འདོན་སྤེལ། 2017/04/6 9:24 AM རྩོམ་པ་པོ།

སྡེ་དགེའི་ཕོ་སར་ཞིག་ལ་ཁྲིམས་ཁང་གི་དྲུང་ཡིག་འོས་འདེམས་བྱུང་།

17792439_1438329902907340_625483847_n སྡེ་དགེ་བ་ཀརྨ་ལཊ་ཨ་རིའི་ཁྲིམས་ཁང་ཞིག་གི་དྲུང་ཡིག་ཆེན་མོར་འོས་འདེམས་བྱུང་། འདས་ལོའི་ཕྱི་ཟླ་ ༡༡ པའི་ནང་ཨ་རིའི་མངའ་སྡེ་ཨོ་ཧའོ་(Ohio)ཡི་རྫོང་ཆེ་ཤོས་ཧཱ་མིལ་ཊོན་(Hamilton)ཁྲིམས་ཁང་གི་དྲུང་ཡིག་ཆེན་མོ་འོས་འདེམས་ཀྱི་འགྲན་རྩོད་ཁྲོད། ཁམས་སྡེ་དགེ་ནས་ཡིན་པའི་ཨ་མ་ (Drenko)ལགས་ཀྱི་བུ་ཀརྨ་(Aftab Karma Singh Pureval )ལགས་ལ་རྒྱལ་ཁ་ཐོབ་ཡོད་པ་དང་། འདི་ལོའི་ཕྱི་ཟླ་དང་པོའི་ཚེས་ ༣ ཉིན་ཁོང་གིས་དངོས་སུ་དྲུང་ཡིག་ཆེན་མོའི་ལས་འཁུར་ཞུས་ཤིང་། ཁྲིམས་ཁང་གི་ལས་བྱེད་རྣམས་ལ་མཇལ་འཕྲད་དང་ལས་མི་གསར་འདེམས་བསྐོ་བཞག་སོགས་ཀྱི་ཕྱག་ལས་མགོ་བཙུགས་ཡོད་པ་དང་། ཁོང་གི་ལས་འཁུར་གྱི་ཉིན་དང་པོར་ཁྲིམས་ཁང་གི་ལས་གནས་གལ་ཆེན་ཁག་ཏུ་མི་གྲངས་ ༢༥༠ ལྷག་གིས་ལས་ཞུགས་ཀྱི་སྙན་ཞུ་ཕུལ་ཟིན་ཡོད་འདུག འདས་པའི་ལོ་ངོ་ ༡༠༠ ལྷག་རིང་ཧཱ་མིལ་ཊོན་ཁྲིམས་ཁང་གི་དྲུང་ཡིག་ཆེན་མོའི་ལས་གནས་དེ་ཨ་རིའི་སྤྱི་མཐུན་ཚོགས་པས་བསྟུན་མར་བཟུང་ཡོད་ཀྱང་། འདས་ལོའི་དྲུང་ཡིག་ཆེན་མོའི་འོས་བསྡུའི་ཁྲོད་སྤྱི་མཐུན་ཚོགས་པའི་འོས་མི་ལྕམ་ཊི་སི་ཝིན་ཁི་ལར་( Tracy Winkler) ལགས་ལ་འོས་གྲངས་ ༡༨༠,༤༣༡ དང་། དམངས་གཙོ་ཚོགས་པའི་འོས་མི་ཀརྨ་ལགས་ལ་འོས་གྲངས་ ༡༩༦,༥༥༢ ཐོབ་སྟེ། ཁུལ་དེའི་དམངས་གཙོ་ཚོགས་པར་ལོ་རྒྱུས་རང་བཞིན་ལྡན་པའི་རེ་བ་གསར་པ་ཞིག་བསྐྲུན་ཡོད་འདུག 17741156_1438329866240677_1419238498_n དྲུང་ཡིག་ཆེན་མོའི་ལས་འཁུར་གྱི་ཉིན་དང་པོའི་དགོང་མོར་ཀརྨ་ལགས་ཀྱིས་གསར་འགོད་པར། དེ་རིང་གི་ཉིན་མོ་འདི་ནི་བསམ་ཡུལ་ལས་འདས་པ་ཞིག་དང་། ཡིད་ཆེས་དཀའ་བའི་ཉམས་མྱོང་ཞིག་ཡིན་ལ། ང་ཚོའི་དགོངས་འཆར་དང་བྱ་བཞག་ལ་རྒྱལ་ཁ་ཐོབ་པའི་ཉིན་མོ་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། ང་ཚོར་སྤྱི་ཚོགས་ལ་ཆེས་ཕན་ནུས་ལྡན་པའི་བྱ་འགུལ་དང་དགོངས་འཆར་ལེགས་པོ་ཡོད་པ་མ་ཟད། ལས་ཀའི་ཐོག་སྔར་ལྷག་འབད་བརྩོན་བྱེད་པའི་ཆོད་སེམས་ལྡན་པ་བཅས་དྲིལ་བསྒྲགས་བྱེད་ཐབས་ཀྱིས་མི་མང་གི་སེམས་ལ་སྤྲོ་སྣང་བསྐྱེད་ཡོད་སྐོར་བརྗོད་འདུག