སྤྲུལ་པའི་རྒྱལ་པོས་བོད་ཁམས་སྤྱི་ལ་གདམས་པ།
ཆོས་རྒྱལ་སྲོང་བཙན་སྒམ་པོ།༼ཁོང་ནི་བོད་ཀྱི་རྒྱལ་རབས་སོ་གསུམ་པ་སྟེ་རྒྱལ་པོ་གནམ་ རི་སྲོང་བཙན་དང་ཚེ་སྤུང་བཟའ་གཉིས་ཀྱི་སྲས་སུ་མེ་མོ་གླང་གི་ལོར་༼ འདས་ལོ་༡༡༦༡ ༽སྐུ་ འཁྲུངས། དགུང་ལོ་བཅུ་གསུམ་པར་བོད་ཀྱི་རྒྱལ་པོའི་ཁྲི་ལ་འཁོད། དམར་པོའི་རི་ལ་ཕོ་བྲང་ རྨད་དུ་བྱུང་བ་བཞེངས། བལ་བཟའ་ཁྲི་བཙུན་དང་རྒྱ་བཟའ་ཀོང་ཇོ་བཙུན་མོར་བསུས། རྒྱལ་ པོ་འདིའི་རིངས་ལ་བོད་ཀྱི་ཡི་གེའི་སྲོལ་བཏོད། སངས་རྒྱས་ཀྱི་ཆོས་ཐོག་མར་བོད་ལ་བསྒྱུར། ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་གི་སྲོལ་མངོན་པར་བཞེངས་ནས་ཆོས་སྲིད་ལེགས་པར་བསྐྱངས། མཐའ་བཞིའི་རྒྱལ་ཕྲན་དབང་དུ་བསྡུས། དགུང་ལོ་གྱ་གཉིས་པ་ས་ཁྱི་ལོར་ སྐུ་གཤེགས། ༼དེབ་དཀར་དུ།དགུང་ལོ་སོ་བཞི་པ་༼འདས་ལོ་༡༡༩༥༽ལྕགས་ཁྱི་ལ་གྲོངས་ཞེས་ འཁོད། ༽
༄༅། ༀ་མ་ཎི་པདྨེ་ཧཱུྃ༔ ཐུགས་རྗེ་ཆེན་པོའི་སྤྲུལ་པ་ཆོས་སྐྱོང་བའི་རྒྱལ་པོ་སྲོང་བཙན་ སྒམ་པོས༔ བོད་འབངས་སྤྱི་མཐུན་ལ་གསུངས་པ༔ བོད་ཀྱི་མི་རྣམས་ཉོན་ཅིག༔ བོད་ཁ་བ་ ཅན་གྱི་མི་རྣམས་སྤྲེའུ་དང་བྲག་སྲིན་མོའི་བུར་སོང་བས༔ ཁོང་ཅོལ་ཆུང་ལ་ཁ་སྦྲིན༔ ཁྲེལ་ འཛེམ་དང་ངོ་ཚ་ཆུང་ལ་གསར་འགྲོགས་ལ་དགའ༔ དད་པ་ཆུང་ལ་སྡིག་ལ་མི་འཛེམ༔ འགྲན་སེམས་ཆེ་ལ་ཕྲག་དོག་ཆེ༔ འདོད་ཐག་ཉེ་ལ་ཚིག་མི་བཙན་པས༔དུས་ཕྱི་མའི་མི་ རྣམས་ཆོས་དང་གང་ཟག་གཉིས་ཀ་ལ་གསར་འགྲོགས་ཆེ་བས༔ ཆོས་བྱེད་པ་ལ་སྒྲོ་སྐུར་ འདོགས༔ ཆོས་ལ་ནི་གསར་སྔས་ཆེ་བས་དར་སྐྱེན་ལ་ནུབ་སྐྱེན༔ སྒྲུབ་མི་ནུས་པར་བཤད་ འདོད༔ བསོད་ནམས་དང་འདུ་འཛི་ལ་དགའ༔ ཆོས་བརྒྱད་ཀྱི་གྲགས་པ་འདོད་པ་ཤེས་ ཐག་འབྱུང་བས༔ དེའི་དུས་སུ་ཐུགས་རྗེ་ཆེན་པོའི་བསྟན་པ་དར་བས་ལྷ་དཀར་པོ་སྒོམ་ པ་མང༔ རྡོ་དཀར་པོ་ཟ་བའི་དུས༔ ཆོས་དར་ལ་མ་སྨིན་པའི་དུས་བྱ་བ་ཡིན་པ༔ དེའི་ཚེ་ ཐུགས་རྗེ་ཆེན་པོའི་ཆོས་བྱེད་པར་འདོད་ན་འཁོར་བའི་མཚན་ཉིད་མི་རྟག་པ་ཡིན༔ རང་ རྟག་ཏུ་རེ་སྟེ་ཚེའི་འགྲིབ་ལུགས་བུད་མེད་ཀྱི་གྲུའུ་འཐུལ་བ་བཞིན་འཛད་པ་ཡིན༔ ཉི་མ་ ནུབ་ཁའི་གྲིབ་སོ་བཞིན་འདེད་དེ༔ བྲོས་པས་མི་ཐར༔ ཐོ་ཡོར་ལ་བྱ་སྒྲོ་བཙུགས་པ་རླུང་ གིས་གཡོ་བ་ལྟར་ནམ་འཆི་ཆ་མེད་པ་ཡིན༔ བཙོན་གསོད་སར་ཁྲིད་པ་ལྟར་འཆི་བ་ལ་ཇེ་ ཉེ་ཇེ་ཉེར་སོང་ནས་འཆི་ངེས་པ་ཡིན༔ མི་ཤ་འོ་དང་མི་དོང་བ་ཕྲད་པ་ལྟར་འཆི་བ་ལ་བླུ་ ཐབས་མེད་པ་ཡིན༔ དེ་ལ་ཚེ་འདི་བས་ཕྱི་མ་མི་དྲན་པ་ཡིན༔ དེ་ལྟར་དུག་ལྔ་རང་ཁར་ སྤྱད་ན༔ ཞེ་སྡང་གི་མེ་འབར་བས་དགྲ་མ་ཐུལ་གྱིས་དོགས་ནས་རང་གི་སྲོག་ལ་མི་ལྟ༔ འདོད་ཆགས་ཀྱི་ཆུ་བྲུག་པས་གཉེན་མ་སྐྱོང་གིས་དོགས་ནས༔ ནོར་རྫས་ལ་གདུང་སེམས་ ཀྱི་ཟད་འདོད་པ་དང་འདྲ༔ གཏི་མུག་གི་མུན་པར་ཚུད་པས་རང་ངོ་རང་གིས་མ་ཤེས་པ་ མུན་ཁུང་དུ་རྫས་འཚོལ་བ་དང་འདྲ༔ང་རྒྱལ་གྱི་རི་བོ་ལ་འཛེགས་པས་ང་བདག་གི་འགོང་ བོ་དང་མ་བྲལ་བ་ཆུ་རྩལ་ཅན་ཆུས་ཁྱེར་བ་དང་འདྲ༔ ཕྲག་དོག་གི་འཚུབ་མར་ཚུད་པས་ གཉིས་ཀ་ཕུང་བ་སྟོབས་ཅན་གཡང་སར་འཛིངས་པ་དང་འདྲ༔ ཉོན་མོངས་དུག་ལྔ་རང་ ཁར་སོང་བ་རྩྭ་ལ་མེ་མཆེད་པ་དང་འདྲ༔ དུག་ལྔ་རང་ཁར་སྤྱད་པས་ཞེ་སྡང་གིས་དམྱལ་ བར་སྐྱེ༔ཚ་གྲང་སྡུག་བསྔལ་མྱོང་༔ སེར་སྣས་ཡི་དྭགས་སུ་སྐྱེ༔ བཀྲེས་སྐོམ་གྱི་སྡུག་བསྔལ་ མྱོང༔ གཏི་མུག་གིས་བྱོལ་སོང་དུ་སྐྱེ༔ བཀོལ་སྤྱོད་ཀྱི་སྡུག་བསྔལ་མྱོང༔ འདོད་ཆགས་ཀྱིས་ མིར་སྐྱེ༔ འགྱུར་བའི་སྡུག་བསྔལ་མྱོང༔ ཕྲག་དོག་གིས་ལྷ་མ་ཡིན་དུ་སྐྱེ༔ འཐབ་རྩོད་ཀྱི་སྡུག་ བསྔལ་མྱོང་༔ ང་རྒྱལ་གྱིས་ལྷར་སྐྱེར༔ འཕོ་ལྟུང་གི་སྡུག་བསྔལ་མྱོང་༔ འགྲོ་དྲུག་སྡུག་བསྔལ་ གྱིས་གཅིག་ནས་གཅིག་ཏུ་འཁོར་བས་སྡུག་བསྔལ་གྱི་མཐའ་མི་ཆོད་པ་ཡིན་ནོ༔སྡུག་བསྔལ་ དེ་ལས་བཟློག་པའི་ཐབས་བཀའ་རྒྱ་ཆེ་ལུང་གྲངས་མང་ཡང་༔ འགྲོ་དྲུག་གི་སྡུག་བསྔལ་ ལས་ཐར་པར་བྱེད་པ་ལ་ཐུགས་རྗེ་ཆེན་པོ་ལས་ལྷག་པ་མེད༔སྙིང་པོ་ཡི་གེ་དྲུག་པས་རིགས་ དྲུག་པས་རིགས་དྲུག་གི་སྐྱེ་སྒོ་གཅོད་པ་ཡིན༔ༀ་མ་ཎི་པདྨེ་ཧཱུྃ༔ ༀ་ཡེ་ཤེས་ལྔ་ལྡན་ལྷ་ཡི་ སྐྱབས༔ འཕོ་ལྟུང་ཞི་ནས་སྐྱེ་སྒོ་གཅོད༔ མ་སྙིང་རྗེ་ཆེན་པོ་ལྷ་མིན་སྐྱབས༔ འཐབ་རྩོད་ཞི་ ནས་སྐྱེ་སྒོ་གཅོད༔ ཎི་བྱམས་པ་ཆེན་པོ་མི་ཡི་སྐྱབས༔ འགྱུར་བ་ཞི་ནས་སྐྱེ་སྒོ་གཅོད༔ པད་ དགའ་བ་ཆེན་པོ་བྱོལ་སོང་སྐྱབས༔ གླེན་ལྐུགས་ཞི་ནས་སྐྱེ་སྒོ་གཅོད༔མེ་བཏང་སྙོམས་ཆེན་ པོ་ཡི་དྭགས་སྐྱབས༔ བཀྲེས་སྐོམ་ཞི་ནས་སྐྱེ་སྒོ་གཅོད༔ ཧཱུྃ་ཐུགས་རྗེ་ཆེན་པོ་དམྱལ་བའི་ སྐྱབས༔ ཚ་གྲང་ཞི་ནས་སྐྱེ་སྒོ་གཅོད༔ ཐུགས་རྗེ་ཆེན་པོའི་ལྟ་བ་དགོངས་པ་ཕྱོགས་མེད་ མཐའ་བྲལ༔ སྒོམ་པ་རང་གསལ་འཛིན་མེད༔ སྤྱོད་པ་མཉམ་པ་རིས་མེད༔ འབྲས་བུ་ཆོས་ སྐུ་འགྱུར་མེད༔ དམ་ཚིག་དྲི་མེད་རྣམ་དག༔ འཕྲིན་ལས་འགྲོ་དོན་ཕྱོགས་མེད༔ ཐུགས་རྗེ་ ཆེན་པོའི་ལྟ་དགོངས་ཡིན་ནོ༔ རང་གི་གྲོགས་སུ་དམ་པའོ་ཆོས་བཟང་བས་ཐུགས་རྗེ་ཆེན་ པོའི་ཆོས་ལ་མཆོད་ཅིག༔ སྐྱེལ་མར་དཀོན་མཆོག་གསུམ་བཟང་བས་དཀོན་མཆོག་གསུམ་ ལ་སྐྱབས་འགྲོ་རྒྱུན་མ་གཅོད་ཅིག༔ སུན་མར་བླ་མ་ཡི་དམ་མཁའ་འགྲོ་གསུམ་བཟང་བས་ གསོལ་བ་རྒྱུན་མ་ཆད་པར་ཐོབ་ཅིག༔ རྒྱབ་སྐྱོར་དུ་ལྟ་སྒོམ་སྤྱོད་པ་གསུམ་བཟང་བས་ ཉམས་སུ་ལོངས་ཤིག༔ སྡིག་པ་ཕྲ་མོ་ནས་སྤོངས་ཤིག་ཐིགས་པ་བསགས་པས་རྒྱ་མཚོ་ཙམ་ དུ་འགྲོའོ༔ དགེ་བ་ཕྲ་མོ་ནས་གྱིས་ཤིག་རི་རབ་འཆེན་པོ་ཡང་རྡུལ་ཕྲ་རབ་ནས་གྲུབ་བོ ༔ ཅི་བྱས་དགེ་བའི་རྩ་བ་བླ་མེད་བྱང་ཆུབ་ཏུ་བསྔོས་ཤིག༔ ཕྱིའི་རྒྱ་མཚོ་ལ་མཆིལ་མ་གཅིག་ བོར་བ་མི་འཛད་པ་ལྟར་ཡིན་ནོ༔ ཞེས་ཐུགས་རྗེ་ཆེན་པོའི་ཡང་སྙིང་༔ ༀ་མ་ཎི་པདྨེ་ཧཱུྃ༔ ཞེས་པ་འདི་བས་ལྷག་པ་མེད་དོ༔ བླ་ན་མེད་པའི་བྱང་ཆུབ་ཐོབ་པའི་སྙིང་པོ་མ་ནོར་བ་ ཡིན་ནོ༔ཞེས་སྤྲུལ་པའི་རྒྱལ་པོས་བོད་ཁམས་སྤྱི་ལ་གདམས་པའོ༔
༼མ་ཎི་བཀའ་འབུམ་ལས་བཤུས།༽
བསམ་ཚུལ་འབྲི།
དགོན་སྡེ་རྣམས་ལ་གཏམ་དུ་བྱ་བ།