ཆུ་སྒང་དམག་སྤྱི་སྡེ་དགེ་ཀཿཐོག་ཕུར་པ་ཕྲིན་ལས།
ཡོང་ཁུངས། ངེད་དྲ་བ།
ཕུར་པ་ཕྲིན་ལས་ནི་སྔོན་མ་ཀཿཐོག་དགོན་པའི་གྲྭ་པ་ཡིན་ཞིང་།དགོན་པར་བཞུགས་སྐབས་ཀཿཐོག་དྲི་མེད་ཞིང་སྐྱོང་རིན་པོ་ཆེའི་ཕྱག་མཛོད་གནང་མྱོང་བ་དང་།ཁོང་ཐོག་མར་ཁམས་ཤར་རྒྱུད་ནས་དགྲ་བོ་ལ་རྒོལ་འཛིང་རིམ་པ་བྱས་ཏེ་དབུས་ཕྱོགས་སུ་སླེབས་པ་དང་།༡༩༥༨་༢་༡༨ཉིན་རྒྱལ་ས་ལྷ་སར་ཡོད་པའི་ཨ་འབྲུག་ཚང་གི་མཆོད་ཁང་དུ་མདོ་ཁམས་སྨད་ཀྱི་རྒྱལ་གཅེས་དཔའ་བོ་མི་གྲངས་བཞི་ཅུ་ལྷག་གསང་སྟབས་ཀྱིས་འཛོམས་ནས་དགྲ་བོ་རྒྱ་དམར་ལ་རྒོལ་རྡུང་བཏང་སྟེ་བོད་ཀྱི་བསྟན་མི་རིགས་དང་བཅས་པ་ཇི་ལྟར་སྲུང་སྐྱོབ་དགོས་ཚུལ་ཐད་ནས་གྲོས་མོལ་བྱས་པའི་ཁོངས་སུ་སྡེ་དགེའི་ཕྱོགས་ནས་ཁོང་དང་བྱ་རྒོད་རྣམ་རྒྱལ་རྡོ་རྗེ་གཉིས་ཡོད་པ་དང་།དེ་བཞིན་༡༩༥༧ལོར་མདོ་ཁམས་ཆུ་བཞི་སྒང་དྲུག་གིས་གསེར་ཁྲི་བརྡུང་དུས་སྡེ་དགེའི་འཐུས་མི་གནང་ཡོད་པ་དང་།སྐབས་དེར་བོད་རིགས་དབུལ་ཕོངས་མང་པོས་ཀྱང་དངུལ་དངོས་འབུལ་བའི་དམ་འཛིན་པ་གནང་།དེ་ནས་ཕན་པོ་དང་མལ་གྲོ་གུང་དཀར།ཡར་འབྲོག་བརྒྱུད་ནས་ལྷོ་ཁའི་ཕྱོགས་སུ་བསྐྱོད་དེ།ལྕགས་ཚ་གྲི་གུ་ཐང་གི་དམག་སྤྱིའི་ལས་ཁུངས་ནང་གི་མི་སྣ་དང་།ཆུ་སྒང་དམག་སྒར་གྱི་སྡེ་དགེའི་དམག་སྤྱིའང་གནང་།ཤང་དགའ་ཆོས་དགོན་དུ་གོ་མཛོད་ལེན་དུ་འགྲོ་བའི་ལམ་བར་དུ་རྒྱ་མའི་དམག་སྒར་ཞིག་དང་ཐུག་ནས་ཁོང་གཙོས་པའི་མི་ཉི་ཤུ་ཁས་ལེན་པ་ཐོན་ནས་འཇབ་སྐྱོད་ཀྱིས་ཉེར་མཚམས་སུ་སླེབས་པ་ན་མེ་མདའ་བརྒྱབ་སྟེ་རྒྱ་ཁ་ཤས་བསད།དེ་ནས་གྱང་གོག་འཁྲིས་སུ་བཅར་བའི་ཚེ་རྒྱ་དམག་གིས་ལག་འབོམ་ཁ་ཤས་དབྱུགས་བྱུང་བར་དེ་འཕྲལ་ཁོང་གིས་ལག་འབོམ་གཉིས་འབར་གས་མ་བྱས་པའི་མཚམས་དེར་དམར་འཇུས་བརྒྱབ་སྟེ་དགྲ་བོའི་ཕྱོགས་སུ་ཕྱིར་འཕངས་པས་གྱང་གོག་ནས་ཡེ་ཤན་ཀན་བརྒྱབ་མཚམས་ཆད།དེ་ནས་ཁོང་རྣམས་མེ་མདའི་ཁར་ཐེ་ཚོམ་མེད་པར་མཆོངས་ཏེ་རྒྱ་དམག་ཚང་མ་ཐུང་མདས་བསད་དེ།རིང་མདའ་ཁ་ཤས་དང་མེ་ཤན་ཀན་ཆེ་ལེགས་གཅིག་ཀྲིང་འདན་གཅིག་བཅས་བླངས་ནས་རྒྱལ་ཁ་ཆེན་པོ་ཐོབ།