ཁྲིམས་ཁང་གི་ཕྱག་ལས་གནང་ཕྱོགས་སྐོར་ལ་ཁོང་གིས། ཁྲིམས་ཀྱི་འཛིན་སྐྱོང་ཐད་དགའ་ཉེ་ཕྱོགས་ལྷུང་དང་ཆབ་སྲིད་དཔུང་རོགས་བྱེད་པའི་གནད་དོན་ཡོད་ཀྱང་། ཆབ་སྲིད་དཔུང་རོགས་ཀྱི་བྱ་སྤྱོད་འཁུར་ཏེ་ཁྲིམས་སྒྲིག་ལ་ཤུགས་རྐྱེན་བཟོས་པ་ཡིན་ན་ཁྲིམས་འགལ་ཚབས་ཆེན་ཡིན་ལ། ཁྲིམས་ཁང་དུ་མི་ཚང་མ་འདྲ་མཉམ་ཡིན་པ་ལས་མི་དེ་ག་འདྲ་ཡོད་པ་དང་གང་ནས་ཡིན་པ། དངུལ་ཡོད་མེད་སོགས་ཀྱི་ཁྱད་པར་གང་ཡང་མེད་སྐོར་དང་། ཁོང་གིས་དབུ་འཁྲིད་པའི་ཁྲིམས་ཁང་གི་འཛིན་སྐྱོང་གསར་པའི་ངོས་ནས་རྫོང་ཁྲིམས་ཁང་གི་འཕྲུལ་ལས་ཡར་རྒྱས་གཏོང་རྒྱུ་དང་། དྲང་བདེན་གྱི་ཁྲིམས་འཛིན་ལམ་ལུགས་ལག་བསྟར་བྱེད་པར་ནུས་པ་འདོན་རྒྱུ་ཡིན་སྐོར་སོགས་བརྗོད་འདུག ཁོང་གི་ཨ་མ་ (Drenko)ལགས་ཀྱིས་གསར་འགོད་པར། ང་ཚོ་བོད་ནས་ཡོང་བའི་བཙན་བྱོལ་བ་ཡིན་ཞིང་། ཕྱིས་སུ་ཨ་རིར་གནས་སྤོར་གྱིས་ད་ལྟ་བུ་ལ་དྲུང་ཡིག་ཆེན་མོའི་འོས་འདེམས་ཁྲོད་རྒྱལ་ཁ་ཐོབ་པར་ང་རང་དཔེ་དགའ་བོ་བྱུང་བ་མ་ཟད། བོད་མི་ཞིག་ཡིན་པའི་ཆ་ནས་སྤོབས་པ་ཆེན་པོ་སྐྱེས་བྱུང་། ང་གཅིག་པུར་དགའ་སྤོབས་བྱུང་བ་ཙམ་མིན་པར་བོད་མི་བཙན་བྱོལ་བ་ཨ་མ་ཞིག་གི་བུ་ལ་རྒྱལ་ཁ་འདི་འདྲ་ཐོབ་པར་བོད་མི་ཡོངས་རྫོགས་དགའ་སྤོབས་སྐྱེས་དགོས་པ་ཞིག་རེད་བསམ་གྱི་འདུག མ་འོངས་པར་ཁོས་བོད་ལ་རོགས་པ་བཟོ་ཐུབ་ན་དཔེ་ཡག་པོ་རེད། ཅེས་བརྗོད་འདུག ཀརྨ་ལགས་ཕྱི་ལོ་ ༡༩༨༢ ཟླ་ ༩ པའི་ཚེས་ ༩ ཉིན་ཨོ་ཧའོ་ཞེ་ནི་ཡ་( Xenia)གྲོང་ཁྱེར་དུ་སྐྱེས་ཡོད་པ་དང་། ཕ་ཌི་ཝིན་ཌིར་སིན་ (Devinder Singh)ལགས་དང་ཨ་མ་(Drenko)ལགས་ལ་བུ་གཉིས་ཡོད་པའི་ནང་ནས་ཀརྨ་ལགས་ཆེ་བ་དང་། ཆུང་བའི་མིང་ལ་ (Avid)ཟེར་གྱི་ཡོད་པ་རེད། ཀརྨ་ལགས་ཁྲིམས་ལུགས་རིག་པའི་བསླབ་པ་མཐར་ཕྱིན་རྗེས་ཆེད་ལས་ཁྲིམས་རྩོད་པའི་ཕྱག་ལས་གནང་ཡོད་པ་དང་། རང་ལོ་ ༣༤ སོན་པའི་ཁོང་ནི་ཆབ་སྲིད་ཀྱི་སྡིངས་ཆའི་ཐོག་ཨ་རིའི་དམངས་གཙོ་ཚོགས་པས་རེ་བ་ཆེན་པོ་རྒྱག་བཞིན་པའི་ན་གཞོན་ཞིག་ཡིན་འདུག

སྡེ་དགེ་རྒྱལ་ཡོངས་ལྷན་ཚོགས་ཀྱི་ལས་ཁུངས་ནས་བསྡུ་སྒྲིག་དང་འགྱུར་ཞུས་བྱས།

བསམ་ཚུལ་འབྲི།

' རྩོམ་འོག་མ།

ནེའུ་ཡོག་དུས་བབ་ཚགས་ཤོག་ནང་ཐོན་པའི་སྡེ་དགེའི་པར་ཁང་།

སྡེ་དགེའི་ཕོ་སར་ཞིག་ལ་ཁྲིམས་ཁང་གི་དྲུང་ཡིག་འོས་འདེམས་བྱུང་།

བསམ་ཚུལ་འབྲི།

འབྲེལ་ཡོད་ཀྱི་རྩོམ་གཞན།