མཁན་པོ་སྐལ་ལྡན་ཚེ་རིང་།
དགོན་ཆེན་དགོན་པོའི་ལོས་རྒྱུས་ལས་དྲངས།
སྡེ་དགེ་ཆོས་རྒྱལ་ཆེན་པོའི་གདན་ས་དགོན་ཆེན་ལྷུན་གྲུབ་སྟེང་དང་ཉེ་བའི་གྲོང་གསེབ་ཤིག་ཏུ་རབ་བྱུང་བཅུ་དྲུག་པའི་ལྕགས་ཕག་སྤྱི་ལོ་༡༩༧༡ལོར་སྐྱེས།ལོ་བརྒྱད་པ་ནས་ཕ་ལས་ཡིག་ཀློག་རིགས་བསླབ།ལོ་བཅུ་བཞི་པར་སྡེ་དགེ་དགོན་ཆེན་གྱི་ཆོས་གྲྭར་ཞུགས།སྙན་བརྒྱུད་བསྟན་པའི་སྲོག་ཤིང་དགོན་ཆེན་སྒིས་བླ་མ་ངག་དབང་ཆོས་འཕེལ་བཟང་པོ་ལས་རབ་ཏུ་བྱུང་།དཔལ་ཀྱེ་རྡོ་རྗེའི་དཀྱིལ་འཁོར་དུ་དབང་བསྐུར་བས་སྡོམ་པ་སུམ་ལྡན་དུ་གྱུར།གཞན་ཡང་རྗེ་དེ་ལས་ནཱ་རོ་མཁའ་སྤྱོད་ཀྱི་སྨིན་གྲོལ་སོགས་རྒྱ་ཆེར་ཐོས།ངོར་ཁང་སར་མཁན་རིན་པོ་ཆེ་ངག་དབང་མཁྱེན་བརྩེ་ཐུབ་བསྟན་སྙིང་པོ་ལས་ལམ་འབྲས་ཚོགས་བཤད་སོགས་མང་པོ་དང་།ཀླུ་ལྡིང་མཁན་ཆེན་འཇམ་དབྱངས་བསྟན་པའི་ཉི་མ་ལས་ངོར་དཀྱིལ་བདུན།སྦྱོང་དཀྱིལ་བཅུ་གཉིས་སོགས་མཁན་ཞབས་རྣམས་ལས་སྨིན་གྲོལ་མང་པོ་དང་།དཔེ་ཝར་མཆོག་སྤྲུལ་རིན་པོ་ཆེ་འཇམ་དབྱངས་བསོད་ནམས་དབང་པོ་ལས་ལམ་འབྲས་སློབ་བཤད་སོགས་སྨིན་གྲོལ་རྒྱ་ཆེར་ཐོས།ཁྱད་པར་རྫོང་སར་སློབ་གྲྭར་ལོ་ངོ་དྲུག་ཙམ་གྱི་རིང་ལ་ལུང་རིགས་སྨྲ་བའི་གཙུག་རྒྱན་མཁན་ཆེན་པདྨ་དམ་ཆོས་ལས་དབུ་ཁར་འདུལ་མཛོད་ཚད་མ་སྡོམ་གསུམ་རྒྱུད་བཤད་ཀྱི་སྐོར་ཤིན་ཏུ་མང་པོ་ཐོས་ཤིང་རྗེ་དེ་ཉིད་དབང་རྒྱུད་མན་ངག་གི་བཀྲིན་སུམ་ལྡན་དུ་གྱུར།བསྟན་པའི་སྲོག་ཤིང་མཁན་ཨ་པད་རིན་པོ་ཆེ་ལས་གུར་སཾ་བདེ་མཆོག་སོགས་དང་།མཁན་ཆེན་ཀུན་དགའ་དབང་ཕྱུག་ལས་ཚད་མ་མདོ་དང་རྣམ་འགྲེལ་ངེས་སོགས་དང་།གཞན་ཡང་ས་སྐྱའི་ཕོའི་བདག་ཆེན་དང་།བཅོ་བརྒྱད་ཁྲི་ཆེན།དིལ་མགོ་མཁྱེན་བརྩེ།མཁྱེན་བརྩེའི་ཡང་སྲིད་རིན་པོ་ཆེ།མཚན་ཞབས།མཁན་རིན་པོ་ཆེ་ཚུལ་ཁྲིམས་རྒྱལ་མཚན་སོགས་དམ་པ་དུ་མ་བསྟེན་ནས་མདོ་སྔགས་རིག་གནས་དང་བཅས་པ་ལ་སློབ་སྦྱོང་མཐའ་ཡས་པར་བྱས།རྫོང་སར་བཤད་གྲྭའི་སྐྱོར་དཔོན་ལོ་བཞི།དགོན་ཆེན་དབྱར་གནས་མཁན་པོ་ལོ་ལྔ་བྱས།དགོན་ཆེན་བཤད་གྲྭའི་མཁན་པོ་ལོ་དྲུག་གི་རིང་ལ་ས་སྐྱའི་གྲགས་ཆེན་བཅོ་བརྒྱད།སྤྱི་རྣམ་ལྗོན་ཤིང་།ཀྱེ་རྡོ་རྒྱུད་གསུམ།བདེ་མཆོག་འཇིགས་བྱེད་ཀུན་རིག་སོགས་མདོ་སྔགས་རིག་གནས་དང་བཅས་པའི་བཤད་ཁྲིད་སྤེལ།འབྱུང་འདུལ།ཀྱེ་རྡོར་གཞི་བསྟེན།ཀུན་རིགབྲག་རྫོང་།ཚེ་སྒྲུབ།དབྱངས་ཅན་མའི་བསྙེན་སྒྲུབ་སོགས་འགའ་ཞིག་བགྱིས།དུས་འཁོར།ཀྱེ་རྡོར།ཀུན་རིག་སོགས་སྒྲུབ་མཆོད་དང་གཏེར་བཟློག་དུ་མའི་རྡོར་སློབ་བྱས་དང་བྱེད་བཞིན་ལ།
མདོར་ན་མདོ་སྔགས་རིག་གནས་དང་བཅས་པ་དང་ཆོ་གའི་ཕྱག་ལེན་ཕྲ་མོ་ནས་བསླབས་ཏེ་བཤད་སྒྲུབ་སྤེལ་བས་བསྟན་པ་ལ་ཕན་ཐོགས་པའི་རེ་བ་དང་བཅས་ད་ལྟར་དགོན་ཆེན་བཤད་གྲྭའི་མཁན་པོའི་ཚུལ་དུ་གནས་སོ།།
བསམ་ཚུལ་འབྲི།
འཇུ་མི་ཕམ་རྣམ་རྒྱལ་རྒྱ་མཚོ།