དེ་ནས་ཤང་དགའ་ཆོས་དགོན་དུ་སླེབས་ཉེར་སྐབས་རྐང་ཟམ་བརྒྱུད་ནས་འགྲོ་དགོས་པས་དམག་མི་ཡོངས་རྫོགས་མཉམ་ཐོན་དུས་ཚོད་འགོག་བར་དགོངས་ཏེ་སྤྱི་ཁྱབ་བཀོད་འདོམས་ཁང་ནས་དམག་སྤྱི་གསུམ་སྟེ་གཅིག་ཁོང་ཡིན་པ་རེད།ལམ་བར་རྫོང་ཁང་ཞིག་བཤེར་བགྱིས་པས་ཁུག་ཀྱོག་གཅིག་ཏུ་འཕྲུལ་མདའ་ཉེར་གསུམ་འདུག་པས་བླངས།དེའི་རྗེས་ཤང་དགའ་ལྡན་ཆོས་འཁོར་ནས་གོ་ལག་ཆ་ཚང་རྩིས་ལེན་བྱས་པ་དང་།སླར་ཡང་ལྷོ་ཁར་ཕྱིར་ལོག་སྐབས་སྔོན་འགྲོའི་སོ་ལྟ་སྐྱོད་མིའི་དམག་སྤྱི་གནང་བ་དང་།རྟ་དམག་བརྒྱད་ཅུ་སྐོར་སྔོན་དུ་བཤར་སྐབས་རྒྱ་དམག་མོ་ཀྲ་བཅུ་གཉིས་ཡོང་བ་དང་གདོང་ཐུག་བརྒྱབ་སྐབས།ཕན་ཚུན་མེ་མདའ་བརྒྱབ་སྟེ་འཛིང་རེས་བྱས་པས་ཁོང་ཚོའི་མེ་མདའ་ཡིས་རྒྱ་མིའི་མོ་ཀྲའི་ནང་གི་འབར་རྫས་བཀད་དེ་རྒྱ་དམག་རྣམས་ཕྱིར་དོན་ལོང་མེད་པར་མི་དང་མོ་ཀྲ་ཆབས་ཅིག་རྩ་མེད་དུ་བཏང་།དཀར་ཁང་རི་བརྒྱུད་ནས་གཡུལ་འགྱེད་སྐབས་ཁོང་གིས་སྣེ་ཁྲིད་པའི་དམག་མི་བཞི་བརྒྱ་ལྔ་བཅུ་ཙམ་གྱིས་རྒྱ་དམག་སྟོང་ཚོ་བརྒལ་བ་དམར་བསད་བཏང་བའི་བྱས་རྗེས་རིམ་པར་བཞགལྷོ་རྫོང་ཁོངས་ཞམས་གཡས་ཟམ་པར་རྒྱ་དམག་ཉེན་འགོག་ཏུ་དྲག་པོའི་དམག་སྤྱི་བཞི་ཞེས་དམིགས་བསལ་གྱིས་གསར་འདེབས་བྱས་པའི་ནང་ནས་གཅིག་ཁོང་ཡིན་པ་དང་།ཆུ་སྒང་དབུས་སྤྱི་ཁྱབ་ཁོངས་བཀོད་འདོམས་ལྟར་ཁྱུང་པོ་དཀར་རུ་དཔོན་དང་མཉམ་སྦྲེལ་གྱིས་ཁྱུང་པོ་ཁུལ་དུ་ཡོད་པའི་རྒྱ་དམག་ལ་འཇབ་རྒོལ་རིམ་པར་བྱས།རང་སྲོག་འབེན་ལ་བཙུགས་ཏེ་དྲག་འཐབ་རིམ་བྱས་ཀྱིས་མཐར་རྒྱ་གར་དུ་བཙན་བྱོལ་ལ་འབྱོར་བ་དང་།རྒྱ་གར་དུ་འབྱོར་རྗེས་ཆུ་སྒང་རྒྱུན་ལས་ཀྱི་ལས་འགན་ལོ་མང་རིང་ཞུས།ཤུལ་འཛིན་བུ་མོ་ཀརྨ་སྒྲོལ་མ་དང་ནང་མི་ད་ལྟ་སྦིར་སྡེ་དགེ་གཞིས་ཆགས་ཁོངས་གནས་མུས་ཡོད་པའི་ལོ་རྒྱུས་སྙིང་བསྡུས་སུ།
ཆུ་སྒང་གི་ལོ་རྒྱུས་དེབ་ཕྲེང་ཁག་ལས་ཚེ་དབང་བསོད་ནམས་ཀྱིས་བསྡུ་སྒྲིག་བྱས།
བསམ་ཚུལ་འབྲི།
ཧོར་འདྲ་བྱི་སུག་རབ་བརྟན།