༄༅།། བོད་རྒྱལ་ལོ་ ༢༡༤༨ རབ་གནས་ལྕགས་མོ་གླང་གི་ལོ་གསར་གྱི་ཤིས་ཚིག
༄༅།། བོད་རྒྱལ་ལོ་ ༢༡༤༨ རབ་གནས་ལྕགས་མོ་གླང་གི་ལོའི་གནམ་ལོ་གསར་དུ་བཞད་པའི་དགའ་སྟོན་རྟེན་འབྲེལ་ལ་འཛམ་གླིང་ཤར་ནུབ་གང་དུ་བཞུགས་ཡོད་པའི་ཤ་ཁྲག་གཅིག་པའི་བོད་རིགས་སྤུན་ཟླ་རྣམས་དང་། ལྷག་པར་དུ་གཞིས་བྱེས་གཉིས་སུ་བཞུགས་པའི་རང་རེ་སྡེ་དགེ་བ་ཡོངས་ལ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ་རྒྱུ་དང་། རྒྱུན་དུ་སྡེ་དགེ་རྒྱལ་ཡོངས་ལྷན་ཚོགས་དང་ལོ་གསར་འཚམས་འདྲི་འབུལ་རྒྱུའི་འབྲེལ་བ་ཡོད་རིགས་ལ་དམིགས་བསལ་གྱི་འཚམས་འདྲི་ཞུ་རྒྱུ་དང་།
འདི་ལོར་ཏོག་དབྱིབས་གཉན་རིམས་ཀྱི་རྐྱེན་པས་དྲྭ་ལམ་འཚམས་འདྲི་འདིས་འཐུས་པ་བྱེད་ཆོག་པ་གྱིས། གནམ་ལོ་གསར་པའི་ནང་སྟོང་གསུམ་མི་མཇེད་འཇིག་རྟེན་གྱི་ཁམས་འདིར་ཕན་བདེ་མ་ལུས་པ་འབྱུང་བའི་གཞི་སྒོ་གཅིག་པུ་རྣམ་འདྲེན་བཞི་པའི་ལུང་རྟོགས་ཀྱི་བསྟན་པ་རིན་པོ་ཆེ་ཉི་མ་བྱེ་བ་འབུམ་ལས་འཕྲོས་པའི་སྒྲོན་མེ་འདི་ཉིད་དར་རྒྱས་ཡུན་རིང་དུ་གནས་པ་དང་། བསྟན་འཛིན་བྱེ་བའི་གཙུག་རྒྱན་བོད་འབངས་ཡོངས་ཀྱི་ལྷ་སྐལ་རྒྱལ་ཀུན་མཁྱེན་བརྩེ་ནུས་གསུམ་གཅིག་ཏུ་འདུས་པ་འཕགས་མཆོག་འཇིག་རྟེན་མགོན་པོ་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དབུས་རིས་མེད་ཀྱི་སྐྱེས་ཆེན་དམ་པ་རྣམས་ཀྱི་སྐུ་ཚེ་བསྐལ་བརྒྱར་བརྟན་ཅིང་བསྟན་འགྲོའི་དོན་ཆེན་འབད་མེད་ལྷུན་གྱིས་འགྲུབ་པ་དང་། དེ་རྣམས་ཀྱི་བྱིན་མཐུ་ལ་བརྟེན་ཡངས་པའི་རྒྱལ་ཁམས་སྤྱི་དང་། ལྷག་པར་བོད་ཡུལ་བསིལ་ལྡན་ས་ལའི་སྨན་ལྗོངས་ཀྱི་ཞིང་འདིར་ནད་མུག་འཁྲུག་རྩོད་སད་སེར་རྩྭ་ཐན་དང་ཁྱད་པར་དུ་འདི་ལོའི་ཏོག་དབྱིབས་ནད་ཡངས་ལ་སོགས་པ་ཆོས་སྲིད་ཀྱི་རྒུད་པ་མཐའ་དག་དབྱིངས་སུ་ཞི་ནས། ཆར་ཆུ་དུས་འབེབས་ལོ་ཕྱུགས་རྟག་ལེགས་སོགས་ཆོས་འབྱོར་བདེ་སྐྱིད་མི་བཟད་པའི་གཏེར་ཆེན་པོ་ལ་ལོངས་སུ་སྤྱོད་པའི་སྨོན་འདུན་གྲངས་མེད་ཞུ་རྒྱུ་དང་བཅས།
སྡེ་དགེ་རྒྱལ་ཡོངས་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་བོད་རབ་གནས་ལྕགས་གླང་ལོའི་ཟླ་ ༡ ཚེས་ ༡ ཕྱི་ལོ་༢༠༢༡ ཟླ་ ༢ ཚེས་ ༡༢ ཉིན་ཕུལ། 
བསམ་ཚུལ་འབྲི།
༄། ༢༠༢༠ ལོའི་སྡེ་དགེ་རྒྱལ་ཡོངས་ལྷན་ཚོགས་ཀྱི་ཚོགས་པའི་དམིགས་འདུན་ལྟར་ཛ་དྲག་ནད་པ་དང་ཉམས་ཐག་དཀའ་ངལ་ཅན་རྣམས་ལ་རོགས་རམ་ཞུས་པའི་སྐོར།