨེ་མ་ཧོ། ཨེ་མ་ཧོ།
ཐུགས་ཀྱི་བཀྲ་ཤིས་ཆོས་ཀྱི་ཞིང་ས། །
བདེ་སྟོང་གསལ་འབར་བག་དྲོ་ལྷུན་ཆགས། །
མི་འགྱུར་ནམ་མཁའ་ལྟ་བུའི་བཀྲ་ཤིས། །
འདིར་ཚོགས་ཡོངས་ལ་འཛོམས་པར་ཤོག་ཅིག །
ཨེ་མ་ཧོ། ཨེ་མ་ཧོ།
ཡོན་ཏན་བཀྲ་ཤིས་དགོས་འདོད་ཀུན་འབྱུང་། །
ཆོས་སྲིད་ཕུན་ཚོགས་བསྟན་པ་དར་རྒྱས། །
བསམ་འཕེལ་ནོར་བུ་ལྟ་བུའི་བཀྲ་ཤིས། །
འདིར་ཚོགས་ཡོངས་ལ་འཛོམས་པར་ཤོག་ཅིག །
ཨེ་མ་ཧོ། ཨེ་མ་ཧོ།
འཕྲིན་ལས་བཀྲ་ཤིས་མཐུ་སྟོབས་དཔལ་འབར། །
ཕྱོགས་ལས་རྣམ་རྒྱལ་དབུ་འཕང་མཐོ་བའི། །
དགུང་ལ་ཉི་ཟླ་ལྟ་བུའི་བཀྲ་ཤིས། །
འདིར་ཚོགས་ཡོངས་ལ་འཛོམས་པར་ཤོག་ཅིག །
ཨེ་མ་ཧོ། ཨེ་མ་ཧོ།
གནས་འདི་མཁའ་སྤྱོད་མཐོང་བ་ཀུན་སྨོན། །
འདིར་ཚོགས་དཔའ་ཐུལ་དང་སྨན་རིག་འཛིན། །
མི་འབྲལ་ཚོམ་བུ་གཅིག་ཏུ་ཚོགས་ནས། །
བདེ་ཆེན་འགྲུབ་པའི་བཀྲ་ཤིས་ཤོག་ཅིག ། ཨེ་མ་ཧོ། ཨེ་མ་ཧོ། བྲོ་ལེ་ཚན་བཞི་པའོ།
བྲོ་ཡི་དགའ་སྟོན་འདིར་འབྲེལ་བར།། ལྟད་མོ་རྣམ་པ་སྣ་ཚོགས་བྱ།། འདུས་པ་རྣམས་ཀྱིས་སེང་ཆེན་རྗེ།། དྲན་པས་གསོལ་འདེབས་དབྱངས་སྙན་བསྒྲགས།། དེས་ནི་གནས་སྐབས་དགའ་བ་དང་།། ཡུན་དུ་ཆོས་སྲིད་ལེགས་ཚོགས་འཕེལ།། རྟེན་འབྲེལ་བཟང་པོའི་སྒོ་འཕར་དབྱེ།། བཀྲ་ཤིས་དོན་འགྲུབ་ཕྱོགས་ལས་རྒྱལ།། ས་མ་ཡ། ཞེས་པའང་བསེ་རུ་འོད་ལྡན་དཀར་པོས་དགོས་པ་ཁྱད་པར་ཅན་ཕྱིར་བྲིས་པ་མངྒ་ལ།།
འདི་ཉིད་རྒན་པོ་ཉི་མ་ཚེ་རིང་ནས་མཁོ་འདོན་ཞུས་པའོ།
བསམ་ཚུལ་འབྲི།
བརྩེ་དྲུང་གི་གོད་ཆག རིག་བྱེད་སྐབས།