ཕྱི་ལོ་ ༢༠༠༨ ལོ་ནས་སྡེ་དགེའི་ཁུལ་གྱི་ལས་འགུལ་ཁག་ཅིག
སྟོང་ལོ་གཉིས་པའི་ནང་གི་སྡེ་དགེའི་ཁུལ་གྱི་ཞི་རྒོལ།
ཕྱི་ལོ་༢༠༠༨ལོ་ནས་ཁམས་སྡེ་དགེའི་ས་ཕྱོགས་གང་ས་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་རྣམ་པ་མི་འདྲ་བའི་ཡར་ལངས་ཞི་རྒོལ་རིམ་པ་མང་པོ་ཞིག་གནང་པའི་ནང་ནས།ལག་སོན་བྱུང་བའི་གནས་ཚུལ་ཁག་ཅིག་འདིར་ཕྱོགས་སྒྲིག་ཞུ་བ་ལ།
༈༢༠༠༨ཀྱི་ཞི་རྒོལ་སྣེ་ཁྲིད་པའི་ཉེས་མིང་འོག་སྲོག་ཐོག་གི་ཁྲིམས་ཆད།
རྒྱ་གཞུང་གིས་བོད་མི་བསོད་ནམས་ཚེ་རིང་ཞུ་བར་ལོ་གཉིས་ནར་འགྱངས་ཀྱིས་སྲོག་ཐོག་ཁྲིམས་ཐག་བཅད་ཡོད་པ།
ཡོང་ཁུངས།བཙན་བྱོལ་བོད་གཞུང་དྲ་གནས།
༄༅༎ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཞེས་པས། འདི་ལོའི་ཕྱི་ཟླ་ལྔ་པའི་ནང་ཁམས་སྡེ་དགེ་དཔལ་ཡུལ་རྫོང་ཁོངས་ནས་ཡིན་པའི་ན་གཞོན་བསོད་ནམས་ཚེ་རིང་ལ། ༢༠༠༨་ལོར་ལྷ་སར་༣།༡༤་ཞི་རྒོལ་ནང་སྣེ་ཁྲིད་བྱས་པའི་ཉེས་མིང་བཀལ་ཏེ་ལོ་གཉིས་ནར་འགྱངས་ཀྱིས་སྲོག་ཐོག་གཏང་རྒྱུའི་ཁྲིམས་ཐག་བཅད་ཡོད་པ་མ་ཟད། ཁོང་གི་ཕ་མ་གཅིག་པའི་སྤུན་མཆེད་ཚེ་དབང་འགྱུར་མེད་དང༌། དཔལ་ཡུལ་ནས་ཡིན་པའི་བཀྲིས་ཆོས་སྒྲོན། སྨར་ཁམས་ནས་ཡིན་པའི་སྒྲོལ་དབྱངས། ཀོང་པོ་ནས་ཡིན་པའི་ག་གཡང་། ལྷ་ས་ནས་ཡིན་པའི་ཨ་ནེ་ཡེ་ཤེས་མཚོ་མོ། ལྷ་ས་ནས་ཡིན་པའི་བཀྲ་དབྱངས། ལྷ་ས་ནས་ཡིན་པའི་སྒོ་རའི་ཙུའུ་ཀྲང་པ་སངས་ཚེ་རིང་བཅས་བསོད་ནམས་ཚེ་རིང་དང་འབྲེལ་ཡོད་བོད་མི་བདུན་ཙམ་ལ་བསོད་ནམས་ཚེ་རིང་འགེབས་སྲུང་བྱས་པའི་ཉེས་མིང་འོག་ལོ་༡་ནས་༧་བར་བཙོན་འཇུག་དགོས་པའི་ཁྲིམས་ཆད་བཏང་ཡོད་འདུག
བསོད་ནམས་ཚེ་རིང་༢༠༠༨ལོའི་ཟླ་༣ པའི་ཞི་རྒོལ་ནང་ཞུགས་རྗེས་ལྷ་ས་གྲོང་ཁྱེར་སྤྱི་བདེ་ཚན་པས་འཛིན་བཟུང་བརྡ་ཁྱབ་ཤུགས་ཆེ་སྤེལ་ཏེ། རྩིས་སྤྲོད་བྱེད་མཁན་ལ་དངུལ་གྱི་བྱ་དགའ་ཁྱོན་ཆེ་སྤྲོད་རྒྱུའི་ཁྱབ་བསྒྲགས་ཐེངས་མང་བྱས་པ་དང༌། མཐར་༢༠༠༩ ཟླ་ ༡༠ པའི་ནང་འཛིན་བཟུང་བྱས་ནས། ལོ་གཉིས་ནར་འགྱངས་ཀྱིས་སྲོག་ཐོག་གཏོང་རྒྱུའི་ཐག་གཅོད་བྱས་རྗེས། ད་ལྟའི་ཆར་ལྷ་སའི་བཙོན་ཁང་གང་ཞིག་ནང་དུ་ཡོད་པ་དང༌། ད་ལྟ་འཚོ་གནས་ཡོད་མེད་ཀྱི་གནས་སྟངས་སོགས་གང་ཡང་གོ་རྒྱུ་མེད་པ་ཡིན་འདུག།
༈ཁམས་སྡེ་དགེ་འཇོ་མདའ་ཁུལ་གྱི་ཛ་དྲག་གནས་ཚུལ།
ཡོང་ཁུངས།བོད་ཀྱི་བང་ཆེན།
འདི་ལོའི་ལོ་མགོ་ནས་བཟུང་རྒྱ་ནག་གཞུང་གིས་ཁམས་སྡེ་དགེ་འཇོ་མདའ་ས་ཁུལ་འདན་ཆོས་འཁོར་དགོན་སོགས་གང་སར་རྒྱལ་གཅེས་ཆོས་གཅེས་དང། ཏཱ་ལའི་ཁ་བྲལ་རིང་ལུགས་པར་ངོ་རྒོལ་ཟེར་བའི་ས་ཡིག་བསྡུ་རུབ་ཀྱི་ལས་འགུལ་དྲག་པོ་རབ་དང་རིམ་པ་སྤེལ་ཡོད་པ་དང། ཐ་ན་སྟོངས་ལ་ཉེ་བའི་རི་སྐྱེས་སྲོག་ཆགས་ཤྭ་བ་སོགས་ཀྱང་རང་སྣང་གང་ཤར་གྱིས་སྡེབས་གསོད་བྱས་དང་བྱེད་བཞིན་ཡོད་པ་ལྟར། སྐྱབས་ཆེ་དགོན་དུའང་རྒྱལ་གཅེས་ཆོས་གཅེས་དང། ཏཱ་ལའི་ཁ་བྲལ་རིང་ལུགས་ལ་ངོ་རྒོལ་ཟེར་བའི་ལས་འགུལ་སྤེལ་མཁན་སྔ་རྗེས་ཐེངས་དགུ་ཙམ་ཕྱིན་ཀྱང་དགེ་འདུན་པས་ངོས་ལེན་རྩ་བ་ནས་མ་བྱས་པར་མཐའ་མར་དགེ་འདུན་པ་ཚང་མ་ཕྱོགས་གང་སར་ཁ་འཐོར་བྲོས་བྱོལ་དུ་ཕེབས་བྱུང་ནས་ཟླ་བ་གཅིག་ལྷག་དགོན་མ་ལག་དང་བཅས་པ་སྟོང་པ་ཆགས་ཡོད་འདུག
དམག་མི་དང་ཉེན་རྟོག་མི་སྣས་སྐྱབས་ཆེ་དགོན་པ་བཟུང་བསྡད་ཡོད་པ་མ་ཟད། མགྱོགས་མྱུར་དགེ་འདུན་པ་རྣམས་འཛོམས་དགོས་པའི་བཙན་བཀའ་བཏང་ཡོད་པ་དང། གལ་ཏེ་མ་མཛོམས་ན་དགོན་པ་རྩ་མེད་དུ་གཏོང་རྒྱུ་ཡིན་པར་སྡེ་དགོན་གཉིས་ཀར་ཉེན་ བརྡ་བཏང་ཡང་གྲུབ་འབྲས་གང་ཡང་མ་སོན་པའི་རྐྱེན་གྱིས་ཕྱི་ཟླ་༦ པའི་ཚེས་༢༧ ཉིན་སྐྱབས་ཆེ་དགོན་གྱི་མཆོད་སྡེའི་གཙོ་བོ་པདྨ་སྨད་པའི་ནང་དུ་ཡོང་ནས་གུང་ ཁྲན་ཏང་ཡོན་གྱི་མིང་ཡོད་པའི་བོད་མི་འགྱུར་མེད་མགོན་པོ་དང། རྒྱ་ཚང་རྡོ་རྗེ་གཉིས་འཛིན་བཟུང་བྱས་ཏེ་སྐྱབས་ཆེ་དགོན་དུ་ཁྲིད་ཡོད་པར་ཡུལ་ མི་རྣམས་དངངས་འཚབ་ཆེན་པོལངས་ཏེ་ནོར་ལྷ་དང། མགོན་པོ་དར་རྒྱས་སོགས་མི་གྲངས་ཉེར་བདུན་ཙམ་སྐྱབས་ཆེ་དགོན་དུ་སོང་ནས་གོང་ གསལ་མི་གཉིས་པོ་གློད་གྲོལ་གཏོང་དགོས་པའི་རེ་འདུན་ཞུས་ཀྱང་དེ་ལས་ལྡོག་སྟེ་ དུག་རྫས་ངན་པ་ཞིག་འཕངས་ཏེ་བོད་མི་རྣམས་མགོ་ཡུ་འཁོར་བ་དང། དྲན་པ་འཐོར་བ། མིག་གིས་མི་མཐོང་བ་བཟོས་རྗེས་དམག་མི་དང་ཉེན་རྟོག་པས་ལྕགས་རྒྱུགས་དང། གློག་རྒྱུགས། མེ་མདའི་ཡུ་བ་སོགས་མགོ་ལུས་གང་ལའང་འཛེམས་མེད་ཀྱིས་གཞུས་ཏེ་དེ་ག་རང་དུ་ནོར་ ལྷ་སོགས་དྲན་པ་འཐོར་ནས་ཆུ་ཚོད་གཉིས་ཙམ་རིང་རོ་བཞིན་གྱུར་ཡོད་འདུག
དེང་སྐབས་འཛིན་བཟུང་བྱས་པ་རྣམས་ཀྱི་མི་མིང་ཤེས་རྟོགས་བྱུང་བ་ཁག་གཤམ་གསལ། ༡ ཤ་ཤག་ཚང་ནོར་ལྷ་རང་ལོ་༤༧། ༢་ཚེ་བཟང་ཚང་མགོན་པོ་དར་རྒྱས་རང་ལོ་༤༤། ༣ བུ་ལྷག ༤ གྲོ་ཁོ་ཚང་ཨ་འཇིག ༥ ཚུལ་ཁྲིམས། ༦ བསམ་འཕེལ་ནོར་བུ། ༧ བསོད་སྟོབས། ༨ རིས་ཆུང་ཉི་གྲགས། ༩ ཆོས་འཁོར་ཚང་རིན་ཆེན་རྒྱལ་མཚན་རང་ལོ་༡༥། ༡༠ འཇིགས་མེད་དབང་ཕྱུག། ༡༡ རྒྱལ་མཚན་ཚང་བྱམས་པ། ༡༢ བྱང་ཆུབ་ཆོས་འཕེལ། ༡༣ ག་དགེ། ༡༤ ཕྱུག་པོ་ཚང་འགྱུར་མེད། ༡༥ དོན་དགའ། ༡༦ཨོ་ཡོང་ཚེ་རིང། ༡༧ ཆོས་སྐྱོང་དབང་རྒྱལ་བཅས་སྐྱབས་ཆེ་དགོན་པའི་བཤད་གྲྭའི་གྲྭ་ཤག་རྣམས་བཙོན་ཁང་ བཟོས་ནས་བཀག་ཉར་བྱས་ཡོད་འདུག དེ་དག་གི་ནང་ནས་ནག་ཉེས་ཆེ་ཤོས་དང། བྱེད་གཏེ་རུ་ཉེས་འཛུགས་ཀྱིས་ནོར་ལྷ་དང།མགོན་པོ་དར་རྒྱས་གཉིས་ཉིན་དེ་རང་དུ་ འཇོ་མདའ་རྫོང་དུ་བཙན་ཁྲིད་བྱས་ཡོད་ཀྱང། ད་བར་ཕྱི་ནང་སུས་ཀྱང་ཁོང་གཉིས་ཀྱི་གནས་སྟངས་ཤེས་མི་མེད་སྟབས། ཡུལ་མི་དང་ཉེ་འབྲེལ་རྣམས་སེམས་འཚབ་ཤིན་ཏུ་ཆེན་པོ་བྱེད་བཞིན་ཡོད་འདུག འཕྲོས་ལུས་སྐྱབས་ཆེ་དགོན་དུ་འཛིན་བཟུང་བཀག་ཉར་བྱས་པའི་ནང་ནས་རྒྱལ་མཚན་ཚང་ བྱམས་པ་དང། རྨུ་ཚ་ཚང་ཚེ་བརྟན། བུ་ལྷུག་གསུམ་ཕྱི་ཟླ་༧ པའི་ཚེས་༢ ཉིན་འཇོ་མདའ་རྫོང་དུ་བཙན་ཁྲིད་བྱས་ཡོད་པ་རེད།
ཉིན་དེའི་དགོང་མོ་ས་མ་རུབ་ཙམ་དུ་ཡུལ་མི་བཞི་བཅུ་ཙམ་གྱིས་གོང་གསལ་བོད་མི་ རྣམས་གློད་གྲོལ་དགོས་པའི་རེ་འདུན་ཞུ་བར་འགྲོ་སྐབས་དུག་རྫས་དང། མེ་མདའ་མང་པོ་བོད་མི་དེ་རྣམས་ཀྱི་ཁྲོད་དུ་འཕངས་ཏེ་གནས་བརྟན་ཚེ་རིང་དང། ཚེ་བརྟན་འགྱུར་མེད།་དགེ་ལྷ། གྲོ་སྐྱབས། ག་ཆུང་དར་རྒྱས། དཔའ་རྒྱལ། འཕྲིན་ལས་དར་རྒྱས།བུད་མེད་པ་སངས་སོགས་བོད་མི་མང་པོ་རྨས་སྐྱོན་ཆེན་པོ་ཐེབས་ ཡོད་འདུག་པས། ཁོང་ཚོ་ཡང་ཤི་གསོན་ཅི་འགྱུར་ད་ཆ་ཐེ་ཚོམ་གྱི་གནས་སུ་གྱུར་ཡོད་འདུག
ཟླ་འདིའི་ཚེས་༧ ཉིན་གནས་ཚུལ་ཤེས་རྟོགས་བྱུང་བ་ལྟར་ན། འཇོ་མདའ་རྫོང་ཁོངས་ཀྱི་གྲོང་ཚོ་དྲུག་སྟེ།སྐེ་རེ་སྨད་མ་དང། རི་འོག་རུ་པ། སྐེ་སྲིབ། སོས་ཁོག པདྨ་སྨད་མ། ནོར་མ་རུ་པ། སྐྱབས་ཆེ་དགོན་བཅས་ཀྱི་འཐུས་མི་༣༠ འཇོ་མདའ་རྫོང་དུ་ཆེད་བཅར་གྱིས་ཉེ་སྔོན་ཕྱི་ཟླ་༦་ཚེས་༢༧ ཉིན་འཛིན་བཟུང་བྱས་པའི་ཨ་ཤག་ཚང་ནོར་ལྷ་རང་ལོ་༤༧ དང༌། ཚེ་བཟང་ཚང་མགོན་པོ་དར་རྒྱས་རང་ལོ་༤༤ ཅན་གཉིསདང། སྐྱབས་ཆེ་དགོན་དུ་འཛིན་བཟུང་བཀག་ཉར་བྱས་པའི་ནང་ནས་རྒྱལ་མཚན་ཚང་བྱམས་པ་དང། རྨུ་ཚ་ཚང་ཚེ་བརྟན། བུ་ལྷུག་གསུམ་ཕྱི་ཟླ་༧ པའི་ཚེས་༢ཉིན་འཇོ་མདའ་རྫོང་དུ་བཙན་ཁྲིད་བྱས་པ་རྣམས་གློད་གྲོལ་དགོས་པ་དང་ གོང་གསལ་མི་ ངོ་རྣམས་འཛིན་བཟུང་བཙོན་འཇུག་དགོས་པའི་ཉེས་པ་གང་ཡང་མེད་པ་མ་ཟད། སྤྱི་ཚོགས་ནང་ཡ་རབས་སྤྱོད་བཟང་གི་མིག་དཔེར་འོས་པ་ཤ་སྟག་ཏུ་སོང་གཤིས་མྱུར་ དུ་གློད་གྲོལ་དགོས་པའི་འབོད་སྐུལ་ཞུས་འདུག་ཀྱང་ད་བར་ཡ་ལན་གང་ཡང་བྱས་མི་ འདུག།
གཞན་ཡང་འདི་ལོའི་ས་ཟླའི་དུས་ཆེན་ཉིན་ལྷ་སར་མཆོད་མཇལ་བྱེད་མཁན་ཁམས་དང་ཨ་ མདོ་གཙོ་གྱུར་བོད་མི་མང་པོ་འཛིན་བཟུང་བྱས་པའི་ནང། ༡ ཁམས་སྡེ་དགེ་མཁར་སྒང་བསོད་སྟོབས། ༢ མཁར་སྒང་བསྟན་པ་རྣམ་རྒྱལ། ༣ སྡེ་དགེ་དཔེ་ཝར་བ་པད་རྡོ། ༤ སྡེ་དགེ་སྒྲོན་མ་སྐྱབས། ༥ སྡེ་དགེ་རག་ཆབ་བ་ངག་རྡོ། ༦ སྡེ་དགེ་དཔེ་ཝར་བ་པད་རྡོ། ༧ཁམས་ཚ་བ་སྔ་ཚེ་རིང་འགྱུར་མེད་བཅས་ད་དུང་གློད་གྲོལ་མ་བཏང་བར་རྡུ་སྡེག་དང། ཚ་འདྲི་བཟོད་པར་དཀའ་བ་བྱེད་བཞིན་ལྷ་ས་རྒུ་རྩ་བཙོན་ཁང་དུ་ཡོད་པའི་གནས་ཚུལ་ཡང་ཤེས་རྟོགས་བྱུང་འདུག།།
༈སྡེ་དགེ་འཇོ་མདའ་ཁུལ་དུ་བོད་མི་གཉིས་ལ་ཁྲིམས་ཆད།
ཡོང་ཁུངས།བོད་ཀྱི་བང་ཆེན།
འབྲེལ་ཡོད་ལ་བོད་ནས་ཁ་པར་བརྒྱུད་ཁུངས་ལྡན་གནས་ཚུལ་འབྱོར་གསལ་ལྟར་ན། མདོ་ཁམས་སྡེ་དགེ་འཇོ་མདའ་རྫོང་ཁོངས་ཨད་སྤུན་༼དབེན་པའི་༽ཤང༌། གདོང་སྒྲ་གྲོང་ཚོའི་བོད་མི་ག་ལུག་ལ་ལོ་༡ དང་ཕྱེད་ཀ་དང༌། དབང་ཕྱུག་ལ་ལོ་༡ བཅས་འཇོ་མདའ་རྫོང་ནས་ཁྲིམས་ཐག་བཅད་དེ་བཙོན་འཇུག་བྱེད་བཞིན་ཡོད་པའི་གནས་ཚུལ་གསར་དུ་གོ་ཐོས་བྱུང་འདུག
ན་ནིང་སྡེ་དགེ་འཇོ་མདའ་རྫོང་ཁོངས་ནས་བོད་མི་མང་པོ་ཞིག་གིས་ས་ཞིང་མ་བཏབ་སྟེ་རྒྱ་གཞུང་ལ་མི་འདོད་པའི་རྣམ་འགྱུར་ཤུགས་ཆེ་བསྟན་སྐབས་རྒྱ་གཞུང་གིས་བོད་མི་ཞིང་དང་པོ་རྨོ་མཁན་ལ་སྒོར་ཁྲི་བརྒྱ་སྤྲོད་རྒྱུ་ཡིན་ཚུལ་སོགས་བཤད་ཀྱང་བོད་མི་རྣམས་ཀྱིས་ཁས་བླངས་མེད་པ་དང༌། རྒྱ་གཞུང་གིས་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་འགྲོལ་ཐོབ་པའི་དགའ་སྟོན་ལེགས་སྐྱེས་ཆེད་ཡིན་ཟེར་ཏེ་རླངས་འཁོར་ཆེ་ཆུང་མང་པོ་སྤྲད་འཆར་བྱས་ཀྱང་བོད་མི་རྣམས་མ་གྲོས་བསམ་པ་གཅིག་མཐུན་གྱིས་མི་སུ་གང་གིས་རླངས་འཁོར་བླངས་མེད་པ་དང༌། ྋགོང་ས་མཆོག་ལ་མཚན་སྨད་སྐུར་འདེབས་དགོས་པ་སོགས་ལ་དང་དུ་བླངས་མེད་པ་རེད།
ད་ལོ་ཡང་རྒྱ་གཞུང་གིས་ས་ཞིང་འདེབས་ལས་མ་བྱས་ན་མི་འགྲིག་པའི་བཙན་བཀའ་ཤུགས་ཆེ་བཏང་ཡོད་པ་དང༌། དཔྱིད་ཀ་ཙམ་ལ་གདོང་སྒྲ་གྲོང་ཚོའི་ལྷ་ཁང་དུ་སིདྷི་དང་མ་ཎི་སྒྲུབ་བའི་སྐབས་བོད་མི་རྣམས་ཀྱིས་གཅན་གཟན་གྱི་ལྤགས་རིགས་མེ་སྲེག་གཏོང་བས་རྒྱ་གཞུང་གི་ཉེན་རྟོག་པ་དང་དམག་མི་བརྒྱ་ལྷག་འབྱོར་ཏེ་བཀག་འགོག་བྱས་པ་དང༌། བོད་མི་མང་པོ་ལ་ཚད་ལས་འདས་པའི་ཉེས་བརྡུང་བཏང་སྟེ་ཤང་ནང་དུ་བཀའ་འགུག་སྐབས་གོང་གསལ་བོད་མི་གཉིས་ནས་རྒྱུ་མཚན་གསལ་བརྗོད་བྱས་པར་བརྟེན་འཛིན་བཟུང་བཀག་ཉར་བྱས་པ་མ་ཟད། མཐར་འཇོ་མདའ་རྫོང་ནས་ཁྲིམས་ཐག་བཅད་དེ་བཙོན་འཇུག་བྱས་ནས་ཟླ་གྲངས་མང་པོ་འགྲོ་བཞིན་ཡོད་འདུག་ཀྱང་ཟླ་དུས་ཚེས་གྲངས་སོགས་ཞིབ་ཕྲ་ཤེས་རྟོགས་བྱུང་མི་འདུག ད་སྐབས་ས་གནས་དེར་ཉེན་རྟོག་པ་དང་དམག་མི་མང་པོ་རྒྱུན་སྡོད་བྱེད་བཞིན་ཡོད་འདུག་པ་དང་བོད་མི་མང་པོ་ཞིག་ལ་སུན་བཙིར་ཡང་ཡང་བཏང་རྐྱེན་རི་མགོ་སོགས་སུ་བྲོས་བྱོལ་དུ་འགྲོ་དགོས་ཆགས་ཡོད་པའི་གནས་ཚུལ་འདུག་པ་བཅས།།
༈སྡེ་དགེ་འཇོ་མདའ་རུ་ས་ཞིང་འདེབས་ལས་མ་བྱས་པའི་ངོ་རྒོལ།
ཡོང་ཁུངས།རྒྱལ་སྤྱིའི་བོད་ཀྱི་ཆ་འཕྲིན་དྲ་བ།
༄༅། །འདི་གར་འབྲེལ་ཡོད་ནས་ཁུངས་ལྡན་གནང་ཚུལ་མཁོ་སྤྲོད་བྱུང་བ་ལྟར་ན། ན་ནིང་བོད་ཆོལ་ཁ་གསུམ་གྱི་ས་ཁྱོན་ཡོངས་སུ་རྒྱ་དམར་སྲིད་གཞུང་གི་དྲག་གནོན་འོག་བོད་མི་དམར་གསོད་དང༌།མནར་གཅོད་རྡུང་རྡེག་ཚད་ལས་འདས་པ་བཏང་དང་གཏོང་བཞིན་པ་རྣམས་ལ་མྱ་ངན་དྲན་གསོ་དང༌། གདུང་སེམས་མཉམ་བསྐྱེད་ཆེད་བོད་ཀྱི་ས་ཆ་མང་པོ་ཞིག་ནས་ད་ལོ་ས་ཞིང་འདེབས་ལས་མ་བྱས་པར་རྒྱ་གཞུང་ལ་ངོ་རྒོལ་གྱི་རྣམ་འགྱུར་སྟོན་བཞིན་ཡོད་པ་ལྟར། བོད་ལྗོངས་ཆབ་མདོ་ས་ཁུལ་འཇོ་མདའ་རྫོང་ཁོངས་ཁ་སྒང་ཤང་དང༌། རོང་གསུམ་ཤང༌། འཇོ་མདའ་གྲོང་བརྡལ་ཁྲེན་ཀང་གྲེང་བཅས་ཀྱི་ཁོངས་གཏོགས་ལྗི་བ་རུ་བ་དང༌། འདྲ་རྒན།མཚན་འབའ། ཨམ་འབའ། མགོ་མདའ། རྡོ་ཕྲེང་མདའ། སྐེད་ཧྲེང༌། འཇོ་མདའ། ཝ་ཤུལ། ག་གཟི། གཞི་ལུ། དངུལ་མདའ། ཐར་རྩེ། འབོད་ཐང༌།ཁ་སྒང༌། ར་མདོ་རུ་བ་སོགས་སུ་ད་ལོ་བོད་མི་རྣམས་ཀྱིས་ས་ཞིང་འདེབས་ལས་མ་བྱས་ནས་ཟླ་གཅིག་མ་ཟིན་ཙམ་ཕྱིན་ཚར་ཡོད་འདུག་པ་དང༌།ད་དུང་རྒྱ་གཞུང་གིས་ར་མདོ་ས་གནས་ནས་བོད་མིའི་ས་ཞིང་ཁག་ཅིག་ཉོས་ཏེ་དམག་སྒར་རྒྱག་བཞིན་ཡོད་པ་དང༌། གྲོང་ཚོ་སོ་སོར་ལས་དོན་རུ་ཁག་མི་གསུམ་རེ་ཙམ་བབས་ཏེ་ཞིང་ཁར་ནམ་རྒྱུན་འདེབས་སྲོལ་གྱི་འབྲུ་རིགས་རྣམས་ད་ལྟ་བཏབ་ན་དུས་ཐོག་སྐྱེ་མི་སྲིད་ཀྱང་ཞོ་ཁོག་དང༌།སྲན་མ། ཡུག་པོ་སོགས་འདེབས་ནས་ཞིང་ཁ་རྨོ་དགོས་པའི་བཀའ་གཏོང་བཞིན་ཡོད་འདུག་པ་མ་ཟད། གལ་སྲིད་བོད་མི་ཚོས་ས་ཞིང་མ་བཏབ་པ་ཡིན་ཚེ་དམག་མིའི་འདྲུད་འཐེན་འཁོར་ལོས་ཞིང་ཁ་རྨོ་རྒྱུ་ཡིན་སྐོར་བཤད་ཡོད་འདུག་ཀྱང་བོད་མི་ཚོས་རྨོ་བཅུག་ཡོད་མི་འདུག
ད་ལྟ་རུ་བ་མང་པོ་ཞིག་ནས་བོད་མི་ཕོ་སྐྱེས་ཕལ་ཆེར་དབྱར་རྩྭ་དགུན་འབུ་བརྐོ་རུ་འགྲོ་རྒྱུ་ཡིན་ཚུལ་སོགས་ཀྱི་ཁག་བཏགས་ཏེ་རི་ལ་ཕྱིན་ཟིན་ནས་ས་ཞིང་རྨོ་མཁན་དང༌། ལས་དོན་རུ་ཁག་གི་ཚོགས་འདུ་ལ་ཞུགས་མཁན་ཡང་དཀོན་པོ་ཆགས་ཡོད་འདུག
ཟླ་འདིའི་ཚེས་༨ཉིན་གནས་ཚུལ་འབྱོར་གསལ། དེ་རིང་སྡེ་དགེ་འཇོ་མདའ་ས་གནས་ཀྱི་ས་ཞིང་མ་བཏབ་པའི་སྐོར་དང་འབྲེལ་བའི་གནས་ཚུལ་གསར་དུ་ཐོས་པ་ལྟར་ན། ས་ཞིང་མི་འདེབས་མཁན་གྱི་གྲོང་སྡེ་རྣམས་སུ་དེ་སྔོན་འབྲེལ་ཡོད་སྲིད་གཞུང་ནས་ལམ་ཁ་དང་ཟམ་པ་བཟོ་རྒྱུའི་རོགས་དངུལ་སྤྲད་རྒྱུ་ཁས་བླངས་པ་རྣམས་ཕྱིར་འཐེན་བྱས་པ་མ་ཟད། གྲོང་སྡེའི་འགོ་གཙོའམ་ཚོན་ཀྲང་ཁག་ཅིག་ཕྱིར་འབུད་བྱས་ཡོད་གནས་ཀྱང་འདུག
ཁོང་རྣམས་ཀྱིས་ས་ཞིང་འདེབས་ལས་མི་བྱེད་པའི་དོན་ནི་བོད་མི་རྣམས་རྡོག་རྩ་གཅིག་སྒྲིལ་དང༌། རྐྱེན་འདས་མནར་གཅོད་མྱོང་མཁན་རྣམས་ཀྱི་སྡུག་བསྔལ་སྲུང་ཆེད་ཡིན་སྐོར་སོགས་བཤད་ཀྱི་ཡོད་འདུག་པ་བཅས།
བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་ ༢༠༠༩།༥།༧ ལ་འདི་ག་གསར་ཁང་དུ་མཁོ་སྤྲོད་གནང༌བྱུང་།
༈སྡེ་དགེ་འཇོ་མདའ་ནས་བོད་མི་༩འཛིན་བཟུང་བྱས་པ།
ཡོང་ཁུངས།རྒྱལ་སྤྱིའི་བོད་ཀྱི་ཆ་འཕྲིན།
༄༅།།འདི་གར་འབྲེལ་ཡོད་ནས་ཕྱི་ཚེས་ ༡༢ ཉིན་ཁུངས་ལྡན་གནས་ཚུལ་མཁོ་སྤྲོད་བྱུང་བ་ལྟར་ན། ཕྱི་ཟླ་༦ཚེས་༦ཡས་མས་ཙམ་ལ་ཆབ་མདོ་ས་ཁུལ་འཇོ་མདའ་རྫོང་ཁོངས་ཀྱི་འབྲོག་སྡེ་སྐེ་རེ་གོང་དུ་རྒྱ་མི་ལས་གླ་བ་༦།༧ཙམ་ཞིག་དབྱར་རྩ་དགུན་འབུ་བརྐོ་རུ་ཡོང་སྐབས་བོད་མི་རྣམས་ཀྱིས་བརྐོ་མ་བཅུག་བར་བརྟེན། རྒྱ་མི་དཔུང་རོགས་ཁག་ཅིག་ཁྲིད་ནས་ཕན་ཚུན་འཁྲུག་འཛིང་གང་འཚམས་ཤོར་ཡོད་འདུག་པ་དང༌། མི་ལ་རྨས་སྐྱོན་བྱུང་མིན་གྱི་གནས་ཚུལ་ཁ་གསལ་མི་འདུག་ཅིང་ཉེན་རྟོག་པས་བོད་མི་༩འཛིན་བཟུང་བྱས་ཏེ་འཇོ་མདའ་རྫོང་དུ་ཁྲིད་ནས་ད་བར་བཀག་ཉར་བྱེད་བཞིན་ཡོད་འདུག་པ་དང༌།གནས་ཚུལ་མཁོ་སྤྲོད་པས་ཁོང་རྣམས་ཀྱི་མིང་ད་ལྟ་ཤེས་རྟོགས་ཐུབ་ཡོད་མི་འདུག རྒྱ་མི་རྣམས་འཛིན་བཟུང་བྱས་མིན་གྱི་གནས་ཚུལ་ཞིབ་ཕྲ་གང་ཡང་མི་འདུག་པ་བཅས། བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་འདི་ག་གསར་ཁང་དུ་༢༠༠༩།༦།༡༢ ཉིན་
སྡེ་དགེ་འཇོ་མདའ་རྫོང་ཁོངས་སུ་མུ་མཐུད་གནས་ཚུལ་ཛ་དྲག་ངང་ཡོད་པ།
ཡོང་ཁུངས།རྒྱལ་སྤྱིའི་བོད་ཀྱི་ཆ་འཕྲིན་དྲ་བ།
༄༅། །འདི་གར་འབྲེལ་ཡོད་ནས་ཕྱི་ཟླ་ ༧ ཚེས་ ༥ ཉིན་གནས་ཚུལ་མཁོ་སྤྲོད་གནང་བ་ལྟར་ན། ཉིན་གཉིས་ཙམ་གྱི་གོང་སྡེ་དགེ་འཇོ་མདའ་རྫོང་ཁོངས་ཝ་ར་ཤོག་ཁག་དགུ་ཡིས་གཙོས་པའི་འཇོ་མདའ་རྫོང་གི་ཉེ་འགྲམ་གྱི་བོད་མི་ཁྲི་གཅིག་གནས་ཚུལ་མཁོ་སྤྲོད་པར་ཞིབ་འདྲི་བྱས་ཀྱང་དངོས་གནས་ཁ་གྲངས་དེ་ལྟར་ཡིན་སྐོར་གསུངས་བྱུང༌།ཙམ་འདུ་འཛོམས་གྱིས་འཇོ་ཕུ་དགོན་ནས་འཇོ་མདའ་རྫོང་ཕྱོགས་སུ་ཕྱིན་ཏེ་འཇོ་ཕུ་དགོན་པའི་ས་ཆ་སྟོང་པ་དེ་རྣམས་རྒྱ་གཞུང་གིས་ཉེ་ཆར་ནས་བདག་པོ་རྒྱག་བཞིན་པ་དང་འབྲེལ་བའི་ཐོག གལ་སྲིད་ཁྱོད་ཚོས་ང་ཚོའི་ས་ཆ་འཕྲོག་རྒྱུ་ཡིན་ཚེ་ང་ཚོའི་ཞིང་ཁ་དང་རྟ་ནོར་སེམས་ཅན་སོགས་རྒྱུ་ནོར་ཡོད་ཚད་གཞུང་བཞེས་ཀྱིས་ད་ནི་ང་ཚོ་ས་ཆ་གང་དུ་སྡོད་དགོན་མིན་དང་ག་རེ་ཟ་དགོས་མིན་སོགས་ཀྱི་ལམ་སྟོན་དང་ཐག་གཅོད་རོགས་ཟེར་བའི་ངོ་རྒོལ་རྣམ་འགྱུར་ཤུགས་ཆེ་བསྟན་ཡོད་འདུག་པ་དང༌། སྐབས་དེར་འཇོ་མདའ་རྫོང་གི་ལས་བྱེད་རྣམས་ཀྱིས་གང་མགྱོགས་ཐག་གཅོད་ཚུལ་མཐུན་བྱ་རྒྱུ་ཡིན་ཚུལ་སོགས་ཕར་བཤད་ཚུར་བཤད་མང་པོ་ཞིག་བྱས་མཐར་རེ་ཞིག་ལྷིང་འཇགས་སུ་གྱུར་ཡོད་འདུག་ཀྱང༌། བོད་མི་རྣམས་ཀྱིས་ད་དུང་ཉིན་ཤས་རྗེས་ཁོ་ཚོས་ཐག་གཅོད་ཚད་ལྡན་མ་བྱས་ཚེ་ལས་སླ་པོ་འཇོག་རྒྱུ་མིན་སྐོར་གྱི་གླེང་སློང་ཤུགས་ཆེ་བྱེད་བཞིན་ཛ་དྲག་ངང་གནས་ཡོད་འདུག
ཉེ་སྔོན་རྒྱ་གཞུང་གིས་ས་གནས་དེའི་བོད་མི་རྣམས་ལ་ྋགོང་ས་ྋསྐྱབས་མགོན་ཆེན་པོ་མཆོག་དང༌། རྒྱལ་དབང་ཀརྨ་པ། སྐྱབས་ཆེ་དགོན་པ་བཅས་ལ་ངོ་རྒོལ་རྒྱག་དགོས་སྐོར་གྱི་སློབ་གསོ་སྤྲོད་བཞིན་པའི་ཁོངས་སྐྱབས་ཆེ་དགོན་ལ་དགག་པ་རྒྱག་དགོས་དོན་ནི་སྐྱབས་ཆེ་དགོན་དེ་ཉིད་འཇོ་མདའ་རྫོང་ཁོངས་ཀྱི་དགོན་པ་ཆེ་གྲས་ཞིག་ཡིན་འདུག་པས་དགོན་པ་ཆེ་བ་དེ་གནོན་ཐུབ་པ་ཡིན་ཚེ་ཆུང་བ་རྣམས་རང་བཞིན་གྱིས་འཇོམས་འགྲོ་རྒྱུ་ཡིན་པའི་ངན་འཆར་དང༌། མ་ཟད་ཁ་སྔོན་དགོན་དེར་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤྲོད་འཆར་སྐབས་དགོན་དེའི་གཅོད་རྒན་སྤྲུལ་སྐུ་སོགས་བླ་སྤྲུལ་ཆེ་གྲས་རྣམས་ཀྱིས་ྋགོང་ས་མཆོག་ལ་མཚན་སྨད་ཞུ་རྒྱུའི་ས་རྟགས་རྩ་བ་ནས་བསྐྱོན་མེད་པ་དང༌། གྲྭ་མང་སུས་ས་རྟགས་བརྒྱབ་ན་དགོན་པའི་སྒྲིག་ཁོངས་ནས་ཕྱིར་འབུད་གནང་རྒྱུ་ཡིན་ཚུལ་སོགས་གསུངས་པར་བརྟེན་དགོན་དེར་རྒྱ་དམག་སྡོད་བཞིན་པ་དང་དགག་པ་རྒྱག་དགོས་སྐོར་སོགས་བཤད་ཀྱི་ཡོད་འདུག
གཞན་ཡང་ར་མདོ་ཕྱོགས་ནས་རྒྱ་དམག་གིས་ས་ཞིང་ཉོས་པའི་ཐོག་དམག་སྒར་རྒྱག་བྱེད་ཀྱི་བྱེ་མ་དབོར་འདྲེན་དང་འབྲེལ་བའི་ཐོག་བོད་མི་རྣམས་དང་གདོང་ཐུག་ཕྲན་བུ་བྱུང་སྐབས་རྒྱ་དམག་ཚོས་མེ་མདའ་བོད་མིའི་གདོང་ལ་གཏད་དེ་ཁྱོད་རང་ཚོ་སྡོད་མ་ཚུགས་ན་གསོད་ཆོག་པ་གོང་རིམ་གྱིས་བཀའ་ཡོད་སྐད་སོགས་ཀྱིས་སྡིགས་ར་བསྐུལ་བ་དང༌། ཉེ་ཁུལ་གྱི་བོད་མི་རྣམས་འཇོ་མདའ་རྫོང་ལ་འགྲོ་སྐབས་བརྙད་བརྐོ་འདྲ་མིན་བྱས་ཏེ་ཤིན་ཏུ་དཀའ་ངལ་སྤྲོད་བཞིན་ཡོད་པ་སོགས་དེ་སྔོན་ ༡༩༩༤ དང་ ༡༩༩༥ གཡས་གཡོན་དུ་འཇོ་མདའ་རྗོང་ཕྱོགས་སུ་ཆབ་མདོ་ནས་དམིགས་བསལ་དྲག་ཆས་རྒྱ་དམག་ཡོང་ནས་དྲག་བརྡུང་གི་ལས་འགུལ་ཤུགས་ཆེ་ཞིག་བརྩམས་ཡོད་པ་དེ་དང་འདྲ་མཚུངས་སུ་ཆགས་ཡོད་སྐོར་ས་གནས་དེ་གའི་བོད་མི་རྣམས་ཀྱིས་བཤད་ཀྱི་ཡོད་འདུག་ཅིང༌། བོད་མི་དེ་རྣམས་འཇིགས་སྐྲག་དང་བློ་འཚབ་ཅི་ཆེའི་ངང་གནས་བཟོད་མི་བདེ་བར་ཅི་བྱ་གཏོལ་བྲལ་གྱི་གནས་སུ་གྱར་ཡོད་འདུག་པ་བཅས། སྨོན་ལམ་མཐར་ཕྱིན་གྱིས་ ༢༠༠༩།༧།༥ ཉིན།།
ཁམས་སྡེ་དགེ་འཇོ་མདའ་རྫོང་གི་འཇོ་ཕུ་དགོན་པ་རྒྱ་ནག་གཞུང་གིས་སྒོ་རྒྱག་ཏུ་བཅུག་པ།
ཡོང་ཁུངས།གཡུ་ཞུན་དྲ་བ།
ཚེས་༣༠ཉིན་ད་ལྟ་རྒྱ་གར་དུ་ཡོད་པའི་བསྟན་པ་ཡར་འཕེལ་གྱིས་ཕ་ཡུལ་ནས་གནས་ཚུལ་འབྱོར་བ་ངོ་སྤྲོད་བྱས་བ་ལྟར་ན།ཉེ་བའི་ལོ་ཤས་ནང་འཇོ་ཕུ་དགོན་པའི་ནང་རྒྱ་ནག་གཞུང་གིས་ལས་འགུལ་མི་ཉུང་བ་ཞིག་སྤེལ་བར་རྐྱེན་བྱས་ནས་ སློབ་གཉེར་བ་ཚོར་སུན་བཙུར་རྒྱུན་ཆད་མེད་པར་བྱས་ཏེ།དགོན་པའི་དགེ་འདུན་པ་མི་ཉུང་བ་ཞིག་ལ་རྒྱ་ནག་གི་བཀའ་དང་ལེན་མ་བྱས་པའི་ཉེས་མིང་འོག་རྫཽང་ཉེན་རྟོག་པས་བཙོན་འཇུག་ཁྲིམས་ཆད་གཏོང་བཞིན་པ་དང་།ལྷག་པར་དུ་ཟླ་ཤས་སྔོན་ལ་དགོན་པའི་དབུ་མཛོད་བྱང་ཆུབ་སྤྲུལ་སྐུ་གློ་བུར་འཛིན་བཟུང་བྱས་བར་།དགེ་འདུན་པ་ཁ་ཤས་ཀྱིས་ཁོང་ལ་ཉེས་བ་ཅི་ཡང་མེད་པས་མྱུར་དུ་གློད་གྲོལ་བཏོང་དགོས་པའི་སྐད་འབོར་བྱས་པར་བརྟེན་།དགེ་འདུན་དེ་ཚོའང་ད་ལྟ་བཙོན་འཇུག་བཀག་ཉར་བྱས་ཡོད་པ་མ་ཟད་། ཟླ་བ་འདིའི་ཚེས་༢༨ཉིན་བོད་ནས་གནས་ཚུལ་འབྱོར་བ་ལྟར་ན།ད་ལྟ་འཇོ་ཕུ་དགོན་པ་སྒོ་རྒྱབ་ཡོད་པ་མ་ཟད་།ཤུལ་དུ་ལྷག་པའི་དགེ་འདུན་པའི་གྲས་ཀྱི་རྒན་ཤས་སྤེ་ཚེ་ཞེས་པའང་འཛིན་བཟུང་བྱས་ཡོད་ནའང་།ཁོང་གི་ཉེ་འབྲེལ་མང་པོ་རྒྱ་གར་དུ་ཡོད་པས་སེམས་ཁྲལ་མི་ཡོང་ཆེད་གནས་སྐབས་རིང་ཞིབ་ཕྲ་བརྗོད་འདོད་མེད་པ་བཤད་སོང་ཟེར་།འཇོ་ཕུ་དགོན་པ་ནི་ད་ལྟའི་ཆར་ཁམས་ཁུལ་གྱི་བཀའ་བརྒྱུད་དགོན་པ་ཆེ་ཤས་ཀྱི་གྲས་ཡིན་པ་དང་། ནམ་རྒྱུན་སློབ་གཉེར་བ་བརྒྱ་ཕྲག་ཁ་ཤས་ཀྱིས་མདོ་སྔགས་རིག་གནས་དང་བཅས་པའི་འཆད་རྩོད་རྩོམ་གསུམ་གྱི་སྒོ་ནས་རྒྱལ་བའི་བསྟན་པ་འཛིན་སྐྱོང་སྤེལ་གསུམ་གནང་བཞིན་ཡོད་པ་རེད།
2012.3.30 ཉིན།
སྡེ་དགེ་འཇོ་མདའ་འཛི་སྒར་དགོན་གྱི་གྲྭ་པ་གཉིས་འཛིན་བཟུང་དང་བཀག་ཉར།
ཡོང་ཁུངས།གཡུ་ཞུན་དྲྭ་བ།
འདི་གར་འབྲེལ་ཡོད་ནས་ཁུངས་ལྡན་གནས་ཚུལ་མཁོ་སྤྲོད་གནང་དོན་ལྟར་ན། འདི་ལོའི་གསུམ་བཅུའི་དུས་དྲན་ཉིན་གྱི་མཚན་མོ་ཁམས་སྡེ་དགེ་འཇོ་མདའ་རྫོང་ཁོངས་འཛི་སྒར་དགོན་པ་ནས་རྒྱ་གཞུང་ལས་བྱེད་པའི་རླངས་འཁོར་ཞིག་མེ་བསྲེགས་བཏང་བའི་གནས་ཚུལ་ཐོན་ཡོད་འདུག་པ་དང༌། ཕྱི་ཉིན་རྒྱ་དམག་དང་ཉེན་རྟོག་པས་འཛི་སྒར་དགོན་པའི་གྲྭ་ཀརྨ་དཔལ་ལྡན་རང་ལོ་ ༢༤ ཅན་དང་གཞན་གྲྭ་པ་གཉིས་བཅས་འཛིན་བཟུང་གིས་ཁྲིད་ནས་སོང་ཡོད་འདུག་ཅིང༌། མཐར་གྲྭ་པ་གཞན་གཉིས་ལྷོད་བཀྲོལ་བཏང་ཡོད་འདུག་ཀྱང་རྗེས་སུ་གྲྭ་མེ་ཕམ་དགེ་ལེགས་རང་ལོ་ ༢༠ ཅན་འཛིན་བཟུང་གིས་འཇོ་མདའ་རྫོང་དུ་ཁྲིད་ནས་ཀརྨ་དཔལ་ལྡན་དང་ཁོང་གཉིས་བཀག་ཉར་དང་སྡུག་སྦྱོང་ཤུགས་ཆེ་བཏང་བ་མ་ཟད། རྫོང་ཐོག་ལ་ཁྲོམ་སྐོར་དུ་ཁྲིད་ནས་མི་མང་ཁྲོད་རྔམ་རྫིག་སྟོན་བཞིན་ཡོད་འདུག
སྤྱིར་བཏང་ན་ནིང་ ༢༠༠༩ ལོར་འཇོ་མདའ་རྫོང་དུ་ས་ཞིང་མ་བཏབ་པ་སོགས་ཀྱི་ལས་འགུལ་འདྲ་མིན་སྤེལ་བ་དང༌། རྒྱ་གཞུང་གིས་གློ་བུར་དུ་ཡུལ་ཚོ་སོ་སོར་རླངས་འཁོར་ཆེ་ཆུང་མང་པོ་སྤྲད་འཆར་བྱས་སྐབས་བོད་མི་རྣམས་ཀྱིས་མ་བླངས་པའི་གྲས་ས་གནས་ལས་བྱེད་ཀྱིས་ཉར་བསྡད་པ་ཞིག་མེ་བསྲེགས་ཐེབས་ཡོད་འདུག རླངས་འཁོར་མེ་སྲེག་གཏོང་མཁན་གྲྭ་པ་དེ་གཉིས་ཡིན་པའི་བདེན་དཔང་ཅི་ཡང་ཐོབ་སོན་བྱུང་ཡོད་མི་འདུག་ཀྱང་རྒྱ་གཞུང་ལས་བྱེད་པ་དང༌། ཉེན་རྟོག་པ། དམག་མི་བཅས་ཀྱིས་ཁོང་གཉིས་ལ་སྡུག་སྦྱོང་མནར་གཅོད་གཏོང་བཞིན་ཡོད་འདུག ད་དུང་ཆབ་མདོ་ས་ཁུལ་གྱི་རྫོང་ཁག་རྣམས་ལས་འཇོ་མདའ་རྫོང་དེ་རྒྱ་ཁབ་ཁ་བྲལ་གཏོང་མཁན་གྱི་ནག་ཉེས་ཆེ་གྲས་ཡིན་སྐོར་བགྲང་ནས་ཉིན་རེ་ནས་ཉིན་རེ་བཞིན་དམ་བསྒྲགས་ཆེ་རུ་གཏོང་བཞིན་ཡོད་འདུག་པ་བཅས། བོད་མི་མང་སྤྱི་འཐུས་རྒྱུན་ལས་ཆབ་སྲིད་སྡེ་ཚན་ནས་དགེ་བཤེས་སྨོན་ལམ་མཐར་ཕྱིན་པས་ ༢༠༡༠།༣།༢༥ ཉིན།
ཁམས་སྡེ་དགེ་འཇོ་མདའ་རྫོང་ནས་བོད་མི་འཛིན་བཟུང་དང་གཅར་རྡུང་།
ཡོང་ཁུངས་།ཨེ་ཤེ་རང་དབང་རླུང་འཕྲིན་ཁང་།
ཁམས་སྡེ་དགེ་འཇོ་མདའ་རྫོང་ནས་བོད་འཛིན་བཟུང་དང་གཅར་རྡུང་བྱས་པའི་གནས་ཚུལ་ཐོན་འདུག
འབྲེལ་ཡོད་མི་སྣས་གནས་ཚུལ་མཁོ་སྤྲོད་བྱས་བ་ལྟར་ན་།སྡེ་དགེ་འཇོ་མདའ་རྫོང་པདྨ་ཤང་དང༌། གནས་མདོ་ཤང་གཉིས་ཀྱི་ཁོངས་གཏོགས་སྟག་ལུང་དགོན་པར་གྲྭ་པ་གཅིག་ཀྱང་སྡོད་མཁན་མེད་པར་ཟླ་གཅིག་ལྷག་ཕྱིན་ཡོད་པས་།རྒྱ་གཞུང་གིས་པདྨ་སྨད་པའི་སྡེ་ནང་བོད་མི་གནད་ཡོད་འགན་ཁུར་བ་རྣམས་ལ་དགེ་འདུན་པ་རྣམས་དགོན་པར་ཕྱིར་འབོད་བྱེད་དགོས་པའི་བཙན་བཀའ་ཐེངས་མང་བཏང་ཡོད་ཀྱང་། ལས་དོན་འགྲུབ་མེད་པར་བརྟེན་སྤྱི་ཟླ་ ༦ ཚེས་ ༢༧ ཉིན་ཤང་གི་ལས་བྱེད་བོད་མི་འགྱུར་མེད་མགོན་པོ་དང༌། རྒྱལ་ཚང་རྡོ་རྗེ་གཉིས་དམག་མིས་འཛིན་བཟུང་བྱས་ཏེ་སྐྱབས་ཆེ་དགོན་པའི་ཕྱོགས་སུ་ཁྲིད་པའི་སྐབས་།བོད་མི་ ༢༠ ལྷག་ཙམ་གྱིས་ལམ་ཁ་བཀག་ནས་། དམག་མི་དང་འཁྲུག་འཛིང་ཤོར་ཏེ་ཕར་ལ་ཁུ་ཚུར་སོགས་བཞུས་པ་དང༌། ཚུར་ལ་དུག་རྫས་དང་མེ་མདའ་གང་ཡིན་དབྱེར་མ་ཆོད་པ་མང་པོ་བརྒྱབ་ནས་བོད་མི་རྣམས་ལ་རྨས་སྐྱོན་ཚབས་ཆེན་ཕོག་ཡོད་འདུག བོད་མི་དེ་རྣམས་མང་ཆེ་བ་དམག་མིས་འཛིན་བཟུང་བྱས་ཏེ་གནས་མདོ་ཤང་ཁོངས་སྐྱབས་ཆེ་དགོན་དུ་ཁྲིད་ནས་དགོན་པའི་བཤད་གྲྭ་ནང་བཀག་ཉར་བྱེད་བཞིན་ཡོད་པ་དང༌། རང་ལོ་ ༤༧ ལ་སོན་པའི་ནོར་ལྷ་དང༌། རང་ལོ་ ༤༣ཡས་མས་ཡིན་པའི་མགོན་པོ་དར་རྒྱས་གཉིས་གཏེ་བོ་ཡིན་ཚུལ་གྱིས་འཇོ་མདའ་རྫོང་ཕྱོགས་སུ་ཁྲིད་ཟིན་པ་ཤེས་རྟོགས་བྱུང་ཡོད་འདུག བོད་མི་བཀག་ཉར་བྱས་པ་རྣམས་ཀྱི་རྐང་མཐིལ་དང་ལག་མཐིལ་དུ་ལྕགས་འཛེར་བརྡབ་སྟེ་རྒྱུག་པ་དང༌། ལྕག་ཚན་བཞུ་བ་སོགས་གཅར་རྡུང་ཚད་ལས་འདས་པ་བཏང་ཡོད་འདུག རྨས་མ་ཁ་ཤས་འབྲོག་སྡེ་ཁག་ཏུ་གནས་སྡོད་ཀྱིས་སྨན་བཅོས་སོགས་ཀྱི་མཐུན་རྐྱེན་ཚད་ལྡན་རེག་གི་མེད་ཟེར་།བོད་མི་འཛིན་བཟུང་བྱས་པ་རྣམས་ནི་རྨུ་ཚ་ཚང་ཚེ་བརྟན་དང་རིས་ཆུང་ཉི་གྲགས།བསམ་འཕེལ་ནོར་བུ།ཨོ་ཡོ་ཚེ་རིང༌།ཨ་བརྟན། ག་དགེ་བཅས་ཡིན་པ་དང་གཞན་པ་ཁ་ཤས་ཀྱི་མིང་གསལ་པོ་ཤེས་རྟོགས་བྱུང་མེད་།དེ་མིན་བྱམས་པ་དང༌། འགྱུར་མེད། བྱང་ཆུབ་ཆོས་འཕེལ། དོན་དགའ་བཅས་ལ་གཅར་བརྡུང་ཚད་ལས་འདས་པ་བཏང་སྟེ་ད་ལྟ་གློད་གྲོལ་བཏང་ཡོད་འདུག སྤྱིར་བཏང་སྐྱབས་ཆེ་དགོན་དུ་རྒྱ་ནག་གི་དམག་མི་གནས་སྡོད་བྱས་ནས་ཟླ་གཅིག་ལྷག་འགྲོ་བཞིན་ཡོད་ཅིང་དུས་ཚོད་དེའི་རིང་གྲྭ་བ་གཅིག་ཀྱང་སྡོད་མཁན་མེད་པ་ཆགས་ཡོད་ཟེར་།ད་ལྟའི་ཆར་དམག་མིའི་རླངས་འཁོར་ཆེ་བ་ ༨ དང་ཆུང་བ་ ༨་ནས་༩ ཙམ་རྒྱུན་སྡོད་བྱེད་བཞིན་ཡོད་འདུག སྐྱབས་ཆེ་དགོན་གསར་བཞེངས་གྲུབ་ནས་ད་ལོ་སྒོ་འབྱེད་བྱ་འཆར་ཡོད་ནའང་ད་ལྟ་གནས་སྟངས་ཛ་དྲག་ངང་ལྷུང་ཡོད་ཟེར་།གཞན་ཡང་གནས་མདོ་དགོན་པ་དང༌། གཏེར་སྟོན་དགོན་པ། རྒྱུ་ནེ་དགོན་པ་བཅས་ཀྱི་སྒྲུབ་བླ་ཁག་ཅིག་ལ་མེ་མདའ་ཁུར་དུ་བཅུག་ནས་དམག་མི་དང་མཉམ་དུ་པར་ལེན་དུ་བཅུག་ཡོད་ལ་།ཉིན་ ༡༥ ཙམ་གྱི་སྔོན་ནས་བཟུང་གནས་མདོ་ཆུས་ཁོངས་ཀྱི་ཁྱིམ་མི་རེ་རེ་བསྐོང་ཚོགས་ཀྱིས་ཏཱ་ལའི་བླ་མ་དང༌། རྒྱལ་བ་ཀརྨ་པ། སྐྱབས་ཆེ་དགོན་པ་བཅས་ལ་དགག་པ་རྒྱག་དགོས་སྐོར་བཤད་ཀྱི་ཡོད་འདུག ད་དུང་འཇོ་མདའ་ཁོངས་འཇོ་ཕུ་དགོན་པའི་ཉེ་འགྲམ་གྱི་ས་ཆ་ཞིག་ལ་ལྕགས་རི་བསྐོར་ནས་བཞག་ཡོད་པ་རྣམས་རྒྱ་གཞུང་ལ་དགོས་ཚུལ་བཤད་པར་བརྟེན་ཉིན་ཤས་སྔོན་བོད་མི་ ༥༠༠ ཙམ་གྱིས་དགོན་པའི་ས་ཆ་བཙན་འཕྲོག་བྱས་ན་མི་འགྲིག་པའི་སྐོར་གྱི་སྐད་འབོད་བྱས་པར་།རྒྱ་དམག་ ༨༠༠ ཙམ་གྱིས་བཀག་འགོག་བྱས་ཡོད་འདུག སྤྱིར་བཏང་འཇོ་མདའ་གཡས་གཡོན་དུ་དེ་སྔོན་དམག་སྒར་མེད་ནའང༌།ད་ལོ་དམག་མིས་སྟག་གཟིག་ར་མདོ་ཕྱོགས་ནས་ཞིང་ཁ་ཉོས་ཏེ་དམག་སྒར་རྒྱག་རྩིས་བྱེད་བཞིན་ཡོད་པ་བཅས་ཀྱི་གནས་ཚུལ་ཐོན་འདུག
ཉེ་སྔོན་སྡེ་དགེ་འཇོ་མདའ་ནས་འཛིན་བཟུང་བྱས་པའི་བོད་མི་རྣམས་ཀྱི་མིང་ཤེས་རྟོགས་བྱུང་བ།
ཡོང་ཁུངས།གཡུ་ཞུན་དྲྭ་བ།
༄༅། །འདི་གར་འབྲེལ་ཡོད་བརྒྱུད་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། སྡེ་དགེ་འཇོ་མདའ་རྫོང༌། མཁར་སྒང་ཤང༌། ལྷོ་བོ་སྟོད་མའི་གྲོང་སྡེ་ཁག་བཞིས་ ༢༠༠༨ ལོར་བསད་རྨས་བཟུང་གསུམ་བྱས་བའི་བོད་རིགས་སྤུན་ཟླ་རྣམས་ལ་མྱ་ངན་མཚོན་ཆེད་འདི་ལོ་གསུམ་བཅུའི་དུས་དྲན་ཉིན་ནས་བཟུང་ཉིན་གསུམ་རིང་ནོར་ལུག་རྣམས་ལ་ཞིང་ཁའི་ལོ་ཏོག་བཟའ་རུ་བཅུག་ཅིང༌། མཐའ་ན་སྔོ་ཚལ་རིགས་ཀྱང་རྩ་མེད་བྱས་ཡོད་པ་དང༌། དེའི་རྗེས་ཉེ་འཁོར་གྱི་གྲོང་སྡེ་རྣམས་ཀྱིས་ཀྱང་དེ་བཞིན་བྱས་ཡོད་འདུག ཉེ་ཆར་གྲོང་སྡེ་ཁག་བཞི་ལ་རྒྱ་གཞུང་གིས་སྣུམ་འཁོར་སྤྲད་པ་མ་བླངས་པ་དང༌། ན་གཞོན་ཁག་ཅིག་གིས་མི་འདོད་པའི་རྣམ་འགྱུར་འདྲ་མིན་ཡང་བསྟན་ཡོད་འདུག
འདི་ཟླའི་ནང་རྒྱ་དམག་དང་ཉེན་རྟོག་པ་མང་པོ་ཡོང་ནས་བོད་མི་ན་གཞོན་བརྒྱད་འཛིན་བཟུང་བྱས་སྐོར་ཁ་སྔོན་གྱི་གསར་འགྱུར་ནང་གནས་ཚུལ་ཐོན་ཡོད་པ་ལྟར་ཁོང་རྣམས་ནི་གཤམ་གསལ་ལྟར་ཡིན་།
༡༽ རི་མགོ་དགོན་པའི་གྲྭ་ལུང་དམར་ཚང་གི་བུ་བླ་མ་དཔལ་ཆེན་དབང་རྒྱལ། ལོ་ ༢༥
༢༽ བླ་མ་དཔལ་ཆེན་གྱི་སྤུན་མཆེད་སྐལ་བཟང་རྒྱལ་མཚན། ལོ་ ༡༩
༣༽ བཀྲ་ཤིས་ཚང་གི་བུ་ཆོས་དགའ། ལོ་ ༣༡
༤༽ མེ་རག་ཚང་གི་བུ་བསྟན་པ་རྣམ་རྒྱལ། ལོ་ ༢༥
༥༽ བསྟན་པ་རྣམ་རྒྱལ་གྱི་སྤུན་མཆེད་ཐུབ་བསྟན་རྣམ་རྒྱལ། ལོ་ ༢༠
༦༽ རི་མགོ་དགོན་པའི་གྲྭ་ཆོས་མགོན་ཚང་གི་བུ་ཨོ་རྒྱན་བསོད་ནམས། ལོ་ ༡༧
༧༽ དགེ་རྒྱ་ཚང་གི་མག་པ་དཔལ་འབྱོར། ལོ་ ༢༦
༨༽ དགེ་རྒྱ་ཚང་གི་བུ་ཐུབབསྟན། ལོ་ ༢༡
འཛིན་བཟུང་བྱས་པ་རྣམས་ལས་སྐལ་བཟང་རྒྱལ་མཚན་དང༌། ཐུབ་བསྟན། ཨོ་རྒྱན་བསོད་ནམས་གསུམ་གློད་བཀྲོལ་བཏང་ཡོད་ཀྱང་བཀག་ཉར་སྐབས་ཉེས་རྡུང་ཚབས་ཆེན་བཏང་བར་བརྟེན་སྐལ་བཟང་རྒྱལ་མཚན་དང༌། ཐུབ་བསྟན་གཉིས་ཉིས་ཤས་རིང་སྨན་ཁང་དུ་ལུས་ཡོད་འདུགབཀག་ཉར་བྱས་པ་རྣམས་ལ་རྒྱ་གཞུང་གིས་ཁྱོད་ཚོའི་ལས་འགུལ་དེ་དག་ལ་ངན་བསྐུལ་བྱེད་མཁན་སུ་ཡིན་དང༌། འགོ་གཙོ་སུ་ཡིན། རྒྱབ་རྩ་སུ་ཡོད་སོགས་བཤད་དགོས་སྐོར་ཚ་འདྲི་བྱེད་ཀྱི་ཡོད་འདུག གཞན་ཡང་དམག་མི་དང་ལས་བྱེད་པས་ཡུལ་མི་རྣམས་ལ་དམ་བསྒྲགས་ཤུགས་ཆེ་བྱས་དང་བྱེད་བཞིན་པ་མ་ཟད། ཚོགས་འདུ་འདྲ་མིན་ཚོགས་བཞིན་པ་ཡིན་འདུག་པས་འབྲེལ་ཡོད་བོད་དོན་རྒྱབ་སྐྱོར་ཚོགས་པ་ཁག་དང་གསར་འགྱུར་བརྒྱུད་ལམ་ཁག་ནས་འཛིན་བཟུང་བཀག་ཉར་དུ་ཚུད་པ་རྣམས་གློད་བཀྲོལ་ཡོང་ཐབས་དང༌། བོད་མི་རྣམས་ལ་རྡུང་རྡེག་དྲག་གནོན་མི་ཡོང་བའི་སྐྱབས་འཇུག་གནང་རོགས་ཞེས་འབོད་སྐུལ་ཞུ་བཞིན་འདུག
འཇོ་མདའ་རྫོང་རོང་གསུམ་གྲོང་ནས་མི་ ༡༤ འཛིན་བཟུང་བྱས་པ།
ཡོང་ཁུངས།དྲ་བ།
དེ་རིང་འཇོ་མདའ་ཆོས་འཛོམས་ལགས་ཀྱིས་ཁུངས་ལྡན་གནས་ཚུལ་མཁོ་འདོན་བྱས་གསལ་ལྟར་ན། སྤྱི་ཟླ་ ༥ ཚེས་ ༡༤ ཉིན་རྒྱ་གཞུང་གིས་ཁམས་སྡེ་དགེ་འཇོ་མདའ་རྫོང་ཐང་ཕུག་ཆས། རོང་གསུམ་ཤང༌། རོང་གསུམ་གྲོང་ཚོ་ནས་གྲོང་མི་བཅུ་གཅིག་འཛིན་བྱས་འདུག དེའི་ནང་ནས་རིན་ཆེན་རྡོ་རྗེ་དང༌། ཆོས་བཟང་ཞུ་བ་གཉིས་ནག་ཉེས་ཆེ་བར་བརྩིས་ཏེ་ཆབ་མདོ་གྲོང་བརྡལ་ལ་འཁྲིད་ཡོད་པ་ རེད་ཟེར་བ་ལས་ད་ལྟའི་ཆར་ཁ་གསལ་ཞིག་ཤེས་རྟོགས་བྱུང་མི་འདུག ལྷག་མ་བརྒྱད་པོ་འཇོ་མདའ་རང་དུ་བཙོན་འཇུག་བྱས་འདུག གོང་གསལ་བོད་མི་དེ་དག་འཛིན་བཟུང་བྱས་དོན་ནི། རོང་གསུམ་གྲོང་ཚོ་སྤྱི་མགྲིན་ནས། ས་བྱི་དང་ས་གླང་ཞི་བའི་འོས་ལངས་ནང་ཞུགས་པའི་བོད་རིགས་སྤུན་ཟླ་ཚོར་རྒྱ་གཞུང་ གིས་གནར་གཅོད་འདྲ་མིན་གཏོང་བར་གདུང་སེམས་མཉམ་སྐྱེད་མཚོན་ཆེད། འདི་ལོར་ཞིང་ཁ་འདེབས་ཀྱི་མིན་ཟེར་ནས་གྲོང་མི་ཚོ་རི་ལ་འབུ་རྐོ་མཁན་འགྲོ་བར་ ས་གནས་རྒྱ་གཞུང་གིས་ས་ཞིང་རྨོས་འདེབས་དགོས་པའི་བཙན་བཀའ་ཕབ་ཀྱང་མ་ཉན་པས་ གླེང་རྙོག་ཡོད་བཞིན་པའི་མུར། ཁུལ་དེའི་གནས་རི་ཨ་མྱེས་རྫོང་ཞེས་པའི་རི་གཤམ་ནས་རྒྱ་མིས་བྱེ་མ་དབོར་ནས་ འཚོང་འགྲེམ་བྱེད་པར། གྲོང་མི་ཚོས་འདི་ནས་བྱེ་མ་དབོར་ན་ལུང་པར་བཀྲ་མི་ཤིས་པ་ཡོང་ཚུལ་འགྲེལ་བརྗོད་ ཀྱིས་ཉིན་མང་རིང་བཀག་ཀྱང༌། དོན་ཕན་མ་བྱུང་ཐོག་གོ་སྐབས་དེར་བཟུང་ནས་གྲོང་ཚོའི་མི་ ༡༤ འཛིན་བཟུང་བྱས་པ་རེད་འདུག གོང་གསལ་མི་བཅུ་ ༡༤ དེ་དག་གི་མིང༌།
༡༽ ཇོ་རུ།
༢༽ རྡོ་རྗེ།
༣༽ མི་གཡང༌།
༤ བཀྲ་ཤིས་ཚེ་དགའ།
༥༽ ཉི་སྒྲོན།
༦༽ ཆོས་སྐྱོང༌།
༧༽ མགོན་རྡོ།
༨༽ བསོད་ནམས་བཀྲ་ཤིས།
༩༽ ནོར་བུ་བཀྲ་ཤིས།
༡༠༽ རིན་ཆེན་རྡོ་རྗེ།
༡༡༽ ཆོས་བཟང༌། བཅས་ཡིན་འདུག གོང་གསལ་འཛིན་བཟུང་ཟིན་པའི་གྲོང་མི་དེ་དག་གིས་རྒྱ་གཞུང་ལ་རྒྱ་སྒོར་ ༢༠༠༠ རེ་སྤྲོད་ན་གློད་རེ་ཡོད་ལུགས་གོ་རྒྱུ་ཡོད་ནའང་གྲོང་མི་ཚོ་དཔལ་འབྱོར་གྱི་ གནས་བབ་སྐྱོ་བས་གློད་ཐབས་སྙེད་ཀྱི་མེད་པ་དང༌། མུ་མཐུད་ཞིང་ཁ་རྨོ་རོགས་མ་བྱས་པར་རྒྱ་གཞུང་འུ་ཐུག་ནས་གཞུང་གི་འཕྲུལ་འཁོར་ གྱིས་རྨོ་རྩིས་བྱེད་བཞིན་ཡོད་འདུག གནས་ཚུལ་འབུལ་མཁན་སྤྱི་འཐུས་རྒྱུན་ལས་ཆབ་སྲིད་སྡེ་ཚན་དགེ་སྤྱི་བེ་རི་འཇིགས་མེད་ཀྱིས། ༢༠༠༩།༥།༢༡། ལ
༈རྫ་ཆུ་ཁར་རྒྱལ་དར་བསྒྲེངས།
ཡོང་ཁུངས།ཨེ་ཤི་ཡ་རླུང་འཕྲིན།
རྒྱ་ནག་གི་རྒྱལ་དར་པར་ཕབ་སྟེ་བོད་ཀྱི་རྒྱལ་དར་འཕྱར་ནས་བོད་རང་དབང་ཞེས་འཁོད་པའི་ཡིག་ཆ་བཀྲམས་འདུག
༄༅༎ཕྱི་ཟླ་༩་ཚེས་༧རེས་གཟའ་པ་སངས་ཉིན་སི་ཁྲིན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་རྫ་ཆུ་ཁ་བ་དབོན་པོ་ཤང་སློབ་གྲྭའི་མདུན་ཐང་དུ་རྒྱ་ནག་གི་རྒྱལ་དར་ཡོད་པ་མར་ཕབ་སྟེ། དེའི་ཚབ་ཏུ་ལག་པས་བྲིས་པའི་བོད་ཀྱི་རྒྱལ་དར་བསྒྲེངས་པ་དང་། བོད་རང་དབང་ཞེས་འཁོད་པའི་ཡིག་ཆ་བཀྲམས་ཡོད་པ་དང༌།རྒྱ་ནག་གི་ཉེན་རྟོག་པས་རྒྱ་ནག་གི་རྒྱལ་དར་བསྐྱར་དུ་བསྒྲེངས་ནས་ཡིག་ཆ་རྣམས་ཡར་བསྡུས་ཡོད་པའི་སྐོར་ཨེ་ཤེ་ཡ་རང་དབར་རླུང་འཕྲིན་ཁང་གི་གསར་འགོད་པ་པདྨ་དངོས་གྲུབ་ལགས་སུ་སེར་བྱེས་བྱ་བྲལ་ཁང་ཚན་གྱི་སྐུ་ཞབས་འཇམ་དཔལ་ཡོན་ཏན་ལགས་གནས་ཚུལ་ངོ་སྤྲོད་གནང་བར་གསན་རོགས༎
༈བོད་རྫ་ཆུ་ཁ་ནས་རྒྱ་ནག་གིས་འཇིགས་སྐུལ་འཁྲབ་སྟོན།
ཡོང་ཁུངས།དྲ་བ།
འདི་གར་ཕྱི་ལོ༢༠༠༩ ལོའི་ཟླ་བ༡༠ཚེས་༦ལ་ཁུངས་ལྡན་གནས་ཚུལ་འབྱོར་བ་ལྟར་ན། བོད་རྫ་ཆུ་ཁ་ནང་ཚེས་ཉེར་གཅིག་ནས་བཟུང་ཁ་པར་མི་འགྲོ་བའི་གནས་ཚུལ་བྱུང་ཡོད་པ་མ་ཟད། ཟླ་འདིའི་ཚེས་ཉི་ཤུའི་ནང་དགྱ་གཞུང་གི་ལས་བྱེད་རྣམས་ནས་ས་གནས་དེའི་ལས་བྱེད་ཚོར་ཁྱེད་ཚོས་མི་དམངས་གང་མང་བསྡུས་ནས་དགྱ་གཞུང་ལ་ངོ་རྒོལ་བྱེད་དུ་འཇུག་དགོས་ལ།
སྐབས་དེར་བོད་ཆས་ངེས་པར་དུ་གྱོན་དགོས་པའི་བཀའ་བཏང་འདུག ད་དུང་མི་མང་ཚོར་བཀའ་བརྒྱ་དེ་དང་ལེན་མ་བྱས་ན། ཁྱེད་ཚོར་ལམ་ཁ་གཅིག་མ་གཏོགས་མེད་ཚུལ་སོགས་ཀྱི་འཇིགས་སྐུལ་འོག་བོད་མི་སུམ་ ཅུ་ལྷག་འདུ་འཛོམས་བྱེད་དུ་བཅུག་ཡོད་ལ།
བོད་མི་ཚོ་དེར་འཛོམས་དུས་ས་གནས་དེར་དམག་མི་བརྒྱད་བརྒྱ་ལྷག་འཛོམས་ཏེ་བོད་མི་ཚོར་ཆུ་འགྱིག་དམ་གང་རེ་སྤྲད་ནས་མདུན་ཕྱོགས་ཀྱི་དམག་མི་དག་ལ་ངོ་རྒོལ་བྱེད་པའི་ཚུལ་གྱིས་ཆུ་དམ་དེ་དག་གིས་རྒྱག་དགོས་པའི་བཀའ་བཏང་འདུག་ལ། གལ་སྲིད་སྐབས་དེར་མྱི་ལ་རྨས་སྐྱོན་བྱུང་ན་ཡང་སྐྱོན་མེད་ཚུལ་སོགས་བརྗོད་འདུག
དེ་ལྟར་ཁོ་ཚོས་ངོ་རྒོལ་གྱི་འགོ་བརྩམས་པ་དང་མཉམ་དུ་དམག་མི་དག་གིས་མདུན་ཕྱོགས་ནས་རླངས་འཁོར་མང་པོ་མེར་བསྲེགས་བཏང་ནས་དུ་བ་ཆེན་པོ་འཕྱུར་དུ་བཅུག་ཅིང་ཤོག་སྦག་མེ་མདའི་སྐད་འདྲ་བ་ཡང་མང་པོ་བཀད་ནས་སྒྲ་གྲགས་སུ་བཅུག དེ་མིན་ད་དུང་འོད་མཆེད་པའི་བཅའ་དངོས་རེ་ཡང་བཀད་ནས་བརྙན་འཕྲིན་དུ་ཕབ་པ་དང་པར་མང་པོ་བརྒྱབ་པའི་གནས་ཚུལ་བྱུང་འདུག
གཞན་སྐབས་དེར་དམག་མི་ཁ་ཤས་ལ་རྨས་སྐྱོན་ཕོག་ཡོད་པའི་རྣམ་པ་བསྟན་ནས་རླངས་འཁོར་ནང་སྐྱེལ་འདྲེན་བྱེད་པའི་འཁྲབ་སྟོན་གྱི་ཚུལ་ལ་དཔག་ན་འཁྲབ་སྟོན་འདི་ལས་བོད་མི་ཚོར་ནག་ཉེས་གང་མང་ཞིག་འགེལ་ ངེས་ཡིན་པའི་སྣང་ཚུལ་མཐོང་སོང་བས་ད་སྐབས་ས་གནས་དེའི་བོད་མི་དག་གིས་སེམས་ཚུབ་བྱེད་ཀྱིན་ཡོད་པ་སོགས་ཀྱི་གནས་ཚུལ་འགྲེལ་བརྗོད་གནང་བྱུང་།
དེ་མིན་བོད་རྫ་ཆུ་ཁ་འབུམ་རྙིང་ཕྱོགས་སུ་ཡང་དེ་འདྲའི་གནས་ཚུལ་ཞིག་བྱུང་ཡོད་ཚུལ་འདུག་མོད་ད་དུང་གསལ་བོ་ཤེས་མ་སོང་ཟེར།
གནས་ཚུལ་མཁོ་སྤྲོད་བྱེད་མཁན་ཐར་ཤུལ་བསོད་གྲགས།
༈རྫ་ཆུ་ཁ་དབོན་པོ་དགོན་པའི་དགེ་འདུན་པ་ ༡༢ འཛིན་བཟུང་།
ཡོང་ཁུངས།བོད་ཀྱི་བང་ཆེན།
ཟླ་འདིའི་ཚེས་ ༡༩ ཉིན་བོད་ནས་ཁུངས་ལྡན་གནས་ཚུལ་འབྱོར་གསར་ལྟར་ན། བོད་མདོ་ཁམས་རྫ་ཆུ་ཁ་དབོན་པོ་དགོན་པའི་དགེ་འདུན་པ་ ༡༢ རྒྱ་ནག་གཞུང་གིས་འཛིན་བཟུང་བྱས་ཡོད་པའི་གནས་ཚུལ་ཐོན་འདུག
དེ་ཡང་རྒྱ་གར་ལྷོ་ཕྱོགས་ནས་དགེ་འདུན་པ་བྱམས་པ་ཡོན་ཏན་གྱིས་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཚེས་ ༡༨ ཉིན་སླར་ཡང་རྫ་ཆུ་ཁ་དབོན་པོ་དགོན་པའི་དགེ་འདུན་པ་ཀླུ་སྒྲུབ་དང་། རྒན་བློ་བཟང་སྒྲུབ་གསལ་དང་། བློ་བཟང་མཐར་ཕྱིན་བཅས་དགེ་འདུན་པ་གསུམ་འཛིན་བཟུང་བྱས་ཡོད་པ་དང་། འཛིན་བཟུང་བྱས་རྗེས་ཉེན་རྟོག་པ་བཅུ་གསུམ་རྒན་བློ་བཟང་སྒྲུབ་གསལ་དང་བློ་བཟང་མཐར་ཕྱིན་གཉིས་ཀྱི་གྲྭ་ཤག་ཏུ་འོང་ནས་གང་བྱུང་སྔོག་བཤེར་གྱིས་རྩོམ་ཡིག་མང་པོ་ཞིག་བཙན་ཁྱེར་བྱས་ཡོད་འདུག ཚེས་ ༡༩ ཉིན་གྱི་ཞོགས་པར་དབོན་པོ་དགོན་པའི་དྲུང་ཡིག་གྲྭ་བསོད་བཟང་། རྒན་བསོད་ཉི། ཐག་མཆོག་དང་དབང་རྒྱལ་བཅས་འཛིན་བཟུང་བྱས་ཡོད་འདུག་པ་དང་། ཉིན་རྒྱབ་བོད་ནང་གི་ཆུ་ཚོད་དང་པོ་དང་སྐར་མ་བཅུ་བདུན་ཙམ་ལ་གཞུང་གིས་དགོན་པའི་དགེ་འདུན་པ་རྣམས་ཕྱོགས་གཅིག་ཏུ་བསྡུས་ནས། འདི་ལོའི་ཕྱི་ཟླ་ ༩ ཚེས་ ༧ ཉིན་དབོན་པོ་དགོན་དུ་བོད་ཀྱི་རྒྱལ་དར་བསྒྲེངས་མཁན་དང་བོད་རང་དབང་ཅེས་པའི་ཡི་གེ་གཏོར་མཁན་སུ་ཡིན་རྩད་གཅོད་བྱེད་ཆེད་ཡིག་གཟུགས་བརྟག་དཔྱད་བྱེད་ཀྱི་ཡིན་ཟེར་ནས། དགེ་འདུན་པ་རེ་རེ་བཞིན་རྩིག་པར་བོད་ཡིག་འབྲི་བཅུག་པའི་ལས་འགུལ་སྤེལ་བཞིན་ཡོད་འདུག གཞན་ཡང་ཚེས་ ༡༥ ཉིན་འཛིན་བཟུང་བྱས་པའི་མི་སྣ་དེ་དག་ཀྱང་དགོན་པའི་སློབ་གྲྭའི་གྲྭ་པ་ལྔ་ཡིན་འདུག་ནའང་། ཁོང་ཚོའི་མིང་ཅི་ཡིན་ད་དུང་ཁ་གསལ་བྱུང་མི་འདུག གོང་འཁོད་འཛིན་བཟུང་བྱས་པའི་དགེ་འདུན་པ་ཁྱོན་ ༡༢ བྱུང་ཡོད་པ་དེ་དག་ད་ལྟ་རྫ་སྟོད་ཆུས་ཐོག་ཏུ་བཀག་ཉར་བྱས་ཡོད་འདུག་ལ། ཁོང་ཚོར་གྱོན་པ་དང་ཟ་མ་སོགས་མཁོ་སྤྲོད་དང་ཐུག་འཕྲད་བྱེད་འཇུག་གི་མེད་པར་བརྟེན། ཁོང་ཚོའི་ད་ལྟའི་གནས་སྟངས་ཇི་བཞིན་ཤེས་ཀྱི་མེད་པ་རེད་འདུག
གཞན་ཡང་ཟླ་འདིའི་ཚེས་ ༡༦ ཉིན་དབོན་པོ་སྡེ་པའི་ཁྱིམ་ཚང་ཚང་མའི་བཟའ་དཔོན་ཚང་མ་དབོན་པོ་ཡུལ་ཚོ་རུ་བསྡུ་བསྐོང་བྱས་པའི་ཚོགས་འདུའི་སྐབས། གཙོ་བོ་རྒྱལ་གཅེས་ཆོས་གཅེས་ཀྱི་སློབ་གསོ་དང་འདྲ་བའི་གཏམ་བཤད་སྤེལ་ཡོད་པ་དང་། ལྷག་པར་མི་མང་གིས་ཕྱོགས་ཡོངས་ནས་ལྷིང་འཇགས་བྱེད་དགོས་པ་དང་། འདི་ལོའི་ཟླ་ ༩ པའི་ཚེས་ ༧ ཉིན་གྱི་དོན་རྐྱེན་ཉེས་ཅན་པ་འཛིན་བཟུང་བྱེད་རྒྱུ་ཡིན་པ་དང་། རྗེས་སོར་གནས་ཚུལ་དེ་ལྟ་བུ་ལྷག་མི་རུང་བས་ཁྱིམ་ཚང་སོ་སོས་འགན་ཁུར་དགོས་པ། ད་དུང་དབོན་པོ་སྡེ་པས་འབྲོག་སའི་ལྕགས་རྭ་ཕྱིར་བསྡུ་བྱེད་བཞིན་ཡོད་པ་དེ་ཕྱིར་བསྡུ་བྱེད་མི་ཆོག་པའི་སྐོར་ཀྱི་སློབ་གསོ་བཏང་ཡོད་འདུག
མདོ་ཁམས་རྫ་ཆུ་ཁ་དབོན་པོ་དགོན་དགའ་ལྡན་བཤད་སྒྲུབ་དར་རྒྱས་གླིང་ནི་ཕྱི་ལོ་ ༡༧༠༨ ལོར་གོ་རྒྱལ་དགེ་ཚུལ་ཁྲིམས་ཞེས་པས་ཕྱག་བཏབ། རིམ་པས་དགོན་པ་དེར་རྒྱུད་གྲྭ་སྟོད་སྨད་ཀྱི་ཕྱག་བཞེས་ལྟར་གནས་ཡོད་པ་དང་། སྔ་དུས་ནས་གདན་ས་སེར་འབྲས་ལ་གྲྭ་རྒྱུན་དུ་འགྲོ་བའི་ལུགས་སྲོལ་ཆེན་པོ་ཡོད་འདུག་ལ། ད་དུང་དགོན་པ་ཕྱག་བཏབ་པ་ནས་སྤྱོད་འཇུག་བློ་འགྱུར་བར་བཀའ་རབ་འབྱམས་དགེ་བའི་བཤེས་གཉེན་བཅོ་བརྒྱད་བྱོན་མྱོང་ཡོད་པ་རེད། ཕྱི་ལོ་ ༡༩༩༩ ལོའི་བོད་ཟླ་ ༨ པའི་ཚེས་ ༥ དགོན་པ་འདི་ནས་མདོ་ཁམས་འཇང་དགུན་ཆོས་ཆེན་མོ་གསར་འཛུགས་གནང་བ་དང་། ༢༠༠༥ ལོའི་བོད་ཟླ་ ༤ ཚེས་ ༨ ཉིན་དགོན་པ་འདིའི་ཁྱབ་ཁོངས་སུ་གྲྭ་བཙུན་གཞོན་སྐྱེས་རྣམས་ལ་རྨང་གཞིའི་རིག་གནས་སློབ་གླིང་ཞིག་གསར་འཛུགས་གནང་དང་། ད་ལྟ་སློབ་གྲྭ་དེའི་ནང་སྐད་ཡིག་དང་རྩིས་རིག རྒྱ་ཡིག་དང་བསྡུས་གྲྭ སུམ་རྟགས་དག་གསུམ་དང་། སྙན་ངག ལོ་རྒྱུས། རིག་རྩལ་འགྲན་སྡུར་སོགས་སློབ་གསོའི་རྣམ་པ་རྒྱ་ཆེར་སྤེལ་བཞིན་ཡོད་པ་རེད་འདུག །
མེ་སོར་གསར་འགོད་པས།
སྡེ་དགེ་འཇོ་མདའ་ནས་བོད་མི་བརྒྱད་འཛིན་བཟུང་བྱས་པ།
ཡོང་ཁུངས།རྒྱལ་སྤྱིའི་བོད་ཀྱི་ཆ་འཕྲིན་དྲ་བ།ད་ལོ་སྡེ་དགེ་འཇོ་མདའ་རྫོང་ཁོངས་ཀྱི་ཤང་ཁག་མང་པོ་ཞིག་གི་བོད་མི་རྣམས་ཀྱིས་ས་ཞིང་བཏབ་མེད་པ་དང་དེ་དག་ལ་རྒྱ་གཞུང་གི་དམག་མི་དང༌། ཉེན་རྟོག་པ། ལས་བྱེད་བཅས་ནས་ཐུབ་ཚོད་དང་སྡིགས་ར་བསྐུལ་བ་སོགས་འདས་ཟིན་པའི་གནས་ཚུལ་རྣམས་སྐབས་བསྟུན་སོ་སོར་གསར་འགྱུར་བརྒྱུད་ལམ་ཁག་ནས་ཡོངས་ཁྱབ་ཏུ་བསྒྲགས་ཟིན་ཡོད་པ་རེད། ད་ལན་ཕྱི་ཟླ་༡༠ཚེས་༡༨ཉིན་འདི་གར་འབྲེལ་ཡོད་ནས་གནས་ཚུལ་མཁོ་སྤྲོད་གནང་བ་ལྟར་ན། ཡང་བསྐྱར་ཉིན་ཤས་སྔོན་ཐོག་མར་འཇོ་མདའ་རྫོང་ཁ་སྒང་ཤང་ལུང་དམར་རུ་བར་དམིགས་བསལ་དམག་མི་དང་རྒྱ་ཡི་ལས་བྱེད་པ་ཁག་ཅིག་ཡོང་ནས་ཞིང་ཁ་རྨོ་དགོས་སྐོར་དང༌། ད་ལོ་ཞིང་ཁ་མ་བཏབ་པའི་རྒྱུ་མཚན་ཇི་ཡིན་གྱི་གནད་དོན་དང་རྐྱེན་རྩ་སུ་ལ་ཐུག་མིན་བཅས་གསལ་བཤད་དགོས་སྐོར་སོགས་བཤད་སྐབས་བོད་མི་རྣམས་ཀྱིས་མ་ཉན་པ་དང༌། ཁ་ལན་སློག་པ་སོགས་མི་འདོད་པའི་རྣམ་འགྱུར་ཤུགས་ཆེ་བཏོན་པར་བརྟེན་ད་བར་ཁ་སྒང་ཤང་ལྷོ་སྟོད་མ་ཁོངས་ནས་བོད་མི་གཞོན་སྐྱེས་བརྒྱད་རིམ་བཞིན་འཛིན་བཟུང་གིས་ བཀག་ཉར་བྱས་ཡོད་འདུག་པ་དང༌། ཁོང་རྣམས་ལ་ཞིབ་ཕྲའི་ཉེས་མིང་གང་འདྲ་བཀལ་ཡོད་མེད་དང་བོད་མི་དེ་དག་གི་མིང་བཅས་གནས་ཚུལ་མཁོ་སྤྲོད་པས་ཤེས་རྟོགས་བྱུང་མི་འདུག གཞན་ཡང་འཇོ་མདའ་རྫོང་ཁོངས་ཀྱི་ས་གནས་ཁག་མང་པོར་དེ་ལྟ་བུའི་འདྲི་རྩད་བྱེད་ འགོ་བརྩམས་ཡོད་འདུག སྤྱིར་བཏང་ད་སྐབས་ས་ཞིང་འདེབས་ལས་བྱེད་པའི་དུས་ཚོད་མིན་ཀྱང་ད་ལོ་ས་ཞིང་མ་བཏབ་ནས་བཞག་ཡོད་པ་རྣམས་འཕྲུ་སློག་མ་བརྒྱབ་ཚེ་ལོ་གཞུག་མ་ཡང་ཕན་ཐོགས་མེད་པ་ ཆགས་ཀྱི་ཡོད་པ་ཞིག་རེད་འདུག ད་དུང་འཇོ་མདའ་རུ་བོད་མི་རྣམས་ཀྱིས་བཤས་ཚོང་བྱས་མེད་པར་བརྟེན་རྒྱ་ཡི་ལས་བྱེད་རྣམས་ཤ་ཉོ་མཁན་ཆབ་མདོ་ལ་འགྲོ་དགོས་ཆགས་བཞིན་ཡོད་འདུག་པ་དང༌། རྒྱ་མི་ཁག་ཅིག་གིས་རྟ་ཉོ་ནས་ཁྲིད་འགྲོ་བཞིན་ཡོད་འདུག་པས་བོད་མི་རྣམས་ཀྱིས་ཁོ་ཚོས་རྟ་ཤ་ཟ་ཡི་མེད་འགྲོ་བསམ་པའི་དོགས་གཞི་དང་བཅས་གལ་སྲིད་ཁོ་ཚོས་རྟ་བཤས་པ་སོགས་བྱས་ཚེ་བོད་ཀྱི་སྲོལ་རྒྱུན་དང་འགལ་ཞིང་བོད་མི་རྣམས་ལ་བརྙས་བཅོས་ཚད་མེད་བྱས་པ་ཡིན་ཚུལ་གྱི་གླེང་སློང་ཡང་འབྱུང་བཞིན་ཡོད་འདུག་པ་བཅས།སྤྱི་འཐུས་རྒྱུན་ལས་ཆབ་སྲིད་སྡེ་ཚན་ནས་དགེ་བཤེས་སྨོན་ལམ་མཐར་ཕྱིན་གྱིས་ ༢༠༠༩།༡༠།༡༩ ལ།
ཁམས་འཇོ་མདའ་རྫོང་ཁོངས་སུ་ས་ཞིང་འདེབས་ལས་མི་བྱེད་པའི་དོན་རྐྱེན་ཐད་བོད་མི་བརྒྱད་འཛིན་བཟུང་བྱས་པ།
ཡོང་ཁུངས།དྲ་བ།
༢༠༠༩ ཕྱི་ཟླ་ ༡༠ ཚེས་ ༢༡ རེས་གཟའ་ལྷག་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཁམས་འཇོ་མདའ་རྫོང་ཁོངས་སུ་ས་གནས་མང་ཚོགས་ཚོས་ས་ཞིང་འདེབས་ལས་མི་བྱེད་པ་སོགས་སྔ་རྗེས་ངོ་རྒོལ་བྱུང་བར་བརྟེན་ཟླ་ ༡༠ པའི་ཟླ་དཀྱིལ་དུ་འཇོ་མདའ་རྫོང་ཁ་སྒང་ཤང་ལུང་དམར་རུ་བར་རྒྱ་གཞུང་འབྲེལ་ཡོད་ལས་བྱེད་དང་དམག་མི་ཁག་གཅིག་ཡོང་སྟེ་མང་ཚོགས་ཚོར་འདི་ལོ་ཞིང་ཁ་མ་བཏབ་པའི་རྒྱུ་མཚན་ཇི་ཡིན་བསྐྱར་དུ་རྩད་གཅོད་བྱས་ཡོད་པ་མ་ཟད། དེའི་རྐྱེན་རྩ་སུ་ལ་ཐུག་ཡོད་མེད་གསལ་བཤད་དགོས་སྐོར་ཤོད་སྐབས། མང་ཚོགས་ཚོའི་ངོས་ནས་ཉན་འཇོག་མ་བྱས་པར་མི་འདོད་པའི་རྣམ་འགྱུར་ཤུགས་ཆེ་བསྟན་པར་བརྟེན་ས་གནས་དེ་ནས་གཞོན་སྐྱེས་བརྒྱད་སྔ་རྗེས་སུ་འཛིན་བཟུང་བྱས་ཡོད་པ་དང་། གོང་གསལ་ལྟར་འདི་ལོའི་ས་ཞིང་འདེབས་ལས་མི་བྱེད་པའི་རྒྱུ་མཚན་འདྲི་རྩད་བྱས་ཏེ་མང་ཚོགས་ལ་སུན་གཙེར་ཤུགས་ཆེ་བཟོ་བཞིན་ཡོད་འདུག་པ་མ་ཟད། འཇོ་མདའ་རྫོང་ཁོངས་སུ་བོད་མི་རྣམས་ཀྱིས་འདི་ལོ་བཤས་ཚོང་བྱས་མེད་པར་བརྟེན་རྒྱའི་ལས་བྱེད་རྣམས་ཤ་ཉོ་བར་ཆབ་མདོར་འགྲོ་དགོས་ཆགས་ཡོད་པ་རེད། རྒྱ་མི་ཁག་གཅིག་ནས་རྟའང་ཉོས་ཏེ་གསོ་ཉར་བྱེད་བཞིན་པར་བལྟས་ན་རྟ་ཤ་ཟ་གི་མེད་དམ་སྙམ་པའི་དོགས་གཞིའི་མང་ཚོགས་ཁྲོད་གླེང་སློང་ཤུགས་ཆེ་བྱེད་བཞིན་ཡོད་པ་རེད།
བོད་ཁམས་འཇོ་མདའ་རྫོང་གི་ཉེན་རྟོག་ལས་ཁུངས་མདུན་ངོ་རྒོལ།
ཡོང་ཁུངས།ཨེ་ཤི་ཡ་རླུང་འཕྲིན། 2009-08-21
བཀག་ཉར་འོག་མུ་མཐུད་གནས་བཞིན་པའི་བོད་མི་དགོན་པོ་དར་རྒྱས་ཀྱི་བཟའ་ཟླས་རང་ཉིད་ཀྱི་བུ་ཕྲུག་ཚོ་འཁྲིད་ཏེ་ངོ་རྒོལ་བྱེད་བཞིན་པ།
༄༅༎དེ་རིང་ཁམས་འཇོ་མདའ་རྫོང་གི་ཉེན་རྟོག་ལས་ཁུངས་མདུན་འཇོ་མདའ་རྫོང་དུ་བཀག་ཉར་འོག་མུ་མཐུད་གནས་བཞིན་པའི་བོད་མི་དགོན་པོ་དར་རྒྱས་ཀྱི་བཟའ་ཟླ་བོ་ཡག་ཞུ་བ་ཞིག་ནས་རང་ཉིད་ཀྱི་བུ་ཕྲུག་ཚོ་འཁྲིད་ཏེ་མཉམ་དུ་ངོ་རྒོལ་བྱེད་བཞིན་ཡོད་པའི་གནས་ཚུལ་ཞིག་ཐོན་འདུག
དེའང་ཟླ་བ་འདིའི་ཚེས་བཅུ་གཉིས་ཉིན་བཙན་བྱོལ་བོད་གཞུང་གི་དྲ་རྒྱའི་ཐོག་བཀོད་པའི་གནས་ཚུལ་ལ་གཞིགས་ན་ཉེ་ཆར་རྒྱ་ནག་གཞུང་ནས་ཁམས་འཇོ་མདའ་རྫོང་ཁོངས་རྒྱལ་མཚན་ཚང་གི་བྱམས་པ་དང་བུ་ལྷུག་དེ་བཞིན་དམུ་ཚ་ཚང་གི་ཚེ་བརྟན་བཅས་བོད་མི་གསུམ་ཕྱི་ཟླ་བརྒྱད་པའི་ཚེས་བཞིའི་ཉིན་ཆབ་མདོར་འཁྲིད་དེ་དུས་བཀག་བཙོན་འཇུག་ལོ་གཉིས་བྱེད་རྒྱུའི་ཁྲིམས་ཐག་བཅད་ཡོད་པ་མ་ཟད་དེ་མིན་ཨ་ཤག་ཚང་གི་ནོར་ལྷ་དང་མགོན་པོ་དར་རྒྱས་གཉིས་ལ་རྒྱ་ནག་གཞུང་ནས་དེ་སྔའི་ས་གནས་བོད་མིའི་ཞི་བའི་ངོ་རྒོལ་ལས་འགུལ་གྱི་སྣེ་འཁྲིད་མཁན་ཡིན་པའི་ཉེས་བཙུགས་བྱས་ཏེ་སྔ་ས་ནས་འཇོ་མདའ་རྫོང་དུ་བཀག་ཉར་བྱས་ཏེ་ད་ཆ་མུ་མཐུད་བཀག་ཉར་འོག་གནས་བཞིན་པ་རེད་འདུག་ལ་དེ་རིང་མགོན་པོ་དར་རྒྱས་ཀྱི་བཟའ་ཟླ་བོ་ཡག་ནས་རང་ཉིད་ཀྱི་བུ་ཕྲུག་ལྔ་པོ་དེ་ཚང་མ་ཉམ་དུ་ཁྲིད་ཡོང་ནས་འཇོ་མདའ་རྫོང་ཉེན་རྟོག་ལས་ཁུངས་ཀྱི་མདུན་ངོ་རྒོལ་བྱེད་བཞིན་ཡོད་པ་དང་གཞན་ཡང་མགོན་པོ་དར་རྒྱས་ཀྱི་བཟའ་ཟླ་བོ་ཡག་ནས་གལ་ཏེ་ཉེན་རྟོག་ཚན་པར་དགོན་པོ་དར་རྒྱས་གློད་བཀྲོལ་མ་བཏང་བ་ཡིན་ན་རང་ཤི་རྒྱག་གི་ཡིན་ཞེས་བཤད་བཞིན་ཡོད་པ་རེད་འདུག་པ་ལས་དེ་རྗེས་ཀྱི་ཞིབ་ཕྲའི་གནས་ཚུལ་ག་རེ་ཐོན་ཡོད་མིན་གསལ་པོ་མེད་པ་རེད་འདུག
འཇོ་མདའ་རྫོང་གི་གྲྭ་པ་གསུམ་འཛིན་བཟུང།
ཡོང་ཁུངས།བོད་ཀྱི་བང་ཆེན།
ལོ་སྔོན་མའི་ཟླ་བ་༡༢ པ་དང། ཟླ་འདིའི་སྟོད་དུ་ཁམས་སྡེ་དགེ་ས་ཁུལ་འཇོ་མདའ་རྫོང་ཁོངས་ཀྱི་དགོན་པ་ཞིག་གི་སྤྲུལ་སྐུ་བྱང་ཆུབ་དང། གྲྭ་སངས་རྒྱས་རྒྱ་མཚོ། གྲྭ་ཨ་བྷུ་མ་བཅས་སྔ་རྗེས་སུ་རྒྱ་གཞུང་གིས་འཛིན་བཟུང་བྱས་ཡོད་པ་རེད། གྲྭ་སངས་རྒྱས་རྒྱ་མཚོ་དང་སྤྲུལ་སྐུ་བྱང་ཆུབ་གཉིས་ས་གནས་གཞན་ཞིག་ཏུ་སོང་ནས་ཚུར་གྲོང་པ་ཞིག་བརྒྱུད་ཡོང་སྐབས། གྲོང་པ་དེར་རྒྱ་མིའི་ཉེན་རྟོག་པ་འགས་བོད་མི་ཞིག་ལ་ཉེས་རྡུང་གཏོང་བཞིན་ཡོད་པ་མཐོང་སྐབས། ཉེས་རྡུང་མ་གཏོང། གནད་དོན་ག་རེ་བྱུང་བ་རེད་ཅེས་སོགས་བར་འདུམ་བྱས་པར། གནས་སྐབས་ཉེན་རྟོག་པས་གང་ཡང་མ་བྱས་རུང། མར་ཙམ་ལམ་བར་དུ་སླེབས་སྐབས་ཉེན་རྟོག་པ་འགའ་ཞིག་གིས་གྲྭ་སངས་རྒྱས་རྒྱ་མཚོ་འཇུས་ནས་ད་སྐབས་ཆབ་མདོ་ས་ཁུལ་བཙོན་ཁང་དུ་ཡོད་པ་དང། ཕྱི་ཟླ་༡ ནང་དུ་སྤྲུལ་སྐུ་བྱང་ཆུབ་ས་གནས་རང་ནས་འཇུས་ཡོད་འདུག དེ་ནས་གྲྭ་ཨ་བྷུ་མ་ལྷ་ས་ནས་འཇུས་ནས་ད་སྐབས་ཁོང་གཉིས་བཙོན་ཁང་གང་དུ་ཡོད་མེད་སོགས་ཀྱི་གནས་ཚུལ་ཤེས་རྟོགས་མེད་པ་རེད་འདུག །
བསམ་ཚུལ་འབྲི།
ལྔ་བཅུ་ང་དགུ་ལོའི་སྡེ་དགེ་དཔལ་རྒོད་ཁག་ཅིག་གི་ལོ་རྒྱུས།